Një ngjarje rëndë ka ndodhur sot në Gjirin Ha Long të Vietnamit, ku një anije turistike u përmbys nga një stuhi e fortë, duke lënë të paktën 34 persona të vdekur.

Anija mbante në bord 48 pasagjerë dhe pesë anëtarë të ekuipazhit, e cila u përmbys si pasojë e një stuhie të papritur me shi të rrëmbyeshëm, në vendin e Trashëgimisë Botërore të UNESCO-s.

Shumica e pasagjerëve ishin familje që vinin për vizitë nga kryeqyteti Hanoi, përfshirë më shumë se 20 fëmijë që ndodheshin në bord.

Sipas mediave, rojet kufitare kanë shpëtuar deri më tani 11 persona, ndërsa 34 trupa janë gjetur të pajetë.

Autoritetet kanë bërë të ditur se përpjekjet e shpëtimit do të vijojnë edhe gjatë natës, pasi ende rezultojnë të zhdukur tetë persona. m.p.

Personi që shihni në foto është Xhilian Zheleku, roja bregdetare pranë kanalit të Çukës në Sarandë i cili është kthyer në heroin e pushuesve.

Sipas asaj që mediat lokale raportojnë mësohet se Zheleku përgjatë kësaj të shtune ka arritur që të shpëtojë gjashtë turistë të cilët rrezikonin të mbyteshin.

Pa marrë parasysh rrezikun që mund t’i kanosej, ky shtetas ka mundur që të shpëtojë pushuesit të cilët kanë zgjedhur Sarandën për të kaluar pushimet e tyre.

Zona në të cilën këta shtetas kanë rrezikuar që të humbin jetën është një nga pikat më alarmante për të cilën shpesh herë banorët e zonës kanë bërë thirrje që autoritetet duhet të marrin masa.

Thuhet se përgjatë ditëve të fundit se pikëderdhja e lumit të Bistricës ka ndryshuar drejtim dhe është bërë shumë i rrezikshëm. Për këtë arsye u bëhet apel autoriteteve që të ndalojnë notin pranë kësaj zone dhe të marrin masa. m.p.

Me një akuzë 211 fletë, Prokuroria e Posaçme kundër Korrupsionit dhe Krimit të Organizuar ka përfunduar hetimet dhe ka “kopsitur” dosjen për në gjyq për 17 të akuzuarit për skemën e mashtrimit me mikrokreditë.

Në fashikujt e dosjes voluminoze, me firmën e prokurorit të çështjes, Edvin Kondili, rezulton se janë 17 emra të cilët Prokuroria e Posaçme i akuzon për tre vepra penale: “Mashtrimit me pasoja të rënda”, “Falsifikimit të dokumentave” dhe “Grup i strukturuar kriminal”, vepra të cilat sipas ligjit shqiptar parashikojnë deri në 15 vite burg.

Emrat e të akuzuarve janë:

Elda Ibro
Arben Meskuti
Alban Kote
Aldo Daka
Albert Gega
Olsi Ibro
Andis Gjoka
Vasil Bakallbashi
Yliana Sejfo
Indrit Çuberi
Rigels Bejko
Altin Vako
Helidon Xhindi
Fatos Alimadhi
Lefter Canaj
Roland Deda
Endri Myftari

Spak ka zbuluar një sistem të sofistikuar kompjuterik që përndiqte debitorët në gjithë Shqipërinë nga grupi që udhëhiqte Olsi Ibro, 45-vjeçari i cili në korrik të vitit të kaluar ndërmori aktin ekstrem duke konsumuar fostoksinë dhe më pas duke u hedhur nga një pallat në ndërtim në rrugën “Ramazan Shijaku” në Tiranë ku dhe gjeti vdekjen e menjëhershme. Gjithashtu, dhe nga bashkëshortja e tij, Elda Ibro si dhe Arben Meskuti.

Deri më tani lidhur me këtë dosje në qeli janë tre nga 17 të akuzuarit nga SPAK. Priten zhvillime të rëndësishme në lidhje me këtë çështje sensitive, që pas disa vitesh hetimi çon para bankës së të akuzuarve 17 persona, ku më i rëndësishmi në akuzë, Olsi Ibro, nuk jeton më. m.p.

Sllovenia legalizoi vdekjen e asistuar të hënën pas një referendumi, në të cilin shumica e votuesve votuan pro.

