Nga Jakin Marena

Protesta në bulevardin qëndror të kryeqytetit, e cila si çdo natë nis në 18.00 me një numër tepër të paktë pjesëmarrësish, për t’u fryrë me gjimnazistë, nëna me fëmijë, pensionistë e njerëz të tjerë pas dy orësh, ka hyrë në ditën e 16-të këtë të hënë!

Nuk ka ndalim lëvizja e pasdites në Bulevardin “Dëshmorët e Kombit’ por dhe nëpër rrugica, ndërsa protestuesit e kanë harruar tashmë shkakun se për çfarë janë ngritur në këtë protestë. Nëse krye të herës u ngritën për të mbrojtur Zvërnecin e Rrjollin, tani janë shndërruar në lëvizje që po godet në një pikë, kërkojnë dorëheqjen e kryeministrit Edi Rama!

Protesta është kthyer në një protestë politike, por me ndryshimin e vetëm se askush nuk po e pranon një gjë të tillë, madje nuk po nxjerr në skenë as lidershipin! Nuk është se nuk e dinë shqiptarët se kush është përzjerë mes këtyre protestuesve, shumica idealistë si vetë adoleshenca, për të marrë sadopak nga entuziasmi rinor e gjimnazor, për ta paraqitur dhe si mbështetje për ta!

Duke filluar me Lapajn, që nisi dikur një protestë para kryeministrisë me dhjetra njerëz anëtarë të partisë së tij, ‘Shqipëria Bëhet’, duke përfunduar më pas në tek pullë në një karrige po përballë kryeministrisë! Edhe tani me njerëzit e tij, është duke tentuar që të rrëmbejë lidershipin e protestës për t’u dukur si parti me mbështetje, por realisht ka përfunduar në periferi të saj!

Duke vijuar me neo-komunistin Arlind Qori, njeriu më konsistent në idenë e tij, atë të shembjes së kapitalizmit, ndërtimit të komunizmit që parashikon nxjerrjen jashtë vendit të investimeve të huaja, mosmarrjen e huave dhe ‘kafërdisjen’ me forcat tona! Si në kohë të Enverit vaktit, për 45 vite me radhë! Ia pamë hajrin, aq sa na katandisi në këtë farë feje që jemi, me një alternativë qeverisëse në opozitë një neokomunist si Arlind Qori që për fat s’ka fare mbështetje, por dhe një komunist të devotshëm si Sali Berisha, ky i fundit në krye të PD dhe opozitës, tash 36 vite!

Dhe meqë jemi tek Berisha, ajo që mund të themi është se ai po tenton fort të privatizojë kupolën drejtuese të protestës, gjë që thuajse e ka arritur! Pasi mori premtimin për vizën e përkohëshme për një udhëtim mjekësor në SHBA, lobimi mbi 6 milionë dollarë bëri punën e vet dhe e prodhoi një vizë të shkurtër, tashmë ka shtrirë ndikimin e vet në të gjithë enët kapilare të protestës! Janë thuajse të gjithë deputetët dhe zyrtarët e tjerë të PD të të gjitha niveleve në këtë protestë, me përjashtim të Berishës dhe Flamur Nokës! Dhe Palokës, të cilit nuk i del koha!

Nuk janë shumë, por ama, kanë depërtuar dhe tek mikrofonët e protestës, mbajnë fjalime, madje dhe flasin në emër të protestës, duke filluar me gazetarët e televizionit të familes dhe përfunduar me kandidatin e pavarur për kryetar të bashkisë së Tiranës, po gazetar i familjes, Florian Binaj! Janë të gjithë në të drejtën e Zotit! Madje dhe Stresi e babai i tij! Për sa kohë nuk bëjnë rrëmujë!

Kreun e “Mundësia’ nuk po e llogarisim, pasi ai po sillet kot nëpër anekset e protestës, pa asnjë ndikim në të! Përfshijmë këtu dhe kryeministrin e vetëshpallur, Pëllumb Pilinci, i cili deklaron se ai i organizon protestat! Meqë jemi te Pilinci, ende nuk e kuptojmë se përse policia bashkiake e Tiranës bllokoi makinën e tij, dhe ende na mundon dilema e fortë, nëse ishte në kundravajtje apo se po i prishte imazhin e mirë protestës rinore nga “Skënderbej’ në bulevardin e kryeqytetit?!

Nga ana tjetër, mbetemi sërish në qëndrimin se Shqipëria, pa dëshirën e saj, është përfshirë në një konflikt të pakërkuar ideologjik mes të majtës në SHBA dhe presidentit Donald Trump dhe familjes së tij! Vajza Ivanka e dhëndri Jarend Kushner, në kohën kur presidenti aktual amerikan më shumë ‘anonte’ nga hyrja në burg se sa nga rikthimi në Presidencë, kishte aq shumë akuza në kurriz dhe as që mendohej zgjedhja e tij në krye të SHBA, kishin shfaqur interes për të investuar në ishullin e Sazanit dhe në Zvërnec! Bashkë me një konsorcium të dy vëllezërve nga Katari! Shfaqur interes themi, sepse deri më tani s’ka asnjë projekt të shkruar dhe përfunduar, po punohet për të, por gjë e shkruar ende nuk është paraqitur, jo më të jetë firmosur!

Konflikti i pakërkuar mes të majtëve në SHBA dhe Trump u zhvendos në Shqipëri, ku papritmas u shfaq interesi i tyre për flamingot që ‘drekojnë’ në lagunat tona, pasi qëndrojnë inkonjito, si të gjithë zogjtë shtegtarë për të gjithë ata që nuk e dinë, sepse zog autokton që nuk e luan b**ën nga Shqipëria ne kemi shqiponjën, e kemi simbol kombëtar për hir të Zotit, madje dhe me dy krena!

Pa përjashtuar këtu dhe përplasjen mes Evropës dhe Trump për gjithçka, duhet të nënvizojmë se pavarësisht garancisë së dhënë nga vendet anëtare të BE, duke filluar nga Gjermania e deri tek Spanja, se anëtarësimi do të realizohet deri në vitin 2030, duhet edhe të pranojmë edhe faktin tjetër se nuk kemi jo vetëm luksin por as takatin që të kundërshtojmë aleatin tonë të madh, SHBA-të, në të gjitha iniciativat e saj! Përfshirë dhe Bordin e Paqes, pjesëmarrje të cilën nuk e kundërshtonim dot! Ka qënë gjithnjë pranë nesh SHBA, që me mbrojtjen e shtetit të parë shqiptar, si dhe me çlirimin e mbështetjen finale për ngritjen e shtetit të dytë shqiptar në Ballkan, Kosovën! Kemi dhe detyrime dreqi e mori, s’bëhet gjaku ujë. Vetëm Enveri vaktit s’pyeste për Amerikën dhe të gjithë e dimë si u katandisëm!
Por në këtë protestë janë përzierë dhe iranianët me të gjithë mbështetësit e tyre islamikë, shihet ‘larmia’ e tyre deri në kapje foltoreje dhe në bulevardin qëndror të kryeqytetit, në përpjekjen spekuluese për t’i dhënë zë luftës së tyre kundër Izraelit, deri dhe manipulime të tilla duke hedhur lajme të rreme të mbështetura me pamje të manipuluara për krijimin e të ashtuquajturave ‘enklava izraelite’ në Vlorë e vende të tjera si dhe publikimin e hartave të rrejshme me flamurin izraelit në tërësinë territoriale të Shqipërisë! Pa përjashtuar publikimin non stop të protestave, madje të shumëfishuara me AI, deri dhe të sajuara me bllokimin e bregdetit! Fundja dhe mediat perëndimore, ato anti-Trump themi, protestat po i japin live, pavarësisht se nuk i akuzojmë se kanë manipuluar me to! Gazetarët dhe mediat kanë bërë punën e tyre, thjeshtë po evidentojmë këtë interesin e papritur, për të paraqitur Shqipërinë si vend anti-Trump dhe anti-SHBA!

Dhe meqë jemi tek mbështetja e gjithë axhendës anti-Trump të protestës, nuk mund të lëmë pa përmendur edhe pjesëmarrjen e përfaqësuesve të Albin Kurtit, si përfaqësuesi tipik anti-amerikan kundër gjithçkaje amerikane, në organizimin e saj! Ka marrë përsipër diçka dhe ai! Përpos këtyre fantazmave që ka dërguar në terren që nga Elvis Hoxha, i cili nënvizojmë se ka gjetur bashkë me Dejona Mihalin ‘parajsën’ pranë Albinit, përpos atyre 1 mijë vetave që ka dërguar me autobusë dhe me 200 makina në mbështetje të protestës anti-amerikane në Shqipëri, ndihmesa më e madhe e Kurtit për protestën ka qënë vënia në dizpozicion të protestës e të gjithë makinerisë baltosëse online e mediatike të përdorur në zgjedhjet e fundit kundër kundërshtarëve politikë në Kosovë.

Janë të njejtët emra të rremë me adresa të rreme që ‘burojnë’ nga të gjitha qendrat e kryeqendrat evropiane, që komentojnë e linçojnë këdo që kritikon sadopak protestën, që kërcënojnë ata që dalin kundër protestës, që përdorin të njejtin fjalor për patriotizmën e deri thirrje për Albinin që të jetë në krye të Shqipërisë, që përdorin të njejtën kategori kërcënimesh për këdo që del kundër protestës! Madje dhe dalja e një pjese të protestuesve pranë çdo kafeneje e apeli ndaj qytetarëve, ‘ngrihuni nga kafja’, për të gjithë ata që po prehin kockat me familjet e tyre pas një pune të lodhshme të ditës, janë ide të Albinit! “Testin’ e ka bërë në Kosovë ai! Që herët!

Në këtë protestë kanë ndikimin e tyre të fortë dhe vendet fqinje, dhe mbi të gjitha Greqia! Është çështje biznesi, dhe ngritja me 4.5 miliardë dollarë e njërit prej resorteve më të mëdhenj në Mesdhe, siç pritet të jetë investimi i Sazanit dhe i Zvërnecit, ka ngjallur shqetësim dhe xhelozi! Është çështje konkurence, pasi mund të thithë një pjesë të caktuar të turizmit dhe parasë, që deri më tani ka shkuar në Greqi! Pra thith atë që quhet turizëm elitar, pa bukë me vete, me një fjalë!
I përmendëm të gjitha këto, për të treguar se protesta, është një konglomerat interesash dhe për pasojë dhe me qëndra drejtimi të ndryshme, çka e bën të dyshimtë axhendën e tyre nga dita në ditë! Kjo u pa dhe në mbrëmjen e së dielës, ku protesta pasi përfundoi ‘adetet’ në bulevardin përballë kryeministrisë, nisi ‘xhiron’ e tejzgjatur, nëpër unazën e Tiranës dhe më pas, në mënyrë të papritur pushtoi rrugën e Durrësit për të dalë në autostradën Tiranë-Durrës e për të tentuar mbërritjen në ambientet e të vetmit aeroport ndërkombëtar shqiptar, atë të “Nënë Terezës”!
Pa llogaritur faktin se bllokimi i autostradës solli një trafik të çmendur, krijoi radhë të gjata deri në disa kilometra me makina, ajo që ‘dhembi’ më shumë ishte bllokimi i qytetarëve, vendas dhe të huaj, të cilët do të merrnin avionët e linjës për të lëvizur jashtë vendit përmes aeroportit të Rinasit! Humbën avionin me një fjalë, dhe për më tepër nuk kanë kujt t’i drejtohen, pasi jo vetëm që humbën punën për të cilën ishin nisur, por dhe paratë që kanë paguar! Kush i kompenson ata?
Udhëtimi drejt Rinasit u ndërpre nga policia! Duke qënë se aeroporti “Nënë Tereza” është objekt strategjik i një rëndësie të veçantë për Sigurinë Kombëtare, për mbrojtjen e saj mund të ndërhyjë deri dhe Ushtria, forcat e policisë bllokuan marshimin e protestuesve në drejtim të aeroportit, i bllokuan në një vend ku nuk sillnin problem, megjithëse dëmi ishte bërë tashmë për një pjesë të udhëtarëve jashtë vendit që mbetën të bllokuar. Pasi policia u bëri thirrje që të shpërndahen, për hir të së vërtetës pjesa më e madhe e tyre u ftilluan pas bllokimit dhe këtë gjë e deklaruan me zë të lartë se ishin manipuluar në këtë ndërmarrje aspak ligjore dhe aspak dinjitoze! Përmendën dhe emra nga organizatorët e protestës, të cilët kishin bërë thirrje për të marshuar drejt aeroportit, pavarësisht se ata të zënë ngushtë justifikohen me ‘futjen e sabotatorëve brenda protestës’! Madje dhe organet ligjzbatuese kanë nisur thirrjen në seanca pyetjesh këta organizatorë!

I përmendëm të gjitha këto për të treguar se sa e lehtë është që të manipulohen protestuesit nga ky grup organizator, i cili ende mbetet një mister dhe vepron në ilegalitet të plotë! Mjafton një thirrje pa identifikim ndaj turmës, dhe protestuesit drejtohen drejt rrugëve nacionale duke i bllokuar ato e deri tek aeroporti i vetëm ndërkombëtar shqiptar, “Nënë Tereza”, apo larg qoftë nesër nëpër selitë e partive politike, zyrave të shtetit e deri tek shtëpitë e politikanëve kryesorë, duke vënë nën kërcënim dhe rrezik jetët e familjarëve të tyre nga turmat pa kokë që e lëvizin sa andej këndej! Prandaj themi se dikush duhet t’i dalë zot kësaj proteste, pasi nuk dihet se kush po e lëviz atë masë amorfe! Aq më tepër që pjesa më e madhe e pjesëmarrësve janë adoleshentë e fëmijë, të cilët manipulohen lehtë, për axhenda aspak në favor të Shqipërisë dhe shqiptarëve! Kjo protestë përpos e manipuluar në elementë të caktuar, duket se është dhe ‘kontaminuar’, parë dhe nga këndvështrimi i deklaratave, kërcënimeve dhe lincimeve të helmëta që lëshojnë!

Duhet të bëhen publikë organizatorët, jo se nuk dihen! Dhe të mos i bien kot më qafë gazetarit Marin Mema, i cili me sa duket gjendet në atë vorbull si padashje. Gjendet mes nevojës për të vijuar emisionin që ka në TV, është i shkëlqyer ky emision, pavarësisht kostos së lartë financiare që kërkon për ta mbajtur, dhe pamundësisë për të kundërshtuar situatën e papritur në të cilën ai gjendet, atë të protagonizmit! Shijon ai i bekuar protagonizëm! Megjithëse është distancuar!
Ajo që mund të themi është se dihen emër për emër organizatorët. Mos të bëjmë sikur nuk dihen nga gazetarët! Mësohet se dhe nga institucionet ligjzbatuese, janë identifikuar të gjithë ata që kanë devijuar protestën në këto akte paligjshmërie! Sidomos në këto 3 ditët e fundit, protesta ka devijuar rëndë në shinat e paligjshmërisë, teksa janë shfaqur personazhe me maska, si dhe ka thirrje për ekzekutime me vdekje të politikanëve, zyrtarëve dhe analistëve mediatikë të caktuar.
Ka dhe thirrje për rrethimin e SPAK për të mos e lënë asnjë prokuror që të dalë jashtë godinës, nëse nuk realizohen axhendat e tyre për të arrestuar të gjithë ata që turma e protestuesve, ditë pas dite ka vënë në listë, me betimin se do të dërgohen pa gjyq në burg! Ndërkohë që në shkelje të ligjit, tashmë nga turma e protestuesve ka nisur edhe bllokimi i akseve kryesore në Tiranë, duke e bërë kështu të domosdoshme ndërhyrjen e policisë dhe të strukturave të tjera ligjzbatuese. Sipas dhe këshillave të studentëve serbë, ‘veteranëve’ të protestës anti-Vuçiç. Janë publikuar komunikimet në media, kanë dhe emra partnerët në Shqipëri! I gjeni kollaj!
Si organizatorë të protestës dhe përgjegjës për veprime të paligjshme janë identifikuar shumë e shumë punonjës të shoqatave që qarkullojnë dhe ‘konsumojnë’ miliona euro fonde të BE, janë dhe disa bankierë të dyshuar për pastrim parash, pavarësisht shkallës së lartë të inteligjencës që kanë shfaqur në rininë e tyre të hershme. Ka shumë ish zyrtarë të shkarkuar dhe të arrestuar për korrupsion në të gjitha qeverisjet, personazhe të dyshuar për krime kibernetike, punonjës të mediave të familjes Berisha, personazhe të skeduar për krime seksuale, biznesmenë që nuk paguajnë taksa në shtet, por dhe përfaqësues OJQ që kanë humbur financimin nga SHBA për shkak të një firme të Trump, njerëz të frustuar e në moshë madhore nga këto rrjetet ballkanike!

Organet ligjzbatuese kanë identifikuar edhe një grup tjetër personash, me emër dhe mbiemër, si të ‘importuar’ nga jashtë. Bëhet fjalë për njerëz të lidhur me Albin Kurtin, personazhe të tjerë të skeduar si lidhje të errëta me qarqet greke e të dyshuar të tjerë për lidhje me shërbime jo partnere si dhe të vendeve armike. Në bashkëpunim, mësohet se institucionet ligjzbatuese shqiptare, po punojnë për dokumentimin e veprimtarisë të secilit të dyshuar, ku pritet të ketë veprime sipas ligjeve shqiptare në fuqi! Heshtja e organeve ligjzbatuese deri më tani ka qënë për shumë arsye, mes të cilave, evidentimi e dokumentimi i shkeljeve dhe personave përgjegjës, dhe mbi të gjitha prania e madhe e fëmijëve dhe e adoleshentëve në protestë, pjesa më e madhe e të cilëve ende s’e kanë mbushur moshën e votimit, e për pasojë nuk mbajnë përgjegjësi për veprimet që bëjnë!

Dhe meqë jemi tek bllokimi i rrugëve jetike në vend deri tek aeroporti i Rinasit nga protestuesit, ajo që nuk mund të kalojë pa u përmendur lajmi që dhe ka entuziasmuar fort protestuesit, është akti i ‘zhbllokimit’ të deputetës Marjana Koçeku, e dalë nga lista e sigurtë dhe e mbyllur e kandidatëve për deputetë të PS në qarkun e Shkodrës. Madje ishte e para në listë e emri i saj s’është votuar, është votuar vetëm sigla e PS! E cila u ‘divorcua’ nga grupi parlamentar i PS!
Marjana dha lajmin se doli deputete e pavarur që nga mbrëmja e ditës së dielë! E njohur ndryshe edhe si ‘Neomalësorja’, në kulmin e protestës, e cila kërkon dorëheqjen e kryeministrit dhe kreut të partisë së saj, deri mbërmjen e së dielës, Edi Rama, Koçeku njoftoi papritur largimin nga grupi parlamentar i PS. Nuk dihen tamam tamam arsyet që e çuan deputeten drejt këtij ‘divorci’ politik me PS-në, por në një postim në rrjetet sociale ajo njoftoi se do të jetë deputete e pavarur.

Këtë qëndrim “Neomalësorja” e argumentoi shkurt, duke thënë se idealet dhe vlerat e saj, janë ato që i ka pasur para se të bashkohej me një parti politike dhe që i diktojnë edhe kufijtë tani. “Prej sot jam deputete e pamvarun. Idealet e vlerat e mia janë ato që i kam pasë e i kam shprehë qysh para se me u asociu me nji parti. Ato m’i diftojnë kufijtë”, shkruan ajo.

Prandaj themi se Marjana u ‘zbbllokua’ duke dalë jashtë kufijve të PS, me të cilën ishte asociuar më herët, duke mbetur në kufijtë e saj! Pavarësisht se nga PS, elementë të caktuar brenda saj, i kanë kërkuar të dorëzojë mandatin e deputetit pasi është votuar sigla e PS dhe jo ajo si kryesuese e listës së mbyllur në Shkodër, dorëzimi i mandatit të deputetit mbetet në dinjitetin e vetë Marjanës! Megjithëse grupi i PS nuk e diskutoi ikjen e Marjanës, por dhe vetëe Marjana i ka këputur një mbyllje telefoni dhe nuk përgjigjet fare! Poston ndonjë ‘emoji’ me Flamingo e kaq!

Nëse i referohemi deklaratës saj për daljen jashtë grupit të PS e ‘divorcit’ me partinë që qeveris vendin, pra rikthim në kufijtë e saj, lë për të kuptuar se mandati i deputetit është një ‘kostum’ i tepërt për Marjanën, është një ‘dhuratë’ e partisë në radhët e të cilës nuk dëshiron të jetë më. Ky ‘kostum’ që nga mbrëmja e së dielës, çdo sekondë e më tepër që e mban, i rri shumë keq, pasi s’është më për trupin e saj. Madje po del sikur ia kanë veshur me zor ditën e zgjedhjeve dhe i rri shumë keq! Por rëndësi ka që Marjana u rikthye në habitatin e vet, u ‘zhbllokua’ nga ‘zinxhirët’ e PS, pasi kishte mbetur e ‘bllokuar’ në një ‘trup’ tjetër politik, në një trup të huaj për të, si PS!

Marjana të bëjë dhe një sforco të vogël e të çlirohet tamam, të dorëzojë atë mandatin e deputetit! Apo nuk e pranojnë pa mandat këta ‘padronët’ e rinj, ata që drejtojnë protestën?! Do t’ju ‘bënte punë’ më shumë pa këtë ‘kostumin’ e PS, partisë që duhet të nxirret me patjetër, bashkë me PD jashtë skenës politike, sipas tyre! Të shohim! Robi rron për pak dinjitet, një çikë erz siç thuhet, që malësorët për hir të së vërtetës, e kanë me shumicë! Ndoshta Marjana do ishte rasti i radhës!

Nga Jakin Marena

Protesta e qytetarëve, e cila filloi për mbrojtjen e Flamingove, Pelikanit Kaqurel dhe zogjve të tjerë në Zvërnec dhe po vijon me axhenda të tjera, nga ato politike për rrëzimin e Ramës dhe futjen në burg bashkë me Berishën e deri te ato anti-investim të huaj, anti-kapitalizëm në tërësi, anti-Trump, anti-SHBA, anti-semite dhe islamike, vijon të refuzojë çdo negociatë me qeverinë!

Ka një konglomerat axhendash, idesh dhe grupimesh që mblidhen në bulevardin qëndror të kryeqytetit, për hir të së vërtetës duhet pranuar se janë të qeta por janë dhe në të drejtën e tyre për t’u tubuar, por që për gati dy javë me radhë po vijojnë pa ndërprerje! E mbi të gjitha po vijojnë deri më tani bashkë, me gjithë fërkimet e sporadike mes grupimeve të caktuara, duke filluar nga ato të partive të vogla të Qorit, Lapaj e Shehut, e deri tek përplasjet me protestuesit e PD, të cilët e ngritën një ‘oktavë’ më lart zërin, teksa dërguan në protestë Stresin bashkë me të atin e grupin që i shoqëronte, me dy gishtat lart! Si qytetarë ishin në protestë sipas pretendimit të tyre! Pavarësisht se kishte kontestime për ta. Fundja kontestime kishin dhe për një të ri që kishte nxjerrë në shëtitje qenin, derisa e dëbuan! Me këta të PD s’para ‘kruhen’ shumë për fatin e tyre!

Teksa lufta hibride vijon me kapacitet të plotë, me përfshirjen dhe të vetë qeverisë iraniane, teksa vijojnë replikat e kryeministrit Rama jo vetëm me iranianët por me të gjithë ata që po tentojnë të dëmtojnë imazhin e Shqipërisë në botë, duke dëmtuar turizmin në radhë të parë si dhe investimet e mëdha të huaja në vend, përfshirë dhe ato në Sazan e Zvërnec, me pjesëmarrjen dhe të vajzës e dhëndrit të presidentit amerikan Donald Trump, teksa tentojnë të dëmtojnë procesin e integrimit të Shqipërisë në BE, protesta në Tiranë s’ndalet por vijon me një ‘pult komandimi’ sekret!

Pavarësisht interesimit të mediave, pavarësisht kërkesës së pjesës më të madhe të protestuesve, të cilët kërkojnë deri dhe krijimin e një Kuvendi kombëtar për të ndërmarrë hapat e mëtejshëm deri në një rezultat përfundimtar, sipas tyre qëllimi është rrëzimi i qeverisë e i kësaj klase politike dhe marrja në dorë nga vetë rinia të fateve të vendit, bërthama e organizimit vijon të jetë pa emër! Askush nuk merr përsipër të dalë në publik, duke e zhytur akoma më shumë në mister axhendën reale dhe qëllimin final të këtij grupimi që qëndron në ilegalitet, teksa janë nxitur dhe teoritë konspirative! Të cilat nuk po i përmendim! Publikohen lista me emra në fakt ditë pas dite si pjesë e grupit nismëtar, duke përfshirë dhe nga Kosova, që nga Ron Gjonovci e deri tek Shkëlzen Gashi e këshilltari i Kurtit, Elvis Hoxha, por gjithshka përgënjeshtrohet brenda disa minutave!

Teksa kërkohet nga qytetarët në bulevard transparencë për të gjitha vendimet e qeverisë, anulimin e të gjitha vendimeve të ndërmarra deri më tani dhe zhbërjen e tërë sistemit politik, në ditën e 14-të të protestës qytetare, protesta nuk ka asnjë lloj transparence se nga kush drejtohet. Nuk shtyhemi thjeshtë nga kurioziteti për të ditur emrin e liderit apo pjesëtarëve të grupit që bën lidershipin e kësaj proteste! Për hir të së vërtetës pak a shumë emrat dihen, që nga bankierë, gazetarë me qendër në Tiranë apo diku jashtë vendit, ndonjë këshilltar nga përtej Atlantikut apo ndonjë ish zyrtar i lartë nga Vendet e Ulta të Evropit, pa përjashtuar të ‘deleguarit’ e Albinit, që sillen si fantazma nëpër bulevardin qëndror të kryeqytetit, për ‘ti vënë punët në vijë’ siç i ka vënë Albini në Kosovë, këtu e tre vite pa qeveri e institucione dhe izolim ndërkombëtar, e deri tek influencerë, për habi nuk ka hallexhinj të Zvërnecit në grupimin kryesor drejtues, por ama shqiptarët duhet të dinë se kujt ti besojnë ‘vakancën’ që kërkojnë, që referuar kutit të protestuesve do të krijohet pas largimit të politikës së vjetër dhe sistemit aktual politik!

Sepse shqiptarët kanë arritur në atë farë pike reflektimi dhe qytetarie, ka të shkolluar dhe këtu në Shqipëri e jashtë vendit, të cilët nuk bëjnë influencerin por që kontribuojnë me mënyrën e tyre për të ardhmen e këtij vendi pa qënë në protestë, pra kanë arritur në atë shkallë ndërgjegjësimi shqiptarët sa për të kuptuar se asgjë nuk bëhet sipas parimit ‘e ndryshojmë njëherë, pastaj shohim e bëjmë, dhe atëherë do të zbardhet lidershipi që do të marrë në dorë fatet e vendit’! Shqiptarët kanë kalamaj, kanë prindër dhe familjarë të tjerë, të cilët nuk mund ta çojnë as nëpër mend që t’i lënë kaq lirë dhe badihava në dorë të një grupi misterioz që po lëviz fijet e protestës, në një rast hipotetik! Qofshin dhe më të mirët e botës, apo me qëllimin më të mirë dhe më brilant për shqiptarët e Shqipërinë, por që nuk mund të flasin asesi në emër të shqiptarëve! Të paktën të votohen njëherë, dhe shalqiri blihet me provë!

Është shumë për të besuar kështu verbërisht, në mënyrë indirekte dhe pa i parë gjërat me sy e pa i peshuar të gjithë elementët që vërtitën sot e kësaj dite në lojën politike! Qoftë dhe armiku më i egër i Ramës, Berishës dhe tërë klasës politike, kërkon një çikë garanci, dhe si garanci kërkon që lideri apo grupi drejtues i protestës të jetë si ‘kolateral’ politik i lënë në ‘bankën e sigurisë politike’, për të qënë pika ku nesër të drejtohen, nëse diçka nuk shkon sipas parashikimit!

Mungesa e një lidershipi, paqartësia e kërkesave dhe mbi të gjitha tendenca për të dalë jashtë kontrollit përmes thirrjeve anti Trump, anti-amerikane, anti-semite, anti-kapitalizëm me metoda marksiste, kërcënimet ndaj çdo mendimi ndryshe apo kundër protestës, e pasuar kjo me linçimin e kërcënimet non stop të kritikëve të caktuar dhe familjarëve të tyre në rrjetet sociale, si dhe përvetësimi i axhendës së protestës nga ana e iranianëve, të majtëve radikale e deri të fqinjëve tanë konkurrentë në turizëm, ka rritur mosbesimin ndaj tyre dhe axhendës që përfaqësojnë! Pasi në Shqipëri, në të vetmin vend të rajonit që ka stabilitet e siguri, vitin e ardhshëm zhvillohet samiti i NATO-s, me pjesëmarrjen dhe të vetë presidentit amerikan, Donald Trump!

Një situatë e tillë pa rrugë dhe pa krye e kësaj proteste, me sa duket ka ftilluar dhe axhendat politike në vendet anëtare të BE dhe mbi të gjitha në SHBA, që ta shohim më me seriozitet këtë situatë për të arritur në konkluzionin se Shqipëria është shumë e vogël dhe nuk e ka takatin për ta mbajtur një përplasjeje të linjave politike mes vendeve dhe për të qënë ‘sheshi i betejës’ ku mund të përplasen axhendat e të majtës ekstreme anti-Trump nga SHBA e Evropa! Sepse ne nuk na llogarit kush për hir të së vërtetës! Madje dhe kryeministri Edi Rama, teksa është shprehur në festën e 35 vjetorit të themelimit të PS se reagimet ndërkombëtare për protestat që kundërshtojnë investimin në Zvërnec, janë një luftë politike e ideologjike që nuk i takon Shqipërisë.

Duke përmendur deklaratën e senatorit demokrat amerikan, bëhet fjalë për Sanders i cili shquhet si një përfaqësues i ekstremit të majtë brenda demokratëve amerikanë, Rama tha se interesi i senatorit është lufta ndaj presidentit Trump dhe jo Zvërneci, apo dëmtimi i mjedisit. Pasi sipas Ramës, nëse ndonjë senator amerikan do të ishte i interesuar për mbrojtjen e natyrës apo të drejtës së pronës, do të kishte reaguar më parë për protestat që kundërshtojnë resortin që do të ndërtohet në Rrjoll, duke nënvizuar se ‘tani kanë çfarë kanë të tjerët me Presidentin e SHBA, nuk mund ta importojnë në Shqipëri dhe mbi të gjitha nuk mund të përdorin shqiptarët si mish për top. Nuk mund t’i përdorin shqiptarët që shqiptarët t’i dalin kundër vetes, t’i dalin kundër të ardhmes, t’i dalin kundër rrugëve të rritjes mirëqenies”.

Njëherësh, kryeministri Rama reagoi dhe këtë të shtunë, teksa nënvizoi se “fakti është se po bie pak e nga pak histeria ndërkombëtare e rrjeteve sociale, e cila nuk ka asnjë lidhje me natyrën e Shqipërisë, me Zvërnecin a me flamingot e Nartës, por ushqehet nga kundërshtira ideologjike të sojsoshme, ku padyshim kundërshtia ndaj Presidentit amerikan është kryesorja fare – se ndryshe dyshoj shumë që një ndërkombëtar i vetëm do të merrej me një projekt zhvillimi turistik në Shqipëri. E s’ka si ndodh ndryshe, do bjerë pak e nga pak, sepse Shqipëria është një shesh shumë i vogël për përsheshin global anti-Trump”!

Pra bëhet fjalë për axhenda ideologjike të luftës politike në vende të tjera, qofshin këto dhe vendet aleate tonat, por që ishte një luftë e cila nuk na takon ne, nuk është e jona! Dhe për më tepër, shoqatat mjedisore, me sa dimë ne nuk protestojnë nëpër kryeqtetet larg lagunave dhe baltës që përmbajnë ato, por pikërisht në vendngjarje! Dhe nëse nuk përtojnë apo nuk kanë frikë se bëhen me baltë, le të shkojnë në Zvërnec apo në Rrjoll, të protestojnë paqësisht për atë që kanë në mendje, të vendosin dhe lule e të bëjnë shëtitje bregut të detit në Lagunë apo në zonën e Rrjollit, por me kushin që të mos dhunojnë policinë, të mos linçojnë forcat e rendit, pronarët apo bizneset! Këtu në Tiranë, për hir të së vërtetës, nuk është ‘lufta jonë’ kjo përpjekje e tyre kundër investimeve të huaja dhe nuk bëjmë mëkat nëse deklarohemi se jemi kundër! Prandaj jemi në demokraci! Nëse duan ta ngrenë nivelin në luftë politike, të zgjedhin grupin nismëtar, të bëjnë partinë dhe të zgjedhin liderin! Fundja ‘kryeministrin’ Pilinci aty e kanë, të gatshëm që të marrë detyrën! Është vetëshpallur kryeministër ai, lëviz me truporoja, e në cep të trotuarit rri çdo natë!

Ndërkohë shqiptarët në shumicë janë pozicionuar fort pro SHBA e pro BE, pavarësisht se kush është në krye tek aleatët tanë të mëdhenj! Pasi Amerika dhe Evropa, si me drejtues të majtë ashtu dhe të djathtë, të njejtën gjë ka bërë: Ka qënë në mbrojtje të shqiptarëve, me pikë kulminante bombardimin e Beogradit, çlirimin e Kosovës dhe mbështetjen e shtetit më të ri shqiptar në Evropë, Kosovën! E nisën republikanët e Bushit plak në SHBA me ‘vijën e kuqe’ për serbët, e vijuan demokratët me Klinton me bombardimin e çlirimin e Kosovës dhe e përmbyllën me republikanët me Bushin e ri, që mbështeti zyrtarisht shpalljen e pavarësisë! Kështu dhe Evropa!

