Një aksident i rëndë ka ndodhur sot në aksin rrugor Sarandë–Delvinë, në vendin e quajtur “Pularia”, ku për pasojë kanë humbur jetën dy vajza të reja nga fshati Kopaçezë, njësia administrative Delvinë. Ngjarja e rëndë ka tronditur zonën, ndërsa viktimat janë identifikuar nga autoritetet, por emrat nuk janë bërë ende publikë.

Burime nga vendngjarja bëjnë me dije se një person tjetër ka mbetur i plagosur rëndë dhe është transportuar me urgjencë në spitalin e Sarandës, ku ndodhet në kujdesin e mjekëve.

Në vendin e aksidentit kanë mbërritur forca të shumta policie, ambulanca dhe zjarrfikësja, të cilat kanë ndërhyrë për nxjerrjen e trupave dhe për ndihmën e të plagosurit.

Rrethanat e ngjarjes mbeten ende të paqarta. Paraprakisht dyshohet se mjeti ka dalë nga rruga për shkaqe që janë ende në hetim.

The post Aksident tragjik në Sarandë–Delvinë, humbin jetën dy vajza, një i plagosur rëndë first appeared on JavaNews.al.

Një zjarr i fuqishëm ka përfshirë pasditen e sotme një sipërfaqe me shkurre në fshatin Zharrëz të Fierit, duke vënë në rrezik serioz një nga puset e naftës që ndodhen në këtë zonë, shkruan A2 CNN. Flakët, të përhapura me shpejtësi nga era e fortë, kanë shkaktuar panik te banorët, pasi afërsia me pusin e naftës paraqiste rrezik të madh.

Menjëherë pas sinjalizimit, dy mjete zjarrfikëse të Albpetrolit kanë ndërhyrë duke arritur të izolojnë vatrën e zjarrit dhe të parandalojnë përhapjen e tij në territorin përreth. Për shkak të natyrës së rrezikshme të zonës, operacioni ka qenë mjaft delikat.

Ndërkohë, në vendngjarje kanë mbërritur edhe forcat e policisë, të cilat po kryejnë hetime për të përcaktuar shkaqet e zjarrit. Ende nuk ka të dhëna nëse bëhet fjalë për një incident aksidental apo për zjarrvënie të qëllimshme. Fatmirësisht, nuk raportohet për të lënduar apo dëme materiale të tjera përveç sipërfaqes së djegur me shkurre.

The post Zjarr i madh në Zharrëz të Fierit, rrezikohen puset e naftës first appeared on JavaNews.al.

Zelenski falënderon Shqipërinë për mbështetjen e vazhdueshme në Ditën e Pavarësisë së Ukrainës

Presidenti ukrainas, Volodymyr Zelensky, shpreh mirënjohjen e tij ndaj Shqipërisë dhe Presidentit Bajram Begaj, për urimet e ngrohta në 34-vjetorin e pavarësisë së Ukrainës.

“Faleminderit sinqerisht Presidentit Bajram Begaj, për fjalët e tij të ngrohta në këtë ditë të veçantë,” shkruan Zelensky në rrjetin social “X”.

Ai shton se Shqipëria mbetet një partner i besueshëm i Ukrainës, si në skenën ndërkombëtare, ashtu edhe në marrëdhëniet bilaterale, dhe shprehu shpresën për thellimin e mëtejshëm të bashkëpunimit mes dy vendeve.

Ky mesazh vjen në një moment kur miqësia dhe mbështetja ndërkombëtare janë më të rëndësishme se kurrë për Ukrainën, ndërsa vendi vazhdon të përballet me agresionin rus.

The post Zelensky falënderon Shqipërinë për mbështetjen: Partner i besueshëm! first appeared on JavaNews.al.

Largimi i Genc Deromemajt nga radhët e Partisë Demokratike dhe emërimi i tij në krye të Kadastrës së Vlorës bëri jo pak bujë.

Ish-kreu u degës së PD-së në Vlorë dhe pjesë e subjektit opozitar që prej vitit 2002, braktisi partinë e tij për postin drejtues në Kadastër, që iu besua pak javë më parë.

Por, një hulumtim i Top Channel zbulon se rrjedhjet nga Partia Demokratike e Vlorës janë të shumta. Figura të larta të PD-së, me kontribut të gjatë në parti, tashmë kanë ikur.

Zamira Sinaj, anëtare e Kryesisë së Partisë Demokratike dhe ish-drejtoreshë e Spitalit Psikiatrik të Vlorës gjatë kohës kur ky subjekt ishte në pushtet, tashmë është bërë pjesë e Partisë Socialiste, duke u zgjedhur edhe deputete në parlamentin e ardhshëm. Për më tepër Sinaj më 11 Maj ishte në listën e sigurt të PS-së.

Edhe shumë emra të tjerë, që kanë qenë anëtarë të Partisë Demokratike, sot janë bërë pjesë e administratës publike, të drejtuar nga socialistët. Nënkryetarja e Bashkisë së Vlorës, Klea Lalo, vjen nga radhët e demokratëve, ashtu si edhe tre këshilltarët e kryebashkiakut socialist, Ermal Dredha: Sokol Kuçi, Erdet Mandi dhe Saimir Haxhiu. Po ashtu, Spitali i Vlorës drejtohet nga një ish-demokrate, Julinda Çuni, ndërsa Tatimet nga Bled Taushani, dikur pjesë e strukturave të PD-së.

Për kreun e Partisë Demokratike në Vlorë, Hysni Sharra, emërimi i demokratëve në poste drejtuese ka qenë zgjedhje e vetë atyre.

Rrjedhjet nga Partia Demokratike u komentuan dhe nga ish-kreu i degës së Vlorës, kandidat në listat e mbyllura më 11 Maj, por që nuk mundi të fitonte mandat, Atird Hoxha, i cili i sheh ikjet si plan të Ramës për të dobësuar PD-në.

