Benita Zena ka folur për herë të parë më gjerësisht pas rrugëtimit të saj në Big Brother, duke komentuar eliminimin pak para finales dhe reagimin e publikut ndaj saj.

Në një intervistë për emisionin “Artistët Shqiptarë”, e pyetur nga moderatori Butrint Pasjaqa se pse mendon se u eliminua në një moment kur po fitonte gjithnjë e më shumë pëlqimin e publikut, Benita tha se e kishte ndjerë se një skenar i tillë mund të ndodhte.

Ajo tregoi se momenti i eliminimit nuk ishte krejtësisht i papritur për të, sidomos pasi dëgjoi reagimet gjatë spektaklit.

Foto: Instagram

“Me të treguar të drejtën, nuk ka qenë diçka befasi për mua. E kam pritur deri në një moment. Kur e kam dëgjuar publikun dhe kur Jonida thotë Benita apo Hygerta, kur e kam ndjerë Bugattin, thashë: shkova unë. Kur u zgjat, thashë se me siguri do të ndodhë një padrejtësi”, u shpreh ajo.

Benita tha se, pavarësisht mosarritjes së finales, beson se ka fituar diçka më të rëndësishme, mbështetjen e publikut.

“E kam marrë zemrën e publikut dhe finalja nuk është asgjë. E kam merituar ndoshta edhe fitoren”, deklaroi ajo.

Gjatë intervistës, foli edhe për dasmën e Klodit dhe Elijonës, moment i cili mori shumë vëmendje gjatë qëndrimit të saj në reality show.

Benita theksoi se në një format të tillë është normale që emocionet, dramat dhe momentet spektakolare të jenë pjesë e lojës.

“Kur je në një reality show, deshe apo nuk deshe, ke hyrë për të bërë show. Njerëzit kur e hapin televizorin duan të shohin skena, drama dhe momente interesante. Asnjë lot nuk ka qenë fals. Ka pasur pak shou dhe pak përnjëmend”, tha tutje. /Telegrafi/

Lionel Messi thuhet se u ka thënë shokëve të tij të skuadrës te Argjentina se finalja e Kupës së Botës kundër Spanjës ishte ndeshja e fundit e karrierës së tij ndërkombëtare.

Sipas gazetarit Hernan Castillo, kapiteni i Albiceleste njoftoi vendimin e tij të rëndësishëm gjatë një fjalimi emocional në dhomën e zhveshjes para të gjithë skuadrës pas përfundimit të turneut të FIFA-s.

“Leo Messi u tha shokëve të tij të ekipit kombëtar të Argjentinës se finalja e Kupës së Botës kundër Spanjës ishte ndeshje e tij e fundit për ekipin kombëtar”.

IFFHS shpall Lionel Messin lojtarin më të mirë të Kupës së Botës 2026

“Pas finales, ai mbajti një fjalim emocional para shokëve të ekipit", raportoi Castillo.

Ndryshe, Messi ishte lojtari kryesor i Argjentinës këtë Botëror, duke shënuar tetë gola dhe katër asistime, duke dërguar kombëtaren e tij në finale, të cilën e humben nga Spanja në vazhdime me rezultat 1-0. /Telegrafi/

Zëvendëskryeministri i parë dhe ministri për Çështje Evropiane, Bekim Sali, mori pjesë në seancën e Këshillit Nacional për Integrim Evropian, ku prezantoi qëndrimet e Qeverisë lidhur me Raportin e Komisionit Evropian për Sundimin e Ligjit 2026 dhe ecurinë e Agjendës së Reformave.

Në fjalën e tij, Sali theksoi se anëtarësimi në Bashkimin Evropian mbetet prioriteti më i lartë strategjik i vendit dhe se reformat në sundimin e ligjit duhet të shoqërohen me rezultate konkrete dhe të matshme.

Ai nënvizoi se Maqedonia e Veriut vazhdon të jetë ndër vendet më të suksesshme në zbatimin e Agjendës së Reformave, duke rikujtuar se deri më tani janë siguruar 142,1 milionë euro nga Plani i Rritjes, ndërsa së fundmi është dorëzuar edhe kërkesa e katërt për financim, me 22 hapa reformues të realizuar.

Sali u bëri thirrje të gjithë deputetëve që të mbështesin procesin reformues dhe të kontribuojnë në miratimin e ligjeve të nevojshme, duke theksuar se dallimet politike nuk duhet të pengojnë interesin strategjik të shtetit dhe përfitimet që qytetarët presin nga procesi i integrimit evropian.

Blogerja e njohur ndërkombëtarisht, Wizard Liz, është bërë sërish pjesë e vëmendjes në rrjetet sociale, këtë herë pas një videoje që po qarkullon në TikTok, ku ajo shpreh admirimin për një vajzë shqiptare.

Në videon virale, Liz dëgjohet duke thënë: "Ne i duam gratë shqiptare. Kamarierja këtu më njohu, djema. Ajo është shqiptare, është shumë e bukur".

