Real Madridi raportohet se është i gatshëm të shqyrtojë largimin e Vinicius Juniorit gjatë kësaj vere, nëse Arsenali e konkretizon interesimin e tij me një ofertë të madhe financiare.

Sipas Daily Mail, bisedimet për rinovimin e kontratës së brazilianit kanë ngecur dhe nuk kanë shënuar asnjë përparim gjatë 12 muajve të fundit.

Vinicius, i cili ka hyrë në sezonin e fundit të kontratës së tij me klubin madrilen, po kërkon një pagë të ngjashme me atë të Kylian Mbappes, futbollistit më të paguar në skuadër, si dhe një bonus të majmë besnikërie. Nga ana tjetër, Real Madridi nuk dëshiron të rrezikojë ta humbasë lojtarin si futbollist të lirë në verën e vitit 2027.

Raporti shton se trajneri Jose Mourinho nuk pritet ta bllokojë një transferim të mundshëm, pavarësisht se e vlerëson shumë cilësinë e Viniciusit.

Portugezi besohet se largimi i brazilianit do ta zgjidhte një problem taktik që kishte shqetësuar edhe paraardhësit e tij, Carlo Ancelottin dhe Xabi Alonson. Sipas raportit, Viniciusi dhe Mbappe preferojnë të luajnë në të njëjtat hapësira të sulmit, ndërsa kontributi i tyre në fazën mbrojtëse është i kufizuar.

Probleme raportohet se ka pasur edhe jashtë fushës. Marrëdhënia mes Viniciusit dhe Mbappes nuk ka qenë ideale, me francezin që, sipas Daily Mail, e konsideronte brazilianin si një nga arsyet që çuan në largimin e Xabi Alonsos.

Gjithçka nisi pasi Vinicius reagoi ashpër ndaj një zëvendësimi, duke krijuar tensione që dobësuan pozitën e trajnerit spanjoll. Alonso u shkarkua më vonë, pavarësisht se Mbappe kishte tentuar ta mbështeste duke luajtur në Superkupën e Spanjës edhe pse nuk ishte plotësisht i gatshëm fizikisht.

Raporti rikujton edhe përplasjen mes Mourinhos dhe Viniciusit pas ndeshjes së play-offit të Ligës së Kampionëve ndaj Benficas.

Mourinho merr vendimin përfundimtar për Vinicius pas interesimit nga Arsenali

Braziliani kishte akuzuar Gianluca Prestiannin për ofendime raciste, ndërsa Mourinho deklaroi pas ndeshjes se nuk mund të konfirmonte versionin e asnjërës palë. Trajneri kritikoi gjithashtu mënyrën se si Viniciusi festoi golin e tij, gjë që nuk u prit mirë nga kampi i futbollistit dhe marrëdhëniet mes tyre mbetën të ftohta.

Me negociatat për kontratën që vazhdojnë të jenë të bllokuara, Real Madridi ka dy alternativa.

Klubi mund t'i plotësojë kërkesat e Viniciusit me një kontratë prej 30 milionë eurosh në sezon, plus një bonus besnikërie prej 15 milionë eurosh, ose ta shesë atë gjatë kësaj vere nëse Arsenali paraqet një ofertë të kënaqshme, duke shmangur kështu rrezikun që ta humbasë pa dëmshpërblim pas skadimit të kontratës./Telegrafi/

Boksieri shqiptar i kategorisë së rëndë, Kristian Prenga, do të ngjitet sonte në ring për sfidën më të madhe të karrierës së tij, ku do të përballet me ish-kampionin e botës, Anthony Joshua.

Dueli do të zhvillohet në Arabinë Saudite, në një mbrëmje të madhe boksi ku vëmendja do të jetë te rikthimi i britanikut në ring.

Për Joshuan, kjo përballje ka një rëndësi të veçantë, pasi shërben si përgatitje dhe test para superduelit të shumëpritur me Tyson Furyn, i planifikuar të zhvillohet në fund të këtij viti.

Përtej një dueli boksi: Pse përballja me Anthony Joshuan ka rëndësi jetike për Prengën

Britaniku hyn në këtë sfidë si favorit i madh, por Prenga ka përpara një mundësi të artë për të treguar vlerat e tij në skenën më të madhe të boksit botëror.

Sipas raportimeve nga mediat britanike, programi i mbrëmjes mund të pësojë vonesa për shkak të dueleve paraprake, ndërsa përballja mes Kristian Prengës dhe Anthony Joshuas pritet të nisë rreth orës 00:00 sipas kohës lokale në Kosovë.

Për boksierin shqiptar kjo është një natë që mund t’i ndryshojë karrierën, pasi një paraqitje e fortë ndaj një emri si Joshua do ta vendoste atë në qendër të vëmendjes ndërkombëtare./Telegrafi/

Kur u konfirmua se Kristian Prenga do të përballej me Anthony Joshuan, shumë e panë këtë si një luftë ku favoriti është i qartë.

