Yield-et e bonove 12-mujore pësuan rënie në ankandin e kësaj jave, duke ndjekur uljen e normës bazë të interesit nga Banka e Shqipërisë.

Sipas informacionit nga Ministria e Financave, yield-i mesatar i ponderuar i këtyre instrumenteve zbriti në 2.68%, nga 2.76% që kishte qenë në ankandin e mëparshëm, në fund të muajit qershor. Aktualisht, yield-et e bonove 12-mujore kanë arritur nivelin më të ulët që prej verës së vitit 2022.

Kërkesa e investitorëve rezultoi përsëri e kënaqshme, me gjithsej 8.9 miliardë lekë, nga 7.8 miliardë lekë që kishte shuma e shpallur për financim. Ministria e Financave pranoi oferta për një shumë lehtësisht më të ulët se ajo e shpallur, gjithsej 7.7 miliardë lekë.

Në fillim të këtij muaji, Këshilli Mbikëqyrës i Bankës së Shqipërisë vendosi uljen e normës bazë të interesit, nga 2.75% në 2.5%.

Vendimi u argumentua me inflacionin e ulët, që prej më shumë se një viti po qëndron poshtë objektivit të Bankës së Shqipërisë dhe me rritjen ekonomike më të dobët se pritshmëritë për tremujorin e parë të vitit, ndërkohë që monedha vendase edhe këtë vit vazhdon të shfaqë tendencë mbiçmuese në kursin e këmbimit valutor.

Lëvizja e Bankës së Shqipërisë forcoi edhe më shumë tendencën rënëse të yield-eve, që po regjistrohet prej më shumë se një viti.

Yield-et e bonove 12-mujore patën zbritur madje poshtë nivelit të normës bazë të interesit në disa raste, ndërsa instrumentet më afatgjata të maturimit kanë prekur nivelet më të ulëta historike muajt e fundit.

Kjo situatë është ndikuar nga disa faktorë. Huamarrja e qeverisë në tregun e brendshëm financiar këtë vit ka ardhur në rënie.

Sipas Bankës së Shqipërisë, huamarrja e re neto e qeverisë në tregun e brendshëm ra me 6.5 miliardë lekë në tre muajt e parë të vitit, në reflektim të strukturës së maturitetit që kishte portofoli i titujve dhe të strategjisë së huamarrjes së qeverisë përgjatë kësaj periudhe.

Nga ana tjetër, kërkesa për këto instrumente ka vazhduar të jetë e lartë, për shkak të gjendjes së mirë të likuiditetit në tregun financiar.

Një faktor shtesë që ka rritur kërkesën dhe ka shtuar konkurrencën për instrumentet e borxhit të qeverisë ka qenë edhe pjesëmarrja në rritje e investitorëve nga jashtë vendit. Sipas të dhënave nga Banka e Shqipërisë, investitorët jorezidentë e shtuan portofolin e titujve qeveritarë, me rreth 5.3 miliardë lekë në tremujorin e parë 2025.

Megjithëse pjesëmarrja e tyre është shtrirë kryesisht në tregun e obligacioneve me afate të mesme maturimi, kërkesa e tyre e ka rritur likuiditetin e tregut në tërësi dhe konkurrencën në tregun e titujve, duke ndikuar në uljen e yield-eve.

Përmirësimi i parametrave makroekonomikë dhe në veçanti ulja e borxhit publik ka përmirësuar vlerësimin e kreditit sovran të qeverisë shqiptare në dy vitet e fundit, duke ndikuar në tërheqjen edhe të investitorëve nga jashtë në tregun e titujve qeveritarë në Lekë./ E.Shehu

Burimi: Banka e Shqipërisë

The post Yield-i i bonove 12-mujore arrin nivelin më të ulët në tre vjet appeared first on Revista Monitor.

Pas përfundimit të aksionit për kontrollin e tregtimit me faturë të produkteve blegtorale, qeveria po përgatitet të rikthejë një skemë kompensimi për fermerët nëpërmjet rimbursimit të TVSH-së në nivelin 10%.

Sipas burimeve për Monitor, është gati një projektligj i ri, i cili parashikon që kompensimi për fermerët të aplikohet duke nisur nga viti 2026, si pjesë e një reforme më të gjerë për formalizimin e zinxhirit agroushqimor dhe uljen e kostove për prodhuesit vendas.

Deri tani në rang vendi rezultojnë të regjistruar 100 mijë fermerë të pajisur me NIPT që kanë të drejtë të shesin te përpunuesi, grumbulluesi apo supermaketet produktet e veta, pa faturë TVSH-je, por nëpërmjet autofaturës që plotësohet prej blerësit.

Skema e TVSH-së së rimbursueshme që përfitohej prej përpunuesve u hoq plotësisht në vitin 2022. Pas heqjes së saj, ku fermeri përfitonte tregtimin e produkteve me çmim të leverdisshëm, u rrit kostoja e prodhimit, sepse TVSH-ja e paguar nuk kreditohet më dhe bëhet pjesë e kostos së lëndës së parë.

Deri në vitin 2017, rimbursimi i TVSH-së për përpunuesit ishte 20%, çka do të thotë se psh,. për çdo blerje të qumështit me faturë tatimore nga fermeri, përpunuesi mund të kreditonte këtë vlerë në TVSH-në e zbritshme.

Kjo skemë e bënte ekonomikisht të leverdishme blerjen edhe me çmim të lartë për fermerin dhe siguronte marzh të qëndrueshëm fitimi për industrinë.

Nga viti 2019 deri në 2022, skema ndryshoi. TVSH-ja në blerje (nga fermerët) u ul në 6%. Ndërsa TVSH-ja në shitje e produkteve të bulmetit mbeti 20%. Kjo krijoi një pabarazi fiskale, pasi industria paguante më shumë në dalje sesa kreditonte në hyrje.

Prej vitit 2022, skema e TVSH-së së kreditueshme u heq plotësisht, duke vendosur 0% TVSH të zbritshme për blerjet e qumështit nga fermerët.

Shoqata e Industrisë së Përpunuesve të Qumështit propozoi që skema të harmonizohej me praktikat e rajonit, ku TVSH-ja e blerjes dhe e shitjes të unifikohej në 6% ose 9%, për të shmangur pabarazitë tatimore.

Skema e vjetër të zëvendësohej me një mekanizëm neutral fiskal, jo penalizues për përpunuesin. Ky propozim nuk u pranua nga Ministria e Financave në buxhetin e vitit 2022.

Në vend të rimbursimit të TVSH-së, qeveria aplikoi subvencione direkte deri në 10,000 lekë për krerë bagëtie/lopë për fermerët.

Por përpunuesit në atë kohë theksuan se skema e subvencioneve nuk do të ketë efekt të të drejtpërdrejtë në uljen e kostos së lëndës së parë për industrinë. Nuk garanton formalizimin, sepse nuk është e lidhur me volumin real të qumështit të shitur.

Ndryshe nga rajoni, ku subvencionet jepen për litër qumësht të prodhuar e dorëzuar, në Shqipëri mungon kjo logjikë e orientuar drejt prodhimit të formalizuar.

Situata me heqjen e TVSH-së së kreditueshme, kostot e larta të ushqimit të kafshëve nga fragmetizimi i tokave dhe mungesës së vaditjeve krijuan një zinxhir pasojash në sektor, duke ulur ndjeshëm volumin e përpunimit dhe duke vënë në rrezik vazhdimësinë e kapaciteteve prodhuese, ndërkohë që tregu po përballet me konkurrencë gjithnjë e më të fortë të mallrave të gatshme që vijnë nga importi.

Po ashtu për shkak të çmimit më të lirë të shitjes së qumështit jashtë, importet vijojnë të jenë në nivele të larta, pasi qumështi i prodhuar nga fermat e huaja po përdoret, kryesisht në sezonin e verës si lëndë e parë për përpunuesit vendas.

Si qumështi vendas po zëvendësohet me importe

Në periudhën janar-prill 2024 u importuan 6 mln litra qumësht sipas të dhënave të Doganave. Kjo ishte sasia më e larta e qumështit e importuar prej 2016-s. Për janar-prill 2025 u importuan 5,1 mln litra qumësht. Krahasuar me të njëjtën periudhë të vitit të kaluar importet janë ulur 15,4%.

Çfarë synon aksioni?

Nisja prej 14 korrikut të aksionit të tatimorëve për kontrollin e zinxhirit të tregtimit të mallrave blegtorale nga fermeri drejt grumbulluesit dhe konsumatorit final shkaktoi paqartësi te fermerët në radhë të parë dhe grumbulluesit ku nisën t’i kërkonin njëri-tjetrit fatura fiskale, teksa mes tyre transaksionet dokumentohet me autofaturim të blerësit. Po ashtu inspektorët tatimorë nisën të kërkonin origjinën e mallit edhe te tregtarët ambulantë.

Nisur nga situata Administrata Tatimore sqaroi për Monitor se fokusi i aksionit është forcimi i kontrollit në terren mbi lëshimin e autofaturës për tregtimin e produkteve blegtorale, ku rezulton informalitet i lartë në tregtimin e tyre, sidomos prej grumbulluesve dhe përpunuesve të mëdhenj. Nëpërmjet këtij aksioni tatimet synojnë të rrisin të ardhurat, dhe të forcojnë sistemin për gjurmueshmërinë e mallit.

Pavarësisht nisjes së aksionit skema e faturimit për tregtimin e mallrave blegtorale nga fermeri drejt grumbulluesit nëpërmjet faturës fiskale të llojit autofaturim, me qëllim më pas hedhjen në treg të tyre për konsumatorin final nuk ndryshoi. Do të vijojë të mbetet e njëjtë. Pra fermeri i pajisur me NIPT shet produktet e tij te grumbulluesi, përpunuesi apo supermarketet, ndërsa këta të fundit kanë detyrimin e lëshimit në SelfCare të autofaturës.

E njëjta skemë do të vijojë të funksionojë për shitjen e fermerëve të regjistruar si tatimpagues për kategorinë  “person fizik” apo “shpk”. Në këtë rast fatura e fiskalizuar për shitjen e mallit lëshohet prej tij. Në këtë rast nuk funksionon autofatura.

Po ashtu përmes një njoftimi Tatimet bënë me dije se tregtarët ambulantë nuk kanë asnjë detyrim për të lëshuar faturë dhe për të mbajtur dokumentacion tatimor për mallrat.