Aleatët tanë veprojnë me qetësi e pa ngutje, në lidhje me qëndrimin ndaj protestës amalgamë në Tiranë, e cila është në ditën e 14-të, teksa nuk shohin askënd që të dalë e të marrë përgjegjësinë e organizimit të saj! Dhe mesazhet amerikane e evropiane jepen me sinjale, veprime dhe deklarata, pa përmendur protestën! Kështu ndodhi me dhënien e vizës për Berishën, anipse nuk i është hequr ‘non grata’, e cila nuk do t’i hiqet kurrë me sa shihet! Mori thjeshtë një vizë të shkurtër dhe të përkohshme për një vizitë mjekësore, ka ndonjë ftohje apo do të bëhet ndonjë vizitë më e thelluar për majasallin ose dhe për trutë, pak rëndësi ka!
Viza për Berishën ngjan më atë ‘liridaljen’ që merrnin ushtarët në kohën e karantinës, disaditore dhe më pas riktheheshin sërish në territorin e repartit, duke mbajtur veshur uniformën ushtarake! Dhe Berisha do të mbajë sërish të veshur ‘kostumin’ e non gratës nga SHBA e Britania, pa e hequr kurrë deri sa të shkojë tek i Plotfuqishim! Ndoshta, protestat anti-Trump e prodhuan dhe këtë sinjal, me Berishën në ‘liridalje’! Po ashtu dhe gjermanët, teksa shefi i diplomacisë deklaroi mbështetjen pa ekuivok për Shqipërinë në BE! Pikërisht në të njejtën ditë u dhanë këto sinjale të qarta, të cilët duhen lexuar nga ata që qëndrojnë në prapaskenë të protestës e po na marrin erzin!

Pasi është një luks i tepërt që bota demokratike të lejojë krijimin e një vatre të re konflikti në Shqipëri e Ballkan, për disa flamingo që pretendohet se rrezikohen dhe që janë harruar që ditën e dytë të protestës, apo për një zemërim qytetar që mendohet se është krijuar ndaj qeverisë dhe opozitës e deri te axhendat e konkurencës rajonale për turizëm, luftës hibridë iraniane, përplasjes së majtistëve e goditjet ndaj Trump e familjes së tij! E thënë më thjeshtë, kjo protestë, megjithëse elementët e bukur që ka pasur brenda saj por edhe linçimin e fortë ndaj kritikëve dhe çdo zëri kundër, nuk ka bindur jo vetëm shqiptarët por as partnerët tanë ndërkombëtarë, që nga SHBA e deri te vendet e anëtare të BE e Britania e Madhe, madje as ‘sponsorët’! Përkundrazi!

Për më tepër që artikulimi në këtë protestë, ata që janë artikuluar, ka lënë shumë për të dëshiruar, pasi fillohet me futjen në burg apriori të liderëve të politikës pa pyetur gjykatat e drejtësinë, për të cilat kjo protestë ka kërkuar që të shkrihen, e deri kërcënimet me vdekje të liderëve aktualë politikë, shkrirjen e politikës aktuale në tërësi, pa pasur në axhendë deri më tani asnjë emër apo grup emrash që do të marrin në dorë fatet e vendit! Thuhet se do ta marrë populli në dorë qeverisjen, është utopi! Eshtë një film i parë që herët nga shqiptarët dhe aleatët tanë të mëdhenj! Kështu ka qënë dhe Partia Komuniste, në ilegalitet në kohën e Luftës së Dytë Botërore! Populli njihte vetën Spiro Moisiun si drejtues të luftës, aleatët me atë komunikonin, ndërsa Enver Hoxha as që njihej. Ishte komisar politik! PKSH ishte në ilegalitet, por që luajti fijet në prapaskenë teksa vrau e dëboi të gjithë rivalët politikë. Dhe në zgjedhjet e 1945-sës pala fituese u përfaqësua nga Fronti Demokratik, jo nga PKSH! Deri në vitin 1948 kështu vijoi, komunistët në ilegalitet!

Shqiptarët u ‘dogjën’ nga drejtimi me ‘pult sekret’ i komunistëve, pa i njohur ata, dhe vuajtën nën izolim e diktaturë për 45 vite me radhë! Po ashtu dhe aleatët u ‘dogjën’ me shqiptarët! Eshtë shumë e vështirë që historia të përsëritet dy herë njëlloj! Ndaj dyshojmë që ‘valvulat’ e shkarkimit u ‘liruan’ dhe për Berishën! I cili deklaroi se u hoq non grata, megjithëse rezulton ende në faqen zyrtare të DASH si i tillë familjarisht! Dhe një gjë e tillë nuk është aspak e mirë as për protestën dhe as për PD-në dhe opozitën, të cilët janë të detyuar të kenë si të ardhmen e tyre, Sali Berishën, deri sa të vdesë! Me afat trashëgimie tek familjarët dhe pas vdekjes!

Ndërkohë që këtë javë pritet të vijë ambasadori i ri amerikan, gjeneralit në pension Eric Wendti emëruar nga Trump, pikërisht nga Presidenti, betejën ndaj të cilit palët ideologjike e kanë zhvendosur në Tiranë, duke përdorur protestën për Zvërnecin si ‘kavie’ të eksperimetit të tyre, për qëllime politike! Mbetet mister se çfarë përmban ‘valixhja diplomatike’ që sjell me vete ambasadori i ri amerikan! Por e sigurtë është se ai nuk ka kurrfarë axhende anti-Trump! Përkundrazi, është në mbrojtje të vendit të vet dhe të Presidentit të vet!

Nga Jakin Marena

Dua të sqarohem që në fillim të herës, për të qenë korrekt me veten dhe lexuesin, në lidhje me përdorimin e fjalës “zogjtë’ që në titull, në opinionin tim për protestat e qytetarëve në Tiranë, por dhe në rrethe!

Meqënëse shoqatat ambientaliste dhe ato tjerat që s’po ua përmend emrin, si zanafillë të ngritjes në protestë, përpos tërheqjes zvarrë të banorit në Zvërnec nga dy të pajtuar nga kushedi se kush për të ushtruar dhunë pasi nuk ishin pjesë e rojeve private të kompanisë, preteksti ky, ishte dhe mbrojtja e Flamingove, Pelikanit Kaqurrel, të shapkave të veçanta si dhe zogjve të tjerë në këtë ligatinë, i përmblodha në një emër, “Zogu” apo “zogjtë’. Pasi nëse përmendim Flamingot ngjyrë rozë, përpos keqkuptimeve për përdorimin e tyre si simbol, do t’i mbetej ‘hatri’ dhe Pelikanit Kaqurrel dhe zogjve të tjerë!

Duke ditur si buka që hamë, që mbi 90 përqind e atyre që protestojnë nuk e kanë parë asnjëherë Flamingon nga afër, këtë zog shtegtar që vetëm para disa viteve u duk edhe në vendin tonë, në fillim u duk në lagunën e Karavastasë, e dha deputeti Braçe asokohe lajmin e mirë për të por dhe për Pelikanin Kaçurel, e pastaj në Zvërnec, madje jemi të bindur se po mbi 90% e protestuesve nuk e dinë se me çfarë ushqehen Flamingot, ajo që mund të themi është se kjo protestë është përtej hallit të disa shoqatave ambientaliste! Të cilat për hir të së vërtetës, pavarësisht dëmit që i sjellin vendit me krijimin e një klime tensioni në këtë kohë turizmi dhe investimesh madhore, në fund të herës e kanë për detyrë të protestojnë në mbrojtje të mjedisit! Marrin goxha financime për këtë! Të kuptohemi, si në të gjithë botën, edhe në Shqipëri, këta aktivistë janë në luftë me qeveritë dhe institucionet për mbrojtjen e ideve të tyre për habitatin, të cilin marrin në mbrojtje!

Nuk u hyj fare këtyre as këtyre teorive konspirative për shërbime sekrete që po përpiqen të ‘gllabërojnë’ Shqipërinë, të zhbëjnë Shqipërinë si shtet! Aspak nuk e ka ndërmend askush ta bëjë një gjë të tillë! Përkundrazi, Shqipërinë e duan të jetë ekzistenciale, por pa asnjë zhvillim! E duan të “virgjër’, pa investime, një eksperiment në mes të Ballkanit. Siç ishte në kohën e Enverit! Ndoshta dhe për në kohë më të hershme, ‘gjthi’ do ishte zgjidhja më e drejtë për njerëzimin, pa tymra, pa fabrika moderne madje as pa fabrika tezgjahu, leshi apo pambuku që mund të ndotnin ambientin! Pasi ne jemi të ekstremit për gjithçka, e duam në limite fare atë që mbrojmë!

Vendet e rajonit tonë kanë atë të ‘bekuar’ konkurrencë për turizmin, zhvillimin dhe lëvizjen e epiqendrës rajonale sa në një vend, në tjetrin. E frika se një investimi prej 4.5 miliardë dollarësh në Zvërnec dhe Sazan, ku investitor përpos vëllezërve biznesmenë nga Katari janë dhe vajza e dhëndri i preferuar i Donald Trump, Ivanka Trump e Jared Kushner, mund ta kthejë Shqipërinë në qendër të turizmit e sigurisë në rajon, ka bërë që të aktivizohen ‘sensorët’ e këtyre vendeve fqinje dhe në Shqipëri! Për ta zhbërë këtë investim madhor, pasi përpos të tjerash një investim amerikan tregon dhe besim e siguri për vendin tonë. Për më tepër që hap rrugën për investime të tjera të mëdha, në energji, minerale dhe naftë! Dhe në Shqipëri janë në ‘habitatin’ fqinjët tanë, gjejnë me ‘okë’ njerëz të tillë për t’i vënë nën shërbim, madje lirë apo falas fare!

Nuk është e re, pasi dhe vetë mediat por dhe politikanë të Athinës janë shprehur kundër këtij investimi, kanë pranuar se është një investim madhor që dizbalancon turizmin në Greqi. Goditja ka shkuar deri në emetimin e lajmeve se ky investim amerikan i planifikuar në Shqipëri mund të shkojë në ishujt grekë, ku sipas këtyre lajmeve bëhet fjalë për ishullin Mikonos, pasi në mënyrë hipotetike hamendësojnë atë që dëshirojnë, tërheqjen e Kushner nga projekti dhe zhvendosja në Greqi, për ta ‘shkatërruar’ fare atë, e thënë kjo me kutin e aktivistëve tanë këty në Shqipëri! Në Greqi, nuk e kanë fshehur as mbështetjen për protestat në Tiranë, as nisjen e autobusëve plot me emigrantë, dhe as ato protestat në Athinë para ambasadës sonë, me pjesëmarrjen e hallexhinjve shqiptarë emigrantë, grekë dhe palestinezë, në ‘mbrojtje’ të Zvërnecit tonë! “Digjen’ fare për ne!

Në bulevardin qëndror të kryeqytetit në protestë marrin pjesë kategori të ndryshme njerëzish! Në vend të parë, kështu duam dhe ne ta evidentojmë, janë ata që janë të shqetësuar realisht për çfarë ndodh në Shqipëri! Që nga ambienti dhe halle të tjera! Këta janë të rinj, të reja, studentë dhe qytetarë që protestojnë për vete dhe mirë bëjnë! Ndërsa futesh në ‘thellësi’ të protestës, përbërja e saj është tepër heterogjene! Teksa sheh pankartat që shfaqin, thirrjet që aplifikojnë dhe përmes altoporlantëve, aty sheh thirrje që vijnë që nga ‘thellësia’ e luftës së Dytë Botërore ‘Shqipëria e shqiptarëve, vdekje e tradhëtarëve’. Dihet burimi i saj pasi në organizim shihet shumë aktiv ish nënkryetari i Partisë Balli Kombëtar, i konvertuar në konspiracionist i madh të cilit bota i duket e sheshtë, pra shesh e do vendin, si Fred Cako!

Në protestë dëgjon dhe thirrje të harruara në kohë, që përdoreshin në kohën e Fatos Nanos së ndjerë në vitet 1998-2005, por me ndryshim emri, “Edi Rama, ka maru ka maru…’! Këto parulla, e sigurtë që janë fryt i ‘memorjes’ së PD, e cila ka pasur dhe ka njerëzit e saj në protestë! Që nga Këlliçi e deri tek Alizoti e Klevis Balliu! Madje duke bërë dhe thirrje për pjesëmarrje masive të demokratëve, ku vetë kreu i PD, Berisha ka bërë ‘pirueta’ brenda disa ditësh, herë ishte pro projektit të Kushner dhe arabëve në Zvërnec e Sazan dhe herë kundër! Duke rimarrë pozicionin sot pro protestës për të kërkuar përmes saj, realizimin e ëndrrës së tij në ‘sirtar’ për 13 vite me radhë, qeverinë teknike! Të cilët zor se e merr për shumë e shumë arsye!

Ndërkohë që ‘shkëlqejnë’ me pjesëmarrjen e tyre dhe tre ‘musketjerët’ e partive të vogla në opozitë, përkatësisht Arlind Qori i “Lëvizja Bashkë’, Agron Shehaj i “Mundësia’ dhe Adriatik Lapaj i “Shqipëria Bëhet”! Të cilët lëvizin, sillen dhe deklarohen sikur ata të jenë ‘pronarë’ të protestës! ‘Vibrojnë’ dhe me sloganet e tyre, që nga ato marksiste që kërkojnë një Shqipëri pa investime të huaja e pa kapitalizëm e deri tek kauzat mobile, që lëvizin sipas ‘erës’ dhe kahjes së protestës! Por që janë të gjithë dyshues ndaj njëri tjetrit! Ka dhe kryetarë partish fantazmë, ‘gjuetarë’ të çdo proteste dhe lëvizjeje në bulevard, të cilët kanë vetëm një anëtar, por dhe vetë nuk votojnë për partitë e tyre! Nuk po ua përmendim emrat, për të mos lodhur lexuesin!

Nuk kishte si të mungonte dhe ‘bërthama’ drejtuese nga ‘vëllai’ i vogël! Pasi në protestë, grupimit i bashkohen dhe grupi i strukturuar i Vetëvendosjes nga Kosova, i cili thërret se duhet Albin Kurti kryetar i të dy shteteve shqiptare! Për të izoluar dhe Shqipërinë me një fjalë, pasi Kosova vijon në krizë prej gati dy vitesh dhe e izoluar, vetëm e vetëm se Albini, megjithëse herë i ka dhe herë nuk i ka votat, nuk denjon të qeverisë shtetin e dytë shqiptar në Evropë! Siç mund të ndodhë me shumë gjasa dhe pas zgjedhjeve të ditës së dielë, teksa vendi për shkak të kokëfortësisë së Albinit mund të shkojë në zgjedhje sërisht në vjeshtë! E kështu me radhë!

Ka dhe thirrje të tilla “Rama e Berisha në burg”, thirrje për mbrojtjen e zogjve, si dhe ‘meme’ me të vërtetë interesante për nga shkalla e konceptimit, e deri në kërkesën për themelimin e një partie të re, që të bëhet nga ambientalistët, por dhe nga shoqatat e tjera si dhe të rinjtë, thirrje të cilave u shtohen dhe ato kundër Trump e Amerikës! Parë në këndvështrimin e ngushtë, këto shoqatat kanë të ‘drejtë’ të jenë kundër Trump dhe familjes së tij, jo pse i bashkohen trendit të ndarjes së botës përgjysmë, në pro e kundër presidentit aktual amerikan, por sepse Trump ka firmosur ca urdhëra të ‘nxehtë’, mes të cilëve dhe ndërprerjen e financimeve ndaj të gjitha këtyre shoqatave nëpër botë! Përfshirë dhe ato shqiptare. Eshtë dhe interes personal ky, Trump u ka ‘fikur derën’! Pra, s’ka lidhje me ‘virgjërinë’ e Zvërnecit, të cilin shprehen dhe protestojnë se duan ta ruajnë patjetër! Të paprekur me një fjalë, një ‘Safari’ në Shqipëri, për zogj shtegtarë, ngjashëm me ‘Safarin’ në Afrikë, por me një ndryshim, atje shumica e kafshëve dhe gjallesave nuk janë migratore, shihen gjatë gjithë vitit! Dhe ka hapësira të gjëra, ku ka të lësh e të marrësh!

Ka dhe nga ata të cilët kanë shkuar në protestë për të shfryrë dufin e tyre, ndaj gjithçkaje, që nga sharja me libër shpie dhe me një fjalor aspak dinjitoz, të kryeministrit Rama, e deri tek fjalori i fiksuar dhe në pankarta, i cili bën të ulin kokën dhe shumica e protestuesve që jan ë me të vërtetë seriozë! Me Berishën nuk e ‘kruajnë’ në fakt, i ‘sygjestionon’ ai me sa duket! Ka dhe panelistë, përfaqësues të biznesve, që janë borxh deri në grykë te tatimet, bankat e kudo ku kanë marrë para! Ka dhe influencerë e blogerë që ‘luftojnë’ për ndjekës, apo persona që duan të jenë gjithnjë në qendër të vëmendjes! Ka nga të gjithë ky lloj që paraqiten si shpëtimtarë të kombit! Por që asesi nuk mund të triumfojë alternativa “t.q.r” që u shpalos në protestë, pasi të gjithë shqiptarët në përgjithësi që kur lindin, lindin me këtë alternativë gati! Dhe janë pak më të frikshëm ata që nuk bërtasin podiumeve, të cilët rrezikojnë gjithnjë ta zbatojnë këtë alternativë në heshtje! Ata të podiumeve, thjeshtë i bëjnë pjesëmarrësit të ulin kokën nga turpi, pasi ‘qeni që leh s’të ha’!

Ka dhe përfaqësues të islamit radikal, që dalin me maska në protestë, kanë pankarta kundër Izraelit dhe pro Iranit e Palestinës, lëshojnë thirrje anti-semite duke na marrë erzin kudo në botë dhe duke u përpjekur të zhbëjnë arritjen në luftën e dytë botërore kur përballë represionit nazist, shqiptarët morën në mbrojtje hebrejtë! Ky fluks islamik vjen nga ‘Rruga e Kavajës’, i mbështetur nga ndonjë shoqatë anti-semite, si dhe nga Kosova, e vende të tjera të rajonit, deri në Sanxhak, Bosnje, Beograd dhe më gjërë! Ka dhe mbështetës nga Greqia për protestën dhe kjo kuptohet, janë në ‘mbrojtje’ të turizmit të tyre e shfrytëzojnë shqiptarët! Prandaj themi që protesta tashmë i ka kaluar ‘caqet’ e Zvërnecit dhe ambientit, duke kërkuar rrëzimin e qeverisë e anulimin e disa vendimeve dhe ligjeve të miratuara nga Parlamenti! Dhe në krye të herës, anulimin e projektit të Zvërnecit dhe Sazanit, investim i madh i arabëve nga Katari dhe i Kushner e Ivanka Trump!

Pra ka një kakofoni kërkesash, idesh, lëvizjesh e përfaqësimi, normale për një protestë qytetare, por që në fund të herës, realiteti duhet të triumfojë, pasi një protestë pa kokë dhe pa qëllim final, aq më tepër pa fund, nuk arrin të formësojë asgjë, përkundrazi do të shuhet aq shpejt sikurse nisi! Duhet një lidership të cilit duhet t’i drejtohen institucionet për të dëgjuar kërkesat e tyre apo dhe gazetarët, ata që s’janë bashkuar me protestën, për të marrë ndonjë prononcim.

Ndoshta duhet lidershipi që dhe ta kanalizojë këtë protestë në një parti politike, apo në një lëvizje ambientaliste apo islamike nëse përputhet me ligjin, balliste apo konspiracioniste! Si të jetë më e lehtë për t’u bërë, por ama duhet një lidership, pasi deri më tani nuk kemi parë në protestë një bërthamë organizatore! Duke ngjallur dhe keqkuptime, ndoshta dhe të panevojshme! Sepse nëse vijon kështu do të mbeten në rrugë duke bërë xhiro e duke u rrudhur përditë! Thjeshtë do të kthehet në bezdi por dhe argëtim nëpër rrjetet sociale, pasi kanë shpërthyer ‘meme’-et dhe adresat e rreme! Siç ka ndodhur me opozitën e drejtuar nga Basha, e tani nga Berisha! Të paktën Basha këndonte himnin kombëtar, para flamurit me shqiponjën dykrenare, ndërsa tani ka thirrje para Flamingos!

Por ajo që shihet me sy të lirë, është fakti se tre partitë e reja opozitare, që kanë dhe deputetë në Kuvend, 4 të tillë gjithsej, Qori, Lapaj e Shehaj po përpiqen për të marrë drejtimin e protestës! Dhe deri diku ia kanë arritur, pasi kanë nisur të bëjnë përzgjedhjen e njerëzve që do të flasin, të parullave e të thirrjeve anti-kapitalizëm, anti-Trump, anti-Ramë, anti-Berishë dhe për gjithçka! Kjo ka sjellë shqetësim dhe tek organizatorët fillestarë të protestës, të cilët po tentojnë t’i mbajnë sa më larg, por pa rezultat! Madje dhe konspiracionisti ballist, Cako është shqetësuar shumë nga prania e Qorit, teksa është shprehur se Arlind Qori është një nga njerëzit kryesorë që manipulon protestën, duke shtuar se bashkëshortja e tij ka pasur në dorë fondet e Sorosit. Eshtë përzierë dhe Salianji, bashkë me mbështetësit e tij që kërkojnë të dominojnë, duke shfrytëzuar mungesën e një qëndrimi zyrtar të PD deri më tani, në mbështetje të protestës!

Duke parë këtë ‘intervenim’ të partive të reja, Berisha ka lëshuar alarmin për të kapur lidershipin e protestës e për të mbajtur aq sa mund të mbajë për PD-në! Ka krijuar dhe një pol tjetër proteste me tribunë vetjake ku i bën thirrje turmës për rrëzimin e Ramës! Janë bërë ambientalistë dhe demokratët, duke filluar nga Këlliçi, e vijuar me Alizotin, Klevis Balliun dhe deputetë e zyrtarë të tjerë të PD! Madje protestën e Shkodrës e ‘privatizuan’ fare, duke zhdukur Berishën nga burgu dhe lënë vetëm Ramën! Nuk pretendohet të shkojnë Noka apo Strazimiri në protestë, pasi gjuha e ashpër e tyre këto ditë kundër protestës, e përjashton një gjë të tillë! Do të bëhej nami!

Ndërsa Berisha qëndron në prapaskenë, po lëviz fijet, për ta dominuar lidershipin e protestës, gjë që po ia arrin pak e nga pak, përmes njerëzve të tij që kanë marrë në dorë frenat vende vende! Madje po lëshojnë thirrje më të ashpra se vetë protestuesit më kamikazë, po ndërhyjnë dhe në rrjetet sociale, duke qënë në të njejtin ‘nivel’ fyerjesh ndaj kundërshtarëve të protestës, me ata që kanë marrë ‘flamurin’ për këtë punë! Kanë paraqitur si paketë ndryshimet ligjore dhe 4 kërkesa e protestuesve të artikuluar kështu në mënyrë klandestine, paketë ligjore që përfshin: Shfuqizimin e ligjit për Investimet Strategjike, shfuqizimin e ndryshimeve në ligjin për Zonat e Mbrojtura, shfuqizimin e ligjit për Paketën e Maleve, shfuqizimin e disa dispozitave në ligjin për Trashëgiminë Kulturore. Të cilat ndoshta janë artikuluar nga vetë përfaqësuesit e PD në protestë, për t’i paraqitur në emër të protestës së qytetarëve!

Pra, përtej numrave pjesëmarrës në protestë, përtej parullave, thirrjeve për rrëzimin e qeverisë, përtej kërcënimeve për burgosjen e politikanëve aktualë pa gjyq, përtej mbrojtjes së ambientit apo zhbërjerjes së projektit turistik në Zvërnec dhe Sazan, përtej thirrje anti-Trump, anti-semite dhe pro Kurtit apo Palestinës e Iranit, ‘beteja’ e vërtetë që po zhvillohet brenda kësaj proteste, është ajo e marrjes së lidershipit të saj! Prandaj po kërkohet me insistim krijimi i një partie politike. Ia kanë ‘gjetur’ dhe emrin, “Shqipëria e re” e “Partia e Bulevardit’, për të amortizuar ‘intervenimin’ e partive opozitare dhe mbi të gjitha të Berishës dhe PD, të cilët po kapitalizojnë ditë pas dite këtë protestë! E nisur si protestë qytetare!

Zgjatja pafund e protestës, me indikacione nga jashtë e nga brenda, pa një kokë publike drejtuese e akoma më tepër pa një lidership dhe një lider real e funksional, me thirrje kërcënuese ndaj kujtdo që mendon kundër tyre, me thirrje për burg dhe jakobinizëm ndaj popullatës indiferente, duke shkuar kafe më kafe e derë më derë dhe kërcënuar, rrezikon që kjo lëvizje e nisur si qytetare të tjetërsohet dhe të kapitalizohet pikërisht nga ai, Sali Berisha, ‘baba dhe nëna’ e molotovit, dhunës dhe vrasjeve politike, të cilin një pjesë e protestuesve e duan në burg bashkë me Ramën!

Megjithëse sharjet me libër shpie ndaj tij kanë munguar, janë vetëm për Ramën! Berisha nuk duron aty dhe këtë e dinë aktivistët, panelistët, albinistët, të ardhurit nga rajoni e deri këta radikalët e podiumëve të alternativës “t.q.r”, që nuk dinë shumë fjalë, vetëm ato të ndyrat, sa kanë tmerruar gratë e kalamajtë që janë pjesë e protestës, një pjesë e të cilëve po reagojnë! Rreziku është real për protestën, dhe mund të dështojë ky revolucioni i “zogjve’, i nisur për të rrëzuar Ramën por që mund të forcojë në krye të opozitës Berishën! I cili dihet sa mbështetje reale ka, në ballafaqimet elektorale! ‘Bërthama’ qytetare e aktiviste e protestës është dobësuar!

Nga Jakin Marena

Protestat jashtë partive politike për një vend normal dhe demokratik janë gjë e mirë, janë shëndet demokracie dhe mbi të gjitha ndikojnë fort në mirëqeverisjen e vendit! Nga cilido grupim që organizohet dhe në drejtim të cilësdo qeverie, pavarësisht kahjeve, i drejtohet!

Edhe protesta për Zvërnecin, parë në planin ‘macro’, është një zhvillim pozitiv, për shkak se partitë e mëdha janë mbajtur larg këtij tubimi! Pavarësisht zanafillës nga një veprim ordiner i një polici privat, që shkoi deri në gomarllëk me atë veprimin e panevojshëm, e drejta për të protestuar është një aset i jashtëzakonshëm demokratik!
Dhe një protestë e kryen misionin e vet, pas realizimit të kërkesave për të cilat ishin nisur që në krye të herës!

Qeveria nga ana e saj i mori masat, u hoqi licensat kompanive private, policia shkarkoi gjithë zinxhirin komandues të policisë së Vlorës, këtë grup sehirxhinjsh të cilët nuk ndërhynë kur po dhunohej një qytetar që po protestonte! Prokuroria e bëri punën e vet, e dërgoi në gjykatë personin që ushtroi dhunë dhe kjo e fundit e la në arrest! Deri këtu në rregull!

Por pikërisht atëherë kur mendohej se gjithçka po shkonte drejt normalizimit, filluan të dalin në dritë axhenda të tjera, të një konglomerati grupesh, grupimesh, shoqatash e deri ndërhyrje nga bota e fqinjësisë së ‘mirë’, e cila kurrë nuk e harron vesin, për t’u ankuar deri në Parlamentin Evropian se po ‘rrëmbehn pronat e minoritetit grek në “Zvërnec”! Për të mirën e tonë po përpiqet, për të mbrojtur territorin shqiptar, sikurse thotë!

Protesta u zhvendos në Tiranë, një protestë masive që drejtohej kryesisht nga shoqëria civile dhe në pamje të parë me disa marksistë nëpër të, sa për të ‘prishur syrin e keq’, por për axhendën e tyre politike të luftës ndaj çdo investimi të huaj në Shqipëri, me pretendimin se po shitet e blihet vendi tek ‘kapitalizmi gjakpirës’. Ndërsa shqiptarët, për këta marksistë, minimumi duhet të jenë si në kohën e Enver Hoxhës që i ndaloi me ligj huatë dhe investimet e huaja, dhe maksimumi për të ruajtur vendin nga grabitja dhe mjedisin nga ndotja, të përdornin gjethin për të mbuluar pjesët intime të trupit! Deri këtu arrihet!

Tashmë sloganet ndryshuan, ndërsa kërkesat u rritën dhe gjithë shigjetat u drejtuan tek investimi i madh i huaj prej 4.5 miliardë dollarësh në Zvërnec! Nga një ndër kompanitë më të mëdha në botë, jo izraelite sikurse kishin marrë dhenë legjendat urbane por një bashkëpunim mes një biznesi të fuqishëm nga Katari dhe Jared Kushner e Invanka Trump, dhëndri e vajza e preferuar e presidentit amerikan, Donald Trump!

Rrallë herë ishin përputhur interesat ekonomike dhe në shërbim të turizmit elitar shqiptar përmes kompanive të mëdha botërore që hidhnin lekë në Shqipëri, dhe interesave strategjike, të bashkëpunimit me aleatët tanë të mëdhenj! Investim amerikan ky! Pikërisht këtu me sa duket lindi dhe reagimi, ku u përzien bashkë xhelozia shqiptare dhe ballkanike, inati shqiptar dhe sponsorizimi ballkanik, e akoma më larg deri rus, vetëm e vetëm për ta zhbërë këtë investim dhe për të realizuar si herët e tjera zhvendosjen e tij në vendet fqinje! Shembujt janë të kohëve të fundit, ku në vitin 2006 një investim i planifikuar në Durrës u zhvendos në Malin e Zi dhe herën tjetër investimi i Kakomesë përfundoi diku tjetër, po te fqinjët tanë! Gjysma e tij më saktë!

Me gjithë sqarimet direkte të kryeministri Edi Rama, i cili tha se ende nuk ka një projekt, por po përpunohet në disa studio të mëdha, si dhe të gjitha sqarimet e tjera se çdo gjë po operohet sipas ligjit dhe në funksion të përfitimit të shtetit shqiptar, me gjithë faktin se toka është me titull pronësie këtu e mbi 25 vite dhe për më tepër nuk është goditur asnjëherë në gjykatë nga banorët apo dikush tjetër, sërish protesta vijoi nën thirrjet ‘Shqipëria d’është në shitje’ e gjëra të tjera të këtij lloji! E drejtë e tyre protesta, e shoqatave dhe grupeve të interesit! Madje dhe e marksistëve!

Por kori i patriotizmës, normale për një shoqëri ballkanike sikurse është ajo shqiptare, pësoi disa ‘njolla’ të errëta, të cilat nuk kaluan pa u vënë re! Në fillim u përzie Athina zyrtare, e cila reagoi për një shtetas të saj në Shqipëri, i cili ishte dhunuar nga polici privat! Mirë bëri, pasi personi në fjalë kishte dhe shtetësi shqiptare por dhe shtetësi greke! Ama deklarata se po preken homogjenët grekë në Zvërnec dhe po u merren pronat e tyre nga qeveria, habiti jo vetëm shqiptarët por dhe vetë minoritarët, të cilët e dinë se janë të shtrirë poshtë Vlorës, dhe jo sipër saj!

Pastaj i vuri ‘vulën’ progonatasi i greqizuar Fredi Bejleri, këtyre u duhet bërë testi i ADN-së pasi jemi në kohëra të tjera tashmë dhe teknologjia ka përparuar për të parë se çfarë gjaku kanë, i cili si eurodeputet grek që është, u ankua në PE se po dhunohen grekët etnikë në Zvërnec dhe po u merren pronat nga qeveria shqiptare! Por dhe deklaratat e ish kryeministrit Tsipras!

Ndërkohë që u zbulua dhe identiteti i personit të dhunuar nga polici privar, me shtetësi greke dhe shqiptare. Eduart Subashi quhej personi i dhunuar nga rojet private gjatë protestës në Zvërnec, i cili u shpreh se si qytetar i Vlorës kishte dalë për të kërkuar të drejtën e tij, për një pronë që tha se e zotëron me dokumenta. Pronën e kishte marrë me ligjin 7501 për tokën teksa ai pretendoi publikisht se donte që të përfshihej në investim dhe toka e tij! Për të fituar ndonjë lek me një fjalë dhe ai! Gjithsesi dhuna nuk justifikohet ndaj tij, ajo ishte e rëndë dhe duhet dënuar!

Por ama, përfshirja e mediave greke në tërë këtë punë, e rrjeteve ballkanike të mediave, me qendër këtej nga veriu i Ballkanit, dhe mbi të gjitha furnizimi i protestës dhe me njerëz të ardhur me autobusë nga Athina, na duket sikur e njollosën këtë protestë! E cila për hir të së vërtetës do ta kishte fuqinë më të madhe nëse do të bëhej në Zvërnec! Për më tepër që mbërritja e mbështetjes deri dhe nga serbët e Mitrovicës së Veriut, u panë në mesin e turmës që lëvizte nga Ministria e Brendshme deri tek Kryeministria, dukej qartë akcenti i tyre i shqipes, aq sa si me urdhër flisnin vetëm përmes një ‘përkthyesi’ nga Tirana, i cili shpjegonte se ishin shqiptarë të shqetësuar për shitjen e vendit!

Duke qënë se nuk duam t’i besojmë këto teoritë konspirative, me spiunë rusë në mes të turmës së protestuesve në bulevardin qëndror të kryeqytetit apo deri sarajevas e malazias, thjeshtë po i përmbahemi asaj që kemi parë dhe asaj që është shfaqur publike, për të evidentuar faktin se patriotizma e organizatorëve të protestës për Zvërnecin u shua që në momentin e hyrjes së autobusëve me protestues nga Greqia, që me thirrjet anti-Trump dhe anti- investim të huaj në Shqipëri, që me përfshirjen e marksistëve në këtë axhendë si dhe të ndonjë deputeti të PD tek tuk, fjala është për ish prokurorin Arjan Ndoja, që ‘lëviz’ me mandatin e deputetit të PD në xhep.

Përzierja e kaq shumë axhendave ballkanike për një investim sipas rregullave në një cep të Shqipërisë, si në Zvërnec, tregon qartë se për shkak të xhelozisë, për shkak të parave të hedhura apo për shkak të inateve personale ndaj njëri tjetrit, po rrezikon fort një investim të huaj prej 4.5 miliardë dollarësh, që do ta rendisë Shqipërinë në majën e turizmit në Ballkan!

