Një ngjarje e rëndë ka ndodhur sot në Shëngjin, ku një 23-vjeçar dyshohet se ka rënë nga ballkoni aksidentalisht.

23-vjeçari me banim në Bruksel është transportua në Spitalin e Traumës në Tiranë, për ndihmë më të specializuar mjekësore.

“Rreth orës 17:40 në ambientet e një hoteli në Shëngjin, dyshohet se ka rrëshqitur aksidentalisht dhe ka rënë nga lartësia (ballkoni), shtetasi R. I., 23 vjeç, banues në Burrel, pushues në Shëngjin. 23-vjeçari është transportua në Spitalin e Traumës në Tiranë, për ndihmë më të specializuar mjekësore”, njofton policia.

Grupi hetimor po punon për sqarimin e plotë të rrethanave të rastit.

The post Ishte me pushime në Shëngjin, 23-vjeçari rrëshqet dhe bie aksidentalisht nga ballkoni i hotelit appeared first on Albeu.com.

Kaosi politik në Kosovë nuk është as rastësi dhe as paaftësi, por një situatë e krijuar me qëllim nga partitë politike për të mbrojtur interesat dhe pushtetin e tyre. Kështu u shpreh për “Syri Tv” akademiku Nexhmedin Spahiu i cili theksoi se qytetarët janë të vetmit që humbin nga ky kaos institucional.

Sipas tij, mazhoranca dhe opozita po e mbajne peng vendin për pazare dhe llogari personale. Sakaq, ai hodhi akuza ndaj Gjykatës Kushtetuese në Kosovë duke e bërë pjesë të bllokadës. Spahiu deklaroi se kriza po përdoret si mjet që disa të qëndrojnë në postet që janë edhe pa legjitimitet politik.

“Ngërçi politik në Kosovë i intereson të gjithëve, përveç qytetarëve kosovarë, të cilët paguajnë taksa për shërbime që nuk i marrin. Si pasojë e kësaj situate, as Parlamenti, as Qeveria, as Presidentja dhe as Gjykata Kushtetuese nuk e bëjnë punën e tyre, sepse të gjithëve u leverdis kjo gjendje kaosi. Të gjithë shohin interesin e tyre në këtë situatë, dhe në një sistem me vlera të dobëta, kjo është përgjigjja për atë që po ndodh sot në Kosovë.

Interesi i partisë në pushtet është që të mbajë një qeveri në detyrë, pasi nuk po arrin të krijojë shumicën e nevojshme parlamentare. Ajo nuk dëshiron të ndajë pushtetin, nuk do që Fatmir Limaj të marrë postin e kryetarit të Kuvendit, dhe për këtë arsye po shfrytëzon një vendim të diskutueshëm të Gjykatës Kushtetuese të vitit [mungon viti], e cila në atë kohë mori një vendim për të mbajtur Thaçin në pushtet, duke e interpretuar se posti i kryetarit të Kuvendit i takon partisë së parë që del nga zgjedhjet, dhe jo asaj që ka shumicën e votave. Vendimi ishte absurd: nëse i takon partisë së parë, përse duhet të votohet? Nëse votohet, duhet ta fitojë ai që merr më shumë vota. Ky vendim absurd ka mbetur peng për Kosovën edhe sot dhe po shfrytëzohet nga Albin Kurti.

Opozita nuk ka interes të bëhet konstituimi i institucioneve, sepse ka frikë se Albin Kurti nuk do të arrijë të formojë qeverinë dhe vendi do të shkojë në zgjedhje të reja – diçka që nuk i leverdis.

Ka edhe aktorë jashtë parlamentit që nuk janë të interesuar për zgjedhjen e institucioneve. Një prej tyre është Presidentja, së cilës i përfundon mandati pas disa muajsh. Duke qenë se ka humbur përkrahjen dhe ka prishur marrëdhëniet me shumicën e spektrit politik, ajo nuk ka asnjë shans të rizgjidhet. Prandaj, e vetmja mundësi që ajo sheh për të qëndruar në post, është krijimi i një ngërçi politik të tillë që do të detyrojë ndërkombëtarët të ndërhyjnë në Kosovë me shpresën se në atë rast do të imponohet si presidente.

Gjykata Kushtetuese kishte mundësinë të korrigjonte vendimin e gabuar të së kaluarës, ta shpallte të pavlefshëm dhe t’i jepte zgjidhje situatës, por edhe aty ekziston një konflikt interesi. Në rast se presidentes i përfundon mandati dhe nuk ka kryetar Kuvendi, detyrën e ushtruesit të presidentit e merr kryetari i Gjykatës Kushtetuese. Kjo është arsyeja pse edhe Gjykatës i leverdis që ngërçi të vazhdojë.

Zgjedhjet lokale nuk rrezikohen, sepse presidentja është ende në mandat deri në përfundimin e tyre, kështu që ato do të mbahen. Ndoshta ato do të ndihmojnë disi në kthjellimin e situatës politike, pasi do të shërbejnë si një matje e forcave reale politike.

Megjithatë, zgjedhjet e parakohshme mbeten një opsion i pashmangshëm për sa kohë situata mbetet e tillë dhe nuk ekziston një vullnet tjetër politik për ta zgjidhur.”-tha Spahiu.

The post Kaosi politik në Kosovë, Spahiu: Ngërç i qëllimshëm për pushtet! Zgjedhjet e parakohshme, opsion i pashmangshëm appeared first on Albeu.com.

8 persona janë arrestuar nga policia greke, si pjesëtarë të një grupi kriminal që shiste drogë në Mykonos. 4 efektivë të policisë greke dhe 4 shqiptarë, përfshirë dhe një person tjetër në kërkim, bashkëpunonin me njëri-tjetrin duke rihedhur në treg drogë të sekuestruar nga policia.

Hetimet e policisë zbuluan edhe lidhje të oficerëve me pjesëtarë të mafias greke, duke i informuar për kontrollet policore.

Kreu i grupit kriminal ishte një oficer 42-vjeçar grek. Ai kishte qenë i pezulluar që nga 14 janari 2025 për mashtrimin e një ish-partneri në tetor 2024. Një oficer policie 31-vjeçar, që shërbente në Stacionin e Policisë së Akropolit, ishte “krahu i djathtë” i tij. Ai më parë kishte shërbyer në Departamentin e Narkotikëve të Athinës Juglindore, nga ku dyshohet se kishte sekuestruar lëndë narkotike të konfiskuara dhe i kishte shpërndarë ato për shitje përmes rrjetit.

