Dashi

Dashuria: Sot do të keni mundësinë t’i jepni vëmendje imagjinatës suaj. Një shëtitje me miqtë ose partnerin do të jetë preteksti i përsosur për tu argëtuar duke mos menduar, për një here të vetme për punën. Edhe për beqarët do jetë një fundjavë e mirë.

Puna: Disa probleme në vendin e punës që nuk janë zgjidhur ende po ju shqetësojnë edhe një herë. Do të zgjidhni me qetësi gjithçka.

Demi

Dashuria: Në këtë ditë të mrekullueshme do të keni mundësi të relaksoheni dhe të shijoni gëzimet e familjes pa asnjë lloj ngjarje të papritur. Për më tepër, mund të plotësoni edhe disa teka personale. Një lajm i mirë vjen për zemrat e vetmuara, do pëlqeni dikë me shikimtë parë.

Puna: Disa pengesa në punë ose në bisedime mund t’ju bëjnë nervoz. Relaksohuni dhe gjithçka do jetë në rregull.

Binjakët

Dashuria: Nëse kohët e fundit jeni ndarë ose beqarë, do të jeni më të prirur të dilni dhe të bëni miq të rinj. Sidoqoftë, do t’ju duhet një nxitje nga miqtë tuaj për të provuar të dilni nga guaska juaj. Çiftet do kalojnë momente magjike.

Puna: Dita fillon në mënyrë pozitive në lidhje me punën dhe përfundon po aq, me mundësinë e ideve të reja fituese.

Gaforrja

Dashuria: Sot mund të ketë diskutime të vogla me partnerin që mund të përkeqësojnë marrëdhënien tuaj. Mundohuni të jeni më të butë dhe besnikë ndaj të dashurit tuaj. Edhe beqarët do duhet të përpiqen të jenë më pak të kujdesshëm.

Puna: Në punë mund të ketë ca re, mbase për shkak të ndonjë gabimi ose ndonjë kolegu që ju ka zili.

Luani

Dashuria: Do të keni mundësinë të kaloni më shumë kohë me të dashurit tuaj gjatë fundjavës. Do të tregoni dashuri me partnerin tuaj duke rritur mirëkuptimin në çift. Ditë e shkëlqyeshme për beqarët që do bëjnë takime veçanërisht interesante.

Puna: Në vendin e punës mund të ketë një rritje financiare. Hapini sytë gjithsesi përpara se të pranoni.

Virgjëresha

Dashuria: Edhe pse nuk jeni në gjendje të përsosur fizike, në dashuri sot gjithçka do të jetë mirë. Mos kini frikë të shkoni përpara dhe të shprehni ndjenjat tuaja. Edhe beqarët do të jenë në gjendje të deklarojnë veten me ata që dëshirojnë dhe kanë shanse të shkëlqyera për të marrë një po.

Puna: Do të jeni nën peshë dhe nuk mund të jeni në gjendje të kryeni detyrat tuaja, duke vonuar kështu disa projekte.

Peshorja

Dashuria: Sot do të ketë një lodhje të vogël për ju. Do të luftoni për të vazhduar me kërkesat e partnerit tuaj dhe madje të zhgënjej pritjet tuaja. Mundohuni të shpjegoni situatën për të shmangur argumentet. Edhe beqarët do jenë në një humor shumë të keq dhe të pafavorshëm për njohje.

Puna: Falë planeteve të favorshme do të bëni një hap të madh përpara, mund të keni një mundësi të mirë ose të merrni pak më shumë para.

Akrepi

Dashuria: Marrëveshja e çiftit do të jetë veçanërisht e lartë gjatë ditës. Shfrytëzojeni rastin t’i propozoni partnerit tuaj projekte të rëndësishme, të cilat do të jenë vendimtare për të ardhmen tuaj. Beqarët do kenë mjaft mundësi për të ndryshuar situatën e tyre, thjesht vetëm të duan ta bëjnë atë.

Punë: Sot mund të merrni lajme të të mira në vendin e punës, ju mund të qetësoni çdo keqkuptim profesional.

Shigjetari

Dashuria: Një ditë pozitive në dashuri, sot mund të flisni me dorë në zemrën tuaj me sigurinë që partneri juaj do t’ju ​​kuptojë. Përpiquni t’i kushtoni fundjavës diçka romantike dhe pasionante. Fat që vjen edhe për beqarët, dashuria është afër jush.

Puna: Do të zemëroheni dhe do të zhgënjeheni për shkak të disa projekteve të paqarta, por mos u dorëzoni dhe provoni përsëri. Këtë herë mundohuni të mos bëni gabime.

Bricjapi

Dashuria: Do të jeni në humor të mirë dhe do të kujdeseni patjetër shumë më tepër për njerëzit që ju rrethojnë. Ju keni ndërtuar një marrëdhënie të mirë dhe për asgjë në botë nuk do të prishni gjithçka. Edhe beqarët do përpiqen t’i kushtojnë vëmendje dikujt që i intereson shumë.

Puna: Dita e punës fillon ngadalë, por përmirësohet në mes, edhe nëse do të ketë disa pengesa.

Ujori

Dashuria: Sot do të ketë pak nostalgji në lidhje me disa ngjarje të së kaluarës. Sidoqoftë, do të ketë projekte të shkëlqyera për t’u realizuar me të dashurin tuaj dhe ato do t’ju paguajnë për ato që keni humbur. Beqarët do kalojnë një mbrëmje të këndshme me miqtë.

Puna: Më në fund po kaloni një kohë të mirë në punë, por gjithashtu keni mundësinë të përmirësoheni më tej, thjesht angazhohuni.

Peshqit

Dashuria: Në këtë ditë të mrekullueshme do të bëni shkëndija në dashuri dhe do të jeni më të prirur t’i përkushtoheni partnerit tuaj. Kjo është koha e duhur për të provuar të forconi lidhjen tuaj. Koha e mirë edhe për ata që janë vetëm dhe dëshirojnë të kenë një person pranë tyre.

Puna: Në qiellin tuaj ka aq shumë fat, përfitoni nga ajo për të bërë biznes dhe negociata fitimprurëse, ju me të vërtetë keni nevojë për të.

The post Horoskopi ditor për nesër, e Diel 20 Korrik 2025 first appeared on JavaNews.al.

Nga Ylli Pata

Sherri i ashpër që shpërtheu këto ditë për një kolltuk deputeti ndërmjet Adriatik Lapajt dhe Endri Shabanit, i cili u shoqërua me lemerinë e dhunës dhe shantazhit, nuk është një gjë e re në politikën tonë. Përkatësisht është një fenomen tipik shqiptar.

Prej vitit 1990, thuajse në çdo zgjedhje kemi pasur në sheshin tonë të gladiatorëve politikë, personazhe dhe fenomene që kanë ndriçuar papritur, e më pas shuar si drita e xixëllonjës me daljen e diellit.

Thuajse në çdo event elektoral, kemi pasur forca politike që kanë arritur të kthehen në një fenomen politik, në një “hirushe” e drobitur nga dhuna e njerkës dhe vajzave të saj, e më pas një festë e shkurtër që sajonte Zana, e cila zgjaste deri në trokitjen e mesnatës, kur magjia prishej.

Në Shqipëri, ka pasur disa herë shanse të arta, kur parti apo grupime mund të ktheheshin në të “bekuarin” pol të tretë që mund të prishte rregullin ushtarak të dy partive të mëdha. Në vitin 1996 doli Poli i Qendrës, një aleancë e PSD me PAD, si për të krijuar një qendër të moderuar ndaj skemës ekstremiste të PD-së dhe PS-së.