Dhe nuk e themi vetëm ne që këto kauza, kryesisht mjedisore po rrezikojnë Shqipërinë dhe vetë Ballkanin! Institute for Democracy and Electoral Assistance në raportin e tij të vitit 2025 për Ballkanin Perëndimor, ka dokumentuar se aktorë të huaj të lidhur me interesa ruse dhe rajonale shfrytëzojnë rregullisht temat mjedisore, etnike dhe kulturore për të koordinuar fushata dezinformimi në vende si Shqipëria, Maqedonia e Veriut e Mali i Zi.

Mjedisi, sipas raportit, është bërë një nga vektorët më të preferuar, sepse mobilizon emocione legjitime të qytetarëve dhe e bën shumë të vështirë dallimin midis aktivizmit autentik dhe operacioneve të orkestruara. Në analizën e janarit 2026, ky institut identifikon si “sinjale paralajmëruese të hershme” pikërisht ato modele që sot po vërejmë në debatin publik dhe që përfshijnë, video të prodhuara në cilësi profesionale që qarkullojnë në mënyrë koordinuese, narrativa “patriotike” që paraqiten si spontane, por që shfaqen njëkohësisht në disa portale, dhe presion i organizuar mbi institucione e zyrtarë.

“Objektivi qendror i ndikimit rus në Shqipëri nuk është të zhvendosë besnikërinë publike, por të gërryejë besimin institucional. Për këtë arsye, përpjekjet e dezinformimit përqendrohen në paraqitjen e qeverisë si tërësisht të korruptuar, të reformave si kozmetike ose të rreme dhe të procesit të integrimit në BE si të pandershëm ose të kotë. Qëllimi nuk është mobilizimi masiv, por erozioni i qetë: prodhimi gradual i cinizmit, lodhjes dhe shkëputjes qytetare.

Duke amplifikuar mangësi reale të qeverisjes në dëshmi të kalbëzimit sistemik dhe duke i kornizuar proceset e ngadalta ose komplekse të reformës si mashtrim i qëllimshëm, këto narrativa synojnë të minojnë besimin në procedurat demokratike dhe të dobësojnë durimin publik ndaj procesit të anëtarësimit. Në këtë mënyrë, ato synojnë të vonojnë ose të ndërlikojnë politikisht trajektoren përndryshe shumë të përshpejtuar të integrimit të Shqipërisë në BE”, thuhet në raportin e këtij instituti!
Njëherësh, nënvizohet se çrregullimet kibernetike dhe teknike luajnë një rol mbështetës në këtë mjedis.

Incidentet e të dhënave, rrjedhjet, manipulimi i platformave ose ndërhyrjet digjitale janë më pak për dëme të menjëhershme dhe më shumë për të përforcuar narrativën e disfunksionit- se institucionet nuk janë të besueshme, proceset janë të errëta e shteti është ose i paaftë ose i kapur.

Sinjalet e hershme paralajmëruese në këtë kontekst përfshijnë valë të papritura dezinformimi të lidhura me raportet e progresit të BE ose me momente kyçe reformash, narrativa të koordinuara që i paraqesin reformat si të inskenuara ose mashtruese; rrjedhje të dhënash ose incidente kibernetike të kornizuara si prova të kolapsit sistemik; dhe një përputhje në rritje midis indinjatës antikorrupsion dhe cinizmit anti-integrim.

Cenueshmëria e Shqipërisë, pra, nuk qëndron në drejtimin nga i cili mund të kthehet, por në faktin nëse ajo mund të ruajë besimin publik mjaftueshëm gjatë për të përfunduar një proces transformimi kërkues dhe politikisht të kushtueshëm.

Pra e thënë më shqip, nuk bëhet fjalë për një ‘bythë vend’ atje në Zvërnec, që po penalizon ‘këngën’ e pelikanëve dhe zogjve të tjerë, se këto janë të garantuara, apo se po preket greku me emrin e ‘homogjenit’ Subash, të dhunuar padrejtësisht nga një polic privat, i cili kurrë mos daltë nga burgu! Bëhet fjalë për bllokimin e investimeve të mëdha në Shqipëri, shfaqja e vendit tonë si i pasigurtë për këto investime dhe për pasojë zhbërja e këtij vendi! Kjo duhet pasur kujdes!

Aq më tepër që mendojmë se paraqet një rrezik akoma më të madh shtrirja e ‘krahut’ nga ana e SPAK, i cili ka sekuestruar llogarinë bankare të kompanisë investuese si dhe bllokuar transaksionit, që mund të rezultojë tërësisht arbitrar dhe negativ, me pasoja për investimet e huaja në vend! Jo të mos hetojë, por të mos bllokojë të paktën! Me një vendim të habitshëm, E themi këtë sepse SPAK ka vënë nën sekuestro preventive, llogaritë bankare të ‘Albania Land Development’, kompania e cila zotërohet nga dy sipërmarrësit e njohur nga Katari, vëllezërit Moutaz e Ramez Al-Khayyat, të cilët kanë parashikuar të investojnë së bashku me Jared Kushner-in, dhëndrin e presidentit amerikan Donald Trump, në ndërtimin e një resorti luksoz në Zvërnec.

Janë 4.5 miliardë dollarë investim i huaj, nuk është shaka! Dhe ky vendim i SPAK është një thikë me dy presa që rrezikon investimin, pasi hetimi në rregull, por bllokimi i llogarive bankare të bizmesmenëve të mëdhenj të huaj, ende pa filluar investimi, është rrezik!

Nga Jakin Marena

Sali Berisha, nga 23 maji i këtij viti e deri në vitin 2030 do të jetë kryetari i ri i PD! U nis për t’u zgjedhur sipas parimit ‘një anëtar, një votë’, vijoi me thirrjet për një votëbesim për kreun e ri demokrat dhe përfundoi me një ‘referendum’ për të të përjetësuar Berishën në krye të PD!

Praktikisht Berisha, tashmë 82 vjeç, është jo vetëm kreu më i vjetër i një partie të djathtë, futni dhe partitë e majta e të qendrës këtu po deshët, në të gjithë botën, nuk flasim për kryetarë fisesh apo mbajtës kurore mbretërore, por është dhe kryetari më jetëgjatë në krye të një partie politike!

Teksa ka deklaruar se zgjedhja e tij ‘do ta lërë pa gjumë Edi Ramën deri në vitin 2030’, kohë që përkon dhe me zgjedhjet e përgjithshme parlamentare më 2029, që për Berishën me sa duket që tani janë të fituara nga PS dhe Edi Rama, Doktorit i bie që të mbushë plot 40 vite në krye të PD.

Të ishte fjala për fitore të njëpasnjëshme në garat e elektorale hajde de, falet! Pasi, në literaturën politike kudo në botë, partia është bashkim vullnetesh të lira të anëtarësisë për një qëllim të përbashkët, ndërsa kryetari zgjidhet nga këta vullnet-lirë për të sjellë partinë në pushtet dhe për të implementuar programin e alternativën e kësaj partie, në qeverisjen e vendit!

Një kryetar partie që fiton zgjedhjet parlamentare apo dhe vendore, nuk mund të futet në për votim me një kandidat rival, për të zgjedhur një kryetar të ri! Ai largohet vetëm nëse dëshiron vetë të tërhiqet në jetën private, duke udhëhequr një ‘rotacion’ të qetë në parti dhe në qeverisjen e vendit, që e ka drejtuar deri në ato momente! Një parti fituese asnjëherë nuk hyn në garë për të zëvendësuar drejtuesin që udhëhoqi këtë fitore, me një kryetar të ri! Lideri është zgjedhur nga anëtarësia e vet dhe nga qytetarët e vendit, për të qeverisur jo vetëm partinë, por edhe vendin! Është aksiomë kjo, pranohet pa vertetim, dhe s’mund të ndryshohet as nga rivalët politikë të fituesit dhe as nga këta panelistët që nën shenjën e ‘barazitizmit’ në këtë vend, atavizëm e kohës së Enver Hoxhës ky, kërkojnë të fusin ‘norma’ të reja. Nuk nuk mund ta zhbëjnë këtë!

Ndërsa Sali Berisha praktikisht i ka humbur zgjedhjet përballë Edi Ramës, që nga viti 2013 e këtej! Nuk ka fituar asnjë palë zgjedhje, as parlamentare dhe as vendore! Zero fitore dhe 100 përqind humbje! Do të thotë dikush se zgjedhjet i humbi Lul Basha, deri më 2021, si kryetar i PD dhe opozitës! Po çfarë Lulziu ishte kryetar i PD!

Lulzim Basha u emërua si person i dëgjueshëm nga Berisha, edhe kur humbiste ri-emërohej po nga njerëzit e Berishës, kryetar. Meqënëse në vitin 2021 u afrua shumë afër partisë fituese me vota, thuhet se koalicioni opozitar i drejtuar nga Basha ishte 30 mijë vota larg PS së Ramës, Lulit të shkretë iu mbush mendja se ishte me të vërtetë kryetari i PD! Rrethanat e sollën që dhe SHBA e shpalli Berishën person ‘non grata’ familjarisht dhe Bashës iu kërkua që ta pezullonte ‘babain’ nga PD! Të vriste ‘babanë’ me një fjalë, atë politik themi! Basha e ‘plagosi’ vetëm, nuk e ‘vrau’!

Pikërisht këtë e priti keq Berisha, cili ishte kreu i vërtetë i PD, ndërsa Basha ishte njeriu që ai e lëvizte që nga prapaskena, për të gjitha arsyet e mundshme, për të mos qënë vetë në publik! Këtu e shkeli Basha, dhe ‘ati’ politik nuk ia fali, e ‘vau birin’. Pas disa goditjeve deri në sulm fizik ndaj selisë së PD, arriti t’i marrë përmes levave të tij në gjyqësor dhe me ndonjë ndihmë tjetër, vulën, logon e selinë e PD, si dhe ta dëbonte përfundimisht jo vetëm nga PD por dhe nga skenat politike! Duke i marrë dhe deputetët më të afërt, se anëtarësinë e kishte gjithnjë Berisha!

Madje e shpalli dhe armik të ‘parevokueshëm’, duke ia mbyllur derën përfundimisht në PD! Të njejtën gjë bëri dhe me Alibeajn. E tashmë së fundmi, edhe me Salianjin e Balliun, të cilët ‘gabuan’ kur menduan se mund të bënin kandidatin për kryetar të PD, duke rivalizuar Berishën! Madje i përmendën dhe faktin që sipas nenit “Basha’ ai duhej të ishte larguar menjëherë nga drejtimi i PD, për t’ju hapur rrugën e kandidimit të ‘mëtonjësve’ të rinj për kryetar partie! I përmendën nenin “Basha”, pra me Lulin brenda dhe pikërisht për këtë arsye u ‘xhindos’ Berisha, i cili i përjashtoi jo vetëm kandidatët, por dhe mbështetësit e tyre! Duke garuar me veten!

Nuk donte probleme Berisha në pronën e tij, PD-në! E donte rrugën të pastër, një hipotekë të pastër e pa asnjë ‘njollë’ në testamentin e lënë për fëmijët kur të vijë e ta marrë i Plotfuqishmi! Sa më vonë nëse varet nga dëshira jonë, dhe pastë jetë sa më të gjatë, si me apo pa këmbë e dorë! Të jetë aty, si një ‘aset’ i fortë për PD-në dhe për qytetarët që ta kenë si ‘etalon’ për të treguar se si duhet të jetë një kryetar partie që të mos marrë kurrë vota për të qeverisur këtë vend! Këte di dhe vetë Berisha, por bën sikur s’kupton, ndaj dhe ‘referendumin’ e 23 majit ku u zgjodh si kryetar i ‘ri’ i PD, e quan si më demokratikun në botë dhe një “plumb për armikun Edi Rama”!

Kënaqet jo vetëm se u zgjodh, por argëtohet akoma më shumë me ‘freskun’ që i bëjnë ata që nuk e duan madje as gjallë mbi tokë, por që i janë afruar me të, vetëm për një copë mandati deputeti dhe për të shpresuar se kjo mund të vijojë dhe në të ardhmen, ‘radhë’ që nis nga Gaz Bardhi, e vijuar me Gjekmarkajn dhe emra të tjerë rrotull tyre! Ndërkohë që Noka, Vokshi dhe grupi tjetër i besnikëve të tij, natyrshëm e quajnë nder t’i shërbejnë. Për më tepër që nuk kanë lëvizur nga mbështetja ndaj tij kurrë, ndoshta e vetmja vlerë e tyre, dhe sikur kjo besnikëri të jetë bërë nga zori dhe pamundësia për të bërë hajr larg Berishës! Ama s’kanë lëvizur nga Berisha asnjëherë!

Dhe meqë jemi tek shifrat, Berisha në vitin 2030 kur përfundon ky mandati i 23 majit si kryetar, mbush plot 40 vite si kryetar partie! Eshtë rekord më vete, dhe i njejtë me atë të ‘babait të tij shpirtëror’, Enver Hoxha, kryetarit jetëgjatë komunist. Ku për për hir të së vërtetës gjatë luftës e deri në vitin 1948, Partia Komuniste ishte në ilegalitet e vendin e ‘udhëhiqte’ Fronti Demokratik! Por për lehtësi, e lëmë që Enveri qëndroi Sekretar i Parë i PKSH e më pas PPSH, plot 40 vite! E mbi të gjitha ai u nda nga jeta më 11 prill 1985, duke qënë njëherësh Sekretar i Parë i PPSH, dhe drejtues i vendit, homazhet iu bënë si sekretar i parë pa asnjë shkëputje!
Por dhe Berisha mbush në vitin 2030 plot 40 vite si kryetar i PD, pikërish aq vite sa ka qeverisur PPSH-në Enver Hoxha! Por ama, Berisha po rrezikon rekordin e Enverit, pasi duke qënë se është një racë që jeton gjatë, ndërkohë që në PD nuk ka asnjë rival, mund të marrë me referendum dhe një mandat tjetër, deri në 2034, dhe rekordi i Enverit thyhet njëherë e mirë! Duke e bërë ish diktatorin komunist që të ‘rrotullohet në varr’ dhe të ‘dridhet, pasi nuk e ka menduar askush që rekordi i tij do të thyhej nga një udhëheqës post-komunist! Dhe për më tepër që e mban veten për të djathtë! Berishës nuk po ia llogarisim 25 vitet pa shkëpuetje, si anëtar e sekretar i PPSH, nga më të devotshmit madje, pasi nuk ishte “Sekretar i Parë”!

Sa për faktin se do të vdesë si kryetar partie njësoj si Enveri, këtë e ka mbyllur me kohë dhe vakt Berisha! Që në momentin e ‘hipotekimit’ të PD si pronë të familjes së tij, një biznes ky me të vërtetë madhor dhe fitimprurës që sjell mbështetje, mbrojtje përballë drejtësisë por dhe ndonjë lek, të kuptohemi! Janë mësuar me lekë tashmë, kanë dhe vila jo vetëm në Tiranë e Durrës, kanë banesa jo vetëm në disa qytete kryesore të vendit, por dhe në kryeqytetet e qytetet më të mëdha në vendet anëtare të BE! E ka pranuar vetë vajza e ish kryeministrit! Ndonëse SPAK është bërë i pandjeshëm ndaj këtyre pohimeve, dhe Berishën pritet ta ‘dënojnë’ vetëm pas vdekjes fizike! Që përkon me përfundimin e mandatit të vetë SPAK! Po shtyje ta shtyjmë këtë ‘patate të nxehtë’!

Përfundimisht Berisha është njeriu i rekordeve! Në PD themi! Po kërcënon dhe vetë ‘atin’ e tij shpirtëror me rekordet e tij! Duke u bërë ‘nul’ dhe këto rekordet e qëndrimit në ujë, jo notit, pasi Berisha kurrë nuk ka ditur not! Ndërkohë që dhe demokratët janë gati për të thyer rekorde, pasi janë të vetmit anëtarë partie në planet që mbështesin një ‘kufomë’ politike për t’i udhëhequr, vetëm në opozitë! Deri sa ta marrë dhe vetë PD-në në varr, për t’i bërë ceremoninë e dyfishtë!
‘Funeralin’ politik të PD, Berisha e ka përgatitur me kohë dhe vakt! Por e ka vulosur më 23 maj, kur u ‘ratifikua’ si kryetar i PD! Duke mos marrë asnjë urim nga asnjë parti motër e PPE! Madje as dhe nga këto partitë e djathta shqiptare në Kosovë apo në rajon! Nuk është uruar as nga krerët e partive aleate në Tiranë! Ama Berisha do ta thyje rekordin e Enverit, do t’i kalojë 40 vitet e tij si “Sekretar i Parë” i PD! Në amëshim do shkojë si kreu i PD, si Enveri i PPSH! Është e sigurtë!

Nga Jakin Marena

Lideri i opozitës, Sali Berisha, asnjëherë nuk ka qenë në gjendje të pranojë humbjen në zgjedhje përballë rivalit politik! Kurrë s’ ka deklaruar me gojën plot se humbi në një garë elektorale, për të uruar kundërshtarin politik për fitoren! E ka problem këtë! Gjithnjë ia ‘vjedhin’ fitoren!

Dhe në vitin 2013, kur mori mbi 1 milion vota kundër dhe u rrëzua me turp nga pushteti, pas 8 vitesh si kryeministër në një qeverisje të mbushur me korrupsion të përgjakshëm dhe vrasje politike në mes të bulevardit, korrupsion masiv dhe krim, bëri sikur u dorëhoq përmes lotësh nga posti i kreut të PD, por në realitet nuk e pranoi kurrë se ishte ‘rrahur’ keq nga rivali politik!

Qëndroi në heshtje, pas kuintave, duke lëvizur fijet e drejtimit të PD, përmes të emëruarit në krye të kësaj partie Lulzim Basha, për të shpikur në këtë mënyrë ‘qytetarin dixhital’, përmes të cilit akuzonte mes të tjerave, qeverinë e majtë dhe kryeministrin Edi Rama se ia kishin vjedhur votat dhe në vitin 2013!

Pavarësisht se fitorja ishte tepër e madhe për t’u vjedhur, siç pretendon ai!

Në të gjitha humbjen e shënuara nga opozita, në drejtimin formal të Bashës, Berisha ka pasur rolin e tij primar, që nga zgjedhja e kandidatëve për deputetë, përjashtimi i figurave kryesore të PD, e deri tek protestat e dhunshme dhe djegia e mandateve, bojkotin e zgjedhjeve vendore, gjithnjë nën argumentin se Rama i ka tjetërsuar votat, dhe se fitorja e opozitës është vjedhur!

Vetë nuk shkonte në Bruksel për të denoncuar zgjedhjet, duke i cilësuar si të parregullta dhe të vjedhura, por ama dërgonte të gjithë ‘zarat’ e tij, grupe grupe për të shfrytëzuar çdo moment të mundshëm e për të nxirë Shjqipërinë! Duke qënë se ia dinin dhe ‘numrin e këmbës’ askush në Uashington dhe Bruksel nuk e vinin në hesap atë që thonin të dërguarit e Berishës por dhe vetë ai, derisa në fund të herës, pasi e braktisën në zyrën e tij private afër RTSH, u ‘plasi’ shpirti dhe në SHBA u vendos t’ia mblidhnin në një dosje të gjitha bëmat, duke e shpallur ‘non grata’ familjarisht për korrupsion të lartë, minim të demokracisë dhe shantazhim të drejtësisë!

Pak kohë më pas, e shpallën dhe britanikët ‘non grata’ për tre motivet që evidentoi Uashingtoni, por i shtuan dhe një të katërt duke e gremisur fare, atë të bashkëpunimit me elementët kriminalë për të shantazhuar dhe dominuar PD-në! Pas një sërë peripecish, që nga përjashtimi e deri tek rimarrja e partisë me vulë e logo, teksa dëboi Bashën, ‘birin bukëshkalë politik’, Berisha ia doli që të shënonte dhe ai humbjet e veta rrënuese të radhës, në krye të PD përballë Ramës, më të fundit ato parlamentare të 11 majit të vitit të kaluar, teksa opozita shënoi një humbje me minus 300 mijë vota krahasuar me zgjedhjet e vitit 2021, kur kjo opozitë drejtohej nga Basha!

Dhe si gjithnjë, Berisha nuk i është ndarë linjës Tiranë-Bruksel, Tiranë-Strasburg dhe disa herë dhe Tiranë-Berlin, për të denoncuar atë që ai e quan ‘narkoshteti i Ramës i krijuar për të vjedhur vota, në kurriz të opozitës’! Berisha nuk lë asnjë rast pa shkuar në kancelaritë evropiane, vetëm apo me Albanën, herë e herë dërgon dhe Gaz Bardhin me Jorida Tabakun, duke kapur deputetë apo eurodeputetë nëpër korridoret e Brukselit, Strasburgut apo Berlinit, madje deri më Brazilin e largët në një takim partish të djathta, për të treguar se me Edi Ramën nuk fitohet kurrë me zgjedhje, pasi ai ia grabit votat opozitës! Demotivon dhe demokratët kështu, por Berisha s’do që t’ia dijë, kërkon të justifikojë humbjen dhe të gjejë alibinë për humbjen e radhës!

Anipse të gjitha raportet ndërkombëtare, duke filluar nga ato të OSBE-së e deri tek raportet e Komisionit Evropian apo Parlamentit Evropian, në funksion të integrimit të Shqipërisë në BE, i kanë vlerësuar maksimalisht zgjedhjet, kanë bërë dhe vërejtje dhe kanë dhënë rekomandime, i bëjnë dhe për zgjedhjet në vendet anëtare të BE, Berisha nuk ndalet së denoncuari atë që ai e quan ‘tjetërsim të rezultatit përmes blerjes së votave’! Një akt i pa vertetuar asnjëherë, as nga vetë monitoruesit e opozitës, as nga ndërkombëtarët dhe as nga këto OJQ-të që komandohen më shumë se gjysma nga Berisha e njerëzit e tij!

Dhe teksa Berisha nuk rresht së akuzuari kundërshtarin politik Rama se me të kryeministër nuk zhvillohen zgjedhje, teksa nuk lë rast pa dërguar letra e denoncime në kancelaritë evropiane se Rama po përgatitet të grabisë zgjedhjet e vitit të ardhshëm për pushtetin vendor, vetë ai, Sali Berisha, është tepër i zënë me përjashtimet e të gjitha kandidatëve për kryetar PD përballë tij në zgjedhjet e 23 majit, për të garuar i vetëm në ato që i quan ‘zgjedhjet më të ndeërshme në botë për kryetar partie, sipas parimit një anëtar një votë”! Kandidon vetëm përballë vetes, ndërkohë që Salianjin, Alesia Balliun, Kokalarin, Mereme Selen e Vladimir Mulajn, jo vetëm nuk i regjistroi si kandidatë, por dhe i denigroi, duke i përjashtuar dy të parët bashkë me mbështetësit, nga PD!

Por Berishës i rikthehet karma! Ndërsa dërgonte padi kundër Ramës në kancelaritë evropiane për zgjedhjet e para një viti dhe për ato që zhvillohen pas një viti, nuk kishte si të ndodhte ndryshe, që dhe për Berishën nga radhët e PD të niseshin ankesa dhe padi drejt Brukselit dhe PPE-ve për shkatërrimin e zgjedhjeve brenda PD për postin e kryetarit, ku ankoheshin se Berisha e ka vrarë garën në këtë parti dhe ka shkelur demokracinë e brendshme me të dyja këmbët!

Kështu, Alesia Balliu, e cila u përjashtua nga gara për kreun e PD-së, u ka dërguar emaile dy figurave më me peshë në politikën europiane dhe ndërkombëtare, David McAllister, kryetar i Komisionit të Jashtëm të Parlamentit Evropian dhe Tina Mercep, nga IDU, për ‘farsën e 23 majit’ dhe zgjedhjen e Berishës pa rival dhe në kundërshtim me statutin e PD, kryetar! Balliu në email-et që u ka dërguar McAllister e Mercep, ka ngritur shqetësime serioze mbi situatën e brendshme në PD, duke akuzuar se kjo parti është “marrë peng” nga Berisha e rrethi i tij politik.

Balliu ka argumentuar se një forcë politike që aspiron të rikthehet në pushtet dhe të përfaqësojë standardet europiane, nuk mund të drejtohet nga një person i shpallur “non grata” nga SHBA dhe Britania e Madhe. Ajo ka kërkuar vëmendjen e partnerëve ndërkombëtarë për degradimin e standardeve demokratike brenda PD. Sipas Balliut, një pretendent për kreun e PD nuk mund të zgjedhë vetë kundërshtarët që do të ketë përballë në garë, teksa ka denoncuar edhe përdorimin e partisë, në funksion të betejave personale të Berishës kundër SPAK-ut, si dhe ka ngritur pretendime për një klimë kontrolli, presioni dhe përjashtimi ndaj zërave kritikë në parti. Në emailin drejtuar zyrtarëve ndërkombëtarë, Balliu ka përmendur individë pranë Berishës, të cilët po përfitojnë politikisht dhe ekonomikisht në kurriz të demokratëve dhe frymës opozitare.

Por ‘paditë’ kundër Berishës në kancelaritë europiane nuk janë ndalur këtu! Ish-deputeti Ervin Salianji, edhe ky i përjashtuar nga gara për postin e kryetarit dhe nga PD nga ana e Berishës, madje dhe i akuzuar për lidhje me krimin pavarësisht se vetë Salianji bëri burg për PD, bëri dhe për hesapin e vet të kuptohemi, iu drejtua me një letër Presidentit të Partive Popullore Europiane, Manfred Weber, si dhe drejtuesve të partive kryesore të qendrës së djathtë europiane pjesë e PPE, mes tyre Kancelarit të Gjermanisë, Merz dhe kryeministrit të Greqisë, Mitsotakis.

Në këtë letër, Salianji nënvizon se bllokimi i garës për kryetar të PD, me Berishën kandidat të vetëm, sot 82-vjeçar që e ka drejtuar partinë për 36 vite dhe përjashtimi i tij pa një vendim zyrtar, por me pretekstin se është i vetë-përjashtuar, është simbol i mbylljes së partisë, që ndryshe, nga sa thotë, vetë demokratët që ka takuar kërkojnë rinovim të drejtimit të lidershipit.

Salianji nënvizon në letrën dërguar PPE-ve se “establishmenti i vjetër politik” po mbyll hapësirën e brendshme për garë, për shkak të interesave personale e për t’i rezistuar ndryshimit dhe këto prirje rrezikojnë të minojnë si frymën e rinovimit, ashtu edhe rrugën europiane të Shqipërisë. “Lënia ime jashtë garë nuk është çështje vetëm e një kandidimi individual, por mbrojtja e standardeve demokratike, pluralizmit të brendshëm dhe kredibilitetit institucional të partisë më të madhe opozitare në Shqipëri”, tha Salianji.
Ish deputeti dhe kandidati i përjashtuar i PD, evidenton shkeljen e hapur që i bëhet statutit të partisë, i cili parashikon qartë dorëheqjen e kryetarit pas humbjes në zgjedhjet e përgjithshme, pa mundësi rikandidimi të menjëhershëm. “Moszbatimi i kësaj dispozite ngre shqetësime legjitime lidhur me respektimin e rregullave demokratike të brendshme dhe llogaridhënien institucionale”, shkruan ish-deputeti në letrën e tij drejtuar PPE.

Pra iu rikthye ‘karma’ zotit Berisha! I cili deri në këto momente nuk ka lënë letër pa dërguar në Bruksel e Strasburg kundër Ramës e mazhorancës së PS, me akuza se i kanë vjedhur zgjedhjet, marrëzia arriti deri atje sa të deklaronte se i kanë vjedhur 30 mandate deputeti. Ndërsa këto ditë akuzat nga brenda PD për rrënim të zgjedhjeve në këtë parti, përjashtim të rivalëve nga gara përballë tij dhe kandidimi me veten për postin e kryetarit, kanë marrë dhenë, duke mbërritur në tavolinën e grupit më të madh parlamentar PPE-ve, shefit të Jashtëm të Parlamentit Evropian dhe zyrtarëve të tjerë! Me një akuzë konkrete për Berishën, si rrënues të PD! Nuk e dimë se si Sali Berisha do të shkojë në Bruksel që të denoncojë Ramën për ‘grabitje të zgjedhjeve’, ndërkohë që në tavolinë ata në Bruksel kanë denoncimin e ish zyrtarëve të PD ndaj Berishës, për dhunim të demokracisë partiake, rrëmbim të postit të kryetarit dhe mbajtjen peng të PD deri në vdekje!

