Nga Jakin Marena

Partia Demokratike e urdhëhequr nga Sali Berisha nuk lëviz fare nga ‘rutina’ e tij e të bërit politikë, sidomos ku vjen menjëherë pas humbjeve në zgjedhjet parlamentare. Dhe nuk kanë qënë të pakta humbjet gjatë këtyre 35 viteve që Berisha e drejton herë zyrtarisht dhe herë në prapaskenë partinë më të madhe opozitare në vend.

Është tërësisht e lexueshme tërë strategjia e Berishës dhe e mbështetësve të tij, duke filluar nga 10 shtatori kur pritet të mblidhet dhe më pas të konstituohet Kuvendi i ri i dalë nga zgjedhjet e 11 majit të këtij viti. Të cilat Berisha betohet se nuk do t’i njohë kurrë, pavarësisht se në një formë apo tjetër do të hyjë si ‘faqja e bardhë’ në Kuvend. Opozita e drejtuar nga PD do të marrë ato 50 mandate që i takojnë, mund të ‘përthithë’ dhe mandatin e tezes së Llapajt për ta bërë edhe atë pjesë të koalicionit siç paralajmëroi indirekt dhe vetë kreu i “Shqipëria Bëhet”. Ndërsa ‘kusuri’ i vendeve në Kuvend,  plot 83 mandate janë të PS-së të drejtuar nga Edi Rama, 3 mandate të PSD të Tom Doshit, 2 mandate të “Mundësia’ të Agron Shehajt dhe 1 mandat deputeti ka shkuar për Lëvizjen “Bashkë” të Arlind Qorajt!

Mbështetur në këto shifra, rrënuese për opozitën e drejtuar nga Berisha ku si asnjëherë tjetër në këto 35 vite, merr një rezultat të tillë humbës  në një garë elektorale, skenari i i tij duke filluar nga fillimi i shtatorit pritet të jetë i njejtë sikurse ka ndodhur edhe herë të tjera, kur PD ka ardhur pas një humbjeje të rëndë!

Ndoshta, dhe për shkak të moshës së thyer të vetë Berishës, është 8l vjeç aktualisht, lëvizjet politike të PD dhe opozitës që kryeson pritet të jenë më të ‘ekonomizuara’ në territor, duke u përshtatur vetëm brenda perimetrit të qytetit të Tiranës. Një ‘rrudhje’ e tillë vjen dhe për shkak të rënies drastike të mbështetjes për PD dhe për aleatët e saj. E cila u pa në zgjedhjet e 11 majit, ku ‘munguan’ 320 mijë vota nga rezultati i zgjedhjeve të 2021, kur PD drejtohej nga Lulzim Basha!

Për të gjitha këto arsye, si dhe arsye të tjera që janë vetëm në kokën e Berishës dhe në realitetin e tij paralel se si i sheh gjërat, PD dhe opozita kanë një skenar të gatshëm për ta ‘shpalosur’ në vjeshtë, në dimër e në behar! E kanë paralajmëruar në fakt dhe është një ‘film’ i parë shumë herë ky, me regjizor dhe aktor kryesor Sali Berishën!

Berisha mëse njëherë është shprehur se nuk e njeh rezultatin e dalë nga zgjedhjet e 11 majit! Madje dhe ditën e certifikimit zyrtar të rezultatit nga ana e KQZ, Berisha deklaroi se ka qënë një farsë elektorale e qeverisë, që sipas tij i ka marrë mbi 33 deputetë opozitës, dhe për pasojë nuk do ta njohë këtë rezultat! Pa përjashtuar këtu sjelljen e Berishës para mediave me shkop në dorë teksa shpjegon përmes videove, hartave si dhe fotove se si ia ‘vodhën’ 33 mandatet e deputetit opozitës, numër që përkon me mandatet që PS e Edi Ramës ka më shumë se opozita e bashkuar e Doktorit! Diferencë e madhe është për t’u justifikuar, por për Berishën ky është realiteti i tij, dhe ai ka treguar se gjithnjë dhe për gjithçka ka një realitet paralel të vetin, eksluzivisht të vetin!

Por nga ana tjetër Berisha dhe mbështetësit e tij shprehen se do të vendosin institucionet për të hyrë ose jo në Kuvend në shtator, për të djegur ose jo mandatet dhe gjëra të tjera të këtij lloji! Dhe kur përmenden se ‘institucionet partiake vendosin’, të gjithë e kuptojnë se institucioni i vetëm në PD është Berisha. I cili ka nënvizuar se pavarësisht se nuk e njeh rezultatin e këtyre zgjedhjeve, lufta në Parlament do të jetë e fortë, do të realizohet me të gjitha mënyrat kundër atij që ai e quan ‘regjimi i Edi Ramës’! Pra opozita e Berishës do të hyjë në Kuvend.

Dhe për të qënë të përgatitur si gjithnjë për seancat parlamentare, Berisha dhe mbështetetësit e tij kanë nisur me marrjen e masave për të qënë të gatshëm për ‘përballje’ por dhe për çdo rastësi që mund të vijë, për ta bërë, kauzë të përkohshme të opozitës gjatë tërë sesionit të ri parlamentar!

Si punë të parë Berisha ka garantuar mikun e tij Ilir Meta, i cili gjendet në qeli nën akuzat për korrupsion, që ta bëjë me grup parlamentar! Pasi i ka dhënë në tavolinë 4 mandate deputeti për përfaqësuesit e Partisë së Lirisë, Berisha i ka dhënë ‘hua’ dhe 3 të tjerë nga radhët e PD për të formuar një grup parlamentar më vete! Po diskutohet njëherësh, për ngritjen e një grupi tjetër parlamentar të kryesuar nga republikani Fatmir Mediu e që mund të ketë në përbërje dhe deputetët e vetëm të PDIU apo ndonjë partie tjetër!

Të gjitha këto lëvizje me grupet fiktive parlamentare bëhen për t’i pasur si ‘poste zjarri’ më vete dhe për të treguar se ka dhe grupe të tjera parlamentare të opozitës që luftojnë kundër ‘regjimit të Ramës’. I përdor dhe për statistikë në letrat që me së s’bën do të dërgojë herë pas here në Bruksel apo më tej, në përpjekjet e tij për të nxirë Shqipërinë. Në fund të letrës e ka kollaj, për të shkruajtur se qëndrime të tilla janë të mbështetura nga tre grupe parlamentare të opozitës, do të fiksohen emrat e tre ‘kryetarëve’ të grupeve parlamentare, firmat dhe vulat e tyre. Pra, do të ‘copëtojnë’ dhe ndajnë forcat për ta ‘rrethuar’, sa më shumë Ramën, dhe për t’ia bërë në fund të herës jetën sa më të gjatë në pushtet. Por, për ithtarët e PD dhe opozitës, bën punë ky skenar!

Pra këto grupe fiktive parlamentare do të jenë një tip ‘guerrileje’ që krijohen vetëm e vetëm për t’u përdorur ku dhe kur ta lypë nevoja. Por dhe për të ‘zgrapur’ ndonjë lek nga buxheti i shtetit, ndonjë delegacion jashtë vendit, pasi kanë fonde të mëdha për grupet parlamentare.

Në këtë mënyrë vjeshta do të shtyhet me krijimin e këtyre grupeve fiktive parlamentare, si tip ‘guerrileje’ që do të provojnë funksionimin e tyre nën drejtimin e kryetarit të grupit të PD të rikonfirmuar tashmë nga Berisha, Gaz Bardhi, me ndonjë bllokim foltoreje, me ndonjë thyerje karrigeje, me ndonjë shkulje mikrofoni, goditje deputeti kundërshtar dhe gjëra të tjera të këtij lloji! Mbështetje do të jetë kuptohet, edhe Famur Noka, numri 2 i PD! Ka dhe përvojë për këto punë! Këto ‘lëvizje’ do të bëjnë punë këtë vjeshtë për heqjen e mendjes së elektoratit nga humbja rrënuese e 11 majit të këtij viti, ku PS bashkë me aleatin hipotetik të saj PSD ka shumicën cilësuar përmbi 84 vota në Kuvend, të mjaftueshme për të votuar ligje me shumicë të cilësuar në funksion të anëtarësimit në BE, pa ia marrë ‘dorën’ Berishës dhe opozitës në tërësi!

Ndërsa kalimi i dimrit është më kollaj. Meqë është dhe ftohtë e shkulja e mikrofonëve apo dhe kabllove të sallës së Kuvendit apo të kryesisë së Kuvendit mund të shkaktojë ndërprerje të energjisë e për pasojë dhe të ngrohjes, skenari i PD është gati: Do mbledhin karriget e Kuvendit brenda, bashkë me tavolinat, pak benzinë e një shkrepse dhe ja, zjarri i bë, ngrohja është e garantuar! Shtuar dhe ‘tejnxehja’ nga përplasja me deputetët kundërshtarë trup më trup! Duke filluar nga Gaz Bardhi! E kanë parë sa fort shtyn ai në këto raste, shtyn me shumë stil Gazi!

Ndërkohë që në behar, meqë dita zgjatet dhe moti ngrohet, si dhe lëvizjet e turistëve janë të shtuara, skenari i Berishës dhe PD është dalja në ndonjë kryqëzim rruge dhe në mungesë të mbështetësve do të vendosin makinat luksoze të deputetëve për të bllokuar rrugët, dhe për t’ua nxirë jetën njerëzve! E kanë bërë dhe herë të tjera! Pastaj ndonjë kauzë e rastit spontane për të mbajtur me gajret mbështetësit, derisa t’i ‘dorëzohen’ pushimeve të gjata të verës së ardhshme!

Këto janë skenaret, tepër të lexueshme, të Berishës dhe PD për muajt në vijim duke filluar nga shtatori e përfunduar në korrik të vitit të ardhshëm! Por teksa po përmendnim skenare, Berisha nuk ndryshon kurrë dhe është gjithnjë në ‘habitatin’ e vet këtu, na erdhën në kujtesë skenarët e vjeshtës së vitit 1997, kur PD dhe Berisha ishin larguar nga pushteti vetëm në vitin e parë të mandatit të dytë qeverisës, pas shpërthimit të ngjarjeve të marsit 1997 për shkak të rënies së firmave piramidale, rënies së shtetit për tre ditë me hapjen e depove të armëve të ushtrisë dhe zgjedhjeve të parakohëshme. Autori i këtyre radhëve, asokohe gazetar dhe terreni, ‘rastësisht’ futi në dorë nga selia e PD ‘kalendarin e qëndresës’ së opozitës të firmosur nga Berisha, për të përballuar regjimin e dalë nga ‘rebelimi komunist’ sipas tij. Ishte një kalendar që përmbante konferencat e shtypit përditë dhe objektin e tyre, bojkotin e Kuvendit kur dhe si, deklaratat që do të jepeshin për këtë bojkot, kur do të riktheheshin në Kuvend nga bojkoti pas disa muajsh, tekstin e deklaratës që do të mbahej në atë rast, kur do të bojkotonin sërish si dhe deklaratat respektive! Kërkesën për largimin e ish kryeministrit Fatos Nano, protestat që do të fillonin nga Mamurrasi, Laçi e Shkodra dhe do të ‘rrethonin’ Tiranën.

Kërkohej sakrificë sublime. Ishte një ‘kalendar’ gati 2 vjeçar, në të cilin ishin hartuar paraprakisht dhe deklaratat për shtypin, bëheshin me print asokohe, për sqarim të gazetarëve të rinj, që nuk e kanë ‘prekur’ atë kohë. Tashmë ata janë në epokën e internetit dhe rrjeteve sociale! Dhe pas fillimit të botimit një nga një nga ne. në median tonë asokohe, ‘reprezalja’ në PD solli dhe trauma si shkarkime në sektorin e komunikimit në selinë e PD. Kuptohet, u ndryshuan dhe datat dhe hyrja e deklaratave të parapërgatitura për ngjarjet që do ndodhnin. Të cilat për hir të së vërtetës ndodhën, pasi Berisha e kishte ndarë mendjen që do të ndodhnin! Janë në google ato!

E përmendëm këto, për të treguar se Berisha ka vepruar e vepron sipas realitetit të tij paralel, ndodh apo nuk ndodh ngjarja. Nëse e ka vendosur me mendjen e tij, ai është në gjendje ta shpikë sipas interesit të tij! Kështu dhe me këtë ‘kalendarin’ e sivjetëm të lëvizjeve politike për 4 stinët e ardhshme të këtij viti politik! I ka fiksuar gjërat Doktori, ka bërë skenarin, çfarë do të ndodhë, kur do të ndodhë, kush do të jenë aktorët, kush do të ‘sakrifikohet’ për të folur apo për t’u përplasur dhunshëm duke rrezikuar paraburgimin, dhe në fund pushimet! Këtu do të jemi, do ta shohim, sepse nuk lëviz Berisha nga ‘koordinatat’ e vendosura prej tij më parë. Nuk ia lë gjërat rastësisë ai, prandaj është katandisur PD në këtë derenxhe, tërësisht e kalcifikuar!

Nga Jakin Marena

Në PD ka një keqkuptim shumë të madh me veten e kjo nuk ndodh për herë të parë! Në kushtet e pafuqisë totale për të bërë politikë në vend, për të thithur elektorat e për të ardhur në pushtet, lidershipi demokrat sheh çdo lëvizje në rajon apo në arenën  ndërkombëtare, si një lëvizje që në një formë apo tjetër ka në qendër hallin e Berishës, familjes së tij dhe të ithtarëve të tij në PD.

Me atë universin e tyre paralel, demokratët që kanë mbetur në PD dhe për shkak se mendojnë me trurin e Berishës, ka 35 vite që u është bërë ‘lavazh’ truri e më këtë shpjegohet dhe mbështetja që ia dhanë për ta bërë kryetar një të rikthyeri pas 10 vitesh nga ‘varri politik’ siç është Berisha, dhe ngjarjet më të fundit që ndodhën njëra pas tjetrës, njëherë me takimin mes ‘carit’ rus Vladimir Putin dhe presidentit amerikan Donald Trump në Alaskë në funksion të paqes mes Rusisë e Ukrainës, apo disa ditë më vonë në takimin e realizuar në Shtëpinë e Bardhë me Presidentin ukrainas Zelensky dhe liderët e BE e të Britanisë, i shohin sikur nuk kanë lidhje me dhënien fund të luftës në Ukrainë, por sikur kanë diskutuar vetëm për hallin e Berishës me ‘non gratën’ e tij në SHBA dhe me përballjet që ai ka me drejtësinë! Dhe nuk ka pak dosje në ngarkim të tij!

Është një realitet paralel dhe tërësisht i përmbysur ky i parë nga Berisha dhe mbështetësit e tij, të cilët në vend që të gëzojnë për ato pak hapa të vegjël para që ka bërë çështja e dhënies fund të luftës mes Rusisë e Ukrainës, merren me detaje të vogla se si u soll Trump me Putinin, mënyrën si e priti, si doli para mediave, çfarë thanë dy liderët respektivë të dy fuqive të mëdha botërore, e mbi të gjitha komunikimin 10-15 minutësh të tyre në ‘vetmi’ në makinën në të cilën lëvizën të dy nga aeroporti drejt vendit ku do të zhvillohej takimi! Apo ‘loja’ me foto-montazhet se si e prisnin liderët evropianë e të BE si ‘nxënës’ të bindur Trumpin në korridoret e Shtëpisë së Bardhë!

Nuk po hyjmë në detaje të këtij takimi, as me situatën e mëvonshme se si do të precipitojnë ngjarjet në lidhje me konfliktin mes Rusisë dhe Ukrainës, rolit që mund të luajnë SHBA e fuqitë evropiane në arritjen e paqes, nuk mund të parashikojmë as paparashikueshmërinë e situatës për shkak se vetë Trump është një politikan i paparashikueshëm, ndërkohë që Putin është lehtësisht i lexueshëm në kërkesat e tij për të marrë në dorë dhe bashkuar me Rusinë tërë jugun e pasur të Ukrainës, pra dhe atë pjesë që nuk i ka pushtuar ende. Ose përndryshe nuk ka paqe për të!

Ajo që ne dimë, është se si po e lexon lidershipi i PD i drejtuar nga Sali Berisha këtë ‘zbutjen’ e presidentit amerikan Trump me homologun e tij rus Putin. Që për hir të së vërtetës, ndonëse pak e ekzagjeruar nga Trump, presidenti amerikan ka qenë i detyruar që, për t’i dhënë fund luftës tre vjeçare që ka marrë deri më tani mbi 1 milion jetë njerëzish, të ‘cedojë’ pak në raport me pritjen që i bëri ‘carit rus’ në Alaskë, si dhe përdorimin e disa kërkesave të Putin, që kanë të bëjnë me pamundësinë e rikthimit të Krimesë, Ukrainës, apo dhe pamundësinë e anëtarësimit në NATO po të Ukrainës. Dikush i sheh si përpjekje për lehtësimin e dialogut, dikush si ‘dashuri’ të Trump për të ‘fortin’ Putin, dikush tjetër si një përpjekje për të tejkaluar situatën! Punë e tyre!

Dhe ajo që po shohim jo pa dhimbje është fakti se Berisha dhe PD janë më shumë se të ekzaltuar me atë çfarë ka ndodhur dhe po ndodh, duke e ‘impostuar’ realitetin përmes realitetit të tyre paralel, sikur Trump e Putin më shumë se sa për Ukrainën, po flasin për Shqipërinë, hallin e Berishës që e ka lënë PD plot 16 vite në opozitë, si dhe hallet e tjera të Berishës e familjes së tij! Si dhe ‘hallin’ që kanë me Ramën, i cili nuk po i lë që nuk po i lë që të fitojnë asnjëherë!