Ndërsa Ministria e Bujqësisë dhe Zhvillimit Rural në reagimin e saj bëri me dije se kontrollet për sigurinë ushqimore dhe pajisjen me faturë tatimore nuk janë aksion kundër fermerëve, por një hap për ta formalizuar, forcuar dhe mbështetur sektorin bujqësor./ Dorina Azo

https://monitor.al/pa-autofature-ska-mall-nga-fermeri-tatimet-aksioni-po-forcon-kontrollin-ndaj-grumbulluesve/

https://monitor.al/tatimet-sqarojne-aksionin-ambulantet-skane-detyrim-per-fature-apo-dokumentacion-tatimor/

The post Qeveria, gati të rikthejë skemën e kompensimit të TVSH-së për fermerët, në nivelin 10% appeared first on Revista Monitor.

Shpenzimet e pushtetit vendor për 5-mujorin e parë 2025 evidentojnë zhvendosje të theksuar drejt shpenzimeve të personelit dhe tkurrje të mëtejshme të shpenzimeve kapitale në raport me shpenzime totale.

Personeli zuri 56% të shpenzimeve totale bashkiake në 5 mujorin 2025 nga 52% që zunë vitin e kaluar në këtë periudhë.

Të dhënat zyrtare nga Ministria e Financave tregojnë se shpenzimet për paga dhe kontributet shoqëruese arritën 16,454 milionë lekë, ose rreth 25% më shumë se një vit më parë.

Ndërkohë shpenzimet kapitale zunë 14% të shpenzimeve totale në 5-mujorin 2025 nga 16.6% në vitin 2024.

Shtimi me 25% i shpenzimeve të personelit në vitin 2025 erdhi nga rritja e pagave.

Në anën tjetër, shpenzimet kapitale, matësi kryesor i investimeve publike në infrastrukturë, shërbime dhe asete të reja, kanë mbetur praktikisht të pandryshuara në nivelin: 4,1 miliardë lekë milionë lekë, gati të njëjtin nivel si një vit më parë.

Ndërsa kostot e personelit kanë “ngrënë” një copë më të madhe të tortës së shpenzimeve, hapësira për projekte zhvillimi nuk është zgjeruar,  madje realisht është ngushtuar, po të llogariten edhe efektet e inflacionit.

Kontrasti midis ritmit të rritjes së pagave dhe ngrirjes së investimeve po ul produktivitetin e buxheteve vendore, ku shumica e fondeve po përdoren kryesisht për funksionimin e përditshëm, jo për rritje kapacitetesh apo përmirësim shërbimesh.

10 vite nga nisja e zbatimit të reformës territoriale, në vend që të rrisin shërbimet për qytetaret i kanë përkeqësuar ato. Kompetencat dhe territoret e bashkive janë zgjeruar dukshëm pas reformës territoriale të vitit 2015 dhe gjithashtu, edhe kapacitetet financiare.

Reforma shkriu 373 njësi vendore në 61 bashki, ndërkohë fondet  janë dyfishuar dhe pushteti i bashkive është i gjerë në komunitetet që drejtojnë, që nga strehimi e deri te kujdesi social, bujqësia, infrastruktura rurale dhe arsimi parashkollor, të cilat nëse zotërohen siç kërkojnë ligjet, ata mund të ndikojnë cilësinë e jetës, po aq edhe sa politikat e qeverisë qendrore.

Por në realitet, cilësia e shërbimeve, jo vetëm që nuk ka ndryshuar që nga reforma, por në shumicën e rasteve, kostoja e tyre është rritur, teksa rajonet e Shqipërisë po zbrazen nga popullsia dhe sidomos të rinjtë.

Komunitetet rurale po përballen me mungesa të mëdha në shërbime dhe në infrastrukturë, teksa bashkitë e vendit nuk janë të afta të zbatojnë dhe të realizojnë buxhetet e tyre të vogla karshi nevojave të mëdha.

BB: Reforma territoriale la fshatin pa shërbime dhe përkeqësoi cilësinë e tyre në qytet

Të dhënat zyrtare nga Ministria e Financave tregojnë se në 2024 pushteti vendor realizoi vetëm 43 për qind të programit të investimeve. Nga 46,3 miliardë lekë të planifikuara u investuan vetëm 19,9 miliardë lekë ose më pak se gjysma e programit./ B.Hoxha

Burimi: Ministria e Financave

The post Bashkitë rrisin shpenzimet e personelit, ulin investimet në 5-mujor appeared first on Revista Monitor.

Pas rreth dy muajsh  nga fatkeqësia e ndodhur në minierën e kromit në Katjel ku një punonjës humbi jetën, Ministria e Infrastrukturës dhe Energjisë ka vendosur që të revokojë lejen nën argumentin e kushteve teknike të rënduara.

Në një dokument të firmosur në fillim të këtij muaji por të bërë publik këto ditë ministria argumenton arsyet e këtij vendimi.

“Autoriteti Kombëtar për Sigurinë dhe Emergjencat në Miniera, me anë të shkresës Nr. 850 prot. AKSEM, datë 09.06.2025, protokolluar në Ministrinë e Infrastrukturës dhe Energjisë me Nr. 4146 Prot., datë 09.06.2025, është propozuar revokimi i Lejes Minerare të Shfrytëzimit Nr. 1335, datë 15.04.2009, për mineralin krom, në Objektin “Katjeli Jugor”, Bashkia e Përrenjasit, Qarku i Elbasanit, pas problematikave serioze të ndodhura kohët e fundit në objekt, si rezultat i përmbytjeve të nivelit Hz +428, i vetmi nivel në të cilin kryhet veprimtari minerare.

Pas disa inspektimeve të AKSEM në objekt, është vërejtur se kushtet teknike janë në gjendje të rënduar, me prani të shtuar të ujërave dhe llumrave, deformim të armaturave mbajtëse dhe kapacitet të tejmbushur të sistemit të pompimit, çka e bën të pamundur zhvillimin e veprimtarisë normale pa rrezik për jetën e punonjësve nga Hz +428 deri në nivelin e pusit Hz +655” thuhet në shkresë.

Lidhur me këtë vendim MIE ka kërkuar që në zbatim të Ligjit Nr.10304, datë 15.07.2010 “Për sektorin minerar në Republikën e Shqipërisë”, i ndryshuar, neni 49, pika 1, zotëruesi i lejes minerare në këtë rast Miniera e Kromit Katjel sh.p.k.  ka detyrimin të zbatojë planin përfundimtar të mbylljes së aktivitetit minerar, rehabilitimin e mjedisit për sipërfaqen e prekur nga aktiviteti minerar dhe planin e menaxhimit të mbetjeve minerare, të miratuar nga struktura përgjegjëse AKBN.

Vetëm këtë vit nga ana e ministrisë janë njoftuar 15 procedura për fillimin e revokimit të lejeve minerare ku arsyet janë nga më të ndryshme nga mungesa e aktivitetit minerar prej më shumë se një viti tek mosrespektimi i detyrimeve që lidhen me pagesën e garancisë./ N.Maho

The post MIE revokon lejen për minierën e kromit në Katjel, shkak kushtet teknike appeared first on Revista Monitor.

Megjithatë, shitjet e makinave elektrike në Shtetet e Bashkuara u tkurrën me 1% në qershor

Shitjet globale të makinave elektrike dhe hibride plug-in u rritën me 24% në qershor krahasuar me një vit më parë, falë një kalimi drejt makinave elektrike në Kinë dhe Europë, deklaroi shoqëria e kërkimeve të tregut Rho Motion.

Megjithatë, shitjet e makinave elektrike në Shtetet e Bashkuara u tkurrën me 1% në qershor dhe do ta kenë të vështirë të rimëkëmben këtë vit, pasi projektligji i shpenzimeve i Presidentit Donald Trump uli kreditë tatimore më shpejt se sa pritej – tha Charles Lester, përgjegjës i të dhënave në shoqërinë Rho Motion.

Amerika e Veriut, edhe për shkak të ngadalësimit të shitjeve në Kanada, ka mbetur për herë të parë pas krahasuar me vendet “e pjesës tjetër të botës” që përfshijnë tregjet në zhvillim në Azinë Juglindore dhe Amerikën Jugore dhe Qendrore, tha Lester.

Pse është e rëndësishme

Shtëpitë automobilistike në botë duhet të përballen me një tarifë importi prej 25% në Shtetet e Bashkuara, tregu i dytë më i madh i makinave në botë, duke bërë që shumë prej tyre të ndryshojnë parashikimet e tyre për vitin 2025.

Në Europë parashikohet që stimujt për blerësit me pakicë dhe të flotës në tregjet kryesore si Gjermania dhe Spanja, së bashku me ofertën në rritje për makina elektrike me çmim të ulët, do të mbështesin shitjet e automjeteve elektrike në gjysmën e dytë të vitit.

Ndërsa disa nga automjetet elektrike më të suksesshme në segmentin e automjeteve të vogla prodhohen nga shtëpitë automobilistike europiane si Volkswagen dhe Renault, ato nga markat kineze, përfshirë BYD po zënë pjesë tregu në kontinent dhe po udhëheqin rritjen në tregjet në zhvillim, tha Lester.

Shifrat

Shitjet globale të makinave elektrike me bateri dhe hibride plug-in u rritën në 1.8 milionë njësi në qershor sipas të dhënave të Rho Motion.

Shitjet në Kinë u rritën me 28% krahasuar me të njëjtin muaj një vit më parë, duke arritur në 1.11 milionë automjete.

Në Europë u regjistrua një rritje prej 23%, në rreth 390.000 njësi, ndërsa shitjet në Amerikën e Veriut ranë me 9% dhe më shumë se 390.000 njësi.

Shitjet në pjesën tjetër të botës u rritën me 43% duhet tejkaluar 140.000 njësi. / Reuters

The post Shitjet globale të makinave elektrike rriten me 24% në qershor appeared first on Revista Monitor.

Pas administratës tatimore ka reaguar edhe Ministria e Bujqësisë dhe Zhvillimit Rural në lidhje me fokusin e nisjes së aksionit nga dita e hëna për kontrollin e tregtimit të produkteve blegtorale.

