Një qytetar ka ngritur shqetësimin e tij pranë redaksisë sonë në lidhje me gjendjen e rrëmujshme të kabullove të internetit në rrugën e Barrikadave, përballë gjimnazit “Sami Frashëri”, në Tiranë. Ai denoncon mënyrën e çorganizuar dhe të rrezikshme me të cilën janë vendosur kabullot, që duken si një “rrjetë merimange” që sa vjen e shtohet, duke dhënë një imazh jo vetëm kaotik por edhe të rrezikshëm për qytetarët që kalojnë aty çdo ditë. “Mirëmëngjesi JOQ, jemi tek rruga e Barrikadave, përballë gjimnazit ‘Sami Frashëri’. Shiko çfarë ndodh me teknologjitë tona! Sa kabuj kemi, sa lidhje janë bërë, katastrofë! Ju lutem, a ka ndonjë zgjidhje për këto kabuj, për këtë rrëmujë që është këtu?”, shkruan qytetari në mesazhin e tij. Pamje të tilla nuk janë të rralla në kryeqytet, por mbeten një turp për institucionet që mbyllin sytë përballë rrezikut dhe mungesës totale të standardeve urbane. A ka një plan për zgjidhjen e këtij problemi, apo do të vazhdojmë të jetojmë nën rrjete kabujsh si në ndonjë lagje të braktisur?

9241 views

Ministri i Investimeve Publike të Serbisë, Darko Glišić, ka pësuar një goditje të rëndë në tru gjatë një interviste live në televizionin TV Pink, mëngjesin e së martës. Teksa ishte i ftuar në një emision të drejtpërdrejtë, ministri nisi të shfaqte shenja shqetësuese dhe nuk arriti të përfundonte bisedën. Transmetimi u ndërpre menjëherë, ndërsa ai u transportua me urgjencë drejt Qendrës Klinike në Beograd. Sipas konfirmimeve nga autoritetet serbe dhe mediave vendase, gjendja shëndetësore e Glišić është kritike. Ai është diagnostikuar me hemorragji cerebrale, është futur menjëherë në ndërhyrje kirurgjikale dhe ndodhet në respirator nën kujdes intensiv. Ministri i Shëndetësisë, Zlatibor Lončar, tha se ekipi mjekësor po bën të pamundurën për stabilizimin e tij, ndërsa theksoi se orët në vijim janë vendimtare. Ngjarja ka sjellë reagime të menjëhershme edhe në nivel shtetëror. Presidenti Aleksandar Vuçić, i cili ndodhet aktualisht në spital pranë Glišić, reagoi me një mesazh të fortë për mikun dhe bashkëpunëtorin e tij të ngushtë: "Darko, mos u dorëzo! Nuk ka dorëzim." Darko Glišić konsiderohet si një nga njerëzit më të besuar të Vuçiçit, me një rol të rëndësishëm si kryetar i Bordit Ekzekutiv të Partisë Progresive Serbe (SNS). Ai ka një karrierë të gjatë në politikën serbe, përfshirë postin e kryetarit të komunës së Ub-it, si dhe si deputet në parlamentin serb.

22.4K views

Një qytetare nga Shkodra ka denoncuar mbrëmjen e sotme në redaksinë e JOQ Albania një rast vjedhjeje që i ka ndodhur në biznesin e saj. Sipas saj, ngjarja është regjistruar rreth orës 21:00, në lagjen Rus, pranë postës. Në pamjet e kamerave të sigurisë shihet qartë një i ri që hyn brenda dyqanit, afrohet tek banaku, merr telefonin celular dhe largohet qetësisht sikur të mos kishte ndodhur asgjë. Denoncuesja thotë se telefoni i vjedhur ishte telefon pune, duke i shkaktuar dëme dhe pengesa të mëdha në aktivitetin e saj. Sipas informacioneve që ajo ka marrë nga uniformat blu, i njëjti person ka kryer të paktën 6 vjedhje të tjera të ngjashme vetëm gjatë ditës së sotme në qytet. “Përshëndetje JOQ, rreth orës 21:00 hyri dikush në dyqanin tim dhe mori këtë telefon. Ka ndodhur në Shkodër, ngjitur me postën në Rus. Kush e njeh, të më lajmërojë. Është telefon pune. Policia na tha që ka bërë brenda ditës së sotme 6 vjedhje celularesh, se e paskan denoncuar edhe të tjerë.” Kërkohet ndihma e qytetarëve për identifikimin e autorit. Nëse dikush e njeh personin që shfaqet në video, ju jeni të lutur të kontaktoni menjëherë redaksinë tonë ose informoni Policinë e Shkodrës.

