Kanë nisur përgatitjet për Festivalin e RTSH. Pas publikimit të spotit zyrtar nga Elhaida Dani për Fest ’64, prapaskenat e festivalit më të madh muzikor në vend kanë filluar të lëvizin me shpejtësi.

Interesi për të marrë drejtimin e këtij edicioni është rritur, dhe dy emra të njohur të ekranit kanë hyrë fuqishëm në garë. Burime pranë RTSH bëjnë me dije se Luana Vjollca ka dorëzuar zyrtarisht platformën e saj për prezantimin e festivalit. Ajo ka propozuar edhe emrin e skenaristit me të cilin synon të ndërtojë gjithë konceptin artistik të ngjarjes.

Platforma e saj ndodhet aktualisht në shqyrtim nga Drejtoria e Përgjithshme e RTSH, por ende nuk është marrë një vendim përfundimtar.

Ndërkohë, edhe Arbana Osmani ka shfaqur interes për t’u rikthyer në skenën e Fest ’64. Ajo raportohet se ka prezantuar një projekt të detajuar, ku përfshihen emrat e kameramanit, regjisorit dhe skenaristit, me të cilët dëshiron të realizojë spektaklin.

Kujtojmë se përplasja e dy moderatoreve ka nisur vite më parë, që në nisje të “BBV1”, ku Luana ishte ajo që donte ta moderonte këtë format, por ishte Arbana ajo që e mori drejtimin e këtij formati. Pas këtij vendimi duket se dy vajzat nuk kanë pasur më asnjë kontakt me njëra-tjetrën, duke ngrirë kështu raportet.

E tashmë duket se historia po përsëritet, këtë herë për drejtimin e Festivalit të fundvitit. Të dy projektet e dorëzuar janë marrë në konsideratë për të qenë drejtueset e këtij formati, ndonëse të shumtë kanë qenë ata në rrjet, që janë shprehur se drejtimi do t’i jepet Luanës, për shkak të kostove të ulëta që projekti i saj ka. Deri më tani, vetë dy vajzat kanë zgjedhur që mos të japin detaje për hapat që kanë ndërmarrë deri më tani.

Në rrjetet e tyre sociale, Luana dhe Arbana janë duke shijuar pushimet, në pritje të një vendimi, se cili prej tyre do të jetë imazhi i Festivalit. E nëse disa vite më parë ishte Arbana ajo që arriti të fitonte, në dukje këtë herë do të jetë Luana ajo që do të vendoset në krye të kompeticionit të rëndësishëm muzikor. Megjithatë, deri sa drejtuesit e RTSH të marrin një vendim, ka ende pak kohë./E.T

Një 42-vjeçar i cili vidhte nëpër shezlongë dhe automjete sendet personale të pushuesve ka rënë në prangat e policisë së Durrësit.

Blutë bëjnë me dije se i arrestuari ishte shpallur në kërkim edhe për vjedhje të tjera të kryera më parë.

Njoftimi i policisë:

Në vijim të operacioneve të njëpasnjëshme të zhvilluara nga Komisariati i Policisë Durrës, me qëllim zbardhjen dhe dokumentimin me prova ligjore të autorësisë së vjedhjeve të ndodhura më parë, si dhe bazuar në informacionet e siguruara nga këqyrja e kamerave dhe në prova të tjera të siguruara gjatë hetimit, në bashkëpunim me Stacionin e Policisë Manzë, u finalizua operacioni policor i koduar “Sendet”.

Në kuadër të operacionit, u bë kapja e shtetasit në kërkim I. B., 42 vjeç, banues në Manzë, Durrës, i dënuar më parë po për vjedhje dhe i shpallur në kërkim për vjedhje të tjera.

Nga hetimet e kryera dhe nga analizimi i pamjeve filmike, rezulton se ky shtetas është autor i vjedhjeve nëpër shezlongë të sendeve personale të pushuesve, si dhe i vjedhjes së një automjeti në Shkozet, Durrës.

Në bashkëpunim me Prokurorinë, vijon puna për dokumentimin e plotë ligjor të veprimtarisë kriminale të këtij shtetasi në fushën e vjedhjes së pronës, pasi dyshohet si autor i disa vjedhjeve të ndodhura më parë në territorin e qarkut Durrës.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme, për veprën penale “Vjedhja”.

Përhapet zjarri në Finiq, situatë kritike në fshatrat Krane dhe Fitore

Zjarri që vijon në Finiq është përhapur edhe në fshatra të tjera. Gazetari Limos Didani raporton se situata paraqitet kritike në Krane dhe Fitore./E.T

Ekstradohet nga Italia një shtetas i kërkuar për veprën penale “Ushtrim i ndikimit të paligjshëm ndaj personave që ushtrojnë funksione publike”. Ai është 32-vjeçari Edison Cukaj, por që njihet dhe me emrin Edison Gjoka.

Policia thotë se ekstradimi i tij u bë i mundur në vijim të bashkëpunimit të ngushtë të specialistëve të Interpol Tiranës me homologët e Interpol Romës.

