Një grup i strukturuar kriminal shqiptar, i përfshirë në trafikun e kokainës në Mbretërinë e Bashkuar, është dënuar me burgime që variojnë nga 16 muaj deri në 8 vite.

Operacioni, i koduar “Operation Young”, identifikoi shtëpi të përdorura si depo për drogën, makina të përshtatura për fshehje të lëndëve narkotike dhe individë që menaxhonin aktivitetet ditore të trafikut.

Në qendër të rrjetit kriminal ishte Saimir Neziraj, i cili kontrollonte një linjë të shpërndarjes së kokainës.

Neziraj kishte rolin e mbledhjes së parave dhe furnizimit me drogë, ndërsa Edmir Beqiri ruante sasinë e kokainës në Sëindon. Dy të tjerë, Ardian Gjeta dhe Jorgo Brachousai, përdoreshin për shpërndarjen në terren.

Më 1 shkurt 2024, agjentët e policisë ndoqën Nezirajn teksa udhëtonte drejt Londrës, ku u takua me Ergys Abdyli në një rrugicë. Neziraj mori një sasi të konsiderueshme kokaine nga Abdyli dhe e riktheu atë në Swindon, ku ia dorëzoi Beqirit për ta ruajtur.

Gjatë aksionit policor në Swindon, Derby dhe në Londër, u sekuestruan sasi të mëdha parash dhe droge, ndërsa të dyshuarit u arrestuan. Më pas ata u akuzuan për shkelje të ligjeve mbi lëndët narkotike dhe u mbajtën në paraburgim.

6 të pandehurit pranuan fajësinë dhe u dënuan në total me rreth 28 vite burg në total. m.p.

Pavarësisht se Xabi Alonso ka kërkuar edhe një përforcim në mesfushë, Real Madrid duket se e ka mbyllur përfundimisht merkaton e kësaj vere. Klubi madrilen ka filluar që tani nga puna për të menduar për merkaton e vitit 2026.

Prej kohësh është përfolur për Ibrahima Konate, i cili duket se do të vijë falas verën e ardhshme në Madrid, pasi nuk ka pranuar të rinovojë kontratën me Liverpool. Përveç Konate, Real Madrid po punon për të siguruar transferimin e një tjetër qendërmbrojtësi francez, siç është Dayot Upamecano.

26-vjeçari ka refuzuar të rinovojë kontratën me Bayern, duke qenë së kërkon një rrogë më të lartë se 16 milionë euro që merr aktualisht në sezon dhe duket se do të largohet si lojtar i lirë drejt Madridit. Për francezin ka interes edhe nga PSG e Man. United, por duket se ai ka zgjedhur klubin madrilen. m.p.

Një dhëndër ka humbur jetën si pasojë e plagëve të marra nga të shtënat festive gjatë dasmës së tij në veri të Turqisë.

Sipas agjencisë shtetërore të lajmeve Anadolu, ngjarja tragjike ndodhi në qytetin Sebinkarahisar, në provincën Giresun. Dhëndri 23-vjeçar, i identifikuar si Ali K., u plagos ndërsa ai dhe bashkëshortja e tij po shoqëroheshin drejt shtëpisë pas përfundimit të ceremonisë martesore.

Më pas ndërroi jetë si pasojë e plagëve.

Dyshohet se të shtënat u kryen nga një e afërme e nuses.

Forcat e sigurisë kanë ndaluar gruan e dyshuar, ndërkohë që në oborrin e saj janë gjetur dy armë zjarri pa leje. Prokuroria ka nisur hetimet për ngjarjen.

Të shtënat festive gjatë dasmave janë një fenomen i zakonshëm në rajonin e Detit të Zi në Turqi, shpeshherë me pasoja tragjike.

Autoritetet turke kanë bërë thirrje të përsëritura për ndërprerjen e kësaj praktike të rrezikshme, e cila po shndërrohet gjithnjë e më shpesh në tragjedi familjare. m.p.

Kryebashkiaku i Elbasanit Gledian Llatja ka njoftuar plotësimin e vendeve vakante në bashki pas shkarkimeve në masë në administratë si një reformë e ndërmarrë nga qeveria në rang vendi për reformim të institucioneve vendore.