Një pol, që arriti të kthehet në një zë i rëndësishëm i debatit publik në vend, i cili mori vende të rëndësishme në Kuvendin e Shqipërisë në 1997, por edhe poste të larta qeveritare, si pasojë e aleancës me PS-në e Fatos Nanos.

Një mundësi e artë, që kjo qendër të kthehej në një hapësirë oksigjeni për atë pjesë të shoqërisë që nuk e gjenin veten tek dy legjionet e mëdha ndërluftuese.

Por pushteti arriti dhe e dizintegroi plotësisht këtë pol, i cili gjithnjë e më shumë humbi fuqi e mbështetje. Përfaqësuesit e tij, edhe pse ishin personazhet të njohura dhe autoritete në fushën e tyre, nuk qullosën gjë në politikë. Sherri për poste e kolltuqe, i dëmtoi aq shumë, sa sot ai pol është asimiluar totalisht. Duke mos lënë në historikun politik, as artefakte apo të dhëna arkeologjike për të dëshmuar diçka.

Po në vitet 1996-1997, nga krahu i djathtë pati një shpërthim idilik i së djathtës tradicionale e konservatore që nga republikanët e Godos, Balli Kombëtar e Legaliteti, të cilët madje arritën edhe të fitojnë si një grupim unitar një qytet të vështirë si Shkodra. Sërish, pas1 ose dy vjetësh, përplasja dhe abraziviteti për poste deputetësh dhe ministrat, e ka çuar PR në partinë personale të Fatmir Mediut, e forcat tradicionale, drejt një karikature personazhesh surrealë.

Rasti më eklatant i shpërthimit të “faktorit të tretë” që ngjiti për mjaft kohë ishte natyrisht “faktori Ilir Meta”. I cili erdhi në skenë me një reaksion kimik të zhurmshëm, duke dominuar me thonj hapësirën e qëndrës, por pikërisht etja për sa më shumë poste e mandate e çoi në shkërmoqje totale.

Në 2013 kishim Aleancën Kuqezi të Kreshnik Spahiut, e cila ishte një fenomen i ri dhe specifik me një galvanizim popullor. Fenomen i cili e pësoi pikërisht nga vrulli i hyrjes në skenë, me një operacion të fuqishëm nga lart. Brenda dhe jashtë Tiranës.

Në 2015-n, patëm fenomenin “Gjergj Bojaxhi”, i cili ju afrua një fete të madhe elektorati në bashkinë Tiranë, garoi edhe në zgjedhjet e 2021-shit, por më pas u lodh e u shpërnda.

Në 2017-n u ndez si shkëndijë “Libra” e Ben Blushit, por që pas zgjedhjeve e gjithë partia u tret si kripa në ujë.

Në zgjedhjet e këtij viti, terreni pjellor ishte më i favorizuari për formacionet e reja, për faktorët e freskët dhe të një elite të re politike. Si pasojë e kësaj situate, hynë në Parlament tre grupime të reja politike; aleanca Lapaj-Shabani, partia e Agron Shehajt dhe ajo e Arlind Qorit.

Hyrja në Parlament, edhe pse duket e bujshme dhe e rëndësishme për një parti, ajo nuk është gjithçka. Edhe pse mbetet objektivi normal i çdo force politike, pasi Parlamenti është baza e një investimi për të ardhmen, kolltuku ka dhe anën e tij të errët.

Siç po ndodh me rastin e sherrit për ulësen e vetme të koalicionit të Nisma Thurje me Shqipëria Bëhet.

Edhe pse ka disa ditë që u hap kjo telenovelë korriku, nuk reshtin edhe sot, sulmet ndaj Endri Shabanit e Zeqir Kordhonit, nga personazhet të lidhur me Lapajn.

Politika, përtej pallavrave populiste të të ashtuquajturve politikanë të rinj që sillen si kasta e vjetër, natyrisht që është interes. Por pikërisht termi interes është “gracka” që dallon se sa e ka shikimin, idenë por edhe shpirtin të ngushtë apo të gjere të aktorit që i hyn kësaj loje.

Aksioni politik nuk është gjithmonë një revolucion dyjavor siç ndodhi në 1990 dhe o burra hyn e merr postet e larta, ndan pronat e vendit, privatizon fabrikat, repartet ushtarake, shet të gjithë armët e municionin, merr paratë e shitjes së naftës që del nga toka, së bashku me mineralet etj etj.

Politika sidomos sot është një aksion alla maratonë, që për të ecur duhet të mbjellësh sa më shumë, ecësh e vraposh ngadalë por pa u ndalur.

Lapaj, edhe pse nuk hyri në Kuvend, mund të kandidojë pas 2 vjetësh për kryetar bashkie, apo në zgjedhjet e ardhshme për deputet. Duke mbushur boshllëkun që ndodhi më 11 maj dhe mësuar nga gabimet e fushatës.

Por insistimi për të marrë, madje me dhunë kolltukun e deputetit, tregon se nuk e ka mendjen për të ecur, por për tu ulur. Si në një karrocë ambulante që shet fara për kalamajt pranë një shkolle.

The post Përtej duelit Lapaj-Shabani: Iluzioni i partive ambulante! first appeared on JavaNews.al.

Ajo që nisi si një miqësore verore mes Elbasanit dhe Pogradecit, në stadiumin “Elbasan Arena”, përfundoi në skena të turpshme dhune dhe tensioni.

Pas përfundimit të ndeshjes, një përplasje verbale mes futbollistëve të të dy skuadrave degjeneroi në kacafytje fizike në mes të fushës. Situata u përshkallëzua edhe më tej kur në sherr u përfshinë edhe anëtarë të stafit dhe tifozë të pranishëm në tribunat e stadiumit.

Futbollistët e Pogradecit u sulmuan fizikisht dhe me objekte nga tifozët vendës, ndërsa stafet përkatëse nuk arritën të shmangnin përshkallëzimin e përplasjes.

Pas disa minutash kaosi, në mes të ofendimeve dhe tensionit, lojtarët e ekipit pogradecar arritën të largohen drejt dhomave të zhveshjes, duke i dhënë fund një episodi që nuk i shërben aspak imazhit të futbollit shqiptar – aq më tepër në një sfidë që duhej të ishte vetëm përgatitore.

The post Nisi si miqësore, përfundoi si luftë! Plas grushti në futbollin shqiptar, në fushë futen edhe tifozët first appeared on JavaNews.al.

Aksioni për lirimin e hapësirave publike në Tiranë po jep rezultatet e para konkrete. Inspektorati i Mbrojtjes së Territorit dhe Policia Bashkiake kanë ndërmarrë një operacion të gjerë për të kthyer qytetin te qytetarët. Sipas të dhënave zyrtare, gjatë kësaj periudhe:

– Janë bërë 1,428 njoftime për lirimin e hapësirave të zëna në mënyrë të paligjshme;
– 352 subjekte kanë reaguar pozitivisht dhe kanë realizuar çmontimin vullnetarisht;
– Janë mbajtur 32 akt-konstatime për shkelje të ligjit;
– Janë liruar 20 mijë m² hapësirë publike që më parë ishin të zëna me struktura apo objekte të paligjshme.

Ky aksion është pjesë e një nisme të Bashkisë së Tiranës për të përmirësuar jetën urbane dhe për të siguruar më shumë hapësira të lira për komunitetin.

