Mediat malazeze kanë raportuar se shërbimet franceze të sigurisë, thuhet se kanë paralajmëruar autoritetet e Malit të Zi për ardhjen e një fluturimi çarter nga Beogradi me persona të lidhur me mjedise kriminale dhe me Partinë Përparimtare Serbe.

Kompania franceze VINCI, e cila menaxhon aeroportin “Nikola Tesla” në Beograd, ka qenë e para që ka pasur informacion për këtë fluturim çarter.

Përmes oficerit të saj ndërlidhës, ajo e ka njoftuar njësinë franceze të inteligjencës DGSE (Drejtoria e Përgjithshme për Sigurinë e Jashtme), e cila më pas ka alarmuar autoritetet malazeze, sipas portalit malazez Antena M.

DGSE ka alarmuar Podgoricën pasi ka marrë informacione për një fluturim drejt Tivatit në prag të samitit të Bashkimit Evropian dhe Ballkanit Perëndimor, në të cilin merr pjesë edhe presidenti francez, Emmanuel Macron, transmeton Telegrafi.

Edhe pse autoritetet franceze nuk i kanë komentuar zyrtarisht këto pretendime, vetë fakti që përmendet DGSE tregon seriozitetin e situatës.

Bëhet fjalë për një shërbim që shpesh quhet “CIA franceze”, një organizatë e ngarkuar me mbledhjen e informacionit të inteligjencës jashtë vendit, luftimin e terrorizmit, operacionet kundërzbulimit dhe mbrojtjen e interesave kombëtare franceze në mbarë botën.

DGSE – përgjigjja franceze ndaj CIA dhe MI6

DGSE është themeluar gjatë Luftës së Dytë Botërore, ndërsa formën e sotme e ka marrë në vitin 1982. Roli i saj mund të krahasohet me CIA-n amerikane ose MI6 britanike. Selia e shërbimit ndodhet në Paris dhe, sipas të dhënave të disponueshme, punëson rreth 7000 persona dhe ka një buxhet prej gati një miliard eurosh në vit.

Gjersa u del në krah kriminelëve të dëbuar nga Mali i Zi, Vuçiq flet për Kosovën

Ndryshe nga shërbimi i brendshëm DGSI, i cili vepron brenda territorit të Francës, DGSE fokusohet në kërcënimet e jashtme, shkruan nova.rs.

Agjentët e saj veprojnë në mbarë botën, mbledhin informacione përmes rrjeteve të bashkëpunëtorëve, përgjojnë komunikime, analizojnë imazhe satelitore dhe kryejnë operacione të fshehta në interes të shtetit francez.

Siguria e Macronit si prioritet

Angazhimi i mundshëm i DGSE në rastin e Tivatit nuk do të ishte i pazakontë. Presidenti francez, Emmanuel Macron konsiderohet një nga liderët më të mbrojtur në Evropë dhe çdo vizitë e tij jashtë vendit përfshin përgatitje të shumëfishta sigurie.

Sipas Antena M, kompania franceze Vinci, që menaxhon aeroportin “Nikola Tesla” në Beograd, ka regjistruar e para informacionin për fluturimin e dyshimtë çarter. Përmes oficerit ndërlidhës, DGSE është njoftuar dhe më pas thuhet se ka përcjellë paralajmërimin tek strukturat e sigurisë në Mal të Zi.

Një bashkëpunim i tillë nuk është i pazakontë, pasi shërbimet franceze shpesh shkëmbejnë të dhëna me agjenci partnere kur vlerësojnë se ekziston rrezik potencial për zyrtarë francezë ose për ngjarje ndërkombëtare.

Shërbimi i njohur për operacione të fshehta

Gjatë dekadave, DGSE ka marrë pjesë në operacione të shumta kontroverse. Rasti më i njohur ndodhi në vitin 1985, kur agjentët e saj fundosën anijen e organizatës Greenpeace “Rainbow Warrior” në Zelandën e Re, për të parandaluar protestat kundër testeve bërthamore franceze. Ky operacion shkaktoi skandal ndërkombëtar dhe çoi në dorëheqjen e ministrit të atëhershëm të mbrojtjes së Francës.

Shërbimi më vonë është përfshirë në luftën kundër al-Qaedës, në shpëtimin e pengjeve franceze në Irak dhe Afrikë, si dhe në një sërë operacionesh antiterroriste në Lindjen e Mesme dhe në Sahel.

Detyra speciale për llogari të Vuçiqit - kush janë kriminelët e ndaluar në Mal të Zi?

Në vitet e fundit, ai ka rritur ndjeshëm aktivitetet në fushën e sigurisë kibernetike, mbikëqyrjes elektronike dhe monitorimit të ndikimeve të huaja në zgjedhjet evropiane.

Policia malazeze dhe Agjencia për Siguri Kombëtare kanë njoftuar se kanë shtuar kontrollet në Aeroportin e Tivatit dhe kanë kryer verifikime të detajuara të pasagjerëve që kanë mbërritur me fluturimin çarter nga Beogradi. Nga gjithsej 87 shtetas të Serbisë, disa persona të cilësuar si të interesit të sigurisë janë ndaluar të hyjnë në Mal të Zi.

Edhe pse për momentin nuk ka konfirmim zyrtar se pikërisht DGSE ka inicuar aksionin, fakti që samiti është mbajtur në prani të Macronit dhe zyrtarëve të tjerë të lartë evropianë e bën të besueshme që shërbimet franceze kanë qenë të përfshira në vlerësimin e rreziqeve të sigurisë. /Telegrafi/

Interesimi për ndërhyrje estetike në hundë është rritur ndjeshëm vitet e fundit, sidomos te moshat e reja.

Gjatë podcastit “Shëndeti në rend të parë”, i përkrahur nga United Hospital, otorinolaringologu i specializuar në rinoplastikë, Kujtim Kastrati, foli për arsyet pse të rinjtë po kërkojnë gjithnjë e më shumë rinoplastikë, ndikimin e rrjeteve sociale dhe rëndësinë e konsultës së kujdesshme para çdo ndërhyrjeje.