Dy herë kampioni i botës është emri i madh, ndërsa Prenga konsiderohet "outsider". Megjithatë, për boksierin shqiptar kjo nuk është thjesht një ndeshje. Është momenti që mund t'ia ndryshojë tërësisht karrierën.

Mundësia që nuk vjen dy herë

Në boksin profesionist, jo çdo sportist arrin të përballet me një ikonë si Anthony Joshua. Prenga e ka ndërtuar karrierën larg dritave të skenës së madhe, duke regjistruar fitore dhe një përqindje mbresëlënëse nokautesh, por pa pasur rastin të përballet me elitën e kategorisë së rëndë.

Përballja me Joshuan është bileta e tij drejt nivelit më të lartë të sportit.

Edhe në rast humbjeje, nëse arrin të zhvillojë një duel dinjitoz dhe ta vendosë Joshuan në vështirësi, emri i tij do të hyjë në radarët e promotorëve, televizioneve dhe organizatorëve të mëdhenj.

Një fitore do të trondiste botën e boksit

Nëse Prenga arrin ta mposhtë Anthony Joshuan, nuk do të ishte thjesht surpriza e vitit.

Do të ishte një nga fitoret më të mëdha në historinë e boksit shqiptar.

Joshua është ende një prej emrave më të mëdhenj në kategorinë e rëndë dhe kjo ndeshje shihet si hapi i fundit përpara superduelit të planifikuar me Tyson Furyn.

Një humbje e Joshuas ndaj Prengës do ta rrëzonte të gjithë planin milionësh të organizatorëve dhe do ta kthente shqiptarin në një prej emrave më të kërkuar në sport.

Presioni është te Joshua, jo te Prenga

Në letër, Joshua ka gjithçka për të humbur.

Ai rikthehet në ring pas një periudhe të vështirë personale dhe sportive dhe konsiderohet favorit absolut. Mediat britanike e shohin këtë duel si testin e fundit përpara përballjes me Tyson Furyn.

Prenga, ndërkohë, hyn në ring pa barrën e favoritit. Kjo e bën atë të rrezikshëm.

Në kategorinë e rëndë mjafton një goditje për të ndryshuar historinë e një mbrëmjeje.

Zbulohet shuma marramendëse që pritet të fitojë Kristian Prenga nga dueli me Joshuan

Shansi për të ndryshuar jetën financiarisht

Edhe aspekti ekonomik është i jashtëzakonshëm.

Raportimet flasin se Prenga do të arkëtojë shpërblimin më të madh të karrierës së tij nga kjo përballje, ndërsa ekspozimi global përmes DAZN dhe interesimi ndërkombëtar do t'i rrisin ndjeshëm vlerën në treg.

Nëse zhvillon një paraqitje të mirë, ofertat për duele të tjera të mëdha mund të vijnë menjëherë.

Përfaqësimi i Shqipërisë në skenën më të madhe

Prenga nuk futet në ring vetëm si individ.

Ai është një boksier shqiptar që do të ketë përballë një prej ikonave të sportit botëror.

Një paraqitje e mirë do të ishte reklamë jo vetëm për karrierën e tij, por edhe për boksin shqiptar, i cili rrallëherë ka pasur një përfaqësues në një skenë kaq të madhe./Telegrafi/

Mitrovica po vazhdon të shkëlqejë në arenën evropiane. Kampionet e Kosovës kanë siguruar kualifikimin në gjysmëfinalen e raundit të dytë kualifikues të Ligës së Kampionëve për femra, pasi mposhtën kampionin e Bullgarisë, Ludogorets Razgrad, me rezultat 2-0.

Ndeshja u zhvillua të shtunën në stadiumin “Fadil Vokrri” në Prishtinë dhe ishte finalja e raundit të parë kualifikues të Ligës së Kampionëve.

Mitrovica tregoi edhe një herë cilësinë e saj, duke dominuar ndaj kampioneve bullgare dhe duke siguruar një fitore të merituar.

Golat që vulosën kualifikimin u realizuan nga Aurora Mulliqi dhe Gresa Berisha, të cilat i dhanë skuadrës kosovare një tjetër sukses të madh në garat evropiane.

Ky triumf vjen vetëm pak ditë pasi Mitrovica kishte dhuruar spektakël ndaj kampiones së Moldavisë, Zimbru Chisinau, të cilën e mposhti me rezultat të thellë 10-0./Telegrafi/

Dani Olmo ka reaguar për incidentin e krijuar në fund të ndeshjes mes Spanjës dhe Argjentinës, ku pati tensione mes futbollistëve dhe pjesëtarëve të stafit argjentinas.

Ngjarja bëri bujë të madhe në media dhe rrjetet sociale, ku u publikuan pamje të ndryshme nga ajo që ndodhi pas përfundimit të ndeshjes.

Përveç videove, në ditët në vijim u publikuan edhe regjistrime audio, në njërin prej të cilëve Roberto Ayala, pjesë e stafit të Argjentinës, dyshohet se kërkon falje për incidentin.

