Nga Endri Kajsiu/

Pse mungoi kryeprokurori në prezantimin e draftit të kodit të ri penal dhe heshtja e çuditshme e organit të “akuzës”?

Më 25 korrik 2025, në Hotel Tirana, në një sallë të mbushur me profesionistë të drejtësisë, përfaqësues të trupit diplomatik dhe studentë të drejtësisë, u prezantua zyrtarisht drafti i ri i Kodit Penal të Shqipërisë. Një dokument themelor për shtetin e së drejtës, hartuar me kontributin e dhjetëra ekspertëve vendas dhe të huaj.

Por mungesa e një figure qendrore ishte flagrante: Prokurori i Përgjithshëm, z. Olsian Çela.

Burime të besueshme konfirmojnë se z. Çela ishte i ftuar zyrtarisht nga Ministria e Drejtësisë, ashtu si të gjithë prokurorët e juridiksionit të përgjithshëm. Por jo vetëm që refuzoi të marrë pjesë, por u dërgoi edhe email vartësve të tij duke i “lënë të lirë” të mos marrin pjesë, me justifikimin absurd: “Nuk kemi qenë pjesë e grupit të punës”.

Ky qëndrim bie poshtë nga vetë dokumentet zyrtare të Ministrisë, që tregojnë pjesëmarrjen në takime të caktuara të grupit të punës të prokurorëve nga struktura e tij, zotërinjtë: Kujtim Luli, Arqile Koça dhe Gëzim Spahiu, me urdhër të vetë z. Çela.

Pra, në vend të përballjes publike, z. Çela zgjodhi rrugën e mungesës, të heshtjes dhe të gënjeshtrës — një sjellje e papranueshme për një funksionar të lartë kushtetues. Më keq akoma, emaili i tij i brendshëm është jo vetëm një akt i turpshëm intimidimi ndaj prokurorëve por edhe shkelje e rëndë e kushtetutës dhe ligjit që cënon pavarësinë e prokurorëve në ushtrimin e funksioneve të tyre.

Prokuroria nuk është bunker personal, dhe Prokurori i Përgjithshëm nuk është pronar i Kodit Penal. Roli i tij nuk është të tërhiqet kur ligji troket në derë, por të përballet dhe të japë mendim, sado kritik të jetë ai.

Në kontrast me këtë qëndrim, Kryetari i Gjykatës së Lartë mori pjesë me dinjitet institucional në aktivitet. Ai mbajti qëndrim, ndau mendime dhe tregoi se përfaqësimi nuk është luks, por detyrë publike. Sjellja e tij ishte shembull përfaqësimi kushtetues, ndryshe nga mungesa me alibi dhe heshtje e Kryeprokurorit.

Përballë kësaj sjelljeje të padenjë, pati prokurorë që guxuan të marrin pjesë. Ashtu si dhe prokurorët e SPAK, të cilët treguan se drejtësia nuk hesht kur thirret në emër të ligjit.

Po aq zhgënjyese ishte edhe mungesa e Dhomës Kombëtare të Avokatisë, veçanërisht e kreut të saj, z. Maksim Haxhia, që sipas burimeve kishte koordinuar më herët qëndrimin me z. Çela, duke u justifikuar me një vizitë të planifikuar “në Kosovë”. Mungesa e tyre ishte një akt simbolik mospërfilljeje ndaj një momenti themelor për profesionin e tyre, por edhe turpërues për institucionet dhe komunitetin e prokurorëve dhe avokatëve që ato përfaqësojnë respektivisht.

Në fund të ditës, Shqipëria nuk ka nevojë për drejtues institucionesh që fshihen pas emaileve dhe alibive, por për përfaqësues që përballen me përgjegjësinë publike.

Në një shtet të së drejtës, detyrat kushtetuese nuk trajtohen si prona private. Ato janë barrë publike dhe kërkojnë guxim, integritet dhe përballje.

Kush nuk ka kurajën të përfaqësojë institucionin në ditët më të rëndësishme, nuk meriton të qëndrojë asnjë ditë në atë zyrë.

lexo.al

The post Kur detyrat kushtetuese dhe publike përdoren si pronë private first appeared on JavaNews.al.

Pezullohet nga detyra një oficer policie i përfshirë në një konflikt fizik jashtë shërbimit, në qytetin e Vlorës

Pas përfshirjes jashtë orarit të shërbimit në një konflikt fizik, në ambientet e një lokali në lagjen “Pavarësia 2”, Vlorë, Drejtori i Përgjithshëm i Policisë së Shtetit, Drejtues Madhor Ilir Proda, ka urdhëruar pezullimin e menjëhershëm nga detyra, deri në sqarimin e plotë të rrethanave, të oficerit të Policisë Kufitare Dibër.

Ndërkohë, Drejtoria e Standardeve Profesionale në Policinë e Shtetit ka nisur ndaj Nënkomisar A. I., me detyrë Oficer Policie në Komisariatin e Policisë Kufitare Dibër, procedurën disiplinore të rëndë, bazuar në Ligjin nr. 82/2024 “Për Policinë e Shtetit”, që parashikon masa për:

-raste të sjelljeve që diskreditojnë imazhin dhe dëmtojnë besimin e publikut tek Policia e Shtetit, të kryera jashtë ushtrimit të detyrës;

-kryerjen e veprimeve që cenojnë rëndë figurën e punonjësit të policisë, institucionit apo shërbimit policor në tërësi.

Nga veprimet e para hetimore ka rezultuar se Nënkomisar A. I., jashtë shërbimit dhe në shoqërinë e shtetasit L. B., 57 vjeç, banues në lagjen “Pavarësia”, Vlorë, është konfliktuar fillimisht fizikisht me shtetasin A. B., 18 vjeç. Pas përshkallëzimit të konfliktit, janë përfshirë edhe shtetasit V. B., 53 vjeç, pronar i një hoteli në lagjen “Pavarësia 2”, dhe E. M.

Aktualisht, Nënkomisar A. I. ndodhet i shtruar në Spitalin Rajonal Vlorë.

Për këtë rast vijojnë veprimet procedurale nga oficerët e Policisë Gjyqësore pranë Prokurorisë, në bashkëpunim me Agjencinë e Mbikëqyrjes Policore.

Policia e Shtetit mbetet e vendosur të reagojë me vendosmëri ndaj çdo rasti që cenon besimin e qytetarëve. Ajo fton qytetarët të denoncojnë çdo veprim të paligjshëm apo sjellje të papërshtatshme nga punonjësit e saj, duke garantuar trajtim të paanshëm dhe konform ligjit.

The post Dhunoi kamarierin 18 vjeçar, pezullohet nga detyra oficeri i policisë, ndodhej jashtë shërbimit first appeared on JavaNews.al.

Nga Av. Gurali Brahimllari

Në datën 24/09/2024 Gjykata e Strasburgut, duke shqyrtuar ankimet nr.44715/20 dhe nr. 47930/21 të shtetasve angleze A.L si dhe E.J kundër Francës, në lidhje me (pa)ligjshmërinë e  përdorimit të të dhënave të platformave të enkriptuara EnchroChat, nuk zgjidhi në mënyrë përfundimtare çështjen me argumentin se aplikantët nga Mbretëria e Bashkuar, nuk kishin shterur mjetet ligjore të ankimit para gjykatave Franceze.

Ky qëndrim i GJEDNJ-së u determinua nga shpjegimet e pavërteta të Qeverisë Francese (palë e paditur në këtë proces), se për shkeljen e të drejtave të mbrojtura nga KEDNJ, dy aplikantët anglezë duhet të kishin ushtruar të drejtën e ankimit para gjykatave franceze.

Qeveria franceze është fshehur pas Urdhërit Europian të Hetimit, mbi të cilin ishin transmetuar të dhënat e transkripteve të EncroChat, duke shtrëmbëruar përmbajtjen e legjislacionit të saj procedurial duke parashtruar para GJEDNJ-së se:

“….118.  …kërkuesit kishin në dispozicion mjete ankimi kundër instancave franceze që mund të kishin qenë efektive, dhe të cilat duhet të ishin përdorur/shfrytëzuar.

119. Argumenton fillimisht se kërkuesit mund të kishin kërkuar nga autoritetet hetimore anulimin e transmetimit të të dhënave tek autoritetet britanike me qëllim përfshirjen e tyre si provë në procedime të ndryshme penale në bazë të nenit 694-41 të KPP-së… Nënvizon se ky mjet ankimi është i hapur për çdo “person/palë të interesuar” dhe se kërkuesve do t’u kishte mundësuar të mbështeteshin në praktikën gjyqësore të konsoliduar, e cila lejon, në një situatë tërësisht të brendshme, kërkimin e anulimit të përcjelljes së akteve/dokumenteve që rrjedhin nga një procedim me arsyetimin se ato janë marrë në kushte që bien në kundërshtim me nenin 8 të Konventës… Duke vepruar kështu, kërkuesit do duhej të kishin paraqitur të gjitha pretendimet e tyre në gjykatat e brendshme(franceze).”

