Presidenti i UEFA-s, Aleksander Ceferin, mungoi në finalen e Kupës së Botës 2026 mes Spanjës dhe Argjentinës, një veprim që, sipas raportimeve të mediave britanike, shihet si një shenjë proteste ndaj mënyrës se si FIFA e menaxhoi turneun.

Sipas gazetës The Times, mungesa e kreut të futbollit evropian pasqyron marrëdhëniet e tensionuara mes UEFA-s dhe FIFA-s, të cilat janë përkeqësuar pas disa vendimeve të diskutueshme gjatë Botërorit.

Rasti Balogun ndezi përplasjen

Një nga arsyet kryesore të pakënaqësisë së UEFA-s ishte vendimi i Komisionit Disiplinor të FIFA-s për të anuluar pezullimin me një ndeshje të sulmuesit amerikan Folarin Balogun.

UEFA e kritikoi ashpër këtë vendim, duke e cilësuar si "të paprecedentë, të pakuptueshëm dhe të pajustifikuar", ndërsa theksoi se një ndërhyrje e tillë dëmton besueshmërinë e procesit disiplinor.

Kontroversa u shtua edhe më shumë pasi u raportua se presidenti i SHBA-së, Donald Trump, kishte kontaktuar presidentin e FIFA-s, Gianni Infantino, duke kërkuar një rishikim të kartonit të kuq të Balogun. Kjo ngriti dyshime për ndikim politik në vendimmarrjen e organit më të lartë të futbollit botëror.

Pakënaqësi edhe për trajtimin e gjyqtarëve dhe Iranit

Një tjetër pikë përplasjeje ishte rasti i gjyqtarit somalez Omar Artan, i cili u kthye nga autoritetet amerikane përpara fillimit të turneut. Si përgjigje simbolike, UEFA e emëroi gjyqtar arbitër kryesor të finales së Superkupës së Evropës që do të zhvillohet muajin e ardhshëm.

UEFA shprehu gjithashtu shqetësim për trajtimin e përfaqësueses së Iranit gjatë Botërorit.

Lojtarët iranianë iu nënshtruan kontrolleve dhe kufizimeve më të rrepta gjatë hyrjes dhe daljes nga Shtetet e Bashkuara, ndërsa trajneri Amir Ghalenoei deklaroi se skuadra e tij ishte vendosur në "pozicionin më të vështirë" të të gjitha ekipeve pjesëmarrëse.

Kundërshtime edhe për ndryshimet në rregullat e lojës

Pakënaqësia e UEFA-s nuk lidhet vetëm me çështjet disiplinore. Sipas raportit, drejtuesit evropianë janë kundër disa risive të aplikuara nga FIFA gjatë turneut.

Një prej tyre ishte zgjatja e pushimeve për rifreskim, të cilat, sipas UEFA-s, praktikisht e ndanë ndeshjen në katër pjesë dhe krijuan hapësirë shtesë për transmetimin e reklamave televizive.

Po ashtu, pjesa e parë e pushimit në finalen e Kupës së Botës zgjati 27 minuta, ndonëse rregullorja e futbollit parashikon një maksimum prej 15 minutash.

UEFA nuk pritet të adoptojë disa nga interpretimet e reja të FIFA-s, përfshirë mënyrën e përdorimit të VAR-it në rastet e ngatërrimit të identitetit të lojtarëve, si dhe rregullin që lejon futbollistët të mbulojnë gojën gjatë komunikimit në fushë.

Megjithatë, pavarësisht mungesës në finale, Ceferin ishte i pranishëm në ceremoninë hapëse të Kupës së Botës më 11 qershor në Mexico City, ku ndoqi ndeshjen e parë të turneut. /Telegrafi/

Finalja e Kupës së Botës 2026 mes Spanjës dhe Argjentinës nuk dominoi vetëm ekranet televizive, por edhe kërkimet në internet.

Sipas të dhënave të Google Trends, pyetja "Sa zgjat koha shtesë në futboll?" arriti nivelin më të lartë të kërkimeve në Spanjë në 20 vitet e fundit.

Interesi i madh erdhi pasi finalja në stadiumin MetLife përfundoi pa gola në kohën e rregullt dhe kaloi në vazhdime, ku Ferran Torres shënoi golin që i siguroi Spanjës titullin e dytë kampion bote.

Përveç pyetjes për kohën shtesë, pesë kërkimet më të njohura në Spanjë gjatë finales ishin:

• "Nga është Ferran Torres?"
• "Kur mbërrin kombëtarja spanjolle në Madrid?"
• "Kur do të zhvillohen festimet për titullin e Kupës së Botës?"
• "Kush shënoi golin që i dha Spanjës Kupën e Botës?"
• "Për cilin klub luan Ferran Torres?"

Pas përfundimit të finales dhe shpalljes së Spanjës kampione, u rrit ndjeshëm edhe interesi për fanellën e re të kombëtares.

Kërkimet për "fanella e Spanjës me dy yje" dhe "fanella e re e Spanjës" u bënë ndër më të kërkuarat në vend.

Ndërkohë, në Argjentinë, menjëherë pas humbjes në finale, tema më e kërkuar në internet ishte Kupa e Botës 2030, me tifozët që tashmë e kthyen vëmendjen te edicioni i ardhshëm.