Megjithatë, Olmo nuk duket se e ka pranuar këtë falje. Futbollisti spanjoll ka argumentuar se një kërkimfalje humb kuptimin nëse në të njëjtën kohë tentohet të justifikohet veprimi.

U kap duke sulmuar Dani Olmon pas finales së Botërorit, legjenda argjentinase thyen heshtjen

“Nëse dikush thotë se i vjen keq dhe në të njëjtën kohë e justifikon grushtin dhe pretendon se ishte një reagim ndaj fyerjes sime, atëherë ndoshta nuk i vjen keq vërtet. Nuk po e thonë të vërtetën, sepse unë nuk u thashë asgjë dhe për këtë arsye nuk kam nevojë për faljen e tyre”, ka deklaruar Olmo.

23-vjeçari ka mohuar kështu pretendimin se incidenti ishte shkaktuar nga ndonjë provokim apo fyerje e tij ndaj pjesëtarëve të Argjentinës.

Olmo ka preferuar të mos ndalet vetëm te ajo që ndodhi, por ka dhënë edhe një mesazh për mënyrën se si duhet të sillemi pas gabimeve, duke e bërë të qartë se përgjegjësia dhe sinqeriteti janë më të rëndësishme sesa përpjekja për ta arsyetuar një veprim.

“Ajo që na përcakton vërtet nuk është gabimi, por guximi për ta pranuar atë me përulësi, ndershmëri dhe dinjitet”, ka përfunduar Olmo./Telegrafi/

Tyson Fury ka bërë një deklaratë tejet të ashpër në lidhje me përballjen mes Anthony Joshuas dhe Kristian Prengës, duke thënë se ish-kampioni britanik nuk ka arsye të vazhdojë karrierën nëse nuk arrin ta mposhtë boksierin shqiptar.

Fury dhe Joshua pritet të përballen më në fund në nëntor, nëse të dy i fitojnë sfidat e tyre të radhës.

Fury tashmë ka bërë punën e tij duke triumfuar ndaj Mariusz Wach në Tajlandë, ndërsa Joshua do të përballet me Kristian Prengën të shtunën në mbrëmje në Arabinë Saudite.

Duke folur për BoxingScene, Fury ishte jashtëzakonisht i drejtpërdrejtë kur foli për Prengën dhe mundësitë e Joshuas në këtë duel.

Meçi i fshehtë i Tyson Furyt: Askush nuk e transmetoi, por britaniku fitoi

“Më lejoni t’ju them, nëse nuk mund të fitojë kundër Prengës, ai do ta harrojë boksin”, deklaroi Fury.

Britaniku vazhdoi me një vlerësim mjaft të ashpër për kundërshtarin e Joshuas, duke e cilësuar Prengën si një kundërshtar të lehtë në aspektin e nivelit të përballjeve të tij të mëparshme.

“Prenga është si ajo që amerikanët do ta quanin një konservë domatesh. Fjalë për fjalë si një endacak i zgjedhur me dorë. Pa tingëlluar mungesë respekti ndaj tij”, tha Fury.

Zbulohet shuma marramendëse që pritet të fitojë Kristian Prenga nga dueli me Joshuan

Ai më pas vuri në pikëpyetje nivelin e kundërshtarëve me të cilët është përballur deri më tani boksieri shqiptar.

“Ai nuk është përballur me askënd. As me dikë që mund të mendoni se ka një emër si një punëtor i shkëlqyer. Askush. Dhe njëri prej tyre e nokautoi edhe atë”, shtoi Fury./Telegrafi/

Ndeshja miqësore ndërmjet Llapit dhe Lirisë nuk ka shkuar deri në fund, pasi është ndërprerë në minutën e 82-të pas një situate të tensionuar në fushë.

Shkak për ndërprerjen ishte pakënaqësia e trajnerit të Lirisë, Ismet Munishi, me vendimet e gjyqtarit kryesor.

Munishi fillimisht protestoi për një ndërhyrje të palejuar gjatë lojës, mirëpo aksioni vazhdoi dhe ndeshja nuk u ndërpre.

Trajneri prizrenas më pas hyri në fushë për të protestuar ndaj vendimit të gjyqtarit, i cili reagoi duke e ndëshkuar Munishin me karton të kuq.

Situata u përshkallëzua më tej, pasi në shenjë proteste ndaj vendimit të arbitrit, Munishi vendosi ta tërheqë skuadrën e tij nga fusha.

Si pasojë, miqësorja u ndërpre në minutën e 82-të, në një moment kur rezultati ishte 0:0.

Për situatën ka reaguar edhe Llapi, që ishte skuadra vendase. Klubi nga Podujeva ka konfirmuar ndërprerjen e takimit përmes një njoftimi në rrjetet sociale.

“Ndeshja miqësore KF Llapi – FC Liria u ndërpre në minutën e 82-të, në rezultatin 0:0, pas pakënaqësive të ekipit mysafir ndaj ndarjes së drejtësisë”, thuhet në njoftimin e Llapit.

