Festivali Ndërkombëtar i Animacionit Anibar ka përmbyllur me sukses edicionin e tij të 16-të në qytetin e Pejës, duke sjellë një javë plot filma, diskutime, punëtori dhe një frymë kolektive që tejkalon thjesht artin e animacionit.

Tema e sivjetme – “WTF (What’s The Future?)” – nuk ishte thjesht një lojë fjalësh provokative, por një reflektim i thellë mbi pasigurinë globale, realitetin social dhe sfidat që po e formësojnë të ardhmen.

“WTF” – Pyetje, jo përgjigje

“Këtë vit kemi vendosur që në vend të një teme të zakonshme, ta formulojmë një pyetje,” tha Arba Hatashi, drejtoresha e festivalit.

“Pyetja ‘What’s The Future?’ na shtyn të reflektojmë, por njëkohësisht akronimi ‘WTF’ shpreh edhe një reagim emocional shumë të sinqertë që e ndjejmë çdo ditë përballë krizave globale – klimaterike, ekonomike apo politike”.

Sipas saj, ideja nuk ishte të jepeshin përgjigje, por të krijoheshin hapësira ku njerëzit mund të diskutonin dhe bashkoheshin rreth kësaj dileme.

Për Arbën, pavarësisht motit të paparashikueshëm dhe surprizave të shumta që sjell çdo edicion, “jemi shumë të lumtur që kemi arritur të realizojmë të gjitha aktivitetet që kishim paraparë përgjatë javës. Ka pasë shumë filma, shumë mysafirë, dhe një audiencë të mrekullueshme”.

Një program i pasur dhe i guximshëm

Sipas Vullnet Sanajës, drejtor ekzekutiv i Anibar, ky edicion ka qenë “jashtëzakonisht i suksesshëm”.

Ai theksoi se përveç projeksioneve në kinematë e hapura dhe të mbyllura, ka pasur edhe “rritje të interesimit për aktivitetet tjera si Anibar Pro, ku këtë vit për herë të parë kemi sjellë bashkë profesionistë të industrisë, producentë dhe animatorë nga rajoni dhe më gjerë”.

Në kuadër të Anibar Pro, është lansuar edhe projekti “GjeneSys”, një nismë e mbështetur nga Ambasada e Francës dhe Instituti Francez në Kosovë, që ka për qëllim të mbështesë gjeneratën e re të animatorëve për të zhvilluar idetë e tyre dhe për të krijuar studiot e para të pavarura të animacionit në vend.

“Kemi sjellë ekspertë nga Franca, kemi mbajtur masterklasa dhe i kemi ndihmuar animatorët të prezantojnë idetë e tyre para publikut – me synimin që këto ide të kthehen në filma konkretë”, tha Sanaja.

Edukimi si bosht i zhvillimit

Një shtyllë kyçe e Anibarit është gjithmonë edukimi – dhe këtë vit Fllanza Taraku, koordinatore e programit edukativ, solli një gamë të gjerë të punëtorive, për të gjitha moshat.

“Kemi organizuar shtatë punëtori, prej të cilave njëra ka qenë e dedikuar për fëmijët – ku kanë mësuar bazat e animacionit me teknikën stop-motion”, tha ajo.

Në Qendrën Kreative Dukagjini u mbajt punëtoria “K-Theater”, ku pjesëmarrësit krijuan një përrallë, e ilustruan dhe e performuan me muzikë live.

Në Shkollën e Artit, një tjetër punëtori u ndau në dy pjesë: njëra për shkrimin e një zinë dhe tjetra për ilustrimin e saj. “Gjithçka që ka dalë nga kjo punëtori mund të gjendet në ceremoninë e mbylljes – është një punë shumë e veçantë që përfaqëson kreativitetin dhe zërin e të rinjve pjesëmarrës,” shtoi Taraku.

Fryma e Anibarit

Përtej aktiviteteve zyrtare, ajo që e bën Anibarin të veçantë është fryma kolektive që gjenerohet gjatë asaj jave në Pejë. “Unë e kam ndier këtë frymë më shumë se kurrë këtë vit”, tha Fllanza. “Jam shumë krenare për punën që e kemi bërë si ekip, dhe për gjithë vullnetarët që e bëjnë këtë festival të ndodhë. Më vjen keq që përfundon sonte, por jemi gati për vitin tjetër.”

Një ftesë për të ardhmen

Anibar nuk është vetëm një festival filmash. Është një platformë e angazhimit qytetar, një terren për edukim alternativ, dhe një pasqyrë e shoqërisë në lëvizje. Nëse nuk ishit pjesë këtë vit, mesazhi nga organizatorët është i qartë: “Ju presim patjetër vitin tjetër – bashkë ta pyesim përsëri: What’s The Future?”. /Telegrafi/

The post “WTF” – çfarë ndodhi në Anibar 2025? appeared first on Telegrafi.

Për edicionin e 24-të, DokuNights rikthehet jo vetëm si një program muzikor, por si një pulsim i pandashëm i DokuFest-it, duke u rritë, duke ndryshu, duke andrru gjithmonë diçka më të madhe. Bashkë, i drejtojmë sytë nga yjet dhe takohemi çdo natë në skenën tonë në Sonar, në kalanë e Prizrenit. Të rrethuar nga gurët e lashtë e dritat, bashkë do e presim lindjen e diellit.

Një frymë, një frymëmarrje, një rrahje zemre, një tingull, në kohë. Kuruar nga Nita Deda dhe Leart Rama, programi i këtij viti sjell një plejadë të gjerë artistësh: nga këngë ceremoniale shekullore deri te tinguj të guximshëm bashkëkohorë që na e riformësojnë ndjenjën e ritmit dhe pranisë. Bashkë shënojmë një kohë muzike, shënojmë magjiken, kujtesën dhe lëvizjen.

Me 2 gusht, hapim dyert e Sonarit me një natë që vazhdon deri në mëngjes, pret rrezet e para të dritës kur ato mbërrijnë malet. Do të jemi nën qiell e re, teksa ndëgjojmë melodi të thella nga disa nga artistët më vizionarë të skenës elektronike.

Byron Yeates, gjeniu pas Radiant Record, dhe dyshja rrezatuese australiane IN2STELLAR takohen përmes orbitës së Rebiswan në një natë të pafund, pa kufij. Mezi po e presim njërën ndër netët që premton ndjesi të thella, në performancën prekëse të kuartetit ukrainas Dakha Brakha, që s’ka frikë t’i sdifojë të gjitha zhanret. Duke bashkuar traditat popullore me energjinë teatrale, na pret një spektakël i rrallë tingulli dhe vizioni, duke udhëtuar përtej kohës, kufijve, shekujve.

Kërkimet tona ndër yje, s’do të ishin të plota pa i bërë dritë muzikës vendase të Ylli Limanit, këngë të cilat do t’i këndojmë të gjithë së bashku, duke përshkuar të gjitha brezat. Vazhdojmë me shndritë, shndritë, shndritë me retro-futurizmin emocionues të Shkodra Elektronike teksa ata hedhin dritë në kalanë tonë, në neve, në zemrat tona me interpretimet e tyre moderne të këngëve tradicionale të Shkodrës.

Një rikthim i përmallshëm në shtëpi me Ibadet Ramadanin, ndërsa ajo lason albumin e saj të ri solo, një projekt që rrugëton të gjejë audiencën e tij të parë në qytetin, kalanë, qiellin tonë, më të gjitha këngët për dashurinë dhe mallin.