46.2K views

Një qytetar ka dërguar në redaksinë e JOQ Albania një video të regjistruar në Vlorë, ku tregohet momenti i një ndërhyrjeje të ashpër nga ana e efektivëve të policisë. Në pamjet filmike, shihet një grup prej disa policësh që përpiqen të ndalojnë me forcë një person. Personi fillimisht reziston, por ndodhet i shtrirë përmbys në tokë, ndërsa efektivët e mbajnë të bllokuar. Ndërhyrja fizike e policëve është e dukshme, dhe në një moment njëri prej tyre kryen një lëvizje të shpejtë drejt pjesës së sipërme të trupit të të ndaluarit, e cila duket si goditje. Sipas dëshmisë së qytetarit, ngjarja ka ndodhur pasi automjeti i këtij personi ishte marrë me karrotrec, ndonëse ai pretendon se makina ishte e parkuar rregullisht. Qytetari thotë se pas kthimit të tij dhe kundërshtimit të veprimit të policisë, situata u përshkallëzua në përplasje fizike, duke përfunduar me këtë ndalim të dhunshëm. Sipas tij, policët e kanë goditur me grushte drejtuesin e makinës. Deri më tani nuk ka një reagim zyrtar nga Policia e Shtetit për të sqaruar rrethanat e incidentit dhe arsyet e ndërhyrjes. JOQ Albania do të presë një sqarim zyrtar për këtë ngjarje.

4255 views

Një denoncim shqetësues ka mbërritur në redaksinë e JOQ Albania nga një qytetare në lagjen 17 të qytetit të Durrësit, e cila ngre zërin kundër zaptimit të hapësirave publike nga një subjekt privat. Sipas saj, hapësira e parashikuar në projektin e pallatit si lulishte dhe pronë e përbashkët për banorët, është kthyer në parking privat për një market që po hapet në katin përdhe të pallatit, i quajtur “ProNatyra”. Fillimisht, në zonë ishte vendosur një tra, i cili u hoq nga bashkia pas një kërkese të banorëve. Por, sipas qytetares, situata është përkeqësuar më tej: “Zotëria që ka marketin tani parkon makinën për së gjati çdo ditë, në mënyrë që të mos lejojë hyrjen apo daljen e makinave të banorëve. Edhe dy makinat që shihen aty janë të marketit, askush tjetër nuk ka mundësi të hyjë,” – shprehet ajo në një video që ka dërguar në redaksinë tonë, ku tregon qartë bllokimin e hapësirës. Denoncuesja shton se çdo ditë përplasen me pronarin e biznesit për këtë çështje dhe kërkon ndërhyrje institucionale që situata të zgjidhet njëherë e mirë, pasi hapësira është pjesë e pronës së përbashkët që ata e kanë paguar në momentin e blerjes së banesave. "Kompleksi Jedas ndodhet në lagjen 17. Po përballemi çdo ditë me tensione për diçka që na takon me të drejtë," – shprehet ajo. Në një kohë kur abuzimet me hapësirat publike janë kthyer në problem të përditshëm, raste të tilla kërkojnë zgjidhje të shpejtë dhe të drejtë për të garantuar qetësinë dhe të drejtat e banorëve.

