Shefi i NATO-s Mark Rutte do të vizitojë Uashingtonin nesër për të zhvilluar takim me Donald Trump dhe zyrtarët e lartë të kabinetit të tij.

Njoftimi për shtyp që bëri me dije vizitën e Rutte nuk dha një arsye specifike për udhëtimin, por Trump tha së fundmi se do të ishte i gatshëm të furnizonte me armë Ukrainën nëpërmjet NATO-s.

Presidenti amerikan gjithashtu ka premtuar se do të bëjë një “deklaratë të madhe” në lidhje me Rusinë nesër, të cilën disa besojnë se mund të jetë mbështetja e tij për një projektligj sanksionesh kundër Moskës.

Përveç takimit me Trump në udhëtimin dy-ditor, Rutte do të zhvillojë gjithashtu bisedime me Sekretarin e Shtetit të SHBA-së, Marco Rubio dhe Sekretarin e Mbrojtjes, Pete Hegseth.

Konflikti i radhës në rubrikën “Shihemi në Gjyq” të së “Dielës Shqiptare” në Tv Klan, zhvillohet mes nënës dhe djalit. Vergjinushja, 76 vjeçe, shpreh në insertin prezantues problematikën e rëndë të dhunës nga nusja dhe fyerjeve nga i biri.

“Jam 76 vjeç. Të të rrahë nusja, të të ofendojë djali, të të japë zeher të hash dhe të të thërrasë me fjalë ofenduese, të ofendojë edhe djalin e vogël, 100 të zeza m’i thotë, kam shumë për të thënë!”

Edhe kur hyn në studio, ajo përsërit të njëjtën gjë, e përlotur. “E dhunuar nga djali, e ofenduar nga nusja, e ofenduar nga mbesa, e rrahur. Fjalët më të pista i janë thënë kësaj nëne, 76 vjet grua!”, thotë e moshuara, e cila së fundmi ka mbetur edhe vejushë.

Nga ana tjetër, djali, Alberti, ka një konflikt me nënën dhe i kërkon të zgjedhë.

“Jam shumë i revoltuar! Nga shtëpia, nga kunata dhe nga nëna, personalisht. Unë sot nuk qëndroj dot me nënën se jam i kërcënuar, po më pengon. Nëna mban të dy krahët. Sot o të më zgjedhë mua, ose të mbajë familjen tjetër.”

Vergjinushja nis të tregojë se ka dy djem, nga të cilët i madhi është i martuar. Ajo thotë se djali i madh i ka dhënë edhe ilaç, pavarësisht se për 22 vjet ka qëndruar në shtëpinë e saj bashkë me familjen e tij. Nga djali dhe nusja, ajo është ofenduar vazhdimisht por i ka duruar të gjitha. Alberti konkretizon cilat kanë qenë këto ofendime të rënda, të cilat janë thënë prej nuses së shtëpisë kundrejt nënës së tij.

Vergjinush: Zonja Vergjinush ka një mal me halle, publiku do të çuditet me këtë zonjën Vergjinush dhe do të thotë kështu publiku që si ka ardhur kjo grua plakë, si nuk e ka ngrënë ilaçin e atij djalit që e ka mësuar djali nënën të hajë ilaç ku ma ka lënë dhe nuk kisha për të ardhur këtu, por më mbajti kjo grua (Eni Çobani) që nuk kam çfarë të them unë si plakë që jam.

Albert: Të ndërhyj unë?

Eni Çobani: Prit të dëgjojmë mamanë, do të ndërhysh, do të flasësh.

Albert: Të ndërhyj se më del aty ku dua unë.

Eni Çobani: Çfarë do të thuash?

Albert: Nga ai ilaçi i saj jam ofenduar edhe unë, nga hatri i saj që e ka mbajtur ajo se ajo zonja nuse kur është ndarë, ka vajtur dhe i ka kërkuar falje. Kur i ka kërkuar falje më ka marrë edhe mua në qafë sot, se nuk i kërkon dot falje.

Eni Çobani: Djalit tjetër?

Albert: Nuses i ka kërkuar, jo djalit dhe më ka thënë mua duro, duro, unë nesër mund të vritem. Sot që dal nga këtu, unë nuk jam i garantuar. Dakord? Sot o ai o unë në shtëpi.

Vergjinush: Unë e kam martuar djalin dhe e kam mbajtur djalin, kam bërë një gabim që të mos ma falë publiku dhe mos ta bëjë këtë që kam bërë unë, 22 vjet e kam mbajtur bashkë. E ofenduar nga djali, e ofenduar nga nusja, unë i shkelja ofendimet me këmbë. Por që e kam mbajtur bashkë, e kam mbajtur vetëm nga turpi, thoshin nuk mban vjehrra nuse. Unë pastaj këta djemtë, i thosha djalit puno, të madhit. Herë punonin, herë s’punonin. I mbaja vetëm me një pension, i mbaja vetë i gjashtë në shtëpi, me dy fëmijë në shkolla. Si përfundim, nusja ndahej dhe vinte në shtëpi më bashkohej.Unë si vjehrrë nuk ia thosha dot që moj bijë ti u ndave dhe ike. Unë si vjehrrë kam bërë një gabim që nuk më falet, të mos ma falë publiku.

Eni Çobani: Ke bërë shumë mirë se në fund të fundit, me djalin tënd ke qëndruar dhe me nusen, nuk është gabim.

Albert: Kur u nda radhën e parë, mos të kishte shkuar ta kishte thirrur në shtëpi. Të mos e kishte thirrur kur u nda dhe është gabimi edhe i nënës që shkon e i kërkon falje, edhe është fajtore, edhe shkon i kërkon…

Eni Çobani: Nëna fal gjithmonë, nënat kështu janë. Nënat janë me zemër të madhe.

Albert: Të më falë publiku se e kam nënë, arrin sot në sy të djalit, nusja në sy të djalit, bëhet nëna ime sot k**vë dhe pu**në! Mund ta nxjerr me video!

Vergjinush: Gomaricë! Më ka bërë nusja gomaricë!

Albert: I thashë të ma tregojë nëna ime kë kam baba unë!

Vergjinush: Një grua pa burrë! Z. Ardit, të më dëgjosh me vëmendje, edhe znj. Eni!

Albert: E kam bërë gati incizimin, ta dëgjojë sot publiku! Nëse unë gënjej, të më shpien me pranga që sot!

Vergjinush: Unë kam bërë një gabim që nuk më falet. Si u ndanë këta, kishim pesë lekë muhabet, fëmijët m’i linin mua dhe sot djalit të djalit të madh, ia shtroj unë rrobat, 76 vjeçe dhe ia ngre. E kam nip! E kam të djalit, ma do shpirti, ma do barku! Nuk e përzë dot!