Këto argumente të qeverisë franceze, jo vetëm janë pranuar si të vërteta, por edhe i kanë bindur gjykatësit e Strasburgut në vendimmarrjen e tyre kur shprehen se: “…142.  Qeveria (Franceze) tregon në këtë mënyrë bindshëm se kërkuesit kishin një mjet ankimi që i lejonte ata të kundërshtonin ligjshmërinë dhe proporcionalitetin e marrjes së të dhënave dhe transmetimit të tyre tek autoritetet britanike për përfshirjen e tyre si provë në dosjen penale.”

Prandaj Gjykata e Strasburgut, ndonëse ka dhënë në këtë vendim definicione të rëndësishme për prespektivën e zgjidhjes së çështjeve të ngjashme për të ardhmen (shih paragrafin 101 të vendimit), ka  arritur në konkluzionin se:  

“145.  Në bazë të sa më sipër, Gjykata vlerëson se kërkuesit kishin në dispozicion një mjet ankimi, që u jepte mundësi të kundërshtonin në mënyrë efektive masën/vendimin për transmetimin e të dhënave të marra në ekzekutimin e Urdhrit Europian të Hetimit të lëshuar më datë 11 mars 2020, si dhe masën/vendimin për interceptimin, që mundësoi mbledhjen e tyre. Megjithatë, kërkuesit nuk kanë ndjekur asnjë mjet ankimi para gjykatave franceze dhe nuk provojnë ndonjë rrethanë të veçantë që do t’i përjashtonte ata nga një gjë e tillë.”

Por ky qëndrim është nxjerrë “zbuluar” si i pavërtetë nga një vendim i Gjykatës Franceze të  Kasacionit, i dhënë në datën 3 qershor 2025, sipas të cilit ligji procedurial francez nuk i mundëson asnjë shtetasi që nuk është palë në një proces gjyqësor në gjykatat franceze, që të kundërshtojë në Francë, vlefshmërinë e përgjimit të komunikimeve të kryera nga  autoritetet gjyqësore franceze.

Sipas përmbajtjes së këtij vendimi të Gjykatës Franceze të Kasacionit, ankuesi (një shtetas Belg), që ishte paraburgosur dhe po ndiqej penalisht para Gjykatës së Bruge-s në Belgjikë, mbi bazën e të dhënave të SkyECC, akuzohej “për trafik droge dhe konspiracion kriminal”, me dyshimin se kishte qenë përdorues i kësaj platforme dhe nëpërmjet saj, kishte shkëmbyer mesazhe me persona të tjerë. Mbrojtja e ankuesit, në tetor 2024 (bazuar edhe ne vendimin e GJEDNJ-së për aplikantët anglezë që u publikua më 17/10/2024), ka ngritur padi para gjykatave franceze për të deklaruar të pavlefshme transkriptet e përftuara nga hetimet e kryera dhe përgjimet në platformën SkyECC, edhe pse aplikanti nuk po ndiqej penalisht në Francë.

Në nëntor 2024, Gjykata e Apelit e Parisit e hodhi poshtë kërkesën duke e shpallur atë të papranueshme, për shkak se nga zbatim logjik i ligjit francez është e pamundur që një person i përfshirë në procedura penale jashtë vendit, të kundërshtojë ligjshmërinë e provave të mbledhura më parë në Francë. Ky qëndrim i Gjykatës së Apelit është ankimuar në Gjykatën e Kasacionit duke argumentuar shkeljen e të drejtës kushtetuese për një mjet juridik efektiv para gjykatave  Franceze, duke referuar edhe qëndrimin e qeverisë franceze para GJEDNJ-së dhe përfundimet e saj në vendimin e aplikantëve anglezë.

Më 3 qershor 2025, Gjykata Franceze e Kasacionit refuzoi ta referonte këtë çështje para Këshillit Kushtetues, duke POHUAR, ndër të tjera se, legjislacioni francez sipas neneve 170 dhe 173 të Kodit të Procedurës Penale, të drejtën e ankimit, për të kontestuar rregullshmërinë e akteve ose dokumenteve të përfshira në dosjen hetimore, e ka  kufizuar vetëm për subjektet e procesit penal (gjykatësit hetues, prokurori publik, dëshmitari i asistuar ose palëve), duke synuar që të ruajë sekretin e hetimit dhe të integritetin e procesit hetimor si edhe të mbrojë interesat e personave të përfshirë në këto hetime. Madje Gjykata e Kasacionit thekson se: “Për më tepër, ankesat e bazuara në shkeljen e parimeve kushtetuese të respektimit të të drejtave të mbrojtjes, të drejtës për një mjet efektiv juridik dhe të drejtës për një gjykim të drejtë janë të pavlefshme pasi aplikanti, i cili pretendon shkeljen e këtyre parimeve para një gjykate të huaj, nuk është subjekt i ndonjë procedure në Francë.

Pra ky vendimi i Gjykatës së Kasacionit, që e konsideron të pavlefshme ANKESËN e kërkuesit nga Belgjika për shkak se nuk është subjekt i ndonjë procedure në Francë, provon të kundërtën e qëndrimit të qeverisë franceze para GJEDNJ-së në vendimin e shpallur më 24/09/2024.

Këtë vendim të Gjykatës së Kasacionit në Francë, do ta bashkëngjisim dokumenteve që kemi përcjellë në Gjykatën e Strasburgut, ndërkohë që bëjmë me dije lexuesin se para Gjykatës Kushtetuese kemi kundërshtuar pretendimet e përfaqësuesve të Prokurorisë së Posaçme, se legjislacioni francez prezumohet të jetë “kampioni” i respektimit të të drejtave të njeriut edhe në fushën e respektimit të standadeve për fshehtësinë e korrespondencës dhe të çdo mjeti komunikimi”.

Theksojmë përsëri se legjislacioni procedurial francez, është i vetmi legjislacion në të gjithë vendet e BE-së, që lejon përgjimin masiv (nëpërmjet sondave përgjuese që interceptojnë të gjithë fluksin e komunikimeve), ndërsa jurisprudenca e GJEDNJ-së, jo vetëm nuk e pranon këtë lloj përgjimi në proceset penale, por e ka venë në dyshim atë edhe për nevojat e inteligjencës sekrete kur lejohet nga legjislacioni i brendshëm (por me theksin se asnjëherë nuk janë prova në proces penal).

Për më tepër në kundërshtim, jo vetëm me jurisprudencën e GJEDNJ-së, por edhe me nenin 222/a të K.Pr.Penale të Republikës së Shqipërisë, ligji procedurial francez NUK LEJON ANKIMIN ndaj vendimit të përgjimit të telekomunikimeve.

Për të interesuarit, sjell në vëmendje jurisprudencën e GJEDNJ-së në çështjen LAMBERT k. FRANCËS, dt. 24 gusht 1998, ku Gjykata ka konstatuar shkelje të nenit 8 të Konventës për shkak se: “20. Z. Lambert parashtroi se vendimi i Gjykatës së Kasacionit për t’i refuzuar atij çdo të drejtë për t’u ankuar për përgjimin e disa prej bisedave të tij telefonike, me arsyetimin se ishte linja e një pale të tretë që ishte përgjuar, kishte shkelur nenin 8 të Konventës.

Ndërsa në çështjen MATHERON k. FRANCES, dt. 29 mars 2005, Gjykata gjeti shkelje të nenit 8 të Konventës për shkak të pamundësisë për të kundërshtuar përfshirjen në dosjen e aplikantit, të transkripteve të bisedave të tij të përgjimeve telefonike të kryera në procese në të cilat ai nuk ishte i përfshirë.  Gjykata pranoi ankimin duke konstatuar shkelje të nenit 8 të KEDNJ-së për shkak se “… është e qartë se arsyetimi i Gjykatës së Kasacionit mund të çojë në vendime që privojnë mbrojtjen e të drejtave të një numri të caktuar personash, përkatësisht të gjithë ata që do të ishin kundër rezultatit të përgjimeve telefonike të kryera në procese të huaja për ta”.

Duke iu kthyer vendimit të dt. 03.06.2025 të Gjykatës Franceze të Kasacionit, edhe pse  kjo Gjykatë ende nuk është shprehur për pjesën e ankimit të shtetasit belg, në lidhje me të drejtën e tij për të kundërshtuar Urdhërin Europian të Hetimit që ka lejuar transmetimin e transkripteve,   del qartazi se parashtrimet e qeverisë franceze para GJEDNJ-së kanë qenë të pavërteta, për shkak se aplikantët anglezë nuk kanë patur asnjë mundësi për të kundërshtuar ligjshmërinë e procesit të kapjes së të dhënave të EncroChat, para Gjykatëve Franceze. Madje ata nuk mund të kundërshtonin as transmetimin e këtyre të dhënave nëpërmjet UEH për shkak se ndryshe nga autoritetet belge, Mbretëria e Bashkuar nuk kishte kërkuar paraprakisht ndihmë juridike nga Franca për zbulimin e vendndodhjes së platformës EncroChat dhe të përdoruesve të saj.