Më pas së bashku me shoqen e saj teksa ndodhen në pushime flasin edhe në gjuhën shqipe: "Të dua, zemër".

Foto: TikTok

Kjo deklaratë ka marrë reagime të shumta nga ndjekësit shqiptarë, të cilët e kanë shpërndarë videon dhe kanë vlerësuar fjalët e saj.

Wizard, e cila është një nga krijueset më të ndjekura në rrjetet sociale për përmbajtje rreth vetëzhvillimit, bukurisë dhe jetës personale, ka qenë shpesh në qendër të vëmendjes edhe për historitë private dhe mesazhet që ndan me miliona ndjekës.

Në të kaluarën, ka folur hapur për përvojat e saj në marrëdhënie dhe për ndryshimet personale që ka kaluar, duke bërë që shumë fansa ta ndjekin jo vetëm për përmbajtjen motivuese, por edhe për historinë e jetës.

Ndërkohë, videoja e fundit ka rikthyer vëmendjen te ylli nga Belgjika dhe mënyra se si ajo vazhdon të krijojë lidhje me audienca të ndryshme në mbarë botën. /Telegrafi/

Michael Olise, sulmuesi anësori 24-vjeçar i Bayern Munich, mbetet në listën e ngushtë të transferimeve të Real Madridit, por çdo përpjekje nga presidenti Florentino Perez do të rezervohet për 29, 30 dhe 31 gusht.

Sipas Joaquin Maroto, një gazetar i gazetën AS, klubi mbretëror nuk planifikon të fillojë transferimin para 72 orëve të fundit të afatit kalimtar veror së transferimeve.

Informacioni i dhënë nga gazetari i AS në kanalin Doctor Jota e vendos ofensivën e mundshme në fazën e fundit të gushtit. Teoria është se Florentino Perez synon të mbajë pak kohë deri në mbylljen e afatit kalimtar për të përcaktuar largimet e lojtarëve, kërkesat përfundimtare të skuadrës dhe pozicionin e klubit gjerman.

Ky afat kohor përjashton, për momentin, një lëvizje të menjëhershme për Michael Olise. Klubi i Madridit do të vazhdojë të punojë në këtë fazë, por pa paraqitur një ofertë në javët në vijim ose pa ndryshuar planet e tij për shkak të presioneve të tregut.

Maroto pohon se operacionet e drejtuara personalisht nga presidenti zakonisht përqendrohen në ditët e fundit. Në këtë rast, afati në fjalë zgjat nga 29 gushti deri në mbylljen e seancës së punës më 31 gusht, një periudhë e shkurtër në të cilën çdo negociatë do të kërkonte një marrëveshje të shpejtë midis palëve.

Pengesa kryesore qëndron te Bayern Munich, të cilët aktualisht nuk po e shqyrtojnë mundësinë e largimit të Olise. Reprezaentuesi francez është nën kontratë deri më 30 qershor 2029, një marrëveshje që i lejon klubit gjerman të kontrollojë kohën. Performanca e tij e mbështet këtë qëndrim: ai regjistroi 15 gola dhe 19 asistime në sezonin 2025/26 të Bundesligës.

Bayern Munich ka riafirmuar publikisht angazhimin e saj për të ardhmen e sulmuesit anësor në javët e fundit, pasi lojtari mbetet një pjesë kyçe e planeve të tyre sportive. Ky qëndrim e detyron Real Madridin të presë për një ndryshim të rrethanave përpara se të fillojë negociatat zyrtare.

Transferimi do të varet nga shprehja e qartë e dëshirës së lojtarit për t'u larguar dhe nga rënia dakord e Bayernit për të negociuar. Bordi i Real Madridit thuhet se nuk ka ndërmend të nxitojë procesin, veçanërisht duke pasur parasysh se ende nuk ka një tarifë të dakordësuar dhe asnjë deklaratë publike nga klubi pronar. /Telegrafi/

Qeveria në mbledhjen e saj miratoi Ribalancin e plotësuar të Buxhetit për vitin 2026, ku implementohen amendamentet e miratuara, me të cilat sigurohen mjete shtesë për gratë e angazhuara në aktivitete bujqësore, mjete për krijimin e linjes nacionale SOS për mbështetjen e viktimave të dhunës në familje dhe dhunës gjinore, si dhe mjete për hapjen dhe vënien në funksion të dy qendrave të kujdesit për viktimat e dhunës në familje dhe dhunës gjinore.

Nga Ministria e Financave thonë se propozimi i ribalancit të plotësuar me amendamentet e përfshira pas debatit në Komisionin e Financave dhe Buxhetit në Kuvend dhe ndryshimet e propozuara do të parashtrohet në Kuvend për miratim.

"Me ribalancin e buxhetit, të ardhurat e përgjithshme planifikohen në nivel prej 379.5 miliardë denarësh. Shpenzimet e përgjithshme janë projektuar në nivel prej 425.8 miliardë denarësh, me ç’rast mjetet shtesë janë destinuar drejt prioriteteve të përcaktuara qartë.
Me ribalancin janë siguruar mjete shtesë për subvencione në bujqësi, më shumë mjete për subvencione në transportin hekurudhor, për mbështetje të sportit, si dhe për standardin e studentëve dhe nxënësve".

