Aktorja amerikane, Megan Fox, ka tërhequr sërish vëmendjen e fansave me një postim të ri në rrjetet sociale, duke rikthyer atmosferën e periudhës së saj më ikonike në Hollywood.

Ylli i filmit “Jennifer’s Body” ka publikuar disa fotografi ku shfaqet me një veshje të zezë elegante dhe provokuese, e përbërë nga një bluzë gjysmë transparente prej rrjete dhe të brendshme me dantellë.

Në imazhe, Fox shfaqet me një aureolë mbi kokë dhe e mbështjellë me një shall të zi prej rrjete, duke krijuar një pamje artistike dhe dramatike.

Megan Fox

Krahas fotografive, aktorja ka publikuar edhe një video me një çakmak, një detaj që u ka kujtuar fansave një nga skenat më të njohura të filmit horror “Jennifer’s Body”.

Që nga rikthimi i saj në Instagram në mars, Megan Fox ka qenë aktive me postime të ndryshme, ku shpesh ka ndarë imazhe me stile të guximshme dhe të kuruara.

Aktorja kishte mbyllur profilin e saj në dhjetor të vitit 2024, përpara se të rikthehej me një seri fotosh që menjëherë tërhoqën vëmendjen e publikut dhe mediave.

Me këto paraqitje, Megan Fox vazhdon të mbetet një nga figurat më të komentuara të showbiz-it ndërkombëtar, duke ruajtur statusin e saj si një ikonë e modës dhe kinemasë. /Telegrafi/

Adam Levine dhe Behati Prinsloo kanë tërhequr vëmendjen me paraqitjen e tyre të afërt gjatë një udhëtimi familjar në St Tropez, pak ditë para përvjetorit të 12-të të martesës së tyre.

Këngëtari i Maroon 5, 47 vjeç, dhe supermodelja 38-vjeçare u fotografuan duke shijuar kohën në një jaht luksoz, ku u panë duke u përqafuar, duke shkëmbyer puthje dhe duke kaluar momente romantike së bashku.

Levine u shfaq me rroba banje, duke ekspozuar tatuazhet e tij, ndërsa Prinsloo tërhoqi vëmendjen me një kostum banje të zi elegant, shkruan DailyMail.

Çifti gjithashtu ndau momente aventureske me dy vajzat e tyre, Dusty Rose, 9 vjeçe, dhe Gio Grace, 8 vjeçe, ndërsa kanë edhe një djalë trevjeçar, emri i të cilit nuk është bërë publik.

Kjo paraqitje vjen rreth katër vite pas skandalit të vitit 2022, kur Levine u përball me kritika pas publikimit të disa mesazheve flirtuese me modelen Sumner Stroh.

Në atë periudhë, këngëtari pranoi publikisht se kishte kaluar kufijtë me komunikimet e tij, ndërsa mohoi një lidhje fizike.

Pavarësisht vështirësive, çifti ka vazhduar martesën dhe jetën familjare së bashku. Levine së fundmi ndau edhe një fotografi të rrallë me të tre fëmijët e tyre, duke treguar anën e tij familjare.

Adam Levine dhe Behati Prinsloo u martuan më 19 korrik 2014 në Cabo San Lucas, Meksikë, në një ceremoni ku morën pjesë edhe shumë figura të njohura të Hollywood-it. /Telegrafi/

Filmi i ri epik i Christopher Nolan, “The Odyssey”, u përball me reagime të shumta pas publikimit të kastit në fillim të këtij viti, por tashmë, pas daljes në kinema, është zbuluar se disa prej emrave më të diskutuar kanë role shumë më të vogla në film.

Përzgjedhja e aktorëve si Zendaya, Lupita Nyong’o, Travis Scott dhe Elliot Page shkaktoi debate të shumta në rrjetet sociale, me disa kritikë që e akuzuan filmin për zgjedhje të “zgjuara” politike.

Megjithatë, sipas të dhënave për kohën në ekran, pjesëmarrja e disa prej këtyre aktorëve është minimale, shkruan DailyMail.