Bashkëpunëtorët e tij ishin një Shef Policie 35-vjeçar i Nëndrejtorisë së Policisë së Mykonos dhe një Shef Policie 43-vjeçar i caktuar në Departamentin e Policisë së Akarnasit. Bashkëpunëtorë civilq të grupit ishin 43-vjeçar i kërkuar, një shqiptar 24-vjeçar dhe motra e tij 29-vjeçare, partnerja e kreut të grupit si dhe dy persona të tjerë nga Shqipëria. Në të njëjtën dosje, akuzohen edhe 13 persona të tjerë, përfshirë një Shef Policie i cili shërben në Departamentin e Policisë Pydna-Kolindros, por gjatë periudhës së hetimit ai shërbente në Nëndrejtorin e Policisë së Mykonosit.

Midis emrave të hetuar, janë tre individë me precedentë të rëndë kriminalë, emrat e të cilëve u përfshinë edhe në dosjen e madhe që heton vrasjet e katër anëtarëve të mafias grekë të cigareve të udhëhequr nga i shumëkërkuari “Entik”, i cili fshihet në Dubai.

Oficeri 42-vjeçar i policisë u arrestua më 23 tetor 2024, për mashtrim të përsëritur kundër ish-partneres së tij. Në atë kohë, telefoni i tij celular u konfiskua. Policia kishte informacione se si kishte një pozicion drejtues në një bandë trafikimi droge në ishullin e Mykonos dhe më gjerë. Deklasifikimi i komunikimeve zbuloi përfshirjen e tij në trafikimin e drogës dhe formimin e një organizate kriminale me të dyshuarit e tjerë. Në të njëjtën kohë, dolën në pah kontaktet e tij me individë të lidhur me aktivitetet e mafias greke, në kontekstin e informimit të tyre rreth kontrolleve të ardhshme policore dhe aktiviteteve të tjera. Shumë nga komunikimet e tij me oficerin 31-vjeçar të policisë u zbuluan, ndërsa regjistrimi i mbikëqyrjes së tyre zbuloi një marrëveshje midis tyre për një pazar droge që i përfshinte të dy.

Oficeri i policisë e informoi 42-vjeçarin për largimin e tij nga Departamenti i Zbatimit të Ligjit për Narkotikët dhe aftësinë që kishte për të larguar lëndët narkotike.

Zbulohen 5 milionë euro në llogari bankare

Autoritetet identifikuan transaksione bankare midis dy oficerëve të policisë, të cilët luajtën një rol kyç në rrjet. Gati 5 milionë euro u gjetën në llogaritë e 42-vjecari dhe partneres së tij, ndërsa dyshohet se ishte i përfshirë edhe vëllai i 29-vjeçaras shqiptare, i cili transportonte dhe kanalizonte drogën e sekuestruar.

Anëtarët e organizatës komunikonin ekskluzivisht përmes aplikacioneve online, ndërsa “truri” policor i rrjetit dyshohet se është i përfshirë edhe në raste të tjera të paligjshme, siç është informimi i biznesmenëve për kontrollet policore.

The post Polici grek bashkëpunonte me shqiptarë për drogën në Mykonos, atij dhe partneres shqiptare u zbulohen 5 mln euro appeared first on Albeu.com.

La Repubblica shkruan se java e ardhshme do ta ndajë Italinë në dy pjesë. Veriu do të përballet me stuhi të forta dhe reshje të dendura, ndërsa në qendrën dhe jugun e shtetit fqinj do të mbizotërojë një valë rekord të nxehti, e përshkruar nga meteorologët si “vala më e fuqishme e dekadave të fundit, ndoshta edhe e historisë”.

Vala afrikane e të nxehtit, e njohur në zhargonin meteorologjik si “Deveja”, po prek që tani rajonet e Siçilisë, Sardenjës dhe Pulias, ku temperaturat kanë arritur tashmë 40°C. Ndërkohë, në një lartësi prej 1 mijë e 500 metrash, parashikohen rreth 30°C, një vlerë jashtëzakonisht e rrallë për Italinë.

Por e gjitha kjo nuk është asgjë krahasuar me atë që pritet të ndodhë nga e hëna në zonat e brendshme lindore të Siçilisë, mes Sirakuzës, Katanias dhe Kaltanisetas. Për shkak të erërave të forta, lagështisë shumë të ulët dhe largësisë nga deti, temperaturat mund të arrijnë deri në 45°C.

Sipas ekspertëve, është e mundur që në këto zona të regjistrohen temperatura maksimale mbi 49°C, një nivel që do të thoshte potencialisht rishkrim i historisë klimatike të Italisë dhe të gjithë Evropës. Kjo do të thyente edhe rekordin evropian prej 48.8°C të regjistruar në gusht të vitit 2021 në Floridia, provincë e Sirakuzës.

Rekordi botëror prej 56.7°C, i vendosur në vitin 1913 në Luginën e Vdekjes (Death Valley), në Kaliforni, mbetet ende larg për momentin. Ai vend njihet si më i nxehti në Tokë dhe vazhdon të tërheqë turistë nga e gjithë bota, të cilët bëjnë foto para termometrit të famshëm të Furnace Creek.

Arritja e temperaturave afro 50°C nën hije në Itali dhe në Evropë do të ishte një precedent historik. Në kushte të tilla ekstreme: metalet fillojnë të zgjerohen (edhe pse nuk është e dukshme me sy të lirë), plastika e butë deformohet, gjalpi apo dylli që kanë pika shkrirjeje më të ulëta shkrihen plotësisht, ndërkohë që infrastruktura dhe rrjetet elektrike mund të rrezikojnë kolaps të menjëhershëm. Por më shqetësuese është se proteinat në trupin e njeriut nisin të denaturohen, çka mund të çojë në çrregullime mendore, marrje mendsh dhe humbje ndjenjash.

Kjo është ajo që meteorologu Mattia Gussoni nga ilMeteo.it e cilëson si “fytyra e re e verës së shekullit XXI”: pasojë e drejtpërdrejtë e ndryshimeve klimatike të shkaktuara nga aktiviteti njerëzor, me ngjarje ekstreme që po bëhen gjithnjë e më të shpeshta dhe të qëndrueshme.

Por kjo situatë ka edhe një anë tjetër. Pjesa më e madhe e Mesdheut qendror dhe perëndimor do të përjetojë temperatura +8°C mbi mesataren sezonale, veriu i Italisë do të gjendet në një “zonë përplasjeje” atmosferike, e goditur nga një ciklon që do të prekë edhe Evropën veriore.

Veçanërisht në Alpe, në Piemonte dhe Lombardi, priten reshje intensive brenda pak orësh, mbi 100-150 mm, sasi që normalisht bie për një muaj të tërë, duke rritur rrezikun për përmbytje dhe rrëshqitje dheu në zona të pjerrëta./ La Repubblica

The post Termometri do të shënojë 50 gradë? Pritet vala më ekstreme në histori në Itali appeared first on Albeu.com.

