Transporti në vendin tonë pritet të pësojë një transformim në vitet e ardhshme, çka do të ndikojë edhe në reduktimin e emetimeve të gazeve me efekt serrë dhe përshtatjen ndaj ndryshimeve klimatike.

Sipas Raportit të Gjendjes në Mjedis, i publikuar nga Agjencia Kombëtare e Mjedisit, deri në vitin 2030, rreth 30% e transportit rrugor do të transferohet drejt hekurudhës, duke lehtësuar ndjeshëm ngarkesën në rrugë dhe duke ulur ndotjen e ajrit.

Aktualisht, transporti rrugor konsiderohet ndër kontribuesit kryesorë të ndotjes së ajrit dhe të emetimeve të CO2 në vend, teksa nisja e funksionimit të trenave shihet si një nga masat më të rëndësishme për reduktimin e konsumit të lëndëve djegëse fosile, që janë karburantet.

Ndërkaq, parashikimi që rreth 30% e transportit rrugor të zhvendoset në hekurudhë lidhet ngushtë me përfundimin e disa prej projekteve më të rëndësishme hekurudhore në vend, si linja Tiranë – Durrës – Rinas dhe Vorë – Hani i Hotit.

Sipas afateve tw bwra publike, projekti për ndërtimin e linjës Vorë – Hani Hotit pritet të përfundojë pikërisht në vitin 2030, teksa aktualisht është në fazë tenderimi për përzgjedhjen e kompanisë që do kryejë punimet.

Ndërkohë linja Tiranë – Durrës – Rinas është më e avancuar, por afati për përfundimin e plotë është shtyrë disa herë. Së fundmi u bë me dije se trenat për këtë linjë hekurudhore parashikohet të vijnë në 3-mujorin e parë të vitit 2027.

Përveç përfitimeve mjedisore, zhvendosja drejt transportit hekurudhor pritet të sjellë edhe rritje të sigurisë rrugore, kursime ekonomike dhe lehtësi në lëvizjen e mallrave dhe qytetarëve./kb

Katër muaj pas përfundimit të zgjedhjeve të 11 majit, e ngarkuara me punë e SHBA-së, Nancy Vanhorn ka shkuar paraditen e së premtes në kryeministri. Diplomatja amerikane qëndroi në godinën qeveritare përreth 20 minuta.

Vizita e saj vjen një ditë pasi Komisioni Rregullator shpalli rezultatin përfundimtar të zgjedhjeve duke certifikuar 11 majin.

Vizita vjen gjithashtu në një kohë kur Rama pritet që të shpallë kabinetin e ri qeveritar. 11 shtatori përflitet si datë për mbajtjen e Asamblesë së PS-së, ku pritet të njoftohen emrat e rinj të qeverisë./kb

Inspektoriati Kombëtar i Mbrojtjes së Territorit ka shembur edhe 19 objekte të tjera pa leje në zonën e Kepit të Rodonit, duke e çuar në 41 numrin total të objekteve të rrafshuara deri tani.

“Kepi i Rodonit, Durrës | IKMT vijon aksionin për shembjen e objekteve pa leje në zonën e mbrojtur. Gjatë ditës së sotme janë prishur 19 ndërtime të paligjshme, duke çuar totalin në 41 objekte të shembura.

Puna në terren vazhdon në bashkëpunim me Policinë e Shtetit, për pastrimin e plotë të territorit dhe mbrojtjen e vijës bregdetare”, thuhet në njoftimin e Inspektoriatit Kombëtar të Mbrojtjes së Territorit.

Prej vitesh tashmë i larguar nga politika aktive, por jo nga ajo publike dhe akademike.

Ish-kreu i diplomacisë shqiptare në qeverinë “Rama”, Ditmir Bushati ka pranuar ofertën e Universitetit të Harvardit që është universiteti më i vjetër në SHBA dhe vlerësohet si një nga më prestigjiozët në botë.

Lajmin e bën me dije vetë Bushati në faqen e tij zyrtare në rrjetin social “Facebook”, ku shprehet se do t’i bashkohet Qendrës për Marrëdhënie Ndërkombëtare të Universitetit të Harvardit të paktën për këtë vit akademik.

Universiteti i Harvardit ???????? është fuqia e mendimit dhe zemra e ideve novatore ????????????

Kam patur fatin të jem dy herë në Harvard. Si ministër, ku kam mbajtur një fjalë me studentët për sfidat me të cilat ndeshet Europa Juglindore, dhe më herët si pjesëmarrës i një programi ekzekutiv për negociatat.

Është nder dhe kënaqësi për mua, që kësaj radhe t’i bashkohem Qendrës për Marrëdhënie Ndërkombëtare të Universitetit të Harvardit për këtë vit akademik, duke u angazhuar në projekte kërkimore dhe në një cikël leksionesh me studentë, pedagogë dhe studiues, mbi rolin e marrëdhënieve SHBA-BE në konsolidimin e paqes dhe prosperitetit në Europën Juglindore.

Qendra për Marrëdhënie Ndërkombëtare, e themeluar në 1958 nga Henry Kissinger dhe Robert Boëie, është institucioni më i madh i kërkimit në Universitetin e Harvardit lidhur me marrëdhëniet ndërkombëtare.

Ajo është pikë takimi e akademikëve dhe njerëzve të praktikës nga e gjithë bota, duke pasqyruar në këtë mënyrë një angazhim të hershëm për të lidhur në jetë studimet me praktikën. Kësisoj, e konsideroj një eksperiencë të vyer pasi jo vetëm do të kem mundësi të kontribuoj bazuar në përvojën time, por edhe të mësoj nga të tjerët.

Rendi ndërkombëtar i bazuar në rregulla ka pësuar goditje të fortë si pasojë e agresionit rus në Ukrainë dhe konfliktit të ripërtërirë në Lindjen e Mesme.

Për rajonin tonë, pasojat janë të qarta, duke pasur parasysh afërsinë gjeografike dhe çështjet e pazgjidhura të shtetësisë.

Mirëpo momenti aktual është tejet sfidues pasi ekspozon një hendek: nevoja për bashkërendim SHBA-BE në rajonin tonë vijon të jetë e madhe, ndërkohë që hapësira për bashkëpunim mes tyre duket se po ngushtohet.

Ndaj është e rëndësishme të shqyrtohen politikat, instrumentet dhe modelet e bashkëpunimit SHBA-BE në Europën Juglindore, në funksion të një agjende transformuese dhe konsolidimit të projektit europian të rajonit./kb

Rreth 33% e shqiptarëve e konsiderojnë emigrimin përkohësisht ose përgjithmonë brenda dhjetë viteve të ardhshme, ndërsa 10 për qind e tyre synojnë largimin brenda vitit.

Këto ishin rezultatet e anketës që zhvilloi në nëntor të vitit 2024 Banka Qendrore e Austrisë në vendet e Europës, Qendrore, Juglindore dhe Lindore CESEE (Bullgari, Çeki, Hungari, Poloni, Rumani, Shqipëri, Bosnjë, Maqedonia e Veriut dhe Serbi).