Nga Jakin Marena

Ishim mësuar që punimet në Kuvend, si në komisionet parlamentare ashtu dhe në seancat plenare, t’i përcillnim me ‘zemër të ngrirë’ pasi nga momenti në moment mund të digjeshin karrige, tavolina, të fluturonin libra, parfume dhe gjithçka në drejtim të podiumit apo të ‘panelit’ të ministrave të qeverisë, të cilët kanë qënë ‘shënjestër’ e deputetëve të Berishës!
Veprime këto që e kanë detyruar Gardën të reagojë për të evituar përballjen fizike. Por, këtë të enjte morëm vesh se, pas kësaj periudhe tensionesh të forta politike dhe përplasjesh në Kuvend, mazhoranca dhe opozita kishin arritur dakordësi për një rezolutë të përbashkët mbi procesin e anëtarësimit të Shqipërisë në Bashkimin Evropian. Në komisionin parlamentar, në fillim, të kuptohemi!
Dokumenti i dakordësuar që u miratua në seancën plenare, e cilëson integrimin evropian “objektiv strategjik kombëtar” dhe vendos theksin te forcimi i rolit të Kuvendit në mbikëqyrjen e reformave, kontrollin parlamentar ndaj ekzekutivit dhe monitorimin e negociatave me BE-në.
Për hir të së vërtetës, rezoluta parashikon angazhime konkrete nga të dyja palët politike për forcimin e dialogut, garantimin e pjesëmarrjes së plotë të opozitës në jetën parlamentare dhe respektimin e standardeve demokratike, në përputhje me Kushtetutën e Rregulloren e Kuvendit. Po ashtu, në dokument kërkohet edhe përshpejtimi i reformës zgjedhore sipas rekomandimeve të OSBE/ODIHR e Komisionit të Venecias, mbështetje për institucionet e drejtësisë në luftën kundër korrupsionit e krimit të organizuar, garantimi i lirisë së medias dhe pluralizmit mediatik.
Dhe teksa rezoluta vjen në një fazë të rëndësishme për procesin e integrimit, ndërsa Shqipëria pret vlerësimin për raportin IBAR dhe avancimin e mëtejshëm të negociatave me Bashkimin Evropian, duke ‘thithur’ dhe konsensusin e opozitës në Komisionet parlamentare, diçka ‘kërciti’ fort, duke e bërë liderin e PD, Sali Berisha që të pendohet rëndë e të deklarojë sërish se Shqipëria nuk është gati për të mbyllur negociatat dhe për t’u anëtarësuar në BE. E harroi dakordësinë fare!
Dikush mund të mendojë se Berisha u provokua në seancë nga Rama, apo nga tërë mazhoranca. Por pati hamendësime për ndonjë ndonjë, larg qoftë, sekuestro të re pasurie për familjarët e tij, ndonjë ndërprerje aksesi financiar apo investues po për familjarët e tij, se këtu Berisha nuk mban fare! E ka shumë problem këtë gjë, del dhe kundër ndonjë martese, dhe nëse ajo është në proces!
Por asgjë nga këto, të paktën në dukje, s’kishte ndodhur! Mazhoranca ishte në sallën e Kuvendit, po tregohej mjaft e qetë, me shumë bonssens ndaj opozitës! Madje dhe duke i bërë ‘qejfin’ herë herë me ndonjë copëz debati mes vetë përfaqësuesve të saj, siç ishte shkëmbimi i replikave mes kreut të Kuvendit Niko Peleshi dhe ish ministrit të Drejtësisë, deputetit Ulsi Manja! Replika këto ‘korrën’ dhe duatrokitjet e deputetëve të opozitës madje, por që në fund të herës inatin dhe tërbimin e Berishës nuk e zhdukën që nuk e zhdukën!
Edhe Edi Rama, i cili nuk e kursen Berishën me ironitë e tij, duke ia bërë nervat ‘tel’ por pa ia përmendur emrin asnjëherë, ishte në Gjermani, i pranishëm në ceremoninë tradicionale të akordimit të Çmimit të Karlit të Madh (Charlemagne Prize), i cili konsiderohet si një nga nderimet më të rëndësishme evropiane që prej vitit 1950, për individë dhe institucione me kontribut të spikatur në bashkimin dhe përparimin e Evropës.
Kishte ndodhur diçka tjetër, të cilën Berisha nuk e ka duruar dhe as nuk e duron dot! Madje kishte dy zhvillime të njëpasnjëshme që e kishin tërbuar në atë farë feje, sa nuk duronte asgjë në sallën e Kuvendit, nuk i hynte asgjë në sy! Komisionerja evropiane për zgjerimin, Marta Kos kishte bërë ‘gjëmën’, pasi kishte deklaruar se Shqipëria do të anëtarësohet në BE brenda vitit 2030 dhe ky ishte ‘basti’ i saj! Kjo e kishte tronditur por dhe tërbuar që në krye të herës me të vërtetë rëndë Berishën, i cili deri më tani, është shprehur se Shqipëria është ‘narko-shtet’ i Ramës dhe nuk e meriton të jetë në mesin e vendeve të BE, si vend anëtar me të drejta të plota!
Lajmi që BE kërkon mbylljen sa më shpejt të negociatave me Shqipërinë, i deklaruar gjatë një vizitë të Kos në Sllovaki, e cila tha se beson që grupkapitujt për Shqipërinë të mbyllen sa më shpejt të jetë e mundur, e kanë nxjerrë kreun e PD tërësisht nga binarët. Ishte vërtetë lajm i rëndë për të, i papërbvallueshëm dhe për moshën e tij, por dhe për vetë investimin e fortë që ka bërë!
“A mund ta imagjinoni? Nga viti 2009, BE po fillon punën për një traktat të ri pranimi, për Malin e Zi. Me Shqipërinë, ne kemi hapur të gjitha grupkapitujt e negociatave, dhe shpresoj të ecim përpara për t’i mbyllur sa më shpejt që të jetë e mundur. Ambicia jonë është për gjithë rajonin, të gjitha vendet të bëhen vende anëtare me të drejta të plota dhe me përgjegjësi të plota në BE, bazuar në linjëzim të plotë me ligjet e vlerat europiane. Dua ta them, duam ta bëjmë këtë ambicie realitet, dhe po, zgjerimi po ndodh”, tha Kos, duke goditur keq ëndrrën e Berishës për bllokim.
Dhe objektivi i Shqipërisë për t’u anëtarësuar në BE, lidhet dhe me një ambicie, ‘bast’ personal të Marta Kos. Ajo kërkon një sukses të përbashkët pikërisht në momentin kur do të mbyllë mandatin si komisionere e zgjerimit të BE. “Dua të hedh një sy në të ardhmen. Sllovakia merr Presidencën e BE, në gjysmën e parë të 2030. Mandati im mbaron pikërisht në atë kohë. Duhet të punoj fort që deri atëherë Presidenca juaj të jetë e suksesshme. Por gjysma e parë e 2030 do të jetë një moment i rëndësishëm për zgjerimin, disa vende kandidate kanë caktuar ambicie të forta për të mbyllur negociatat dhe për t’u anëtarësuar. Pra, me fillimin e dekadës së re, në 2030, duket të jetë një pikë kthese për BE dhe ju do e udhëhiqni atë moment”, theksoi Kos.
Komisionerja për zgjerimin, Kos, ka bërë përllogaritjen e fitimit të ‘bastit’ nga ana e saj, teksa vlerëson se Shqipëria do të mbyllë të gjithë grupkapitujt e negociatave me BE para Krishlindjeve të 2027, e deri atëherë ka për të plotësuar 101 detyrat e fundit, në 2028 synon të marrë traktatin e pranimit të anëtarësimit. dhe brenda vitit 2030 të jetë shteti më i ri anëtar i BE. Llogari këto që nuk konvergojnë me dëshirën e Berishës, i cili po bën të paundurën, mbeti madje në Berlin dhe Bruksel bashkë me bashkëpunëtorët e tij, thonë se ka hedhur dhe miliona euro për këtë qëllim, për të penguar anëtarësimin në BE! Nën ‘petkun’ e dënimit të Ramës, por që në të vërtetë kërkon të dënojë shqiptarët! Të hakmerret ndaj tyre, për shkak se e kanë abandonuar, nuk e mbështesin dhe as e llogarisin më si faktor relevant! Lerë ta votojnë për të qeverisur! U skrapatua Berisha!
Pikërisht kjo e ka nervozuar aq shumë kreun e PD, sa menjëherë sapo është njohur me këtë ‘bast’, ka filluar akuzat ndaj qeverisë, Ramës por dhe shtetit shqiptar, duke u shprehur se gjithçka është deklaruar nga kjo mazhorancë si arritje është një mashtrim! Berisha, edhe këtë të enjte, që nga podiumi i Kuvendit, ku po diskutohej pikërisht për këtë rezolutë që u miratua më pas me konsensus nga deputetët e mazhorancës dhe opozitës, akuzoi PS në qeverisje se procesin e integrimit po e bazon në mashtrime, censurë dhe fshehje të së vërtetës. “PD ka deklaruar me kohë se Shqipëria nuk plotëson asnjë kriter veç atij gjeopolitik, por mbështesim integrimin në BE. Gradualisht, ju faktuat ato që ne kishim thënë për ju. Faktuat me vepra konkrete se jeni jo për integrimin, por plaçkitjen, pasurimin e paligjshëm të shqiptarëve”, tha Berisha!
Kreu i PD, e quajti mazhorancën “hipokrite” që do të flasë për integrimin teksa deklaroi se “raporti dënon letrën famëzezë të Ramës dhe Vuçiçit që kërkoi integrim jashtë kushteve demokratike. Jeni ju pengesa kryesore e shqiptarëve në integrim. Armiqtë e vërtetë të integrimit jeni ju që vidhni shqiptarët”. Pa harruar përsëritjen e akuzës se Shqipëria është ‘narko-shtet’ dhe se do të denoncojë në Bruksel dhe kudo ku të ketë takime dhe të dëgjohet, se Shqipëria nuk e meriton anëtarësimin në BE. Dhe Berisha, në momentin kur po votohej rezoluta për BE, kërcet e del jashtë seancës dhe Kuvendit, duke bojkotuar fare votimin e saj! Nuk e do integrimin ai!
Dhe Berisha, teksa fajëson Ramën, në të vërtetë është njeriu më i përkushtuar për të nxirë Shqipërinë kudo nëpër botë, për të nxirë dhe ‘komunisten’ Kos, që mbështet këtë ‘narkoshtetin Ramës’ dhe ‘pa pasur asnjë progres drejt integrimit, kërkon anëtarësimin e Shqipërisë në BE brenda vitit 2030’! Kreu i PD nuk ia fal komisioneres Berisha këtë ‘bast’ për anëtarësimin e Shqipërisë në BE, brenda vitit 2030, as mbështetjen e fortë të saj për Shqipërinë dhe shqiptarët!
Por zhvillimi tjetër që nxori Berishën tërësisht nga binarët në sallën e Parlamentit dhe jashtë saj ka qënë vizita e kryeministrit Rama në Gjermani! Pikërisht në Berlin, ku kreu i PD dhe opozitës ka hedhur miliona euro për lobim, vetëm e vetëm që të bllokojë integrimin e ‘narko-shtetit të Ramës’ në BE! E thonë me keqardhje zërat brenda selisë së PD, të cilët kanë nisur t’i ‘qajnë’ këto para, sikurse bënë me milionat e lobimit në SHBA për heqjen e ‘non gratës’ për Berishën, shuma të cilat do ta kishin ‘stabilizuar’ PD-në nga qendra në bazë, të paktën financiarisht!
Berisha i ka rënë në ‘fund të këmbëve’ narrativa e krijuar me shumë bujë, sipas të cilës Berlini zyrtar nuk do të votojë për anëtarësimin e Shqipërisë në BE. Madje kreu i PD i kishte kërkuar gjermanëve që të vendosnin kushte të rënda për qeverinë shqiptare, sepse sipas tij, vendi ynë nuk kishte plotësuar asnjë kusht e nuk ishte gati për mbylljen e negociatave! Pavarësisht mbështetjes gjermane në votimin pro Shqipërisë në Komisionin e Jashtëm të PE, pavarësisht deklaratave të tjera të Berlinit dhe të vendeve anëtare të BE për progresin mbresëlënës të Shqipërisë në rrugën drejt anëtarësimit, ka qënë sërish Rama ai që ka ‘menduar’ për ta tërbuar Berishën dhe për ta nxjerrë nga binarët, aq sa të braktisë dhe votimin e rezolutës për integrimin në BE, për të cilën nga PD thuhet se në 90 përqind e saj, teksti është hartuar prej tyre.
Kryeministri, me praninë e tij në ceremoninë tradicionale të akordimit të Çmimit të Karlit të Madh, i cili konsiderohet si një nga nderimet më të rëndësishme evropiane që prej vitit 1950, për individë dhe institucione me kontribut të spikatur në bashkimin dhe përparimin e Evropës, ka ndarë disa fotografi ndërsa shkruan se për të, ishte kënaqësi dhe nder të ishte pjesë e grupit të miqve të nderit.
Rama shihet teksa takohet dhe bisedon me presidenten e Komisionit Evropian, gjermanen Ursula von der Leyen, me kancelarin gjerman Friedrich Merz, kryeministrin grek Kyriakos Mitsotakis e personalitete të tjera të larta politike. Pasi në këtë ceremoni, ish-presidenti i Bankës Botërore Mario Draghi u nderua me Çmimin “Karli i Madh” 2026, në vlerësim të rolit të tij të rëndësishëm në ruajtjen e stabilitetit ekonomik europian e në promovimin e vizionit për një Europë më të bashkuar, me treg më të integruar, kapacitete më të forta mbrojtëse dhe konkurrueshmëri më të lartë ekonomike.
Pra, nga Gjermania, Rama ia ka vënë ‘kripën në plagë’ Berishës, i cili ka shpenzuar shumë për një çikë bllokim apo thjeshtë pengim të integrimit të Shqipërisë në BE! Ka shpenzuar shumë energji për nxirjen e Shqipërisë në sytë e ndërkombëtarëve, gjë që deri më tani as vendet më armike nuk e kanë quajtur vendin tonë ‘narko-shtet’ dhe të kapur nga krimi! Madje as rivalët tanë në integrimin në BE nuk kanë thënë kurrë se Shqipëria nuk është gati! Jo më opozita në vendet respektive ta ketë thënë për vendin e tyre një gjë të tillë, dyerve të Brukselit dhe kancelarive të vendeve anetare të Unionit! Vetëm ‘çibani’ ynë, Berisha, e thotë! Gjithsesi këtë radhë, ishte me të vërtetë i tronditur dhe i tërbuar! Mund dhe para të shkuara dëm, si gjithnjë!

Nga Jakin Marena

Mungesa e konsensusit për zgjedhjen e presidentit të Republikës ka bërë që Kosova të shkojë në zgjedhje më 7 qershor! Janë zgjedhjet e treta në vend prej pak më shumë se një viti, të shkaktuara thjeshtë e vetëm për faktin se partitë politike nuk po gjejnë një emërues të përbashkët për zgjidhjen e krizës politike, duke mos qënë dakord për asgjë!
Që nga shkurti i vitit të kaluar, Kosova është qeverisur vetëm me qeveri në detyrë, dhe kjo për shkak se kreu i mazhorancës Albin Kurti nuk ka denjuar të ndajë pushtet me askënd.
Lëvizja Vetëvendosje, vinte me një rezultat domethënës të vitit 2021 teksa kishte marrë 58 deputetë në parlamentin me 120 deputetë të Kosovës, duke qeverisur me partitë e vogla për krijimin e qeverisë së atëhershme, mes të cilëve ishte dhe lista ‘Guxo” e Vjosa Osmanit!
Ndërkohë që në zgjedhjet e 9 shkurtit 2025 Kurti fitoi 10 mandate më pak, duke mos arritur shumicën qeverisëse, dhe duke e zvarritur për gati 10 muaj procesin e zgjedhjet se kryetarit të Kuvendit, përmes kandidimit të Albulena Haxhiut mbi 40 herë pa mundur të gjejë konsensus. E në fund të herës gjeti ‘karar’ me Dimal Bashën, teksa u fut në cirkuitin e krizës institucionale në fillim me nënkryetarin serb dhe më pas me mungesën e numrave për qeverinë e re!
Zvarritje pas zvarritjesh, Kurti, me një ‘dorë’ ndihme dhe nga presidentja e atëhershme, Vjosa Osmani, ia arriti që ta çojë datën e zgjedhjeve të parakohëshme më 28 dhjetor të vitit të kaluar, pikërisht në pikun e rikthimit të diasporës në atdhe, për të festuar festat e fundvitit!
Rezultati i zgjedhjeve të 28 dhjetorit ishte një ‘bekim’ për Kurtin, nëse ai llogjikonte si kreu i një partie politike me sens qeverisës, pasi mori mbi 51 përqind të votave! Duke rrënuar opozitën dhe në veçanti Lidhjen Demokratike të Kosovës të kryesuar nga Lumir Abdixhiku, duke ulur kuotat e PDK të Bedri Hamzës, duke nxjerrë jashtë Kuvendit “Nismën’ e Fatmir Limajt, duke lënë në ‘vend’ AAK e Ramush Haradinajt. Për më tepër, duke e konsoliduar Vetëvendosjen si partinë e parë politike në Kosovë e cila merr për herë të dytë mbi 50 përqind të votave, të aftë për të qeverisur pa nevojën e koalicioneve të mëdha! Duke fuqizuar dhe Listën Serbe, të kuptohemi!
Por kur e ke në ‘gjak’ krizën dhe qeverisjen përmes krizës, nuk tërhiqesh, pasi edhe këtu Albin Kurti e gjeti mundësinë për ta shkaktuar! Ndonëse votuesit në Kosovë i kishin dhënë votën Vetëvendosjes për të qeverisur e vetme, pra për të pasur kreun e qeverisë dhe të Kuvendit, fakt është se nuk e kishte mandatuar për të zgjedhur nga radhët e saj dhe Presidentin e Republikës! Pas krijimit të qeverisë së re, zgjedhjes së kreut të Kuvendit më të fund të Albulena Haxhiut, Kurti e zvarriti procesin vetëm e vetëm që të mos rizgjidhej për një mandat të dytë në krye të Shtetit, Vjosa Osmani! Anipse ishte pikërisht Osmani ajo që i garantoi mbi 51% të votave, me datën e zgjedhjeve më 28 dhjetor! E ka pranuar vetë Osmani, e cila deklaroi se është ndjerë e përdorur nga Kurti, ndërkohë që Kurti nuk i dha mbështetje për një mandat të dytë presidencial!
Megjithëse kishte mbi 51 përqind të votave, megjithëse votoi lehtësisht qeverinë e re dhe kreun e Kuvendit, bashkë me kryesinë e Kuvendit, Kurti nuk pranoi që nuk pranoi të ndajë pushtet me asnjë parti politike për presidentin e ri! Madje dhe negociatat me LDK-në për këtë qëllim, degjeneruan në ofertën për të pasur poste ministrore dhe një zv.kryeministër, vetëm e vetëm që Vetëvendosja të kishte presidentin e ri, gjë që u refuzua! Pra Kurti nuk lëshoi pushtet! Siç kishin bërë me radhë forcat e tjera politike në të kaluarën, duke shmangur gjithnjë krizën presidenciale. Sepse me me këtë Kushtetutë është operuar dhe atëherë, por nuk pati krizë të Presidentit!
Skadimi i afatit për zgjedhjen e kreut të shtetit, pavarësisht zvarritjeve përmes procedurave dhe teknicialiteteve, solli shpërndarjen reale të parlamentit dhe kalimin e vendit në zgjedhje! Për herë të tretë në pak më shumë se një vit, vendi shkon në zgjedhje. Njëherësh doli në pah dhe nxitimi i Kurtit për të fajësuar opozitën si shkaktare e krizës, me argumentin se nuk votoi dhe presidentin në favor të Vetëvendosjes, pavarësisht se qytetarët e Kosovës kishin dhënë si asnjëherë tjetër pas pavarësisë votën për një parti politike, mbi 51 përqind të votave ose 56 deputetë, ku bashkë me pakicat joserbe kishte në dizpozicion plot 66 mandate, në Kuvendin me 120 deputetë!
Kurti sërish preferoi zgjedhje të parakohëshme para qeverisjes së vendit! Duke e katandisur Kosovën të qeverisej nga një qeveri në detyrë, të drejtuar nga vetë kreu i Vetëvendosjes, e cila pavarësisht se shpenzon paratë e shtetit, nuk mban asnjë përgjegjësi për qeverisjen e vendit! Praktikisht vendi ka gati dy vite që është pa qeverisje, dhe kjo për faj të Kurtit!
Nuk po hyjnë në akuzat që qarkullojnë brenda dher jashtë Kosovës, madje deri në Berlin, se Kurti po zbaton axhendat e Beogradit, të marra përsipër që në kohën kur ishte i burgosur dhe trajtohej si mbret në burgjet serbe, duke i garantuar në qeli madje dhe konferenca shtypi, duke marrë në fund të herës faljen nga vetë presidenti i asaj kohe Koshtunica, pavarësisht se shokët e tij të burgut, shqiptarë që ishin kundër regjimit serb gjatë sundimit serb, u zhdukën dhe fizikisht!
Nuk po i përmendim as faktin se serbët i gjetën Kurtit dhe dashnore, Lidija Sokoloviçin, vajzën e ish ministrit serb, Zoran Sokoloviç! E ka me ‘firmë e vulë’ dashninë e fortë me Lidijan, teksa e kanë kapur në një makinë bashkë me të dhe miq të tjerë! Sllavët e kanë normale këtë rekrutimin e mbajtjen nën mbikqyerje dhe përmes këtyre elementëve të ‘butë’, siç janë femrat spiune! Nuk po përmendim as lëvizjen shqiptaro-serbe ‘KAN” të themeluar nga Albin Kurti dhe serbi Nenad Rikalo, lëvizje që më pas u nda secili në punën e vet por me qëllimin e përbashkët, zhbërjen e pavarësisë, luftës së UÇK dhe të vetë shtetit të Kosovës, duke i dhënë spektrit politik në Kosovë, Vetëvendosjen e Listën Serbe, që janë kthyer në gangrenë për shtetin e dytë shqiptar!
Atëherë, pse Albin Kurti, edhe kur ka shumicën në Kuvend për të qeverisur ‘pa dhimbje koke’ e lë Kosovën pa qeverisje për vite me radhë, duke u vënë përballë SHBA e BE, duke marrë kosto për vendin si sanksionet nga BE, duke bllokuar njohjet e anëtarësimet në strukturat euroatlantike, duke bllokuar miliona euro financime të BE të llogaritura për Kosovën dhe mbi të gjitha, duke rrezikuar të vertetojë tezën serbe se ‘shqiptarët e Kosovës nuk kanë aftësi shtetformuese’?
Në krye të herës, ajo që mund të themi është se Kurti nuk dëshiron të bashkëpunojë apo të ndajë pushtet, por të nënshtrojë kundërshtarët politikë! Duke treguar se i fiton zgjedhjet, por i do të gjitha pushtetet, jo vetëm përmes votës por dhe përmes nënshtrimit të rivalëve politikë! Ndonëse ia ka dalë të frustojë lidershipin e opozitës, Kurti nuk ka mundur të krijojë aleanca reale vasaliteti me partitë e mëdha opozitare! Përfundimisht, Kurti nuk e njeh nocionin ‘negociim’!
Elementi i dytë që e ka çuar Kurtin në mosqeverisje dhe kur ka mbi 51 përqind të votave, ka të bëjë me faktin se kreu i Vetëvendosjes nuk dëshiron të lërë ‘gjurmë’ në zbatimin e marrëveshjes së Ohrit! I penduar që e aprovoi këtë marrëveshje, pavarësisht ‘bishtave’ që nxjerr tashmë, Kurti dëshiron që t’i shtyjë sa më larg negociatat me Serbinë, dhe akoma më mirë që t’ia lërë në dorë përkohësisht këtë ‘patate të nxehtë’ një qeverisjeje të pakicës së opozitës, për ta pasur më pas si ‘bonus’ të fortë përballë militantëve të vet, kryesisht nga diaspora, në narrativën e ‘tradhëtisë’ së opozitës, për të garatuar më pas, rikthimin në pushtet, pa marrëveshjen e Ohrit nëpër këmbë!
Kurti nuk ka turp të bëjë si çlirimtar i Kosovës, pavarësisht se, atëherë kur duhej të merrte armën dhe të dilte kundër genocidit serb, preferoi të qëndronte në Prishtinë, të deklaronte se nuk kapte armë me dorë, nuk di madje as ta mbushë dhe zbrazë armën, madje e la veten dhe të arrestohej nga serbët, të lexonte pa fund libra e jepte intervista nga burgjet e sigurisë së lartë në Serbi, e të përgatitej nga ata, sipas akuzave në Prishtinë, që të ‘desantohej’ në politikë në Kosovë dhe më pas në krye të shtetit të Kosovës! Për ta rrënuar këtë vend nga themelet, siç po e rrënon!
Dhe Kurti miklohet fort ku e thërrasin “Albin Baba” militantët, kryesisht ata të diasporës, paratë e të cilëve jo vetëm që mbajnë familjet e tyre në vendlindje, por dhe rrënojnë demokracinë dhe vetë shtetin e Kosovës, duke e mbajtur Kurtin në krye të vendit si dhe duke përgatitur nga brez të tërë përtacësh në Kosovë, që nuk denjojnë të punojnë, por vetëm të vegjetojnë! Madje janë bërë të gjithë “Dj”, këngëtarë dhe influencerë dhe askush nuk punon! Vetëm konsum dhe aheng!
Por mbi të gjitha Kurtit i volit kjo situatë e qeverisjes së vendit me ‘qeveri në detyrë’! Pasi i shpenzon paratë e shtetit siç i do vetë, nuk bën investime por tendera për produkte të gatshme, që nga energjia që e blen në Serbi e deri tek gjërat më të thjeshta dhe jetike për vendin! Shumica nga Serbia blihen. Mbi të gjitha takson dhe bizneset duke ua bërë jetën ‘ferr’, aq sa shumica e bizneseve të mëdha janë zhvendosur në Shqipëri dhe vendet e rajonit ku ka shqiptarë, duke e kthyer qytetarin e Kosovës të varur tërësisht nga paratë që dërgohen nga diaspora dhe nga ato 100 euro që jepen sa herë ka zgjedhje, madje dhe tre herë në vit! Të barabartë në varfëri, ‘mot a mot’ si në kohën e Enver Hoxhës në Shqipëri! Skllevër, që dashurojnë atë që i skllavëron!
Nuk mund ta kuptojmë se çfarë do të kërkojë Kurti në zgjedhjet e 7 qershorit të këtij viti nga qytetarët e Kosovës! Pasi i pati nga 40 përqind e deri tek mbi 51 përqind për një vit e ca votat e qytetarëve shqiptarë dhe nuk qeverisi që nuk qeverisi dot! Se nuk deshi, të kuptohemi. Ndoshta kërkon të marrë mbi 80 deputetë që t’i ketë të gjitha pushtetet në dorë. Megjithëse është tepër e pamundur një gjë e tillë! Pasi kanë hyrë aktorë të rinj në tregun politik, e mbi të gjitha Vjosa Osmani, ish presidentja e Kosovës, e cila kryeson listën e kandidatëve të LDK!
Për më tepër që qytetarët e Kosovës janë të zhgënjyer nga Kurti, të cilit i dhanë mbështetje maksimale për të evituar krizën në qeverisje, anipse nuk ia dhanë për presidentin votat, por ai post honorifik është! Për hir të së vërtetës nuk ka çfarë i duhet, nuk i prishte asnjë punë t’i jepte sërish mandatin e dytë Osmanit, do t’ia bënte ‘qokën’ ajo siç ia bëri me zgjedhjet e 28 dhjetorit të vitit të kaluar! Tdhe do ta zgjidhte njëherë e mirë krizën në Kosovë. Ndërsa tani ka dhe diasporën në punë, nuk vjen dot në atdhe për të votuar! Dhe sërish ndoshta bie poshtë 40 përqindshit, Vetëvendosja! E ndoshta do ketë sërish krizë qeverisjeje!
Kurti po bën dhe në këtë fushatë atë që di të bëjë më mirë, loja me nacionalizmin dhe aktivizimin e kanaleve të nëndheshme serbe në favor të tij! Herë akuzon opozitën për bashkëpunim me serbët, këtu aktivizon tërë armatën e ‘patriotëve dixhitalë’, pjesa më e madhe e të cilëve janë jashtë vendit dhe mbi të gjitha e kanë ‘modemin’ adresar në Beograd! Stis dhe ndonjë kërcënim me eleminim fizik të tij nga Beogradi, ‘film’ i parë ky sa herë gjendet ngushtë e merr një ‘dorë ndihme’ nga Vuçiç. Pavarësisht se, më të interesuarit për këtë gjendje krize në Kosovë me Kurtin në krye të qeverisjes në detyrë, gjenden pikërisht në Beograd! Por Kurti bën dhe tentativa të forta për t’u përfshirë në punët e shqiptarëve në Maqedoninë e Veriut apo dhe në Malin e Zi, se shqiptarët e Shqipërisë nuk e kanë qasur dhe as nuk e qasin me kohë dhe vakt!
Dhe në vazhdën e përpjekjeve për të qënë “baba’ i shqiptarëve në rajon, Kurti sipas postulatit të vjetër shqiptar, ‘p*dha e madhe shqyen br* e veta’, në vend që të rriste kredibilitetin në sytë e shqiptarëve në rajon, ‘dashuria’ për Miskoskin e rrënoi! “Vdes’ për Mickoskin Kurti, e shpreh hapur këtë. Aq sa dhe ‘patriotët’ e rrjeteve sociale nuk kanë asnjë argument për ta mbrojtur!
Të gjithë e panë Kurtin në kongresin e bashkimit të “VLEN”, përkrah kreut të qeverisë që RMV, Hristian Miskoski, qeshjen e tyre vesh më vesh dhe dashamirësinë që treguan ndaj njëri tjetrit! Ndërkohë që u rrënua ngrehina e fundit që një parti politike të quhet shqiptare: Nuk u këndua as himni kombëtar shqiptar para fillimit të punimeve të kongresit të “VLEN”, e cila është krijesë e Kurtit dhe Miskoskit, ky i fundit përfaqësues i botës serbe në Shkup, për të rrëzuar nga pushteti përfaqësuesit që sollën lirinë e shqiptarëve në 2001, BDI-në e Ali Ahmetit!
Albin Kurti nuk e prishte terezinë, vetëm qeshte dhe fliste për ‘bashkim-vëllazërim, teksa bisedonte në krah të kryeministrit Miskocki, pavarësisht se me ‘bekimin’ e tij, krijesa e përbashkët “VLEN” në qeverisje, kishte zhbërë gjuhën shqipe në institucionet e Maqedonisë së Veriut, dhe tashmë për hir të ‘vëllait’ Miskocki, për të mos i prishur qejfin atij, zhbënë dhe himnin kombëtar shqiptar në kongres, duke e zëvendësuar me himnin e BE!
Mbërriti dita e kiametit dhe për ‘Albin Babën’, për të cilin vetëm ata që janë kundër shqiptarëve, janë aleatë të tij! Ndërsa Rama, Ahmeti e deri Abazoviçi, janë tradhëtarë! Kuti i Kurtit ky, i cili si patriot i madh më herët ka braktisur dhe bregdetin shqiptar, duke zgjedhur të pushojë në ‘daçën’ e ish ushtarakut rus, në bregdetin grek! Shtet që ende se ka njohur Kosovën, për hir të së vërtetës!
Praktikisht Kosova me Kurtin kryeministër po shkon drejt askundit, duke rrëzuar qeveritë e veta njëra pas tjetrës! Praktikisht, në funksion të axhendës serbe në rajon, Albini është kryeopozitari perfekt për rrëzimin e qeverisë së tij, së fundmi “Kurti 3”! Ndërkohë që ‘dashuria’ e madhe për kryeministrin e RMV, me orientim pro-serb dhe pro-rus shtohet pafund, me sa duket, vetëm pse ai është shumë më përpara se vetë Kurti në përpjekjet për shtrirjen e botës serbe në Ballkan!
Kurtit i duhen dhe këto zgjedhje, nëse shqiptarët e Kosovës vijojnë ta mbështesin, ose disa palë zgjedhje rresht, për ta përfunduar misionin e tij, për ta zhbërë gjithçka është arritur në Kosovë! Ndoshta Kurti pret që dhe ndërkombëtarët e humbasin durimin me Prishtinën, aq sa të shfaqen të penduar përse e krijuan këtë shtet që nuk di të mbahet me këmbët e veta! Dhe kështu të plotësohet ëndrra serbe e armiqësisë së Kosovës me Perëndimin! Votuesi shqiptar e ka në dorë më 7 qershor, që të tregojë nëse do të vijojë më tej hitoria e zhbërjes së shtetit nga Kurti! Të shohim! Shpresat janë të pakta, ‘shplarja e trurit’ është e madhe e diaspora vijon të ketë ndikim. Ka krijuar klasën e dembelëve dhe të atyre që nuk e duan, e për më tepër po e njollosin luftën e UÇK-në, në Kosovë! Ata po vendosin në zgjedhjet e fundit në Kosovë!

Nga Jakin Marena

Procesi i zgjedhjes së kreut të ri të Partisë Demokratike është kthyer tashmë në një barcaletë të dhimbshme, e cila ka degraduar deri në garimin e një kandidati të vetëm, i cili është lideri aktual të partisë më të madhe opozitare, Sali Berisha!

Ndonëse Berisha, si humbës në zgjedhjet e fundit parlamentare të 11 majit të vitit të kaluar, me statutin e bërë nga vetë ai dhe të ‘kodifikuar’ në një nen të veçantë, nenin ‘Basha’, duhej të ishte larguar menjëherë pas certifikimit të rezultatit pa asnjë të drejtë rikandidimi, ishte po vetë ai që u kujdes deri në detaje për të ‘qethur’ në masën 100 përqind të të gjithë rivalëve në garë! Madje arriti deri atyre, sa të deklarohet se nuk i pëlqen asnji rival përballë, kundërshti e maskuar përmes justifikimit se nuk plotësojnë kriteret e kandidimit!

Berisha u soll si Nastradin Hoxha në vaktit, me një fjalë, i cili teksa ishte dënuar me varje nga pushteti i atëhershëm turk, shfaqi dëshirën ‘madhore’ të tij, që të varej në pemën që dëshironte vetë ai! Ku donte të vdiste Nastradini, ndaj si pëlqente asnjë pemë, duke i detyruar ekzekutorët që ta rikthenin në burg (hapsanë) pas tre ditësh, teksa kishin shetitur disa pyje (zabele) me radhë, pemë më pemë, pa sukses! Kështu dhe Berisha, dhe ua themi pse!

Në situatën ku ndodhet PD e drejtuar nga Berisha, një vit pas humbjes katastrofale të zgjedhjeve parlamentare, me një zbritje mbështetjeje demokrate prej 300 mijë më pak se në zgjedhjet e vitit 2021 kur PD drejtohej nga Basha, kishin deklaruar pjesëmarrjen në garën për kryetarin e PD, anëtari i kryesisë Ervin Salianji, ish themeluesja e ‘Rithemelimit’ të Berishës Evi Kokalari, anëtarja demokrate Alesia Balliu dhe në ‘minutat e fundit’ të regjistrimit hynë në garë Mereme Sela dhe Vladimir Mulaj!

Në pamjet të parë, askush nuk i jep shpjegim se përse Berisha i përjashtoi një nga një të gjithë kandidatët në garë, për postin e kreut të PD, duke lënë në fletën e votimit vetëm emrin e tij! Në kushte normale është e pashpjegueshme, sepse e kishte të sigurtë fitoren. Por mendja e Berishës punon ‘sahat’, në anën e kundërt të lëvizjes së akrepave në fakt, vetëm në funksion të ‘pastërtisë’ së pronës së tij!

Berisha nuk e imagjinon dot që një kandidat tjetër të marrë qoftë dhe 10 përqind të mbështetjes së anëtarësisë së partisë, në atë që ai e quan hipoteka më e madhe e pasurisë së tij dhe të familjes, që është PD! Dhe nuk ka ‘faj’ në fakt, është ‘minierë ari’ partia më e madhe opozitare, të garanton mbrojtje përballë SPAK dhe gjykatës por dhe të shton fuqishëm lekët! Po dyshuat, mendohuni vetëm pak, dhe kalonin nëpër mend pasuritë e tij dhe të familjarëve të tij, vilat, apartamentet dhe komplekset e pallateve, në zonat më të mira turistike në Tiranë, në vend dhe në shumicën e kryeqyteteve të Evropës! Eshtë nën hetim, hetim i thënçin, nga SPAK për pasuritë!

Pra e sheh PD-në si një pronë që prodhon gjithçka! Me këtë mentalitet e sheh ai partinë që drejton, me këtë mentalitet e udhëheq këtë partië, pa pyetur as për statut, as për rregulla, as për humbjen e mbështetjes në elektorat dhe në arenën ndërkombëtare si dhe pas asnjë shans apo shpresë, sado të vagullt, për të ardhur në pushtet! Thjeshtë e do PD-në do si pronë të tij, pa e ndarë me askënd mbështetjen, qoftë edhe formalisht, në një garë partiake për postin e kryetarit!
Pikërisht për ta pasur tërësisht të vetën dhe për vete, Berisha ‘vetëpërjashtoi’ Salinjin e Balliun, por dhe Kokalarin, të cilëve as që ua mori në dorëzim formularin e kandidimit për kreun e PD! Ndërkohë që për mjeken Mereme si dhe Mulajn, i mori në konsideratë zarfet, por pas një dite, me urdhër të tij dhe vendim të sekretarit të përgjithshëm të PD, Flamur Noka nuk i regjistroi fare në garë! I bëri ‘def’ me një fjalë, me një lëvizje dore, jo pse i rrezikonin postin! Harrojeni!

Salianjin e ‘vetëpërjashtuar’ e akuzoi për lidhje me krimin, me Ramën dhe me këdo që ka inat Berisha në planet, pavarësisht se ai bëri një çikë burg për partinë por dhe për mendtë e veta. Por ama ai mori mbrapsht edhe akuzat e anëtarit të kryesisë, Salianji, i cili me dokumente të firmosura dhe të vulosura nga institucionet britanike, akuzonte Berishën se është i shpallur ‘non grata’ për bashkëpunim me krimin e organizua,r të cilin e ka në shërbim për të nënshtruar PD-në!

Me të njejtën gjatësi vale është akuzuar Balliu nga Berisha, i cili ka marrë mbrapsht akuzat e saj, që nga bashkëpunimi me krimin e deri tek marrja peng nga Berisha të PD për interesat e tij personale! Ndërkohë që Meremja e ngratë, pasi u kthye në ‘meme’, u bllokua të regjistrohej si kandidate për kryetare e partisë, megjithëse e dinte edhe vetë se nuk do të merrte vota! Gjithsesi mjekja Mereme ka vendosur që ta dërgojë në gjykatë garën për kreun e PD, duke kërkuar përjashtimin e Berishës nga kandidimi, referuar nenit ‘Basha’, me argumentin se nuk duhej të ishte në garë, jo më të përjashtonte kandidatët e tjerë!

Berisha nuk është ndalur vetëm në këto veprime! Përmes Flamur Nokës, kreu i PD i ka ‘pastruar’ të gjitha listat e anëtarësisë nga mbështetësit e Salianjit dhe të kandidatëve të tjerë për kryetarë të PD, në përpjekje për të garantuar një mbështetje në limitet e 100 përqindshit, aq sa do ta kishte zili dhe vetë Enver Hoxha vaktit, i cili mbahej te 99.999 përqind ! Megjithëse Berisha e ka pasur ‘atin shpirtëror’ Enverin në fund të herës, si komunist 24 karat që ka qënë dhe është!

Një ‘agresion’ i tillë i Berishës ndaj anëtarësisë, nuk është pritur aspak mirë nga baza e PD! Të cilët kanë nisur një reagim të fortë, deri në rebelim! Aq sa më Korçë, përmbysën tërë procesin e votimit të kreut të degës vendore të kësaj partie! Në fillim kundërshtuan, më pas morën me vete kutitë e votimit, dhe në fund grisën listat e anëtarësiusë të përçunduara nga Ndoka e bllokuan votimin, duke treguar se udhëzimet nga qendra nuk pinë ujë më në qytetin e ‘serenatave’, teksda kanë kërkuar lirshmëri të anëtarësisë, pa asnjë ndikim, për të zgjedhur drejtuesit vendore!

