Zjarri në Zhelinë është vendosur nën kontroll, kështu ka informuar Drejtori i Qendrës për Menaxhim me Kriza, Muhamet Ali.

Ai ka falenderuar të gjitha shërbimet për reagimin e plotë, teksa ka sqaruar se ekipet ende ndodhen në terren.

“Falë angazhimit të shpejtë dhe të koordinuar të të gjitha ekipeve dhe resurseve në terren, zjarri që shpërtheu në territorin e Komunës së Zhelinës dhe po lëvizte në drejtim të Erebinës, për momentin është vënë nën kontroll. Falënderim për të gjitha shërbimet e angazhuara për profesionalizmin dhe reagimin e shpejtë! Situata vazhdon të ndiqet me kujdes, ndërsa ekipet mbeten në terren deri në eliminimin e plotë të rrezikut nga riaktivizimi”, njofton Ali.

Kujtojmë se zjarri në Zhelinë u përhap sot pasdite, teksa kryetari i komunës Blerim Sejdiu tha se dyshojnë në zjarrvënie të qëllimshme.

The post Vendoset nën kontroll zjarri në Zhelinë appeared first on Telegrafi.

Gjermania planifikon të dërgojë një sistem të mbrojtjes ajrore Patriot në Ukrainë, por për dorëzimin dhe pranimin e tij do të duhen të paktën gjashtë deri në tetë muaj, raporton Bild, duke iu referuar burimeve nga qeveria gjermane.

Sipas planit fillestar, SHBA do të ridrejtonte një pjesë të rezervave të saj të mbrojtjes ajrore drejt Ukrainës, ndërsa Gjermania do të financonte zëvendësimin e tyre. Megjithatë, presidenti amerikan Donald Trump refuzoi të transferojë sisteme nga rezervat ushtarake. Si pasojë, vendet evropiane tani duhet të ofrojnë pajisje nga rezervat e veta dhe të porosisin zëvendësime nga prodhuesit amerikanë.

Thuhet se vetëm financimi i blerjes së armëve për Ukrainën nuk e zgjidh problemin. Shtetet evropiane duhet të shfrytëzojnë rezervat e tyre dhe të bëjnë porosi për t’i zëvendësuar ato tek prodhuesit në SHBA.

Bild raporton se aktualisht në Evropë ka mungesë të sistemeve të mbrojtjes ajrore. Prej disa ditësh po zhvillohen negociata të mbyllura se kush dhe në çfarë mënyre mund ta mbështesë Ukrainën.

Sipas të dhënave më të fundit, Zvicra është renditur më poshtë në listën e pritjes për marrjen e një sistemi Patriot, ndërsa njësia e parë nga kjo seri, e financuar nga Gjermania, do të dërgohet drejtpërdrejt në Ukrainë. Ndërkohë, sistemi është ende në prodhim nga kompania amerikane Raytheon dhe nuk do të jetë gati për dorëzim përpara gjashtë deri në tetë muajsh.

Të hënën, më 14 korrik, Trump njoftoi një marrëveshje me Sekretarin e Përgjithshëm të NATO-s, Mark Rutte, sipas së cilës vendet evropiane anëtare të NATO-s do të blejnë armë amerikane, përfshirë sistemet e avancuara Patriot, dhe do t’ia dorëzojnë ato Kievit.

SHBA gjithashtu po shqyrton shitjen e sistemeve Patriot nga rezervat e saj për Ukrainën, si pjesë e planit të ri të Trump, në të cilin aleatët evropianë do të blejnë armë amerikane për Kievin. /Telegrafi/

The post Sistemi Patriot do të arrijë brenda tetë muajve në Ukrainë appeared first on Telegrafi.

Manchester United ka shfaqur interes për të siguruar një zëvendësues për Marcus Rashfordin, vetëm pak orë pas lajmit se sulmuesi ka gjetur një skuadër tjetër. 

Rashford u huazua nga Manchester United te Aston Villa për pjesën e dytë të sezonit 2024/2025, pasi kishte prishur raportet me trajnerin Ruben Amorim. 

Fillimisht nuk ishte e qartë nëse marrëdhënia mes tij dhe klubit do të rregullohej pas rikthimit në ‘Old Trafford’. 

Megjithatë, bazuar në atmosferën në klub dhe në faktin që ai nuk u përfshi në skuadrën prej 29 lojtarësh për miqësoren me Leeds United në Suedi, duket se marrëdhënia nuk do të rindërtohet. 

Së fundi të shtunën, David Ornstein i The Athletic raportoi se Barcelona po përparon në formulimin e një marrëveshjeje për Rashford, përfshirë një huazim dhe një opsion blerjeje. 

Vetëm disa orë më vonë, filluan të qarkullonin raportime për alternativën e mundshme të tij. 

Sipas Footmercato, Newcastle dhe Man United janë në garë për sulmuesin e Paris Saint-Germain, Randal Kolo Muani, i cili kaloi pjesën e dytë të sezonit te Juventus, duke shkëlqyer me 10 gola dhe tri asistime në 22 paraqitje. 

26-vjeçari ka kontratë me PSG-në deri në qershor 2028, por mund të ketë vështirësi për një vend titullari me trajnerin Luis Enrique. 

Kolo-Muani u transferua te PSG në vitin 2023 për një marrëveshje me vlerë 76.4 milionë euro, por deri më tani nuk ka arritur të përmbushë pritshmëritë në kryeqytetin francez./Telegrafi/

The post Man Utd nis menjëherë bisedimet me yllin francez pas largimit të Rashford appeared first on Telegrafi.

Një 32-vjeçar ka humbur jetën pasditen e sotme teksa po montonte disa skela në shëtitoren e plazhit të Shëngjinit pranë bustit “Willson”.