Në total janë emëruar 18 administratorë të rinj të njësive administrative. Nga ky proces ka pasur më shumë së 400 aplikime për vendet vakante administrator apo drejtor.

“Ka qenë një proces i hapur ku kanë aplikuar mbi 436 qytetarë që kanë shprehur interes të jenë pjesë në këtë proces.

Për administratorët është zhvilluar konkursi me shkrim i cili kryesisht ka pasur të bëjë me specifikat për njohjen e problematikeve me zonën. Dhe konkursi me gojë ku janë parë aftësitë e tyre komunikuese dhe përgjegjësia që ata kanë. Kjo erdhi edhe si pasojë që kishin një pjesë e administratorëve për tu përshtatur me teknologjinë pasi janë shtuar shërbimet online”, është shprehur kryebashkiaku i Elbasanit. m.p.

Inspektoriati i Mbrojtjes së Territorit (IMT) ka reaguar fill pas operacionit të zhvilluar nga Prokuroria e Posaçme Antikorrupsion (SPAK) në bashkëpunim me Policinë e Shtetit, ku në pranga kanë rënë dy inspektorë dhe 2 të tjerë janë shpallur në kërkim.

Me qëllim sqarimin e opinionit publik, IMT shkruan se institucioni shtetëror distancohet plotësisht nga ky rast dhe se dënon maksimalisht veprimtarinë e paligjme të dy punonjësve ndërsa njofton se Gerald Fuçia dhe Edmond Çela, të arrestuar, dhe dy inspektorët e tjerë të shpallur në kërkim, janë shkarkuar nga detyra.

Reagimi i Inspektoriatit të Mbrojtjes së Territorit, Tiranë:

Marrë shkas nga ngjarja e ndodhur ditën e sotme, ku katër punonjës të Inspektoratit të Mbrojtjes së Territorit kanë shkelur rëndë ligjin, bëjmë me dije opinionin publik se institucioni ynë e dënon me vendosmëri këtë rast.

Sjellje të tilla janë të papranueshme dhe IMT distancohet plotësisht nga këto veprime individuale. Ndaj personave të përfshirë janë marrë menjëherë të gjitha masat e nevojshme administrative, duke i shkarkuar nga detyra.

Theksojmë se ky rast nuk përfaqëson punën dhe misionin e IMT-së. Institucioni ynë mbetet i përkushtuar të vijojë punën me integritet, transparencë dhe profesionalizëm, në shërbim të interesit publik dhe në mbrojtje të territorit.

IMT inkurajon organet ligjzbatuese për bashkëpunim të plotë dhe ndëshkimin e rastit sipas ligjit, si edhe inkurajon çdo qytetar të denoncojë raste të ngjashme, në mënyrë që të mos mbetet asnjë hije dyshimi mbi integritetin e institucionit dhe misionin e tij.

SPAK dhe Policia e Shtetit po vijojnë në zhvillimin e operacionit me qëllim goditjen e rasteve të korrupsionit pranë IMT. Deri më tani në pranga kanë rënë Gerald Fuçia dhe Edmond Çela, të cilët u kërkonin para bizneseve të ndryshme me qëllim moskryerjen e veprimeve për shkeljet e kryera nga ata. Konkretisht bëhet fjalë për mosheqjen e tendave të lokaleve, një aksion që po zhvillohet në shkallë të gjerë me qëllim lirimin e hapësirave publike.

Ndërkohë në kërkim është shpallur dhe Klajdi Zhilla, shofer i drejtorit të IMT-së së Tiranës, Ersid Hasanllari, si dhe një tjetër person emri i të cilit ende nuk është bërë me dije për mediat. m.p.

Katër fëmijët e Marjola Nakolecit, 36-vjeçarja e masakruar me thikë nga bashkëshorti Pandeli Nakoleci në Volos të Greqisë, do të jetojnë me tezen e tyre.

Fëmijët e moshës 8, 16, 13 dhe 6 vjeç, do të shpërngulen në ishullin Skiathos, atje ku jeton tezja e tyre, raportojnë mediat greke. Avokatja e familjes ka deklaruar se procesi gjyqësor për dhënien e kujdestarisë do të zyrtarizohet ditën e nesërme.

Nga ana tjetër, motra e viktimës ka marrë mbështetjen e plotë të Shërbimit Social Grek për të marrë përsipër rritjen e fëmijëve, ndërsa dhe këta të fundit kanë shprehur dëshirën e tyre për të jetuar me tezen e tyre.