Anketa që kishte si qëllim përdorimin e euros në këto vende, përfshiu edhe pyetjet për emigracionin. Rezultatet treguan se Shqipëria mbetet vendi me përqindjen më të lartë të qytetarëve me synime për emigrim në rajon. Anketa “Euro e OeNB 2024” tregon se, megjithëse dëshira për të emigruar është në rënie në shumicën e vendeve të rajonit, Shqipëria vazhdon të qëndrojë ndër vendet me përqindjen më të lartë të popullsisë që synon largimin.

Rreth 10% e shqiptarëve shprehin synimin për të emigruar brenda 12 muajve të ardhshëm, duke e renditur Shqipërinë ndër vendet me shkallën më të lartë të migrimit të mundshëm, së bashku me Maqedoninë e Veriut (11%). Pas tyre renditen Serbia, Rumania, Bosnja dhe Hercegovina, Bullgaria dhe Polonia, ku shifrat luhaten mes 2% dhe 5%. Hungaria dhe Çekia kanë përqindjet më të ulëta, nën 2%.

Në përgjithësi, dëshira për emigrim ka ardhur duke rënë në rajon, por Shqipëria mbetet një përjashtim. Në vitin 2019, para pandemisë COVID-19, 7% e qytetarëve të vendeve të anketuara deklaronin se kishin ndërmend të largoheshin brenda një viti. Në vitin 2021, gjatë pandemisë, kjo shifër ra në 5%, ndërsa në 2024 zbriti më tej në 4.5%. Ky trend shihet si pozitiv për shumicën e vendeve të CESEE, pasi emigracioni masiv ka thelluar problemet demografike dhe ka sjellë vështirësi në tregun e punës.

Në Shqipëri trendi nuk ka ndryshuar shumë. Përveç synimeve për emigrim në periudhën afatshkurtër, të dhënat e anketës tregojnë se 33% e shqiptarëve e konsiderojnë të mundshme emigrimin përkohësisht ose përgjithmonë brenda dhjetë viteve të ardhshme.

Ky është niveli më i lartë në rajon, ndërkohë që në Çeki dhe Hungari kjo shifër është vetëm 7%.

Shumica e njerëzve deklarojnë se duan të emigrojnë për arsye të lidhura me punësimin, rreth 46% mesatarisht në të gjitha vendet e anketuara. Arsyeja e dytë më e rëndësishme është kërkimi i kushteve më të mira të jetesës jashtë vendit.

Të dhënat e vitit 2024 tregojnë gjithashtu se Shqipëria ka një përqindje shumë të lartë të qytetarëve që kanë jetuar më parë jashtë vendit. Sipas raportit, 28% e popullsisë shqiptare deklaron se ka pasur një periudhë emigrimi, duke e renditur vendin tonë ndër më të prekurit në rajon.

Mesatarja për vendet e CESEE është 14%, ndërsa Hungaria ka përqindjen më të ulët me vetëm 7%. Në shumicën e vendeve të tjera, përqindja e personave që kanë jetuar jashtë varion nga 11% deri në 16%.

Studimi tregon se qëndrimet afatshkurtra, pra më pak se një vit, janë më të zakonshmet dhe përbëjnë rreth 35% të të gjitha rasteve. Megjithatë, Shqipëria shfaqet më afër vendeve me qëndrime më të gjata.

Në Bosnjë dhe Hercegovinë, rreth 50% e emigrantëve të rikthyer kanë qëndruar më shumë se tre vjet jashtë vendit. Pas Bosnjës, renditen Bullgaria, Shqipëria dhe Serbia, ku rreth 40% e emigrantëve të rikthyer kanë pasur një emigracion afatgjatë./ Monitor/kb

Komisioni Rregullator do t’i vendosë sot ‘kapak’ përfundimisht rezultatit të zgjedhjeve të 11 majit. Gjatë mbledhjes që do të nisë në orën 11:30, Komisioni do të miratojë numrin e votave, të mandateve dhe listave emërore për çdo subjekt zgjedhor për çdo zonë zgjedhore dhe në rang vendi.

Pas miratimit të rezultatit zgjedhor, do të jetë presidenti Bajram Begaj, i cili do të dekretojë fillimin e legjislaturës së 11-të brenda 10 ditëve nga përfundimi i Kuvendit të vjetër. Pritet mbledhja e parë të Kuvendit të ri, e cila do të shënojë edhe fillimin zyrtar të legjislaturës së re për katër vitet e ardhshme.
Nga zgjedhjet e 11 majit, Partia Socialiste mori 83 mandate, Partia Demokratike-Aleanca për Shqipërinë Madhështore 50 mandate. Partia Socialdemokrate tre deputetë, Mundësia dy, ndërsa Lëvizja Bashkë dhe Nisma Shqipëria Bëhet nga një mandat/kb

Nga Teseo La Marca, DIE WELT

Katër orë në një rrugë me gropa që duken si kratere nga granatat. Asfalt ose është i pabarabartë, ose nuk ka fare. Gurë dhe degë që përplasen kërcënueshëm mbi karroceri. Tundimi për të hequr dorë dhe për t’u kthyer mbrapsht është i madh. Dhe pastaj papritur: asfalt superthithës i gjeneratës më të re, i shtruar dhe i shënuar në mënyrë perfekte. Marr frymë thellë dhe shtyp pedalin e gazit.

Asnjë makinë tjetër nuk ka arritur deri këtu, kemi gjithë autostradën vetëm për vete. A është kjo një dhuratë nga qielli? Apo thjesht vepër e ndonjë nëpunësi të korruptuar që ka zhdukur ndonjë fond? Pas disa minutash vjen përgjigjja: autostrada përfundon papritur dhe pa asnjë paralajmërim në një shteg të paasfaltuar, i ndërprerë nga dhjetëra kanione të vegjël që i ka krijuar shiu i fundit i rrëmbyeshëm. Arrijmë të bëjmë frenim emergjent fiks në kohë.

Gropa në rrugë dhe një rrugë shtetërore e regjistruar gabimisht në Google Maps: këto gjëra duhet të marrësh në konsideratë nëse nisesh për një udhëtim rrugor në Shqipëri. Megjithatë, ia vlen të eksplorosh këtë shtet të vogël ballkanik me makinë, që nuk është as sa madhësia e Brandenburgut. Një vend xhuxh, por që ofron gjithçka: nga plazhet me rërë në Adriatik deri te malet e larta alpine, nga kisha ortodokse te xhamitë osmane.

Një makinë me qira mund ta marrësh në Shqipëri lehtë dhe relativisht lirë. Për më tepër, shumë shqiptarë që punojnë në hotele dhe lokale flasin gjermanisht, italisht apo anglisht. Kush është i gatshëm të përballet me trafikun kaotik të qyteteve si Tirana apo Durrësi dhe me rrugët me gropa në zonat rurale, do të shpërblehet me zemërgjerësi: me fshatra piktoreske, brigje të thepisura marramendëse dhe pamje mahnitëse të Rivierës Shqiptare. Gjatë rrugës, ka pafundësisht mundësi për të zgjeruar horizontin.

Mësimi 1: Mos u mbështet te Google Maps

Rrugët e këqija të Shqipërisë nuk vijnë krejt nga hiçi. Vendi ka një histori të trazuar dhe pjesërisht tragjike në të kaluarën e afërt. Kur diktatura staliniste e Enver Hoxhës u shemb në vitin 1990, vendi mesdhetar u zhyt në një kaos pothuajse si i një lufte civile, nga i cili u rimëkëmb ngadalë.