Sipas tij, te moshat e reja ndikimi i rrjeteve sociale është shumë i madh. Pamja e personazheve të njohura, krahasimet e vazhdueshme dhe bullizimi bëjnë që shumë të rinj të shohin hundën si një “problem” që duhet korrigjuar.

“Tek moshat e reja po ndikon shumë pjesa e rrjetit social. Po ndikon pjesa e bullizimit”, tha Kastrati.

Ai shtoi se një pjesë e pacientëve nuk shkojnë vetëm për probleme funksionale, si vështirësia në frymëmarrje, por edhe për arsye estetike të ndikuara nga ajo që shohin në rrjete sociale.

Duke folur për rastet konkrete, Kastrati tregoi se ka pacientë që paraqiten në konsultë me foto të personave të njohur, duke kërkuar një hundë të ngjashme me ta.

“Ka raste kur pacienti vjen me një foto dhe thotë: e dua hundën time sikur ky”, u shpreh ai.

Megjithatë, sipas mjekut, kjo është një pritshmëri që duhet sqaruar me shumë kujdes. Ai theksoi se rinoplastika mund ta ndryshojë formën e hundës, por nuk e ndryshon tërësisht fytyrën apo identitetin e një personi.

“Në këto raste është mirë që të fokusohemi më tepër në konsultë, që pacienti të mos zhgënjehet, sepse fytyra e tij nuk do të ndryshojë. Do të ndryshojë hunda, por fytyra nuk ndryshon”, tha Kastrati.

Për këtë arsye, ai theksoi se konsultimi para operacionit është një nga fazat më të rëndësishme.

“Duhet të jemi korrektë duke parë tiparet e fytyrës së pacientit”, tha ai, duke shtuar se jo çdo kërkesë estetike mund të realizohet në mënyrën që pacienti e imagjinon.

Për më shumë shikoni të plotë podcastin "Shëndeti në rend të parë":

- YouTube www.youtube.com

Aktorja e njohur, Sharon Stone, ka treguar se momenti vendimtar që çoi në fundin e martesës së saj të dytë ishte reagimi i bashkëshortit gjatë një krize serioze shëndetësore në fillim të viteve 2000.

Stone zbuloi se mjekët kishin gjetur tumore në gjoksin e saj, ku njëri prej tyre ishte shumë i madh.

Një mjek i tha se ekzistonte dyshimi i fortë për kancer dhe i rekomandoi një mastektomi të dyfishtë (heqjen e të dy gjinjve).

Sharon Stone

Edhe pse ajo ishte e bindur se nuk kishte kancer, vendosi t’i nënshtrohej operacionit për siguri.

Sipas saj, bashkëshorti i atëhershëm kundërshtoi ashpër këtë vendim, duke e quajtur 'qesharak'.

Ai ishte i zemëruar me mundësinë që ajo të hiqte të dy gjinjtë, ndërsa Stone këmbënguli se vendimet për trupin dhe shëndetin e saj i merrte vetë.

Ajo tha se pikërisht ky reagim i tij e bëri të kuptonte se martesa kishte marrë fund.

Sharon Stone

Sipas Stone, ai mendonte se ajo po merrte shumë vendime vetë dhe nuk e mbështeti në një moment kritik të jetës së saj.

Megjithatë, pas operacionit rezultoi se tumoret ishin beninje (jo kancerogjene), kështu që nuk pati nevojë për mastektomi të dyfishtë.

Megjithëse nuk e përmendi me emër, Stone ishte e martuar me Phil Bronstein nga viti 1998 deri në vitin 2004. /Telegrafi/

Sony, gjatë eventit PlayStation State of Play, prezantoi një seri të madhe njoftimesh dhe video-lojërash të reja, duke përfshirë edhe zhvillime të rëndësishme për serinë God of War.

Një nga surprizat kryesore ishte prezantimi i një loje të re në universin e God of War, e cila këtë herë nuk fokusohet te Kratos, por sjell një drejtim të ri për serinë.

Sipas njoftimeve, projekti i ri i jep më shumë hapësirë narrativës dhe personazheve të tjerë të rëndësishëm të sagës.

Gjatë ngjarjes u prezantuan gjithashtu disa tituj të tjerë të mëdhenj, përfshirë lojëra aksioni, horror dhe aventura, si dhe përditësime për projekte ekzistuese të PlayStation Studios dhe zhvilluesve të tjerë.

Në përgjithësi, State of Play u fokusua në një linjë të fortë lojërash single-player dhe rikthimin e markave të njohura të Sonyt, duke treguar se kompania po i jep sërish prioritet përvojave narrative dhe lojërave me histori të thellë. /Telegrafi/

God of War Laufey - Gameplay Reveal Trailer | PS5 Games www.youtube.com

Until Dawn 2 - Announce Trailer | PS5 Games www.youtube.com

Marvel’s Wolverine - Extended Gameplay Trailer | PS5 Games www.youtube.com

- YouTube www.youtube.com

Shqipëria të premten do të ndikohet nga kushte atmosferike të qëndrueshme.

Shërbimi Meteorologjik Ushtarak bën të ditur se moti parashikohet me kthjellime (diell) si dhe alternime të herëpashershme vranësirash kryesisht mesatare në pjesën e parë të ditës, ndërsa pas orëve të mesditës do të mbizotërojë mot i kthjellët.

Era do të fryjë me drejtim juglindje - jugperëndim me shpejtësi mesatare 6m/s.

Deti - Valëzimi në detet Adriatik dhe Jon i forcës 2-4 ballë. /Telegrafi/

Instituti Hidrometeorologjik bën të ditur se sot do të mbajë mot me diell dhe vranësira të shpërndara.

IHK njofton se temperaturat minimale do të lëvizin ndërmjet 10–13 gradë Celsius, ndërsa maksimalet e ditës ndërmjet 22–26 gradë Celsius.

Era do të fryjë nga veriperëndimi me shpejtësi 1–4 m/s. /Telegrafi/

Aktorja Jennifer Aniston ka bërë një nga referencat e rralla publike për ish-bashkëshortin e saj, Brad Pitt, gjatë një bisede me mikeshën dhe kolegen e saj nga seriali "Friends", Lisa Kudrow.