52.6K views

Një ngjarje shqetësuese është raportuar të ketë ndodhur pasditen e sotme rreth orës 18:00 në zonën e Mëzezit në Tiranë, në rrugën dytësore që të çon drejt QTU-së. Një qytetar që po lëvizte me makinë në drejtim të QTU-së tregon se është përballur me një drejtues tjetër mjeti që vinte kundravajtje, me targë AB 519 NP, duke krijuar një situatë të rrezikshme në rrugë. “Po ecja rrugës dytësore pranë Spitalit Hygeia, kur më vjen një person përballë në kundravajtje. Filloi të ulëriste si i çmendur ‘jam i çmendur, hape rrugën!’ Kur i thashë që ku po shkon kundravajtje, ai më tha ‘a polic je ti?’ dhe hapi krahun pak më lart, duke ardhur drejt meje me një pistoletë në dorë.” Momenti i rrezikshëm është filmuar dhe shfaqet në videon e dërguar në redaksinë e JOQ Albania. Në pamje, shihet se rreth vendngjarjes kishte edhe qytetarë të tjerë që u alarmuan nga sjellja agresive e këtij personi. Video është filmuar në momentin që personi në fjalë futet në makinë për të lënë armën dhe kthehet sërish duke i ulëritur drejtuesit të mjetit. Pasi përballja verbale përfundoi, ai është futur sërish në makinë, ndërsa dëgjohet duke ulëritur nëpër dhëmbë, në një gjendje që duket e paqëndrueshme. “Si ka mundësi që ende ka njerëz të tillë në rrugë? Me armë, në kundravajtje dhe me këtë lloj sjelljeje agresive, është e frikshme të qarkullosh.” Ngjarja hedh dritë mbi mungesën e kontrollit dhe sigurisë në rrugët e vendit, ku çdo qytetar mund të përballet me rrezik për jetën nga individë që lëvizin me armë dhe pa asnjë sens përgjegjësie. Institucionet duhet të marrin masa urgjente për identifikimin dhe ndëshkimin e autorit të kësaj sjelljeje të papranueshme.

124.1K views

Një ngjarje shqetësuese raportohet se ka ndodhur sot në plazhin e Pllakave në Ksamil. Një 15-vjeçar ka denoncuar në redaksinë e JOQ Albania se dy turistë të moshuar, me shtetësi belge, janë përpjekur ta ngacmojnë. Sipas adoleshentit, ai është larguar menjëherë nga vendi i ngjarjes dhe ka nisur t’i godasë me gurë për t’i penguar të afrohen sërish. Rasti ngre shqetësime serioze për sigurinë e të miturve në plazhe dhe nevojën e mbikëqyrjes më të rreptë të hapësirave publike, sidomos gjatë sezonit turistik. Mesazhi i dërguar nga qytetari: "Përshëndetje JOQ, sot në Ksamil, në plazhin e Pllakave, këta dy pleq u përpoqën të më ngacmonin. U largova dhe fillova t’i godisja me gurë që të mos afroheshin më. Janë belgë. Unë jam djalë 15 vjeç."

64.2K views

Një javë më parë Emirion Mandreja një i ri nga Rrësheni, denoncoi në një intervistë ekskluzive dhunën që atij iu ushtua nga shefat e policisë së qytetit, mes tyre dhe shefi i Komisariatit Klodian Kondi. Emirioni foli publikisht me emra, duke dërguar dhe foto nga plagët e të nxirat që mori në trup nga dhuna e efektivëve. Pas intervistës policia bëri një reagim të gjatë për ngjarjen, ku thoshte se Emirioni e dëmtoi kokën dhe trupin pasi ‘bëri luftë me muret dhe tavolinat e komisariatit’. Sipas policisë, Emirioni nuk u dhunua nga shefi ‘boksier’ Klodian Kondi, por e dëmtoi vetë veten, madje tentoi të qëllojë dhe policët. Ngjarja natyrisht bëri bujë në mbarë vendin, duke trazuar dhe ujërat brenda radhëve të policisë, për të fshehur këtë skandal. Kur kanë kaluar vetëm 6 ditë nga ai denoncim, Klodian Kondi del protagonist në një ngjarje tjetër, ku sipas një dëshmie që ka siguruar JOQ Albania, ai akuzohet se është përfshirë në rrahjen e një biznesmeni në qytetin e Sarandës. Genci Ahmeti, tregon se si u dhunua nga Klodian Kondi në gusht të 2022. Ngjarja nisi me një sherr në biznesin e një të afërmeje të denoncuesit, ku ky i fundit nuk ishte i përfshirë. Ai akuzon Klodian Kondin se e përfshiu në ngjarje dhe e burgoi për 30 ditë. Më tej ai shton se në momentin e shoqërimit në komisariat, por edhe pas shoqërimit, Klodian Kondi dhe ish-shefi i krimeve në Sarandë Erion Muho, e kanë dhunuar duke i shkaktuar plagë në trup, të cilat i fakton edhe me raporte mjekoligjore. Ai kërkon që Klodian Kondi të mbajë përgjegjësi për dhunën që ushtron ndaj të burgosurve, teksa apelon institucionet që ai të përjashtohet menjëherë nga radhët e Policisë. “Ky person duhet të largohet menjëherë nga radhët e policisë.”