Zendaya shfaqet për rreth dy minuta në filmin me kohëzgjatje 172 minuta, ndërsa Elliot Page ka rreth pesë minuta paraqitje.

Edhe Lupita Nyong’o raportohet se shfaqet për afërsisht tre minuta, ndërsa Travis Scott ka një kohë të ngjashme ose edhe më të shkurtër në ekran.

Roli kryesor i filmit përqendrohet te Matt Damon, i cili është personazhi me pjesëmarrjen më të madhe, ndërsa pas tij renditen Tom Holland dhe Anne Hathaway.

Pas publikimit të filmit, disa shikues ironizuan reagimet e mëparshme ndaj kastit, duke argumentuar se polemikat ishin të ekzagjeruara duke pasur parasysh kohën e kufizuar të disa aktorëve në ekran.

“The Odyssey” është një adaptim i veprës së lashtë të Homerit dhe një nga projektet më të mëdha kinematografike të Christopher Nolan. /Telegrafi/

Një eksperiencë e pazakontë e turistes, Kennie Anne Alindogan, në Shkup, është bërë virale në rrjetet sociale, pasi ajo përfundoi rastësisht pjesë e kolonës së automjeteve të një dasme shqiptare.

Përmes një videoje të publikuar në rrjetet sociale, turistja tregoi se vetëm pak minuta pasi zbriti nga autobusi, u gjend mes atmosferës festive të një dasme shqiptare.

“Zbrita nga autobusi në Maqedoninë e Veriut… dhe pesë minuta më vonë, pa e kuptuar, u bëra pjesë e kolonës së automjeteve të një dasme shqiptare”, ka shkruar ajo në postimin e saj.

Turistja tregoi se nuk njihte askënd nga të pranishmit, por vendosi të pranonte ftesën për t'iu bashkuar festës.

Ajo shkroi: “Nuk e kisha fare idenë se kush ishin ata njerëz, por kur më thanë të hipja në makinë, mendimi im i vetëm ishte: ‘Epo... ose kjo do të jetë fillimi i një historie fantastike, ose i një dokumentari të Netflix-it’”.

Në fund, ajo tha se përjetoi një kujtim të paharrueshëm dhe shprehu vlerësimin për mikpritjen shqiptare.

“Fatmirësisht, doli të ishte e para. Shqiptarët janë shumë të mrekullueshëm! Ju dua shumë”, tha ajo.

Përmes postimit, Alindogan u bëri thirrje edhe ndjekësve të saj që ta ndihmojnë të gjejë dy shqiptarët që e ftuan në kolonën e automjeteve të dasmës.

“Internet, bëje magjinë tënde dhe më ndihmo t’i gjej këta dy shqiptarë. Dua t’i falënderoj siç duhet për këtë kujtim kaq të bukur!”, u shpreh ajo. /Telegrafi/

Victoria Beckham u mbështet nga familja e saj gjatë lançimit të aromës së re Portofino ’97 në New York City, ndërsa mungesa e djalit të saj Brooklyn vazhdoi të tërhiqte vëmendjen.

Ish-ylli i Spice Girls u shfaq e lumtur në eventin e organizuar në Caffe Paradiso, ku u shoqërua nga bashkëshorti David Beckham, djali Romeo, vajza Harper, djali Cruz dhe e dashura e tij Jackie Apostel.

Victoria ndau një moment të veçantë me Romeon dhe Harperin, duke pozuar më pas për një fotografi familjare. Ajo u shfaq elegante me një fustan të zi pa mëngë, ndërsa David Beckham zgjodhi një kostum blu të errët për këtë rast, shkruan DailyMail.

Familja kaloi kohë së bashku duke shijuar kafe dhe ëmbëlsira në ambientet e jashtme të kafenesë, në një atmosferë të ngrohtë me miq të afërt.

Ndërkohë, Brooklyn Beckham nuk ishte i pranishëm në këtë event. Ai ka vazhduar të mbajë distancë nga daljet familjare pas përçarjes së raportuar me prindërit e tij.