Fotoja e Messit me Yamal pushtoi botën

Në nivel global, fotografia e famshme ku Lionel Messi mban në krahë dhe lan në vaskë foshnjën Lamine Yamal u bë trendi numër një në Google, pasi imazhi simbolik mori një domethënie të re pas finales, ku Yamal udhëhoqi Spanjën drejt triumfit ndaj Argjentinës. /Telegrafi/

Ka histori që shkojnë përtej futbollit dhe ajo e Borja Iglesias është një prej tyre. Sulmuesi galician ngriti të dielën Kupën e Botës me Spanjën, duke përmbyllur një rrugëtim të jashtëzakonshëm që vetëm 1.212 ditë më parë dukej se kishte marrë fund.

Më 25 gusht 2023, në kulmin e krizës së shkaktuar nga rasti Luis Rubiales pas triumfit të kombëtares spanjolle të femrave në Kupën e Botës, Borja Iglesias njoftoi se largohej nga kombëtarja.

"Nuk ndihem i përfaqësuar nga ajo që ka ndodhur", shkroi ai në rrjetet sociale, duke bërë të ditur se nuk do të vishte më fanellën e Spanjës derisa të kishte ndryshime në Federatën Spanjolle të Futbollit (RFEF).

Ishte një vendim i guximshëm, në përputhje me karakterin e tij, pasi sulmuesi nuk ka hezituar kurrë të shprehë publikisht bindjet e tij, edhe kur ato kanë shkaktuar polemika.

Rikthimi i madh

Historia e Iglesias me kombëtaren nuk ka qenë e lehtë. Ai debutoi në vitin 2022 nën drejtimin e Luis Enrique, pas një sezoni të shkëlqyer me Betisin, por më pas humbi gradualisht vendin në skuadër.

Pas rënies së formës, në janar të vitit 2024 u huazua te Bayer Leverkusen, në kërkim të më shumë minutave dhe besimit.

Pika e kthesës erdhi pas rikthimit te Celta Vigo, ku rigjeti formën më të mirë. Në dy sezonet e fundit ai realizoi 29 gola, paraqitje që bindën Luis de la Fuenten ta rikthente në kombëtare në tetor të vitit të kaluar.

Që nga ai moment, Iglesias u bë pjesë e rregullt e skuadrës spanjolle.

Fundi i përsosur

Shpërblimi nuk mund të ishte më i madh. Pas dorëheqjes për shkak të parimeve të tij, rindërtimit të karrierës dhe rikthimit në kombëtare falë paraqitjeve në fushë, Borja Iglesias arriti kulmin duke fituar Kupën e Botës 2026 me Spanjën.

Është fundi ideal i një historie të ndërtuar mbi bindje, këmbëngulje dhe punë të palodhur, duke dëshmuar se jo të gjithë kampionët arrijnë suksesin në të njëjtën mënyrë.

Për Borja Iglesias, rruga drejt lavdisë ishte më e vështirë, por edhe shumë më domethënëse. /Telegrafi/

Spanja po feston fitimin e titullit të dytë në histori të Kupës së Botës, pasi në finalen e madhe mposhti Argjentinën me rezultat 1-0 pas kohës shtesë.

Një ditë pas triumfit historik, futbollistët dhe stafi teknik u kthyen në Madrid, ku u pritën nga një festë madhështore. Sipas vlerësimeve, rreth dy milionë tifozë mbushën rrugët e kryeqytetit spanjoll për të përshëndetur kampionët e botës, duke krijuar kolona të gjata njerëzish dhe duke bllokuar pjesë të tëra të qytetit.

Festimet nisën me vizita zyrtare te drejtuesit e shtetit. Fillimisht, kombëtarja u prit nga Mbreti Felipe VI dhe familja mbretërore në Pallatin Zarzuela. Princeshat ishin të veshura me fanellat e kombëtares spanjolle, ndërsa mbreti dhe mbretëresha i uruan lojtarët për suksesin historik.

Një nga momentet më të veçanta ishte takimi i Mbretit Felipe VI me talentin Lamine Yamal, të cilin e përqafoi ngrohtësisht gjatë ceremonisë.

Pas vizitës në pallatin mbretëror, kampionët u drejtuan për në Pallatin Moncloa, ku u pritën nga kryeministri Pedro Sánchez. Ai përgëzoi skuadrën për paraqitjet e saj, duke theksuar se "finalet nuk luhen, por fitohen", ndërsa shtoi se Spanja e ka dëshmuar këtë në mënyrën më të mirë të mundshme.

Më pas nisi parada e shumëpritur. Futbollistët hipën në një autobus të hapur dhe përshkuan rrugët e Madridit drejt sheshit ikonik Cibeles. Për shkak të turmës së jashtëzakonshme, autobusi lëvizte shumë ngadalë, duke u dhënë lojtarëve mundësinë të festonin për një kohë të gjatë me tifozët.

Atmosfera u ndez edhe më shumë kur sulmuesi Borja Iglesias mori rolin e DJ-së në autobus, duke lëshuar muzikë reggaeton që shoqëroi festën gjatë gjithë itinerarit.

Në qendër të vëmendjes ishte edhe Ferran Torres, i cili mbante një kapele me mbishkrimin ironik "Make Spain Great Again" ("Ta bëjmë Spanjën sërish të madhe"), një referencë humoristike ndaj sloganit të presidentit amerikan Donald Trump.

Ndërkohë, Lamine Yamal elektrizoi turmën kur mori mikrofonin dhe thirri: "Campeones del Mundo!" ("Kampionët e botës!"), ndërsa qindra mijëra tifozë iu përgjigjën me ovacione dhe brohoritje.