Ndërkohë, Liria nuk ka bërë të ditur se ndeshja është ndërprerë. Klubi prizrenas në njoftimin e tij është mjaftuar vetëm me publikimin e rezultatit të momentit të fundit, duke mos dhënë detaje për incidentin që çoi në ndërprerjen e takimit./Telegrafi/

Dy futbollistët e talentuar të Prishtinës, Lorik Mehmeti dhe Rin Ahmeti, kanë marrë një ftesë të veçantë nga gjiganti francez Paris Saint-Germain.

PSG-ja, kampioni aktual i Ligës së Kampionëve, ka ftuar zyrtarisht dy talentet e klubit kryeqytetas për të marrë pjesë në një periudhë stërvitore dhe vlerësimi në Akademinë e PSG-së.

Sipas njoftimit të Prishtinës, Mehmeti dhe Ahmeti do të qëndrojnë në kampusin e klubit francez në Poissy, ku do të stërviten dhe do të vlerësohen nga stafi i akademisë së PSG-së.

Periudha stërvitore do të zhvillohet nga 27 korriku deri më 9 gusht 2026.

Kjo ftesë përbën një mundësi të rëndësishme për dy futbollistët e rinj, të cilët do të kenë mundësinë të tregojnë aftësitë e tyre në një prej akademive më të njohura të futbollit evropian.

Prishtina e ka cilësuar ftesën si një vlerësim për cilësinë, potencialin dhe punën e vazhdueshme të dy futbollistëve.

Në njoftimin e klubit theksohet gjithashtu se kjo është dëshmi e punës që po bëhet në riorganizimin dhe avancimin e akademisë së të rinjve të Prishtinës, me fokus në identifikimin, zhvillimin dhe promovimin e talentëve.

‘Bardhekaltrit’ synojnë që në të ardhmen akademia të shërbejë si një bazë e rëndësishme për ekipin e parë, me futbollistët e rinj të klubit që pritet të kenë rol gjithnjë e më të madh.

Mehmeti dhe Ahmeti tashmë kanë përpara një periudhë të rëndësishme, pasi për rreth dy javë do të kenë mundësinë të punojnë në ambientet e akademisë së PSG-së dhe të tregojnë potencialin e tyre para trajnerëve dhe skautëve të klubit francez./Telegrafi/

Arsenali raportohet se ka shfaqur interesim për transferimin e Vinicius Juniorit, por trajneri i ri i Real Madridit, Jose Mourinho, nuk ka ndërmend të lejojë largimin e yllit brazilian.

Trajneri portugez tashmë ka nisur punën në krye të “Los Blancos”, duke punuar me një pjesë të skuadrës gjatë përgatitjeve parasezonale, ndërsa drejtuesit e klubit po punojnë edhe në afatin kalimtar për përforcimet e nevojshme.

Objektivi kryesor i Mourinhos këtë sezon është i qartë: ta ndalë Barcelonën që të fitojë titullin e tretë radhazi në La Liga dhe ta rikthejë Real Madridin te titulli i 37-të në elitën e futbollit spanjoll. Në të njëjtën kohë, portugezi synon që skuadra të jetë konkurruese edhe në fazat e avancuara të Ligës së Kampionëve.

Për ta realizuar këto objektiva, Mourinho dëshiron të ketë në dispozicion skuadrën më të fortë të mundshme dhe, sipas raportimeve, Vinicius Junior është pjesë e planeve të tij.

Sipas The Telegraph, burime pranë klubit kanë bërë të ditur se Mourinho ua ka bërë të qartë drejtuesve të Real Madridit se dëshiron që lojtarët kryesorë të skuadrës të qëndrojnë dhe të mos jenë pjesë e diskutimeve për shitje.

Trajneri që ka fituar dy herë Ligën e Kampionëve është i vendosur që në ekipin e tij të ketë Vinicius, Kylian Mbappe dhe Jude Bellingham.

Ky qëndrim mund t’ia komplikojë ndjeshëm Arsenalit tentativën për ta transferuar Viniciusin. Nëse Reali dhe Mourinho nuk janë të gatshëm ta shesin brazilianin, atëherë një kalim i tij në veri të Londrës duket shumë i vështirë.

Arsenali synon transferimin sensacional të Vinicius Jr

Deri tani, “Topçinjtë” kanë transferuar Christos Tzolis nga Club Brugge për 40 milionë euro, ndërsa kanë siguruar edhe Illan Meslierin si lojtar të lirë pas përfundimit të kontratës së tij me Leeds Unitedin.

Arsenali ka shfaqur gjithashtu interesim për transferimin e Bruno Guimaraesit nga Neëcastle United, por deri më tani nuk ka arritur marrëveshje me klubin anglez për mesfushorin brazilian./Telegrafi/

Federata Gjermane e Futbollit (DFB) është dashur të bëjë një marrëveshje të pazakontë me Red Bullin për ta siguruar lirimin e Jurgen Kloppit nga angazhimet e tij paraprake dhe për ta emëruar atë përzgjedhës të kombëtares së Gjermanisë.