Parlamenti slloven miratoi ligjin me 50 vota pro, 34 kundër dhe tre abstenime.

Sipas ligjit të ri, ata që vuajnë nga një sëmundje e pashërueshme, që janë të shëndoshë mendërisht dhe gjendja shëndetësore e të cilëve është e tillë që nuk mund ta durojnë më dhimbjen, kanë të drejtë t’i japin fund jetës së tyre.

Ata që vuajnë nga sëmundje mendore përjashtohen. Ligji mund të zbatohet edhe në rastet kur trajtimet nuk ofrojnë ndonjë lehtësim ose përmirësim të arsyeshëm të gjendjes së pacientit.

Të gjitha opsionet e tjera të trajtimit duhet të jenë shteruar. Eutanazia, pra vdekja e shkaktuar nga një mjek ose infermier me kërkesë të pacientit, mbetet e ndaluar. Theresa Novak, një anëtare e parlamentit nga Partia Liberale në pushtet, tha, megjithatë, se “do të ishte imorale që mjekësia t’i privojë njerëzit nga e drejta për të vdekur nëse dëshirojnë dhe mjekësia nuk mund t’i ndihmojë ata”. m.p.

Një qytetar është dhunuar në mes të pushuesve në Ksamil. Ngjarja është shënuar mesditën e së premtes në një prej zonave më të frekuentuara të Ksamilit, të mbushur plot me pushues, edhe të mitur.

Sipas informacioneve, agresori, i identifikuar si Agim Taraj, person me precedentë penalë për dhunë dhe trafik droge, ka ushtruar dhunë fizike ndaj një qytetari, pa asnjë ndërhyrje nga forcat e rendit. Ndërkohë, mësohet se dy personat që janë përfshirë në konflikt janë shoqëruar në polici

Në një video shihet teksa agresori largohet dhe personi tjetër është i gjakosur në kokë. Në video dëgjohet edhe një grua, e cila e shokuar nga ngjarja, dëgjohet duke thënë “O plehrë ça ke bërë? Do ta shikosh…”

Të paktën 28 persona janë plagosur pasi një automjet u përplas me një turmë njerëzish në Santa Monica Boulevard në Los Angeles.

Sipas mediave të huaja, shtatë persona janë plagosur dhe gjashtë prej tyre janë në gjendje të rëndë, tha Departamenti i Zjarrfikësve të Los Anxhelosit (LAFD).

Thuhet se incidenti ndodhi në orën 02:00 sipas orës lokale (09:00 GMT) pranë një klubi nate në North Vermont Avenue, afër kryqëzimit me Santa Monica Boulevard, i cili është i famshëm për jetën e tij të natës.

Njëri nga pacientët kishte një plagë plumbi, tha Kapiteni i LAFD-së, Adam VanGerpen, dhe dëshmitarët okularë përshkruan se kishin dëgjuar të shtëna. “Kjo është nën hetim nga policia,” tha ai më tej, shkruan A2 CNN.

Shërbimet e emergjencës në vendin e ngjarjes në Los Angeles, ku thuhet se një makinë është përplasur me një turmë njerëzish.

Kapiteni VanGerpen tha gjithashtu se personi me plagën e plumbit mund të jetë shoferi, por shtoi “ne nuk e kemi konfirmuar ende këtë”. Pamjet nga vendi i ngjarjes tregojnë një makinë gri në trotuar me mbeturina të shpërndara në tokë dhe një prani të madhe policie.

Aktualisht nuk është e qartë se çfarë e shkaktoi hyrjen e automjetit në turmë. Viktimat janë dërguar të gjitha në spitale ose qendra traumatike, u tha kapiten VanGerpen gazetarëve në vendngjarje. Ai tha se shumica e atyre në turmë ishin gra që prisnin të hynin në klubin e natës.

“Ishte një skenë shumë kaotike”, tha Kapiten VanGerpen, duke shtuar se “shumë kalimtarë pranë klubit dolën për të ndihmuar njerëzit”. m.p.

Shqipëria renditet ndër vendet me nivelin më të ulët të përgatitjes digjitale në Europë. Një raport i Eurostat-it ka nxjerrë në pah se vetëm 51% e të rinjve shqiptarë të moshës 16–29 vjeç zotërojnë aftësi digjitale bazë, një përqindje dukshëm më e ulët se mesatarja e Bashkimit Evropian, që është 71%.