Duket sikur në PD, më shumë se sa për arritjen e paqes mes Rusisë e Ukrainës dhe dhënies fund të përplasjes ushtarake që po merr jetë njerëzish dhe po zhyt ekonominë botërore në krizë, po gëzojnë për ‘zbutjen’ e Trump me Putin. E quajnë kthesë historike ndryshimin e qëndrimit të presidentit amerikan, është në të vërtetë pavarësisht se i ka brenda të dyja rezultatet-progresin dhe dështimin, por lidershipi demokrat dhe vetë Berisha tentojnë t’i japin ngjyrime të tjera kësaj ‘zbutjeje’ për interesa strategjike, duke e ‘përafruar’ me hallin që ai ka me ‘non gratën’ në SHBA, përballjen me drejtësinë dhe akuza të tjera që janë bërë në drejtim të Berishës dhe PD dhe nga CIA amerikane, për sponsorizimin e PD  nga Kremlini me gjysmë milioni dollarë për të krijuar destabilitet në Shqipëri.

Berisha dhe të tijtë gati sa nuk e quajnë ‘amnisti’ për kreun e Kremlinit këtë ‘zbutjen’ e Trump me Putinin, pavarësisht kondicionit politik dhe gjeopolitik për të cilin po ndodh. Gati sa nuk e quajnë Putinin ‘viktimë’ të Sorosit dhe sorosianëve në krye të SHBA, me në krye ish presidentin Joe Biden, të cilët e sollën situatën në këtë derenxhe në të cilën ndodhet bota sot, me luftën Rusi-Ukrainë dhe luftra të tjera nëpër këmbë.

Në pamje të parë duket sikur dhe në PD, janë në të njëjtën linjë me Trump i cili thotë se të kisha qenë unë presidenti i SHBA, nuk do të kishte ndodhur lufta Rusi-Ukrainë, tezë që Trump  dëshironte ta dëgjonte nga Putin, të cilën arriti ta dëgjonte. Ndërkohë që këta mbështetësit e Trump në Tiranë, duke filluar nga Berisha dhe përfunduar tek Këlliçi bëjnë sikur përçojnë idetë e Trumpit dhe në këtë cep të globit, për hir të së vërtetës realiteti është krejt ndryshe. Jo vetëm Trump por as ata që janë rreth tij, nuk e dinë nëse ekzistojnë këta robtë këtu në Tiranë apo jo. Pavarësisht se Berisha ka paguar mbi 20 milionë dollarë thjeshtë e vetëm për të futur emrin e tij në ‘radarin’ e njerëzve të Trump, me shpresën për t’i hequr ‘non gratën’.

Teksa gjasat janë zero për të hequr ‘non gratën’ e Berishës në SHBA, kishin disa herë shanse DASH dhe administrata e re amerikane e drejtuar nga Trump për ta bërë këtë punë, Berisha dhe të tijtë po përpiqen që ‘zbutjen’ e Trumpit me Putinin, ta paraqesin me lezet para ithtarëve të tyre por dhe para publikut shqiptar, si një ‘amnisti’ për liderin rus në raport me luftën dhe krimet që ka kryer në Ukrainë si dhe problemet që ka shkaktuar, teksa është cilësuar kriminel luftë jo vetëm nga tërë bota demokratike, por dhe nga paraardhësi i vetë Trump, ish presidenti Biden!

Dhe nuk e bëjnë këtë përpjekje thjeshtë e vetëm sepse janë të ‘dashuruar’ me rregull treshi me Putinin, ndoshta dhe kanë qënë gjatë gjithë kohës dhe vazhdojnë të jenë të tillë, por tentativën për ta quajtur Putinin të ‘aminstuar’ nga Trump e bëjnë në përpjekje për të ‘amnistuar’ dhe vetë Berishën e PD, të cilët morën gjysmë milioni dollarë nga Kremlini, pjesa e dukshme kjo, për të destabilizuar Shqipërinë dhe më gjerë tërë rajonin e Ballkanit.

Pra, tentojnë të ‘zerojnë’ të gjitha akuzat që janë bërë deri më tani ndaj Berishës se Kremlini ka sponsorizuar Berishën dhe PD në Shqipëri! Duke tentuar të ‘mbjellin’ qëndrimin se Putini nuk është ‘aq i zi sa thonë’, ‘ai u prit me nderime nga Trump’, e për pasojë janë pa rëndësi ato paratë e dhëna nga qeveria e Putin për PD-në e Berishës që të destabilizonte Shqipërinë!

E vërteta është krejt ndryshe. Takimi në Alaska erdhi për të shuar një luftë, për të evituar një destabilitet dhe kursyer jetë njerëzish në Ukrainë dhe më gjerë. Ndërsa paratë ruse Putini i dha për PD për të ngritur një vatër krize në Ballkan, për të destabilizuar Shqipërinë dhe rajonin, me shpresën e tërheqjes së vëmendjes nga krimet që po bëhen në Ukrainë! Janë dy gjëra krejtësisht të ndryshme, pavarësisht se realiteti paralel i Berishës dhe i të tijve tenton pa sukses t’i puthisë!

Nga Jakin Marena

Sali Berisha nuk ka asnjëherë informacion kur atij nuk i intereson për çfarë flitet e bëhet apo dëshiron të fshehë diçka të madhe, përfshirë edhe tentativën për të mos dhënë një qëndrim të qartë mbi një ngjarje apo mbi një fakt.

Me një fjalë, kur Berishës nuk i shkon diçka për ‘osh’ ai bën sikur nuk di asgjë, nuk ka asnjë informacion sado i thjeshtë të jetë, sikur s’njeh askënd, sikur s’ka kaluar kurrë nëpër ato rrugë apo vise që përmenden. E bën aq hapur një gjë të tillë, sa teksa në fillim besohej se vërtetë lideri demokrat nuk merrej me ‘gjëra aq të vogla’ në dukje, por me kalimin e kohës një besim i tillë ka rënë tërësisht, për të zënë vend qartë akuza për hipokrizi ndaj tij.

E themi këtë sepse Berisha ndërsa shprehet për gjërat që nuk i shërbejnë se nuk ka dijeni apo nuk i njeh, tregon qartë se e mban syrin te ‘vrima e çelësit’, duke ‘përgjuar’ dhe marrë nëpër gojë të gjithë ata shqiptarë, politikanë, gjyqtarë, prokurorë ose të thjeshtë, të cilët i cilëson kundërshtarë të tij dhe të familjes së tij, teksa nxjerr në tregun mediatik ‘lajme’ nga më të paimagjinueshmet dhe të pabesueshmet!

Dikush tha se Berisha na kujton atë barcaletën që kishim në rini, kur pyetej një nga personat me kujtesë fenomenale por autodidakt, për ngjarje, data e periudha historike dhe për ta zënë gafil, e pyesnin se ku është bërë Lidhja e Prizrenit, ndërkohë që ai thoshte me pafajësinë proverbiale të tij: Këtë vërtet nuk e di! Por Berisha nuk është nga ky kontigjent. Ai ka kujtesë të fortë, ndërkohë që ‘harron’ vetëm atë që i leverdis ta harrojë, të mos e kujtojë apo të mos e njohë!

Këto na erdhën në mendje, teksa dëgjuam ditë më parë përgjigjen e tij në lidhje me situatën e investimit të dhëndrit të Donald Trump në Sazan! Duke këmbëngulur se nuk ka asnjë dijeni nëse mund të jetë shitur apo falur për Jared Kushner ky ishull, pavarësisht se është në Shqipëri dhe për më tepër Berisha pretendon se nuk fluturon, as noton e as ecën në tokë asgjë pa qenë ai në dijeni.

“Së pari, të jem i hapur me ju, nuk kam asnjë të dhënë se kemi të bëjmë me një shitje. Ligjet shqiptare lejojnë dhënien me 1 euro, siç dihet, për një periudhë të caktuar të terreneve, trojeve dhe tokave. Unë nuk kam asnjë dijeni se, ishulli i Sazanit është blerë nga çifti Kushner apo është shitur nga kreu i organizatës kriminale, Edi Rama personalisht, nuk kam asnjë lloj dijenie, sepse ligjet shqiptare nuk parashikojnë një gjë të tillë”, deklaroi Berisha para mediave. Pra, s’di gjë!

Por vetëm pak kohë më parë Berisha ka deklaruar se kryeministri Rama ia dha Sazanin dhëndrit të presidentit amerikan Donald Trump për qëllime e influencë politike. Teksa u shpreh se për Sazanin ka pasur kërkesa dhe oferta për Sazanin nga shumë biznesmenë dhe investitorë që prej vitit 2001, por qeveria së fundmi vendosi ta jepte të Jared Kushner. Berisha tha i bindur se Rama ia dha Sazanin dhëndrit të presidentit amerikan thjeshtë e vetëm për qëllime e influencë politike. Duke prezantuar tashmë një ndryshim qëndrimi me 360 gradë, në deklaratën e një ditë më parë për këtë investim të rëndësishëm, krahasuar me atë që ka dhënë disa muaj më parë!

Tani këtë ‘piruetë’, Berisha e ka bërë nga frika prej Trump, nga frika se do t’i shkojnë dëm gati 20 milionë dollarët lobime në SHBA për të hequr ‘non gratën’ apo së paku për të garantuar një vizë sa për të shkelur tokën amerikane, nga frika se mund të zbardhen detaje tronditëse nga dosja e tij në DASH që e shpalli ‘non grata’, nëse ‘harron’ sulmon vajzën e preferuar të Trump, Ivanka e dhëndrin e tij Kushner, apo se kështu i volit politiksht në këtë moment, kjo mbetet për t’u parë.

E themi këtë sepse Berisha po atë ditë doli si gjithnjë jashtë kontrollit me fantazitë e tij, duke sulmuar kryeministrin Edi Rama, në lidhje me atë që kreu i PD e quan skandali me shefin e FBI, McGonigal. Teksa ka deklaruar se do të ngrejë një komision hetimi për këtë çështje, ndërsa akuzon kreun e SPAK, Altin Dumani se është një vegël e Edi Ramës, pasi sipas tij e ka varrosur këtë dosje të rëndë! Që për hir të së vërtetës s’ka lidhje aspak me Shqipërinë e shqiptarët!

Hyn dhe në detaje të imta fare, a thua ka qenë prezent në SHBA në të gjitha aktet që ai thotë se kanë ndodhur mes ish shefit të FBI dhe njerëzve të Ramës, që i përmend me emër, mbiemër, familjarë, nga vijnë si origjinë, ku kanë punuar, kur janë martuar, sa kalamaj kanë, e gjëra të tjera të këtij lloji! E di se nuk merret njeri për verifikimin e këtyre detajeve të panevojshme, ndërkohë që ata që u përmend emrin as duan t’ia dinë se çfarë thotë Berisha. Kapet pas çdo situate, pas çdo lajmi të rremë në media, të cilin pasi e merr dhe e përpunon siç di vetëm ai, e degjeneron në atë farë feje, sa dhe nëse ka ndonjë përqindje sado të vogël vërtetësie brenda tij, e “këput” fare, duke e bërë tërësisht të pabesueshëm e të papërtypshëm. Berisha këtu është në ‘habitatin’ e vet!

Kërkon hetim për McGonigal, pavarësisht se SHBA e ka mbyllur hetimin e vet atje, për shkelje të rregullave e ligjeve amerikane nga ana ish zyrtarit të lartë të FBI-së, ku s’përmendet në asnjë rast fjala “korrupsion” apo lidhje me Shqipërinë. Berisha ditë pas dite po bën teori konspirative, duke e kthyer Shqipërinë në qendër e botës dhe duke cilësuar Ramën me pa të drejtë, njeriun që qeveris jo vetëm Shqipërinë por dhe Amerikën. Dikur përmes Sorosit e zyrtarëve të lartë të FBI, sipas Berishës, ndërsa tani hajde merre vesh se me kë po e ‘menaxhon’ Rama dhe Trump-in.

Ndërkohë që Berisha nuk di se çfarë ndodh me ishullin tonë në Shqipëri, Sazanin, e tha një ditë më parë, kohë më parë sajonte teori të pabesueshme konspiracioni, për nga nga shkalla e fantazisë, duke e “impostuar” kryeministrin e vendit Rama, në “një ishull” të veçuar të Paqësorit në mes të askundit dhe ku sipas tij “po pyetet nga agjentët e FBI”. Paçka se asokohe Berishës, ende nuk ia kishin pranuar 20 milionë dollarët për lobim në SHBA për të hequr atë të bekuar ‘non grata’. Ndërsa ende nuk kishte ardhur Trump në Shtëpinë e Bardhë!

Dhe këtu ka një kontraditkë shumë të madhe në ato që thotë Berisha, në kohë të ndryshme, për të treguar se ka informacion të ‘thelluar’ për gjithçka dhe nga ana tjetër bën sikur është i paditur dhe për informacione elementare. Nga njëra anë flet me detaje për gjithçka, duke thurur teori të mëdha konspiracioni, sikur ka qenë në “ishullin” ku “qëndroi për tre ditë” sipas tij Rama duke u pyetur nga agjentët e FBI”, sikur ka qenë pas ferrës dhe ka dëgjuar dhe mbajtur shënim gjithçka, sikur ka qenë prezent si hije në të gjitha marrëveshjet e supozuara nga vetë ai, mes Ramës e ish zyrtarit të FBI që i paskan bërë “puçin” kreut të PD për ta shpallur ‘non grata’ nga SHBA e për ta evidentuar nga CIA amerikane si filorusin më të madh në Shqipëri, që u financua me gjysmë milioni dollarë për të destabilizuar vendin, para që i mori Berisha në fakt!

E sipas këtij realiteti paralel që ka krijuar vetë dhe me të vetët, Berisha kërkon të ngrejë komision hetimi për ‘McGonigal’, çështje që tashmë e ka harruar dhe vetë Amerika! Hajde merre vesh!

Apo flet me kompetencë dhe për ngjarjet më të fundit, ato të  përfshirjes së shumë fshatrave dhe zonave turistike nja zjarret, pothuajse në 99 për qind të raste të vënë nga dora e njerëzve, ‘piromanët’ ndjejnë kënaqësi kur shohin djegien e vreshtave me ullinj, pemëtoreve, pyjeve apo banesave, ndonjë kishe dhe kasolleve të bagëtive me gjithë bagëtitë brenda, duke rrezikuar seriozisht jetën e qytetarëve shqiptarë! Berisha sërish bën kompetentin, të gjithëditurin, duke deklaruar se nuk kishte ushtarë e policisë shqiptarë për fikjen e flakëve, por ishin të huaj! Ka fyer të gjithë këta heronj që u përballën e flakët për të shpëtuar jetë njerëzish e pasurinë e shqiptarëve, anipse rrezikuan dhe jetën e tyre.

U poqën nga njëra anë zjarri, fryt i devijancës së trurit njerëzor siç janë ‘piromanët’, nga ana tjetër vapa e tmerrshme nga temperaturat më të lartat e dekadave me radhë, nga ana tjetër Berisha që flet ‘kaluar’ nga bjeshkët e Tropojës ku gjendet bashkë me dhëndrin, se ushtarët dhe policët shqiptarë nuk janë në aksion për fikjen e zjarreve. Madje hedh dhe lajme të tjera me ithtarë të tij, sipas të cilave zjarret janë ndezur për të pastruar vendin për ndërtimin e kullave! Kulla në Gramsh, në Delvinë, Bulqizë, Munellë? S’ka faj’ i ka punët në terezi, është me vila e shtëpi në Shqipëri dhe në të gjitha kryeqytetet më në zë të Evropës, leku letër dhe e ka harruar kasollen e lopës në Viçidol të Tropojës, ku ka lindur dhe është rritur!!

Nga ana tjetër Berisha bën të paditurin për shumë e shumë gjëra, përfshirë dhe ishullin tonë, jo në mes të Paqësorit, por diku aty përballë Vlorës sonë heroike. Bën të paditurin sidomos për ato shkelje ligji e deri korrupsioni të përgjakshëm ku kanë gisht ai e familja e tij, kanë shkaktuar humbje jetësh të pafajshme, miliona euro të vjedhura, prona të tjetërsuara dhe vrasje nga shteti i drejtuar prej tij në mes të bulevardit. Sipas akuzës këto të gjitha, nuk po ia shpikim ne! Për këto gjëra të ‘vogla’ nuk kishte dhe nuk ka ‘dijeni” Berisha fare. Po fare. Madje as nuk i kupton, bën sikur nuk dëgjon pyetjet dhe nuk sheh asgjë.

Ende ka ‘dilema’, nëse Berisha e ka mësuar se ku ‘bie’ Gërdeci, fshati që hodhi në erë djali i tij me biznesin e demontimit të municioneve, duke vrarë 26 njerëz të pafajshëm dhe plagosur mbi 300 të tjerë. Berisha asokohe deklaroi se nuk e dinte ku binte Gërdeci, megjithëse e ka marrë me zvarritje këtë zonë gjatë zboreve, një jetë të tërë. Deklaroi se nuk dinte se nga binte Gërdeci, nuk e kishte dëgjuar këtë emër kurrë më parë, pavarësisht se ishte ‘therur’ me ish zv.kryeministrin Ilir Rusmali e ish ministrin Financave Ritvan Bode, të cilët nuk pranuan për qamet kalimin e lejes për Gërdecin me vendim qeverie, duke ia lënë ‘peshqesh’ ministrisë së Mbrojtjes, të drejtuar asokohe nga Fatmir Mediu, i cili tani është në dyert e gjykatave!

Berisha madje nuk ‘dinte’ as se punonte baxhanaku i tij në këtë punishte, i marrë në punë nga Shkelzeni, duke i ngatërruar me qëllim dhe emrin, teksa deklaronte emrat e viktimave të këtij shpërthimi të korrupsionit shtetëror të drejtuar nga djali i tij sipas akuzave, dhe për të cilin ishte angazhuar i gjithë shteti, në fillim për ta ngritur e më pas për të mbrojtur krimin që ndodhi. Duke shkatërruar edhe drejtësinë shqiptare nga themelet. S’i kish treguar gjë liria për martesën e motrës! Le më të ketë qenë në drekën e vogël në formë dasme, të organizuar me këtë rast!