Ministria e Bujqësisë dhe Zhvillimit Rural bën me dije se kontrollet për sigurinë ushqimore dhe pajisjen me faturë tatimore nuk janë aksion kundër fermerëve, por një hap për ta formalizuar, forcuar dhe mbështetur sektorin bujqësor.

MBZHR në bashkëpunim me Ministrinë e Financave dhe Administratën Tatimore, sqaron se ka për qëllim formalizimin e sektorit dhe garantimin e sigurisë ushqimore për të gjithë qytetarët.

“Fermerët nuk janë fajtorë. Ata janë bashkëpunëtorë të rëndësishëm në ndërtimin e një ekonomie të ndershme dhe të sigurtë.

Qëllimi ynë nuk është të vendosim gjoba, por të krijojmë një sistem ku çdo hallkë e zinxhirit të prodhimit dhe tregtimit të produkteve bujqësore të jetë e pastër, e kontrollueshme dhe në shërbim të qytetarit.

Pse është i rëndësishëm bashkëpunimi në këtë nismë?

-Gjurmueshmëria e produkteve – të dimë ku është prodhuar, si është përpunuar dhe kush e ka tregtuar një produkt.

-Siguria ushqimore – për të pasur më shumë besim në atë që vendosim në tryezë.

-Transparencë dhe mbështetje – fermerët që janë të regjistruar dhe të formalizuar kanë akses më të lehtë në subvencione, kredi, programe zhvillimi dhe mundësi për të eksportuar.

Ftojmë  të gjithë  aktorët  e zinxhirit agroushqimor të bashkëpunojnë për të ndërtuar një sektor të qëndrueshëm, të kontrollueshëm dhe të sigurtë për konsumatorin shqiptar dhe për eksportet shqiptare, që tashmë janë prezente në mbi 80 tregje elitare ndërkombëtare”, sqaron Ministria e Bujqësisë.

https://monitor.al/tatimet-sqarojne-aksionin-ambulantet-skane-detyrim-per-fature-apo-dokumentacion-tatimor/

The post Reagon edhe Bujqësia: Kontrollet s’janë kundër fermerëve, synojnë sigurinë ushqimore appeared first on Revista Monitor.

Aksioni i nisur nga administrata tatimore me fokus forcimin e kontrollit të shitjes me faturë të produkteve blegtorale nga fermerët drejt prodhuesve dhe përpunuesve, në disa tregje rajonale është shoqëruar edhe me kontroll të inspektorëve te tregtarët ambulante.

Përmes një njoftimi Tatimet bëjnë me dije se tregtarët ambulantë nuk kanë asnjë detyrim për të lëshuar faturë dhe për të mbajtur dokumentacion tatimor për mallrat.

“Administrata Tatimore informon opinionin publik dhe individët e regjistruar si “tregtarë ambulantë” se, bazuar në legjislacionin tatimor në fuqi, nuk kanë detyrim për të lëshuar faturë tatimore dhe as për të mbajtur dokumentacion tatimor për mallrat apo shërbimet që tregtojnë.

Ky përjashtim parashikohet në ligjin nr. 87/2019, “Për faturën dhe sistemin e monitorimit të qarkullimit”, i ndryshuar, konkretisht në nenin 5, pika 1, gërma c). Gjithashtu, ligji nr. 9920, datë 19.05.2008, “Për procedurat tatimore në Republikën e Shqipërisë”, i ndryshuar, në nenin 5, pika 1, gërma j), përcakton qartë statusin dhe kushtet e ushtrimit të aktivitetit të tregtarëve ambulantë.
Detyrimet e vetme të një tregtari ambulant janë:

• Të jetë mbi moshën 16 vjeç;
• Të jetë i vetëpunësuar dhe të mos punësojë persona të tjerë;
• Të tregtojë në hapësira publike me leje të lëshuar nga Bashkia përkatëse;
• Të jetë i regjistruar si ambulant pranë Drejtorisë Rajonale Tatimore;
• Të paguajë: Kontributet e sigurimeve shoqërore dhe shëndetësore; Tarifën për zënien e hapësirës publike; Taksat bashkiake të aplikueshme”.

Administrata Tatimore mbetet e angazhuar në krijimin e një klime besimi dhe bashkëpunimi me qytetarët, duke garantuar që çdo politikë tatimore të zbatohet në mënyrë të drejtë, transparente dhe të kuptueshme për të gjithë.

The post Tatimet sqarojnë aksionin: Ambulantët s’kanë detyrim për faturë apo dokumentacion tatimor appeared first on Revista Monitor.

Kërcënimi i Presidentit të SHBA-së Donald Trump për një tarifë 30% mbi importet e Bashkimit Europian po e ndërlikon vendimmarrjen e Bankës Qendrore Europiane, por nuk ka gjasa të prishë planet për një pauzë të uljes së normave javën e ardhshme, thanë pesë politikëbërës të Bankës Qendrore Europiane.

BQE sinjalizoi pas takimit të qershorit se ka të ngjarë t’i mbajë normat e interesit të pandryshuara më 23-24 korrik.

Por tarifa 30% e propozuar nga Trump është më e lartë se sa kishte parashikuar BQE-ja edhe në skenarin më negativ nga tre skenarët për ekonominë e Eurozonës që publikoi muajin e kaluar.

Kjo do të thotë që BQE-ja është detyruar të kryejë vlerësime të reja dhe tani politikëbërësit mendojnë për një rezultat më negativ sesa në qershor, thanë pesë burimet, të gjithë anëtarë të Këshillit Drejtues të BQE-së.

Ata thanë se guvernatorët ngurrojnë të veprojnë në bazë të asaj që është ende një kërcënim, megjithatë, veçanërisht duke pasur parasysh deklaratat ndonjëherë kontradiktore të bëra nga administrata e Trump, që nga njoftimi i tij i parë për tarifat globale në prill. Prandaj, çdo diskutim në lidhje me uljen e normave ka të ngjarë të mbahet për takimin e BQE-së në shtator.

Trump tha të dielën se tarifat e tij do të hyjnë në fuqi më 1 gusht, dhe Komisioni Europian gjithashtu ka ndaluar kundërmasat deri në atë datë.

Ekonomistët e tregut kanë thënë kryesisht se mendojnë se është e pamundur, që Trump të vazhdojë me kërcënimin e tij të tarifave për shkak të dëmit që do t’i shkaktonte ekonomisë amerikane në aspektin e inflacionit më të lartë dhe rritjes më të ulët.

Por nëse vendoset taksa 30%, ata presin që BQE të ulë normat e interesit.

Analistët e Barclays parashikuan një ulje të normës së depozitave të BQE-së në vetëm 1% deri në marsin e ardhshëm nga 2% aktual, nëse SHBA-të vendos një normë mesatare tarifore 35% për mallrat e BE-së, të cilën ata vlerësuan se do të zbriste 0.7 pikë përqindjeje nga rritja e Eurozonës.

Projeksionet më të fundit makroekonomike të BQE-së, të publikuara në qershor, vunë në dukje një rimëkëmbje graduale të ekonomisë së Eurozonës në vitet e ardhshme, me inflacionin që luhatet rreth objektivit 2%.

Këto projeksione supozonin si bazë një tarifë 10% mbi eksportet e mallrave të BE-së në SHBA, e cila do ta çonte rritjen ekonomike të Eurozonës në 0.9% këtë vit, 1.1% vitin e ardhshëm dhe 1.3% në vitin 2027.

Por parashikimet sipas një skenari alternativ të publikuar në të njëjtën kohë, treguan se një tarifë 20% e SHBA-së do të frenonte rritjen me 1 pikë përqindjeje gjatë së njëjtës periudhë dhe gjithashtu do të ulte inflacionin në 1.8% në vitin 2027, nga 2.0% në skenarin bazë. / Reuters

The post Tarifat e SHBA-së shtojnë presion mbi BQE-në në korrik, por nuk ndërpresin pauzën e uljes së normave appeared first on Revista Monitor.

Perspektiva për ekonomitë e Europës Lindore, të cilat për dekada kanë përfituar nga globalizimi, po përkeqësohet ndërsa Shtetet e Bashkuara rrisin tarifat, sipas Beata Javorcik, kryeekonomiste në Bankën Europiane për Rindërtim dhe Zhvillim.

Rajoni, që tashmë është kryesisht pjesë e Bashkimit Europian dhe i përfshirë në aleancën ushtarake të NATO-s, ka përfituar ndjeshëm duke përqafuar tregtinë e lirë pas rënies së komunizmit, veçanërisht në aspektin e transferimit të teknologjisë, që ka riformësuar ekonomitë e tij.

Tani, përpjekja e Presidentit të SHBA-së, Donald Trump, për të transformuar tregtinë globale pritet të përkeqësojë kushtet tregtare për ekonomitë – kryesisht të vogla dhe të hapura – të rajonit, tha Javorcik.

Tarifat e SHBA-së për vendet në të cilat BERZH ushtron aktivitet janë rritur në një mesatare 10%, nga më pak se 2%, me vendet eksportuese të makinave dhe pjesëve të këmbimit, si Sllovakia dhe Hungaria, që përballen me tarifa deri në 20%.

Sistemi tregtar i organizuar nga Organizata Botërore e Tregtisë mbrojti ekonomitë e vogla nga presioni i vendeve të mëdha. Ajo që po shohim është një erozion i rregullave globale të tregtisë dhe një zhvendosje drejt negociatave dypalëshe, që natyrisht do të thotë se vendet më të vogla kanë më pak fuqi negociuese.

Ndërsa Trump shpallte ultimatumet e tij të fundit tarifore, duke propozuar një normë 30% për Bashkimin Europian dhe Meksikën, modelet e BERZH-it parashikojnë që tarifat të mbeten në nivelet aktuale dhe se përbërja e eksporteve nuk do të ndryshojë si pasojë e luftës tregtare.

Banka parashikon një goditje 0.8% në produktin e brendshëm bruto të Sllovakisë dhe një ngadalësim shtesë 0.4% për ekonominë hungareze. Ndikimi i drejtpërdrejtë në vendet e tjera të rajonit është shumë më modest.

Ndikimi indirekt

Megjithatë, goditja indirekte pritet të jetë më e fortë, veçanërisht pasi Trump synon Gjermaninë, deri tani tregu më i madh i eksportit për shumicën e vendeve të Europës Lindore. Kjo pritet të ngadalësojë rritjen rajonale me një mesatare 0.8%, sipas Javorcik.

