Për 350 vende në Policinë e Kosovës kanë aplikuar afro 6900 qytetarë në konkursin e fundit, i cili u mbyll së fundmi. Sipas njohësve të kësaj fushe, kjo po bëhet më shumë për të hyrë në punë të shtetit shkaku i stabilitetit më të madh, ndërkaq trajnimi i tyre do të zgjatet në 6 muaj, siç kishte qenë më herët.

Shumë shpejt pritet që Kosovës t’i shtohen edhe 350 policë të rinj.

Kjo pasi që sapo është mbyllur konkursi i hapur nga Policia e Kosovës.

Megjithatë, për këto pozita do të zhvillohet një garë e ashpër, meqenëse numri i aplikimeve është goxha i madh

“Në konkursin për zyrtarë policorë, që ka qenë i hapur nga data 17 qershor deri më 7 korrik, kanë aplikuar gjithsej 6818 veta, prej tyre 5569 meshkuj dhe 1249 femra.”

Por, si shpjegohet një interesim kaq i madh për një numër të kufizuar të të pranuarve?

“Qytetarët e Kosovës e kanë një përshtypje që domosdo duhet të jenë të punësuar në një punë të shtetit, e cila është një qasje e gabuar e djemve dhe vajzave të reja, sepse një punë e shtetit nuk sjell edhe një punë të sigurt, një punë e shtetit nuk të sjell të ardhura të mjaftueshme dhe të sigurta për të jetuar”, tha Visar Rrecaj, ish-zyrtar i Policisë së Kosovës

E pas rastit të fundit në Lipjan, ku një qytetar ndërroi jetë, e dyshimet janë që kanë kaluar kompetencat e tyre zyrtarët policorë, si pasojë e mos profesionalizmit të tyre dhe mos përgatitjes së tyre të mjaftueshme në Akademinë e Policisë, e cila momentalisht zgjatë afro 3 muaj, nga 6 sa ka qenë, sipas Rrecajt, ka qenë një gabim.

“Trajnimet kryhen, por koha gjatë së cilës ata i kryejnë këto trajnime, nuk mjafton që këto trajnime të kthehen në shprehi, sepse trajnimet fizike e psikike duhet të përsëriten shumë gjatë, deri të kthehen në shprehi”, tha Visar Rrecaj, ish-zyrtar i Policisë së Kosovës

Televizioni Dukagjini ka pyetur Policinë nëse trajnimi në Akademinë Policore do të kthehet në 6 muaj prej gjeneratës së re e tutje, nga 3 muaj sa është aktualisht, por ky institucion nuk ka kthyer përgjigje.

Megjithatë, prej burimeve të saj televizioni mëson se një gjë e tillë do të ndodhë.

Pritshmëri të tilla ka edhe ish-nënkoloneli Refki Morina.

“Trajnimi që ka qenë 3 muaj, shumë shpejt do të kthehet në 6 muaj. Në bazë të informacioneve që kemi, do të kenë trajnime të mjaftueshme si për armë dhe të tjerat, dhe duhet t’i kushtohet rëndësi shumë edhe trajnimeve që do të kryhen pas Akademisë, sidomos në punën e tyre fushore 19-javore”, tha Refki Morina, Ish-nënkolonel në Policinë e Kosovës .

Ani pse zyrtarisht nuk është thënë, si arsye për shkurtimin e trajnimit është përmendur në opinionin publik nevoja që policët e rinj të dalin në terren meqë, sipas diskutimeve, ka pasur mungesë të tyre./RTV Dukagjini/

The post Interesim i madh për t’u bërë polic, trajnimi në akademi pritet të kthehet në 6 muaj appeared first on Telegrafi.

Në episodin e parë të ciklit të ri të emisionit “Debat Plus”, para publikut vjen një rrëfim rrëqethës e tronditës nga një i mbijetuar i luftës në Kosovë.

Kjo dëshmi nuk është vetëm për të dokumentuar krimet e kryera, por për të thyer heshtjen që për vite kishte rënduar mbi barrën e përjetimit dhe dhunës.

Emisioni nisi me një reflektim mbi jetën e para luftës e të mbijetuarit të dhunës seksuale nga forcat serbe – një jetë modeste në një fshat malor, e mbushur me vështirësi, punë si arsimtar dhe përpjekje për një jetë të dinjitetshme.

Por, ngjarjet që ndodhin në vitin 1998-1999 shënuan pikën e kthesës.

Ishte periudha kur ai për herë të parë dëgjoi për Ushtrinë Çlirimtare të Kosovës e cila po luftonte forcat serbe, pikërisht atëherë frika, dhuna dhe persekutimi hynë në mënyrë brutale në jetën e tij dhe të familjes së tij.

Rrëfimi i tij përfshin ndarjen nga gruaja dhe fëmijët, djegien e fshatit, depërtimin me dhunë, rrahjet, poshtërimin dhe aktet e dhunës seksuale ndaj tij.

“Tmerr çka s’ta merr mendja hiq. E filloi lufta edhe neve si zakonisht, e kemi pas punktin e policisë dy kilometra prej fshatit tonë edhe gjithë kemi qenë me frikë, hyjshin policia vazhdimisht, çdo dy ditë, na gjithë kemi fjetë në mal, më së zori e kanë pas fëmija edhe gratë, se prapë na iknim por fëmija e gratë e kanë pas zor, se ka pas herë që me ka dy ditë s’kemi hangër bukë… Ujë pijshim se gjenim përrockave, e me hangër ka ndodhë dy ditë s’kemi hangër”, ka rrëfyer ai.

“… me maska vinin, dy ofansiva kanë hy në fshat tonë. Ofansiven e parë s’kanë mujt s’kanë mujt me më za, ndërsa, në ofansiven e dytë me kanë za dhe na kanë mbledhë në fshat aty, kemi qenë 480 vetë, kurr s’e harroj atë 480 vetë edhe na kanë mbleshë një arë edhe e kanë djegë tërë fshatin…Po, po krejt, edhe gra e fëmijë i kanë marrë i kanë qu për *******, neve burrave na kanë mbledhë në një arë edhe, se e dinin disa gjuhën, unë s’e kam ditë gjuhën serbe, thamë, çka bahet me neve, thanë, me juve po ju pret masakra e ******** se dy ditë kanë hy në ************ e kanë kry masakrën, tani kanë hy në fshatin tonë”, ka rrëfyer ai..

Në këtë rrëfim rrëqethës, i mbijetuari tregon se si u kap nga forcat serbe, bashkë me 480 burra të tjerë nga fshati dhe zona përreth, dhe u dërgua në drejtim të ************, me tanke para e mbrapa, të shtyrë e të rrahur brutalisht.

“Po pas masakrës së **********në ora 4 u kry ofansiva, ata qysh thoshin, edhe u mblidhen të shkolla në fshat aty që janë mbledh ushtria, policia krejt me maska, të ngjyrosur, edhe tha, u kry ofansiva, tha me sukses edhe këta krejt me i marrë e me i qu në ***********…. edhe kah jemi shku rrugës në fshatin **********, **********”, ka thënë ai.

Dy herë ai përjetoi dhunë seksuale nga policë serbë – njëri prej tyre e urinoi mbi trupin e tij të përgjakur dhe të rrëzuar në dysheme.

“… edhe veç ma ka ba me gisht hajde, edhe na kanë qu e kemi shkarku zhavorin e kena maru si punkt edhe me kanë marr mu me kanë shti mrena në shpi të ******** edhe me kanë dhunu.…Jo, unë kam qenë një dhomë vetëm edhe krejt ata gjashtë kanë qenë, i kanë qu tjetër vend…Krejt të maskum, edhe më ka ra të fikt, unë s’kam ditë kurgja hiq, kur më ka dal çpia(më ka ardhë vetëdija), më urinonte, një polic, kur kqyri krejt gjak isha kanë….edhe më ka rrokë grykë automati në shpinë, bile i kam shenjat në shpinë edhe më ka thanë serbisht hyn në kolonë”, ka rrëfyer ai.