Albert: Ajo po s’e përzuri atë, unë nuk rri! Unë iki që sot!

Vergjinush: Berti, lërmë nënën!

Albert: Nuk ndahesh me djathin, nuk shoh prej hirrës. Kur s’pashë prej vëllait, prej kunatës, nuk shoh prej hirrës.

Eni Çobani: Ti çfarë kërkon tani, të mos flejë me nipin?

Albert: As me nipin, asgjë! Të bëjë nëna dorëheqje! O me atë, o me mua!

Vergjinush: Unë jam gjyshe!

Albert: Nuk të lë të mbarosh, unë jam i kërcënuar!

Vergjinush: Turp të kesh që të kam rritur!

Albert: Turpin le ta kem unë!

Vergjinush: Më kërcënon në sy të publikut, nuk ju kam kërcënuar kurrë!/tvklan.al

Gisele Pelicot, gruaja franceze që ka fituar vëmendje ndërkombëtare pasi ka dëshmuar publikisht në gjyqin për dhunimin masiv që ka përjetuar, i është ndarë titulli më i lartë i Francës.

Kjo 72-vjeçare është emëruar Kalorëse e Legjionit të Nderit, sipas një liste të publikuar para Ditës Kombëtare të Francës.

Pelicot ka hequr dorë nga e drejta për anonimitet në një gjyq të profilit të lartë kundër burrit të saj, i cili e ka droguar dhe dhunuar, si dhe i ka ftuar dhjetëra burra tjerë të huaj që të abuzojnë me të për gati një dekadë.

Pelicot është në mesin e 589 personave që u është ndarë ky çmim prestigjioz.

Ajo ka marrë pjesë në seancat gjyqësore pothuajse çdo ditë.

Ato kanë përfunduar në dhjetor të vitit të kaluar dhe Dominique Pelicotit, 72-vjeçar, i është dhënë dënim maksimal prej 20 vjetësh burgim për dhunim, pasi e ka pranuar se e ka dhunuar Giselen dhe i ka rekrutuar rreth 50 burra për ta dhunuar, derisa ajo ka qenë pa vetëdije në shtrat.

“Dua që të gjitha gratë që janë dhunuar të thonë: Zonja Pelicot ia ka dalë, mundem edhe unë”, u ka thënë më parë ajo gazetarëve, duke treguar se ka vendosur ta bëjë të hapur procesin gjyqësor për “t’ia ndërruar vendin turpit” duke e bartur nga viktima te dhunuesi.

Presidenti francez, Emmanuel Macron e ka nderuar publikisht figurën e saj, duke thënë se “dinjiteti dhe kuraja e saj e kanë inspiruar Francën dhe botën”.

Sipas avokates së saj, një libër me hollësi për përjetimet e Gisele Pelicotit do të publikohet në fillim të vitit të ardhshëm.

Trashëgimia e pasur historike dhe arkeologjike e Korçës po zgjon çdo vit e më tepër kuriozitetin e vizitorëve, sidomos të huaj. Këtë të diel, një grup studiuesish austriakë, mes të cilëve arkeologë, historianë dhe filologë, vizituan Tumën e Kamenicës, një vendvarrim prehistorik që daton në shekullin e XII para Krishtit.

Vizitorët e kanë një pikë të veçantë në guidat e tyre Tumën e Kamenicës, pasi si ajo nuk ka një të dytë, jo vetëm në Shqipëri, por edhe në Rajon, për nga vlerat dhe interesi arkeologjik dhe antropologjik.

Vizitorët mbetën të befasuar nga ajo çka panë dhe dëgjuan për këtë varrezë prehistorike, ku gjenden veç varreve edhe objekte prej kocke, qeramike, armë dhe zbukurime prej bronzi, ari dhe argjendi. Vendbanimi i Linit në Pogradec dhe Tuma e Kamenicës në Korçë marrin rëndësi të veçantë, pasi plotësojnë një boshllëk për historinë e vendit.

“Punoj në Departamentin e Antikitetit në Universitetin e Salsburgut dhe fokusi im është arkeologjia nënujore dhe historia e mjekësisë. Shumë mbresëlënëse, më pëlqeu shumë. Një zonë shumë e rëndësishme këtu dhe nga sa dëgjova ka një lidhje mes vendndodhjes dhe Tumës, gjë që është shumë e rrallë. Është shumë e rëndësishme puna që është bërë këtu, jo vetëm në anën e mjekësisë, pra është shumë impresionuese. Shqipëria është një vend shumë interesant, jam i lumtur që jam këtu. Kam qenë vite më parë dhe kam vizituar Butrintin, dhe këtë herë kam parë shumë vende historike dhe arkeologjike”, thotë Rupert Breitwieser.

“Vij nga Vjena dhe jam mësuese e latinishtes, ndaj jam shumë e interesuar për arkeologjinë e Ballkanit. Ne kemi shumë studentë me origjinë nga vendet e Ballkanit si Maqedonia e Veriut, Bosnja si edhe Shqipëria, ndaj më shërben të kuptoj më shumë për vendet nga ata vijnë. Mendoj që është shumë interesante dhe keni bërë një punë shumë të mirë në mënyrën sesi e prezantoni historinë tuaj. Mendoj që është ende duke u zhvilluar dhe ajo që i shkrova bashkëshortit tim dje është që jam shumë kurioze sesi do të duket pas 10 vitesh, ndaj shpresoj të vijmë pas 10 vitesh për ta parë”, shprehet Annamaria Lesigang.

“Kemi 2-3 ditë që kemi ndërmarrë këtë tur dhe kemi parë Tiranën dhe Shkodrën. Jemi duke vizituar sitet antike dhe prehistorike dhe ky vend është shumë i pasur. Jam mësuese e latinishtes dhe anglishtes në Vjenë, Austri. Kemi një program shumë të ngjeshur. Kemi parë gërmimet e Linit, ishte një pamje shumë e bukur në liqen. Është mahnitëse. Kemi qenë më herët në një tur në Bullgari dhe aty kemi parë tuma të ngjashme, çka më kujton disi atë kulturë. Interesi im kryesor është kultura romake dhe më pëlqeu shumë rruga Egnatia në Elbasan, por mendoj që ky muze këtu është shumë informues dhe i mbajtur shumë mirë”, thotë Barbara Beckenberger.

Tuma e Kamenicës daton të jetë ndërtuar në shekullin e XII para Krishtit. Deri tani janë zbuluar 400 skelete njerëzore të asaj periudhe dhe rreth 3500 objekte arkeologjike. Ajo përfaqëson monumentin më të madh mortor të zbuluar në Shqipëri.