32-vjecari ishte i shpallur në kërkim ndërkombëtar, pasi në prill 2025, Gjykata e Posaçme e Shkallës së Parë për Korrupsionin dhe Krimin e Organizuar Tiranë, kishte vendosur masën e sigurisë “Arrest në burg” për veprën penale “Ushtrim i ndikimit të paligjshëm ndaj personave që ushtrojnë funksione publike”.

Mësohet se ky shtetas u zbulua në kuadër të operacionit të SPAK ”Ura” pasi ka ndikuar te polici i kufirit në Durrës, Naim Beluli që të hyjë pa u kontrolluar.

Bexhet Mema ishte personi që kishte biseduar me efektivin e policë për të kaluar Edison Cukajn-Gjokën. Por plani i tyre dështoi pasi Cukaj u ndalua në Portin e Barit nga autoritetet Italiane, pasi nuk dispononte dokumentacion të rregullt dhe është deportuar në Shqipëri.

Ky episod ka ndodhur në qershor 2022, ndërsa nuk dihet mënyra sesi Cukaj ka kaluar sërish për në shtetin italian ku dhe u arrestua së fundmi. /E.T

Muzeu Kombëtar Ikonografik “Onufri” është njëri prej destinacioneve më të vizituar ndër sitet kulturore të qytetit të Beratit.

Ikonat, ngjyrat, historia, gjithçka është ruajtur me kujdes, për t’u parë nga afër. “Ejani. Jo thjesht për të kaluar kohën, por për ta ndjerë atë”, është ftesa që bën ky institucion drejtuar artdashësve, të cilët këtë sezon turistik kanë qenë të shumtë dhe nga të gjitha anët e globit.

Qendra Kombëtare e Muzeumeve Berat administron Muzeun “Onufri”, si edhe Muzeun Etnografik, të cilët mbledhin, ruajnë dhe promovojnë koleksione me vlerë të rëndësishme të trashëgimisë kulturore të qytetit të Beratit dhe zonës përreth. Berati ka qenë një qendër e rëndësishme e zhvilluar sidomos në shek XVII, një vend ku u grumbulluan, u prodhuan dhe u ruajtën vlera të rëndësishme të cilat janë thesare të vërteta të kulturës kombëtare./E.T

/

Komunikimi live në rrjetet sociale i kryeministrit Edi Rama me ndjekësit nuk mund të kalonte pa humorin dhe përgjigjet e tij epike.

“Le nam me këto syze kalamajsh”,  i ka komentuar dikush kreut të qeverisë.

”Po ça të bëjëm tani, këto që na u gjendën miku im, po të paktën janë kuqezi. Dhe mua kuqezia më pëlqen shumë’’, – ia ktheu Rama./E.T

Adriatik Doci

Gazetari Lutfi Dervishi, me të drejtë, ka ngritur disa pyetje për ‘rrethimin policor’ të News24 mëngjesin e djeshëm, duke e vënë theksin tek mungesa e informacionit. 24 orë pas ngjarjes, për të gjitha pyetjet shtruara nga gazetari Dervishi ka nga një përgjigje.

-Kush ka dhënë urdhrin për rrethimin e godinës së News24?

Ka një vendim gjykate të formës së prerë, i cili parashikon që kompania “Focus Media News” e Irfan Hysenbelliut duhet të lirojë njërën nga godinat publike në Shkozë, e përdorur prej 23 vitesh për zyra të News 24. Ky vendim e bën të panevojshëm një urdhër zyrtar për rrethim të beftë policor. Por, mund të ketë një nxitje, ndoshta një urdhër verbal ose shenjë me ‘gishtin e madh poshtë’, me shumë gjasa nga Edi Rama ose Belinda Balluku me miratimin e Ramës, pasi Irfan Hysenbelliu, pronari i News24, sulmon prej dy vitesh Ballukun dhe drejtorët e saj. Arsyet se pse Hysenbelliu sulmon Ballukun me mediat e tij besohet se mund të jenë disa, si ndonjë kërkesë tenderi e paplotësuar, dyshime për përgjim etj., por nuk ka dyshim që Rama zgjodhi anën e Ballukut, duke e ‘dënuar’ Hysenbelliun me heqje të privilegjeve.

-Cili ishte motivi zyrtar për ndërprerjen e sinjalit të transmetimit?

Tek kjo pyetje ka një gënjeshtër. Nuk ka ndërprerje të sinjalit të transmetimit. Që të ndërpritet sinjali, duhet më parë të hiqet licenca nga AMA. Nuk kemi të bëjmë me heqje licence. Kjo do të ishte agresion ndaj lirisë së medias. ‘Automati’ është ulur nga vetë Hysenbelliu për të maksimalizuar zhurmën dhe për t’u viktimizuar si martir i medias së lirë. Policia nuk merret me sinjale dhe linja, por zbaton vendime gjykate.

-Pse nuk u dha asnjë paralajmërim para ndërhyrjes?

Qeveria nuk del t’i bie daulles dhe të thërrasë ‘o milet’ kur zbaton një vendim gjykate. Kompanisë së Irfan Hysenbelliut i kishte mbaruar kontrata e qirasë prej tre vitesh (2022). Mosmarrëveshja ishte zhvendosur në gjykatë. Dhe gjykata ka vendosur që Hysenbelliu duhet të ‘mblidhte plaçkat’, pra ‘median e lirë’ t’a ushtronte në shtëpinë e tij si të gjithë të tjerët.