Edhe tifozët dhuruan momente argëtuese gjatë festës. Një banderolë që paraqiste vëllain e vogël të Yamalit, Keyne, të ilustruar si Jezu Krishti, tërhoqi vëmendjen e lojtarëve dhe shkaktoi të qeshura mes kampionëve të rinj të botës.

Madridi u shndërrua në një festë gjigante, duke përjetuar një nga ditët më të mëdha në historinë e futbollit spanjoll pas fitimit të Kupës së dytë të Botës. /Telegrafi./

Lionel Messi ka reaguar për herë të parë pas humbjes së Argjentinës në finalen e Kupës së Botës 2026 ndaj Spanjës, duke publikuar një mesazh emocionues në rrjetet sociale.

Kapiteni argjentinas, i cili me shumë gjasa zhvilloi ndeshjen e tij të fundit në një Kupë Bote, falënderoi tifozët për mbështetjen dhe u shpreh krenar për rrugëtimin e skuadrës deri në finale.

"Dhimbja është e madhe dhe do të duhet kohë që kjo plagë të shërohet. Por dua të mbaj mend gjithçka të bukur që përjetuam. Ndeshjet që përmbysëm, përkushtimin maksimal të secilit dhe mbështetjen e një vendi të tërë, që së bashku me punën dhe sakrificën e këtij grupi na bëri edhe një herë ndër ekipet më të mira në botë", shkroi fillimisht Messi.

39-vjeçari theksoi se, edhe pse humbja është e vështirë për t'u pranuar, arritja në dy finale radhazi të Kupës së Botës është një sukses i madh.

"Sot është e vështirë ta vlerësojmë plotësisht atë që kemi arritur, por ky grup arriti të luajë në dy finale radhazi të Kupës së Botës. Faleminderit nga zemra për çdo urim dhe çdo mesazh. Edhe një herë arritëm ta bashkojmë vendin tonë dhe të ndajmë krenarinë e madhe për të qenë argjentinas", shtoi ai.

Kështu e përjetoi Lionel Messi fundi e ndeshjes finale

Në fund të mesazhit, Messi pati edhe një gjest sportiv ndaj kampionëve të rinj të botës.

"Dua gjithashtu ta përgëzoj Spanjën për fitimin e kampionatit," përfundoi legjenda argjentinase.

Argjentina u mposht 1-0 nga Spanja në finalen e zhvilluar në stadiumin MetLife, me golin vendimtar të Ferran Torres në vazhdime. Messi e mbylli turneun me 8 gola dhe 4asistime, ndërsa finalja ishte e vetmja ndeshje e Botërorit ku ai nuk kontribuoi me gol ose asistim.

Formacioni më i mirë i Kampionatit Botëror 2026

Pavarësisht spekulimeve se kjo ishte paraqitja e tij e fundit në Kupën e Botës – të ushqyera edhe nga mbishkrimi "El Último Tango" në këpucët e tij – Messi mbetet nën kontratë me Inter Miamin deri në fund të vitit 2028 dhe ende nuk ka bërë të ditur nëse do t'i japë fund karrierës. /Telegrafi/

Morgan Rogers është futbollisti më i ri i Chelseat, pasi ka nënshkruar një kontratë gjashtëvjeçare me klubin londinez, sipas gazetarit të njohur të transferimeve, Fabrizio Romano.

Reprezentuesi anglez largohet nga Aston Villa në një transferim me vlerë prej rreth 136 milionë eurosh (117 milionë funte), ndërsa marrëveshja përfshin edhe opsionin për zgjatjen e kontratës deri në qershor të vitit 2033.

Chelsea do t’ia paguajë Aston Villës shumën fikse prej rreth 136 milionë eurosh, pa bonuse shtesë të lidhura me performancën.

Ky transferim e bën Rogers blerjen më të shtrenjtë në historinë e Chelseat, si dhe futbollistin britanik më të kushtueshëm të të gjitha kohërave.

Sipas gazetarit Ben Jacobs, 23-vjeçari ka kaluar me sukses kontrollet mjekësore dhe tashmë pritet vetëm zyrtarizimi i plotë i transferimit në "Stamford Bridge".

Rogers vjen pas një sezoni fantastik me Aston Villën, ku në edicionin 2025/26 shënoi 14 gola dhe regjistroi 11 asistime në 55 paraqitje në të gjitha garat.

Chelsea beson se anglezi do të jetë një nga figurat kryesore të projektit të ri sportiv, ndërsa investimi rekord prej rreth 136 milionë eurosh tregon besimin e madh që klubi ka te potenciali i tij. /Telegrafi/

Eduard Dervishaj është një nga shqiptarët me karrierën më të suksesshme në administrimin e futbollit evropian.

Prej shumë vitesh ai është pjesë e Federatës Mbretërore Spanjolle të Futbollit, ku ka mbajtur poste të rëndësishme, deri te zëvendës sekretar, dhe aktualisht ushtron detyrën e drejtorit të Departamentit Ndërkombëtar dhe Operacioneve.

I lindur dhe i rritur në Tiranë, Dervishaj jeton në Spanjë që nga viti 1997. Gjatë karrierës së tij ka qenë përgjegjës për organizimin e katër finaleve të Ligës së Kampionëve, ndërsa vitin e kaluar u emërua drejtues i projektit organizativ të Kupës së Botës 2030, që do të zhvillohet në Spanjë, Portugali dhe Marok.

telegrafi.com

Në Botërorin 2026, 65-vjeçari ishte pjesë e delegacionit të kombëtares së Spanjës, e cila zhvilloi një turne të jashtëzakonshëm në Amerikën e Veriut dhe në fund u kurorëzua kampione e botës.