Sipas policisë, sot rreth orës 16:45 dyshohet se 32-vjeçari me iniciale Z.L ka rënë nga lartësia si pasojë e kontaktit me rrymën dhe ka humbur jetën.

Ndërkaq, grupi hetimor ndodhet në vendngjarje dhe po punon për sqarimin e plotë të rrethanave të ngjarjes.

“Rreth orës 16:45, në shëtitoren e plazhit të Shëngjinit, pranë bustit “Ëillson”, dyshohet se, si pasojë e kontaktit me rrymën elektrike, ka rënë nga lartësia e një skele dhe ka humbur jetën shtetasi Z. L., 32 vjeç, banues në fshatin Mërqi, Lezhë. Grupi hetimor ndodhet në vendngjarje dhe po punon për sqarimin e plotë të rrethanave të ngjarjes”, thuhet në njoftimin e policisë./rtsh/

The post Humb jetën 32-vjeçari në Shëngjin, ra në kontakt me rrymën dhe pastaj u rrëzua nga skelet appeared first on Telegrafi.

Ministria e Mbrojtjes së Shqipërisë ka njoftuar se efektivët e Batalionit Komando, pjesë e Misionit KFOR 07 në Komandën Rajonale Perëndimore po stërviten në Pejë.

“Efektivët e Batalionit Komando, pjesë e Misionit KFOR 07 në Komandën Rajonale Perëndimore (RC-ë), vazhdojnë të tregojnë profesionalizëm dhe përkushtim jo vetëm në përmbushjen e detyrave operacionale, por edhe në stërvitjet e përbashkëta me aleatët tanë të NATO-s”, thuhet në postimin e Ministrisë së Mbrojtjes në Facebook.

Stërvitja HELI MEDEVAC, ishte e fokusuar në evakuimin mjekësor ajror. /Telegrafi/

The post Forcat shqiptare të KFOR-it në stërvitje të përbashkët me NATO-n në Pejë appeared first on Telegrafi.

Llapi po tregohet jashtëzakonisht aktiv në këtë afat kalimtar, duke vazhduar të ndërtojë skuadrën për edicionin e ri të Superligës së Kosovës.

Bardhekaltërit kanë zyrtarizuar dy përforcime të reja në repartin defansiv: rikthimin e ish-kapitenit Bujar Idrizi dhe nënshkrimin me mbrojtësin e ri Fuad Ajvazi.

Rikthimi i liderit

Pas dy vite e gjysmë në futbollin gjerman me FC Kosova Düsseldorf, Bujar Idrizi rikthehet te Llapi, aty ku ka lënë gjurmë si një ndër figurat kryesore të suksesit në vitet e fundit. Mbrojtësi i qendrës dhe i krahut të djathtë ka qenë pjesë e skuadrës që fitoi dy herë Kupën e Kosovës dhe një herë Superkupën, në sezonet 2020/21 dhe 2021/22.

Klubi e cilëson rikthimin e tij si një hap strategjik, jo vetëm për të forcuar repartin mbrojtës, por edhe për të rikthyer në skuadër një lider me përvojë, i cili do të udhëheqë grupin drejt objektivave të reja.

Një rikthim tjetër, këtë herë nga Suhareka

Llapi gjithashtu ka konfirmuar afrimin e Fuad Ajvazit, një tjetër mbrojtës që i bashkohet skuadrës. 20-vjeçari rikthehet në Podujevë, pasi më parë ishte pjesë e grupmoshave të reja të klubit (U21). Sezonin e fundit, Ajvazi luajti për Suharekën në elitën e futbollit kosovar, por skuadra e tij e kaluar nuk arriti të mbijetonte në Superligë.

Ajvazi ka eksperiencë edhe jashtë vendit, pasi ka qenë pjesë e ekipit suedez IF Karlstad, një tjetër element që e bën një prurje të rëndësishme për të ardhmen e Llapit.

Synimet e Llapit për sezonin e ri

Me këto dy përforcime, Llapi konfirmon ambiciet për sezonin 2025/26, duke synuar jo vetëm garën për trofe, por edhe rikthimin në garat evropiane. Drejtuesit e klubit janë të vendosur të sjellin cilësi dhe përvojë në skuadër, ndërsa merkatoja pritet të vazhdojë me emra të tjerë gjatë ditëve në vijim. /Telegrafi/

The post Llapi vazhdon përforcimet: Rikthehet Bujar Idrizi, firmos edhe Fuad Ajvazi appeared first on Telegrafi.

Përballja mes Oleksandr Usyk dhe Daniel Dubois për titullin e padiskutueshëm të peshave të rënda do të zhvillohet në stadiumin legjendar Wembley, përpara mbi 90 mijë tifozëve.

Të dy boksierët kanë kryer tashmë peshimin zyrtar, duke konfirmuar gatishmërinë për sfidën e madhe që do të vendosë kampionin absolut të botës.

Në peshimin zyrtar, Daniel Dubois regjistroi 110.5 kg, ndërsa Usyk peshonte 103.1 kg.

Kjo diferencë prej mbi 7 kilogramësh tregon qartë strategjinë e Dubois për të përdorur fuqinë fizike dhe goditjet e rënda, ndërkohë që Usyk mbetet në parametrat e tij të zakonshëm, duke besuar te shpejtësia, teknika dhe rezistenca.

Në përballjen e parë mes tyre, zhvilluar në gusht të vitit 2023 në Wroclaw të Polonisë, Usyk fitoi me nokaut teknik në raundin e nëntë. Ajo ishte humbja e dytë në karrierë për Dubois, i cili aktualisht ka një bilanc prej 22 fitore dhe 2 humbje (21 fitore me nokaut).