Ditët e fundit qeveria ka ndërmarrë aksion për shembjen e ndërtimeve pa leje në zonën turistike të Thethit, ç’ka solli edhe përplasje mes pronarëve dhe efektivëve të policisë apo punonjësve të IMT.

Po ashtu një tjetër aksion i ndërmarrë në të gjithë vendin është ai për lirimin e hapësirave publike që janë zënë nga lokalet apo bizneset.

Për këto zhvillime të fundit që kanë krijuar edhe reagime në publik, Edi Rama ka njoftuar se nesër ‘rikthehet’ para publikut me rubrikën në rrjetet sociale “Sy m’ sy”’.

“Ca thonë pse tani e jo më parë? Ca pse tani e jo më vonë? Kurse unë them pse jo nesër një SY M’SY?
NESËR pra, që në mëngjes, LIVE padyshim, KËTU ku tjetër?”, shkruan Rama

The post Aksioni për shembjen e ndërtimeve pa leje në Theth dhe lirimi i hapësirave publike, Rama ‘rikthehet’ para publikut: Nesër këtu! appeared first on Albeu.com.

Kryeministri i Izraelit, Benjamin Netanyahu, po shërohet nga një rast helmimi ushqimor, njoftoi sot zyra e tij, duke bërë me dije se ai do të vazhdojë të ushtrojë detyrat nga shtëpia gjatë tre ditëve të ardhshme.

Netanyahu, 75 vjeç, u ndje keq gjatë natës për shkak të një inflamacioni në zorrë dhe dehidratimi, për të cilat po merr trajtim intravenoz, thuhet në deklaratën zyrtare.

“Sipas këshillave të mjekëve të tij, kryeministri do të pushojë në shtëpi për tre ditë dhe do të vijojë të menaxhojë punët e shtetit prej andej,” shtoi zyra e tij.

Netanyahu ka pasur disa probleme shëndetësore në të kaluarën. Në vitin 2023, atij iu vendos një stimulues kardiak (pacemaker), ndërsa në dhjetor të po atij viti iu nënshtrua një ndërhyrjeje për heqjen e prostatës, pasi u diagnostikua me një infeksion të traktit urinar.

The post Helmohet Netanyahu, u ndje keq mbrëmë prej një inflamacioni në zorrë dhe dehidratimi appeared first on Albeu.com.

Prej ditësh vijon të jetë aktiv zjarri në Dukat të Vlorës, ku mbi 80 efektivë janë angazhuar nga toka dhe ajri, për të mbajtur nën kontroll flakët që kanë pushtuar zonën.

Sot në terren ka zbritur ministri i Mbrojtjes, Pirro Vengu, i cili i shoqëruar nga drejtori i Emergjencave Civile, Haki Çako, kanë shkuar në Dukat për të parë nga afër situatën me zjarrin problematik që kërcënon Parkun Kombëtar të Llogarasë.

Përmes një postim në rrjetet sociale, Vengu shkruan se për shkak të terrenit të vështirë malor, është aktivizuar ndihma nga ajri përmes helikopterëve Cougar të ushtrisë, për të parandaluar përhapjen e zjarrit.

Sipas Vengut, orët në vijim do të jenë të vështira për shkak të erës së fortë dhe temperaturave të larta. Të paktën 50 efektivë janë në terren duke punuar për shuarjen e zjarrit.

“Gjendemi këtu në lartësitë e Dukatit, ku prej disa ditësh në fakt kemi një situatë dhe një brez zjarri i cili ka rrezikuar në fakt një përhapje domethënëse. Që prej orëve të para të mëngjesit, kemi një ndërhyrje nga ajri dhe mbështetje nga toka me efektivë të Forcave të Armatosura, të Bashkisë Vlorë, të Pyjores së Vlorës, praktikisht 50 persona që janë në operacion e sipër sot në këtë zonë, në mënyrë që të krijohet një perimetër dhe të mund të parandalohet kalimi i këtij fronti zjarri në anën tjetër të Parkut të Llogarasë. Do jenë orë të vështira për efekt jo vetëm të termometrit, por edhe të erërave të forta që ka zona, ndaj duhet të ruajmë vigjilencën maksimale. Operacioni i mbështetjes nga ajri me helikopterët Cougar do të vijojë gjatë gjithë ditës në mënyrë që të kemi të gjithë instrumentet në dispozicion”, tha ministri i Mbrojtjes.

The post Zjarri në Dukat të Vlorës, ministri Vengu zbret në terren: Orë të vështira… appeared first on Albeu.com.

Një aksident me vdekje ka ndodhur ditën e sotme në divjakë. Mësohet se një 62-vjeçar duke lëvizur me mjetin e tij bujqësore në rrugën e parcelave ka humbur kontrollin e mjetit duke u përmbysur në kanal.

Maliq Meta është bllokuar në mjet dhe si pasojë ka gjetur vdekjen e menjëhershme.

Megjithatë edhe pse janë afruar menjëherë bashkëfshatarët e tjerë për t’i dhënë ndihmë nuk kanë arritur ta shpëtojnë.

The post Aksident në Divjakë/ Përmbyset mjeti bujqësor dhe e zë poshtë, humb jetën tragjikisht 62-vjeçari appeared first on Albeu.com.

Irani dhe tre vende të tjera evropiane, Britania, Franca dhe Gjermania, kanë rënë dakord të rifillojnë bisedimet mbi programin bërthamor të Teheranit dhe heqjen e mundshme të sanksioneve, por koha dhe vendi i negociatave janë në diskutim.

Agjencia gjysmëzyrtare e lajmeve Tasnim raportoi se raundi i ardhshëm i bisedimeve do të mbahet në nivelin e zëvendësministrave të jashtëm të Iranit, Mbretërisë së Bashkuar, Francës dhe Gjermanisë.

The post Irani bie dakord me Britaninë, Francën dhe Gjermaninë për të rifilluar bisedimet bërthamore appeared first on Albeu.com.

Shkrimtarja Mimoza Ahmeti ishte e ftuar mbrëmë në ‘’Goca dhe Gra’’ dhe dukej qartë që nuk kishte ndonjë simpati të madhe për Egla Cenon. Kjo u konfirmua në momentin që aktorja Egla Ceno i kërkoi poetes Mimoza Ahmeti që t’i vendoste një autograf në një nga librat që kishte sjellë me vete, por Mimoza refuzoi duke thënë e prerë: Jo.