The post A e ka gënjyer qeveria franceze Gjykatën e Strazburgut në parashtrimet për çështjen e përgjimeve të EncroChat? first appeared on JavaNews.al.

Andi Mustafaj, në një lidhje direkte me studion e “Off the Record” me Andrea Dangllin, deklaroi se do të çojë para Këshillit Kombëtar të Partisë Demokratike propozimin për një ridimensionim të partisë.

Zëdhënësi i fushatës së Partisë Demokratike në zgjedhjet e 11 majit tha: “Po diskutohet dhe do e çoj para Këshillit Kombëtar. Në shtator besoj se do e prezantoj”.

“Aktualisht, PD-ja është e angazhuar në dokumentimin e farsës zgjedhore. Po nxjerrim çdo ditë fakte të rëndësishme”, tha Mustafaj.

“Në histori shpesh fitojnë autokratët. Detyra e opozitës është nxjerrja e të gjithë skandaleve dhe po bëjmë detyrën tonë politike. Sa i përket fushatës, historia do e tregojë se fushata pozitive ishte zgjedhja e duhur. Se çfarë mund të bënin më mirë strukturat, nuk mund të vlerësohet nën efektin e emocionit. Duhet qetësi dhe çdo gjë analizë duhet bërë në kohën e vet”, shtoi Mustafaj në “Off the Record” me Andrea Dangllin, në A2 CNN.

Kur u pyet nëse ka autokraci edhe në drejtimin e opozitës, Mustafaj u përgjigj: “Pjesa më e rëndë është autokracia në ushtrimin e pushtetit. Nuk i shpëtojmë dot autokracisë shtetërore, ndërsa autokracisë partiake, nëse ka, i shpëton. Nëse pranojmë që në Shqipëri nuk ka pasur zgjedhje, por pavarësisht kësaj kërkohet dorëheqja e kupolës drejtuese të PD-së, kjo do ishte padrejtësi e madhe”.

Në lidhje me impaktin e LaCivita në fushatën e demokratëve, Mustafaj deklaroi: “Zgjedhjet nuk u fituan, por ka pasur ndikim pozitiv në ligjërimin e PD-së. Unë jam shumë krenar që kam qenë zëdhënës i një fushate pozitive. Bëmë fushatë mbi konceptin e përmirësimit të jetës së qytetarëve dhe kjo është pozitive për politikën shqiptare.

The post Propozimi për ridimensionimin e PD, Mustafaj: Do e prezantoj në shtator first appeared on JavaNews.al.

Në kuadër të Mekanizmit të Mbrojtjes Civile të Bashkimit Europian, një avion zjarrfikës Canadair është nisur nga Italia dhe do të angazhohet në operacionet ajrore për shuarjen e flakëve në jug të vendit, në zonat Borsh, Piqeras dhe Lukovë.

Ky mjet ajror do të forcojë ndërhyrjet në terrene të vështira dhe të paarritshme nga toka, duke dhënë ndihmë në përballimin e situatës së zjarreve që kanë përfshirë këto zona.

Ndërkohë, helikopterët e Forcës Ajrore do të angazhohen pranë fshatit Zhulat, në rajonin e Gjirokastrës, si dhe në zonën e Qafëbuallit, pranë Bulqizës.

Siç raporton Ministria e Mbrojtjes, janë 21 vatra aktive zjarri në vend dhe 16 nën monitorim.

Situata mbetet kritike në zonat e Lurës, Bulqizës, Delvinës, Tiranës dhe Korçës, ku janë angazhuar mbi 1350 forca operacionale dhe 65 automjete zjarrfikëse. Përveç ndërhyrjeve nga toka, po përdoren edhe helikopterë nga Forcat e Armatosura dhe bashkëpunëtorët ndërkombëtarë për të frenuar përhapjen e flakëve.

The post Flakët në jug të Shqipërisë, avioni “Canadair” niset nga Italia për ndihmë emergjente first appeared on JavaNews.al.

Evropa dhe Polonia duhet të jenë të përgatitura për një konflikt të mundshëm të madh me Rusinë që në vitin 2027. Alarmin e ka ngritur Kryeministri i Polonisë, Donald Tusk. Qeveria e tij do t’i shfrytëzojë maksimalisht dy vitet e ardhshme për të stabilizuar situatën në Poloni dhe për të siguruar sigurinë. Tusk e njoftoi këtë në një takim në bashki në qytetin Pabianice pranë Lodzit, siç raportohet nga mediat gjermane Die Welt.

Kreu i qeverisë polake përmendi një vlerësim të ngjashëm nga Komandanti i ri Suprem i NATO-s, Alexus Grynkevich, me të cilin kishte folur pak më parë. Sipas këtij vlerësimi, Rusia dhe Kina mund të bëhen aq të forta deri në vitin 2027 sa të kërkojnë një përballje të koordinuar me NATO-n dhe Shtetet e Bashkuara.

Në dritën e luftës së Rusisë kundër Ukrainës, ekspertët ushtarakë perëndimorë po qarkullojnë vlerësime të ndryshme se kur agresioni mund të drejtohet kundër shteteve të tjera në Evropë. Viti 2027 është afati më i shkurtër kohor i përmendur deri më tani. Ministri gjerman i Mbrojtjes Boris Pistorius (SPD) parashikon vitin 2029. Shtetet e BE-së po riarmatosen dhe duan të jenë në gjendje të zmbrapsin një sulm rus deri në vitin 2030.

Rusia po zgjeron gjithashtu forcat e saj të armatosura. Megjithatë, udhëheqja e Moskës e quan të pakuptimtë sugjerimin se territori i NATO-s duhet të sulmohet. Gazeta ruse Komsomolskaya Pravda kohët e fundit e përmbysi këtë narrativë dhe sugjeroi se NATO synon të sulmojë Rusinë në vitin 2027.

The post Polonia në alarm: Rusia do na sulmojë në vitin 2027 first appeared on JavaNews.al.

Gjashtë anëtarët e grupit të trafikut ndërkombëtar të drogës, që vepronte në vitet 2020-2021 mes Kolumbisë dhe Europës, kanë dalë sot, 27 korrik, në GJKKO për masat e sigurisë.

Mes tyre janë Erion Alibej dhe Plaurent Dervishaj. Ata janë nën hetim edhe për dosjen “Plumbi i Artë”.

SPAK njoftoi dje, 26 korrik, se si rezultat i këtij operacioni janë sekuestruar 6 ton lëndë narkotike (kokainë e kanabis) me një vlerë në treg prej 411 milionë eurosh.

“Vendimi u ekzekutua menjëherë në bashkëpunim me strukturat e Policisë së Shtetit. Më datë 25.07.2025 u bë e mundur arrestimi i gjashtë personave në hetim: A. H, K. H, E.N, E. A, P. D, I. Ll. Gjatë ekzekutimit të masës së sigurisë, në banesën e shtetasit A. H. u gjetën dhe sekuestruan 3 armë zjarri të llojit pistoletë, të mbajtura pa leje, për të cilat është arrestuar në flagrancë. Një prej të dyshuarve, shtetasi D. P. (alias D. B., alias E. S.), është shpallur në kërkim, dhe po punohet për lokalizimin dhe kapjen e tij në bashkëpunim me Policinë e Shtetit dhe partnerët ndërkombëtarë. Për interesat e hetimit,  Prokuroria e Posaçme ka kërkuar dhe marrë miratimin e Gjykatës së Posaçme për kryerjen e kontrolleve në banesa, automjete dhe persona”, thuhej në njoftimin e Prokurorisë së Posaçme.

Gjatë kontrolleve janë sekuestruar shumë monetare (43 mijë euro), karta banke, automjete (një Mercedes Benz AMG G63, një Volkswagen Golf 7a, dhe një Volksëagen Sharan), tre pistoleta, celularë, karta banke, dornë, hard disqe, si dhe një skaf luksoz.

Në dorën e SPAK kanë rënë edhe dokumente bankare dhe transaksionesh financiare me llogari në Emiratet e Bashkuara, Gjermani, Itali dhe Panama.

The post Trafiku nga Kolumbia në Europë, grupi i drogës del para GJKKO-së first appeared on JavaNews.al.

Një 48-vjeçar ka rënë në prangat e Policisë në Lushnjë, pasi tentoi të vidhte sende me vlerë në një Kishë.

Përmes një njoftimi, Policia bën të ditur se arrestimi i tij u bë në flagrancë, pasi u konstatua brenda ambienteve të Kishës Katolike.

Ndërkohë materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.

Njoftimi i Policisë:

Lushnjë-Policia parandaloi një rast të vjedhjes së një objekti kulti.