Lëvizjet e Trump- po injektojnë gjithashtu më shumë pasiguri politike sesa është vërejtur gjatë krizës financiare globale pothuajse dy dekada më parë. Kjo pasiguri po frenon vendimmarrjen për investime, ndërsa tkurrja potenciale e tregjeve të eksportit po zbeh gjithashtu stimujt për të rritur shpenzimet për kërkim dhe zhvillim.

“Tregjet në zhvillim do të vuajnë nëse globalizimi ndalon,” përfundoi ajo. / Bloomberg

The post BERZH: Tarifat e Trump godasin ekonomitë në zhvillim të Europës Lindore appeared first on Revista Monitor.

Filmat? Nuk janë më thjesht një mënyrë për të kaluar një mbrëmje me shi. Në fakt, falë kinemave verore, të shkuarit për të parë një film në një ekran veror ka nisur të kthehet në një nga aktivitetet më të pëlqyera të stinës.

Sipas platformës Time Out, kinemaja më e bukur në natyrë në botë është shpallur Westpac OpenAir në Sidnei. Por, lista e përditësuar përfshin një sërë vendesh mbresëlënëse edhe në Europë, dhe e para prej tyre është Pavilion Mies van der Rohe në Barcelonë.

Westpac Openai Sidney

Kjo perlë arkitekturore u projektua nga Ludwig Mies van der Rohe dhe Lilly Reich si pavioni gjerman për Ekspozitën Ndërkombëtare të Barcelonës më 1929. U shemb një vit më vonë, por në vitin 1986 u rindërtua në vendndodhjen origjinale, në Montjuïc. Prej disa vitesh aty zhvillohet ‘Pantalla Pavelló’: cikël filmash me temë arkitekturën, që projektohen mbi murin prej mermeri travertin, ndërsa publiku i ndjek i ulur rreth.

Pavilion Mies van der Rohe

Por Spanja duket se e ka gjetur formulën, pasi edhe Amante në Ibiza, Sala Montjuïc po në Barcelonë, dhe Cinema Lliure a la Platja në Katalonjë janë përfshirë në renditje.

Rathausplatz Vjenë

Vendi i dytë europian në listë është Cinéma de la Plage në Kanë, e hapur që prej vitit 2001. E treta është Rathausplatz në Vjenë, që ofron shfaqje falas të “operave të Offenbach dhe koncerteve të Rolling Stones përballë bashkisë me stil gotik të qytetit.

Adventure Cinema Lowther Castle

Kinematë më të bukura në natyrë në Europë:

Pavilion Mies van der Rohe, Barcelonë
Cinéma de la Plage, Kanë
Rathausplatz, Vjenë
Arene de Pula, Kroaci
Cine Thisio, Athinë
Amante, Ibiza
Piazza Grande, Lokarno
Fortress Cinema, Kosovë
Adventure Cinema në Kështjellën Lowther, Cumbria
Rooftop Film Club, Londër
Sala Montjuïc, Barcelonë
Cinema Lliure a la Platja, Katalonjë
West Beach (Film) Festival, Amsterdam
Open Air Cinema Kamari, Santorini
Gare aux Docs, Paris
Kreuzberg Open-Air Cinema, Berlin
Cine Manto, Mykonos
Cinemoving San Polo, Venecia
Moonflicks, Chester, Mbretëria e Bashkuar

/ Time Out, Shqip.al

The post Kinematë në natyrë më të bukura në Europë appeared first on Revista Monitor.

Mungesa e tualeteve publike në zona turistike është bërë shpesh objekt diskutimesh në forume të turistëve të huaj duke e sugjeruar këtë si diçka që institucionet duhet ta kenë parasysh.

Së fundmi duket se Bashkia Shkodër ka vendosur që të aplikojë marrjen me qira të tualeteve publikë që janë të lëvizshëm dhe që do të vendosen në zonën turistike.

Referuar procedurës së prokurimit të hapur nga Ndërmarrja e Shërbimeve dhe Punëve Publike në këtë bashki nënvizohet se sasia e kërkuar e këtyre tualeteve të jetë 12 copë ndërsa fondi limit 1.6 milionë lekë apo rreth 16 mijë euro.

“Ne funksion te mbrojtjes se mjedisit , si dhe te plotësimit me shërbime te turisteve vendas dhe te huaj, kërkohet përdorimi i tualeteve portative ne zonat turistike.

Përdorimi i këtyre tualeteve përveç konceptit te nevojës , shkojnë përtej, për përmasim i performances se shërbimeve ne zonat turistike”, thuhet në specifikimet e dokumenteve.

Ndërkaq nënvizohet se pastrimi i tualeteve do behet brenda te gjitha kushteve higjeno-sanitare nga subjekti fitues, 2 here ne jave, dite te premte dhe te hënë.

Ndërkohë Autoriteti kontraktor, merr përsipër pastrimin sipërfaqësor te tualeteve gjate gjithë javës.

Sipas dokumenteve afati për qiranë e këtyre strukturave të lëvizshme do të jetë për periudhën nga nënshkrimi i kontratës deri në fund të vitit 2025.

Mbeten të paqarta zonat turistike ku do të vendosen këto 12 tualete publike edhe pse Shkodra ka një sërë rajonesh ku fluksi turistik është i përqendruar duke nisur nga plazhet tek liqeni sitet kulturore apo pjesa qendrore e qytetit.

The post Tualete me qira për zonat turistike, tenderi i Bashkisë së Shkodrës appeared first on Revista Monitor.

Agjencia e Administrimit të Pasurive të Sekuestruara dhe Konfiskuara (AAPSK) ka shënuar një rritje të ndjeshme të të ardhurave nga qiradhënia në gjashtëmujorin e parë të vitit 2025, duke reflektuar një përmirësim të mëtejshëm në menaxhimin aktiv të pasurive në administrim.

Gjatë periudhës janar–qershor 2025, të ardhurat nga qiratë kapën vlerën totale prej rreth 100.4 milionë lekë, ndërkohë që në të njëjtën periudhë të vitit 2024, kjo shifër ishte 58.4 milionë lekë. Kjo përkthehet në një rritje prej 71.7% krahasuar me vitin e kaluar.

Të dhënat tregojnë një trend të qëndrueshëm rritjeje përgjatë gjithë periudhës janar–qershor 2025. Në të gjashtë muajt e analizuar, të ardhurat e këtij viti kanë qenë dukshëm më të larta se në të njëjtët muaj të vitit 2024.

Muaji mars 2025 ka shënuar rritjen më të lartë mujore, me të ardhura 153% më të larta krahasuar me marsin 2024 (nga 7.7 milionë në 19.5 milionë lekë). Edhe janari, shkurti dhe qershori kanë shfaqur rritje të ndjeshme me mesatarisht 80% më shumë.

Kjo performancë tregon për një menaxhim më efektiv të pasurive shtetërore nën administrimin e AAPSK-së, me ndikim të drejtpërdrejtë në të ardhurat publike, si edhe përdorimin e këtyre të ardhurave për rritjen e kapaciteteve të agjencive ligjzbatuese, si edhe në funksion të fuqizimit të komuniteteve.

Të ardhurat totale mujore (qiradhënie)

The post AAPSK rrit me rreth 72% të ardhurat nga qiradhënia në 6-mujorin e parë të vitit 2025 appeared first on Revista Monitor.

Çdo mall i blerë nga fermeri qoftë qumësht, mish, apo perime duhet të shoqërohet me faturë fiskale (e llojit autofaturë), për të vërtetuar transaksionin dhe origjinën, në të kundërt blerësit e këtyre produkteve rrezikojnë të gjobiten apo t’u konfiskohet malli.

Administrata Tatimore sqaroi për Monitor se në fokus të aksionit të ndërmarrë prej ditës së hënë synohet të forcohet kontrolli në terren mbi lëshimin e autofaturës për tregtimin e produkteve blegtorale, ku rezulton informalitet i lartë në tregtimin e tyre, sidomos prej grumbulluesve dhe përpunuesve të mëdhenj.

Pra skema e faturimit për tregtimin e mallrave blegtorale nga fermeri drejt grumbulluesit nëpërmjet faturës fiskale të llojit autofaturim, me qëllim më pas hedhjen në treg të tyre për konsumatorin final nuk ndryshon. Do të vijojë të mbetet e njëjtë. Pra fermeri i pajisur me NIPT shet produktet e tij te grumbulluesi, ku ky i fundit ka detyrimin e lëshimit në SelfCare të autofaturës.

Po përveç pjesës fiskale me qëllim rritjen e arkëtimeve, aksioni i tatimoreve synon të forcojë ndjeshëm procesin e gjurmueshmërisë për sigurinë ushqimore në vend, pasi një mall i shitur me faturë arrin të gjurmohet lehtësisht në sistem .

“Një pjesë e konsiderueshme e transaksioneve të tregtimit të produkteve blegtorale kryhen jashtë sistemit tatimor, duke mos garantuar gjurmueshmërinë e origjinës së mallit, mungesën e dokumentacionit shoqërues dhe duke penguar formalizimin e zinxhirit të vlerës.

Për të adresuar këtë problem, aksioni i ndërmarrë së fundmi ka në fokus përpunuesit dhe grumbulluesit e produkteve bujqësore. Sipas udhëzimeve të administratës tatimore, këta subjekte janë të detyruar që, gjatë blerjes së produkteve nga fermerët, të përdorin autofaturën si mjet për dokumentimin e transaksionit, ku informaliteti tek ta ka rezultuar i lartë”, sqaruan nga DPT.

Sipas të dhënave të DPT-së në vend rezultojnë 100 mijë fermerë të regjistruar me NIPT që kanë detyrimin të tregtojnë mallrat e prodhuara nëpërmjet autofaturave që i lëshon blerësi.

E njëjta skemë do të vijojë të funksionojë për shitjen e fermerëve të regjistruar si tatimpagues për kategorinë  “person fizik” apo “shpk”. Në këtë rast fatura e fiskalizuar për shitjen e mallit lëshohet prej tij. Në këtë rast nuk funksionon autofatura.

Çfarë është autofatura?