Usyk mbetet i pamposhtur me 23 fitore në 23 ndeshje, duke përfshirë edhe suksesin e bujshëm ndaj Tyson Furyt.

Edhe pse Dubois ka avantazh në peshë dhe gjatësi – është 196 cm i gjatë krahasuar me 191 cm të Usyk – ekspertët e shohin përsëri ukrainasin si favorit.

Të dy boksierët kanë të njëjtën shtrirje të krahëve (198 cm), por Usyk konsiderohet më i përgatitur teknikisht dhe më elastik në ring.

Sipas parashikimeve nga mediat britanike, Usyk ka shanse më të larta për fitore. Fitorja e tij vlerësohet me koeficient 1.33, ndërsa triumfi i Dubois kuotohet me 3.72.

Mundësia që Usyk ta fitojë duelin me nokaut, nokaut teknik ose diskualifikim është vlerësuar me 2.30, ndërsa për Dubois kjo shifër është 4.75.

Kjo përballje pritet të përcaktojë kampionin e padiskutueshëm në peshat e rënda, duke bashkuar të gjithë titujt kryesorë të boksit profesionist: WBA, WBC, WBO, IBF dhe The Ring Magazine.

Sfida konsiderohet si një nga më të rëndësishmet në historinë moderne të boksit, me Usyk që kërkon të vazhdojë dominimin dhe Dubois që shpreson ta befasojë botën me një rikthim të madh. /Telegrafi/

The post Bota e boksit përballet sot me një moment elektrizues: Parashikohet fituesi i mega-duelit, Usyk – Dubois appeared first on Telegrafi.

Opozitarja LSDM ka reaguar ndaj Projektligjit të ri të Policisë të propozuar nga Ministri i Punëve të Brendshme, Pançe Toshkovski, i cili është vënë në procedurë parlamentare.

Zëdhënësja e LSDM-së, Bogdanka Kuzeska, tha se ky projektligj hap rrugë për emërime partiake dhe politizim të plotë të MPB-së.

“Ky projektligj i paprecedent dhe skandaloz përfaqëson një lëvizjeve tjetër të rrezikshme dhe anti-shtetërore nga Toshkovski. Ministri po synon të zbatojë një partizanizim të plotë të policisë duke çmontuar sistemin e karrierës dhe profesionalizmit. Ministri po i ul pa turp të gjitha kriteret dhe standardet për punonjësit e policisë, me qëllim që të krijojë një sistem për pushtimin e Ministrisë së Brendshme përmes xhelatëve të partisë”, tha Kuzeska.

Ajo shtoi se sistemi i MPB-së po tentohet të shkaterrohet, teksa do të amnistohen edhe personat e dënuar.

“Po shuhen Qendrat Rajonale për Kufirin, duke dobësuar kontrollin kufitar. Po planifikohet fshirja e të dhënave nga sistemet e policisë. Po rritet kufiri i moshës për punësim, duke përjashtuar profesionistët e rinj. Po fshihet neni 19, që lejon amnistinë e personave të dënuar brenda sistemit”, tha Kuzeska.

Kuzeska tha se me këto veprime Toshkovski po e shndërron MPB-në në një milici partiake që vetëm në shërbim të qytetarëve nuk do të jetë.

The post Kuzeska: Toshkovski po tenton të bëjë politizim të plotë të MPB-së, po i ul të gjitha kriteret dhe po shkatërron gjithçka appeared first on Telegrafi.

Tifozët e Manchester United kanë shprehur shqetësim lidhur me propozimet për stadiumin e ri, të cilat përfshijnë deri në 40 për qind të vendeve të dedikuara për tribunat VIP dhe shërbimet luksoze. 

United ka zhvilluar takime të vogla me tifozët për të diskutuar planet e mundshme për stadiumin e ri me kapacitet 100,000 ulëse, i cili u njoftua në muajin mars. 

Një tifoz i njohur i klubit ka zbuluar disa nga idetë që janë diskutuar në këto takime.  

Sipas një postimi të ti në platformën X, tifozi i cili ka biseduar me persona që ishin të pranishëm, tha se janë përmendur propozime si: pagesa paraprake për bileta sezonale 15-vjeçare dhe një model i biletës sezonale me përfitime të veçanta. 

A few weeks ago, United invited supporters to apply to take part in discussions about the proposed new stadium. This week, those sessions were held with the selected participants — and some interesting details have started to emerge.

It seems attendance at the sessions was quite…

— Cheeses Of Nazareth (@OhCheesesChrist) July 18, 2025

Gjithashtu janë shqyrtuar edhe plane për të dedikuar deri në 40 për qind të kapacitetit për tribunat luksoze dhe për të krijuar një përvojë “në stil amerikan” në ditën e ndeshjes, si bare me ekrane rrethore 360 gradë dhe shumë pika të vogla për shitje të mallrave zyrtare përreth stadiumit. 

Përfaqësues të klubit thanë në këto takime se ende shpresojnë që stadiumi i ri, i cili pritet të kushtojë dy miliardë euro, të jetë i hapur deri në vitin 2030. 

Në fillim të këtij muaji, klubi deklaroi se synon që stadiumi i ri të jetë nikoqir i finales së Kupës së Botës për Femra në vitin 2035, e cila pritet të mbahet në Mbretërinë e Bashkuar./Telegrafi/

The post Publikohen detaje shokuese rreth stadiumit të ri të Man Utd – tifozët mbesin të shqetësuar appeared first on Telegrafi.

Situata me zjarret mbetet ende problematike në vendin tonë. 20 vatra zjarri janë raportuar gjatë 24 orëve të fundit. 4 prej tyre vijojnë të jenë ende aktive.