Tentoi të vidhte sende me vlerë në një objekt kulti (Kishë Katolike), kapet në flagrancë autori.

Shërbimet e Komisariatit të Policisë Lushnjë gjatë patrullimit në territor, gjatë mbrëmjes së djeshme, në lagjen “Kongresi”, kanë konstatuar një shtetas në ambientet e Kishës Katolike duke vjedhur sende me vlerë.

Patrulla e Përgjithshme ka ndërhyrë menjëherë duke bërë të mundur kapjen dhe arrestimin në flagrancë të autorit të dyshuar, shtetasit B. B., 48 vjeç, banues në Lushnjë.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.

The post Tentoi të vidhte sende me vlerë brenda Kishës, arrestohet 48-vjeçari në Lushnjë first appeared on JavaNews.al.

Gjatë 24 orëve të fundit në Shqipëri janë evidentuar 45 vatra zjarri, nga të cilat 21 mbeten aktive dhe 16 nën monitorim, ndërsa 8 janë shuar.

Situata mbetet kritike në zonat e Lurës, Bulqizës, Delvinës, Tiranës dhe Korçës, ku janë angazhuar mbi 1350 forca operacionale dhe 65 automjete zjarrfikëse. Përveç ndërhyrjeve nga toka, po përdoren edhe helikopterë nga Forcat e Armatosura dhe bashkëpunëtorët ndërkombëtarë për të frenuar përhapjen e flakëve.

Zjarret kanë rrezikuar banesa dhe zona urbane, duke detyruar evakuime në disa prej tyre. Autoritetet paralajmërojnë rrezik të lartë për zjarret në pyjet e vendit edhe për ditët në vijim.

Njoftimi i plotë i Ministrisë së Mbrojtjes:

Mbeten aktive këto vatra:

• Në vendin e quajtur “Liqeni i Luleve”, pjesë e Parkut Kombëtar Lurë, vazhdon aktiv Vatra e quajtur Gropa e Madhe dhe Pllau i Gjurës mbi fshatin Gurë-Lurë Zjarri, ku janë rreth 50 forca nga strukturat operacionale.
• Në fshatin Zall Gjoçaj, bashkia Mat ka vazhduar puna për shuarjen e zjarrit të rënë më me një shtrirje mbi 14 km, me zhvillime në tre kahe: nga Masdeja ku përfshin sipërfaqe të konsiderueshme në pyje, në Qafa e Tollës si dhe në vendin e quajtur Fush Kuqe ku në terren operuan rreth 46 forca nga strukturat operacoinale.
• Në Qafë Buall, Bashkia Bulqizë është përhapur drejt zonës së Qytetit të Vjetër, fshatit Plan i Bardhë dhe drejt Krastës. Në operacionin e shuarjes së zjarrit janë angazhuar 120 forca nga strukturat operacionale dhe kanë ndërhyrë 2 helikopterë. Situata është më e qetë dhe nuk rrezikohen zona urbane. Janë evakuuar 6 banesa
• Në lartësitë e malit mbi fshatin Kalasë, bashkia Delvinë, ka vijuar operacioni me të gjitha strukturat, të ndihmuar nga 58 efektivë dhe 4 automjete zjarrfikëse të FA-së. Vartra ka midis fshatrave Borsh, Piqers. Sasaj, njësia administrative Lukovë, janë 4 vatra te shkëputura midis tyre por në lartësi dhe pa asnjë mundësi ndërhyrje me njerëz dhe mjete. Era ndihmon përhapjen me shpejtësi të flakëve. Ndërhyrje nga ajri ka në orët e para të mëngjesit.
• Vatra e zjarrit që përfshiu fshatrat Kalas – Tatzat – Senicë – Vergo – Kopaçëz – Palavli, të bashkisë Dlvinë , aktualisht vazhdon aktiv zjarti fshatin Kopaçëz në mal, ku janë angazhuar rreth 70 forca nga të gjitha strukturat operacionale, një autoa,bulancë dhe helikopteri Cougar .
• Në zonën e Shmilit në fshatin Lugaxhi, bashkia Elbasan, ka vijuar puna për shuarjen e zjarrit me angazhimin në teren të rreth 50 forcave bga strukturat operacionale.
• Në zonën mbrapa mali të Lisecit, Bashkia Gramsh, është izoluar në shumë pjesë vatra e zjarrit e aktivizuar që prej mbrëmjes së djeshme në terren të vështirë për ndërhyrne e forcave operacionale. Zjarri është sipërfaqësor dhe pa dëme, sepse pylli është shumë i lartë.
• Në zonën e Shkopetit, njësia administrative Milot, vazhdon aktiv zjarri vatra e të cilit është përhapur edhe në territorin e bashkisë Mirditë. Pjesa më aktive e vatrës është përhapur në zonën e kufirit ndarës mes bashkive Kurbin-Mirditë-Mat, mbi lartësitë e fshatit Lurth, kua janë angazhuar rreth 80 forca vendore të bashkive Kurbin e Mirditë. Nuk ka rrezik për banesat.
• Në fshatin Kulmë dhe fshatin Fang, bashkia Mirditë, zjarr i rënë në një sipërfaqe pyjore ka marrë përmasa të mëdha, favorizuar nga temperaturat ekstreme dhe era që fryn. Në fshatin Fang operuan forca zjarrfikëse, shërbimi pyjor, forca bashkiake dhe vullnetarë të ndihmuar dhe nga 80 forca ushtarake në total me 3mjete dhe rreth 40 forca bashkiake.
• Në vendin e quajtur Qeramica ndërmjet fshatrave Trestenik- Vishocicë të bashkisë Devoll, është aktivizuar një vatër zjarri, e cila për shkak të erës rrezikon të përhapet, pasi vendi ku ndodhet është e veshur me barishte e shkurre.
• Në fshatin Kriçkovë, bashkia Pogradec, forcat operacionale janë në terren për vënien në kontroll të situatës.
• Në Parkun Kombëtar të Prespës, fshati Lajthizë, Bashkia Pustec, është aktivizuar një vatër zjarri. Për shuarjen e zjarrit u aktivizuan në total rreth 60 forca operacionale, ndërsa sot pritet të angazhohen 75 forcave operacionale.
• Në fshatin Galinë, bashkia Berat zjarri është aktiv dhe në vendngjarje ka shkuar Shërbimi vendor i MZSH të bashkisë Berat.
• Në zjarrin e rënë në fshatin Fushëbardhë dhe pranë tunelit të Skërficës, bashkia Gjirokastër, i cili ka ardhur nga territori i bashkisë Delvinë, nga një zonë në lartësi të madhe, u angazhuan rreth 60 forca të strukturave operacionale, por zjarri është duke përparuar drejt vendit të quajtur Bregu i Pamjes, zonë e mbrojtur dhe pritet ndërhyrje nga ajri.
• Zjarri në fshatin Izvor i Vjetër dhe në fshatin Duraj, bashkia Memaliaj, vazhdon të jetë aktiv. Zjarri është izoluar dhe fikur ne fshatrat Levan, Bardhj, Xhafaj, Njësia Administrative Krahës.
• Vijon puna për shuarjen e zjarrit të rënë në Malin me Gropa, bashkia Tiranë, në një sipërfaqe rreth 30 ha kullotë dhe pyll. Në operacion morën pjesë rreth 55 forca nga strukturat operacionale. Është bërë arrestimi i një personi të dyshuar për zjarrëvënie të qëllimshme.
• Në fshatin Ibë, Bashkia Tiranë, zjarr ka rënë në terreni të vështirë dhe me rrugë të pakalueshme për mjetet zjarrfikëse. Në operacion janë angazhuar: 2 helikopterë të Forcave të Armatosura, 6 mjete dhe 25 forca nga struktura operacionale.
• Në fshatin Shetel, Bashkia Shijak, ka rënë zjarr në një sipërfaqe pyjore. Në vendngjarje janë dislokuar rreth 40 forca nga strukturat operacionale. Priet ndërhyrje nga ajri.
• Bashkia Malësi e Madhe është aktive vatra në vendin e quajtur “Rraze Veshtit”. Në operacion për izolimin dhe shuarjen e kësaj vatre zjarri janë angazhuar 35 forca nga të gjitha strukturat operacionale . Terreni është mjaft i vështirë, nuk është e mundur te ndërhyhet me mjete zjarrfikëse.
  Në monitorim mbeten vatrat në Fshatin Ulëz, bashkia Mat; në Livadhet e Peladhisë, bashkia Bulqizë; Në Majën e Paliskës, dhe në vendin e quajtur Sashic, bashkia Vlorë; Në fshatin Markat, Bashkia Konispol; Në vendin e quajtur pyjet e Gurakuqit, bashkia Librazhd; Në fshatin Dishnicë, bashkia Korçë; në fshatin Strelcë, bashkia Maliq; Në fshatin Muzhakë, bashkia Skrapar; Në fshatin Konisbaltë, bashkia Dimal; Në fshatin Paftal, bashkia Berat, në zonën e Shpiragut; në fshatin Zgërbonjë, bashkia Poliçan; në vendin e quajtur Gryka e Motinës, mbi fshatin Dragobi, në malin Sukë, fshati Mamëz, bashkia Kukës;
  Në operacionet për shuarjen e zjarreve u angazhuan:
• 65 automjete zjarrfikëse,
• 1350 forca operacionale.
• Gjithashtu në operacionet e ditës së djeshme morën pjesë,
• 5 automjete zjarrfikëse dhe 2 Helikopterë nga Forcat e Armatosura,
• 2 helikopterë hungarezë, si dhe 2 helikopter Canadair të ofruar nga Mekanizimi i Mbrojtjes Civile Evropiane Kroat dhe Italian, që operuan në zonën e Vlorës.