"Gjithashtu, është siguruar mbështetje shtesë për kategoritë e shtresave në nevojë të qytetarëve përmes mjeteve për kompensime sociale, shoqëritë mbrojtëse, kuzhinat popullore dhe masat për deinstitucionalizim, si dhe mjete shtesë për mbrojtjen shëndetësore. Me rebalancin sigurohen mjete shtesë për investime kapitale, në vlerë prej rreth 46 miliardë denarësh, që është rritje për 14.5% krahasuar me buxhetin fillestar. Në të njëjtën kohë, shpenzimet për mallra dhe shërbime janë zvogëluar", thonë nga MF.

Me ribalancin, deficiti buxhetor është projektuar në nivel prej 46.3 miliardë denarësh, ose 4.1% e PBB-së. Rritja ekonomike është projektuar në nivel prej 3.5%.

Poezi nga: Farhad Pirbal
Përktheu: Anton Papleka

Kafka thotë: gjithçka është e zezë.
Joyce thotë: gjithçka është ngjyrë hiri.
Modigliani thotë: gjithçka është qafë e gjatë dhe e hollë.
Strindbergu thotë: gjithçka është një konflikt i përjetshëm
midis burrit e gruas.
Darwini thotë: gjithçka është lavdi fitimtarëve.
Lawrence thotë: gjithçka është seks.
Einsteini thotë: gjithçka është relative.
Marxi thotë: gjithçka është para.
Gorky thotë: gjithçka është luftë e klasës punëtore.
Bretoni thotë: gjithçka është ëndërr.
Aragoni thotë: gjithçka është Elsa.
Hedayati thotë: gjithçka është fantazi.
Moneti thotë: gjithçka është pambuk.
Unë them: gjithçka është pengesë
për të arritur te bukuria.

Udhëzimet ushqimore që ndryshojnë vazhdimisht nënkuptojnë se brezi Z ndjek përgjithmonë një objektiv që lëviz.

Nga: Lara Brown / The Telegraph
Përkthimi: Telegraif.com

Shkenca e ka dhënë verdiktin. Kafeja është e mirë për ju. Të paktën kështu shprehet Shoqata Amerikane e Zemrës, e cila thotë se pirja e dy deri në katër filxhanëve kafe në ditë mund ta ulë rrezikun e sëmundjeve të zemrës, diabetit, dështimit të zemrës dhe goditjes në tru.

Sa lajm i mirë. Për sa kohë që nuk u besoni studimeve që thonë se kafeina rrit tensionin e gjakut.

Dhe, sigurohuni ta pini vetëm në mëngjes - dhe, nëse vërtet doni ta optimizoni jetën tuaj, ekziston një studim i rastësishëm, një test i dyfishtë që zgjat 21 ditë dhe të cilin mund ta lexoni. Ai arrin në përfundimin se, ndonëse kafeja mund të jetë inflamatore, ajo është gjithashtu e mirë për mikrobiomën e zorrëve. Por, mbajeni mend: një filxhan kafe gjashtë orë para gjumit është po aq i keq sa gjysmë filxhani në kohën e gjumit. Mos e teproni.

Ose, mund të ndaleni dhe të pyesni veten nëse doni ta çoni jetën kështu. Sipërmarrësi i teknologjisë, Bryan Johnson, e bën këtë. Ai ka hartuar një plan si pjesë e misionit të tij “Mos vdis”. Ky regjim kërkon zgjimin në orën pesë të mëngjesit, pluhur proteinik, kreatinë, suplemente dhe terapi me valë goditëse, të gjitha para mëngjesit. Për të gjetur kohë për të gjitha këto, ai është në shtrat - i vetëm - që në orën 20:30.

Johnsoni mund të dëshmojë një ditë se është një mrekulli e shkencës moderne. Sigurisht që është tërheqëse të lexosh për të. Ose, atë mund ta godasë një autobus nesër. Dhe, atëherë ndoshta do t'i vinte keq që çdo ditë hante të njëjtat vakte nga enët e kompanisë Tupperware, që shmangte pushimet me diell dhe sheqerin e shtuar.

Dhe, kush mund të thotë se regjimi i tij është i duhuri? Nutricionistët na thanë për vite me radhë t'i shmangnim vezët nga frika e kolesterolit, derisa vendosën se ato ishin një dhuratë ushqimore.

Vera është e keqe për ju, përveçse mund të parandalojë kancerin. Çokollata është një superushqim, me kusht që të jetë organike - me 85 për qind kakao dhe të hani vetëm një copëz. Proteina është e mirë, por pluhuri proteinik është i përpunuar dhe duhet shmangur me çdo kusht.

Nutricionistët nuk bien dakord se çfarë është dhe çfarë nuk është e mirë për ju. Përfundimet e tyre duket se ndryshojnë çdo pesë vjet. Dhe, edhe nëse disi do ta ndiqnit “regjimin” e duhur, është pothuajse e pamundur t'u shmangeni rreziqeve për shëndetin e jetës moderne.