Autofatura është një dokument tatimor që lëshohet nga blerësi (përpunuesi apo grumbulluesi), në emër të shitësit (fermerit), në rastet kur fermeri është I pajisur me NIPT dhe bën shitje pa faturë TVSH -je për xhiron me vlerë deri 10 milionë lekë në vit.

Kjo procedurë synon të garantojë që transaksioni të dokumentohet ligjërisht dhe të mundësohet regjistrimi i origjinës së produktit në sistemin fiskal.

Pra fermeri i pajisur me NIPT do të vijojë që produktet e prodhuara që i shet të grumbulluesi, përpunuesi, supermarketet, apo tregtarët e shumicës dhe pakicës, pa faturë TVSH-je për një qarkullim vjetor deri në 10 milionë lekë.

Detyrimi për lëshimin e faturës është e blerësit të këtyre produkteve, që në këtë rast mund të jetë një grumbullues, përpunues apo supermarket. Prej këtyre të fundit fatura fiskale që lëshohet në SelfCare ëhstë e lloji autofaturë “Blerje nga fermerët vendas”.  Autofatura duhet të firmoset nga shitësi që në këtë rast është fermeri, ku krahas të dhënave të tij emri dhe NIPT-i e fermerit përshkruhet edhe lloji i mallit të blerë dhe vlera pa TVSH. Pra autofatura përmban të gjithë elementët e një fature fiskale, por ajo lëshohet nga blerësi, jo nga shitësi.

Si lëshohet autofatura fiskale për fermerin?

Tatimet sqarojnë se referuar nenit 8, pika 1, gërma “a” e udhëzimit nr.16, datë 03.04.2020, “Për faturën dhe sistemin e monitorimit të qarkullimit”, i ndryshuar, mallrat e blera nga prodhuesit bujqësorë e blegtoralë duhet të shoqërohen me faturë të fiskalizuar.

Për lëshimin e saktë të këtyre faturave, tatimpaguesit duhet të ndjekin disa hapa:

1. Zgjidhni opsionin “autofaturë”, i cili përmban automatikisht të dhënat e blerësit që po lëshon faturën
   2. Lloji i faturës duhet të jetë “Blerje nga fermerët vendas” (Domestic)
   3. Vendosni të dhënat e fermerit shitës (emri dhe NIPT-i)
   4. Përshkruani mallrat e blerë, pa llogaritur TVSH-në

Kujdes. Për të vërtetuar saktësinë e transaksionit dhe origjinën e mallrave të shitur, rekomandohet që fatura të jetë e nënshkruar nga shitësi (fermeri).

https://www.tatime.gov.al/d/8/45/45/1900/njoftim-per-menyren-e-leshimit-te-faturave-per-blerjet-nga-prodhuesit-bujqesore-dhe-blegtorale

Si lëshohet nga SelfCare autofatura?

Hapat për lëshimin e faturës janë: 1. Pasi kemi aksesuar platformën nëpërmjet kredencialeve të portalit e-Albania të biznesit, shkojmë te menuja “Faturat” dhe klikojmë “Lësho faturë”.

2. Zgjidhet tipi i faturës me ose pa para në dorë, dhe te opsioni autofaturë përzgjedhim llojin e autofaturës “Blerje nga fermerët vendas”.
3. Plotësohen saktë të dhënat e shitësit, në rastin tonë prodhues bujqësor dhe blegtoral, duke përzgjedhur dhe vendosur numrin NIPT te identifikimi i shitësit. Kujdes! Duhet të plotësohet saktë NIPT-i i fermerit!
4. Plotësojmë artikujt e blerë nga fermeri bashkë me sasinë dhe vlerën përkatëse, pa llogaritur TVSH-në.
5. Shtojmë mënyrën e pagesës, në varësi të llojit të faturës me para në dorë apo pa para në dorë.
6. Për të përfunduar faturimin klikojmë “Regjistro Faturën”.

https://www.youtube.com/watch?v=FZZzX9qngvk

The post Pa autofaturë s’ka mall nga fermeri; Tatimet: Aksioni po forcon kontrollin ndaj grumbulluesve appeared first on Revista Monitor.

Në një kohë kur aftësitë digjitale janë thelbësore për integrimin në tregun modern të punës dhe për përfshirjen në shoqërinë digjitale, Shqipëria vijon të mbetet ndër vendet me përgatitjen më të ulët në Europë.

Sipas të dhënave të Eurostat, vetëm 51% e të rinjve të moshës 16–29 vjeç në Shqipëri zotërojnë aftësi digjitale bazë, përqindje që qëndron shumë poshtë mesatares së Bashkimit Europian (rreth 71%)

Në vendin tonë, nuk ka dallim midis gjinive – si meshkujt ashtu edhe femrat kanë të njëjtin nivel përgatitjeje dixhitale (51%). Por ndryshe nga Shqipëria, në shumicën e vendeve të BE-së femrat e reja kanë tejkaluar meshkujt për nga zotërimi i aftësive dixhitale bazë.

Në vitin 2023, në nivel BE-je kishte më shumë të reja (73%) që raportuan se zotëronin aftësi digjitale bazë krahasuar me të rinjtë meshkuj (69%). Ky trend vihet re edhe në shumicën e vendeve anëtare. Diferenca më e madhe në favor të vajzave të reja u regjistrua në Kroaci, ku 94% e tyre (krahasuar me vetëm 80% të djemve) kanë të paktën aftësi digjitale bazë.

E kundërta vihet re në pesë vende të tjera të BE-së, ku përqindja e të rinjve meshkuj me  aftësi digjitale bazë është pak më e lartë se ajo e vajzave – këto vende janë Gjermania, Malta, Rumania, Estonia dhe Sllovakia.

Përdorimi ditor i internetit

Sipas të dhënave më të fundit të Eurostat, 99% e të rinjve shqiptarë të moshës 16–29 vjeç përdorën internetin çdo ditë gjatë vitit 2024, mbi mesatarene BE-së prej 97 për qind.

Megjithatë, përqindja e popullsisë së përgjithshme që përdor internetin çdo ditë është vetëm 83%, çka krijon një hendek prej 14 pikë përqindjeje mes të rinjve dhe pjesës tjetër të shoqërisë. Ky hendek është më i thellë se mesatarja e BE-së (9 pikë përqindjeje) dhe tregon për një ndarje të fortë ndërbrezore në përdorimin e teknologjisë.

Krahasimisht, në vende si Irlanda apo Holanda, ku 100% e të rinjve janë online çdo ditë, edhe pjesa tjetër e popullsisë ndodhet shumë afër kësaj norme (98%), duke reflektuar një shoqëri më të digjitalizuar në tërësi./ Eurostat

The post 99% e të rinjve shqiptarë janë çdo ditë online, por ndër të fundit në Europë për aftësitë dixhitale appeared first on Revista Monitor.

Çfarë do të ndodhte nëse drejtuesit e korporatave do të ndaleshin për një moment, jo vetëm për të reflektuar mbi objektivat që duhet të përmbushin, por edhe mbi atë se kush duan të jenë si liderë?

Mund të duket paksa i tepërt, por një studim i fundit nga McKinsey tregon se reflektimi mund të ndihmojë në përballimin e një problemi gjithnjë e më të pranishëm në botën e menaxhimit: lodhja e thellë nga drejtimi i pandërprerë dhe presionet e vazhdueshme.

Reflektimi ose analiza personale është një mënyrë efektive për të zhvilluar aftësi thelbësore njerëzore si empatia, bujaria, ndjeshmëria dhe përshtatshmëria, cilësi që ndihmojnë në shmangien e lodhjes emocionale dhe ruajtjen e ekuilibrit mendor. Ai nxit guximin, mbështet një mendësi të qëndrueshme drejtimi dhe forcon performancën afatgjatë.

McKinsey thekson se organizatat që investojnë në kapitalin njerëzor kanë 1.5 herë më shumë gjasa të ruajnë standarde të larta. “Gjithçka ka të bëjë me mënyrën se si drejtuesit përballen me të papriturat dhe si arrijnë të përfshijnë në këtë proces njerëzit që udhëheqin,” thotë Dana Maor, partnere e lartë në McKinsey dhe një nga autorët që mbështet këtë kërkim.

Libri, me titull “The Journey of Leadership: How CEOs Learn to Lead from the Inside Out”, përqendrohet në zhvillimin personal dhe profesional të drejtuesve përballë sfidave moderne të lidershipit. Përmes rrëfimeve konkrete dhe strategjive të zbatuara, autorët, të gjithë partnerë në McKinsey, promovojnë një model udhëheqjeje të orientuar nga njeriu, ku përulësia, vetëdija dhe mësimi i vazhdueshëm janë themeli i suksesit në një mjedis të ndryshueshëm. Ata theksojnë rëndësinë e veprime të vogla të përditshme që forcojnë qëllimin dhe ndihmojnë drejtuesit të ruajnë qartësinë dhe motivimin.

Ndërsa presioni mbi drejtuesit rritet nga dita në ditë, qoftë përmes vendimeve të vështira apo pasojave të objektivave të papërmbushura, lodhja e lidershipit është kthyer në një dukuri të zakonshme. Vetëm gjatë vitit të kaluar, në SHBA dhanë dorëheqjen 2,221 CEO, një rritje me 16%, ndërsa qëndrueshmëria mesatare në drejtimin e kompanive Fortune ra nga gjashtë në pesë vjet.

Në këtë sfond, gjithnjë e më shumë ekspertë e cilësojnë lidershipin e përqendruar te njeriu si një domosdoshmëri, veçanërisht në kohë të pasigurta. Ata sugjerojnë që vetë-reflektimi duhet të jetë hapi i parë: drejtuesit të kërkojnë reagime të sinqerta nga bashkëpunëtorë të besuar dhe të bëjnë pyetje thelbësore për veten:

Si po e menaxhoj kohën?
Çfarë më motivon?
Si mund të rris performancën?
Si mund të frymëzoj ekipin dhe të sjell ndikim pozitiv?

McKinsey thekson gjithashtu se shumica e drejtuesve të sotëm nuk janë të përgatitur për sfidat që i presin në krye të organizatës. Sipas tyre, 83% e drejtuesve në mbarë botën ndihen të papërgatitur për rolet më të larta, pasi strategjia dhe inteligjenca nuk mjaftojnë më.