Aktorja ka zgjedhur ta ironizojë këtë veprim të shkrimtares ndaj saj, ku përmes një postimi shkruan se po i shkruan nga fundi i krevatit të spitalit ku është shtruar nëna e saj.

“Ti je artiste dhe siç e dimë tashmë, artistët nuk janë të detyruar të jenë njerëz”, shkruan Egla duke shtuar se veprimi i shkrimtares ishte “një simfoni hipokrizie e shoqëruar me simptoma të një narçizmi të veshur me ‘poezi’ dhe ftohtësi që as metaforat nuk e ngrohin dot”.

Reagimi i plotë i Egla Ceno:

E dashur Moza, ose më saktë: Moza që u ngrit mbi dorëshkrimet e një epoke, që hëngri metafora me lugë floriri e na mësoi të mos i kërkojmë dedikim poetëve, sepse ata janë mbi ne, si retë, si mjegulla, si keqkuptimi.

Po të shkruaj një letër publike nga fundi i një shtrati spitali ku shtrirë është nëna ime, sepse… le të themi që ti e meriton.

Moza e dashur, të ndoqa me kureshtje naive (impenjimi do kishte qenë i tepërt) gjatë intervistës që më ra për pjesë të të bëj, ku erdhe bashkë me librin tënd, plot 5 kopje, ndoshta për ta treguar, ndoshta për ta lexuar, ndoshta thjesht për të patur diçka që të mbash në dorë.

Unë në një akt njerëzor tu afrova me stilolaps në dorë, me lutjen e heshtur të një lexuesi që kërkon një dedikim dhe ti nuk ma dhe. Keqardhje? Jo. Habi? As që bëhet fjalë. Ti je artiste dhe siç e dimë tashmë, artistët nuk janë të detyruar të jenë njerëz.

E pra, Moza e madhe, nëse një lexues nuk e meriton një dedikim, pse ta marrë librin? Dhe nëse një autore nuk e sheh të arsyeshme të bëjë një dedikim, pse ta sjellë librin në televizor? Sepse, në fund të fundit, kjo është një simfoni hipokrizie e shoqëruar me simptoma të një narçizmi të veshur me “poezi” dhe ftohtësi që as metaforat nuk e ngrohin dot.

Ti nuk më le dot si “pemë”, më le si dikë që po i kërkonte dedikim dikujt që ka stil përbuzjen si art. Dhe ky është zhanër më vete.

Me përshëndetje të përmbajtura,

Një lexuese që do poezi, por jo pa njerëzi.

The post Mimoza Ahmeti refuzoi t’i japë një autograf, Egla Ceno i përgjigjet një ditë më pas: Hipokrizi e shoqëruar me simptoma të një narçizmi! appeared first on Albeu.com.

Dashi
Të lindur më: 21 Mars – 19 Prill
Në marrëdhënie sot do keni nevojë për më shumë mirëkuptim dhe durim, ndaj shmangni debatet e panevojshme me partnerin. Në punë paraqiten mundësi për të shfaqur aftësitë tuaja, por mbani vëmendjen tek detajet për të mos bërë gabime. Shëndeti kërkon më shumë kujdes ndaj aktivitetit fizik, mos e neglizhoni pushimin. Në aspektin financiar, është mirë të mos shpenzoni më shumë seç duhet, ruani një balancë të qëndrueshme.

Demi
Të lindur më: 20 Prill – 20 Maj
Në dashuri pritet një klimë e ngrohtë dhe harmonike, ku do ndiheni të kuptuar nga partneri juaj. Në punë, një lajm i mirë mund të vijë nga një koleg, por mos u nxitoni me vendime të rëndësishme. Kujdesuni për shëndetin, veçanërisht për sistemin tretës dhe hidratimin. Financat janë të qëndrueshme, por shmangni investimet impulsive sot.

Binjakët
Të lindur më: 21 Maj – 20 Qershor
Ditë e mirë për të forcuar lidhjet emocionale dhe për të shprehur ndjenjat pa frikë, pasi partneri do tregojë mirëkuptim. Në ambientin e punës do keni mundësi të dalloheni për idetë tuaja origjinale, ndaj mos hezitoni të propozoni diçka të re. Shëndeti është i mirë, por një shëtitje në ajër të pastër do ju bëjë akoma më energjikë. Në planin financiar, do shfaqen disa shpenzime të papritura, ndaj organizohuni më mirë.

Gaforrja
Të lindur më: 21 Qershor – 22 Korrik
Në jetën sentimentale, sot mund të ndjeni një largësi emocionale, ndaj flisni hapur me partnerin për nevojat tuaja. Në punë, rutina do dominojë, por mund të përfitoni nga kjo për të rregulluar çështje të mbetura pezull. Shëndeti kërkon vëmendje ndaj ushqimit dhe pushimit të mjaftueshëm. Financat janë të mira, por këshillohet të shmangni huadhëniet.

Luani
Të lindur më: 23 Korrik – 22 Gusht
Për sa i përket dashurisë, dita ju favorizon për të bërë plane afatgjata me partnerin dhe për të ndarë ëndrrat tuaja. Në punë do ndiheni të motivuar dhe do arrini rezultate të dukshme falë përkushtimit tuaj. Shëndeti është i qëndrueshëm, por mos neglizhoni aktivitetet relaksuese. Financat janë në përmirësim, por bëni kujdes me shpenzimet e tepërta.

Virgjëresha
Të lindur më: 23 Gusht – 22 Shtator
Sot do ndjeni një ndjesi të fortë stabiliteti në marrëdhëniet personale, ku mirëkuptimi do jetë në qendër të vëmendjes. Në punë, një projekt i ri do kërkojë angazhim maksimal, ndaj organizohuni mirë për të shmangur stresin. Shëndeti është i mirë, por merrni kohë për veten dhe për hobi që ju relaksojnë. Financat janë të balancuara, por mos bëni shpenzime për gjëra të panevojshme.

Peshorja
Të lindur më: 23 Shtator – 22 Tetor
Në dashuri do ndiheni të frymëzuar dhe do keni dëshirë të provoni diçka ndryshe me partnerin, duke sjellë freski në lidhjen tuaj. Në aspektin profesional, një informacion i ri mund t’ju ndihmojë të merrni një vendim të rëndësishëm. Kujdesuni për shëndetin, sidomos për tensionin dhe pushoni sa më shumë të mundeni. Në financa, është mirë të shmangni riskun dhe të fokusoheni tek kursimet.