Në zonën e quajtur “Liqeni i Luleve”, pjesë e Parkut Kombëtar të Lurës janë dy vatra zjarri, njëra po zhvillohet në drejtim të Lurës, ndërsa tjetra nga krahu i Malit të Dejës.

Në zonën e “Malit të Peladhisë”, pjesë e Bashkisë Bulqizë është aktive një tjetër vatër zjarri e zhvendosur në lartësinë mbi fshatin Krajkë, e cila është në terren të vështirë.

Në fshatin Drenovë, bashkia Mallakastër, vijon aktive vatra e zjarrit të rënë në një sipërfaqe me shkurre, ferra dhe pyll pishe, midis kufirit ndarës të fshatit Drenovë, Belishovë, dhe fshatit Gorishovë.

Në fshatin Borsh, bashkia Himarë, mbrëmjen e së premtes vatra e zjarrit është riaktivizuar. Gjatë natës efektivët kanë qëndruar në vendngjarje për të monitoruar situatën, por mëngjesin e së shtunës vatra e zjarrit është riaktivizuar përsëri, në një sipërfaqe me shkurre pranë banesave, e cila vështirëson ndërhyrjen, pasi është terren i vështirë.

52 hektarë me shkurre dhe bimësi, si dhe rreth 90 rrënjë ullinj janë djegur si pasojë e zjarreve që kanë përfshirë vendin tonë në 24 orët e fundit.

Për shuarjen e zjarreve u angazhuan 32 automjete zjarrfikëse dhe 275 forca operacionale.

Agjencia Kombëtare e Mbrojtjes Civile iu bëjnë thirrje të gjithë qytetarëve që të shmangin çdo veprim që mund të shkaktojë zjarr dhe të njoftojnë menjëherë shërbimet emergjente në rast se konstatojnë një vatër zjarri./tch/

The post Zjarret në Shqipëri – 4 vatra ende aktive, dëme të mëdha në pyje dhe ullishte appeared first on Telegrafi.

Ka disa zakone të tmerrshme që janë mbajtur në hareme dhe sulltanët i kanë ndëshkuar ashpër robëreshat

Haremet e Perandorisë Osmane kanë qenë gjithmonë të rrethuara nga mite dhe legjenda. Ato janë konsideruar si oaza luksi, ku gratë jetonin me bollëk, por realiteti ka qenë shumë më i errët.

Brenda mureve të haremit janë fshehur intriga, mizori dhe rituale që mund të trembnin këdo. Le të hedhim një vështrim në tetë nga zakonet dhe traditat më rrëqethëse që kanë ekzistuar në këto cepa të fshehur të botës.

1. Kastrimi i eunukëve: dhimbje, rërë dhe mbijetesë

Eunukët, figurat kryesore në harem, i janë nënshtruar disa prej operacioneve më brutale. Ata kastrroheshin në moshë të vogël për të përjashtuar mundësinë e kontakteve me gratë e haremit. Vetë procesi ishte jashtëzakonisht i dhimbshëm dhe i rrezikshëm. Operacioni u kryhej djemve para pubertetit. Për të ndalur gjakderdhjen, plagët mbuloheshin me rërë të nxehtë. Kjo praktikë rriste rrezikun e infeksioneve dhe vdekjes, por ata që mbijetonin bëheshin kujdestarë të haremit. Eunukët ishin shumë të vlerësuar në tregje dhe bliheshin lehtësisht, jo vetëm për pallatin e sulltanit, por edhe për shtëpitë e të pasurve të Perandorisë Osmane, të cilët donin t’i ngjanin sadopak sulltanit. Nëse mjeku dyshonte në cilësinë e kastrimit, ai mund ta përsëriste atë! Është interesante se tredhja ishte e ndaluar me ligj islam, por kjo nuk e pengonte përdorimin masiv të eunukëve “të gatshëm”. Një shembull i hipokrizisë së asaj kohe, transmeton Telegrafi.

2. “Shtëpia e shpendëve”: lufta kundër helmit dhe frika nga tradhtia

Ushqimi i sulltanit kontrollohej gjithmonë për praninë e helmit, pasi helmimi ishte një mënyrë e zakonshme për të eliminuar armiqtë. Brenda Pallatit Topkapi ekzistonte një e ashtuquajtur Shtëpi Zogjsh (Kushkhane), ku përgatitej ushqimi ekskluzivisht për sulltanin. Atje, shijuesit rrezikonin jetën duke provuar çdo pjatë. Pas kësaj, ushqimi “vulosej” dhe dërgohej në tryezën e sulltanit. Çdo shërbëtor ishte gati të jepte jetën për ta mbrojtur sulltanin nga tradhtia e oborrit të tij. Ndërkohë, askush nuk shqetësohej shumë për ushqimin e grave të tij…

3. Dasmat si mjet poshtërimi

Gratë e haremit të sulltanit, pas nëntë vitesh jete në pallat, mund të aplikonin për… martesë. Por jo për t’u martuar me sulltanin, sigurisht, por me ndonjë burrë tjetër, shpesh të afërt me pallatin. Kjo vlente për ato zonja që nuk kishin sjellë në jetë fëmijë të sulltanit dhe nuk i interesonin më si partnere.

Thuhet se një “dhuratë” e tillë (gruaja nga haremi) ishte e dëshirueshme për çdo zyrtar. Megjithatë, shpesh ndodhnin situata të pakëndshme… Sipas zakonit, dhëndri nuk e shihte nusen para martesës, ndaj, nëse zhgënjehej nga pamja e saj, mund ta refuzonte. Madje menjëherë, në dasmë!

Për vajzën kjo nënkuptonte turp për gjithë jetën. Refuzimi shpallej publikisht dhe ajo mund të dërgohej në një pjesë të largët të haremit ose të dëbohej. Fatkeqet nuk kishin ku të shkonin. E vetmja zgjidhje ishte të ktheheshin në harem, ku i priste tallja.

