GJKKO ka rrëzuar kërkesën e gjyqtares Pajtime Fetahu për zëvendësim të masës së sigurisë “Arrest me burg”.

Gjyqtarja, e cila dyshohet se ishte pjesë e organizatës kriminale të Suel Çelës do të vijojë të qëndrojë në qeli.

Pajtime Fetahu, sipas dosjes së SPAK, komunikonte drejtpërdrejt me Suel Çelën, i cili vijon të jetë në arrati.

Në dosjen me 262 faqe të SPAK, vihet re angazhimi i gjyqtares për të nxjerrë nga burgu miqtë e Suel Çelës, e nga ana tjetër për të futur në qeli armiqtë e tyrë.

Nga dosja e siguruar nga Vizion Plus bie në sy afrimiteti në mesazhet e shkëmbyera në SKYECC mes saj dhe Suel Çelës, që identifikohet me emrin tjetër, Marius Lulaj.

Në 2020, gjyqtarja në detyrë, jo vetëm që i ka favorizuar anëtarët e bandës, por u kërkonte atyre dhe vetë Suel Çelës, eliminime fizike.

The post Kërkoi zëvendësimin e masës së sigurisë, GJKKO rrëzon gjyqtaren Pajtime Fetahu: Do të qëndrojë në qeli appeared first on Gazeta Express.

Altin Pajaziti, 23 vjeç dhe Kadri Prushi, 53 vjeç, të dy banues në Kosovë janë arrestuar nga Forca Operacionale e Tiranës në kuadër të operacionit “Suspend”.

Sipas policisë, dy të arrestuarit dyshohet se kanë trafikuar 2 pistoleta, me qëllim shitjen në Tiranë, me vlerë afro 10 000 euro.

“Gjatë operacionit, shërbimet e Policisë kanë ndaluar në autostradën “Lezhë-Fushë Krujë”, automjetin me të cilin qarkullonin shtetasit Altin Pajaziti dhe Kadri Prushi, në të cilin, gjatë kontrollit, kanë gjetur dhe sekuestruar 2 armë zjarri pistoleta dhe municion luftarak. Nga hetimet dyshohet se këta shtetas i kanë trafikuar pistoletat nga Kosova, me qëllim shitjen në Tiranë”, njoftoi policia.

Vijojnë hetimet në drejtimin e Prokurorisë, për dokumentimin e plotë të veprimtarisë kriminale të këtyre shtetasve, identifikimin dhe kapjen e shtetasve të tjerë të përfshirë.

The post Trafik armësh nga Kosova në Shqipëri, “Operacionalja” shtrin përtokë dy persona dhe i vë prangat appeared first on Gazeta Express.

Kryeministri Edi Rama ka deklaruar më 11 maj, ditën e zgjedhjeve, do të dalin në dritë të gjitha të vërtetat. Gjatë bisedës së tij në rubrikën “Sy më Sy” me ndjekësit në rrjetet sociale, ai e cilësoi opozitën si një "qamet të madh" dhe theksoi se ajo nuk ka as parti të organizuar.

“Do fitojmë prapë se kemi bërë shumë punë, por edhe se nuk kemi kundërshtarë. Çfarë të bëjmë, nuk kemi kundërshtar”, deklaroi Rama.

Lidhur me kritikat e opozitës për krijimin e vendeve të punës, kreu i qeverisë theksoi se 300 mijë vende pune të krijuara janë një fakt i vërtetueshëm. Ai ftoi qytetarët të kontrollojnë regjistrin dhe të shohin ndryshimin e numrit të të punësuarve para dhe pas qeverisjes së tij.

“Kjo është e thjeshtë, merrni regjistrin dhe shihni sa të punësuar kishte në Shqipëri dhe sa janë sot. Do shihni që janë fakte, jo muhabet”, tha Rama.

Ai theksoi se më 11 maj, Partisë Socialiste i duhet një mandat me shumicë domethënëse, duke argumentuar se kjo do të ishte gjithashtu një mesazh i qartë për Brukselin.

“Duhet shumicë domethënëse, nuk është rastësi. Nuk është thjesht për këtu se për kë do votojmë ne, por është edhe për atë në Bruksel imazhi i fushatës sonë. Më 11 maj, Brukseli do marrë mesazhin se shqiptarët kërkojnë anëtarësimin tani dhe këtë mesazh shqiptarët mund ta japin”, u shpreh ai.

Gjithashtu, Rama reagoi ndaj akuzave të Partisë Demokratike se qeveria e tij ka kopjuar programin elektoral të opozitës.

“Qajnë hallin se edhe u kopjua programi, është gjëa më qesharake në botë, a thua se bëhet fjalë për ndonjë kod atomik, a thua se bëhet fjalë për ndonjë kod kasaforte, kodi i Da Vinçit, u kopjua Kodi i Da Vinçit, o Zot o Zot”, ironizoi kryeministri.

The post Rama: Ne fitojmë më 11 Maj, opozita nuk është kundërshtar appeared first on Gazeta Express.