Sot, Shqipëria është një shtet kandidat për në BE, ku përparimi i vrullshëm përplaset pa kompromis me kushte paraindustriale. Kështu ndodh që rrugë të asfaltuara mirë ende nuk ekzistojnë në Google Maps, ndërsa, nga ana tjetër, shtigje mushkash ndonjëherë janë shënuar si autostrada. Megjithatë, turizmi është rritur ndjeshëm vitet e fundit. Edhe pse marketingu profesional i destinacioneve është ende në ndërtim e sipër, vendi është shndërruar – falë fjalës së mirë që përhapet gojë më gojë – në një këshillë pushimi që nuk është më aq sekret. Përveç peizazhit, udhëtarët entuziazmohen nga çmimet e lira dhe mikpritja thuajse pa kufij e shqiptarëve.

Kështu ia bëra tërheqës destinacionin e udhëtimit edhe gruas sime. Me traget për ne rruga fillon nga Italia, përtej Adriatikut, drejt Durrësit; atje marrim me qira një makinë dhe duam të eksplorojmë jugun e vendit. Destinacioni i parë është Berati, një qytet me arkitekturë osmane, pastaj rruga na çon përgjatë Vjosës (lumi i fundit i madh i egër në Evropë) deri te burimet termale në Përmet. Prej andej mbeten vetëm disa qafa malore për të mbërritur te bregu i thepisur i Rivierës Shqiptare me plazhet e saj të gjata.

Për të ecur përpara, nuk duhet të mbështetesh vetëm te hartat digjitale, por herë pas here edhe te këshilla e vendasve.

Mësimi 2: Makina e shtrenjtë – temë e ndjeshme

Mjeti ynë për udhëtim është një Citroën C1 i vogël, i kuq. Me të bie paksa në sy në qytetet shqiptare – si një i varfër. Në rrugën drejt Beratit të dalin përpara thuajse vetëm SUV luksozë të lëmuar. Markat gjermane si Mercedes, BMW dhe Audi janë veçanërisht të pëlqyera. Ndërsa në fshat has ende shumë “kazanë” të vjetër.

Makina e bosëve krijojnë një kontrast të çuditshëm me fasadat e rrënuara të shtëpive që qëndrojnë të shpërndara nëpër peizazh. Shqipëria, me një prodhim të brendshëm bruto për frymë rreth 10.000 dollarë amerikanë, është ndër vendet më të varfra të Evropës; 4,5 përqind e popullsisë është e kequshqyer, ndërsa shumë shtëpi mbeten skelete të papërfunduara për mungesë parash. Nga vjen, pra, kjo “begati makinash”?

Kush mund ta dijë më mirë sesa ata që xhirojnë me këto makina luksoze rreth e rrotull? Nga një BMW X5 i bardhë para nesh zbresin tre të rinj me shpatulla të gjera dhe nofulla të forta. Shoferi nuk e merr me humor pyetjen time disi të turpshme:

“Shiko rrugët. Duhet të kesh makina të mëdha e të forta.”

Një argument bindës. Dhe duke parë shtatin e tyre e shikimet e ashpra, pyetje të tjera nuk kishin më vend.

Mësimi 3: Mos ofro autostop natën

Është mbrëmje, jemi afër Beratit dhe e kuptojmë se ka njerëz për të cilët rrugët e këqija ndoshta janë edhe një përparësi. Sa më shumë errësohet, aq më shumë shfaqen ata në dritën e fenerëve. Të përkulur e të vetmuar ecin përgjatë rrugës – ndonjëherë gra, por më së shumti burra të moshuar, të tharë nga jeta. Nga vijnë dhe ku shkojnë, nuk di ta shpjegojë as plaku pranë të cilit më në fund ndalojmë, për t’i ofruar një vend në makinë. Dikur edhe unë kam udhëtuar me autostop dhe e di se sa mirë bën kur të marrin disa kilometra rrugë me vete.

Na duhet pak kohë derisa në hartë të gjejmë një vend që tingëllon si fjala që plaku, me xhaketën e grisur, përsërit vazhdimisht. Një gisht i ngritur, një buzëqeshje – kështu funksionon komunikimi në raste të tilla. Që plaku nuk flet shumë, nuk është keq, sepse ka një erë të tmerrshme alkooli.

Në vendmbërritje, plaku falënderon. Sërish një re fryme që përzien birrën me verën. Pastaj ai tërheq e shtyn fort dorezën e derës, përpiqet kot ta hapë. Vetëm kur diçka kërcet, më kujtohet se duhet të jetë aktivizuar mbrojtja e fëmijëve. Dal jashtë dhe i hap derën plakut.

Ai falënderon edhe një herë, pastaj largohet duke çaluar shpejt. Në tapetin e këmbëve lë pas dorezën e këputur të derës. Lamtumirë, garanci e makinës me qira.

Mësimi 4: Enver Hoxha? Njeri i mirë

Tomori, mikpritësi ynë në Berat, e ka më mirë. “Janë ata krejt të varfrit që ende ecin më këmbë nga një fshat në tjetrin,” na thotë ai, “njerëz të moshuar si unë, me pension rreth 200 euro në muaj.” Fati i tij është që ka një shtëpi të hijshme në qendrën historike të Beratit. Sot aty jep dhoma me qira për turistë. Me ato para ka blerë një biçikletë dhe i ka financuar djalit studimet në Tiranë.

“Edhe unë do të kisha dashur të udhëtoja gjatë jetës sime,” thotë Tomori nga tarraca e tij me pamje nga qendra e Beratit. Për shkak të shtëpive karakteristike të bardha me shumë dritare të vendosura simetrikisht, Berati quhet edhe “Qyteti i një mijë dritareve.”

Tomori do të kishte dashur të shihte Italinë, ose SHBA-të, shton ai. Por për shkak të kostove kjo ishte e pamundur. Dikur, nën diktaturën e Enver Hoxhës, ishte radioja ajo që ia ushqente kureshtjen për botën e madhe. Në fshehtësi, në dhomën e tij, dëgjonte stacionet italiane; i donte shumë këngët e Adriano Celentano-s dhe Caterina Caselli-t.

Ai flet rrjedhshëm italisht. “Por atëherë ruhesha që askush të mos e kuptonte,” tregon Tomori. Po të kishin marrë vesh njerëzit e gabuar që ai dëgjonte radio italiane, do ta kishin arrestuar si spiun.

Megjithatë, Enver Hoxhën, diktatorin paranojak të asaj kohe, ai prapë e quan njeri të mirë. Në socializëm, të paktën secili kishte një jetë të siguruar; djali i tij nuk do të ishte dashur të largohej. As drogë e as kriminalitet nuk kishte atëherë.

Sot, përkundrazi, këto janë. Prandaj për Tomorin edhe puna me makinat e bosëve është e qartë: “Të gjithë këta djem të rinj me fuoristrada të shtrenjta – ç’mendoni ju, nga e kanë gjithë këtë para? Të gjithë flenë me armën nën jastëk.” Për të, biçikleta mbetet më e dashur.