Sipas raportimeve, Brooklyn nuk ka reaguar publikisht ndaj disa momenteve të rëndësishme familjare që pas nisjes së tensioneve, përfshirë përvjetorin e 50-të të David Beckham dhe Ditën e Babait.

Pavarësisht mungesës së tij, pjesa tjetër e familjes Beckham ka vazhduar të shfaqet së bashku në evente publike, duke treguar mbështetjen për njëri-tjetrin. /Telegrafi/

Faruk Ajeti, ambasadori i Kosovës në Gjermani, ka vlerësuar suksesin ndërkombëtar të regjisorit kosovar Visar Morina, duke e cilësuar atë si një nga regjisorët më të mirë të kinematografisë së Kosovës.

Ajeti ka mirëpritur në ambasadë Visar Morinën, një artist dhe krijues me vizion të jashtëzakonshëm, i cili prej vitesh jeton dhe vepron në Gjermani.

“Dje pata kënaqësinë e veçantë të mirëpres në ambasadë një nga regjisorët më të mirë të kinematografisë sonë Visar Morina, një artist dhe krijues me vizion të jashtëzakonshëm, i cili prej vitesh jeton dhe vepron në Gjermani”, ka shkruar Ajeti.

Ai ka theksuar se nga Çikatova e Vjetër e Drenicës, me talent dhe një gjuhë të veçantë artistike, Morina ka arritur të prekë skenat më prestigjioze të kinemasë ndërkombëtare.

Së fundmi, filmi i tij “Shame and Money” është shpërblyer me çmimin kryesor në Filmfest München dhe në Sundance Film Festival, një arritje e veçantë që e afron drejt nominimit për çmimin më prestigjioz të kinemasë botërore, Oscarit.

“Por suksesi i Visarit është shumë më tepër se një triumf individual. Ai është një histori suksesi i Republikës tonë, një dëshmi e fuqisë së talentit tonë dhe të potencialit të jashtëzakonshëm krijues që njerëzit e vendit tonë zotërojnë”, ka deklaruar Ajeti.

Ai ka theksuar se me veprat e tij të vlerësuara ndërkombëtarisht, si “Von Hunden und Tapeten”, “Der Schübling”, “Babai”, “Exil” dhe së fundmi “Shame and Money”, Visar Morina ka ngritur lart emrin e kinematografisë së Kosovës dhe ka vendosur një standard të ri artistik në skenën evropiane.

Në muajt në vijim, në kuadër të diplomacisë kulturore, Ajeti ka bërë të ditur se do të ketë bashkëpunim me Visar Morinën dhe artistë të tjerë për të sjellë më afër publikut gjerman historinë, talentin dhe krijimtarinë e jashtëzakonshme të artistëve kosovarë. /Telegrafi/

Aktorja, Abby Elliott, ka paraqitur kërkesë për divorc nga bashkëshorti i saj Bill Kennedy, pas rreth 10 vitesh martesë.

Elliott, e njohur për rolin e Natalie në serialin e suksesshëm “The Bear”, ka dorëzuar dokumentet zyrtare të divorcit më 17 korrik.

Sipas raportimeve, ajo ka vendosur datën e ndarjes më 8 korrik, ndërsa si arsye janë përmendur “dallimet e papajtueshme”.

Gjatë martesës së tyre, çifti u bë prindër i dy fëmijëve, Edith, 5 vjeçe, dhe William, 3 vjeç. Elliott ka kërkuar kujdestari të përbashkët ligjore dhe fizike të fëmijëve, shkruan DailyMail.

Aktorja ka kërkuar gjithashtu mbështetje bashkëshortore nga Kennedy dhe ka paraqitur kërkesë që atij të mos i jepet një mbështetje e tillë. Ajo ka kërkuar gjithashtu që producenti të mbulojë shpenzimet e saj ligjore.

Abby Elliott dhe Bill Kennedy u njohën në vitin 2014 gjatë xhirimeve të filmit “Sex Ed”, të cilin Kennedy e kishte shkruar. Çifti nisi një lidhje po atë vit dhe u fejua në vitin 2015.