Vrasja e Marjola Nakolecit nga bashkëshorti i saj Pandeli Nakoleci ka ndodhur më 22 Gusht në Volos të Greqisë në banesën ku ata jetonin. Prezent në ngjarjen e rëndë kanë qenë dhe 3 prej fëmijëve të çiftit. Pandeli Nakoleci u arrestua nga policia një ditë më vonë teksa ishte fshehur në një parking 200 metra larg vendit të ngjarjes.

Nakoleci ka pranuar përpara gjykatës krimin ndërsa është shprehur se e gjitha ndodhi për motive xhelozie pasi sipas tij, bashkëshortja kishte lidhje paralele dhe mbi të gjitha ishte shtatzanë me partnerin e saj. m.p.

Sulmi i dytë izraelit në spitalin Nasser në Gaza ishte “i paramenduar”, thotë ambasadori palestinez në OKB.

“Sulmi i dytë në spitalin Nasser ishte një sulm i paramenduar ndaj mjekëve dhe gazetarëve që mbërritën në vendngjarje pas sulmit të parë”, tha Riyad Mansour në takimin e Këshillit të Sigurimit të OKB-së në Nju Jork, shkruajnë mediat e huaja.

Ai shton: “Kjo nuk është luftë. Këto janë mizori të kryera kundër një popullsie të tërë civile.”

Mansour thotë se Izraeli ende po u ndalon gazetarëve dhe hetuesve ndërkombëtarë të hyjnë në Gaza “për të ruajtur kontrollin e vendit të krimit” dhe “për të parandaluar që realiteti të arrijë kudo në botë”. m.p.

Ditën e sotme, Policia e Shtetit dhe SPAK kanë ndërmarrë një operacion për arrestimin e disa personave, punonjës të IMT-së, të dyshuar për korrupsion.

Burime për A2 CNN bëjnë me dije se deri më tani mësohet se dy persona janë arrestuar, inspektorët Gërald Fuçia dhe Edmond Çela, ndërsa dy të tjerë janë shpallur në kërkim (shtetasit Klajdi Zhilla dhe një tjetër person).

Mësohet se arrestimi është bërë në një lokal pranë zonës së Kombinatit në kryeqytet.

Operacioni vjen pas denoncimit të bërë më herët në polici se këta persona merrnin para tek biznese të ndryshme, duke i favorizuar në zabtimin e ambienteve publike.

Kujtojmë se gjatë muajve të fundit, qeveria ka ndërmarrë një aksion për shembjen e objekteve pa leje dhe shtesave të lokaleve të ndërtuara në mënyrë të paligjshme.

Ky aksion i IKMT-së nisi fillimisht me shembjen e disa objekteve pa leje në Theth, të cilat shërbenin si bujtina për turistët dhe më pas u shtri edhe në qytete të tjera si Tiranë, Vlorë, etj. m.p.

Policia e Durrësit po zhvillon mbrëmjen e sotme një operacion me zonën e Shkozetit në Durrës.

Burime bëjnë me dije se janë shoqëruar disa persona me rrezikshmëri të lartë shoqërore.

Ndërkohë ende nuk ka detaje shtesë mbi ngjarjen apo identitetin e personave të shoqëruar, pasi operacioni është në zhvillim e sipër.

Kujtojmë se në Durrës, edhe më herët gjatë këtyre muajve janë organizuar operacione për kapjen e personave me rrezikshmëri të lartë shoqërore, ku janë ç’montuar disa organizata kriminale. m.p.

Fatmir Mediu ishte i ftuar në ditarin e mbrëmjes në A2 CNN ku foli rreth qëndrimit të opozitës në shtator dhe sesionit të ri parlamentar.

Mediu u shpreh se duhet bërë një analizë për zgjedhjet e majit, pas raportit të ODIHR, teksa zërave për largimin e Berishës iu përgjigj se momentalisht nuk ka asnjë figurë që mund të përbashkojë PD dhe opozitën në tërësi përveç tij.