Fotot para dhe pas çmontimeve vullnetare tregojnë qartë ndryshimin që po ndodh në qytet.

The post FOTO / Aksioni për lirimin e hapësirave publike, Bashkia Tiranë: 20 mijë m² sipërfaqe u rikthehen qytetarëve first appeared on JavaNews.al.

Nga Mero Baze

Në Kosovë, çdo verë, policia ndalon dhe shoqëron në burg tre apo katër emigrantë nga diaspora që kërcënojnë me mesazhe, kryesisht gazetarë apo figura politike. Kontingjenti i kërcënuesve është kryesisht i Vetëvendosjes, si më agresivët dhe më të pagdhendurit, por kur i ndal policia dhe i shoqëron në gjykatë, ata fillojnë të qajnë, të pendohen, kërkojnë ndjesë dhe betohen se nuk do ta përsërisin.

M’u kujtua kjo praktikë ndërsa dje, pas publikimit të disa mesazheve zanore që kërcënonin Endri Shabanin dhe kandidatin tjetër të listës së tij, i cili nuk ka pranuar të heqë dorë nga mandati nëse i jepet nga KQZ, ishte lehtësisht e verifikueshme të zbulohej se kush ishte kërcënuesi. Një kërkim në regjistrin telefonik të Torontos në Kanada të çonte tek disa vëllezër që janë kushërinj të Adriatik Lapajt.

Së pari, duhet të themi se kërcënimet ndaj figurave publike janë kthyer në një fenomen të zakonshëm në Shqipëri. Shumë personazhe publike marrin mesazhe kërcënuese për jetën, shpesh si një sport që nxitet nga anonimiteti dhe karakteri agresiv i shumë shqiptarëve në diasporë, që shkarkojnë frustrimin e tyre duke sharë e kërcënuar njerëz në Shqipëri.

Në këtë kontekst, ndonjë rast mund edhe ta injorosh.

Por ky nuk ishte nga ata raste të zakonshme që hasen përditë në “inbox”-et tona. Kërcënuesi, përveçse adresonte qartë shqetësimin se kishte kontribuar për Lapajn, sillej si një tutor i tij – fliste në numrin shumës, i dilte zot kërcënimit me zhdukje, sikur të ishte një ortak politik apo financiar.

Kjo nxjerr në pah një problem serioz që autoritetet tona e injorojnë, por që në vende të tjera – përfshirë Kosovën – ka vëmendje të posaçme, duke e kufizuar fenomenin.

Nuk po them se vëllezërit Rexhepaj do ta vrasin vërtet Shabanin apo ndonjë tjetër, por është e qartë që ata flisnin në emër të një kontributi të vetëshpallur financiar e elektoral dhe silleshin sikur kishin blerë Adriatik Lapajn si pronë të tyre.

Në raste të tilla, denoncimi në polici i kërcënuesve duhet të shërbejë për vendosjen e standardeve ndaj këtij lloj sjelljeje të rrezikshme.

Nga ana tjetër, është thellësisht fyese dhe e papërshtatshme mënyra se si partia e Lapajt u “distancua”: duke u bërë thirrje simpatizantëve të vet që “të përmbahen” dhe “të mos kërcënojnë rivalët”. E kuptoj që e kanë bërë nga injoranca politike, por kjo nuk është distancim. Përkundrazi, është një kërcënim i rafinuar, që tingëllon si: “Kam një ushtri kërcënuesish që për momentin po u them të përmbahen – por nesër… nuk i kontrolloj dot”.

Pra, në mënyrë të tërthortë, Lapaj po dërgon sinjalin se i ka nën kontroll këta banditë dhe se mund edhe t’i përdorë kur t’i duhen.

Por një parti politike nuk i del zot banditëve. Ajo ose distancohet qartësisht, me emër dhe mbiemër, ose bëhet pjesë e këtij lloj kriminalizimi të fushatës. Aq më tepër që kjo deklaratë u bë vetëm pasi u identifikuan se kërcënuesit ishin kushërinjtë e Lapajt.

Në vend të kësaj loje të rrezikshme, Lapaj duhet të kishte dalë publikisht dhe t’i kishte dënuar me emër dhe mbiemër, duke kërkuar edhe ndëshkimin e tyre dhe jo të sillej sikur ishte në hall që nuk përmbante dot banditët e vet.

Pikërisht për këto raste, policia shqiptare duhet të adoptojë praktikat shumë efikase të policisë dhe drejtësisë së Kosovës, që të gjithë ata që kërcënojnë me identitet të qartë – i pret në aeroport kur vijnë me pushime, i shoqëron në polici dhe më pas i çon në gjykatë.

Kjo nuk ka lidhje me shpëtimin e jetës – sepse, në të vërtetë, ata që të kërcënojnë nuk janë asnjëherë ata që të vrasin. Por kjo lidhet me shpëtimin e një standardi shoqëror, që po zhbëhet çdo ditë nga psikopatët që shesin sufllaqe në Toronto e kërcënojnë njerëz publikë në Tiranë.

Për më tepër, këta individë nuk janë as sponsorë të deklaruar të Lapajt dhe, padashje, mund t’i krijojnë edhe telashe ligjore në deklarimin e shpenzimeve të fushatës, duke bërë më të besueshëm zërat që ai financohet nga individë të botës së errët.

The post Kërcënuesit nga Toronto që Lapaj si “përmban dot” first appeared on JavaNews.al.

Për 20 vjet me radhë, nga 2004 deri më 2024, kompania Bankers Petroleum ka eksportuar naftë bruto në një vlerë të jashtëzakonshme prej 5.3 miliardë euro.

Por ky është vetëm fillimi i një operacioni që ka gllabëruar miliona nga nëntoka e shqiptarëve.

Në dy dekada aktivitet intensiv në sektorin më strategjik të ekonomisë shqiptare, Bankers është kompania që nuk ka rezultuar asnjëherë me fitim. Asnjëherë të vetme! Përkundrazi, ka deklaruar humbje, duke justifikuar para autoriteteve shqiptare një total shpenzimesh prej rreth 6.8 miliardë euro. Sipas të dhënave zyrtare, bilanci përmbyllet me një humbje prej rreth 116 milionë euro.

Përkthimi i kësaj skeme të vetëdeklaruar është brutal: shteti shqiptar nuk ka përfituar asnjë të ardhur tatimore nga ky aktivitet shumëmiliardësh. Zero fitim për buxhetin e shtetit, ndërkohë që thesari natyror i vendit është eksportuar pa mëshirë.

Mega-afera që trondit themelet e shtetit

Këto fakte janë tronditëse. Janë shifra që mjaftojnë për të lënë gojëhapur çdo qytetar, por edhe çdo skeptik. Ajo që ka ndodhur me Bankers është, pa asnjë dyshim, mega-afera më e madhe dhe më e pacipë në historinë e Shqipërisë postkomuniste.

Për afro 20 vjet, shumat marramendëse që janë nxjerrë nga nëntoka e shqiptarëve kanë përfunduar – të paktën sipas të gjitha indicieve – në financimin e një mekanizmi të sofistikuar korrupsioni, ku duket se është përfshirë një pjesë e mirë e administratës tatimore dhe zinxhiri institucional i shtetit shqiptar.

Kjo nuk mund të ketë ndodhur pa dijeninë e shtetit. Përkundrazi, ka indicie serioze që shteti jo vetëm ka qenë në dijeni, por ka heshtur me dashje, e ndoshta, sipas disa zërave, me urdhër politik, përballë grabitjes spektakolare të pasurisë publike.