4. Ritet e ushqimit

Ushqimi ishte një rit i vërtetë. Në harem, të ngrënët nuk ishte vetëm kënaqësi, por edhe pjesë e rëndësishme e kulturës. Gratë hanin vetëm me dorën e djathtë dhe rreptësishtë me tre gishta, që të mos ndotnin pjesën tjetër të dorës. Nëse dikush i shkelte këto rregulla dhe, mos o Zot, hante me dorën e majtë (e cila konsiderohej “e ndotur”), kjo shihej si shkelje e rëndë e etiketës. Për këtë, eprorët mund të ndëshkonin të “nënshtruarat”.

5. Dënimi me mbytje

Dënimi më i ashpër për gratë e fajshme të haremit ishte mbytja. Gratë e akuzuara për tradhti ose krime të rënda futeshin në thasë dhe mbyteshin në Bosfor.

Kjo praktikë shërbente jo vetëm si ndëshkim, por edhe si paralajmërim për banorët e tjerë të haremit. Shumë prej tyre kishin frikë edhe nga vetë përmendja e shkeljes së rregullave, nga frika se mos përfundonin njësoj.

Ka të dhëna se sulltani Ibrahim I urdhëroi mbytjen e të gjithë haremit të tij, që përbëhej nga 280 gra, sepse njëra prej tyre u akuzua për tradhti! Sigurisht, kjo mund të jetë legjendë, por përsëri…

6. Argëtime të çuditshme

Gratë e zakonshme të haremit nuk mund të merrnin pjesë në festat madhështore, si rrethprerja e princit apo martesa e vajzës së sulltanit. Festat e tyre mbeteshin të fshehura nga sytë e të tjerëve dhe roli i tyre ishte vetëm të argëtonin sulltanin.

Në serialin “Epoka e Lavdishme” është treguar se ato thjesht kërcenin dhe luanin instrumente muzikore, por shumë sulltanë osmanë dëshironin argëtim më të sofistikuar. Duke ditur që të gjitha këto gra ëndërronin të bëheshin të preferuarat e tij, atyre u organizoheshin “prova speciale”. Për shembull, duhej të kërcenin derisa të prekeshin me dorë një sferë kristali të varur në tavan, ose të zvarriteshin mbi një trarë druri mbi pishinë, pa u lagur. Apo të mblidhnin perla që qëllimisht hidheshin në fund të pishinës. Secila tregonte se në çfarë ishte më e zonja.

7. Jeta pas hekurave

Gratë e haremit nuk kishin të drejtë të dilnin lirisht nga dhomat e tyre. Botën jashtë e shikonin përmes grilave të dritareve ose shëtisnin vetëm në hapësira të kufizuara të pallatit. Si të burgosura, gjithçka funksiononte me regjim të rreptë.

Për shumë gra që kishin lindur të lira në vende jo myslimane, ky burg u bë një torturë. Bota jashtë ishte e paarritshme, ndërsa jeta e tyre kufizohej në intriga dhe shërbim ndaj sulltanit.

8. Kodi i rreptë i veshjes

Veshja kishte rol të madh në harem. Çdo ngjyrë dhe stil tregonin statusin e gruas. Të preferuarat e sulltanit vishnin rroba të çmuara me ngjyra të ndezura, ndërsa banoret e reja të haremit mjaftoheshin me veshje modeste dhe ngjyra të zbehta.

Nëse një vajzë “me rang më të ulët” vishte rroba apo stoli të destinuara për të preferuarat, mund të ndëshkohej. Shkelja e kodit të veshjes shihej si sfidë ndaj hierarkisë së vendosur. /Telegrafi/

The post Çfarë fshihnin vërtet haremet? Tetë rregulla mizore për robëreshat appeared first on Telegrafi.

Oleksandr Usyk dhe Daniel Dubois janë gati për përballjen e shumëpritur në peshat e rënda, e cila do të zhvillohet në stadiumin Wembley të Londrës më 20 korrik.

Dy boksierët do të luftojnë për titullin e padiskutueshëm të botës, në një sfidë ku në lojë janë rripat WBA (Super), WBO, WBC, IBF dhe The Ring Magazine.

Në duelin e parë mes tyre, që u zhvillua në gusht 2023 në Poloni, Usyk mposhti Dubois-in me nokaut teknik në raundin e nëntë.

Por këtë herë, Dubois – tani me avantazhin e të luftuarit në vendlindjen e tij, Londër – shpreson të përmbysë gjithçka, i mbështetur nga një publik vendas që pritet të jetë në anën e tij.

Për Usyk, 38-vjeçar, kjo do të jetë një tjetër mundësi për të mbrojtur rekordin e tij të pamposhtur prej 23 fitoreve (14 me nokaut).

Ndërkohë, Dubois, me një rekord prej 22 fitoreve dhe 2 humbjeve, ka fituar tri ndeshje radhazi me nokaut që nga disfata ndaj Usyk, përfshirë suksese ndaj Jarrell Miller, Filip Hrgovic dhe Anthony Joshua.

Lexo po ashtu: Konfirmohet ora e saktë për duelin historik të boksit, Usyk – Dubois

Në konferencën për shtyp para ndeshjes, Usyk minimizoi shqetësimet për moshën e tij, duke deklaruar: “Unë e respektoj Dubois-in. Ai është i motivuar, por edhe unë jam. 38 vjeç nuk është shumë. Do ta shohim në ring.”

Nga ana tjetër, Dubois është shprehur i vendosur për të ndryshuar fatin: “Do ta shkruaj skenarin tim. Ata kanë skenarin e tyre, por unë dua të jem ai që fiton rripat dhe luan rolin kryesor.”