“Për të bërë një analizë të zgjedhjeve, duhet një raport i ODIHR. PD duhet të bëjë analizën se kush ishin problemet. Për rregullat brenda PD nuk e gjykoj unë. Nëse kërkohet të largohet Berisha, nuk mendoj se ka një autoritet që mund ti bashkojë në një front të vetëm. Nuk mund të kryejmë vetëvrasje sepse do ringjallemi si Krishti. Sa i nxehtë do të jetë shtatori, unë mendoj se opozita duhet të jetë e mëncur për të krijuar një bindje të qytetarët dhe faktori opozitar. Kemi diskutuar një plan veprimi… Ne jemi në një koalicion me PD, po të futeshin dhe partitë e tjera rezultati do të ishte dhe më i mirë”, tha Mediu.

Më tej, kreu i PR foli dhe për vizitën e zhvilluar së fundmi në Kiev dhe zhvillimet pas takimit me Trump dhe Putin në Alaskë.

“Grupi “United for Ucraine” është krijuar mbas agresionit dhe kishte si një qëllim të angazhimit të diplomacisë parlamentare për të mbështetur Ukrainën. Vizita në Ukrainë kishte qëllim njohjen e qëndrimit të Kievit pas takimit të Alaskës dhe çfarë mund të bëhej. Takuam presidentin Zelensky dhe shumë zyrtarë të lartë dhe morëm një qëndrim të qartë.

Ne patëm një ftesë në ambasadën amerikane dhe aty ishte dhe gjenerali Kellog, ai tregoi për pritshmëritë dhe qëndrimin amerikan, pa hyrë në detaje, në bindjen që presidenca Trump për të arritur një marrëveshje me Rusinë ishte në qëndrimin e Shteteve të Bashkuara. Ai nuk ishte vetëm për ditën kombëtare të Ukrainës, por edhe për të negociuar me Zelenskyn për zhvillimet në Uashington. Janë disa grupe që punojnë dhe ministri i Jashtëm do të shkojë shumë shpejt në Uashington për të diskutuar me Rubion. Zyrtarët ukrainas e bënë të qartë se janë kundër lëshimit të territoreve. m.p.

Pavarësisht manipulimeve ruse, presionit ukrainas dhe shqetësimeve evropiane, Uashingtoni po lëviz drejt një rendi të ri global ku përfundimi i luftës në Ukrainë shihet si prioritet.

Por fokusi kryesor mbetet kontrolli i armëve bërthamore me Rusinë dhe Kinën pas skadimit të marrëveshjes START në 2026.

Trump duke komentuar deklaratat e Lavrov për rolin e Zelenskyt në negociatat e paqes, i është përgjigjur duke thënë: Të gjitha janë budallallëqe. Ukraina po përpiqet të mposhtë dikë 15 herë më të madh. Dua që kjo luftë të mbarojë. Duhet t’i kesh të dy, Putinin dhe Zelenskyn, në tavolinë.

Trump përmendi humbjet e mëdha njerëzore, mbi 12 mijë ushtarë të vrarë në dy javë.

“Nuk mund ta lejojmë këtë të vazhdojë. Nëse duhet të përdor tarifa apo sanksione për ta ndalur, do ta bëj.” m.p.

Largimi i Ingo Martinez për tek Al-Nassr dhe forma jo e mirë që ka treguar Ronaldo Araujo të paktën në dy ndeshjet e para të La Ligës, kanë bërë që Hansi Flick të kërkojë nga drejtuesit një përforcim në qendër të mbrojtjes.

Mediat spanjolle raportojnë se drejtori sportiv i Barcelonës, Deco, ka një listë me 3 emra dhe njëri prej tyre mund të jetë partneri i ri në qendër të mbrojtjes për Pau Cubarsi.

Gonçalo Inacio: qendërmbrojtësi i Sporting Lisbon, 24 vjeç, i cili numëron edhe 16 ndeshje me kombëtaren portugeze. Kontrata aktuale me Sporting Lisbon skadon në vitin 2027. Vlera e mbrojtësit është diku te 45-50 milionë euro.

Murillo: mbrojtësi brazilian 23-vjeçar i Nottingham Forest, me një kontratë deri në vitin 2029 dhe konsiderohet si një nga zbulimet në Premier League. Vlera e tij është diku mes 50-55 milionë euro.

Castello Lukeba: mbrojtësi francez 22-vjeçar i RB Leipzig. Gjithashtu nën kontratë me klubin gjerman deri në vitin 2029 dhe për të ka interes nga shumë klube të mëdha. Leipzig kërkon mbi 80 milionë euro.