Akrepi
Të lindur më: 23 Tetor – 21 Nëntor
Ditë ideale për komunikim të hapur me partnerin dhe për të sqaruar çdo keqkuptim që ka mundur të lindë së fundmi. Në punë do keni mundësi të bashkëpunoni me kolegë të rinj, çka mund t’ju hapë dyer për projekte të ardhshme. Shëndeti mund të ndikohet nga lodhja mendore, ndaj gjeni kohë për pushim. Financat kërkojnë vëmendje, mos u përfshini në shpenzime të mëdha sot.

Shigjetari
Të lindur më: 22 Nëntor – 21 Dhjetor
Në marrëdhënie do ndiheni më të lidhur se kurrë dhe mund të merrni një vendim të rëndësishëm për të ardhmen tuaj. Në punë, vlerësimi nga eprorët do ju japë motivim për të vazhduar përpara, por mos harroni të bashkëpunoni me ekipin. Shëndeti është i mirë, por mos e teproni me ushqimin e shpejtë. Financat janë të qëndrueshme, por është mirë të bëni një planifikim për muajt në vijim.

Bricjapi
Të lindur më: 22 Dhjetor – 19 Janar
Sot është një ditë e mirë për të ndarë ndjenjat me partnerin, veçanërisht nëse keni pasur tensione të vogla kohët e fundit. Në punë, një detyrë e re mund të kërkojë më shumë angazhim, prandaj planifikoni mirë kohën tuaj. Shëndeti kërkon më shumë lëvizje fizike dhe kujdes ndaj stresit. Financat janë të balancuara, por mos merrni vendime të nxituara për investime.

Ujori
Të lindur më: 20 Janar – 18 Shkurt
Në dashuri do ndjeni përkrahje dhe ngrohtësi nga partneri, duke ju dhënë siguri për të ardhmen. Në punë, bashkëpunimi do jetë çelësi i suksesit, ndaj mos hezitoni të kërkoni ndihmë kur është e nevojshme. Kujdesuni për shëndetin duke u ushqyer shëndetshëm dhe duke marrë pushim të mjaftueshëm. Financat janë të qëndrueshme, por shmangni shpenzimet për luks të panevojshëm.

Peshqit
Të lindur më: 19 Shkurt – 20 Mars
Marrëdhëniet sentimentale do jenë të balancuara, por mirë është të kaloni më shumë kohë me personin e zemrës. Në punë, një ide e re mund të marrë vëmendje dhe të sjellë përfitime në të ardhmen, ndaj mos u tërhiqni. Shëndeti është i mirë, por bëni kujdes me lodhjen e tepërt fizike. Financat paraqiten solide, por ruani kursimet për projekte afatgjata.

The post Horoskopi 20 Korrik, ja çfarë kanë parashikuar yjet për ju appeared first on Albeu.com.

Në çfarë ore duhet të pini ujë për përfitimet më të mira shëndetësore?

Pirja e ujit është një veprim i thjeshtë, me një mori përfitimesh për shëndetin fizik dhe mendor. Por kujdes, nuk është vetëm çështja se sa ujë pini, por edhe kur e pini atë, për të përmirësuar shëndetin tuaj.

Pirja e ujit mund të bëjë ndryshimin midis ndjenjës së lodhjes ose të energjisë, midis lëkurës së lodhur dhe lëkurës që shkëlqen, midis urisë së pakontrolluar dhe një metabolizmi më aktiv.

Sipas disa studimeve, ka momente strategjike kur pirja e alkoolit mund ta ndihmojë trupin të funksionojë më mirë, të rregullojë ritmet e brendshme dhe t’i japë një shtysë konkrete mirëqenies së përditshme.

Sapo zgjoheni për të aktivizuar metabolizmin

Pirja e një gote të madhe me ujë sapo zgjoheni është një nga këshillat më të zakonshme dhe efektive. Kjo sepse pas një gjumi të gjatë nate, trupi është i dehidratuar dhe ka nevojë të rigjallërohet.

Një gotë ujë në mëngjes ndihmon në përshpejtimin e metabolizmit, nxit eliminimin e toksinave dhe përgatit trupin tuaj për mëngjes. Shtimi i disa pikave limoni do ta rrisë edhe më tej efektin e detoksifikimit.

Kur ke uri (por nuk e di nëse je vërtet i uritur)

Sa herë keni ndjerë paksa etje dhe keni ngrënë diçka të lehtë, vetëm për të kuptuar se në të vërtetë nuk keni pasur uri? Në realitet, trupi shpesh e ngatërron etjen me urinë.

Pirja e një gote uji gjatë atyre kohërave mund t’ju ndihmojë të kuptoni nëse keni vërtet nevojë për ushqim apo thjesht për hidratim. Kjo është një strategji e dobishme, jo vetëm për të kontrolluar kaloritë, por edhe për ta njohur veten më mirë.

Gjatë vakteve, por pa e ekzagjeruar

Disa njerëz mendojnë se pirja e ujit me vaktet mund të ngadalësojë tretjen. Në realitet, kur konsumohet në sasi të moderuara, uji mund të ndihmojë në zbërthimin e ushqimit në stomak dhe të ndihmojë enzimat tretëse të bëjnë punën e tyre më mirë.

Megjithatë, është e rëndësishme të mos e teproni. Pirja e tepërt e ujit në të njëjtën kohë mund të hollojë lëngjet gastrike dhe të ngadalësojë disi procesin e tretjes. Këshilla jonë? Gllënjka të vogla, në temperaturë ambienti, veçanërisht nëse pjatat janë shumë të kripura ose pikante.

Koha midis mëngjesit, drekës dhe darkës është shpesh koha ideale për të pirë ujë pa e sforcuar tretjen. Pikërisht gjatë këtyre orëve trupi fillon të dehidratohet ngadalë, veçanërisht nëse punoni, lëvizni shumë ose jeni të ekspozuar ndaj ajrit të kondicionuar.

Pirja e ujit midis vakteve ndihmon në ruajtjen e niveleve të hidratimit dhe gjithashtu mund të mbajë nën kontroll dëshirat emocionale. Dhe nëse harroni herë pas here, vendosni një alarm: trupi juaj do t’ju falënderojë.

Kushdo që merret me sport e di që pirja e ujit mund të ketë një ndikim të madh në performancë. Pirja e ujit para stërvitjes ndihmon në përgatitjen e muskujve, lubrifikimin e nyjeve dhe ruajtjen e niveleve të larta të energjisë.

Gjatë dhe pas aktivitetit fizik, është thelbësore të rimbushni lëngjet e humbura nëpërmjet djersës: gllënjka të vogla çdo 15-20 minuta janë të mjaftueshme për të shmangur dhimbjet e barkut, marramendjen ose lodhjen e parakohshme. Pavarësisht nëse jeni një vrapues 10 km apo një praktikues i lehtë i jogas, hidratimi është një pjesë integrale e rutinës suaj të fitnesit.