Përmes zërit të tij të thyer por të vendosur, dëshmitari solli një kujtesë të gjallë për tmerret që ndodhën në luftën e fundit në Kosovë.

Ky rrëfim nuk është vetëm dokument i së shkuarës, por një thirrje për drejtësi dhe një kujtim i gjallë për brezat e sotëm e të ardhshëm që të mos harrojnë. Kjo është vetëm një nga shumë dëshmitë që emisioni “Debat Plus” do të sjellë në ciklin e tij të ri, i cili synon të ndriçojë të vërtetat e pathëna të luftës përmes zërave të atyre që mbijetuan.

The post Një zë që thyen heshtjen – rrëfimi i një të mbijetuari të dhunës seksuale gjatë luftës në Kosovë appeared first on Telegrafi.

Derisa Gjykata Komerciale aprovoi kërkesën për masë sigurie, respektivisht pezullim të vendimit të ZRRE-së për hapjen e tregut të energjisë elektrike për bizneset e mëdha, Rregullatori nuk i sheh aktvendimet në raste individuale si precedent. Ndërkohë, kërkesa për masë sigurie nga përfaqësues të bizneseve në tërësi u refuzua nga Gjykata Themelore. Sidoqoftë, krahas asaj kolektive, beteja vazhdon me padi individuale në Gjykatën Komerciale.

Vendime të kundërta lidhur me kërkesën për masë sigurie ndaj vendimit të Zyrës së Rregullatorit për Energji për hapjen e tregut të energjisë elektrike për bizneset e mëdha, kanë nxjerrë gjykata të ndryshme në vend.

Departamenti për Çështje Administrative i Gjykatës Themelore, refuzoi dy kërkesa të Odës Ekonomike dhe Shoqatës së Prodhuesve në emër të bizneseve, si dhe të PDK-së për masë sigurie.

Ndërsa, Gjykata Komerciale ka aprovuar masën e sigurisë ndaj vendimit të ZRRE-së në disa raste individuale të padive të bizneseve që preken nga procesi, duke e pezulluar atë deri në aktgjykimin përfundimtar.

Rregullatori, që refuzon ta pezullojë vendimin në tërësi duke mos i konsideruar aktvendimet individuale si precedent të përgjithshëm, nuk lëvizi nga qëndrimi.

“Jo, këto Aktvendime nuk krijojnë precedent për të gjithë procesin dhe nuk kanë efekt të përgjithshëm. Çdo vendim për masë të sigurisë ka efekt vetëm për palët përkatëse në procedurë. Vendosja e masës së sigurisë kërkon parashtrim të veçantë dhe individual të kërkesës për pezullim dhe shqyrtohet në bazë të rrethanave të veçanta të secilit rast nga Gjykata”.

Në Shoqatën e Prodhuesve, kërkesa e të cilëve për pezullim të vendimit në emër të bizneseve si tërësi u refuzua, këmbëngulin se Rregullatori duhet të pajtohet për pezullim pasi paditë individuale po vazhdojnë.

“Gjykata Themelore, Departamenti për Çështje Administrative, kemi marrë dje njoftimin që e ka refuzua masën pezulluese, por nuk e ka refuzua padinë. Ne do të vazhdojmë me Gjykatën e Apelit dhe tutje qëllimi ynë ka qenë për një vendim për procesin në tërësi, ndërkohë ne jemi duke vazhdua me të gjitha bizneset edhe paditë individuale. Paditë individuale po pezullohen nga Gjykata Komerciale”, ka deklaruar Kushtrim Ajvazi, kryetar i Shoqatës së Prodhuesve.

Ai sqaroi se për shkaqe ligjore padia bashkë me OEK-un u adresua në Themelore pasi u bë në emër të bizneseve, teksa ato individuale kanë adresë Komercialen.

Ndërsa u shpreh i bindur se institucionet e drejtësisë do t’u japin të drejtë në të gjitha paditë.

“Të jemi të qartë, edhe pse kemi shkua si grup, ne individualisht të gjitha bizneset janë duke dorëzua lëndë individuale, ne jemi duke pritë dhe çdo ditë po marrim përgjigje për rastet individuale që po pezullohen. Ky rast nuk nënkupton që po i dëmton bizneset në paditë individuale. Paditë individuale janë duke vazhdua, do të vazhdojnë deri te padia e fundit ku do të fitojmë rastin”, ka theksuar Ajvazi.

Nga 1 Qershori, rreth 1300 biznese me më shumë se 50 punëtorë ose më shumë se 10 milionë euro qarkullim vjetor, janë nxjerrë në tregun e hapur të energjisë elektrike përkundër protestave dhe kërkesës së përsëritur për shtyrjen e procesit për një vit, me qëllim përgatitjen e tregut dhe bizneseve./RTV Dukagjini

The post Konfuzion ligjor për vendimin e ZRRE-së, gjykatat me vendime të ndryshme – bizneset kërkojnë drejtësi appeared first on Telegrafi.

Ministri në detyrë i Mbrojtjes, Ejup Maqedonci, në një intervistë në emisionin Personale në RTV Dukagjini, ka deklaruar se lufta e Ushtrisë Çlirimtare të Kosovës mund të konsiderohet ndër më të pastrat në historinë e njerëzimit.

Megjithatë, sipas tij, pas përfundimit të luftës, shoqëria kosovare dhe klasa politike nuk kanë bërë sa duhet për ta mbrojtur dhe promovuar këtë pjesë të lavdishme të historisë kombëtare.

Maqedonci ka theksuar se vendi ka qenë nën një presion të vazhdueshëm ndërkombëtar për ta lënë në hije të kaluarën çlirimtare, në funksion të krijimit të një rendi të ri në Ballkan.

Ai ka komentuar edhe për themelimin e Gjykatës Speciale, duke thënë se në kohën kur është marrë ai vendim, nuk ka qenë e mundur të bëhej më shumë për ta parandaluar atë.

“Ne nuk e kemi pasur sigurinë as për të ardhmen e vendit… e gjithë shoqëria jonë, por besoj se edhe të gjithë ata që ishin në politikë për këto 25 vite, nuk kanë bërë mjaftueshëm për të ruajtur vlerat e UÇK-së, për të promovuar luftën e drejtë dhe të pastër të UÇK-së dhe për të penguar synimet e Serbisë dhe aleatëve të saj për të denigruar UÇK-në”, ka deklaruar ai.

”Gjykimi në Hagë nuk është gjykim personal por ndaj një kauze. Atje janë marrur drejtuesit e UÇK-së dhe duke u dënuar apo synuar të dënohen, dënohet komplet struktura”, ka thënë ai.

Në pyetjen se sa po bënë shteti jonë tani për të mbrojtur këta krerët të cilët janë atje, Maqedonci ka thënë:

”Do të duhej të ishte e kundërta besoj”, ka thënë ai.

Maqedonci vlerësoi se mungesa e një qëndrimi të unifikuar dhe të qëndrueshëm për ta mbrojtur historinë e luftës së UÇK-së ka lënë hapësirë që Serbia të vazhdojë përpjekjet për ta kriminalizuar atë luftë, përmes narrativave ndërkombëtare dhe nismave ligjore.

The post Maqedonci: Lufta e UÇK-së ishte e lavdishme, por shoqëria dhe politikanët nuk e promovuan mjaftueshëm appeared first on Telegrafi.

Që nga viti 2023, në hapësirat e “Albi Mall” në Prishtinë, Libraria Dukagjini zë një pjesë të saj me librat më të fundit të saj, për organizimin e Festivalit të Librit.