Në shtator të vitit 2016, ata u martuan gjatë një ceremonie në New England. Më vonë, së bashku mirëpritën dy fëmijët e tyre, duke ndërtuar një familje gjatë viteve të martesës.

Deri tani, përfaqësuesit e Abby Elliott nuk kanë dhënë një koment zyrtar për ndarjen. /Telegrafi/

Mbrëmja e kaluar ishte e veçantë për mijëra adhurues të muzikës në Shkup, ku Yll Limani mbajti koncertin e tij, duke dhuruar emocione dhe një atmosferë të paharrueshme për publikun.

Salla ku u zhvillua koncerti ishte e mbushur me mijëra fansa, të cilët kënduan njëzëri çdo varg dhe melodi të këngëve të tij.

Përveç energjisë dhe hiteve të shumta të interpretuara gjatë mbrëmjes, një nga momentet më emocionuese ishte dedikimi i veçantë që Yll Limani bëri për këngëtarin Shpat Kasapi.

Ylli ndaloi performancën për të shprehur vlerësimin e tij për një nga emrat më të njohur të muzikës shqiptare dhe për ndikimin që ai ka pasur në rrugëtimin e tij artistik.

“Shpat Kasapi është një nga artistët me më së shumti ndikim në muzikën shqiptare dhe një nga ata artistë që më ka formuar”, u shpreh Ylli me emocione para publikut.

“Kur isha i vogël, i doja shumë këngët e tij dhe nuk kishte këngë që nuk ia dija. Nuk e kam njohur personalisht, por dy-tri herë e kam takuar në aeroport dhe gjithmonë jam shtangur nga ideja që takova idhullin e fëmijërisë sime”.

Pas këtyre fjalëve prekëse, Yll Limani interpretoi një këngë në nder të Shpat Kasapit. Ky moment u prit me duartrokitje të gjata dhe ovacione nga publiku shkupjan, duke sjellë emocione te të pranishmit për kujtimin e këngëtarit të ndjerë. /Telegrafi/

Parlamenti japonez ka përfunduar një debat njëvjeçar mbi të ardhmen e Fronit të Krizantemës, duke vendosur të ruajë rregullin e trashëgimisë vetëm për pasardhësit meshkuj të linjës atërore.

Vendimi vjen pavarësisht mbështetjes së gjerë në opinionin publik për mundësinë që një grua të mund të trashëgojë fronin perandorak.

Reforma e re nuk lejon një ndryshim të tillë, por synon të adresojë krizën e mungesës së trashëgimtarëve në familjen perandorake.

Ligji i ri parashikon që të afërm të tjerë meshkuj mbi moshën 15 vjeç mund të rikthehen në familjen perandorake përmes birësimit, nëse janë të pamartuar.

Gjithashtu, princeshat do të mund të ruajnë statusin mbretëror edhe pas martesës me persona jashtë familjes perandorake, megjithëse bashkëshortët dhe fëmijët e tyre nuk do të konsiderohen anëtarë të familjes perandorake.

Kriza e trashëgimisë lidhet me numrin e kufizuar të anëtarëve meshkuj të familjes perandorake.

Nga 16 anëtarë të rritur të familjes, vetëm pesë janë burra, ndërsa aktualisht nuk ka fëmijë të vegjël që mund të sigurojnë vazhdimësinë e linjës.

Trashëgimtari kryesor mbetet princi 19-vjeçar Hisahito, nipi i perandorit dhe djali i parë mashkull i lindur në familjen perandorake japoneze pas katër dekadash.

Nëse ai nuk do të ketë një djalë, rregullat aktuale mund të çojnë në fundin e linjës së trashëgimisë mashkullore.

Vendimi ka shkaktuar debate, pasi u miratua nga qeveria e kryeministres Sanae Takaichi, gruaja e parë që ka drejtuar qeverinë japoneze.