Megjithatë, përpara se të ngjiten në ring, dy boksierët duhet të respektojnë disa rregulla të natës së ndeshjes, përfshirë një detaj të vogël por të rëndësishëm të përgatitjes së dorës.

Ish-kampioni i botës në peshat super të mesme, Carl Froch, ka theksuar për DAZN një rregull pak të njohur: “Në natën e ndeshjes, shiritat mbrojtës të duarve nuk mund të mbështillen rreth kyçit të dorës si në stërvitje. Ata duhet të vendosen vetëm mbi nyjat e gishtave, sipas rregullave të federatës”.

Gjithashtu, gjyqtarët zakonisht udhëzojnë boksierët para ndeshjes për sjelljen gjatë përballjes, duke i paralajmëruar për kapjet, goditjet e ndaluara dhe respektimin e komandave të tyre.

Nëse një boksier injoron udhëzimet e gjyqtarit, mund të rrezikojë penalizim ose edhe ndaljen e ndeshjes.

Dueli Usyk-Dubois 2 pritet të jetë një nga përballjet më të mëdha të vitit, me sytë e botës së boksit të përqendruar në Wembley për të parë kush do të shkruajë historinë këtë herë. /Telegrafi/

The post Usyk dhe Dubois rikthehen në ring: Dueli i dytë me një rregull pak të njohur që mund të ndikojë në ndeshje appeared first on Telegrafi.

A keni dëshiruar ndonjëherë të flisni me dikë më me përvojë për problemet tuaja, ose t’i kërkoni atij t’ju përgatisë një vakt të shijshëm të gatuar në shtëpi?

Epo, për këtë shërben shërbimi OK Grandma i Japonisë!

Client Services është një kompani japoneze që specializohet në një gamë të gjerë shërbimesh komoditeti, nga shërbimet e pastrimit dhe strehimit deri te shërbimet e kujdesit për fëmijët dhe kujdesit për kafshët shtëpiake.

Megjithatë, janë shërbimet e tyre unike që i bëjnë njerëzit të flasin për to, përcjell Telegrafi.

Këta njerëz mund të kenë dikë që të marrë pjesë në evente në emrin tuaj, të kërkojë falje në emrin tuaj dhe madje të lërë punën tuaj në mënyrë që të mos keni nevojë të merreni me sikletin e situatës.

Një nga ofertat e tyre më të njohura është shërbimi OK Grandma, i cili i lejon kujtdo të marrë me qira një grua të moshuar midis moshës 60 dhe 94 vjeç.

OK Grandma, e njohur edhe si OK Oppa-Chan, u lansua në vitin 2012, dy vjet pas themelimit të kompanisë dhe është ende një nga shërbimet më të njohura.

Më shumë se 100 të moshuar të punësuar kanë përvoja dhe pasione të pasura jetësore dhe besojnë se ende kanë shumë për të kontribuar në shoqëri, nga aftësitë ndërpersonale te gatimi ose thjesht ofrimi i shoqërisë dikujt në nevojë.

Për të marrë me qira një gjyshe, klientët duhet të paguajnë tarifën bazë prej 23 dollarë, plus çdo tarifë transporti, dhe janë përgjegjës për shpenzimet e nevojshme të gjyshes gjatë kohës që kalojnë së bashku. /Telegrafi/

The post Në Japoni, mund të marrësh me qira një gjyshe appeared first on Telegrafi.

Ndërsa temperaturat u rritën në Afganistanin jugor, shoferët e taksive në Kandahar dolën me një zgjidhje unike për të shpëtuar veten dhe pasagjerët e tyre nga nxehtësia e padurueshme.

Afganistani, një nga vendet më të varfra në botë, është gjithashtu ndër më të prekshmit ndaj ndikimit të ndryshimeve klimatike.

Vendi është lënë jashtë bisedimeve të Kombeve të Bashkuara për klimën që kur talebanët morën pushtetin në gusht 2021, pasi forcat e udhëhequra nga SHBA u larguan nga vendi.

Shoferët e taksive ankohen se është bërë jashtëzakonisht vapë në tre-katër vitet e fundit.

Kondicionerët në Corollat e vjetra kryesisht nuk funksionojnë dhe riparimet janë shumë të shtrenjta.

Megjithatë, slogani “bëj si të duash” i dha jetë kondicionerëve të punuar me dorë.

Më e rëndësishmja, pasagjerët nuk ankohen.

Shoferët e taksive në Kandahar kanë gjetur një zgjidhje unike për të shpëtuar veten dhe pasagjerët e tyre nga nxehtësia përvëluese dhe e padurueshme.

Ata përdorin sisteme ftohjeje të punuara me dorë për të luftuar nxehtësinë.

Taksitë tani kanë një kondicioner të lidhur në çati me një tub shkarkimi që sjell ajër të freskët përmes dritares së pasagjerit.

Problemi i vetëm me këtë improvizim është nevoja për të mbushur manualisht ujin në njësi dy herë në ditë. /Telegrafi/

The post Ja si po i bëjnë ballë vapës shoferët afganë appeared first on Telegrafi.

Prodhuesi i ChatGPT, OpenAI po lanson një fond prej 50 milionë dollarësh për të mbështetur organizatat jofitimprurëse dhe të komunitetit.

Fondi është veprimi i parë pas një raporti rekomandimesh nga komisioni jofitimprurës i kompanisë me bazë në San Francisko.

OpenAI ka punuar për të rinovuar strukturën e saj të korporatës, për të cilën thotë se është e nevojshme për të vazhduar rritjen e shumave masive të kapitalit të nevojshëm për të qëndruar konkurrues në garën e AI, një lëvizje që po përpiqet të balancojë me misionin e saj themelues, si një organizatë jofitimprurëse, për të zhvilluar AI për të mirën publike, shkruan Reuters.