Vlora njihet si një bastion i majtë, që në çdo cikël zgjedhor ja ka besuar qeverisjen Partisë Socialiste.

Demokratët që morën poste drejtuese në Vlorë

Genc Deromemaj – Drejtor i Kadastrës

Zamira Sinaj – Deputete e PS

Klea Lalo – Nënkryetare e Bashkisë Vlorë

Kozma Mali – Drejtor i Financave në Bashki

Sokol Kuçi – Këshilltar i Kryetarit

Erdet Mandi – Këshilltar i Kryetarit

Saimir Haxhiu – Këshilltar i Kryetarit

Bled Taushani – Drejtor i Tatimeve

Julinda Çuni – Drejtoreshë e Spitalit

The post Nga opozita në pushtet! Demokratët e Vlorës që iu bashkuan PS-së! Deromemaj hapi rrugën e “eksodit blu” first appeared on JavaNews.al.

Një sherr ka ndodhur në Itali, mes anëtarëve të dy familjeve me origjinë shqiptare, të cilët janë përleshur fizikisht dhe si pasojë gjashtë burra janë ndaluar nga policia.

Sipas mediave italiane, përleshja dyshohet se ka ndodhur në qendër të Cassano delle Murge, në provincën e Barit, pas një konflikti për motive të dobëta.

Pesë nga të dyshuarit, të moshës midis 27 dhe 66 vjeç, kanë përfunduar në spital.

Tre prej tyre pësuan lëndime më të rënda, ndërsa dy të tjerë më të lehta. Gjykata ka caktuar masën e sigurisë “arrest në shtëpi” për të gjashtë personat e përfshirë në konflikt.

The post Sherr mes dy familjeve shqiptare në Itali, 5 të plagosur, arrestohen 6 burra first appeared on JavaNews.al.

Valës së fundit të të nxehtit në Spanjë i ka ardhur fundi, por pasojat që ka lënë pas janë të zymta.

Midis 3 dhe 18 gushtit, temperaturat ekstreme dyshohet se kanë shkaktuar 1,149 viktima, sipas Instituto de Salud Carlos III. Shifrat vijnë nga një sistem monitorimi që gjurmon “vdekjet shtesë” duke i krahasuar numrat e përditshëm me ato që normalisht pritet të ndodhin. Në korrik, sistemi kishte regjistruar 1,060 vdekje të tjera të lidhura me të nxehtin, 50% më shumë se një vit më parë.

Këto shifra nxjerrin në pah një të vërtetë në rritje: vera spanjolle nuk është më thjesht e padurueshme, por vdekjeprurëse.

Edhe pse temperaturat kanë rënë, zjarret e nisura gjatë valës së të nxehtit vazhdojnë të përhapen. Galicia, Castilla y León dhe Extremadura mbeten të goditura rëndë, me vatra të cilat vazhdojnë të jenë jashtë kontrollit.

Vetëm në dy javë janë djegur mbi 100 mijë hektarë tokë, përfshirë 30 mijë hektarë në një ditë të vetme. Këtë vit, Spanja ka humbur 373 mijë hektarë tokë nga flakët. Kjo e bën 2025-ën sezonin më të zi të zjarreve në historinë e vendit, duke kaluar shkatërrimin e vitit 2022 dhe duke iu afruar rekordit absolut të Portugalisë në 2017-ën.

The post Dyshohet për 1100 viktima në Spanjë, sezoni më i “zi” prej zjarreve në histori first appeared on JavaNews.al.

Telenovela verore për një karrige në Kuvend që dhuruan Adriatik Lapaj dhe Endri Shabani, të hënën e 25 gushtit do të prodhojë një seri të re me protagonist Kolegjin Zgjedhor që pritet ti japë fund gjithë sagës së ankimimeve për procesin e 11 majit.

Në gjykatën zgjedhore Adriatik Lapaj do kërkojë që mandati i vetëm të transferohet nga e para e listës së mbyllur te i pari në listën e hapur, të cilën e udhëheq vete, duke shpresuar në rrëzimin e vendimmarrjes së Komisionit te Ankimimeve dhe Sanksioneve, por një lëvizje e tillë duket mision i pamundur.

Pesë anëtarët e KAS në vendimin e tyre te 30 korrikut për t’ia kaluar mandatin Ana Dajkos, të parës së listës së mbyllur kanë analizuar edhe elementin e kuotës gjinore. Në argumentin e kësaj trupe edhe nëse bëhet transferimi i mandatit, në të gjitha rastet duhet të kalojë në dorën e një zonje, pasi Kodi Elektoral përcakton qarte se një grua nuk mund të zëvendësohet me një burrë, raporton Top Channel.

“Nëse kandidatja zgjedh të mos bëhet pjesë e Kuvendit, atëherë është Kuvendi që ka kompetencën të vejë në lëvizje KQZ-në, duke i kërkuar emrin e kandidatit zëvendësues, i cili, në zbatim të pikës 2, të nenit 164, të Kodit Zgjedhor duhet të vijë gjithashtu nga lista e mbyllur e subjektit dhe duhet t’i përkasë gjithashtu gjinisë së nën-përfaqësuar”, thuhet ne vendimin e KAS të zbardhur nga gazetarja e Top Channel Elda Menga.

Çështja e kuotës gjinore u reflektua në Kodin Zgjedhor si një mekanizëm që burrat të mos u zënë vendin grave, një element i ëndësishëm, të cilën Adriatik Lapaj duket se nuk e kishte menduar mirë. Në rast dorëheqjeje të Ana Dajkos, e para në listë, radha i shkon të dytës, Livia Stavri, partneres së Endri Shabanit, qëndrimet e të cilit ishin shkëndija që i dhanë jetë telenovelës verore.

Cilido që të jete vendimi i Kolegjit për mandatin e vetëm të “Shqipëria Bëhet”, nuk prek rezultatin e zgjedhjeve, por vetëm i jep dritën jeshile certifikimit të rezultatit në mënyrë që, edhe de jure 140 deputetët e dalë nga zgjedhjet të kenë mundësi të betohen në seancën e parë të legjislaturës së re parlamentare që nis më 10 shtator.