Kryetari i Partisë Demokratike, Sali Berisha paraqitisot programin e PD-së për ‘Shqipërinë Madhështore’, për sektorin e Mjedisit, Pyjeve dhe Kullotave.

Në fjalën e tij, Berisha tha se, “mjedisi, me të cilin lidhet direkt shëndeti i njeriut, është më i braktisur, më i kërcënuar se rrallë ndonjëherë në histori. Mjedisi është sot i tëri i dominuar, i manipuluar, i dëmtuar nga interesa kryekëput mafioze të klientelës qeveritare”.

“Shqipëria, që për disa rrethana mund të kishte mjediset më të lakmueshmet në Europë, ka kryeqytetin, njërin nga 10-12 qytetet më të ndotura të planetit”, theksoi Berisha.

“Verën e kaluar ne nuk kishim pothuajse asnjë flamur blu në detërat dhe liqenet tona”, tha Berisha, megjithëse shtoi ai, “ne ndërtuam 11 impiante të përpunimit të ujërave të zeza dhe po shkonim faktikisht drejt bllokimit të tërë të derdhjes së ujërave të zeza në det, ato korrupsioni i ka kyçur. Bashkitë nuk i vënë në funksion. Nuk paguajnë energjinë për funksionimin e tyre”.

Pra, shtoi ai, “mjedisi, pyjet dhe kullotat përbëjnë një emergjencë kombëtare”.

Duke prezantuar programin e PD për mjedisin, Berisha tha se “projekti ynë ka një synim, vendosjen e standardeve më të mira evropiane”.

Standarde, që sipas tij,  “synojnë një mjedis të shëndetshëm, një mjedis të pastër, një mjedis të monitoruar, një mjedis të zhvilluar”.

“Kompleksi mjedisor, faktorët që bashkëveprojnë në mjedisin, do të marrin të gjithë vëmendjen dhe angazhimin”, tha Berisha.

“Nuk ka dyshim se pyllëzimi real do jetë një drejtim qendror. Pyllëzimi do të gërshetohet me mbjelljen e drurëve frutorë. Por kjo nuk do të thotë se do hiqet dorë nga mbjellja e drurëve të tjerë nativë për zonat ku ato janë”, theksoi ai.

“U shkatërrua e tëra infrastruktura e mbrojtjes së pyjeve. U shkatërrua e tëra infrastruktura e kullotave. Rindërtimi i institucioneve të këtyre fushave, veprimtaria e tyre në përputhje me standardet evropiane, do jetë zotimi ynë para shqiptarëve”, nënvizoi Berisha.

The post Programi për mjedisin, Berisha: Vendosim standarde evropiane appeared first on Gazeta Express.

Një ngjarje e rëndë ka ndodhur ditën e sotme në qytetin e Sarandës, ku një burrë ka plagosur me thikë bashkëshorten.

Gruaja e identifikuar si Mairanda Budini, është goditur me thikë në bark nga bashkëshorti i saj, dhe është transportuar me urgjencë në spital ku po merr ndihmë mjekësore.

Ngjarja e rëndë ka ndodhur në lagjen 4 të qytetit. Ndërkohë autori i ngjarjes është larguar dhe po kërkohet nga policia.

The post Burri plagos me thikë gruan në Sarandë appeared first on Gazeta Express.

Një plagosje me thikë ka ndodhur këtë të hënë në lagjen nr. 4 të Sarandës.

Sipas informacioneve paraprake një grua ka mbetur e plagosur pasi është goditur me thikë nga burri i saj. Miranda Budini.

Gruaja është identifikuar si Miranda Budini ndërsa është transportuar menjëherë në spitalin e Sarandës, ku mësohet se po merr ndihmën e parë dhe ndodhet jashtë rrezikut për jetën.

Ende nuk dihet shkaku i ngjarjes. Policia, ndërkohë, po vijon kërkimet për kapjen e autorit.

The post Emri/ Burri plagos me thikë bashkëshorten në Sarandë, si paraqitet gjendja e saj appeared first on Gazeta Express.

Policia Kufitare e Kakavijës ka finalizuar operacionin e koduar “Modifikimi”, duke goditur një rast të tentativës për trafikim të lëndëve narkotike drejt Greqisë.

Gjatë kontrolleve intensive me teknologji dhe qen antidrogë, në një automjet u gjetën 60 pako me kanabis sativa, me peshë totale 63.2 kilogramë, të fshehura në parafangot dhe shasinë e mjetit.

Si rezultat, u arrestuan në flagrancë shoferi O. K., 44 vjeç, dhe pasagjerja E. Xh., 45 vjeçe, të dy banues në Fier.

Policia sekuestroi gjithashtu 1890 euro, tre celularë dhe automjetin e përdorur për trafikimin e drogës.

Hetimet vijojnë për të identifikuar persona të tjerë të përfshirë në këtë aktivitet kriminal. Materialet procedurale i kaluan Prokurorisë së Gjirokastrës për veprime të mëtejshme.