Mikroplastikat gjenden në ujin që pimë dhe në ambalazhet e ushqimeve. Ato mund të shkaktojnë probleme të fertilitetit dhe çrregullime neurologjike. Substancat perfluoroalkile dhe polifluoroalkile (kimikatet e përhershme) gjenden në enët tona të gatimit, në rrobat tona dhe në gjakun tonë. Kimikatet që çrregullojnë sistemin endokrin ndodhen në çdo faturë që prekni.

Vij nga brezi më i optimizuar për shëndetin. Pimë më pak se prindërit tanë. Mbajmë ora inteligjente, shkojmë në joga dhe e zëvendësojmë akulloren me kos të ngrirë. Tani ekziston një version me përmbajtje të lartë proteinash i Babybel-it, i çokollatës Mars dhe një lager artizanal me zero përqind alkool për ata që përpiqen të arrijnë objektivat e tyre të mirëqenies.

Por, asgjë nga këto nuk duket se po funksionon. Revista The Lancet Public Health ka zbuluar se normat e rasteve të 17 llojeve të kancerit po rriten me çdo brez. Sa më shumë ta “optimizojmë” veten, aq më pak të shëndetshëm duket se bëhemi.

Në vitin 2014, studiues nga Kolegji i Kolorados lidhën 164 njerëz me një aparat të rremë EEG dhe u dhanë një rezultat fiktiv të gjumit. Grupi të cilit i thanë se kishte fjetur mirë, shkëlqeu në testet njohëse, ndërsa grupi që mori një rezultat të dobët të gjumit hasi në vështirësi.

Por, performanca e tyre nuk kishte asnjë lidhje me sa të çlodhur ishin. Gjithçka ishte një efekt placebo. Tani mund të blini një unazë që monitoron gjumin tuaj REM ose, për disa mijëra paundë, një shtrat “inteligjent” që ofron ftohje dhe ngritje të personalizuara për të përmirësuar “gjendjen fizike të gjumit” tuaj. Por, a po ju bën e gjithë kjo më të mjerë, apo madje të sëmurë?

Më gëzon shumë kur dëgjoj se kafeja ka përfitime shëndetësore. Por, nuk do të pres leje nga shkencëtarët që ta shijoj. Dhe, nuk do të ndalem së piri atë kur të dalë studimi i radhës që pretendon se është e tmerrshme për ne. Jeta është më shumë sesa maksimizimi i shëndetit.

Siç na kujton Oscar Wilde - i cili kishte fare pak durim me viktorianët e zellshëm dhe, e imagjinoj, do të kishte edhe më pak durim me ithtarët e sotëm të mirëqenies: “Kënaqësia është e vetmja gjë për të cilën duhet jetuar; asgjë nuk plaket si lumturia”. /Telegrafi/

Bizhuteri Swarovski me vlerë 333 mijë denarë u sekuestrua në pikën kufitare të Aeroportit Ndërkombëtar të Shkupit, pasi doganierët e zbuluan atë gjatë një kontrolli të detajuar të një pasagjeri që po hynte në vend.

"Gruaja është shtetase e RMV-së e cila mbërriti me fluturim nga Zagrebi, dhe me të hyrë në vend me qëllim që t'i shmangej pagesës së detyrimeve të importit, ajo shkoi në kanalin e gjelbër në vend të kanalit të kuq. Pasagjerja u selektua për kontroll nga doganierët, të cilëve u deklaroi se nuk kishte asgjë për të deklaruar. Pas kontrollit me rreze X dhe ekzaminimit të bagazhit, u zbuluan 23 bizhuteri Swarovski".

"Rasti iu transferua Departamentit të Hetimeve të Sektorit të Kontrollit dhe Hetimeve, i cili ngriti kallëzim penal për veprën penale "kontrabandë", e dënueshme sipas Kodit Penal", thonë nga Dogana.

Harry Styles ka anuluar koncertin e planifikuar në stadiumin MorumBIS në Sao Paulo të Brazilit, vetëm pak orë para nisjes së tij, për shkak të një problemi shëndetësor.

Lajmin e konfirmoi organizatori Live Nation Brasil, duke bërë të ditur se biletat do t'u rimbursohen të gjithë fansave, ndërsa koncerti i radhës në Brazil pritet të zhvillohet sipas planit.

Ky nuk është incidenti i parë gjatë turneut të tij "Together, Together".

Harry Styles

Muajin e kaluar, këngëtari 32-vjeçar u rrëzua në skenë gjatë një koncerti në stadiumin Wembley të Londrës.

Ai qëndroi për disa sekonda i shtrirë duke u përpjekur të rimerrte frymën, para se të largohej nga skena.

Harry Styles

Pavarësisht këtyre vështirësive, Styles ka vazhduar turneun e tij, derisa së fundmi emocionoi publikun në Londër duke falënderuar ish-anëtarët e "One Direction": Niall Horan, Louis Tomlinson, Zayn Malik dhe të ndjerin Liam Payne.