Gjatë intervistës për “Actors on Actors”, Aniston dhe Kudrow kujtuan momentet më të mira nga seriali.

Biseda u ndal te episodet e 'Ditës së Falënderimeve', kur Kudrow përmendi episodin ku Brad Pitt ishte mysafir dhe e cilësoi atë si 'shumë qesharak'.

- YouTube www.youtube.com

Aniston u pajtua me këtë vlerësim dhe kujtoi me humor yjet e shumtë që kishin marrë pjesë në serial, përfshirë Brad Pitt, Bruce Willis, Julia Roberts, Isabella Rossellini dhe Sean Penn.

Ajo tha se gjithmonë i kishte habitur fakti që edhe yjet më të mëdhenj të Hollywood-it ndiheshin nervozë para paraqitjeve në “Friends”.

Brad u shfaq në sezonin e tetë të serialit, duke luajtur personazhin e Will Colbert, një ish-shok shkolle i Ross dhe Monicas, i cili urrente Rachel Green, personazhin e interpretuar nga Aniston.

Jennifer Aniston dhe Brad Pitt nisën lidhjen e tyre në vitin 1998, u fejuan në vitin 1999 dhe u martuan në vitin 2000.

- YouTube www.youtube.com

Ata njoftuan ndarjen në vitin 2005.

Pavarësisht divorcit, Aniston kishte deklaruar atëherë se shpresonte që një ditë të mbeteshin miq.

Jennifer Aniston dhe Brad Pitt

Me kalimin e viteve, duket se marrëdhënia mes tyre është përmirësuar.

Një nga momentet që tërhoqi vëmendje ishte përqafimi i tyre miqësor në prapaskenat e ndarjes së çmimeve 'Screen Actors Guild Awards 2020'. /Telegrafi/

Ndërsa turizmi po njeh rritje të vazhdueshme në mbarë Evropën dhe po shndërrohet në një nga shtyllat kryesore të ekonomive të shumë shteteve, gjithnjë e më shumë po shfaqen edhe tensione sociale mes këtij sektori dhe komuniteteve lokale. Problemet lidhen kryesisht me qasjen në banesa, rritjen e çmimeve të qirave dhe kostove të përgjithshme të jetesës në qytetet më të vizituara.

Në shumë destinacione turistike, sidomos në qytetet historike dhe bregdetare, rritja e kërkesës për akomodime afatshkurtra ka bërë që një pjesë e madhe e banesave të shndërrohen në apartamente turistike. Kjo ka sjellë zvogëlim të ofertës për banorët vendas dhe, si pasojë, rritje të ndjeshme të çmimeve të qirave. Për shumë familje, veçanërisht të rinjtë dhe shtresat me të ardhura mesatare ose të ulëta, kjo po e bën gjithnjë e më të vështirë përballueshmërinë e jetesës në qytetet e tyre, transmeton Telegrafi.

Ndërkohë, edhe kostot e shërbimeve dhe produkteve bazë në zonat turistike po rriten, të nxitura nga kërkesa e lartë sezonale dhe orientimi i ekonomisë lokale drejt vizitorëve të huaj. Kjo situatë ka nxitur pakënaqësi në rritje te banorët, të cilët shpesh ndihen të margjinalizuar në qytetet ku jetojnë, ndërsa përfitimet ekonomike të turizmit nuk shpërndahen në mënyrë të barabartë.

Si rezultat, në disa vende evropiane po vërehen edhe reagime publike dhe protesta kundër “turizmit të tepruar”, me thirrje për rregullim më të rreptë të tregut të qirave afatshkurtra dhe politika që mbrojnë banorët lokalë, shkruan euronews.

Në këtë kontekst, shtrohet gjithnjë e më shpesh pyetja: cilat vende dhe qytete po përballen më fort me këtë reagim dhe si po e balancojnë ato zhvillimin ekonomik nga turizmi me nevojat e banorëve të tyre?

Spanja, Italia dhe Franca janë tre vendet evropiane ku reagimi kundër turizmit masiv është më i theksuar, sipas një studimi të ri të publikuar nga platforma e argëtimit digjital JB.com.

Të dhënat zyrtare tregojnë një prirje të qartë rritjeje të vazhdueshme të fluksit turistik, gjë që ndihmon në shpjegimin e pakënaqësisë në rritje të komuniteteve lokale.

Në Spanjë, për shembull, vetëm në katër muajt e parë të vitit 2026, numri i turistëve është rritur me 3.4 për qind krahasuar me të njëjtën periudhë të vitit të kaluar. Ky trend pritet të forcohet edhe më tej, pasi sipas Ministrisë së Turizmit, vendi parashikohet të regjistrojë një rritje prej 7.1 për qind të pasagjerëve në fluturimet ndërkombëtare hyrëse gjatë qershorit të këtij viti.

Kjo rritje e shpejtë e numrit të vizitorëve, ndonëse përbën një shtysë të rëndësishme për ekonominë dhe punësimin, po ushtron gjithashtu presion të madh mbi infrastrukturën urbane, tregun e banesave dhe kostot e jetesës në qytetet kryesore turistike. Si pasojë, në disa rajone po shtohen zërat kritikë ndaj turizmit masiv, me thirrje për politika më të balancuara që synojnë të ruajnë ekuilibrin mes zhvillimit ekonomik dhe cilësisë së jetës së banorëve lokalë.

Italia dhe Franca gjithashtu pritet të shënojnë rritje të ndjeshme të fluksit turistik gjatë muajit qershor, përkatësisht me 12 për qind dhe 2.6 për qind krahasuar me të njëjtën periudhë të vitit 2025, sipas një njoftimi për shtyp të publikuar nga Ministria e Turizmit e Spanjës.

Këto shifra tregojnë se, pavarësisht debateve dhe pakënaqësive të shfaqura në disa qytete evropiane, kërkesa për udhëtime në destinacionet më të njohura të kontinentit mbetet në rritje të vazhdueshme. Kjo rritje, megjithatë, vazhdon të ushqejë diskutimet për menaxhimin e turizmit dhe ndikimin e tij në jetën e përditshme të banorëve lokalë, veçanërisht në zonat ku numri i vizitorëve tejkalon ndjeshëm kapacitetin e infrastrukturës urbane.