The post Merr fund ëndrra e Lapajt për t’u bërë deputet! Burime: Në çdo rast, mandatin e merr një zonjë! first appeared on JavaNews.al.

Në Kavajë “Sacro e Profano” është një nga agroturizmat më të rinj në zonë, një investim i kuzhinierit Xhovani Ziu, i cili pas shumë vitesh në Itali vendosi të rikthehet për të investuar në vendin e tij.

Ministrja e Bujqësisë dhe Zhivllimit Rural, Anila Denaj ndau në rrjetet sociale një video nga agroturizmi “Sacro e Profano”.

Sipas ministres “kjo sipërmarrje agroturistike ndërthur traditën shqiptare me finesën italiane, duke ofruar një ambient të kuruar në çdo detaj dhe një kuzhinë të pasur me produkte të freskëta që vijnë drejtpërdrejt nga fermerët lokalë”.

Denaj nënvizoi se përmes bashkëpunimit me prodhuesit e zonës, “Sacro e Profano” bëhet pjesë e zinxhirit ushqimor Made in Albania, duke sjellë në tryezë shije autentike dhe duke i dhënë turizmit rural një eksperiencë gastronomike të pasuruar me mikpritje dhe pamje të mahnitshme nga të katër anët.

“Agroturizmin e kam jetuar në eksperiencën time në Itali. Ne këtu kemi përveç restorantit dhe akomodimin në zonë. Klientela jonë janë më shumë kryesisht të huaj, më shumë nordikët se turistë klasikë. Kjo na jep garanci që në të ardhmen mund të kemi një rritje të punës”, u shpreh Ziu.

Ministrja rikujtoi se “përmes Skemës Kombëtare të Investimeve, me 50% grant dhe mbështetjes nga Kredia e Butë të kombinuar me Garancinë Sovrane, çdo fermer mund të përfitojë financim me normë interesi vetëm 2% dhe mbulim kolateral deri në 70%, ndërsa për zonat malore mbështetja është edhe më e madhe falë Paketës së Maleve”./Marrë nga ATSH

The post Skema Kombëtare/ Denaj: Fermerët mund të përfitojnë financim me normë interesi vetëm 2% first appeared on JavaNews.al.

Kryetari i Parlamentit të Ukrainës, Stefanchuk, në një postim në rrjetet sociale njofton se sot, në Ditën e Pavarësisë së Ukrainës, Presidenti Zelenksi ka dekoruar 14 kryeparlamentarë, deputetë, senatorë e kongresmenë të ShBA dhe vendeve europiane, mes tyre Kryetaren e Kuvendit të Shqipërisë, Elisa Spiropali, për mbështetjen ndaj Ukrainës dhe bashkëpunimin me Parlamentin e këtij vendi.

Kryeparlamentares Spiropali iu akordua Çmimi i Lartë Shtetëror “Urdhëri i Princeshës Ollga, i Klasit të Parë”.

“Faleminderit secilit prej jush, miqtë tanë të dashur, anëtarë të familjes së madhe parlamentare, për çmimet e merituara që u janë dhënë nga Presidenti Zelenski, në emër të popullit ukrainas!”, shkruan kryeparlamentari ukrainas Ruslan Stefanchuk.

The post Elisa Spiropali, mes 14 personazheve të dekoruar nga Zelenski në Ditën e Pavarësisë së Ukrainës first appeared on JavaNews.al.

Pasditen e së dielës pranë shkëmbinjve të Gjipesë është shpëtuar një turist francez që rrezikonte të mbytej. Kanë qenë pushuesit që kanë lajmëruar policinë kufitare e cila e nisur nga Dhërmiu ka arritur të shpëtojë 38-vjeçarin nga Franca.

Turisti i identifikuar si Hassabou Elias, me shtetësi franceze, kishte pësuar probleme me shpinën dhe nuk mund të lëvizte pjesën e poshtme të trupit, duke mos qenë në gjendje të notonte.

Ai u shpëtua në kohë, u transportua drejt bregut dhe ndodhet jashtë rrezikut për jetën, në gjendje të mirë shëndetësore.

The post Mbeti i bllokuar në mes të detit, shpëtohet turist francez pranë Gjipesë first appeared on JavaNews.al.

Opinion nga Timothy Snyder, Financial Times

Vladimir Putin, arkitekti i luftës më të përgjakshme të shekullit XXI, nuk e sheh pushtimin e Ukrainës thjesht si politikë apo strategji. Ai e justifikon atë përmes një miti të lashtë, “Përralla e Viteve të Shkuara”, një kronikë mesjetare ku kryeplaku danez Rørek (i njohur si Rurik) paraqitet si themelues i një tradite të shenjtë që, sipas Putinit, legjitimon pretendimet e Rusisë mbi Kievin.

Por e vërteta historike është tjetër: Rørek nuk ka shkelur kurrë në Kiev, e aq më pak të ketë themeluar ndonjë shtet rus. Këto janë mashtrime mesjetare që shërbyen për të forcuar pushtetin e princave të asaj kohe, dhe që sot Putini i përdor për të justifikuar një luftë të përgjakshme.

Një mit që udhëton nga murgjit te Kremlini

Në vitin 862, sipas kronikës së murgjve të Kievit, sllavët i ftuan skandinavët që t’i sundonin. Historianët janë të qartë: ky ishte një trillim i huazuar nga sagat nordike, ku pushtimet justifikoheshin si “ftesa”.

Në fakt, Rørek ka sunduar në brigjet e Baltikut, por kurrë nuk ka qenë në Kiev. Vetëm një shekull më vonë skandinavët filluan të vendoseshin aty. Megjithatë, murgjit i dhanë Rørek-ut një jetë biblike, e bënë hero, e bënë “babain” e një dinastie imagjinare dhe ia sollën “trashëgimtarin” fshehurazi në Kiev.