Aftësitë njerëzore, si ndjeshmëria, komunikimi i hapur, përulësia dhe ndërtimi i besimit, janë thelbësore për t’u lidhur me ekipet dhe për të nxitur një kulturë bashkëpunimi dhe mësimi. Gatishmëria e një drejtuesi për të treguar ndjeshmëri apo për të pranuar gabime, krijon besim dhe kontribuon në ndërtimin e një mjedisi të shëndetshëm organizativ.

Udhëheqësit duhet të ndërtojnë një ekuilibër mes cilësive që shpesh perceptohen si të kundërta si guximi dhe përulësia, vetëbesimi dhe fleksibiliteti. Ata që arrijnë këtë ekuilibër kuptojnë se bujaria dhe ndjeshmëria krijojnë një klimë pune ku të gjithë ndihen të vlerësuar dhe të motivuar.

Për më tepër, liderët kuptojnë se kujdesi për të tjerët fillon me kujdesin për veten. Përfitimet janë të qarta: drejtuesit janë më të aftë të frymëzojnë ekipet, të sigurojnë mirëqenie dhe të arrijnë rezultate më të mira. Puna e brendshme për të zhvilluar aftësitë njerëzore i ndihmon drejtuesit të ndërtojnë organizata më të shëndetshme dhe më të qëndrueshme, ku njerëzit dhe rezultatet ecin paralelisht. / INC, Shqip.al

The post Pak reflektim si zgjidhje për drejtuesit e mbingarkuar appeared first on Revista Monitor.

Nga ujërat e cekëta ngjyrë akuamarine të Greqisë te kënetat plot zogj të Francës, lagunat përfaqësojnë një alternativë të qetë dhe mbresëlënëse ndaj plazheve të mbipopulluara dhe pishinave tradicionale

Kur bëhet fjalë për t’u freskuar gjatë pushimeve verore, zgjedhjet më të zakonshme janë pishinat ose deti. Por ekziston edhe një mundësi e tretë, shpesh e anashkaluar: lagunat.

Të ndara nga deti përmes një brezi rëre ose ishulli natyror, dhe të përbëra nga një përzierje uji të ëmbël dhe të kripur, këto amfiteatro natyrore janë të mbrojtura nga rrymat dhe dallgët e forta, duke krijuar basene të qeta uji, shpesh me ngjyra të ndezura turkizi, që rivalizojnë edhe peizazhet më ekzotike të Tahitit.

Për familjet, lagunat janë një ndryshim i madh loje: pa rryma të rrezikshme, pa kandil deti, pa thellësi të fshehura – vetëm rërë e butë dhe ujë i cekët ku prindërit mund t’i lënë fëmijët të luajnë dhe të notojnë me qetësi të plotë.

Lagunat nuk janë thjesht vende të qeta për t’u larë. Këto zona “në mes”, as plotësisht det e as liqen, janë shpesh thesarë ekologjikë. Flamingot, rosat e egra, karabullakët dhe shumë zogj të tjerë lulëzojnë këtu, ndërsa ujërat e pasur me lëndë ushqyese mbështesin fermat e midhjeve dhe gocave të detit – ideale për një drekë të freskët me këmbët në rërë.

The Telegraph sugjeron 15 lagunat më të bukura në Europë, si një alternativë për pushime vere, mes të cilave renditet edhe Laguna e Nartës në Vlorë.

“Vetëm pak kilometra nga Vlora, laguna e Nartës mbetet një nga thesaret më të fshehura të bregdetit shqiptar. Vijat e cekëta të ujit janë ideale për fëmijët, që mund të luajnë e të lahen me siguri, ndërsa të rinjtë dhe të rriturit mund të eksplorojnë zonën me kajak apo paddleboard. Laguna është gjithashtu një parajsë për dashamirësit e natyrës: rreth 3,000 flamingo të mëdhenj, çafka dhe pelikanë popullojnë kriporet përreth, duke e kthyer këtë habitat në një atraksion të rrallë ekologjik.

Për familjet, Narta ofron më shumë sesa thjesht plazh – shtigjet e sheshta përreth lagunës janë të përshtatshme për çiklizëm, ndërsa afër ndodhet Manastiri i Zvërnecit i shekullit XIII, i ndërtuar mbi një ishull të vogël që lidhet me tokën përmes një ure druri, duke ofruar një udhëtim unik kulturor dhe shpirtëror.

Larg zhurmës së resorteve dhe turmave të dendura, Narta mbetet një zgjedhje e qetë dhe autentike për pushime ndryshe buzë Adriatikut”.

Lagunat më të bukura të Europës për një verë ndryshe

Blue Lagoon –  Turqi

Lagunë ikonike në bregun e Dalamanit, pranë Fethiye, me ujëra turkizë të qeta, të ndara nga deti me një brez të bardhë rëre. Si pjesë e një parku kombëtar, ofron mundësi për not, kajak dhe paragliding mbi peizazhin mahnitës nga mali Babadağ.

Port Glarokavos – Halkidiki, Greqi

Në jug të gadishullit Kassandra, kjo lagunë formohet nga një brez i rrallë dyfishtë rëre që krijon shtresa me nuanca të ndryshme blu. E shpallur si “plazhi më i bukur në Europë”, ofron një kombinim të shkëlqyer mes bareve plazhi dhe zonave të qeta, ideale për familje dhe pushime larg zhurmës.

Blue Lagoon – Comino, Maltë

Grykë e ngushtë me ujëra kristal të cekëta mes ishullit Comino dhe Cominotto. Shumë e pëlqyer për zhytje sipërfaqësore dhe relaks, me pak zhvillim turistik dhe hyrje me rezervim online gjatë sezonit.

Mar Menor – Spanjë

Laguna më e madhe me ujë të kripur në Europë, me ujëra të ngrohta, të cekëta dhe baltë minerale me veti kuruese. Plazhe të qeta dhe ideale për familje gjatë gjithë vitit.

Étang de Thau – Francë

Lagunë e madhe dhe e qetë, me plazhe të sigurta për fëmijë dhe restorante që shërbejnë ostra lokale. Zonë e pasur me biodiversitet për vëzhgim zogjsh dhe natyrë.

Lido di Venezia – Itali

Ishull mes lagunës dhe Adriatikut me plazhe, vila elegante dhe rezervate natyrore. Ofron balancë mes luksit, qetësisë dhe aventurës.

Ria Formosa – Portugali

Park natyror me kanale dhe ishuj që ndryshojnë formë me baticat. Strehon flamingo dhe kalë deti – perfekt për kajak, çiklizëm dhe pushime në qetësi.

Skjellvika – Norvegji

Plazh i cekët dhe shumë i pastër në Sandefjord, i përshtatshëm për fëmijë të vegjël. Zona ka fusha për piknik dhe shtigje për shëtitje.

Sëanpool Lagoon – Angli

Lagunë e mbrojtur në Cornwall, ideale për fëmijë, me natyrë, akullore dhe paddleboard për adoleshentë. Pranë ndodhet edhe një rezervë natyrore me shtigje të lehta.

Ho Bugt – Danimarkë

Fusha baticore pjesë e UNESCO-s, me aktivitete për fëmijë, si larje, shëtitje dhe safarë me goca deti. Vizitorët mund të ecin deri në ishullin Langli për të parë foka dhe zogj.

Grevelingenmeer – Holandë

Lagunë e madhe me ujë të kripur dhe të qetë, ideale për sporte ujore, zhytje dhe çiklizëm. Vizitorët mund të shohin foka, kuaj të egër dhe të marrin pjesë në festivale lokale.

Zaton Bay – Kroaci

Gjiri në formë patkoi pranë Dubrovnikut me ujëra të kaltra dhe aktivitete detare. Plazhe për të gjitha shijet dhe transport i lehtë nga qyteti.

Cala Brandinchi – Itali (Sardenjë)

I quajtur “Tahiti i vogël”, ka rërë të bardhë dhe ujë të kthjellët. Hyrja kërkon rezervim online gjatë sezonit veror.

Praia da Amoreira – Portugali

Plazh i gjerë me lagunë baticore dhe pellgje shkëmbore plot jetë detare. Ideal për fëmijë, sërfistë dhe shëtitje në natyrë./ The Telegraph

The post Lagunat më të bukura në Europë – mes tyre edhe Narta, një zgjedhje e qetë dhe autentike për verën appeared first on Revista Monitor.

Rritja e sektorit të mikrokredisë u ngadalësua vitin e kaluar.

Të dhënat e Bankës së Shqipërisë tregojnë se portofoli total i huasë nga institucionet e licencuara për mikrokredi në fund të 2024 arriti në 24.1 miliardë lekë, 3.9% (rreth 0.9 miliardë lekë) më shumë krahasuar me një vit më parë. Rritja e kredisë është ngadalësuar ndjeshëm krahasuar me nivelin prej 29% (rreth 5.2 miliardë lekë) të vitit 2023.

Megjithëse në tërësi ecuria e kredisë për ekonominë vitin e kaluar ishte pozitive, kjo rritje për sektorin e mikrofinancës është frenuar dukshëm. Me sa duket, skandali i mikrokredivedhe nisja e një cikli të shtrëngimi rregullator nga Banka e Shqipërisë kanë dhënë efekte qysh vitin e kaluar në volumin e kredidhënies nga institucionet mikrofinanciare.

Vitin e kaluar, dy institucionet financiare jobanka, Micro Credit Albania dhe Final, u bënë objekt i një çështjeje penale të çuara për gjykim nga Prokuroria e Tiranës, të akuzuara për shkelje të shumta ligjore në procesin e mbledhjes së kredive të këqija.

Në vijim, Banka e Shqipërisë vendosi heqjen e licencës për të dy këto institucione.  Megjithëse në vetvete rasti lidhej me kompani të mbledhjes së borxheve të këqija, kjo çështje solli një dëm në imazh edhe për institucionet mikrofinanciare, kryesisht të kredive të shpejta.

Çështja në fjalë u bë shkak edhe për një shtrëngim të fortë në kuadrin rregullator të lidhur me mikrofinancën. Masat e reja të Bankës së Shqipërisë hynë në fuqi nga fillimi i këtij viti, por megjithatë duket se ngjarjet e mësipërme kanë sjellë një frenim të rritjes së shpejtë disavjeçare të aktivitetit të mikrokredive konsumatore.