Në të kundërt, Qipro dhe Shqipëria renditen ndër vendet më mikpritëse ndaj vizitorëve në Evropë, sipas të njëjtit raport të JB.com. Në këto vende nuk janë dokumentuar protesta të organizuara kundër turizmit, ndërsa niveli i presionit rregullator ndaj udhëtarëve dhe sektorit turistik mbetet relativisht i ulët. Kjo i bën ato destinacione më të qeta në aspektin e debatit publik rreth turizmit masiv, pavarësisht rritjes së vazhdueshme të interesit të vizitorëve ndërkombëtarë.

Studimi i JB.com ka analizuar një sërë faktorësh për të arritur në këto përfundime, duke përfshirë intensitetin e protestave kundër turizmit, vëmendjen mediatike ndaj tyre, nivelin e taksave turistike, si dhe raportin mes numrit të vizitorëve dhe popullsisë rezidente në 30 vende të ndryshme në mbarë botën.

Cilat qytete kanë parë më shumë protesta kundër turizmit?

Spanja, e cila renditet në vendin e parë ndër 30 vendet e analizuara në studim, është gjithashtu shteti ku është regjistruar numri më i madh i protestave kundër turizmit masiv. Sipas të dhënave, këto reagime janë shtrirë në më shumë se 40 qytete në mbarë vendin, duke nisur nga Barcelona deri në Ishujt Kanarie, dy nga destinacionet më të frekuentuara turistike në Evropë.

Rajoni i Katalonjës, ku ndodhet Barcelona, mbetet një nga zonat më të ngarkuara nga fluksi i vizitorëve ndërkombëtarë. Vetëm në vitin 2025, ky rajon ka pritur rreth 20.1 milionë turistë, një rritje prej 0.6 për qind krahasuar me vitin 2024. Pas Katalonjës, si destinacione të tjera kryesore turistike në Spanjë renditen Ishujt Balearikë dhe Ishujt Kanarie, të cilët gjithashtu përballen me presion të lartë sezonal nga turizmi masiv.

Pakënaqësia e banorëve është shfaqur edhe në forma të dukshme proteste në terren. Në qershor të vitit të kaluar, qindra protestues marshuan në qendër të Barcelonës, duke mbajtur pankarta me mesazhin “Turizmi po e vret Barcelonën”. Në disa raste, tensionet u shoqëruan edhe me veprime simbolike, ku protestuesit spërkatën turistët me pistoleta uji në zonat më të frekuentuara të qytetit, si një mënyrë për të tërhequr vëmendjen ndaj ndikimit që, sipas tyre, turizmi masiv po ka në jetën e përditshme të banorëve lokalë dhe në identitetin urban të qytetit.

- YouTube www.youtube.com

Edhe Italia është përballur me një valë protestash të ngjashme në disa nga qytetet e saj më të vizituara, përfshirë Venecian, Romën, Firencen, Napolin dhe Milanon. Në këto zona, pakënaqësia e banorëve është lidhur kryesisht me ndikimin e turizmit masiv në tregun e banesave dhe në cilësinë e jetesës urbane.

Në disa raste, aktivistë lokalë kanë shkuar edhe më tej, duke sabotuar kutitë e çelësave të përdorura për qiratë afatshkurtra. Këto veprime simbolike synojnë të denoncojnë mungesën e banesave të përballueshme për banorët rezidentë, të cilët gjithnjë e më shumë po përballen me çmime të larta dhe zhvendosje nga qendrat historike të qyteteve.

Si pjesë e përpjekjeve për të frenuar turizmin e tepruar, Venecia ka rikthyer një masë të veçantë rregullatore, duke vendosur ditë specifike gjatë fundjavave në muajt prill, maj, qershor dhe korrik, kur vizitorët ditorë detyrohen të paguajnë një tarifë hyrjeje.

Kjo masë synon të menaxhojë më mirë fluksin e madh të turistëve në periudhat më të ngarkuara dhe të lehtësojë presionin mbi infrastrukturën e qytetit.

Ndërkohë, edhe Franca ka regjistruar protesta në disa prej qyteteve të saj kryesore, përfshirë Marsejën, Nicën dhe Parisin. Përveç protestave urbane, është rritur edhe aktivizmi kundër anijeve turistike, veçanërisht në zonat bregdetare, ku ndikimi i tyre mjedisor dhe social është bërë një çështje gjithnjë e më e debatueshme. Këto zhvillime tregojnë një rezistencë në rritje të komuniteteve lokale si në destinacionet kontinentale, ashtu edhe në ato bregdetare, ndaj presionit të turizmit masiv. /Telegrafi/

E mërkura e ardhshme është dita e fundit për kandidatët që synojnë pozitën e kryeprokurorit të shtetit. Megjithatë KPK-ja nuk ka treguar nëse deri tash ka aplikuar ndonjë kandidat, derisa folën shkurt për padinë që u bëri Blerim Isufaj, aktualisht kryeprokuror i Prokurorisë Speciale.

Kanë mbetur edhe pak ditë derisa konkursi për kryeprokuror të shtetit të përmbyllet.

Megjithatë Këshilli Prokurorial i Kosovës, nuk ka treguar se sa persona kanë aplikuar deri tash për këtë pozitë, duke thënë se kjo do të bëhet pas përmylljes së afatit të konkursit.

Derisa nga ky institucion folën për padinë që Blerim Isufaj, i përzgjedhur më 2022 për këtë pozitë, bëri ndaj KPK-së, për këtë konkurs.