Në vendin tonë, nuk ka dallime gjinore sa i përket zotërimit të këtyre aftësive – si djemtë, ashtu edhe vajzat janë në të njëjtin nivel. Kjo bie në kontrast me situatën në shumicën e vendeve të BE-së, ku vajzat zakonisht kanë aftësi digjitale më të mira se djemtë. Në vitin 2023, 73% e vajzave në BE raportuan zotërim të aftësive digjitale bazë, kundrejt 69% të djemve, me diferencën më të madhe të regjistruar në Kroaci.

Në pesë vende të BE-së – Gjermani, Maltë, Rumani, Estoni dhe Sllovaki – djemtë zotërojnë pak më shumë aftësi digjitale se vajzat.

Megjithatë, pavarësisht niveleve të ulëta të aftësive digjitale, 99% e të rinjve shqiptarë përdorën internetin çdo ditë gjatë vitit 2024, një përqindje më e lartë se mesatarja e BE-së. Ndërkohë, në nivel kombëtar, vetëm 83% e popullsisë së përgjithshme në Shqipëri përdor internetin çdo ditë, duke krijuar një hendek prej 14 pikë përqindjeje mes brezit të ri dhe pjesës tjetër të popullsisë – diferencë kjo më e thellë se mesatarja në Bashkimin Evropian. m.p.

Barcelona po interesohet për Darwin Nunez, sulmuesin uruguaian për të cilin pati kritika të shumta sezonin e kaluar, për shkak të formës jo të mirë dhe nuk dha atë që pritej prej tij.

Sipas raportimit në fjalë, është pikërisht trajneri i Barcelonës, Hansi Flick, që këmbëngul për transferimin e Nunez, duke e parë si një përforcim ideal në sulm dhe pse jo si zëvendesuesin e mundshëm të Robert Lewandowski-t. Polaku do luajë sezonin e fundit me katalanasit dhe do largohet verën e ardhshme.

Në anën tjetër, Liverpool ka kërkuar 70 milionë euro për të lënë të lirë Darwin Nunez, shifër kjo që trembë Barcelonën, duke ditur gjendjen aktuale financiare. Megjithatë, katalanasit kanë një propozim tjetër për anglezët: huazim me detyrim blerjeje për Darwin Nunez.

Flick është i bindur që do ta rikthente urugianin në formën e tij të dikurshme dhe te Barcelona do të bëhej një nga sulmuesit më të mirë në botë. m.p.

Disa javë pas rrëzimit tragjik të avionit të Air India në Ahmedabad, ku humbën jetën 260 persona, po dalin në dritë detaje të reja që po trondisin opinionin publik dhe industrinë e aviacionit.

Sipas një raporti paraprak të autoriteteve indiane dhe burimeve amerikane të përfshira në hetim, kapiteni Sumeet Sabharwal, 56 vjeç, dyshohet se ka ndërprerë furnizimin me karburant të avionit, vetëm sekonda pas ngritjes nga pista. Dy çelësa të karburantit, që zakonisht mbeten të aktivizuar gjatë gjithë fluturimit, rezultojnë të jenë vendosur në pozicionin “Cutoff”, çka bëri që motorët të ndalonin së punuari.

Avioni Boeing 787 Dreamliner, i nisur nga Ahmedabad drejt Londrës më 12 qershor në orën 13:38, qëndroi në ajër për vetëm 30 sekonda para se të përplasej në një zonë të banuar. Nga përplasja humbën jetën 241 persona në bord dhe 19 të tjerë në tokë, ndërsa vetëm një pasagjer mbijetoi në mënyrë të pabesueshme.

Zyrtarisht, nuk është konfirmuar se kush nga pilotët mbylli furnizimin me karburant. Por regjistrimet nga “black box” tregojnë një dialog alarmant në kabinë, ku njëri pilot pyet: “Pse u ndërpre?” dhe tjetri përgjigjet: “Nuk isha unë.”

Sipas hetuesve amerikanë dhe raportimeve të Wall Street Journal, provat tërheqëse nga komunikimi sugjerojnë se veprimi mund t’i përkasë kapitenit Sabharwal, i cili ishte në rolin e monitoruesit në atë moment, ndërsa bashkë-piloti Clive Kunder, 28 vjeç, ishte në kontroll të avionit gjatë ngritjes.