Konservatorët mbrojnë idenë se linja mashkullore është themeli i legjitimitetit të monarkisë, ndërsa kritikët argumentojnë se reforma nuk pasqyron dëshirën e shumicës së qytetarëve japonezë. /Telegrafi/

Jennifer Lopez ka lënë pa fjalë publikun gjatë natës përmbyllëse të eventit prestigjioz Alta Moda 2026 të Dolce & Gabbana, zhvilluar në Taormina të Siçilisë.

Këngëtarja dhe aktorja 56-vjeçare ishte protagoniste e mbrëmjes, duke dhuruar një performancë energjike dhe duke tërhequr vëmendjen me disa ndryshime spektakolare veshjesh.

Për daljen e parë në skenë, JLo zgjodhi një kombinim të guximshëm me të brendshme të zeza elegante, çorape të zeza dhe taka të larta, ndërsa më pas u shfaq me një palë pantallona të bardha me detaje dantelle, të kombinuara me çizme të bardha me taka, shkruan DailyMail.

Një tjetër moment i veçantë ishte paraqitja e saj me një fustan të gjatë portokalli, që i dha artistes një pamje elegante dhe mbresëlënëse.

Para kësaj performance, Lopez kishte tërhequr vëmendjen edhe gjatë qëndrimit të saj në Itali, ku ndau me ndjekësit fotografi nga udhëtimi dhe u shfaq me disa paraqitje të kuruara.

Artistja ka qenë në qendër të vëmendjes gjatë verës, duke udhëtuar nëpër Evropë dhe duke marrë pjesë në evente të rëndësishme, përfshirë Javën e Modës në Paris dhe finalen e Wimbledon 2026 në Londër.

Jennifer Lopez vijon të mbetet një nga ikonat më të njohura të muzikës dhe modës, duke dëshmuar edhe një herë se vazhdon të ketë një ndikim të fortë në skenën ndërkombëtare të showbiz-it. /Telegrafi/

Një 63-vjeçar është arrestuar pasi dyshohet se është përplasur me shpejtësi të lartë me portën hyrëse të rezidencës së Beyonce dhe Jay-Z në East Hampton.

Sipas raportit të policisë, të siguruar nga Page Six, drejtuesi i mjetit ka hyrë me shpejtësi në rrugicën e rezidencës dhe ka shkaktuar dëme të konsiderueshme në portat mekanike të pronës.

Pas incidentit, burri është arrestuar dhe është dërguar në spitalin Stony Brook për të marrë trajtim për dhimbjet e shkaktuara. Automjeti i tij është sekuestruar, ndërsa hetimet për ngjarjen vijojnë, shkruan DailyMail.

Autoritetet kanë bërë të ditur se personi nuk ka histori kriminale dhe se në momentin e ngjarjes dukej i hutuar. Sipas policisë, ai nuk ka bërë kërcënime dhe nuk ka përmendur emrat e pronarëve të rezidencës.

Oficerja Jennifer Dunn deklaroi se mund të ketë qenë një rastësi që ai përfundoi në atë pronë, pasi mund të ketë pasur një problem shëndetësor.


Para përplasjes, burri kishte ndaluar edhe në një tjetër shtëpi në të njëjtën zonë, duke pyetur për një grua që nuk banonte aty, çka kishte ngritur dyshime për gjendjen e tij të hutuar.

Policia nuk gjeti armë apo kërcënime të drejtpërdrejta, ndërsa ndaj tij janë përgatitur dokumente për shkelje të pronës dhe dëmtim kriminal.

Beyoncé dhe Jay-Z e blenë këtë rezidencë buzë detit në vitin 2017 për 26 milionë dollarë, që korrespondojnë me rreth 22,4 milionë euro. Prona, e njohur si Pond House Estate, ishte nxjerrë fillimisht në treg në vitin 2009 për 39,5 milionë dollarë, ose rreth 34 milionë euro. /Telegrafi/

Justin Bieber ka tërhequr vëmendjen vetëm pak ditë para performancës së tij në spektaklin e pjesës së parë të finales së Kupës së Botës FIFA, pasi është fotografuar duke pirë një puro gjatë një loje golfi me miqtë në The Hamptons.