The post Kakavijë/ U kapën me mbi 60 kg kanabis në makinë, përfundojnë në pranga dy persona appeared first on Gazeta Express.

Në kuadër të operacionit të koduar “Modifikimi”, Policia Kufitare ka parandaluar dhe goditur një tentativë për trafikim të lëndëve narkotike drejt Greqisë, falë kontrolleve të shtuara dhe inteligjencës policore.

Gjatë një kontrolli intensiv, me përdorimin e mjeteve logjistike bashkëkohore dhe një qeni antidrogë, Policia gjeti të fshehura në një automjet 60 pako me lëndë narkotike Cannabis Sativa, me peshë totale prej 63.2 kilogramë.

Në vendngjarje u arrestuan dy shtetas: O. K., 44 vjeç, banues në Fier, shoferi i automjetit, dhe E. Xh., 45 vjeçe, pasagjere në automjetin ku u gjet lënda narkotike. Gjatë kontrollit fizik të tyre, Policia ka sekuestruar edhe 1890 euro.

Operacioni është realizuar nga shërbimet e Policisë Kufitare në bashkëpunim me autoritetet doganore, duke përdorur teknika bashkëkohore të kontrollit dhe duke analizuar riskun dhe inteligjencën policore. Automjeti është kontrolluar në vijën e dytë të kontrollit të detajuar në dalje, ku janë zbuluar pako të mbështjella me natriban të fshehura në parafangot dhe shasinë e automjetit.

Për këtë rast, janë sekuestruar gjithashtu 3 celularë dhe automjeti i përdorur për transportimin e lëndës narkotike. Hetimet vijojnë për identifikimin e personave të tjerë të përfshirë në këtë aktivitet kriminal.

Materialet procedurale do t’i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër për veprime të mëtejshme lidhur me veprën penale “Trafikimi i lëndëve narkotike”, kryer në bashkëpunim.

The post Tentuan të kalonin kufirin me 60 pako kanabis, arrestohen shoferi i makinës dhe pasagjeri appeared first on Gazeta Express.

Një ngjarje e rëndë ka ndodhur rreth orës 12:40 në Levan, ku shtetasi F. M., rreth 68 vjeç, është goditur nga treni i mallrave Fier-Vlorë. Sipas informacioneve të para, dyshohet se aksidenti ka ndodhur aksidentalisht, kur i moshuari ka qenë në lëvizje dhe është goditur nga shkalla e fundit e trenit të mallrave.

I dëmtuari është transportuar menjëherë në spital, ku po merr kujdesin e nevojshëm mjekësor.

The post Goditet nga treni i mallrave Fier-Vlorë, 68-vjeçari përfundon në spital appeared first on Gazeta Express.

Gjykata e Posaçme e Shkallës së Parë për Krime të Rënda ka lënë në burg Edison Muçekun, i cili u ekstradua në Shqipëri nga Britania e Madhe pak ditë më parë. Muçeku akuzohet për veprën penale "Sigurimi i kushteve për të kryer vrasje", një hetim i iniciuar nga SPAK, lidhur me tentativën për vrasjen e Hamza Terziut në Bulqizë më 21 maj 2020.

Edison Muçeku është shpallur në kërkim nga SPAK si pjesë e operacionit "Revanshi", i zhvilluar në maj 2024. Gjatë seancës gjyqësore, Muçeku ka mohuar akuzat, duke insistuar se nuk ka pasur asnjë lidhje me ngjarjen për të cilën po akuzohet. Avokati i tij ka kundërshtuar provat e përdorura, duke argumentuar se ato janë të paligjshme, veçanërisht ato që lidhen me përdorimin e teknologjisë Sky ECC.Muçeku dyshohet si një nga 'ushtarët' e bandës së drejtuar nga Viktor Xheçuka (Tori), i cili është akuzuar për vrasje me pagesë. Po ashtu, ai është pjesë e organizatës që ka pasur lidhje me Ervis Martinaj, të cilin SPAK e akuzon si 'mbret të kumarit', dhe i zhdukur prej 8 gushtit 2022. Sipas përgjimeve të Sky ECC, Muçeku është porositur për tentativën e vrasjes së Durim Bamit më 4 Nëntor 2020.

The post U ekstradua nga Britania, GJKKO lë në burg Edison Muçekun, i akuzuar për vrasjen e Hamza Terziut appeared first on Gazeta Express.

Drejtuesi politik i Koalicionit Euroatlantik, Lulzim Basha, zhvilloi një takim në Njësinë 5 të Tiranës, ku prezantoi programin e tij ekonomik dhe angazhimin për drejtësi dhe mirëqeverisje, në prag të zgjedhjeve të 11 majit.

Gjatë takimit, Basha theksoi se korrupsioni i qeverisë është pengesa kryesore për zhvillimin ekonomik dhe se zgjidhja është një ndryshim rrënjësor.