Në aktivitetin e sivjetmë, qëllimi është që lexuesi të jetë më afër, dhe të ketë më shumë vende për t’u informuar, blerë dhe lexuar libra të ndryshëm.

Latif Mustafa tregon detaje më të hollësishme për këtë organizim.

“Kemi organizuar edhe disa aktivitete për fëmijë të cilët do të nxisin disa lloje të shkathtësive të tyre, atyre shkathtësive që kanë të bëjnë me edukimin estetik, edukimin analitik, por edhe me sensin e tyre të garës, për të garu dhe për të fituar ndonjë libër”, ka thënë Latif Mustafa, Libraria “Dukagjini”.

Në këtë aktivitet, ku janë afro 5 mijë tituj të librave, lexuesit mund të gjejnë zhanre të ndryshme, të cilët janë me një zbritje goxha të favorshme.

“Gjithashtu, kemi një lirim enorm, nga 20% deri në 60%, duke i përfshirë këtu librat e Librarisë ‘Dukagjini’ që i kemi standard me një zbritje prej 30%”, ka thënë Latif Mustafa nga Libraria “Dukagjini”.

E një aktivitet të tillë e mirëpresin edhe qytetarët, të cilët thonë se organizime të tilla i shtyjnë drejt leximit.

“Normal, i shtinë me i lexu, edhe zbritje, njerëzit me ble, me lexu, edhe është hala më mirë.”

“Me lexu nuk po mundemi shumë, por çmimet janë në rregull.”

Festivali këtë të shtunë pati ditën e dytë, ndërkohë do të jetë i hapur edhe javën e ardhshme.

The post “Dukagjini” organizon “Festivalin e Librit”, prezantohen afro 5 mijë tituj appeared first on Telegrafi.

Në mbyllje të serisë së hulumtimeve të emisionit “Debat Plus”, publiku u njoh me kulmin e një rrëfimi tronditës mbi figurën shumëdimensionale të Nazim Bllacës, ish-mësuesi i gjeografisë që u bë dëshmitar kyç i EULEX-it dhe, sipas materialeve të publikuara, njëkohësisht bashkëpunëtor i prokurorisë serbe.

Përmes përgjimeve të incizuara gjatë kohës sa Bllaca ndodhej në burg, dëshmohet se ai gëzonte privilegje të jashtëzakonshme për një të dënuar për vrasje: komunikonte për orë të tëra në telefon me Zdenka Pumper, hetuese e lartë e EULEX-it, e cila më vonë do të bëhej pjesë e Zyrës së Prokurorit të Specializuar në Hagë.

Në momente kur kërkesat e tij për ulje dënimi, lirim me kusht apo avancim të rasteve në drejtësi nuk plotësoheshin, Bllaca kërcënonte se do të tërhiqej nga bashkëpunimi dhe se do të dilte publikisht kundër EULEX-it.

Në një nga përgjimet, ai dëgjohet duke thënë:

“Nëse EULEX-i nuk e çon përpara, unë më 21 janar do t’ia zgjas dorën Danillos, ty edhe me ju thanë ‘Na falni, mbaroj gjithçka’… e më dërgoni për atje. Le të lëshon ndonjë prokuror një letër që Bllaca s’don më”.

Për më tepër, ai pohon se kishte hapur Facebook-un nga burgu, ndonëse nuk kishte të drejtë, dhe kishte paralajmëruar se do të fliste publikisht për çështje të ndjeshme, përfshirë rastet Bamieh dhe Ratel, dy prokurorë të përfshirë në akuza ndaj ish-krerëve të UÇK-së.

“Pas 10 ditësh, Bllaca do të flas, edhe pikë”, – shkruante ai.

Bllaca paraqitet si “agjent i dyfishtë”, dëshmitar që për 6 vjet kishte ndihmuar EULEX-in të ndërtonte raste të mëdha gjyqësore, përfshirë katër procese penale në Kosovë, dhe që, sipas të gjitha gjasave, është përfshirë edhe si dëshmitar në Hagë.

Emri i tij është përmendur edhe nga vet mbrojtja e Kadri Veselit në procesin aktual.

Ndërkohë, Zdenka Pumper, personi që bashkëpunoi nga afër me Bllacën për vite me radhë në Kosovë, tashmë koordinon hetimet në Hagë kundër Hashim Thaçit, Kadri Veselit, Jakup Krasniqit dhe Rexhep Selimit.

Sipas vetë Bllacës, “nuk ka çështje që Zdenka nuk e di në Kosovë”, duke e përshkruar atë si njërën nga figurat më të fuqishme në zinxhirin e drejtësisë ndërkombëtare që ka vepruar në Kosovë.

Ky kapitull final i hulumtimit të ‘Debat Plus’ ka lënë shumë pyetje të hapura për legjitimitetin e proceseve të drejtësisë ndërkombëtare, për rolet e individëve kyç në ndërtimin e aktakuzave, dhe mbi të gjitha, për përdorimin politik e juridik të dëshmitarëve që veprojnë në kushte të paqarta dhe shpesh të dyshimta.

“Debat Plus” përmbylli episodin e fundit me thirrjen për të vazhduar kërkimin drejt së vërtetës dhe drejtësisë, në një sistem ku besimi publik është lëkundur dhe ku faktet shpesh janë të errësuara nga interesa të ndërlikuara ndërkombëtare.

“Në një sistem ku e vërteta mbetet shpesh e fshehur, e keqpërdorur dhe e manipuluar, për ne mbetet detyrë të vazhdojmë të kërkojmë përgjigje dhe drejtësi”, ka thënë Ermeal Panduri./RTV Dukagjini/

The post Bllaca, dëshmitari që shkruante nga burgu në Facebook dhe udhëzonte drejtësinë ndërkombëtare appeared first on Telegrafi.

Në një nga përgjimet e publikuara në “Debat Plus” në RTV Dukagjini, Nazim Bllaca, dëshmitar bashkëpunues i EULEX-it dëgjohet duke kërcënuar me pasoja të rënda në rast se ai “goditet” nga misioni ndërkombëtar.

“Nëse EULEX-i e godet Bllacën, ti e din çka del mandej… Unë nuk jam as Agim Zogaj… këtu ku ka të holla, ka kallashnikov. Ku ka kallashnikov, ka edhe plumb”, i thotë ai Zdenka Pumper-it, një zyrtare e EULEX-it me të cilën komunikonte rregullisht.

Në vazhdën e publikimeve, janë zbardhur përgjime dhe dokumente që dëshmojnë për mënyrën se si Bllaca për vite me radhë ka bashkëpunuar me hetues ndërkombëtarë dhe me Serbinë, përfshirë edhe raste që më vonë përfunduan në Gjykatën Speciale në Hagë.

Në një tjetër përgjim, Bllaca deklaron se kishte bashkëpunuar me prokurorin italian Maurizio Salustro, i cili fillimisht u prezantua si ndjekës i “peshqve të mëdhenj” në Kosovë, por që më pas punoi si këshilltar i drejtësisë në Beograd.

Ai tregon se kishte dorëzuar lëndë për rastin “Kleçka” dhe se e njihte mirë procesin e përzgjedhjes së figurave që viheshin në shënjestër nga hetimet ndërkombëtare:

“Unë kam nënshkru kush janë peshqit e mëdhenj gjatë kohës së luftës… kam dorëzu lëndën te Salustro… e di se cilët janë figurat me pushtet dhe me pika të zeza”, dëgjohet të thotë Bllaca.

Kurse në një përgjim tjetër Bllaca i thotë Zdenkës: Prit pak se kur nis punën Gjykata Speciale, do ta kalojmë atje rastin sepse është çështje sensitive.

Por përtej dëshmisë, përgjimet zbulojnë një frikë dhe tension të vazhdueshëm tek Bllaca, për shkak të përfshirjes së tij në rrjete sensitive të bashkëpunimit ndërkombëtar.