Ndaj nuk e besojnë më shqiptarët Berishën, në këto ‘pirueta’ që bën herë pas here. I ka mashtruar aq shumë, sa dhe historinë më të bukur konspirative të tregojë, madje të ‘qendisur dhe me fije ari’ ta rrëfejë, gjithnjë shqiptarëve Berisha do t’ju kujtohet se tha se nuk e dinte ku binte Gërdeci, nuk njihte baxhanakun e tij. Prandaj nuk na bëri shumë përshtypje deklarata e Berishës se s’dinte asgjë çfarë ndodhte me Sazanin dhe investimet e dhëndrit të Trump. ‘Film’ i parë ky!Për më tepër dukej sikur pajtohej me Ramën në këtë pikë, duke dalë tërësisht nga boshti i tij konspirativ i kohëve më parë. Sidomos para zgjedhjeve të 11 majit të këtij viti.

Megjithatë, në fund të herës Berisha është shumë, shumë argëtues! Sidomos kur bën sikur s’sheh, sikur s’kupton, sikur s’njeh askënd, sikur nuk ka asnjë informacion! E pastaj ngrihet ‘pupthi’ e fillon e ‘kurdiset’ pas disa minutash, me informacione të ‘dorës së parë’ për detaje nga më të imtat! Anipse në 99% të tyre del bllof, duke i ardhur përgënjeshtrimet nga të gjitha anët! Por ama bën sikur i di të gjitha!

Ta ‘hajë kush ta hajë’, ai ka për detyrë që ta nxjerrë nga goja atë që ka në mendje, jo të thotë ndonjë të vërtetë! Kështu ka vepruar gjithnjë, ky është ‘habitati’ i tij për 35 vite me radhë! Nuk presim të ndryshojë tani në pleqërinë e thellë! Madje as nuk duam që të ndryshojë për aq vite sa i kanë mbetur. Është më argëtues kështu! Dhe mbi të gjithë, larg pushtetit, pa mundur të ngatërrojë gjë më. Na dhimbsen pak, demokratët, por ata Berishën duan!

Nga Jakin Marena

Nuk jemi tamam të qartë se çfarë e detyroi ish kryeministrin demokrat Sali Berisha që më në fund ta pranojë publikisht se vrasja e 4 demonstruesve të opozitës së atëhershme më 21 janar 2011 në mes të bulevardit përballë kryeministrisë ishte një vrasje shtetërore!

Ishim mësuar ndër vite e vite me deklaratat e tij, sipas të cilave ai kishte mbrojtur institucionin e kryeministrisë, ndonëse në të gjithë literaturën botërore godina nuk është institucion por tulla e llaç dhe për këto raste ka rregullore se si duhet të veprohet kur titullari nuk është në seli apo kur është në seli, ku dhe evakuohet menjëherë.

Për hir të së vërtetës Berisha ishte jashtë godinës kur u mbodhën protestuesit, por këmbënguli që të hynte në ‘kullë’, madje i provokonte dhe nga dritarja e kryeministrisë ata, duke e ndërlikuar situatën. Ka dhe foto për këtë! Megjithatë, nënvizojmë se godina s’është ‘kulla’ e asnjë kryeministri! Janë të përkohëshëm aty, venë e vijnë!

Berisha nëpër studiot televizive, janë me zë e figurë dhe gjenden lehtë videot, ka deklaruar se mund të vriste jo 3 por dhe 3 mijë demonstrues, nëse kalohej gardhi i godinës së kryeministrisë, gardh që sot nuk ekziston më. Madje kishte kërcënuar dhe ish kreun e opozitës së atëhershme Edi Rama, sot kryeministër i vendit, se nëse do të bënte një hap para më 21 janar, se kishte urdhëruar 4 snajperë që ishin pozicionuar në tarracën e kryeministrisë, që ta qëllonin në kokë! Kreun  e opozitës me një fjalë! Dhe urdhërin e kishte dhënë ai, vetë Sali Berisha!

Pasi është mburrur për vite me radhë e ka dhënë një material të mjaftë dhe për prokurorin më të thjeshtë në këtë vend, që do të shërbente dhe si indicie që të niste një hetim penal ndaj ish kryeministrit të këtij vendi për urdhërdhënie për vrasje politike deri të kreut të opozitës, dhe njëherësh pasi është përballur me vendimin e troçtë të Strasburgut që e ktheu çështjen e cila ka kaluar në SPAK tashmë, duke kërkuar hetimin e dërgimin për gjykim të atyre që dhanë urdhërin për këtë masakër, si dhe pasi është përballur me faktin se prokurorët e SPAK sado xhan ta kenë Berishën nuk kanë nga të luajnë pa e kopsitur dhe zyrtarisht dosjen e ’21 janarit’, e ardhur e kopsitur thuajse nga Strasburgu, Berisha më në fund ka pranuar se është vrasje shtetërore ‘21 janari’! Më mirë vonë se kurrë! Por i ka nxjerrë një ‘bisht’!

Madje është munduar që të japë një shpjegim ‘alla Berisha’ se përse ai e quante krim shtetëror vrasjen e 4 demonstruesve të opozitës më 21 janar! Teksa ka deklaruar se ata janë vrarë nga punonjësit e shtetit, pra Garda e Republikës, Berisha u mundua të bëjë specialistin e balistikës, duke nënvizuar faktin se mund të ketë dhe plumb rikoshet, pra pa qëllim dhe jo me dashje!

Ish kryeministri, sot kreu i PD, e bën shpjegimin sipas realitetit të tij paralel kur krimi shtetëror bëhet me dashje apo pa dashje. Sipas tij, vrasja në bulevard e demonstruesve nga Garda nuk quhet krim shtetëror me dashje, pasi për të, ‘ka klasifikim krimi shtetëror’. Krimi shtetëror me dashje ka rregullat e veta kur quhet, kur shteti e merr të pafajshëm dhe i pushkaton. Kur shteti jep urdhër këtë-këtë, kur s’duhet ta bëjë kurrë atë. Krim shtetëror pa dashje është kur ndodh nga rikosheta, ndodh nga detyra, sepse Garda ka patur një ligj. Unë e kam thënë 5-6 vjet para, që është krim shtetëror, krim shtetëror pa dashje”.

Janë shpjegimet allasoj të Berishës këto, për të justifikuar krimin shtetëror me shumë dashje madje, më 21 janar 2011, anipse atë ditë ai këto vrasje i quajti si vrasje mes vedi të demonstruesve, madje dhe duke dhënë shpjegime përmes videove që publikonte para mediave, se si njeriu i thinjur atyre afër, me çadër pistoletë qëlloi shokun e gjëra të tjera të këtij lloji! Derisa sa doli videoja që tregonte gardistët duke qëlluar e vrarë demonstruesit e pafajshëm, jo në momentin e përplasjes, por teksa shpërndaheshin!

Por në fund Berisha doli aty ku donte, pikërisht aty ku kishte nevojë të dilte, tek urdhërdhënia. I shqetësuar nga fakti se Gjykata e Strasburgut kërkon në mënyrë të prerë pikërisht hetimin dhe dënimin e atyre që kanë dhënë urdhërin për të qëlluar në ‘mish’ mbi turmën, Berisha deklaron se “nuk ka patur absolutisht asnjë urdhër”! Kundërshton pikërisht atë që asnjë prokuror i SPAK nuk mund ta shmangë. Pra, dhënien e urdhërit për të qëlluar, pasi Garda nuk qëllon pa urdhër. Ka dhe përgjime për dhënien e këtij urdhëri, kush tha ‘qëlloni në mish’, urdhër që dëgjohet në mënyrë lineare në kasetën që është bërë publike, dhe ku kjo kasetë është duke u hetuar nga SPAK!

Dhe sipas ligjit apo të gjitha rregulloreve, në një institucion të lartë, urdhëri jepet nga titullari më i lartë në institucionin ku ka përplasje, në atë rast ishte ish kryeministri Berisha në godinën e kryeministrisë. SPAK le të zbardhë se si prevaloi urdhëri nga ish kreu i qeverisë te ish ministri i Brendshëm Lulzim Basha, si e ‘përthithi’ urdhërin me dhunë ish kreu i Gardës Ndrea Prendi, kush e rrahu Prendin teksa u shfaq me hematoma në sy dhe kush ia mori pisoletën për të qëlluar në turmë ‘në mish’, duke i marrë jetën një demonstruesi, kush ia ndërroi ‘veglat’ pistoletës më pas, kush i hoqi dhe fshiu kamerat e sigurisë, kush i zhduku provat, kush e paralizoi policinë e prokurorinë, kush e quajti grusht shteti e lëshoi akuzat me ‘lavire bulevardi’ për kryeprokuroren e asaj kohe dhe ‘horr bulevardi’ për presidentin e asaj kohe, kush ngriti komision hetimi, kush i detyroi mjekët të thonin se ishin qëlluar nga afër viktimat dhe gjëra të tjera të këtij lloji!

Teksa Berisha po tenton që të mbrohet pikërisht në linjën e krimit shtetëror, pa qëllim apo pa dashje, ndryshe mendon Gjykata Evropiane për të Drejtat e Njeriut, apo Gjykata e Strasburgut siç dëshirojmë ta quajmë shkurt ne shqiptarët, edhe për t’i dhënë forcë vendimeve të kësaj gjykate! Në nëntor 2023, ‘Strasburgu’ e detyroi Shqipërinë që të zbulonte përgjegjësit e vërtetë të krimit shtetëror të 21 janarit 2011, specifikisht ata të cilët urdhëruan Gardën të qëllojë me armë zjarri ‘në mish’ ndaj turmës së protestuesve të opozitës.

Në vendimin prej 48 faqesh të ‘Strasburgut’ sqarohet qartë se pretendimi i Berishës se krimi shtetëror ka qënë pa dashje është absurd, teksa në vendim thuhet se gjatë hetimeve u zbulua që në gardhin para Kryeministrisë janë konstatuar shenja plumbash. Gjykata ngrinte dyshime të forta që shenjat mund të vërtetojnë faktin se gardistët kishin qëlluar drejt turmës dhe një pjesë e mirë e plumbave janë ndalur nga gardhi. Pra jo me rikoshet siç pretendon ish-kryeministri, por ‘drejt e në mish’ sipas urdhërit dhe që mund të kishte shkaktuar më shumë viktima, nëse nuk do të ishte gardhi si ‘mburojë’ natyrale për protestuesit.

Gjykata e Strasburgut e bën të qartë se është dhënë urdhër për të vrarë dhe drejtësia në Shqipëri duhet të hetojë e të dërgojë për gjykim të gjithë ata që kanë dhënë, si dhe përcjellë këtë urdhër të përgjakshëm! S’ka vend këtu për ‘plumba rikoshet’ këtu!

E thënë më thjeshtë, vrasjet më 21 janar 2011 janë krim shtetëror me dashje, me urdhër, sepse Garda nuk qëllon me plumba të vërtetë pa urdhër,  janë vrasje të qëllimshme dhe jo nga ‘plumba qorr’, sikurse kërkon të justifikohet Berisha, për t’i dhënë drejtim tjetër hetimit të SPAK, përmes pranimit të një gjysmë të vërtete për të shpëtuar nga akuza e rëndë për tërë krimin në total.

Ne kemi besim se SPAK do ta hetojë me seriozitet këtë krim, i cili po shihet dhe si ‘test’ për një drejtësi të vërtetë në Shqipëri, për një drejtësi e cila ka mbështetjen e shqiptarëve, partnerëve tanë ndërkombëtarë dhe mbi të gjitha ka ‘thithur” e “thith’ miliona euro mbështetje në të gjitha planet. Janë lekë të hedhura nga arka e shtetit shqiptar, nga taksat tona, prandaj, duam që hetimi dhe më pas gjykimi të jetë i drejtë dhe sipas ligjit, për t’i dhënë ‘hakun’ që i takon secilit që ka gisht në vrasjet e 21 janarit 2011. Janë 4 jetë njerëzish të marra nga shteti, jo pa dashje por me qëllim!

Përfundimisht, në vitin e 15-të të masakrës shtetërore të ‘21 janarit’, ku plumbat e Gardës morën jetën 4 protestuesve në Bulevard, dosja më e bujshme që nga viti 1990, ndodhet tashmë prej më shumë se një viti në duart e SPAK. Pati ‘pirueta’ dhe kundërshti nga SPAK, e shoqëruar me një lojë ‘ping-pongu’ për të mos e marrë nën hetim këtë dosje të ‘nxehtë’, por më në fund kalimi në SPAK erdhi vetëm pasi u urdhërua nga Gjykata e Strasburgut.

Nga 15 korriku i vitit të kaluar, dosja e një prej të vrarëve të 21 janarit, Aleks Nikës mbërriti nga Prokuroria e Tiranës në SPAK, institucioni i vetëm që ka juridiksionin e fuqinë e që mund dhe duhet të zbardhë rolin e Berishës, kryeministrit të ‘21 janarit’, Lul Bashës, ministrit të Brendshëm të ‘21 janarit’, kreut të Gardës, Ndrea Prendi dhe të çdo zyrtari të lartë të përfshirë në këtë krim shtetëror, vrasje me dashje me plot gojën mund të thuhet. Ka dhe të ‘penduar’ nga Garda e politika që kanë folur, ka dhe prova të reja që janë marrë nga SPAK i cili thuhet se po i heton. Të paktën kështu besojmë!

Prandaj SPAK e regjistroi zyrtarisht procedimin penal për 3 vepra penale, që janë: “Vrasja në rrethana të tjera cilësuese” e kryer në bashkëpunim kundër dy ose më shumë personave dhe në mënyrë të rrezikshme për jetën e shumë personave, “Shpërdorim i detyrës” kryer në bashkëpunim, “Kryerja e veprimeve që pengojnë zbulimin e së vërtetës” kryer në bashkëpunim. SPAK tha kohë më parë se ‘21 janari’ është në kompetencën e tij pasi dyshohet se veprat penale mund të jenë kryer nga ish-funksionarë të lartë shtetërorë, gjatë ushtrimit të detyrës.

Akuzat janë ngritur pikërisht mbi atë që ‘Strasburgu’ urdhëroi: Të zbulohen ata që dhanë urdhrat për vrasjet, pse Berisha pengoi hetimet, pse mashtroi me kamerat e sigurisë, pse nuk e dorëzoi zinxhirin drejtues të Gardës e policisë në prokurori dhe kush vrau Aleks Nikën e Hekuran Dedajn, që kanë mbetur pa autor. Mund të hetohet dhe përse Berisha dërgoi një çantë me para te vëllezërit e njërit prej viktimave, të cilët e refuzuan me neveri! Meqë Berisha thotë se ishte një krim shtetëror, por pa dashje, pse duhej të afronte para për të mos folur!

Tashmë ‘topi’ është në duart e SPAK për të hetuar këtë vrasje shtetërore, të pranuar dhe nga vetë Berisha më në fund. Thjeshtë mund ta fillojë duke pyetur Berishën në fillim, ta thërrasë njëherë se nuk bëhet kiameti! Pastaj le të marrë Bashën për ta pyetur, jemi të sigurtë se ai do të ‘bilbilojë’ Pastaj tërë të tjerët pas tyre! S’mund të kalojë vrasja e katër demonstruesve në mes të bulevardit përballë kryeministrisë, thjeshtë dhe vetëm me 4 vite burg për një gardist dhe kreun e Gardës. Ka dhe më.

E kërkon Strasburgu, e me sa duket dhe Berisha e ka parandierë se asnjë prokuror i posaçëm nuk mund ta shmangë përgjegjësinë e ish kryeministrit në këto vrasje! Sado me qëllim të mirë ka qënë dhe është në drejtim të tij! Ndaj Berisha po nxiton ta ‘orientojë’ nëpër kanale të tjera akuzën për urdhër-dhënie të Gardës që të vrasë më ‘21 janar’! Sipas teorisë ‘prano një gjë të vërtetë, por modifikoje e rrethoje me disa të pavërteta’.

4 demonstruesit e opozitës së atëhershme nuk u vranë me plumba ‘qorr’, ata u vranë me urdhër nga lart, dhe me plumba të vërtetë, duke u qëlluar ‘në mish’ nga Garda! Sado që të zgjatet kjo çështje, ajo s’mund të mbyllet më! Eshtë Gjykata e Strasburgut në mes! Nuk të lë të lëvizësh asnjë një centimetër!

Nga Jakin Marena

Në fillim ishte Sali Berisha ai që i dha fund ‘këngës’ së përditshme në majë të ballkonit të katit të tetë të pallatit të tij në qendër të Tiranës, duke fituar lirinë nga një vendim i gjykatës, e cila e liroi nga arresti shtëpiak! Kreu i PD, pas 11 muajsh izolimi brenda brenda pallatit të tij 10-katësh në rrugën “Mustafa Matohiti”, fitoi lirinë. Gjykata e Posaçme vendosi ta lirojë liderin e PD, duke shfuqizuar masën e sigurisë “arrest në shtëpi”, masë e dhënë ndaj tij më 30 dhjetor 2023.

Vendimi që i dha të drejtë pretendimeve të Berishës për revokim të masës, u shpall nga gjyqtarja Flojera Davidhi. Seanca nuk ishte njoftuar me herët nga gjykata, madje edhe në shënimin me dorë të bërë në listën ditore të seancave gjyqësore, nuk ishte emri i kërkuesit Sali Berisha, por i Prokurorisë së Posaçme. Një ‘konspiracion’ i cili i ‘shpëtoi’ dhe gazetarëve më të vëmendshëm të kronikës, të cilët të mësuar t’i marrin ‘direktivat’ të gatshme dhe të vijëzuara me ngjyrë të verdhë, këtë radhë nuk patën ndonjë ‘rrjedhje informacioni’.

Si gjithnjë për Berishën, nuk del as ‘miza’ nga SPAK. Gjyqtarja Davidhi dha verdiktin, duke e liruar Berishën. Teksa vlerësoi se nuk ekzistojnë më kushtet dhe kriteret për zbatimin e kësaj mase sigurie. Për më tepër që situata ishte dhe dhe në prag të zgjedhjeve parlamentare dhe sipas gjyqtares, ‘tata’ i rikthyer i politikës do të udhëhiqte fushatën e PD, në vend që të përgjigjej për akuzat e rënda apo të shkruante kujtimet.