-A janë ndjekur procedurat ligjore për një veprim të tillë ndaj një medie?

Është ndjekur rruga gjyqësore. Pas prishjes së ujdisë (të bëj fresk me media-peshqir, më jep plaçkë publike), Edi Rama ka dashur t’a largojë Hysenbelliun nga godina publike që në vitin 2022 kur i mbaroi kontrata e qirasë, por biznesmeni iu drejtua gjykatës duke fituar një sigurim padie, që do të thotë se do t’a mbante godinën deri në një vendim përfundimtar. Në fund, gjykata vendosi që Hysenbelliu duhet të lëshojë ndërtesën publike pas 23 vitesh.

-A ka vendim gjykate?

Gjykata Apelit Administrativ, në 14 korrik të vitit 2025, ka vendosur që kompania “Focus Media News” e Irfan Hysenbelliut duhet të lirojë godinën publike. Vendimi është i formës së prerë. Bëhet fjalë për njërën pronë publike, pasi për tjetrën, e cila ndodhet po në Shkozë, ia ka zgjatur kontratën deri në vitin 2033 Arben Ahmetaj në vitin 2016. Hysenbelliu përdor edhe konviktin e Gjuhëve të Huaja, të cilin e kthyer në univesitet privat, Universiteti Luarasi.

-Cilat janë provat ose arsyet që justifikojnë këtë veprim ekstrem?

Veprim ekstrem është tentativa për të penguar zbatimin e një vendimi gjykate të formës së prerë. Nga ana tjetër, të lëshosh një nga pronat publike që përdor për biznes, pas një procedure ligjore, nuk duket ndonjë dramë aq e kobshme.

-Nëse është çështje kontrate (qiraje) a i është dhënë koha e nevojshme medias për të gjetur ambiente të tjera?

Kompania “Focus Media News” me pronar Irfan Hysenbelliun ka pasur kohë tre vite për të gjetur ambiente të tjera. Fatmirësisht, Hysenbelliu është edhe ndërtues pallatesh, kështu që ka pasur dhe ka mundësi që televizionin t’a zhvendosë në pronën e tij.

-A ka pasur komunikim paraprak?

Irfan Hysenbelliut i është kërkuar zyrtarisht që në vitin 2022 kur i mbaroi kontrata që të lirojë godinën publike. Tre vjet betejë ligjore për të liruar një godinë që nuk është jotja. Komunikimi paraprak është ezauruar.

-Kush mban përgjegjësi për pengimin e gazetarëve në vendin e punës?

Mban Irfan Hysenbelliu, i cili ashtu siç ka përdorur mediat për të shtuar pasurinë, po përdor gazetarët në duelin me Ramën. Vend pune për një biznes privat nuk mund të jetë një ambient publik për të cilin ka vendim të formës së prerë që të lirohet. Gazetarët, katër muaj pa rroga dhe dy vite pa siguracione, detyrohen edhe të vajtojnë humbjen e përdorimit të një pasurie publike nga pronari i medias.

-A është marrë parasysh dëmi i menjëhershëm që i shkaktohet publikut, duke e privuar nga informacioni?

Publiku nuk qëndron në errësirë sepse ka edhe dritare të tjera. Nuk është televizioni News24 i vetmi fanar ndriçues në Shqipëri. Dhe plaga nuk është aq e madhe për disa arsye; ishte fundjavë kur publiku ishte orientuar drejt plazhit, nuk ndodhi ndonjë ngjarje e madhe që mbeti pa u mbuluar dhe ndërprerja e sinjalit e provokuar nga vetë pronari është e përkoshme.

-Si garantohen të drejtat kushtetuese për informim dhe liri shtypi kur policia ndalon gazetarët të ushtrojnë detyrën?

Liria e shtypit jo domosdoshmërisht ushtrohet duke zaptuar prona publike. Nëse do të ishte kështu, po marrim secili nga ne nga një godinë publike dhe e kthjejmë në biznes privat. Edhe kur pushteti tregohet zemërgjërë duke t’a dhënë pasurinë publike, media nuk mund të jetë plotësisht e lirë, pasi në momentin kur tenton të bëhesh media e lirë dhe e pavarur, pushteti nuk t’a rinovon më kontratën. Kështu që zbatimi i një vendimi gjykate që News24 të lirojë godinën publike është një mundësi që televizioni të jetë edhe më ‘i pavarur’ dhe i ‘lirë’.

Nga Lutfi Dervishi

Në vend të lajmeve, ekrani i News24 sot shfaq vetëm shiritat vertikalë me ngjyra prove, të bardhë, të verdhë, blu të çelët, jeshile, rozë, të kuqe, blu të errët dhe të zezë në të dy anët. Kjo pamje që dikur tregonte mungesën e sinjalit televiziv sot është simbol i heshtjes së imponuar.
Policia ka rrethuar News24 në orët e para të mëngjesit dhe ka bllokuar punën e gazetarëve të News24, BalkanWeb, Panorama dhe Gazeta Shqiptare.