The post ’’Ku ka kallashnikov, ka edhe plumb”- Bllaca kërcënonte EULEX-in duke premtuar dëshmi për “peshqit e mëdhenj” në Hagë appeared first on Telegrafi.

Përgjimet e publikuara në ‘Debat Plus’ dëshmojnë se Zdenka Pumper jo vetëm që ishte në kontakt të vazhdueshëm me Nazim Bllacën, por njihte edhe serbët me të cilët ai bashkëpunonte, si Radosllav, Gjinoviq e Mirkoviq.

Emrat e tyre përmenden qartë në biseda të regjistruara, ku Bllaca i referohet Gjinoviqit si “Gjina” – një figurë kyçe me lidhje të drejtpërdrejta me EULEX-in dhe, sipas Bllacës, njeri që ndihmonte në çuarjen përpara të çështjeve ku “viktimat ishin nga pala serbe”.

Bllaca: Po dëgjo, Gjina veç m’ka thirr thotë Bllacë, Bllacë hyn me bashkëpunu me Allenin edhe u kry muhabeti. Mos fol asgjë para dy vjetëve, mos fol kurrgjë me Danillon. Unë dje e kom thirr edhe i kom thonë: “Gjino, unë e kom kry punën,  Alleni e ka kry punën, Zdenka e ka kry punën”. Mirëpo, tash duan me mashtru Prokuroria, a e kupton. Thotë, ‘fal Zotit që e kanë kry punën Alleni edhe Zdenka’. I them ‘po veç Prokuroria e bllokon’ thotë ‘pse’, i them unë pse mund të jetoj në duart e peshqve të mëdhenj të Hajredin Kuçit, a e kupton? Atëherë thotë ‘jo unë se paskam ditë edhe thotë se EULEX-i të monitoron aty edhe thotë jo s’ka asgjë aty. S’kam kurrfarë sigurie për jetën time. Sot jam gjallë, nesër muj me vdek. I thom mirë çoma letrën unë e çoj të hënën edhe kur ta ndërprej tash lidhjen me ty menjëherë do ta thërras Gjinoviqin, edhe i them edhe njëherë të hënën në ora 09:00 me ma dërgu dokumentin të Rado Saljeviqi. Pse kërkoj ndihmë prej këtij, për shkak se viktimat janë nga pala serbe a e kupton? Për këtë arsye unë kërkoj që dikush brenda ndonjë njeri brenda, a e ke pa dokumentin unë e kom çu te Mirkoviqi, ka dikush brenda në EULEX që don me m’blloku, nuk po du me të gënjy.

Në njërin nga përgjimet, Bllaca përmend se kishte refuzuar të bashkëpunonte me një pjesë të stafit të EULEX-it, duke u ankuar për “mashtrime brenda organizatës”, por se Gjinoviqi kishte ndërhyrë për të rregulluar kontaktin me prokurorin Allen Cansick – duke i dhënë sinjalin se gjithçka do të shkonte mirë për aq kohë sa viktimat ishin serbe.

Bllaca:  Jam nervozu shumë kam punu me ty edhe them faleminderit shumë që kemi punu, bashkëpunojmë, shkojmë kadale, step by step, 20 muj aty këtu edhe u kry muhabeti. Nuk të kam gënjy apo jo? Kam mendu me ndihmu edhe Gjinoviqi ka hy në kontakt me Allenin edhe thotë hyn Bllaca, edhe i thash jo bre se nuk besoj se ka shumë mashtrues aty brenda, në organizatën tande. Ai thotë hyn kur të them unë, hyn. Unë them a mundesh me m’ndihmu nëse më del ndonjë bllok aty? Thotë unë do të ndihmoj, s’ka me pas bllok këtu për arsye se viktimat janë të anës serbe, a më kupton?

Zdenka: Po,po e kuptoj

Në një tjetër përgjim, Bllaca thotë se kishte informuar Gjinoviqin, Zdenkën dhe Allenin se kishte përfunduar punën e tij, por po përballej me bllokada nga Prokuroria, të cilat ai i lidhte me “peshq të mëdhenj” si Hajredin Kuçi. Bllaca shprehet se i frikësohet për jetën e tij dhe se po kërkonte ndihmën e serbëve me ndikim për të çuar përpara dokumentet që kishte përgatitur.

Bllaca: Po dëgjo, Gjina veç m’ka thirr thotë Bllacë, Bllacë hyn me bashkëpunu me Allenin edhe u kry muhabeti. Mos fol asgjë para dy vjetëve, mos fol kurrgjë me Danillon. Unë dje e kom thirr edhe i kom thonë: “Gjino, unë e kom kry punën,  Alleni e ka kry punën, Zdenka e ka kry punën”. Mirëpo, tash duan me mashtru Prokuroria, a e kupton. Thotë, ‘fal Zotit që e kanë kry punën Alleni edhe Zdenka’. I them ‘po veç Prokuroria e bllokon’ thotë ‘pse’, i them unë pse mund të jetoj në duart e peshqve të mëdhenj të Hajredin Kuçit, a e kupton? Atëherë thotë ‘jo unë se paskam ditë edhe thotë se EULEX-i të monitoron aty edhe thotë jo s’ka asgjë aty. S’kam kurrfarë sigurie për jetën time. Sot jam gjallë, nesër muj me vdek. I thom mirë çoma letrën unë e çoj të hënën edhe kur ta ndërprej tash lidhjen me ty menjëherë do ta thërras Gjinoviqin, edhe i them edhe njëherë të hënën në ora 09:00 me ma dërgu dokumentin të Rado Saljeviqi. Pse kërkoj ndihmë prej këtij, për shkak se viktimat janë nga pala serbe a e kupton? Për këtë arsye unë kërkoj që dikush brenda ndonjë njeri brenda, a e ke pa dokumentin unë e kom çu te Mirkoviqi, ka dikush brenda në EULEX që don me m’blloku, nuk po du me të gënjy.

Bisedat mes Bllacës dhe Gjinoviqit janë të shumta. Në to, dallohen kujdesi në komunikim dhe përdorimi i kodeve, ndërsa Bllaca premton dërgimin e dokumenteve me email te prokurori Kujtim Shehu. Në një bisedë tjetër, Gjina i kërkon që mos të flasin në telefon për çështje të ndjeshme, por të shkëmbejnë të gjitha informatat përmes emailit.

Gjina: Gjallë jemi te dy, edhe unë edhe ti, edhe pse dojnë me na pa të vdekur.

Bllaca: E din që kam punu dy vjet me këtë landën, e din ti.

Gjina: E di.

Bllaca: Po e din ti mirë. Tash Alleni ka kry punë, ai miku yt.

Gjina: Bravo, bravo. A të kam thanë?

Bllaca: Mirëpo, tash ka dalë një guri i madh.

Gjina: Ani shkrujëm, mos të folim kështu në telefon. Shkrumi.

Bllaca: Ani mirë. T’i shkruj të gjitha. Po, a e din cili është çelësi? Ai miku yt sipër. E din ti cili është ai.

Gjina: Po, po e di. Krejt,  shkrumi të gjitha këto. Mirëpo, dëgjo. Shkruje një email ku mundesh me mi çu direkt. A don me shkru në shqip?

Bllaca: Po, po në shqip.

Gjina: Atëherë, çoma me email. Ai miku i merr, i përkthen edhe mi çon.

Bllaca: Atëherë, mirë. Edhe ti prej të hanës duhesh me dhezë motorrin.

Gjina: Të thërras unë të hanën. Tung, tung. Shihemi./RTV Dukagjini/

The post Përgjimet e reja të Bllacës:”Nëse s’më ndihmon EULEX-i, më ndihmojnë serbët – viktimat janë të tyre” appeared first on Telegrafi.