20.2K views

Shumë qytetarë në Shqipëri u befasuan nga një dukuri e pazakontë në qiell, ndriçime të forta dhe të shpeshta, me ngjyrë vjollcë, që zgjatën që nga ora 01 e 30 pas mesnate deri në orën 03 e 30. Pamja e pazakontë tërhoqi vëmendjen e banorëve në zona të ndryshme të cilët kanë dërguar në redaksi dhe pamje nga ky fenomen që krijoi ndjesinë e një skene misterioze, por edhe shqetësuese për disa prej qytetarëve. Qielli dukej sikur ndizej herë pas here, ndërsa nga toka nuk dëgjoheshin gjithmonë bubullima. Por çfarë është kjo dukuri? Fenomeni njihet si rrufe brenda reve, ose ndryshe “rrufe të heshtura”, që ndodhin kur shkarkesat elektrike zhvillohen në brendësi të reve pa rënë në tokë. Ky ndriçim është i dukshëm edhe nga largësi të mëdha, sidomos gjatë natës, kur qielli është i errët dhe drita e rrufesë përhapet më qartë. Edhe pse duket dramatike, kjo është një dukuri e zakonshme në periudha me lagështi dhe nxehtësi të lartë, veçanërisht gjatë verës. Drita vjollcë që u pa në shumë zona vjen nga mënyra se si drita e rrufesë përthyhet dhe shpërndahet nëpër retë e dendura. Ky spektakël i rrallë është i njohur në shumë vende të botës dhe ndodh rregullisht gjatë stuhive të natës. Ndonëse pamja mund të ngjajë e pazakontë, ajo është pjesë e proceseve natyrore të atmosferës dhe nuk përbën rrezik për sa kohë stuhia mbetet në largësi.

40K views

Një video e pazakontë ka mbërritur në redaksinë e JOQ Albania, ku shihen dy të rinj duke ecur qetësisht në qendër të Tiranës, teksa mbajnë përdore nga një kalë secili. Të rinjtë janë të veshur me rroba të zakonshme, pa veshje tradicionale apo ndonjë shenjë që të tregojë ndonjë event të veçantë. Skena është filmuar pak minuta më parë dhe ka tërhequr menjëherë vëmendjen e qytetarëve që ndodheshin aty pranë. Të rinjtë nuk janë të hipur mbi kuaj, por i drejtojnë përmes trotuareve dhe trafikut të kryeqytetit sikur të ishin në një shëtitje të zakonshme. Në video shihen kalimtarë të habitur që ndalojnë për t’i parë ose për të filmuar, ndërsa skena shkakton kuriozitet dhe habi për shkak të kontrastit mes kafshëve dhe ambientit urban që i rrethon. Deri tani nuk dihet nëse kjo është pjesë e ndonjë performance artistike, proteste apo thjesht një veprim spontan nga ana e tyre. Qytetarët që kanë dërguar pamjet shprehen pamje të tilla janë të pazakonta në zemër të Tiranës dhe pyesin nëse kjo është mënyra më e re e shëtitjes në kryeqytet.