Pas triumfit, Dervishaj ndau në rrjetet sociale disa fotografi me trofeun e Kupës së Botës dhe trajnerin Luis de la Fuente, duke falënderuar të gjithë ata që ishin pjesë e këtij rrugëtimi.

Ai theksoi se pati privilegjin të përjetonte nga afër Botërorin e tij të dytë.

Para se të ndërtonte karrierën e tij në Spanjë, Eduard Dervishaj dha një kontribut të rëndësishëm edhe në futbollin shqiptar.

telegrafi.com

Ai ka qenë sekretar i përgjithshëm i Federatës Shqiptare të Futbollit në periudhën 1992–1996, ndërsa më herët ka punuar edhe si trajner i Dinamos së Tiranës. /Telegrafi/

Përfundimi i Kupës së Botës 2026 solli edhe ndarjen e shpërblimeve financiare për 48 kombëtaret pjesëmarrëse. Përveç lavdisë sportive, ekipet përfituan edhe miliona euro, në varësi të ecurisë së tyre në turne.

Kampionia e re e botës, Spanja, ishte përfituesja më e madhe, duke arkëtuar 42 milionë dollarë, që janë rreth 36 milionë euro.

Finalistja Argjentina përfitoi 30 milionë dollarë (rreth 25.7 milionë euro), ndërsa Anglia, që përfundoi në vendin e tretë, fitoi 27 milionë dollarë (rreth 23.1 milionë euro). Franca, e katërta, arkëtoi 25 milionë dollarë (rreth 21.4 milionë euro).

Edhe skuadrat që u eliminuan në fazat e tjera u shpërblyen:

- Çerekfinalistet – 19 milionë dollarë (rreth 16.3 milionë euro).

- Skuadrat e eliminuara në 1/8 e finales ) – 15 milionë dollarë (rreth 12.9 milionë euro).

- Skuadrat e eliminuara në 1/16 e finales – 11 milionë dollarë (rreth 9.4 milionë euro).

- Kombëtaret që nuk kaluan fazën e grupeve – 9 milionë dollarë (rreth 7.7 milionë euro).

Përveç suksesit sportiv, Kampionati Botërori 2026 rezultoi edhe një burim i rëndësishëm të ardhurash për federatat pjesëmarrëse, me Spanjën që, krahas trofeut të dytë në histori, u largua edhe me shpërblimin më të madh financiar të turneut. /Telegrafi/

Futbolli anglez është në zi pas ndarjes nga jeta të Kevin Keegan, një prej figurave më të mëdha në historinë e këtij sporti. Ish-kapiteni dhe ish-trajneri i Anglisë ka vdekur në moshën 75-vjeçare, vetëm shtatë javë pasi bëri të ditur se ishte diagnostikuar me kancer në stadin e katërt.

Lajmin e hidhur e konfirmoi familja e tij, duke bërë të ditur se Keegan ndërroi jetë i rrethuar nga bashkëshortja dhe vajzat e tij.

“Kevin, fitues i dy Topave të Artë, ishte një bashkëshort, baba dhe gjysh i dashur. Familja dëshiron të falënderojë ekipin e tij të jashtëzakonshëm mjekësor për gjithë mbështetjen. Ky është një moment jashtëzakonisht i vështirë dhe kërkojmë privatësi,” thuhet në deklaratën e familjes.

Keegan zbuloi në qershor se vuante nga kanceri në stadin e katërt, faza më e avancuar e sëmundjes, kur ajo është përhapur edhe në pjesë të tjera të trupit.

Gjatë karrierës së tij si futbollist, Keegan veshi fanellat e Scunthorpe United, Liverpool, Hamburg, Southampton dhe Newcastle United, duke u shndërruar në një nga lojtarët më të dekoruar të futbollit anglez.

Ai fitoi dy herë radhazi Topin e Artë, në vitet 1978 dhe 1979, duke hyrë në historinë e futbollit evropian si një nga lojtarët më të mirë të brezit të tij.

Pas pensionimit, Keegan pati një karrierë të suksesshme edhe si trajner, duke drejtuar Newcastle United, Fulham, Manchester City dhe kombëtaren e Anglisë.

Newcastle United reagoi menjëherë pas lajmit, duke e cilësuar Keeganin si “një nga figurat më ikonike, më me ndikim dhe më të dashura në historinë e klubit”.

“Kevin ishte shumë më tepër sesa një futbollist apo trajner legjendar. Ai ishte zemra e Newcastle United për breza të tërë tifozësh. Ndikimi i tij nuk do të matet me numrin e ndeshjeve apo rezultatet, por me kujtimet që krijoi, ëndrrat që frymëzoi dhe brezat e tifozëve në mbarë botën që u dashuruan me futbollin falë tij”, thuhet në reagimin e klubit.

Me ndarjen nga jeta të Kevin Keegan, futbolli humbet një prej ikonave më të mëdha, një figurë që la gjurmë të pashlyeshme si në fushë, ashtu edhe në bankinë. /Telegrafi/

Loja shpërblyese “Eksperti” nga Telegrafi është mbyllur pas gjashtë javëve të jashtëzakonshme gjatë Kampionatit Botëror 2026, duke tërhequr tashmë 7500 përdorues që testuan njohuritë e tyre në parashikimin e rezultateve të ndeshjeve.