Kjo ishte thjesht politikë e mitizuar: një mënyrë për të rritur prestigjin e sundimtarëve të Kievit.

Shekuj më vonë, Moska, e krijuar shumë më vonë se ngjarjet e shekullit IX, e përvetësoi mitin e Rurik-ut për të ndërtuar dinastinë e saj. Në 1721, Pjetri i Madh e përdori për të themeluar “Perandorinë Ruse” dhe për ta lidhur atë me një origjinë të lashtë skandinave.

Sot, Putini bën të njëjtën gjë, por në një shkallë më të rrezikshme: ai përdor mitin për të thënë se Moskës i takon Kievi, dhe se ukrainasit nuk ekzistojnë si komb më vete.

Hamlet, Putini dhe politika e mashtrimit

Historia e Rørek-ut nuk ndalet te kronikat e Kievit. Në një tjetër vepër mesjetare, Gesta Danorum, ai paraqitet si një viking pagan, gjysh i Amleth, personazhi që më vonë do të frymëzonte Shekspirin për Hamletin.

Kështu, Rørek qëndron në prapaskenën e një prej tragjedive më të mëdha të artit botëror. Por ai nuk është themelues i Rusisë, sado që Putini ta paraqesë si të tillë. Ky manipulim i së shkuarës është pikërisht ajo që filozofja Hannah Arendt do ta quante totalitarizëm: kur një regjim përdor mite për të justifikuar pushtimin dhe gjakderdhjen reale.

Ukraina, historia dhe e ardhmja

Ndërsa Putini e “ngrin” të shkuarën për ta përdorur si armë, Ukraina po rilind në një tjetër drejtim. Më shumë se një shekull më parë, mendimtarë si Mykhailo Hrushevsky dhe Ivan Franko i dhanë kombit një histori sociale dhe kulturore, jo mite dinastike. Sot, në mes të luftës, Ukraina po përjeton një ringjallje me botime të reja, histori globale, dhe një dialog të hapur me kulturat tjera.

Kjo e dallon thellësisht nga Rusia e Putinit, e cila vazhdon të jetojë me mitin e “Rusisë së përjetshme dhe të pastër”.

Aleanca e dy cinikëve

Takimi i Putinit me Donald Trump në Alaskë javën e kaluar e vërtetoi këtë tragjedi. Putini foli për “kombin vëllazëror” ukrainas, duke e lidhur me mitin e Rurik-ut. Trump, nga ana tjetër, u përqendrua te pakënaqësia e tij për faktin se njerëzit kujtojnë ende ndihmën ruse në zgjedhjet e vitit 2016.

Trump e mohoi gjithçka si një “mashtrim”, ndërsa Putini vetëm buzëqeshi. Në këtë simbiozë, Ukraina mbeti e padukshme: askush nuk përmendi qindra mijëra të vrarë e të plagosur.

Kur arti bëhet armë

Nga Rurik te Hamlet, nga murgjit mesjetarë te diktatorët modernë, arti dhe miti janë përdorur për të justifikuar pushtetin. Por kur politika kthehet në teatër mitesh, ajo sjell tragjedi reale: qytete të bombarduara, fëmijë të rrëmbyer, popuj të zhdukur nga historia.

Putini mund të besojë se po bën “të vërtetë” një legjendë të shekullit IX. Por në shekullin XXI, pasojat e këtij mashtrimi janë shumë konkrete: gjak, shkatërrim dhe humbje.

The post Mitologjia si armë, pse Putini beson se Rusia ka “rrënjë të shenjta” në Ukrainë first appeared on JavaNews.al.

Ish-presidenti i Kosovës, Behgjet Pacolli, ka denoncuar këtë të diel një episod të shëmtuar të ndodhur në dëm të disa shtetasve të Kosovës, të cilët po përpiqeshin të futeshin në Ukrainë.

“Ka dhjetëra shtete që ende nuk e kanë njohur Kosovën, por pothuajse të gjitha u lejojnë qytetarëve tanë hyrjen me pasaportë kosovare. Sot, Ukraina ka kthyer shtetasit e Kosovës në pikën kufitare me Moldavinë, jo vetëm që i ka refuzuar, por i ka ofenduar dhe keqtrajtuar, madje duke i quajtur “terroristë”. Ky nuk është rasti i parë: para disa vitesh, e njëjta Ukrainë veproi në mënyrë skandaloze me ekipin tonë kombëtar të futbollit, të cilët u detyruan të udhëtonin në Gjeorgji për të zhvilluar ndeshjen”, shkruan Pacolli në një status në Facebook, përcjell A2 CN.

Pacolli kërkon reagim nga autoritetet shtetërore për këtë sjellje nga pala ukrainase. “Ne këtu në Kosovë vazhdojmë të tregojmë solidaritet dhe dhimbje për ta, ndërkohë që ata na poshtërojnë. A nuk është koha të rishqyrtojmë qëndrimet tona ndaj atyre që nuk na respektojnë as dinjitetin më minimal?”.

The post Denoncimi i Pacollit: Ukraina pengon hyrjen e shtetasve të Kosovës në territorin e saj, i quan “terroristë” first appeared on JavaNews.al.

Në një reagim publik për ndarjen nga jeta të analistit dhe gazetarit Artur Zheji, lideri i BDI-së, Ali Ahmeti, shprehu dhimbjen dhe vlerësimin e tij për figurën e Zhejit.

Përmes një postimi në rrjetet sociale, Ahmeti e cilësoi atë si një zë të guximshëm dhe të pavarur në hapësirën mediatike shqiptare. “Humbja e tij la një boshllëk të madh në gazetari dhe në jetën publike shqiptare”, shkruan ai, duke nënvizuar kontributin intelektual dhe qytetar të Zhejit në debatin publik shqiptar.

“Me pikëllim të thellë mora lajmin për ndarjen nga jeta të gazetarit dhe analistit të njohur Artur Zheji, në moshën 63-vjeçare.