6548 views

Ky që shikoni është Bardhok Gjergji nga Mirdita, i cili prej disa kohësh ndodhet në një proces divorci me ish bashkëshorten e tij Vojsava Tuci. Çifti janë prindër të tre fëmijëve. Martesa e tyre nuk po funksiononte si më parë dhe ata vendosën që të ndahen. Pas ndarjes, Gjykata e Lezhës ka vendosur që për fëmijët duhet të kujdeset Vojsava, por Bardhoku ka të drejtë që t’i marrë çdo të premte në orën 16:00 deri të dielën në orën 16:00. Më konkretisht në vendimin e gjykatës thuhet: “I pandehur Bardhok Gjergji ka të drejtë t’i takojë dhe t’i mbajë fëmijët e mitur E, A dhe A Gjergji, nga ora 16:00 e ditës së premte deri në orën 16:00 të ditës së dielë pasuese të çdo jave, 15 ditshin e parë të muajit Gusht të çdo viti, si dhe javën e fundit të muajit dhjetor të çdo viti tek.” Por Bardhoku ka mbi 5 javë që nuk i ka takuar të vegjlit e tij, pasi sikur thotë ish-bashkëshortja nuk po respekton vendimin e gjykatës dhe i ndalon fëmijët që të takohen me të. Qytetari ka bërë disa ankesa në Komisariatin e Mirditës dhe të Lezhës, por nuk ka marrë asnjë zgjidhje. Bardhoku nuk kërkon asgjë më shumë, vetëm që vendimi i gjykatës të respektohet dhe ai të mund të takojë fëmijët e vegjël. Ai tregon se fëmijët kanë dëshirë ta takojnë, por nëna e tyre bashkë me familjarët e saj nuk i lejojnë. Institucionet duhet të reagojnë që ky baba të gjejë drejtësi, të takojë fëmijët e tij, të rrijë me ta, të luajë e të përkujdeset ashtu sikur çdo prind ka të drejtë. Në mesazhin e plotë ai thotë: “Pershëndetje JOQ. Un që po ju shkruaj jam nje qytetar nga Mirdita dhe desha qe te bej nje denancim pran redaksis tuaj. Une jam ne nje hall aq te madh saqë nuk po mundem që te takoj fmit e mi, sepse ish gruja Vojsava Tuci bashk me familjarët e vet dhe vvokaten po mi mbajn fmit jasht deshires tek familja e vet. Une i jam drejtuar Komisarjatit Mirdit si dhe Komisarjatit Lezhe dhe nuk me kan dhan asnje zgjidhje. Edhe pse giykata e Lezhes e ka lëshuar me vendim giykate që me 28 01 2025 që un si baba ti marr femit çdo jav nga 48 or, ata nuk me japin anje pergjigije, përveçse i leshojn ish-bashkshortes urdhra mbrotje. Tani un dua që te giej nje zgjidhje per te takuar fëmijët e mi. Ju lutem postojeni.”

71.6K views

Një qytetar i revoltuar ka dërguar në redaksinë e JOQ Albania një denoncim në lidhje me sjelljen skandaloze të një drejtuesi automjeti në aksin Radhimë-Vlorë, ku trafiku është i rënduar prej kilometrash të tërë gjatë kësaj periudhe vere. Në pamje shihet një automjet që lëviz pa asnjë ngurrim kundravajtje, duke shtuar më tej kaosin dhe stresin për dhjetëra drejtues të tjerë që presin në radhë. Qytetari që dërgoi videon shprehet me ironi dhe nervozizëm: “Përshëndetje JOQ, desha të ndaj një shqetësim me këta kamikazë që qarkullojnë në këtë mënyrë kundravajtje. Aksi Radhimë-Vlorë ku trafiku është me kilometra dhe këta të papërgjegjshëm vazhdojnë pa problem.” Siç shihet dhe në video, drejtuesi i makinës mban një targë të personalizuar ku shkruhet “Arben H.”, duke ngritur pyetjen: Kush është Arbeni? Gangsteri që nuk pyet për ligj, për trafik, apo për askënd tjetër? Kjo sjellje e papërgjegjshme nuk është rast i izoluar. Çdo verë, me rritjen e fluksit në zonat turistike, rriten edhe rastet e arrogancës në timon, ndërkohë që qytetarët që respektojnë rregullat mbeten të bllokuar me orë të tëra. JOQ Albania vijon të publikojë raste të tilla në mënyrë që autoritetet të marrin masa dhe të ndërgjegjësojnë drejtuesit e papërgjegjshëm që rrezikojnë jetën e të tjerëve.