Por me sa duket ‘dhuratat’ nga drejtësia e re për familjarët e Berishës nuk paskan të sosur. E themi këtë, pasi këtë të hënë është liruar nga arresti shtëpiak dhe dhëndri i vetëm i familjes, Jamarbër Malltezi! Kundrejt një garancie pasurore kjo. Pasi gjykata ka pranuar kërkesën për revokim të masës së sigurisë të Malltezit, kundrejt një garancie pasurore prej 3 milionë lekësh. Gjithë ai korrupsion me përfitime madhore dhe për më tepër me involvimin e tërë strukturave të shtetit në këtë aferë, si ajo e “Partizanit”, kishte një ‘çmim’ ordiner, vlente as më pak dhe as më shumë por vetëm 3 mijë euro. Para xhepi. Kush nuk i paguan kaq lekë për të gëzuar 5.4 milionë euro!

Ndërkohë që është rrëzuar dhe kërkesa e gjyqtares Elsa Ulliri, kryesuese e treshes që do të gjykojë dosjen ‘Partizani’, e cila kërkoi tërheqjen me argumentin se ishte kushërirë e deputetes demokrate Andia Ulliri. Dhe ky një ‘bonus’ për familjen Berisha, e cila është e tëra e akuzuar për aferën e privatizimit të ish kompleksit sportiv “Partizani’, ku nga një bythë vend, prej 83 metrash katrorë, e marrë dhe kjo sipas akuzës me padrejtësi nga ana e dhëndërit Malltezi, sepse thuhet se ishte kompensuar një herë në kohë të Italisë, dhe ku përmes vendimeve të vjehrrit Berisha, u përfituan territore të tëra në mes të kryeqytetit, duke ndërtuar kulla dhe përfituar të paktën 5.4 milionë euro po nga dhëndëri i Berishës. Kjo është akuza zyrtare, që të mos na ‘tronditet’ Abi!

Dhe sipas SPAK, Berisha akuzohet për korrupsion pasiv e po hetohet në liri, po ashtu dhe dhëndëri akuzohet për korruptim të vjehrrit dhe për pastrim parash, dhe nga e hëna e kësaj jave, është dhe ai i lirë si një ‘elektron’ për t’u hetuar dhe me shumë gjasa dhe për të përfituar bashkë me vjehrrin nga gjyqtarët dhe prokurorët e ‘shoqnisë’ së Argitës. Nuk përbën asgjë çudi tani!

Praktikisht pas këtyre vendimeve të gjykatës së Posaçme, cinike në kuptimin më të mirë të fjalës, por dhe të atakueshme moralisht, pasi nuk po hyjmë në detaje të analizës për punën e drejtësisë së re, atë nuk e diskutojmë, ajo që ia vlen të theksohet është se tani e tutje do të ketë një shkallë më të ulët besimi të qytetarëve shqiptarë te prokurorët dhe gjyqtarët e posaçëm në lidhje me goditjen e korrupsionit madhor! Pasi me keqardhje konstatojmë se SPAK të cilin e ka ‘dërguar baba me la gojën sa për ta çuar dosjen deri në gjykatë’ dhe për të mos ia ndjerë më për të, si dhe Gjykata e Posaçme, mbetën pikërisht në ‘testin’ e vërtetë të bërjes drejtësi në këtë vend. Pra u ‘thyen’ përballë Berishës e familjes së tij, në mos kanë qënë të ‘këputur’ që në fillim të herës, pavarësisht se bënin si ‘tigra’, me këta të ‘urtët’ zyrtarë të PS!

Aq më tepër që po veprohet me dy standarde, pasi Berisha dhe familja e tij, pas një presioni të jashtëzakonshëm ndaj prokurorëve dhe gjyqtarëve që janë marrë me hetimin apo me gjykimin e rekursve të tyre, duke i prekur deri në familje me emër dhe mbiemër madje dhe kërcënuar të gjithë ata përfaqësues të drejtësisë që kanë lidhje me çështjet në ngarkim të tyre, kanë arritur të marrin rezultate të vërteta në favor të tyre. Në rastin konkret, janë liruar nga arresti shtëpiak dhe po mbrohen në liri, si Berisha ashtu dhe Malltezi! Pasi me këto akuza, në një vend normal me drejtësi normale, më e pakta do të ishin bashkë në të njejtën qeli, që t’i bënin hyzmet njëri tjetrit!

Ndërkohë që të gjithë zyrtarët e tjerë që janë arrestuar me akuza më të lehta se kjo e Berishës dhe dhëndrit të tij, vijojnë të qëndrojnë në qeli! Për më tepër që në ndryshim nga Berisha, të cilit nuk i janë marrë në referencë kërcënimet ndaj gjyqtarëve e prokurorëve, sharje e kërcënime me libër shtëpie me një fjalë, ndaj zyrtarëve të tjerë të shtetit, kryesisht nga ata  të mazhorancës, dhe për ndonjë fjalë tepër që kanë hedhur, jo fyerje të kuptohemi, u janë përgjuar, shënuar dhe përfshirë nën akuza të reja, dhe muhabetet mes burrit dhe gruas! Madje dhe janë linçuar publikisht! Pra po përdoren dy standarde në fakt dhe kjo duket me sy të lirë fare!

Duke parë apatinë e drejtësisë së re, ku s’kemi më shpresë nëse prokurorët e SPAK do të bëjnë rekurs në Apel lirimin e dhëndrit të Berishës, ia vlen të theksojmë se nuk do të jetë e largët dita që Berisha dhe të tijtë do të lirohen nga të gjitha akuzat për “Partizanin’, ndërkohë që nuk do të guxojë më askush që të çojë deri në fund çështje të tilla sensitive për të cilën u ngrit SPAK dhe GJKKO, si shpërthimi i korrupsionit të përgjakshëm të ‘Gërdecit’, me 26 të vrarë dhe mbi 300 të plagosur, ’21 janarin’ me katër dmenostrues të opozitës të vrarë nga Garda e Republikës në mes të trotuarit përballë kryeministrisë, aferën mbi 500 milionë euro të CEZ-DIA dhe krime e afera të tjera korruptive në ngarkim të familjes së Berishës.

Me sa duket ka ardhur koha që kush bie në burg apo merret nën hetim për një akuzë korrupsioni apo më tej, mjafton të deklarohet si i afërm me Berishën, dhe e ka të kryer daljen nga burgu, lehtësimin nga akuzat e deri tek lirimi prej tyre. Me lekë, miqësi apo me çfarëdo qoftë. Presioni i Berishës po bën punë, po kryen punë te drejtësia e re. Njëherësh po e zhyt akoma më tej këtë drejtësi, e cila e ka të vështirë të merret në mënyrë lineare me familjen Berisha, të shpallur ‘non grata’ familjarisht në SHBA e Britaninë e Madhe për korrupsion madhor, minim të demokracisë, shantazhim të drejtësisë dhe lidhje me elementët kriminalë.

Praktikisht drejtësia e re është nën ndikimin e humorit të keq të Berishës, dhe ndjehet e detyruar që ta marrë me të mirë atë, që të mos vihet nën presionin e sulmeve dhe të kërcënimeve, ta ‘llastojë’ deri në atë farë mase, sa të shkelë e parimin bazë mbi të cilin është ngritur kjo drejtësi: dhënia fund e pandëshkueshmërisë së zyrtarëve të lartë dhe trajtimi i të gjithë qytetarëve si të barabartë përballë ligjit. Deri më tani kjo drejtësia e barabartë nuk ka ndodhur, pasi dhe dikush që ka ngritur një çati pa leje diku në ndonjë cep qyteti apo katundi, është plasur në burg dhe është hetuar, gjykuar e ka marrë vendimin brenda qelisë.

Ndërkohë që askush nuk duhet të pretendojë nga kjo e hënë se SPAK do t’i bjerë pas dhe do të hetojë se nga kanë dalë të ardhurat për blerjen  e banesave nga vajza e Berishës në kryeqytetet më të mëdha të Evropës. E ka pranuar vetë se i ka blerë, me pagesa përmes sistemit bankar!  Me gjithë këto ‘llastime’ nga SPAK e GJKKO, ajo që na vjen në majë të gjuhës të themi është: ‘paç fatin e Berishës dhe familjarëv e të tij”!

Nga Jakin Marena

Ka një të vërtetë të habitshme në tërë këto vite në historikun e Partisë Demokratike, parti e cila ndryshoi selinë para se të humbiste pushtetin në zgjedhjet parlamentare të vitit 2013! Nuk po merremi me faktin se si u kalua ish godina e SHQUP-it buzë Lanës, nga pronësia e Ministrisë së Mbrojtjes, tek subjekti politik asokohe në pushtet, Partia Demokratike.

Nuk po i hyjmë as ‘formulës’ së shpejtësisë me të cilën u mor vendimi për këtë kalim të kësaj godine nga Mbrojtja, tek PD, as lëvizjen gjeneralëve që e firmosën me nxitim, madje as lëvizjen e administratës së SHQUP po me nxitim dhe kalimin e saj në ambiente aspak komode për të. E mbi të gjitha nuk po analizojmë as pritshmëritë e poseduesve të rinj të kësaj godine, e shquar për hapësirat e bollshme e mbi të gjitha për sipërfaqen e bollshme që e rrethonte, pikërisht në kohën kur një projekt si ai i xhamisë së re sapo ishte hedhur në tregun mediatik për t’u diskutuar e që mund të shtrihej deri në kufijtë e kësaj godine. Këto po i lëmë mënjanë, s’po i diskutojmë, pasi janë diskutuar mjaft!

Për hir të së vërtetës, përpos shërbimit ndaj Ministrisë së Mbrojtjes, ambientet e SHQUP-it të asaj kohe shërbenin dhe për veteranët e luftës, si dhe për shoqatat e ndryshme që kishin të bënin me veteranët. Shërbente për aktivitete në raste përvjetoresh, për aktivitete në raste promovimi librash, por dhe për të organizuar në ambientet e kësaj godine ceremonitë mortore për veteranët që ndaheshin nga jeta. Ishte një ‘nyje’ takimi, me një fjalë, ku veteranët, ata anti-komunistë por dhe ata të Luftës Antifashiste Nacionalçlirimtare, takoheshin me njëri tjetrin, për aktivitete të ndryshme por dhe për t’i dhënë lamtumirën njëri tjetrit, në rastin e ndarjes nga jeta. Dhe ky ka qënë dhe një nga funksionet e selisë së sotme të PD, para se ajo të transformohej në seli politike.

Ajo çfarë ka bërë përshtypje, dhe kjo pranohet dhe nëpër koridoret e selisë së PD, është fakti se që në momentin kur lidershipi, strukturat e administrata e PD ka shkelur dhe është akomoduar në selinë e re buzë Lanës, punët në këtë parti kanë ecur sëprapthi, pa asnjë rezultat pozitiv. Përkundrazi, që nga ai moment ka filluar rrënimi dhe fundi i partisë së parë opozitare në vend. Për të kaluar të terma konkretë, PD që me kalimin në selinë e re buzën Lanës humbi rëndë në zgjedhjet e verës së vitit 2013, duke marrë mbi një milion vota kundër, duke dorëzuar pushtetin në duart e kreut të atërhershëm të opozitës Edi Rama. I cili vijon të qeverisë edhe sot e kësaj dite, me një parashikim të dakordësuar pothuajse nga të gjithë se do të largohet nga pushteti vetëm kur të vendosë vetë ai. Pra kur të ketë vendosur flamurin shqiptar në tryezën e BE, me Shqipërinë si vend anëtar të Bashkimit Evropian! Atëherë e ka lënë Rama ‘shenjën’ në histori, por dhe pasi të ketë vënë në vijë tërë punët e tjera, për një Shqipëri me të vërtetë moderne!

Por PD ka humbur zgjedhjet vendore të vitit 2015, ka humbur zgjedhjet parlamentare të vitit 2017, ka djegur mandatin e deputetëve duke shënuar rrënimin total të saj, pasi doli jashtë sistemit në vitin 2019, për t’i vënë ‘vulën’ me bojkotin e zgjedhjeve vendore po të vitit 2019 pasi i ka lënë tërë hapësirën e pushtetit vendor mazhorancës socialiste. Njëherësh PD ka humbur zgjedhjet parlamentare të vitit 2021, zgjedhjet e fundit të drejtuara nga Basha. Por PD, ka humbur thellë zgjedhjet vendore të vitit 2023 me fitimin e vetëm 6 bashkive relativisht të vogla e periferike. Dhe ‘qershia mbi tortë’, për të ardhur në humbjen e rëndë në zgjedhjet parlamentare të 11 majit të këtij viti, ku opozita e drejtuar nga Berisha kryetar i PD mori vetëm 50 mandate bashkë me aleatët, ndërsa Rama mori plot 83 mandate, e ku bashkë me PSD shkon në 86 mandate, shumica e nevojshme e cilësuar për ligje të rëndësishme, pa hasur në kërkesat për pazar të opozitës. Të gjitha këto ngjarje ndodhën, me PD në selinë e re buzë Lanës.

Por me kalimin në selinë e re të demokratëve kanë ndodhur dhe ngjarje të tjera të pazakonta, si ajo e organizimit të zgjedhjes së kryetarit të PD sipas parimit ‘një anëtar një votë’ pas dorëheqjes fiktive të Berishës nga posti i kryetarit më 2013. Gara u la e hapur për Lulzim Bashën, i cili teksa kishte mbështetjen totale të Berishës si trashëgimtar dhe ‘bir’ politik i tij, kishte përballë Sokol Olldashin një politikan race të djathtë, i bërë vetë pasi kishte ardhur nga radhët e gazetarisë, që bëri një fushatë brilante. Fatkeqësisht ishte në një garë ku fituesi ishte paravendosur, fitoi Basha që mbështetej nga Berisha. Olldashi humbi përballë Bashës, por ishte aty me qëndrimet e tij të forta në Kuvend, në opozitë e përballë atyre që kishin uzurpuar lidershipin e PD. Kishte dhe mbështetës, poltikanë të rinj por me karrierë dhe kredeciale serioze për të qënë lidership i PD.

Vetëm disa muaj më vonë, më 20 nëntor 2013 Sokol Olldashi humbi dhe jetën, në një aksident misterioz automobilistik në aksin rrugor Tiranë-Elbasan, pikërisht në rrugën të cilën e kishte nisur dhe ndërtuar vetë, sa kohë ishte ministër i Transporteve në qeverinë e Berishës. Edhe sot ka mbetur mister largimi i tij tragjik nga jeta, por ajo që dimë është se ky largim, përpos që krijoi një farë lehtësimi tek lidershipi i ri i PD, i cili e shihte si kërcënim për marrjen e kreut të partisë në rastin e humbjeve të mëpastajme zgjedhore, njëherësh krijoi edhe një boshllëk të madh në PD, boshllëk që nuk po arrin të mbushet asnjëherë, teksa fatet e partisë më të madhe opozitare tashmë kanë mbetur në duart e një 81 vjeçari si Sali Berisha, i rikthyer pas armiqësimit për vdekje me Bashën, të cilin e përzuri nga partia, pasi më parë ‘biri’ politik e kishte përjashtuar nga PD, pas shpalljes ‘non grata’ nga SHBA.

Mungesën e Olldashit vijon ta ndjejë përditë PD, e cila nuk po gjen një lidership të ri, që të ndahet njëherë e mirë nga berishizmi dhe të bëjë PD-në një alternativë serioze për të ardhur në pushtet. Ata që mund të merrnin ‘stafetën’ e drejtimit u përjashtuan më herët, me urdhër të Berishës dhe me firmën e Bashës, duke filluar nga Astrit Patozi, Majlinda Bregu dhe një sërë figurash të tjera që i kishin dhënë tonin politikës në partinë më të madhe opozitare, por dhe politikës shqiptare në tërësi. Megjithëse ishin të rinj!
Por që nga viti 2013 kur PD erdhi te selia e re buzë Lanës, kanë ndodhur edhe ngjarje të tjera aspak dinjitoze për një parti politike.

Madje të pandodhura kurrë më parë! Për të arritur pikën kulminante më 8 janar 2022, kur Berisha në krye të ‘Rithemelimit’, në krye të mbështetësve të tij të ‘armatosur’ me qysqi, varre, shkopinj dhe mjete të tjera rrethanore sulmoi selinë e PD që ishte në ‘zotërimin’ e Bashës kryetar i pjesës zyrtare të partisë, me qëllimin e vetëm për ta pushtuar me forcë. Rezistoi për momentin selia e PD që të mos binte në duart e ‘armikut’ Berisha, pasi ishin blinduar dyer e dritare nga Basha si masë paraprake, pasi doli dhe Salianji me shkop në dorë për mbrojtjen e selisë, si dhe falë ndërhyrjes së policisë më vonë, për t’u ‘pushtuar’ më pas disa muaj më vonë pa ‘luftë’ po nga Berisha, i cili e mori ‘paketë’ si ‘dhuratë’ nga Bardhi, bashkë dhe me vetë Gazin e grupin e deputetëve mbështetës të tij, brenda.

Pra, periudha prej mbi 12 vitesh e kalimit të PD në selinë e re buzë Lanës ka qënë një ‘gropë’ më vete, e shoqëruar me përplasje të forta brenda partisë, përjashtime të figurave kryesore nga partia, përplasjeve me dhunë për selinë e PD, e deri dhe humbje jete të njerëzve të fortë të kësaj partie në aksidente të pamundura automobilistike, aq sa u ka dhënë ‘jetë’ teorive konspirative, sipas të cilave selia e re është si një vend ‘vakëf’ ku nuk bën hajr asgjë, sado të përpiqesh. Nuk përjashtohen zërat në PD, të cilët thonë se këtë parti e zuri ‘mallkimi’ i Sokol Olldashit, njeriut të vetëm adapt që mund të kishte shpëtuar PD nga rrënimi që po i ndodh përditë deri më sot. Për ta bërë një alternativë pushteti, por Berisha ia mohoi këtë mundësi, duke investuar tek Lulzim Basha, si një njeri i lakueshëm e i dëgjueshëm, paçka se ishte një investim i shkuar dëm!