Detajet e marrëveshjes janë bërë të ditura gjatë prezantimit zyrtar të Kloppit të premten, kur presidenti i DFB-së, Bernd Neuendorf, konfirmoi se federata ka pranuar të bëjë një donacion prej 1 milion eurosh për fondacionin “Ëings for Life”, i cili mbështetet nga Red Bull.

Sipas Neuendorfit, ky gjest ishte pjesë e marrëveshjes për lirimin e Kloppit dhe kishte për qëllim të shprehte mirënjohjen ndaj mënyrës se si Red Bull e trajtoi largimin e tij.

“Federata Gjermane e Futbollit ka bërë këto marrëveshje të veçanta në shenjë mirënjohjeje për faktin se lirimi u trajtua në një mënyrë kaq të pakomplikuar dhe joburokratike”, deklaroi Neuendorf.

Por donacioni prej 1 milion eurosh nuk ishte e vetmja pjesë e marrëveshjes.

Si pjesë e marrëveshjes më të gjerë me Red Bullin, DFB-ja është zotuar që të zhvillojë tri ndeshje të kombëtares së Gjermanisë në ‘Red Bull Arena’ të Leipzigut gjatë kohëzgjatjes së kontratës së Kloppit.

Kjo nënkupton se stadiumi në pronësi të Red Bullit dhe tifozët lokalë do të përfitojnë drejtpërdrejt nga marrëveshja që mundësoi largimin e parakohshëm të një prej figurave më të rëndësishme të kompanisë.

Debutimi i Kloppit në stolin e Gjermanisë mund të sjellë një duel të papritur

Emërimi i Kloppit është konsideruar si një goditje e madhe për DFB-në, e cila synon ta rikthejë futbollin gjerman në majat e skenës ndërkombëtare.

Në lidhje me marrëveshjen ka folur edhe Hans-Joachim Watzke, nënkryetari i parë i DFB-së dhe një prej njerëzve më të afërt me Kloppin që nga koha kur të dy punonin së bashku te Borussia Dortmundi./Telegrafi/

Fisnik Asllani mund të jetë shumë pranë një transferimi të madh në Bundesligë, me sulmuesin e Kosovës që po lidhet gjithnjë e më shumë me një kalim te Leipzigu.

Asllani mungoi në dy miqësoret e para parasezonale të Hoffenheimit, fillimisht ndaj skuadrës së kategorisë së katërt, SGV Heilbronn-Freiberg, ndërsa të shtunën nuk ishte në dispozicion as në përballjen ndaj Greuther Furthit të Bundesligës 2.

Këto mungesa vijnë në një kohë kur mediat e njohura gjermane, përfshirë edhe Kicker, kanë raportuar se Hoffenheimi nuk dëshiron të rrezikojë me sulmuesin kosovar, pasi ai pritet të transferohet te Leipzigu.

Asllani mund të bëhet një prej largimeve më të rëndësishme të Hoffenheimit gjatë kësaj vere, me Leipzigun që raportohet se mund ta transferojë për rreth 30 milionë euro.

Për 23-vjeçarin më herët është raportuar edhe interesimi i Barcelonës dhe Borussia Dortmundit, ndërsa vlerësimi i lartë që gëzon në futbollin gjerman dëshmohet edhe nga fjalët e përzgjedhësit të Kosovës, Franco Foda.

Në një intervistë për mediumin gjerman LVZSport, Foda ka folur gjerësisht për cilësitë e sulmuesit kosovar, duke e vlerësuar në mënyrë të veçantë aftësinë e tij në zonën e rreptësisë.

“Fisniku ka kualitete të jashtëzakonshme në zonë, teknikisht është shumë i aftë, përshtatet mirë në hapësira të ngushta dhe në lojën në ajër, e ruan topin mirë dhe ka nuhatje të mirë për situata të ndryshme të lojës. Me të në fushë mund të sulmosh në thellësi, ai shënon dhe asiston në gola”, ka deklaruar Foda.

As Barcelona e as Dortmundi, gjiganti gjerman e mbyllë marrëveshjen për Fisnik Asllanin

Përzgjedhësi i Kosovës nuk është ndalur me kaq. Ai ka vënë në pah edhe karakterin e Asllanit dhe kontributin e tij në fazën defensive, duke e përshkruar si një futbollist që mendon për skuadrën dhe jo vetëm për statistikat personale.

“Mes gjithë këtyre që i përmenda, ai është lojtar ekipor që është gjithmonë aty për skuadrën, punon shkëlqyeshëm edhe për ta fituar topin. Ai ka pasion të vërtetë për futbollin dhe është shumë i etur për të shënuar gola”, është shprehur Foda.