Ndonëse në disa rrethe, Berisha përmes Nokës dhe emisarëve të tij, pa parë fare votat në kuti, ia ka dalë që të ketë të përzgjedhurit e vet në krye të këtyre degëve, në Korçë dhe degë të tjera situata është jo në favor të Berishës! I cili jo vetëm që ka destabilizuar PD-në, duke prekur fundin, por dhe po e rrënon me një shpejtësi që askush nuk e kishte menduar më parë!

Dhe i gjithë ky ‘aksion’ politik i Berishës për rrënimin e PD ndodh pikërisht një vit para zgjedhjeve të përgjithshme për pushtetin vendor! Për të cilat jo vetëm që nuk ka bërë asnjë përgatitje e as një organizim strukturash për këtë qëllim, por po e ‘kreh’ gjithnjë e më shumë anëtarësinë, duke përjashtuar e ‘vetëpërjashtuar’ funksionarë të lartë e mbështetës të tyre, vetëm e vetëm që të këtë mundësinë të garojë i vetëm për kryetar të PD!
Dhe hajde e duroje pastaj Berishën dhe vite të tjera, teksa akuzon Ramën dhe mazhorancën se ‘i kanë vjedhur fitoren’, ndërkohë që e ka degraduar PD-në në atë farë feje, e ka përgjysmuar dhe armiqësuar anëtarësinë e kësaj partie, sa në këtë derenxhe ku është katandisur PD, nëse arrin të marrë ndonjë bashki, do të ishte fitore tepër e madhe për Berishën! Që gjithsesi nuk do fitoren e opozitës, por kërkon të drejtojë një parti, që ta ketë të tijën si pronë e për nevojat e tij personale!

Dhe kjo nuk është tekë e një plaku 82 vjeçar, me gjithëse mosha e bën të vetën dhe prej guri të ishte, por është një filozofi e tërë e Berishës i cili ia ka dalë që të njehsojë partinë me kryetarin, pra PD me emrin e tij! Dhe kur ndodh kjo, gjë që ka ndodhur, atëherë partia vdes sëbashku me kryetarin! Ky pritet të jetë dhe fati i kësaj partie, e cila do të shkojë në ‘amëshim’ në momentin kur të ndalet ‘ora biologjike’ e Sali Berishës! Për këtë të jemi të sigurtë, nuk ka shpëtim më PD-ja! Të zhgënjyerit t’i drejtohen një alternative të re! Nëse do gjejnë ndonjë person që t’i mbledhë demokratët, që janë shpërndarë si ‘zogjtë e korbit’, sa këndej andej!

Nga Jakin Marena

Shqipëria vijon të mbetet vendi me kredecialet më të forta dhe në ‘hartën’ e vendeve me të avancuara në Ballkanin Perëndimor, në garën e madhe e të rëndësishme të procesit të integrimit në Bashkimin Europian!
Një fakt të tillë e kanë pranuar jo vetëm vendet anëtare të BE, me peshë specifike në uninion, që nga Parisi e Berlini e deri te Roma e Madridi, rasti më i fundit është edhe biseda telefonike e kryeministrit holandez Rob Jetten këtë të premte me kryeministrin tonë Edi Rama, por dhe vetë Brukseli zyrtar, kryeqendra e Bashkimit Evropian!
Në një deklaratë të fundit, Komisionerja për Zgjerimin në BE, Marta Kos, vlerësoi maksimalisht progresin e bërë nga vendi ynë, duke e renditur Shqipërinë mes shteteve në krye të këtij procesi. “Shqipëria është një nga vendet në krye të procesit të zgjerimit. Shpresojmë që në muajin maj, do të jemi në gjendje që të miratojmë të gjitha standardet e përkohshme për sundimin e ligjit e pastaj të nisim me mbylljen e kapitujve.
Është e mahnitshme ajo që Shqipëria ka bërë në vitet e fundit me hapjen e të gjithë grupkapitujve. Fakti që ju keni një lidership të vendosur për integrimin e plotë në familjen evropiane e bën këtë projekt një kombinim të përsosur. Mbështetja e qytetarëve dhe puna e qeverisë, shpresoj të kontribuojmë në Bruksel”, tha Kos. Pra, jemi në krye të listës!
E thuajse tërë lidershipi evropian është i bindur që Shqipëria i ka të gjitha shanset që të mbyllë të gjithë kapitujt e negociatave me BE deri në fund të vitit të ardhshëm për të qënë pastaj në ‘syrin’ e vendeve anëtare për të vendosur për anëtarësimin e plotë në BE deri në vitin 2030, sipas parashikimeve të vetë qeverisë shqiptare por dhe zyrtarëve më të lartë të Brukselit, të cilët kanë mbështetur e mbështesin udhëtimin e Shqipërisë drejt anëtarësimit në familjen e madhe dhe demokratike Evropiane!
Dhe në funksion të fazës së dytë, pra të vendimit të parlamenteve të të gjitha vendeve anëtare të Unionit për anëtarësimin e Shqipërisë në BE, ky është tërësisht vendim politik dhe nuk varet më asgjë në dorën tonë sepse me mbylljen e negociatave Shqipëria e përmbyll detyrimin e saj, ka qënë dhe një deklaratë e fortë e kreut të diplomacisë gjermane, Johann Wadephul, në raport me lehtësimin e rrugës së Shqipërisë por dhe vendeve aspirante për anëtarësimin e plotë më BE!
Ishte një lajm që u emetua në disa media shqiptare si me drojë dhe pa i dhënë ndonjë vend të rëndësishëm në rang-listën e lajmeve, a thua se ishte dikush që po kujdesej për ta kaluar pa u vënë re si lajm. Por që përmbante një mesazh të rëndësishëm, sipas të cilit BE mund të hyjë në një fazë të re vendimmarrjeje, pa bllokime e veto, nëse kalon propozimi i Gjermanisë për votim me shumicë, në politikën e jashtme dhe të sigurisë.
Ishte ministri i jashtëm gjerman, Johann Wadephul, ai që dha një mesazh të fortë dhe të qartë nga Dublini, teksa propozoi heqjen e parimit të votimit unanim në politikën e jashtme dhe të sigurisë brenda BE, duke e zëvendësuar atë me vendimmarrjen me shumicë. “Në një demokraci, parimi i shumicës është norma dhe unanimiteti përjashtimi. Dhe ne duhet ta bëjmë normën e demokracisë edhe normë në Bashkimin Europian. Vetëm në këtë mënyrë Europa mund të mbetet e aftë për të vepruar”, tha kryediplomati gjerman! Teksa shtoi se momenti duhet shfrytëzuar, duke iu referuar zhvillimeve në Hungari, pasi sipas tij pas zgjedhjeve në Hungari e humbjes së Viktor Orbán, tani kemi një dritare të mirë mundësie që duhet përdorur dhe çdo muaj ka rëndësi, madje çdo javë!
Wadephul paralajmëroi se BE nuk mund të përballojë më bllokime si në të kaluarën, teksa nënvizoi se ‘bllokime si ato që kemi parë, veçanërisht në javët e fundit, nuk janë më diçka që mund ta përballojmë në këtë botë. Kohët janë shumë serioze për këtë”! Deklarata e tij, është propozim gjerman ky që të kuptohemi dhe gjermanët u shkojnë deri në fund punëve nuk lënë asgjë në mes, vjen në një moment kur vetë BE po vihet nën presion për të ndryshuar mënyrën si merr vendime, sidomos për zgjerimin. Dhe këtu përfiton dhe Shqipëria!
Pra, për Shqipërinë, një nga vendet që kryesojnë përpjekjet për zgjerim në Ballkanin Perëndimor, ky propozim është lajm i jashtëzakonshëm, pasi hapet rruga që për një arësye apo tjetër, asnjë shtet i veçantë nuk mund të bllkojë përmes vetos anëtarësimin e vendit tonë në BE siç ka ndodhur deri më tani me Maqedoninë e Veriut, dhe sipas është kërcënuar dhe vendi ynë që të bllokohet për axhenda të ndryshme të ndonjë shteti të veçantë! Nëse Shqipëria ecën përpara me reformat, është në krye të listës së vendeve që kanë bërë më mirë për hir të së vërtetës, atëherë asnjë lloj vetoje nuk e bllokon procesin e integrimit! Sado përpjekje që të ketë!
Veto ka qënë ajo që e ka zvarritur procesin ndër vite, por nëse kalon votimi me shumicë sipas propozimit të Berlinit, gjasat janë të mëdha dhe të sigurta, atëherë historia ndryshon në favorin e Shqipërisë por dhe të vendeve të tjera aspirante për në BE. E thënë me fjalë më të thjeshta, me heqjen e vetos, Shqipëria shmang bllokimet politike e fiton kohë në turravrapin e saj drejt BE-së.
Gjithçka është e koordinhuar, nuk është thjehstë një rastësi që përmbledh të gjithë këta elementë në favor të Shqipërisë! Presidentja e Parlamentit Europian Roberta Metsola dhe Komisionerja për Zgjerimin Marta Kos e kanë thënë hapur se Shqipëria dhe Mali i Zi janë në krye të vendeve që po ecin më shpejt drejt anëtarësimit. Për më tepër, Metsola ka shkuar edhe më tej, duke kritikuar hapur vetë BE-në për vonesat. Sipas saj, vendet kandidate po ecin më shpejt sesa vetë Bashkimi Europian merr vendime. Ajo e lidh drejtpërdrejt këtë situatë me kërkesën për unanimitet, që sipas saj po e mban peng procesin.
Nga ana tjetër, Komisioni Europian ka dhënë një vlerësim pozitiv, por fjala e fundit mbetet tek vendet anëtare. Dhe në një moment kur vetë zyrtarët më të lartë europianë pranojnë se procesi është zvarritur, ky debat mund të jetë pikërisht shansi që i duhet Shqipërisë që të arrijë objektivin e anëtarësimit në vitin 2030. Heqja e vetos është një lajm i mirë, shmangen skenarët ballkanikë të bllokimit të integrimit të Shqipërisë në BE dhe vlerësuar në meritë, me shumicën e votës së vendeve anëtare, vendi ynë anëtarësohet në BE! Gjermanët nuk bëjnë shaka me propozimet e tyre, nuk i hedhin kot në erë, dhe mbështetja e tyre është një ‘aset’ për Shqipërinë!
Por teksa ‘yjet’ janë vënë në vijë të drejtë në favor të Shqipërisë dhe shqiptarëve, në raport me mbështetjen evropiane për anëtarësimin në BE, njëri dhe vetëm njëri është kundër të gjithëve, teksa deklaron se Shqipëria nuk ka plotësuar asnjë kusht për të qënë gati për anëtarësimin në BE! Ai është, i papërsëritshmi, jetëgjati në politikë e në jetën e përditshme, kreu i PD dhe i opozitës shqiptare, Sali Berisha! Teksa deklaron me një ligësi të dukshme se Shqipëria është narko-shtet, që nuk ka asnjë zhvillim pozitiv në këtë vend dhe teksa bën thirrje për rrëzimin e qeverisë dhe të Edi Ramës, ai tenton të bëjë dëme në raport me integrimin!
Berisha apelon dhe ndaj vendeve të BE që të vënë kushte për qeverinë shqiptare, nga ato të pakalueshmet, për ta bllokuar integrimin e Shqipërisë në BE! Kreu i PD deklaron se Shqipëria nuk është gati për në BE dhe shpik çdo lloj pengesea dhe lajmi, për ta përcjellë jo vetëm në publik por dhe në Bruksel dhe kryeqytetet e vendeve anëtare të BE, për të krijuar perceptimin se Shqipëria nuk është gati për anëtarësimin! Herë shkon vetë nga Evropë, herë dërgon Albanën, por dhe Gazin e Joridën, vetëm e vetëm për të nxirë sa më shumë Shqipërinë!
Deklaratat nga Berisha për të nxirë Shqipërinë në sytë e evropianëve janë në kundërthënie të plotë me vlerësimet maksimale të Komisionerës për Zgjerimin në BE, presidentes së Komisionit Evopian, presidentes së Pasrlamentit Evropian e me kryeministrat e vendeve anëtare, të cilët e thonë se jemi në krye të listës së vendeve aspirante! Teksa kreu i PD përpiqet me të gjitha mënyrat për ta vështirësuar udhëtimin e Shqipërisë drejt anëtarësimit të plotë në BE, Berlini zyrtar pritet të heqë dhe veton e vendeve anëtare, për ta lehtësuar maksimalisht rrugën e Shqipërisë në Union dhe për të mos e lënë anëtarësimin e saj në BE, nën humorin e vendeve që për një tekë apo tjetër bllokojnë integrimin! Berisha sillet si në atë proverbin e vjetër shqiptar, sipas të cilit ‘i zoti e shtet, tellali nuk e jep’!

Nga Jakin Marena

Sali Berisha nuk tërhiqet nga gara për kreun e Partisë Demokratike, ‘garë’ e cila në qershor të këtij viti do të ‘ratifikojë’ zyrtarisht liderin historik si ‘pronarin’ e vetëm dhe të pakontestueshëm të partisë më të madhe opozitare!

Pasi ka dërguar në ‘konservim’ statutin e PD, bashkë dhe me nenin e famshëm “Basha’ të tij, që përcaktonte se nëse kryetari i partisë nuk e sillte PD në pushtet atëherë automatikisht ai ishte i shkarkuar nga ky post, dhe menjëherë fillonin procedurat për zgjedhjen e pasuesit të tij, Berisha tashmë po kombinon fushatën e përjashtimeve, me protestat e ‘filtrimin’ e listave të anëtarësisë!

Berisha jo vetëm që ka shkelur me të dyja këmbët statusin e PD, prej një viti, duke e justifikuar qëndrimin në krye të partisë me justifikimin se zgjedhjet e vitit të kaluar nuk ishin zgjedhje por farsë, pavarësisht se dështoi të sillte opozitën në pushtet sikurse e precizon statuti i partisë, por dhe tashmë kur kanë dalë zëra të rinj që duan të garojnë për postin e kryetarit, madje janë pajtuar dhe me faktin për të garuar përballë tij, anipse në kundërshtim me statutin është në garë, kreu aktual i PD po i përjashton nga partia! Pra dhe formalisht, nuk do as kandidatë fiktivë që të zënë vend në garën përballë tij, për postin e kryetarit të PD! Pavarësisht se askush nuk e rrezikon!

Kështu veproi me Salianjin, të cilin e ka ‘vetëpërjashtuar’, duke i ngarkuar në kurriz dhe akuza të tilla si ato të bashkëpunimit me krimin e elementët kriminalë, por dhe me PS dhe Edi Ramën, për të mbushur sallat e foltoreve paralele të tij. I vobekti Salinji, për ‘Babalen’ e famshme bëri burg duke u sakrifikuar për partinë, u konsiderua një hero, madje u prit si hero, derisa bëri ‘gabimin fatal’, teksa ka gjykuar udhëheqësin dhe udhëheqjen në tërësi për mungesë efikasiteti opozitar e mbështetjeje nga ana e bazës dhe e qytetarëve, e ku në fund i vuri ‘vulën’ fare marrëdhënieve me Berishën, atëherë kur iu mbush mendja se është gati për të kandiduar përballë Berishës për postin e kryetarit! Mirë Berisha, por nuk e lë rehat as Flamur Noka, këtë s’duron Salianji!

Për ‘kutin’ e Berishës dhe të njerëzve rreth tij, Salianji, por dhe Alesia Balliu e Evi Kokalari kanë guxuar shumë, pasi kanë shkuar deri atje ku nuk mban më Berisha, dhe për këtë arsye janë ‘vetëpërjashtuar’ jo vetëm nga gara, por dhe nga PD si anëtarë të thjeshtë, përjashtim ‘paketë’ bashkë me mbështetësit e tyre, deri në shkrirjen e disa degëve të PD në rrethe! Pra janë shpallur armiq në shkallë të gjërë, e shoqëruar kjo dhe me pastrimin e listave të anëtarësisë së PD, përmes artificave të tij, si ajo e marrjes së kartave të reja me firmën e Sali Berishës! Pikërisht në prag të zgjedhjeve të PD, ku mendohet që Berisha të jetë garues i vetëm për kryetar partie, pasi deri më tani nuk e ka gjetur ende vetë dikë që ta ketë përballë si ‘rival’. Pra një kandidat me leje!

Një situatë e tillë, ku humbësit me në krye Berishën kanë marrë frenat e PD, ka bërë që kjo parti të katandiset në limitet e ekzistencës, sipas ‘aritmisë’ së drejtimit të 82 vjeçarit Sali Berisha, i cili po tenton që të shitet si e ardhmja e PD, dhe akoma më tepër po kërkon ta shesë veten formalisht për të mbajtur me gajret mbështetësit e tij, si e ardhmja e vendit! Dhe që këtu nis fillimi i fundit për PD-në dhe për tërë opozitën, pasi sot një 36 vjeçar, ka lindur, është shkolluar, është martuar e bërë me fëmijë, më Berishën në ekran, me zërin e tij në sfond! Jo se është gremisur tani kjo parti, por jemi të sigurtë se me Berishën kryetar, vetëm poshtë e më poshtë do të shkojë!

Për të mbajtur këtë ‘statusin’ e të ardhmes së PD, Berisha është gati të bëjë çdo gjë. E ka bërë madje deri më tani! Pasi la pa sukses koridoreve të Uashingtonit mbi 10 milionë euro për të hequr ‘non gratën’ e pa përfituar qoftë dhe një vizë pune për në tokën amerikane, duke mos e marrë ‘investimin’ mbrapsht, Berisha ktheu sytë nga Berlini, ku njëherë në javë zbarkon vetë ai ose të dërguarit e tij, në kryeqytetin gjerman, vetëm e vetëm për të nxirë me të gjitha mënyrat Shqipërinë. Madje duke bërë dhe thirrje që të vendosen kushte ndaj Shqipërisë për anëtarësimin në BE, duke na marrë erzin me akuza të tilla të paformuluara as nga armiqtë më të mëdhenj të shqiptarëve, si ajo që e cilësonte vendin tonë një narko-shtet. Vetëm Berisha e quan të tillë!

Për hir të së vërtetës, me aq para sa ka marrë nga paratë e shqiptarëve, përmes abuzimeve sa ka qënë në pushtet, janë dhe akuza zyrtare këto e për këtë arsye është nën hetimin e SPAK, nuk e ka për gjë që të ‘dorovisë’ dhe lobistët gjermanë, që me sa duket, nën shembullin e atyre amerikanë, kanë vendosur ta rrjepin plakun e PD, por që deri më tani nuk kanë arritur të bllokojnë asgjë në procesin e integrimit! Pasi 27 vendet e BE po e shqyrtojnë raportin e shkëlqyer të Komisionit Evropian, për të dhënë verdiktin përfundimtar për ecurinë e Shqipërisë drejt BE-së! Dhe, as Gjermania e as vendet e tjera të BE, sikurse pretendonte Berisha dhe njerëzit afër tij, nuk kanë bllokuar procesin e integrimit të Shqipërisë!

Vlerësimi për Shqipërinë dhe mbështetja për të në rrugën e integrimit vijon me kapacitet të plotë, duke ia ‘ngrirë buzëqqeshjen në buzë’ Berishës dhe mbështetësve të tij, të cilët lanë nam duke paguar dhe duke zënë njerëzit korridoreve të Evropës, vetëm e vetëm për të bllokuar negociatat! Leku letër, me një fjalë, vetëm për të tentuar hedhjen në erë të ëndrrës së shqiptarëve, pa mundur të lënë gjurmë në këtë aksion anti-shqiptar! E themi këtë, pasi integrimi në BE nuk është as i Ramës dhe as për Ramën, por i Shqipërisë e për shqiptarët. Po ku bindet Berisha! Ai e ka ligësinë në shpirt, vesi i të qenit kundër Shqipërisë, i tij, do të dalë bashkë me shpirtin!

Teksa koridoreve të PD flitet se Berisha ka shpenzuar miliona dollarë për të hequr ‘non gratën’ në SHBA dhe për të rregulluar marrëdhëniet e PD me Uashingtonin, si garanci për të pretenduar pushtetin në Shqipëri, zërat thonë, jo pa dhimbje për demokratët që janë në mandatin e katër rresht në opozitë, se ai ka shpenzuar dhe miliona euro për të nxirë Shqipërinë në Berlin e Bruksel si dhe për të goditur Ramën, përpjekje këto pa shënuar asnjë sukses. Dhe të përmendësh shp[enzim milionash për lobim të kotë para demokratëve që po presin thumba gati 16 vite në opozitë dhe vite të tjera po aq me sa duket më tej, është si ‘të përmendësh litarin në shtëpinë e të varurit’! Prandaj, në kushte dëshpërimi, po korridoreve të PD po përmendet me zë të lartë, e për habinë e të gjithëve edhe me nostalgji, koha e drejtimit së kësaj partie nga Lulzim Basha!

Sipas këtyre zërave, gjatë drejtimit të Bashës, pavarësisht se Berisha ishte në prapaskenë dhe luante jo pak fijet, marrëdhëniet me SHBA-të, me Gjermaninë dhe me vendet e BE, ishin të shkëlqyera! Madje pa paguar asnjë lek për lobime që të rregulloheshin marrëdhëniet e PD me këto vende aleate! Paçka se e nekatosi Berisha, kur pagoi gjysmë milioni dollarë, para të dhuruara nga Rusia këto, për atë lobimin e famshëm në SHBA, që për hir të së vërtetës ishin para të dhëna për nxitjen e destabilizimit të Shqipërisë dhe rajonit, për hesap të Kremlinit, duke ia nxirë faqen PD, parti i themeluar nën moton “E duam Shqipërinë si gjithë Evropa”!

Teksa shihen rezultatet e PD-së dhe opozitës nën drejtimin e Berishës në ballafaqimet elektorale përballë PS dhe Ramës, shihet me sy të lirë se mbështetja ka rënë, për të mbërritur në zgjedhjet parlamentare të 2025, kur kjo parti ishte nën nivelin historik të 36 viteve të jetës së saj, duke humbur vetëm pas dy vitesh nga zgjedhjet vendore, 300 mijë votues neto të djathtë!

Pavarësisht se Lulzim Basha ishte një humbës funksional, e këtu bashkohemi me qëndrimin e përgjithshëm se ai nuk mund të qeveriste PD si lider i vërtetë pa ‘vrarë babanë’ politik Berisha që në fillim të herës e jo ta linte në prapaskenë si ‘përgjues çiftesh’ për të luajtur fijet në parti, tashmë në PD është ‘pjekur’ qëndrimi se, megjithatë, Basha ia doli që të rrezikonte pushtetin e mazhorancës së PS, duke mbetur vetëm më shumë se 30 mijë vota larg përmbysjes së madhe nga ana e opozitës e drejtuar prej tij! Themi për rezultatin e të gjitha parttive të opozitës, bashkë!

Është tepër e dhimbshme që në PD të kujtojnë me nostalgji kohën e Bashës si kryetar partie, jo vetëm për marrëdhëniet me partnerët tanë të mëdhenj dhe vendeve të BE, që ishin të shkëlqyera, por dhe për rezultatet e arritura në zgjedhjet e njëpasnjëshme, që kanë qënë shumë herë më të larta se sa ato që ka marrë Berisha si lider! I cili u rikthye në krye të PD pikërisht duke sulmuar rezultatet e PD të drejtuar nga Basha, por që për vete po manifeston rezultate gati sa gjysma e tij! Për më tepër tashmë e ka kthyer dhe PD-në si veten, një ‘non grata’ funksionale në SHBA, Britani, e trajtuar si ‘non grata’ edhe nga vendet anëtare të BE e të rajonit tonë!

Tashmë dhe në PD ka nisur të artikulohet thirrja “Lul ku je, të ramë më qafë kot”! Eshtë vërtetë e vështirë për t’u besuar, por e vërtetë! Demokratët janë zhgënjyer rëndë dhe shkojnë pas atij që i garanton një rezultat sa më të lartë në përballjen me mazhorancën e Edi Ramës! Dhe kjo tregon se PD është ku thërret qameti! Aq rëndë janë me Berishën, sa kanë nostalgji për Bashën dhe luten apo bëjnë apel që të rikthehet për t’i udhëhequr apo më e pakta, sikur i kërkojnë falje se nuk e vlerësuan si duhet kur e kishin në krye dhe i ranë në qafë kot! PD është katandisur aq keq dhe aq rëndë, sa duket pa asnjë shpresë dhe nuk i bën derman më asgjë!

Nga Jakin Marena

Që Sali Berisha nuk llogarit asnjë kundërshtar brenda PD, që mund ta rrezikojë që t’i marrë ‘skeptrin’ e lidershipit të kësaj partie, besojmë se askush në Shqipëri nuk e vë në diskutim!

Madje dhe aleatët tanë të mëdhenj, SHBA dhe Britania të cilët e shpallën ‘non grata’, dhe vendet anëtare të BE që e trajtojnë po si ‘non grata’, e dinin që në kohën kur ishte Lulzim Basha kryetari zyrtar i PD, se Berisha nuk ishte tërhequr nga drejtimi i partisë, por i luante fijet në prapaskenë!

Prandaj i këputën ‘non gratën’ familjarisht, pasi shpresuan që Basha do të kishte këllqe për ta dëbuar nga PD, por nuk e llogaritën që Basha kishte lindur praktikisht i ‘vdekur’ si lider politik! Tashmë Basha ‘mat’ rrugët e atdheut dhe Evropës, ndërsa Berisha është rikthyer në majë të PD dhe opozitës, duke mos lënë asnjë njeri aty, që të ngrejë kokën politikisht! As që të bëjë hajër!

E në kushtet kur ka zhbërë statutin e PD dhe nenin e famshëm “Basha’, i cili përcakton se kush humb zgjedhjet, automatikisht largohet nga drejtimi i partisë, teksa nuk ka marrë asnjë përgjegjësi për humbjen katastrofike në zgjedhjet vendore të 2023 e mbi të gjitha në zgjedhjet parlamentare të vitit 2025, ku i ‘firuan’ afër 300 mijë vota opozitare, Berisha jo vetëm që ka shpallur sërish kandidaturën për kreun e PD, por po ‘krasit’ dhe të gjithë ata që e çojnë nëpër mend të garojnë përballë tij, në zgjedhjet e qershorit brenda partisë!

Berisha nuk ka frikë askënd se do t’i marrë postin e kryetarit! E themi me bindje këtë, pasi ai e dominon PD-në, e ka pronë të veten dhe praktikisht do ta drejtojë atë deri kur i ‘plotfuqishmi’ ta thërrasë në amëshim! Dhe pas kësaj, drejtimi i PD do të jetë brenda familjes dhe për këtë janë të bindur të gjithë, prandaj ‘tundin belin’ po të gjithë, që nga Bardhi e deri te Gjekmarkaj nën tingujt e melodisë së këngës, ‘…tek rruga me pisha, rroftë e qoftë Sali Berisha’!

Atëherë pse Berisha ka ndërmarrë këtë operacionin ‘fshesa’ në parti, duke përjashtuar apo siç deklaron ai ‘vetëpërjashtuar’ që nga Salianji e Alesia Balliu, që ‘gabuan’ dhe menduan se mund të garojnë përballë tij për postin e kreut të PD, e deri tek mbështetësit e tyre, të cilët morën pjesë në këto foltoret e organizuara qytet më qytet?! Me pjesëmarrje masive në krahasim me Berishën!

Dhe nuk janë pak, pasi Berisha ka ‘shuar’ thuajse dy degë të PD, në Durrës e në Elbasan! Teksa dega e PD në Elbasan zhvilloi këtë të dielë votimin për zgjedhjen e drejtuesit të ri të degës Alis Narazani, pikërisht në një moment kur forcat politike po përgatiten për sfidat e ardhshme elektorale, anëtarët u përballen me heqjen e emrit të tyre nga listat e anëtarësisë. Një denoncim publik është bërë nga Doris Madhi, aktualisht drejtuese e grupit të këshilltarëve të opozitës në Këshillin Bashkiak të Elbasanit, e cila ka deklaruar se është hequr pa asnjë njoftim nga lista e anëtarësisë së PD, duke i hequr të drejtën e votës dhe përjashtuar përfundimisht nga partia, në të cilën ka aderuar për vite me radhë dhe të cilën e përfaqëson në Këshillin Bashkiak!

Gjithashtu nga lista është hequr edhe emri i Rudina Allës, kryetare e forumit demokrat të Gruas, Zheni Gjergjit, pasi ajo u emërua drejtoreshë në Spitalin e Elbasanit, apo dhe Alesia Balliut, pasi kjo e fundit ka shpallur publikisht ambicien për t’u regjistruar dhe për të kandiduar në garën për kreun e Partisë Demokratike, përballë Sali Berishës.

Dhe kjo valë përjashtimesh vjen vetëm disa ditë pasi PD zyrtare, përjashtoi si këshilltarë të saj në Këshillin Bashkiak të Durrësit Dritan Burgijën e Arlind Boshkun, pasi këto të fundit mbështetën lëvizjen e Ervin Salianjit. Duke shkaktuar tronditje dhe tek demokratët e Durrësit, tronditje që është përhapur dhe në Mat, ku ka përjashtime të shumta apo dhe qytete të tjera të vendit, çka tregon se operacioni ‘fshesa’ po zhvillohet me kapacitet të plotë në PD, i urdhëruar nga Berisha! Dhe akoma më keq, Berisha përmes Flamur Nokës ka shkrirë dhe degët e PD në Krujë dhe Fushë-Krujë, pikërisht në dy degët ku PD ka pasur rezultate në zgjedhjet e fundit! Aq rëndë është situata, sa krerët e këtyre dy degëve zbarkuan në selinë e PD, dhe vetëm ndërhyrja e Berishës, që premtoi zgjidhje pozitive të kësaj situate, e shpëtoi Nokën nga ‘thonjtë’ e krutanëve demokratë!

Për hir të së vërtetës, Berisha, teksa nuk i trembet asnjë rivali brenda PD, po tregon çdo ditë dhe më shumë se halli i vetëm që po e detyron të realizojë këtë operacion përjashtimesh masive në të gjithë vendin, të zërave kundër në parti, është mungesa e dëshirës për të mbajtur përgjegjësitë si kryetar partie, për humbjet katastrofike në zgjedhje, e mbi të gjitha, heqjen e mundësisë së përballjes me zërat kundër në PD, në dështimin e pritshëm të radhës, vitin e ardhshëm!

Teksa rivali i tij politik, kreu i mazhorancës Edi Rama ka nisur përgatitjet e forta për garën e zgjedhjeve për pushtetin vendor të vitit 2027, teksa ka shpërndarë të gjithë deputetët dhe ministrat në terren, pas zgjedhjes së të deleguarve dhe ngritjes së grupeve të punës në çdo qark, duke paralajmëruar se do t’i fitojë të gjitha bashkitë, Berisha nuk ka të ngritur asnjë strukturë nëpër rrethe! Por dhe ato që nisen të ngrihen, janë përfshirë në konflikte e përplasje të forta!

Dhe për më tepër në vend që të merret me riorganizimin dhe përgatitjen e PD dhe të opozitës për zgjedhje, Berisha merret me Salianjin, Balliun e mbështetësit e tyre, të cilët i ka ‘vetëpërjashtuar’ nga PD! Anipse PD dhe opozita kanë nevojë dhe për një votë mbështetëse në zgjedhje, pasi po gremiset me shpejtësi marramendëse drejt humnerës, ku në çdo palë zgjedhje i ‘firojnë’ 250-300 mijë vota opozitare! Por nuk dëgjon Berisha nga ai ‘sektor’, ndërkohë që vijon me kapacitet të plotë operacionin ‘fshesa’, duke fshirë drejtues të lartë nëpër degët e PD në rrethe dhe për pasojë larguar dhe mbështetësit e tyre! Të cilët, pak që kanë 16 vite në opozitë dhe me shumë ‘shanse’ për të qënë dhe një dekadë tjetër jashtë pushtetit, por dhe nga partia ua heqin përfaqësuesit e tyre!

Në fakt Berisha sa herë ka hall apo dështon në zgjedhje, nxiton të shpallë një ‘armik’ brenda PD! Pasi për Ramën dihet, atë Berisha e ka armik të dizpozicion, për ta akuzuar se i ka ‘vjedhur e grabitur zgjedhjet’! U shpall ‘non grata’ nga SHBA e u përjashtua nga PD, menjëherë shkatërroi PD-në duke e ndarë copa copa, deri dhe duke sulmuar selinë qëndrore të saj buzë Lanës me qysqi dhe tritol për ta pushtuar, pa sukses, por që e mori më vonë ‘qyl’ nga ‘kallauzët’ që gjendeshin në grupin e Bashës! Vetë Basha u shpall armiku numër një i Berishës, apo siç e thotë me shumë dëshirë, se Basha është ‘armiku i PD, opozitës dhe pluralizmit në Shqipëri’!

Humbi zgjedhjet më 2025, shpalli armik Salianjin por dhe të tjerët, dhe pavarësisht se anëtari i kryesisë po bënte burg në kohën e zgjedhjeve. U shpall ‘armik’ vetëm se kërkoi ndryshime në qasjen opozitare e më vonë pasi e ‘vetëpërjashtuan’ pasi bëri ‘gabimin’ e madh e fatal, teksa kërkoi të garojë përballë Berishës, dhe menjëherë u ‘vetëpërjashtua’ nga Berisha, bashkë me të gjithë mbështetësit nëpër rrethe! Këtë ‘operacion’ përjashtimi brenda PD, Berisha po e bën vetëm e vetëm për të mos pasur probleme dhe as këta zërat kundër nëpër këmbë, pas humbjes së paralajmëruar në zgjedhjet vendore të vitit të ardhshëm!

Përjashtimet në PD, Berisha i ka bërë gjithmojë në këto 36 vite, sa herë që ka pasur dështime. Që në fillimin e viteve ’90 kur përjashtoi Cekën, Pashkon e grupin ‘mocionist’ siç quhej atëherë, Azem Hajdarin disa herë, ish kryetarin e PD Eduard Selamin kur humbi referendumin për Kushtetutën, Dashamir Shehin, Genc Rulin dhe të tjerët teksa humbi mbështetjen në 1997, Genc Pollon e mbështetësit në vitin 2001, Patozin e të tjerët në humbjen e radhës në opozitën e dytë, opozitë që zor se do t’i gjendet fundi kohor, për të ardhur tek Salianji dhe mbështetësit e tij, këto ditët e fundit, ku në ‘horizont’ ka humbjen e garantuar Ka vepruar njëlloj si gjithmonë!