Mësimi 5: Edhe makinat e vjetra vlejnë si simbole statusi

Nga Berati udhëtimi vazhdon drejt maleve të egra të Përmetit, ku këmbët e lodhura nga udhëtimi i gjatë çlodhen sërish në ujin termal të burimeve të Bënjës, me temperaturë 25 deri në 30 gradë. Në sfond qëndron ura prej guri me harqe e Urës së Katiut nga shekulli XVIII, që të jep ndjesinë e një udhëtimi në kohë.

Shpejt malet e ashpra zëvendësohen nga kodrat bukolike. Rruga nga Përmeti deri në Adriatik kalon pranë tufave të deleve dhe mureve të vjetra prej guri. Interesante është se, sa më thellë futesh në provincën shqiptare, aq më pak shihen fuoristrada. Dhe megjithatë, këtu do të duhej të ishin më të nevojshëm. Në vend të tyre, has njerëz mbi gomerë ose mbi traktorë të vjetër që kollotisin e tymosin.

Nëse pyet njerëzit e thjeshtë këtu, secili ka teorinë e vet për prejardhjen e makinave luksoze. Disa, si Tomori, e lidhin me tregtinë e drogës; të tjerë flasin për korrupsion. Dhe ai, thonë, e ka qendrën larg, në kryeqytet.

E vetmja gjë e padiskutueshme është se makinat në shoqërinë shqiptare kanë një rëndësi të jashtëzakonshme. Edhe kush vozit një Mercedes-Benz të vjetër e të gërvishtur, e mban atë gjithnjë të shndritshëm. Thuajse në çdo oborr, në çdo parking gjenden lavazhe të vegjël.

Një pronar i një lavazhi të tillë e shpjegon kështu dashurinë e shqiptarëve për makinën: “Një veturë është për shumë shqiptarë pasuria më e rëndësishme. Ata punojnë jashtë, jetojnë herë këtu, herë atje. Shtëpia mbetet dytësore, makina bëhet edhe më e rëndësishme.” Dhe kjo është e kuptueshme: Shqipëria është një vend tipik emigracioni – dërgesat e shqiptarëve të diasporës drejt atdheut janë të pazëvendësueshme për ekonominë. Në një vend ku jeta e mirë ka varur prej dekadash nga sa i lëvizshëm je, automobili merr pashmangshëm një kuptim të veçantë.

Mësimi 6: Ki besim te mikpritja

Në fund të udhëtimit tonë rrugor na ndodh megjithatë të hasim në një kontroll policie. Është pasdite vonë dhe dritat tona nuk ishin ndezur. “Your driving license”, thotë polici nga dritarja e hapur, kur kupton që unë nuk flas shqip. Më kap ankthi. Patentën time italiane e kisha humbur pak para këtij udhëtimi, ndaj kam vetëm një leje të përkohshme drejtimi italiane, që këtu nuk ka asnjë vlefshmëri. Polici më shikon me vëmendje. “Tourist?” Pyet. Unë tund kokën. “You can go.”

Ja ku ishte sërish ajo mikpritje legjendare shqiptare. Edhe këtë herë na shpëtoi. Për të, për peizazhin dhe për kuzhinën e nënvlerësuar shqiptare ia ka vlejtur pa dyshim ky udhëtim.

Megjithatë, policia nuk i kursen vetëm turistët. Pavarësisht kontrolleve të shpeshta në rrugë, nuk pamë asnjë fuoristradë të ndaluar; gjithmonë ishin makinat e vogla si e jona. Dhe nuk është për t’ua marrë për keq. Unë, si turist i paditur, mund të bëja pyetje naive e prapë pronarët e fuoristradave të më linin rehat – këtë e kërkon mikpritja shqiptare. Por për policët vendas nuk do të ishte kaq e lehtë të dilnin pa pasoja./kb

Qeveria shqiptare ka shpërblyer sot forcat e angazhuara në përballimin e zjarreve masive që kanë përfshirë vendin gjatë muajve të fundit.

Kryeministri Edi Rama vlerësoi punën e ushtarakëve, punonjësve civilë dhe personelit mjekësor, duke e cilësuar situatën si një “kronikë dramatike, por me nota përkushtimi”.

Ai shprehu mirënjohjen ndaj të gjithë atyre që, me guxim dhe sakrificë, luftuan me flakët për të mbrojtur jetën, pronën dhe natyrën shqiptare.

“Të nderuar ushtarakë, civilë dhe mjekë. Jemi sot këtu për të shprehur mirënjohjen dhe për t’u përulur me respekt përpara jush dhe gjithë asaj që ju përfaqësoni. Beteja e zjarrit që përfshiu sipërfaqe të konsiderueshme muajt e fundit, ishte një kronikë plagësh, ethesh dhe dhimbjesh. Ishte një kronikë dramatike, por me nota përkushtimi”, tha kryeministri Rama./kb

Ky fund gushti do të jetë intensiv në Kryeministri. Kreu i qeverisë Edi Rama, do të presë deri në datën 30 gusht ministra, por edhe eksponentë të Partisë Socialiste në disa takime të ndryshme.

Kujtojmë se më 30 gusht, kryeministri Rama do të niset për në Slloveni ku do të marrë pjesë në samitin e Bledit.

Gjithsesi, takimet do të vijojnë edhe sot, 27 gusht.

Sipas mediave, dita ka nisur më qetë për shkak të axhendës së kryeministrit.

Pas ceremonisë pritet që në zyrën e tij të ketë takime të tjera nga ministra dhe eksponentë të PS-së. Takimet janë fokusuar në projekte të ndryshme, ato që janë lënë përgjysmë apo nisma të reja që do të ndërmerren në legjislaturën e ardhshme/kb

Pas shpalljes se vakances dhe rivleresimit ne njesite administrative dhe njesite e Bashkise Elbasan, u zhvilluan testime dhe konsultime të vazhdueshme per pergjedhjen e administratratoreve te rinj. Është vënë re një interes i madh, sidomos nga të rinjtë, për tu bërë pjesë e këtij procesi i cili u zhvillua me korrektësi dhe transparencë ku të gjithë aplikantët u testuan me shkrim, por edhe në aftësitë e tyre komunikuese dhe punën në ekip.

Pas përfundimit të procesit Bashkia e Elbasanit ka përzgjedhur administratorët e 17 Njësive Administrative, me përjashtim të Rajonit nr. 4 në qytet ku ende nuk ka rezultuar asnjë fitues, në të gjithë njësitë e tjera janë shpallur administratorët e rinj, apo ata që u rizgjodhën.

Sa më sipër, në Rajonin nr. 1 te Qytetit është riemëruar Andromeda Poloska e cila prej pak kohësh ishte vendosur në këtë detyrë dhe u bë pjesë e konkursit për të riqëndruar.

Në Rajonin nr. 2 largohet Elsid Zyma dhe në vend të tij është emëruar znj. Eltjona Kolla.

Në Rajonin nr. 3  është rizgjedhur Fatjon Hasalla.

Në njësinë nr. 5 largohet Dritan Pisha dhe në vend të tij emërohet Agron Lulaj.

Në njësinë nr. 6 largohet Gëzim Keci dhe emërohet Luan Rama.

Në Funar Oltion Haka largohet ndërsa vendin e tij, për t’u shërbyer banorëve dhe për të nxitur zhvillimin e mëtejshëm turistik, e merr Fisnik Bozha.

Në Gracen largohet Fadil Salla ndërsa emërohet Detin Haka.