Në mungesë të informacionit për këtë ngjarje të pazakontë ka më shumë pyetje se përgjigje:

Kush ka dhënë urdhrin për rrethimin e godinës së News24?

Cili ishte motivi zyrtar për ndërprerjen e sinjalit të transmetimit?

Pse nuk u dha asnjë paralajmërim para ndërhyrjes?

A janë ndjekur procedurat ligjore për një veprim të tillë ndaj një medie?

A ka vendim gjykate?

Cilat janë provat ose arsyet që justifikojnë këtë veprim ekstrem?

Nëse është çështje kontrate (qiraje) a i është dhënë koha e nevojshme medias për të gjetur ambiente të tjera?

A ka pasur komunikim paraprak?

Kush mban përgjegjësi për pengimin e gazetarëve në vendin e punës?

A është marrë parasysh dëmi i menjëhershëm që i shkaktohet publikut, duke e privuar nga informacioni?

Si garantohen të drejtat kushtetuese për informim dhe liri shtypi kur policia ndalon gazetarët të ushtrojnë detyrën ?

Kur mbyllet një media, nuk humb vetëm ajo humbet e drejta jote për t’u informuar. Sot është News24, nesër mund të jetë zëri yt. Heshtja nuk është neutralitet, është zgjedhje.

Nga Eduard Zaloshnja

“A mendoni se hapësirat publike që po çlirohen do të ripushtohen me kalimin e kohës?” — kjo ishte pyetja kryesore e pyetësorit, linkun e të cilit e shpërndava me 2000 sms krejt të rastësishme në gjithë territorin e vendit.

Është një pyetje legjitime të bëhet në prag të Rilindjes Urbane 2.0, ngaqë hapësirat publike u ripushtuan pas Rilindjes Urbane 1.0.

Por duket se besimi tek vendosmëria e Ramës për suksesin e Rilindjes Urbane 2.0 është i lartë, pavarësisht zhbjerrjes se versionit 1.0.

Kështu, plot 70% e të anketuarve mendojnë se nuk do ketë më ripushtim të hapësirave publike të çliruara. Vetëm 26% mendojnë se do ketë një ripushtim (pothuaj krejtësisht votues opozitarë). Kurse 4% janë të dyzuar (përqindjet i kam rrumbullakosur për lehtësi leximi).

Fakti që 70% e shqiptarëve të këtushëm besojnë në vendosmërinë e Ramës për t’i disiplinuar hapësirat publike i var atij mbi shpinë një barrë të rëndë politke. Të paktën deri më 2030, nuk duhet të lindë nevoja për një Rilindje Urbane 3.0…/e.t

Kryeministri Edi Rama, duke iu përgjigjur ndjekësve, paralajmëroi gjithashtu një “shkundje” edhe të strukturave të kontrollit të territorit, duke filluar nga IMT te policitë bashkiake.

“Asht siç ka pasur një përshkallëzim të valës së lëvizjeve me drejtuesit nëpër bashkitë e qyteteve të mëdha ku ka nevojë për një shkundje për të kaluar në një nivel tjetër, do të ketë shtrirje të kësaj vale në strukturat e kontrollit të territorit, duke filluar nga IMT te policite bashkiake dhe strukturat e planifikimit dhe zhvillimit urban. Por do të jetë teknologjia që do të vendoset në qendër. Tanimë e kemi të ngritur thuajse plotësisht të gjithë bazën e të gjithë vizuale mbi territorin e qyteteve të mëdha që janë afektohen nga ndërtimet e paligjshme”, u shpreh Rama./e.t

Policia e Fierit ka zbardhur shkaqet e aksidentit rrugor të një dite më parë në vendin e quajtur “Qafa e Koshovicës”, ku 4 persona mbetën të plagosur rëndë.

Sipas hetimeve, shkak i aksidentit është bërë ndërprerja e rrugës nga automjeti që drejtohej nga shtetasi M. A., i cili është larguar nga vendngjarja.

Në përfundim të veprimeve procedurale është bërë i mundur arrestimin në flagrancë të shtetasit M. A., 45 vjeç, banues në Itali, për veprat penale “Shkelja e rregullave të qarkullimit rrugor” dhe “Largimi nga vendi i aksidentit”.

Materialet procedurale iu referuan Prokurorisë së Fierit, për veprime të mëtejshme./e.t

ur Kateryna Yesypchuk përfundoi ndërrimin e saj të parë si drejtuese e trenit në Metronë e Kievit, në qershor të vitit 2025, këmbët i dhembnin.

Edhe pse sistemet e frenimit në trenat e zhurmshëm nëntokësor kontrollohen vetëm me dorë, 25-vjeçarja shpjegon:

“Instinktivisht shtypja këmbët në dysheme, sepse jam mësuar të përdor pedalin e frenimit në makinën time”.

Deri në vitin 2017, grave u ndalohej të drejtonin trenat e metrosë. Aso kohe, 450 profesione të konsideruara më parë si “të rrezikshme dhe të dëmshme” për gratë u hapën për të gjithë.

Përfaqësues të metrosë e mbronin ndalimin për gratë duke përmendur zhurmën dhe dridhjet, të cilat, sipas tyre, mund të dëmtonin shëndetin e tyre riprodhues.