Pak ditë më vonë, u bë sërish viral për një moment gazmor në skenë, kur vuri re se zinxhiri i pantallonave i kishte mbetur hapur dhe e mbylli mes brohoritjeve të publikut. /Telegrafi/

Harry Styles

Presidenti i SHBA-së, Donald Trump, do të donte ta shihte Gianni Infantinon si Sekretarin e Përgjithshëm të ardhshëm të OKB-së, sipas gazetës The New York Post.

Presidenti i FIFA-s u afrua me Trump gjatë organizimit dhe pritjes së Kupës së Botës 2026, pasi ia dorëzoi atij Çmimin e Paqes të FIFA-s dhjetorin e kaluar.

Trump beson se Infantino “respektohet nga të gjithë në botë” dhe zotëron “një aftësi të veçantë për të bashkuar njerëzit”, i tha gazetës amerikane një burim pranë Presidentit të SHBA-së.

Një Sekretar i Përgjithshëm i ri i OKB-së do të zgjidhet këtë vit për të zëvendësuar Antonio Guterresin e Portugalisë, i cili largohet në fund të dhjetorit.

Për të siguruar pozicionin, Infantino do të ketë nevojë për miratimin e Këshillit të Sigurimit prej 15 anëtarësh, ku pesë anëtarë të përhershëm kanë të drejtë vetoje, e më pas konfirmimin nga Asambleja e Përgjithshme.

Mbetet e paqartë nëse Infantino dëshiron vërtet të bëhet Sekretar i Përgjithshëm i OKB-së apo sa gjerësisht e ka diskutuar Trump këtë çështje me të.

Megjithatë, udhëheqësi amerikan sheh një mundësi të qartë mes një fushe prej shtatë kandidatësh të përshkruar nga një burim i brendshëm si "të dobët", raporton The New York Post. /Telegrafi/

Rasti i helmimit në Gostivar ekspozon një precedent të rrezikshëm dhe të papranueshëm, thonë nga LSDM.

Sipas tyre, Prokuroria dhe institucionet kompetente kanë vendosur procedurat burokratike dhe të ashtuquajturën "sekret të hetimit" mbi të drejtën kushtetuese të qytetarëve për një mjedis dhe shëndet të sigurt.

"Ndotja e ujit filloi më 25 qershor. Në vend që të reagonin menjëherë, autoritetet shëndetësore dhe të inspektimit heshtën për javë të tëra dhe i lejuan qytetarët të konsumonin ujë të kontaminuar me fekale. Edhe më e frikshme është se, pavarësisht dijenisë se uji ishte i kontaminuar, vetëm pak ditë para hapjes së hetimit, institucionet e shpallën publikisht ujin të sigurt".

"Hetimi nuk u iniciua nga institucionet shëndetësore, por Prokuroria Themelore Publike duhej të vepronte sipas një informacioni. Kjo në vetvete flet për një kolaps të plotë institucional. Problemi më serioz, megjithatë, është sjellja e Prokurorisë. Këmbëngulja e tyre në "sekretin e hetimit" si justifikim për mosmarrjen e masave për të mbrojtur shëndetin publik është një zëvendësim i rrezikshëm i tezave".

"Cilësia e ujit të pijshëm nuk është sekret hetimor. Është një fakt i shëndetit publik që duhet t'u dihet qytetarëve në çdo kohë. Shpallja e një ndalimi për ujin e pijshëm për shkak të devijimeve mikrobiologjike absolutisht nuk do ta kishte kompromentuar hetimin në asnjë mënyrë. Në vend të kësaj, Zyra e Shëndetit Publik veproi me takt dhe autoritetet shëndetësore heshtën, duke lejuar përhapjen e epidemisë. Rezultati është helmim masiv me mbi 3,100 pacientë të regjistruar".

"Të gjithë ata që morën pjesë në fshehjen e informacionit në lidhje me cilësinë e ujit, dhe më pas në fshehjen e provave, si dhe ata që kishin indikacione për ndotje të ujit dhe nuk bënë asgjë për të parandaluar dhe mbrojtur shëndetin e banorëve të Gostivarit, duhet të mbajnë jo vetëm përgjegjësi morale, por edhe penale", thonë nga LSDM.

Këngëtari Gjesti ka tërhequr vëmendjen e ndjekësve të tij me një postim të fundit në rrjetet sociale, ku ka lënë të kuptohet se po përgatit një projekt të ri.

Ai publikoi një fotografi ku shfaqet duke pushuar, ndërsa në mbishkrim tregoi se muajin e fundit ia ka kushtuar relaksit.

"Jeta ime që një muaj kështu ka qenë. Më është dashur një pushim që ta lëshoj komplet n'ler. E di që jeni tu e prit një bombë prej meje në këtë verë. Po keni durim edhe pak se kam diçka për ju. Besoj Besartit", ka shkruar Gjesti.

Foto: Instagram

Ky mesazh ka ngjallur menjëherë reagime nga fansat, të cilët besojnë se artisti po paralajmëron publikimin e një kënge ose projekti të ri muzikor gjatë kësaj vere.