Aktualisht, krahu i saj jofitimprurës zotëron dhe kontrollon krahun fitimprurës dhe OpenAI planifikon ta shndërrojë njësinë ekonomike fitimprurëse në një korporatë me përfitim publik, në të cilën shoqëria mëmë jofitimprurëse do të bëhej aksioner.

Ndryshe, komisioni jofitimprurës u krijua si pjesë e përpjekjeve të OpenAI për të treguar se mund të qëndrojë besnik ndaj misionit të tij themelues, pavarësisht rinovimit të korporatës.

OpenAI tha se fondi do të lehtësojë partneritetet për të zbatuar AI në sektorë të tillë si arsimi, mundësitë ekonomike, organizimi i komunitetit dhe kujdesi shëndetësor.

Ai gjithashtu do të mbështesë kërkimin dhe inovacionin e udhëhequr nga komuniteti të fokusuar në përdorimin e AI për të mirën publike. /Telegrafi/

The post OpenAI lanson fondin prej 50 milionë dollarësh për të mbështetur organizatat jofitimprurëse appeared first on Telegrafi.

Këtë verë, Kulla Varso 53-katëshe në Varshavë do të hapë një platformë vëzhgimi në një lartësi prej 230 metrash, duke ofruar pamje të qiellit nën re nga ndërtesa më e lartë në Bashkimin Evropian.

E quajtur Highline Warsaw, atraksioni më i ri dhe më i lartë i Varshavës do të ketë një tarracë në çati dhe një bar vetëm pak metra poshtë platformës kryesore të vëzhgimit, si dhe një qendër përvojash me panorama virtuale dhe detaje rreth historisë së qytetit.

Data e saktë e hapjes nuk është njoftuar ende, por menagjeri i marketingut të kompanisë deklaroi se ata janë në një fazë intensive përgatitjeje dhe aktualisht po planifikojnë të hapen në gusht.

Observatori dhe qendra e përvojës do të operohet nga Magnicity, një kompani që operon observatorë në disa qytete të mëdha, duke përfshirë Parisin, Roterdamin, Chicagon dhe Berlinin.

E përfunduar në vitin 2022, Kulla Varso me lartësi 310 metra ndodhet në qendër të Varshavës, pranë Pallatit të famshëm të Kulturës dhe Shkencës, i cili me 237 metra ishte ndërtesa më e lartë në Poloni deri në ndërtimin e rrokaqiellit të ri.

Pallati i Kulturës dhe Shkencës ka gjithashtu një platformë shikimi në një lartësi prej 130 metrash. /Telegrafi/

The post Tani mund ta shikoni Evropën nga 230 metra lartësi – nga maja e ndërtesës më të lartë në kontinent appeared first on Telegrafi.

Fenerbahce ka intensifikuar përpjekjet për të siguruar shërbimet e Granit Xhakës, duke iu bashkuar garës së nisur nga Sunderland, Inter dhe Milan për nënshkrim me mesfushorin shqiptar, sipas një raportimi nga gazetari Ekrem Konur. 

 Gjigantët turq kanë nisur kontakte me përfaqësuesit e lojtarit, duke shpresuar t’i ofrojnë një rol kyç në planet e tyre për mesfushën. 

Megjithatë, Bayer Leverkusen mbeten të palëkundur në pozicionin e tyre. Xhaka nuk do të lirohet përveç nëse paguhet plotësisht shuma e kërkuar prej 8 milionë eurosh.  

Kampionët e Bundesligës për sezonin 2023/24 nuk ndihen të detyruar ta shesin, ndërsa 31-vjeçari ka ende kohë të mbetur në kontratë. 

#Leverkusen
Fenerbahçe are competing with Sunderland, Inter Milan, AC Milan and Neom SC to sign Granit Xhaka.

Leverkusen will not allow Xhaka to leave without the price tag they have set for him being paid. pic.twitter.com/LH7ie7whiR

— Ekrem KONUR (@Ekremkonur) July 19, 2025

Sunderland konsiderohet se është kandidati më serioz, teksa raportimet sugjerojnë se ata janë gati të plotësojnë kërkesat e Leverkusen dhe t’i ofrojnë Xhakës një rol udhëheqës në rikthimin e tyre në Ligën Premier. 

 Ndërkaq, të dy klubet nga Milano kanë kryer hapat e parë në negociata, por asnjëra prej tyre nuk ka çuar më tej bisedimet deri tani. 

Me Neom SC që zyrtarisht u tërhoq nga negociatat më parë gjatë kësaj jave, garës për nënshkrimin e Xhakës duket se do t’i mbeten klubet evropiane.  

Lojtari mbetet i hapur për një transferim, megjithatë raportohet se po e shqyrton me kujdes çdo opsion, përfshirë mundësinë e rinegocimit të kushteve dhe qëndrimit te Leverkusen./Telegrafi/

The post Ndizet gara për nënshkrimin me Granit Xhakën – pjesë e saj bëhet edhe gjiganti turk appeared first on Telegrafi.

Në shuarjen e zjarrit mes Zhelinës dhe Erebinës, me të cilin janë përfshirë vetegjetacioni dhe shkurre e thatë, janë kyçur dy aeroplanë “Er traktor”, njoftoi Drejtoria për Mbrojtje dhe Shpëtim.