Pasi u zgjodhën fituesit e javës së parë, dytë, tretë, katërt dhe pestë - tani pasi kanë shkuar edhe shtatë ditë të tjera, pra deri në mbylljen e kampionatit - janë shpallur edhe fituesit javorë të javës së gjashtë (të fundit), të cilët grumbulluan më së shumti pikë me parashikimet e tyre.

Në vendin e parë renditet “Perpa”, i cili grumbulloi 24 pikë dhe siguroi çmimin kryesor javor, një biçikletë statike për stërvitje nga MegaSport.

Në vendin e dytë me 22 pikë është renditur “Driniii”, i cili ka fituar një pako 1 vjeçare për asistencë rrugore, ndërsa podiumin e plotësoi “Sadikkk_3”, i cili mblodhi 22 pikë dhe fitoi një SmartWatch Samsung FIT3.

Për tërheqjen e shpërblimeve dhe informatat shtesë, të tre fituesit janë kontaktuar tashmë nga redaksia e Telegrafit në e-mailin me të cilin janë regjistruar në lojën shpërblyese “Eksperti”.

Gara është mbyllur me një sukses të madh, duke mbledhur mijëra adhurues të futbollit që parashikuan rezultatet e ndeshjeve të Botërorit.

Vlen të theksohet se fituesit e javës së gjashtë janë llogaritur bazuar në pikët e grumbulluara nga 13 korriku (e hënë) deri më 19 korrik (e diel) në ora 23:59, periudhë e cila përbënte javën e gjashtë të garës në “Eksperti”.

Ndryshe, gjatë gjithë kampionatit, lojtarët e “Ekspertit” kanë garuar për t’u ngjitur në renditje, ndërsa më të mirët në fund të Botërorit 2026 do të shpërblehen me çmime kryesore si iPhone 17 Pro Max, trotinet elektrik Segway dhe PlayStation 5, ku tashmë dihen edhe emrat e tyre, që do të publikohen gjatë ditës më vonë.

Shënim: Në rast se dy ose më shumë lojtarë grumbullojnë numër të njëjtë pikësh, renditja përcaktohet nga kriteret shtesë të sistemit. Përparësi kanë lojtarët që kanë më shumë rezultate të sakta, më shumë parashikime me diferencë të saktë të golave dhe më shumë fitues të parashikuar saktë. Nëse barazia vazhdon edhe pas këtyre kritereve, përparësi merr lojtari që ka parashikuar i pari. /Telegrafi/

Finalja e Kupës së Botës 2026 u mbyll me emocione të mëdha, lot zhgënjimi për Argjentinën dhe festë të jashtëzakonshme për Spanjën, e cila u kurorëzua kampione e botës pas fitores 1-0 ndaj "Albiceleste" në vazhdime.

Kapiteni argjentinas Lionel Messi nuk arriti ta mbronte titullin botëror, por u largua nga fusha mes ovacioneve të tifozëve argjentinas.

39-vjeçari ishte dukshëm i prekur emocionalisht, ndërsa përshëndeste mbështetësit e "Albiceleste", të cilët e duartrokitën dhe brohoritën emrin e tij pas një tjetër turneu të jashtëzakonshëm.

Argjentina merr medaljet e vendit të dytë

Më pas, futbollistët e Argjentinës u ngjitën në podium për të marrë medaljet e nënkampionit të botës.

Edhe pse nuk arritën ta ruanin titullin e fituar katër vite më parë, lojtarët e Lionel Scalonit u larguan me kokën lart, pasi zhvilluan një turne të shkëlqyer dhe arritën deri në finalen e madhe.

Spanja feston titullin botëror

Pas ceremonisë së Argjentinës, radha i erdhi kampionëve të rinj të botës. Futbollistët e Spanjës u ngjitën një nga një në podium për të marrë medaljet e arta, ndërsa buzëqeshjet dhe emocionet nuk munguan në fytyrat e tyre.

Disa prej lojtarëve nuk humbën rastin të puthnin trofeun e Kupës së Botës sapo iu afruan atij, duke shijuar momentin më të madh të karrierës së tyre.

Kulmi i ceremonisë erdhi kur presidenti i Shteteve të Bashkuara të Amerikës, Donald Trump, së bashku me presidentin e FIFA-s, Gianni Infantino, ia dorëzuan Kupën e Botës kapitenit të Spanjës.

telegrafi.com

Në mesin e fishekzjarrëve, konfetit dhe festës së bashkëlojtarëve, kapiteni ngriti lart trofeun e artë, duke vulosur triumfin e "La Roja" në Botërorin 2026 dhe titullin e dytë në historinë e saj. /Telegrafi/

Përfundimi i Kupës së Botës 2026 solli edhe ndarjen e çmimeve individuale për futbollistët më të dalluar të turneut, me Spanjën që dominoi edhe në këtë aspekt pas triumfit në finale ndaj Argjentinës.

Rodri u shpall Lojtari më i mirë i turneut, pasi ishte figura kryesore e Spanjës gjatë gjithë kampionatit. Mesfushori spanjoll udhëhoqi ekipin drejt titullit botëror me paraqitje të shkëlqyera dhe u vlerësua me çmimin më prestigjioz individual të turneut.

Një tjetër çmim për kampionët e botës shkoi për Pau Cubarsin, i cili u zgjodh Lojtari më i mirë i ri i Kupës së Botës. Mbrojtësi i talentuar spanjoll spikati me paraqitje të sigurta dhe pjekuri të jashtëzakonshme, pavarësisht moshës së re.

Edhe çmimi për Portierin më të mirë përfundoi në duart e një futbollisti spanjoll. Unai Simón u vlerësua si gardiani më i mirë i Botërorit falë pritjeve vendimtare dhe kontributit të madh në rrugëtimin e Spanjës drejt trofeut.