Sipas informacionit të dërguar nga Instituti i Gjeoshkencave , sot priten reshje të dobëta në qarkun e Shkodrës dhe lokale të dobëta në shumicën e qarqe të vendit. Për Zjarret në pyje: Sot pritet nivel rrezik “I LARTË” në të gjitha qarqet. Pritet rrezik “I LARTË” nё zona tё lokalizuara qarku Berat (Veri), qarku Dibër (Jug), qarku Elbasan (Perëndim), qarku Fier (Lindje), qarku Lezhë (Veri), qarku Vlorë (Veri).

The post Luftë me zjarret në vend nga toka e qielli! Situata kritike në 5 zona. Qindra forca në terren first appeared on JavaNews.al.

Policia ka vënë në pranga një 58-vjeçar në Shijak, pasi dyshohet se është autori i zjarrit që përfshiu një sipërfaqe të pyllëzuar në fshatin Shetel, duke vënë në rrezik edhe banesat përreth.

Ngjarja ndodhi mbrëmjen e së shtunës, rreth orës 20:00, kur i dyshuari, shtetasi I. B., banues në fshatin Shetel, dogji mbeturina në tokën e tij, por zjarri i doli jashtë kontrollit për shkak të erës së fortë.

Flakët përfshinë një zonë të gjerë me sipërfaqe pyjore dhe rrezikuan seriozisht edhe disa banesa pranë vatrës së zjarrit.

Materialet procedurale i janë referuar Prokurorisë pranë Juridiksionit të Përgjithshëm Durrës, ku 58-vjeçari do të përballet me akuzën e “Shkatërrimit me zjarr të pyjeve ose mjedisit pyjor”, sipas nenit 206/a të Kodit Penal.

Policia apelon që qytetarët të shmangin veprimet që mund të shkaktojnë zjarrvënie të qëllimshme ose nga pakujdesia, duke rrezikuar jetën, pronën dhe mjedisin.

The post E nisi për “pastrim”, i vuri flakën pyllit! Arrestohet 58 vjeçari në Shijak first appeared on JavaNews.al.

Rusia tani “po prodhon tre herë më shumë municion brenda tre muajsh sesa e gjithë NATO-ja gjatë një viti”, deklaroi së fundi sekretari i Përgjithshëm i NATO-s, Mark Rutte, për New York Times.

Radio Evropa e Lirë (REL) dhe Conflict Intelligence Team (CIT), analizuan prodhimin e armëve ruse dhe perëndimore për të vlerësuar nëse Rusia vërtet ka një epërsi kaq të madhe të prodhimit ndaj Shteteve të Bashkuara dhe aleatëve të tij – dhe në cilat kategori armësh – artileri, municion, tanke, aeroplanë, raketa, dronë dhe mbrojtje ajrore – secila palë ka epërsi.

Fakt apo ekzagjerim? Prodhimi i municioneve për artileri të NATO-s dhe Rusisë

Nuk është hera e parë që Rutte pretendon se Rusia po e tejkalon NATO-n sa i përket prodhimit të artilerisë. Në prill, gjatë një interviste për CBS, ai tha se Rusia “po prodhon katër herë më shumë municion sesa e gjithë NATO-ja prodhon për një vit”.

Zyrtarët ukrainas dhe perëndimorë vlerësojnë se Rusia kishte prodhuar rreth 2-2.3 milionë municione për artileri më 2024, një rritje krahasuar me rreth 1.25 milionë të prodhuara më 2022, teksa Moska po investon shumë në zgjerimin e kapaciteteve të saj prodhuese.

Ndërkaq, SHBA-ja planifikon të rrisë prodhimin e predhave 155-milimetërshe në 1.2 milion në vit deri në fund të vitit 2025, teksa Evropa prodhon pothuajse të njëjtin numër – vetëm në fabrikën Rheinmetall në Gjermani planifikohen të prodhohen deri në 700.000 në vit – sipas vlerësimeve konservatore.

Prodhimi aktual në SHBA i predhave është 40.000 në muaj, apo pak më pak se gjysmë milioni në vit, që do të thotë se në total, SHBA-ja dhe BE-ja kanë prodhuar rreth 1.7 milion predha këtë vit.

Për të prodhuar tri herë më shumë brenda tre muajve, ashtu siç tha Rutte, fabrikat e Rusisë do të duhej të prodhonin një sasi masive prej 20.5 milionë predhash këtë vit.

Sipas analizës së CIT-it, zgjerimet e fabrikave në Bijsk, Kazan dhe vende të tjera mund t’i lejojnë Rusisë të prodhojë rreth 4 milionë predha 152-milimetrëshe dhe 122-milimetrëshe në vit.

Predhat kanë nevojë për armë

Rusia vazhdon të mbështetet shumë në rezervat e saj të sistemeve të artilerisë të epokës sovjetike për predhat që prodhon, ndërsa numri i obusëve që ka prodhuar ka rënë nga rreth 12.000 më 2022 në mbi 6.000 në mesin e vitit 2024. Sipas analistëve të CIT-it, Rusia prodhon më pak se 100 obusë vetëlëvizës në vit të llojeve Msta-S, Giatsint-K dhe Malva.

NATO ka epërsi të qartë në këtë aspekt: Franca planifikon të prodhojë 144 sisteme të artilerisë CAESAR në vitin 2025, ndërsa Polonia do të dyfishojë prodhimin e AHS Krab në 100 njësi në vit. Sllovakia pritet të prodhojë 40 obusë Zuzana, ndërsa SHBA-ja prodhon çdo vit 216 tuba topash për armët M777.

Armët e rënda

Një aspekt ku Rusia me gjasë ka epërsi janë tanket.

Sikurse artileria, shumica e prodhimit të saj të tankeve vjen nga riparimi dhe modernizimi i tankeve sovjetike që ka në stoqe. Kjo përbën shumicën e rreth 1.500 tankeve që, sipas Christopher Cavoli, ish-komandant i lartë i NATO-s për Evropën, pritet që Rusia t’ia japë ushtrisë së saj më 2025.

Megjithatë, Rusia ka rritur ndjeshëm prodhimin “nga e para” të tankut të saj modern T-90M, duke prodhuar rreth 280 në vit.

Shumica e shteteve në Evropë, ndërkaq, prodhojnë shumë pak tanke. Franca nuk ka prodhuar asnjë tank Leclerc që më shumë se një dekadë, ndërsa Britania ka porositur 148 tanke të reja Challenger 3, që pritet t’i dorëzohen deri në vitin 2030. Gjermania bën përjashtim, pasi prodhon 50 tanke Leopard 2A8 në vit.

SHBA-ja 109 tanke M1A2 Abrams në vit – ushtria thotë se kjo shifër mund të rritet deri në 420 nëse është e nevojshme – dhe po ashtu modernizon deri në 200 modele më të vjetra.

Epërsia ajrore

Përderisa Rusia prodhon më shumë tanke, SHBA-ja dhe BE-ja ia kalojnë të paktën për katër herë Moskës sa i përket prodhimit të aeroplanëve luftarakë. Rusia vlerësohet se mund të prodhojë 50-60 aeroplanë luftarakë në vit, përfshirë aeroplanë që mund të përdoren për qëllime të ndryshme sikurse Su-57 dhe bombardues strategjikë sikurse Tu-160M2. Pavarësisht sanksioneve, shteti po prodhon më shumë aeroplanë se para se të niste pushtimin e Ukrainës – në vitin 2018, ushtria ruse kishte pranuar vetëm 36 aeroplanë të rinj luftarakë.

Megjithatë, prodhimi i NATO-s është shumë më i lartë. Kompania amerikane Lockheed Martin do të dorëzojë mbi 170 aeroplanë luftarakë F-35 këtë vit, përveç dhjetëra aeroplanëve Rafale (Franca), Eurofighter Typhoon (konsorciumi evropian) dhe Gripen (Suedia) që prodhohen nga vendet e BE-së dhe aleatët e tjerë të NATO-s.