Lexo po ashtu Zjarr i madh në Zhelinë, mbyllet rruga rajonale Shkup-Tetovë

Në terren tashmë po veprohet me një helikopter ushtarak, një kamion policie MAN me një cisternë tetë tonëshe dhe një top uji, dy pinzgauerë, një “Hermelin”, 30 ushtarë dhe disa ekipe të Brigadës së Mbrojtjes nga Zjarri të Shkupit së bashku me zjarrfikësit nga NJTZ të Tetovës.

Siç njoftoi paraprakisht LAMM, për shkak të zjarrit në orën 13:15, rruga rajonale Tetovë – Shkup nga mbikalimi Dobarski deri te pompa e benzinës “Xhezo Petrol” është e mbyllur për komunikacion. Komunikacioni po devijohet përgjatë autostradës Tetovë-Shkup-Tetovë pranë fshatit Grupçin dhe fshatit Zhelinë.

Gjatë ditës së sotme, deri në orën 14, në territorin e shtetit janë regjistruar gjithsej 11 zjarre në ambient të hapur, nga të cilat gjashtë janë aktive, tre janë nën kontroll dhe tre janë shuar.

Lexo po ashtu Zjarri në Zhelinë, Sejdiu: Dyshojmë se është shkaktuar qëllimisht

Përveç zjarrit në Zhelinë, janë aktive edhe zjarret në komunat Vasilevë – fshati Niviçinë, ku digjet pyll me kërcell të ulët, Makedonski Brod – fshati Greshnicë me pyll të përzier të prekur dhe vegjetacion të ulët, Prilep – midis fshatrave Careviq dhe Smolan, pyll i përzier dhe vegjetacion  të ulët. Për shkak të erës së forta, zjarri në Veles është përsëri aktiv – pranë fshatrave Xhidimirc – Krushje – Ivankovc, me degë në disa drejtime, ku është prekur pyll i përzier me kërcell të ulët të degraduar, dhe ka një zjarr në Komunën e Sarajit pranë rrethrrotullimit ku digjet bar i thatë.

The post DMSH: Mbështetje ajrore shtesë për shuarjen e zjarrit në Zhelinë, aktivizohen dhe dy “Air traktorë” appeared first on Telegrafi.

Pete Davidson dhe Elsie Hewitt po presin fëmijën e tyre të parë, një lajm që ka surprizuar fansat pasi shtatzënia nuk ishte e planifikuar.

Megjithatë, çifti duket më i lumtur dhe më i lidhur se kurrë, duke përjetuar këtë moment me shumë dashuri dhe përkushtim.

Lidhja mes Pete dhe Elsie filloi në mars 2025, dhe që atëherë romanca e tyre është thelluar shumë, shkruan DailyMail.

Ata tashmë jetojnë së bashku dhe janë në përgatitje për ardhjen e foshnjës, që pritet të vijë në dimër.

Elsie ndau lajmin në Instagram me disa fotografi ku tregonte barkun e rrumbullakosur dhe një shije humori, duke i bërë fansat të qeshin me statusin e saj.

Për Pete, kjo shtatzëni përfaqëson realizimin e një ëndrre të madhe: dëshirën për t’u bërë baba.

Në intervista të mëparshme, ai kishte shprehur se e ka shumë për zemër këtë rol dhe tani ndihet gati për këtë kapitull të ri.

Për më tepër, ai ndodhet në një moment të mirë emocional pas sfidave të së kaluarës, duke lënë pas vështirësitë dhe duke e pranuar jetën me më shumë qetësi.

Historia e dashurisë së tyre ka kaluar nga thashethemet në një lidhje të fortë dhe të sinqertë, e bazuar në mbështetje dhe ndjeshmëri.

Tani, Pete dhe Elsie janë gati për sfidën më të bukur që po i pret: prindërimin dhe ndërtimin e familjes së tyre. /Telegrafi/

The post Pete Davidson dhe Elsie Hewitt në pritje të fëmijës së parë: Shtatzënia e paplanifikuar që i afroi më shumë se kurrë appeared first on Telegrafi.

Oleksandr Usyk dhe Daniel Dubois përballen sonte në një nga duelet më të mëdha të peshave të rënda, që do të zhvillohet në stadiumin e mbushur plot Wembley në Londër.

Në përballjen e parë, zhvilluar në gusht të vitit 2023 në Poloni, Usyk arriti ta mposhtë Dubois me nokaut teknik në raundin e nëntë.

Megjithatë, ajo ndeshje nuk kaloi pa polemika, pasi një goditje e diskutueshme e Dubois – që Usyk e cilësoi si të ulët – ndezi debatet.

Në konferencën për shtyp të prillit, Usyk madje solli edhe një diagram për të shpjeguar zonat e lejuara të goditjes.

Rekordi i Usyk mbetet i paprekur me 23 fitore (14 me nokaut), ndërsa Dubois, pas asaj disfate, ka përmirësuar performancën duke arritur tri fitore të rëndësishme me nokaut ndaj Jarrell Miller, Filip Hrgovic dhe Anthony Joshua.

Britaniku aktualisht ka bilancin 22 fitore (21 me nokaut) dhe 2 humbje.

Sfida e sotme është për titullin e padiskutueshëm të botës në peshat e rënda.

Në lojë janë rripat prestigjiozë IBF, WBA, WBO, WBC dhe The Ring Magazine, duke e bërë këtë duel një nga më të rëndësishmit e dekadës.

Kur fillon ndeshja Usyk vs Dubois 2?

Transmetimi fillon (për duelet e para) në orën 18:30 sipas orës tonë lokale, raporton SunSport.

Lufta kryesore është planifikuar të fillojë me ecjet drejt ringut rreth orës 22:45 (ora e Kosovës).

Ndërkohë, duelet paraprake fillojnë nga ora 18:40. /Telegrafi/

The post Konfirmohet ora e saktë për duelin historik të boksit, Usyk – Dubois appeared first on Telegrafi.