Njëherësh zërat ‘supersticiozë’, teksa e cilësojnë selinë e re të PD si vend ‘vakëf’, ku kryheshin dhe ritet mortore për veteranët, thonë se këtë parti e ka zënë edhe ‘mallkimi’ i veteranëve, çka  është e pamundur të ketë dërman as në të ardhmen. Poshtë e më poshtë do të bjerë, sipas tyre! Madje as vizitat dhe luetjet e shpeshta të Bashës tek Kisha e Shën Ndout në Laç, para zgjedhjeve të vitit 2021 dhe para sulmit të Berishës mbi selinë e PD më 8 janar, një vit më vonë nuk dhanë rezultat! Vizitat e Bashës dhe lutjet tek kisha e vjetër çudibërëse janë bërë dhe publike, janë të botuara në media në atë periudhë! Berishën nuk e akuzojmë dot, pasi ai është atesist, i pafe dhe nuk shkon as në kishte dhe as në xhami! Eshtë njeriu i ri-tipik i krijuar nga Enver Hoxha!

Por, pavarësisht këtyre zërave konspirativë dhe supersticiozë që e lidhin rrënimin e PD-së me mallkimin e Olldashit dhe të veteranëve, jemi të bindur se e vërteta e kulluar është që PD nuk do të bëjë hajr jo vetëm në zgjedhjet e vitit 2029, por as në zgjedhjet e vitit 2033, pasi ka në krye të saj mallkimin e vetëm që ka pasur që në krye të herës, Berishën. Ai është burimi i të gjitha të këqijave në këtë parti, dhe parashikohet që do të shkojë drejt ‘amëshimit’ sëbashku me të! Do ta marrë me vete dhe PD-më me një fjalë! Këtu do të jemi, dhe do ta shohim!

Nga Jakin Marena

Sali Berisha u mundua që lobimin me vlerën e ‘kripur’ prej 6 milionë dollarësh me një kompani amerikane ta paraqiste para zgjedhjeve si një risi për rregullimin e marrëdhënieve me SHBA, por pas 11 majit i është kthyer në një bumerang të madh.

Jo se deshi ta bënte publike para zgjedhjeve marrëveshjen lobuese, por meqë kontrata u zbulua nga media dhe u pasqyrua me të gjitha detajet e mundshme për publikun, lidershipi demokrat tentoi që të rikuperonte dëmin duke e paraqitur si një fakt të kryer se SHBA është në anën e PD dhe mezi pret që Sali Berisha, ‘sherifi i ri’ në qytet të marrë drejtimin e qeverisë së re shqiptare.

Madje kreu i PD filloi ta përcillte dhe për militantët e tij këtë perceptim të realitetit paralel dhe të ‘përmbysur’, teksa nisi të imitonte në fushatën e zgjedhjeve të 11 majit të opozitës, pikë për pikë veshjen, fjalorin dhe sjelljen e Donald Trump gjatë fushatës së tij presidenciale, përmes të cilës ai mundi të rikthehej në Shtëpinë e Bardhë, pas 4 vitesh pauzë, me presidencën e Biden!

Berisha filloi të shpeshtonte daljet publike me ish drejtuesin e fushatës së Donald Trump, të kontraktuarin nga PD për fushatën e 11 majit të opozitës, Chris LaCivita, vuri një kapele në kokë si të Trump, deklarohej me të njejtin fjalor si presidenti amerikan dhe shprehej me fjalët madje imitonte dhe gjestikulacionet e tij, teksa deklarohej kunder Sorosit e komunistëve në Shqipëri, të cilët i kërcënonte se do të largoheshin patjetër nga pushteti më 11 maj!

Për më tepër që Berisha nisi ta quante vetën “sherifi i ri’ që do të vinte në në qeverisje së shpejti, në përqasje të etiketimit që zv.presidenti amerikan i bëri Trump teksa fliste në Bruksel përballë liderëve evropianë, ku nënvizoi se ‘tashmë ka një sherif të ri në Uashington”.

S’dimë saktësisht nëse vetë Berisha e besonte atë që thoshte, por mënyra se si sillej dukej se i pëlqente ta quanin ‘sherifi i ri’ i Shqipërisë. Por të sigurtë jemi se ithtarët e tij në kupolën e PD, përfshirë dhe ata që shkonin e vinin në Uashington, e besonin 100% se Berisha ishte ‘sherifi i ri’ i Shqipërisë pas 11 majit! Madje shkriheshin kur e thonin këtë!

Dhe si për ta bërë më të besueshëm slloganin ‘sherifi i ri në qytet’, Berisha ka pozuar me një kapele alla-kaubojsi, që e mori si dhuratë nga një shqiptaro-amerikan nga Teksasi, Lodovik Tetaj. Ndonjë kapele, ndonjë flamur të ‘ruajtur motit’ dhurojnë ata, janë patriotë. Nuk japin lekë diaspora jonë në Amerikë për qamet, pasi nuk duan të na ‘mësojnë keq’. Fundja s’kanë dhënë kurrë për 35 vite me radhë, të kuptohemi, dhe se kanë për inat, por nuk e kanë zanat këtë punë!

“Sherifi i ri në qytet”, shkruan Berisha, teksa shfaqet me kapele kaubojsi. Pra, me sa duket Berishës i dukej vetja vetja si “sherifi i ri” i Shqipërisë, meqë po ndiqte dhe imitonte pas asnjë ndryshim, Donald Trump-in në veprimet e tij. Imagjino se si i duket flamur Nokës, Albana Vokshi e deri tek Agron Gjekmarkaj. Jo vetëm sherif por dhe luan e shkuar luanit!

Rezultati i zgjedhjeve të 11 majit dihet tashmë, nuk ka nevojë për komente të mëtejshme. Edi Rama dhe PS fituan 83 deputetë, plot 9 mandate më shumë se në zgjedhjet e vitit 2021. PD dhe koalicioni i udhëhequr nga Sali Berisha shënoi një humbje rrënuese, duke marrë vetëm 50 deputetë, ndërsa socialistët bashkë me aleatin hipotetik PSD, kalojnë shumicën e cilësuar, me plot 86 deputetë, pa pasur asnjë nevojë për të kërkuar votat e opozitës për ligje të rëndësishme. Madje as rinumërimi në Tiranë e kudo i kërkuar nga Berisha s’ndryshoi rezultatin. Përkundrazi i hoqi dhe disa vota që ishin hedhur tepër për PD nga numëruesit, gabime njerëzore këto!

Berisha jo vetëm që nuk u bë ‘sherifi i ri’ i Shqipërisë, sipas përqasjes imituese me etiketimet për Trump, por tashmë rrezikon shpërbërjen e PD, e cila është në mandatin e katërt rresht në opozitë dhe nëse respektohet neni ‘Basha’, Berisha duhej të kishte ikur që më 12 maj nga posti i kryetarit të PD. Gjë që nuk do ta bëjë kurrë, pasi nuk e lëshon ‘pronën’ e tij Berisha, spese e zvogëloi kaq shumë vetëm e vetëm që të kishte ‘paketën kontrolluese’ të opozitës! Që vështirë ta mbajë gjatë!

Jo vetëm që nuk fitoi zgjedhjet Berisha, por tërë përpjekjet e tij për t’u paraqitur si zgjedhje e SHBA dhe Donald Trump për kryepartner në Shqipëri, i janë kthyer në bumerang të madh! E themi këtë sepse, tani pas humbjes rrënuese të zgjedhjeve të 11 majit, për ‘sherifin e ri’ në tentativë kanë nisur problemet me drejtësinë për lobimin prej 6 milionë dollarësh në SHBA.

Raportohet se SPAK ka nisur hetimet për çështjen e kontratës së lobimit për llogari të PD nga një fondacion amerikan. Nga Prokuroria e Posaçme nuk sqarohet se çfarë elementësh e kanë bindur që nga faza e verifikimeve të kalojë në hetim, por ajo që dihet është se procedimi penal mban numrin 143, ndaj prokuroria ka kërkuar ta pasurojë këtë çështje me kontratën e lobimit. Për të siguruar këtë dokument Altin Dumani i ka kërkuar zyrtarisht PD-së që t’i vendosë kontratën në dispozicion, fakt i konfirmuar fundjavën e kaluar nga Flamur Noka, i cili nuk ishte thirrur për këtë hetim, por për krimet zgjedhore të 11 majit të kallëzuara nga demokratët.

“PD ka bërë transparencë të plotë, kemi vënë çdo gjë në dispozicion s’kemi gjë për të fshehur”, u shpreh Noka për mediat. Kontrata me një kompani amerikane në Uashington me vlerë 6 milionë dollarë e për një afat 2-vjeçar u nënshkrua në 4 prill 2025. Si firmosës në Shqipëri ishte sekretari i përgjithshëm i PD, Flamur Noka dhe si garant në SHBA një shtetas i identifikuar si Nuredin Seci, një tropojan 72 vjeçar, emigrant i vonë ky, i cili tërë jetën e tij ka punuar elektricist dhe që ka emigruar në Amerikë për një jetë më të mirë.
Demokratët pretendojnë se ka qenë komuniteti shqiptaro-amerikan ai që përmes fondacionit “Make Albania Great Again” kishte kontraktuar kompaninë “Continental” për të ndihmuar në konsolidimin e marrëdhënieve të PD. Pa përmendur emra dhe pa zbardhur listën e ‘donatorëve’ të këtij fondacioni, që kanë vënë ‘dorën në zemër’ dhe kanë hedhur 6 milionë dollarë për t’i hequr ‘non gratën’ Berishës. Por ama garanti, me sa dimë nga praktika për marrëveshjet deri nga më të thjeshtat, ka për detyrë që të mbulojë pagesat nëse firmatari i kontratës së subjektit, në rastin konkret Flamur Noka në emër të PD, refuzon të paguajë paratë sipas marrëveshjes nga pamundësia apo nga karshillëku! Është pengu mes palëve për të bërë likujdimet sipas rastit të bllokimit. Pikërisht atëherë hyn në lojë garanti, i cili sikurse thonë gojët e liga është një emigrant i zakonshëm që jeton në kushtet e mbijetesës. Pra copë copës sipas standardit amerikan!

Por hetimi me sa duket ka nisur që herët. Pasi mësohet se menjëherë pasi u bënë publike të dhënat e kësaj marrëveshjeje lobimi në SHBA të PD, pa kaluar shumë orë në 24 prill, SPAK njoftoi nisjen e verifikimeve. Kjo çështje mbeti me këtë status deri në 28 maj kur SPAK kreu lëvizjen e parë dhe i dërgoi kërkesën Flamur Nokës si sekretar i përgjithshëm i PD. Në mes të muajit qershor SPAK ka administruar të dhënat dokumentare të PD, që siç konfirmohet nga burime zyrtare po kryhen tashmë në kuadër të procedimit penal. Dhe hetimet do të vijojnë, pasi Noka është thjeshtë dora zyrtare, pas tij dihet kush vepron. Është vetë Sali Berisha. Pasi dhe sot Berisha nuk u paraqit në GJKKO për gjyqin e aferës “Partizani’. Madje anuloi dhe konferencën e përditshme të shtypit të orës 12.00 ku ‘denonconte’ vjedhjen e votës. Ka nisur të mos lëvizë më vërdallë, derisa të qetësohet situata të kuptohemi! “Sherifat” zhduken nga qarkullimi ndonjëherë!

Por duhet të jemi të sinqertë. Kur vjen puna tek hetimi dhe gjykimi i i Berishës nga ana e SPAK dhe GJKKO, nuk është thënë se mund të jemi entuziastë se kjo çështje do të shkojë në fund. Kemi parë se si zvarriten çështjet që kanë lidhje me Berishën, duke filluar nga ’21 janari’, dosje që erdhi e gatshme nga Gjykata e Strasburgut, tek “Gërdeci”, hetimi i pasurisë dhe tashmë tek hetimi dhe gjykimi i aferës “Partizani”.

Edhe këtë të hënë ndodhi e çuditshmja, fletëthirrjen për seancën e sotme të gjykimit nuk guxoi askush t’ia dërgonte Berishës në dorë, megjithëse është në liri të plotë dhe mund t’ia dërgonin tek selia buzë Lanës apo në shtëpi, por ia dorëzuan dhëndërit të tij Jamarbër Malltezi që është në arrest shtëpie, në të njejtin pallat me Berishën. Por që nuk e kishte ‘parë’ vjehrrin fare këto javët e fundit! Pasi këtë të hënë ai deklaroi në sallën e gjyqit se nuk e kishte njoftuar vjehrrin Berisha. Janë zvarritje ordinere këto, duke hequr ditë pas dite nga një ‘tullë’ në besueshmërinë e drejtësisë së re tek qytetarët. E cila në perceptimin e shqiptarëve u ngrit për të futur Berishën, Metën dhe bashkëqeverisësit e tyre në burg në krye të herës, dhe pastaj për të burgosur të gjithë abuzuesit në qeverisjen e Edi Ramës. Këta të drejtësisë së re e filluan nga e fundit. Punë e tyre.

Por ne duhet të jemi të sinqertë me veten sëpaku, s’kemi fort shpresë as që këtij hetimit të kontratës së re të lobimit prej 6 milionë dollarësh të PD me një kompani në SHBA për të hequr ‘non gratën’ e Berishës e për t’i siguruar një vizë për të kaluar përtej Atlantikut, SPAK do t’i shkojë deri në fund. Apo ‘larg qoftë’ të fillojë të hetojë vetë për kontratën me LaCivitën dhe të tjera, që thuhet se arrijnë dhe këto në 20 milionë dollarë, as që e shkojmë nëpër mend. Thjeshtë nisi ky hetim, që mund të vijojë pafund, e që mund të shërbejë si një statistikë pune për vetë SPAK-un. Që tashmë ka nisur të ecë dhe ai me perceptim dhe jo me rezultate. Kasaveti ynë ky.

Megjithatë, drejtësia sëpaku formalisht është në ‘kërkim’ të ‘sherifit të ri’ në tentativë që po sillet këtej vërdallë në kërkim të një alibie për ta bërë sa më të ‘ëmbël’ humbjen rrënuese në zgjedhjet e 11 majit, me detyrimin për t’i kërkuar hesap për 6 milionë dollarët e lobimit në SHBA. Të presim si do shkojë dhe ky proces hetimi, do të guxojnë ta thërrasin Doktorin për ta pyetur, pasi e kanë një çikë problem këtë. Nuk e dimë nëse është mungesë këllqesh apo dashuri e nostalgji për Berishën ky ngurrim i SPAK. Të presim! Mbështetjen SPAK e ka me pash nga shqiptarët, por ama këllqet dhe dëshirën për zbatimin e ligjit, s’ia ‘injektojmë’ dot! Atë ose e ke ose nuk e ke! Sa për ‘rrjedhje’ informacioni nga SPAK për dosjen e Berishës, harrojeni. Nuk ndodh kurrë, s’ka fletë selektive të selektuara me ngjyrë të verdhë si për dosjet e tjera, sidomos të mazhorancës, që dalin si rastësisht në media. Madje dhe sa herë janë kollitur zyrtarët nën hetim, që janë pyetur!

Nga Jakin Marena

Pyetja që mund t’ju drejtohet rëndom ‘skifterëve’ të Sali Berishës, të cilët bënë ‘varravingo’ për muaj të tërë nga Tirana në Uashington dhe anasjellas është shumë e thjeshtë por domethënëse: E hoqët ‘non gratën’ e liderit të PD?!

Apo, pyetja që vërtitet në mendjen e të gjithë shqiptarëve për të dërguarit e kreut të PD është akoma më e thjeshtë: kur do të udhëtojë Berisha përtej Atlantikut, për në SHBA, qoftë dhe me një vizë turistike apo vizë të sanksionuar për të marrë pjesë në një institucion ndërkombëtar, me seli në tokën amerikane! Nuk po pyesim se sa lekë kanë kushtuar këto udhëtime në grup!

Nëpër mediume, deklarata publike dhe panele televizive këta ‘emisarë’ e kishin bërë si të sigurtë heqjen e ‘non gratës’ nga administrata e presidentit Trump, pasi sipas tyre vendimi ishte marrë në mënyrë abuzive e me lobim të Edi Ramës e Sorosit nga administrata paraardhëse e ish presidentit Joe Biden. Përcaktohej si fakt i kryer ky vendim i Trump për shuarjen e ‘non gratës’!

Këto premtime ishin para zgjedhjeve të 11 majit të këtij viti. Madje dhe u pagua goxha rëndë për të marrë qoftë dhe një vizë nga SHBA për Berishën në prag të 11 majit, gjë që nuk ndodhi. Plot 6 milionë dollarët e hedhur për të lobuar për një vizë, dhanë një produkt tepër të vobektë: një postim të një gazetari që kishte marrë opiion nga një zyrtar pa emër në DASH i cili i shpjegonte se si e përfitojnë vizën ‘non gratat’ në SHBA. Informacion që merret pa lekë në faqen e DASH.

Nuk po i hyjmë faktit se ku i ka gjetur këto miliona dollarë Berisha për të lobuar për heqjen e ‘non gratës’ apo për një vizë fundja për të udhëtuar drejt SHBA. Sa për sy e faqe të paktën! Sepse ai elektricisti tropojan nuk besojmë se ka mbledhur 6 milionë dollarë, pjesa e dukshme themi pasi nëpër koridoret e PD thuhet se janë afër 20 milionë dollarë të hedhura me gjithë pagesën e drejtuesit të fushatës së PD, Chris LaCivita. Ndoshta ky elektricist mund ta kishte dëshirën, por nuk e ka pasur dhe as nuk e ka takatin vetë, madje as rrethin shoqëror, për të mbledhur një shumë kaq tronditëse parash, të destinuara për të rregulluar marrëdhëniet e Berishës me SHBA. Pasi PD i kishte në rregull marrëdhëniet me Uashingtonin, madje pa kokërr leku fare, para se të merrte Berisha vulën e logon e saj. Pas këtij akti ato u bllokuan!