Tv Klan

Në dhjetor të vitit 2024, pothuajse shtatë muaj para se ministri rus i Transportit, Roman Starovoit të gjendej i vdekur nga një plagë e shkaktuar me armë zjarri afër makinës së tij Tesla në një paralagje të Moskës, hetuesit në Kursk kanë njoftuar për arrestimin e ish-drejtorit të një korporate për zhvillim.

Autoritetet dyshojnë se Igor Grabin i ka keqpërdorur fondet e buxhetit që janë ndarë për mbrojtje në rajonin e Kurskut, zonë kufitare me Ukrainën. Shuma kap vlerën e 250 milionë dollarëve.

Me këto fonde ishte paraparë ndërtimi i fortifikimeve që njihen ndryshe edhe si “dhëmbët e dragoit”, të dizajnuara për të parandaluar lëvizjen e tankeve dhe mbrojtjen e Kurskut nga pushtimi. Megjithatë, forcat ukrainase e kanë pushtuar Kurskun më 6 gusht të vitit 2024, duke e turpëruar Kremlinin, edhe për faktin se dhëmbët e dragoit është raportuar të jenë shkatërruar nga shiu dhe bora.Në periudhën pas arrestimit të Grabinit, edhe zyrtarë tjerë të lartë, përfshirë shefin e tij, janë ndaluar nën dyshimet për përfshirje në përvetësim. Ata dyshohej se paratë i kishin siguruar përmes nënkontraktorëve. Guvernatori i Kurskut, Aleksei Smirnov ka dhënë dorëheqje në dhjetor të vitit 2024. Ai është arrestuar katër muaj më vonë.

Smirnov nuk ka qenë guvernator në kohën kur janë bërë dyshimet për përvetësim. Në atë pozitë ka qenë Roman Starovoit, i cili ishte promovuar në pozitën e ministrit të Transportit në maj të vitit 2024.

Starovoit është shkarkuar nga detyra me vendim të presidentit rus, Vladimir Putin më 7 korrik. Trupi i tij i vdekur është gjetur disa orë më vonë. Hetuesit besojnë se vetëvrasja mund të ketë qenë shkaku.

Në Rusinë e Putinit, vjedhja dhe përvetësimi i fondeve publike nuk është as fenomen i ri dhe as i rrallë. Në fakt, korrupsioni vetëm sa është përkeqësuar pas më shumë se 25 vjetëve të Putinit në pushtet, vlerësojnë ekspertët.

Mirëpo, rasti i vdekjes së Starovoitit ka marrë vëmendje në mesin e elitave politike të Rusisë. Për disa vetëvrasja nuk është skenar i besueshëm dhe disa madje dyshojnë nëse ai ka qenë i gjallë në kohën e shkarkimit.

Ky emër i shtohet listës së zyrtarëve të vdekur në sektorin publik dhe privat në periudhën e fundit. Më shumë se tetë udhëheqës të kompanive të energjisë kanë vdekur në rrethana të dyshimta prej nisjes së luftës së plotë të Rusisë në Ukrainë në shkurt të vitit 2022.

Ilia Shumanov, ish-drejtor ekzekutiv në zyrën e organizatës Transparency International për Rusinë, ka thënë se kjo situatë reflekton se si lufta në Ukrainë i ka krijuar kokëçarje klasës udhëheqëse në Rusi – politikanëve, agjencive të sigurisë, zyrtarëve ushtarakë dhe oligarkëve.

“Datën e vdekjes së Starvoitit dhe kohën e vdekjes nuk e dimë. Para nënshkrimit të Putinit? Para nënshkrimit të dekretit për shkarkim?”, ka pyetur ai përgjatë një interviste.

“Ekzistojnë kaq shumë pyetje rreth këtij rasti”.

“Ka shenja të transformimit të sistemit brenda elitës prej kur ka nisur lufta… tani po shohim klane tjera. Grupe tjera që po tentojnë të luajnë sipas rregullave të tyre dhe që nuk koordinohen me njëri-tjetrin, sepse kjo është strategji e mbijetesës për ta”, ka thënë ai.

Presidenti rus, Vladimir Putin (në qendër të fotografisë), ministri rus i Mbrojtjes, Sergei Shoigu (në anën e majtë) dhe shefi i
Aleksandra Prokopenko, ish-këshilltare në Bankën Qendrore të Rusisë, ka thënë se rrethanat në të cilat ka vdekur Starovoiti “shpërfaqin edhe një herë se sa të paqarta janë bërë nivelet e larta brenda Qeverisë ruse në kohë krizash”.

“Askush nuk di asgjë dhe askush nuk dëshiron të marrë përgjegjësi”, ka thënë Prokopenko, tani ekspert në Qendrën për Rusi dhe Euroazi në kuadër të Institutit Carnegie.

“Shkolla e guvernatorëve”
Dilemat rreth përgatitje në rajonin e Kurskut, sidomos për “dhëmbët e dragoit”, janë transmetuar gjerësisht në mediat lokale prej fundit të vitit 2023.

Në maj të vitit 2024, Starovoit, i cili ka shërbyer si guvernator i Kurskut prej vitit 2019, është ngjitur në kabinetin e Putinit. Ky vendim ishte konsideruar njohje e punës së tij si teknokrat në nivelin lokal.

Si ministër i Transportit, Starovoit ka qenë mbikëqyrës i burokracisë federale, duke rregulluar gjithçka, prej hekurudhave deri te autostradat.

Kjo mbikëqyrje ka qenë në linjë me lidhjet shumëvjeçare të Starovoitit me miliarderin Arkady Rotenberg, mik fëmijërie i Putinit.

Pasuria e Rotenbergut dhe vëllait të tij rrjedh nga një kompani ndërtimi që ka fituar projekte jashtëzakonisht të shtrenjta, përfshirë ato gjatë Olimpiadës së mbajtur në Soçi më 2014.

Starovoit e ka mbikëqyrur projektin e Rotenbergut për ndërtim të Urës së Kërçit, përpjekje jashtëzakonisht e kushtueshme për të lidhur Gadishullin ukrainas të Krimesë, të pushtuar nga Rusia, me territorin rus. Ukraina është përpjekur disa herë që ta dëmtojë apo shkatërrojë urën.

Në kulturën ruse – biznesore, qeveritare apo kriminale – një aranzhim i tillë njihet si “kulm” – pra kur një person apo entitet e mbron apo i rri mbrapa dikujt tjetër.

Tre muaj pas shpërnguljes së Starovoitit në Moskë, trupat ushtarake ukrainase e kanë pushtuar Kurskun, dhe atë me jo shumë vështirësi.

Rezultatet kanë qenë të përziera. Nuk është se forcat ushtarake ruse janë larguar prej vijës së frontit në Ukrainë, sidomos nga pjesët ku ushtria ukrainase ka qenë në presion, megjithatë ka demonstruar vendosmërinë e ukrainasve.