Mbrojtja ajrore

Teksa Rusia lëshon breshëri raketash në Ukrainë, dhe dronët ukrainas godasin thellë brenda Rusisë, prodhimi i sistemeve të mbrojtjes ajrore është vendosur në qendër të vëmendjes.

Sipas Military Balance, një vlerësim vjetor i kapaciteteve ushtarake në mbarë botën, kishte 248 bateri S-400 në vitin 2024 dhe ka shtuar edhe 18 të tjera në vitin 2025, që nënkupton një kapacitet prodhimi prej rreth 36 sistemesh në vit. Prodhimi i sistemeve të tjera, si Tor, Buk dhe Pantsir, është më i vështirë për t’u vlerësuar, për shkak të mungesës së të dhënave.

Raytheon prodhon rreth 12 sisteme të mbrojtjes nga raketat Patriot në vit, ndërsa kompania gjermane Diehl planifikon të prodhojë tetë sisteme IRIS-T në vitin 2025, si dhe 800 deri në 1.000 raketa për to çdo vit. NATO gjithashtu prodhon sistemin NASAMS, i zhvilluar nga Norvegjia dhe SHBA-ja, i cili mund të përdorë raketat AIM-120 AMRAAM ose AIM-9X. SHBA-ja prodhon 1.200 përkatësisht 2.500 njësi të secilës raketë në vit.

Megjithatë, mungesa e të dhënave të plota e bën të vështirë të përcaktohet qartë se sa sisteme dhe raketa të mbrojtjes ajrore prodhojnë të dy palët. Ajo që është e qartë është se, me Ukrainën dhe Rusinë që vazhdojnë të pësojnë goditje nga dronë të thjeshtë, normat aktuale të prodhimit nuk mjaftojnë për t’i mbrojtur në mënyrë efektive nga një prej tipareve më të reja dhe të qëndrueshme të kësaj lufte: dronët goditës të prodhuar në masë dhe me kosto të ulët.

Lufta e dronëve

Sipas Ukrainës, Rusia prodhon çdo muaj afër 5.000 dronë me rreze të gjatë veprimi të llojeve të ndryshme, apo 60.000 në vit. Këtu përfshihen dronët sulmues Geran-2 (versioni rus i dronëve Shahed të Iranit) dhe Gerbera, një dron që nuk ka municion dhe përdoret si dron mashtrues me qëllim që të mbingarkojë sistemet ukrainase të mbrojtjes ajrore.

NATO-ja aktualisht nuk prodhon asnjë dron të krahasueshëm me këta dronë të lirë kamikazë, ndërkaq SHBA-ja ka zgjedhur që të përdorë fluturake pa pilot shumë më të kushtueshëm, sikurse Reaper dhe Global Hawk.

Rusia po ashtu prodhon mbi 200 raketa lundruese dhe balistike në muaj, sipas agjencisë së inteligjencës ushtarake të Ukrainës, duke bërë që prodhimi vjetor të arrijë nga 2.400 deri në 3.000 raketa. SHBA-ja, ndërkaq, vlerësohet se prodhon 700 raketa lundruese të llojit JASSM dhe 500 raketa balistike ATACMS në vit.

Kjo bën që Rusia të ketë epërsi sa i përket dronëve kamikazë dhe lundrues.

Në rast të një lufte mes Rusisë dhe NATO-s, mbrojtja ajrore e NATO-s do të ishte në një pozicion më të mirë për të neutralizuar kërcënimin nga dronët, krahasuar me mbrojtjen ajrore të Ukrainës, e cila ka vuajtur nga mungesa e aeroplanëve luftarakë që nga fillimi i pushtimit, thanë analistët nga CIT.

Teksa Rusia ka përparësi në prodhimin e raketave, mbrojtja e saj ajrore, që shpesh ka vështirësi edhe kundër dronëve të thjeshtë ukrainas, ka gjasa të ketë probleme serioze për të mbrojtur hapësirën ajrore të vendit nga raketat e NATO-s./ REL

The post A po prodhon Rusia më shumë armë se NATO? first appeared on JavaNews.al.

Ilirjana Kuçana, anëtare e Këshillit Kombëtar të Partisë Demokratike, e ftuar në studion e “Off the Record” me Andrea Dangllin deklaroi se partia ku ajo bën pjesë nuk e ka luksin “për të bërë pushime të gjata”.

“PD-ja nuk e ka luksin për të bërë pushime të gjata. Sepse ajo çfarë i ka ndodhur jo vetëm Partisë Demokratike, por edhe Shqipërisë, unë mendoj që duhet menduar për disa skenare dhe do duhet të jetë në terren për të gjetur zgjidhjen jo vetëm për 500 mijë demokratë që e duan zgjidhjen, por edhe për ata që kanë votuar Edi Ramën, por sot ai po i prish shtëpitë”, tha Kuçana.

“Që ka pasur farsë zgjedhore, kjo nuk diskutohet. Denoncimet e mia në SPAK kanë qenë të përjavshme para zgjedhjeve, por denoncimet që kam bërë për bandat kriminale më kthyen në kandidaten më të sulmuar. Por, kam zgjedhur të merrem me politikë sepse e shikoj si mision ndaj qytetarëve që më kanë besuar dhe më kanë votuar.

Qytetarët më pyesin: duhet të ikim edhe ne nga Shqipëria, apo opozita do të na qëndrojë krah përballë një kryeministri që nuk dihet se çfarë do të bëjë nesër”, theksoi më tej Kuçana.

The post “PD-ja nuk e ka luksin për të bërë pushime të gjata”, anëtarja e Këshillit Kombëtar: Duhet të jemi në terren first appeared on JavaNews.al.

Panik dhe tmerr në një supermarket Walmart në Traverse City, Michigan, ku një burrë ka plagosur me thikë 11 persona, të cilët ishin klientë të rastësishëm.

Siç shkruajnë mediat e huaja, autori është arrestuar nga policia, falë ndërhyrjes së disa qytetarëve që arritën ta neutralizonin para se të përshkallëzonte masakrën. Sherifi i qarkut, Michael D. Shea, tha se “qytetarët i dhanë fund këtij sulmi brutal”.

Të plagosurit janë dërguar në Munson Medical Center dhe raportohen jashtë rrezikut për jetën. Ndërkohë, motivi i sulmit mbetet ende i paqartë.

Autoritetet thonë se nuk ka shenja se viktimat ishin të përzgjedhura, bëhet fjalë për një sulm të befasishëm e pa “objektiv” të qartë.

Dëshmitarët flasin për skena tronditëse. “Gjaku rridhte kudo dhe njerëzit ulërinin,” tha një prej klienteve.

Autori u pa duke vrapuar nëpër korridore dhe duke goditur njerëzit njëri pas tjetrit, derisa u ndalua me forcë nga qytetarët.

Hetimet për rastin vijojnë, ndërsa policia ka kërkuar që banorët të shmangin zonën.

The post SHBA/ Masakër në supermarket, sulmohen me thikë 11 persona first appeared on JavaNews.al.

Artikull i La Repubblica, përshtatur në shqip

Një kthesë e pritshme në diplomacinë ndërkombëtare është përgatitur nga Emmanuel Macron së bashku me Arabinë Saudite, që synojnë të nxisin një marrëveshje të rëndësishme në Lindjen e Mesme.

Në këtë axhendë strategjike me Riadin, Macron kërkon të krijojë një lëvizje të ndërsjellë: njohjen e shtetit të Palestinës nga disa vende perëndimore në këmbim të njohjes së Izraelit nga disa liderë të botës arabe.

Që prej muajsh, Parisi dhe Riad po punojnë për organizimin e një konference ndërkombëtare, që do të gjejë zgjidhjen për konfliktin në rajon.

Në fillim, samiti ishte parashikuar për qershor, por u shty për shkak të sulmeve izraelite ndaj Iranit dhe mospërgatitjes së kushteve të duhura. Megjithatë, përkeqësimi i krizës humanitare në Gaza dhe bllokimi i përpjekjeve amerikane për ndërmjetësim kanë shtyrë Macron të ndërmarrë këtë hap të rëndësishëm.

Aktualisht, Macron është i vetmi lider i G7-ës që mbështet hapur këtë iniciativë, por shpreson të përfshijë Britaninë e Madhe dhe Kanadanë para Asamblesë së Përgjithshme të OKB-së në shtator, ku do të njoftojë njohjen formale të Palestinës. Në të njëjtën kohë, do të zhvillohet edhe konferenca e përbashkët Francë-Arabi Saudite.

Në maj, Britania, Kanadaja dhe Franca kanë dhënë një sinjal të fortë me një deklaratë të përbashkët, duke dënuar “veprimet skandaloze” të qeverisë Netanyahu në Gaza. Megjithatë, iniciativa është ngadalësuar për shkak të kundërshtimit amerikan.

Kryeministri britanik Keir Starmer po përballet me presion nga baza e tij për të ndjekur shembullin francez, ndërsa Kanadaja ka theksuar mbështetjen për “zgjidhjen me dy shtete”, duke lënë të hapur mundësinë e një njoftimi të rëndësishëm në OKB.