"Korrupsioni i qeverisë është pengesa kryesore për zhvillimin ekonomik të Shqipërisë. Zgjidhja nuk janë arnimet, por një ndryshim rrënjësor", tha Basha. Ai shpjegoi se programi i Koalicionit Euroatlantik fokusohet te mbështetja e qytetarëve dhe ekonomisë reale, duke prezantuar Fondin për Mirëqenien e Familjes, i cili ofron mbështetje për familjet shqiptare, përfshirë 2,000 euro për çdo bebe të porsalindur dhe mbulim të plotë të interesit të kredisë për 30 mijë çifte të reja.

Një tjetër pikë e rëndësishme e programit është fuqizimi ekonomik i grave, me një grant prej 5 milionë eurosh për krijimin e 1,000 bizneseve nga gratë sipërmarrëse dhe mbështetje për gratë në artizanat dhe bujqësi. Basha nënvizoi gjithashtu uljen e taksave dhe heqjen e taksës mbi karburantet si pjesë të politikave fiskale për të mbështetur ekonominë.

"Ne kemi një program të qartë që flet për drejtësinë, për çmimet, për pagat, për mbështetje për familjet dhe për një ekonomi që u jep mundësi të gjithëve", shtoi ai.

The post Basha: Programi ynë, mundësi për të gjithë! Kredi pa interes për 30,000 çifte të reja appeared first on Gazeta Express.

Policia e Tiranës ka arrestuar një 27-vjeçar, i cili së bashku me një 25-vjeçare, kërcënuan një person që t’iu jepte 1000 euro për të fshirë foto/shkrime mbi jetën private të tij, nga rrjeti social “Tik Tok”.

Policia njofton se është arrestuar shtetasi F. T., 27 vjeç, ndërsa u procedua penalisht shtetasja L. M., 25 vjeçe, pasi në bashkëpunim me njëri-tjetrin, kanë kanosur një 33-vjeçar, për dhënien e shumës 1000 euro, që të fshinin disa foto/shkrime të jetës së tij private, nga rrjeti social “Tik Tok”.

Në kuadër të të njëjtit operacion, u ndalua edhe një 21-vjeçar, shtetasi L.H, për shtrëngimin me anë të kanosjes për dhënien e pasurisë, ndodhur me datë 14.03.2024, bazuar në kallëzimin e bërë nga një shtetas.

The post “1000 euro që të fshijmë fotot private në TikTok”, dy të rinj kërcënojnë 33-vjeçarin në Tiranë appeared first on Gazeta Express.

Kreu i Partisë Demokratike, Sali Berisha i pranishëm në tryezën e rrumbullakët me temë “Riktheni të rinjtë shqiptarë përsëri në atdhe”, theksoi angazhimin për një politikë që do të mundësojë rikthimin e të rinjve shqiptarë në vend.

Në aktivitetin e organizuar nga departamenti Brain Gain në PD, dhe në bashkëpunim me Lidhjen Demokratike të Gruas (LDG) dhe Forumin Rinor të Partisë Demokratike (FRPD),  Berisha nënvizoi angazhimin e selisë blu në politika për kthimin e shqiptarëve në vendlindje.

“Ne do të jemi të angazhuar ndaj një politike, e cila do të kthejë të rinjtë shqiptarë, kudo që ndodhen dhe punojnë në botë”, deklaroi Berisha. Ai vlerësoi kontributin e të rinjve në fushatë, duke theksuar se dinamizmi i tyre është jetësor për fitoren e PD-së.

Në këtë kontekst, ai nënvizoi se Partia Demokratike ka 58 kandidatë nën moshën 40 vjeç në zgjedhjet e ardhshme, duke e cilësuar këtë një tregues të angazhimit për të rinjtë dhe të ardhmen e vendit.

“Ajo që departamenti tregoi, duke punuar si opozitë dhe punoi shumë më mirë për tu afruar pranë të rinjve dhe ka meritën e padiskutueshme që është afruar me të rinjtë. Këta të rinj do të jenë pjesë substanciale e administratës së ardhshme.

Do të jenë pjesë substanciale e qeverisjes tonë dhe ne kemi shumë nevojë për kontributin e të rinjve. Ai kontribut është jetik. Misioni nuk mund të realizohet pa energjinë dhe ëndrrat tuaja. Dhe ëndrrat tuaja do ti japin të ardhmen këtij vendi”, theksoi Berisha.

Duke përmendur shembuj suksesi si Mira Murati dhe Dua Lipa, Berisha u shpreh se të rinjtë shqiptarë kanë arritur majat në arenën ndërkombëtare dhe se synimi i PD-së është të krijojë kushtet për t’i rikthyer ata në Shqipëri.

Ish-kryeministri u shpreh se programi i PD, ka në fokus të rinjtë.