Që nga heqja e ndalimit për gratë për të drejtuar trenat e metrosë, asnjë grua nuk kishte arritur të përfundonte trajnimin intensiv – deri së fundmi.

Në vjeshtën e vitit 2024, një grua nisi punën në qytetin verilindor të Harkivit, ndërsa sot Kateryna Yesypchuk është e para dhe e vetmja grua që drejton tren nëntokësor në Kiev.

Në kushtet e pushtimit të vazhdueshëm rus, Ukraina po përballet me mungesë të theksuar të fuqisë punëtore në shumë sektorë. Gjatë vitit 2024, Metroja e Kievit uli ndjeshëm frekuencën e qarkullimit të trenave – pjesërisht për shkak të mungesës së drejtuesve.

Kateryna Yesypchuk thotë se në fillim nëna e saj ishte kundër që ajo të punonte si drejtuese treni nëntokësor, mes “vajit dhe ndotjes” së metrosë. Por ajo nuk e kishte problem ndotjen – ishte mësuar me kushte të tilla.

Ajo u trajnua fillimisht për mekanike në qytetin qendror-lindor të Dnipros, ku ishte e vetmja vajzë mes 93 djemve.

“Disa prej mësuesve ishin të bindur se do të ndiqja disa kurse dhe pastaj do të hiqja dorë. Por jo – i përfundova studimet”, kujton Yesypchuk.

Para se të bëhej drejtuese treni, ajo punoi në pozita të tjera brenda ndërmarrjes së Metrosë së Kievit. Kur u hap pozita për drejtues treni – me një pagë prej rreth 669 dollarësh në muaj – vendosi të aplikonte. Thotë se bashkëshorti e mbështeti pa hezitim.

Në programin e trajnimit për drejtues trenash, Yesypchuk ishte njëra nga 28 pjesëmarrësit, përfshirë tre gra të tjera. Vetëm dhjetë e përfunduan me sukses – dhe ajo ishte e vetmja grua mes tyre.

Pamja e pazakontë e një gruaje në kabinën e trenit nëntokësor në Kiev ka shkaktuar edhe disa situata të pakëndshme.

Gjatë një ndërrimi, ndërsa po përgatitej të zëvendësohej nga një drejtues tjetër, ajo hapi derën e kabinës. Disa udhëtarë iu afruan me kureshtje për të biseduar dhe Yesypchuk u përgjigj me mirësjellje – por dikush e filmoi. Videoja u publikua në internet dhe menaxherët e saj e qortuan për shkelje të protokollit. Komunikimi me udhëtarët përmes derës së hapur të kabinës është rreptësisht i ndaluar.

Ndërsa admiron teknologjinë e rrjetit të metrosë së Kievit, Kateryna Yesypchuk nuk qëndron nën tokë më gjatë se sa duhet dhe përpiqet të shmangë përdorimin e saj si pasagjere.

“Metronë e karakterizon një zhurmë e pandërprerë”, thotë ajo.

“Kur del jashtë pas punës, gjithçka duket e qetë – edhe kur makinat bien borinë”.

Shpesh e pyesin edhe pse flet me zë të lartë.

“Jam mësuar që në metro duhet të flasësh fort që të të dëgjojnë”, shpjegon Yesypchuk.

Ajo nuk është ende e sigurt nëse do ta vazhdojë këtë punë në afat të gjatë.

“Dua të shoh si do të shkojë”, thotë ajo.

“Nëse e kuptoj se kjo punë nuk është për mua dhe se i kam mbivlerësuar aftësitë e mia, atëherë sigurisht që do të kërkoj një punë tjetër. Por për tani, do të provoj – do të jem në timon”.

Kievi është i njohur për stacionet dekorative të metrosë të epokës sovjetike, por stacioni i preferuar i Yesypchuk është ai ku zbret në fund të ndërrimit.

Shtëpia e saj ndodhet në Myrnohrad, në rajonin lindor të Donetskut – një zonë që aktualisht është në qendër të luftimeve mes forcave pushtuese ruse dhe ushtrisë ukrainase. Për momentin, banesa e familjes është e dëmtuar, por ende qëndron në këmbë.

“Vetëm dua që gjithçka të përfundojë mirë – dhe që një ditë të mund të them më në fund: ‘Po kthehem në shtëpi’”, thotë ajo./ REL

Kryeministri Edi Rama deklaroi se lirimi i hapësirave publike nuk do të jetë një aksion vere, por është pjesë e programit për Rilindjen Urbane 2.0 që do të zgjasë përgjatë gjithë mandatit të ri.

Kreu i qeverisë iu bëri thirrje qytetarëve që të kontribuojnë në evidentimin e ndërtimeve zaptuese duke shkruajtur në platformën “Hapësira ime publike”.

“Platforma “Hapësira ime publike” do të mund të denoncoi cdo gjë të tillë për të identifikuar më shumë, por edhe ata që mbyllin sytë. Kryeministri nuk bën punën e drejtorëve, por për të shkundur ata që nuk bëjnë punën. Godina pa leje përgjithësisht nuk ka. Ato që janë ose janë sekuestruar ose do të sekuestrohen dhe konfiskohen. Kemi sekuestruar një godinë në Vlorë në shkelje të parametrave, jemi në proces me dy a tre të tjera. Rilindja Urbane 2.0 do të zgjasë 4 vjet dhe do të zgjasë 4 vjet nuk është aksion. Nuk e linim dot në dimër”, tha Rama.