Këtë javë, ministrat e jashtëm të Britanisë, Kanadasë dhe Francës do të takohen në New York për të konsoliduar objektivat e planit francez-saudit. Sipas Pallatit Elysee, rreth 15 vende janë gati të mbështesin një “hartë për paqen”, që sipas Macron synon të izolojë Hamasin, të sigurojë lirimin e pengjeve, të propozojë një mision ndërkombëtar stabilizues në Gaza dhe të vendosë themelet e një shteti palestinez me qeverisje të besueshme dhe gjithëpërfshirëse.

Një dokument i përbashkët pritet të publikohet së shpejti, i cili do të mbështetet edhe në një letër të presidentit palestinez Mahmoud Abbas, ku ai premton zgjedhje të reja dhe reforma të rëndësishme.

Për të mos përsëritur skenarin e vitit 2006, kur Hamas mori pushtetin përmes votës, Parisi kërkon të vendosë një kuadër ligjor që përjashton çdo forcë politike që nuk njeh Izraelin ose nuk refuzon dhunën.

Në planin francez-saudit përfshihet edhe mundësia që disa vende të Gjirit, përfshirë Arabinë Saudite, Kuvajt dhe Katarin, të njohin Izraelin si pjesë e një marrëveshjeje të madhe diplomatike. Megjithatë, kryeministri izraelit Benjamin Netanyahu, i izoluar në arenën ndërkombëtare, vazhdon të refuzojë me forcë këtë alternativë, duke kushtëzuar njohjen arabe me krijimin e një shteti palestinez, të cilin ai e kundërshton kategorikisht.

Një diplomat i lartë francez që merr pjesë në këto bisedime tregon se kjo iniciativë vjen si përgjigje ndaj tri presioneve kryesore: tmerri i dokumentuar në Gaza, presioni i opinionit publik dhe humbja e ndikimit të Perëndimit në botë, ku kritikohet standardi i dyfishtë mes konfliktit në Lindjen e Mesme dhe agresionit rus në Ukrainë.

Diplomatët francezë njoftojnë për humbje besueshmërie në vende si India, Brazili dhe Afrika e Jugut.

Macron mbështetet fuqishëm në marrëdhënien e tij me Mohammed bin Salman, liderin saudit që përpara 7 tetorit dukej gati të nënshkruante Marrëveshjet e Abrahamit, por tani është më i kujdesshëm për të mos prishur marrëdhëniet me aleatin amerikan.

“Le të jetë Franca ajo që del në krye, të marrë goditjet dhe kritikën, duke qëndruar në sfond,” thotë diplomati. Franca vazhdon të jetë një lojtar i respektuar në skenën e Lindjes së Mesme, por tashmë me rol dytësor…

The post Kthesa e papritur: Plani i Macron dhe Arabisë Saudite për Palestinën dhe Izraelin first appeared on JavaNews.al.

Partia Demokratike ka reaguar për situatën e zjarreve në vend, duke bërë përgjegjëse qeverinë që, sipas saj, ka dështuar në marrjen e masave.

Me një deklaratë për shtyp, PD tha se qytetarët duhet të ruhen, pasi me kryeministër Edi Ramën paratë shpenzohen për lukse dhe situata e zjarreve do të jetë e njëjtë këtë verë dhe tjetrën.

Deklarata e Partisë Demokratike:

“Nga Jugu në Veri, Shqipëria është pushtuar nga zjarret.

Ndërkohë që, u bëjmë thirrje banorëve, qytetarëve dhe turistëve të tregojnë kujdes të shtuar, të largohen sa më parë nga zonat e kërcënuara, dhe të ndihmojnë këdo në rrezik. Partia Demokratike shpreh indinjatën e thellë me reagimin minimalist dhe thuajse përqeshës të autoriteteve.

Jo vetëm ndërhyrjet bëhen me vonesë, por janë mungesa e alarmit dhe angazhimit që e bëjnë situatën  të duket edhe më kaotike, kërcënuese dhe dëshpëruese.

Zjarret, përmbytjet, fatkeqësitë natyrore përsëriten në Shqipëri, si në të gjithë botën, dhe kjo nuk është në dorë të qeverive, por përgatitjet, gatishmëria, vullneti, janë detyrë dhe në dorë të tyre.

Siç e kemi parë prej vitesh, qeveria dërgon ushtrinë dhe zjarrfikësit, të cilët u sulen zjarreve me shkurre, me lopata dhe batanije, si në një vend të Botës së Tretë, apo të sapodalë nga lufta dhe në mungesë të mjeteve bazike.

Një pamje tjetër shohim prej tri javësh në Theth, Tiranë dhe gjithandej nëpër Shqipëri.

Për të shembur bujtinat në Theth dhe marrë para shitësit të rigonit në Sarandë, qeveria dërgoi IMT, Tatimet, Policinë dhe Ushtrinë, me mjete të rënda, me arrogancë, të armatosur deri në dhëmbë, në luftë me qytetarët.

Për Edi Ramën, prioritet absolut është uzurpimi i pushtetit lokal, jo zjarret dhe dhjetëra problemet që kërcënojnë qytetarët dhe jetën e tyre.

Për Edi Ramën, prioritet është spektakli me satelitët “Albania 1” dhe “2”, apo dronët për të cilët, pasi i hedh në Facebook për t’u mburrur nuk ka kush as t’i lexojë dhe as kush t’i komandojë. Sepse, Edi Rama e ka bërë ushtrinë e një vendi të NATOs, një organizatë që shkon të fikë zjarret me shkurre dhe pagure.

Prandaj, përballja me zjarret dhe fatkeqësitë natyrore që kërcënojnë qytetarët janë të mekura.

Do të jetë kështu këtë verë dhe tjetrën, sepse Edi Rama nuk kujtohet dhe as kujdeset për infrastrukturën e shtetit, për fondet e emergjencave, për modernzimin e ekipeve të kërkim-shpëtimit. Paratë që i merr nga taksat i bën shpenzime luksi për vete dhe ministrat, udhëtime me charter, koncerte të shtrenjta apo kopësht 4 milion euro në oborrin e Kryeministrisë.

Edi Rama është me pushime, pasi bëri zhurmën me drejtorët, me heqjen e tendave dhe terrorizimin e Thethit, por zjarret nuk bëjnë pushim dhe pyjet, territori, bizneset, shtëpitë dhe jeta e qytetarëve është në rrezik.

Edi Rama nuk është zjarrfikës, por ai nuk mund të lejohet të jetë Kryeministri që hedh Shqipërinë në zjarr”.

The post Situata me zjarret, reagon PD: Vendi nën flakë! Me Ramën paratë harxhohen për luks first appeared on JavaNews.al.

Ndërsa vatrat e zjarrit vazhdojnë të përfshijnë Shqipërinë nga veriu në jug, kryeministri Edi Rama ka shprehur vlerësimin e tij për të gjitha strukturat që po luftojnë për të vënën nën kontroll flakët. Rama falënderoi forcat zjarrfikëse, Emergjencat Civile dhe Forcat e Armatosura, të cilat prej javësh ndodhen në terrene të vështira malore për të ndaluar përhapjen e zjarreve.

Vlerësim, kryeministri, shprehu edhe për kryepolicin e Delvinës, Agim Troci, i cili u lëndua gjatë përpjekjeve për të shuar flakët që dolën jashtë kontrollit në disa fshatra të zonës.

“Me falënderim e respekt për çdo efektiv të Forcave të Armatosura e të Policisë së Shtetit, po ashtu me një veçim plot admirim për shefin e policisë së Delvinës, Agim Troci, që shpëtoi jetë duke rrezikuar të tijën. Po ashtu për zjarrfikësit, forcat e Urgjencës Kombëtare dhe të Emergjencave Civile, të cilët janë në gatishmëri në këtë kohë të vështirë zjarresh në gjithë Europën Mesdhetare”, shkroi Rama.

Prej javësh, vendi po përballet me vatra të shumta zjarresh, ku në disa raste janë rrezikuar banesa dhe biznese. Pas evakuimit të tre fshatrave në Delvinë disa ditë më parë, një situatë e ngjashme është shënuar edhe në zonën e Borshit, ku flakët janë afruar shumë pranë banesave dhe objekteve hoteliere ku ndodhen pushues.

Për shkak të situatës kritike, janë bërë evakuime të 40 banorëve dhe pushuesve, ndërsa vijon ndërhyrja nga toka dhe ajri për të vënë flakët nën kontroll.

The post Zjarret përfshijnë Shqipërinë, Rama falënderon strukturat në terren: Të gjithë janë në gatishmëri first appeared on JavaNews.al.

Avokati i njohur Idajet Beqiri, i ftuar në “Ora e Fundit” në ABC News pohoi se shtetit i së drejtës në Shqipëri nuk po funksionon siç duhet pasi sipas tij po bën goditje selektive.