“Lidhur me pyetjen tuaj për numrin e aplikuesve në konkursin për Kryeprokuror të Shtetit, ju njoftojmë se procesi i pranimit të aplikacioneve është ende në zhvillim e sipër dhe afati për aplikim mbetet i hapur deri më 10 qershor 2026. Për këtë arsye, Këshilli Prokurorial i Kosovës nuk publikon të dhëna lidhur me numrin e aplikuesve deri në përfundimin e afatit të konkursit dhe verifikimin administrativ të aplikacioneve të pranuara. Sa i përket padisë së paraqitur nga z. Blerim Isufaj në gjykatë, Këshilli Prokurorial i Kosovës e respekton të drejtën e secilit person për t’iu drejtuar organeve kompetente gjyqësore për mbrojtjen e të drejtave dhe interesave të tij juridike.

Duke pasur parasysh se çështja është në procedurë gjyqësore, KPK-ja nuk komenton rastet që janë objekt shqyrtimi nga gjykatat dhe do të veprojë në përputhje me vendimet e institucioneve kompetente. Konkursi për Kryeprokuror të Shtetit është shpallur në përputhje me legjislacionin në fuqi dhe procedurat e parapara për këtë proces.”

Nga Gjykata Admininistrative nuk kanë kthyer përgjigje sa i përket kësaj padie, por avokati i Isufajt, Artan Çerkini ka thënë për Dukagjinin se ende nuk kanë pranuar asnjë përgjigje për këtë.

Liridon Salihu, hulumtues në GLPS thotë se Gjykata duhet të vendos sa më shpejt që është e mundur duke pas parasysh natyrën e rastit.

“Bazuar në afatet që përmban rregullorja vlerësojmë që gjysma e korrikut ose fundi i korrikut mund të dalë me një kandidat nga ana e KPK-së për kryeprokuror të shtetit, por varet edhe nga procedurat që do e përcjellin këtë proces, sic e dini tashmë është atakuar në gjykatë shpallja e këtij konkursi, pritet ndonjë vendim nga ana e gjykatës, dhe varësisht prej asaj mund të dallojë edhe koha kur mund të kemi kryeprokurorin e ri të shtetit”, ka thënë Salihi.

Ndërkohë që Vullnet Bugaqku thotë se ky proces duhet të përmbyllur me transparencë dhe integritet të plotë.

“Nuk e shoh që ka me pas ndonjë ndërlidhje eksplicite qoftë në propozimin e kandidatura apo përzgjedhjes së kandidaturave nën ndikimin politik sepse pres që përbërja e re e KPK-së të mos i bëjë gabimet që i kanë bërë përbërja e vjetër dhe pres që të zhvillojë një procedurë tejet transparente dhe në mënyrë meritore”, ka thënë Bugaqku.

Këshilli Prokurorial i Kosovës, vendosi të hapë konkurs të ri për kryeprokurorin e shtetit, 4 vjet pas atij që nxori të parin Blerim Isufajn, por që nuk u dekretua na presidentja. /Tv Dukagjini

- YouTube youtu.be

Florentino Pérez ka rritur edhe më shumë pritshmëritë te tifozët e Real Madridit, duke konfirmuar tri emra konkretë dhe duke paralajmëruar një transferim gjigant që, sipas tij, do të ishte më i shtrenjti në historinë e klubit.

Presidenti i Real Madridit, që po kërkon edhe një mandat në krye të klubit në zgjedhjet e së dielës, ka bërë premtime të mëdha në emisionin Horizont.

“Mund t’ju tregoj për tre transferime: Mourinho, Konaté dhe Dumfries. Por do të ketë edhe më shumë. Të martën, do t’i bëj një ofertë të rëndësishme një ekipi të nivelit të lartë të Ligës së Kampionëve për një lojtar të shkëlqyer. Do të ishte shuma më e madhe e transferimit që Real Madridi ka paguar ndonjëherë. Të paktën 150 milionë”, ka deklaruar Pérez.

Presidenti madrilen shtoi se afrimi i madh do të jetë i një profili “Galaktik”, duke e krahasuar me emra legjendarë të historisë së Realit.

“Kur nënshkruajmë me dikë, e bëjmë për të krijuar emocione. Figo, Zidane, Ronaldo, Cristiano, Kaká. Lojtari do të jetë i atij kalibri dhe nuk është nga Premier League. Një Galaktik i vërtetë”, u shpreh Pérez.

Ai po ashtu i hodhi poshtë spekulimet se bëhet fjalë për Michael Olise, duke sqaruar se, edhe pse e vlerëson, nuk është objektivi që ka në mendje, ndërsa përmendi edhe disa emra të tjerë vetëm për t’i përjashtuar.

“Lidhur me Olisen: Ai është një lojtar i shkëlqyer, por nuk është emri që po mendoj. Ai nuk është as Doku apo Haaland. Nga mesfusha”, shtoi Pérez, duke lënë të kuptohet se “bomba” e paralajmëruar vjen reparti ku ka nevojë më shumë klubi .

Në fund, Pérez përsëriti edhe mesazhin e tij në prag të zgjedhjeve, duke theksuar rolin e tij në mbrojtjen e interesave të klubit.

“Askush nuk do ta mbrojë Real Madridin më mirë se unë”, deklaroi ai.

Tashmë mbetet të shihet nëse oferta e paralajmëruar për “një ekip të nivelit të lartë të Ligës së Kampionëve” do të konkretizohet dhe cili do të jetë emri i “Galaktikut” që pritet ta tronditë tregun. /Telegrafi/

Modelja dhe ylli televiziv britanik, Katie Price, raportohet se po përpiqet të sigurojë lirimin e bashkëshortit të saj, Lee Andrews, i cili ndodhet në burg në Dubai.

Sipas raportimeve, Andrews duhet të paguajë mbi 100 mijë euro për t'u liruar nga paraburgimi.

Ai aktualisht po mbahet në burgun Al Awir në Dubai për një çështje civile private dhe jo për akuzat për spiunazh që kishte pretenduar fillimisht.

Foto: Instagram

Price udhëtoi drejt Dubait këtë javë për t'u takuar me bashkëshortin e saj dhe thuhet se ka vizituar disa herë burgun në përpjekje për të përfunduar dokumentacionin e nevojshëm për lirimin e tij.

Burime pranë saj kanë deklaruar se, pavarësisht gjithçkaje që ka ndodhur, ajo dëshiron ta ndihmojë dhe të marrë përgjigje për situatën në të cilën ai është përfshirë.