Për më shumë, ky gjest e ka turpëruar Kremlinin, pasi kjo ka qenë hera e parë që trupa të huaj e kanë sulmuar dhe pushtuar territorin rus, prej Luftës së Dytë Botërore. Si përfundim, ushtria ruse është detyruar t’i angazhojë 11.000 trupa ushtarake të Koresë Veriore dhe ka tentuar për shtatë muaj që t’i largojë ushtarët ukrainas nga territori.

Më 9 dhjetor 2024, Grabin, i cili më parë ka shërbyer si zëvendësdrejtor i përgjithshëm i Korporatës për Zhvillim në rajonin e Kurskut, është arrestuar. Tetë ditë më vonë, shefi i tij, Vladimir Lukin është arrestuar, gjithashtu. Të dy janë akuzuar për përvetësim.

Smirnov, i cili ka qenë zëvendës i Starovoitit para se të merrte detyrën, është ndaluar në prill të vitit 2025.

Sipas raportimeve të gazetës Kommersant, dhe kanalit 112 në Telegram, ai e ka përmendur nëpër dëshmi Starovoitin. Në total, nëntë persona janë ndaluar apo kanë qenë të përfshirë për skandalin në Kursk.

Kronologjia e ngjarjeve
Më 7 korrik, në orën 9:20 të mëngjesit, sipas kohës lokale të Moskës, Kremlini ka bërë të ditur se Starovoit do të shkarkohet nga detyra e ministrit të Transportit.

Pak para orës 16:00, në kanalet në Telegram, që dihen se kanë lidhje me shërbimet ruse të sigurisë, është raportuar se Starovoit është gjendur i vdekur dhe që duket se ka kryer vetëvrasje.

Rreth orës 16:20, Komiteti Hetues i Rusisë e ka konfirmuar vdekjen e Starovotit, duke thënë se ai është gjetur në makinën e tij personale – Tesla – në një hapësirë parkimi në paralagjen Odintsovo të Moskës. “Versioni fillestar është vetëvrasja”.

Disa orë më vonë kanë nisur raportimet ndryshe-ndryshe për rastin – disa kanë thënë se trupi është gjetur afër makinës, të tjerë brenda makinës. Disa kanë thënë se Starovoit mund të ketë vdekur një ditë më parë.

Revista Forbes për rajonin e Rusisë ka thënë se Starovoit mund të ketë vdekur në natën e 5 korrikut. Një ligjvënës me nam ka thënë se ai ka vdekur “kohë më parë”.

Nëse vërtetohet, ky fakt mund të bëhet problem për Kremlinin: a e ka ditur Putini që Starovoit ka vdekur në kohën kur është nënshkruar dekreti për shkarkimin e tij?

Sergey Markov, analist politik i afërt me Kremlinin, ka sugjeruar që ai është vrarë për t’ia pamundësuar dhënien e dëshmive kundër zyrtarëve tjerë.

Kush përfiton?
Për shumë rusë situata me korrupsion është përkeqësuar nën Putinin, diçka që e ka përsëritur shpesh edhe politikani tashmë i vdekur, Aleksei Navalny.

Në masë ekziston perceptimi se korrupsioni tolerohet, sidomos nga Kremlini dhe agjencitë e sigurisë, përveç nëse reflektohet keq te Putini apo te ndonjë agjenci për siguri kombëtare.

Ky mund të jetë njëri prej faktorëve që ka çuar në vdekjen e Starovoitit, ka thënë Shumanov.

“Nëse jeni person përgjegjës pse forcat ushtarake ruse kanë hyrë në tokën ruse, jeni shumë më i keq sesa Navalny”, ka thënë ai. “Ne as nuk e dimë rastin penal ndaj tij, mund të ketë qenë për tradhti” dhe jo për përvetësim.

“Kush mund të përfitojë nga vdekja e tij?”, ka pyetur Shumanov.

“Ajo çfarë ka ndodhur është e pashembullt në historinë moderne të Rusisë dhe është sinjal i qartë që diçka brenda sistemit ka nisur të funksionojë krejtësisht ndryshe”, ka thënë Tatyana Stanovaya, eksperte e njohur e politikave ruse, në një koment të publikuar së fundmi./rel

Dhjetë persona, përfshirë gjashtë fëmijë, janë vrarë si pasojë e një sulmi ajror izraelit në Gazë, teksa kanë qenë duke pritur për t’i mbushur shishet me ujë, kanë raportuar autoritetet shëndetësore palestineze.

Trupat e tyre janë dërguar në spitalin Nuseirat’s al-Awda, ku janë duke u trajtuar edhe 16 persona të plagosur, prej tyre shtatë janë fëmijë.

Dëshmitarët kanë thënë se droni ka lëshuar një raketë në turmën që ka qenë duke pritur me shishe të thata në duar, në afërsi të një cisterne uji në kampin e refugjatëve al-Nuseirat.

Ushtria izraelite ka thënë se ka ndodhur një “gabim teknik” pasi në sulm është shënjestruar një “terrorist” i Xhihadit Islamik, dhe për pasojë municioni ka rënë në një tjetër territor.

Ushtria ka thënë se incidenti është duke u rishikuar dhe se është duke punuar për të zvogëluar dëmin civil.

Në disa pamje të paverifikuara janë parë fëmijë të përgjakur dhe të vdekur, ndërsa të tjerë duke bërtitur afër, në gjendje paniku dhe dëshpërimi.

Për sulmin është raportuar pas intensifikimit të sulmeve ajrore izraelite në Rripin e Gazës.

Një zëdhënës i Agjencisë së Gazës për Mbrojtje Civile ka thënë se 19 palestinezë tjerë janë vrarë të dielën në tri sulme të ndryshme në ndërtesa të banimit në qendër të Gazës dhe qytetin e Gazës.

Ndaras, Komiteti Ndërkombëtar i Kryqit të Kuq ka thënë se ka trajtuar më shumë viktima në spitalin në Rafah në gjashtë javët e fundit sesa në 12 muajt paraprakë.

Të shtunën, në spitalin Nasser në jug të Gazës është thënë se kanë vdekur 24 persona afër një qendre për shpërndarje ndihmash. Dëshmitarët kanë thënë se trupat ushtarake izraelite kanë nisur sulme teksa njerëzit kanë tentuar të furnizohen me ushqim.

Ushtria izraelite ka thënë se nuk është në dijeni për individë të plagosur nga ushtarët e tij afër qendrës për ndihma.

Agjencia e Kombeve të Bashkuara për të Drejta të Njeriut ka thënë të premten se i ka regjistruar 789 vrasje që janë kryer në zonat për ndihma.