Teksa Berisha dhe mbështetësit e tij ishin në pritje të ‘zbarkimit të aleatëve’ për të ‘shporrur regjimin dhe narkoshtetin e Edi Ramës, e njeriut të Sorosit në Shqipëri’, në mënyrë të papritur nga Uashingtoni mbërriti mandata. Që u preu krahët përfundimisht, jo se nuk e dinin se kështu do të ndodhte, por sepse deri më tani ishte mbajtur e fshehtë për militantët e thekur, pas humbjes rrënuese më 11 maj, të paktën sa për të kaluar rehat këtë verë të nxehtë post-zgjedhjesh’.

Teksa Berisha dhe ithtarët e tij ishin në delir pas botimit të një opinioni të Agim Neshos në një media amerikane me të cilin ‘kishte tronditur Ramën’, me sa duket pjesë e ‘paketës’ së lobimit në SHBA e paguar me afër 20 milionë dollarë, papritur vjen lajmi për një urdhër që kishte nxjerrë presidenti Donald Trump. Se diçka kishte tronditur Berishën u pa që në konferencën e shtypit me gazetarët, ku lideri demokrat nuk ‘thithte’ fare dhe ngatërroi e bëri lëmsh dy mediat shqiptare me median amerikane. S’orientohej fare. Me sa duket ishte tronditur me themel Berisha dhe nuk kishte faj. Lajmi i keq nuk përballohet në këtë moshë, aq më tepër kur ke investuar 20 milionë dollarë për të marrë një vizë për në SHBA, ndërsa në këmbim merr një goditje të fortë për një njeri që s’ka kohë për të pritur, pasi është mbi 81 vjeç!

Lajmi kishte mbërritur ndoshta sëpari te Berisha, më i interesuari për çfarë ndodh në Uashington dhe që ka lidhje me Ballkanin! Pra njeri më në hall në këtë vend! Mandata kishte të bënte me faktin se Trump shtyu me një vit urdhërin ekzekutiv për gjendjen emergjente në Ballkanin Perëndimor, ku përmenden edhe individët e korruptuar. Në njoftim, përmendeshin dhe individë që kanë minuar sundimin e ligjit e demokracinë, si një referencë për politikanët që janë shpallur ‘non grata’, mes të cilëve ‘shkëlqen’ dhe Sali Berisha. Pas armëpushimit mes Iranit dhe Izraelit, Presidenti i SHBA, me këtë vendim Trump riktheu ankthin në radhët e politikës shqiptare, pasi shumë prej politikanëve ndihen të pasigurt, ndërsa u erdhi ky mesazh i fortë nga Uashingtoni.

Trump ka vendosur të mbajë në fuqi urdhrin ekzekutiv për Ballkanin Perëndimor, i shpallur fillimisht në vitin 2001 dhe i përditësuar në vitet 2003, 2021 dhe 2025. Në vitin 2021, gjatë presidencës së Biden, Shqipëria u përfshi për herë të parë në këtë urdhër, duke u renditur në të njëjtin grup me vendet e tjera të rajonit dhe disa ish-republika sovjetike. Ky vendim erdhi pas shpalljes “non grata” të Berishës dhe u konsiderua një mesazh i drejtpërdrejtë për zyrtarët e korruptuar. Dekreti i 2021 parashikonte masa ndëshkimore ndaj individëve që cënojnë paqen e stabilitetin në Ballkan, përmes sanksioneve dhe shpalljeve “non grata”.
Në janar 2025, pak ditë para se të largohej nga detyra, presidenti Biden ndërmori ndryshime të tjera, duke përfshirë edhe bllokimin e pasurive në SHBA për zyrtarët nga Ballkani që zotërojnë prona atje. Presidenti Trump nuk ka ndryshuar asgjë nga këto akte dhe ka vendosur të mbajë në fuqi të gjitha masat e miratuara nga administrata e mëparshme e Biden.

Vendimi i Trump është një goditje për Berishën dhe mbështetësit e tij, të cilët kishin shpresuar se me rikthimin e Trump në pushtet, statusi “non grata” do të zhbëhej. Jo vetëm që nuk ndodhi, por mesazhi është se mund të ketë edhe masa të tjera. Por që në fund të herës, Trump me vendimin e tij të ditëve të fundit jo vetëm që e vulosi përfundimisht mbajtjen në fuqi të ‘non gratës’ për Berishën e familjen e tij, por e çimentoi përfundimisht këtë vendim sanksionimi, çka paralajmëron se sanksionimi për kreun e PD dhe familjarët e tij do të vijojë në pafundësi!

Mbi të gjitha administrata e Trump me këtë vendim tregoi qartë se askush nuk mund të blejë me para Amerikën, sikurse pretendoi Berisha dhe mbështetësit e tij teksa hodhën miliona dollarë si lobim për blerjen e vendimit për heqjen e “non gratas’ apo të një vize për SHBA. Ndoshta krijimi i një opinioni të tillë se Amerikën mund ta blejë kushdo që ka para, ka ndikuar në përshpejtimin e marrjes së vendimit të Trump për të lënë përfundimisht Berishën person ‘non grata’ në SHBA.

Veprimi i fundit i Trump konfirmon se qëndrimi i Uashingtonit për Ballkanin mbetet konstant, pavarësisht ndryshimeve në administratë, dhe se frika për ndëshkim nuk duhet të largohet nga asnjë aktor i politikës shqiptare. Dhe një ditë pasi Trump shtyu me një vit urdhrin ekzekutiv për gjendjen emergjente në Ballkanin Perëndimor, ku përmenden edhe individët e korruptuar, kreu i PD Berisha bënte sikur nuk kuptonte, teksa iu shmang pyetjes së gazetarëve.

Teksa u pyet për këtë vendim të administratës amerikane e presidentit Trump, Berisha deklaroi se SHBA nuk e ka me të, por sipas tij një vendim i tillë ka ardhur për shkak të karteleve të drogës dhe qeverisë Rama. Pra, sipas Berishës Trump e ka me Ramën! “Ramaduro. Çfarë komenti tjetër do. Tre ditë para kryeministri i Shqipërisë nga media kryesore numër një e SHBA u damkos Ramaduro. Tre javë më parë një zyrtar i lartë i departamentit të drejtësisë solli këtu mesazhin e ministrit të drejtësisë së SHBA, apo prokurorit të përgjithshëm, me të cilin kërkon që Shqipëria të merret me kartelet e saj të drogës. Por për këtë bien këto kambana? A është folur ndonjëherë për kartele droge? Nuk është folur kurrë. A është cilësuar ndonjëherë Rama Ramaduro, unë e kam cilësuar Noriega. Epiteti im bëri nuk ngjiti Ramaduro në vend. E kapi dhe e shpalli media nr. 1 e botës. Pra si të mos e shpallë Trump Ballkanin një zonë të rrezikshme, kartelet po, Ramaduro po. Të gjitha së bashku”, u shpreh Berisha.

Pas këtij vendimi dramatik për të, Berisha gjen kohën dhe pa iu dridhur syri deklaron se vendimi i Trump s’ka asnjë lidhje me të por me Ramën. Pavarësisht se fliste për të sanksionuarit në rajon, ndonëse pa emër, por ‘non grata’ është shpallur Berisha në SHBA dhe jo Edi Rama! I cili, ka pasur si mysafirë në Shqipëri vajzën e Donald Trump, Invanka Trump të cilësuar nga shumëkush si trashëgimtarja politike e të atit. bashkë dhe dhëndërin Jared Kushner. Do të investojnë miliarda dollarë në ishullin e Sazanit dhe këto ditë u panë duke shijuar pushimet në Vlorë!

Tashmë jo vetëm Berisha por as demokratët nuk kanë më pritshmëri nga SHBA dhe administrata e Trump për të hequr ‘non gratën’ e kreut të PD dhe familjarëve të tij, njëri prej të cilëve mund të trashëgojë dhe PD-në, në momentin kur ‘misioni’ i Berishës mbi tokë përfundon, dhe shkon në ‘gjirin’ e të Plotfuqishmit! Bashkë me të shkon në ‘amëshim’ dhe PD. E cila në çdo palë zgjedhje humb nga 250 mijë votues demokratë. Të paktën në dy zgjedhjet e fundit kështu ka ndodhur!

Duke parë këtë fund të afërt të PD me Berishën kryetar, demokratët kanë nisur të shohin hallet e tyre! Kanë nisur ‘sistemimin’ dhe në administratën shtetërore të drejtuar nga PS dhe Edi Rama. Rasti më konkret është ai i ish kryetarit të PD Vlorë, Genc Deromemaj, i cili u emërua drejtor i Kadastrës së këtij qarku! Ka dhe raste të tjera të braktisjes së madhe, çka tregon se frymëzimi në PD dhe tek opozita ka marrë fund! Sa kohë që të jetë në krye të saj Sali Berisha, tashmë një ‘non grata’ funksional në SHBA dhe nga Trump, kjo PD nuk ka frymë, s’ka ringritje!.

Ndodh që as leku herë herë ‘nuk e hedh ujin përpjetë’, aq më tepër kur ky është lek haram pasi është marrë përmes abuzimit nga paratë e shqiptarëve. Dështimi i Berishës tregoi se kur je i zhytur as milionat e hedhura për lobim dhe për të ndryshuar fatin politik, s’të bëjnë derman. Thjeshtë dhe vetëm po hidhen lekë për të plotësuar tekat e një plaku, të cilit i është mbushur mendja se pa të në krye, nuk ka opozitë në këtë vend. Për fatin e keq të PD dhe fatin e mirë të vendit, PD dhe opozita e këtij modeli do të jetë për shumë e shumë vite larg pushtetit! Është e sigurtë kjo!

Nga Jakin Marena

Brenda Partisë Demokratike ka nisur një përplasje e fortë dhe me pasoja aspak të mira në lidhje me ‘tradhëtinë’ e numëruesve demokratë për zgjedhjet parlamentare të 11 majit të këtij viti.

Numëruesit e PD, të cilët qëndruan me ditë të tëra në përballje me procedurat e gjata dhe të lodhshme të kalimit një më një të fletëve të votimit, akuzohen nga kandidatët demokratë të listës së hapur për deputetë se kanë trafikuar votat nga një kandidat tek tjetri.

Nuk bëhet fjalë të kenë dërguar vota tek kundërshtarët politikë, te kandidatët e PS të Edi Ramës, por kanë bërë një vjedhje me ‘qark të mbyllur’ brenda llojit apo siç thuhet ndryshe brenda ‘shtëpisë’ demokrate, duke kaluar me pa të drejtë vota nga një kandidat i PD tek një kandidat tjetër po i PD.

Ndër të parët që kanë reaguar ishte kandidati i PD në listën e hapur për Tiranën, Ilir Alimehmeti, i cili ndonëse mori mbi 18 mijë vota në Tiranë, rezultoi me dy mijë vota poshtë kandidates po të PD Jorida Tabaku, tashmë deputetja e 13-të e koalicionit opozitar “Për Shqipërinë Madhështore” që pritet të hyjë në Parlament. Me këtë rezultat themi, pasi 12 kandidatët e listës së mbyllur janë automatikisht deputetë sipas ndryshimeve të minutës së fundit në Kodin Zgjedhor, pika e vetme për të cilën këmbënguli PD. Pra për listën e sigurtë ku ‘strehoi’ besnikët e tij që s’marrin kokërr vote në terren, pasi e kanë bërë baltë me kohë e vakt sa nuk durohen, madje as nga demokratët!

Nuk dimë se kë akuzon Alimehmeti, të cilit s’ia nxë goja as ta përmendë Sali Berishën, por që ka pretendime se është mbi Tabakun përsa i përket votave. Pasi në bazë të rezultatit përfundimtar, koalicioni i Berishës ka të drejtë të fusë në Kuvend vetëm një deputet nga lista e hapur në Tiranë. Mandatin e 14-të që ishte gati ta merrte, e fitoi partia “Mundësia” e Agron Shehajt. Praktikisht Alimehmeti pretendimet i ka për Tabakun, dhe jo për t’ia marrë Shehajt, pasi ‘Mundësia’ e ka ‘blinduar’ këtë mandat me mbi 1200 vota. Pretendimet janë shprehur dhe nga ‘kryegjyqtarja’ e PD, Adriana Kalaja e cila akuzon Tabakun se u bë deputete me votat e Ramës dhe të oligarkëve për të poshtëruar Berishën. Kreu demokrat, për hir të së vërtetës bën sikur nuk e ka mendjen.

Kreu i PD ndërhyri për të zbatuar pikën e Kodit sipas të cilit nuk ka ankimime personale për rinumërim, por vetëm në emër të PD. Gjë që partia më e madhe opozitare nuk e ka bërë për asnjë kandidat, megjithëse deklaron se i ka mbështetur kërkesat e tyre. Madje dhe të koalicionit ‘Nisma Shqipëria Bëhet” të Adriatik Llapajt në Fier! Për hir të së vërtetës nëse ka pasur votë të orientuar apo trafik votash në Tiranë apo dhe në tërë Shqipërinë, këtë trafik dhe tjetërsim vote brenda demokratëve askush në PD nuk guxon ta bëjë, pa dijeninë apo urdhërin e Berishës. Gjithsesi KAS vendosi rinumërimin në disa kuti në Tiranë, por rrëzoi kërkesat e Alimehmetit në Tiranë por dhe të Aulon Kalasë në qarkun e Durrësit si dhe të tjerëve nëpër qarqe, për rinumërim.

Në fakt Aulon Kalaja u tregua më i ‘shkathët’ dhe e ribëri kërkesën në emër të PLL, anëtare e koalicionit “Madhështor” të Berishës, dhe tashmë do të verifikohet pretendimi i tij për vjedhje votash në favor të ish prokurorit Arjan Ndoja, i cili shpreson që sikurse i shpëtoi plumbit teksa udhëtonte sëbashku me të akuzuarin për krime ‘Rrumin’ e Shijakut, të shpëtojë dhe mandatin e deputetit, që e ka garantuar deri më tani me një fitore të diskutueshme nga lista preferenciale e kandidatëve të PD në qarkun Durrës. Kalaja është i sigurtë se do ta zhbëjë diferencën prej 1 mijë votash që ka me Ndojën, pasi votat e tij, ai pretendon se janë trafikuar në drejtim të ish prokurorit, ndërkohë që është i bindur se  rinumërimi do të nxjerrë në pah atë që ka ndodhur.

KQZ rinumëroi votat edhe në qarkun e Dibrës, kërkesë kjo e kandidatit të PD Xhemal Gjunkshi, i cili pretendoi se votat e tij ishin trafikuar tek kandidati tjetër Përparim Spahiu, ish deputet i ish-LSI. Nuk e kemi kuptuar se përse e bëri këtë ankimim gjenerali i PD-së në Dibër, pasi sipas rezultatit përfundimtar, PD kishte marrë vetëm 2 deputetë aq sa kishte lista e mbyllur. Ndërkohë që kjo ‘beteja’ për votën prefenciale në listën e hapur as që kishte kuptim, dhe sikur gjithë votat e Spahiut t’ia kalonin me konsensus Xhemal Gjunkshit, ky i fundit jashtë se jashtë Kuvendit do të mbetej! Çështje ‘hunde’ me sa duket ka qënë ankimimi, për të treguar se ‘jam më i fortë se ti’.

Ka dhe rinumërim në Fier, ndërkohë që në disa qarqe të tjera, dhe përfaqësuesit e PD në KAS e panë se ishte një gomarllëk i madh të vijohej më tej në këtë mosbesimin e kandidatëve të PD tek numëruesit dhe në akuzat se i kanë vjedhur votat e njëri tjetrit. Pasi dhe rinumërimet deri më tani s’kanë sjellë ndonjë përmbysje rezultati. Mendohet që në Durrës Kalaja mund të ‘përmbysë’ Ndojën, pavarësisht se vota dhe trafikimi i votës ka qënë i orientuar nga lart!

Bie në sy fakti se Berisha nuk ka qënë shumë entuziast në lidhje me këtë rinumërimin e votave të kandidatëve të PD, të cilët akuzojnë njëri tjetrin e bashkë me ta dhe numëruesit demokratë nëpër qendrat e numërimit se kanë trafikuar votën, pasi për kreun demokrat, me rëndësi ka qënë dhe është vetëm goditja e qeverisë dhe e kryeministrit Edi Rama, në funksion të krijimit të alibisë për humbjen e thellë të opozitës në zgjedhje, përmes manipulimit nga ana e mazhorancës.

Madje Berisha e bëri ‘baltë’ deri në Bruksel për të bindur disa krerë partie se ‘narkoshteti’ i Edi Ramës ka vjedhur vullnetin e popullit, nxiu Shqipërinë duke deklaruar publikisht deri aty sa sipas tij ‘Shqipëria nuk e meriton mbylljen e negociatave, vijimin e procesit të anëtarësimit, pasi nuk është gati për të qënë vend anëtar i BE sepse është narko-shtet’. Anipse të gjithë liderët e vendeve më të fuqishme të BE dhe vetë Presidentja e Komisionit Evropian në samitin  e BE të zhvilluar në Tiranë 5 ditë pas zgjedhjeve të 11 majit, e uruan nominalisht Ramën për fitoren më 11 maj, deklaruan rritjen e bashkëpunimit me qeverinë shqiptare si dhe paralajmëruan hapur anëtarësimin e Shipërisë në BE brenda vitit 2030!