Ndërkohë, Andrews besohet se i ka garantuar Katie se do të sigurojë vetë shumën e nevojshme dhe se ajo nuk do të ketë nevojë të kontribuojë financiarisht.

Mediat britanike raportojnë gjithashtu se Andrews kishte kaluar rreth tre muaj në të njëjtin burg edhe vitin e kaluar, pasi dyshohej për mashtrim financiar lidhur me një kredi hipotekare prej rreth 230 mijë eurosh, e cila pretendohet se ishte marrë duke përdorur nënshkrimin e falsifikuar të një ish-partnereje.

Katie Price

Marrëdhënia mes çiftit ka qenë në qendër të vëmendjes që nga fillimi i këtij viti, kur ata bënë publike romancën e tyre dhe u martuan vetëm pak kohë pasi ishin njohur. /Telegrafi/

Kur Cristiano Ronaldo u largua nga futbolli evropian për t’u transferuar në Arabinë Saudite, shumë e konsideruan atë hap si sinjal se karriera e tij në kombëtare do të ftohej, me idenë se kampionati saudit nuk ishte në nivelin e kërkuar për futbollin elitar.

Mirëpo, me kalimin e kohës, Saudi Pro League jo vetëm që u mbush me yje si Neymar, Benzema, Milinkovic-Savic e Cancelo, por nisi të shihet gjithnjë e më shumë si një skenë ku lojtarët mund të jenë ende relevantë edhe për ekipet e tyre kombëtare.

Edhe pse Ronaldo deklaroi se “liga saudite është shumë më e mirë se ligat portugeze dhe franceze… në Francë gjithçka sillet rreth PSG-së”, kjo u prit me skepticizëm në Evropë.

Për një kohë, futbolli në Lindjen e Mesme u trajtua si një nivel dytësor krahasuar me pesë ligat e mëdha evropiane, duke u krijuar bindja se lojtarët që shkonin atje do ta humbnin shansin për t’u thirrur në kombëtare.

Nuk “mbyll” domosdoshmërisht derën e kombëtares

MARCA shkruan se realiteti i viteve të fundit e ka rrëzuar këtë perceptim. Në Evropë u përhap ideja se futbollistët që transferohen në Arabinë Saudite e mbyllin kapitullin me kombëtaren, por koha ka treguar se kjo nuk është bërë normë.

Si shembull përmendet deklarata e Ronald Koemanit, i cili në vitin 2024 tha se “libri i tij me ekipin kombëtar është mbyllur” për Steven Bergwijn pas kalimit të tij te Al-Ittihad.

Megjithatë, thirrjet e fundit në kombëtare për lojtarë që luajnë në SPL tregojnë se trajnerët po i vlerësojnë edhe këta futbollistë, nëse janë në formë dhe kanë rol të rëndësishëm në ekipet e tyre.

Ivan Toney dhe debatet në Angli

Rasti më i diskutuar së fundmi është ai i Ivan Toney. Sulmuesi i Al-Ahli u përfshi në skuadrën e Thomas Tuchel për Kupën e Botës 2026, duke shkaktuar debat në Angli, sidomos për faktin se u preferua ndaj disa opsioneve vendase.

“Përfshirja e tij ishte gjithashtu një surprizë për ne. Ai ka një prani të natyrshme në zonë dhe është një finalizues i natyrshëm".

"Ai është i mirë në goditjet standarde. Dhe të mos harrojmë, ai është një specialist i penalltive i klasit botëror”, deklaroi Tuchel pas shpalljes së listës.

Shembuj nga Brazili e Spanja - Franca dhe Portugalia, fenomeni merr formë

MARCA përmend edhe raste të tjera: Roger Ibáñez është ftuar nga Carlo Ancelotti për Brazilin, ndonëse deri tani kishte pasur një minutazh të kufizuar me kombëtaren.

Në Spanjë, debati u përqendrua te Aymeric Laporte (për periudhën e tij në Arabinë Saudite), ndërsa trajneri Luis de la Fuente ishte i prerë.

“Të luash në Arabinë Saudite nuk është përcaktuese. Unë preferoj një ekip që luan 90 minuta në Arabinë Saudite sesa një që luan 15 ose 20 minuta në Ligën Premier”, kishte thënë ai në vitin 2024.

Në Francë, N’Golo Kanté u rikthye dhe u përdor rregullisht edhe gjatë kohës te Al-Ittihad, ndërsa për Botërorin 2026 është përmendur edhe Theo Hernández, aktualisht pjesë e Al-Hilal.

Sipas shkrimit, fenomeni mori formë sidomos në Portugali, ku vazhdoi besimi te Cristiano Ronaldo edhe pas kalimit të tij në Arabinë Saudite.

Për më tepër, emra si João Félix (Al-Nassr), Rúben Neves dhe João Cancelo (Al-Hilal) vazhdojnë të jenë lojtarë të rëndësishëm për Roberto Martínez dhe pritet të jenë pjesë e Botërorit në SHBA, Kanada dhe Meksikë.

Lista e plotë e lojtarëve nga futbolli saudit në Botërorin 2026

Sipas listës së përmendur, në Botërorin 2026 do të ketë një numër të konsiderueshëm futbollistësh që luajnë në Arabinë Saudite dhe do të përfaqësojnë kombëtaret e tyre: Bregu i Fildishtë – Franck Kessié (Al Ahli); Franca – Theo Hernandez (Al Hilal); Brazili – Roger Ibáñez (Al Ahli) dhe Fabinho (Al Ittihad); Curaçao – Jurien Gaari (Abha Club); Portugalia – Rúben Neves (Al Hilal), João Félix (Al Nassr) dhe Cristiano Ronaldo (Al Nassr); Anglia – Ivan Toney (Al Ahli); Panama – Orlando Mosquera (Al Fayha); Maroku – Yassine Bono (Al Hilal); Senegali – Édouard Mendy (Al Ahli), Kalidou Koulibaly (Al Hilal) dhe Sadio Mané (Al Nassr); Egjipti – Nabil Dunga (Al Najma); Algjeria – Riyad Mahrez (Al Ahli) dhe Houssem Aouar (Al Ittihad); Iraku – Ali Jasim (Al Najma); Meksika – Julián Quiñones (Al Qadisiyah); Turqia – Merih Demiral (Al Ahli); Tunizia – Aymen Dahmen (Al Hazem); Uruguai – Darwin Núñez (Al Hilal); Jordania – Ali Al-Azaizeh (Al Shabab); Gana – Cristopher Bonsu Baah (Al Kadisiyah).