Teksa shohim historikun e përjashtimeve në PD sa herë ka pasur hall apo ka dështuar Berisha, na krijohet gjithnjë e më shumë bindja se kreu aktual i PD operon sipas strategjisë së liderit të tij shpirtëror, ish diktatorit komunist Enver Hoxha! Duke qënë se ka mbajtur teserën e PPSH për 25 vite me radhë, duke qënë dhe sekretar i PPSH i Qendrës Spitalore për vite me radhë, Berisha ka marrë nga Enveri ‘mot a mot’ skenarin e përjashtimeve dhe dënimeve të ’armiqve të partisë’!

Ish diktatori Enver Hoxha, sa herë që kishte dështime në ekonomi, në ushtri, në polici, por dhe thjeshtë e vetëm për të mos lënë askënd të ngrinte kokën kundër udhëheqjes, i përjashtonte nga partia, i linçonte e në fund i dënonte me burg, pushkatim apo më lehtë, me internime familjare! Madje duke filluar me shokët e tij të luftës dhe të punës e tij, që nga Koçi Xoxe e Tuk Jakova e deri tek Beqir Balluku, Kadri Hazbiu e Mehmet Shehu! Dhe pas çdo reprezalja brenda PPSH, nga piramida në bazë, duke goditur ‘armikun e kllasës’, Enveri deklaronte se ‘partia u pastrua nga armiqtë e brendshëm, doli më e fortë nga kjo përballje. Partia mbi të gjitha”!

Kështu vepron dhe Berisha! Kush del kundër udhëheqjes, përjashtohet dhe dëbohet nga partia! I ‘qan’ fort zemra dhe për t’i dënuar me burg, internuar apo dhe pushkatuar, por për fatin e keq të tij dhe për fatin e mirë të kundërshtarëve të tij e shqiptarëve, dënimi me vdekje apo internim-dëbimet janë hequr me ligj! Tani Berisha s’ka më fuqi ekzekutive në fakt, është ndryshkur’ në opozitë! Mjaftohet vetëm me përjashtimet nga partia! Madje deklaron pas çdo goditje të ‘armikut’ brenda partisë njësoj si Enveri, se ‘partia doli më e fortë’! Pavarësisht se ka prekur fundin PD dhe ende nuk dihet kur do të ndalet rrokullima!

“Asnjë ndikim përveç se pozitiv, kanë momentet e largimit të atyre, të cilët në fushatën elektorale kanë tradhtuar idealet e demokratëve dhe kanë punuar për mazhorancën e krimit. Mos mendojë njeri se, në shërbim të socialistëve do të ndodhet në gjirin tonë. Vërtet ka një grusht njerëzish që shkelen, shiten, bëjnë pazare, por absolutisht demokratët janë në këmbë”, deklaroi këtë të hënë Berisha, duke justifikuar përjashtimet e kundërshtarëve brenda PD.

Sikurse parashikohet situata, pasi që tani një vit para zgjedhjeve deklaron se “Rama do t’i grabisë zgjedhjet’, Berisha do ta vijojë operacionin ‘fshesa’ në PD për t’i zhdukur nga partia të gjithë ata që mendojnë se mund të kenë një rol në këtë parti, mund të mendojnë se mund të bëjnë karrierë dhe të marrin përmes garës përgjegjësi për këtë parti apo larg qoftë, t’j u krijohet bindja se mund të kandidojnë përballë Berishës për postin e kryetarit!

Nuk pranon shqetësime Berisha në PD! Si humbi ngushtë si humbi si gjithëherë thellë e më thellë përballë rivalit socialist, të gjithë duhet të pajtohen me të, në justifikimin se ia vodhën votat! Sa herë që të ketë zgjedhje, do të ketë halle të tilla, se me të kryetar të PD, opozita vetëm do të humbë! Është e garantuar! Por ama, Berisha sërish do të jetë humbësi më i fituar! Ka partinë, bën dhe ndonjë ‘qokë’ financiare si gjithnjë! Përballon hallet me drejtësinë, deri sa të ketë jetë! Është në pronën e tij ai, bën çfarë të dojë me të, por dhe me ‘argatët’ që ka në PD!

Nga Jakin Marena

Ka disa kohë që po emetohen në media lajme që kanë të bëjnë me garën e mundshme për kreun e PD, që do të mbahet diku nga qershori! E quajnë me plot gojën ‘garë’, pa u bërë tërr syri!

Madje ka netë të zjarrta debati në këto panelet televizive, ku moderatorët dhe të ftuarit kërkojnë të mbajnë të ndezur ‘kandilin’për disa emra kandidatësh, mes të cilëve spikat Ervin Salianji, i cili e ka pranuar dhe vetë hipotetikisht se do të garojë përballë Berishës, për të marrë drejtimin e PD!

Ka dhe emra të tjerë, duke filluar nga shqiptarja rezidente në SHBA, Evi Kokalari, e përfunduar tek demokratja ‘rebele’ e Elbasanit, Alesia Balliu, të cilët Berishën e llogarisin si të larguar nga kupola e PD, ndërsa flasin për të ardhmen e kësaj partie, nën drejtimin e tyre!

Po flitet dhe për spastrime që po ndodhin tek mbështetësit e kandidatëve për kreun e PD-së, më saktë mbështetësit e Salianjit nëpër këto foltoret nëpër rrethe. ku për hir të së vërtetës mbledh më shumë njerëz se Berisha. Si në rastin e këshilltarëve demokratë të Durrësit dhe të tjerë. Flitet se ka edhe ‘filtrime’ të listave të anëtarësisë së PD, për anëtarët të cilët do të shkojnë në kutitë e votimit ditën e zgjedhjeve. Është kërkuar ndihmë dhe nga KQZ për kuti votimi e për vula!

Ka dhe reagime nga ana e kupolës së PD, pra njerëzit afër Berishës, të cilët shprehen se Salianji është i ‘vetëpërjashtuar’, pra nuk është anëtar i PD, një term tërësisht alla-PD, që nuk zë vend në asnjë fjalor politik as shqiptar dhe as botëror, ndërsa vetë Salianji bërtet me të madhe se është anëtar PD, bën takime në emër të PD nëpër rrethe për të përmirësuar, sipas tij, PD-në, merr pjesë në protestat kombëtare me molotovë, anipse me 300 vetë, të thirrura nga Berisha, e mbi të gjitha nuk mungon në asnjë mbledhje të kryesisë së PD!

Këtu ka një absurd në të vërtetë, pasi sipas ‘kutit’ të Flamur Nokës dhe drejtuesve të tjerë të PD afër Berishës, Salianji nuk lejohet të kandidojë pasi nuk është anëtar i PD, ndërsa merr pjesë në mbledhjet e kryesisë së PD! Nuk e dimë nëse merr pjesë në mbledhje me statusin e anëtarit të kryesisë së partisë, me statusin e vëzhguesit apo si gazetar, megjithëse gjithnjë, këta të fundit në mbledhjet me dyer të mbyllura, nxirren jashtë sallës! Vetëm Berisha mund t’i japë ‘majë’ kësaj pune, për ta shpjeguar termin e ‘vetëpërjashtimit’ të Salianjit, por dhe të marrjes pjesë në mbledhjet e kryesisë si anëtar i saj, paçka se sipas Nokës, ai nuk figuron si anëtar i thjeshtë i PD! Sepse ka një shpjegim të vetin Berisha, me atë realitetin e tij paralel, që i bind pasuesit! Jo vetëm se Salianji është vetëpërjashtuar, por dhe se ka bashkëpunuar me krimin, akuzë sefte e re kjo e Berishës për anëtarin e kryesisë, që mendon se mund të garojë përballë Berishës për kreun e PD!

Na bën çudi fakti që nëpër panelet televizive debati vërtitet vetëm rreth masave të Berishës për të ‘pastruar’ listat, për të shmangur kandidatët ‘rebelë’ nga gara për kreun e PD, dhe aspak nuk kemi një debat mirëfilli për gjendjen aktuale të kësaj partie, kërcënimin real që të mos fitojë asnjë bashki në zgjedhjet e përgjithshme për pushtetin vendor që zhvillohen në pranverën e ardhshme, si dhe shkaqet pse PD në çdo palë zgjedhje bie me nga 250-300 mijë vota të djathta! Duke e garantuar qëndrimin dhe një dekadë tjetër sëpaku, në opozitë, në pushtetin qëndror!

Nëse debati orientohet drejt faktit se Berisha merr po masa sepse ka frikë se Salianji e rrezikon në garën për postin e kryetarit, atëherë ajo që mund të themi është se, nuk është e drejtë që të trajtohen shqiptarët si qytetarë nën nivelin normal të arsyetimit dhe të zhvillimit mendor! E themi këtë sepse problemi real qëndron te mbartësit e këtij qëndrimi, pra se Berisha është frikësuar nga Salianji, të cilët mund të cilësohen ose pa njohuri për situatën politike ose janë ‘ngarkuar me detyrën’ që të zhvendosin debatin në çështje emrash për të lënë mënjanë qëllimisht problemin e vërtetë, që është kriza në PD, dhe ku shkaktari i krizës e ka emrin ‘Sali Berisha’!

E themi këtë sepse Berisha, kurdo që të garojë, sot, nesër, pas një muaji e pas një viti, në 12-të të ditës apo në 12-të të natës, i fiton zgjedhjet brenda PD për kryetar me mbi 90 përqind të votave! Këtë dominancë në PD e ka treguar me kohë dhe vakt! Ishte në periudhën më të keqe në shtator të vitit 2021, i përjashtuar nga grupi dhe nga vetë PD prej kreut të asaj kohe, Lulzim Basha, menjëherë sapo u shpall ‘non grata’ nga SHBA, dhe Berisha arriti që të marrë drejtimin e partisë! Shpenzoi lekë pa fund me Kuvendet e foltoret e atëhershme, përfshirë lobimet e sulmin me qysqi dhe mjete rrethanore ndaj selisë së PD buzë Lanës më 8 janar, por dhe më pas, teksa shpenzoi shumë për të rimarrë edhe zyrtarisht logon e vulën e PD. Tashmë s’ka Zot që ia merr më partinë!

Berisha jo vetëm që mori zyrtarisht logon dhe vulën e PD, me gjithë Bardhin, Gjekmarkajn e deri Salianjin, ‘paketë’ bashkë me të, por tani kërkon që asnjë zë kundër të mos dalë përballë tij, për të prishur ‘uniformitetin’ e partisë, jo përballë Edi Ramës për ta rrëzuar nga pushteti, por përballë segmenteve të caktuara të opozitës për të qënë gjithnjë pjesë e pushtetit si përfitues për këtë rol, tepër komod dhe pa asnjë përgjegjësi! Sepse në fund të herës, opozita është pushtet, dhe Berisha kërkon të jetë ‘maja’ e opozitës, pa asnjë rival rreth e rrotull! Ndaj i shuan zërat kundër, ndaj përpiqet që të zvogëlojë dhe rolin e atyre partive të reja opozitare që s’janë në aleancë me të!

Dhe në këtë lojë të fortë pushteti në opozitë, Berishës jo vetëm që nuk i rrezikohet posti i kreut të PD e opozitës në tërësi, nga Salianji apo të ngjashëm me Salianjin, por ka luksin e madh që edhe të mos ‘konsumohet’ lart e poshtë për çështje legjitimiteti, duke ia lënë këto punët e ‘pista’ në parti, Flamur Nokës, Bardhit dhe mbështetësve të tjerë të tij, në kupolën drejtuese të PD! Praktikisht, Noka merret me interpretimin e statutit, Bardhi me ndryshimin e statutit, pasi është emëruar në krye të komisionit partiak për këtë punë, pra për të hequr pa dhimbje nenin ‘Basha’ me një fjalë, ndërsa Klevis Balliu merret me organizimin e partisë! Aq sa mund të organizojë ai! Për pak harruam Gjekmarkajn, nënkryetarin tjetër të PD, i cili i fut një opinion me humor, pak nga të gjitha, as mish dhe as peshk dhe e kryen punën e detyrën karshi Berishës, më së miri!

Berishës i mbetet vetëm të japë direktivën e mbajtjes së protestave njëherë në 10 ditë për të ‘rrëzuar Ramën nga pushteti’, për të përcaktuar se kur përfundon kilometri i fundit për ‘narko-shtetin e Ramës’, për të nxirë dhe marrë erzin Shqipërisë nëpër kancelaritë perëndimore, paçka se në të shumtën e herës i mban fjalimet nëpër korridore me ‘kameramane’ Albana Vokshin, sepse nuk e afrojnë nëpër podiume për të folur! Dhe atëherë që flet në emër të Albanës, ia presin fjalën në mënyrën më brutale të mundshme në mes të Strasburgut, megjithëse Berisha as nuk skuqet dhe as nuk zverdhet nga turpi! Nuk bën pjesë në atë ‘lagje’ ai!

Berishës i kanë mbetur këto ‘punët e rënda’, pasi në lidhje me garën për kreun e PD nuk shqetësohet! Kur nuk e lëvizi ‘topi i Amerikanit dhe Inglizit, nuk do ta lëvizë as topi i Gjermanit’, ka nisur të qarkullojë postulati më i ri për Berishën nëpër koridoret e selisë buzë Lanës, nga momenti kur ambasada gjermane ndërhyri fort kundër protestave të dhunshme të PD e mbi të gjitha kur kërkoi që të mos përdoret flamuri i Gjermanisë nëpër këto sulmet me molotov dhe mjete të tjera piroteknike, ndaj institucioneve të shtetit, bizneseve dhe koshave të plehrave anës rrugës! Duke ia ‘ngrirë gëzimin në buzë’Berishës, të arritur pas hamendësimeve se ‘gjermanët kanë marrë me sy të keq Ramën’ dhe sipas PD, mund ta rrëzojnë nga pushteti!

Dhe në fund të herës ajo që duam të rikujtojmë është fakti, se këto lajmet që hidhen nëpër media apo diskutohen nëpër panelet televizive, sipas të cilave Salianji apo të tjerët i rrezikojnë postin e kryetarit, Berishës, duhet të marrin fund njëherë e mirë dhe të mos zënë kohën televizive nëpër panelet e darkës e të mërzisin miletin!

Çështja e postit të kryetarit të PD është mbyllur me kohë dhe vakt. Ai do të jetë Sali Berisha sa të jetë gjallë, i urojmë vërtetë jetë të gjatë! PD është pronë me ‘hipotekë’ e Berishës, dhe nëse ia ka lënë dikujt me ‘testament’ për momentin kur të shkojë pranë të Plotfuqishmit, larg qoftë, të gjithë duhet të jenë të bindur se ua ka lënë dy fëmijëve të tij, 50 me 50 përqind të ‘aksioneve’! Si trashëgimi dhe nuk është pak! Njëri e financon dhe ‘vjel’ të mirat financiare dhe politike prej PD, duke i shpërndarë sipas përqindjes në ‘hipotekë’, tjetri e drejton dhe zyrtarisht! Nuk do të ketë emër tjetër, përpos Berisha në krye të PD! Ka marrë fund kjo punë! S’ka asnjë shpresë. Salianji kryetar është thjeshtë një shaka!

Nga Jakin Marena

Argumenti që zgjodhi kreu i PD-së, Sali Berisha, për të justifikuar bojkotin e Kuvendit dhe refuzimin e votimit pro për rezolutën që e shpallte Iranin shtet terrorist, ishte shumë i dobët dhe nuk e përballonte dot peshën e këtij kundërshtimi të madh! Ishte i pabesueshëm, si justifikim!

Përdorimi i adhnimit të Berishës, i cili me gojën e Gaz Bardhit deklaroi se nuk do të marrin pjesë në këtë seancë pasi është thirrur në kundërshtim të hapur me rregulloren e Kuvendit, dy ditë para kohe me një fjalë, nuk përbën asnjë argument madhor për bojkot të rezolutës kundër regjimit të ajatollahëve të Iranit! As akuzat e PD se, kjo nuk është një seancë normale parlamentare, por një mbledhje e thirrur për axhendën personale të Kryeministrit dhe të Kryetarit të Kuvendit, pa asnjë rend dite të miratuar apo të shpallur zyrtarisht, apo dhe në shkelje të procedurave minimale që garanton Rregullorja e Kuvendit, nuk janë arsye për refuzimin e rezolutës.

Të gjitha justifikimet e hedhura në publik nga ana e PD dhe e Berishës, për bojkotin e Kuvendit dhe të mos-hedhjes së votës pro rezolutës që shpallte Iranin financues të terroriznit, janë thjeshtë ‘pirueta’ të përdorura nga ana e lidershipit të partisë më të madhe opozitare, për të justifikuar bojkotin, dhe përmes tij dhe mungesën e dëshirës për të votuar kundër regjimit të ajatollahëve!

As nxitimi më pas për të mbajtur një qëndrim sa për të ‘larë gojën’, që në lojën e madhe të aleancës me SHBA për të shpallur Iranin sponsor të terrorizmit, ta bëjë publik këtë qëndrim përmes një postimi në adresën zyrtare të PD, s’mund ta zëvendësonte asesi një rezolutë të miratuar nga Parlamenti shqiptar, që merret në konsideratë nga vendet mike, siç ndodhi me përshëndetjet që erdhën nga Izraeli dhe SHBA për këtë akt!

Nuk po hyjmë në faktin që në këtë deklaratë në rrjetet sociale për Iranin, ku PD shpalli Gardën Revolucionare të regjimit të Teheranit si organizatë terroriste, ishte ‘harruar’ Hezbollahu dhe Hamasi, zgjatimet e këtij regjimi në Liban, Palestinë apo Gaza! Po e quajmë harresë në nxitim e sipër për të qënë brenda në realitetin e tij paralel të Berishës, por sikurse janë zhvilluar ngjarjet që nga shembja e komunizmit e këtej në raportet e Berishës me Iranin, nuk besojmë se janë ‘harresa’ këto nga shpejtësia apo nxitimi! Berisha nuk bën asgjë pa llogari personale! Është ‘skile’ e vjetër ai, dhe e përshtat gjithçka sipas hallit dhe interesit të tij personal!

Në krye të herës, mendojmë se Berisha nuk e harron ‘flirtin’ me vendet radikale islamike dhe ‘bijtë e terrorit’, teksa sapo erdhi në pushtet në vitin 1992, puna e parë që bëri ishte anëtarësimi i Shqipërisë në Konferencën Islamike. Madje, Berisha u ‘vëllazërua’ aq shumë me këta elementë e vende readikale, sa përfitoi edhe shuma të mëdha parash e ndihma të tjera në formë dhuratash, shtuar këtu dhe ‘bumin’ e madh të fondacioneve dhe shoqatave me emra të përveçëm nga Irani.

Aleatët tanë të mëdhenj, veçanërisht amerikanët nuk i harrojnë ato kohë, i shkruajnë ata që të mos i harrojnë në fakt. Nuk harrojnë kohën kur vendi ynë u kthye në një poligon stërvitjeje për Al Kaedën, luftëtarët e të cilës u vizituan nga vetë Osama Bin Laden më 1994- 1995, ku thuhet se në përbërje të një ‘delegacioni biznesmenësh arabë’, takoi vetë Berishën president asokohe e ku më pas ndoqi nga afër stërvitjet në terren. Për largimin ‘bijve të terrorit’, u ranë ‘shtatë lëkurë’ shërbimeve inteligjente shqiptare dhe atyre partnere me në krye ato të SHBA-ve vite më vonë, kur Berisha u largua nga pushteti, sipas tij ‘me dhunë nga amerikanët’.
SHBA dhe partnerët tanë të mëdhenj, nuk e harrojnë ‘flirtin’ e Berishës me iranianët në të dyja qeverisjet e PD, teksa ka akuza se ka bashkëpunuar edhe me Gardën Revolucionare të Iranit, e sidomos krahun më të rëndësishëm të saj, Forca ‘Quds’, struktura që merret me operacionet e jashtme e me mbështetjen e rrjeteve aleate të Teheranit në rajonin e Lindjes së Mesme, drejtimin e forcave lokale të lidhura me interesat e Iranit, përkatësisht organizatat tashmë të shpallura terroriste Hezbollah e Hamas. Që i ‘harroi’ Berisha t’i shpallte në postimin e tij në rrjetin social!

Dhe nuk janë të reja akuzat ndaj qeverisjeve të Berishës për bashkëpunim me regjimin e Iranit dhe zgjatimet e tij në Lindjen e Mesme, Hamas e Hezbullah! Madje, nëpër koridoret e PD është folur që në atë kohë dhe flitet akoma se, një pjesë e raketave shqiptare ‘tokë-tokë’ dhe ‘tokë-ajër’ që merreshin nga magazinat e ushtrisë e dërgoheshin në Gërdec për t’u ‘demontuar’ në punishten e Gërdecit, thuhet në media se ishte një biznes i Shkelzen Berishës, 90 përqind e tyre kalonin si ngarkesa për shitje në drejtim të organizatave terroriste të Hamasit dhe Hezbullahut! Pra nuk demontoheshin, por shiteshin direkt për këto organizata terroriste!

Dikush mund të thotë se Hamasi dhe Hezbollahu u furnizuan me raketa shqiptare për inat të Fatah-ut, organizatës së Arafatit të ndjerë, i cili ka akuza se u mashtrua nga Berisha në qeverisjen e parë të PD, për blerje armësh. Pasi i ‘hëngri’ lekët dhe nuk dërgoi asnjë armë, u përball më pas me kërcënime dhe vetëm paratë e Piramidave që shkuan një pjesë në dorën e Fatah-ut e shpëtuan nga sikleti e halle të tjera, por që nuk e detyruan të hiqte dorë nga “flirti’ me Iranin dhe ‘bijtë e terrorit’!

Berisha e ka me ‘provë’ këtë tregtinë e armëve e municioneve me vendet e Lindjes së Mesme, pasi mëse njëherë i janë kapur ngarkesa si ato të dërguara për në Çad, në Jemen dhe në vendet e tjera nën konflikt, por dhe anija plot me armë e municione e nisur për t’u dërguar në Libinë e Muamar Gedafit, në kulmin e bombardimeve kundër tij, kontrabandë e bërë gjatë qeverisjes së dytë të PD! Madje të gjithë e mbajnë mend, është me zë dhe figurë, në video e foto, takimin e Lulzim Bashës, ministrit të Jashtëm të asaj kohe në qeverinë e Berishës, me Gedafin. Takimi u bë në çadrën e liderit të vrarë libian. Ju garantojmë se Basha nuk ka shkuar me mendjen e vet atje! Nën hyqmin e Berishës askush nuk mendon me mendjen e vet, ‘montohet’ truri i Berishës në kafkën e tyre. Kështu ka funksionuar dhe do të funksionojë për jetë e mot në PD. Sa të jetë Berisha kryetar i PD, sëpaku!

Fundja Berisha e pranon dhe vetë se e ka në “ADN”në e vet armiqësinë e tij me amerikanët, të cilët i akuzonte publikisht dikur se donin ta hiqnin pushteti kur ishte President. Do të thoni ju, ku e deklaron këtë. As më pak dhe as më shumë por në televizionin iranian. Aty Berisha e gjeti të rrëfente hallet që e kishin kapur me SHBA-të, pra sipas tij ‘me Fuqitë kolonialiste (me në krye SHBA-të), që shkaktuan rrëmujën në Shqipëri dhe luftën në Bosnjë’, duke e detyruar madje që të lejonte dhe kontrabandën e naftës me Milosheviçin sepse “ndihej inferior nga presioni (sipas tij anti-musliman) i vendeve perëndimore”. Pavarësisht se OKB dhe SHBA e akuzuan publikisht Berishën në atë kohë se ka thyer embargon e furnizimit me naftë të Ish-Jugosllavisë së Milosheviçit, thjeshtë e vetëm për pasurim personal të lidershipit të asaj kohe të PD!

I kanë përmendur dhe firmën ‘Shqiponja’ të PD që merrej me tregtinë e naftës me Milosheviçin, dhe e zbardhur ndërkohë më vonë nga ish kryeministri malazez në përbërje të ish Federatës së Jugosllavinë dhe ish numri dy i Federatës, Momir Bulatoviç, i cili shkruan në një libër të tij se është takuar me Berishën dhe ka marrë lehtësira për ‘mbylljen e syve’ për thyerjen embargon e naftës të OKB, pavarësisht se Berisha e tejkaloi këtë pakt, duke e marrë vetë në dorë trafikun e naftës me Milosheviçin. E ka pranuar dhe vetë Berisha këtë fakt, pavarësisht se e justifikoi se do të ndihmonte bujqit në Kosovë për të punuar tokën! Nafta nuk u përdor për trakatorët e bujqve të Kosovës por u përdor për makinerinë serbe që vrau dhe deportoi mbi 1 milionë shqiptarë të Kosovës. Dhe këto fakte janë mbajtur shënim nga partnerët tanë, veçanërisht SHBA!

Berisha asokohe ka akuzuar sërish SHBA-të si shkaktare për firmat mashtruese piramidalë që i grabitën deri në vitin 1997 mbi 1.2 miliardë dollarë kursime dhe e çuan vendin në prag të luftës civile dhe shtetin në faliment. Dhe këto akuza i ka bërë pikërisht në televizionin iranian. “Shumë banka Evropiane dhe të tjera i kanë mbajtur këto firma në mënyrë të veçantë SHBA, ajo nga njëra anë kërkonte prej nesh të heqim dorë nga limani i Durrësit, me qëllim që të vendoste bazat ushtarake të cilat do t’i shërbenin për inspektimin e fluturimeve mbi territorin e Bosnjë-Hercegovinës dhe për këtë ata na premtuan anëtarësimin në Partneritetin për Paqe. Për fat të keq, as që bëhet fjalë për anëtarësim për Partneritet për Paqe, për ndihmë, ndërsa ata tani kërkojnë dorëheqjen time”, deklaron Berisha në televizionin iranian, në atë intervistë të dhënë në prill 1997, vetëm 3 muaj para dorëheqjes nga posti i Presidentit. Aty e ka hapur ‘zemrën’ Berisha!

Asokohe Berisha zbuloi edhe një detaj të ‘vogël’, që kishte të bënte me faktin se kishte bllokuar sipas tij Durrësin, për t’u përdorur nga amerikanët si liman që të mbikqyrte luftën në Bosnje, ku Milosheviçi kreu krime makabre duke vrarë e shkatërruar. Pra Berisha pranon publikisht se i dha një ‘dorë’ të dytë ‘kasapit’ të Ballkanit, duke mos pranuar, sipas tij këtë kërkesë të amerikanëve. Dhe nëse është e vërtetë, ky është krim dhe veprim pro kasapit të Ballkanit.

Pra Berisha, sikurse lideri i tij shpirtëror, Enver Hoxha, me sa duket e ka shumë për zemër Iranin e Ajatollahëve! Diktatori komunist shkroi dhe një libër, “Shënime për Lindjen e Mesme’, ku mbështeti ardhjen në pushtet të regjimit të Ajatollahëve! Në këto gjurmë ka shkuar dhe Berisha gjatë tërë jetës së tij, me sa duket, me dashuri pa kufi për Iranin, jo si një amanet i lënë nga babai i vet për Kuvajtin siç thoshte atëherë, i justifikuar nën ‘petkun’ e dashurisë për Persinë e lashtë dhe armiqësinë për ‘imperialistët’ amerikanë dhe anglezë! Pikërisht ata që e kanë shpallur ‘non grata’ familjarisht në vitin 2021 për korrupsion, minim të demokracisë dhe shantazhim të drejtësisë! Pjesa e dukshme kjo, por që bazë kanë qënë më shumë këto ‘flirtet’ me ajatollahët!

E me sa duket ‘flirti’ i Berishës me Iranin vijon dhe sot e kësaj dite, teksa ndaloi deputetët e tij që të votonin në Kuvend një rezolutë ku shpalleshin terroriste Garda Revolucionare, Hezbollahu dhe Hamasi! Por këto dy të fundit, Berishës nuk ia zë dot goja t’i përmendë në deklaratën e tij të fundit në rrjetet sociale, teksa e ‘shpalli’ Iranin shtet terrorist! Pa lënë asnjë gjurmë zyrtare me një fjalë të mbështetjes me votë në Kuvend, për të qënë nesër në rregull me ajatollahët se ‘s’ka gisht në shpalljen e regjimit të Iranit si financues i terrorizmit’! E ka gati justifikimin, ‘lapsus’ i atyre që menaxhojnë faqen zyrtare të PD në rrjetet sociale! Dhe për t’ia lënë Ramës dhe amerikanëve si gjithnjë fajin!

Këtë ka bërë gjithmonë Berisha! Për interesin e vet, sepse dhe vesi del me shpirtin! Pasi ka frikë se ata ‘miqtë’ e tij andej nga Lindja e Mesme mund të flasin, se kanë për gjë ata! Po rrafshohet Teherani, kokat drejtuese të liderëve në Teheran, Gaza e Liban po ‘këputen’ nga bombardimet dhe më keq nuk ka ku shkon. Por mund të nxjerrin dhe Berishën si aleat i qëndrueshëm i tyre në të gjitha kohët! Prandaj Berisha kërkon të jetë në rregull me Ajatollahët, duke mos lënë gjurmë votimi në Kuvend për rezolutën që e shpall Iranin sponsorizues të terrorizmit!