Pas një pune disa vjeçare me përkushtim në shërbim të komunitetit, pavarësisht sfidave të mëdha, në Bradashesh largohet Andi Lici dhe emërohet Edmond Muça.

Gjergjani dhe Shirgjani janë dy zonat më të mëdha bujqësore të cilat kanë marrë zhvillim shumë të madh vitet e fundit, falë investimeve të Bashkisë Elbasan, por edhe përçimit të zërit të banorëve nga ana e administratorëve, respektivisht Resul Hoxha dhe Ylli Dushku të cilët largohen dhe në vend të tyre për të vazhduar këtë mision vijnë Alfred Mukja dhe Ibrahim Roçi.

Tregani me natyrën e tij fantastike dhe ujërat termalë është përtej një njësie administrative të Elbasanit, por është shtëpia e mijëra turistëve që e vizitojnë çdo vit. Banorët, e po njësoj turistët, e kësaj zone kanë gjetur përherë të hapur derën e Manjola Rexhepit për çdo problematikë të tyre, dhe me të njëjtin përkushtim këtë detyrë do ta vijojë Mërkur Kaçi.

Në Shushicë largohet Gëzim Ruda dhe emërohet Sokol Sinani i cili angazhohet të punojë më fort për zhvillimin turistik të kësaj zone, pa lënë pas dore problematikat e komunitetit.

Në njesinë administrative Labinot Fushë, pas punës së mirë të bere nga Jonuz Qosja ne detyren e administratorit shpallet fitues Islam Kaculi.

Në Papër, Gjinar, Zavalinë dhe Labinot Mal, kanë rezultuar fitues administratorët aktualë të cilët detyrën e kishin marrë prej pak kohësh dhe kërkojnë ende kohë për të plotësuar misionin e tyre.

Përkatësisht në këto zona do të administrojnë Arjan Vrapi, Emanuel Hida, Ervis Dedja, Ylber Kuçi.

Gjatë një takimi me kryetarin e Bashkisë Z. Gledian Llatja, administratorët edhe një herë morën porosi për të qenë në shërbim të komunitetit, zëri i çdo banori në zgjidhjen e problematikave aty ku është e mundur dhe adresimi në raste të tjera.

Sipas Z. Llatja, administratorët janë 18 sy e veshë më shumë për të qenë pranë çdo zone ashtu si komuniteti meriton të trajtohet, me përkushtim dhe dinjitet.

Llatja edhe një herë kujtoi administratorët e rinj se zyrat e njësive duhet të qëndrojnë hapur dhe të asistojnë çdo qytetar në aksesin në portalin qeveritar e-albania. Po ashtu, në fshatra fokus duhet ketë gjithashtu asistenca ndaj fermerëve për përfitimin nga fondet e AZHBR. /kb

Universitetet publike në mbarë vendin kanë shpallur listën e kandidatëve fitues të raundit të parë për pranimin në institucionet e arsimit të lartë.

Ky vit ka shënuar një numër më të lartë aplikantësh, nga 19.700 që ishte një vit më parë në 20.200.

Drejtori i Rrjetit Akademik Shqiptar, Arjan Xhelaj, flet për degët më të kërkuara, të cilat arrijnë t’i plotësojnë kuotat që prej fillimit.

“Inxhinieritë dhe IT-ja kanë mbi 30% të aplikimeve. Interesi në rritje në IT bën të mundur që edhe degët e tjera, që deri dje mund të quheshin të rrezikuara, si matematika, fizika ose degë të tjera, tashmë të preferohen, sepse nëse nuk arrin të kapësh IT-në të paktën mund të regjistrohesh në këto degë, të cilat krijojnë një bazë të fortë për të vijuar nesër-pasnesër në ciklin e dytë me një Master në fushën e Teknologjisë dhe Informacionit. Programet profesionale mbeten të kërkuara. Ato e kanë kaluar markën e 10-përqindëshit dhe besoj se gjatë ciklit të dytë do të kemi një rritje, duke pasur parasysh që kemi një numër të lartë maturantësh të cilët nuk e kapin mesataren 6,5. Është një grupim maturantësh që është i detyruar të studiojë këto degë profesionale,” shprehet z. Xhelaj./kb

Ka marrë fund kriza institucionale në Kosovë. Pas 57 seancave të dështuara, deputetët kanë votuar për konstituimin e Kuvendit të Kosovës, duke ia besuar detyrën deputetit të Vetëvendosjes, Dimal Basha.

73 deputetë kanë votuar pro kandidaturës së Bashës. Pro Dimal Bashës kanë votuar deputetët e grupit parlamentar të PDK-së, përveç tre figurave: Ganimete Musliu, Nait Hasani dhe Fadil Demaku.

Pro votuan edhe depuetët e AAK-së, Daut Haradinaj, Lahi Brahimaj, Bekë Berisha, por edhe Arben Gashi nga radhët e LDK-së.

Gjashtë muaj pas zgjedhjeve të 9 shkurtit, Kosova do të ketë një Kuvend funksional, duke i hapur rrugën edhe përpjekjeve për formimin e qeverisë së re.

Dimal Basha ishte kandidati i pestë i propozuar nga radhët e Vetëvendosjes, pas Albulena Haxhiu, Donika Gërvalla, Hekuran Murati e Arbërie Nagavci.

Asnjëri prej katër kandidatëve të mëparshëm nuk arriti të marrë më shumë se 57 vota për kryetar të Kuvendit.

Pika e radhës është zgjedhja e pesë nënkryetarëve para se Kuvendi të konsiderohet i konstituuar dhe të fillojë të rrjedhë afati për votimin e qeverisë.

Kuvendi pas fjalës së Dimal Bashës shkoi në pushim njëorëshe, ndërsa punimet do të rifillojnë në orën 12:30/kb

Kryeministri Edi Rama ka ndarë pamje nga prishja e një godine pa leje në Kepin e Rodonit. Rama shkruan se aksioni për prishjen e objekteve pa leje dhe lirimin e hapësirave publike s’do të ndalet deri ne eliminimin e këtij fenomeni.

“Shembja e objekteve të paligjshme, e cila ka nisur kudo, nuk është një aksion, po një proces që jo vetëm s’do të ndalet deri në eliminimin e këtij fenomeni, por edhe do të shoqërohet ditët në vijim me paketën e re të masave për tkurrjen e këtij fenomeni, duke rritur forcën goditëse të ligjit mbi fajtorët dhe personat përgjegjës të nivele të ndryshme, përfshirë edhe “symbyllurit” në inspektoriate, polici e me radhë.

Këto pamje janë nga operacioni i nisur sot në Kepin e Rodonit, Bashkia Durrës, ku një tjetër mrekulli e natyrës është abuzuar për qëllime fitimi nga ndërtime të paligjshme”, shkruan Rama./kb

Kryeministri Edi Rama është rikthyer këtë të hënë në zyrën e tij në Tiranë, pas tre javësh pushimi në vilën qeveritare në Dhërmi.

Kreu i qeverisë duket i veshur sportiv, me rroba të zeza, teksa hyn në godinën e Kryeministrisë.