Në fund, mesazhi i përgjithshëm i shkrimit është i qartë: futbolli saudit po shndërrohet gjithnjë e më shumë në një “vitrinë” të rëndësishme, ku lojtarët mund të ruajnë statusin e tyre ndërkombëtar dhe të jenë pjesë e skenës më të madhe, Kupës së Botës. /Telegrafi/

Përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas, e ka anuluar shkuarjen në Mal të Zi për shkak të problemeve shëndetësore.

Ajo do të duhej të merrte pjesë në Samitin BE–Ballkani Perëndimor në Tivat, si dhe në Dialogun për politikën rinore në Budva, shkruan vijesti.me.

Sipas një bashkëpunëtori të saj të afërt, Kalas është sëmurë dhe nuk ka mundur të udhëtojë sot, shkruan vijesti.me.

Gjermania dhe Franca me “non-paper” për Ballkanin Perëndimor para samitit në Mal të Zi

Ai tha se ajo “pendohet që po e humb samitin”, se po punon nga shtëpia dhe pritet të kthehet në zyrë brenda pak ditësh.

Kalas kishte planifikuar gjithashtu të takohej me të rinj nga i gjithë rajoni dhe Evropa në Budva, si dhe të hapte Forumin e Rinisë së Ballkanit Perëndimor së bashku me kryeministrin e Malit të Zi, Milojko Spajiq.

Në mbrëmje ishte paraparë një darkë pune në Kotor, e organizuar nga presidenti i Malit të Zi, Jakov Milatoviq.

Ditën e dytë të vizitës, ajo duhej të merrte pjesë në Samitin BE–Ballkani Perëndimor në Tivat.

Samiti BE–Ballkani Perëndimor do të mbahet nesër në Tivat dhe është i organizuar nga presidenti Milatoviq. /Telegrafi/

Kandidati për Kryeministër Lumir Abdixhiku ka postuar fotografi nga tubimi në Podujevë. Ai këtë tubim e ka quajtur tërmet politik.

‘’Tërmet politik në Llap! Kryengritja e djathtë! Ju faleminderit! Në Podujevë garojmë me kandidatin Ekrem Hyseni me numër 19, kandidaten Arjeta Salihu Abazi me numër 29, kandidatin Zaim Thaçi me numër 92 dhe kandidaten Alisa Jetullahu me numër 99’, ka shkruar Abdixhiku.

Aktorja e Hollywoodit, Sharon Stone, kujtoi sulmin fizik që përjetoi 10 vjet më parë.

Gjatë një paraqitjeje në podcast-in "The Person Who Believed in Me", të drejtuar nga korrespondenti i CBS David Begnaud, Stone foli për sulmin.

"Nuk e di sa shumë mund të them për këtë, por më goditën nga pas. Nuk e dija vërtet çfarë më ndodhi. Isha pa ndjenja në dysheme. Nuk e di si arrita atje", tha ajo.

Sharon Stone

Pas kësaj, Stone shkoi te mjeku për probleme me pjesën e pasme të qafës dhe shpatullave.

"Shkova në klinikë sepse kisha shumë probleme me pjesën e pasme të qafës dhe shpatullave, të cilat më dhembnin shumë. Ata donin të më bënin një lloj injeksioni dhe më bënë të gjitha rrezet X të gjoksit, qafës dhe shpatullave. Mjeku më tha më pas se gjoksi im ishte thyer plotësisht. Ai tha se ishte e qartë se isha sulmuar dhe se ajo që më ndodhi ishte një akt kriminal", tha ajo.

Stone nuk donte t'i përgjigjej pyetjes se kush e sulmoi.

"Nuk do ta them publikisht, por ne e raportuam dhe bëmë gjithçka. Pata mundësinë të paraqes një raport dhe duke qenë se kanë kaluar 10 vjet dhe unë jam një figurë publike, vendosa të mos e bëj. Jam mjaft e sigurt se e di kush ma bëri këtë", tha ajo.

- YouTube www.youtube.com

Kur u pyet nëse besonte se sulmi ishte dhunë në familje, Stone tha se nuk lejohej të thoshte diçka. /Telegrafi/

Barcelona do të ketë një numër të madh futbollistësh të përfaqësuar në Kupën e Botës 2026, me lojtarët e skuadrës katalanase që do të mbrojnë ngjyrat e kombëtareve të tyre në turneun më prestigjioz të futbollit.

Mes tyre, pesë futbollistë pritet të përjetojnë për herë të parë emocionet e një Kampionati Botëror.

Në krye të listës është talenti spanjoll Lamine Yamal, i cili do të debutojë me Spanjën në Kupën e Botës.

Sulmuesi i ri konsiderohet një nga armët kryesore të “La Roja” dhe pritet të ketë një rol vendimtar në ambiciet e kombëtares spanjolle për të synuar trofeun.

Po ashtu, portieri Joan Garcia do të marrë pjesë për herë të parë në një Botëror, ndërsa mbrojtësi i talentuar Pau Cubarsi do të synojë të sigurojë një vend në formacionin titullar të Spanjës.

Debutim në Kupën e Botës do të ketë edhe përforcimi më i ri i Barcelonës, Anthony Gordon, i cili do të përfaqësojë Anglinë në turneun që zhvillohet këtë verë.

Ndërkohë, talenti i akademisë katalanase, Hamza Abdelkarim, do të shkruajë historinë personale duke marrë pjesë për herë të parë në një Kampionat Botëror me kombëtaren e Egjiptit.