Kapiten Sabharwal ishte një pilot me mbi 8,200 orë fluturimi dhe gëzonte reputacion të lartë në komunitetin e aviacionit. Miq dhe kolegë e përshkruajnë atë si një njeri të qetë, profesionist të përkushtuar dhe “shpirt të butë”. Ai nuk kishte pasur asnjë incident serioz gjatë karrierës së tij dhe ishte i njohur për sjelljen e tij të respektueshme.

Por pas tragjedisë, autoritetet po shqyrtojnë edhe aspektin psikologjik të kapitenit. Burime të afërta me hetimin kanë treguar se Sabharwal kishte kaluar një periudhë të vështirë personale pas vdekjes së nënës në vitin 2022, duke u ndarë më pas nga bashkëshortja dhe u transferua në Mumbai për t’u kujdesur për të atin 90-vjeçar.

Disa pilotë të tjerë të Air India kanë përmendur probleme të mundshme me shëndetin mendor, ndonëse kompania ajrore kishte dhënë leje mjekësore për fluturimin, pas kontrolleve rutinë dhe analizave të alkoolit, të cilat rezultuan të pastra.

Pak orë përpara fluturimit fatal, Sabharwal i kishte thënë rojës së kompleksit ku banonte: “Kujdesu për babanë tim. Do të kthehem shpejt.”

Ende nuk është e qartë nëse ndërprerja e karburantit ishte një gabim fatal, një akt i qëllimshëm apo një defekt teknik. Ekspertët e aviacionit e kanë përshkruar vendosjen e çelësave në “Cutoff” menjëherë pas ngritjes si një veprim “absolutisht të pashpjegueshëm”.

Hetimet janë në zhvillim, ndërkohë që raporti përfundimtar pritet të sqarojë nëse kemi të bëjmë me gabim njerëzor, vetëvrasje me pasoja masive apo një zinxhir ngjarjesh tragjike që çuan në katastrofën ajrore më të rëndë të Indisë në dekadat e fundit. m.p.

Lëvizja për Zhvillim Kombëtar i bën thirrje kryeministrit Edi Rama të ndalojë aksionet për pastrimin e territorit nga objektet pa leje në Theth dhe të dëmshpërblejë banorët për investimet e kryera.

Në një deklaratë për media, Ekrem Spahiu, bashkëkryetar i LZHK-së i kërkoi kryeministrit të mos ndërhyrë në punët e pushtetit vendor.

“Pasi mori 83 mandate, është bërë shumë agresiv ndaj institucioneve dhe shqiptarëve duke iu imponuar frikshëm. Qeveria nuk mund të drejtojë bashkitë sepse është shkelje e parimeve të ndarjes së pushteteve në një shtet demokratik. LZHK i bën thirrje Ramës që të ndërpresë menjëherë ndërhyrjet politike në bashkitë e vendit. LZHK shpreh shqetësimin e saj për përmbajtjen ligjore dhe mënyrat se si po realizohet aksioni i prishjes së ndërtimeve pa leje dhe lirimi i hapësirave dhe ambienteve publike dhe dënon këtë klimë terrori shtetëror ndaj banorëve të Thethit dhe kërkon dëmshpërblimin e të gjithë objekteve të prishura.”, u shpreh ai.m.p.

Shqipëria është një vend me polarizim të madh. Madje, sot polarizimi politik i’a kalon edhe periudhës Komuniste!

Në kohën e Regjimit kishte “Bijtë e Partisë”, “Bijtë e Shqipërisë” dhe “Armiqtë e Partisë dhe të Shqipërisë”.

Të parët ishin njerëzit e pushtetit, të dytët edhe pse nuk kishin pushtet nuk kishin pengesa për arsim, punësim e mund të siguronin për atë kohë, një jetë të pranueshme. Ndërsa të fundit ishin sikur të mos ekzistonin, nuk gëzonin asnjë të drejtë!

Pra, Regjimi, kishte nevojë edhe për masat, qoftë për krahë pune e ashtu edhe si ushtarë të mundshëm në një luftë apo konflikt të nxehtë!

Sot, polarizimi politikë ka bërë të ketë vetëm dy kategori, “Bijtë e Partisë” që kanë gjithçka dhe “Armiqtë e Partisë” që kanë zgjedhur shpesh në këto 35 vite tranzicion, largimin dhe emigrimin si të vetmën shpresë për të jetuar në kushte të pranueshme!