Kryeministri Rama nuk la pa përmendur dhe sezonin turistik, që sipas tij po has në disa problematika për shkak se një pjesë e industrisë të këtij sektori nuk po mendon strategjikisht.

Rama paralajmëroi hapa radikale në këtë sektor duke nisur nga viti i ardhshëm.

“Duke filluar nga një pjesë e industrisë që nuk po mendon strategjikisht, por po mendon kap ca të kapësh. Po mendon sot për nesër. Nëse sot vendos çmime që do të hapin me shpejtësi fjalën që është shumë shtrenjtë në Shqipëri. Kemi bërë një hap të madh me plazhet dhe vitin e ardhshëm do të ndërmarrim hapa radikale. Pushteti vendor do të ngrihet në një nivel tjetër”, tha kreu i qeverisë./e.t

Presidenti amerikan Donald Trump po shqyrton mundësinë e ricaktimit të statusit ligjor të marijuanës, duke e klasifikuar ndër substancat narkotike më pak të rrezikshme. Kjo nismë synon të rifillojë procesin që ishte nisur nga paraardhësi i tij, Joe Biden, por që nuk u përmbyll kurrë.

Sipas mediave amerikane, qëndrimi i ri i Trump vjen si rezultat i interesave ekonomike në rritje rreth industrisë së kanabisit, përdorimit të saj në trajtime mjekësore, por mbi të gjitha, nga presioni i fortë i donatorëve të fushatës.

Ashtu si ndodhi me sektorin e kriptomonedhave, edhe kompanitë e marijuanës kanë kontribuar me shuma të mëdha në fushatën e tij elektorale, duke kërkuar një qëndrim më të favorshëm.

Gjatë një aktiviteti për mbledhje fondesh në klubin e tij të golfit në Neë Jersey, Trump është shprehur i hapur për bashkëpunim me investitorë të industrisë, mes tyre edhe Kim Rivers, drejtuesi i kompanisë Trulieve, një prej më të mëdhave në tregun e marijuanës. Rivers e ka inkurajuar ish-presidentin të mbështesë kërkimin shkencor mbi përdorimin terapeutik të kanabisit.

Sondazhet tregojnë se edhe pjesa republikane e elektoratit mbështet ripërcaktimin e marijuanës si substancë më pak të rrezikshme.

Megjithatë, Trump përballet edhe me presione nga grupet lobuese që kundërshtojnë zbutjen e ligjeve për kanabisin, duke e vendosur atë mes dy zjarresh./e.t

Nga Shpëtim Luku

Në Shqipëri, prej vitesh ekziston një paaftësi e theksuar brenda komunitetit të gazetarëve për të ndarë biznesin e medias nga vetë profesioni i gazetarit. Kjo paaftësi ka shkuar deri aty sa, kur përmendej fjala “media”, shumica mendonin menjëherë për botuesit e saj. Botues, të cilët ndërkohë kishin zaptuar edhe shoqatat e gazetarëve, duke i kthyer ato në vegla të interesave të tyre.
Në vend që të përjetojë, të luftojë dhe të përpiqet të zgjidhë problemet e veta, gazetari shqiptar ka funksionuar shpesh si në mëshirën e botuesit, duke e konsideruar atë jo vetëm si punëdhënës, por edhe si “buka e gojës”. Në këtë realitet të deformuar, kontrata e punës – dokumenti që duhet të institucionalizojë marrëdhënien mes gazetarit dhe pronarit të medias – është pothuajse e panjohur për shumicën.
Para disa vitesh, u tentua nënshkrimi i një kontrate kolektive të punës në media. Nisma dështoi, jo vetëm për shkak të presionit të pronarëve, por edhe për shkak të mungesës së mbështetjes nga vetë gazetarët. Kujtoj një episod kur i kërkova pronarit të një televizioni kombëtar të angazhohej në promovimin e aktiviteteve të Sindikatës së Gazetarëve. Përgjigjja e tij ishte:
“Je në vete ti? Sindikata është kundër nesh, ti do të na kërkosh ta forcojmë kundër vetes?”
Përgjigja ime ishte e qartë: “Më vjen mirë që e konsideron kundërshtare, pasi një nga qëllimet tona është pikërisht ndarja e biznesit të medias nga profesioni i gazetarit.”
Fatkeqësisht, ky mentalitet nuk ka ndryshuar. Shumë gazetarë në Shqipëri janë gati të “hidhen në zjarr” për interesat e pronarit, ndërsa energjinë që duhet ta përdornin për të mbrojtur interesat e tyre, e shpenzojnë për të ruajtur interesat e atij që shpesh është edhe cenuesi kryesor i të drejtave të tyre. Nëse gjysma e kësaj energjie do të kanalizohej për të ngritur dinjitetin dhe integritetin e profesionit, gazetaria shqiptare do të kishte sot më shumë pavarësi, respekt dhe lavdi.

