Olimpique Marseille ka qenë shumë aktive këtë merkato, duke bërë disa transferime. Drejtori sportiv i Marseille, Med’hi Benatia, ka zbuluar se nuk ka ndërmend të ndalet me kaq dhe synimi i tij i radhës do jetë transferimi i Edon Zhegrovës.

Marokeni e pëlqen shumë fantazisin e Kosovës, sipas edhe raportimit të Fabrizio Romano, por edhe shumë mediave franceze, Marseille ka nisur zyrtarisht negociatat me Lille-n për transferimin e mundshëm të Zhegrovës.

Para se të arrijë marrëveshjen me Lille-n, Marseille duhet të zgjidhë një problem tjetër. Duke qenë se Edon Zhegrova nuk e ka statusin e të qenurit nga një vend anëtar i BE, Marseille momentalisht i ka të zenë 4 vendet me këtë status, ndaj duhet larguar njëri prej lojtarëve, për të liruar vendin Zhegrovës.

Duke qenë se kontrata e Zhegrovës skadon vitin e ardhshëm, Lille e vlerëson fantazistin shqiptar 15-20 milionë euro, shifër që mesa duket Marseille është e gatshme ta paguajë. m.p.

Një traget me 150 udhëtarë në bordin e tij ka pësuar avari dhe ka ngecur në tokë të thatë në brigjet e Evias në Greqi.

Ngjarja raportohet se ka ndodhur në Nea Stira, teksa pasagjerët po zbriten me urgjencë me varka e jelekë shpëtimi, pasi ka frikë e panik për një fundosje.

Mjeti lundrues paraprakisht njoftohet se kishte një rrjedhje të vogël uji. Në bord janë edhe 9 anëtarë të ekuipazhit.

Trageti operonte në itinerarin nga Nea Stira në Agia Marina, teksa ngeci sot pasdite (5 gusht) në bregun e Glaros, afërsisht dhjetë minuta pas nisjes së tij nga porti.

Sipas informacioneve, trageti “Panagia Paravouniotissa” mbante 105 pasagjerë dhe 9 anëtarë të ekuipazhit dhe ata janë në gjendje të mirë shëndetësore. Operacioni i transferimit të tyre filloi menjëherë me ndihmën e anijeve private dhe pasagjerët u transportuan të sigurt në portin e Nea Stira, raportoi media greke.

Tre anije të Rojës Bregdetare, anije private dhe një anije tjetër që transportonte pasagjerë nxituan në vendngjarje për të ndihmuar në proces.

“Nuk na u dhanë udhëzime, askush nuk na informoi, i gjetëm vetë jelekët e shpëtimit nën sedilje”, theksoi një pasagjer, duke folur për Mega, dhe shtoi: “e kuptuam manovrën e kapitenit dhe më pas ramë në një hendek. Kur erdhi momenti i evakuimit, kapiteni tha nëpërmjet altoparlantëve, “zbritni dhe hipni në varka”. m.p.

Është zbuluar shkaku i vdekjes së legjendarit të rokut të heavy metal, Ozzy Osborne. Sipas certifikatës së tij të vdekjes, këngëtari vdiq nga një ‘infarkt akut miokardi’ dhe ‘arrest kardiak jashtë spitalit’.

Vokalisti i Black Sabbath, i cili u diagnostikua me sëmundjen e Parkinsonit në vitin 2019, ndërroi jetë më 22 korrik i rrethuar nga familja e tij.

Ozzy u varros në oborrin e rezidencës së tij në Buckinghamshire javën e kaluar gjatë një funerali privat ku morën pjesë familja e tij dhe një mori artistësh të rokut.

Vdekja e tij erdhi vetëm disa javë pasi ai u shfaq në skenë për koncertin e tij të lamtumirës në stadiumin Villa Park në vendlindjen e tij, Birmingham. Koncerti e pa atë të ribashkohej me shokët e tij të parë të grupit Black Sabbath për herë të parë që nga viti 2005.

Më shumë se 42 mijë fansa mbushën vendin për shfaqjen Back To The Beginning, gjatë së cilës ai i tha turmës në fjalimin e tij të fundit: “Nuk keni ide se si ndihem, faleminderit nga thellësia e zemrës sime.”