Emisioni “Debat Plus” në RTV Dukagjini ka publikuar episodin e pestë të serisë ekskluzive “Llaptopi i Bllacës”, ku janë zbardhur përgjime të reja dhe komunikime të ndjeshme ndërmjet Nazim Bllacës dhe ish-hetueses së EULEX-it, Zdenka Pumper.

Në episodet e mëparshme, ishin paraqitur pjesë të shkurtra të bisedave mes tyre, por sonte, “Debat Plus” sjell një mori të dhënash të reja – përfshirë përgjime të drejtpërdrejta – që hedhin dritë mbi bashkëpunimin e ngushtë ndërmjet Bllacës dhe hetueses evropiane.

Në këto përgjime Zdenka Pumper  komunikon rrjedhshëm me Bllacën në gjuhën serbe. Ajo më vonë gjatë dëshmisë së saj në Hagë në rastin e Hysni Gucatit dhe Nasim Haradinajt  ndër të tjera prezantohet si ish-police austriake.

Dyshja, Bllaca-Pumper diskuton për gjithçka: nga pakënaqësitë e Bllacës në burg, te emrat e prokurorëve që nuk i pëlqejnë atij, e deri te mënyrat se si të koordinojnë informatat për t’i shndërruar në raste gjyqësore.

Bllaca e thërriste Zdenkën “motër”, duke reflektuar një marrëdhënie të ngushtë dhe të pandarë, me komunikime që ndodhnin ditë e natë, pa ndonjë kufizim orari apo fundjave.

Sipas profilit të saj në LinkedIn, Zdenka Pumper kishte nisur punën si hetuese në EULEX nga maji i vitit 2009, vetëm pesë muaj pas zbarkimit të misionit në Kosovë. Ajo ishte pjesë e Task-Forcës kundër korrupsionit për gjashtë vjet.

Por ajo që shton edhe më shumë peshë në këtë histori është fakti se pas largimit nga EULEX-i, Pumper u bashkua me Prokurorinë e Gjykatës Speciale në Hagë, fillimisht si pjesë e Task Forcës Hetimore Speciale (SITF) dhe më pas si pjesë e Zyrës së Prokurorit të Specializuar (ZPS).

Vetë Pumper, në rastin ndaj Nasim Haradinajt dhe Hysni Gucatit, është paraqitur si dëshmitare.

“Jam Zdenka Pumper. Punoj për Zyrën e Prokurorit të Specializuar. I jam bashkuar TFHS-së në janar të 2016-s dhe pastaj në verë kalova direkt në ZPS. Jam udhëheqëse e koordinimit të hetimeve”, kishte thënë ajo gjatë dhënies së dëshmisë së saj në Hagë.

“Për prejardhjen e saj, interesohej edhe Bllaca kur fliste me të. Veçse Zdenkes nuk i vinte mirë e as s’donte të lëshohej se pse din kaq mirë serbisht”, ka thënë Ermal Panduri.

Bllaca: Ku ke kry shkollë ti bre?

Zdenka: Qysh po mendon?

Bllaca: Ti ke punu në Kroaci apo jo?

Zdenka: Jo, në Austri.

Bllaca: E qysh e din serbishten?

Zdenka: Ee ma ka mësu baba.

Bllaca: Pse e ke mësu, çka po të vyn? Kjo është gjuhë ballkanike, për pak vende?

Zdenka: Baba më ka thënë gjithnjë që duhet me mësu ma shumë gjuhë.

Bllaca: Këtu ka njëfarë ndërlidhje. Mirë, mirë…

Zdenka: Çka?

Bllaca: Duhet me pa a ka ndonjë far lidhje këtu apo jo …

Zdenka: Çfarë lidhje?

Bllaca: Dëgjomë. Unë kam kqyr pak, kam lexu pak. Ku ke punu, çka ke punu. Çfarë kohe e ke kry shkollën fillore, shkollën e naltë e fakultetin. Kam lexu pak.

Zdenka: Po…?

Bllaca: …edhe që ke punu me financa shumë. Po, e kam pa e kam lexu me kënd duhet me punu Bllaca, kush është ky njeri, a ka far fuqie? A ka nerva…

Zdenka: Unë kam nerva.

Bllaca: Edhe kështu është mirë, por tash duhet me verifiku a ki ndonjë lidhje…kjo lidhja ballkanike….

Zdenka: Jo unë nuk kam kurrgjë ..

Pra, Bllaca me Zdeken, koordinonin në përpikmëri se sit ë vepronin tutje.

’’Ajo i jepte udhëzime si komandantja e saj, ai i ndiqte si ushtar i disiplinuar. Dytë, qëllimin e kishin të njëjtë, punoni kundër ish-komdantëve të UÇK-së. Dhe në telefon nga burgu, Bllaca i raportonte asaj e edhe ajo i shpjegonte se qysh po punon p.sh. kundër Haradinajt dhe atë në dy telefonata të ndryshme”, ka thënë tutje Panduri.

Bllaca: Unë kam punu në tri linja kundër kolaboracionistëve..

Zdenka: A keni bërë ndonjëherë atë që e kam kërkuar prej jush?

Bllaca: Po, kam punu në tri linja me kolaboracionistë, me LDK-në, kundër PDK-së dhe kundër dëshmitarëve.

Zdenka: …edhe s’keni mujt …

Bllaca:  a ti je i rrezikshëm … unë kam lexuar e-mailin, u çudita thash çka ka lidhje kjo me këtë? Pi ujë, coca-cola, edhe mendoj çka është kjo? Duhet me mendu për këto punë apo jo? Çka është kjo? Çfarë lidhje ka me këtë far linku? Edhe them, çudi …ne kemi punu në tri linja. Edhe procesi kundër Limajt…

Zdenka: Unë kam dërguar për Haradinajn.

Bllaca: Dëgjomë, na duhet me punu për këtë punën që e kemi, a po kupton? Që e kam përpara, afër. Shefi yt, a don me ngrit padi kundër peshqve të mëdhenj apo jo?

Zdenka: Nuk e di.

The post “Motra” e Bllacës në EULEX – Roli i dyfishtë i Zdenka Pumper në rastet kundër UÇK-së appeared first on Telegrafi.

Në Bosnje dhe Hercegovinë, përkatësisht në Srebrenicë, sot është shënuar 30-vjetori i gjenocidit të kryer nga forcat serbe ndaj popullatës civile myslimane, ndërsa drejtësia vendore dhe ajo ndërkombëtare ka arritur që vetëm disa persona t’i dënojë për këtë vepër.

Në këtë përvjetor, nga Kosova ka qëndruar në Srebrenicë një delegacion i lartë shtetëror.

Lidhur me këtë, në RTV Dukagjini ka folur politologu Adnan Qaka.

“Fatkeqësia më e madhe është që nuk ka pasur vullnet politik që të dënohet Serbia për krim e gjenocid, që në fakt nuk e ka bërë vetëm në një qytet, në Srebrenicë, por në tërësi. Duhet ta themi qartë se ajo që ka bërë Serbia në Bosnje është gjenocid i pastër”, ka thënë ai.

Sipas Qakës, padinë që Bosnja e ka formuluar, e ka bërë në mënyrë mjaft profesionale, me prova shkencore dhe me fakte të fuqishme e ekspertë të dëshmuar.

“Mirëpo, kjo ka qenë një çështje puro politike, ku është një e vërtetë që është dëshmuar edhe nga Florens Hardman, zëvendësprokurorja e Tribunalit të Hagës, që shumë dëshmi, shumë prova që i ka depozituar Bosnja në Tribunalin e Hagës – këto që kanë qenë, do të thotë, shtetet që i kanë bartur këto fakte, dokumente për Tribunalin e Hagës – edhe i kanë manipuluar, thjesht janë tjetërsuar ato dokumente, ku qëllimi i qartë ka qenë që të mos dënohet Serbia për krimin e gjenocidit”, ka thënë Qaka.