Ndërkohë, Kylian Mbappé i Francës fitoi Këpucën e Artë, pasi e mbylli turneun si golashënuesi më i mirë me 10 gola.

Kështu, Spanja, përveç trofeut të Kupës së Botës, fitoi edhe tre nga katër çmimet më të rëndësishme individuale të turneut, duke konfirmuar dominimin e saj në Botërorin 2026. /Telegrafi/

Lionel Messi e përjetoi një tjetër finale të madhe me fanellën e Argjentinës, por kësaj radhe nuk arriti ta mbyllte me trofe.

Kapiteni i "Albiceleste" luajti si titullar në finalen e Kupës së Botës 2026 ndaj Spanjës dhe qëndroi në fushë gjatë gjithë ndeshjes, përfshirë edhe kohën shtesë. Megjithatë, Argjentina u mposht dhe humbi mundësinë për të mbrojtur titullin e fituar katër vite më parë.

Pas vërshëllimës së fundit të gjyqyarit, zhgënjimi i Messit ishte i dukshëm. Ylli argjentinas u shtri për disa çaste në barin e stadiumit, i dëshpëruar pas humbjes në finalen e tretë të Kupës së Botës në karrierën e tij.

Megjithatë, sapo u ngrit, Messi tregoi edhe një herë klasin e tij.

Kapiteni argjentinas iu afrua talentit spanjoll Lamine Yamal dhe e përgëzoi për triumfin, duke e përshëndetur me respekt pas ndeshjes.

Gjesti i Messit u vlerësua nga të pranishmit në stadium dhe në rrjetet sociale, duke treguar edhe një herë sportivitetin e tij, pavarësisht zhgënjimit për humbjen në ndeshjen më të rëndësishme të turneut. /Telegrafi/

Finalja e Kupës së Botës mes Spanjës dhe Argjentinës nuk u mbyll vetëm me festën e spanjollëve, por edhe me tensione në fushë pas vërshëllimës së fundit të gjyqtarit.

Spanja triumfoi me rezultat 1-0 pas vazhdimeve, falë golit të Ferran Torresit, duke u shpallur kampione e botës.

Megjithatë, menjëherë pas përfundimit të takimit situata u tensionua, me disa futbollistë të të dyja skuadrave që u përfshinë në përplasje.

Në qendër të incidentit ishte mesfushori argjentinas Leandro Paredes, i cili fillimisht u përplas me mbrojtësin spanjoll Eric Garcia, duke e kapur për fyti.

Tensioni vazhdoi edhe më tej, pasi Paredes pati një përplasje edhe me Gavin, të cilin e shtyu dhe e rrëzoi në tokë.

Lojtarët e të dyja skuadrave ndërhynë menjëherë për të qetësuar situatën dhe për të shmangur përshkallëzimin e konfliktit, ndërsa arbitrat dhe anëtarët e stafit teknik u futën mes futbollistëve. /Telegrafi/

Spanja fitoi finalen e Kupës së Botës 2026, ndërsa notat e lojtarëve pasqyrojnë qartë dominimin e "La Roja" në ndeshjen vendimtare.

Lojtari më i vlerësuar te kampionët ishte Rodri, i cili mori notën 8.5, duke konfirmuar edhe një herë rëndësinë e tij në mesin e fushës. Mesfushori spanjoll kontrolloi ritmin e lojës dhe ishte vendimtar në triumfin e ekipit të Luis de la Fuente.

Pas tij renditet Pau Cubarsí me 8.2, ndërsa Lamine Yamal (7.3) vazhdoi të tregojë pjekuri pavarësisht moshës së re. Nota të mira morën edhe Pedro Porro (7.1), Aymeric Laporte (7.0) dhe Dani Olmo (7.0).

Në anën tjetër, Argjentina pati një mbrëmje shumë më të vështirë. Lojtari me notën më të lartë ishte portieri Emiliano Martinez me notën 9.6, po ashtu më i vlerësuari në finale.

Lionel Messi u vlerësua me 7.2, ndërsa mbrojtësit Cristian Romero (6.9), Nicolás Tagliafico (6.6), Lisandro Martínez (6.7) dhe Gonzalo Montiel (6.7) morën nota mesatare.

Performanca më zhgënjyese ishte ajo e Enzo Fernández, i cili u vlerësua vetëm me 5.9, nota më e ulët e finales.

Notat e lojtarëve të Spanjës dhe Argjentinës

/Telegrafi/

Sa herë që një kombëtare fiton Kupën e Botës, nuk fiton vetëm trofeun më prestigjioz të futbollit. Ajo fiton edhe të drejtën për të shtuar një yll mbi stemën e fanellës, një simbol që është bërë shenja më e madhe e suksesit në futbollin ndërkombëtar.

Në finalen e Kupës së Botës 2026, Spanja do të synojë të fitojë yllin e saj të dytë, ndërsa Argjentina do të luftojë për të shtuar të katërtin.

Tradita nisi me Brazilin

Edhe pse sot duket si një traditë e kahershme, yjet mbi stemat e kombëtareve nuk kanë ekzistuar gjithmonë. Ishte Brazili ai që e nisi këtë praktikë. Pasi fitoi Kupën e Botës për herë të tretë në Meksikë në vitin 1970, Konfederata Braziliane e Futbollit vendosi të vendoste tre yje të artë mbi stemën e saj për të nderuar brezin legjendar të udhëhequr nga Pelé.