Arturi ishte një zë i guximshëm dhe i pavarur në hapësirën mediatike shqiptare. Ndonëse ndonjëherë në debate dhe diskutime publike kemi ndarë mendime të ndryshme, mirëpo gjithmonë me respekt dhe vlerësim të ndërsjellë, gjë që përbën dëshmi e integritetit dhe kulturës së tij të lartë intelektuale.

Humbja e tij lë një boshllëk të madh në gazetari dhe në jetën publike shqiptare.

Ngushëllimet e mia më të sinqerta familjes, miqve dhe kolegëve të tij. U prehtë në paqe dhe i qoftë e lehtë toka shqiptare.”, shprehet ai.

The post Ali Ahmeti për ndarjen nga jeta të Artur Zhejit: Humbje e madhe për gazetarinë dhe jetën publike shqiptare first appeared on JavaNews.al.

Një nga ushtarakët më të dekoruar të ushtrisë ruse ka rezultuar të jetë pjesë e një mashtrimi të përmasave të mëdha. Hetuesit rusë kanë zbuluar se kolonel-lejtnant Konstantin Frolov, i njohur me nofkën “Xhelati” për aftësitë e tij si snajper, ka urdhëruar trupat e tij të qëllonin qëllimisht mbi të dhe mbi njëri-tjetrin për të përfituar kompensime financiare dhe medalje nderi, përcjell A2 CNN.

Sipas raportimit të gazetës Kommersant, Frolov dhe 35 ushtarë të Brigadës së 83-të Ajrore të Sulmit arritën të përfitonin rreth 2,5 milionë dollarë nga buxheti i Kremlinit, duke inskenuar plagosje gjatë luftës në Ukrainë.

Frolov, 39 vjeç, ishte kthyer në një figurë të njohur përmes mediave shtetërore, duke rrëfyer histori për akte heroike dhe plagosje të shumta në front. Në një video të Ministrisë së Mbrojtjes në vitin 2024, ai deklaronte: “Që fëmijë, detyra dhe nderi nuk kanë qenë kurrë fjalë boshe për mua. Unë gjithmonë kam dashur të jem ushtarak, dhe u bëra një i tillë”.

Madje, ai kishte pretenduar se kishte shpëtuar dhe birësuar një vajzë të plagosur nga bombardimet ukrainase, një histori që hetimet e fundit e cilësuan plotësisht të pavërtetë.

Raportimet e rreme për plagosjet u përdorën si bazë për t’i akorduar Frolovit disa medalje për trimëri dhe guxim. Por pas një denoncimi në qershor të vitit të kaluar, autoritetet nisën një hetim të gjerë që zbardhi mashtrimin, shkruan A2 CNN.

Gjatë hetimeve, Frolov pranoi se kishte kërkuar nga ushtarët e tij të qëllonin mbi të, duke shmangur organet jetike, në mënyrë që të dukej se ishte plagosur në beteja reale. Ai madje denoncoi bashkëpunëtorët e tij për të përfituar një marrëveshje me prokurorinë.

Kremlini refuzoi kërkesën e tij për t’u rikthyer në front, ndërsa Frolov tani përballet me akuza për mashtrim në shkallë të gjerë, ryshfet, si dhe trafikim të paligjshëm armësh dhe pajisjesh shpërthyese.

The post Skandal në ushtrinë ruse! “Xhelati” i Putinit del mashtrues, plagoste veten për para dhe medalje first appeared on JavaNews.al.

Gjatë një interviste për Meet the Press, zëvendëspresidenti amerikan JD Vance mbrojti qasjen e Presidentit Donald Trump për përfundimin e luftës në Ukrainë përmes negociatave dhe kompromiseve, duke u përpjekur të largonte fokusin nga sanksionet dhe kërkesat për armëpushim që Kreu i Shtëpisë së Bardhë kishte propozuar më parë ndaj Rusisë.

Vance përdori shembuj nga historia, duke përmendur Luftën e Dytë Botërore, për të argumentuar se diplomacia është e domosdoshme për të përfunduar konfliktet e mëdha.

Megjithatë, ai gaboi kur tha se “Lufta e Dytë Botërore përfundoi përmes negociatave”.

“Nëse kthehemi te Lufta e Dytë Botërore, nëse kthehemi te Lufta e Parë Botërore, nëse kthehemi tek çdo konflikt i madh në historinë e njerëzimit, të gjithë përfundojnë me një lloj negociate,” tha Vance.

Reagimet në rrjetet sociale nuk vonuan.

Një komentues shkroi: “Vance thotë se Lufta e Dytë Botërore përfundoi me negociata, dikush t’i tregojë për Hiroshimën”. Një tjetër tha se“Lufta e Dytë Botërore përfundoi me gjithçka tjetër, por jo negociata.”

Lufta e Dytë Botërore nuk përfundoi me negociata, por u mbyll me dorëzim të pakushtëzuar të Gjermanisë më 7 maj 1945 dhe të Japonisë më 2 shtator 1945.

Sa i përket Ukrainës, Vance theksoi se çdo vendim mbi territoret e humbura nga Rusia duhet të vendoset nga vetë ukrainasit. “Së pari, ukrainasit do të vendosin vetë ku të vendosen kufijtë në vendin e tyre,” tha ai. Presidenti Volodymyr Zelensky ka bërë të qartë se nuk ka asnjë dëshirë të pranojë humbjen e territorit të pushtuar në mënyrë të paligjshme.

Qasjen e propozuar nga Trump, mbështetur nga Vance, disa kritikë e shohin të kundërt me realitetin historik dhe situatën aktuale të konfliktit në Ukrainë, ku Rusia vazhdon të kontrollojë pjesë të mëdha të territorit ukrainas që nga fillimi i pushtimit në 2022.

The post JD Vance bën gafën historike teksa flet për Ukrainë: Lufta e Dytë Botërore mbaroi sepse… first appeared on JavaNews.al.