Në ditët në vijim, Partia Socialiste pritet të mbledhë Asamblenë Kombëtare, ku Rama do të prezantojë përbërjen e kabinetit të ri qeveritar, i njohur si “Rama 4”./kb

Sot nga ora 10:00 deri në orën 12:00 në Universitetin e Arteve të Bukura mbahen homazhet për gazetarin Artur Zheji, që u nda nga jeta të shtunën teksa ndodhej në Sarandë. Më pas miqtë, kolegët, të afërmit dhe bashkëpunëtorët do t’i japin lamtumirën e fundit, për t’u përcjellë në Varrezat e Tufinës.

Zheji ishte një nga zërat më të artikuluar në analizën politike, me një stil të veçantë dhe shpeshherë provokues në mënyrën se si i shpaloste qëndrimet e tij.

Spikati si gazetar, publicist, analist politik, ish-drejtues mediash dhe moderator emisionesh televizive.

Artur Zheji respektohej si nga mbështetësit, ashtu edhe nga kritikët për kapacitetin e tij për të analizuar në thellësi dhe për të thënë gjëra që shumë të tjerë i shmangnin.

Zheji do t’i mungojë familjes e miqve, ndërsa gazetarisë shqiptare do t’i mungojë një debatues i fortë publik dhe provokues interesant në panelet e debateve mediatike./kb

Në Kavajë “Sacro e Profano” është një nga agroturizmat më të rinj në zonë, një investim i kuzhinierit Xhovani Ziu, i cili pas shumë vitesh në Itali vendosi të rikthehet për të investuar në vendin e tij. Ministrja e Bujqësisë dhe Zhivllimit Rural, Anila Denaj ndau në rrjetet sociale një video nga agroturizmi “Sacro e Profano”.

Sipas ministres “kjo sipërmarrje agroturistike ndërthur traditën shqiptare me finesën italiane, duke ofruar një ambient të kuruar në çdo detaj dhe një kuzhinë të pasur me produkte të freskëta që vijnë drejtpërdrejt nga fermerët lokalë”. Denaj nënvizoi se përmes bashkëpunimit me prodhuesit e zonës, “Sacro e Profano” bëhet pjesë e zinxhirit ushqimor Made in Albania, duke sjellë në tryezë shije autentike dhe duke i dhënë turizmit rural një eksperiencë gastronomike të pasuruar me mikpritje dhe pamje të mahnitshme nga të katër anët. Agroturizmin e kam jetuar në eksperiencën time në Itali. Ne këtu kemi përveç restorantit dhe akomodimin në zonë. Klientela jonë janë më shumë kryesisht të huaj, më shumë nordikët se turistë klasikë.

Kjo na jep garanci që në të ardhmen mund të kemi një rritje të punës”, u shpreh Ziu. Ministrja rikujtoi se “përmes Skemës Kombëtare të Investimeve, me 50% grant dhe mbështetjes nga Kredia e Butë të kombinuar me Garancinë Sovrane, çdo fermer mund të përfitojë financim me normë interesi vetëm 2% dhe mbulim kolateral deri në 70%, ndërsa për zonat malore mbështetja është edhe më e madhe falë Paketës së Maleve”./kb

Agjencia e Prokurimit Publik ka njoftuar nisjen e procesit të trajnimit, testimit dhe certifikimit të punonjësve të përfshirë në prokurimet publike, në bashkëpunim me Departamentin e Administratës Publike dhe Shkollën Shqiptare të Administratës Publike (ASPA). Sipas APP-së, pjesëmarrja në këtë proces është e detyrueshme për personat përgjegjës për prokurimin dhe punonjësit e strukturave të dedikuara, në përputhje me standardet e reja të miratuara nga qeveria. Procedurat specifike janë përcaktuar në një udhëzim të përbashkët mes DAP, APP dhe ASPA të nënshkruar në dhjetor të vitit 2024. Ndër të tjera udhëzimi specifikon se kurrikulat e trajnimit do të zgjatin 40 orë, ndërsa do organizohen në 4 nivele njohurish: Niveli bazë, mesatar, i avancuar dhe niveli ekspert. Për t’u certifikuar në nivelin bazë, pjesëmarrësit duhet të sigurojnë të paktën 50 pikë, nga 100 që është maksimalja. Testimet do të organizohen nga ASPA, ndërsa në rast se pjesëmarrësit nuk e kalojnë nivelin bazë, ata do të kenë mundësi të ndjekin përsëri trajnimin dhe të ripërsërisin testimin. Agjencia e Prokurimit Publik thekson se moscertifikimi brenda afatit të përcaktuar mund të sjellë pasoja, përfshirë moslejimin e ushtrimit të së drejtës për të qenë në cilësinë e personit përgjegjës apo pjesë e strukturave të dedikuara në fushën e prokurimit publik. Sipas APP ky proces synon rritjen e profesionalizmit dhe transparencës në menaxhimin e fondeve publike./kb

Çmimet në restorantet shqiptare mbeten ndër më të përballueshmet në rajon, por dallimet mes qyteteve janë të ndjeshme.

Një darkë për dy persona në bregdet kushton më shumë se në veri apo në qytetet e tjera brenda vendit, ndërsa mishi i viçit dhe peshku mbeten kategoritë më të shtrenjta.

Një përmbledhje e çmimeve në restorante në dhjetë qytete të Shqipërisë, e përpunuar nga “Monitor”, tregon se një vakt në restorant vijon të mbetet ekonomik për shumicën e qytetarëve dhe turistëve, por me diferenca të qarta sipas zonës dhe llojit të gatimit.

Në Tiranë, një darkë standarde me mish viçi (1 500–2 200 lekë), një sallatë (400–700 lekë) dhe një gotë vere (300–600 lekë) mund të shkojë rreth 2 100–3 500 lekë në total – ose 19–30 euro.

Sipas menaxherit të Restorant Tymi, një nga më të frekuentuarit në kryeqytet, turistët janë të befasuar nga raporti cilësi-çmim.

“Për një darkë të plotë me mish viçi, sallatë dhe një gotë verë, klienti mesatar shpenzon rreth 15–18 euro”, – thotë ai për “Monitor”, duke shtuar se ka një interes në rritje për gatimet tradicionale dhe pijet artizanale, veçanërisht nga turistët italianë dhe nordikë.

Në qytetet bregdetare si Vlora dhe Saranda, çmimet janë më të larta për gatimet me peshk. Një pjatë me levrek apo kocë varion nga 1 200 deri në 1 500 lekë, ndërsa në restorantet me pamje nga deti mund të shkojë deri në 1 700 lekë në Sarandë.

Nga ana tjetër, qytetet si Shkodra, Gjirokastra apo Elbasani ofrojnë çmime ndjeshëm më të ulëta. Në Shkodër, një pjatë me mish derri fillon nga 400 lekë, një birrë kushton 150–300 lekë, ndërsa një sallatë bazë ofrohet për 250–300 lekë.

Edhe për pijet, Shqipëria mbetet konkurruese.

Një koktej në bar-restorant varion nga 600 deri në 13 00 lekë, ndërsa një birrë 0.5 litra zakonisht kushton nga 250 në Tiranë deri në 500 lekë në Sarandë, me çmimet më të ulëta të regjistruara sërish në qytetet veriore.

Turistët konfirmojnë se kuzhina shqiptare është një nga arsyet kryesore për të qëndruar më gjatë. “Nuk e prisja që në kryeqytet të ha kaq mirë me më pak se 20 euro.