Cinna Peyghamy, YAAND dhe urbau na bashkohen, për të na ofruar performanca të papërpunuara dhe bashkëkohore që zbehin vijat midis akustikës dhe elektronikës, urbanes dhe rurales, traditës dhe transformimit. Një tjetër moment të rëndësishëm e shënojmë me upsammy, e cila do të prezantojë albumin e saj të ri Strange Meridians me një shfaqje live audio/vizuale. Një përzierje e pasur melodish gjithë ndriçim dhe pamjesh reaktive, që shpalosen qartazi, me plot besim. Por, para gjithë kësaj na pret LUXE. Ajo na drejton, na shoqëron, e na zhytë drejt e në një terren me andrra, andrrime.

DokuNights do e përmbyllin me performancën e këngëtarëve legjendarë e performuesve virtuozë Orkestra e Beratit, të cilët na ftojnë këndojmë e vallëzojmë me muzikën e pasur tradicionale shqiptare. Nata s’ndalet këtu. Vazhdon lart në kala me një festë të pafund: 10-vjetori i Sound Metaphors dhe edicioni i 24-të i DokuFest, me kolonën zanore të DJ-ve të Sound Metaphors, Sleep D që na sjell një dritare në universin e Butter Sessions, dhe për një vit tjetër magjik, i vetmi, i dashtuni jonë Genc Elezaj.

Tri shtigje, një destinacion. Një andërr e përbashkët për me vallëzu deri në mëngjes, në të ardhmen, derisa dritat të ndizen përsëri për edicionin e 25-të të festivalit tonë, dhe DokuNights kthehet me andrrën e tij më ambicioze deri më tani! /Telegrafi/

The post DokuNights 2025: Shpalos programin e plotë të artistëve që do të performojnë appeared first on Telegrafi.

Dokumentari “Amy Bradley is Missing” u publikua së fundmi në Netflix.

Ai ndjek misterin e zhdukjes së Amy Bradley pas një udhëtimi familjar me anije në fund të viteve 1990.

Në mars të vitit 1998, në moshën 23-vjeçare, ajo udhëtoi me anijen turistike ‘Rhapsody of the Seas’ me prindërit e saj, Ron dhe Ivo dhe vëllanë e saj Brad.

Ata po shkonin në Curaçao. Por disa ditë më vonë, gjithçka shkoi keq kur ajo u raportua e zhdukur.

Ajo u pa për herë të fundit duke u kthyer në kabinën e saj pas një nate në një klub nate në një anije turistike. FBI-ja kreu një hetim të gjerë, i cili nuk dha rezultate.

Lexo po ashtu Të gjitha lajmet nga Netflix

Dokumentari eksploron momentet e saj të fundit në anijen turistike si dhe informacione të reja që kanë dalë gjatë viteve dhe pamje të mundshme.

Regjisori Ari Mark deklaroi: “Shumica e njerëzve në dokumentar nuk janë intervistuar kurrë më parë. Të vetmit njerëz që u intervistuan ishin familja Bradley”.

“Është një gjë të flasësh për zhdukjen e Amy dhe një tjetër ta përjetosh të gjithën. Kjo është një familje që beson thellësisht në atë që thotë: ‘Ajo është atje jashtë, ne jemi gati ta gjejmë’”. /Telegrafi/

The post Dokumentari i Netflix “Amy Bradley is Missing” i lë shikuesit të mahnitur – ku u zhduk vajza nga anija turistike? appeared first on Telegrafi.

Gjatë edicionit të 16-të të Festivalit Ndërkombëtar të Animacionit Anibar, u përmbyll me sukses iniciativa më e re profesionale Anibar Pro – Genesis.

Në këtë ngjarje të veçantë u duartrokit progresi dhe potenciali i talentëve të rinj në industrinë e animacionit.

Kjo nismë francezo-kosovare, e realizuar në bashkëpunim me Institutin Francez në Kosovë dhe e mbështetur nga Ministria Franceze për Evropën dhe Punët e Jashtme si dhe Ambasada Franceze në Kosovë, është kthyer në një shtyllë të rëndësishme të misionit të festivalit për fuqizimin e krijuesve të rinj dhe zhvillimin e industrive kreative në rajon.

Gjatë pesë ditëve të festivalit i cili mbajt në Pejë, 18 animatorë te rinj prezantuan konceptet e filmave të tyre para një audience ndërkombëtare të përbërë nga producentë, studio dhe mentorë, në kuadër të Genesis Pitching Sessions. Programi profesional përfshiu gjithashtu punëtori, panele diskutimi dhe aktivitete rrjetëzimi me fokus në ndërmarrësi, mentorim dhe tregim etik.

Drejtori Ekzekutiv i Anibar, Vullnet Sanaja, vlerësoi ndikimin e programit Genesis dhe ndau vizionin e tij për të ardhmen, duke theksuar se kjo iniciativë ishte vetëm faza e parë e një rruge të gjatë që do të vazhdojë me më shumë mundësi për zhvillim, bashkëpunimi ndërkombëtar dhe mbështetje të drejtpërdrejtë për krijuesit e rinj.

Momenti kulmor i ngjarjes erdhi kur anëtarët e jurisë – Olivier Catherin, Corinne Destombes dhe Manon Messiant, figura të njohura të animacionit evropian, shpallën dhjetë projektet e
përzgjedhura që do të vazhdojnë rrugëtimin e tyre nën përkujdesje profesionale:

● Albana Hajdini – Stick With Me

● Alisa Fejza – Fading Echoes

● Bleona Brahimi – Inside the Box

● Diellza Franca – At Hana’s

● Erza Qorrolli – Engji

● Finesa Peja – Cice!

● Kaltrina Berisha – Imagine if You Can’t Imagine the Imaginable

● Leonita Thaqi – Liminal

● Rina Lasku – No More Dirt

● Yll Avdiu – As the Forest Whispers

Të përzgjedhur për origjinalitetin, vizionin dhe potencialin e tyre artistik, këta krijues të rinj do të përfitojnë nga mentorim i strukturuar, punëtori dhe masterklasa me producentë e ekspertë të animacionit. Secili prej tyre do të lidhet me një nga producentët që takuan gjatë Genesis, duke siguruar kështu udhëzim të vazhdueshëm për zhvillimin e mëtejshëm të projekteve të tyre.

Me përfundimin e edicionit të parë, Anibar Pro – Genesis është pozicionuar si një shtyllë e fuqishme në kuadër të festivalit. Më shumë se një platformë për përzgjedhje të projekteve, ky program shndërrohet në një inkubator të qëndrueshëm kreativ që ndërton ura mes animatorëve te rinjë në Kosovë dhe tregut ndërkombëtar.

Ndërsa perdet mbyllen për këtë edicion, një gjë është e qartë: zërat e këtyre të rinjve sapo kanë nisur të dëgjohen. Gjenerata e re e animatorëve është këtu, dhe e ardhmja e tyre duket premtuese.

The post Përzgjidhen projektet e dhjetë animatorëve të rinj – përfundon me sukses edicioni i parë i iniciativës Anibar Pro – Genesis appeared first on Telegrafi.

Një grup animatorësh, producentësh dhe krijuesish nga Ballkani dhe më gjerë u mblodhën të enjten për një diskutim mbi temën “Si të fillosh (dhe të mbash) një karrierë në animacion në Ballkan”. Ky panel u zhvillua në kuadër të edicionit të 16-të të Festivalit Ndërkombëtar të Animacionit Anibar, që po mbahet këtë javë në Pejë.

I moderuar nga regjisorja dhe producentja e njohur e animacionit Vessela Dantcheva, paneli bashkoi profesionistë nga Kosova, Kroacia, Maqedonia e Veriut dhe më tej, të cilët sollën perspektivat e tyre mbi mënyrat për të mbajtur gjallë frymën krijuese në një rajon që jo gjithmonë njihet për mbështetje të qëndrueshme ndaj arteve.