Para se Barcelona të tentojë transferimin e njërit prej emrave të mësipërm duhet të finalizojë shitjen e Fermin Lopez ose te Marc Casado. Për Fermin Lopez ka interes konkret nga Chelsea dhe marrëveshja mund të mbyllet brenda 1 shtatorit për shifrën 55-60 milionë euro. Për Casado-n po ashtu ka interes nga ekipet Angleze si Wolves apo Aston Villa, Barcelna pret ofertë deri në 30 milionë euro për të. m.p.

Juristi Kreshnik Spahiu, ka deklaruar se edhe pse kreu i PD Sali Berisha në deklaratat e tij thotë se nuk i njeh zgjedhjet e 11 majit, sipas tij ato i ka njohur kur komisionerët e PD nënshkruan për rezultatin e zgjedhjeve.

‘Berisha i njohu zgjedhjet nëpërmjet 12 mijë komisionerëve që kanë nënshkruar rezultatin për çdo kuti. Kur një parti nënshkruan dhe njeh rezultatin ky është akti juridik që i bënë zgjedhjet të vlefshme ose të pavlefshme. Nëse ata nuk do të nënshkruanin atëherë do të diskutonim nëse njihen ose jo zgjedhjet. Thonë se do të bëjnë protesta dhe në 1 tetor të gjithë do të marrin rrogën nga mandati i deputetit’, tha ai. m.p.

Ish-Presidenti i Interit, Massimo Moratti, është shtruar në spital në terapi intensive për shkak të pneumonisë.

Sipas raportimeve, gjendja e tij është kritike pasi mjekët e intubuan për shkak të vështirësisë në frymëmarrje.

Massimo Moratti bleu Interin në vitin 1995 nga Ernesto Pellegrini, i cili u nda nga jeta së fundmi.

Moratti arriti ta çojë Interin në një sukses historik në vitin 2010, duke fituar Champions League, dhe në të njëjtin sezon Serie A dhe Kupën e Italisë.

Skuadra italiane gjatë presidencës së Moratti-t fitoi 16 trofe gjithsej.

Kujtojmë se Massimo Moratti në maj të këtij viti festoi 80-vjetorin dhe në festën e ditëlindjes ishin thuajse të gjithë ish-lojtarët e tij, Ronaldo, Recoba, Vieri, Pirlo dhe heronjtë e tripletës së vitit 2010. m.p.

Ambasada ruse në Beograd deklaroi se për situatën në Serbi zgjidhja e vetme është “dialogu në fushën e së drejtës”, siç theksoi, “sipas rregullave serbe”.

Në një postim në Telegram, Ambasada ruse theksoi se “vëren” se vëmendja e saj e kushtuar situatës në Serbi “kohët e fundit nuk ka kaluar pa u vënë re”, pa sqaruar për çfarë bëhet fjalë.

“Sipas mendimit tonë, kjo do të thotë vetëm një gjë: vlerësimet tona pasqyrojnë me saktësi, korrektësi, përgjegjësi dhe me qëllime të mira realitetin”, njoftoi Ambasada ruse, por po ashtu nuk sqaroi se për cilat vlerësime bëhet fjalë.

Kremlini veçse i ka dhënë mbështetje autoriteteve në Beograd, të cilat përballen me protesta antiqeveritare që po zgjasin që disa muaj, teksa demonstruesit po kërkojnë mbajtjen e zgjedhjeve të jashtëzakonshme parlamentare. Zyrtarët rusë përsërisin pohimet e autoriteteve serbe se protestat përbëjnë të ashtuquajturën “revolucion me ngjyra”, një term që i referohet kryengritjeve në ish-republikat sovjetike kundër regjimeve autoritare.

Ministria e Jashtme e Rusisë tha më herët gjatë gushtit se “disa forca në Serbi, nën mbulesën e sloganeve për ‘kërkimin e drejtësisë dhe demokracisë’, nuk hezitojnë të përdorin agresion të hapur, barbarizëm dhe dhunë”, ndërsa ambasadori rus në Serbi, Aleksandar Bocan-Harcenko, javën e kaluar deklaroi se Perëndimi dëshiron të zëvendësojë presidentin e Serbisë, Aleksandar Vuçiç, me një politikan të dobët që kontrollohet nga Bashkimi Evropian.