Ai u ndal te ngjarjet e “21 janarit”, ku katër qytetarë të pafajshëm, protestues në bulevard, u ekzekutuan para godinës së kryeministrisë.

Sipas Beqirit, kjo dosje është e kopsitur me prova dhe fakte, ndërsa shtoi se urdhëruesi i vrasjeve të qytetarëve në bulevard është ish-kryeministri, Sali Berisha.

“Shteti i së drejtës nuk po funksion siç duhet dhe organet e drejtësisë, duket sikur kanë kaluar në ekstrem, që është e rrezikshme për shtetin e së drejtës. Goditjet po i bëjnë selektive, po marrin dosjen “Partizani” dhe po lënë çështje të tjera, që janë të rënda dhe më pasoja dhe për korrupsion shtetëror me miliarda euro. Po përdoren metodat e frikësimit.  Berisha ka lumë akuzash. Ai ka afera të rënda korruptive.  SHBA dhe BE duhet të ndërhyjnë. 21 janari është dosja e kopsitura me prova. Nuk ka dosja më të hetuar bukur, me prova kaq të shumta që e implikojnë si urdhërues dhe vrasës Sali Berishën, por nga ana tjetër është një dosje nga më të pastra”, tha ai.

Ai foli dhe për lidhjet e Sali Berishës me Damir Fazlliç, ndërsa shtoi se kjo dosje fakton rrethanat se si agjentura serbe arriti të korruptonte ish-kryeministrin e Shqipërisë dhe personat e tjerë të lidhur me familjen e Sali Berishës.

“Dosja e Fazlliç, ajo mund të quhet dosja e pastër serbe në Shqipëri, pra se si Serbia me agjenturën saj korruptoi jo vetëm kryeministrin e vendit, por edhe persona të tjerë të lidhur me familjen e Berishës, dhe i përdori ata në disa plane: si grup i strukturuar kriminal për të ndërtuar dosjet ndaj ish-udhëheqësve të UÇK dhe ashtu i bën provat siç i donin serbët.  Sali Berishën e pret burgu i përjetshëm.”, pohoi ai.

The post “Berishën e pret burgu i përjetshëm”, avokati: “21 janari” është kopsitur, është faktuar se… first appeared on JavaNews.al.

Operacioni kundër zjarreve në jug të vendit është intensifikuar në orët e para të mëngjesit të kësaj të diele, 27 korrik.

Ministri Pirro Vengu bën me dije se në zonat e Borshit, Piqerasit dhe Sasajt ka rinisur aksioni nga ajri me dy helikopterë të Forcës Ajrore, të cilët janë angazhuar për neutralizimin e flakëve që kanë kërcënuar banesat dhe bizneset për shkak të erës së fortë.

Gjatë natës, zjarrfikësit dhe Forcat e Armatosura të dislokuara në Borsh siguruan perimetra sigurie përreth zonave të banuara, ndërsa Policia e Shtetit dhe punonjësit e emergjencave civile ndihmuan banorët dhe pushuesit të largohen në kohë nga rreziku.

Sipas njoftimit zyrtar, 40 persona janë evakuuar drejt zonave të sigurta.

Operacioni vijon edhe në këto momente, me ndërhyrje të koordinuar nga toka dhe ajri, për të vënë nën kontroll flakët që përhapen me shpejtësi në një terren të vështirë.

The post Helikopterët mbi flakë, 40 të evakuuar. Zjarret rrezikojnë banesat në Borsh, Piqeras dhe Sasaj first appeared on JavaNews.al.

Nga Mero Baze

Ka një përpjekje për të hapur një debat rreth rihapjes së PD, rikthimit të garës për lider të ri apo pranim të mendimit ndryshe.
I gjithë debati zhvillohet mbi premisa tërësisht të gabuara, madje të shpikura.
Po ta shikosh debatin, duket sikur PD është një parti normale, që ka një ofertë serioze në treg dhe tani problemi është si të zgjedhim liderin, si të zgjedhim personazhet dhe si të rrisim konkurrencën.
Këto janë rrethana të shpikura dhe nëse debatin e mbështet mbi rrethana të shpikura, atëherë një problem që është dramatik e bën qesharak.

E vërteta e PD nuk është që nuk do të hapet, që nuk do lider të ri apo që nuk është produktive. E vërteta e PD është që nuk ka më interes për të. Dhe kjo është një dramë e madhe.

Sali Berisha e ka bërë të parëndësishme PD-në, pasi e ka bërë të palëkundshme, të pamotivueshme si parti dhe mbi të gjitha të papërspektivë.
Duke deklaruar se është i dërguar i zotit për të mos ikur kurrë nga PD dhe duke parë që ai nuk është i interesuar të fitojë zgjedhjet por të ketë një aktivizëm për hallet e veta, PD nuk është më një ofertë për shoqërinë shqiptare. Ai është një projekt familjar i destinuar të zvogëlohet dhe të degradojë në një çetë bajraktarësh.

Këto thirrjet që nga Alimehmeti e deri tek Nard Ndoka që Berisha të jetë lider dhe të shikojmë problemet e tjera e bëjnë qesharak këtë debat.

Fakti që PD është e parëndësishme, e palëkundshme dhe mbi të gjitha e papërspektivë lidhet pikërisht me atë që Sali Berisha është në krye të saj dhe as ka ndërmend të bëjë garë, as ka ndërmend të njohë humbje, as ka ndërmend të ripërtërijë partinë për fitore.

Kur flitet sikur PD ka nevojë të hapet, sikur PD ka nevojë të ketë garë apo sikur PD ka nevojë të ketë debat, duket sikur duan t’i gjejnë faraonit të PD ushtarë të rinj për t’i murosur bashkë me të varr, dhe jo sikur duan të gjejnë lider të ri, e të bëjnë parti të re.

Oferta për t’iu bashkuar këtij debati apo këtij realiteti të shpikur në PD është ofertë e skaduar qysh në fillim.
PD e mbetur, është duke u bërë thirrje mbeturinave të saj të mobilizohen dhe një herë më so e shpëtojnë Berishën. Berisha nuk ka nevojë për ta, lodhen kot. Humbja, që është gjëja më e rëndë për një lider, është një problem i zgjidhur për Berishën: për të fajësuar kundërshtarin. Ripërtëritja e partisë që është një detyrim, po ashtu është një problem i zgjidhur se e ka caktuar veten të dërguar të zotit.

Pastaj këto zërat qesharak që Berisha duhet të rithemelojë PD-në, pasi ajo katër vjet më parë ishte rikthim, janë akoma më qesharakë. Berisha nuk është rikthyer kurrë në PD. Berisha aty ka qenë 35 vjet në krye të saj, herë me të deleguar e herë vetë. Sa herë të deleguarit i dilnin nga reshti, i zbonte. Selamin e zboi me dhunë, për një muaj se ishte në pushtet. Lulin e zboi për disa muaj me hunj se nuk ishte në pushtet. Por nuk është rikthyer, se aty ka qenë. Një lider rikthehet kur mund një kundërshtar që e ka dëbuar nga PD.

Berisha vetëm ka dëbuar dhe s’ka zbuar askush nga PD që të rikthehet. Thjesht tani ka vendosur të mos delegojë më askënd derisa të vdesë. Atëherë prisni, se është çështje biologjike, nuk është çështje politike. Kur ta zgjidhë Zoti, fillojeni këtë debatin. Tani është debat si t’ia bëni pleqërisë të këndshme Berishës duke ia ripërtërirë ushtarët. Lëreni, se s’ka moshë të mësohet me të rinj. Mirë i ka ata rrotull. Ja kanë marrë dorën dhe uturakut dhe kateterit.

The post Mbi PD e mbetur dhe mbeturinat e saj first appeared on JavaNews.al.

Skuqet nga flakët maja e malit Shashicë. Pavarësisht se në majën e malit sipër Vlorës pati ndërhyrje nga toka dhe ajri, flakët ende nuk janë vendosur nën kontroll..

Jo vetëm që nuk janë vendosur nën kontroll, por mesa duket vatra e zjarrit është përhapur edhe më tej.

Flakët po i afrohen më tepër shtëpive të banuara të Kaninës, duke e bërë të rrezikshme situatën.

Ndërkohë, territori i djegur prej tyre është shtuar edhe më tepër. Ndërhyrja nga ajri është ndalur për shkak të errësirës. Flakët në terren po luftohen me forcat zjarrfikëse të Vlorës, të cilët pavarësisht punës së palodhur nuk po ia dalin dot t’i vendosin nën kontroll.

Ndërkohë, shtëllungat e tymit kanë mbuluar në total bregdetin e Vlorës, duke u dukur nga kilometra larg.

The post Skuqet nga flakët maja e malit Shashicë, zjarri po i afrohet shtëpive të banuara first appeared on JavaNews.al.