Megjithatë, Gjesti nuk ka zbuluar ende detaje rreth asaj që po përgatit, duke lënë gjithçka në kuadër të një surprize për ndjekësit.

I njëjti në maj solli albumin e tij të ri "SiR" në bashkëpunim me DJ Gimbon, projektet e të cilëve u pëlqyen tejet mase.

Ata mblodhën miliona klikime dhe u bënë viral me hitet që krijuan. /Telegrafi/

- YouTube www.youtube.com

Sulmuesi i Kombëtares së Argjentinës, Lionel Messi, është shpallur lojtari më i mirë i Kupës së Botës 2026 nga Federata Ndërkombëtare e Historisë dhe Statistikave të Futbollit (IFFHS).

Çmimi përcaktohet duke përdorur indeksin e performancës IFFHS, i cili vlerëson vlerësimet e ndeshjeve, golat, asistimet dhe ndikimin e përgjithshëm gjatë gjithë fazave eliminatore.

Në 8 ndeshje në turne, 39-vjeçari regjistroi 8 gola dhe 4 asistime, numri i dytë më i lartë i përfshirjes në gola në Kupën e Botës 2026, ndërsa Argjentina luftoi për t'u kualifikuar në finale.

Ndërsa FIFA ia dha Topin e Artë Zyrtar për lojtarin më të mirë të turneut mesfushorit spanjoll Rodri, Messi mori Topin e Argjendtë, ndërsa sulmuesi francez Kylian Mbappe mori Topin e Bronztë.

Pau Cubarsi u zgjodh si Lojtari më i mirë i ri i Kupës së Botës, teksa “Dorëzën e Artë” e fitoi portieri spanjoll, Unai Simon. /Telegrafi/

Ministria e Punëve të Brendshme informon se zyrtarët e policisë janë vazhdimisht në terren dhe po veprojnë sipas të gjitha raporteve që lidhen me pasojat e stuhisë së fortë, në koordinim me institucionet e tjera kompetente. MPB informoi se aktivitetet janë duke u zhvilluar për të siguruar sigurinë publike, pastrimin e dëmeve dhe normalizimin e trafikut dhe funksioneve publike.

Pasojat më të mëdha u regjistruan në zonën e Sektorit për Punë të Brendshme Shkup. Deri në orën 22:00 të djeshme, u regjistruan 117 automjete pasagjerësh të dëmtuara, 35 çati të dëmtuara, 189 pemë të rrëzuara, shtatë semaforë të dëmtuar, pesë zjarre dhe 10 persona të lënduar.

"Stuhia shkaktoi dëme edhe në disa institucione shtetërore dhe objekte me rëndësi jetike. Dëme u regjistruan në objektet e Prokurorisë Themelore Publike për Ndjekjen e Krimit të Organizuar dhe Korrupsionit, kompleksin "Vili Vodno", Bazën Policore të Aeroportit Petrovec, ndërtesën "Nova Makedonija", si dhe në objektet e Ministrisë së Financave, Ministrisë së Bujqësisë dhe Prokurorisë Publike".

"Në Kumanovë u raportuan nëntë automjete të dëmtuara dhe tre çati të dëmtuara, ndërsa pesë raste u regjistruan në zonën e SPB Tetovë - tre automjete të dëmtuara dhe dy struktura çatie të dëmtuara. Në Gostivar nuk u raportuan dëme ose persona të lënduar".
"Në zonën e SPB Veles u regjistruan dy automjete të dëmtuara për shkak të pemëve të rrëzuara, ndërsa në Shtip u raportuan 14 makina të dëmtuara dhe gjashtë çati të dëmtuara".

"Në Strumicë, erërat e forta rrëzuan shtylla elektrike në fshatrat Dobroshinci dhe Gradosorci, gjë që shkaktoi edhe ndërprerje të furnizimit me energji elektrike në fshatin Svidovicë".

"Nuk u regjistruan pasoja të mëdha në rajonin e Manastirit, përveç një ere të fortë afatshkurtër në zonën e Makedonski Brod, pa dëme materiale", thanë nga MPB.

Ministria e Brendshme njoftoi se ekipet e policisë mbeten në terren dhe vazhdojnë të pastrojnë pasojat dhe të sigurojnë sigurinë e qytetarëve.

Sjellja e egër e lojtarëve dhe trajnerëve të Argjentinës ka shënuar pasojat pas finales së Kupës së Botës. Spanja fitoi 1-0 pas kohës shtesë me një gol nga Ferran Torres, por festimi i merituar i kampionëve të rinj të botës u eklipsua nga sulmet e ashpra verbale dhe fizike nga argjentinasit ndaj ekipit spanjoll.

Së pari, Leandro Paredes vrapoi drejt Eric Garcias, e goditi me grusht në qafë dhe e hodhi përtokë. Kur mesfushori spanjoll Gavi u hodh për të mbrojtur shokun e tij të skuadrës, Paredes e sulmoi edhe atë, e goditi me grusht dhe e hodhi përtokë në një lëvizje mundjeje.