Kjo deklaratë e ambasadorit rus ka nxitur kritika nga opozita në Serbi, e cila e ka vlerësuar si ndërhyrje në çështjet e brendshme të shtetit.

Ambasada ruse në Beograd në njoftimin e fundit theksoi se “as nuk mund të flitet për ndonjë ‘ndërhyrje’ nga ana jonë në çështjet e brendshme të Serbisë” dhe se “Rusia, përgjatë historisë, ka mbështetur në mënyrë të qëndrueshme dhe të palëkundur sovranitetin, pavarësinë, autonominë dhe integritetin territorial të Serbisë, si dhe lirinë e popullit serb”.

“Ne nuk dyshojmë se ekziston vetëm një rrugë, dhe ajo është dialogu në fushën e së drejtës. Sipas rregullave serbe. Për Serbinë. Për popullin e saj”, tha Ambasada ruse në Beograd.

Presidenti i Serbisë, Aleksandar Vuçiq, ditëve të fundit ka bërë dy herë thirrje për dialog me protestuesit. Thirrjen e dytë ai e bëri gjatë një interviste për Euronews Serbia të hënën, ku gjithashtu deklaroi se anëtarësimi i Serbisë në BE mbetet prioriteti i tij.

Ambasada ruse shtoi se “vërejmë se dhuna është ende në arsenalin e tyre”, pa sqaruar për kë e ka fjalën. m.p.

Asambleja e Partisë Socialiste do të mblidhet më datë 11 Shtator. Në këtë datë kryeministri Edi Rama do të shpallë të gjithë emrat që do të formojnë skuadrën e qeverisë “Rama 4”.

Për dy javë me radhë, kryeministri do të vijojë takimet e tij në zyrë me anëtarët e partisë së tij, vizita këto që kanë nisur që prej dy ditësh në godinën qeveritare.

Më parë, Asambleja e Përgjithshme është mbledhur në fund të gushtit, ndërsa burime për Euronews Albania, bënë me dije se 11 shtatori do të jetë data që Rama do t’i japë fund aludimeve apo pretendimeve për emrat e rinj apo të vjetër që do të formojnë kabinetin e mandatit të 4-t. m.p.

Juristi Kreshnik Spahiu, e ka cilësuar përbërjen e re të ekipit të Sali Berishës, si një konfirmim se gjithë konflikti i viteve të fundit në Partinë Demokratike ka qenë një skenar i inskenuar.

Në një intervistë për Report Tv, ai shtoi se PD dhe Berisha duhet të bëjnë vetëm një analizë të thjeshtë, se pse humbën zgjedhjet.

‘Nuk kanë kaluar dy vite e gjysmë kur kjo parti ka pasur sherr, janë rrahur mes tyre në selinë e partisë. E them këtë për të kujtuar kronologjinë e ngjarjeve, për të gjithë shqiptarët se kjo parti ishte e ndarë në dy pjesë dhe kjo tregon se e gjithë ajo ka qenë një teatër. Fakti që Berisha ekipin e ri po e ndërton me listën Basha me në krye Bardhin tregon se ka qenë një film dhe jo një luftë reale. Partia Demokratike dhe Sali Berisha duhet që të bëjnë vetëm një analizë, se pse humbi në zgjedhje, ai ka marr 15 deputetë më pak se Basha. Berisha ka marr rezultat më të dobët se Basha. Është teatër, Berisha nuk njeh zgjedhjet por ai njeh rrogën që merr dhe merr mandatin e deputetit’, tha ai. m.p.

Policia e Shtetit dhe SPAK kanë ndërmarrë një operacion për arrestimin e disa personave, punonjës të IMT-së, të dyshuar për korrupsion.

Burime për A2 CNN bëjnë me dije se deri më tani mësohet se dy persona janë arrestuar, ndërsa të paktën 2 të tjerë janë shpallur në kërkim.

Operacioni vjen pas denoncimit të bërë më herët në polici se këta persona merrnin para tek biznese të ndryshme, duke i favorizuar në zabtimin e ambienteve publike.

Kujtojmë se gjatë muajve të fundit, qeveria ka ndërmarrë një aksion për shembjen e objekteve pa leje dhe shtesave të lokaleve të ndërtuara në mënyrë të paligjshme. m.p.