Në Romë do të paguaja dyfishin”, – thotë Anna, turiste nga Italia, duke nënvizuar avantazhin e përballueshmërisë në Shqipëri.

Kjo diferencë e çmimeve nuk vjen nga cilësia e shërbimit, por nga volumi i kërkesës dhe zhvillimi më i ngadaltë turistik në disa prej këtyre qyteteve – shprehet Enri Jahaj, krehu i Shoqatës së Bareve dhe Restoranteve

Sipas Altin Prengës, “çmimet janë të lira për shkak të kostos së lirë të fuqisë punëtore” duke krijuar kushte të favorshme për udhëtarë individualë, çifte apo familje që zgjedhin Shqipërinë për shkak të përballueshmërisë së saj.

Kjo u jep një avantazh shtesë destinacioneve më pak të vizituara, të cilat ofrojnë autenticitet dhe mikpritje tradicionale, pa koston e lartë të turizmit masiv.

Lënda e parë e shtrenjtë, por sekreti i suksesit të pjatave shqiptare

Edhe pse lënda e parë nga tregu vendas në sektorin e bareve dhe restoranteve është shumë më e shtrenjtë se importi për shkak të mungesës, çmimet e ushqimit në Shqipëri vazhdojnë të mbeten relativisht të përballueshme.

Sipas Enri Jahajt, kryetarit të Shoqatës së Bareve dhe Restoranteve, kjo ndodh për shkak të fuqisë punëtore të lirë dhe bashkëpunimit që mbajnë kostot nën kontroll.

Jurgen Bame nga “Era Restaurant”, shton se oferta e çmimeve të përballueshme është një nga arsyet kryesore që tërheq turistët, sidomos ata me buxhete më të kufizuara, ndërsa Altin Prenga, pronar dhe shef kuzhine i “Mrizi i Zanave”, thekson se lëndët e para në Shqipëri janë të shtrenjta, ndaj nuk mund të konsiderohen ushqimet shqiptare si të lira.

Ai sqaron se konkurrenca dhe përpjekjet për prodhim mbajnë çmimet nën kontroll, por nuk do të donte që ushqimet të ishin më të lira, sepse çmimi duhet të jetë i drejtë dhe i balancuar me cilësinë që ofrohet.

Z. Prenga nënvizon se çmimi i drejtë është ai që i përgjigjet vlerës reale të produktit dhe eksperiencës që klienti merr.

Ai përmend se përdorimi i produkteve vendase është baza e suksesit të restorantit të tij dhe një element kyç për ruajtjen e identitetit të kuzhinës shqiptare.

Produktet lokale ndihmojnë që të ruhet cilësia dhe ndikojnë pozitivisht në ekonominë e biznesit, duke qenë një motiv kryesor për punën e tij.

Altin Prenga thekson se origjina e produkteve vendase është kyçe për cilësinë e ushqimit shqiptar.

Ai shprehet se “lopët janë gjysmë të egra, prandaj mishi është më i fortë dhe më autentik” dhe përmend se “mangësia e bujqësisë intensive na ka dhënë një rrjet të shkurtër mes prodhuesit të vogël dhe konsumatorit, që garanton freskinë e perimeve dhe frutave”.

Sipas tij, “kjo lidhje e drejtpërdrejtë mes prodhuesve dhe konsumatorëve është forca jonë, edhe pse nuk jemi të organizuar mirë dhe nuk kemi luks në prodhim”.

Z. Prenga thotë se falë produkteve vendase, gastronomia shqiptare ruan një identitet të fortë që tërheq jo vetëm vendasit, por edhe turistët.

“Mundësia për të shijuar një vakt të plotë, të shijshëm dhe me produkte lokale, me një çmim të arsyeshëm, është një nga pikat e forta të përvojës turistike në Shqipëri” – shprehet z. Bame./MONITOR/kb

Në mesazhin e tij, Kurti kujtoi bashkëbisedimet me Zhejin, si para ashtu edhe pas kamerave, duke e përshkruar atë si një gazetar të rrallë, që e shihte gazetarinë përtej lajmit të ditës, me një angazhim të thellë intelektual.

“Fjala e tij nuk thuhej për t’u harruar të nesërmen,” shkruan Kurti.

Ai solli ndër mend edhe rrënjët e familjes së Zhejit, duke theksuar se i ati, Petro Zheji, ishte një intelektual erudit dhe përkthyes i njohur nga Gjirokastra, ndërsa e ëma, Besa Imami, një aktore e shquar nga Gjakova.

Kurti nënvizoi se Zheji nuk ishte vetëm reporter lufte, por edhe gazetar aktivist dhe patriot i emancipuar, që kontribuoi në ndërkombëtarizimin e çështjes shqiptare dhe forcimin e jehonës së kërkesës për liri.

“Familjes, të afërmve, kolegëve, bashkëpunëtorëve dhe publikut të Artur Zhejit, u shpreh ngushëllimet e mia të sinqerta për këtë humbje të madhe,” përfundon reagimi i Kryeministrit të Kosovës./kb

Qyteti i Durrësit, i vendosur përgjatë bregdetit adriatik të Shqipërisë, është tashmë një destinacion kryesor për turistët britanikë që kërkojnë një alternativë të përballueshme përkundër qyteteve bregdetare tradicionale evropiane, shkruan filiali italian i faqes së njohur turistike travelandtourworld.com.

Ky qytet bregdetar ka fituar popullaritet falë çmimeve të tij të përballueshme, plazheve mahnitëse dhe përvojave të gjalla kulturore.

Me rezervime që janë rritur 224% krahasuar me vitin e kaluar, sipas të dhënave të ”Love Holidays”, Durrësi tashmë është në radarin e shumë udhëtarëve që kërkojnë një përzierje relaksimi dhe aventure pa shpenzuar shumë.

Ndryshe nga shumë destinacione të njohura plazhi, Durrësi u ofron vizitorëve një atmosferë më të qetë, ku ata mund të shijojnë të gjithë bukurinë e një bregdeti mesdhetar pa mbipopullime.

Qyteti kombinon historinë e lashtë, arkitekturën interesante dhe shërbimet e arritshme, duke e bërë atë një mundësi tërheqëse për një pushim të përballueshëm.

Çfarë e bën Durrësin unik?

Durrësi, qyteti i dytë më i madh i Shqipërisë, është i njohur për plazhin e tij të bukur, që shtrihet 6,5 kilometra me rërë. Me klimën e tij mesdhetare, ky qytet ofron kushte perfekte për dashamirësit e plazhit.

Bregu është i rrethuar nga gjire të izoluara dhe ujëra bruz, ideale për t’u çlodhur, notuar ose shijuar sporte të ndryshme ujore.

Për më tepër, qyteti ofron një shumëllojshmëri akomodimesh të përballueshme, nga hotelet buzë detit deri te resortet spa butik, duke e bërë atë një zgjedhje të shkëlqyer për ata që kërkojnë luks pa shpenzuar shumë.

Bregu bregdetar i qytetit është plot me bare, kafene dhe restorante, shumë prej të cilave ofrojnë pamje fantastike të detit.

”Cosmo-Restaurant”, i vendosur në skajin perëndimor të plazhit, është shumë i vlerësuar për gatimet e tij me ushqime deti, duke përfshirë karavidhe të freskëta, duke e bërë atë një vend që duhet vizituar patjetër nga adhuruesit e ushqimit.