Kutia e Pandorës: Hetimi që mund të fundosë një sistem të tërë

Burime konfidenciale konfirmojnë se Prokuroria e Fierit ka hapur një hetim që ka tronditur themelet e këtij sistemi të fshehtë. Edhe pse nuk dihet saktësisht se si nisi procedimi penal, një gjë është e sigurt: është hapur kutia e Pandorës.

Sipas të dhënave hetimore, në këtë aferë të dyshuar janë të përfshira:

• Një rrjet i gjerë kompanish fantazmë,

• Dhjetëra firma kontabilistësh dhe ekspertësh financiarë,

• Zyra konsulence dhe ligjore me emër dhe lidhje politike,

• Biznese të mëdha dhe të mesme shqiptare dhe të huaja,

• Madje edhe shoqëri ndërkombëtare nga gjysma e globit, të gjitha të përfshira në falsifikimin e kontratave dhe fryrjen e shpenzimeve të Bankers.

Ka mes emrave të “ekspertëve” ish-ministra apo ish-drejtues të lartë të shtetit shqiptar që jo krejt rastësisht kanë qenë të angazhuar me menaxhimin apo ekspertizën e Bankers.

Skema ishte e qartë dhe e përsëritur: Bankers frynte fiktivisht shpenzimet me qëllim që në fund të çdo viti të deklaronte bilanc me humbje, duke shmangur kështu detyrimet tatimore për tatim fitimi. Por nuk mbaron këtu: kompania përfitonte edhe rimbursime të TVSH-së, duke e kthyer mashtrimin në përfitim të dyfishtë.

Në këtë sistem kriminal janë përdorur kontrata fiktive, dokumente të falsifikuara dhe transaksione mashtruese, të realizuara me ndihmën e individëve dhe kompanive vendase dhe të huaja.

Shkelja e ligjit është flagrante

Ligji është i qartë: një kompani që del me humbje, duhet të shpallet në faliment. Por Bankers ka operuar për 20 vjet me humbje të vetëdeklaruara, pa asnjë pasojë ligjore. Asnjë nga ekspertët kontabël apo zyrat juridike me të cilat Bankers ka operuar nuk e kanë parë të arsyeshme të shpallin falimentin, duke e shndërruar kompaninë në një gjigand të abuzimit me financat, por që për çudi nuk i binte në sy askujt.

Aktualisht, Prokuroria ka ngritur akuza të rënda, si:

• Krijimi i skemave mashtruese për tatimin mbi vlerën e shtuar,

• Fshehja e të ardhurave,

• Pastrimi i produkteve të veprës penale apo veprimtarisë kriminale,

• Shpërdorimi i detyrës,

• Moskryerja e detyrave nga organet tatimore.

Ajo që e bën këtë çështje edhe më dramatike janë përmasat e skemës kriminale: një sistem i tërë, i ngritur në mënyrë të qëllimshme dhe të strukturuar, për të grabitur pasurinë publike me bekimin e heshtur të shtetit.

Këto janë parametrat e një grupi të strukturuar kriminal, që për nga shkalla, kohëzgjatja dhe përfshirja, duhet t’i kalojë urgjentisht në juridiksionin e SPAK-ut. Vetëm ky institucion ka kompetencën dhe mjetet për të hetuar një krim të kësaj natyre dhe përmasash.

Testi i madh për drejtësinë shqiptare

Ky hetim është ndoshta prova më e madhe që është paraqitur ndonjëherë para drejtësisë shqiptare. Ai do të testojë jo vetëm kurajën e prokurorëve të zakonshëm, por sidomos integritetin dhe vendosmërinë e SPAK-ut.

Interesat që preken janë të mëdha: financiare, politike, shtetërore, madje dhe mediatike. Sepse mes rreshtave ka interesa të epërfolura të televizioneve kombëtare. Por ky është momenti i së vërtetës. Nuk ka çast më të përshtatshëm për drejtësinë shqiptare për të treguar se funksionon, që nga faturat e “rigonit dhe qumështit” të shitësve ambulantë, deri te miliardat e naftës shqiptare të zhdukura në ajër. (VNA.al)

The post Skandali “Bankers”/Si u gllabërua nëntoka e shqiptarëve pa paguar një qindarkë për shtetin first appeared on JavaNews.al.

Ka vijuar aksioni i inspektorëve kundër tregtarëve që shesin qumësht, bulmet dhe mish pa faturë.

Nëpërmjet një postimi në rrjetet sociale, kryeministri Rama ka publikuar pamje nga aksionet më të fundit të inspektorëve tatimorë në tregje të ndryshme.

Postimi i Ramës:

Vijon papushim sekuestrimi i qumështit, bulmetrave dhe mishit pa faturë! Deri në fund

The post “Në 6 ditë”,Rama publikon pamjet e aksionit: Vijon sekuestrimi i qumështit, bulmetrave dhe mishit pa faturë! first appeared on JavaNews.al.

Dy vëllezër të mitur gjetën vdekjen tragjikisht të mbytur në ujërat e lumit Shkumbin pasditen e 18 Marsit.

Teksa ruanin bagëtitë fëmijët 7 dhe 9 vjeç hynë të lahen, por nuk mundën të dalin prej andej. Sipas peshkatarëve, edhe pse në dukje i qetë dhe i cekët, Shkumbini fsheh rreziqe.

Për banorët e Labinotit, por edhe të Elbasanit larja në ujërat e Shkumbinit ka qenë gjithmonë e zakonshme, por edhe tragjeditë nuk kanë munguar.

Përpos gropave dhe zonave të rrezikshme që herë-herë lumi krijon gjatë dimrit kur vjen me rrëmbim, në shumë vende të tjera janë gërryerjet pa kriter ato që krijojnë gropa të rrezikshme. Tragjedia e rëndë dhe e paimagjinueshme e familjes Bica sot vjen si kambanë alarmi për më shumë kujdes.

The post Tragjedia në Shkumbin, peshkatarët japin alarmin: Gërryerjet pa kriter në lumë po vrasin njerëz first appeared on JavaNews.al.

Ato janë si qindra vajza e gra në botë që u premtohet një jetë më e mirë dhe që, për fat të keq, ngecin në rrjetat e trafikantëve duke u detyruar të ushtrojnë prostitucionin.

Stefania jetonte në Kolumbi dhe aplikoi për punë në Shqipëri. Qëllimi i saj ishte të punonte si balerinë nate. Por sot ajo, bashkë me disa vajza të tjera nga Kolumbia, janë nën akuzë për prostitucion, me një pasaportë të bllokuar që nuk e lejon të largohen e, veç të gjithave, pa asnjë ndihmë.

“Ne jemi kolumbiane, kemi ardhur këtu të mashtruara nga persona që na sollën, sepse erdhëm me qëllimin për të kërcyer. Kur mbërritëm këtu, kishim borxhe dhe na thanë se duhet të paguajmë, duke qëndruar këtu e duke punuar si prostituta. Ne pranuam që ta bëjmë, të shlyejmë borxhin dhe më pas të largoheshim. Kur u bëmë gati të ktheheshim, na arrestuan në aeroport”, tha Stefania.

Por autoritetet e policisë i thonë TCH se po përdoret një skemë tjetër e ushtrimit të prostitucionit nga shtetase të huaja, që – siç rezulton nga disa raste – udhëtojnë në Shqipëri e qëndrojnë nga dy deri në katër muaj, duke u zëvendësuar me të tjera.