Thiago Almada iu bashkua sulmit ndaj Gavit, duke e tërhequr dhe duke e ndihmuar Paredes ta rrëzonte përtokë. Të dy lojtarët e goditën me shqelma gjatë këtij procesi.

Bëhet virale banderola e Yamalit nga festa e titullit të Kupës së Botës, ka të bëjë me përleshjen Gavi-Paredes

Paredes u ndëshkua menjëherë me karton të kuq pas ndeshjes për këtë dhunë të tmerrshme, por iu hoq kartoni. Nahuel Molina është gjithashtu nën hetim pasi kamerat e kapën duke goditur me grusht në stomak kapitenin e Spanjës, Rodrin, mes kaosit të përgjithshëm.

Gjithashtu, ka pamje të Roberto Ayala, mbrojtësit legjendar argjentinas dhe ndihmës trajnerit të Lionel Scaloni, duke goditur Dani Olmon. FIFA ka nisur një hetim ndaj argjentinasve, të cilët përballen me dënime të rënda.

Megjithatë, Gavi nuk mendon se ata duhet të ndëshkohen. Edhe pse vuajti shumë në përplasjen me ta.

Incidentet në finalen e Kupës së Botës, zbulohen katër argjentinasit që përballen me dënime të rënda

"Nuk mendoj se lojtarët e Argjentinës duhet të pezullohen. E kuptoj që ajo që bënë nuk është një shembull i mirë për fëmijët, por futbolli gjithmonë ka pasur një anë agresive”.

“E konsideroj gjithçka që ndodhi pas finales si pjesë të futbollit”, përfundoi mesfushori spanjoll. /Telegrafi/

Ines Garcia Santos, e dashura e futbollistit Lamine Yamal, ka reaguar pasi u përball me një valë kritikash në rrjetet sociale.

Shumë e akuzuan se kishte lënë të dashurin e saj, me të cilin ka qenë në lidhje për pesë vite, për të nisur një romancë me yllin e Barcelonës.

Në rrjetet sociale po qarkullojnë fotografi të Ines me ish-partnerin e saj, ndërsa vëmendje të veçantë ka tërhequr edhe një koment i saj, ku vetëm pak javë më parë i kishte shkruar atij: "Të dua, zemër".

TikTok · 𝗛𝗘’𝗦 𝗔 𝗕𝗔𝗟𝗟𝗘𝗥

TikTok · 𝗛𝗘’𝗦 𝗔 𝗕𝗔𝗟𝗟𝗘𝗥 www.tiktok.com

TikTok | Make Your Day

Kjo ka bërë që shumë njerëz të pretendojnë se ajo e zëvendësoi shumë shpejt ish-të dashurin me Yamalin.

Përmes një postimi, Ines u shpreh se nuk e kishte menduar kurrë që publikimi i diçkaje kaq të thjeshtë do të merrte përmasa të tilla.

"Kam kaluar orë të tëra duke lexuar komentet. Edhe pse përpiqem të jem e fortë, edhe unë jam vetëm njeri. Pas këtij profili fshihet një person me ndjenja, që qan, gabon dhe nuk pushon së qeni njeri vetëm sepse është në një lidhje", shkroi ajo.

Ajo shtoi se e kupton që jo të gjithë duhet ta pëlqejnë, si dhe i pranon kritikat kur ato shprehen me respekt.

"Ka një dallim të madh mes të kesh një mendim dhe të shpenzosh kohë për të poshtëruar, fyer apo për t'i uruar të keqen dikujt që as nuk e njeh. Nuk po i bëj keq askujt. Nuk i kam marrë askujt asgjë. Thjesht po jetoj jetën time", tha Ines.

U bëri thirrje njerëzve të reflektojnë para se të shkruajnë komente fyese, duke kujtuar se në anën tjetër të ekranit ndodhet një njeri me familje, miq, pasiguri dhe ndjenja.

"Ju lutem, mos harroni se fjalët mund të lëndojnë shumë më tepër sesa mendoni", vazhdoi tutje.

Në fund, Ines theksoi se nuk ka ndërmend të bindë askënd që ta pëlqejë, por kërkon vetëm pak më shumë empati dhe humanizëm.

"Shpresoj që një ditë interneti të mos jetë më një vend ku festohet mizoria. Deri atëherë, do të vazhdoj të jetoj me respekt dhe shpresoj që edhe të tjerët të bëjnë të njëjtën gjë. Faleminderit nga zemra të gjithëve që gjetën kohë ta lexojnë këtë. Më pëlqen thjesht të ndaj momente të vogla nga jeta ime. Nuk dua t'i bëj keq askujt dhe as të shkaktoj që dikush të ndihet keq për atë që publikoj", përfundoi ajo.