The post Qaka: Gjenocidi në Bosnje u dokumentua, por u tjetërsuan provat appeared first on Telegrafi.

Një vajzë 10-vjeçare u sulmua nga qentë endacakë në oborrin e QKUK-së, duke pësuar lëndime dhe traumë. Babai i saj, Avni Gashi, fajëson institucionet për mungesë sigurie dhe reagimi, dhe kërkon përgjegjësi dhe masa për mbrojtjen e qytetarëve. Komuna dhe QKUK nuk kanë komentuar për rastin.

Kafshim, gërvishtje e edhe një përvojë traumatike.

Këtë e përjetoi vajza 10-vjeçare e Avni Gashit kur u sulmua një ditë më parë nga qentë endacakë para klinikës ku po merrte trajtim, atë të Mjekësisë Fizikale dhe Rehabilitimit.

Një ditë më pas, gjersa trajtimin po e vazhdon në Klinikën e Kirurgjisë, Gashi thotë se përvoja ishte e rëndë.

”E pruna vajzën me u shëru, e hangër qeni midis spitalit. E thirra policinë, s’erdhën, thanë se s’kemi pse dalim në terren, punë e kryen emergjenca. Dua të di për shtetin tonë a ma me rëndësi janë qentë e njerëzit. Ndoshta s’ka qenë shumë e lënduar po ka marrë traumë, ushtrimet për të cilat erdhi tash s’mundet t’i bëjë”, ka thënë Avni Gashi, prind i vajzës që u sulmua.

Gashi thotë se nuk kërkon asnjë lloj kompensimi gjersa shprehet i shqetësuar për të gjithë ata që adresë për ndihmë e kanë Qendrën Klinike Universitare

”Kurrfarë ndihme hiç. Kërkesa ime është të më përgjigjen, a jemi më me rëndësi ne populli a qentë për qeverinë tonë, për komunën e Prishtinës. S’kërkoj kompensim, kërkoj të ketë siguri qytetare. Sot pësoi vajza jem nesër mund të pësojë vajza e dikujt tjetër. Përvojë e rëndë për vajzën po ç’ka me bo tash, kalojnë këto po ne po jetojmë në një shtet formal”, ka thënë Avni Gashi, prindi i vajzës që u sulmua.

I zhgënjyer me gjithë situatën, ai nuk ka ndërmend të ndjekë asnjë rrugë ligjore.

”Jam tepër i zhgënjyer, tepër! S’kanë marrë kurrfarë mase. Policia më tha bëji padi komunës. Si kam kushtet për me e padit komunën, komuna duhet të dërgojë dikë ta shoh rastin nga afër”, ka thënë Avni Gashi, prind i vajzës që u sulmua.

Gjatë kohës sa Bekim Brestovci ishte në krye të Drejtorisë së Shërbimeve Publike, pati premtuar se ishte çështje ditësh qëkur nga QKUK të largoheshin qentë endacakë, ndihmë që e kishte kërkuar edhe vet QKUK.

Por për këtë rast, të dyja institucionet, kanë zgjedhur të heshtin./RTV Dukagjini/

The post Shkoi për trajtim, vajza 10-vjeçare sulmohet nga qentë endacakë në QKUK appeared first on Telegrafi.

Analisti politik Sadri Ramabaja ka shprehur dyshime se zgjedhjet e dyfishta, parlamentare dhe lokale, mund të mbahen më 12 tetor.

Në Debat Plus, Ramabaja theksoi se për të caktuar një datë të tillë duhet një marrëveshje politike, por aktualisht nuk ekziston një pajtueshmëri ndërmjet partive.

“Nuk ma merr mendja që mund të shkohet në dy palë zgjedhje më 12 tetor, edhe për një arsye. Për datën e zgjedhjeve duhet të ketë një marrëveshje politike, ndërkaq, as LDK-ja e as PDK-ja nuk janë dakord që të mbahen që të dy palët zgjedhjet. Ka deklarime që mund të diskutojmë për datën por jo për 12 tetorin.

Më shumë do t’i konvenonte opozitës të shkonin në zgjedhje pas zgjedhjeve lokale pas 12 tetorit. Dhe gjasat mund të jenë, në rast se nuk do të kishim ndonjë ndryshim esencial këtë javë ose javës që vjen me publikimin e vendimit të Gjykatës Kushtetuese”, ka thënë Ramabaja.

The post Ramabaja: Nuk ka gjasa për zgjedhje të dyfishta më 12 tetor appeared first on Telegrafi.

Në emisionin “Debat Plus” të moderuar nga Ermal Panduri, janë prezantuar të dhëna nga një sondazh i realizuar së fundmi nga UBO Consulting, ku qytetarëve u është shtruar pyetja:

Sa jeni të kënaqur me punën që ka bërë deri më tani qeveria e udhëhequr nga Kryeministri, Albin Kurti?

Sipas rezultateve të publikuara per here te pare kështu është rezultati:

14.8% – Shumë i/e kënaqur

33.6% – I/e kënaqur

26.1% – I/e pakënaqur

20.9% – Shumë i/e pakënaqur

4.6% – Nuk e di / Nuk kam përgjigje

The post Sondazhi i UBO-së: 48.4% e qytetarëve, të kënaqur me punën e Qeverisë Kurti appeared first on Telegrafi.

Në emisionin “Debat Plus” të moderuar nga Ermal Panduri, janë prezantuar të dhëna nga një sondazh i realizuar së fundmi nga UBO Consulting, ku qytetarëve u është shtruar pyetja:

“Cila është zgjedhja juaj e dytë nëse votoni në zgjedhje këtë të diel?”

Sipas rezultateve të publikuara:

LDK kryeson me 18.5% si zgjedhje e dytë,

pasohet nga LVV me 16.5%,

PDK renditet e treta me 13.7%,

AAK rezulton me 4%,

Lista për Familjen ka marrë 3.7%,

NISMA ka 0.9%,

AKR ka vetëm 0.1% ndërsa Lista Serbe ka 1.1%.

Nga ana tjetër, një përqindje e konsiderueshme e të anketuarve nuk janë shprehur në mënyrë të qartë:

33.6% janë deklaruar si “të pavendosur” ose “nuk e dinë”,
0.8% kanë zgjedhur kategorinë “Tjetër”,
ndërsa 7.1% kanë refuzuar të përgjigjen.

Ky sondazh hedh dritë mbi lëvizshmërinë e votuesve dhe preferencat e mundshme në një raund të dytë votimi hipotetik, duke reflektuar një skenë politike ende të paqëndrueshme dhe me nivel të lartë të pavendosmërisë.

The post Sondazhi i UBO: LDK e para si zgjedhje e dytë, LVV dhe PDK ndjekin nga pas appeared first on Telegrafi.

Apeli i Dhomave të Specializuara për Kosovën ka në duar uljen ose kthimin në rigjykim të rastit të Pjetër Shalës, i dënuar për krime lufte me 18 vjet burgim. Organizata e veteranëve të UÇK-së, ka pak shpresë që do jetë një vendim në favor të Shalës e avokatët thonë se mund të ketë ulje të dënimit

Edhe pak javë kanë mbetur që Pjetër Shala, i dënuar për krime lufte nga shkalla e parë e Dhomave të Specializuara për Kosovën të kuptojë edhe vendimin e shkallës së dytë për të.

Paneli i Gjykatës së Apelit, ka caktuar 15 korrikun, datën e shpalljes së aktgjykimit për këtë rast.

Në seancat e mbajtura në Apel, Pjetër Shala i dënuar nga shkalla e parë, me 18 vjet burgim, ka kërkuar anulim të dënimit ose rigjykim të rastit, nën arsyetimin se vendimi përmban shkelje të shumta.