“E nisëm me animacione të vogla. Dhe ja ku jemi sot”, tha Dantcheva.

Në fjalën e tij, regjisori kroat i animacionit dhe artist i librave komikë, Marko Dješka, theksoi se çelësi në krijimin e filmave është qëndrueshmëria: “Kur bëhet fjalë për film-bërje, nuk mendoj që ka rëndësi se ku je. Nëse flasim për filma të shkurtër, flasim për një audiencë ndërkombëtare. Çelësi është të jesh konstant. Ndërtimi i një karriere kërkon vazhdimësi, por të fituarit të holla prej saj varet nga vendi ku jeton”, tha Dješka.

Flaka Kokolli, një animatore e re nga Kosova, tregoi para publikut sesi studioja e saj u krijua më shumë nga nevoja sesa nga ambicia, duke shtuar se në fillim të karrierës së saj, të gjitha mundësitë në Kosovë ishin vetëm për motion graphics.

“E kam nisur studion më shumë nga dëshpërimi sesa nga dëshira për të pasur një studio,” tha ajo. “Kur nisa karrierën, të gjitha mundësitë në Kosovë ishin për motion graphics, dhe unë nuk doja të merresha me atë”.

Ndërkohë, animatori kroat Draško Ivezić, që aktualisht jeton dhe punon në Francë, shtoi se vështirësitë nuk zhduken edhe në vende me industri më të zhvilluara. “Problemi ekziston edhe në Francë,” tha ai. “Po, mund të duket si Eldorado, por njerëzit atje po ashtu e kanë të vështirë. Nuk është e lehtë”.

Nga Maqedonia e Veriut, animatori Krste Gospodinovski foli mbi sfidat e punës në një vend ku industria e animacionit pothuajse nuk ekziston.

“Në Maqedoni ‘nuk ka industri’,” tha ai. “Nëse punon vetëm në animacion, duhet ta duash me të vërtetë. Animacioni është një proces i vështirë. Nëse nuk e do, nuk mund të ecësh përpara” .

Diskutimi u përmbyll duke theksuar se, pavarësisht mungesës së infrastrukturës tradicionale, Ballkani mbetet një rajon plot potencial krijues.

The post Anibar mban panel të veçantë rreth sfidave dhe mundësive në animacion appeared first on Telegrafi.

Sezoni i fundit i serialit globalisht të suksesshëm “Squid Game” ka ndihmuar platformën Netflix që të tejkalojë parashikimet e analistëve për fitimet në tremujorin e dytë të vitit. Po ashtu, kompania ka rritur pritshmëritë për të ardhurat vjetore.

Aksionet e Netflix, të cilat kishin shënuar një rritje prej afro 44% gjatë këtij viti para publikimit të raportit financiar të së enjtes, ranë me 1% në tregun pas orarit të bursës, duke u stabilizuar në 1,260 dollarë (1,147 euro). Netflix theksoi se rritja e parashikimit të të ardhurave reflekton kryesisht “dobësimin e dollarit amerikan”.

Për periudhën prill-qershor, kompania raportoi fitim për aksion të holluar prej 7.19 dollarësh (6.54 euro), duke kaluar pritshmërinë e analistëve të anketuar nga LSEG, e cila ishte 7.08 dollarë (6.44 euro), shkruan Reuters.

Netflix e ngriti parashikimin për të ardhurat e vitit 2025 në mes 44.8 deri në 45.2 miliardë dollarë (40.77 – 41.13 miliardë euro), duke përmendur dobësimin e dollarit amerikan si dhe “rritjen e shëndetshme të anëtarësimeve dhe të të ardhurave nga reklamat”. Më parë, ky parashikim kishte qenë deri në 44.5 miliardë dollarë (40.50 miliardë euro).

Kompania ka ndërtuar një version të platformës së saj me mbështetje reklamuese për të tërhequr përdoruesit që janë më të ndjeshëm ndaj çmimit, edhe pse ka theksuar se reklamat nuk do të jenë burimi kryesor i rritjes së të ardhurave gjatë këtij viti. Ajo ka shtuar gjithashtu edhe ngjarje live, si ndeshje të mundjes WWE, për të tërhequr reklamues dhe shikues të rinj.

“Raporti nuk përmban shumë surpriza – Netflix tani funksionon si një makinë e lubrifikuar mirë,” u shpreh analisti i PP Foresight, Paolo Pescatore. “Reklamimi mbetet ende një objektiv strategjik kyç, por do të kërkojë më shumë kohë për t’u zhvilluar.”

Fitimi neto për tremujorin ishte 3.1 miliardë dollarë (2.82 miliardë euro), pak më lart se parashikimi prej 3.06 miliardësh (2.78 miliardë euro). Ndërkohë, të ardhurat totale arritën në 11.08 miliardë dollarë (10.08 miliardë euro), duke kaluar projekcionin e analistëve prej 11.07 miliardë (10.07 miliardë euro).

Netflix publikoi sezonin e tretë dhe të fundit të dramës distopike koreane “Squid Game” vetëm disa ditë para përfundimit të tremujorit të dytë. Ky serial është shfaqja më e ndjekur në historinë e Netflix për përmbajtje jo në gjuhën angleze. Sipas kompanisë, sezoni i tretë ka mbledhur plot 122 milionë shikime.

Ndër publikimet e tjera gjatë tremujorit përfshiheshin edhe titujt “Sirens”, “The Four Seasons” dhe sezoni i tretë i “Ginny & Georgia”.

Netflix ka ndaluar së publikuari të dhënat tremujore për numrin e abonentëve, duke u kërkuar investitorëve që të fokusohen më shumë te fitimi si masë e suksesit. Kompania tha se rritja e anëtarësimeve ishte më e mirë se pritshmëria, por ndodhi në fund të tremujorit, gjë që kufizoi ndikimin në të ardhurat e kësaj periudhe.

Duke parë përpara, Netflix ka parashikuar të ardhura prej 11.5 miliardë dollarësh (10.47 miliardë euro) dhe fitim neto afërsisht 3 miliardë dollarë (2.73 miliardë euro) për tremujorin e ardhshëm. Analistët kishin parashikuar përkatësisht 11.3 miliardë (10.28 miliardë euro) dhe 2.9 miliardë dollarë (2.64 miliardë euro).

Kompania po përgatit gjithashtu sezonet e reja të dy prej serialeve të saj më të suksesshëm. “Wednesday” do të rikthehet në gusht, ndërsa episodet finale të “Stranger Things” do të publikohen në nëntor dhe dhjetor. /Telegrafi/

The post Sezoni i fundit i “Squid Game” ndihmon Netflix të tejkalojë parashikimet e fitimit dhe rrit pritshmëritë për të ardhurat vjetore appeared first on Telegrafi.

Janë shpallur nominimet për çmimin më të rëndësishëm televiziv – Emmy.

Sezoni i dytë i serialit “Severance” ka më shumë nominime, plot 27, i ndjekur nga seriali “Penguin” me 24 dhe “The Studio” dhe “White Lotus” me 23 nominime.

“Severance” dhe “The Studio” transmetohen në Apple TV+, ndërsa “Penguin” dhe “The White Lotus” transmetohen në HBO Max.

Fituesit e çmimeve “Emmy” do të shpallen në ceremoninë më 14 shtator në Los Angeles.

Disa seriale të suksesshme në Netflix janë ndër serialet që konkurrojnë për çmimet Emmy.