Çmimet e përballueshme të ngrënies jashtë në Durrës janë një arsye tjetër për popullaritetin e tij në rritje, me birrë që kushton midis 2,05 dhe 2,40 stërlina dhe një gotë verë me çmim vetëm 1,73-3,03 stërlina.

Një përvojë e pasur historike

Ndërsa Durrësi është më i njohur për plazhet e tij, ai gjithashtu krenohet me një trashëgimi të pasur kulturore që tërheq adhuruesit e historisë.

Një nga monumentet kryesore të qytetit është Kalaja e Durrësit, e cila daton në shekullin V.

Vizitorët mund të eksplorojnë fortifikimet e lashta, duke përfshirë Kullën Veneciane, e cila u ndërtua në shekullin XV dhe ofron pamje panoramike të qytetit dhe bregdetit.

Një tjetër vend historik i rëndësishëm është Amfiteatri Romak i Perandorit Adrian, amfiteatri i dytë më i madh në Ballkan. I ndërtuar në fillim të shekullit II, ky amfiteatër dikur priste gara gladiatorësh dhe tubime të ndryshme.

Me kalimin e kohës, u ripërdor për rituale të krishtera dhe në vitet 1960, u rizbulua pas shekujsh të varrosjes nga tërmetet.

Hyrja në këtë vend historik magjepsës kushton rreth 2,60 stërlina duke e bërë atë një përvojë të arritshme dhe pasuruese për turistët.

Për ata që janë të interesuar në historinë fetare, Xhamia e Durrësit, e vendosur në qendër të qytetit, ia vlen të vizitohet.

E hapur fillimisht në vitin 1938, është një vend pune adhurimi dhe u ofron vizitorëve mundësinë për të vlerësuar arkitekturën islame shqiptare.

Hyrja në xhami është falas, por vizitorëve u këshillohet të vishen modestisht dhe të heqin këpucët para se të hyjnë.

Relaksimi dhe aktivitetet në plazhin e Durrsit

Plazhi i Durrësit ofron një gamë të gjerë aktivitetesh për vizitorët që kërkojnë të relaksohen ose të qëndrojnë aktivë.

Plazhi i gjatë është i pajisur mirë me shezlongje dhe çadra, të cilat mund të merren me qira për vetëm 4,33 stërlina deri në 21,63 stërlina në ditë.

Për ata që kërkojnë pak më shumë veprim, plazhi ofron gjithashtu sporte ujore emocionuese si jet ski dhe zhytje nënujore, perfekte për kërkuesit e aventurave.

Për një përvojë më të relaksuar, ”Hawaii Beach Club” është një zgjedhje ideale.

I vendosur në një skelë, klubi ofron kokteje dhe shezlongje të rehatshme, duke u lejuar vizitorëve të shijojnë pije me një pamje marramendëse të detit.

Pavarësisht nëse vizitorët zgjedhin të relaksohen ose të marrin pjesë në aktivitete me energji të lartë, plazhi i Durrësit përmbush një sërë preferencash, duke e bërë atë një vend ideal si për familjet ashtu edhe për udhëtarët solo.

Akomodim dhe restorante me çmime të përballueshme

Vizitorët e Durrësit do të zbulojnë se akomodimet në qytet janë shumë të përballueshme, veçanërisht kur krahasohen me destinacione të tjera evropiane të plazhit.

Për shembull, udhëtarët mund të rezervojnë një qëndrim në hotel ”Epidamn Boutique & Spa” për vetëm 69 stërlina për natë për dy të rritur.

Sipas ”Vacanze d’amore”, turistët mund të gjejnë edhe paketa shtatë-netëshe të minutës së fundit duke filluar nga 138 paund për person.

Skena kulinare e qytetit është një tjetër atraksion, me një shumëllojshmëri restorantesh që shërbejnë gatime lokale dhe ndërkombëtare. Ushqimi i shpejtë është i bollshëm dhe i përballueshëm, me opsione të shijshme si byrek 40 centë.

Udhëtime ditore dhe atraksione pranë Durrësit

Përtej plazheve dhe vendeve historike, Durrësi ofron mundësi të shumta për ata që dëshirojnë të eksplorojnë më larg.

Pak jashtë qytetit, vizitorët mund të bëjnë një turne në Vreshtat Abaia, ku mund të shijojnë pesë verëra të ndryshme të prodhuara në vend.

Kantina gjithashtu ofron një turne me guidë në bodrumin e saj dhe një restorant, që shërben gatime lokale për të shoqëruar verërat.

Një turne me guidë fillon nga 17 stërlina për person, duke e bërë atë një zgjedhje të shkëlqyer për dashamirësit e verës.

Për ata që kërkojnë më shumë bukuri natyrore, Durrësi është i vendosur në mënyrë të përshtatshme pranë Tiranës, kryeqytetit të Shqipërisë, vetëm 40 minuta larg.

Shqipëria është e njohur për plazhet e saj të pastra, gjiret e izoluara dhe atraksionet e përballueshme.

Vendasit rekomandojnë të eksploroni disa nga vendet më pak të njohura të vendit, të tilla si Gjiri i Krorëzit dhe Gjiri i Dafinës, të cilat janë të arritshme vetëm me anije dhe ofrojnë një ‘’arratisje’’ nga turma.

Riviera Shqiptare, në jug, është gjithashtu një destinacion popullor, me plazhin e Ksamilit të përshkruar si një “plazh tropikal në Evropë”.

Për aktivitete më aventureske, vizitorët mund të ecin në Bjeshkët e Nemuna, të eksplorojnë vendet e Trashëgimisë Botërore të UNESCO-s si Berati dhe Gjirokastra, ose edhe të provojnë parashutizëm pranë bregdetit të Vlorës.

Shqipëria gjithashtu ofron aktivitete të përballueshme, të tilla si një vizitë në burimin e Syrit të Kaltër për vetëm 40 centë ose një turne në Kalanë e Gjirokastrës për rreth 3 paund.

Edhe skena e jetës së natës në Shqipëri është e lulëzuar, me Tiranën dhe Durrësin që ofrojnë një shumëllojshmëri baresh dhe klubesh.

Për një përvojë unike, vizitorët mund të shijojnë një pije në ”Sky Club”, i vendosur në një kullë rrotulluese që ofron pamje 360 ​​gradë të qytetit.

Në Durrës, muajt e verës sjellin mbrëmje të gjalla të mbushura me muzikë, vallëzim dhe argëtim, duke e bërë atë vendin ideal për t’u çlodhur pas një dite eksplorimi.

Pse Durrësi është destinacioni perfekt dhe i përballueshëm?

Me çmimet e tij të përballueshme, plazhet mahnitëse dhe trashëgiminë e pasur kulturore, Durrësi po bëhet një alternativë popullore ndaj destinacioneve të mbushura me njerëz të plazhit evropian.

Qyteti ofron diçka për çdo lloj udhëtari, qoftë duke kërkuar relaksim, aventurë apo eksplorim kulturor.

Për ata që kërkojnë të shijojnë pushime në plazh pa kostot e larta të destinacioneve më të njohura evropiane, Durrësi është zgjedhja ideale./kb