Avokatët në Kosovë, thonë se bazuar në praktikat e së kaluarës, Apeli edhe në këtë rast mund të ulë dënimin ndaj Shalës.

“Nga analogjia që është përdorur tek rasti i z.Mustafa mund të pritet që të kemi zbutje të dënimin nëse eventualisht nuk ka ndonjë rigjykim ose lirim dhe nëse procedohet me dënim të ulët dënimi sepse në rastin e z.Mustafa gjykata Supreme ka dhënë instruksione dhe të merren parasysh të gjitha rrethanat ligji i ish jugosllavis, ligji i unmikut..”, ka deklaruar Taulant Hodaj – Avokat i akredituar nga Specialja.

“Nëse i referohemi praktikës gjyqësore të gjykatës speciale me theks të veçantë gjykatës së shkallës së parë e njëjta ka aplikuar një politike të ashpër ndëshkimore që në instanca të tjera lartësia e dënimit është rishikuar, vlerësoj se mund të ndiqet kjo logjikë”, ka theksuar Ardian Bajraktari – avokat.

Ndërkohë, në organizatën e veteranëve të UÇK-së, nuk besojnë në këtë gjykatë, që sipas tyre nuk sjell drejtësi në rastet e trajtuara.

“Ne kemi dyshimet tona që kjo gjykatë nuk ka me marr ndonjë vendim në favor të z.Shala në këtë rast por edhe bashkëluftëtarë të tjerë, sepse ka humbur besimi në këtë gjykatë fillimisht kem besu që gjykata ka me bë punën e drejtë e nuk ka me anu, por me gjasë është duke rreshqit prej asaj për çka është themelu si gjykatë me sjell drejtësi, është bërë gjykatë politike”, ka deklaruar Gazmend Syla- Nënkryetar i OVL-UÇK-së.

Pjetër Shala është pjesëtari i dytë i dënuar nga Dhomat e Specializuara për Kosovën, për krime lufte.

Salih Mustafa ishte dënuar me 26 vite burgim, dënim ky që i ishte ulur në 15 vite./RTV Dukagjini/

The post “Shpresë” që Apeli do të ulë dënimin prej 18 vitesh për Pjetër Shalën appeared first on Telegrafi.

Në komunat veriore po vazhdon regjistrimi i Bizneseve në ARBK, por komuna e Mitrovicës Veriore dhe Zubin Potok nuk dinë sa biznese kanë të regjistruara, kurse nga ARBK nuk kanë kthyer përgjigje nga e mërkura. Numri i bizneseve në Leposaviq ka rënë në 2025-n, për dallim nga Zveçani që thanë që regjistrimi është dyfishuar këtë vit.

Funksionimin e tyre tashmë e kanë legal, dhe janë të regjistruara si biznese të Kosovës.

Agjencia e Regjistrimit të Bizneseve tashmë në veri të vendit në secilën prej komunave ka zyrat e saj.

Kjo e fundit nuk ka kthyer përgjigje të mërkurën dhe të enjten për numrin total të bizneseve të regjistruara nëpër këto komuna.

Megjithatë, nga Komuna e Leposaviqit treguan për televizionin numrin e bizneseve të regjistruara në këto tre vite.

“Nga gjysma e dytë e vitit 2023 në Leposaviq janë regjistruar, 10 biznese individuale dhe 6 Biznese me Përgjegjësi të Kufizuar, në vitin 2024 janë regjistruar 60 biznese individuale dhe 17 Biznese me përgjegjësi të Kufizuar, dhe në 2025-tën janë regjistruar 32 biznese individuale dhe 6 biznese me përgjegjësi të Kufizuar”.

E kontaktuar gjithashtu nga e mërkura, Mitrovica e Veriut nuk patën numrat e bizneseve të regjistrua gjatë këtyre viteve.

Nga Komuna e Mitrovicës Veriore thanë kanë s’mund t’i sigurojnë numrat e bizneseve të cilat janë regjistruar në vitin 2024 dhe 2025-së, megjithatë premtuan se të njëjtat do ti dërgojnë më vonë, me anë të email.

Kjo nuk ndodhi deri në publikimin e kronikës.

Edhe nga komuna e Zubin Potokut kryetari i saj tha që nuk ka numrat e saktë të bizneseve të regjistruara në këtë komunë, por janë duke punuar që të ketë numër më të madh të tyre.

Por, për dallim nga fqinjët e saj, qyteti i Zveçanit i dinë numrat.

”Gjatë vitit 2024 dhe 2025-së, janë 57 biznese të cilat janë regjistruara, numër më i madh ka qenë gjatë këtij viti”, ka thënë Ilir Peci, kryetar i Komunës së Zveçanit.

Peci thotë që regjistrimi po vazhdon dhe janë duke punuar në këtë drejtim.

”Është, sidomos mund të them është një përqindje Prej këtyre 57 bizneseve diku rreth 40 janë veç këtë vit, pra është një numër shumë më i madh i regjistrimit të bizneseve këtu”, ka thënë Ilir Peci, Kryetar i Komunës së Zveçanit.

Zyrat e Regjistrimit të Bizneseve janë nëpër objektet e komunave dhe janë vendosur qysh në gjysmën e vitit 2023./Tv Dukagjini/

The post Kosova hyn në veri me biznese – gjithnjë e më shumë firma regjistrohen në ARBK appeared first on Telegrafi.

U mbajt promovimi i librit me poezi “Më quajnë Izmir” nga poetja Tinka Kurti në Librarinë Dukagjini, Prishtinë.

Panelistët folën për poezinë e Tinka Kurtit, e cila përmes vargut bën thirrje për zhvendosjen e të përjashtuarve drejt qendrës së vëmendjes dhe kujtesës.

Në promovim mori pjesë edhe Kryeministri i Kosovës, Albin Kurti.

“Më quaj Izmir” i Tinka Kurtit vjen si një zë i guximshëm në poezinë shqipe. Vargjet e Tinka Kurtit janë mall dhe revoltë, lidhje dhe shkëputje, komentime poetike mbi eksperienca jetësore.

Libri i saj, i cili që në pragun semiotik hyn në relacion intertekstual me lojën melvilliane të identifikimit të subjektit, është një provokim estetik, sepse paralajmëron një zë ‘androcentrik’, ndërsa shpejt kalon në këndvështrimin gjinocentrik, për ta theksuar paradoksin dhe për ta promovuar perspektivën. Duke e parë botën me sy të tillë, poetja Tinka Kurti sjell jo vetëm një optikë specifike personale, por edhe një zë autentik në botën tonë letrare.

Tinka Kurti ka studiuar Gazetari dhe Filozofi në Universitetin e Prishtinës. Ka punuar disa vjet si gazetare në Prishtinë. Më pas ka qenë aktive edhe në politikë. Në 2021-2025 ka qenë deputete e Kuvendit të Republikës së Kosovës. Jeton në Vjenë./ KultPlus.com

Trajneri i xhudos në Kosovë, Driton Kuka, ka bërë thirrje për formimin e shpejtë të institucioneve të reja pas zgjedhjeve, duke theksuar rëndësinë e tyre për vazhdimin e sukseseve sportive të vendit.

Në emisionin “Sportfolio” në Radio Dukagjini, ai shprehu shqetësimin se mungesa e institucioneve funksionale mund të ndikojë negativisht në përgatitjet për ngjarje të rëndësishme si Lojërat Mesdhetare.

Kuka theksoi se proceset sportive kërkojnë mbështetje të vazhdueshme institucionale, dhe çdo vonesë në formimin e qeverisë mund të pengojë përgatitjet dhe pjesëmarrjen e sportistëve në garat ndërkombëtare. Ai apeloi për veprim të shpejtë nga ana e deputetëve të zgjedhur për të siguruar një tranzicion të qetë dhe efikas.