“Ne bëjmë kërcime seksi para meshkujve, por nuk jemi prostituta. Për të ardhur në Shqipëri e për të punuar, ne gjetëm një kontakt, pasi në Kolumbi situata nuk është e mirë. Ne jemi nëna beqare dhe menduam një mënyrë për të siguruar para. Kur erdhëm këtu, e kuptuam se nuk ishim për atë punë, por se kishim rënë në një rrjet prostitucioni. Këta persona janë identifikuar nga autoritetet dhe një prej tyre është në burg”, shtoi ajo.

Vajzat i kanë familjet në Medelin dhe kërkojnë ndihmë për t’u larguar, megjithëse çështja ndaj tyre sapo është mbyllur dhe pritet të gjykohen, si shumë të tjera, nën gjykim në mungesë.

“Ne kemi qëndruar dy muaj në Pogradec në paraburgim. Tani që ka nisur procesi, kemi dy muaj në Tiranë dhe verifikimet vijojnë ende. Nuk na lënë të ikim. Nuk kemi pasaportë pasi na janë marrë. Jemi pa shtëpi, pa ushqim dhe deri tani na ka ndihmuar një fondacion”, përfundoi Stefania. /tch/

The post “Erdhëm për të kërcyer, na detyruan të prostituojmë”! Kolumbianet “mbahen peng” në Tiranë: Policia na ka marrë pasaportat first appeared on JavaNews.al.

Përplasja fizike e ndodhur ditën e sotme në Ksamil, ku u dhunua pronari i “Euro Hotel” Albert Pashaj, duket se nuk ka qenë një rast i veçuar. Pamje të reja të siguruara hedhin dritë mbi një tjetër përplasje mes të njëjtave palë, e cila ka ndodhur rreth një muaj më parë.

Në video shfaqen Albert Pashaj dhe Agim Taraj, pronari i “Sunset Restorant”, teksa godasin njëri-tjetrin me grushta. Konflikti, që duket i ashpër, ndërpritet vetëm pasi ndërhyjnë persona të tjerë për t’i ndarë.

Ky zhvillim i ri forcon dyshimet se sherri i fundit nuk ka qenë spontan, por pjesë e një përplasjeje të vazhdueshme mes dy biznesmenëve të zonës. Burime nga vendi i ngjarjes bëjnë me dije se shkaku kryesor i mosmarrëveshjes lidhet me kontrollin e hapësirës së plazhit përpara hotelit të Pashajt, ku edhe ndodhi incidenti i fundit.

The post Dalin pamjet/ Si u konfliktuan brutalisht një muaj më parë pronarët e dy hoteleve në Ksamil first appeared on JavaNews.al.

Një ngjarje e dhunshme tronditi pushuesit ditën e sotme në plazhin e Ksamilit, ku një person goditi me grushte dhe gjakosi një tjetër.

Agresori i dyshuar është i identifikuar, ai është Agim Taraj, person me precedentë penalë për dhunë dhe trafik droge, teksa ka ushtruar dhunë fizike ndaj shtetasit Albert Pashaj, pa asnjë ndërhyrje nga forcat e rendit.

Ndërkohë, mësohet se dy personat që janë përfshirë në konflikt janë shoqëruar në polici.

Njoftimi i policisë:

Sot, rreth orës 12:45, në Ksamil, dyshohet se gjatë një konflikti për motive të dobëta, është dhunuar me sende të forta shtetasi A. P. Menjëherë, nga shërbimet e Komisariatit të Policisë Sarandë është bërë shoqërimi i shtetasit A. T, si dhe po punohet per identifikimin dhe shoqerimin e personave te tjere të dyshuar si persona të përfshirë në këtë konflikt.

The post I dënuar për dhunë dhe trafik droge, zbulohet identiteti i autorit të dyshuar që goditi me grushte në Ksamil first appeared on JavaNews.al.

Vendi vijon të përballet me një situatë të rënduar nga zjarret, të cilat po prekin zona të ndryshme të territorit. Sipas të dhënave të Qendrës Kombëtare Operacionale të Emergjencave Civile në AKMC, deri në orën 18:00 të ditës së sotme janë raportuar 22 vatra zjarri, nga të cilat 11 janë shuar dhe 11 vijojnë të jenë aktive.

Përmes ndërhyrjes së menjëhershme të forcave operacionale, është bërë i mundur izolimi dhe shuarja e disa vatrave në bashkitë Korçë, Vlorë, Himarë, Kavajë, Shijak, Kamëz dhe të tjera.

Ndërkohë, në zonat ku flakët mbeten aktive, përballja është e vështirësuar për shkak të terrenit të thyer dhe erës së fortë që përhap shpejt zjarrin. Një nga vatrat më serioze ndodhet në Parkun Kombëtar të Lurës në Dibër, ku që prej datës 7 korrik zjarri vijon të përhapet në dy fronte. Në këtë zonë janë angazhuar mbi 60 forca të FA dhe autoriteteve vendore, ndërsa vatra të tjera po digjen në Mat, Bulqizë, Maqellarë, Elbasan, Vlorë, Fier, Lezhë, Durrës dhe Shijak.

Në zonën e Dukatit, mbi fshatin Sotiran, zjarri është përhapur me intensitet dhe ka përfshirë edhe sipërfaqe me pisha. Ndërhyrja është e vështirë dhe po bëhet nga mbi 25 efektivë në terren. Po ashtu, në Mallakastër, një vatër e fuqishme po djeg zonën e Belishovës, ndërkohë që po operojnë qindra forca me dhjetëra mjete zjarrfikëse dhe helikopterë ushtarakë.

Autoritetet bëjnë thirrje për kujdes maksimal dhe raportim të menjëhershëm të çdo rasti zjarri, ndërsa monitorimi dhe ndërhyrjet do të vijojnë pa ndërprerje deri në shuarjen e plotë të vatrave.

The post Situata me zjarret në vend/ 22 vatra, gjysma e tyre ende aktive, forcat në terren luftojnë me flakët first appeared on JavaNews.al.

Kina ka regjistruar inovacion gjithnjë e më të gjallë në teknologjitë e gjelbra dhe me karbon të ulët gjatë periudhës 2021- 2025. me 53.000 patenta shpikjesh të dhëna në këtë sektor vetëm në vitin 2024.

Shifra e vitit 2024, e cila dyfishoi atë të vitit 2020, pasqyron një normë mesatare vjetore rritjeje prej 19.2 për qind.

Inovacioni i Kinës në teknologjitë e gjelbra dhe me karbon të ulët është shfaqur si një forcë kryesore lëvizëse në avancimin e zhvillimit global në këtë fushë. Sektorët e energjisë së pastër dhe ruajtjes së energjisë treguan rritje të fuqishme, me autorizimet e patentave të shpikjeve që u rritën përkatësisht me 34.9 për qind dhe 32.8 për qind në baza vjetore, rritjet më të larta midis të gjitha kategorive të teknologjisë së gjelbër.

Ndërmarrjet kryesore vendase kanë luajtur një rol kyç në avancimin e teknologjisë së gjelbër, me katër kompani vendase që renditen midis 10 kompanive më të mira në botë për grante patentash për shpikje të gjelbra dhe me karbon të ulët në vitin 2024.