Serialet me më shumë nominime për çmimin Emmy këtë vit:

Severance – 27

The Penguin – 24

The Studio – 23

The White Lotus – 23

The Last Of Us – 16

Andor – 14

Hacks -14

Adolescence – 13

The Bear – 13

The Pitt – 13

Rreth Severance

“Severance” është një serial televiziv amerikan, psikologjik, fantastiko-shkencor, i krijuar nga Dan Erickson dhe me producent ekzekutiv dhe regji nga Ben Stiller.

Në të luajnë Adam Scott, Zach Cherry, Britt Lower, Tramell Tillman, Jen Tullock, Dichen Lachman, Michael Chernus, John Turturro, Christopher Walken dhe Patricia Arquette me Sarah Bock që i bashkohet kastit kryesor në sezonin e dytë. /Telegrafi/

The post Seriali “Severance” merr 27 nominime në Emmy Awards 2025 appeared first on Telegrafi.

Producentja e “American Idol”, Robin Kaye dhe bashkëshorti i saj Thomas Deluca u gjetën të vdekur në shtëpinë e tyre në lagjen Encino të Los Anxhelosit.

Policia ka arrestuar 22-vjeçarin Raymond Boodarian, i cili dyshohet për një vrasje të dyfishtë, raporton NBC News.

Policia u thirr për të kontrolluar banorët e një adrese në White Oak Avenue të hënën në mëngjes. Kur mbërritën oficerët, trupat e 70-vjeçares Kaye dhe bashkëshortit të saj, Deluce, u gjetën brenda shtëpisë.

Të dy u shpallën të vdekur në vendngjarje. Sipas raportit, ata u gjetën në dhoma të ndara dhe të dy kishin plagë të shumta me armë zjarri. Hetuesit më vonë zbuluan se oficerët ishin thirrur në të njëjtën adresë më 10 korrik për një vjedhje të mundshme.

American Idol exec Robin Kaye and husband killed in apparent double homicide, tributes paid https://t.co/3oFuy7tUyn pic.twitter.com/apsMNotvrn

— C21 Media (@C21Media) July 16, 2025

Ata nuk mundën të hynin atëherë sepse shtëpia ishte “e siguruar mirë” dhe një inspektim ajror nuk tregoi asgjë të dyshimtë në atë kohë. Megjithatë, kur shqyrtuan pamjet e kamerave të sigurisë, panë se i dyshuari kishte kapërcyer gardhin dhe kishte hyrë në pronë. Edhe pse nuk kishte shenja të një vjedhjeje me thyerje, hetimi tregoi se ai ndoshta kishte hyrë përmes një dere të pambyllur.

Policia beson se Kaye dhe Deluca u kthyen në shtëpi ndërsa Boodarian ishte ende brenda, duke çuar në një konfrontim dhe të shtëna. Pas kësaj, i dyshuari iku.

Policia e identifikoi Boodarian duke përdorur pamjet e sigurisë dhe softuerin e njohjes së fytyrës. Ai u arrestua të martën në shtëpinë e tyre. Agjencia e njësisë së të arratisurve e FBI-së gjithashtu mori pjesë në aksion. Dokumentet e gjykatës tregojnë se Boodarian ka një histori të akteve të dhunshme, por akuzat e mëparshme kundër tij janë hedhur poshtë vazhdimisht.

Vdekja e Robin Kaye shkaktoi trishtim të madh tek kolegët dhe fansat e shfaqjes American Idol, ku ajo punoi si prezantuese muzikore për më shumë se dhjetë vjet.

“Jemi të shkatërruar nga lajmi për ndarjen nga jeta të Robin dhe bashkëshortit të saj të dashur Tom”, tha kompania e prodhimit të shfaqjes në një deklaratë.

“Robin ishte një anëtare kyçe e ekipit tonë muzikor që nga viti 2009 dhe ishte vërtet e dashur dhe e vlerësuar nga të gjithë ata që e takuan. Ajo do të mbetet përgjithmonë në zemrat tona.”

Vrasja e çiftit është ende nën hetim dhe priten informacione shtesë rreth një motivi të mundshëm dhe veprimeve të mëtejshme kundër të dyshuarve. /Telegrafi/

The post Producentja e “American Idol” dhe bashkëshorti i saj u gjetën të vdekur në shtëpinë e tyre në Los Angeles appeared first on Telegrafi.

Seritë televizive si “Severance”, “The White Lotus”, “The Studio” dhe “Hacks” kanë marrë nominime kryesore në edicionin e 77-të të Primetime Emmy Awards, të cilat u shpallën të martën në mëngjes.

“Severance”, seriali i Apple TV+ që sapo përfundoi sezonin e dytë, mori 27 nominime, ndërsa në vend të dytë u rendit “The Penguin” (HBO Max) me 24 nominime. Po 23 nominime morën “The White Lotus” dhe “The Studio”, ky i fundit duke u bërë bashkë me “The Bear” për numrin më të madh të nominimeve në një seri komedie.

Një risi e këtij viti ishte Harrison Ford, që për herë të parë në moshën 83 vjeç mori një nominim për Emmy, për rolin e tij dytësor në sitcom-in “Shrinking”, shkruan HBO.

Nominimet u shpallën nga aktorët Harvey Guillén (“What We Do in the Shadows”) dhe Brenda Song (“Running Point”). Dy kategori të veçanta – për programet më të mira reality competition dhe talk show – u zbuluan ekskluzivisht në “CBS Mornings”.

Vitin e kaluar, kanali FX dominoi Ceremoninë, me fitues si “Shōgun” dhe “The Bear”, ndërsa komedia më e mirë u shpall “Hacks” nga HBO. Te miniseritë, “Baby Reindeer” i Netflix fitoi disa çmime.

Ceremonia e 77-të e Primetime Emmy Awards do të transmetohet drejtpërdrejt nga CBS më 14 shtator 2025, me komedianin Nate Bargatze si prezantues. Ai po ashtu mori një nominim për emisionin e tij varietë “Your Friend, Nate Bargatze”.

Kjo është lista e plotë e nominimeve për “Emmy Awards 2025”:

Seriali më i mirë dramatik
“Andor” (Disney+)
“The Diplomat” (Netflix)
“The Last of Us” (HBO Max)
“Paradise” (Hulu)
“The Pitt” (HBO Max)
“Severance” (Apple TV+)
“Slow Horses” (Apple TV+)
“The White Lotus” (HBO Max)

Seriali më i mirë komedi
“Abbott Elementary” (ABC)
“The Bear” (FX)
“Hacks” (HBO Max)
“Nobody Wants This” (Netflix)
“Only Murders in the Building” (Hulu)
“Shrinking” (Apple TV+)
“The Studio” (Apple TV+)
“What We Do in the Shadows” (FX)

Serial apo film i kufizuar / antologji më i mirë
“Adolescence” (Netflix)
“Black Mirror” (Netflix)
“Dying for Sex” (FX)
“Monsters: The Lyle and Erik Menendez Story” (Netflix)
“The Penguin” (HBO Max)

Filmi më i mirë televiziv
“Bridget Jones: Mad About the Boy” (Peacock)
“The Gorge” (Apple TV+)
“Mountainhead” (HBO Max)
“Nonnas” (Netflix)
“Rebel Ridge” (Netflix)

Programi më i mirë reality konkurrues
“The Amazing Race” (CBS)
“RuPaul’s Drag Race” (MTV)
“Survivor” (CBS)
“Top Chef” (Bravo)
“The Traitors” (Peacock)

Talk show më i mirë
“The Daily Show” (Comedy Central)
“Jimmy Kimmel Live!” (ABC)
“The Late Show with Stephen Colbert” (CBS)

Programi më i mirë varietesh i shkruar
“Last Week Tonight with John Oliver” (HBO Max)
“Saturday Night Live” (NBC)