Nga Jakin Marena

Për ditën e enjte, kreu i PD dhe opozitës, Sali Berisha kishte paralajmëruar se do të rrethonte Parlamentin dhe nëse nuk do t’i jepej leja SPAK-ut për të arrestuar Belinda Ballukun, do ta shembte këtë godinë, ku zhvillon punimet legjislativi shqiptar, njëherë e mirë!
Masat për përballimin e ‘uraganit opozitar’, sikurse e kishte cilësuar Berisha protestën e pritshme para Kuvendit, ditën kur do të votoheshin raportet e PS dhe PD për kërkesën e SPAK për Ballukun, ishin marrë me seriozitet nga ana e policisë shqiptare!
Mbi 1500 efektivë policie, autoboti me ujë dhe masa të tjera të domosdoshme për një protestë të tillë, e paralajmëruar si e dhunshme, u pozicionuan rreth godinës së Parlamentit, të përgatitura për të përballuar një numër të lartë molotovësh e fishekzjarresh, si dhe mundësinë e problemeve të tjera që hamendësoheshin të ndodhnin, të lajmëruara me të madhe dhe nëpër media !
Ajo që u prezantua paraditen e së enjtes ka lënë pa fjalë, si mbështetësit ashtu dhe kundërshtarët e Berishës! Një turmë e vogël protestuesish opozitarë, që nuk e arrinte as numrin e policëve të stacionuar afër godinës së Kuvendit, u mblodh dhe shoqëroi deri në hyrje liderin e PD, Berisha! Në ‘terren’ ishin lënë për të organizuar protestën, Gaz Bardhi dhe Klevis Balliu! Pasi ishin dhe ‘pushim’ për shkak të përjashtimit nga seancat, dhe duhej të bënin ndonjë punë, helbete!
Në sallën e Kuvendit, thjeshtë u ekspozuan disa pankarta kundër Ballukut dhe Ramës, deputetët e PD ‘rrahën’ në kor tavolinat me shuplaka për të bërë sadopak zhurmë, i ‘kërcitën’ votën pro kërkesës së SPAK për të arrestuar Ballukun, bllokuan disa minuta podiumin sa për të treguar se ishin në seancë dhe janë të pozicionuar kundër mazhorancës, dhe në fund dolën qetë qetë nga salla e Kuvendit, mbajtën një fjalim në ecje para turmës së reduktuar e protestuesve, dhe e ndalën hapin tek selia e PD, ku dhanë dhe lajmin e radhës: shtyhet me 22 mars rrëzimi i Ramës!
Nuk u hodh në protesë asnjë fishekzjarr e asnjë molotov kundër forcave të policisë apo drejt godinës së Parlamentit, por vetëm pak spraj blu, i përdorur me pikatore, pa bërë zhurmë. Kështu u mbyll ‘kryengritja’ paqësore e radhës e Berishës, në mënyrën më të pamenduar të mundshme, apo siç kanë thënë dikur të parët tanë, ‘pa asnjë shkrepje’! Dhe një qetësi e tillë nuk erdhi për shkak të pjesëmarrjes së ulët në proteste, sepse e shumta 20 vetë janë ata të caktuarit për aksion nga kupola blu, si dhe furnizuarit që të hedhin molotovët e fishekzjarret tek institucionet.
S’ka nevojë për shumë pjesëmarrje për të krijuar tensione dhe për të ushtruar dhunë ndaj policisë dhe institucioneve! Pasi s’ka pasur pjesëmarrje as herët e tjera, por në të gjitha herët e hodhën në flakë kryeministrinë, Kuvendin e deri edhe vilën e ish diktatorit Enver Hoxha në Bllok! Ku për pak sa nuk ‘poqën’ të gjallë artistët e akomoduar aty, mes të cilëve dhe të huaj! Këtë të enjte, Berisha ishte i ‘fikur’ fare! E themi këtë sepse ka bërë një ndër protestat më të qeta, nga mijëra protesta që ka bërë në karrierën e tij, gati 36 vjeçare në krye të PD!
Janë të shumta hamendësimet në lidhje me këtë ‘qetësi’ të Berishës! Disa thonë se është plakur, disa të tjerë se s’kishte njerëz, të tjerë që s’kishte organizim, kjo përgënjeshtrohet nga deputeti Gjin Gjoni, i cili deklaron se e kishin planifikuar më parë rrethimin e Kuvendit si dhe ngushtimin e ‘lakut’, por skenari ndryshoi në momentet e fundit! Disa të tjerë ngulin këmbë se Berisha ka marrë ndonjë mesazh nga evropianët që të rrijë i qetë dhe të mos bëjë të keqin! Të gjitha hamendjet janë në tryezë, por është vështirë të zgjedhësh njërën, për ta projektuar si të vërtetë! Qoftë një të vërtetë dhe me kutin e Berishës apo realitetin e tij paralel! Sidomos në rastin e Berishës, i cili gjithçka e projekton në funksion të halleve të veta, të interesit të vet, si gjithnjë!
Por ishte një zhvillim tjetër politik që na bën të mendojmë se ka pasur një ‘indikator’ të jashtëm që e ‘fiku’ protestën e Berishës! Në mëngjesin e ditës së enjte në media qarkulloi lajmi i një takimi të rëndësishëm në kryeministri, i ndodhur në mbrëmjen e së mërkurës, por që s’ishte bërë publik nga aktorët e këtij takimi. Ishte kapur rastësisht nga kamera private afër godinës së Kryeministrisë! Konkretisht, ambasadorja e SHBA në Greqi, Kimberly Guilfoyle, është pritur në Tiranë nga kryeministri Edi Rama. Siç u pa edhe në videon e publikuar nga mediat, Rama priti ambasadoren amerikane me një përqafim shumë miqësor në shkallët e Kryeministrisë, dhe ku më pas zhvilluan së bashku një takim, jashtë syve të medias, dhe pa asnjë deklaratë publike.
Ai që e bën edhe më interesant këtë takim është fakti se Guilfoyle nuk konsiderohet thjesht një ambasadore e SHBA në një vend fqinj, por ajo është një nga njerëzit më të besuar të presidentit amerikan, Trump. Për më tepër që është ‘dekane’ e ambasadorëve amerikanë në tërë ‘pellgun’ e Ballkanit dhe pak më gjërë, çka tregon fuqinë e saj politike pranë presidentit Donald Trump!
Ndonëse media greke ka zbardhur detaje për vizitën në Tiranë të ambasadores së SHBA-ve në Athinë, duke e lidhur atë me zhvillimet në sektorin energjetik në rajon, është pak e vështirë të besohet se ‘dekania’ e ambasadorëve të SHBA në Ballkan, vjen në mbrëmje në Tiranë në një vizitë të pa lajmëruar zyrtarisht dhe takon kreun e qeverisë shqiptare, thjeshtë e vetëm për të folur për gazin e lëngshëm, për të diskutuar me Ramën se si funksionon terminali lundrues për gazin e lëngshëm natyror, që përdoret për të importuar dhe përpunuar gazin e lëngshëm natyror, e cila është një anije e pajisur me rezervuarë të mëdhenj ku ruhet gazi i lëngshëm që mbërrin me cisterna nga vendet prodhuese dhe elementë të tjerë teknikë të shndërrimit të gazit në lëng!
Ambasadorja Guilfoyle, një figurë e afërt me presidentin Trump, që u prit me ngrohtësi nga Kryeministri Edi Rama, sipas medias greke, paska udhëtuar drejt Tiranës me qëllimin e vetëm, gjetjen e mundësisë së ndërtimit të një terminali lundrues për gazin e lëngshëm natyror (FSRU) në Shqipëri dhe se një projekt i tillë do të kishte rëndësi për furnizimin me gaz të rajonit dhe për rolin e vendeve të Ballkanit në rrjetin energjetik evropian. Pasi, zhvillimi i infrastrukturës për LNG është kthyer në një çështje strategjike, veçanërisht pas tensioneve në tregjet globale të energjisë dhe përpjekjeve të Evropës për të diversifikuar burimet e furnizimit me gaz.
Dhe si për ta përmbyllur vizitën në Tiranë të ambasadores së preferuar të Trump, në ‘favor’ të Athinës zyrtare, media greke vëren me vëmendje se diskutimet për një projekt të mundshëm LNG në Shqipëri vijnë në një moment kur Greqia synon të forcojë rolin e saj si qendër rajonale për importin e shpërndarjen e gazit, përmes projekteve si terminalet LNG e rrjetet e interkoneksionit. Pak si shumë e paqartë për të qënë tërësisht e vërtetë! Dhe për më tepër, vështirë që super-ambasadorja amerikane në Greqi, të udhëtojë pasdite vonë drejt Tiranës për t’u takuar me Ramën, në funksion të kthimit të Greqisë në qendër rajonale! Pak i tepërt ky arsyetim!
Pavarësisht se nuk përjashtohet mundësia e bisedimeve për gazin e lëgshëm, është në interes të palëve për këtë bashkëpunim ekonomik, për më tepër që hapësira mbarëshqiptare, brenda dhe jashtë kufirit përfshin një treg tepër të madh dhe portet shqiptare janë një aset real, është jashtë të gjitha mundësive logjike që ‘dekania’ e ambasadorëve amerikanë në Ballkan, njëherësh dhe njeriu shumë i afërt i presidentit Trump, të udhëtojë nga Athina në Tiranë, për të realizuar një takim jashtë syve të publikut, vetëm për të folur me Ramën për gazin e lëngshëm!
Teksa i lidhim të gjitha rrethanat, konfliktin në Lindjen e Mesme, tentativën ruse për të ndërhyrë në Ballkan, ‘fikjen’ e Berishës në protestën para Kuvendit, të cilin ishte betuar se do ta shembë nëse votohet kundër kërkesës së SPAK për arrestimin e Ballukut, si dhe heshtjen deri më tani të ambasadës amerikane në Tiranë për votimin e ditës së enjte të mazhorancës kundër lejes për SPAK për arrestimin e Ballukut, pavarësisht se të gjitha ambasadat u prononcuan, tregon se ‘valixhja diplomatike’ e ambasadores së fortë amerikane në Athinë, Guilfoyle, kishte mesazhe të tjera, akoma më të forta se sa ai i gazit të lëngshëm! Aq më tepër që Shqipëria ka kohë që nuk ka ambasador amerikan në Tiranë, vetëm një të ngarkuar me punë të SHBA, Nancy VanHorn-in!
Lind pyetja: Çfarë mesazhi solli për Sali Berishën super-ambasadorja amerikane në Athinë, gjatë takimit me Ramën në kryeministri, që ndikoi fort në uljen e ‘tempit’ të protestës para Kuvendit, të paralajmëruar si një ‘kryengritje’ që do të merrte para dhe do të ‘rrëzonte’ këtë qeveri?! Berisha u shfaq i ‘fikur’ këtë të enjte, nuk e kishte forcën e mëhershme, dhe me sa duket përmes kanaleve diplomatike, gjenden dhe pa realizuar takim ‘tet a tet’, ai e ka marrë mesazhin nga administrata e presidentit Trump, që të mos luajë me ‘zjarrin’, sepse ata s’të falin!
Tashmë Berisha s’mund të përdorë as Sorosin si argument për t’u justifikuar për qëndrimin e fortë amerikan, në një rast të mundshëm! E quan aleat Trump, ka festuar kur është zgjedhur, madje shpresonte të çonte delta-forcën me helikopterë në Surrel për të arrestuar Ramën. Çfarë dosje paralajmërohet të vijë nga Uashingtoni që i ka mbyllur gojën Berishës, pasi janë disa hetime në përfundim e sipër, që nga Gërdeci e deri te ’21 janari’ dhe financimet ruse për PD!
Në fund të herës, ajo që na bën të ndjehemi mirë, është fakti se Tirana ka kohë që po trajtohet si qendër rajonale për Ballkanin, dhe nuk përjashtohet mundësia që të jenë dhënë dhe mesazhe për t’u përcjellë në Prishtinë, por dhe në vendet e tjera të rajonit. Mesazh këto, për shkak të pragut të krizës institucionale në Kosovë, lëvizjeve jo normale me zhvendosje nga Lindja, në Shkup etj, apo tensionimi i situatës në Podgoricë dhe lëkundjet e forta mes Moskës e Brukselit të Vuçiç!
Të gjitha lëvizjet politike të ofruara nga aleati ynë i madh dhe i pazëvendësueshëm, SHBA, janë në tryezë. Përfshirë dhe bisedën për gazin e lëngshëm të ‘piketuar’ nga media greke si shkak i vizitës në Tiranë të super-ambasadores amerikane në Athinë, megjithëse është shumë pak si ‘lëndë diplomatike’ për të realizuar një vizitë të këtyre përmasave, të njeriut ndër më të afërtit dhe më të besuarit e presidentit Trump!
Të presim! Sinjalet e para u dhanë, Berisha ‘fiku’ për momentin dhunën në protesta, ndërsa ambasada amerikane në Tiranë, megjithëse as nuk ishte fare prezente në takimin e Kimberly Guilfoyle me Ramën, madje as që e kishte bërë ndonjë lajmërim për këtë vizitë të pa paralajmëruar të saj, nuk ka dhënë asnjë deklaratë për votimin e djeshëm të Kuvendit, që rrëzoi kërkesën e SPAK për arrestimin e Ballukut! Ditë pas dite do të zbardhen nga pak, këto mesazhe!
Filloi që këtë të premte zbardhja, teksa kryeministri Edi Rama zbulon, aq sa mund të zbulonte, fokusin e takimit me ambasadoren e SHBA në Greqi, Guilfoyle, të cilën e priti në Kryeministri. Rama tha se fokusi ka qenë tek disa çështje të interesit të lartë të SHBA në rajon, që kanë të bëjnë me energjinë, me bashkëpunimin rajonal dhe qasjen ndaj forcave dhe aktorëve të tretë.
“Ka ardhur për të bërë një takim njohjeje për të diskutuar për disa çështje që janë çështje të interesit të lartë amerikan në këtë rajon, që kanë të bëjnë me energjinë, që kanë të bëjnë me bashkëpunimin rajonal, me qasjen ndaj forcave të treta, aktorëve të tretë, dhe nga ana tjetër, kini parasysh që ambasadorja e SHBA në Athinë është një përfaqësuese botërisht e njohur në politikën amerikane drejtëpërdejtë e rrethit të ngushtë vendimmarrës të Trump”, tha Rama. Duke treguar qartë se Tirana është bërë qendër rajonale, pikë reference për Uashingtonin! Dhe për të përcjellë mesazhet tek vendet e rajonit, si partneri më i besueshëm i Trump!

Nga Jakin Marena

Në Shqipëri, teksa zien debati nëse reforma në drejtësi ka dështuar apo jo, ajo që vihet re me sy të lirë është fakti se ka shpërthyer një absurditet në maksimum, në lidhje me qasjen ndaj punës së SPAK dhe gjykatave të posaçme si dhe nismave që kanë nisur të ndërmerren nga gjyqësori për përmirësimin e drejtësisë së re.
Ndërsa, ashtu sikurse pritej, qëndrime kontradiktore e me dy standarde kanë dalë në sipërfaqe dhe në lidhje me qëndrimin më të fundit të mazhorancës socialiste, që ka të bëjë me refuzimin e dhënies së autorizimit për SPAK, për arrestimin e ish numrit dy të qeverisë dhe ish ministres së Infrastrukturës e Energjetikës, Belinda Balluku!
Në qendër të këtij absurdi qëndrimesh, të cilat ndryshojnë me orë e minuta, gjendet PD dhe opozita shqiptare në tërësi, e kryesuar nga Berisha, e cila në mungesë të një orientimi të qartë për mënyrën se si duhet bërë drejtësi në këtë vend, mungesë orientimi i qëllimshëm pasi Berisha është njeriu më i qartë në këtë dynja në raport me drejtësinë, në mëngjes sulmon e kërcënon me ‘libër shtëpie’ prokurorët dhe gjyqtarët e posaçëm, ndërsa në drekë del para mediave e mbështet SPAK-un në punën e tij, pasdite proteston kundër qeverisë se përse nuk lejon SPAK-un të bëjë punën e vet me Ballukun dhe arrestimin e saj!
Një PD e tërë, e vënë në shërbim të Berishës dhe familjes së tij, plotëson tekat e një plaku që ka marrë më qafë të gjithë opozitën, vetëm e vetëm se familjarisht, jo vetëm që është non grata në SHBA dhe Britani të Madhe, por është dhe nën hetim nga drejtësia shqiptare, madje i marrë si i pandehur, për dosjet e rënda të korrupsionit, krimit shtetëror dhe verifikimit të pasurisë!
Opozita është kundër SPAK në momentin kur Berisha paraqitet para oficerit gjyqësor konform masës së sigurisë për të shënuar emrin e për të thënë se është në territorin shqiptar! Në dalje, kreu demokrat atë bën ritualin e përditshëm, duke sulmuar dhe marrë nëpër gojë me tërë arsenalin e akuzave, fyerjeve dhe kërcënimeve, prokurorët e gjyqtarët e posaçëm që kanë në dorë çështje e tij dhe familjarëve të tij! Pastaj, në mesditë akuzon Ramën se ka marrë peng shtetin dhe SPAK-un, duke bërë thirrje në drejtim të organizmave ndërkombëtarë që të ndërhyjnë për të lënë të qetë drejtësinë e re që të bëjë punën e saj! Ndërsa në darkë, njëherë në 10 ditë si dhe çdo të hënë përmes foltoreve me 20 vetë në shesh, deklaron përmbysjen e madhe të ‘narkoshtetit’ sipas tij, të cilin e akuzon se po ushtron presion mbi drejtësinë për të shmangur hetimin dhe dënimin e ish ministrave! Një mish-mash i vërtetë ky i Berishës!
Ndërsa nisma e kreut të Gjykatës së Lartë për ndryshimin e pjesshëm të praktikës unifikuese të vitit 2011 mbi masat e sigurimit personal synon të rishikojë një nga standardet më të rëndësishme të praktikës penale shqiptare, e që ka të bëjë me mënyrën se si gjykatat vendosin dhe arsyetojnë masën më të rëndë të sigurimit, “arrestin në burg”. Që e kanë kthyer primare!
Në thelb, dokumenti propozon që Kolegjet e Bashkuara të rishqyrtojnë disa prej tezave kryesore të vendimit unifikues nr.7 të 2011-ës, që për më shumë se një dekadë ka shërbyer si udhërrëfyes për gjykatat në vendimmarrjen mbi kufizimin e lirisë personale. Pra, nisma synon të rishikojë standardin e vendosur nga vendimi unifikues dhe ta përshtasë atë me zhvillimet e reja ligjore dhe me standardet e Konventës Evropiane për të Drejtat e Njeriut.
Qëllimi i kësaj nisme është që vendimmarrja për paraburgimin të bëhet më e kontrollueshme, më e individualizuar dhe më e përputhshme me parimin se kufizimi i lirisë personale duhet të mbetet një masë përjashtimore. Nëse Kolegjet e Bashkuara do të pranojnë këtë rishqyrtim, praktika gjyqësore shqiptare mund të kalojë drejt një standardi më të rreptë për përdorimin e “arrestit në burg”, duke kërkuar nga gjykatat një analizë më të thelluar të rrezikut e një vlerësim real të alternativave ndaj paraburgimit. Në këtë kuptim, nisma nuk synon thjesht ndryshimin e një vendimi të vjetër unifikues, por vendosjen e një qasjeje të re në interpretimin e masave të sigurimit personal, një qasje që vendos në qendër parimin e proporcionalitetit dhe mbrojtjen e lirisë personale.
Menjëherë pas daljes në publik të kësaj nisme të Gjykatës së Lartë, opozita dhe mbështetësit e saj nëpër panelet televizive, e goditën fort, duke e cilësuar si një përpjekje të mazhorancës dhe Edi Ramës për të mbajtur jashtë dyerve të burgut ministrat dhe zyrtarët e lartë të PS! Pavarësisht se deri ditën e martë, kur u publikua nisma nga kreu i Gjykatës së Lartë, ishte vetë lidershipi i opozitës që e kishte kritikuar pa fund qasjen e drejtësisë së re, për të marrë si masë sigurie në rastin e Ilir Metës apo dhe të vetë Sali Berishës, masën e arrestit, me burg apo arrest shtëpie!
Kanë ardhur kritika nga ndërkombëtarët për çështjen e masave të sigurimit, respektimin e kritereve dhe kushteve për vendosjen e një mase sigurimi, kanë ardhur reagime të forta edhe nga BE. Para disa javëve ishte edhe drejtori për të drejtat e njeriut në BE, që hodhi kritika të ashpra për paraburgimet në Shqipëri, ashtu siç hodhi kritika dhe për mënyrën sesi gjykatat vendosin mbi përcaktimin e kritereve apo afateve për të qëndruar në paraburgim, i cili nuk vlerësohet në mënyrë dinamike ashtu siç Gjykata e Strasburgut e ka vendosur!
Ndërsa pritet të miratohet një nismë e tillë, ajo që mund të themi është se shpresojmë që të marrë fund njëherë e mirë paraburgimi i shqiptarëve, vetëm mbi bazën e dyshimeve, për të gjetur më pas prova rrugës! ‘Përfitojnë’ në fakt nga kjo nismë edhe Berisha e Meta, por dhe kryebashkiaku i Tiranës Veliaj, ish ministri Beqaja, zyrtarë të tjerë e mbi të gjitha qytetarët shqiptarë, të cilët do të kenë shansin të hetohen në gjendje të lirë, si njerëz! Është kërkesë dhe e institucioneve ndërkombëtare për uljen e numrit të paraburgimeve! Tani, opozita del kundër! Pra, një absurd i vërtetë! Pavarësisht, se jo vetëm duhet mbështetur një nismë e tillë, por duhet bërë dhe ai i ‘bekuar’ ndryshim në ligj, për ta hequr gjyqësorin nga ‘kthetrat’ e SPAK, që të marrë fund njëherë e mirë përdorimi i gjyqtarëve si noterë të çfarëdo kërkese të prokurorëve!
Rasti më flagrant e një strategjie me dy standarde ka qënë debati që ka shpërthyer në lidhje me kërkesën e SPAK ndaj Kuvendit për të marrë autorizimin e arrestimit të Ballukut! E cila, pas largimit nga postet qeveritare, është thjeshtë e vetëm deputete! Mazhoranca miratoi raportin, i cili do të votohet ditën e enjte në Kuvend, duke mos dhënë aprovimin për kërkesën e SPAK për ta arrestuar ish zv.kryeministren! Nën argumentin se hetimi nuk pengohet nga deputetja Balluku, në gjendje lirie, e pa asnjë mundësi për të dalë jashtë vendit, për shkak të bllokimit të pasaportës!
Opozita dhe njerëzit afër saj, herë në daljet publike e herë nëpër panelet televizive, vunë nën akuzë Ramën se po mbron Ballukun nga drejtësia! Futën turli teorish konspirative, a thua se mazhoranca socialiste vendimin e saj për refuzimin e lejës për SPAK për arrestimin e Ballukut e kishte marrë në ndonjë ligj apo Kushtetutë të vendeve të Afrikës! Këtë mundësi, pra marrjen e këtij vendimi, e ka të fiksuar Kushtetuta e ligji shqiptar, për të mbrojtur pavarësinë e institucionit të Kuvendit! Pasi të ishte thjeshtë formalisht, e Kuvendi të ishte thjeshtë një noter për kërkesat e prokurorëve për arrestimin e deputetëve, atëherë pse do ta ‘rëndonin’ Kushtetutën me një nen të tillë. Nuk e vinin fare, dhe SPAK apo prokuroria më pas, kur të mos ketë më SPAK themi, do të kërkonin prangosjen e deputetit me vendimin e një gjyqtari si për të gjithë qytetarët e tjerë dhe t’i ‘plaste’ në paraburgim, pa lejen e Kuvendit!
Por PD dhe opozita, të udhëhequra nga Berisha e çon më tej absurdin, teksa ka paralajmëruar se do të djegë apo shembë ditën e enjte Kuvendin, duke protestuar kundër Ramës që s’po ‘lëshon’ Ballukun! Për më tepër që, duke marrë dhe ‘statusin’ e prokurorit dhe të gjyqtarit të posaçëm, përfaqësues të lidershipit të opozitës, ‘ndihmojnë’ Berishën për të dhënë pretencën dhe vendimin e me sa vite burg duhen për deputeten! Madje, duke akuzuar Edi Ramën, se shpëtimin e ish zv.kryeministrës nga arrestimi, ai e bën thjeshtë e vetëm për të shpëtuar veten, veprime këto që sipas opozitës shqiptare po pengojnë integrimin e Shqipërisë në BE. Megjithëse të martën ka qënë vetë presidentja e Komisionit Evropian, Ursula Von der Leyen ajo që deklaroi që vendet e Ballkanit Perëndimore duhet të anëtarësohen menjëherë në BE, që tani sipas saj, për arsye sigurie! Ishte një lajm që kaloi si pa u vënë re për shkak të ‘temperaturave’ të larta politike!
Dhe akuzat e Berishës dhe opozitës, deri në kërcënimet pë djegien e Parlamentit dhe të vendit, në mesin e një situate lufte në Ukrainë e Lindjen e Mesme, vijnë me një argument tjetër, sa të çuditshëm aq dhe kontradiktor! Pavarësisht se Rama ka qënë gjithnjë nën akuzë nga Berisha, opozita dhe mbështetësit e tyre se është lideri i vetëm shqiptar që nuk i mbron bashkëpuntorët e vet, tani që mbajti këtë qëndrim për Ballukun mbështetur në të drejtën kushtetuese për çdo deputet të Kuvendit të Shqipërisë, ai prap po kryqëzohet! Tashmë si mbrojtës!
Për hir të së vërtetës, Berisha ka qënë vetë ai që kur ishte në pushtet ka mbajtur zyrtarë të lartë në punë dhe në arrest shtëpiak, të cilët firmosnin nga shtëpia! Paçka se akuzoheshin për krime të rënda deri dhe zhdukje njerëzish! Sjellja e opozitës dhe lidershipit të saj, në të gjitha herët, është e pastabilizuar e me dy standarde! Duke na kujtuar atë sindromin e kahershëm të saj në sjelljen politike, ‘hip se të vrave, zbrit se të vrava’!
Të shohim si do të zhvillohen ngjarjet këtë të enjte, në ditën e protestës, sipas PD, ‘kundër padrejtësisë’! Do të shembet Parlamenti apo jo?! Aq më tepër që, nga njerëz, të cilët me 750 shkelma kanë marrë azil politik diku në Evropi, janë lëshuar thirrje për të qëndruar fort përballë Kuvendit, deri dhe në vetëflijim, në mbështetje të Berishës! I cili po shihet nga ky kontigjent në ‘diasporën’ e re dhe një grusht demokratësh, gjithnjë e në zvogëlim, si e ardhmja e PD dhe opozitës shqiptare, dhe pse është në moshën 82 vjeçare! Të shohim dhe këtë ritualin e të enjtes!

Nga Jakin Marena

Nëse ka një gjë që i bashkon në një të vetëm tre emrat e përmendur që në titull, Fredi Belerin, Sali Berishën dhe Ilir Metën, është qasja e njëjtë që kanë, në lidhje me zhvillimet politike në Shqipëri, procesin e integrimit dhe ngjarjet më të rënda që kanë ndodhur në këtë vend!

Nuk duam të arrijnë në konkluzione të parehatshme për ta apo për shqiptarët, në akuza që rëndojnë cilindo prej këtyre të treve, por ama s’ mund të heshtim në lidhje me përpjekjet e vazhdueshme të tyre, për të nxirë në një mënyrë apo tjetër dhe intensivisht Shqipërinë, jo vetëm në sytë e shqiptarëve kudo që janë, por dhe të ndërkombëtarëve!

Akuzat ndaj qeverisjes së vendit nuk kanë të bëjnë me keqqeverisjen, por në përpjekjet për të paraqitur Shqipërinë në sytë e partnerëve tanë ndërkombëtarë që po na mbështesin në rrugën e vështirë të anëtarësimit në BE, si një narko-shtet, të kapur nga mafia vendase dhe ndërkombëtare dhe si një vend që përbën rrezik potencial për BE dhe për vetë SHBA! Dhe kjo është ligësi!

Madje Berisha, Beleri por dhe Meta që nga qelia e paraburgimit në burgun 3013, kanë artikuluar akuza të tilla, deri në thirrje ndaj Brukselit për të vendosur kushte të rënda për integrimin në Union, me argumentin se me këtë qeverisje të drejtuar nga Rama, vendi ynë nuk është gati për të bërë hapin e madh, mbylljen e negociatave në 2027 dhe anëtarësimin në vitin 2030! Pavarësisht se SHBA dhe BE i kanë injoruar këto akuza, pasi Trump ftoi në SHBA Ramën në kuadër të pjesëmarrjes në aktin themelues të Bordit të Paqes ndërsa Brukseli ka mbështetur fort Shqipërinë për integrimin, duke vlerësuar progresin që ka bërë, në të gjitha fushat, nxirja e vendit, etiketimet e paqëna përtej luftës politike normale, nuk ndalet nga këta njerëz!

Nënvizojmë se, pavarësisht se në rrethana të tjera, Berisha e Meta duhej të ishin kundër Belerit, këtij eurodeputeti grek që ka hyrë në politikë përmes masakrës së Peshkëpisë ku u vranë nga komandot greke ushtarakët shqiptarë të kësaj pike kufitare si dhe ‘specializimit’ si hidraulik, me kategori të lartë thonë, apo misionit të tij të pamundur për helenizimin e jugut të Shqipërisë, dyshja drejtuese e opozitës shqiptare u bë bashkë dhe e propozoi Belerin si kandidat për kryetar bashkie në Himarë, në emër të koalicionit opozitar!

Rrethanat e sollën që për shkak të akuzës për blerje votash të përfundonte në burg dhe të mos e merrte mandatin e kreut të bashkisë në Himarë, gjasat janë që të mos e marrë kurrë më, Beleri arriti që dhe falë mbështetjes që i dhanë Berisha e Meta duke akuzuar qeverinë shqiptare se po përndjek minoritetin grek apo se po përpiqet që të godasë minoritetin grek për çështje pronash, pra Beleri, teksa u shfaq si viktimë e ‘regjimit të Ramës’, u propozua dhe u zgjodh deputet në Parlamentin Evropian, nga partia e Mitsotakis, për të përfaqësuar shtetin grek në Bruksel! S’ka asgjë të keqe në fakt, kishte nevojë dhe PE për Belerin, me sa duket, nga radhët e zanateve!

Dhe që nga ajo kohë, ‘trioja’ nuk ka pushuar së foluri kundër Shqipërisë dhe shqiptarëve, për t’i paraqitur ata si ‘gogol’ në sytë e ndërkombëtarëve, dhe për më tepër vendin tonë si jo gati për të kaluar nëpër ‘stacionet’ e shpejta të integrimit për në BE, me fazë finale të pranuar dhe nga vetë vendet anëtare të Bashkimit Evropian, anëtarësimin në vitin 2030!

Ndërsa Beleri ka kohë që ka prezantuar linjën e tij politike kundër Shqipërisë, si progonatas që është dhe me të kaluar bejlerësh, ka nisur që të ndryshojë dhe theksin e shqipes duke i dhënë theks grek, linjë që përbën kolonën e përpjekjes së tij për helenizimin e Jugut të Shqipërisë dhe ringjalljes së të ashtuquajturit “Vorio-Epir”, Berisha e Meta po sillen ndjeshëm si ‘ndihmës’ apo zëvendës të këtij “hidrauliku’ të certifikuar, që përfaqëson Greqinë në Parlamentin Evropian!

E themi këtë sepse në zgjedhjet e 11 majit, Berisha dhe partia e Metës bënë fushatë duke pasur Belerin në podiumin e nderit, si të dërguar të shtetit grek por dhe duke e paraqitur si të dërguar të Parlamentit Evropian. Ndërsa takimet e Berishës në Athinë u organizuan nën kujdesin e Belerit! Dhe kjo sërish nuk ka asgjë të keqe, jemi fqinjë dhe përderisa respektohen rregullat e fushatës zgjedhore, pa asnjë ndërhyrje nga zyrtarët e vendit fqinj, gjithçka është normale!

Tashmë së fundmi, me sa duket e ka ndjerë ‘erën e mirë’ nga Brukseli, që Shqipëria mund të anëtarësohet deri më 2030 në BE, kjo treshe ka nisur të ‘shkundë’ dosjet e vjetra, për të ngritur akuza të reja ndaj qeverisë Rama por dhe për të hequr barrën e fajit që kanë pasur vetë gjatë qeverisjeve të tyre, ndërkohë që janë nën hetim për shkak të zullumeve që kanë ndër vite në pushtet.

Që në krye të herës ishte dëshira e ish presidentit Ilir Meta, i cili që nga qelia e burgut kërkoi që të pyetej për ngjarjen e 21 janarit 2011, ditë në të cilën Garda e Republikës, me urdhër nga lart, brenda godinës së kryeministrisë ishin kreu i qeverisë së asaj kohe Sali Berisha dhe ministri i Brendshëm Lulzim Basha, qëlloi me plumba prej vërteti mbi turmën e protestuesve të opozitës që po shpërndahej, duke vrarë katër prej tyre!
Tani, vërtetë që Meta ishte ‘strumbullari’ për protestat e opozitës së atëhershme, pasi për shkak të publikimit të videos nga ana e Dritan Priftit, tashmë të ndjerë, ku shihej ashiqare korrupsioni i ofruar nga zv.kryeministri i asaj kohe, opozita u ngrit në protestë. Por ama Meta ka qënë i dorëhequr dhe në proces hetimi, dhe nuk kishte asnjë mundësi që të dinte se çfarë bëhej brenda kryeministrisë më 21 janar! Aq më tepër që vetë Berisha që ishte në zyrë, bën sikur s’di asgjë!

Pavarësisht se SPAK nuk kishte se çfarë të kërkonte në dëshminë e Metës për të zbardhur sipas tij, të pathënat për ngjarjen tragjike të 21 janarit 2011, deklaratat e mëpastajme të Metës zbuluan dhe atë çfarë deklaronte të arrinte, por që nuk kishte të bënte fare me ditën e tragjedisë, 21 janarin, por me shumë e shumë ditë përpara kësaj ngjarjeje, e formatuar në akuzën e përbashkët me Berishën se, Rama është fajtor për këtë ngjarje, pasi solli ai protestuesit para kryeministrisë!

Nëse do të veprohej sipas ‘kutit’ të Berishës e Metës me protestat e opozitës aktuale të opozitës, sidomos ato të vitit 2019 dhe të këtyre viteve të fundit, atëherë jo vetëm duhej të kishte shkuar, larg qoftë, ‘gjaku deri në gju’, por nën hetim si fajtorë duhej të kishin shkuar me kohë e vakt Berisha, Basha, Kryemadhi apo dhe të tjerë, pasi ata i kanë organizuar protestat! Për fatin e mirë, qeverisja e PS nuk është ajo e PD, kjo qeveri nuk të vret, prandaj ankohen protestuesit demokratë vetëm për ‘cilësinë e gazit lotsjellës’, të hedhur nga policia. Ndërsa më 21 janar 2011, Garda, mori urdhër të derdhte breshëri plumbash prej vërteti mbi kokat e demonstruese duke vrarë katër prej tyre dhe jo gaz lotjellës të skaduar si tani, ku e shumta të bën të fërkosh sytë nga djegia! ‘Kryengritësit heronj’ të Berishës hyjnë e dalin nga policia pa u hyrë gjemb në këmbë, ndërsa për 4 të vrarët e 21 janarit 2011, për gati 15 vite me radhë, nuk ka drejtësi!

Meta, me këtë përpjekje për të dëshmuar dhe për të larguar vëmendjen nga dita e vrasjes së 4 demonstruesve të opozitës më 21 janar, me elementë të para kësaj date, tentoi të shfajësonte veten, duke u përpjekur të krijojë narrativën se i ngritën kurth me video-përgjimin e Priftit ku kërkonte ryshfet. Mbështetet tek ekspertiza shqiptare që e nxorën të manipuluar video-përgjimin përkundër ekspertizës së huaj, teksa vendimi i Gjykatës së Lartë për të mbështetur pretendimin e tij, solli dhe shpalljen të pafajshëm. Pra Meta tenton të shpërqëndrojë hetimin, pasi Strasburgu kërkon nga SPAK që të hetohen urdhërat e dhëna më 21 janar 2011 ndaj Gardës për të qëlluar dhe vrarë protestuesit që po shpërndaheshin! Nuk kërkon të hetohet çfarë u bë para 21 janarit!

Të njejtën gjë po bën Meta dhe tani së fundmi, teksa u bënë ndryshimet në qeveri dhe në krye të Ministrisë për Evropën dhe Punët e Jashtme u dekretua Ferit Hoxha, ish ambasadori ynë në OKB dhe në BE! Është dekretuar dhe nga Meta ambasador dy herë, në kohën kur ishte President! Por ama, pas gati 18 vitesh, ish presidenti Ilir Meta ka dalë me një akuzë të re për ministrin tashmë dhe të betuar në Presidencë, Ferit Hoxhën! Akuzë e ‘gëlltitur’ brenda vetes nga Meta, përmbi 17 vite! Shumë është mbajtur për t’u bërë publike këto ditë!

Meta, që nga qelia ka hedhur akuza në drejtim të Ferit Hoxhës se paska qënë ai fajtori kryesor për marrëveshjen e “Detit’ me Greqinë, e cila për shkak se i falte territor Greqisë nga territori shqiptar, u rrëzua nga ana e Gjykatës Kushtetuese të asaj kohe si anti-Kushtetuese, me një rezultat 9 me 0! Një marrëveshje e nënshkruar kjo, nga ish ministrat e jashtëm Lulzim Basha dhe Dora Bakojanos, në prezencë të ish kryeministrave Sali Berisha dhe Kostas Karamanlis! Sipas Metës, referuar deklaratës së ish zëdhënësit të tij, Ferit Hoxha, si kryenegociator i Shqipërisë për këtë çështje i kishte dhënë informacione dhe kishte tentuar ta “shiste” firmosjen e marrëveshjes si të negociiuar nga Sali Berisha.

Tani, askush nuk e beson se Hoxha ia paska ‘futur’ Bashës e Berishës për një marrëveshje kaq të rëndësishme, si ajo e kufirit të “Detit”! Dihet si funksionojnë gjërat, aq më tepër për Berishën, i cili dinte të paktën në atë kohë dhe sa ‘miza’ fluturojnë nëpër Tiranë, apo nëpër ministritë që ai drejtonte me dorë të hekurt! Dihet se sa liri kishin ministrat për të vendosur pa urdhër të Berishës, jo më sekretarët e përgjithshëm të ministrive! Por ama, Meta që nga qelia tentoi t’i bënte ‘qokën’ e dytë Berishës, për t’ia hequr të pamundurën, përgjegjësinë që Berisha si kryeministër kishte për faljen e territorit shqiptar, Greqisë! Dhe nuk e bën badihava Meta këtë!