Pavarësisht se zbulimi i ‘tradhëtarëve’ brenda numëruesve të PD që kanë trafikuar votën në favor të kandidatëve të caktuar demokratë të listës së hapur, i bërë dhe me dijeninë e tij, Berishës nuk i vjen fort për ‘osh’, kreu demokrat ‘ngushëllohet’ me faktin se ndonëse janë numëruesit e tij që kanë vjedhur votat brenda ‘shtëpisë’ politike dhe jo ata të Ramës, në fund të herës ai tenton që ta bëjë sa më pis procesin zgjedhor të 11 majit me çdo mënyrë që i del para. Anipse janë njerëzit e tij ata që e kanë ndotur aty këtu, duke trafikuar vota nga një kandidat i PD tek tjetri sipas rastit.

Deklaratat e tipit ‘ata që kanë trafikuar votën brenda kandidatëve të PD të hetohen dhe të ndëshkohen sipas ligjit’, apo dhe ankimimet e vetë kandidatëve të PD, të cilët ndonëse e dinë se nuk kanë shanse për një mandat deputeti, këmbëngulin për të gjetur ‘tradhëtarët’ numërues që bënë kalim votash te rivalët brenda partisë, tregojnë qartë se tashmë janë identifikuar ‘armiqtë’ e radhës brenda PD. Ata janë numëruesit ‘tradhëtarë’ të cilët duhen ndëshkuar me burg.

Nuk dimë se sa prej tyre do të plotësojnë kushtet për të qënë objekt i drejtësisë dhe për pasojë për të përfunduar në burg, por ajo që po shikojmë ditë pas dite është fakti se ‘saga’ e përpjekjeve për delegjitim të zgjedhjeve përmes akuzave ndaj ‘narko-shtetit të Ramës’ për tjetërsimin e votës dhe marrjen e 33 mandateve shtesë përmes kësaj ‘farse elektorale’ siç shprehet Berisha në Tiranë dhe Bruksel ku shkon për pushime në shtëpinë e vajzës sa herë që lodhet, sidomos pas vënies nën sekuestro të vilës në Gjirin e Lalzit, ka degjeneruar në një luftë brenda llojit kundër numëruesve demokratë të cilët janë shpallur ‘armiq’ nga PD sepse kanë trafikuar votat nga një kandidat te kandidati tjetër i PD.

Dhe në këtë proces linçimi të numëruesve dhe komisionerëve demokratë të zgjedhjeve të 11 majit qëndron një rrezik shumë i madh për PD dhe për vetë opozitën shqiptare: Rreziku i zerimit të shansve për të pasur në zgjedhjet e ardhshme për pushtetin vendor të vitit 2027 dhe ato parlamentare të vitit 2029 mbështetës demokratë që të marrin përsipër rolin e numëruesit e të komisionerit në emër të opozitës. Pasi kanë frikë se përfundojnë në burg, sepse shihen si armiq potencialë nga PD që i ‘kontraktoi’ për të qënë vullnetarë, me atë pagë që kanë sipas ligjit vullnetarë janë, e për pasojë pritet të mos e marrin përsipër këtë detyrë të rëndë në të ardhmen.

Për hir të së vërtetës PD dhe opozita mezi ia doli që të gjente numërues dhe komisionerë për zgjedhjet e 11 majit. Kjo u pa dhe në faktin se nuk kishin zëvendësues, dhe janë detyruar shpesh që të punojnë pa zëvendësues, pra me pushime të gjata. Madje nuk u furnizuan as me ujë dhe ushqim, teksa ishin të ngujuar nëpër qëndrat e votimit apo të numërimit. Kështu që, ekziston rreziku që në zgjedhjet vendore e ato parlamentare opozita të mos gjejë kokërr komisioneri apo numëruesi për ta dërguar në KQZ, dhe për të plotësuar gjysmën e komisionit apo grupeve të numërimit.

Me shpalljen ‘armiq’ të numëruesve dhe komisionerëve të vet, PD dhe Berisha kanë ‘firmosur’ me dashje apo pa dashje futjen e votimit e të numërimit elektronik në të gjithë vendin apo qarqet kryesore. Ndërsa pjesa tjetër mund të mbulohet me komisionerë e numërues juristë, avokatë, gjyqtarë, prokurorë, mësues, etj. Dhe këta të drejtësisë të bëjnë ndonjë punë, se nuk bëhet nami!

Për më tepër që depolitizimi i administratës zgjedhore, me komisionerë e numërues, si dhe votimi e numërimi elektronik janë një kërkesë e kahershme e OSBE/ODIHR dhe pika kryesore e rekomandimeve për çdo palë zgjedhje. Nuk përjashtohet dhe raporti për zgjedhjet e 11 majit, pikërisht këtë kërkesë të përmbajë si pikë kryesore në rekomandimet e radhës!.

Në këtë mënyrë, mazhoranca e drejtuar nga Rama, bashkë dhe me aleatin hipotetik PSD, nuk do të jetë çudi që të jetë e detyruar nga rekomandimet e raportit të vëzhguesve ndërkombëtarë për zgjedhjet e 11 majit, që të bëjë ndryshime në Kodin Zgjedhor për këtë qëllim: depolitizimin e administratës dhe futjen e votimit dhe numërimit elektoronik.

Votat janë në Kuvend. Vetëm vullnet duhet. PD do të japë konsensus, ose do të jetë e detyruar ta pranojë një ndryshim të tillë, jo vetëm se pritet të jetë kërkesë e OSBE/ODIHR por dhe sepse nuk gjen kokërr numëruesi apo komisioneri. I ka shpallur ‘armiq’ të gjithë, sepse kanë vjedhur votën brendapërbrenda PD. Jo se ndodh për herë të parë në këtë parti. Vetëm nëse i drejtohet për ‘ndihmë’ KQZ-së!

Prandaj themi se, tashmë jemi të sigurtë se po shkojmë po të sigurtë drejt një procesi Zgjedhor, me administratë tërësisht jopolitike dhe me votim e numërim elektronik si dhe nxjerrje rezultati të zgjedhjeve në kohë rekord. Ky zhvillim, falë dhe ‘hajdutëve’ të PD, të cilëve duhet t’ua dimë për nder. Çdo e keqe ka dhe një të mirë! Të paktën këtë herë!

Nga Jakin Marena

Kryetari i PD Sali Berisha ka vendosur të shfrytëzojë në maksimum hedhjen e lekëve prej tij për të krijuar një alibi sa më të qendrueshme për humbjen shkatërruese të zgjedhjeve parlamentare më 11 maji të këtij viti.

E kemi nënvizuar dhe herë të tjera, Berisha s’ka asnjë nevojë në fakt për të bërë ndonjë justifikim për humbjen përballë Ramës, pasi nuk ka përballë kujt të justifikohet. Eshtë ‘vetë

Ali dhe vetë kadi’ në PD, dhe askush nuk guxon të ngrejë zërin përballë tij, madje as ta çojë nëpër mend zbatimin e statutit të PD, ku nëse respektohet neni i fiksuar nga vetë Berisha, pra neni ‘Basha’. Praktikisht Berisha nga data 13 maj më sëpaku duhet të thirrej ‘ish kryetari i PD’, pasi s’ka nevojë për ‘salltanete’ të mëdha shkarkimi apo dorëheqja e tij, ai është i shkarkuar automatikisht.

Por Berisha ka deklaruar se është misionar tashmë në PD e misioni i tij në tokë përfundon vetëm atëherë kur ta marrë i Plotfuqishmi në gjirin e vet. Pra përjetësisht. Pasi Berisha ka paralajmëruar se do të jetë kryetar i PD, dhe askush nuk duhet të pretendojë për të marrë drejtimin e kësaj partie. Në radhë janë familjarët e tij, vajza dhe djali, dhe aty mbyllet ‘qarku’ njëherë e mirë, sepse Berisha nuk ka më besim të përsërisë precedentin ‘Basha’ në krye të ‘pronës’ së tij PD.

Tani, problemi është se misionar ka nisur ta quajë veten dhe numri dy i PD, Flamur Noka, duke e bërë akoma më të rëndë situatën në këtë parti.

Atëherë, përse gjithë këto para të hedhura për lobime dhe denoncime e gjithë këto përpjekje të Berishës për të ngritur një alibi për humbjen e zgjedhjeve, kur në të vërtetë thellë thellë ai ka marrë rezultatin më të kënaqshëm të mundshëm, pasi konsolidon veten dhe familjen në krye të opozitës shqiptare, ka plot 50 deputetë në Kuvend nën siglën e tij, dhe ka lënë vetëm 4 deputetë në Kuvend, të cilët janë përfaqësues të opozitës jashtë grupimit të PD që drejton.

Për më tepër që Berisha tashmë, pas përzënies së Lulzim Bashës jo vetëm nga PD por dhe nga Parlamenti, arriti një objektiv madhor për të cilin ishte betuar që në momentin kur Lul Basha e pezulloi nga PD pas shpalljes ‘non grata’ nga qeveria amerikane. Njëherësh arriti dhe objektivin tjetër për të qënë interlokutori i vetëm i opozitës për ndonjë pazar të mundshëm, si dhe për ta përdorur PD-në si mburojë për hallet e tij familjare me drejtësinë dhe përballë SHBA e Britanisë që e kanë shpallur të padëshirueshëm.

Shenjat e para u dhanë, teksa u përzgjodh trupa gjykuese për aferën “Partizani” një përzgjedhje përmes shortit si ‘me dorë’, pasi e kryeson këtë trupë e afërmja e ish deputetes së PD, që ka në krahë dhe dy gjyqtarë të tjerë të ‘vdekur’ për Berishën dhe PD.

Madje njëra prej tyre vijon të jetë e ‘tërbuar’ për padrejtësinë që iu bë Fredi Belerit, krahut të djathtë të Berishës, me burgosjen e tij, për të cilin publikisht nuk ishte dakord që me këto prova që nuk i konsideronte, të mbyllej në burg. Jo më të dënohej. Pra, ‘leku hedh dhe ujin përpjetë’ kanë thënë motit të parët tanë.

Për hir të së vërtetës Berisha ka dy arsye se përse nuk e pranon publikisht rezultatin e zgjedhjeve të 11 majit dhe pse do të vijojë të hedhë vickla deri në shtator kur të bëhet konsitutimi i Kuvendit të ri, ku do të paraqitet dhe do të marrë pjesë në të gjitha seancat e mundshme parlamentare.

Në krye të herës Berisha e ka për forcë zakoni të kundërshtojë, të jetë kundër gjithçkaje. E ka ves këtë punë. Që në rininë e hershme ai nuk ka pranuar asgjë që nuk e ka bërë vetë. Në katund e në shkollë themi, se para Enver Hoxhës rrinte si ‘çeço’ ai, ishte komunist i devotshëm.

Berisha ka refuzuar njohjen e të gjitha humbjeve të veta në zgjedhje. Madje nëse lexon dhe njëherë tekstin e dorëheqjes pas humbjes shokuese të vitit 2013, zgjedhje që i organizoi vetë pasi ishte kryeministër, edhe atëherë akuzonte Ramën, se ‘bashkë me të gjitha qelbësirat’ vodhën e blenë vota me shumicë. Aq më tepër që zgjedhjet që zhvillon kundërshtari i tij politik, as që e çon në mendje t’i njohë në të gjitha herët. E ka fobi një gjë të tillë me sa duket.

Edhe pse për zgjedhjet e 11 majit të këtij viti, të gjithë ‘yjet’ e tregonin se do të shënonte një humbje të thellë në krye të opozitës, të paparë në tërë vitet e lindjes së PD. Pavarësisht lekëve të hedhura. Dhe Berisha e dinte, madje në ambiente të ngushta pas 11 majit, s’ngurronte të thoshte se kishin marrë më shumë se sa pritej mbështetje, me gjendjen në të cilën ka qënë PD këto vitet e fundit!

Duke qënë se Berisha për hir të së vërtetës brenda vetes është më se i kënqur me rezultatin e 11 majit, ka nën hyqëm 50 deputetë të ‘formatuar’ sipas shijeve të tij, u ka ‘montuar’ trurin e tij dhe janë të bindur deri në palcë e të vendosur për të besuar e përtypur të gjitha deklaratat e kryetarit të PD deri dhe ato më absurdet e të një universi paralel dhe jashtë realitetit, arsyeja e kontestimit e përpjekjet për të përbaltur zgjedhjet parlamentare të 11 majit është ligësia e tij.

Berisha është tmerrësisht i lig, dhe gjithnjë ka ecur me moton ‘pas meje, qameti’. Në të gjitha herët, dhe kur e ka rrjepur këtë popull, nuk është mjaftuar me kaq, por në fund të herës i ka vënë dhe zjarrin, herë përmes shkatërrimit të shtetit nga themelet si në vitin 1997 dhe herë duke i pjekur të gjallë shqiptarët si në Gërdec, apo duke i vrarë në protesta, si më 21 janar 2011.

Tani që nuk ka takat që të bëjë asgjë, pasi e ka treguar për tre vite me radhë se nuk i bën dot dy njerëz bashkë për të protestuar jo më të bëjë ndonjë revolucion, të gjithë janë të bindur, edhe në PD e sigurtë, se gjithçka që bën, e bën për interesin e tij personal. Sali Berisha përpiqet me të gjitha mënyrat që ligësinë e tij për të qënë kundër çdo arritjeje të këtij vendi, sado të vogël dhe që s’ka firmën e tij, ta hedhë poshtë përmes deklaratave brenda dhe jashtë vendit.

Nuk është rastësi se pikërisht ditën kur në Tiranë ishin mbledhur samitin e 6-të të Komunitetit Politik Evropian 47 liderët më të rëndësishëm të BE dhe vendeve të tjera evropiane, mes tyre Macron, Merz, Meloni, Starmer dhe Presidentja e Komisionit Evropian Ursula von der Leyen, Presidenti turk Erdogan etj, Berisha iku në Spanjë në një takim partiak duke sulmuar Shqipërinë dhe duke e quajtur narkoshtet e të papërgatitur për të qënë pjesë e BE, ndërsa u kthye në pikun e Samitit për të marrë pjesë në një protestë të vobekët të organizuar prej tij në një cep të Tiranës, kundër ‘vjedhjes së votës’ sipas tij.

Pavarësisht se pjesa më e madhe e liderëve të këtyre partive ishin në Tiranë dhe uronin përzemërsisht Edi Ramën për fitoren e zgjedhjeve të 11 majit.

Por me sa duket Berisha ka zënë ‘karar’ në përhapjen e ligësisë së tij për të tentuar sadopak përbaltjen e Shqipërisë, përmes disa rezulutave partiake të partive të qëndrës së djathtë, listën e të cilave asnjëherë nuk e bëri publike. Të cilat herë miratohen në Abixhan të Bregut të Fildishtë apo në Ulan Bator të Mongolisë, teksa dihet se si miratohen ato! Pavarësisht qëndrimit të liderëve në krye të qeverive respektive, të cilët e kanë ndarë me kohë dhe vakt partinë nga shteti.

Por Berisha këmbëngul dhe ‘sygjestion’ ithtarët e tij me deklaratat se janë miratuar 4 rezoluta të partive të djathta, mes të cilave dhe këto të fundit të IDC-CDI për zgjedhjet parlamentare të 11 majit. Që sipas Berishës është miratuar më datë 30 në Asambleja e Përgjithshme në Abixhan dhe që pason një rezolutë tjetër para zgjedhjeve të 11 majit, a thua kjo “Internacionale” e partive të djathta ka qëndruar e mbledhur dhe e ‘ngrehur’ për një muaj rresht vetëm e vetëm në dizpozicion të PD dhe të kreut të saj ‘non grata’. Sipas Berishës, farsa elektorale u godit nga organizata më e madhe në botë e partive të qendrës dhe qendrës së djathtë, Internacionalja Demokrate e Qendrës.

Dhe Berisha nuk lë rast pa lexuar edhe tekstin e rezolutës, duke thënë se shprehet shqetësim se këto zgjedhje ishin një farsë politike. Ndalur në procesin e integrimit, Berisha thotë se rezoluta i bën thirrje BE-së që të kushtëzojë përparimin e Shqipërisë në procesin e anëtarësimit me reforma konkrete zgjedhore dhe demokratike. “I bën thirrje BE që të kushtëzojë përparimin e Shqipërisë në procesin e anëtarësimit me reforma konkrete zgjedhore dhe demokratike; Paralajmëron se konsolidimi autoritar dhe ndikimi kriminal në Shqipëri përbëjnë rrezik serioz për demokracinë e brendshme dhe për stabilitetin rajonal”, lexon Berisha.

Rezoluta është hartuar dhe propozuar nga PD me titull “Shqipëria: Integriteti Zgjedhor dhe të Drejtat e Opozitës”, në të cilën përmenden pretendimet e Berishës për zgjedhjet, blerje votash, presion ndaj votuesve dhe përdorim të administratës publike. Në rezolutë, sipas Berishës flitet gjithashtu edhe për “përndjekje gjyqësore” ndaj liderëve të opozitës, duke përmendur Ilir Metën, Sali Berishën, Fatmir Mediun, Ervin Salianjin dhe Fredi Belerin. Mes të tjerash, në rezolutë, i kërkohet BE që të “kushtëzohet” përparimi i Shqipërisë. Dhe për tej, rezoluta ‘përmbush’ dhe dëshirën e Berishës për qeveri teknike dhe për zgjedhje të parakohëshme, si dhe gjëra të tjera të këtij lloji të cilat i kemi dëgjuar në ‘dorë të parë’ nga vetë Berisha në të gjitha daljet e tij publike.

Përpos ligësisë për të nxirë gjithçka nga Shqipëria, Berisha shtyhet në këtë maninë e rezolutave partiake të “internacionaleve’ dhe nga forca e zakonit, apo trashëgimia politike nga babai i tij shpirtëror Enver Hoxha. Edhe Enveri, diktatori komunist, kishte pas vetes një grup të gatshëm të partive Marksiste-Leniniste të mbarë botës, të rindërtuara sipas dëshirës së tij disa prej tyre, të cilat i mbante me lekë e me trajtime të mëdha sa herë që vinin në Shqipëri. Hidhte lekë Enveri atëherë, siç po hedh Berisha sot. E në të dyja herët, paratë janë marrë nga xhepi i shqiptarëve!