Një aheng familjar në një nga restorantet e zonës së Shkabajt, përgjatë magjistrales Prishtinë–Mitrovicë, është kthyer në skenë dhune.

Këngëtari i njohur Shpat Kasapi dhe,Albin Kasapi, janë sulmuar fizikisht gjatë një përplasjeje që ka ndodhur në ambientet e lokalit.

Sipas mediave në Kosovë, të lënduarit janë Shpat Kasapi, rreth 40 vjeç, dhe Albin Kasapi, rreth 47 vjeç. Të dy kanë deklaruar se janë sulmuar nga tre persona: Feim Kicaj (62), Bledar Kicaj (36) dhe Blerim Kicaj (29).

Autoritetet kanë nisur hetimet për të zbardhur motivet dhe rrethanat e konfliktit./e.t

Agjencia e Menaxhimit Emergjent ka njoftuar se sipas të dhënave të pranuara deri më tash edhe 15 vatra vazhdojnë të jetë aktive me zjarre në gjithë vendin nga gjithsej 40 sa ishin gjatë ditës, njëzet e pesë prej të cilave janë lokalizuar.

Situata më e rënduar është regjistruar në Dumnicë të Podujevës, ku është kërkuar asistencë nga njësi të tjera. Në këtë operacion janë angazhuar njësitë e Prishtinës, Vushtrrisë dhe Mitrovicës, ndërkohë që është bërë edhe kërkesë për ndërhyrje ajrore nga KFOR-i për të ndihmuar në shuarjen e zjarrit.

Menaxhimi i situatës po bëhet në koordinim të plotë me Njësitë Profesionale të Zjarrfikjes dhe Shpëtimit.

Agjencia u bën apel të gjithë qytetarëve që të tregojnë kujdes të shtuar, të shmangin çdo veprim që mund të shkaktojë zjarr dhe të raportojnë menjëherë çdo vatër në numrat emergjentë 112, 193 dhe 192./e.t

Shkodra Elektronike zgjodhi kalanë e Shkodrës në një mbrëmje të veçantë, duke sjellë emocione përmes një koncerti në kështjellën mitike. Këngët më të mira të grupit që ndezi Eurovisionin u performuan përpara publikut të pranishëm. Nata kulmoi me këngën e dashur për gjithë shqiptarët, “Zjerm”, shkruan rtsh.

Pas koncertit, dyshja Kolë Lacaj dhe Beatriçe Gjergji treguan emocionet e tyre të mëdha kur këndojnë në Shkodër duke u shprehur se do vijojnë me këngë të reja dhe koncerte gjatë kësaj vere.

“Është gjë e bukur që kemi bërë dy koncerte njëri pas tjetrit në dy kala, njëra e Prizrenit dhe tjetra e Shkodrës. Njerëzit kur i takojmë na thonë që e kanë ndjerë veten të përfaqësuar me këtë që ne po bëjmë dhe vazhdojnë na ndjekin”, u shpreh Kolë Lacaj.

“Shumë mirë, unë jam transformuar në princeshë”, tha Betariçe Gjergji me nota humori.

Pjesë e kësaj mbrëmje bashke me grupin Shkodra Elektronike ishte edhe grupi iso-polifonik i jugut ndërsa të pranishmit shijuan edhe disa prej këngëve të njohura shkodrane në këtë festë që zgjati deri në orët e vona nën tingujt e muzikës në kalanë Rozafa./e.t

“Vendndodhja ka rëndësi”, është një rregull i artë për agjentët e pasurive të paluajtshme. Duke zgjedhur Alaskën si vend për samitin e tij të parë me Vladimir Putinin, Donald Trump mbetet besnik ndaj kodit të tij gjenetik. Ai e detyron kreun e Kremlinit të bëjë një lëshim shumë simbolik, duke e detyruar të shkojë në territorin amerikan. Por, duke e pritur në shtëpinë e tij, i kthen statusin dhe lirinë e veprimit ndërkombëtar liderit të një vendi agresor, nën sanksione dhe mbi të gjitha subjekt i një urdhër-arresti nga Gjykata Penale Ndërkombëtare e Hagës.

Marrëveshja

Kur thuhet Alaska në kontekstin e marrëdhënieve mes Rusisë dhe Amerikës, preken tela të thellë. Aty ku historia, kujtesa, gjeopolitika dhe projeksionet strategjike ndërthuren në një ngërç të pazgjidhshëm dhe shumë emocional. Në fund të fundit, për Vladimir Putinin, të kalojë katër kilometrat e Ngushticës së Beringut – rripi i detit që ndan në veri-perëndim dy vendet – do të jetë si të kthehet në shtëpi. Alaska, në fakt, iu shit në vitin 1867 nga Rusia Shteteve të Bashkuara, që paguan 7,2 milionë dollarë, rreth 120 milionë të sotëm, për një sipërfaqe mbi 1 milion e 518 mijë kilometra katrorë.