Lufta në Gazë ka nisur pasi militantët e Hamasit – organizatë e shpallur terroriste nga Shtetet e Bashkuara dhe fuqi tjera – i kanë sulmuar komunitetet në kufirin izraelit më 7 tetor 2023, çka ka çuar në vdekjen e 1.219 njerëzve, kryesisht civilë.

Si pasojë e veprimeve hakmarrëse të Izraelit janë vrarë të paktën 57.882 palestinezë në Gazë, kryesisht gra dhe fëmijë, sipas autoriteteve shëndetësore palestineze.

Pjesa më e madhe e popullsisë në Gazë është detyruar të zhvendoset disa herë.

Më shumë se 90 për qind e shtëpive vlerësohet të jenë dëmtuar rëndë apo shkatërruar plotësisht. Sistemi shëndetësor dhe sistemet e ujit dhe higjienës janë shkatërruar, ndërsa ka mungesa të mëdha për ushqim, ilaçe, karburante dhe qendra strehimi./rel

Komiteti për Trashëgiminë Botërore i UNESCO-s, në mbledhjen e 47-të në Paris, miratoi një amendament të propozuar nga përfaqësuesit maqedonas, me të cilin u kërkua shtyrja e futjes së rajonit të Ohrit në Listën e Vendeve të Trashëgimisë Botërore në Rrezik.

Me këtë, autoritetet maqedonase morën kushte të reja – që deri më 1 shkurt të vitit 2026 të dorëzojnë një raport për masat e ndërmarra për mbrojtje.

Amendamenti u dorëzua nga delegacioni maqedonas, i cili kërkoi të tërhiqet Projektvendimi që propozon qartazi regjistrimin e rajonit si të rrezikuar.

Komiteti diskutoi për herë të tretë për statusin e Ohrit, në rrethana kur 39 organizata të shoqërisë civile nga Maqedonia e Veriut dhe Shqipëria kërkuan që ai të regjistrohet në Listën e Vendeve të Trashëgimisë Botërore në Rrezik, me arsyetimin se kjo do t’i hapte rrugë një procesi të rehabilitimit, nën mbikëqyrjen e vazhdueshme të Agjencisë së Kombeve të Bashkuara për Arsim, Shkencë dhe Kulturë – UNESCO.

Pas votimit, përfaqësuesit e tyre thanë se janë “të neveritur nga vendimi”, por se do të vazhdojnë të luftojnë për mbrojtjen e rajonit të Ohrit.

Pavarësisht tri misioneve të ekspertëve dhe paralajmërimeve tash e dy dekada, ata theksojnë se Komiteti sërish nuk e miratoi rekomandimin për ta futur Ohrin në Listën e Vendeve të Trashëgimisë Botërore në Rrezik.

Organizatat e shoqërisë civile besojnë se një gjë e tillë shpërblen neglizhencën institucionale dhe minon vetë parimet e konventës së UNESCO-s.

“Ne besojmë se vendimi i Komitetit tradhtoi parimet mbi të cilat u formua dhe minoi – në mënyrë aktive – vetë thelbin e Konventës së Trashëgimisë Botërore”, thanë përmes një deklarate organizatat e shoqërisë civile.

Pas vendimit, ato bënë thirrje që Maqedonia e Veriut dhe Shqipëria ta shfrytëzojnë me përgjegjësi këtë mundësi, “duke i ndalur menjëherë të gjitha projektet shkatërruese” dhe “duke treguar përkushtim të vërtetë për ruajtjen e vlerave unike të rajonit”.

Çfarë do të thoshte vendosja e Ohrit në Listën e Vendeve të Trashëgimisë Botërore në Rrezik?

Nëse Komiteti do ta vendoste Ohrin në Listën e Vendeve të Trashëgimisë Botërore në Rrezik, Maqedonia e Veriut dhe Shqipëria do të obligoheshin të krijonin një plan të posaçëm masash korrigjuese, për ta rikthyer Ohrin në “gjendjen e dëshiruar të ruajtjes”, thotë për Radion Evropa e Lirë Iskra Stojkovska, nga organizata Front 21/42, e cila është në mesin e atyre që kërkojnë që Ohri të vendoset në atë listë.

“Kjo do të thoshte që shteti duhet të miratojë një sërë masash të sakta korrigjuese, që do të çonin nga gjendja aktuale në gjendjen e dëshiruar të vlerave. Kjo do ta vinte shtetin nën një trysni shumë më të madhe nga UNESCO-ja, por, gjithashtu, ai do të fitonte qasje në fonde shtesë”, thotë Stojkovska.

Përveç kësaj, ministrat e Mbrojtjes së Mjedisit dhe të Kulturës do të duhej të miratonin një ndalesë të veçantë për kryerjen e aktiviteteve të ndryshme në zonën e mbrojtur.

Kjo parashihet edhe me Ligjin për Menaxhimin e Trashëgimisë Botërore Natyrore dhe Kulturore.

Sesioni i 47-të i Komitetit të Trashëgimisë Botërore filloi më 6 korrik në selinë e UNESCO-s në Paris, ku vazhdojnë diskutimet nëse disa vende të trashëgimisë botërore, përfshirë rajonin e Ohrit, duhet të përfshihen në Listën e Vendeve të Trashëgimisë Botërore në Rrezik.

Në dokument, UNESCO kërkoi që Maqedonia e Veriut të forcojë menjëherë mbrojtjen e Kënetës së Studençishtës, t’i ndalojë të gjitha aktivitetet ndërtimore aktuale dhe të planifikuara në afërsi të saj, përfshirë kompleksin hotelier “Gorica”, dhe të rishikojë draft-ligjin për shpalljen e kënetës park natyror.

Qëllim thuhet se është harmonizimi i ligjit me standardet e Bashkimit Ndërkombëtar për Ruajtjen e Natyrës (IUCN) dhe me konstatimet e misionit monitorues të UNESCO-s nga viti 2024.

Në vend të mbrojtjes, heshtje dhe akuza të ndërsjella

Por, pavarësisht asaj që thuhet në Projektvendim, Qeveria maqedonase njoftoi se do t’u kërkojë përfaqësuesve të institucioneve maqedonase që marrin pjesë në mbledhjen e UNESCO-s, të propozojnë një amendament për tërheqjen e propozimit.

Në ditët para votimit, partitë shkëmbyen akuza: Qeveria akuzoi Qeverinë e mëparshme për neglizhencë sistematike, ndërsa opozita pretendoi se Qeveria aktuale nuk ka ndërmarrë asnjë masë thelbësore.

E, sipas organizatave të shoqërisë civile, autoritetet lokale dhe qendrore për vite me radhë kanë lejuar ndërtime të pakontrolluara dhe kanë injoruar rekomandimet e UNESCO-s.