Që nga vdekja e tij, fansat dhe miqtë në të gjithë botën kanë vërshuar me homazhe, me mijëra njerëz që vizitojnë stolin Black Sabbath në qytetin e lindjes së muzikantit, Birmingham, për të vendosur buqeta, kurora, postera, tullumbace, qirinj dhe kartolina. m.p.

Kryeministri i Suedisë, Ulf Kristersson, është përballur me kritika pasi pranoi se përdor rregullisht mjete të inteligjencës artificiale për të marrë një “mendim të dytë” në ushtrimin e detyrës së tij si udhëheqës i vendit.

Kristersson, partia e të cilit udhëheq koalicionin qeverisës të qendrës së djathtë në Suedi, tha se përdor mjete si ChatGPT dhe shërbimin francez LeChat. Ai shtoi se edhe kolegët e tij i përdorin AI-në në punën e përditshme.

Në një intervistë për gazetën suedeze të biznesit Dagens, Kristersson tha: “E përdor vetë mjaft shpesh. Nëse jo për gjë tjetër, atëherë për një mendim të dytë. Çfarë kanë bërë të tjerët? Dhe a duhet të mendojmë të kundërtën? Pyetje të këtij lloji”.

Megjithatë, ekspertët e teknologjisë kanë ngritur shqetësime për përdorimin e AI nga politikanët në këtë mënyrë, dhe gazeta Aftonbladet e akuzoi Kristerssonin në një editorial se ka “rënë pre e psikozës së AI-së së oligarkëve”.

Zëdhënësi i Kristerssonit, Tom Samuelsson, tha më vonë se kryeministri nuk merr rreziqe në përdorimin e AI-së: “Sigurisht që nuk bëhet fjalë për informacione të ndjeshme që përfundojnë atje. Përdoret më tepër për të marrë një ide të përgjithshme”.

Por, Virginia Dignum, profesoreshë e inteligjencës artificiale në Universitetin e Umeå-s, tha se AI nuk është në gjendje të japë një mendim domethënës për ide politike dhe se ajo thjesht pasqyron qëndrimet e atyre që e kanë ndërtuar. m.p.

Barcelona është e detyruar të bëjë të tjera shitje, për të bërë të mundur regjistrimin e transferimeve të reja, Joan garcia dhe Marcus Rashford, për sezonin e ri në La Liga.

Mes shumë emrave që kanë katalanasit në mesfushë, ai që duhet të sakrifikohet mesa duket është Marc Casado. Mesfushori difensiv, 21 vjeç, fitoi vëmendjen e të gjithëve me paraqitjet e tij në gjysmën e parë të sezonit të kaluar, më pas roli i tij në fushë filloi të zbehej për shkak të formës së shkëlqyer te Frenkie De Jong dhe të besuarit të Hansi Flick, Marc Bernal.

Në këtë mënyrë, drejtuesit e Barcelona kanë vendosur të nxjerrin në shitje Marc Casado. E ardhmja e mesfushorit spanjoll pritet të jetë në Bundesliga, aty ku Leverkusen po përgatit një ofertë 30 milionë euro për transferimin e tij. Trajneri Erik ten Hag e ka identifikuar mesfushorin katalanas si një nga nënshkrimet prioritare për të forcuar mesfushën.

Me siguri që Barcelona do mbajë një përqindje për shitjen e tij të radhës, si dhe një klauzolë riblerje, ndërsa detajet e tjera pritet të zbulohen së shpejti. m.p.

Jasir Asani, njoftoi transferimin e tij në Iran në mes të sezonit. Klubi Esteghlal njoftoi përmes faqes zyrtare se: “Ne kemi nënshkruar një kontratë 18- mujore me Asanin.”

Kontrata e Asanit me klubin e tij aktual, Guangzhou FC, skadon në janar të vitit të ardhshëm. Megjithatë, Esteghlal shtoi se po punojnë me Guangzhou FC për të siguruar që Asani t’i bashkohet ekipit sa më shpejt të jetë e mundur. Esteghlal është një klub prestigjioz, me nëntë tituj kampion dhe shtatë kupa në historinë e tij. Gjithashtu, ai ka bërë vazhdimisht paraqitje të mira në Ligën e Kampionëve të Konfederatës Aziatike të Futbollit (AFC).