Përdorimin e termit “Parti” e kam si simbolikë të forcës politike që ka pasur pushtetin në të kaluarën apo që e ka sot!

Për fat të keq karriera dhe mundësia për të jetuar mirë, qoftë edhe duke abuzuar e pasur privilegje në këto 35 vite tranzicion është e lidhur ngushtë me politikën dhe pushtetin politik!

Thuajse, asnjë nga ata që kanë qëndruar ose mbetur jashtë sferës së politikës nuk kanë bërë karrierë dhe nuk kanë krijuar pasuri.

Gjithmonë për të kuptuar “subjektet e reja” kam qenë i idesë dhe i mbetem se duhet t’i referohemi “Aleancës Kuq e Zi”, sepse ajo ishte gjeneza e mundësive të subjekteve anti-sistem!

Kjo nisi me shumë eufori dhe mbështetje, po goditjen kryesore të braktisjes e mori, kur ndjekësit e saj bënë llogaritë dhe u binden se forca që ndiqnin nuk ishte pjesë e likes së madhe të pushtetit.

Sinjali i qartë ishte kur AK refuzojë kualicion me Partinë Socialistë. Në atë moment ndjekësit e saj, përtej patriotizmit filluan të bëhen pragmatist duke bërë llogaritë personale për pushtet, karrierë apo për privilegje. Sigurisht, pas vendimi se AK s’do të ishte në kualicion me PS, shantazhet, joshjet e presionet do të ishin më të thjeshtë e do të shoqëroheshin me largime edhe masive.

Partitë e reja në 2025, në thelb kopje apo imitime të deformuar të AK, patën disa avantazhe dhe kjo i bëri pak më shumë të suksesshëm, por në thelb edhe jeta rezultuan humbëse ndaj sistemit.

Avantazhi i rëndësishëm për t’a ishte Drejtësia e re dhe protagonizmi i Spak që frenojë fenomenet që kishin ndarë ndodhur më parë. Ligji dhe zbatimi i dekriminalizimit në vitet e fundit ka dhënë efektet e tij. Një PD e lodhur ne lidership dhe e shpartalluar ishte në favor të subjekteve të reja.

Prandaj, rezultati që morën në 2025 ishte shumë më i mirë se i AK në 2013, por në fund edhe ky ishte humbës ndaj sistemit, sepse as nuk e tronditën e as nuk e rrëzuan.

Përkundrazi, kanë hyrë në një fazë të re dhe të fundit ndoshta, për të mundur përfundimisht veten deri në eliminim të plotë politik.

Pse ndodh kjo? Njerëzit e ndjekin një subjekt me shpresën për të marr pushtet dhe për të qenë të pushtetshëm. Nëse një subjekt ka marrë, qoftë edhe 60 mijë vota, por ka prodhuar vetëm një mandat, ky i fundit nuk i hynë në punë në misionin e tij as liderit e jo më ndjekësve!

Ndjekësit kthehen nga turma me emocione, në pragmaistë duke bërë llogari individuale. Humbja është arsye e këtij transformimi dhe për pasojë dhe goditja e shkatërrimit apo eliminimin politik i një subjekti anti- sistem që humb në jetën politike me këtë të fundit! Pushtet pak, do të thotë sofër e varfër dhe e vogël e për pasojë nuk ushqehen të gjithë e s’ka vend për të gjithë! Ata që janë pragmatistë fillojnë menjëherë të kërkojnë e të gjejmë një sofër më të madhe e me ushqim të bollshëm! m.p.

Një ngjarje e rëndë ka ndodhur pasditen e kësaj të shtune në Shëngjin. Sipas informacioneve paraprake mësohet se një 32-vjeçar ka humbur jetën tragjikisht pasi dyshohet se ka rënë nga skela ku dhe ishte duke punuar.

Ngjarja ka ndodhur rreth orës 16:45, në shëtitoren e plazhit të Shëngjinit, pranë bustit “Willson”, ku i riu me ininciale Z.L, banues në fshatin Mërqi, teksa ishte duke punuar ka rënë nga skela e ndërtimit.