“Ne do mundësojmë kredi të buta për çdo çift të ri, për banesë. E di se çmimet sot janë shumë të larta dhe duket se banesa është mollë e ndaluar, megjithatë ne do të ofrojmë mundësi reale për ju, me mbështetje financiare dhe kredi të buta. Ne do të bëjmë gjithçka që politika e fëmijës së tretë, të jetë mbështetje që për fëmijën e tretë shteti të japë mbështetjen e tij deri në moshën 23 vjeç”, bëri të ditur Berisha.

Sipas tij, “çdo i ri, apo çdo emigrant do të trajtohet pa dallime nëse do të vijë për të investuar në Shqipëri, nuk do të taksohet për 5 vite. Ne do të punojmë që ti rikthejmë në Shqipëri. Kundërshtarët tanë kanë kopjuar programin tonë, por ata janë gënjeshtarë dhe të korruptuar dhe në këtë mënyrë e trajtojnë programin”.

The post Berisha: Angazhim për kthimin e të rinjve shqiptarë në Shqipëri appeared first on Gazeta Express.

Kryeministri Edi Rama, njëkohësisht kryetar i Partisë Socialiste kërkoi sot votat e shqiptarëve jashtë për PS-në, ndërsa i siguroi se votat e tyre duhen për të vrapuar së bashku për të realizuar më në fund ëndrrën shekullore të shqiptarëve që të jenë pjesë e Bashkimit Europian.

Në një takim me shqiptarët në Athinë, Greqi, në kuadër të turit të takimeve me diasporën, Rama siguroi se pas zgjedhjeve do të rikthehet në një tur falënderimesh edhe për të thënë se “votat tuaja nuk i deshëm për të marrë katër vite më shumë ulur në karrige”.

“Jo vetëm do të vijë pas zgjedhjeve por pas zgjedhjeve ju jap fjalën se do të vijmë të bëjmë një festë të madhe falënderimesh për të gjithë ju dhe do vijmë për t’ju thënë që ne nuk i deshëm votat tuaja për të marrë katër vite më shumë ulur në karrige, por me votat tuaja ne duam të vrapojmë së bashku për të realizuar më në fund ëndrrën shekullore të shqiptarëve që të jenë pjesë e Europës, europianë të barabartë me europianët”, tha Rama.

Kryeministri vuri në dukje se tashmë shumë prej shqiptarëve këtu po pyesin veten nëse duhet të kthehen në Shqipëri apo jo.

“Më vjen shumë mirë që disa nga miqtë që më shoqërojnë më treguan se gjatë ditës së sotme duke bërë takime në Athinë kanë ndeshur diçka që pak a shumë është e përbashkët tek shqiptarët e Athinës. Që të gjithë kanë filluar ta pyesin veten nëse duhet të kthehen apo jo. Qoftë edhe pyetja e vetes nëse duhet të ktheheni apo jo është një tregues shumë inkurajues. Ashtu sikundër më pëlqeu shprehja e një taksisti shqiptar këtu që tha kur erdhëm ishim 100 shkallë më poshtë se këta këtu, sot jemi vetëm një shkallë afër tyre”, tha Rama.

Kryeministri siguroi se jemi këtu së bashku pikërisht për ta ngjitur edhe shkallën e fundit dhe për t’u bërë njësh këtu me këta dhe të gjithë europianët e tjerë në vendet e BE-së, duke u bërë edhe ne pjesë e të njëjtës familje dhe duke ulur në sofrën e përbashët të familjes së bashkuar europiane si të barabartë mes të barabartësh”.

The post Rama nga Athina: Na jepni votën për të realizuar ëndrrën shekullore të shqiptarëve, integrimin në BE appeared first on Gazeta Express.

Drejtuesi politik i Koalicionit Euroatlantik, Lulzim Basha, gjatë një takimi me emigrantët shqiptarë në Londër, ka deklaruar se emigracioni masiv është pasojë direkte e dështimit të qeverisë Rama dhe korrupsionit sistematik që ka kapur shtetin shqiptar.

Në fjalën e tij, Basha vlerësoi rolin e emigrantëve shqiptarë si pasqyra e shpresës dhe forcës së qytetarit shqiptar, që edhe në kushte të vështira, larg vendit të tyre, arrijnë të ndërtojnë një jetë të denjë dhe të mbajnë lidhjen me Shqipërinë.

Sipas tij, zbrazja e qyteteve dhe ikja e shqiptarëve nuk janë rastësi, janë pasojë e një sistemi të kalbur nga korrupsioni.

Basha tha se “arsyet pse shqiptarët po largohen lidhen me mungesën e drejtësisë, arsimit cilësor, tregut të punës me paga dinjitoze dhe kushteve të barabarta që do t’i lejonin të rinjtë të ndërtonin të ardhmen në vendin e tyre”.

Ai tha se integrimi europian i Shqipërisë dhe korrupsioni janë në konflikt interesi.

Basha shprehu angazhimin për themelimin e njësisë së rikuperimit të pasurive të vjedhura, e cila do të gjurmojë hajdutët që janë pasuruar me politikë dhe pasuritë e vjedhura t’u kthehen shqiptarëve.