Ylli kanadez i muzikës pop, 32 vjeç, u pa duke shijuar momentin relaksues i veshur me pantallona blu të errëta dhe një këmishë të bardhë me mëngë të shkurtra.

Pamja e tij u kompletua me atlete të zeza prej lëkure me pjesë të bardha, ndërsa kishte një model të shkurtër flokësh dhe mjekër të parregullt.

Veprimi i këngëtarit ka tërhequr vëmendjen, pasi konsumimi i duhanit vjen vetëm pak ditë para daljes së tij në skenën e madhe të Botërorit, ku do të interpretojë në një nga eventet më të ndjekura sportive në botë.

Performanca e pjesës së parë të finales do të zhvillohet më 19 korrik në stadiumin MetLife në New Jersey.

Krahas Justin Bieber, në skenë pritet të ngjiten edhe emra të mëdhenj të muzikës, përfshirë Madonna, Shakira, BTS, Burna Boy, dirigjentin Gustavo Dudamel dhe korin PS22 Chorus nga Staten Island.

Spektakli, i kuruar nga frontmeni i Coldplay, Chris Martin, do të mbështesë FIFA Global Citizen Education Fund, një iniciativë që synon të mbledhë 100 milionë dollarë për të ndihmuar fëmijët në aksesin ndaj arsimit dhe sportit.

Pjesëmarrja e Bieber në këtë event vjen në një periudhë rikthimi në karrierën e tij, pas suksesit të albumit “Swag”, të publikuar në korrik të vitit 2025, i cili u pasua edhe nga një version deluxe me 23 këngë të reja. /Telegrafi/

Ish-banorja e Big Brother VIP Albania, Jori Delli, ka tërhequr sërish vëmendjen e ndjekësve në rrjetet sociale, pasi ka publikuar një fotografi romantike me partnerin e saj, reperin italian Fred De Palma.

Në fotografinë e ndarë në Instagram, çifti shfaqet duke pozuar para pasqyrës së një ashensori.

Jori ka zgjedhur një paraqitje verore me një bluzë portokalli dhe kapelë kashte, ndërsa Fred De Palma shfaqet me veshje sportive dhe syze dielli.

Postimi është shoqëruar me disa zemra me ngjyra, duke reflektuar atmosferën romantike mes tyre.

Jori Delli dhe Fred De Palma prej kohësh nuk e fshehin lidhjen e tyre, ndërsa vazhdojnë të ndajnë me ndjekësit momente nga përditshmëria dhe udhëtimet e tyre së bashku. /Telegrafi/

Matt Brown, një prej figurave më të njohura të reality show-t “Alaskan Bush People”, është kremuar pas vdekjes së tij tragjike në moshën 42-vjeçare.

Sipas mediave amerikane, hiri i tij është dërguar në Krematoriumin e Qarkut Okanogan në shtetin e Uashingtonit.

Autoritetet konfirmuan më herët se Brown humbi jetën nga vetëvrasja. Sipas raportit të mjekut ligjor, si faktorë që kontribuuan në vdekje u përmendën edhe zhytja në ujë pas plagosjes dhe prania e metamfetaminës në organizëm, shkruan DailyMail.

Trupi i tij u gjet më 30 maj në një lumë në Qarkun Okanogan, pas një operacioni kërkimor ku mori pjesë edhe vëllai i tij, Noah Brown. Ky i fundit ishte ai që e identifikoi trupin në vendngjarje.

Pas ndarjes së tij nga jeta, familja publikoi një mesazh prekës, duke e kujtuar Matt si një njeri inteligjent, krijues dhe të apasionuar pas natyrës.

Ata theksuan se ai kishte luftuar për vite me radhë me sfida të shëndetit mendor dhe varësinë, ndërsa gjatë periudhave të rikuperimit kishte ndarë hapur përvojën e tij për të inkurajuar të tjerët të kërkonin ndihmë. /Telegrafi/

Xheneta Fetahu ka tërhequr vëmendjen e ndjekësve me një set të ri fotografik nga pushimet verore, ku shfaqet në super formë.