Në atë kohë, sipas rregullave në fuqi, kombëtarja që fitonte tri herë Kupën e Botës e mbante përgjithmonë Trofeun Jules Rimet. Ky ishte edhe motivi që Brazili vendosi ta përjetësonte suksesin me tre yje mbi fanellë.

Ideja u prit shumë mirë dhe, me kalimin e viteve, edhe federatat e tjera nisën ta ndiqnin të njëjtën praktikë.

FIFA e ktheu në rregull zyrtar

Ajo që filloi si një iniciativë e Brazilit u shndërrua më vonë në një standard të futbollit botëror. FIFA e përfshiu këtë praktikë në rregulloret e saj për pajisjet sportive, duke u dhënë federatave kampione të botës të drejtën të vendosin një yll për çdo Kupë Bote të fituar.

Që atëherë, yjet janë bërë një mënyrë e thjeshtë për të treguar historinë e një kombëtareje. Mjafton të shohësh fanellën për të kuptuar sa herë ajo ka qenë kampione e botës.

Rasti unik i Uruguait

Ekziston një përjashtim që vazhdon të ngjallë diskutime. Uruguai mban katër yje mbi stemë, edhe pse ka fituar vetëm dy Kupa Bote, në vitet 1930 dhe 1950.

Arsyeja lidhet me Lojërat Olimpike të Parisit 1924 dhe Amsterdamit 1928, turne që u organizuan nga FIFA dhe që për shumë vite u njohën nga qeverisja botërore e futbollit si kampionate botërore të kohës, pasi Kupa e Botës ende nuk ekzistonte.

Për këtë arsye, Uruguai vazhdon të mbajë katër yje në fanellën e tij.

Yjet i përkasin vetëm ekipit që i ka fituar

Një rregull që shpesh nuk njihet është se yjet nuk i përkasin gjithë federatës, por vetëm ekipit që ka fituar titullin.

Kjo do të thotë se yjet e fituar nga kombëtarja e meshkujve nuk mund të vendosen automatikisht në fanellat e kombëtares së femrave apo të ekipeve të moshave, përveç nëse edhe ato kanë fituar kampionatet e tyre botërore.

Ky rregull siguron që çdo yll të përfaqësojë arritjen sportive të ekipit që e ka fituar atë.

Ylli i dytë apo i katërt?

Nëse Spanja triumfon në finalen e Botërorit 2026, ajo do të shtojë yllin e dytë në historinë e saj, 16 vjet pas titullit të fituar në Afrikën e Jugut në vitin 2010.

Nëse fiton Argjentina, "Albiceleste" do të vendosë yllin e katërt mbi stemë, duke barazuar Italinë dhe Gjermaninë në numrin e titujve botërorë dhe duke mbetur pas vetëm Brazilit në renditjen historike.

Për këtë arsye, finalja mes Spanjës dhe Argjentinës nuk do të vendosë vetëm fituesin e Kupës së Botës. Njëra prej tyre do të fitojë edhe të drejtën për të qepur përgjithmonë një yll të ri mbi fanellë – një simbol që përfaqëson histori, lavdi dhe një brez të tërë kampionësh. /Telegrafi/

Një detaj i vogël ka tërhequr vëmendjen gjatë ndeshjeve të Argjentinës në Kupën e Botës 2026. Disa prej futbollistëve të “Albiceleste”, mes tyre Lionel Messi, Lisandro Martínez, Nahuel Molina, Cristian Romero, Giovani Lo Celso dhe Gerónimo Rulli, mbajnë një byzylyk të kuq me shtatë nyje, që për ta përfaqëson një simbol mbrojtjeje dhe fati të mirë.

Ky aksesor, i njohur si byzylyku me shtatë nyje, lidhet me traditën mistike të Kabalës, ku fija e kuqe besohet se mbron nga “syri i keq”, energjitë negative dhe zilia.

Me kalimin e viteve, ai është shndërruar në një simbol popullor që shumë njerëz e mbajnë si shenjë force dhe fatbardhësie, pavarësisht bindjeve fetare.

Historia e byzylykut të Messit

Messi e mban këtë byzylyk prej vitesh, si me Argjentinën ashtu edhe në nivel klubesh. Historia e tij nisi në Botërorin e Rusisë më 2018, kur gazetari argjentinas Rama Pantorotto i dhuroi një fjongo të kuqe me kërkesën e nënës së tij, si simbol mbrojtjeje dhe fati.

Pak ditë më vonë, pas fitores ndaj Nigerisë, Messi tregoi se e kishte lidhur në kyçin e këmbës së majtë dhe i tha gazetarit: “Thuaji nënës tënde faleminderit, e kam ruajtur.” Që nga ajo kohë, ai nuk është ndarë më nga ky amulet.

A lejohet nga FIFA?

Po. Rregullat e FIFA-s dhe IFAB-it ndalojnë vetëm aksesorët që mund të jenë të rrezikshëm për lojtarët. Meqenëse byzylyku është prej fijeje dhe nuk paraqet rrezik, ai lejohet të mbahet gjatë ndeshjeve.

Edhe pse nuk ka prova shkencore se sjell fat apo mbrojtje, për Messin dhe disa nga bashkëlojtarët e tij ai është kthyer në një ritual që i ka shoqëruar në disa nga momentet më të rëndësishme të karrierës, përfshirë edhe finalen e Kupës së Botës 2026. /Telegrafi/

Ish-mesfushori gjerman, Toni Kroos, i jep përparësi Spanjës në finalen e Kupës së Botës 2026 dhe paralajmëron për rrezikun që i kanoset Argjentinës nëse “La Roja” shënon e para.