“Angazhimi ynë në 1 qershor, është themelimi i njësisë së rikuperimit të pasurive të vjedhura. Pasurive të vjedhura të shqiptarëve. Dhe këto pasuri, siç e dini fare mirë ju vëllezërit dhe motrat tona në Londër, nuk janë vetëm në Shqipëri, nuk janë vetëm në Tiranë apo në bregdet, janë dhe jashtë Shqipërisë. E dini fare mirë ju. Janë dhe këtu në Londër. Dyqane, prona të patundshme. Politikanëve shqiptarë me 2 mijë euro në muaj sa dyqane mund të blesh në Londër? Sa biznese të suksesshme mund të kesh në Londër me 1800 euro në muaj saç është rroga e drejtorit të tatimeve? Se i bie që çmimet këtu të jenë më të ulëta se në Pukë. Apo jo? Unë e di që në UK, është pak më shtrenjtë se në Pukë, apo jo? E pra, nëjsia e rikuperimit të pasurive të vjedhura ka këtë detyrë: Të gjurmojë me mjete active të hetimit pasuritë e politikanëve të korruptuar shqiptarë që në fakt nuk janë pasuritë e tyre, janë pasuritë tuaja, janë pasuritë e të afërmve tuaj”, tha Basha.

The post Basha në Londër: Emigracioni masiv, pasojë direkte e dështimit të qeverisë appeared first on Gazeta Express.

Kryeministri Edi Rama, tha se, me Greqinë patëm momentin e vështirtë për çështjen që ju e dini. Por sot ajo çështje është e kapërcyer, dhe jemi në  marrëdhënie shumë të mirë me qeverinë greke.

“BE na ka caktuar një kalendar 3 vjeçar për të bërë negociatat. Nuk e kanë patur kurë vendet e tjera një kohë kaq të shkurtër. Atëherë Komisioni do t’i çoj të gjitha shteteve anëtare dhe Greqisë që me Shqipërinë mbaruam dhe gjithçka është gati dhe atëherë në të gjitha parlamentet e vendeve anëtare, do të votohet për të marrë Shqipërinë anëtare të BE”, tha Rama.

Duke folur për marrëdhëniet me Greqinë, Rama e cilësoi absurditet ligjin e luftës.

“Duhet ta dini që me kryeministrin Mitsotakis dhe me qeverinë e tij, ne jemi në dialog të vazhdueshëm. Kemi bërë përparim domethënës në drejtim të atyre çështjeve për të cilat kemi pasur dakordësi, përshembull për ato çështjet që lidhen me minoritetin dhe tek disa vendime që kemi marrë për t’i sanksionuar disa të drejta të minoritetit, si e drejta për tu deklaruar. Janë çështje që duhen zgjidhur dhe ne i kemi zgjidhur dhe është pozitive”, tha Rama.

“Kemi patjetër në tavolinë nga ana jonë kërkesën për të hequr përfundimisht ligjin e Luftës, sepse është absurditet. Ne jemi dy popuj shumë të afërt, jemi dy vende aleate në NATO.  Në dokumentin tonë të politikës së jashtme Greqia është një partner strategjik sëbashku me Turqinë dhe Italinë dhe ne jemi në gjendje lufte, sepse ka një ligj absurd këtu që është ligji i luftës, dhe insistimi ynë është që ky ligj duhet të hiqet. Dhe unë kam shumë besim, që edhe kjo, por edhe çështje të tjera të mbetura ku duhet thënë shumë shpesh është ngatërruar politika padrejtësisht, shumë shpesh bufat e kënetave nacionaliste andej dhe këndej kanë bërë rrëmujë dhe kanë futur të gjithë dynjanë në sherr, dhe ne do t’ja dalim të ngrihemi mbi gjithë këto këneta dhe në bashkëpunim të ngushtë me miqtë tanë në Athinë do të bëjmë që mes Shqipërisë dhe Greqisë, të hapet një epokë e re partneriteti strategjik, jo thjesht në kuptimin që kemi sot, por në kuptimin e një ndërthurje shumë më të fortë të punëve dhe të vetë njerëzve”, tha Rama.

The post Rama: Duhet të hiqet ligji i luftës, hapim epokë të re të partneritetit strategjik mes Shqipërisë dhe Greqisë appeared first on Gazeta Express.

Europa 'PATETIKE' më në fund mund të jetë duke u zgjuar nga gjumi i saj ushtarak, shkruan CNN.

Ishte një pritë e transmetuar drejtpërdrejt në televizion, për të cilën shumë në Europë shpresojnë se do ta ndalë një luftë.

Qortimi publik që Donald Trump ia bëri presidentit të Ukrainës, Volodymyr Zelensky, në Shtëpinë e Bardhë ishte si një rrufe për aleancën transatlantike, duke shpërndarë iluzionet e mbetura në Europë mbi atë nëse SHBA do të qëndrojë në krah të saj përballë agresionit rus.