Për të mirën e demokracisë shqiptare, ka ardhur koha që Partia Demokratike të reformohet dhe të heqë dorë nga berishizmi. Drejtuesit politikë që dështuan më 11 maj duhet të japin dorëheqjen, ndërkohë që deputetët me rezultate të dobëta dhe që kanë 2-3 mandate në Parlament duhet të bëjnë një hap pas.

Jo vetëm kaq. Për të shpëtuar opozitën nuk mjafton rinovimi i PD-së, por bashkimi i saj me formacione të tjera politike duke krijuar një “konfederatë opozitare”, e përmendur disa herë prej dy vitesh nga Fatmir Mediu. Duhet bashkim me partitë e reja, me personalitete nga diaspora dhe nga shoqëria civile.

Fjala.al po përmend një listë me emrat që duhet të jenë pjesë e mozaikut kryesor në “ansamblin e ri” të opozitës shqiptare. Pra, një grup me emra bindës, të cilët konceptohen alternativa serioze në shoqëri dhe që së bashku mund të turbullojnë mirë ujërat e politikës shqiptare:

Ilir Alimehmeti & Jorida Tabaku – Reformimi i PD-së duhet të nisë me dy emra si imazh fillestar, Ilir Alimehmeti dhe Jorida Tabaku. Ata nuk kanë ngarkesat tipike të përplasjeve brenda partisë dhe nuk konceptohen si figura të kultivuara nga Sali Berisha. Përfaqësojnë denjësisht kryeqytetin dhe kanë marrë një numër të jashtëzakonshëm votash në zgjedhjet e 11 majit, duke u konfirmuar si dy figurat më të pëlqyera në PD.

Agron Shehaj – Partia që ai drejton, “Mundësia”, mori rreth 50 mijë vota më 11 maj. U rendit si parti e tretë në qarkun Tiranë, ku dhe mori dy mandate. Ai është një nga deputetët më të pëlqyer nga publiku, gjithmonë konstant me denoncimet e tij kundër pushtetit. Nuk është nevoja që partia e tij të shkrihet me PD-në, por të jetë pjesë e formacionit të plotë opozitar në koalicion. (Bashkë me të, edhe emra si Erald Kapri dhe Barbara Doda, të spikatur në fushatën e zgjedhjeve të 11 majit.)

Adriatik Lapaj – Partia e drejtuar prej tij, “Shqipëria Bëhet”, mori 64 mijë vota më 11 maj, forcë e tretë në rang kombëtar. Ka frymëzuar më shumë se partitë e tjera të reja në Shqipëri dhe ka mbështetje të shpërndarë në të gjitha qarqet. Ka deklaruar publikisht se është i djathtë, edhe pse drejton një parti kryesisht me prirje centriste. Ai gjithashtu do të mund t’i bashkohej PD-së në trajtë koalicioni. (Bashkë me të, edhe emra si Gjeneral Dedë Prenga, Azmer Dulevic, Dorina Prethi dhe Edona Haklaj.)

Gledis Nano – Konsiderohet si një nga personalitetet më të shquara në vend. Ai kujtohet edhe sot si njeriu i cili sfidoi pushtetin dhe nuk pranoi të jepte dorëheqjen në një post tejet të lartë si Drejtor i Përgjithshëm i Policisë. Ka pëlqyeshmëri të lartë publike dhe do të ishte një “transferim” i goditur për opozitën e re shqiptare.

Majlinda Bregu – Partitë e mëdha kanë gjithmonë nevojë për një rikthim elegant te rrënjët. Zonja Bregu është një nga asetet e kahershme të PD-së, edhe pse e shkëputur prej shumë vitesh që kur Lulzim Basha mori drejtimin e partisë. Pas një sërë eksperiencash jashtë vendit me role të rëndësishme, ajo mund të rikthehet në strukturat demokrate.

Florian Haçkaj – Bashkëthemelues i Lëvizjes “Diaspora për Shqipërinë e Lirë”, e cila nisi e para presionin për mundësimin e votës së diasporës. Shumë aktiv në jetën publike dhe një njeri i apasionuar pas politikës. Jeton në Zvicër dhe ka mbi 12 vite përvojë menaxheriale në kompani në nivel ndërkombëtar. Udhëton shumë shpesh në Shqipëri.