Speciali më i mirë varietesh (live)
“The Apple Music Super Bowl LIX Halftime Show Starring Kendrick Lamar” (Fox)
“Beyoncé Bowl” (Netflix)
“The Oscars” (ABC)
“SNL50: The Anniversary Special” (NBC)
“SNL50: The Homecoming Concert” (Peacock)

Speciali më i mirë varietesh (i regjistruar)
“Adam Sandler: Love You” (Netflix)
“Ali Wong: Single Lady” (Netflix)
“Bill Burr: Drop Dead Years” (Hulu)
“Conan O’Brien: The Kennedy Center Mark Twain Prize For American Humor” (Netflix)
“Sarah Silverman: Postmortem” (Netflix)
“Your Friend, Nate Bargatze” (Netflix)

Emisioni më i mirë i lojërave televizive
“Celebrity Family Feud” (ABC)
“Jeopardy” (ABC)
“The Price is Right” (CBS)
“Wheel of Fortune” (ABC)
“Who Wants to Be a Millionaire” (ABC)

Aktorja kryesore në serial dramatik
Kathy Bates, “Matlock”
Sharon Horgan, “Bad Sisters”
Britt Lower, “Severance”
Bella Ramsey, “The Last of Us”
Keri Russell, “The Diplomat”

Aktori kryesor në serial dramatik
Sterling K. Brown, “Paradise”
Gary Oldman, “Slow Horses”
Pedro Pascal, “The Last of Us”
Adam Scott, “Severance”
Noah Wyle, “The Pitt”

Aktorja kryesore në serial komedi
Uzo Aduba, “The Residence”
Kristen Bell, “Nobody Wants This”
Quinta Brunson, “Abbott Elementary”
Ayo Edebiri, “The Bear”
Jean Smart, “Hacks”

Aktori kryesor në serial komedi
Adam Brody, “Nobody Wants This”
Seth Rogen, “The Studio”
Jason Segel, “Shrinking”
Martin Short, “Only Murders in the Building”
Jeremy Allen White, “The Bear”

Aktorja kryesore në serial të kufizuar ose film
Cate Blanchett, “Disclaimer”
Meghann Fahy, “Sirens”
Rashida Jones, “Black Mirror”
Cristin Milloti, “The Penguin”
Michelle Williams, “Dying for Sex”

Aktori kryesor në serial të kufizuar ose film
Colin Farrell, “The Penguin”
Stephen Graham, “Adolescence”
Jake Gyllenhaal, “Presumed Innocent”
Brian Tyree Henry, “Dope Thief”
Cooper Koch, “Monsters: The Lyle and Erik Menendez Story”

Aktorja dytësore në serial dramatik
Patricia Arquette, “Severance”
Carrie Coon, “The White Lotus”
Katherine LaNasa, “The Pitt”
Julianne Nicholson, “Paradise”
Parker Posey, “The White Lotus”
Natasha Rothwell, “The White Lotus”
Aimee Lou Wood, “The White Lotus”

Aktori dytësor në serial dramatik
Zach Cherry, “Severance”
Walton Goggins, “The White Lotus”
Jason Isaacs, “The White Lotus”
James Marsden, “Paradise”
Sam Rockwell, “The White Lotus”
Tramell Tillman, “Severance”
John Turturro, “Severance”

Aktorja dytësore në serial komedi
Liza Colón-Zayas, “The Bear”
Hannah Einbinder, “Hacks”
Kathryn Hahn, “The Studio”
Janelle James, “Abbott Elementary”
Catherine O’Hara, “The Studio”
Sheryl Lee Ralph, “Abbott Elementary”
Jessica Williams, “Shrinking”

Aktori dytësor në serial komedi
Ike Barinholtz, “The Studio”
Colman Domingo, “The Four Seasons”
Harrison Ford, “Shrinking”
Jeff Hiller, “Somebody Somewhere”
Ebon Moss-Bachrach, “The Bear”
Michael Urie, “Shrinking”
Bowen Yang, “Saturday Night Live”

Aktorja dytësore në serial të kufizuar ose film
Erin Doherty, “Adolescence”
Ruth Negga, “Presumed Innocent”
Deirdre O’Connell, “The Penguin”
Chloë Sevigny, “Monsters: The Lyle and Erik Menendez Story”
Jenny Slate, “Dying for Sex”
Christine Tremarco, “Adolescence”

Aktori dytësor në serial të kufizuar ose film
Javier Bardem, “Monsters: The Lyle and Erik Menendez Story”
Bill Camp, “Presumed Innocent”
Owen Cooper, “Adolescence”
Rob Delaney, “Dying for Sex”
Peter Sarsgaard, “Presumed Innocent”
Ashley Walters, “Adolescence”

Aktorja mysafire në serial dramatik
Jane Alexander, “Severance”
Gwendoline Christie, “Severance”
Kaitlyn Dever, “The Last of Us”
Cherry Jones, “The Handmaid’s Tale”
Catherine O’Hara, “The Last of Us”
Merritt Wever, “Severance”

Aktori mysafir në serial dramatik
Giancarlo Esposito, “The Boys”
Scott Glenn, “The White Lotus”
Shawn Hatosy, “The Pitt”
Joe Pantoliano, “The Last of Us”
Forest Whitaker, “Andor”
Jeffrey Wright, “The Last of Us”

Aktorja mysafire në serial komedi
Olivia Colman, “The Bear”
Jamie Lee Curtis, “The Bear”
Cynthia Erivo, “Poker Face”
Robby Hoffman, “Hacks”
Zoë Kravitz, “The Studio”
Julianne Nicholson, “Hacks”

Aktori mysafir në serial komedi
Jon Bernthal, “The Bear”
Bryan Cranston, “The Studio”
Dave Franco, “The Studio”
Ron Howard, “The Studio”
Anthony Mackie, “The Studio”
Martin Scorsese, “The Studio”. /Telegrafi/

The post Nominimet për “Emmy Awards 2025” – aktori 15 vjeçar i “Adolescence” bën histori si aktori më i ri i nominuar ndonjëherë appeared first on Telegrafi.

Një numër i madh artistësh, aktivistësh dhe adhuruesish të animacionit u mblodhën të hënën mbrëma në Kinemanë e Liqenit në Parkun e Pejës për të hapur edicionin e 16-të të Festivalit Ndërkombëtar të Animacionit, Anibar, i cili këtë vit vjen me një pyetje urgjente dhe pa përgjigje të qartë: “Çfarë është e ardhmja?”.

Nën tingujt e korit dhe magjinë e animacionit, ceremonia e hapjes së festivalit u mbajt në një atmosferë të ngrohtë, me një publik entuziast nga vendi, rajoni e bota.

Mbrëmja nisi me një interpretim emocionues e të veçantë nga Kori i mirënjohur “Siparantum” nga Peja. Kurse, pas performancës, audienca pati mundësinë të shikojë filmin “Një Botë në
Kaos” nga David Crisp – një film që shpalos sfidat e shumta me të cilat po përballet planeti ynë.

Anibar këtë vit do të zgjasë deri më 20 korrik, për të sjellë mbi 160 filma nga 51 shtete të botës, ndër ta një kategori e veçantë e titulluar “Palestine Animated.” Filmat do të konkurrojnë në gjithsej 6 gara dhe 5 kategori jo-garuese.

Lexo po ashtu Të gjitha lajmet nga Anibar

Ndër tjera, një mori aktivitetesh – panele diskutimi, punëtori dhe propozime për animacione, do të mbahen nëpër hapësira të ndryshme të qytetit, përfshirë shfaqjet e filmave në Kinemanë Jusuf Gërvalla, Kinematë Kuba dhe Liqeni, Kinemanë Çarshia si dhe Galerinë e Arteve.