Kina gjithashtu regjistroi 6356 aplikime për Traktatin e Bashkëpunimit të Patentave (PCT) në teknologjitë e gjelbra dhe me karbon të ulët në vitin 2024, 130 për qind më shumë se në vitin 2020, duke ruajtur renditjen e saj të lartë globale për katër vjet rresht.

Ndërmarrjet kineze kanë kontribuar në mënyrë kumulative me 12.000 zgjidhje të teknologjisë së gjelbër në WIPO GREEN – një platformë që lidh inovatorët dhe ofruesit e teknologjive të qëndrueshme për të përshpejtuar inovacionin e gjelbër dhe veprimin klimaterik, duke dhënë kontribute aktive në zhvillimin global të gjelbër.

The post Përshpejtimi i inovacionit të gjelbër, si mundësi efikase për një veprim me ndikim klimaterik first appeared on JavaNews.al.

Detaje të reja kanë dalë në dritë lidhur me ngjarjen e ndodhur këtë të shtunë në Ksamil, ku një person u dhunua me sende të forta.

Burime konfirmojnë se i lënduari është Albert Pashaj, pronar i “Euro Hotel Ksamil”, ndërsa autori i dyshuar i dhunës është Agim Taraj, pronar i “Sunset Restorant Ksamil”.

Ngjarja ka ndodhur brenda ambienteve të hotelit të Pashajt dhe dyshohet se konflikti ka shpërthyer për shkak të vendosjes së çadrave dhe kontrollit të hapësirës së plazhit përballë hotelit.

Mësohet se përplasja ka pasur motive pronësie dhe menaxhimi të territorit të vijës bregdetare, një problematikë që kohët e fundit është përshkallëzuar në zonat turistike të Jugut.

The post Sherri i dhunshëm në Ksamil/ Protagonistët e tij pronarë të dy hoteleve në zonë, ja pse lindi konflikti first appeared on JavaNews.al.

Me shtimin masiv të turistëve gjatë viteve të fundit, përveç bumit për të shijuar natyrën mbresëlënëse të detit dhe alpeve shqiptare, një tjetër lloj “turizmi” sa vjen e lulëzon. Vajza të huaja, kryesisht latine dhe kineze, e kanë kthyer në një biznes fitimprurës ofrimin e shërbimeve seksuale kundrejt pagesës në Shqipëri. Qarqet kryesore ku ky fenomen është hasur më shpesh nga autoritetet janë kryeqyteti dhe zonat bregdetare, aty ku janë kryer goditjet nga ana e bluve.

Referuar të dhënave nga Policia e Shtetit, nga janari deri në mesin e korrikut, u zhvilluan të paktën 15 operacione për goditjen e rrjeteve të prostitucionit. Të paktën 22 persona tutorë u arrestuan dhe 11 të tjerë u shpallën në kërkim. Ata rrezikojnë nga 2 deri në 5 vjet burg. Përveç tyre, në hetim në gjendje të lirë u morën gati 100 vajza të huaja, të cilat shfrytëzoheshin për prostitucion. Edhe ato rrezikojnë ndëshkim ligjor, nga gjobë deri në 3 vjet burg.

Gjashtë raste me hetim të thelluar u finalizuan në Tiranë, 5 në Vlorë, 3 në Durrës dhe 1 tjetër në Korçë. Goditja më e rëndësishme u bë gjatë muajit mars në Tiranë nga Antitrafiqet, në operacionin “Orkidea”, ku me vendim gjykate u ekzekutua urdhri për 11 masa sigurie “arrest në burg”, me 44 vajza në hetim në gjendje të lirë. Përgjithësisht, vajzat që merren në hetim, japin deklarime dhe nuk pengohen për të lëvizur. Por nuk do të ishte për t’u habitur, nëse do të gjendeshin duke e ushtruar sërish aktivitetin.

Burime nga policia bëjnë me dije për Report TV se të rejat e huaja që shfrytëzohen për prostitucion vijnë nga vende të Amerikës Latine, Kolumbia, Brazili, Ekuadori apo Venezuela. Më tej, nga vende si Ukrainë dhe Rusia, si dhe nga Kina. Në Durrës për shembull, të gjitha rastet e hetuara këtë vit ishin jo vetëm me tutorë kinez, por edhe të reja kineze që ushtrojnë prostitucion.

Në Shqipëri prostitucioni është ilegal, por një parajsë në lulëzim nga trafikantët. Pothuajse të gjitha vajzat e huaja që përfundojnë në Tiranë, hyjnë në tregun vendas përmes disa faqeve online si “Escort Tirana”, një rrjet ndërkombëtar i njohur, por edhe linja të tjera. Një pjesë e madhe udhëtojnë nga Amsterdami, një vend që e ka të legalizuar, përfshirë edhe tymosjen e hashashit. Vetëm muajin e fundit, në Rinas tentuan të kalojnë të paktën 10 vajza që dyshoheshin se janë eskorta, më cigare hashash, që u morën në hetim në gjendje të lirë. Një pjesë janë larguar nga vendi prej frikës, thonë burimet, por të tjera kanë vijuar në Shqipëri dhe po mbahen në vëzhgim.

Në pjesën dërrmuese të rasteve, vatra ku ushtrohet prostitucioni me të huaja janë apartamentet ditore “AirBNB”. Me kalimin e kohës, u pa se hapësirat më private, larg ambienteve të hoteleve, janë më të volitshme edhe për klientelën, por edhe më të vështira për t’u identifikuar nga policia. Në Tiranë nuk ka ndonjë zonë “të preferuar”. Eskortat janë të shpërndara në të gjitha lagjet.

Prej majit e në vijim, ka një tendencë në rritje në jug të vendit. Nga Vlora deri në Ksamil, ka një dyndje të madhe turistësh, e për pasojë lëvizje të eskortave në këto zona. Kur vjen puna te çmimet, burime nga Antitrafiqet thonë se nëpër bisedat e përgjuara është zbuluar se 100 euro është shifra më e ulët për këtë lloj shërbimi, duke arritur edhe deri në 500 euro më maksimalja. Megjithatë, një pjesë e klientelës së tyre janë VIP, të cilët paguajnë edhe me tepër, në këmbim të të qenit sidomos diskret.

Përgjithësisht të huajat që zbarkojnë në Shqipëri nuk qëndrojnë gjatë, nga disa ditë në disa javë. Ata vijnë si pjesë një turi vizitash në Evropë dhe Ballkan. Pasi mbyllin ciklin në Shqipëri përgjithësisht zhvendosen në vende si Greqia, Maqedonia e Veriut, Mali i Zi apo Serbia.

Tejmbushja e tregut të paligjshëm me vajza të huaja, me tipare latine, ka bërë që vajzat shqiptare të konsiderohen praktikisht jashtë tregu, të paktën me pagesat që konsiderohen “të shtrenjta”. Burime nga Antitrafiqet thonë se ka një tendencë në ulje të qendrave të masazheve që ofrojnë shërbime ekstra, të cilat përgjithësisht kanë qenë me vajza shqiptare. /shqiptarja.com/

The post Prostitucion me të huaja (latine, kineze, ukrainase e ruse)! Skema si eskortat e VIP-ave vijnë dhe ikin nga vendi first appeared on JavaNews.al.

Disa javë pas rrëzimit tragjik të avionit të Air India në Ahmedabad, ku humbën jetën 260 persona, po dalin në dritë detaje të reja që po trondisin opinionin publik dhe industrinë e aviacionit.