E tronditur dhe ndoshta edhe e frikësuar, Europa më në fund mund të ketë ardhur në vete për nevojat e saj të mbrojtjes në epokën e Trumpit.

“Është sikur Roosevelti ta kishte mirëpritur Churchillin në Shtëpinë e Bardhë dhe të fillonte ta bullizonte”, tha eurodeputeti Raphaël Glucksmann për CNN, përcjell Gazeta Express.

Në një muaj kur Sekretari amerikan i Mbrojtjes, Pete Hegseth, e quajti Europën “PATETIKE” gjatë një bisede me zyrtarë të administratës (në të cilën aksidentalisht ishte përfshirë edhe një gazetar i The Atlantic), kontinenti ka filluar të thyejë tabu dhjetëra vjeçare në çështjet e mbrojtjes. Po diskutohen politika që deri para pak javësh do të ishin të paimagjinueshme.

Ndryshimi më i madh ka ardhur nga Gjermania, ekonomia më e madhe e Europës. Pas zgjedhjeve federale, kancelari në pritje, Friedrich Merz, fitoi një votim në parlament për ta hequr “frenimin e borxhit” nga kushtetuta gjermane - një mekanizëm që kufizonte huamarrjen e qeverisë.

Në teori, ky ndryshim ligjor lejon shpenzime të pakufizuara për mbrojtjen dhe sigurinë. Ekspertët presin që ky vendim t'i zhbllokojë deri në 600 miliardë euro në Gjermani gjatë dekadës së ardhshme.

“Ky është një ndryshim i madh loje në Europë, sepse Gjermania ishte më e ngadalta - veçanërisht mes vendeve të mëdha - kur bëhej fjalë për mbrojtjen” tha Piotr Buras, një anëtar i lartë në Këshillin Europian për Marrëdhëniet me Jashtë (ECFR), për CNN.

Duke kapërcyer fobinë e saj ndaj borxhit, Buras tha se Gjermania më në fund ka vepruar sikur Europa vërtetë ka kaluar një “Zeitenwende” - ose “pikë kthese”, siç e përshkroi ish-kancelari Olaf Scholz në shkurt të 2022-ës, vetëm tri ditë pasi Rusia nisi luftën në Ukrainë.

Megjithëse pushtimi e tronditi Gjermaninë, “vetëm shock-u Trump i bëri ata ta marrin këtë vendim vërtetë themelor për ta pezulluar frenimin e borxhit”, tha Buras.

“Ky është Zeitenwende i vërtetë”.

Tabutë po shemben

Në Francën fqinje, Presidenti Emmanuel Macron - i cili prej kohësh ka kërkuar autonomi strategjike europiane nga SHBA-ja - ka thënë se po e shqyrton mundësinë e shtrirjes së mbrojtjes bërthamore franceze tek aleatët e saj, të cilët aktualisht mbështeten në armët bërthamore amerikane.

Komentet e Macronit erdhën pasi kancelari i ardhshëm gjerman, Friedrich Merz, sugjeroi bisedime me Francën dhe Britaninë e Madhe, dy fuqitë bërthamore të Europës, për ta zgjeruar mbrojtjen e tyre bërthamore. Kryeministri polak Donald Tusk e mbështeti idenë dhe madje propozoi që Polonia ta shqyrtojë marrjen e armëve bërthamore vetë.

CNN shkruan se edhe shërbimi i detyrueshëm ushtarak po rikthehet në kontinent e se edhe vendet tradicionalisht neutrale po rishqyrtojnë qëndrimet e tyre.

Uniteti Europian

Megjithëse duket se Europa e ka kuptuar mesazhin, një qasje e bashkuar është e parakohshme.

Kur Presidentja e Komisionit Europian, Ursula von der Leyen, prezantoi një plan për shpenzime miliardëshe për mbrojtjen, të quajtur fillimisht “ReArm Europe”, Spanja dhe Italia kundërshtuan. Plani tani është riemërtuar “Readiness 2030”.

CNN përmend ndasitë në Europë në lidhje me strategjinë e përbashkët në veprimet e përbashkëta.

Ndërsa kjo ndarje gjeografike mund t'i thellojë ndasitë, Buras nga ECFR tha se uniteti i plotë europian ka qenë gjithmonë një iluzion.

“Ajo që vërtet ka rëndësi është ajo që bëjnë vendet kryesore”, tha ai, duke përmendur Gjermaninë, Francën, Britaninë e Madhe dhe Poloninë. “Dua të jem kujdesshëm optimist, por mendoj se tani jemi në rrugën e duhur”.

I pyetur nëse marsi do të mbahet mend si muaji kur Europa u zgjua, Buras u përgjigj:

“Po, jemi zgjuar – por tani duhet të vishemi”.

The post CNN: Europa po zgjohet nga gjumi ushtarak pas “Trump shock” appeared first on Gazeta Express.

Presidenti i Republikës, Bajram Begaj, uroi sot besimtarët myslimanë për Fitër Bajramin, festë e cila shënon mbylljen e muajit të shenjtë të Ramazanit.