157.3K views

Një emigrant shqiptar i kthyer nga Anglia për të kaluar pushimet në vendlindje është ndjerë thellësisht i prekur nga një skenë që pa me sytë e tij në rrugët e Durrësit. Ai ka ndarë me redaksinë e JOQ Albania një video që flet më shumë se çdo fjalë. Në pamje shfaqet një burrë, me shpatulla të përkulura nga lodhja, duke shtyrë një grua me karrocë. Ecën ngadalë, me kujdes dhe përkushtim, por rruga përpara i bëhet pengesë. Trotuari është me gropa, me lartësi të papërshtatshme dhe aspak i aksesueshëm për persona me aftësi ndryshe. Burri e ngre karrocën me mundim, përpiqet të gjejë mënyrën më të lehtë për të kaluar, ndërsa kalimtarët e tjerë thjesht shikojnë dhe vazhdojnë rrugën. Emigranti që ka regjistruar videon shprehet: “Përshëndetje JOQ, jam një emigrant nga Anglia dhe sot teksa po dilja pashë këto pamje që më erdhën keq realisht. Në Durrës minimumi s’ka trotuare as për njerëzit normal, jo më për ata me aftësi të kufizuara!” Në një qytet bregdetar ku çdo verë mbushen rrugët me turistë, Bashkia e Durrësit ende nuk ka arritur të sigurojë trotuare të denja, as për qytetarët, e aq më pak për ata me aftësi të kufizuara.

3542 views

Një qytetar i shqetësuar ka dërguar një video në redaksinë e JOQ Albania, ku shfaqet një grua duke bërtitur dhe sharë në orët e vona të natës. Ngjarja ka ndodhur në rezidencën e Kodrës së Diellit në Tiranë dhe ka shqetësuar të gjithë banorët e lagjes. Gruaja dëgjohet duke përdorur fjalor banal dhe herë pas here ulëret, ndërsa duket se është në një bisedë telefonike me dikë tjetër. Banorët shprehen se i kanë kërkuar disa herë të ndalojë, sidomos pasi në lagje ka edhe fëmijë të vegjël që nuk mund të flenë nga zhurma, por thonë se zonja në fjalë nuk i ka marrë parasysh thirrjet e tyre. “Ka nja 3 orë që bërtet në lagje kjo gruaja. Gjithë banorët kanë dalë dhe i kanë folur, kemi fëmijë të vegjël. Nuk pushon,” – thotë qytetari që ka dërguar videon.

88.4K views

Një ngjarje e rëndë me dy të plagosur ndodhi mbrëmjen e sotme në lagjen “Uji i Ftohtë” të Vlorës, pranë rrethrrotullimit të “Skelës”, ku dy 32-vjeçarë janë goditur me thikë pas një konflikti që dyshohet se ka nisur për motive të dobëta. Të plagosurit janë identifikuar si Kristi Konstadini dhe Indrit Halili, të dy banues në qytetin bregdetar. Sipas informacioneve paraprake, ngjarja ka nisur si një debat mes dy personave, që më pas ka degjeneruar në përplasje fizike dhe përdorim të mjeteve të mprehta. Në redaksinë e JOQ Albania kanë mbërritur pamje të momentit pas sherrit, ku shihen forcat e policisë duke i arrestuar dy 32-vjeçarët e përfshirje në ngjarje. Siç shihet dhe në video, njëri prej tyre arrestohet në mënyrë të dhunshme, ndërkohë që burime për JOQ Albania bëjnë me dije se ky i fundit dyshohet se është konsumator i lëndëve narkotike. Sipas burimeve policore, pas marrjes së trajtimit të nevojshëm mjekësor, ata janë shoqëruar në ambientet e Komisariatit të Vlorës për veprime të mëtejshme hetimore. Në vendin e ngjarjes është sekuestruar edhe mjeti prerës i përdorur gjatë konfliktit.