Në një tjetër aspekt, trajneri Kuka foli për zgjedhjen e medalistes olimpike suedeze për të zhvilluar përgatitjet në Kosovë. Ai e cilësoi këtë si një vlerësim të madh për punën dhe përkushtimin e stafit dhe sportistëve kosovarë, duke theksuar se kjo tregon reputacionin në rritje të Kosovës në arenën ndërkombëtare të xhudos.

Gjithashtu, Kuka ndau mendimet e tij për mungesën e Majlinda Kelmendit në garat e xhudos, duke theksuar ndikimin që ka pasur ajo në zhvillimin e sportit në vend. Ai shprehu dëshirën që Majlinda të rikthehet në garat ndërkombëtare, duke theksuar rëndësinë e saj si një figurë inspiruese për gjeneratat e reja të xhudistëve në Kosovë.

Në përfundim, trajneri Kuka theksoi nevojën për bashkëpunim të ngushtë midis institucioneve dhe komunitetit sportiv për të siguruar që sportistët kosovarë të kenë mbështetjen e nevojshme për të arritur sukses në skenën ndërkombëtare. Ai apeloi për një angazhim të përbashkët në ndërtimin e një të ardhmeje të ndritur për sportin në Kosovë.

The post Driton Kuka flet për të gjitha në ‘Sportfolio’ te Radio Dukagjini appeared first on Telegrafi.

Objekti i ri i emergjencës në QKUK, i nisur në vitin 2016 me një kosto prej 8 milionë eurosh, vazhdon të qëndrojë i papërdorur dhe i degraduar.

Një objekt që u ndërtua për të shërbyer si emergjencë moderne brenda Qendrës Klinike Universitare të Kosovës, sot është kthyer në një hapësirë të harruar, që vetëm këtë funksion, nuk e ka.

Qasja në projektin që nisi me 8 milion euro, është e lehtë ngase nuk e ruan askush.

E funksioni i saj mbetet ai i një magazine.

Shtretër spitalor nga më të ndryshmit, dyshekë, dollap e aparatura janë vetëm në katin e parë të këtij objekti.

Në të ka gjurmë se po qëndrojnë edhe njerëz pa lënë anash edhe qentë endacakë duke e kthyer objektin në një deponi mbeturinash e për disa vetura, edhe parking.

Nisi në vitin 2016 si pjesë e një projekti për përmirësimin e infrastrukturës spitalore dhe lehtësimin e ngarkesës në repartin aktual të emergjencës.  Por, gati një dekadë më vonë, objekti asnjëherë nuk është funksionalizuar.

“Është e turpshme duke pasur parasysh projektet e tjera të rëndësisë së vogël ndërsa ky projekt me rëndësi shumë më të madhe, është neglizhu. Po kryhen projekte të ngjashme e pse të mos kryhet ky objekt që trajton pacientët. Kjo e bën të turpshme neglizhencën që kanë treguar të gjitha qeveritë, jo veç kjo tash”, ka theksuar për RTV Dukagjinin, Bujar Vitija, gazetar i sektorit të shëndetësisë.

Gjatë deklarimit në komisionin për Shëndetësi, ministri Arben Vitia para dy vitesh kishte deklaruar se emergjenca do funksionalizohet shpejtë.

Por viti 2025 e gjen prapë në po të njëjtën gjendje që sipas anëtarëve të komisionit të shëndetësisë, është tregues në vete.

“Është paaftësi dhe keqmenaxhim sepse të merresh me harrnime dhe jo me investime strategjike, është më e mira përgjigje për këtë qeveri të paaftë që nuk ka lënë gjurmë në këto 4 vite për të bërë përmirësim në sektorin e shëndetësisë”, ka deklaruar Armend Zemaj, ish-ministër i Shëndetësisë.

Por sot, emergjenca ekzistuese në QKUK vazhdon të punojë në kushte të vështira me mbingarkesë pacientësh dhe staf të pamjaftueshëm.

Siç ndodhë rëndom, pyetjeve nuk u është përgjigjur Ministria e Shëndetësisë lidhur me atë se a ka ndonjë projekt të rishikuar për objektin dhe kur pritet finalizimi i tij.

Përgjigje nuk ka kthyer as SHSKUK dhe as drejtori i QKUK-së, i cili ka udhëzuar që përgjigjet të kërkohen në MSH.

The post Emergjenca e re e QKUK-së, miliona euro për t’u ndërtuar, tani nuk shfrytëzohet appeared first on Telegrafi.

Më 2025 nuk ka pasur shkëmbim të energjisë elektrike ndërmjet KEK-ut dhe KESH-it, respektivisht Kosovës dhe Shqipërisë. Edhe pse, zyrtarisht, marrëveshja mbetet në fuqi, tash e pesë muaj shkëmbimet janë ndërprerë.

Tash e pesë muaj Korporata Energjetike Kosovës dhe Korporata Elektroenergjitike e Shqipërisë nuk janë duke shkëmbyer energji elektrike.

Kjo përkundër që marrëveshja për këmbimin e tepricave të energjisë ndërmjet KEK-ut dhe KESH-it, varësisht kushteve atmosferike dhe kur njëra ose tjetra ka nevojë, e nënshkruar vite më parë, zyrtarisht, mbetet në fuqi.

Derisa deponimet e fundit u regjistruan në dhjetor 2024, ndërmarrja publike kosovare vitin e kaluar e mbylli me bilanc negativ nga shkëmbimet me homologët në Shqipëri.

“Viti 2024 është përmbyllur me 3,384 megavatë orë obligim i KEK ndaj KESH-it, Gjatë vitit 2025 nuk ka pasur shkëmbim në mes të KEK dhe KESH”, thuhet nga KEK-u.

Para kësaj ndërprerjeje, dimrin e fundit niveli i depozitave nga Shqipëria shënoi ulje krahasuar me atë paraprak, sipas të dhënave që KESH-i i ka dërguar televizionit Dukagjini.

Lexo po ashtu KEK fillon zbatimin e vendimit për liberalizimin e tregut të energjisë elektrike

“Në këtë stinë dimri, sasia e energjisë që KESH sh.a. ka depozituar në KEK sh.a. është 4,927 megavatë orë, ndërsa dimrin e kaluar sasia ka qenë 6,320 megavatë orë”, thuhet nga KESH.

Në krijimin e situatës së re kanë ndikuar angazhimet në Bursën Shqiptare e Energjisë – ALPEX, bashkëpronare të së cilës janë Shqipëria dhe Kosova.

“Prioritet i KEK-ut është kthimi i energjisë që është obligim i akumuluar, të gjitha kapacitetet e lira në dispozicion në linjën e transmetimit Kosovë – Shqipëri nga muaji Dhjetor 2024, i alokohen Bursës shqiptare të energjisë ALPEX, prandaj është e pamundur të planifikohet Deponimi i tepricave nga ana e KEK-ut”, thuhet nga KEK-u.

Ndikimi i ALPEX-it u konfirmua edhe nga Korporata Elektroenergjitike e Shqipërisë.

“Implementimi i ALPEX në Shqipëri dhe Kosovë ka rritur mundësitë e shoqërive për akomodim të energjisë elektrike në rast të tepricave ose sigurimin e furnizimit në rast mungese të energjisë elektrike. Gjithashtu, palët kanë shkëmbyer energji elektrike duke shfrytëzuar kapacitetet e interkoneksionit, të cilat lirohen nga Bursa ALPEX pas tregtimit të energjisë elektrike në intraday”, thuhet nga KESH.

Bazuar në marrëveshjen ndërmjet dy ndërmarrjeve publike, shkëmbimi bëhet sipas parimit megavat për megavat – ndërsa me tregtimin në bursë ndryshon varësisht momentit.

The post Pse KEK e KESH nuk shkëmbejnë energji edhe pse marrëveshja është në fuqi appeared first on Telegrafi.