Fjalët e Fodës vijnë pas një sezoni shumë të mirë të Asllanit me Hoffenheimin. Sulmuesi kosovar e mbylli edicionin me 11 gola dhe 10 asistime në 35 paraqitje në Bundesligë dhe Kupën e Gjermanisë./Telegrafi/

Jose Mourinho duket se e ka përcaktuar shpejt hierarkinë e skuadrës së tij te Real Madridi, duke vendosur pesë futbollistë si të “paprekshëm” gjatë afatit kalimtar të kësaj vere.

Gazetari Abraham Romero ka bërë të ditur se Kylian Mbappe, Jude Bellingham, Federico Valverde, Arda Guler dhe Bernardo Silva, transferimi i ri i klubit, përbëjnë grupin ekskluziv të lojtarëve që Mourinho nuk dëshiron t’i prekë.

Trajneri portugez i konsideron këta pesë futbollistë si titullarë të padiskutueshëm, duke vlerësuar mentalitetin e tyre dhe profilet taktike që i sheh si thelbësore për rikthimin e Real Madridit te suksesi në garat vendore dhe evropiane.

Në aspektin taktik, Bellingham pritet të ketë një rol më të avancuar në mesfushë, me qëllim që të shfrytëzohen maksimalisht aftësitë e tij në fazën ofensive.

Real Madridi nuk është i vetëm në garë për Diomanden – gjiganti anglez bën gati ofertën e majme

Valverde do të ketë një rol më të thellë në mesfushë, ku puna e tij e madhe pritet të jetë vendimtare për kontrollin e tranzicionit.

Ndërkohë, Guler e ka ruajtur vendin e tij në këtë grup pas një sezoni individual mbresëlënës, ndërsa Mbappe vazhdon të konsiderohet arma kryesore e sulmit të “Los Blancos”.

Në anën tjetër, Bernardo Silva pritet të sjellë përvojën e tij të madhe në nivelet më të larta, duke qenë në gjendje të luajë në disa pozita pas transferimit të tij si lojtar i lirë nga Manchester City.

Kështu, Mourinho duket se ka krijuar tashmë një bërthamë prej pesë lojtarësh mbi të cilën synon ta ndërtojë Real Madridin e tij./Telegrafi/

Darwin Nunez duket se është pranë largimit nga Arabia Saudite vetëm një vit pasi iu bashkua Al-Hilalit. Sipas The Athletic, sulmuesi uruguaian ka tërhequr interesimin e Atlanta United në MLS.

Bisedimet e para mes palëve tashmë kanë nisur, megjithëse aktualisht nuk ka një marrëveshje të avancuar. Atlanta United po e shqyrton seriozisht mundësinë e transferimit të 27-vjeçarit.

Në Angli, ku Nunez ka luajtur më parë me Liverpoolin, një lëvizje e tillë tashmë është cilësuar si një “transferim i çuditshëm”.

Nunez iu bashkua Al-Hilalit vetëm verën e kaluar, por tashmë duket se është pranë një tjetër largimi. Pozita e tij në skuadër u dobësua pas transferimit të Karim Benzemas nga gjiganti saudit.

Në 16 paraqitje zyrtare sezonin e kaluar, Nunez realizoi gjashtë gola dhe katër asistime.

Ai gjithashtu u aktivizua me Uruguain gjatë Kupës së Botës së zhvilluar verën e kaluar, duke regjistruar minutat e para zyrtare me kombëtaren që nga shkurti, por aventura përfundoi në mënyrë zhgënjyese.

Mbetet të shihet nëse Atlanta United do të arrijë ta bindë Al-Hilalin për ta lënë të lirë uruguaianin.

Klubi amerikan ka fuqinë financiare për ta realizuar një transferim të tillë, por deri tani nuk ka marrëveshje përfundimtare./Telegrafi/

Ernest Muçi është bërë objektiv i dy klubeve të njohura evropiane, me Aston Villan dhe Napolin që kanë shfaqur interesim për reprezentuesin e Shqipërisë.

Mediat turke kanë raportuar të shtunën se dy klubet janë duke e monitoruar situatën e 25-vjeçarit, i cili aktualisht është pjesë e Trabzonsporit.

Sipas Fotomac, Trabzonspori nuk ka në plan ta shesë Muçin gjatë afatit kalimtar të kësaj vere, por drejtuesit e klubit turk mund ta shqyrtojnë largimin e tij në rast se në adresën e tyre arrin një ofertë e lartë.

Deri më tani nuk raportohet se është paraqitur ndonjë ofertë zyrtare për futbollistin shqiptar.

Aston Villa është duke e ndjekur nga afër situatën e Muçit, ndërsa sipas raportimeve nga Turqia, edhe Napoli po përgatit një ofertë për transferimin e tij.

Muçi sezonin e kaluar e kaloi në formë huazimi te Trabzonspori, pasi ishte pjesë e Besiktashit. Paraqitjet e tij bindëse bënë që klubi turk ta aktivizonte opsionin e blerjes dhe ta siguronte kartonin e tij për 8.5 milionë euro.