13.3K views

Një aksident i rëndë ka ndodhur pak minuta më parë në hyrje të qytetit të Gramshit, ku janë përfshirë dy automjete. Pamjet e mbërritura në redaksinë e JOQ Albania tregojnë një nga mjetet të dëmtuar rëndë në pjesën e përparme, ndërsa dëshmitarë nga vendngjarja raportojnë për persona të plagosur, të cilët janë transportuar me urgjencë drejt spitalit. Sipas informacioneve paraprake, dyshohet se mes të plagosurve ndodhet edhe një i mitur, por gjendja e tyre shëndetësore mbetet ende e paqartë. Policia nuk ka dhënë ende një njoftim zyrtar në lidhje me ngjarjen, ndërsa priten detaje të mëtejshme nga autoritetet për shkaqet dhe dinamiken e aksidentit.

82K views

Një qytetar nga zona e Porto Romanos në Durrës i është drejtuar redaksisë së JOQ Albania për të denoncuar ndotjen alarmante që, sipas tij, po vjen nga Porti i ri i Durrësit. Ai shprehet se qymyri që shkarkohet në port po ndot në mënyrë të pakontrolluar të gjithë zonën përreth, duke e bërë jetesën thuajse të pamundur. Pamjet që ka dërguar janë shqetësuese: duart dhe këmbët bëhen të zeza vetëm duke prekur cimenton pranë banesës, e cila është mbuluar nga pluhuri i qymyrit që përhapet në ajër dhe depërton deri në shtëpi. Por më e rëndë është drama njerëzore që po përjeton familja e tij. Ai tregon se motra e vogël, vetëm 5-vjeç, është dërguar tre herë në urgjencë për shkak të bllokimit të mushkërive, të shkaktuara nga ndotja e ajrit. Në mesazhin e tij dërguar redaksisë, qytetari shkruan: “Jam një emigrant dhe banues në Porto Romano, Durrës. Po mbytemi nga tymi dhe pluhuri i portit ku shkarkohet qymyr. Motra e vogël 5 vjeçare është çuar tre herë në urgjencë për bllokim të mushkërive. Nuk dimë çfarë të bëjmë, nuk dimë ku të denoncojmë sepse ata janë ‘të fortë me miq në shtet’. Vendosëm të ju drejtohemi juve, ndoshta gjeni një zgjidhje… ose do të detyrohemi të largohemi përgjithmonë nga ky vend.” Ky është një alarm i rëndë për institucionet dhe autoritetet përkatëse. JOQ Albania i bën thirrje menjëherë Ministrisë së Mjedisit, Policisë së Shtetit dhe të gjitha strukturave përgjegjëse të ndërhyjnë për të ndalur këtë katastrofë mjedisore dhe për të mbrojtur shëndetin e qytetarëve!

45.1K views

Një qytetare ka dërguar në redaksinë e JOQ Albania një video të xhiruar pak minuta më parë në Sarandë, ku shfaqet një skenë e dyshimtë ndërveprimi midis një efektivi policie dhe një drejtuesi mjeti. Në pamje shihet një automjet i ndaluar nga një patrullë policie në një rrugë të qytetit. Dy efektivë i afrohen shoferit dhe zhvillojnë një bisedë të shkurtër. Ajo që ka tërhequr vëmendjen e qytetares që e ka dërguar videon është një moment kur shoferi duket sikur i jep diçka njërit prej policëve. Menjëherë pas kësaj, efektivët largohen nga vendngjarja. Megjithatë, pamjet nuk janë mjaftueshëm të qarta për të konfirmuar me siguri se çfarë ka ndodhur. Qytetarja që ka dërguar videon shpreh dyshime se mund të ketë pasur një dhënie ryshfeti, por thekson se nuk mund ta pohojë me siguri, duke lënë hapësirë për interpretime të ndryshme. Çfarë mendoni për këtë ndërveprim? A është thjesht një kontroll rutinë policor, apo ka diçka që mund të ngrejë dyshime? Ju ftojmë të ndani mendimin tuaj!