Asani iu bashkua Guangzhou FC përpara sezonit 2023 dhe tërhoqi shpejt vëmendjen e tifozëve me goditjet e tij karakteristike me të majtën dhe depërtimet e shpejta. Ai ishte veçanërisht kërcënues nga distanca dhe në goditjet standarde, duke i dhënë gjallëri sulmit të Guangzhou FC-së. Në Ligën e Kampionëve AFC Elite (ACLE) 2024–25, të mbajtur në mars, ai luajti në dhjetë ndeshje, duke shënuar nëntë gola dhe duke dhënë një pasim për gol, çka e çoi skuadrën në çerekfinale.

Asani bëri transferimin duke përfituar nga rregulli “Bosman”, i cili u lejon lojtarëve të negociojnë lirisht me klube të tjera gjashtë muaj para skadimit të kontratës së tyre. Për shkak të situatës financiare të Guangzhou FC, pritej që Asani të transferohej te Yokohama F. Marinos në Japoni këtë verë, por ai zgjodhi të qëndrojë. Lajmi i papritur i transferimit, së bashku me mundësinë e largimit të tij të parakohshëm gjatë sezonit, ishte një tronditje për tifozët e Guangzhou FC-së.

Në Korenë e Jugut, disa e panë vendimin si zhgënjyes. “Asi” i skuadrës, Asani, sipas tyre, i zhgënjeu tifozët duke shpallur transferimin e tij ndërkohë që kontrata e tij ishte ende e vlefshme. Një burim i brendshëm i klubit korean tha: “Situata midis Esteghlalit dhe Asanit është e rrallë në futboll. Kur një lojtar transferohet, të dy klubet zakonisht bien dakord ta njoftojnë njëkohësisht në një moment të caktuar. Ose, zakonisht është klubi ‘mëmë’ që e bën njoftimin. Ky njoftim nga Esteghlal për transferimin e Asanit tregon mungesë respekti për Guangzhou FC-në.”

Vetë Guangzhou FC deklaroi: “Asani premtoi të qëndronte me ekipin nëse nuk do të transferohej deri në periudhën shtesë të regjistrimit të lojtarëve (24 korrik), por ai e tradhtoi besimin. Ne konfirmuam përmes rrjeteve sociale se Esteghlal dëshironte që ai të bashkohej më herët, por asgjë nuk është vendosur ende.” Një zyrtar i klubit korean përmblodhi situatën: “Nuk ka pasur ende kontakt me Esteghlalin. Nëse ata dëshirojnë që Asani të transferohet para kohe, do të duhet të zhvillohen negociata për një tarifë transferimi. Por përpara kësaj, vendimi i trajnerit është thelbësor. Ne do të vendosim nëse Asani do të luajë pjesën e mbetur të sezonit apo jo. Lojtarët aktualisht janë me pushime. Do të takohemi me trajnerin për të shqyrtuar situatën aktuale.” m.p.

Robotët tokësorë që ndihmojnë ushtrinë ukrainase kanë marrë një funksion tjetër të rëndësishëm: një kullë speciale e bazuar në inteligjencën artificiale gjen dhe rrëzon në mënyrë të pavarur dronë armik.

Kjo u njoftua nga Zëvendëskryeministri i Parë – Ministri i Transformimit Dixhital, Mykhailo Fedorov.

“Robotët tokësorë tashmë po e ndryshojnë fushën e betejës — transportojnë ngarkesa, evakuojnë të plagosurit dhe vendosin mina. Tani këtyre po u shtohet një funksion tjetër — goditja e dronëve armik. Kjo u bë e mundur falë bashkëpunimit të dy pjesëmarrësve në Brave1 — prodhuesve të NRK TerMIT dhe kullës Predator. Kulla e bazuar në inteligjencën artificiale mund të zbulojë dhe shkatërrojë automatikisht dronë armik. Kontrolli në distancë i robotit zvogëlon rrezikun për ushtarët ukrainas”, shkroi ai në Telegramin e tij. m.p.

Presidenti Trump ka paralajmëruar Bashkimin Europian me tarifa prej 35% nëse nuk përmbushet premtimi i marrëveshjes, për investime prej 600 miliardë dollarësh në SHBA. Në një intervistë për emisionin ‘Squawk Box’ të CNBC, presidenti Trump mbështeti qëndrimin e SHBA-së se marrëveshja që arriti nëpërmjet një shtrëngimi duarsh me Presidenten e Komisionit Ursula von der Leyen, në Skoci më 27 korrik, përfshinte një premtim që BE-ja të investonte 600 miliardë dollarë në SHBA deri në fund të mandatit të tij të dytë.