Po ashtu, programi profesional i festivalit, Anibar Pro, do të bashkojë krijues, mentorë, producentë dhe studio nga Kosova dhe vende të tjera evropiane për të shkëmbyer njohuri dhe për të zhvilluar projekte të reja në fushën e animacionit.

Anibar Pro mbështetet nga GENESIS, një iniciativë franceze-kosovare me mision fuqizimin e gjeneratave të reja të sipërmarrësve kreativë në animacion, lojëra digjitale dhe multimedia.

Për plot një javë, Peja do të gjallërohet me aktivitete krijuese, bashkëpunim, si dhe angazhim për mbrojtjen e mjedisit.

The post Festivali Anibar nis edicionin e 16-të appeared first on Telegrafi.

Franshiza “Pirates of the Caribbean”, një nga më të suksesshmet në historinë e kinemasë, mund të sjellë sërish në ekran kastin origjinal: Johnny Depp, Orlando Bloom dhe Keira Knightley.

Sipas një raportimi të fundit nga ‘The DisInsider’, Disney është në diskutime për rikthimin e personazheve ikonë, Jack Sparrow, Will Turner dhe Elizabeth Swann, në filmin e gjashtë të sagës.

Në fillimet e saj, kjo aventurë, e prodhuar nga Jerry Bruckheimer, u mbështet te dinamika e tresheve Depp-Bloom-Knightley, duke krijuar një sukses të papritur që u kthye në një fenomen global.

Megjithatë, me kalimin e viteve dhe pas largimit të Bloom dhe Knightley, Depp mbeti protagonisti kryesor përkrah aktorëve të tjerë si Geoffrey Rush.

Zërat për rikthimin e mundshëm janë përforcuar edhe nga skena pas titrave të filmit të fundit të sagës, ku Will Turner (Orlando Bloom) dhe Elizabeth Swann (Keira Knightley) shfaqen së bashku.

Lexo po ashtu Të gjitha lajmet nga Johnny Depp

Në atë skenë, një hije misterioze hyn në dhomën e tyre, duke lënë të kuptohet rikthimi i Davy Jones, një nga antagonistët më të njohur të sagës. Kjo sugjeron një vijim të historisë që përfshin gjithë kastin origjinal.

Aktualisht, pak dihet për projektin e ri. Disa burime thonë se regjia do t’i besohet Joachim Ronning, ndërsa skenari po shkruhet nga Jeff Nathanson.

Fansat e sagës presin me padurim që këto spekulime të marrin konfirmim gjatë eventit më të rëndësishëm të Disney, D23 Expo, që do të zhvillohet nga 29 deri më 31 gusht 2025.

Nëse lajmet rezultojnë të vërteta, ky do të ishte një nga rikthimet më të bujshme në historinë e filmave aventurë. /Telegrafi/

The post Disney përgatit rikthimin e Johnny Depp, Orlando Bloom dhe Keira Knightley në “Pirates of the Caribbean” appeared first on Telegrafi.

Xhirimet e serialit televiziv të HBO-së “Harry Potter”, i cili përfaqëson rikthimin e shumëpritur në botën magjike të J.K. Rowling, kanë filluar zyrtarisht dhe është publikuar fotografia e parë nga xhirimet.

Kjo filloi në studion e Warner Bros. në Britaninë e Madhe, pothuajse 14 vjet që kur mbërriti episodi i fundit i filmave “Harry Potter”.

Seriali zbuloi gjithashtu pamjen e parë të Dominic McLaughlin si Harry Potter, i cili buzëqeshi i veshur me një kostum me syze të rrumbullakëta dhe një uniformë shkolle, të dallueshme për personazhin.

McLaughlin-it i bashkohen Arabella Stanton si Hermione Granger dhe Alastair Stout si Ron Weasley.

Treshja e re u zgjodh nga më shumë se 30 mijë aktorë që morën pjesë në audicione vjeshtën e kaluar.

Kasta e re e aktorëve e njoftuar të hënën përfshin Rory Wilmot si Neville Longbottom, Amos Kitson si Dudley Dursley, Louise Brealey si Madam Rolanda Hooch dhe Anton Lesser si Garrick Ollivander.

Gjithashtu është konfirmuar se seriali do të shfaqet premierë në vitin 2027 në HBO dhe HBO Max.

The cast so far for the new Harry Potter series on HBO Max pic.twitter.com/JmW3v9gorE

— Daily Harry Potter (@TheDailyHPotter) June 6, 2025

Versioni i ri i HBO-së i serialit të dashur do të ndjekë Potterin e ri teksa zbulon se është një magjistar, lë familjen e tij pas dhe shkon në Shkollën e Magjisë dhe të Shkëlqimit Hogwarts. /Telegrafi/

The post Publikohet fotografia e parë nga xhirimet e serisë “Harry Potter” appeared first on Telegrafi.

Gjatë një interviste për promovimin e filmit “Oppenheimer”, aktorja Florence Pugh zbuloi një incident teknik të sikletshëm që ndodhi gjatë xhirimeve të një skene intime me Cillian Murphy.

Skena në fjalë përfaqëson marrëdhënien e personazhit të Oppenheimer (Murphy) me Jean Tatlock (Pugh), një pjesë thelbësore e filmit që përfshin disa skena nudo.

Pugh tregoi se kamera u prish pikërisht në mes të një skene seksi, ndërsa të dy aktorët ishin plotësisht të zhveshur në një set të mbyllur.

Ajo tha me humor se nuk ishte koha më e përshtatshme për një ndërprerje teknike dhe se kishte shumë pak kamera në dispozicion.

Për ta kthyer situatën në një moment pozitiv, Pugh vendosi të mësojë diçka rreth kamerave.

Ndërsa një teknik (të cilin ajo e quajti kirurg i kamerës) hyri për të rregulluar pajisjen, ajo e pyeti me kureshtje për problemin teknik.

Nga ana tjetër, Murphy konfirmoi se regjisori Christopher Nolan e përfshiu qëllimisht skenën eksplicite, duke qenë i vetëdijshëm se do ta çonte filmin drejt një klasifikimi R (vetëm për të rritur).

Ai e justifikoi vendimin duke thënë se skenat janë “shumë të fuqishme dhe jo të tepruara”.

Murphy gjithashtu vlerësoi performancën e Pugh, duke e cilësuar si “mahnitëse”, pavarësisht kohës së kufizuar në ekran.

Filmi “Oppenheimer”, fitues i çmimeve Oscar është tashmë i disponueshëm në Netflix. /Telegrafi/

The post Florence Pugh rrëfen një moment të sikletshëm gjatë xhirimeve të një skene intime me Cillian Murphy në “Oppenheimer” appeared first on Telegrafi.

Filmi më i ri i Warner Bros, “Superman”, ka debutuar me sukses të madh në kinematë amerikane dhe ndërkombëtare, duke shënuar një fillim të fuqishëm për epokën e re të super-heronjve të DC Comics në ekranin e madh.

Gjatë fundjavës së hapjes, filmi ka arkëtuar 110 milionë euro në Shtetet e Bashkuara dhe Kanada, ndërsa në tregjet ndërkombëtare ka grumbulluar 90 milionë euro, duke çuar totalin global në 200 milionë euro, sipas të dhënave të konfirmuara nga Warner Bros të dielën.

Ky film përfaqëson një rilindje të françizës së Supermanit, një nga figurat më ikonike të botës, që u shfaq për herë të parë në vitin 1938. Në këtë version të ri, rolin e luan aktori David Corenswet, i cili për herë të parë merr përsipër këtë karakter legjendar.