“Ne kemi punuar në Ohër që 11 vjet dhe nuk ka asnjë ndryshim midis qeverisjes lokale dhe asaj qendrore, asnjë ndryshim se cila parti qeveris në cilin nivel… Grindjet mes tyre se kush është fajtor tregojnë vetëm se ata nuk kanë lëvizur asnjë milimetër”, thotë Stojkovska.

Shtatëmbëdhjetë organizata nga Maqedonia e Veriut, 13 nga Shqipëria dhe një rrjet evropian prej 15 organizatash kërkuan nëpërmjet një letre nga Komiteti që rajoni i Ohrit të vendoset në Listën e Vendeve të Trashëgimisë Botërore në Rrezik.

Organizatat maqedonase përfshijnë: Eco Logic, Transparency International – Macedonia, Ohrid SOS dhe Institutin Societas Civilis për Demokraci.

Nga Shqipëria janë, mes tjerave, Fondacioni H2O dhe Aktiv Mobiliti.

Organizata nga Republika Çeke, Kroacia, Serbia, Bullgaria kërkojnë gjithashtu mbrojtjen e Ohrit.

Ato thonë se për shkak të moszbatimit të të gjitha planeve dhe projekteve të mëparshme për mbrojtje dhe për shkak të “shkatërrimit”, Ohri po humbet autenticitetin e tij.

“Ne i kërkojmë Komitetit të Trashëgimisë Botërore, në sesionin e tij të 47-të në Paris, që të mbrojë dhe ruajë rajonin e Ohrit për të gjitha brezët e ardhshëm, duke miratuar Projektvendimin për përfshirjen e tij në Listën e Vendeve të Trashëgimisë Botërore në Rrezik”, thuhet në deklaratën e tyre të përbashkët.

Ato kujtojnë se alarmet e para për urbanizimin e tepërt dhe degradimin e Ohrit iu dërguan UNESCO-s që në vitin 1998 dhe shtojnë se, pavarësisht rekomandimeve nga misionet e ekspertëve në vitet 2017, 2020 dhe 2024, nuk është ndërmarrë gati asgjë thelbësore.

Projektet infrastrukturore që rrezikojnë edhe më shumë rajonin, vazhdojnë, si: autostrada A2 dhe hekurudha e Korridorit 8.

Kërkesat për vlerësimin strategjik mjedisor dhe vlerësimin e ndikimit në trashëgimi, gjithashtu, nuk janë zbatuar.

Ekspertët e UNESCO-s kanë konfirmuar tri herë se Ohri i plotëson kriteret për përfshirje në Listën e Vendeve të Trashëgimisë Botërore në Rrezik, por se Komiteti po u jep afate të reja Maqedonisë së Veriut dhe Shqipërisë, sipas organizatave të shoqërisë civile.

Ato paralajmërojnë se kjo “kohë për reformë” është duke u keqpërdorur për projekte të reja të dëmshme dhe degradim të mëtejshëm.

I njohur në botë, i shkatërruar në shtëpi

Rajoni i Ohrit u shpall trashëgimi botërore në vitin 1979, ndërsa në vitin 2019 ky status u zgjerua edhe në pjesën shqiptare të liqenit, për shkak të vlerave natyrore të tij.

Liqeni i Ohrit është njëri prej liqeneve më të vjetra dhe më të thella në Evropë.

Statusi i trashëgimisë botërore rrit ndjeshëm dukshmërinë globale – çka sjell rritje të turizmit dhe përfitime ekonomike për banorët lokalë, si: vende të reja pune apo zhvillim të bizneseve të vogla.

Ai sjell edhe përfitime të tjera – nga mbrojtja ligjore dhe institucionale deri te qasja në ndihma teknike dhe financiare ndërkombëtare.

Por, rajoni i Ohrit është de facto në rrezik dhe kjo duhet pranuar, thotë Stojkovska.

“Ohri është shkatërruar nga korrupsioni dhe krimi – ne vetë po e shkatërrojmë”, përfundon ajo./REL

Është një mrekulli e natyrës në jug të vendit tonë.

Vjosa që tashmë është park kombëtar, ndërsa një pjesë e lumit është kthyer në destinacion për sporte ujore, një pjesë e zonës në afërsi të zonës së mbrojtur Pishë Poro-Nartë.

Është një udhëtim me kajak që zgjat rreth 3 orë. Nisja bëhet në fshatin Dëllënjë të Vlorës e lundrimi vijon deri në daljen në det. Turet janë një dhe dy ditore.

Për shumë persona kjo eksperiencë mund të duket e frikshme. Por organizatorët e këtyre tureve marrin të gjitha masat për sigurinë.

Lundrimet me kajak në Vjosë kanë nisur këtë vit. Megjithatë, interesi nga vizitorët është i lartë. Preferohet jo vetëm nga vizitorë vendas apo nga rajoni, por edhe nga turistë të huaj. Ata provojnë këtë eksperiencë të veçantë në vendin tonë.

Përgjatë udhëtimit, lumi Vjosa ofron shumë. Vizitorët mund të shikojnë natyrën e rrallë, por edhe specie të veçanta, si p.sh. flamengot. Gjatë lundrimit me kajak mund të hasen edhe banorë të këtij habitati. Me këtë nismë, lundrimet me kajak synojnë promovimin e të gjithë zonës së Vjosës.

Turet dy ditore kanë të përfshirë edhe fjetjen dhe ushqimin. Dhe turistët mund të provojnë gatimet tradicionale të zonës. Ky destinacion në jugun e vendit tonë po tërheq gjithnjë e më shumë vizitorë, kryesisht ata që zgjedhin të pushojnë në Vlorë.

Klan News

Një 19-vjeçar është arrestuar ditën e sotme, pasi një ditë më parë shkaktoi një aksident rrugor, në të cilin humbi jetën pasagjeri me të cilin po udhëtonte.

Mësohet se i riu dyshohet se ka humbur kontrollin nga automjeti që drejtonte dhe ka dalë nga rruga.

Për shkak të aksidentit, ka ndërruar jetë pasagjeri 18-vjeçar dhe ka mbetur i lënduar pasagjeri tjetër që ndodhej në automjet.

“Specialistët e Qarkullimit Rrugor arrestuan shtetasin D. D., 19 vjeç, pasi ditën e djeshme, në autostradën “Tiranë–Durrës”, dyshohet se ka humbur kontrollin mbi drejtimin e automjetit dhe për pasojë automjeti ka dalë nga rruga.

Nga aksidenti ka humbur jetën pasagjeri, shtetasi E. B., 18 vjeç, banues në Durrës, si dhe janë dëmtuar drejtuesi i automjetit dhe pasagjeri tjetër, shtetasi E. Sh., 19 vjeç, të cilët ndodhen në spital, nën kujdesin e mjekëve”, njofton policia.