Deri më tani dyshohet se 32-vjeçari ka rënë në kontakt me rrymën elektrike dhe si pasojë ka humbur kontrollin dhe ka rënë nga lartësia. Fatkeqësisht përplasja me tokën ka rezultuar fatale për të riun, i cili humbi jetën në vend.

Në vendin e ngjarjes menjëherë mbërritën policia, ndërkohë që po punojnë për zbardhjen e plotë të këtij aksidenti tragjik. m.p.

Një konflikt i vjetër për pronësinë e një rruge ka degjeneruar në dhunë fizike pranë parkut të Drilonit në Pogradec.

Në përplasjen e fundit janë përfshirë pronari i hotelit “Driloni”, Jetmir Muçllari, djali i tij 26-vjeçar Johan Muçllari, kryeplaku i Tushemishtit Ilirjan Tasellari dhe një person tjetër, Prokop Pilinçi. Të katërt janë vënë nën hetim nga autoritetet.

Sherri dyshohet se ka nisur për një rrugë pranë kufirit të pronës së kryeplakut, të cilën e pretendon si të tijën biznesmeni Muçllari. Ky i fundit ka vendosur një gardh rrethues në zonën e debatueshme, çka ka acaruar më tej marrëdhëniet mes palëve. Kryeplaku Tasellari ka raportuar disa herë rastin në polici, por konflikti ka vijuar dhe është përshkallëzuar në përplasje fizike.

Ngjarja është pjesë e një zinxhiri incidentesh të përsëritura, që pritet të hetohen më tej nga autoritetet për të përcaktuar përgjegjësitë ligjore. m.p.

Një fëmijë 8-vjeçar nga Kosova, që ishte larguar nga prindërit në plazhin e Shëngjinit, u gjet pas rreth një ore kërkimesh nga policia dhe vrojtuesit e plazhit. Policia thotë se pas njoftimit të nënës së fëmijës, shërbimet policore që patrullojnë me biçikleta u angazhuan menjëherë dhe e lokalizuan të miturin pranë një hoteli.

“Reagimi i menjëhershëm i Policisë dhe i vrojtuesve të plazhit bëri të mundur gjetjen e një fëmije që ishte larguar nga prindërit, në plazhin e Shëngjinit. Punonjësit e Policisë në Shëngjin i dorëzojnë familjes, në gjendje të mirë shëndetësore, fëmijën 8-vjeçar nga Kosova. Salla Operative e DVP Lezhë u njoftua nga një pushuese nga Kosova, se djali i saj ishte larguar dhe nuk po e gjente dot.

Menjëherë pas marrjes së njoftimit, shërbimet e Policisë që patrullojnë me biçikleta në zonën e plazhit në Shëngjin u angazhuan dhe koordinuan veprimet me vrojtuesin e plazhit për gjetjen e fëmijës. Pas rreth një ore kërkimesh intensive në terren, punonjësit e Policisë e lokalizuan të miturin pranë një hoteli. Fëmija ndodhej në gjendje të mirë shëndetësore dhe iu rikthye menjëherë nënës së tij.

Nëna e fëmijës ka falënderuar shërbimet e Policisë dhe vrojtuesit të plazhit për reagimin e shpejtë dhe profesional që kontribuoi në gjetjen e të miturit.”, njofton policia. m.p.

Policia e Bolonjës ka arrestuar një shtetas shqiptar 34 vjeç, i cili u kap me mbi 11 kilogramë kokainë dhe një armë zjarri.

Shqiptari ishte nën mbikëqyrje prej disa kohësh, pasi rezultonte me precedentë penalë më parë. Ai ishte dënuar më me 14 vite burg për vrasjen e një muratori rumun 25-vjeçar, ngjarje e ndodhur më 26 shtator 2011 në Bolonjë.

Sipas autoriteteve, shqiptari kishte vuajtur dënimin për krimin dhe për shfrytëzim prostitucioni “nga viti 2011 deri në maj të vitit 2024”.

Hetuesit gjatë një periudhe vëzhguan lëvizjet e shqiptarit, dhe më pas ndërhynë dhe ushtruan kontroll në banesën e tij në Castel dei Britti, një fshat i vogël i San Lazzaro di Savena, në zonën e Bolonjës.

Gjatë kontrollit në bodrumin e shtëpisë, u gjet një çantë që përmbante 10 blloqe kokaine me peshë totale 11.405 kilogramë dhe një pistoletë Arminius 38 Special të fshehur në një furrë të integruar, i cili u vodh në provincën e Sienës në nëntor 2022. Brenda çantës ishte edhe një çorape që përmbante 23 fishekë. m.p.