Suksesi ose dështimi i këtij filmi shihet si vendimtar për të ardhmen e studios Warner Bros dhe të degës së saj të specializuar, DC Studios. Megjithëse DC ka në portofol emra të mëdhenj si “Batman” dhe “Wonder Woman”, ndër vite nuk ka arritur të rivalizojë fuqinë tregtare të Marvel-it dhe sukseset e tij nën ombrellën e Disney-t.

Filmi i ri është shkruar dhe drejtuar nga James Gunn, i njohur më parë për trilogjinë e suksesshme të “Guardians of the Galaxy” në Marvel.

Gunn u emërua bashkëdrejtor i DC Studios në vitin 2022, së bashku me producentin Peter Safran, me qëllimin për të reformuar dhe rilindur universin kinematografik të DC-së.

Me një nisje kaq të fortë dhe interes të lartë nga publiku, “Superman” pritet të jetë një ndër shtyllat kryesore në rindërtimin e botës së DC-së në ekranin e madh dhe të japë tonin për filmat e ardhshëm që do të ndjekin këtë linjë të re kreative. /Telegrafi/

The post “Superman” rikthehet fuqishëm – filmi i ri mbledh 200 milionë euro në fundjavën e parë appeared first on Telegrafi.

Marka amerikane e modës American Apparel është vënë nën vëzhgimin e publikut pasi Netflix publikoi dokumentarin “Trainwreck: The Cult of American Apparel”, i cili heton skandalet që ndodhën prapa skenave.

Ky dokumentar me regji të Sally Rose Griffiths zbulon ngritjen dhe rënien e këtij ish-gjigandi të modës. Trajton temën e ngacmimit në vendin e punës nën udhëheqjen e Drejtorit Ekzekutiv Dov Charney.

Ai themeloi American Apparel në vitin 1989, ndërsa ishte ende student në Universitetin Tufts. Menjëherë pas kësaj, ai hoqi dorë nga studimet. Marka e përmendur kishte një reputacion të mirë deri në vitin 2014, kur Charney u akuzua për ngacmim dhe abuzim seksual. Ai i mohoi të gjitha akuzat.

Dokumentari përfshin, ndër të tjera, dëshmi nga ish-punonjës dhe klipe audio në të cilat Charney i quan punëtorët “budallenjtë e javës” dhe i abuzon më tej verbalisht ata.

Gjithashtu u publikua një regjistrim në të cilin ai flet hapur për marrëdhënie seksuale me punonjëse femra. Në një rast, ai eci lakuriq para dy punonjëseve femra, gjë që u shfaq gjithashtu. U tha se gjykata i rrëzoi këto raste për shkak të marrëveshjeve të konfidencialitetit të nënshkruara nga punonjësit.

Bordi i drejtorëve të American Apparel më pas hetoi Charney-n dhe fillimisht e pezulloi atë për sjellje të gabuar dhe shkelje të politikave të kompanisë, dhe ai u shkarkua në vitin 2014.

Menaxheri i Charney-t tha në një deklaratë për Entertainment Weekly se pavarësisht rrëfimit të këtij dokumentari të Netflix-it, ai nuk u shpall kurrë përgjegjës për ngacmim seksual apo ndonjë gjë tjetër. /Telegrafi/

The post Dokumentari i ri i Netflix zbulon “kultin” e ish-gjigantit të modës: Abuzimi seksual në fokus appeared first on Telegrafi.

Sezoni i tretë i “Squid Game” përfundon me përpjekjen e fundit të Gi-hunit për të shkatërruar lojën nga brenda.

Ai zgjedh të sakrifikohet për të shpëtuar foshnjën e ‘Player 222’. Ngjarjet përfshijnë një rebelim të dështuar, vdekjen e një personazhi të rëndësishëm dhe një tradhti të papritur.

Jun-ho vazhdon të kërkojë ishullin ku zhvillohen lojërat, pa e ditur se një nga shokët e tij është tradhtar.

Ndërkaq, Front Man rikthehet në rolin e udhëheqësit dhe mirëpret VIP-at misteriozë.

Lexo po ashtu Të gjitha lajmet nga Squid Game

Pesë pika kryesore të sezonit janë:

Përpjekja e fundit e Gi-hunit: Ai mundohet ta mbyllë lojën dhe zgjedh vdekjen për të shpëtuar foshnjën.

Shkallë globale: Në fund shihet se lojërat nuk ndodhin vetëm në një ishull, por në vende të ndryshme të botës.

Kërkimi i Jun-ho-s: Ai kërkon të zbulojë të vërtetën për lojërat, por nuk e di se njëri prej tyre e tradhton.

Roli i Front Man: Ai rikthehet në krye dhe mirëpret mysafirët e veçantë.

Përfundim emocional dhe brutal: Ka vdekje të dhunshme dhe vendime të vështira që lënë gjurmë tek shikuesit.

Kjo përmbledhje tregon temën e sakrificës dhe luftës për drejtësi në një botë ku mbijetesa kërkon vendime të rënda. /Telegrafi/

The post Gjërat që nuk duhet t’i humbisni në sezonin e tretë të “Squid Game”: Sakrifica e Gi-hunit dhe zbulimi i tradhtisë appeared first on Telegrafi.

Kur mendojnë për Tom Cruise, shumë do ta imagjinojnë aktorin e famshëm duke veshur syzet e diellit ikonike të aviatorit Ray-Ban nga Top Gun, por shumë nuk e dinë se ai ishte përgjegjës për shpëtimin e markës që ishte në prag të mbylljes në vitet ’80.

Historia e Ray-Ban filloi në vitin 1937 kur Bausch & Lomb zhvilluan syze dielli aviator për pilotët e Forcave Ajrore Amerikane. Modeli Wayfarer pasoi në vitin 1952, duke u bërë një simbol i rebelimit përmes ikonave të Hollivudit. Megjithatë, deri në fund të viteve 1970, të dy stilet po humbisnin terren në favor të modeleve më të reja dhe më tërheqëse.

Në vitin 1981, Ray-Ban shiti vetëm 18,000 palë syze dielli Wayfarer gjatë vitit dhe mendoi ta ndërpriste krejtësisht linjën. Marka dikur përcaktuese e stilit, e veshur nga James Dean dhe Audrey Hepburn në vitet 1950, ra në harresë ndërsa trendet e modës u larguan nga modelet e tyre klasike.

I përballur me perspektivën e falimentimit, Ray-Ban nënshkroi një marrëveshje reklamimi produktesh prej 50,000 dollarësh në vit në vitin 1982. Strategjia ishte sistematike: të mbushej Hollywood-i me syze dielli Ray-Ban. Midis viteve 1982 dhe 1987, marka u shfaq në mbi 60 filma dhe shfaqje televizive në vit.

Një artikull i revistës GQ të vitit 1982 ndihmoi në rritjen e shitjeve të Wayfarer nga 18,000 në 200,000 palë – një përparim i konsiderueshëm, por prapë jo i mjaftueshëm. Megjithatë, përparimi i vërtetë ndodhi në vitin 1983 me Tom Cruise në filmin “Risky Business”.

Cruise mbante veshur një model Ray-Ban Wayfarer gjatë gjithë filmit (megjithëse jo, ndryshe nga sa besohet gjerësisht, gjatë skenës së famshme të vallëzimit). Kur “Risky Business” doli në kinema në vitin 1983, Ray-Ban shiti 360,000 palë Wayfarer, një rritje prej 2,000 përqind.

Tre vjet më vonë, filmi “Top Gun” e bëri Ray-Ban të përjetshëm. Personazhi i Cruise, Maverick, mbante syzet klasike të diellit Aviator, duke mishëruar heroizmin amerikan dhe mashkullorësinë e rastësishme. Shitjet e Aviator u rritën me 40 përqind në shtatë muajt pas publikimit të filmit.