Panajot Soko – Ekonomist i shkëlqyer dhe njeri aktiv në jetën publike të vendit. Pas largimit me dinjitet nga “Nisma Thurje”, ai do të ishte një vlerë e shtuar për PD-në për katër vitet e ardhshme. Shumë i pëlqyer në publik dhe njeri me intelekt të rrallë. Gëzon respekt në mjedisin politik si dhe atë mediatik.

Klodiana Lala – Si një nga gazetaret më të vullnetshme dhe guximtare në vend, kalimi i saj në politikë do të ishte i natyrshëm. Praktikisht, ajo ka vite që bën opozitë më shumë se shumica e deputetëve aktualë të PD-së. Qytetarët shqiptarë do ta mirëprisnin angazhimin e saj politik, duke qenë se puna e saj e përditshme, thellë-thellë, ngjan me politikën.

Tedi Kopliku, Fisnik Qosja dhe Aulon Kalaja – Aktualisht pjesë e familjes demokrate. Janë tre prej emrave më të freskët dhe bindës në PD. Të rinj, oratorë, seriozë dhe me pëlqyeshmëri të lartë publike. Nuk konceptohen si demokratë berishistë, por si demokratë të moderuar. Do të ishin alternativa të shkëlqyera për një PD të reformuar dhe rinore.

PD duhet të bëhet e re dhe e pastër, të reflektojë shpresë, të ketë besimin e qytetarëve dhe të ketë një rreze sa më të gjerë, duke u bashkuar me sa më shumë “copëza” të shoqërisë, duke krijuar një “konfederatë opozitare” gjithëpërfshirëse. Demokracia shqiptare ka nevojë jo vetëm për një opozitë pa Berishën, por për një alternativë dinjitoze, që kalon caqet e së djathtës tradicionale dhe i kundërvihet palës tjetër, e cila sot qeveris vendin.

Premier League është përfshirë në një skandal të ri, pasi një ish-shef i policisë suedeze ka deklaruar se disa futbollistë të kampionatit anglez kanë qenë të përfshirë në trukime ndeshjesh dhe baste të paligjshme.

Fredrik Gardare, i cili ka udhëhequr hetime të nivelit të lartë mbi krimin e organizuar dhe manipulimin në sport, ka thënë se gjatë një bastisjeje në një kazino të paligjshme në vitin 2021, policia konfiskoi telefona që përmbanin prova të qarta se lojtarë të Premier League kishin marrë pjesë në manipulime rezultatesh, përfshirë baste mbi kartonë të verdhë, goditje këndi dhe elementë të tjerë të lojës.

Gardare ka qenë gjithashtu në qendër të një hetimi të gjatë 18-mujor që ekspozoi ish-mesfushorin e Manchester City, Dickson Etuhu, i cili u dënua për përpjekje për të trukuar ndeshje në Suedi dhe u përjashtua për pesë vite nga futbolli.

Megjithatë, ndonëse provat e reja që dolën nga hetimi i fundit konsiderohen “të qarta dhe të pakontestueshme” sipas Gardare, policia suedeze vendosi të mos e çonte më tej çështjen. Telefona me të dhëna të rëndësishme mbeten ende të sekuestruar nga autoritetet në Stokholm.

“Kam punuar me qindra raste të trukimit të ndeshjeve, por ky ishte më i qarti nga të gjithë. Është e pamundur të injorohet kur e sheh të dokumentuar në një celular të konfiskuar,” tha Gardare për Daily Mail.

Federata Suedeze e Futbollit ka konfirmuar se mori informacion “të përgjithshëm” nga policia lidhur me manipulimin e ndeshjeve në nivel kombëtar dhe ndërkombëtar, por pa detaje specifike për shkak të sekretit hetimor.

Nga ana tjetër, Premier League deklaroi për mediat britanike se “nuk është në dijeni të kësaj çështjeje” dhe se kompetencat për hetime të tilla i takojnë Federatës Angleze të Futbollit (FA).

Kujtojmë se vetëm një vit më parë, sipas një raportimi të The Telegraph, të paktën pesë lojtarë të Premier League ishin kontaktuar nga rrjete ndërkombëtare të basteve të paligjshme për të ndikuar në ndeshje. m.p.