Një sipërmarrës ndërtimi nga Berlini me origjinë nga Serbia u dënua me pesë vjet heqje lirie për evazion fiskal me vlerë miliona dollarë. Në Serbi ai paraqitej si bamirës.

Si drejtor de facto i një kompanie ndërtimi, serbi i dënuar shkaktoi dëme prej gati 15 milionë eurosh përmes punës së paligjshme, tha kryetarja e trupit gjykues Christine Klimke gjatë leximit të vendimit në Gjykatën Rajonale të Berlinit të enjten, më 17 korrik.

53-vjeçari (emri i të cilit, madje as inicialet e tij, nuk përmenden në median gjermane) është mbështetur në punën e paligjshme që nga themelimi i kompanisë së ndërtimit.

Edhe pse kjo është e përhapur në industrinë e ndërtimit në Gjermani, nuk mund të thuhet se ai “e ka bërë këtë rastësisht”, tha Klimke.

Që në fillim, qëllimi i tij ishte të transferonte sa më shumë para të ishte e mundur në atdheun e tij, në Serbi dhe të paraqitej atje si barmirës, shpjegoi gjyqtarja, duke shtuar se kompania paguante pagat e punëtorëve në para të gatshme dhe nuk i raportonte ato tek autoritetet kompetente. m.p.

Një grua nga Elbasani ka dërguar një mesazh në redaksinë tonë, duke u përpjekur të marrë një mendim për shqetësimin e saj familjar. Nuk është vetëm shqetësimi i saj, por një nga temat më delikate në shoqërinë shqiptare sot.

“Kam 8 vite e martuar dhe kam nje marredhenie te shkelqyer me burrin tim. Ne jetojme ne Elbasan. Me pare kemi jetuar ne fshat. Jemi te dy ne pune dhe deri me sot gjerat kane shkuar shume mire mes nesh. Problemi eshte se duam te kemi nje femije dhe nuk po mundemi. Shqetesimi im eshte mentaliteti i burrit. Une, me porosine e tij, i kam bere te gjitha analizat mjekesore dhe rezultatet jane shume pozitive. Nuk ka asgje qe nuk shkon tek une. Jam mire dhe mund te lind femije. Ai, nderkohe, nuk pranon te beje analizat. Thote se problemin e kam une. Nje dite, ne debat e siper, me tha nje fjali qe nuk e kaperdij dot. Nese do te te tregoj a jam mire, do bej femije me nje grua tjeter, me tha. Ishte nje gje shume e rende per mua. M’u duk nje mungese respekti ndaj meje dhe fyerje, sepse une nuk kam asnje problem. Me thoni, si duhet te veproj? Arsyeja pse ju shkrova eshte se komentuesit mund te tregojne historite e tyre dhe ndoshta dikush me jep nje ide apo mendim”, – na ka shkruar ajo.

Urojmë që ky lajm të lexohet sa më shumë. Mirëpresim komentet tuaja në postim ose nëpërmjet hapësirës së mesazheve në kutinë tonë ‘inbox’ të faqes. m.p.

Këtë të shtunë pritet që kryetari i Lëvizjes Vetëvendosje, Albin Kurti, të zhvillojë takim me liderin e NISMËS, Fatmir Limajn, si përpjekje për të arritur një marrëveshje që do ta nxirrte vendin nga bllokada institucionale që zgjat prej muajit prill.

Nga partia e Limajt thonë se ai dhe NISMA janë alternativa e vetme për Kurtin.

“Ky është realiteti politik. NISMA dhe lideri Fatmir Limaj e kanë kuptuar që në fillim, andaj kemi zgjatur dorën e bashkëpunimit. Presim edhe nga lideri i LVV-së të tregojë vullnet. Aktualisht alternativa e vetme është NISMA. Nuk ka ofertë tjetër – ne kemi ofruar bashkëpunim pa kushte: që ekzekutivi t’i takojë partisë fituese, ndërsa në krye të Kuvendit të jetë Limaj”, u shpreh Xhevahire Izmaku, deputete e NISMËS.

Ky takim pritet t’i paraprijë zhbllokadës, pasi në rast arritjeje të marrëveshjes, synohet që konstituimi i Kuvendit të bëhet në vazhdimin e se hënës.