Efekti i Tom Cruise u përhap në të gjithë kulturën popullore. Deri në vitin 1986, syzet Ray-Ban ishin kudo: “Miami Vice”, “The Breakfast Club” dhe “Moonlighting”. Muzikantë si Michael Jackson, Madonna dhe George Michael i bënë ato aksesorët e tyre dallues të modës.

Deri në vitin 1988, Bausch & Lomb shiste 3-4 milionë syze Wayfarer në vit. Ray-Ban ishte transformuar nga një kompani syzesh në vështirësi në një institucion kulturor.

Një investim vjetor prej 50,000 dollarësh me pak reklamë nga Tom Cruise e transformoi një markë në venitje në një ikonë multi-miliardë dollarëshe. /Telegrafi/

The post Si i shpëtoi Tom Cruise syzet “Ray-Ban” – ato ishin në prag të ndërprerjes së prodhimit në vitet ’80? appeared first on Telegrafi.

Aktori Vin Diesel i befasoi së fundmi fansat në festivalin Fuel Fest në Pomona të Kalifornisë, me informacione rreth episodit më të fundit të serisë së filmave “Fast and Furious”.

Në skenë, ai zbuloi tre kushtet e tij kryesore për xhirimin e episodit të fundit të serialit, të titulluar “Fast X Part 2”, i cili është planifikuar për prill 2027.

Diesel mbante veshur një bluzë me mbishkrimin “Fast X Part 2 Los Angeles Production 2025” dhe tha se kishte kërkuar që filmi të zhvillohej përsëri në Los Angeles, për t’u përqendruar në kulturën e garave me makina dhe në rrugë, si dhe për të rikthyer personazhet e Dom dhe Brian O’Conner. Ai theksoi veçanërisht emocionalisht rëndësinë e rikthimit te personazhi i Brian O’Conner, i cili u portretizua nga i ndjeri Paul Walker në serial.

Paul Walker vdiq tragjikisht në vitin 2013 gjatë xhirimeve të filmit “Furious 7”. Pas vdekjes së tij, prodhimi u ndërpre përkohësisht derisa të vendosej se si të vazhdonte historia e personazhit të tij. Në skenat e fundit të atij filmi, Brian O’Conner tërhiqet nga aksioni dhe i përkushtohet familjes së tij, ndërsa për skena shtesë u përdorën vëllezërit e Paul, të cilët shërbyen si sozi, dhe fytyra e Paul u shtua në mënyrë dixhitale.

Deri më tani, personazhi i Brian nuk është shfaqur në vazhdimet pasuese, megjithëse herë pas here është përmendur si i gjallë. Njoftimet e Vin Diesel sugjerojnë mundësinë që pjesa e fundit e filmit të përdorë skena të papublikuara ose të riangazhojë Cody dhe Caleb Walker, vëllezërit e Paul, me anë të zmadhimit dixhital.

Ky veprim i ka entuziazmuar shumë fansa, pasi paralajmëron rikthimin emocional të njërit prej personazheve më të dashur të serialit, si dhe një rikthim në rrënjët e serialit të njohur. /Telegrafi/

The post Vin Diesel zbulon tri kushte kryesore për një vazhdim të “Fast and Furious”: Njëri do t’i kënaqë veçanërisht fansat appeared first on Telegrafi.

Pas suksesit të jashtëzakonshëm global që nga debutimi i tij në vitin 2021, seriali korean “Squid Game” rikthehet me sezonin e tretë dhe të fundit, i cili u publikua sot, më 27 qershor, në platformën Netflix.

Të gjitha gjashtë episodet janë tashmë të disponueshme për shikuesit anembanë botës, duke i dhënë fund një prej sagave më të ndjekura dhe të diskutueshme në historinë e televizionit modern.

Ky sezon përmbyll udhëtimin dramatik të protagonistit Seong Gi-hun dhe përballjen e tij përfundimtare me organizatorët e lojës vdekjeprurëse.

Sipas raportimeve të shumta mediatike dhe vetë krijuesit të serialit, ky kapitull përmbyll historinë kryesore të “Squid Game”. Kjo do të thotë se nuk do të ketë një sezon të katërt.

“Squid Game” u bë një fenomen global që nga lansimi i tij fillestar në vitin 2021, duke kapur vëmendjen e miliona shikuesve dhe duke ndezur debat të gjerë në rrjetet sociale për temat që trajton: pabarazinë sociale, etiken, dhe luftën për mbijetesë.

Suksesi i menjëhershëm i sezonit të parë e shndërroi serinë në një nga prodhimet më të ndjekura në historinë e Netflix. /Telegrafi/

The post Publikohet sezoni i tretë i Squid Game appeared first on Telegrafi.

Seriali “The Waterfront” u publikua në Netflix dy ditë më parë.

Sipas FlixPatrol, “The Waterfront” është seriali më i shikuar në Netflix në mbarë botën.

Seriali u xhirua në Wilmington dhe Southport, Karolina e Veriut, të njëjtat vende ku u krijua seriali “Dawson’s Creek”.

Në film luajnë Holt McCallany, Maria Bello, Jake Weary, Melissa Benoist, Rafael L. Silva, Humberly Gonzalez, Danielle Campbell dhe Brady Hepner. Topher Grace, Dave Annable, Michael Gaston, Gerardo Celasco dhe Zach Roerig.

Për çfarë flet seriali?

Në qytetin imagjinar jugor të Havenportit, Karolina e Veriut, familja Buckley, një familje e pasur por me probleme financiare, drejton një restorant.

Patriarku Harlan Buckley (Holt McCallany) bëhet i paaftë pas dy atakeve në zemër, dhe gruaja e tij Belle (Maria Bello) dhe djali Cane (Jake Weary) përpiqen të shpëtojnë perandorinë familjare.
Ndërsa biznesi fundoset, ata vendosin për një veprim të rrezikshëm – kontrabandën e heroinës duke përdorur një varkë peshkimi.

Cane, i presionuar nga borxhet dhe besnikëria familjare, fillon një operacion kontrabande, i cili shkakton konflikt si me autoritetet ashtu edhe me një organizatë kriminale të udhëhequr nga Grady (Topher Grace).

Vajza Bree (Melissa Benoist) është në rehabilitim dhe lufton për kujdestarinë e djalit të saj Dill. Mbërritja e baristit misterioz Shawn (Rafael L. Silva) shton më shumë tension dhe mister.

Autori Kevin Williamson, i njohur për serialin “Dawson’s Creek” dhe “Scream”, e bazon historinë në fëmijërinë e tij në një komunitet peshkatarësh, dhe elementët prapa skenave të kontrabandës i ngjajnë përvojës reale të babait të tij në vitet 1980.

Çfarë thonë kritikët?

Një nga kritikat më të ashpra vjen nga Caroline Sieda (The Daily Best) e cila e përshkruan “The Waterfront” si “një serial që i mungon thellësia emocionale dhe koherenca narrative”.

Sipas saj, seriali është i mbingarkuar nga mospërputhjet tonale dhe dialogu i parashikueshëm, dhe personazhet, megjithëse potencialisht interesantë, mbeten të sheshtë dhe të pazhvilluar.

Siede arrin në përfundimin se seriali nuk arrin të justifikojë ambiciet e veta dhe duket si një imitim sipërfaqësor i titujve më të mirë brenda zhanrit.

Seriali aktualisht ka një vlerësim prej 6.8/10 në IMDb. /Telegrafi/

The post “The Waterfront”, seriali i ri i Netflix bëhet hit në mbarë botën appeared first on Telegrafi.