“Ky investim i ri është përveç mbi 100 miliardë dollarëve që kompanitë e BE-së investojnë tashmë në Shtetet e Bashkuara çdo vit”, thuhej në fletën e fakteve pas marrëveshjes.

Komisioni Evropian nuk është në gjendje të hartojë dhe zbatojë investime në emër të sektorit privat. 600 miliardë dollarët janë përshkruar nga Komisioni si një tregues i bazuar në kontaktet e ekzekutivit me industrinë.

“Nuk është diçka që BE-ja, si autoritet publik, mund ta garantojë, është diçka e bazuar në qëllimin e kompanive private”, tha një zyrtar i lartë javën e kaluar.

I pyetur në Squawk Box se çfarë kishte në elementin e premtimit për investime të marrëveshjes, Trump tha se nëse nuk ndodhte, “atëherë ata paguanin tarifa prej 35%”.

Trump tha se premtimi për investime ishte një nga arsyet pse ai i kishte ulur tarifat në një normë të përgjithshme prej 15%, kështu që nëse nuk përmbushet, atëherë tarifat më të larta do të rikthehen në fuqi.

Komisioni të martën pezulloi një paketë kundërmasash tregtare që synonin mallra amerikane me vlerë 93 miliardë euro, e cila ishte planifikuar të hynte në fuqi më 7 gusht, ndërsa vazhdon të negociojë një deklaratë të përbashkët që formalizon marrëveshjen e arritur nga Von der Leyen dhe Trump në Skoci. m.p.

Pavarësisht se shumë e kritikuar, duket se marrëveshja e lidhur mes Italisë dhe Shqipërisë për hapjen e kampeve të emigrantëve, po merret shembull.

Fillimisht ishte plani i Britanisë së Madhe për të dërguar emigrantët e paligjshëm në Ruanda por gjithçka ka mbetur në letër. Megjithatë, përtej Atlantikut, ky plan është bërë realitet. Qeveria e Ruandës njoftoi të martën se do të pranojë deri në 250 emigrantë që do të deportohen nga Shtetet e Bashkuara sipas një marrëveshjeje të arritur me Uashingtonin.

“Ruanda ka rënë dakord me Shtetet e Bashkuara për të pranuar deri në 250 emigrantë. Kjo marrëveshje vjen kryesisht sepse pothuajse të gjitha familjet ruandeze i njohin vështirësitë e zhvendosjes dhe vlerat tona shoqërore bazohen në riintegrimin dhe rehabilitimin”, shpjegoi zëdhënësja e qeverisë Yolande Makolo. m.p.

Deputetë të opozitës në Kuvendin e Serbisë, në prag të zgjedhjeve lokale në Kosovë, po punojnë aktivisht për formimin e subjekteve politike në Kosovë – veprim ky që është kritikuar nga pushteti në Beograd, por edhe nga Lista Serbe, që vepron në Kosovë me mbështetjen e autoriteteve serbe.

Bashkimi më i fundit i partisë opozitare serbe Fytyra e re e Serbisë, me nismën qytetare Drejtësia Popullore nga Leposaviqi, është cilësuar nga Lista Serbe, partia kryesore e serbëve në Kosovë, si “zgjatje e dorës së Albin Kurtit”.

Fytyra e re e Serbisë dhe Drejtësia Popullore kanë paralajmëruar se do të marrin pjesë në zgjedhjet lokale të 12 tetorit në Kosovë nën emrin “Fytyra e Re – Drejtësia Popullore”.

Lideri i Fytyrës së Re të Serbisë, njëherësh deputet në Kuvendin e Serbisë, Millosh Parandilloviq, tha se bashkimi me partinë nga Leposaviqi është “luftë kundër regjimit të [presidentit të Serbisë] Aleksandar Vuçiqit dhe [kryeministrit në detyrë të Kosovës] Albin Kurtit”.

Ai i është përgjigjur akuzave të Listës Serbe duke thënë se ajo, së bashku me Partinë Progresive Serbe dhe presidentin Vuçiq, janë “aleatët më të mëdhenj” të regjimit në Prishtinë dhe se “kanë frikë nga çdokush që u rrezikon pozitën”.