Nga Lëvizja Vetëvendosje theksojnë se po vazhdojnë të jenë konstruktivë për të gjetur zgjidhje.

“Takimet me përfaqësues politikë, VV-ja po i zhvillon vazhdimisht – jo vetëm sot, por edhe dje, pardje dhe do t’i vazhdojmë edhe nesër. Le të shihet nga të gjithë kush është bllokuesi i vërtetë pas 50 tentativave për formimin e Kryesisë së Kuvendit”, tha Artan Abrashi deputet i LVV-së.

Në Partinë Demokratike të Kosovës ka qëndrime të ndryshme për votimin e Fatmir Limajt për kryeparlamentar, ndërsa nga Aleanca për Ardhmërinë e Kosovës thonë se nuk do ta votojnë atë.

“Mendoj që PDK-ja do të votojë Fatmir Limajn për kryeparlamentar. Ai ka treguar një virtyt që e vlerësoj shumë. Për të mbajtur një pozitë shtetërore, mendoj që njeriu duhet ta dojë këtë vend – edhe nëse nuk di, ka këshilltarë që mund ta mësojnë. Mendoj se Limaj e do këtë vend”, tha Jakup Nura, deputet i PDK-së.

“Nuk kam votë për Fatmir Limajn. Ai nuk e meriton votën time. Kam deklaruar që para fushatës kanë folur shumë rëndë për Albinin, e pas fushatës po e vlerësojnë”, Nait Hasani, deputet i PDK-së.

“Edhe nëse ata arrijnë dakordësim, votën time Limaj nuk do ta ketë. Ne kemi dhënë propozimet tona – cilido prej VV-së që nuk është i angazhuar në ndonjë ministri, do ta votonim. Por Limajn jo”, Lahi Brahimaj, deputet i AAK-së.

Kuvendi i Kosovës nuk është konstituar tash e tre muaj. Afati i fundit për këtë proces, sipas vendimit të Gjykatës Kushtetuese, është data 26 korrik. m.p.

Forcat zjarrfikëse të Vlorës ndodhen prej orëve të para të ditës në malin e Dukatit, ku terreni i vështirë dhe malor e bën të pamundur ndërhyrjen me mjete.

Zjarrfikësit po punojnë me lopata dhe degë pemësh për të izoluar dhe shuar flakët.

Me qindra pisha, bredha dhe pemë të tjera janë shkrumbuar nga zjarri, i cili i ndihmuar edhe nga era po përparon duke u ngjitur në pjesën e majës së malit të fshatit Dukat.

Edhe pse është në distancë, Parku Kombëtar i Llogarasë rrezikon të përfshihet nga flakët nëse era vijon të fryjë nga verilindja.

Në zonë ndodhen 20 forca zjarrfikëse, ndërkohë që kërkohet ndërhyrje nga ajri për të ndihmuar në shuarjen e flakëve.

Partia Demokratike denoncon tenderë abuzivë sipas saj nga Komiteti Olimpik Kombëtar Shqiptar i drejtuar nga Fidel Ylli, të cilin e akuzon se ka vendosur shefe të misionit të Lojëra Olimpike “Paris 2024”, një punonjëse të biznesit te vet.

Në një deklaratë për mediat, zëdhënësja e Antikorrupsionit në PD, Genta Vangjeli u shpreh:

“Shqetësuese janë të dhënat mbi mënyrën e zhvillimit të tenderave dhe prokurimeve nga KOKSH, ku mungesa e konkurrencës dhe përsëritja e të njëjtëve operatorë fitues në tenderë me vlera të mëdha, hedh hije dyshimi mbi procesin.

Konkretisht tenderin për veshje sportive në vitin 2022 me vlerë mbi 1 milion euro dhe tenderin e vitit 2023 me të njëjtin objekt, me fond prej 4.7 milionë eurosh, si dhe prokurimet për blerje topash basketbolli e volejbolli – të gjitha të fituara nga i njëjti operator.

Shqetësues është edhe përfshirja e punonjëses së biznesit privat, të z.Fidel Ylli në pozicionin e shefes së misionit të Lojërave Olimpike ‘Paris 2024, duke ngritur dyshime serioze për praktika të papranueshme të menaxhimit të interesit publik.” m.p.