Materialet i kaluan Prokurorisë për veprime të mëtejshme.

Fluksi i turistëve të huaj në bregdetin e Durrësit dhe Golemit është shtuar gjatë dhjetëditëshit të dytë të korrikut.

Pushues nga vende të ndryshme zgjedhin plazhet shqiptare, ku gjejnë çmime më të lira dhe mikpritje.

“Jam nga Turqia. Është hera e parë që vij këtu. Uji është pak ftohtë, por çdo gjë është në rregull. Çmimet këtu janë më të lira se në Stamboll. Njerëzit janë të mirë”, thotë një prej tyre.

“Vij nga Bosnja dhe është hera e parë këtu. Mendoj që është një vend i bukur me njerëz të bukur”, shprehet një tjetër.

Krahas turistëve të huaj, nuk mungojnë as shqiptarët nga Kosova dhe Maqedonia e Veriut, të cilët i bashkohen pushimeve buzë Adriatikut, duke e kthyer bregdetin në një nga destinacionet më të frekuentuara të kësaj vere.

Sezoni pritet të kulmojë me një numër edhe më të lartë pushuesish në javët në vazhdim.

Klan News

Lideri i Koresë së Veriut, Kim Jong Un i ka ofruar Moskës “mbështetje të palëkundur” në luftën e saj në Ukrainë, sipas raportimeve të mediave shtetërore.

Në bisedimet me ministrin e Jashtëm rus, Sergei Lavrov në Korenë e Veriut, Kim ka thënë se Pheniani është në linjë me “të gjitha veprimet e udhëheqjes ruse” për të luftuar “rrënjën e problemit të krizës ukrainase”.

Zyrtarët perëndimorë besojnë se Pheniani i ka dërguar rreth 11.000 trupa ushtarake në Rusi vitin e kaluar për të luftuar kundër Ukrainës.

Presidenti rus, Vladimir Putin e ka nisur luftën në shkallë të plotë në Ukrainë në shkurt të vitit 2022.

Sipas agjencisë shtetërore të lajmeve të Koresë Veriore, KCNA, Kim dhe Lavrov janë takuar të shtunën “në një atmosferë të ngrohtë miqësore”.

Lideri koreanoverior ka shprehur “besimin e plotë që ushtria dhe populli rus do të fitojnë në plotësimin e këtij synimi për mbrojtje të dinjitetit dhe interesave bazike të shtetit”.

Në Telegram, Ministria e Jashtme ruse e ka publikuar një video ku shihen dy zyrtarët duke përshëndetur njëri-tjetrin me përqafime.

Rikonfirmimi i Koresë së Veriut për mbështetje ushtarake të Rusisë vjen teksa presidenti amerikan, Donald Trump ka bërë të ditur për rikthim të ndihmave ushtarake në Ukrainë, pas një pauze të vogël.

Trump i ka thënë transmetuesit televiziv NBC të enjten se ka bërë marrëveshje me NATO-n që Shtetet e Bashkuara t’i dërgojnë Ukrainës sisteme ajrore për mbrojtje, përmes aleancës.

Njoftimi i Trumpit ka ardhur në kohën e intensifikimit të sulmeve ajrore ruse në Ukrainë.

Pheniani e ka pranuar në prill të këtij viti se ka të angazhuara trupa ushtarake në Rusi, disa muaj pasi Perëndimi ka ofruar dëshmi se numër i madh ushtarësh janë në vijën e frontit mes Rusisë dhe Ukrainës.

Kimi e ka nënshkruar një marrëveshje me Putinin në qershor të vitit të kaluar, duke u pajtuar për të mbështetuar njëri-tjetrin, nëse ndonjëri shtet përballet me “agresion”.

Përveç ushtarëve, Koreja e Veriut është zotuar për të dërguar mijëra punëtorë për rindërtim të rajonit rus Kursk, të shkatërruar nga lufta, ka bërë të ditur shefi i sigurisë së Moskës muajin e kaluar.

Putin e quan luftën “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre./REL

Ministri i Punëve të Jashtme, Igli Hasani ka marrë pjesë në Forumin e Dubrovnikut 2025, në Kroaci.

Përmes një postimi në rrjetet sociale, Hasani tha se mesazhi kryesor që prodhoi ky samit, që lidhet me përkushtimin ndaj mbrojtjes së paqes në rajon.

Ai thekson se lufta e Ukrainës na kujton se paqja duhet mbrojtur dhe jo të merret si e mirëqenë.

“Mesazh i qartë nga Evropa Juglindore në përfundim të Forumit të Dubrovnikut:

Përkushtimi ynë ndaj paqes mbetet i palëkundur.

Lufta e Ukrainës na kujton se paqja duhet mbrojtur, dhe jo të merret si e mirëqenë.

Rikonfirmojmë qëndrimin tonë ndaj solidaritetit, qëndrueshmërisë dhe ndaj një Evrope të bashkuar.

Mirënjohje Ministrit për Çështjet e Jashtme dhe Evropiane të Kroacisë, Gordan Grlić-Radman, për mikpritjen me qëllim dhe vision”, shkruan Hasani.

Bashkimi Evropian dhe Meksika kanë shprehur zhgënjim pas kërcënimit të presidentit amerikan, Donald Trump për vendosje të tarifës prej 30 për qind në importet e tyre nga 1 gushti.

Meksika e ka kritikuar atë që e ka quajtur “marrëveshje të padrejtë” dhe ka insistuar që sovraniteti i saj është i panegociueshën, derisa shefja e BE-së, Ursula von der Leyen ka kërcënuar me marrjen e “kundërmasave proporcionale”, nëse do të ketë nevojë.

Megjithatë, zyrtarë nga të dyja palët kanë thënë se dëshirojnë t’i vazhdojnë negociatat me Shtetet e Bashkuara.

Trump ka paralajmëruar që do të vendosë tarifa edhe më të larta në importe, nëse ndonjëra prej partnereve tregtare vendosë të hakmerret.

Këtë javë, Trumpi i ka bërë të ditura tarifat e reja edhe për mallrat e Japonisë, Koresë së Jugut, Kanadasë, Brazilit dhe disa vendeve tjera – përfshirë Serbinë dhe Bosnje Hercegovinën – prej 1 gushtit.

Në letrën dërguar Bashkimit Evropian, Trump ka thënë se deficiti tregtar i SHBA-së përbën kërcënim të sigurisë.

“Ne kemi pasur vite për të diskutuar marrëdhënien tonë tregtare me BE-në dhe kemi ardhur në përfundim që duhet të heqim dorë nga ky deficit tregtar i madh, i vazhdueshëm dhe i kërcënuar nga tarifat, politikat dhe barrierat tregtare”, ka shkruar Trump në letrën drejtuar BE-në.