Fytyra e Re e Serbisë mori pjesë në zgjedhjet e fundit parlamentare në Serbi, në fillim të vitit të kaluar, si pjesë e listës “Serbia kundër dhunës”, e cila fitoi 65 nga gjithsej 250 ulëse në Kuvendin e Serbisë.

Më herët, Lëvizja Popullore Serbe dhe Demokracia Serbe të Aleksandar Arsenijeviqit kishin bërë thirrje për bashkim dhe krijimin e një platforme politike me të cilën serbët e Kosovës do t’i kundërviheshin politikave aktuale të qeverive në Prishtinë dhe Beograd.

Ndërkohë, me mbështetjen e deputetit në Parlamentin serb Zharko Ristiq, është themeluar edhe një subjekt i ri politik i serbëve në Kosovë, i quajtur Aleanca e Kosovës. Në Kosovë, këtë iniciativë e udhëheq Goran Marinkoviq nga Dobrotini i Graçanicës.

Megjithatë, Lista Serbe – që gëzon mbështetjen e Qeverisë aktuale të Serbisë – ka deklaruar se Albin Kurti po përpiqet të eliminojë “përfaqësuesit autentikë të serbëve dhe të uzurpojë institucionet e këtij komuniteti”.

Miodrag Marinkoviq, nga Qendra për Veprime Shoqërore Afirmative (CASA), në një bisedë për Radion Evropa e Lirë, vlerësoi se sulmet nga Beogradi ndaj aktorëve të rinj politikë në komunitetin serb në Kosovë tregojnë vetëm një gjë: që këta aktorë nuk janë nën kontrollin e Beogradit. m.p.

Milan po përgatitet për një sezon të ri ambicioz në 2025/26, me një formacion të mbushur me yje dhe përforcime të bujshme.

Sipas raportimeve të fundit, nëse realizohen të gjitha objektivat e merkatos, kuqezinjtë do të kenë një formacion tejet konkurrues, ku në mesfushë do të vendoset talenti shqiptar me pasaportë zvicerane, Ardon Jashari.

Në skemën 3-4-3 të projektuar, Jashari është vendosur në zemër të mesfushës përkrah legjendës kroate Luka Modric, duke formuar një dyshe që kombinon freskinë, energjinë dhe saktësinë me përvojën dhe vizionin.

Përpara tyre do të veprojnë treshen sulmuese të përbërë nga Rafael Leao në të majtë, Christian Pulisic në të djathtë dhe Rasmus Højlund në qendër (nëse realizohet transferimi nga Manchester United).

Në krahët e mbrojtjes do të pozicionohen Estupinan dhe Jimenez, të cilët ofrojnë shpejtësi dhe stabilitet në të dy fazat e lojës.

Ndërkohë, prapavija do të mbështetet në një treshe të fortë qendrore: Pavlovic, Thiaw dhe Tomori, me Mike Maignan që mbetet zgjedhja e padiskutueshme mes shtyllave. m.p.

“Kosova po humb mundësi si pasoje e ngërçit politik në vend.”

Ky është qëndrimi i të ngarkuarës me punë në Ambasadën e SHBA-së në Prishtinë, Anu Prattipati. Për mediat lokale ajo tha ndër të tjera tha se kompanitë amerikane kërkojnë stabilitet institucional për të investuar në Kosovë dhe se nëse kjo nuk ndodh bizneset kërkojnë vende të tjera.

“Formimi i një qeverie pas zgjedhjeve është një funksion bazik demokratik, dhe ky bllokim i vazhdueshëm politik po rezulton në humbje të mundësive për Kosovën. Administrata Trump kërkon aleatë të fortë me të cilët mund t’i avancojmë prioritetet tona; një vend pa institucionet bazë dhe me një rrugë të pasigurt drejt krijimit të tyre është një partner te i cili nuk mund të mbështetemi gjithmonë plotësisht.”- deklaroi ajo. m.p.

Jeffrey Epstein mori letra urimi nga disa prej miqve të tij më të afërt me rastin e ditëlindjes së tij të 63-të, në janar të vitit 2016. Shumica prej tyre ndanin kujtime nga darkat luksoze që ai organizonte rregullisht në rezidencën e tij në Manhattan. Ish-kryeministri izraelit Ehud Barak dhe bashkëshortja e tij e përshkruan Epsteinin si një njeri me kuriozitet pa kufij, që dinte gjithçka për të gjithë. Manjati i medias Mortimer Zuckerman përmendi se darkat përfshinin ushqime që supozohej se përmirësonin performancën seksuale të Epstein. Regjisori Woody Allen i krahasoi ato me skena nga kështjella e Drakulës, megjithëse rezidenca 7-katëshe në fakt ishte një qendër ndikimi për të pasurit dhe të fuqishmit.