Në ato momente kur ndiheni të rraskapitur, në vend që të merrni menjëherë një kafe, provoni një gotë me ujë: dehidratimi, edhe ai i lehtë, mund të shkaktojë rënie të energjisë, lodhje dhe vështirësi në përqendrim.

Hidratimi ndihmon qarkullimin e gjakut dhe oksigjenimin e indeve, përfshirë trurin. Dhe nëse jeni në palestër ose sapo keni bërë ushtrime, mos harroni se rimbushja e lëngjeve është edhe më e rëndësishme për të shmangur dhimbjet e barkut, dhimbjet e kokës dhe lodhjen.

Para ciklit menstrual, për të zvogëluar ënjtjen dhe irritueshmërinë

Ditët para ciklit tuaj njihen për fryrje, mbajtje të ujit dhe luhatje të humorit. Mund të duket paradoksale, por të pirit më shumë ujë në të vërtetë ju ndihmon të mbani më pak lëngje: hidratimi i vazhdueshëm stimulon veshkat të punojnë më mirë, ndihmon në kullimin e mbeturinave dhe gjithashtu ndihmon në zvogëlimin e ndjenjës së rëndesës dhe lodhjes tipike të PMS-së.

Ethe, grip, viruse në stomak ose dhimbje koke. Në të gjitha këto raste, uji është një kurë e padukshme, por e fuqishme. Trupi, nën stres, konsumon më shumë lëngje për të ulur temperaturën, për të eliminuar toksinat dhe për t’u rikuperuar.

Gjatë sëmundjes, lëkura gjithashtu ka tendencë të thahet dhe të humbasë elasticitetin. Kjo është arsyeja pse një nga këshillat e para mjekësore kur ndiheni keq është: “Pini shumë ujë”. Të dish se kur duhet të pish ujë mund të të ndihmojë vërtet të shërohesh më shpejt.

Nëse po përpiqeni të humbni peshë, mos harroni se uji mund të jetë një aleat i fuqishëm. Pirja e rregullt e tij gjatë gjithë ditës përshpejton metabolizmin tuaj, mbështet funksionin e veshkave dhe parandalon mbajtjen e ujit.

Për më tepër, uji merr pjesë aktive në lipolizë (zbërthimin e yndyrës) dhe zvogëlon dëshirën për pije me sheqer ose ushqime të lehta me shumë kalori. Për këtë arsye, është thelbësore të dini se kur duhet të pini ujë për të arritur rezultatet e dëshiruara.

Pirja e një gote të vogël me ujë para gjumit mund të ndihmojë në shmangien e dehidratimit gjatë natës, i cili është më i zakonshëm nga sa mendoni.

Megjithatë, këshillohet të mos e teproni, në mënyrë që të mos keni nevojë të zgjoheni në mes të natës për të shkuar në banjo. Një gllënjkë është e mjaftueshme për të ruajtur ekuilibrin dhe për t’ju ndihmuar të pushoni më mirë.

The post Në çfarë ore duhet të pini ujë për përfitimet më të mira shëndetësore? appeared first on Albeu.com.

Një ngjarje tragjike ka ndodhur në Gjirin Ha Long, një prej destinacioneve më të njohura turistike të Vietnamit, ku një anije turistike është përmbysur gjatë një stuhie të papritur, duke shkaktuar vdekjen e të paktën 34 personave, ndërsa disa të tjerë rezultojnë ende të zhdukur.

Sipas autoriteteve lokale, incidenti ndodhi si pasojë e motit të keq me shi të rrëmbyeshëm dhe erëra të forta, që kanë penguar ndjeshëm përpjekjet për shpëtim. Deri më tani, 11 persona janë nxjerrë të gjallë nga uji, ndërsa kërkimet për të mbijetuarit vazhdojnë.

Anija turistike, e identifikuar me emrin Wonder Seas, kishte në bord 53 persona, shumica prej tyre familje vietnameze nga kryeqyteti Hanoi, të cilët kishin ardhur për vizitë në këtë zonë piktoreske.

Sipas një deklarate të Rojes Kufitare dhe Marinës Vietnameze, anija është përballur me një stuhi të papritur, e cila e ka përmbysur në mes të gjirit. Ekipet e shpëtimit janë në terren, por kushtet atmosferike të vështira vazhdojnë të pengojnë ndërhyrjen.

Gjiri Ha Long është një Trashëgimi Botërore e UNESCO-s dhe një ndër atraksionet më të frekuentuara në Vietnam, i njohur për peizazhin me ishuj gëlqerorë dhe ujërat e qeta – por në raste të rralla mund të preket nga moti ekstrem.

Autoritetet vietnameze kanë nisur hetimet për të sqaruar nëse janë respektuar masa të duhura sigurie dhe nëse ka pasur paralajmërime për stuhinë në momentin e nisjes së udhëtimit.

The post Anija turistike përmbyset gjatë stuhisë, 34 të vdekur dhe disa të zhdukur në Vietnam appeared first on Albeu.com.

Agjencia për Mbrojtjen Civile në Gaza raportoi se sulmet izraelite vranë të paktën 26 persona dhe lanë të plagosur mbi 100 të tjerë pranë dy qendrave të ndihmës në jug të territorit palestinez. Zëdhënësi i agjencisë, Mahmud Basal i tha AFP-së se 22 vetë u vranë në jugperëndim të Han Junisit dhe 4 të tjerë në afërsi të një qendre në veriperëndim të Rafahut, duke fajësuar “sulmet izraelite”. Ushtria izraelite bëri të ditur se po heton këto pretendime.

Për shkak të kufizimeve të vendosura ndaj mediave ndërkombëtare, raportimet për numrin e viktimave dhe detajet për sulmet e raportuara, nuk mund të konfirmohen në mënyrë të pavarur.

Lufta në Gaza, që më 7 tetor 2023 u nxit nga sulmi ndaj Izraelit i kryer nga Hamasi, grup palestinez i shpallur “organizatë terroriste” nga Shtetet e Bashkuara të Amerikës e Bashkimi Europian ka shkaktuar një krizë të rëndë humanitare në enklavën palestineze.

Mbi 2 milion persona që jetojnë në Gaza po përballen me mungesa të furnizimeve ushqimore e të furnizimeve të tjera elementare. Në anën tjetër, mjekët kanë raportuar për rritje të madhe të rasteve të kequshqyerjes.