Mesfushori me tipare sulmuese tashmë ka kontratë me Trabzonsporin deri në verën e vitit 2029, çka i jep klubit turk një pozicion të favorshëm në negociata.

Dhe interesimi nga klubet e mëdha evropiane nuk është befasi, duke marrë parasysh sezonin që Muçi zhvilloi në Turqi.

Në 41 paraqitje në të gjitha garat, reprezentuesi shqiptar realizoi 15 gola dhe nëntë asistime, duke qenë një nga lojtarët më të spikatur të Trabzonsporit./Telegrafi/

Ismael Bennacer ka ndërprerë kontratën me Milanin, duke i hapur rrugë transferimit të tij te Al-Gharafa në Ligën e Katarit.

Mesfushori algjerian ishte pjesë e Milanit që nga viti 2019 dhe gjatë kësaj periudhe regjistroi 178 paraqitje zyrtare me fanellën e “Rossonerëve”.

Megjithatë, Bennacer nuk ka luajtur për Milanin që nga sezoni 2024/25, pasi në periudhën e fundit të karrierës së tij ka qenë i huazuar te Marseille në Ligue 1 dhe te Dinamo Zagreb.

Bennacer ishte një nga lojtarët e rëndësishëm të Milanit në mesfushë dhe kishte regjistruar 31 paraqitje në kampionat në sezonin 2021/22, kur “Rossonerët” fituan titullin e Serie A për herë të parë pas 11 vitesh.

Megjithatë, algjeriani e pati të vështirë të rikthehej në formacionin e Milanit pas një lëndimi të rëndë në gju, të pësuar në fund të sezonit 2022/23.

Sipas gazetarit të njohur italian Gianluca Di Marzio, Bennacer tashmë ka ndërprerë kontratën me Milanin dhe pritet të vazhdojë karrierën te Al-Gharafa në elitën e futbollit të Katarit.

Kontrata e tij me Milanin ishte e vlefshme deri në fund të sezonit 2026/27, por palët kanë vendosur ta ndërpresin atë para kohe./Telegrafi/

Boksieri shqiptar Kristian Prenga do të ngjitet sonte (e shtunë) në ring për sfidën më të madhe të karrierës së tij, teksa në Xheda të Arabisë Saudite do të përballet me ish-kampionin e botës në peshat e rënda, Anthony Joshua.

Përveç rëndësisë së madhe sportive, përballja pritet t’u sjellë të dy boksierëve edhe përfitime të konsiderueshme financiare.

Sipas raportimeve të mediave britanike, fondi total i pagesave për duelin vlerësohet në rreth 5 milionë funte.

Nga kjo shumë, Joshua pritet të përfitojë rreth 4 milionë funte, ndërsa Prenga rreth 1 milion funte. Megjithatë, këto shifra nuk janë konfirmuar zyrtarisht nga organizatorët.

Për boksierin shqiptar, kjo pritet të jetë pagesa më e madhe e karrierës së tij.

Prenga ka një mesazh për shqiptarët para meçit të jetës kundër Joshuas

Promotori amerikan Lou DiBella ka konfirmuar se Prenga do të shpërblehet me një shumë të konsiderueshme për këtë përballje, duke theksuar se ajo është shumëfish më e lartë se çdo honorar që shqiptari ka përfituar më parë.

Në anën tjetër, të ardhurat e të dy boksierëve mund të rriten edhe më tej përmes përfitimeve dytësore, veçanërisht atyre që lidhen me marketingun dhe marrëveshjet komerciale.

Kështu, për Prengën kjo nuk do të jetë vetëm sfida më e madhe sportive deri më tani, por edhe një hap i rëndësishëm financiar në karrierën e tij profesionale./Telegrafi/

Edon Zhegrova mund të jetë një nga emrat që do të ndryshojë skuadër gjatë kësaj vere, me Fiorentinën që ka shfaqur interesim për reprezentuesin e Kosovës.

Mediumi italian La Nazione ka raportuar të shtunën se Fiorentina po e vlerëson mundësinë e transferimit të Zhegrovës, i cili aktualisht është pjesë e Juventusit.

27-vjeçari pëlqehet veçanërisht nga trajneri Fabio Grosso, i cili e sheh Zhegrovën si një përforcim të përshtatshëm për krahun e djathtë të sulmit.

Në anën tjetër, drejtori sportiv i Fiorentinës, Fabio Paratici, është duke punuar për transferimin e Joao Marios dhe, sipas raportimeve në Itali, një formulë e ngjashme mund të përdoret edhe për Zhegrovën.

Bëhet fjalë për një huazim me opsionin e blerjes përfundimtare, formulë që sipas Tuttomercatoweb do të ishte e përshtatshme për të dyja klubet.

Zhegrova iu bashkua Juventusit në shtator të vitit të kaluar, kur u transferua nga Lille.