Nga Ardit Rada

Fundi i gushtit pritet të sjellë edhe emrat e ministrave të rinj të mazhorancës socialiste, një ngjarje kjo jo pa interes kur në Shqipëri çdo afrim apo largim në qeveri pasohet me komente të gjata nga kafenetë tek panelet telvizive. Por me fitoren e mandatit të katërt, Edi Ramës duket se i ka lindur ‘detyra’ që qeverisjen e ardhshme  të mos e ndertojë më mbi themelet e nostalgjisë partiake me “të fortët” e bazës. Shqipëria është në prag të një kapitulli historik: udhëtimit drejt anëtarësimit të plotë në Bashkimin Europian. Kjo sfidë, më e madhe se çdo tjetër në tri dekadat e fundit, kërkon një kabinet ndryshe nga ç’jemi mësuar – një qeveri teknokrate. Kjo edhe për faktin se anëtarësimi në BE është kryefjala e këtij mandati të Ramës dhe PS-së.

Arsyeja kryesore e nevojës së një qeverie të tillë është vetë natyra e procesit të integrimit. Negociatat me BE-në nuk janë betejë politike, por ushtrim i thellë teknik. Çdo kapitull kërkon ekspertizë: nga standardet mjedisore, tek konkurrenca e tregut, nga sundimi i ligjit, tek bujqësia dhe siguria ushqimore. Për të përballuar këtë sfidë nuk mjafton retorika politike apo loja e pushtetit; nevojiten njerëz që e njohin dosjen, që kanë punuar me Brukselin dhe që kanë aftësinë t’i përkthejnë direktivat europiane në politika kombëtare konkrete.

Një qeveri e mbushur me teknokratë – pra me profesionistë që kanë kontribuar ndër vite në procesin e negociatave, që kanë qenë pjesë e skuadrave të punës pranë Komisionit Europian, apo që kanë ekspertizë akademike dhe praktike në fushat ku Shqipëria duhet të përafrohet me standardet europiane. Kjo do të ishte garancia se mandati i katërt nuk do të mbetet peng i ciklit të brendshëm politik.

Nga ana tjetër, emërimi i “socialistëve të vjetër” në kabinet, qoftë edhe për të shpërblyer besnikëri apo për të ruajtur ekuilibra partiakë, do ta kthente qeverinë në një administratë rutinë. Kjo do të ishte fatale në një periudhë ku çdo vit është vendimtar për kapitujt e negociatave pasi integrimi nuk njeh tolerancë për vonesa apo dështime teknike. Çdo hap i gabuar përkthehet në vite të humbura dhe këtë na e kanë mësuar qeverisjes e tri dekadave të fundit.

Po ashtu, sfida e integrimit mund të diktojë krijimin e ministrive të reja apo riformulimin e atyre ekzistuese. Shqipëria mund të ketë nevojë për një Ministri të Integrimit Europian me fuqi të plota koordinuese, një Ministri për Klimën dhe Energjisë sipas modelit të vendeve të BE-së, apo një strukturë të veçantë për Dixhitalizimin dhe Inovacionin, që lidhen drejtpërdrejt me kapituj të negociatave. Vetëm një qeveri teknokrate do ta kishte fleksibilitetin dhe vizionin për të rindërtuar “arkitekturën” e shtetit, pa u kufizuar nga interesat elektorale.

Në këtë kuptim, mandati i katërt i Edi Ramës nuk është një mandat për pushtet, por një mandat për histori. Ai duhet të zgjedhë mes dy rrugëve: ose të mbajë të njëjtën skemë partiake, duke e kthyer integrimin në një premtim të pafund, ose të ndërtojë një kabinet të ri, të çliruar nga lidhjet e vjetra, të drejtuar nga teknokratë që do ta çojnë vendin drejt anëtarësimit të plotë në BE.

Në fund të fundit pyetja është e thjeshtë: A duam një qeveri që ruan pushtetin e brendshëm të Partisë Socialiste, apo një qeveri që siguron të ardhmen europiane të vendit? Nëse përgjigjja është e dyta, atëherë mandati i katërt duhet të jetë mandati i teknokratëve.

The post Ministrat e rinj? Mandati i katërt i Ramës s’është për socialistët, është për Europën first appeared on JavaNews.al.

Në mes të tensioneve gjithnjë e më të ashpra mes Shteteve të Bashkuara dhe Venezuelës, presidenti Nicolás Maduro po kërkon të thellojë lidhjet me Kinën, rivalin kryesor ekonomik të Uashingtonit.

Gjatë mbylljes së “Kongresit të Parë Pedagogjik të Mësuesve Bolivarianë”, Maduro tregoi publikisht telefonin e tij të ri Huawei, të cilin, sipas tij, ia kishte dhuruar presidenti kinez Xi Jinping. Maduro madje shtoi me humor se përmes këtij telefoni komunikonte drejtpërdrejt me liderin kinez “nëpërmjet satelitit”. “Ni hao, ni hao (përshëndetje). Xiexie, xiexie (faleminderit)”, tha ai, duke imituar një bisedë në gjuhën kineze.

Ky veprim, megjithëse simbolik, tregon përpjekjet e qeverisë së Venezuelës për të afruar më shumë Pekinin në një kohë kur presioni amerikan po rritet.

Takimi diplomatik dhe qëndrimi i Kinës

Vetëm disa ditë më parë, Maduro priti ambasadorin kinez në Karakas, Lan Hu, duke vlerësuar bashkëpunimin ekonomik, shkencor dhe teknologjik me Kinën. Ambasadori Hu ka kritikuar hapur “masat e njëanshme dhe shtrënguese” të SHBA-së ndaj Venezuelës, duke nënvizuar nevojën për një botë multipolare të bazuar në respektin reciprok.

Ndërkohë, Pekini shprehu shqetësim për dislokimin e madh ushtarak amerikan në ujërat e Karaibeve. Zëdhënësja e Ministrisë së Jashtme kineze, Mao Ning, deklaroi se Kina “kundërshton çdo kërcënim ose përdorim force që shkel sovranitetin e një vendi” dhe u bëri thirrje SHBA-së të shmangë tensionet në rajon.