Raportimet për sulmet ndaj personave që kërkojnë ndihma pranë qendrave të shpërndarjes janë të përditshme dhe autoritetet palestineze fajësojnë Izraelin lidhur me këto raste. Një ditë më parë, Agjencia për Mbrojtjen Civile në Gaza bëri të ditur se ishin 9 persona që mbetën të vrarë pranë qendrës për shpërndarjen e ndihmës në veriperëndim të Rafahut.

Fondacioni Humanitar për Gazën e që mbështetet nga Shtetet e Bashkuara dhe Izraeli, mori përsipër shpërndarjen e ndihmës në Gaza në fund të muajit maj. Ky fondacion deklaroi se të mërkurën e kaluar, 20 persona vdiqën në Han Junis. Por, për vdekjen e tyre, fondacioni fajësoi “personat e armatosur të lidhur me Hamasin” duke pretenduar se ata shkaktuan “skena kaotike e të rrezikshme”, si dhe “qëlluan drejt personave që kërkonin ndihma”.

Më herët gjatë javës që po lëmë pas, Kombet e Bashkuara njoftuan se kanë regjistruar 875 të vrarë në Gaza. Ata po tentonin të merrnin ndihma dhe mes tyre ishin 674 që kanë humbur jetën “në afërsi të qendrave të Fondacionit Humanitar për Gazën”, që kur ky fondacion nisi operacionet për shpërndarjen e ndihmës

The post Nuk ndalen sulmet izraelite në Gaza, viktima e të plagosur appeared first on Albeu.com.

Kreu i Lëvizjes Vetëvendosje, njëherësh kryeministri në detyrë i Kosovës, Albin Kurti, dhe udhëheqësi i Nismës Socialdemokrate, Fatmir Limaj, janë takuar të shtunën, më 19 korrik, në një restorant në Prishtinë, raportojnë media në Kosovë, por ende nuk dihet nëse kanë arritur ndonjë marrëveshje për daljen nga ngërçi politik, që do të mundësonte krijimin e institucioneve të reja.

Nga LVV-ja dhe Nisma nuk janë përgjigjur thirrjeve të REL-it për koment. Më herët gjatë ditës, eksponentët e dy partive konfirmuan se ky takim do të mbahej, por nuk dhanë detaje për të. Takimi u mbajt teksa po afrohet afati i 26 korrikut – i vendosur nga Gjykata Kushtetuese – për konstituimin e përbërjes së re parlamentare të dalë nga zgjedhjet e shkurtit.

Deputetja e Nismës Socialdemokrate, Xhevahire Izmaku, deklaroi më herët gjatë së shtunës se partia e saj mban qëndrimin që Limaj të zgjidhet në postin e kryeparlamentarit, ndërkaq LVV-ja si fituese e zgjedhjeve, të drejtojë Qeverinë e re.

Ajo tha se partia e saj e ka ofruar bashkëpunimin, duke thënë se zgjedhja e Limajt në krye të organit ligjvënës nuk është kusht, por mundësi që vendi të dalë nga ngërçi dhe të formohen institucionet e reja.

Artan Abrashi, nga LVV-ja, pas seancës konstituive të Kuvendit, deklaroi se partia e tij është konstruktive, por ka akuzuar partitë e tjera që nuk kanë reflektuar pas aktgjykimit të Gjykatës Kushtetuese.

Duke folur për takimin Kurti-Limaj dhe mundësinë e një marrëveshjeje, ai tha se “bashkëpunimi nënkupton bashkëqeverisje, pjesëmarrje në bashkëqeverisje”. Të shtunën, për herë të 49-të deputetët dështuan ta konstituonin përbërjen e re parlamentare. Deputetët e partive që mandatin e kaluar ishin në opozitë po kundërshtojnë votimin e fshehtë për zgjedhjen e kryeparlamentarit, duke argumentuar se një votim i tillë është jokushtetues.

Partia Demokratike e Kosovës dhe Aleanca për Ardhmërinë e Kosovës kanë thënë se nuk do të votojnë për Albulena Haxhiun, të propozuarën e deritanishme të LVV-së për postin e kryeparlamentares, duke kërkuar ndryshimin e propozimit. Ndërkaq, Lidhja Demokratike e Kosovës ka thënë se nuk do të votojë për asnjë kandidatë që do të propozohet nga LVV-ja, partia fituese e zgjedhjeve.

Teksa afati i 26 korrikut po afron, presidentja e Kosovës, Vjosa Osmani, ka paralajmëruar se nëse nuk ka ndonjë rrugëdalje nga ngërçi institucional, javën e ardhshme do t’i drejtohet Gjykatës Kushtetuese.

Në Kuvendin e Kosovës me 120 ulëse, nevojiten 61 vota për të votuar me sukses emrin e ri të kryekuvendarit. Lëvizja Vetëvendosje, si fituesja e më së shumti votave në zgjedhjet e 9 shkurtit, i ka 48 ulëse në Kuvend, pasuar nga Partia Demokratike e Kosovës me 24, Lidhja Demokratike e Kosovës me 20, Lista Serbe – partia më e madhe e serbëve në Kosovë me 9 dhe koalicioni mes Aleancës për Ardhmërinë e Kosovës dhe Nismës Socialdemokrate, me 8 të tilla. Edhe 11 ulëse tjera janë të pakicave.

Vetëm Nisma Socialdemokrate i ka tre deputetë në Kuvend. Përveç Limajt kjo parti përfaqësohet nga Xhevahire Izmaku dhe Arbëreshë Kryeziu. Ministri në detyrë i Administrimit dhe Pushtetit Lokal dhe kryetari i Iniciativës së re Demokratike të Kosovës (IRDK), Elbert Krasniqi, ka sinjalizuar më parë se shtatë deputetë të pakicave joserbe do të votonin pro konstitutimit të Kuvendit të ri dhe një qeverie të re të udhëhequr nga Lëvizja Vetëvendosje.

Në një skenar kur Lëvizja Vetëvendosje, deputetët e Nismës dhe shtatë të pakicave do të votonin për konstituim të Kuvendit, do të duheshin edhe tri vota për finalizim të procesit me sukses. Deri më tani, deputetët e pakicave, Duda Balje, Veton Berisha dhe Adem Hoxha janë deklaruar se nuk ofrojnë mbështetje pa u plotësuar kushtet e tyre./ REL

The post Ngërçi politik në Kosovë, Kurti dhe Limaj u takuan për të biseduar për krijimin e institucioneve appeared first on Albeu.com.

Shkrimtarja Mimoza Ahmeti është e ftuara e kësaj mbrëmjeje në “Goca & Gra”.

Intervista nisi me një moment të sikletshëm për Egla Cenon, e cila i kërkoi autores t’i vendoste një autograf në një nga librat që kishte sjellë me vete. Por, Ahmeti refuzoi ta bënte këtë, pasi sikurse tha, nuk i dhuron librat.