Sipas një raporti paraprak të autoriteteve indiane dhe burimeve amerikane të përfshira në hetim, kapiteni Sumeet Sabharwal, 56 vjeç, dyshohet se ka ndërprerë furnizimin me karburant të avionit, vetëm sekonda pas ngritjes nga pista. Dy çelësa të karburantit, që zakonisht mbeten të aktivizuar gjatë gjithë fluturimit, rezultojnë të jenë vendosur në pozicionin “Cutoff”, çka bëri që motorët të ndalonin së punuari.

Avioni Boeing 787 Dreamliner, i nisur nga Ahmedabad drejt Londrës më 12 qershor në orën 13:38, qëndroi në ajër për vetëm 30 sekonda para se të përplasej në një zonë të banuar. Nga përplasja humbën jetën 241 persona në bord dhe 19 të tjerë në tokë, ndërsa vetëm një pasagjer mbijetoi në mënyrë të pabesueshme.

Zyrtarisht, nuk është konfirmuar se kush nga pilotët mbylli furnizimin me karburant. Por regjistrimet nga “black box” tregojnë një dialog alarmant në kabinë, ku njëri pilot pyet: “Pse u ndërpre?” dhe tjetri përgjigjet: “Nuk isha unë.”

Sipas hetuesve amerikanë dhe raportimeve të Wall Street Journal, provat tërheqëse nga komunikimi sugjerojnë se veprimi mund t’i përkasë kapitenit Sabharwal, i cili ishte në rolin e monitoruesit në atë moment, ndërsa bashkë-piloti Clive Kunder, 28 vjeç, ishte në kontroll të avionit gjatë ngritjes.

Kapiten Sabharwal ishte një pilot me mbi 8,200 orë fluturimi dhe gëzonte reputacion të lartë në komunitetin e aviacionit. Miq dhe kolegë e përshkruajnë atë si një njeri të qetë, profesionist të përkushtuar dhe “shpirt të butë”. Ai nuk kishte pasur asnjë incident serioz gjatë karrierës së tij dhe ishte i njohur për sjelljen e tij të respektueshme.

Por pas tragjedisë, autoritetet po shqyrtojnë edhe aspektin psikologjik të kapitenit. Burime të afërta me hetimin kanë treguar se Sabharwal kishte kaluar një periudhë të vështirë personale pas vdekjes së nënës në vitin 2022, duke u ndarë më pas nga bashkëshortja dhe u transferua në Mumbai për t’u kujdesur për të atin 90-vjeçar.

Disa pilotë të tjerë të Air India kanë përmendur probleme të mundshme me shëndetin mendor, ndonëse kompania ajrore kishte dhënë leje mjekësore për fluturimin, pas kontrolleve rutinë dhe analizave të alkoolit, të cilat rezultuan të pastra.

Pak orë përpara fluturimit fatal, Sabharwal i kishte thënë rojës së kompleksit ku banonte: “Kujdesu për babanë tim. Do të kthehem shpejt.”

Ende nuk është e qartë nëse ndërprerja e karburantit ishte një gabim fatal, një akt i qëllimshëm apo një defekt teknik. Ekspertët e aviacionit e kanë përshkruar vendosjen e çelësave në “Cutoff” menjëherë pas ngritjes si një veprim “absolutisht të pashpjegueshëm”.

Hetimet janë në zhvillim, ndërkohë që raporti përfundimtar pritet të sqarojë nëse kemi të bëjmë me gabim njerëzor, vetëvrasje me pasoja masive apo një zinxhir ngjarjesh tragjike që çuan në katastrofën ajrore më të rëndë të Indisë në dekadat e fundit.

The post “Kujdesu për babanë tim”/ Zbulohen fjalët e fundit të pilotit të Air India përpara tragjedisë që i mori jetën 260 personave first appeared on JavaNews.al.

Kur shkon në një koncert të Coldplay për emocione, por del me martesë të shkatërruar, vendin e punës bosh dhe emrin tënd si hashtag në çdo meme të internetit, mirë se erdhe në sagën më të nxehtë të kësaj vere.

Nëse s’e dini ende, ngjarja ndodhi në koncertin e Coldplay më 16 korrik në Boston, ku CEO i kompanisë amerikane të teknologjisë “Astronomer”, Andy Byron, mendoi se do kalonte një natë të qetë, me pak muzikë live dhe përqafime private.

Por ndodhi ajo që s’ishte parashikuar, ai u kap nga kamera e famshme Kiss Cam duke përqafuar Kristin Cabot, jo gruan e tij, por shefen e Burimeve Njerëzore të kompanisë.

Videoja u bë virale në TikTok, falë një vajze të quajtur Grace, që me një caption të thjeshtë “E dini ku është burri juaj?”, krijoi dramën e momentit. Pas bujës, Grace bëri një video live dhe tha me sinqeritet “S’doja të shkaktoja dramë, por kur luan lojëra idiote, fiton çmime idiote”.

Menjëherë pas zhurmës, kompania Astronomer vendosi që të dy, Byron dhe Cabot, të pushohen përkohësisht nga puna, ndërsa filluan një hetim të brendshëm për të zbuluar nëse “romanca nën dritën e yjeve” kishte pasur ndonjë ndikim në politikat e kompanisë.

CEO i përkohshëm, Pete DeJoy (bashkëthemelues i Astronomer), u vendos në krye ndërkohë që bordi po shqyrton çdo email, bonuse, promovime dhe “takime jashtë orarit” për të kuptuar nëse kjo ishte një romancë e sinqertë apo një histori përfitimesh në të gjitha kuptimet.

Ndërkohë, interneti gëlon. Memet s’kanë të ndalur.

Në anën tjetër, Kristin Cabot, e martuar gjithashtu me një CEO (i një kompanie rumi, që ironikisht quhet “Privateer”), thuhet se është në proces divorci.

Dhe në gjithë këtë histori, vetë Andy Byron s’ka folur ende.

Ndërkohë në zyrat e Astronomer, e cila ka mbi 700 klientë globalë, përfshirë Adobe, EA dhe Marriott, nuk ka ende ndonjë njoftim për kthimin e CEO-së në detyrë. Dhe me këtë tempo, më lehtë të rikonsiderohet Plutoni planet sesa të kthehet Andy në zyrë.

The post Publikoi videon e tradhtisë që u bë virale në gjithë botën, vajza: S’doja të shkaktoja dramë, por… first appeared on JavaNews.al.

Gazetari i kronikës në News24, Igli Çelmeta, ka treguar në emisionin “Kjo Javë” detaje rreth rrëmbimit dhe vrasjes së 22-vjeçarit Renis Dobra më 8 korrik në liqenin e Shkopetit.

Çelmeta zbulon se Dobra nuk kishte para mjaftueshëm as për të ndërruar ekranin e celularit dhe dëshmitë e ditës së ngjarjes e tregojnë këtë. Madje edhe gaz makinës i ka futur vetëm 3 mijë lekë të vjetra, pasi nuk kishte. Por ajo që e bën edhe më tragjike këtë vrasje është fakti se ai është eliminuar për 10 mijë euro…

Nisida Tufa: Si ndodhi dinamika e ditës së vrasjes?