Pas vdekjes së Epstein në vitin 2019, shumë mistere mbeten ende të pazgjidhura, përfshirë burimin e pasurisë së tij dhe lidhjet me figura të njohura edhe pas akuzave për abuzim seksual. Shtëpia e Bardhë fillimisht premtoi transparencë mbi hetimet federale, por administrata Trump u tërhoq nga ky angazhim, duke nxitur reagime të ashpra nga e djathta. Për të zbutur presionin, Departamenti i Drejtësisë zhvilloi një takim me Ghislaine Maxwell, bashkëpunëtore e ngushtë e Epstein, e cila po vuan një dënim 20-vjeçar për trafik seksual. Maxwell, që për vite kishte një zyrë brenda rezidencës së Epstein në Nju Jork, u transferua së fundmi në një burg me siguri më të ulët, duke nxitur spekulime për një marrëveshje të mundshme me ish-presidentin Trump.

Rezidenca në Manhattan, e blerë nga miliarderi Les Wexner, shërbeu si pikë takimi për akademikë, politikanë dhe biznesmenë, ndërsa dekori i saj përfshinte elementë të çuditshëm si një skulpturë nusërie me litar në qendër të shtëpisë. Fotot e publikuara së fundmi tregojnë detaje tronditëse nga brendësia e shtëpisë, përfshirë një kopje të romanit “Lolita” dhe një hartë të Izraelit me firmën e Ehud Barakut. Në një album të ngjashëm me letra, dhuruar për ditëlindjen e tij të 50-të, ndodheshin edhe urime nga Donald Trump dhe Bill Clinton. Tashmë, Komiteti Mbikëqyrës i Dhomës së Përfaqësuesve në SHBA ka kërkuar zyrtarisht nga Departamenti i Drejtësisë të dorëzojë të gjitha dokumentet lidhur me Epstein deri më 19 gusht dhe ka thirrur në gjyq disa figura të larta të politikës amerikane.

Spekulimet për rikthimin e Zinedine Zidane në stolin e trajnerit po intensifikohen gjithnjë e më shumë. Edhe pse emri i tij nuk u përmend shpesh gjatë merkatos së verës, duket se legjenda franceze ka një plan të qartë në mendje: të marrë drejtimin e kombëtares së Francës, raporton Defensa Central.

Vetë Zidane e ka konfirmuar në një deklaratë të fundit se drejtimi i “Trikolorëve” është objektivi i tij madhor: “Ka një trajner aktualisht në krye, një ekip që duhet respektuar, dhe kjo është ajo që bëjmë. Gjithmonë kam respektuar futbollin dhe njerëzit, prandaj ky nuk është momenti i duhur. Por, kur të vijë koha, do të jetë një kënaqësi e madhe për mua nëse më jepet mundësia. E kam lënë karrierën në pritje, por ndjehem plotësisht si trajner,” u shpreh Zidane.

Nga ana tjetër, trajneri aktual i Francës, Didier Deschamps, i cili pritet të largohet pas Kupës së Botës 2026, nuk i mbylli dyert mundësisë që Zidane ta pasojë.

“Kemi kaluar shumë vite bashkë dhe vazhdojmë ta respektojmë njëri-tjetrin. Nuk jemi miq të ngushtë, por gjithmonë do të ketë respekt mes nesh. Ai është një kandidat shumë i mirë, natyrshëm i tillë dhe, do të shtoja, i pritshëm”, kishte thënë Deschamps. mp.

Duke parë rezistencën e Atalantës që nuk lejon largimin e Ademola Lookman tek Inter, drejtuesit e klubit zikaltër nuk po rrijnë më duarkryq dhe janë hedhur në sulm për dy yje të tjerë.

“Corriere dello Sport” raporton se Inter po ndjek dy lojtarë të tjerë, i pari është belgu i Leipzig, Lois Openda, të cilin klubi zikaltër e kërkoi edhe vjet, por u refuzua nga gjermanët. Vetë lojtari është i hapur për transferimin tek zikaltrit, duke ditur që Leipzig nuk do marrë pjesë në Kupat e Europës këtë sezon. Vlera e tij në Transfermarkt është 50 milionë euro.