Ish-banorja e Big Brother VIP Kosova pozoi mbi një dërrasë paddleboard në ujërat e kristalta, duke vënë në pah linjat e saj trupore me një bikini të kuqe.

Pamjen e kompletoi me syze të vogla dielli me xhama të errët, ndërsa flokët i kishte të kapura pas koke, duke i dhënë një stil minimalist dhe elegant.

Grimi i lehtë me buzë në nuancë nude dhe lëkura e bronztë e theksuan edhe më shumë paraqitjen e saj verore.

Xheneta u shfaq e relaksuar dhe plot vetëbesim, ndërsa pozonte nën rrezet e diellit, me detin e kthjellët dhe pushuesit në sfond.

Fotografitë kanë marrë menjëherë pëlqime dhe komente të shumta nga ndjekësit, të cilët nuk kursyen komplimentet për pamjen e saj. /Telegrafi/

Rita Ora ka gjetur pak kohë për t’u relaksuar mes angazhimeve të shumta të turneut të saj veror në Evropë.

Këngëtarja me origjinë shqiptare po shijon pushimet në bregdetin mesdhetar të Spanjës, ku është fotografuar duke u freskuar në det gjatë valës së të nxehtit.

Artistja 35-vjeçare tërhoqi vëmendjen me një palë bikini dyngjyrëshe me printime kafshësh, të cilat i kombinoi me një shami të kuqe që mbulonte flokët gjatë notit shkruan DailyMail.

Rita u shfaq në formë të shkëlqyer fizike, ndërsa po shijonte momentet e qeta larg skenës.

Pushimi vjen pas një periudhe intensive koncertesh në vende të ndryshme të Evropës.

Fundjavën e kaluar, ajo ishte planifikuar të performonte në Festivalin Gozo në Maltë, por koncerti i saj u anulua për shkak të një stuhie të fortë që dëmtoi pajisjet muzikore.

Përmes një mesazhi në rrjetet sociale, Rita u kërkoi falje fansave, duke shpjeguar se shfaqja nuk mund të zhvillohej pasi pajisjet e saj mbetën në skenë gjatë stuhisë dhe u dëmtuan plotësisht.

Pas ndalesës në Spanjë, këngëtarja do të vazhdojë turneun e saj veror me koncerte të planifikuara në Zvicër, Austri, Finlandë dhe Hungari. /Telegrafi/

Kim Kardashian ka reaguar për herë të parë pas ndarjes nga jeta të gjyshes së saj, Mary Jo “MJ” Campbell, e cila u nda nga jeta në moshën 91-vjeçare.

Ylli i kushtoi një homazh prekës gruas që e cilësoi si “shoqen më të mirë” dhe “zemrën e familjes”.

Reagimi i Kim erdhi pasi ajo u përball me kritika në rrjetet sociale. Vetëm pak minuta pasi nëna e saj, Kris Jenner, njoftoi vdekjen e MJ-së, Kim publikoi disa fotografi me bikini nga pushimet e saj, duke bërë që shumë ndjekës të habiteshin me kohën e postimit, shkruan DailyMail.

Më vonë, 45-vjeçarja sqaroi se postimi ishte planifikuar disa ditë më parë dhe ishte publikuar automatikisht.

Ajo theksoi se gjatë gjithë javës kishte qëndruar pranë nënës dhe gjyshes së saj, ndërsa tani familja është e përqendruar te kujtimet dhe festimi i jetës së MJ-së.

Në homazhin e saj, Kim ndau një sërë fotografish me gjyshen dhe kujtoi ndikimin që ajo pati në jetën e saj.

Ajo zbuloi se MJ i kishte dhënë punën e parë në dyqanin e saj në San Diego dhe e kishte mësuar vlerën e punës, forcës dhe vetëbesimit.