Në fund të mesazhit, Ines u shpreh se të gjithë po përpiqemi ta jetojmë jetën sa më mirë që dimë dhe se shpreson që njerëzit të zgjedhin mirëkuptimin dhe dhembshurinë, e jo urrejtjen. /Telegrafi/

Moti sot në Maqedoninë e Veriut do të jetë i ndryshueshëm me vranësira dhe periudha me diell. Do të ketë jostabilitet lokal me shira të rrëmbyeshëm, bubullima, erëra të forta dhe kushte për stuhi të izoluara me breshër. Do të ketë erëra të dobëta deri në mesatare, dhe përgjatë lumit Vardar herë pas here të forta nga veriu.

Në pjesët perëndimore do të fryjë erë e dobët deri në mesatare, herë pas here e fortë perëndimore. Temperatura minimale do të jetë në intervalin prej 12 deri në 21 gradë, ndërsa maksimale do të arrijë 27 deri në 33 gradë.

Në Shkup, moti do të jetë i ndryshueshëm me vranësira dhe periudha me diell. Në pjesë të luginës do të ketë jostabilitet me shira të rrëmbyeshëm, bubullima dhe erëra të forta. Temperatura minimale do të bjerë në 17, ndërsa maksimale do të arrijë 30 gradë.

Kupa e Botës, e cila do të zhvillohet dhe organizohet nga Arabia Saudite në vitin 2034, mund të shtyhet dhe ne do të kemi një kampion të ri bote vetëm në vitin 2035.

Gazeta britanike The Sun shkruan për mundësinë që turneu në Arabinë Saudite të mos mbahet i plotë gjatë vitit 2034, por të përfundojë në fillim të vitit 2035.

Organizimi i turneut në Arabinë Saudite është përballur që në fillim me problemin e temperaturave jashtëzakonisht të larta të verës.

Ky problem u zgjidh në vitin 2022 në Katar duke e mbajtur kampionatin në nëntor dhe dhjetor, por e njëjta gjë nuk mund të zbatohet për turneun në Arabinë Saudite.

Sipas kalendarit hënor islamik, Ramazani 2034 zgjat nga 12 nëntori deri më 12 dhjetor, dhe shanset që turneu të zhvillohet gjatë asaj periudhe janë pothuajse zero.

Kupa e Botës mund të fillojë në mes ose në fund të dhjetorit 2034 dhe të përfundojë vetëm në fund të janarit 2035. Një mundësi tjetër është që i gjithë turneu të fillojë vetëm në janar dhe që finalja të luhet në shkurt 2035.

Në të dyja rastet, Kupa e Botës 2034 do të bëhej e para në histori që do të zhvillohej në dy vite kalendarike ose do të luhej në një vit me numër tek.

Vendimi përfundimtar për datën e turneut duhet të merret nga FIFA në vitin 2027. /Telegrafi/

Nvidia ka prezantuar një teknologji të re për ftohjen e qendrave të të dhënave të bazuara në inteligjencën artificiale, e cila funksionon me një koncept që duket kundërintuitiv: përdor lëng ftohës me temperaturë deri në 45 gradë Celsius për të ftohur pajisjet më të fuqishme kompjuterike.

Gjenerata e re e infrastrukturës Nvidia Rubin përdor për herë të parë një sistem 100 për qind ftohjeje me lëng, ku çdo çip dhe komponent i rrjetit ftohet përmes një qarku të mbyllur, pa përdorur ventilatorë brenda serverëve.

Tradicionalisht, qendrat e të dhënave përdorin ajër shumë të ftohtë dhe sisteme të mëdha klimatizimi për të larguar nxehtësinë nga serverët. Por me rritjen e fuqisë së modeleve të inteligjencës artificiale, kjo metodë po bëhet gjithnjë e më pak efikase dhe kërkon sasi të mëdha energjie dhe uji.

Sistemi Rubin përdor një përzierje prej rreth 75 për qind ujë dhe 25 për qind glikol propileni, e cila qarkullon direkt mbi komponentët kryesorë të serverëve. Lëngu hyn në sistem me temperaturë rreth 45°C dhe largohet më i ngrohtë pasi ka thithur nxehtësinë nga çipat.

Avantazhi kryesor është se kjo teknologji mund të ulë ndjeshëm nevojën për ftohës mekanikë dhe mund të reduktojë përdorimin e ujit, pasi nxehtësia mund të largohet përmes sistemeve të jashtme të quajtura dry coolers, pa avullim të ujit.

Përveç kursimit të energjisë dhe ujit, arkitektura e re sjell edhe më pak zhurmë, pasi eliminon ventilatorët tradicionalë që janë një nga burimet kryesore të zhurmës në qendrat e të dhënave.

Kjo zgjidhje është krijuar posaçërisht për epokën e inteligjencës artificiale, ku kërkesa për fuqi llogaritëse po rritet me shpejtësi. Nvidia synon që Rubin të bëhet një standard i ri për “fabrikat e AI”, duke mundësuar më shumë kapacitet kompjuterik me më pak konsum energjie dhe burimesh.

Në thelb, Nvidia po ndryshon rregullin e vjetër se qendrat e të dhënave duhet të jenë shumë të ftohta: me Rubin, temperaturat më të larta të lëngut ftohës mund të sjellin efikasitet më të madh. /Telegrafi/