Një emër tjetër që po ndjek klubi zikaltër është edhe Mason Greenwood. Vetëm se transferimi i anglezit duket më i komplikuar, duke ditur që Olimpique Marseille e vlerëson 80 milionë euro. Për momentin, belgu i Leipzig, Lois Openda, i cili shënoi 13 gola dhe dha 11 asiste sezonin e kaluar, është më i arritshëm për klubin zikaltër. m.p.

Çmimi i Madh i Hungarisë në Formula 1 nuk shkoi aspak mirë për kampionin në fuqi të botës, Maks Vershtapen. Piloti i Red Bullit nuk ishte në gjendje të luftonte për kreun, duke e mbyllur garën e të dielën në vendin e nëntë.

Pas këtij rezultati, piloti holandez pranoi se nuk ishte një fundjavë e mirë për ekipin, ndërsa theksoi se makina e tij kishte probleme me ekuilibrin, duke i munguar ritmi apo kontrolli. “Po shkonte mirë me shpejtësi të lartë, por nuk kishte kontroll në shpejtësi mesatare dhe të ulëta. Nuk ishte një fundjavë e mirë për ekipin dhe nuk ishim në gjendje të ndryshonim ritmin gjatë garës”, deklaroi Vershtapen.

Piloti holandez tha gjithashtu se strategjia me një ndalesë në bokse ishte një rrezik, veçanërisht me zgjedhjen e gomave që po shkonte keq. “Ka qenë një sezon i vështirë për ne. Shpresojmë që gjysma e dytë e sezonit të jetë më e mirë dhe që të marrim rezultate. E dimë që nuk po garojmë më për kampionatin, por do të përpiqemi të bëjmë më të mirën tonë çdo fundjavë”, përfundoi Maks Vershtapen, i cili shkon me pushime në vendin e tretë dhe me diferencë të madhe nga dyshja e MekLarenit. m.p.

Presidentja zvicerane Karin Keller-Sutter thuhet se është përpjekur ta sjellë në vete Presidentin e SHBA-së Donald Trump në mosmarrëveshjen për tarifat në një bisedë telefonike.

Siç raporton media gjermane Die Welt, nga Uashingtoni mbërriti një mesazh me tekst: “Ndërpriteni këtë telefonatë, përndryshe situata do të përkeqësohet.” Dy minuta më vonë, telefonata midis Zvicrës dhe SHBA-së përfundoi.

Sipas raportit, Presidentja Federale në fakt kishte arritur një sukses të pjesshëm në muajt paraprakë: Pasi Trump vendosi tarifa ndëshkuese prej 31 përqind ndaj Zvicrës më 2 prill, ajo të paktën arriti të arrinte një shtyrje – deri më 1 gusht.

Sekretariati Shtetëror për Çështjet Ekonomike filloi më pas negociatat me qeverinë amerikane. Brenda tre javësh, Këshilli Federal paraqiti një mandat zyrtar negociues: tarifa prej 10 përqind dhe investime zvicerane në SHBA deri në 200 miliardë franga zvicerane.

Trump caktoi dy herë një mbledhje të kabinetit për të nënshkruar marrëveshjen. Dy herë ajo u anulua. Kur u pyetën për këtë, ministrat amerikanë u përgjigjën: “Për aq sa dimë, keni bërë përparim të konsiderueshëm në negociata; ne do t’ju mbajmë të informuar.”

Thuhet se Keller-Sutter këmbënguli për një telefonatë tjetër me Donald Trump. Në orën 8 të mbrëmjes më 31 korrik, Presidentja zvicerane priti rreth dhjetë minuta për të folur me Trump. Pas një shkëmbimi të shkurtër vërejtjesh të sjellshme, ata filluan punën. Trump e bëri të qartë pa mëdyshje se e konsideronte të pamjaftueshme një tarifë prej 10 përqind, duke marrë parasysh një deficit tregtar prej 39 miliardë dollarësh të shkaktuar nga nëntë milionë qytetarë zviceranë. Ai po kërkon një tarifë dukshëm më të lartë.

Presidentja zvicerane vazhdoi të përpiqej të shpjegonte veten – Trump i hodhi poshtë argumentet e saj si “moraliste” dhe nisi një tarifë të shtuar: 30 përqind.