Egla: A mund të më vendosësh një autograf.

Mimoza: Më fal, ky është libri që solla unë?

Egla: Kam përshtypjen po.

Mimoza: Këto i kam për punë.

Egla: A mund t’i blejmë këto?

Mimoza: Jo, e kam për punë.

Kleoniki: A kanë ndryshim këto libra me të tjerë që keni.

Mimoza: Kam udhëtime për të bërë. Do shkoj në Gjermani, nuk do blej libra. Nuk i dhuroj njeriu libra. Duhet të ketë bërë të pamundurën për mua që t’i dhuroj libra.

The post Mimoza Ahmeti refuzon t’i dhurojë libër dhe t’i japë autograf Egla Cenos, çfarë ndodhi në emision appeared first on Albeu.com.

Drejtor Ekzekutiv i kompanisë së inteligjencës artificiale Astronomer, Andy Byron ka dhënë dorëhqjen nga posti dhe detyra pas skandalit të zbuluar gjatë koncertit të Coldplay. Dorëheqja ka ardhur pas reagimeve të shumta që solli zbulimi i këtij rasti.

Lajmin e ka konfirmuar vetë kompania Astronomer e cila theksoi se është e përkushtuar ndaj vlerave dhe kulturës që sipas tyre e kanë udhëhequr që nga themelimi i tyre. Sipas njoftimit udhëheqësit e kompanisë janë të thirrur të vendosin standardet si për sjelljen ashtu edhe për llogaridhënien. Dorëheqja e Byron është pranuar nga Bordi i Drejtorëve.

Byron u pa në një ekran Jumbotron në një koncert të Coldplay në stadiumin Gillette në Massachusetts të mërkurën, duke përqafuar Kristin Cabot, drejtoreshën e personelit të kompanisë, e cila mbikëqyr burimet njerëzore të organizatës. Coldplay po performonte këngën “The Jumbotron Song” kur kamera u kthye nga ata që përqafoheshin ndërsa shikonin skenën. Të dy u ndanë shpejt dhe u përpoqën të fshihnin fytyrat e tyre, me Byron që u përkul, kur vunë re se ishin në ekranin gjigant në vendin e ngjarjes.

The post Kompania e pezulloi nga puna pas videos virale, CEO i Astronomer Andy Byron merr vendimin, jep dorëheqjen appeared first on Albeu.com.

Rastet e ndotjes së ujrave dalin akoma më shumë në pah gjatë sezonit turistik. Prania e pushuesve dhe turistëve i jep më shumë “zë” kësaj problematike e cila neglizhohet gjatë muajve të tjerë të vitit. Një rast i tillë i ndotjes është evidentuar në Dhërmi.

Raportohet se një hotel derdhte ujërat e zeza në një përrua pranë biznesit. Kjo patjetër sjell ndotje të ambientit dhe duke krijuar një imazh negativ tek turistët. Në lidhje me këtë ngjarje është proceduar penalisht administratorja e hotelit. 46-vjeçarja me iniciale E. M. do të hetohet për veprën penale “Ndotja e ajrit, ujërave dhe tokës”. Ndëshkimi nuk është ndalur me kaq pasi Task-Forca e Agjencisë Kombëtare të Ujësjellës-Kanalizimeve ka vendosur masë administrative ndaj hotelit.

The post Hoteli në Dhërmi derdhte ujrat e zeza në përrua, procedohet administratorja appeared first on Albeu.com.

Një aksident rrugor është regjistruar mbrëmjen e kësaj të shtune në qytetin e Lezhës. Burime për mediat bëjnë me dije se në lagjen “Gurra” një automjet tip “Golf” ka përplasur një shtetas, i cili ishte duke kaluar rrugën.

Thuhet se qytetari sapo kishte dalë nga një market në atë zonë ku automjeti e mori “para”. Si pasojë këmbësori mbeti i plagosur dhe është dërguar me urgjencë në spital.

Nuk dihet ende gjendja e tij shëndetësore, ndërkohë që në vendin e ngjarjes mbërriti policia të cilët po punojnë për zbardhjen e plotë të këtij aksidenti.

The post Aksident në Lezhë, makina përplas këmbësorin që po dilte nga marketi appeared first on Albeu.com.

Presidenti ukrainas Volodymyr Zelensky njoftoi të shtunën se Ukraina i ka propozuar Rusisë mbajtjen e një raundi të ri negociatash javën e ardhshme, me qëllim arritjen e një armëpushimi të qëndrueshëm.

Në fjalimin e tij të përditshëm drejtuar qytetarëve ukrainas, Zelensky tha se Sekretari i Këshillit të Sigurisë së Ukrainës, Rustem Umerov, ka bërë një propozim zyrtar për organizimin e takimit me përfaqësuesit rusë. Data e saktë e takimit nuk është konfirmuar ende.

“Negociatat duhet të intensifikohen dhe duhet bërë gjithçka për të arritur një armëpushim”, theksoi Zelensky, duke shtuar se është i gatshëm për një takim të drejtpërdrejtë me homologun rus Vladimir Putin. “Një takim në nivelin më të lartë është i nevojshëm për të siguruar vërtet paqen,” tha ai.

Takimi i fundit mes palëve u zhvillua në qershor, por përfundoi pa rezultat. Moska këmbënguli në dorëzimin e katër provincave lindore dhe ndërprerjen e ndihmës ushtarake nga Perëndimi, kushte që Ukraina i cilësoi si “ultimatume të papranueshme”.

Pavarësisht bllokimit, në fillim të korrikut Kremlini shfaqi gatishmëri për të rifilluar bisedimet, pas presionit në rritje ndërkombëtar. Presidenti i SHBA-së Donald Trump paralajmëroi sanksione të reja ndaj Rusisë dhe partnerëve të saj tregtarë, nëse nuk arrihej një marrëveshje paqeje brenda 50 ditëve, ndërsa njëkohësisht njoftoi rifillimin e dërgesave të armëve në Kiev, me mbështetje nga vendet e NATO-s.

Rezultati i vetëm konkret i dy raundeve të mëparshme negociatash të mbajtura në Stamboll ishte një marrëveshje për shkëmbimin e të burgosurve dhe trupave të rënëve në luftë.

Negociatat e reja vijnë në një moment kritik për të dyja palët, ndërsa luftimet në vijën e frontit vijojnë me intensitet, dhe komuniteti ndërkombëtar shton presionin për një zgjidhje diplomatike të konfliktit.

The post Ukraina propozon raund të ri negociatash me Rusinë/ Zelensky shprehet i gatshëm për takim me Putinin appeared first on Albeu.com.