Shtetet e Bashkuara rrisin presionin

Administrata Trump njoftoi dërgimin e një nëndetëseje bërthamore, avionëve zbulues dhe anijeve luftarake për të luftuar kartelet e drogës, të cilët Uashingtoni i lidh me qeverinë e Maduros. SHBA e ka akuzuar prej vitesh presidentin venezuelas si udhëheqës të “Kartelit të Diellit” dhe së fundmi ka dyfishuar shpërblimin në 50 milionë dollarë për informacion që çon në arrestimin e tij. Maduro, nga ana tjetër, shpalli mobilizimin e 4,5 milionë milicëve dhe theksoi se “asnjë perandori nuk do të prekë tokën e shenjtë të Venezuelës”.

Interesat ekonomike të Kinës

Ekspertët theksojnë se qëndrimi i Kinës është kryesisht ekonomik. Sipas të dhënave të Observatorit të Kompleksitetit Ekonomik, Kina ka një suficit tregtar prej 2,7 miliardë dollarësh me Venezuelën, duke eksportuar më shumë mallra sesa importon, ndërkohë që investon në mënyrë aktive në sektorin e naftës.

Vetëm këtë javë u raportua se një kompani private kineze ka nisur shfrytëzimin e dy fushave të naftës në Venezuelë, me plane për të investuar mbi 1 miliard dollarë deri në vitin 2026.

“Pekini ka interes që të ruajë qasjen e tij ndaj burimeve energjetike të rajonit, por kjo nuk do të thotë se Kina do të ndërhyjë drejtpërdrejt në konfliktin SHBA–Venezuelë”, tha për CNN Gabriel Pastor, analist në qendrën CERES në Uruguai.

Megjithëse Maduro po kërkon aleatë të fuqishëm përballë presionit amerikan, Kina deri më tani ka dhënë vetëm deklarata diplomatike, duke shmangur hapa konkretë që do të ndryshonin ekuilibrat në rajon.

The post Maduro i kërkon ndihmë Kinës pasi Trump i dërgoi flotën “te dera”, a do të reagojë Pekini? first appeared on JavaNews.al.

Irani ka shprehur gatishmërinë për të reduktuar programin e tij të pasurimit të uraniumit në përpjekje për të parandaluar rikthimin e sanksioneve të Kombeve të Bashkuara nga Britania e Madhe.

Zyrtarë iranianë të paidentifikuar thanë se Teherani është i gatshëm të zbusë qëndrimin e tij të ashpër për të shmangur kërcënimin e sulmeve të mëtejshme nga Izraeli ose SHBA-ja, raporton ‘The Telegraph’

Ali Larijani, këshilltar i lartë i Ajatollah Ali Khameneit dhe sekretar i sapoemëruar i Këshillit të Lartë të Sigurisë Kombëtare, po nxit liderët të bien dakord për uljen e pasurimit të uraniumit nga 60% në 20% të pastërtisë.

Vendet evropiane kanë paralajmëruar se, pa përparim konkret në çështjen bërthamore deri në fund të muajit, ato janë të gatshme të zbatojnë sanksione “snapback” të hequra si pjesë e marrëveshjes bërthamore të vitit 2015.

Sanksionet e Kombeve të Bashkuara ndaj Iranit, të lidhura me programin e tij bërthamor, janë një çështje komplekse që rrjedh nga Marrëveshja e Përbashkët Gjithëpërfshirëse e Veprimit (JCPOA) e vitit 2015 dhe Rezoluta 2231 e Këshillit të Sigurimit të OKB-së.

Këto sanksione synojnë të pengojnë Iranin nga zhvillimi i armëve bërthamore, duke vendosur kufizime në aktivitetet bërthamore dhe të raketave, si dhe kufizime tregtare dhe financiare.

Para vitit 2015, gjashtë rezoluta të Këshillit të Sigurimit të OKB-së (1696, 1737, 1747, 1803, 1835 dhe 1929) vendosën sanksione të rrepta ndaj Iranit për shkak të shqetësimeve ndërkombëtare për programin e tij bërthamor. Këto sanksione përfshinin: Embargo armësh: Ndalimi i shitjes ose transferimit të armëve të rënda, si tanke, avionë luftarakë dhe raketa. Kufizime në programin e raketave balistike: Ndalimi i aktiviteteve të lidhura me raketat balistike të afta për të mbajtur armë bërthamore. Inspektimet e ngarkesave: Shtetet anëtare të OKB-së u detyruan të inspektojnë ngarkesat nga dhe drejt Iranit për materiale të ndaluara. Ngrirja e aseteve dhe ndalimet e udhëtimit: Për individë dhe entitete të lidhura me programin bërthamor të Iranit.

Me nënshkrimin e JCPOA-së në 2015, këto sanksione u pezulluan sipas Rezolutës 2231, me kusht që Irani të kufizonte aktivitetet e tij bërthamore, duke përfshirë pasurimin e uraniumit, dhe të lejonte inspektimet nga Agjencia Ndërkombëtare për Energjinë Atomike (IAEA).

Megjithatë, mekanizmi “snapback” u përfshi për të siguruar që sanksionet mund të rikthehen shpejt nëse Irani shkelte marrëveshjen, ndërsa së fundmi, Teherani ka shprehur gatishmërinë për të reduktuar programin e tij të pasurimit të uraniumit.

The post Irani u frikësohet sanksioneve, Teherani: Të gatshëm të reduktojmë pasurimin e uraniumit first appeared on JavaNews.al.

Gazetari Richard Assheton ka udhëtuar drejt Kukësit dhe sjell historinë e kthimit vullnetar të 32-vjeçarit, Ardit Shehu.

“Ky shqiptar, azili i të cilit u refuzua, na deklaroi me një theks të rëndë londinez: ‘Bro, tani Anglia është e mbaruar’”.