Pas rreth 30 minutash, Sekretarja e Shtetit Helene Budliger mori një mesazh nga Uashingtoni. Mesazhi ishte i qartë: biseda duhej të ndërpritej përpara se të dilte jashtë kontrollit. Pasi telefonata mbaroi, Keller-Sutter i shpalli negociatat për çështjen X si të dështuara. Dy orë më vonë, Presidenti Federal mori lajme shkatërruese nga Uashingtoni: tarifa prej 39 përqind për Zvicrën. m.p.

Liverpool luajti ditën e djeshme dy miqësore ndaj Athletic Bilbao, të cilat i fitoi të dyja. Të parën me rezultatin 4-1 dhe të dytën me rezultatin 3-2. Në ndeshjen e parë, surpriza më e madhe ishte djaloshi Rio Ngumoha, autor i golit të parë dhe dha asistin në golin e dytë të Darwin Nunez.

16-vjeçari po konsiderohet te Liverpool si zëvendësuesi ideal i Luis Diaz në krahun e majtë, kolumbiani u transferua te Bayern Munich për 75 milionë euro pak ditë më parë. Dhe gjithë këto ditë, pyetja ka qenë kush do e marrë vendin e Luis Diaz.

Mesa duket, Arne Slot e ka vendosur që më parë, që këtë vend do ia besojë djaloshit 16-vjeçar, ndaj dhe nuk kundërshtoi fare për largimin e Luis Diaz. Edhe pse ende një “fëmijë”, Ngumoha të habit me pjekurinë që tregon në fushë dhe aftësinë për të depërtuar pa probleme në zonën e kundërshtarit.

Rio Ngumoha nuk përfaqëson vetëm të ardhmen: edhe pse është vetëm 16 vjeç, ai tashmë po provon se mund të jetë pjesë e së tashmes së Liverpool dhe është e sigurt që sezonin e ri do flitet dhe do dëgjojmë shumë për të. m.p.

Darwin Nunez është në dilemë të madhe këtë verë.

Milani planifikon të bëjë një ofertë zyrtare këtë javë për sulmuesin e Liverpool. Igli Tare synon një huazim me të detyrim blerjeje. Shifrat nuk janë ende të qarta, por po përflitet për 45 deri në 50 mln euro.

Al-Hilal gjithashtu ka treguar interes serioz për uruguaianin dhe mund të prishë planet e “Djallit”. Klubi nga Arabia Saudite mund t’i ofrojë pagë marramendëse sulmuesit.

Deri tani, Nunez nuk ka vendosur asgjë. Ai po pret ofertat. Ekziston një mundësi që Milani ta bindë. m.p.

Agjencia hapësinore amerikane, NASA, do të përshpejtojë planet për të ndërtuar një reaktor bërthamor në Hënë deri në vitin 2030, sipas mediave amerikane.

Është pjesë e ambicieve të SHBA-së për të ndërtuar një bazë të përhershme për njerëzit që të jetojnë në sipërfaqen hënore.

Sipas Politico, kreu në detyrë i NASA-s iu referua planeve të ngjashme nga Kina dhe Rusia dhe tha se këto dy vende “mund të shpallin potencialisht një zonë ndalimi” në Hënë.

Por mbeten pikëpyetje se sa realistë janë qëllimi dhe afati kohor, duke pasur parasysh shkurtimet e fundit dhe të mëdha të buxhetit të NASA-s, dhe disa shkencëtarë janë të shqetësuar se planet drejtohen nga qëllime gjeopolitike.

Kombe duke përfshirë SHBA-në, Kinën, Rusinë, Indinë dhe Japoninë po nxitojnë të eksplorojnë sipërfaqen e Hënës, me disa që planifikojnë vendbanime të përhershme njerëzore.

“Për të avancuar siç duhet këtë teknologji kritike, në mënyrë që të jetë në gjendje të mbështesë një ekonomi hënore në të ardhmen, gjenerimin e energjisë me fuqi të lartë në Mars dhe për të forcuar sigurinë tonë kombëtare në hapësirë, është e domosdoshme që agjencia të veprojë shpejt”, i shkroi NASA-s sekretari amerikan i transportit, Sean Duffy, i cili u emërua drejtor i përkohshëm i NASA-s nga Presidenti Donald Trump, sipas New York Times. m.p.