Vendimi i marrë nga Cari Aleksandër II, i mbërthyer nga borxhet pas humbjes në Krime, u prit keq nga të dyja palët: “shitje e popullit rus” ose “humbje” për inteligjencën e Moskës; “marrëzia e Seward” (nga emri i sekretarit të Shtetit amerikan që firmosi kontratën) për amerikanët. Por, nëse ende sot nacionalistët rusë nuk ndalen së qari për marrëveshjen e gabuar, blerësit u bindën shumë shpejt për të kundërtën, falë etheve të arit të filluara në vitin 1897, që në pak dekada do t’i sillnin SHBA-së një fitim njëqind fish të investimit. Por le të ndalemi me historinë. Për Putinin, një samit me Trumpin vlen gjysmën e përuljes që përfaqëson udhëtimi në Amerikë. “Samiti në Alaskë, larg nga Evropa dhe Kina, certifikon totalisht bilateralizmin e këtij takimi dhe faktin se vetëm Rusia dhe Shtetet e Bashkuara, së bashku, mund të gjejnë një zgjidhje për krizën e Ukrainës”, shpjegon Dmitrij Suslov, zëvendësdrejtor i Qendrës për Studime Evropiane dhe Ndërkombëtare pranë Shkollës së Lartë të Ekonomisë.

Gara drejt së ardhmes

Jo vetëm kaq. Siç thamë më herët për parashikimet strategjike, ka më shumë sesa simbolizëm historik apo diplomatik në zgjedhjen e Alaskës. “Vendndodhja ka rëndësi”, pra. Nuk është rastësi që të premten, më 1 gusht, Shtetet e Bashkuara nisën stërvitjen Arctic Edge 2025, manovrën vjetore ushtarake të destinuar të demonstrojë dhe forcojë aftësinë e forcave amerikane për të frenuar, garantuar sigurinë dhe mbrojtur Amerikën e Veriut nga kërcënimi i vazhdueshëm që paraqet Rusia në Arktik.

Moska, në fakt, mban një prani të fortë në rajonin e Veriut të Madh, hapësira gjigante mbi Rrethin Polar, ku ngrohja globale po shkrin gradualisht perden e akullit që deri tani ka ndarë kufirin polar të Rusisë nga NATO-ja, duke hapur rrugë të reja detare. Këto rrugë mund të përgjysmojnë kohën e transportit të mallrave dhe lëndëve të para nga Evropa në Azi, përveç se të bëjnë të arritshme rezerva të mëdha nëndetare nafte, gazi dhe metalesh të çmuara.

Trekëndëshi strategjik

Në vitin 2014, Rusia krijoi një Komandë të Veriut, që bëri operativë rreth 50 zona të vjetra ushtarake nga epoka sovjetike dhe baza të reja detare mbi Rrethin Polar, aq sa aktualisht numërojnë më shumë se NATO-ja. Flota ruse po zhvillon gjithashtu nëndetëse bërthamore të reja për operacione në Arktik, si klasa Arcturus, e aftë të përdorë dronë dhe raketa hipersonike nënujore. Mbi të gjitha, Federata mund të mbështetet tek flota e saj e famshme e akullthyesve, më e madhja në botë me mbi 50 njësi, ndërsa po planifikohen po aq të tjera për dekadën e ardhshme.

Në këtë garë mes akujve, Moska nuk është e vetme. Edhe Kina, megjithëse nuk është një vend që ka dalje në Arktik, që nga viti 2018 ka shpallur një interes strategjik në zonë, është pajisur tashmë me tre anije akullthyese– njëra prej tyre më e madhja e ndërtuar ndonjëherë – dhe po bashkëpunon me Rusinë për të krijuar një “rrugë të Mëndafshit polar”. Ky është ndoshta elementi që shqetëson më shumë Trumpin dhe Komandën Veriore të SHBA-së. “Në samit nuk do të flitet vetëm për Ukrainën – thotë Suslov, një nga këshilltarët më të dëgjuar të Kremlinit – por edhe për Arktikun, që është vendimtar për të ardhmen e marrëdhënieve ruso-amerikane, teatër përballjesh ushtarake, por edhe zona më premtuese për bashkëpunimin e ardhshëm mes Moskës dhe Uashingtonit: energjia, shfrytëzimi i lëndëve të para, rrugët tregtare”. Alaska, në qendër të botës./Corriere della sera/e.t

Përfaqësuesi special i presidentit Donald Trump, Richard Grenell, ka treguar për planet e shefit të tij për tu përfshirë në çështjen e Kosovës.

Në një intervistë dhënë për Klan Kosovës, Grenelli tha se administrata Trump do të shkojë hap pas hapi në çështjen e Kosovës.

“Mendoj se do të shkojmë hap pas hapi. Sigurisht jemi plotësisht të angazhuar në këto çështje, por siç e thashë, po bëjmë zhvillim ekonomik gjithandej botës. Ky është fokusi”, tha Grenell.

I pyetur nga gazetarja Bajrami-Gashi se a e ka ndonjë plan për t’u rikthyer në temat e vjetra si korrigjimi i kufijve, Grenell tha se “nuk ka kthim mbrapa në asgjë”.

“Mendoj se planet kanë qenë gjithmonë plani ekonomik. Nuk ka kthim mbrapa në asgjë. Ne gjithmonë jemi përqendruar në zhvillim ekonomik si shtytës për zgjidhje të problemeve dhe do të vazhdojmë ta bëjmë këtë”, tha ai./e.t