Kështu nis artikulli Sunday Times.

Kjo thuhet në artikull sepse Britania e Madhe dhe Shqipëria kanë bashkëpunuar në një skemë riatdhesimi të përshpejtuar që ka zmbrapsur fluksin e mbërritjeve me gomone që në vitin 2022 arriti në gati 13.000 persona.

Sipas Sunday Times të Londrës që nga marrëveshja mes Rishi Sunak dhe kryeministrit shqiptar Edi Rama në vitin 2022, Britania ka deportuar mbi 13,000 shqiptarë.

Kjo është afërsisht trefishi i numrit të atyre që deportoheshin gjatë viteve 2010. Shqiptarët janë tani kombësia më e deportuar dhe mbërritjet e tyre me varka të vogla kanë rënë me 95%.

“Policia, sa herë që flasim [në rrugë] na ndalon”, ka thënë një shqiptarë në një kafene në Kukës . “E di? Për të arrestuar shqiptarët, vetëm shqiptarët.”

Ai kishte jetuar në Barking në lindje të Londrës dhe kishte punuar me para në dorë në të zezë, në kantier ndërtimi, por u deportua gjashtë muaj më parë, tha ai.

Ervin Hoxha, ministri i Brendshëm ka deklaruar për Sunday Times: “Përpjekjet tona të përbashkëta e kanë kthyer këtë çështje në një histori suksesi.” Ai tha se Shqipëria ishte “mirënjohëse” ndaj Britanisë për bashkëpunimin.

Edval Zoto, i cili deri vitin e kaluar drejtonte një projekt të financuar nga Britania si pjesë e marrëveshjes për kthimet dhe përpiqej të bindte njerëzit nga Kukësi të mos emigronin drejt Britanisë, tha se: “Nuk mendoj se Rama po e përdor këtë marrëveshje për përfitim politik… përveç ruajtjes së marrëdhënieve të mira me Britaninë”.

The post “Anglia ka mbaruar”, Sunday Times: Shqiptarët po kthehen vullnetarisht. Paguhen me mijëra paund nga shteti first appeared on JavaNews.al.

Nga Ilir Demaliaj

Dje vendose të largohesh… pa një fjalë, pa një përqafim, pa një “mirupafshim” të thjeshtë siç e bënim gjithmonë me përplasjen e kokave – si një kod që vetëm ne e kishim.

Shkove papritur, me një heshtje që briti më fort se çdo britmë.

U tregove “i pabesë” siç vetëm ti mund të ishe – me elegancë, pa dramë, pa paralajmërim.

As Klodin nuk e përshëndete. As Patrikun – që pikërisht atë ditë kishte ditëlindjen.

As Besën e as Gerin, që ti i kishe mbledhur – pa e ditur ne, ndoshta as ti vetë – për drekën e fundit.

O tragjik i lindur, që Homerin e kishe gjak, Danten e lexoje si lutje, Shekspirin e recitoje si frymëmarrje…
Pse zgjodhe të ikje pikërisht atë ditë?

Ç’ishte kjo lojë mes jetës dhe vdekjes që zgjodhe ta luaje në heshtje?

Patriku më tha sot me një zë që s’e kisha dëgjuar kurrë më parë:

“Kur të vijë sërish dita ime, çfarë të festoj? Ditëlindjen… apo humbjen e atit tim që e doja si shikimin tim?”

Ti, mjeshtër i fjalës së pastër, që e trajtoje shqipen si një vepër arti…

Ti, biri i Petro Zhejit dhe Besës Imami – dy yje të pashuar të mendimit dhe elegancës…

Ti, që nuk lije fjali pa shkëlqim, që e vrisje banalitetin me një batutë të zgjuar, që e ndërtoje mendimin si një arkitekturë të shenjtë…

Pse nuk na the asgjë në fund?

Një fjalë të vetme me zërin tënd që tingëllonte si muzikë deti…

Një përshëndetje… një gjest të heshtur…

Apo ishe shumë në nxitim, më shumë se ç’mund të përballonim ne që mbetëm pas?

Ti që i dhe zë Kosovës, që e deshe si Besa, që bëre zërin tënd një flamur për të drejtën dhe të vërtetën në mikrofonin e Radios Radikale në Romë.

Ti, që i mësove rinisë se si tingëllon një fjali kur është e ndërtuar me shpirt.

Ti, që ishe i pakompromis me gjuhën, me mendimin, me estetikën e fjalës.

Javën e fundit folëm gjatë. Lamë që do takoheshim në shtator, pas pushimeve.

Për projektet. Për intervistën në “N’xhiro në Syçin”.

Premtove. Dhe e di që nuk premtoje kot.

Por s’mund të kishe ditur që ky ishte takimi i fundit.

Apo ishte koha që të thërriste dhe ti s’mund ta shtyje më?

Me kë do këshillohem tani për një ide që s’më lë të fle?

Kush do të më kundërshtojë me pasion e pastaj do të qeshim për orë të tëra, derisa të na gjejë mëngjesi me gotën e fundit të verës dhe fernetin në fund?

Shko, se ndoshta vetëm atje lart mund të jesh aq i lirë sa të mendosh pa kufi.

Por dije se gjithçka që le pas, gjithçka që ndërtove me fjalë, mendim, pasion e dashuri, do të jetojë më gjatë se kjo jetë e shkurtër.

Ti ishe një nacionalist liberal.

Një mendje e mprehtë, një shpirt rebel.

Një dashnor i thellë i gjuhës, i kombit, i drejtësisë, i jetës me kuptim.

Ti u nise në nxitim… dhe ne mbetëm me duart zbrazët dhe sytë plot lot.

Përqafoji të gjithë atje lart edhe për ne.
Thuaju që i kujtojmë.

E ti… do jesh përgjithmonë me ne – në çdo fjali që do guxojmë të shkruajmë me pasionin që na mësove ti.

The post Të mori ‘Zonja e Zezë’, o mik i mirë… first appeared on JavaNews.al.