Ndryshimet rregullatorë kanë vendosur për herë të parë disa kritere të detajuara, duke përfshirë edhe tregues sasiorë, në praktikat e administrimit të rrezikut në huadhënien konsumatore nga institucionet financiare jobanka. Një institucion financiar jobankë nuk do të lejohet të japë në të njëjtën kohë më shumë se dy kredi konsumatore për të njëjtin huamarrës.

Gjithashtu, është përcaktuar edhe një nivel tavan në raportin e shërbimit të borxhit kundrejt të ardhurave (DSTI), që do të llogaritet si vlera e totalit të kësteve mujore të kredive ekzistuese, duke përfshirë edhe kredinë për të cilën po aplikohet, të pjesëtuar me të ardhurat neto të të gjithë bashkëkredimarrësve. Vlera e raportit të shërbimit të borxhit kundrejt të ardhurave nuk duhet të tejkalojë vlerën prej 60%.

Gjithashtu, banka e Shqipëris miratoi edhe disa ndryshime në formulën e llogaritjes së normës maksimale efektive të interesit (NEI Maksimal) për kreditë e vogla konsumatorë deri në 200 mijë lekë. Këto ndryshime kanë sjellë një ulje të ndjeshme të NEI-t maksimal, që në gjysmën e dytë të këtij viti zbriti në 62.2%.

Sipas informacionit të Bankës së Shqipërisë, në fund të vitit të kaluar në Shqipëri vepronin shtatë institucione financiare të licencuara për veprimtarinë e mikrokredisë. Megjithatë, vlerësohet se në pjesën dërrmuese portofoli i mikrokredisë i takon dy institucioneve më të mëdha mikrofinanciare në vend, Iutecredit Albania dhe ECFA (ish-Kredo Finance)./ E.Shehu

The post Frenohet rritja e biznesit të kredive të vogla appeared first on Revista Monitor.

Bankers Petroleum Albania njoftoi se ka emëruar Kryetarin e Bordit Mbikëqyrës dhe Bashkëkryetarin për të Mbështetur Vazhdimësinë e Bashkëpunimit me Autoritetet Shtetërore

z. Andrija Kojaković, sipas njoftimit, mbart një karrierë të spikatur në pozicione drejtuese të sektorit të energjisë, diplomaci dhe këshillim strategjik.

Z. Kojaković do të ketë një rol qendror në mbikëqyrjen e angazhimit të kompanisë me autoritetet shqiptare dhe në mbështetjen për një sqarim të plotë të situatës aktuale.

Z. Kojaković mbart një përvojë të spikatur në poste drejtuese në sektorin e naftës dhe gazit në Ballkan, përfshirë periudhën kur ka qenë Drejtor Ekzekutiv i kompanisë kroate INA d.d. (1995–1997), ku ka udhëhequr nismat e rëndësishme për ristrukturim financiar dhe ligjor. Ai gjithashtu ka shërbyer si Ambasador i Republikës së Kroacisë në disa shtete kyçe (përfshirë Kinën dhe Mbretërinë e Bashkuar), si dhe si Anëtar Bordi në Bankën Evropiane për Rindërtim dhe Zhvillim (BERZH), ku ka këshilluar për zhvillimin ekonomik dhe qeverisjen. Në sektorin privat, ai themeloi dhe drejtoi Central European Oil Company, e mbështetur nga institucione të rëndësishme financiare ndërkombëtare.

Emërimi i tij përforcon angazhimin tonë për menaxhim të fortë, transparencë dhe udhëheqje të përgjegjshme ndërsa ecim përpara.

“Ndërkohë, operacionet tona mbeten të qëndrueshme. Ne kemi riformuar ekipin tonë kryesor dhe punonjësit tanë janë duke u mbështetur në mënyrë të plotë. Aktivitetet e përditshme vazhdojnë pa ndërprerje të mëdha, falë drejtimit të inxhinierëve shumë të kualifikuar dhe me përvojë që po e çojnë kompaninë përpara.

Bankers Petroleum Albania mbetet plotësisht bashkëpunues me të gjitha institucionet dhe autoritetet përkatëse. Ne jemi të përkushtuar ndaj një dialogu konstruktiv dhe përputhshmërisë së plotë gjatë gjithë këtij procesi, duke vazhduar njëkohësisht të kontribuojmë në sigurinë e sektorit të energjisë dhe zhvillimin afatgjatë të Shqipërisë”, thuhet në njoftim.

Në fillim të korrikut, prokuroria e Fierit njoftoi se kishte nisur një hetim ndaj Bankers Petroleum, një prej sipërmarrjeve më të mëdha në vend, që menaxhon me koncesion fushën naftëmbajtëse të Patos Marinzës. Sipas Prokurorisë së Fierit, kompania ka deklaruar për periudhën 2004–2024 një total shitjesh dhe eksportesh prej mbi 532 miliardë lekësh, por ka rezultuar çdo vit me humbje, duke shmangur në mënyrë sistematike pagesën e tatim-fitimit. Ndërkohë, janë deklaruar shpenzime të pretenduara që tejkalojnë të ardhurat, në një vlerë të përgjithshme prej afro 11.7 miliardë lekësh.

Dyshohet se, përmes fryrjes fiktive të këtyre shpenzimeve, kompania jo vetëm ka shmangur taksat, por ka përfituar edhe rimbursime të pajustifikuara të TVSH-së, me një dëm të dyshuar që llogaritet në miliona euro. Prokuroria ka ekzekutuar 9 masa sigurimi ndaj drejtuesve aktualë dhe të mëparshëm të kompanisë, ndërsa 5 shtetas të tjerë, kryesisht të huaj, janë shpallur në kërkim.

Aksioni në Bankers, Prokuroria jep detaje: Shmangu detyrimet tatimore, deklaroi humbje për 20 vite

The post Bankers emëron kroatin Kojaković në Bordin Mbikëqyrës, premton transparencë appeared first on Revista Monitor.

Shqipëria kryesoi Europën në vitin 2024 për normat më të larta të migracionit neto negativ (kthimet minus ikjet) me -12.1 banorë të larguar nga vendi për 1000 banorë në vitin 2024, nga -11.7 që ishte ky tregues në vitin 2022.

Emigrimi neto jo vetëm që nuk po përmirësohet, por fenomeni është bërë kronik dhe po thellohet në mënyrë të qëndrueshme. (shiko tabelën e mëposhtme).

Të dhënat e Eurostat tregojnë se për çdo 1000 banorë vitin e kaluar mbi 12 janë larguar nga vendi një normë shumë herë më e lartë se vendet e tjera të Rajonit dhe Europës Lindore ku në shumicën prej tyre me 2024 kthimet në shtëpi janë më ta larta se ikjet.

Në pjesën më të madhe të Bashkimit Europian ka rënie të emigracionit pas vitit të jashtëzakonshëm 2022, kur lufta në Ukrainë dhe lirimi i kufizimeve pandemike sollën flukse të larta lëvizjeje, por në Shqipëri tendenca është krejt e kundërt. Emigrimi nuk po ndalet dhe duket se nuk ka asnjë ngadalësim real.

Rezultatet tregojnë se në shumicën e vendeve te Ballkanit kthimet janë më të larta se ikjet në 2024. Në Bosnjë emigracioni neto ishte 0.1% më 2024, nga një trend negativ në vitet e shkuara. Bilanci i migracionit neto u kthye pozitiv ishe ne Maqedoninë e Veriut , +0.3 më 2024 nga negativ që ishte në vitet e shkuara. Gjithashtu në Serbi ka tendenca pozitive pasi ikjet me kthimet u barazuan me 2024, nga një bilanc negativ që ishte në të shkuarën.

Sipas të dhënave zyrtare të INSTAT për 1 janar 2025, mosha mediane e popullsie shqiptare rrit me 0,8 vjet brenda 1 viti duke arritur në 44,3 vjeç, ndërsa emigracioni neto (ikjet minus ardhjet) arritën në rreth -29 mijë persona. Në dy vite 2023 dhe 2024 emigrimi neto shënoi -72,597 persona.

Nga viti 2015 deri në 2020, emigracioni neto (ikjet minus ardhjet) ishte rreth -16 mijë persona në vit, 80% e tyre të rinj, ndërsa nga 2020 – 2025 ky tregues është mesatarisht -34,5 mijë në vit. Emigracioni i të rinjve është rritur më shumë se dyfishi pas pandemisë

Anketat e Monitor kanë treguar se, njerëzit nuk po largohen vetëm nga varfëria, por edhe mungesa e shpresës se gjërat mund të përmirësohen dhe gjithashtu vlerësojnë të rëndësishme mungesën e cilësisë në shërbimet shëndetësore dhe arsimore.

Më shumë se 66% e të anketuarve që jetojnë në Shqipëri, 568 persona nga 857 gjithsej, dhanë si arsye për emigrimin “mungesën e perspektives për të ardhmen”.

Gjithashtu, më shumë se gjysma mendojnë si arsyen e dytë më kryesore për largimin nga vendi “standardet më të larta të jetesës”, në vend të tretë “mungesa e një shërbimi shëndetësor të përshtatshëm”, në vend të katërt, ”mungesa e sigurisë dhe stabilitetit politik, ndërsa 46% e të anketuarve kishin si një arsye “arsim më të mirë për fëmijët”.

40% e shtresës së mesme gati për emigrim, nga mungesa e perspektivës dhe sistemit shëndetësor

Ndryshe nga vende që kanë krijuar politika për të tërhequr ose rikthyer diasporën, Shqipëria nuk ka asnjë politikë efektive për të ruajtur apo kthyer qytetarët e saj. Për më tepër, shpesh emigrimi është parë si “zgjidhje” e heshtur për të ulur presionin ekonomik dhe social brenda vendit.

Kjo humbje e vazhdueshme njerëzore solli pasoja të drejtpërdrejta ekonomike, sociale dhe demografike. Tregu i punës po ngushtohet, popullsia po plaket dhe zonat rurale po boshatisen. Shërbimet publike, nga arsimi tek shëndetësia, po e ndiejnë mungesën e specialistëve, ndërsa investimet po zhvendosen drejt vendeve me më shumë stabilitet demografik.

Nëse në disa vende të rajonit kjo prirje po zbutet falë politikave të rikthimit ose integrimit në tregje më të mëdha, në Shqipëri mungesa e një strategjie të qartë për të ndaluar ose kthyer valët e emigrimit vetëm sa po e përkeqëson situatën./ B.Hoxha

The post Eurostat: Shqipëria kryesoi Europën për emigracion neto negativ më 2024 appeared first on Revista Monitor.