Kupa e Botës 2026 pritet të jetë një skenë e rëndësishme për këta futbollistë të rinj, të cilët do të kenë mundësinë të dëshmojnë cilësitë e tyre në nivelin më të lartë të futbollit ndërkombëtar. /Telegrafi/

Një përleshje fizike midis dy shtetasve turq ndodhi dje në Qendrën e Pritjes së Azilkërkuesve në fshatin Vizbegovë të Shkupit, njoftoi policia.

“Më 03.06.2026 në orën 13:30, Shërbimi i Sigurisë Publike Shkup ka marrë një njoftim se në fshatin Vizbegovë, në Qendrën e Pranimit për Azilkërkues, pas një grindjeje paraprake, është prishur rendi dhe qetësia publike me një përleshje fizike midis J.B. (27) dhe A.S. (26), të dy nga Turqia. Pas dokumentimit të plotë të rastit, do të ngrihet një kallëzim përkatës”, thuhet në buletinin e policisë.

Këngëtari i njohur shqiptar, Sinan Vllasaliu, ka pësuar një aksident me motor.

Prive Klan Kosova ka mësuar se artisti ka pësuar lëndime në këmbë.

Ai aktualisht ndodhet në spital, ku i është nënshtruar një ndërhyrjeje kirurgjikale.

Foto: Instagram

Fatkeqësisht aksidenti ndodhi vetëm pak ditë pasi u zbulua se këngëtari ishte përzgjedhur të këndonte në dasmën e yllit botëror, Dua Lipa e cila do të zhvillohet në Itali.

Nuk ka informacione të tjera lidhur me gjendjen e tij dhe nuk dihet nëse i njëjti do të mund të rikuperohet për të marrë pjesë në ceremoninë e martesës së Lipës.

Ministri izraelit i Financave, Bezalel Smotrich, ka bërë deklarata të forta lidhur me politikën e vendbanimeve në Bregun Perëndimor, duke u bërë thirrje qytetarëve izraelitë të zhvendosen atje për të jetuar.

“I them popullit të Izraelit: ejani të jetoni në Bregun Perëndimor. Ka shumë arsye për të jetuar në Bregun Perëndimor”, deklaroi ai.

Sipas tij, nxitja për vendbanime të reja synon të rrisë numrin e kolonëve izraelitë në këtë territor.

Smotrich shprehu gjithashtu shpresën se kjo politikë do të ndihmojë në sjelljen e “një milion kolonëve” në Bregun Perëndimor dhe, siç u shpreh ai, “të shuhet ideja e një shteti palestinez”.

Deklaratat e tij pritet të nxisin reagime të forta ndërkombëtare, pasi çështja e vendbanimeve izraelite në territoret e pushtuara konsiderohet një nga temat më të ndjeshme dhe më të diskutueshme në konfliktin izraelito-palestinez.

Ndryshe, shumë shtete të botës tashmë kanë njohur krijimin e shtetit palestinez. /Telegrafi/

Hasi ka dhënë kontribut të veçantë në luftën për çlirimin e Kosovës nga Serbia. Çdo shtëpi hasjane kishte hapur dyert për të strehuar e ndihmuar djemtë e vajzat e Kosovës që i kishin kthyer pushkën armikut shekullor. Në ditët më të vështira që po kalonte Kosova në ’98-’99, hasjanët nga Shqipëria e Kosova u bënë bashkë për të ndihmuar njëri-tjetrin. 27 vjet pas, Hasi i bashkuar kujton 43 dëshmorët e kombit, 14 prej të cilëve ishin nga Hasi i Shqipërisë.

Në fund të viteve ’90, kufiri që ndante Hasin e Kosovës me atë të Shqipërisë u shndërrua në portën e triumfit të lirisë, për të ndihmuar vëllezërit e një kombi. Nga Hasi i Shqipërisë, që dikur ndahej me një kufi të hekurt, u rreshtuan në luftë shumë djem e vajza. Afërdita, nga Shqipëria, nusja e Besmir Bratit, motra e Naim Qemës, ruan të pacenuar kujtimin për burrin dhe të vëllanë, që i ranë në fushën e nderit në të njëjtën ditë.

“Që ditën që ka fillu lufta e Kosovës, shumë, të gjithë pa përjashtim iu bashkangjitën UÇK-së. Shumë keqardhje, e ndjeshim sikur lufta është si për ju në Kosovë, si për ne në Shqipëri”, tha Afërdita Brati, bashkëshortja e dëshmorit Besmir Brati.

Bashkëshortja e Gaspër Karaqit e kishte ndjerë vdekjen e bashkëshortit.

“E kam parandjerë, të mërkurën në mbrëmje e kam parandjerë, të enjten ka shku në shkollë, dhe prej atij momenti nuk kam qenë e qetë. Dy ditë pas është gjet i vdekur, shumë vështirë, shumë”, tha Bora Karaqi, bashkëshortja e dëshmorit Gazpër Karaqi.

“Gëzohem se e shoh të lirë, e shoh lirinë, pavarësinë e shoh, shoh se po shkon gjithçka përpara, por pengu jonë, na mungojnë si burri dhe vëllai, sepse i kam rrit tre fëmijë jetimë, një nënë 25 vjeçe”, tha Afërdita Brati, bashkëshortja e dëshmorit Besmir Brati.

Pas 27 vjetësh, kur Hasi tashmë ishte bashkuar, kufijtë mes shtetit shqiptar kishin rënë, por Porta e Lirisë, me emrat e 43 bijve hasjanë, do të qëndrojë këtu krenare, që t’u tregojë brezave se liria nuk erdhi lehtë.

“Hasi e ka vendos me një kryesi shumë të sinqertë që me këtë datë 4 qershor të respektohen të gjithë dëshmorët e Hasit njëjtë, ta kemi një datë dhe të vendosim një lule të përbashkët të gjithë njëjtë”, tha Xhevdet Thaçi, kryetar i OVL-së në Has.

Dëshmorët i nderuan bashkë familjarë të dëshmorëve, si dhe organizata të dala nga lufta, ndërsa familjet e dëshmorëve nga Shqipëria morën nga një kujtim nga ky përvjetor, një flamur kombëtar dhe mirënjohje pa fund.