Mesazhe të veçanta Kreu i Shtetit u përcolli klerikëve gjatë vizitave që zhvilloi në institucionet e komunitetit mysliman dhe atij bektashi në Tiranë.

Presidenti Begaj i nisi vizitat me Xhaminë e Madhe e Tiranës, ku u prit nga Myftiu i kryeqytetit, Imam Bilal Teqja.

Presidenti u shpreh se hapja e dyerve të kësaj xhamie përmbushi kërkesën disavjeçare të besimtarëve, për të cilët ky ishte Ramazani i parë me Xhami të Madhe, e cila pret edhe turistë të shumtë, siç bëri me dije Myftiu i Tiranës.

Presidenti theksoi rëndësinë e unitetit mes besimtarëve dhe gjithë shqiptarëve, bashkë me urimin që devotshmëria e treguar gjatë këij muaji të vijojë deri në ardhjen e Ramazanit tjetër.

I shoqëruar nga Myftiu i Tiranës, Kreu i Shtetit përshkoi në këmbë rrugën drejt selisë së Komunitetit Mysliman Shqiptar, ku u prit nga Kryetari Bujar Spahiu, të cilit i përcolli urime për Fitër Bajramin, duke u shprehur:

“Gëzuar Fitër Bajramin! Qoftë kjo ditë e shënuar një ditë solidariteti, një ditë mirësie për të gjithë shqiptarët. Fjalët e Kuranit Famëlartë dhe të urtit, Profetit Mohamed, le të shërbejnë për çdo shqiptar, për çdo besimtar, si shembull frymëzimi në jetën e përditshme, të jemi solidarë me njëri-tjetrin, t’i shtrijmë dorën njëri-tjetrit, të ndihmojmë familjet në nevojë e të jemi të bashkuar në shërbim të interesit tonë madhor, në shërbim të interesit të harmonisë qytetare, të dialogut ndërfetar”, – theksoi Kreu i Shtetit.

Këtë Bajram të Madh Presidenti uroi edhe besimtarët bektashinj. Ai vizitoi selinë e Kryegjyshatës Botërore të Bektashinjve, ku u prit nga Haxhi Dede Baba Edmond Brahimaj, nga ku përcolli mesazhe mbi vlerat morale që mbajnë një shoqëri larg tundimit për të vrapuar drejt materiales.

The post Fitër Bajrami, Presidenti Begaj viziton institucionet fetare, bën thorrje për më shumë dashuri mes shqiptarëve appeared first on Gazeta Express.

Mijëra besimtarë myslimanë u mblodhën sot në Sheshin “Skënderbej” në Tiranë për të falur namazin e Fitër Bajramit, duke shënuar kështu përfundimin e muajit të shenjtë të Ramazanit.

Ceremonia nisi në orën 06:45 me leximin e Kuranit dhe ligjërata fetare, ndërsa falja e namazit u krye në orën 07:30. Pas ritualit, besimtarët u shpërndanë për të festuar me familjet dhe të afërmit, duke ndarë urime e dashuri në këtë ditë të shenjtë.

Kjo festë simbolizon solidaritetin dhe mirësinë, ku besimtarët ndajnë lëmoshë me nevojtarët përpara Bajramit, duke përmbushur një prej parimeve kryesore të fesë islame.

Në Shqipëri, Fitër Bajrami kremtohet nga të gjithë, pavarësisht besimit fetar, duke reflektuar harmoninë dhe bashkëjetesën mes komuniteteve.

The post Mijëra besimtarë falin namazin e Fitër Bajramit në Sheshin “Skënderbej” në Tiranë appeared first on Gazeta Express.

Kryetari i Partisë Demokratike, Sali Berisha, mori pjesë këtë të shtunë në një iftar të organizuar për besimtarët myslimanë të Degës 12, nga kandidati i Opozitës për Qarkun Tiranë, Ethem Aga.

Në fjalën e tij, Berisha shprehu respektin dhe vlerësimin për të gjithë ata që kanë agjëruar gjatë muajit të Ramazanit, duke e cilësuar këtë si një akt që forcon moralin dhe afrimin me Zotin.

"Dua të përulem me nderimin më të madh para të gjithëve ju që keni agjëruar këtë muaj të shenjtë, një sakrificë që fisnikëron shpirtin dhe e afron njeriun më shumë me Zotin", tha Berisha.

Me rastin e Natës së Bajramit, Berisha përcolli urimet e tij për mbarë besimtarët myslimanë.

"Le të festojmë Bajramin me besim më të madh te Zoti, me besim më të madh tek Shqipëria dhe me shpresën për një të ardhme më të mirë", theksoi ai.

Në përfundim të fjalës së tij, Berisha përcolli urimet më të përzemërta për të gjithë shqiptarët, duke dëshiruar gëzim, begati dhe paqe në familjet e tyre.

The post Berisha në Iftar: Nderim të madh për të gjithë ju që agjëruat appeared first on Gazeta Express.