Para finales së madhe të Kupës së Botës 2026 mes Spanjës dhe Argjentinës, Toni Kroos ka dhënë analizën e tij për sfidën që do të përcaktojë kampionin e ri të botës.

Ish-futbollisti i kombëtares gjermane dhe i Real Madridit beson se Spanja ka avantazh në këtë përballje dhe ka theksuar se një gol i hershëm nga skuadra e Luis de la Fuente mund ta ndryshojë tërësisht rrjedhën e finales.

Kroos e bëri analizën në një emision në TikTok, të cilin e drejton së bashku me vëllain e tij, Felix, duke u ndalur veçanërisht te aftësia e Spanjës për të kontrolluar ndeshjen pasi kalon në epërsi.

“Nëse një ekip si Spanja arrin ta imponojë lojën e saj ndërsa është duke udhëhequr, askush nuk dëshiron të përballet me të. Është shumë e vështirë të luash kundër tyre në atë situatë”, tha Kroos.

“Nëse Spanja shënon e para, mund të harrosh gjithçka”

Sipas Kroos, momenti i parë i finales mund të jetë vendimtar. Ai beson se nëse Spanja arrin të shënojë golin e parë, Argjentina do ta ketë shumë të vështirë të rikthehet në lojë për shkak të mënyrës së kontrollit të ndeshjes nga spanjollët.

“Nëse Spanja kalon në avantazh 1-0, mund të harrosh gjithçka. Argjentina mund të pësojë tre ose katër gola, sepse thjesht mund të mos gjejë një zgjidhje për mënyrën se si luan Spanja”, deklaroi ish-mesfushori gjerman.

Lavdëron Messin dhe mentalitetin e Argjentinës

Megjithëse e sheh Spanjën si favorite, Kroos nuk e nënvlerëson aspak Argjentinën. Ai vlerësoi mentalitetin e kampionëve në fuqi të botës dhe rolin vendimtar të Lionel Messit në rrugëtimin drejt finales.

“Argjentina nuk është më e mirë se Gjermania, por ka një mentalitet të jashtëzakonshëm. Ata kanë Messin, i cili i ka udhëhequr deri në finale”, tha Kroos.

Ai gjithashtu u shpreh i impresionuar nga mënyra se si Messi vazhdon të lexojë lojën dhe të ndikojë në ndeshje, pavarësisht moshës.

“Kam vënë re se inteligjenca e tij në fushë vazhdon të rritet. Ai e kupton lojën në një mënyrë të jashtëzakonshme. Nuk e prisja që Messi të qëndronte kaq gjatë në majë”, deklaroi ai.

Kroos pranoi se nuk e kishte imagjinuar që Messi do të vazhdonte të luante në nivelin më të lartë kaq gjatë. /Telegrafi/

Disa orë para finales së Kupës së Botës midis Spanjës dhe Argjentinës, turma të mëdha njerëzish po formohen në stadiumin MetLife në New Jersey.

Tifozët po presin me orë të tëra për të hyrë për shkak të kontrolleve jashtëzakonisht të rrepta të sigurisë që kanë shkaktuar vonesa dhe radhë të gjata në hyrjet e stadiumit.

Kontrollet e sigurisë kryhen për herë të parë në këtë kampionat nga policia amerikane. Arsyeja për një vendim të tillë është prania e shumë zyrtarëve të lartë që do të ndjekin finalet, përfshirë Presidentin e SHBA-së Donald Trump.

Për shkak të kësaj, kontrollet janë shumë më të detajuara dhe kryhen sipas një procedure të ngjashme me atë të aeroporteve - çantat kontrollohen, të gjithë kalojnë nëpër detektorë metalesh dhe duhet të zbrazin xhepat.

Problemi përkeqësohet edhe më tej nga fakti se tifozët dhe të gjithë personat e akredituar - nga gazetarët dhe vullnetarët te punonjësit, kontraktorët dhe stafi i shërbimit të ushqimit - përdorin të njëjtat hyrje.

Për shkak të kësaj, në disa vende koha e pritjes për të hyrë në stadium është më shumë se dy orë e gjysmë. /Telegrafi/

Lionel Scaloni dhe Luis de la Fuente kanë përzgjedhur skuadrat për finalen spektakolare të Kupës së Botës që do të zhvillohet sonte në New Jersey.

Ju kujtojmë se më parë Spanja eliminoi Francën në gjysmëfinale, ndërsa Gauçot ishin më të mirë se Anglia.

Luis de la Fuente zgjodhi 11-shen titullar identike si në ndeshjen gjysmëfinale kundër Francës.

Lionel Scaloni vendosi për tre ndryshime krahasuar me ndeshjen kundër Anglisë në gjysmëfinale. Montiel fillon në vend të Molinës në krahun e djathtë, De Paul në vend të Paredes në mesfushë, ndërsa Nico Gonzalez do të jetë në 11-shen e parë në vend të Simeones.

Finalja do të luhet në orën 21:00 në New Jersey, i cili vetëm se ka filluar të mbushet.

Spanja : Simon, Cucurella, Laporte, Cubarsi, Porro, Rodri, Olmo, Ruiz, Baena, Yamal dhe Oyarzabal.

Argjentinë : E. Martinez, Montiel, Romero, L. Martinez, Tagliafico, De Paul, Enzo, Mac Allister, Nico Gonzalez, Messi, Alvarez.

/Telegrafi/