Për hir të së vërtetës, i gjendur nën akuza të rënda në qelitë e burgut 313, tashmë në momentin kur dosja është gati për të kaluar nën gjykim, Ilir Meta po dërgon mesazhe në drejtim të aleatit të tij Berisha, por dhe më tej tek aleatët e tij në Athinë, përmes Belerit, që të ndikojnë në zbutjen e akuzave! Duke parë se presionet e Berishës ndaj SPAK e Gjykatës së Posaçme kanë bërë punë, duke e lënë jashtë qelisë për akuzat e shumta që ka në kurriz dhe dosjet e rënda që ka nën hetim, Meta shpreson se një ‘kolpo’ presioni e Berishës ndaj drejtësisë së re dhe në favor të lehtësirave për të, do të bëjë punë, përballë akuzave me të cilat po përballet! Te Berisha kanë bërë punë!
Ndërsa mesazhi për politikën greke që ta marrë nën mbrojtje vjen dhe për shkak se Ilir Meta, në kohën kur ishte kryetar Kuvendi është dekoruar nga parlamenti grek me “Kryqin e Artë”. Një medalje që i është dhënë me motivacionin “për kontribut të shquar në shërbim të Greqisë dhe përhapjes së helenizmit në botë”. Eshtë medalje e rëndë dhe oblikuese kjo!

Në tetor 2016 në një takim në Athinë, kreu i Parlamentit grek Nikolaos Voutsis i akordoi Metës “Medaljen e Artë të Parlamentit të Greqisë”. Kjo medalje i akordohet nga Parlamenti grek personaliteteve të rëndësishme në shenjë nderimi për kontributin e tyre të shquar dhe të jashtëzakonshëm në shërbim të shtetit helen. Ky është motivacioni i medaljes për kreun e asaj kohe të Parlamentit shqiptar. Ilir Meta është i dyti pas Vasil Shahinit që dekorohet nga shteti grek me “Kryqin e Artë”! Nuk ka asgjë të keqe në marrjen e kësaj dekorate nga ana e Metës, tregon vlerësim për numrin dy të shtetit shqiptar, por vetëm duam të dimë se cili është shërbimi i shquar që ka dhënë Meta në favor të vendit fqinj! Dhe për më tepër duhet të na i kursejë këto deklaratat me status patrioti shqiptar!
Pra, përmes Belerit, Meta, me sa duket dhe me statusin e kontributorit në shërbim të shtetit grek, po kërkon në Athinë por dhe në Bruksel, mbështetje në përballimin e akuzave të ngritura ndaj tij nga SPAK! Të paktën në lehtësimin e këtyre akuzave! Prandaj po futet në çështje të tilla si kërkesa për të dëshmuar me iniciativën e vet për 21 janarin 2011 si dhe për të shfajësuar Berishën për faljen e ‘Detit’ shtetit fqinj, pa pasur asnjë lidhje me këto çështje!

Halli ku nuk të çon, dhe Meta ka vërtetë hall! Megjithëse po kërkon ndihmë nga Berisha, që është vetë në hall të madh, si dhe nga Beleri, halli i të cilit është se është thjeshtë një hidraulik, rastësisht në Parlamentin Evropian! Më tepër për inat u fut në ‘valle’ nga Mitsotakis, dhe tashmë nuk del pa mbaruar mandatin! Do ta dëgjojmë si gjithnjë dhe kundër Shqipërisë, teksa bashkon ‘zërat’ me Berishën, në akuzat ndaj qeverisë dhe shtetit shqiptar! Kundër integrimit në BE! Dhe sa për ta ditur, Meta në gjendje qetësie, nuk është njeri që bën ‘qoka’ falas! I kalkulon deri në detaje për të marrë më maksimalen e mundshme! Të shohim sa do t’i ecë!

Nga Jakin Marena

Diferenca mes kryeministrit Edi Rama dhe kreut të opozitës Sali Berisha është tepër e qartë, në të gjitha planet! Këtë nuk e ka vënë askush në diskutim, është evidentuar në të gjitha rastet, edhe nga ata të cilët nuk e durojnë kryeministrin socialist!

Por këto dy ditët e fundit e kanë thelluar shumë këtë diferencë mes tyre! Shqiptarët, por dhe aleatët tanë të mëdhenj, nuk kanë pasur nevojë të bëjnë bilance të gjata apo të konsultohen me askënd, për të arritur në këtë konkluzion. Këto dy ditë kanë qënë ‘lakmuesi’ ideal për të dalluar qartë dhe saktë këtë diferencë mes tyre, rëndësinë që ka secili për Shqipërinë dhe shqiptarët, dhe pse jo për të treguar se pse Edi Rama do të vijojë të qëndrojë shumë gjatë në pushtet, përtej 4 mandateve qeverisëse që ka fituar në ballafaqimin e drejtëpërdrejtë elektoral me PD e Berishën!

Në të njejtën ditë, kryeministri që Edi Rama u nis drejt Uashingtonit, me ftesë të presidentit amerikan Donald Trump, për të firmosur dhe marrë pjesë në mbledhjen themeluese të Bordit të Paqes, në Tiranë erdhi realizoi vizitën delegacioni i Parlamentit Europian i kryesuar nga i djathti David McAllister, takoi tërë politikën shqiptare, që nga Edi Rama e deri te Tabaku e Gaz Bardhi!

Zyrtari i lartë i PE, i takoi të gjithë, të majtë e të djathtë, mazhorancë e opozitë, teksa realizoi misionin e tij për të cilin kishte zbarkuar në kryeqytetin shqiptar, ndërkohë që nuk i doli koha për të takuar kreun e opozitës shqiptare, Sali Berisha! E deklaroi qartë këtë fakt, kur tha se i kishte takuar përfaqësuesit e opozitës, teksa shmangu takimin me kreun e PD, Berisha, për ‘mungesë kohe’! Duke vijuar në këtë mënyrë traditën e krijuar gjatë tërë këtyre viteve, atë të mos shkeljes në selinë së PD për takim me Berishën, nga asnjë zyrtar i lartë europian. Amerikan jo e jo!

Praktikisht ditën e mërkurë, zyrtari i lartë i të djathtës gjermane në pushtet, njëherësh dhe kreu i delegacionit të Parlamentit Evropian, ia ka ‘rifeskuar’ Berishës non gratën. Pavarësisht se kreu i PD është shpallur non grata vetëm nga SHBA e Britania e Madhe, me motivacionin tepër domethënës, për korrupsion madhor, minim të demokracisë dhe shantazhim të drejtësisë, edhe vendet e BE, e kanë trajtuar e vijojnë ta trajtojnë Sali Berishën si person ‘non grata’!

Nuk e qasin në Bruksel as Strasburg, pavarësisht se si udhëton Berisha, herë me ftesën e Albana Vokshit e herë në mënyrë private, në përpjekjet e tij për të nxirë Shqipërinë nëpër botë deri në Brazilin e largët, pavarësisht se çfarë deklaron se takoi ‘x’ apo ‘y’ zyrtar të lartë të BE apo PE! ‘Kallaji’ i del kësaj pune kur zyrtarët evropianë vijnë në Shqipëri dhe bojkotojnë Berishën sy më sy, duke treguar se lideri i PD vetëm ka bërë rrugë boshe nëpër Evropë, pa asnjë takim, pa asnjë mbështetje! Shqiptarët këtë e dinë fort mirë, me kohë dhe vakt se koha politike e Berishës ka përfunduar, e bashkë me të, sa të jetë në krye të PD, për këtë parti, është mbyllur pretendimi për të qënë alternativë qeverisëse, ndërsa po zbret poshtë e më poshtë, drejt mosekzistencës!

Ndërkohë që kryeministri i Shqipërisë Edi Rama, këtë të enjte jo vetëjm që mori pjesë në mbledhjen themeluese të Bordit të Paqes, i ftuar personalisht nga presidenti amerikan Donald Trump, jo vetëm që shtrëgoi duart me numrin një të SHBA, por dhe mbajti dhe fjalën e rastit në prani të tij teksa u dëgjua me shumë kujdes, por dhe zhvilloi një takim kokë më kokë me Trump, në prezencë dhe të presidentes së Kosovës, Vjosa Osmani, pas përfundimit të mbledhjes!

Kryeministri Edi Rama, edhe njëherë në Uashington, sikurse ka qënë gjithherë i gatshëm të flasë, ngriti çështjen e Kosovës në sytë e presidentit Trump dhe të të gjithë botës, duke kërkuar në emër të shqiptarëve e të Zotit ndihmë për mbrojtjen e UÇK dhe ish komandantëve të saj, të cilët janë burgosur që prej gati 6 vitesh dhe po gjykohen padrejtësisht në Hagë! Rama nuk është hallakatur nëpër tubime apo rrjete sociale duke bërë patriotin siç po e bëjnë këta ‘partriotët e mëdhenj’, por e ngriti këtë çështje para njeriut më të fuqishëm në tokë, presidentit amerikan Donald Trump, ku i kërkoi t’i japë fund lincimit të Kosovës e çlirimtarëve të saj, të sjellë Thaçin e të tjerët në shtëpi.

Rama i ka kujtuar Trump se i njëjti prokuror, Smith, që përndoqi vetë presidentin amerikan, po përndjek dhe Thaçin, të cilin e arrestoi rrugës për në Uashington, ku do të nënshkruante marrëveshjen me Vuçiç, në prani të Trump! Një diplomaci dhe lidership e paparë deri më tani nga asnjë udhëheqës shqiptar, teksa mundësinë e vetme që iu dha para njeriut më të fuqishëm të botës, nuk e shfrytëzoi si politikanët e tjerë politikë shqiptarë për axhendat personale politike, por për Shqipërinë, Kosovën dhe shqiptarët në tërësi. Apeli i tij ‘Për hir të Zotit President, le të bëjmë diçka përpara se, siç thoni ju, gjëra të këqia të mund të ndodhin sërish”, besojmë se do të mbetet gjatë në memorien e shqiptarëve! Dhe si një paralajmërim për ndonjë rrezik, por dhe se shqiptarët janë të gjithë bashkë përballë çdo rreziku, në aleancë me SHBA-të!

Askush nuk e imagjinon Berishën në këtë stad, as kur ka qënë në pushtet dhe as tashmë që është në opozitë! Përkundër Ramës, që asnjëherë nuk ka folur në gjuhë të huaj kundër opozitës jashtë vendit, Berisha, në të gjitha herët, si në pushtet ashtu dhe në opozitë, nuk e ka ndarë sulmin ndaj kundërshtarëve politikë! Tashmë që është rënduar dhe nga mosha, hallet me drejtësinë dhe ‘non gratën’ në SHBA e Britani, trajtimin si non grata nga vendet e BE dhe ato të rajonit, rënia e PD me nga 250 mijë vota çdo palë zgjedhje dhe rrënimi total i opozitës, Berisha e ka trashur gjuhën kundër Shqipërisë e shqiptarëve! Herë del e bën thirrje në drejtim të BE për të rishikuar negociatat e anëtarësimit me Shqipërinë dhe vendosur kushte të rënda, pasi sipas tij, është narkoshtet, herë bën thirrje për konflikt mes shqiptarëve të Shqipërisë e Kosovës, që të mos pranojë Edi Ramën në Prishtinë sepse është armik i Kosovës. Berisha në fund të herës ua merr erzin shqiptarëve, me perceptime sipas realitetit të tij paralel! Shyqyr që nuk e dëgjon njeri!

Dhe në fund të herës, Rama jo vetëm që shkoi në Uashington, jo vetëm që shtrëngoi duart me Trump, por dhe bisedoi me të në fund të takimit! Do ta zbardhë vetë bisedën, por jemi të bindur që ka folur për të mirën e Shqipërisë dhe Kosovës! Njëherësh u ka dhënë fund dhe ‘dilemave’ të lidershipit të opozitës të kryesuar nga Berisha, por dhe ‘investigativëve’ afër e rrotull tij, që flasin me ‘100 përqind siguri’, se Rama nuk ka shkuar të takojë FBI-në apo organet e tjera ligjzbatuese amerikane për të ‘dhënë llogari’ për një çështje të mbyllur me kohë dhe vakt si ajo e McGonigal, por ka marrë pjesë në Bordin e Paqes si i ftuar i presidenti Trump, ka folur për Shqipërinë, Kosovën dhe lirimin e të burgosurve të UÇK në Hagë, për t’u kthyer në Shqipëri sipas axhendës së mirëpërcaktuar dhe për të realizuar dhe detyrat që dalin nga pjesëmarrja në Bordin e Paqes të kryesuar nga presidenti amerikan! Nga ana tjetër na ‘vjen’ dhe pak keq që ëndrra e opozitës dhe mbështetësve të saj, me helikopterë luftarakë dhe delta-forcë, mori fund njëherë e mirë! Themi na vjen keq, pasi ishte i vetmi ngushëllim për ta në këto kohë të vështira!

Nga Jakin Marena

Kryeministri Edi Rama ka udhëtuar drejt Prishtinës për një vizitë zyrtare. Vizita, me ftesë të institucioneve të Kosovës, ka ardhur në përvjetorin e shpalljes së pavarësisë së shtetit të dytë të shqiptarëve në Ballkan!

Kreu i qeverisë shqiptare zhvilloi takime me presidenten Vjosa Osmani, me kryeministrin Albin Kurti, ka marrë pjesë në promovimin e librit “Kur heshtja flet” të autorit Ahmet Shala, si edhe mbajti një leksion të hapur me të rinjtë e Universitetit “Hasan Prishtina” e nxënësit e gjimnazit “Sami Frashëri”! Pati dhe aktivitete të tjera, të cilat plotësuar ditën e parë të kësaj vizite zyrtare. Një ditë tepër të ngarkuar këtë të hënë tek vëllezërit tanë!

Ndërkohë që të martën, pritet të jetë pjesë e ceremonisë në përvjetorin e shpalljes së pavarësisë së Kosovës, ndërsa nuk është bërë e ditur nëse do të mbajë fjalim në këtë ceremoni, apo nëse do të marrë pjesë në protestën marshim të qytetarëve në Prishtinë, në mbështetje të UÇK, teksa gjyqi në Hagë ndaj Thaçit dhe ish komandantëve të tjerë ka hyrë në fazën finale!

Rama, në deklarimet e tij publike, mbrojti kauzën e UÇK, akuzoi prokurorët e Speciales në Hagë se në mungesë të provave po mbronin një akuzë politike, duke tentuar sipas tij të varrosnin për së gjalli ish komandantët e UÇK teksa kërkuan nga 45 vite burg për secilin, e quajti kauzën çlirimtare të drejtë e të mbështetur dhe nga bota demokratike, duke ironizuar me Hagën se sipas ‘kutit’ të tyre, bashkë me Thaçin, Krasniqin, Veselin e Selimin duhej të arrestonin dhe Klinton, Blair, Solanën e Clark, ata të cilët që materializuan çlirimin e Kosovës nga okupimi serb përmes fushatës së bombardimeve të NATO-s. Vizita e Ramës në përvjetorin e Pavarësisë por dhe teksa është në përfundim gjyqi në Hagë ndaj UÇK, që u pasua dhe nga vizita e kreut të shtetit Bajram Begaj, është një mbështetje e fortë nga Shqipëria për Kosovën në këtë situatë!

Dhe teksa shohim kryeministrin Rama që shkon për vizitë zyrtare në Prishtinë në përvjetorin e 18-të të Pavarësisë, dhe takon liderët kryesorë politikë në vend, e ku pas kësaj vizite niset për në Uashington për të marrë pjesë në “Bordin e Paqes’, nën drejtimin e presidentit amerikan Donald Trump, ajo që na bën përshtypje është fakti se lideri i opozitës, Sali Berisha dhe në këtë ditë të shënuar për Kosovën qëndron në Tiranë! Në majë foltores, duke vjellë vrer kundër vendit të vet!

Që në momentin e shpalljes ‘non grata’ nga SHBA dhe Britania e Madhe nuk ka pasur ftesë zyrtare për Berishën që të realizojë ndonjë vizitë në Kosovë! Në disa raste është justifikuar me situatën e rëndë në PD, me faktin se ishte i zënë me marrjen nën hyqëm të drejtimit të saj, me dëbimin e Bashës nga drejtimi e më pas me riorganizimin e PD, ndërkohë që tashmë nuk po përpiqet fare të justifikohet për këtë mbyllje që i është bërë nga ana e shtetit të dytë shqiptar!

Berisha nuk ka pasur marrëdhënie të mira me Kosovën, ndonëse deklarohet se ka shkrirë gjithë jetën e tij për vëllezërit tanë përtej kufirit! Kjo dihet! Me sa duket lidershipi i Kosovës nuk ia ka falur furnizimin e makinës luftarake të Milosheviçit me naftë dhe në thyerje të embargos së OKB në qeverisjen e parë të PD. Nuk i ka falur as përpjekjen për të përçarë lidershipin e rezistencës paqësore të Ibrahim Rugovës në Kosovë, duke tentuar t’i vendosë përballë Adem Demaçin, apo cilësimin e UÇK-së si organizatë terroriste, njësoj si Milosheviçi, dhe thirrjen më pas për të mos firmosur Rambujenë, në përpjekje për të sabotuar sulmin e NATO-s ndaj ushtrisë serbe. Por në Kosovë nuk i kanë falur as lidhjen me elementët serbë gjatë qeverisjes së dytë të PD, duke filluar me Damir Fazlliçin dhe përfunduar me elementë të tjerë serbë e anti-shqiptarë!

Në fillim i bënë ‘embargo’ duke e bllokuar në kufi për të mos e lejuar të hyjë. Të gjithë e mbajnë mend si e bllokuan në kufirin me Kosovën në Kukës, teksa e kthyen mbrapsht dhe nuk e lanë të bëjë hap para! E refuzuan edhe më pas duke mos artikuluar asnjë ftesë zyrtare për të. Edhe kur ka qënë në pushtet ashtu dhe tani në opozitë, Berisha është përballur gjithnjë me ftohtësinë e Kosovës, duke mos marrë ftesë zyrtare madje as për ditët tepër të rëndësishme, siç është përvjetori i Pavarësisë së vendit nga okupimi serb! Dhe e kanë një shkak!

As këtë vit nuk kishte ftesë për Berishën, të paktën deri më tani, për të marrë pjesë në festimet e përvjetorit të 18-të pavarësisë së Kosovës! Pavarësisht se 17 shkurti vinte menjëherë pas miratimit me konsensus të një deklarate të përbashkët në Kuvendin e Shqipërisë mes pozitës dhe opozitës, në mbrojtje të UÇK nga akuzat në Hagë! Ndonëse Berisha nuk e votoi, por s’ia merr njeri për hesap me sa duket, pasi ai nuk voton asnjëherë për Kosovën! E ka fobi! Madje nuk e viziton Kosovën as afër 17 shkurtit, pasi ka qënë kundër pavarësisë! E ka deklaruar zyrtarisht këtë, teksa ka kërkuar vetëm autonomi të zgjeruar për Kosovën, në kuadër të ish-Jugosllavisë! E zbardhi maskarallëkun e Berishës, vetë presidenti amerikan Bill Klinton, pasi të ishte për liderin demokrat, kjo kërkesë drejtuar SHBA, do të ishte varrosur me kohë e vakt, si lajm! Pa e parë dritën e diellit, sikurse vepron gjithnjë Berisha kundër vendit të vet dhe Kosovës, prapa shpine!

Mungesa e vizitës në Kosovë e Berishës në këtë përvjetor, për hir të së vërtetës s’vjen për shkak të angazhimit politik që ka! Një ‘vrap pele’ është Kosova, shkon e vjen si rrufeja! Nuk ka ardhur kjo mungesë vizite as nga mosha tepër e thyer e liderit të PD, pasi në këto takimet partiake të djathta, grupime të sajuara, Berisha shkon deri në Brazilin e largët! Për të treguar në një farë mënyre në formë sfide se e kapërceu Atlantikun, anipse vizitoi jugun e Amerikës dhe jo SHBA-të ku është shpallur ‘non grata’ funksional dhe pa kthim me sa duket! Shkoi për të nxirë Shqipërinë, pavarësisht se pa dobi!

Berisha nuk e ka për gjë të shkojë dhe pa ftesë, sikurse bëri këtë radhën e fundit, teksa iu ‘ngjit’ pas Albana Vokshit, gjatë vizitës në Strasburg të delegacionit të Parlamentit të Shqipërisë atje! ‘Paketë’ me Vokshin, Berisha tentoi të sulmonte dhe të nxinte Shqipërinë, derisa drejtuesja e seancës u detyrua t’i mbyllë mikrofonin, duke e poshtëruar në sytë e të gjithë të pranishmëve dhe të shqiptarëve! Të gjithë e kanë parë videon e shpërndarë! Ishte më e klikuara dhe komentuara!

Në fund të herës ajo që mund të themi është se Berisha vullnetin për të bërë vizita jashtë vendit e ka, takatin për të lëvizur jashtë vendit e ka. Për më tepër që është pa ‘shpenzime’, pasi nëpër këto kryeqytetet më të mëdha të Evropës e ka të zgjidhur dhe fjetjen, sepse vajza e tij Argita, ka nga një banesë në çdo kryeqytet! I mungon vetëm një gjë fare e vogël Berishës për të kryer vizita, nuk ka asnjë ftesë zyrtare! Askund! I mungojnë që nga viti 2013, por është intesifikuar në limitet e zeros pas shpalljes ‘non grata’ më 2021! Që atëherë s’ka më ftesë zyrtare, s’ka më as vizita në selinë e PD as të një ambasadori, madje as nga ambasadori i Kosovës!

Berisha është ‘non grata’ zyrtare nga SHBA e Britania, por po trajtohet si ‘non grata’ dhe nga vendet anëtare të BE, si dhe vendet ballkanike, përfshirë dhe Kosovën! Pavarësisht se në pushtet është Albin Kurti tash gati 6 vite me radhë, të cilin rëndom Berisha e ka cilësuar si aleatin më të mirë të tij në Prishtinë, e ka mbështetur madje dhe në këto ‘përplasjet’ me Ramën, ende kryeministri aktual i Kosovës nuk ka artikuluar një ftesë zyrtare për Berishën që të vizitojë Prishtinën!

Nuk rrezikojnë me sa duket liderët e Kosovës në pushtet për të ftuar një person të shpallur ‘non grata’ nga SHBA e Britania, e të trajtuar si ‘non grata’ dhe nga BE e gjithë rajoni!

Ndaj Berisha po trajtohet si person ‘non grata’ dhe nga Kosova, e kjo është vërtetë e rëndë për një politikan si Berisha, i cili është munduar të tregojë dhe të fiksojë tek publiku idenë e rrejshme se merr frymë dhe jeton vetëm për Kosovën! Ndonëse në realitet ka vepruar në të gjitha rastet kundër saj, dhe faktet për këtë janë kokëforta! Dhe në mungesë të prezencës në Prishtinë, krah liderëve të tjerë shqiptarë, përfshirë dhe Ali Ahmetin, në ditën e Pavarësisë së Kosovës, Berisha nxjerr inatin e mungesës së ftesës zyrtare për vete, me sulmet ndaj Ramës, duke kritikuar lidershipin zyrtar e politik në Prishtinë se kanë ftuar një armik të egër të Kosovës!

Me sa duket ‘karantina’ e Berishës do të vijojë të qëndrojë në fuqi sa të jetë gjallë, në krye të PD! Nuk do të ketë asnjëherë ftesë zyrtare, jo nga SHBA e Britania që e kanë shpallur ‘non grata’, por as nga vendet anëtare të BE dhe ato të rajonit tonë, përfshirë dhe Kosovën! Ndoshta nga ndonjë shoqatë apo grupim partish fantazmë, po! Por jo nga ata që bëjnë politikën e mbështesin alternativa pushteti! Mund të udhëtojë dhe me ftesën e Albanës ndonjëherë! Kjo nuk diskutohet!

Nga Jakin Marena

Mund të dukemi kategorikë në këtë konstatim të trishtë, por sikurse po rrjedhin ngjarjet, për hir të së vërtetës kanë ngecur në vend dhe pa asnjë ‘rrjedhje’ përpara, të gjitha analizat të çojnë tek ky konkluzion aspak i mirë: Që dosja e vrasjeve të 21 janarit 2011 dyshohet se rrezikon të zbardhet kurrë!

Me gjithë optimizmin e jashtëzakonshëm që kemi për ecurinë e drejtësisë së re para, me gjithë besimin pa limit që kemi tek drejtësia e re se pandëshkueshmëria e zyrtarëve të lartë në këtë vend do të marrë fund njëherë e përgjithmonë, teksa nuk kemi rreshtur së mbështeturi gjatë gjithë këtyre viteve, dhe do të vijohet me mbështetjen pa ndërprerje, sërish ‘mjegulla’ e mosbesimit na ka mbuluar, teksa shohim se si po ecën procesi i hetimit të ngjarjes më të rëndë në këto 35 vite!

Themi më të rëndë, pasi vrasja e 4 demonstruesve të opozitës me duar në xhepa para selisë së kryeministrisë në mes të bulevardit qëndror të kryeqytetit, nga plumbat e Gardës së Republikës, pra nga shteti, është dhe më e rëndë se sa vrasja e ish liderit të Lëvizjes studentore Azem Hajdari më 12 shtator 1998, para selisë së PD! Sepse Azem Hajdari nuk u vra nga shteti!

Ka mbi një vit që Gjykata e Strasburgut e dha verdiktin e saj, duke kërkuar zbardhjen e vrasjeve të 21 janarit, e mbi të gjitha duke u ngjitur më lart në ‘herarkinë’ shtetërore të asaj dite, për të gjetur kush ka dhënë urdhër për të qëlluar mbi turmën e demonstruesve pa dallim, pra për të qëlluar në ‘mish’, teksa kjo turmë ishte shpërndarë thuajse plotësisht!

SPAK kishte hezituar më parë të merrte në dorë hetimin e kësaj çështjeje, ishte ‘patate e nxehtë’, ndërsa pas vendimit të Strasburgut, ishte Gjykata e Lartë ajo që ia kaloi Prokurorisë së Posaçme çështjen, prokurorët e të cilës kanë gati në vit që po rreken si e si të hetojnë, por ama, pa prekur Sali Berishën, njeriun që asokohe ishte kryeministër dhe që akuzohet se ka dhënë urdhërin ndaj Gardës, sipas zinxhirit komanduaes, për të qëlluar dhe vrarë demonstruesit e pafajshëm! Nuk ka akuzë zyrtare për këtë! Të paktën deri më tani!

Në funksion të hetimit, deri më tani, është thirrur në SPAK ish ministri i Brendshëm i asaj kohe, Lulzim Basha, i cili kishte mbi ‘kokë’ eprorin e tij, janë thirrur gardistë, drejtues të lartë policie, por dhe vetë kryeministri i asaj kohe, vetë ai, Sali Berisha!

Kreu i PD është thirrur si person në dijeni, ndërkohë që nuk ka dhënë ndonjë detaj në lidhje me atë çka është pyetur, vetëm ka nxituar të deklarojë se Garda nuk ka marrë urdhër prej tij, ndërkohë që ky institucion sipas tij, vepron sipas rregullores së vet! Madje ka deklaruar se dhe kamerat e sigurisë në kryeministri, për të cilat akuzohet se janë fshirë pamjet e asaj dite, kanë qënë në posedim të Gardës dhe nuk ka asnjë lidhje kryeministria! Anipse kohë më parë ka deklaruar se kishte urdhëruar sekretarin e përgjithshëm të asaj kohe në kryeministri, që t’ua jepte prokurorëve kasetat, ndonëse i vonoi, i ‘përpunoi’, i ‘pastroi’ dhe ua dha bosh! Anipse thuhet se një nga ata që e kanë instaluar këtë sistem kamerash i ka kopjuar të gjitha të dhënat dhe i mban fort, si garanci për veten! Kanë frikë me sa duket njerëzit, prova ëhstë garanci!

Nuk jemi plotësisht në dijeni se si ka qënë ecuria e hetimit të dosjes së rëndë të 21 janarit 2011, ku nga plumbat e Gardës u vranë 4 demonstrues të opozitës, as se çfarë ka deklaruar Berisha para prokurorëve të SPAK për këtë ngjarje të rëndë krimi shtetëror, i pyetur si person që ka dijeni, as se çfarë ka deklaruar Basha në SPAK, deri ku është zbërthyer dhe a e ka ruajtur atë ‘paktin e heshtjes’ me Berishën apo është bërë një ‘i penduar’ i drejtësisë. Nuk dimë me saktësi as se çfarë kanë deklaruar zyrtarët e policisë e të Gardës, pjesë të ‘zinxhirit komandues’ të cilët Berisha nuk i dorëzoi sipas kërkesës së prokurorisë, për t’i futur nën arrest në qeli!

Për hir të së vërtetës kur vjen puna për dosjet e Berishës, edhe këta ‘investiguesit’ e mediave që ‘furnizohen’ me lajme nga SPAK, duke publikuar deri dhe elementët më ordinerë të një përgjimi ambiental apo zbërthim celulari, në këtë rast nuk publikojnë asnjë informacion se çfarë ka ndodhur sëpaku për hetimin e vrasjeve të 21 janarit! Jo vetëm që nuk ‘rrjedhin’ por as ‘pikojnë’ dosjet e Berishës nga SPAK tek mediat dhe tek publiku! E shtrëngojnë fort, dosjen në këtë rast!
Por deri më tani, kur kanë kaluar shumë kohë, kemi parë se po ecet shumë ngadalë! Mbetet mister pse prokurorët e posaçëm ende nuk kanë arritur të sfidojnë veten, që në funksion të kopsitjes së dosjes së ’21 janarit’ të shkojnë dhe nëpër mediat tona kombëtare ose jo, për të marrë atë kasetën origjinale të emisioneve televizive, në të cilat me zë e figurë Berisha mburrej se kishte vendosur në tarracën e kryeministrisë 5 snajperë me urdhërin e prerë për të qëlluar direkt me plumb ballit kreun e atëhershëm të opozitës Edi Rama, nëse ai bënte një hap para dhe kalonte gardhin e kryeministrisë! Gardh i cili që nga viti 2013 nuk ekziston më! Apo deklaratën tjetër të Berishës, sipas të cilës, jo 3 por 300 protestues do të vriteshin, nëse më 21 janar kalohej gardhi i godinës së kryeministrisë! Nuk e dinë nëse është marrë nga SPAK dhe kjo kasetë.

Megjithatë, të gjithë shqiptarët i kanë dëgjuar live deklarimet e Berishës në këto media dhe për këto urdhëra që kishte dhënë më 21 janar, janë dhe në google të gjitha videot me këto deklarata, me të cilat janë njohur dhe ata shqiptarë që s’kanë ndjekur emisionet televizive live kur ka folur Berisha për urdhërat që ka dhënë për snajperët dhe për moskalimin e gardhit të kryeministrisë! Pra, se kush i ka dhënë urdhër Gardës për të qëlluar mbi demonstruesit e opozitës më 21 janar 2011, shqiptarët e dinë fare mirë! E di dhe Strasburgu, i cili vetëm emrin nuk i ka vënë Berishës si urdhërdhënës, në vendimin e marrë mbi një vit më parë ku kërkon hetim me themel për këtë dosje të rëndë! Pra për t’u ‘ngjitur’ tek ‘maja’ e piramidës së komandimit të asaj kohe! Urojmë që ta dijë edhe SPAK këtë fakt!

Megjithëse i pashpjegueshëm mbetet fakti i zvarritjes së hetimit të asaj kasetës me incizimin audio që përmbante urdhërat e dhëna për të qëlluar mbi demonstruesit! Pse nuk është bërë ende ekspertiza! Të thuhej se ishte ndërhyrë dhe kaq! Për më tepër, vonesa në dorëzimin e kasetës me regjistrimin origjinal, garancia që u tha se u kërkua, dhe qëndrimet e veprimet deri në këtë moment, nga shumë aktorë që me apo pa dëshirën e tyre janë të përfshirë në këtë proces! Pasi vërtetë kemi dyshime, sepse ku më pak e ku më shumë, të gjithë e kanë ‘ngrënë’ presionin e Berishës, dhe kjo duket dhe me sy të lirë!

Me pak fjalë, sa garanci ka që kjo kasetë të cilësohet si origjinale nga SPAK për t’u marrë si provë në hetimin e dosjes së ’21 janarit’. Sepse duhet të kuptohemi, Berisha nuk lëshon ‘pe’ asnjëherë falas! Diçka përfiton, ndaj ka ngritur, sikurse thonë ‘gojët e liga’, dhe një media të familjes, përmes të cilës ‘dorovit’ sa andej këndej kundërshtarët e vet! Apo ku flasin dhe të ‘penduarit’. Nuk i shpëton gjë Berishës, është ‘skile’ e vjetër ai! Të shtrydh mirë e mirë, nuk të lejon në ‘pronën’ e vet që të luash me dy porta dhe të dyzuarin! Prandaj kemi dyshime dhe frikë se mund të rrëzohet si provë nga prokurorët incizimi audio, për të mos u përdorur në hetimin e gjykimin e masakrës së 21 janarit, me pasojë 4 viktima. Të vrarë nga shteti! Sepse Berisha nuk pranon asgjë, s’toleron asnjë, e për pasojë shkon dëm dhe një mundësi për një provë shtesë për 21 janarin! Jo se s’ka prova! Dhe ato që janë deri më tani, mjaftojnë për të bërë një hetim të plotë!

Jemi me të vërtetë dyshues nëse ndonjëherë mund të zbardhet dosja e 21 janarit 2011, kush ka dhënë urdhër që Garda e Republikës të qëllojë mbi turmën, dhe a do të hetohen e gjykohen urdhërdhënësit e hierarkisë më të lartë të shtetit të asaj kohe, sipas vendimit të Gjykatës së Strasburgut që kërkon me detyrim përcaktim vënien para akuzës të kupolës së asaj kohe! Të shpresojmë! Megjithëse ia vlen të përsëritet fakti se zbardhja e vrasjeve të 21 janarit janë ‘testi’ numër një për drejtësinë e re shqiptare! Kjo pritet nga shqiptarët, kjo pritet nga ndërkombëtarët. Ndryshe dhe sikur tërë qeverinë e kësaj kohe dhe të asaj kohe të fusësh në burg dhe të lësh 21 janarin jashtë, nuk quhet drejtësi e bërë në këtë vend! Kjo duhet të jetë e qartë për të gjithë! ‘21 janari’ ka qënë dhe është test për SPAK e GJKKO që në krye të herës dhe në vijim! Sado që ta zvarrisin me ‘artifica’ dhe lojë ‘ping pongu’!