32.8K views

Një shqetësim që po përhapet çdo ditë e më shumë mes qytetarëve është zakoni gjithnjë e më i përhapur i hedhjes së fishekzjarreve në orën 00:00, kryesisht për ditëlindje. Ajo që për disa është “festë e bukur”, për shumë të tjerë është burim stresi, frike dhe shqetësimi. Një nënë e re nga Tirana ka ndarë për JOQ Albania një dëshmi shqetësuese: “Çdo natë, në orën 00:00, më duhet të mbyll dritaret sepse do kemi ‘spektakël fishekzjarresh’. Çdo natë bebja ime trembet dhe shpërthen në të qara. A ka ndonjë ligj që i ndalon këto spektakle qiellore në mes të natës? Pse duhet të vuajnë të tjerët për të festuar dikush një ditëlindje?!” Ky nuk është një rast i izoluar. Komentet dhe reagimet e shumta në rrjet tregojnë se një pjesë e madhe e qytetarëve janë të lodhur nga kjo praktikë e pajustifikuar, që shpesh shoqërohet me zhurmë të madhe dhe ndjesi pasigurie. Në mungesë të kontrollit apo ndërhyrjes së institucioneve përkatëse, kjo “modë” e viteve të fundit po kthehet në normë, duke cenuar qetësinë dhe mirëqenien e fëmijëve, të moshuarve dhe gjithë banorëve të zonave urbane. Ndoshta është koha të ngrihemi të gjithë njëzëri dhe t’i kërkojmë bashkive respektimin e rendit dhe qetësisë publike. Ka mënyra shumë më të bukura dhe më të civilizuara për të festuar një ditëlindje, pa cënuar jetën e të tjerëve.

24K views

Një qytetar i cili ushtron aktivitetin si shitës në zonën e Stacionit të Trenit në Tiranë ka dërguar në redaksinë e JOQ Albania një video ku shihen disa të mitur duke grabitur kiosken e tij pas mesnatës, rreth orës 2. Në pamjet e siguruara, dallohet qartë momenti kur njëri prej të miturve futet brenda në kioskë, ndërsa dy të tjerë qëndrojnë jashtë duke ruajtur zonën. Pas pak minutash, edhe një tjetër futet brenda, ndërsa dy të miturit e qëndrojnë jashtë. Sipas tij, nga kioska janë marrë produkte të ndryshme, por edhe para që ndodheshin në arkë. Pronari i kioskës thotë se dëmi i shkaktuar nga vjedhja kap vlerën e 150 deri në 200 mijë lekëve të rinj. “Hyjnë, vjedhin gjithçka dhe largohen të qetë. Dëmi total që më kanë shkaktuar është 1.5 deri në 2 milion lekë të vjetra. Policinë e kam njoftuar, por dua që kjo video të shërbejë si alarm edhe për të tjerët”, – shprehet ai për JOQ Albania. Kjo ngjarje është një tjetër shembull shqetësues i rritjes së rasteve të vjedhjeve të kryera nga të mitur në zonat urbane, çka tregon për mungesën e kujdesit prindëror, mbikëqyrjes institucionale dhe një sistemi efektiv ndëshkimi. Rritja e tillë e devijimeve në moshë kaq të vogël duhet të shqetësojë jo vetëm familjet, por edhe shoqërinë dhe institucionet përgjegjëse. Është momenti për reflektim dhe veprim konkret, përpara se këto raste të shndërrohen në normë dhe jo në përjashtim.

287.4K views