Igli Çelmeta: “Atë ditë Renis Dobra kishte shkuar në Burrel për të ndërruar ekranin e telefonit celular, madje atë ditë nuk kishte arritur ta ndërronte për shkak se nuk kishte shumën monetare për ta paguar. Më pas ka komunikuar me të atin e tij, ku i ka thënë se do të kthehej për në banesë rreth orës 21:30 minuta të datës 8 korrik. Ka pasur automjetin e babait të tij, që më pas u gjet në liqenin e Shkopetit. Ka ndalur në një karburant ku ka furnizuar automjetin me 3 mijë lekë të vjetra gaz, pasi nuk ka pasur më shumë të holla. Më pas është nisur drejt banesës së tij, ku e kanë ndjekur autorët e dyshuar, që mendohet të jenë 4 persona, të cilët prej datës 5 korrik kanë vëzhguar dhe monitoruar të gjitha lëvizjet e 22 vjeçarit.”

Nisida Tufa: Fillimisht ndjekja sa ka qenë?

Igli Çelmeta: “Fillimisht autorët e dyshuar kanë marrë automjet me qira, të cilët kanë lëvizur në qytetin e Burrelit dhe më pas në fshatin Zenishtë ku kishte banesën Dobra. Kanë parë që rruga ka qenë e prishur, pasi automjeti Golf 7 nuk mund të lëvizte me shpejtësi, kështu që një ditë më pas kanë ndërruar automjet, kanë marrë një Hyndai dhe Range Rover. Kur është ndjekur në drejtim të banesës ka qenë Hyndai i bardhë, më pas edhe Range Rover. I kanë bërë pritë rreth 950 m larg banesës së tij. Në ato momente ka qenë duke kaluar edhe një i afërm i viktimës, që ka parë momentin kur autorët i kanë prerë rrugën. Autorët i kanë thënë kushëririt të Dobrës të largohej dhe i afërmi ka dyshuar se kanë qenë forca operacionale të policisë. Kushëriri ka lajmëruar babanë e Renisit dhe kanë shkuar në komisariatin e Burrelit nëse është arrestuar 22-vjeçari.

Aty është kuptuar se kemi të bëjmë me një ngjarje kriminale, një rrëmbim. Familjarët kanë nisur kërkimet për gjetjen e djalit të tyre. Por ngjarja ka ndodhur rreth 30 km larg nga ku është rrëmbyer Renis Dobra. Fillimisht ka qenë babai i cili ka gjetur shapkën e djalit në rrugë. Trupi është gjetur nga familjarët rreth orës 4 të mëngjesit. Pastaj është lajmëruar policia dhe ka nisur zbardhja e ngjarjes e ndihmuar edhe nga dëshmitë e familjarëve, të cilët kanë arritur edhe ata të sigurojnë pamje të kamerave, sidomos atyre afër banesës. Kjo ngjarje është e mirëmenduar dhe e përgatitur për ta vrarë.

Sipas hetimeve, autorët në fillim kanë dashur ta hedhin 22 vjeçarin së bashku me automjetin në urën e Ulzës. Duken gjurmët teksa kanë tentuar ta hidhnin aty. Pasi kanë dështuar aty, kanë shkuar më tutje në liqenin e Shkopetit, ku kanë realizuar synimin e tyre. Ajo që është më tragjike është fakti se autorët e kanë eliminuar Renis Dobrës për një shumë prej 10 mijë eurosh që kishte kushtuar lënda narkotike në Gjermani, të cilën mendohet se Dobrës ia ka kapur policia”, tha ai.

The post “E vranë për 10 mijë euro”, gazetari zbulon detajet e vrasjes së Renis Dobrës: Ditën e ngjarjes shkoi në Burrel për… first appeared on JavaNews.al.

Një shqiptar, i dënuar më parë për vjedhje dhe i dëbuar dy herë nga Mbretëria e Bashkuar, ka sfiduar sërish autoritetet britanike, duke publikuar video në rrjete sociale, ku shfaqet duke drejtuar një Benz Mercedes luksoz me targa të personalizuara në rrugët e Londrës.

28-vjeçari Dorian Puka filmoi veten duke treguar targën e re ‘DO24 AMG’, që pasqyronte emrin e tij dhe markën luksoze të Mercedesit 80 mijë paund. Më pas postoi një video në TikTok, duke ngarë automjetin luksoz nëpër rrugët e Londrës, shkruan Telegraph.

I riu shqiptar ka ngjallur polemika për faktin se autoritetet nuk mund ta deportojnë sepse ka kërkuar azil. Ai nuk mund të largohet derisa çështja e tij të shqyrtohet plotësisht, një proces që mund të zgjasë muaj ose vite, duke pasur parasysh numrin e madh të apelimeve në gjykatën e imigracionit.

Shqiptari fillimisht ra në burg për 9 muaj në vitin 2016, dhe më pas u deportua vitin pasardhës, kur tentoi që të vidhte me forcë një pronë, por u pikas nga pronari përmes kamerës teksa ndodhej me pushime. Ai arriti që të hynte sërish në tokën angleze, ku kreu sërish një sërë vjedhjesh në Londër.

Ngjarja ka shkaktuar reagime politike. Deputeti Chris Philp, e quajti një “turp kombëtar” faktin që një kriminel i dëbuar mund të kthehet dhe të sfidojë hapur ligjin, ndërsa kritikoi qeverinë për mungesë kontrolli mbi sistemin e imigracionit.

“Ky bandit shqiptar është burgosur, është deportuar, është rikthyer fshehurazi dhe tani po tallet me autoritetet në internet duke e valëvitur kërkesën e tij për azil si një kartë VIP. E megjithatë, disi, nuk është deportuar”, tha ai.

Ministria e Brendshme deklaroi se nuk mund të deportojë individë derisa të përfundojnë proceset ligjore të kërkesës për azil, por theksoi se janë duke forcuar masat për largimin e personave pa të drejtë qëndrimi në vend.

The post I dëbuar dy herë nga Anglia/ I riu shqiptar publikon video rrugëve të Londrës me “Mercedezin” 80 mijë paund first appeared on JavaNews.al.

Deputetja e PD Jorida Tabaku, në emisionin “Kjo Javë” në News24 është ndalur në aksionin më të fundit të marrë nga qeveria, për lirimin e hapësirave publike, një aksion që ka kulmuar në kryeqytet, me lirimin e 20 mijë metrave katrorë sipas kryeministri Rama.

Tabaku u shpreh se një qeverisje e tillë me aksione, është një shkak për rritjen edhe më të madhe të informalitetit, ndërsa ka shtuar se shteti ka tentuar që të tregojë forcën me biznesin e vogël.

Sipas saj, kjo mazhorancë ka një politikë që në fillim e nxit informalitetin, dhe më pas ndërmerr aksione të tilla.

“Tiranën nuk e ka drejtuar PD dhe lejet janë dhënë nga ata që e drejtonin. Kush ka lejuar abuzimet? Ka pasur disa leje të dhëna nga institucione të ndryshme. Jam kundër këtij tregimi forcë që shkon te biznesi në mes të sezonit turistik. E dimë që shteti është i fortë dhe ka çdo instrument në dorë. Pse duhet të bëhet kjo me biznesin e vogël? Kjo qeverisje me aksione ka rritur informalitetin. Sepse nga ana tjetër shohim aksione si legalizimi i të gjitha ndërtesave pa leje, stallave etj. Pra e stimulojnë informalitetin dhe më pas bëjnë aksione të tilla.

Po të shkosh në fshatrat e Tiranës, na thonë që është e pamundur të ndërtosh sepse të shkon më shumë “qoka” se ndërtimi”, tha ajo.

The post Lirimi i hapësirave publike/ Tabaku: Shteti tenton të tregojë ‘forcën’ me biznesin e vogël, por… first appeared on JavaNews.al.