Çdo qytetar me vendbanim apo vendqëndrim në Shqipëri do të ketë detyrimin të bëjë vetëdeklarimin e adresës së banimit nëpërmjet e-Albania.

Por me qëllim vërtetimin që qytetari banon në adresën e deklaruar do të ketë detyrimin të ngarkojë dokumentin e pronësisë së apartamentit, apo të kontratës së qirasë për ata që banojnë në qira.

E njëjta procedurë do të zbatohet edhe për rastet e ndryshimit të adresës së vendbanimit, ku qytetarët do të duhet të ngarkojnë çdo dokument të ligjshëm që provon vendbanimin apo vendqëndrimin e tyre në adresën e deklaruar.

Mënyra e paraqitjes së kërkesës për deklarimin e adresës së banimit apo ndryshimit të saj përcaktohen në vendimin “Për përcaktimin e mënyrës së paraqitjes së kërkesës, të dokumentacionit të nevojshëm, të rregullave për deklarimin dhe ndryshimin e vendbanimit ose të vendqëndrimit të shtetasve, si dhe për shtetasit në institucionet shëndetësore dhe në institucionet e ekzekutimit të vendimeve penale”. Vendimi hyri në fuqi pas botimit në Fletoren Zyrtare.

“Shtetasit me vendbanim ose vendqëndrim në territorin e Republikës së Shqipërisë kryejnë deklarimin, ndryshimin ose saktësimin e vendbanimit apo të vendqëndrimit në rrugë elektronike (on-line), në portalin qeveritar “e-Albania”, duke ngarkuar dokumentin e pronësisë së banesës, kontratën e qiramarrjes, të huadhënies, të përdorimit ose çdo dokument tjetër të ligjshëm, që provon vendbanimin ose vendqëndrimin e tyre në adresën e deklaruar”, theksohet ndër të tjera në vendim.

Zyrat e gjendjes civile, nga ana tjetër, janë të detyruara të verifikojnë saktësinë e adresave dhe të njoftojnë qytetarët brenda 24 orëve në rast të mungesës së dokumentacionit, të cilin qytetarët duhet ta plotësojnë brenda 3 ditëve.

Vendimi po ashtu përcakton se të gjithë anëtarët e një familjeje duhet të kenë të njëjtën adresë vendbanimi, që plotëson të gjitha elementet e adresës, sipas dispozitave të parashikuara nga legjislacioni për sistemin e adresave në Republikën e Shqipërisë.

Në rastet kur një person kërkon të regjistrohet në një familje ekzistuese, kërkesa duhet të konfirmohet online nga kryefamiljari. Ndryshimi i adresës nga një anëtar i rritur i familjes kërkon gjithashtu shkëputjen nga familja ekzistuese në sistemin elektronik.

Vendimi po ashtu përcakton se institucionet shëndetësore dhe ato të ekzekutimit të vendimeve penale, kur mbajnë shtetas për më shumë se tre muaj, kanë detyrimin të raportojnë automatikisht pranë gjendjes civile për vendqëndrimin e tyre. Pas daljes nga këto institucione, njoftimi për përditësim të adresës duhet të bëhet brenda 5 ditëve.

Vendimi (i plotë)

1. Shtetasit me vendbanim ose vendqëndrim në territorin e Republikës së Shqipërisë kryejnë deklarimin, ndryshimin ose saktësimin e vendbanimit apo të vendqëndrimit në rrugë elektronike (on-line), në portalin qeveritar “e-Albania”, duke ngarkuar dokumentin e pronësisë së banesës, kontratën e qiramarrjes, të huadhënies, të përdorimit ose çdo dokument tjetër të ligjshëm, që provon vendbanimin ose vendqëndrimin e tyre në adresën e deklaruar.
2. Shtetasi, i cili kërkon të banojë në një familje ekzistuese, paraqet kërkesën në rrugë elektronike (on-line), nëpërmjet portalit qeveritar “e-Albania”. Kjo kërkesë duhet të konfirmohet nga kryefamiljari i familjes pritëse në portalin qeveritar “e-Albania”, duke respektuar standardet e banimit, të miratuara nga legjislacioni në fuqi.
3. Dokumentet e ngarkuara nga shtetasi në shërbimin elektronik në portalin qeveritar “eAlbania” ruhen në bazën e të dhënave të Regjistrit Kombëtar të Gjendjes Civile.
4. Deklarimi, ndryshimi ose saktësimi i vendbanimit, me kërkesë të kryefamiljarit, pasqyrohet njëkohësisht për të gjithë anëtarët e tjerë të familjes.
5. Anëtari madhor i familjes, i cili kërkon të ndryshojë vendbanimin, më parë duhet të kryejë procedurën e veçimit nga familja.
6. Të gjithë anëtarët e një familjeje duhet të kenë të njëjtën adresë vendbanimi, që plotëson të gjitha elementet e adresës, sipas dispozitave të parashikuara nga legjislacioni për sistemin e adresave në Republikën e Shqipërisë.
7. Shtetasi ka detyrimin të deklarojë vendqëndrimin e tij, përveç rasteve të parashikuara në pikën 8 të këtij vendimi.
8. Për shtetasit, që kryejnë dënimin në institucionet e ekzekutimit të vendimeve penale apo qëndrojnë në institucionet e paraburgimit në pritje të vendimit gjyqësor për më shumë se 3 (tre) muaj dhe shtetasit që qëndrojnë pa ndërprerje në institucione shëndetësore për kurim mjekësor afatgjatë dhe kur qëndrimi në këto institucione zgjat më shumë se 3 (tre) muaj, institucioni përgjegjës duhet të paraqesë, brenda 48 (dyzet e tetë) orëve nga plotësimi i afatit të mësipërm, pranë zyrës së gjendjes civile, që ka në juridiksion territorial institucionin përkatës, listën emërore të tyre, e cila duhet të përmbajë emrin, mbiemrin dhe numrin personal.
9. Kur përfundon qëndrimi i shtetasve në një nga institucionet e përcaktuara në pikën 8 të këtij vendimi, institucioni përkatës njofton zyrën e gjendjes civile, që ka në juridiksion territorial lidhur me këtë fakt, brenda 5 (pesë) ditëve.
10. Shkëmbimi i të dhënave, sipas pikave 8 dhe 9 të këtij vendimi, kryhet me ndërveprim nëpërmjet platformës qeveritare të ndërveprimit.
11. Në rastet kur konstatohet se anëtarët e së njëjtës familje kanë adresë vendbanimi të ndryshme nga njëri-tjetri, nëpunësi duhet të kryejë saktësimin e të dhënave të vendbanimit.
12. Me ndryshimin e vendbanimit të shtetasve, nga zyrat e gjendjes civile në bashki/njësi administrative kryhen përditësimet e përbërësve të tjerë të gjendjes civile, si elementet e adresës së vendbanimit dhe numri i votimit.
13. Zyrat e gjendjes civile në bashki/njësi administrative, në rastin kur konstatojnë se ka mangësi në dokumentacion për deklarimin, ndryshimin ose saktësimin e vendbanimit apo të vendqëndrimit, njoftojnë brenda 24 (njëzet e katër) orëve shtetasit për plotësimin e dokumentacionit nëpërmjet portalit qeveritar “e-Albania”. Plotësimi i dokumentacionit të kërkuar nga zyra e gjendjes civile bëhet nga shtetasit brenda 3 (tri) ditëve nga njoftimi.
14. Zyrat e gjendjes civile në bashki/njësi administrative, në rastin kur konstatojnë se adresa e shtetasit nuk përmban të gjitha elementet e adresës, sipas dispozitave të parashikuara nga legjislacioni për sistemin e adresave në Republikën e Shqipërisë, njoftojnë, brenda 24 (njëzet e katër) orëve, shtetasit për plotësimin e dokumentacionit nëpërmjet portalit qeveritar “e-Albania”. Plotësimi i dokumentacionit të kërkuar nga zyra e gjendjes civile bëhet nga shtetasit brenda 3 (tri) ditëve nga njoftimi.

15. Zyrat e gjendjes civile në bashki/njësi administrative, kur konstatojnë element të pasaktë të adresës, që mund të rregullohet prej tyre, e saktësojnë këtë element kryesisht, pa qenë nevoja për aplikim nga ana e shtetasit. 16. Drejtoria e Përgjithshme e Policisë së Shtetit apo zyra që mbulon shtetësinë dhe refugjatët njofton shërbimin e gjendjes civile për çdo akt që krijon, shuan apo ndryshon të drejta lidhur me vendqëndrimin e shtetasve të huaj me leje qëndrimi, të shtetasve të huaj që kanë fituar statusin e refugjatit ose të mbrojtjes plotësuese, si dhe të personave pa shtetësi.
16. Nëpunësi i zyrës së gjendjes civile, pas marrjes së dokumentacionit dhe të kërkesës nga shtetasit apo nga institucionet që e kanë këtë detyrim ligjor, bën deklarimin ose ndryshimin e adresës së shtetasit të huaj në Regjistrin Kombëtar të Gjendjes civile, sipas rregullave të përcaktuara nga legjislacioni në fuqi për të huajt.
17. Vendimi nr. 1243, datë 11.12.2009, i Këshillit të Ministrave, “Për përcaktimin e dokumenteve, që duhen të paraqesin shtetasit, e të procedurave që duhet të kryejnë zyrat e gjendjes civile, në bashki/ njësi administrative dhe institucionet shtetërore të posaçme, për ndryshimet e vendbanimit/adresës së shtetasve”, të ndryshuar, shfuqizohet.
18. Ngarkohen Ministria e Brendshme, Drejtoria e Përgjithshme e Gjendjes Civile, zyrat e gjendjes civile në bashki/njësi administrative, Ministria e Drejtësisë, Ministria e Shëndetësisë dhe Mbrojtjes Sociale dhe njësitë e vetëqeverisjes vendore për zbatimin e këtij vendimi. Ky vendim hyn në fuqi pas botimit në Fletoren Zyrtare.

D.Azo

The post Vetëdeklarimi i adresës në e-Albania me dokumente pronësie do të jetë i detyrueshëm appeared first on Revista Monitor.