Reprezentuesi kosovar u prit me shumë bujë te “Zonja e Vjetër”, por aventura e tij e parë në Torino nuk shkoi sipas pritshmërive.

Në sezonin e fundit, Zhegrova regjistroi vetëm 525 minuta lojë, ndërsa nuk arriti të shënonte gol apo të regjistronte asistim./Telegrafi/

Manchester City ka dhënë sinjale se është i gatshëm të ofrojë 100 milionë euro për anësorin e RB Leipzigut, Yan Diomande, raporton gazetari i njohur i transferimeve, Florian Plettenberg.

Deri më tani nuk është dorëzuar asnjë ofertë zyrtare, por sipas Plettenbergut, kontaktet mes dy klubeve tashmë kanë nisur, ndërsa edhe gazetari Philipp Hinze ka konfirmuar se bisedimet janë duke vazhduar.

Interesimi për talentin 19-vjeçar është jashtëzakonisht i madh. Liverpooli dhe Real Madridi kanë paraqitur më herët oferta në vlerë prej rreth 100 milionë eurosh, por të dyja janë refuzuar nga Leipzig, i cili mbetet i vendosur për ta mbajtur futbollistin.

Plettenberg raporton gjithashtu se Paris Saint-Germaini ende nuk ka bërë ofertë zyrtare për Diomanden.

Reprezentuesi i Bregut të Fildishtë pati një sezon shpërthyes në edicionin 2025/26, duke realizuar 13 gola dhe 10 asistime në 36 paraqitje në të gjitha garat.

Diomande ka kontratë me Leipzigun deri në vitin 2030, çka i jep klubit gjerman një pozicion të fortë në negociata, ndërsa interesimi për sulmuesin vazhdon të rritet nga klubet më të mëdha të Evropës.

Me Manchester Cityn që tashmë po shqyrton një ofertë prej 100 milionë eurosh, gara për shërbimet e talentit afrikan pritet të bëhet edhe më e nxehtë./Telegrafi/

Një punëtor 54-vjeçar ka humbur jetën pas një aksidenti në projektin e rinovimit të vazhdueshëm të stadiumit ‘Spotify Camp Nou’, duke shënuar rastin e parë fatal që prej nisjes së punimeve në qershor të vitit 2023.

Sipas Mundo Deportivo, duke iu referuar policisë katalanase Mossos d'Esquadra, incidenti ndodhi të premten, teksa punëtori ishte duke kryer punime lyerjeje nga një platformë e ngritur.

Shërbimet emergjente dhe policia reaguan menjëherë në vendngjarje, por nuk arritën ta shpëtonin punëtorin.

De Jong jashtë për javë të tëra, Barcelona përgatit transferimin e madh në mesfushë

Policia katalanase ka nisur hetimet për të zbardhur rrethanat e aksidentit, ndërsa për rastin janë njoftuar edhe autoritetet gjyqësore dhe ato të punës, në përputhje me procedurat standarde.

Rikonstruksioni i ‘Camp Nou’ ka përfshirë mijëra punëtorë që nga nisja e punimeve në vitin 2023 dhe konsiderohet një nga projektet më të mëdha të rinovimit të stadiumeve në Evropë.

Ky është rasti i parë i një vdekjeje në vendin e punës gjatë rindërtimit të stadiumit të Barcelonës./Telegrafi/

Platforma e njohur e statistikave Opta, ka publikuar renditjen e 100 ligave më të forta në botë, duke u bazuar në forcën e skuadrave që garojnë në secilin kampionat.

Sa i përket futbollit shqiptar, Kategoria Superiore renditet në vendin e 64-të, ndërsa Albi Mall Superliga e Kosovës zë pozitën e 67-të, vetëm tri vende më poshtë.

Ky klasifikim tregon se, sipas vlerësimit të Optës, kampionati shqiptar vlerësohet aktualisht pak më lart se ai kosovar, megjithëse diferenca mes dy ligave është minimale.

Në rajon, Premijer Liga e Bosnje dhe Hercegovinës renditet e 89-ta.

Kampionati kroat, HNL, mban një pozicion shumë më të lartë, duke u renditur në vendin e 16-të, ndërsa kampionati slloven është në pozitën e 50-të.

Në krye të listës qëndron Liga Premier, e ndjekur nga La Liga spanjolle dhe Bundesliga gjermane.

Në pesëshen e parë bëjnë pjesë edhe Serie A italiane dhe Ligue 1 franceze.

Në dhjetëshen e parë renditen gjithashtu kampionate si Serie A e Brazilit, Superliga e Argjentinës, Superliga e Belgjikës, Primeira Liga e Portugalisë dhe Championshipi anglez.

Ndërkohë, liga si MLS amerikane renditet e 18-ta, Eredivisie e 20-ta, Superliga e Turqisë e 24-ta, Superliga e Arabisë e 41-ta, ndërsa kampionate si ai japonez (J1 League) dhe danez (Superligaen) gjithashtu figurojnë në mesin e 15 ligave më të forta në botë./Telegrafi/