“Do të jesh gjithmonë pjesë e imja. Të dua shumë dhe do të më mungosh përgjithmonë”, shkroi Kim, duke e mbyllur mesazhin me një notë emocionale dhe humoristike, duke thënë se beson se gjyshja po i ndjek postimet nga “llogaria e saj e fshehtë në Instagram”. /Telegrafi/

Grupi Marigona është rikthyer në skenën muzikore me projektin e ri “Nuk Është”, duke shënuar rikthimin pas rreth gjashtë vitesh nga publikimi i fundit muzikor.

Kënga vjen si një bashkëpunim mes Zana Abazi Ramadanit dhe Vullnet Sefajës, ndërsa është pritur me interes nga publiku që e ka ndjekur grupin ndër vite.

Prej kohësh, Zana Abazi Ramadani i është përkushtuar karrierës së saj si soprano, duke qenë aktive në skenën e muzikës klasike.

Me këtë projekt, ajo rikthehet edhe në muzikën moderne përmes emrit Marigona.

“Nuk Është” është publikuar në platformat muzikore dhe shënon një kapitull të ri për grupin, i cili rikthehet në skenë pas një pauze të gjatë. /Telegrafi/

- YouTube www.youtube.com

North West ka tërhequr vëmendjen me transformimin e saj më të fundit gjatë një daljeje në Los Angeles me babain e saj, Kanye West, dhe njerkën, Bianca Censori.

13-vjeçarja u shfaq me një model të ri flokësh, duke hequr dorë nga flokët e gjatë blu për një prerje më të shkurtër me balluke dhe nuancë të zezë, shkruan DailyMail.

Ajo kishte veshur pantallona të zeza të gjera, një bluzë me motive, atlete sportive dhe e kompletoi pamjen me një çantë të vogël të zezë dhe syze dielli.

Edhe Bianca Censori u shfaq me një stil më të mbuluar se zakonisht, e veshur me geta të zeza kapri, bluzë të zezë me mëngë të gjata dhe këpucë me majë të hapur.

Ndërsa Kanye West zgjodhi një kombinim tërësisht të zi me këmishë, pantallona lëkure, xhaketë dhe çizme.

Treshja u pa duke vizituar dyqanin H. Lorenzo, ku North dhe Bianca shfletonin veshje dhe aksesorë.

Në një moment, adoleshentja i tregoi diçka në telefonin e saj Biancës, duke shkaktuar të qeshura mes tyre gjatë shëtitjes. /Telegrafi/

Hailey Bieber ka tërhequr vëmendjen me paraqitjen e saj në fushatën e re të markës Gap, ku pozon pa bluzë, e veshur vetëm me një palë xhinse blu me bel të ulët.

Modelja 29-vjeçare e mbuloi gjoksin me një bluzë bardhezi, ndërsa prezantoi koleksionin e saj me edicion të limituar, The Hailey Jean, i cili u lançua më 16 korrik.

Në fotografitë promovuese, Hailey shfaqet me flokët e lëshuara dhe një stil minimalist, ndërsa në një tjetër imazh zbulon barkun e tonifikuar, shkruan DailyMail.

Ajo pozon gjithashtu pranë një stende me xhinse dhe më pas shfaqet e veshur me një bluzë të bardhë pa mëngë dhe xhinse të errëta.

Koleksioni përfshin dy modele të frymëzuara nga moda e viteve të 90-ta: Extra Baggy, i disponueshëm në tre nuanca si në dyqane ashtu edhe online, dhe Low-Rise Loose, i cili ofrohet ekskluzivisht online.

Në pjesën e pasme të xhinseve është vendosur detaji “1996”, që simbolizon vitin e lindjes së Hailey-t dhe një epokë ikonike për xhinset e Gap.

“Gap ka qenë pjesë e gardërobës sime që kur isha fëmijë, kështu që ky bashkëpunim erdhi shumë natyrshëm. 1996 është viti kur linda dhe frymëzohem shumë nga stili i viteve të 90-ta.

Donim që koleksioni të kishte një ndjesi moderne, nostalgjike dhe personale,” u shpreh modelja. /Telegrafi/