Mjafton të pyesin këta të rinjtë apo t’i thërrasin kujtesës të tjerët, në rastim e mbramë lë të hyjnë dhe në motorin e kërkimit ‘google’ dhe kanë për të gjetur vizitat e famshme të kreut të Partisë Komuniste të Brazilit Zhoao Amazonas dhe familjes së tij, ishin të gjithë në drejtim të partisë, kreun e PK të Spanjes Raul Marko, kryetarin e Partisë Komuniste marksiste-leniniste të Gjermanisë Erenst Aust, Fosko Dinuçin e Partisë Komuniste, marksiste- leniniste të Italisë, dhe të tjerë që mbaheshin me paratë e shqiptarëve, ndërsa vetë shqiptarëve të varfër u kishte ‘mbirë’ buka e misrit dhe turshia në bark, bashkë me tollonin. Ndërsa Amazonas mësoi dhe rakinë dhe hante vetëm koka qengji, e hajde e përballoje pastaj në çdo verë apo kohë kongresi familjarisht.

Dhe sa herë që Enver Hoxha kërkonte ndonjë mbështetje politike përmes deklaratave kundër imperializmit amerikan, social-imperializmit sovjetik dhe sionizmit izraelit, në ‘mbrojtje të lirisë së popujve por dhe të votës së lirë pa dhunën e këtyre shtypësve gjakpirës kapitalistë’, i kishte të gatshme në emër të këtyre partive deklaratat e rezolutat mbështetëse të këtyre partive ‘m-l’. Madje dhe me firmë e vulë kongresi respektiv. Vetëm i lexonte dhe ‘proletariati botëror’ ishte në të njejtën linjë me PPSH. Kërkojini e do t’i gjeni fotot e deklaratat e këtyre maksistë-leninistëve në Google! Pavarësisht se nuk kishin asgjë të dorë të ndikonin në politikën e vendeve respektive, Enver Hoxhës i duheshin thjeshtë për shqiptarët që kishte nën hyqëm. Të cilët ‘hanin bar’, pa asnjë mundësi zhvillimi apo demokracie. Por që mbanin me para dhe këta marksistë-leninistë.

Nuk ka ndryshime as Berisha me këto rezolutat e “Internacionaleve” të tij, të cilat përpilohen në Tiranë dhe çohen nga Albana Vokshi e Belind Këlliçi e lexohen në Bregun e Fildishtë apo në Mongoli. Berishës për militantët e tij i duhen këto rezoluta, për t’u treguar se zgjedhjet po kontestohe edhe nga ndërkombëtarët, anipse ata që thuhet se e kanë miratuar as që e dinë ku bie Shqipëria. Por ka paguar njësoj si babai i tij shpirtëror Enver Hoxha, që këto rezoluta të bëhen, para të shkuara dëm me një fjalë si në kohën e komunizmit me ‘marksistë’leninistë ashtu dhe tani me “Internacionalet’ e djathta të Berishës.

Atëherë në komunizëm ‘hanin bar’ por parimet nuk i shkelnin të gjithë shqiptarët, ndërsa tani vijojnë të ‘hanë bar’ demokratët, të cilët kanë nisur mandatin e katërt në opozitë. Ata që kanë mbetur pas rrudhjeve të vazhdueshme. Për më tepër që, për hir të së vërtetës vetëm në PPE, PD është anëtare, po me të drejta jo të plota dhe pa të drejtë vote, ndërsa në këto ‘internacionalet’ e tjera të partive të djathta, PD nuk është as anëtare me status këshillues e pa të drejtë vote. Nuk figuron fare! Ka figuruar dikur PDK e Zef Bushatit, ndërsa tani s’bëhet fjalë!

Megjithëse Berisha për të mbajtur me gajret militantët e tij vijon të paguajë për të lexuar anglisht rezoluta të shkruajtura në Tiranë, anipse krerët e shteteve respektive njohën zgjedhjet, uruan dhe përgëzuan Ramën për fitoren në zgjedhjet e 11 majit, deklaruan vijimin e bashkëpunimit me qeverinë e tij dhe mbi të gjitha deklaruan se në vitin 2030 Shqipëria bëhet anëtare e BE. Të ishin rezoluta të miratuara nga Parlamenti Evropian, Këshilli i Evropës, Asambleja Parlamentare e KE apo e OSBE, do të kishin ndonjë vlerë.
Këto ditë është në Bruksel sërish Berisha, megjithëse këta të PPE-ve sikur nuk ia ‘vërshëllejnë’ shumë, nuk miratojnë rezoluta ata. Ku ka kërkuar të vijnë në Shqipëri për një mision faktbledhës për zgjedhjet, pa mundur të marrë konfermën e tyre. Rezolutë jo e jo!

Por sërish Berisha hodhi që andej helmin dhe ligësinë e tij. Duke e regjistruar, filmuar e shpërndarë me tabletin e tij nga Albana Vokshi. Për militantët e vet, kuptohet, të cilët janë përgatitur për të mbyllur 16 vitet radhazi në opozitë. Ndoshta dhe më tej, deri më 2033 sëpaku! Ani pse komisionerja për Zgjerimin deklasroi sërish sot nga Brukseli, si për inat të Berishës se është e e vendosur që brenda mandatit të saj të garantojë ‘martesën e Shqipërisë me BE”. Pra më 2030!

Nga Jakin Marena

Partia Demokratike, si udhëheqëse e koalicionit “Për Shqipërinë Madhështore” ka vendosur të ankimojë zgjedhjet kuti më kuti e qark më qark, duke ‘përkundur’ shpresën se do të amortizojë sadopak humbjen shokuese më 11 maj!

Pavarësisht se të gjithë komisionerët dhe numëruesit e votave, përfaqësues të opozitës, i kanë firmosur rezultatet qark më qark duke mos lënë asnjë shënim për manipulim apo keqadministrim të zgjedhjeve, ndërsa KQZ e ka mbyllur përmbledhjen e tabelave me rezultatin përfundimtar në të gjitha qarqet e vendit, demokratët po lëvizin në të njëjtën linjë që ka përcaktuar lideri Sali Berisha: Goditjen e procesit zgjedhor dhe mosnjohjen e rezultatit të zgjedhjeve të 11 majit.

Nuk është se Berisha apo ndjekësit e tij fanatikë po thonë ndonjë gjë të re në lidhje me këtë mosnjohjen e zgjedhjeve apo për përpjekjen që përmes ankimimeve për gjithçka, të arrijnë që të njollosin e përbaltin zgjedhjet.

Eshtë një ‘melodi’ të cilën shqiptarët sëpaku kanë 12 vite që e dëgjojnë pas humbjeve rresht të PD dhe Berishës në garat elektorale, vendore dhe parlamentare përballë PS dhe Edi Ramës. Por dhe më parë, Berisha që nga viti 1991 nuk ka njohur asnjë palë zgjedhje që nuk i ka organizuar vetë por dhe që ka humbur përballë kundërshtarit politik.

Për hir të së vërtetës Berisha s’ka një marrëdhënie të mirë me zgjedhjet kur ai i organizon vetë. Kujtojmë se shkatërrimi i zgjedhjeve si nocion dhe si praktikë ka filluar më 26 maj 1996, kur Berisha i vodhi hapur përmes dhunës shtetërore. Këto zgjedhje nuk i njohu as Shqipëria dhe as komuniteti ndërkombëtar.

Kreu aktual i PD nuk zuri mend dhe kur organizoi një palë zgjedhje në vitin 2009, të cilat i tjetërsoi, aq sa dhe një nga aleatët e atëhershëm të Ramës, tani me Berishën, kreu i PDK Nard Ndoka kërkonte votën e tij të hedhur në kuti, pasi rezultati që iu servir ishte 150 vota pro PD, zero vota për opozitën përfshirë dhe Ndokën, pa asnjë votë e pavlefshme.

Dhe kur opozita e atëhershme hyri në grevë urie për të hapur disa kuti dhe verifikuar rezultatin, Berisha i futi një të djegur fletëve të votimit dhe as dëgjoi më nga ai ‘vesh’ që të kryente këtë proces. Aktualisht hapja e kutive të votimit dhe rinumërimi është kthyer në një normalitet, sa herë që nuk i organizon Berisha zgjedhjet.

“Sagën’ e vjedhjes me çdo kusht të votës Berisha e vijoi sërish sa ishte në pushtet, teksa nuk mungoi t’i vinte ‘kapak’ me rrëmbimin e mandatit të katërt të Ramës që kishte fituar me 10 vota diferencë si kryebashkiak i Tiranës në zgjedhjet vendore të 2011. Ishte një rezultat i vjedhur në tavolinë nga Berisha përmes kreut të KQZ së atëhershme. Vjedhje live madje, sy për sy!

I përmendëm përciptazi këto fakte për të treguar se Berisha nuk ka pasur kurrë marrëdhënie të mira me zgjedhjet kur i ka organizuar vetë ato. I ka vjedhur në të gjitha rastet e mundshme. Pa bërë asnjë mungesë. Nuk mundi të përmbysë rezultatin në zgjedhjet e vitit 2013, pasi ishin 1 milionë vota kundër, por do ta kishte përmbysur dhe atë të ishte humbja më pak e lehtë në fund të herës. U tërhoq për të qëndruar në prapaskenë dhe për të lëvizur ‘fijet’ e drejtimit të Bashës në krye të PD. Koha e tregoi se ai ishte kreu i vërtetë i kësaj partie.

Dhe për të ‘amortizuar’ sadopak këtë humbje shokuese, me 33 mandate deputeti diferencë (83 me 50) dhe mbi 300 mijë vota diferencë të “Koalicionit Madhështor” të opozitës përballë PS dhe Edi Ramës, Berisha po tenton të bëjë sa më shumë zhurmë përmes kërkesave për rinumërim, hapje procesverbalesh, sajimit të ndonjë ‘prove’ që ka patur efekt vetëm 24 orë dhe pas është rrëzuar nga organet ligjzbatuese por dhe nga vetë akuzuesit, e gjëra të tjera të këtij lloji.

Por ajo që na ka bërë më shumë çudi është bindja e krijuar tek disa eksponentë të PD se, Ilir Alimehmeti që mori rreth 18 mijë vota në Tiranë do të hyjë në parlament. Dikush mundohet ta ilustrojë me faktin se nëse numërohen dhe njëherë fletët e pavleshme në Tiranë, mund të marrin mandatin e dytë që fitoi Partia “Mundësia” e Agron Shehajt në Tiranë. Megjithëse ky mandat del se është ‘blinduar’ me mbi 1200 vota të pastra. Por, në fund të herës ka qënë Belind Këlliçi ai që ka deklaruar se në një formë apo tjetër Ilir Alimehmeti do të jetë deputet i qarkut të Tiranës.

Ndërkohë që dhe Myslim Murrizi deklaroi se meqë mori mbi 7 mijë vota, ai do të jetë i sigurtë me mandat deputeti në Parlament në shtator. “Deri më 10 shtator do të ketë lëvizje të tjera të papritura. Kur kam deklaruar publikisht se shumë shpejt 7289 votues të lirë do të kenë përfaqësuesin e tyre në Parlament, as kam hamendësuar dhe as kam fluturuar si shumë delirantë politikë, që ëndërronin se do t’i votonin qytetarët pse i mbështesnin pseudo-kryetarët që nuk kishin dhe nuk kanë asnjë peshë reale në degët e partisë, që vegjetojnë si demek “kryetarë”.

Dhe unë kam bërë fushatë vetëm me qytetarët, pa video dhe pa pirë kafe me asnjë “udhëheqës” me “paparacë” nga pas, që t’u përcillja strukturave mesazhin që “udhëheqësi” vdes për mua. Ehhhh, sa ujëra do të rrjedhin në këtë verë të “nxehtë”, sa do të habiten të gjithë”, shkruan Murrizi. I sigurtë se do të jetë në shtator në Kuvend si deputet i PD i zgjedhur në Tiranë.

Ajo që na ka habitur është se si Këlliçi ashtu dhe Murrizi flasin me një siguri të plotë në lidhje me hyrjen e Alimehmetit dhe Myslymit në Kuvend, ndonëse për momentin nuk i kanë votat për të marrë një mandat deputeti. Dhe jo se nuk u takon të hyjnë në Kuvend si Myslymit ashtu dhe Alimehmetit, por për hir të së vërtetës ata kanë punuar për listën e sigurtë prej 12 deputetësh, të cilët po t’i nxirrje jashtë kësaj liste  të mbyllur nuk bënin as një mijë vota!

Praktikisht PD ka marrë 13 mandate deputeti në qarkun e Tiranës, 12 mandate nga lista e mbyllur ku janë ‘strehuar’ më besnikët e Berishës, krerët e partive aleate si dhe 2 përfaqësues të Partisë së Lirisë të Ilir Metës, si dhe një mandat deputeti nga lista e hapur përmes votës preferenciale. Ku Jorida Tabaku ka marrë mbi 20 mijë vota. Vota të cilat kontestohen të paktën zyrtarisht nga zyrtarja e PD Adriana Kalaja që thotë se janë vota oligarkësh dhe të Edi Ramës, me qëëllimin e vetëm për të poshtëruar Sali Berishën. Pavarësisht se Berisha bën sikur e mbron Tabakun. Themi kështu sepse në PD nuk flitet pa leje. Ndërsa Alimehmeti u rendit pas saj me 2 mijë vota më pak. Pas tyre Ilir Meta, dhe i katërti Myslim Murrizi.

Duke qënë se ‘pista’ Agron Shehaj është thuajse e pamundur të realizohet për t’i shkëputur një mandat deputeti në Tiranë, as PS-së, PSD-së, Llapajt apo Qorajt nuk mund t’i merret mandati në Tiranë, atëherë mbetet mister se cili mandat do të ‘lirohet’ për të kaluar tek Alimehmeti dhe akoma më tej cili mandat tjetër do të ndërrojë ‘pronar’ për të kaluar dhe tek Murrizi.

Koridoreve të PD flitet për fletë-arreste të SPAK, por pa përmendur emra se në drejtim të kujt do të lëshohen, për t’a mbyllur në burg dhe për t’i hequr për pasojë mandatin e deputetit. E sigurtë është se dhe në rast se ndodh fakti që, SPAK ndërhyn përmes akuzave apo fletëarresteve tek PS apo te PSD, vendin e tyre në të gjitha rastet e zë tjetri në radhë, socialist apo socialdemokrat, pasi kanë marrë votat në rang qarku për 19 mandate deputeti PS dhe për 1 mandat deputeti PSD.

E sigurtë është se dhe Ilir Meta nuk ka asnjë shans që të marrë mandat deputeti pasi është në qeli, në pritje të kopsitjes së dosjes dhe përballjes me të në sallën e gjyqit. Atëherë ku shpreson Këlliçi apo Murrizi të marrin dy mandate, njëri për Alimehmetin e tjetri për vete?

Shansi i vetëm që Alimehmeti e Murrizi të hyjnë në Kuvend është që dy nga deputetët e sigurtë të listës së PD të arrestohen dhe të mbyllen në qeli, si dhe Ilir Meta të vijojë qëndrimin në burg. Pikërisht atëherë u hapet rruga Alimehmetit dhe Murrizit për të marrë mandatin e deputetit dhe për të qënë pjesë e Parlamentit shqiptar.

Nuk dimë se kë kanë parasysh Këlliçi e Murrizi në listën e PD të qarkut Tiranë se do të hyjë në burg, po për hir të së vërtetës nën hetim për aferën “Partizani”. ’21 janarin’, ‘Gërdecin’ si dhe hetimin e pasurisë është Sali Berisha. Pra deputeti më me ‘risk’ për të lëshuar mandatin është kreu i PD. Ndërkohë që po hetohet dhe pasuria e numrit dy të PD, Flamur Noka, si dhe është nën hetim ish ministri i Mbrojtjes, njëherësh kreu i PR Fatmir Mediu, për Gërdecin. Megjithëse këta dy të fundit pak gjasa kanë që të përfundojnë në qeli. Sëpaku së shpejti, të themi!

Ndaj na habit guximi me të cilin Këlliçi thotë se Alimehmeti do të jetë deputet në Kuvend, por dhe Murrizi që shprehet i sigurtë se do të marrë në shtator mandatin e deputetit. Nuk besoj se kanë në mendje Berishën në burg për të patur ‘vakancën’ e radhës për deputet, pasi do të ishte një guxim shumë i madh dhe të mendohej! Apo dhe mandatin e Nokës.

Në fund të herës, dhe nëse ekziston dëshira e Këlliçit dhe Murrizit, mister mbetet fakti nëse kanë informacione nga SPAK apo parashikojnë ndërhyrjen e prokurorëve të posaçëm për mbylljen në qeli të Berishës e të ndonjë tjetri nga të përmendurit e listës së sigurtë të PD në Tiranë.

E themi këtë sepse SPAK ka treguar se kur vjen puna tek Berisha, i ngadalëson goxha deri në stopim lëvizjet si dhe matet fort për të hedhur ndonjë akuzë, për të kërkuar një masë më të fortë. Pavarësisht se për “Partizanin’ në një vend normal me drejtësi normale, ai duhej të ishte në qeli. Apo zvarritja pafund e dosjes së ’21 janarit’, e cila ka ardhur e gatshme ‘llokum’ nga Gjykata e Strasburgut, ndërkohë që nuk po merret ende seriozisht nga organet e hetimit në Shqipëri.

Pra me gjithë ‘dëshirën’ e mirë të eksponentëve të PD për të patur ndonjë ‘vakancë’ në listën e PD për Kuvendin, duhet parë pak me rezerva vullneti i SPAK për të kopsitur dosjen e Berishës. Sëpaku për ta thirrur për të dëshmuar për ‘21 janarin’, ‘Gërdecin’, por dhe hetimin e pasurisë. Të presim, por duket se do presim gjatë, shumë gjatë! Me shpresën se mos do të japë ndonjë ‘dorë’ ndihme dhe i “Plotfuqishmi’, e më pas të gjitha palët janë në rregull dhe bien rehat!