“Fatkeqësisht, marrëdhënia jona ka qenë larg reciprokes”.

Në një intervistë për kanalin televiziv amerikan, Fox News, të transmetuar mbrëmjen e së shtunës, Trump ka thënë se disa shtete “janë shumë të shqetësuara”, por ka insistuar që tarifat nënkuptojnë se në SHBA po hyjnë qindra miliarda dollarë.

BE-ja ka qenë shënjestar e shpeshtë e Trumpit për kritika. Më 2 prill, ai pati propozuar 20 për qind tarifë në mallrat e bllokut evripian, ndërsa më vonë ka kërcënuar me rritje të tarifës prej 50 për qind, për shkak të bllokadës në procesin e negociatave.

Uashingtoni dhe Brukseli kanë shpresuar në arritjen e një marrëveshjeje para afatit të fundit, më 9 korrik, mirëpo nuk është bërë ndonjë njoftim zyrtar për dakordim.

Në vitin 2024, deficiti tregtar amerikan me bllokun evropian ka qenë 235.6 miliardë dollarë, sipas zyrtarëve amerikanë për çështje tregtare.

Von der Leyen ka thënë se BE-ja vazhdon të jetë e gatshme për të punuar drejt një marrëveshjeje deri më 1 gusht.

Presidenti francez, Emmanuel Macron ka thënë se “kundërshton ashpër” njoftimin e Trumpit.

Ai ka sugjeruar që nëse nuk arrihet asnjë marrëveshje, atëherë BE-ja duhet t’i përshpejtojë përgatitjet për kundërmasa kredibile.

Disa liderë tjerë të BE-së kanë bërë thirrje për marrëveshje me Trumpin.

Kryeministrja italiane, Giorgia Meloni ka thënë se beson që mund të arrihet një “marrëveshje e drejtë”.

“Nuk ka asnjë kuptim që të nxitet luftë tregtare mes dy anëve të Atlantikut”, ka thënë ajo.

Deri më tani, presidenti amerikan ka arritur marrëveshje tregtare me dy vende – Mbretërinë e Bashkuar dhe Vietnamin – derisa bisedimet vazhdojnë edhe me shumë vende tjera.

Në fillim të prillit, Trump ka vendosur tarifë 10% për importet nga Kosova dhe ndaj pothuajse të gjithë partnerëve tjerë tregtarë.

Ekspertët kanë vlerësuar se tarifat amerikane do të kenë shumë ndikim në Kosovë, për shkak të varësisë së madhe nga importet.

Presidentja e Kosovës, Vjosa Osmani pati thënë se zyra e saj e ka bërë gati një ligj që do të mundësonte heqjen e tarifave prej 10 për qind ndaj mallrave të importuara nga SHBA-ja, por se për miratimin e këtij ligji duhet fillimisht të konstituohet Kuvendi i ri – diçka që nuk ka ndodhur ende, as pas dhjetëra tentimesh./REL

Prania e IKMT-së dhe forcave policore në Theth për shembjen e strukturave, duket se ka bërë bashkë banorët si një herë e një kohë.

Banorët, marrë shkak nga situata e gjendur, janë mbledhur pranë Kishës, së bashku me burrat e Dukagjinit të bashkuar.

Pamjet tregojnë kuvendin e Thethit, të ulur këmbëkryq, teksa diskutojnë se cili do të jetë qëndrimi i tyre përballë shtetit që po u shemb çdo strukturë që nuk disponon leje.

Kjo situatë, ka bërë e një herë që banorët e Thethit t’i rikthehen traditës së kuvendit pranë Kishës, në diskutime për hapin e tyre të radhës. Padyshim, që kjo mbledhje tregon bashkim të forcave qytetarë, ashtu sikurse dhe të vlerave kulturore të kësaj zone.

Sakaq, deri më tani janë prishur 70 objekte pa leje në zonën e Thethit. Situata sot paraqitet më e qetë sot, por mbetet për t’u parë se cili do të jetë reagimi i banorëve dhe pronarëve të strukturave.

Më herët IKMT ka bërë të ditur se janë konstatuar rreth 80 objekte pa leje në këtë zonë, por burime pranë saj bëjnë të ditur se ky numër mund të jetë edhe më i lartë.

/tvklan

Kryeministri i Shqipërisë, Edi Rama ka ndarë disa detaje lidhur me projektin “Shkolla Verore 2025”.

Përmes një postimi në rrjete sociale, Rama thotë se kjo e gjitha është një eksperiencë edukative, por edhe argëtuese, për më shumë se 1 mijë nxënës.

Më tej, ai thekson se ky program ka të përfshirë 150 profesionistë, mësues, psikologë, oficerë sigurie dhe punonjës socialë, ashtu sikurse dhe 100 të rinj vullnetarë nga gjimnazistët.

““Shkolla Verore 2025” – Një eksperiencë edukative dhe argëtuese për më shumë se 1000 fëmijë nga klasa I-V
10 shkolla pjesëmarrëse në Tiranë, Kamëz dhe Durrës, 150 profesionistë, mësues, psikologë, oficerë sigurie dhe punonjës socialë dhe 100 të rinj vullnetarë nga gjimnazet të angazhuar në këtë projekt

Programi solli art, zeje, kodim, gjuhë të huaj, sport, projekte dhe mbi të gjitha pasion për librin”, shkruan Rama në rrjete sociale.

Në kuadër të kontrolleve për sigurinë në det, policia ka bllokuar 36 mjete lundruese nga Ksamili në Koman.

Sipas uniformave blu mësohet se janë kontrolluar 254 mjete lundruese, nga të cilat 36 janë bllokuar për shkelje të perimetrit të sigurisë detare, ushtrim aktivitetesh jashtë zonave të miratuara dhe pa dokumentacion përkatës.

Mjetet e bllokuara janë 24 Jet Ski, 5 Skafe, 4 gomone dhe 3 varka metalike me motor uji të instaluar.

“Policia Kufitare në bashkëpunim me Njësinë Policore Detare në kuadër të operacionit “SIGURIA DETARE”, ka intensifikuar kontrollet përgjatë gjithë vijës bregdetare, në zonat liqenore dhe lumore, me fokus në garantimin e sigurisë për pushuesit dhe përdoruesit e mjeteve lundruese.

Gjatë javës së fundit, janë kontrolluar 254 mjete lundruese, nga të cilat 36 janë bllokuar për Shkelje të perimetrit të sigurisë detare, ushtrim aktivitetesh jashtë zonave të miratuara dhe pa dokumentacion përkatës.

Mjetet e bllokuara janë 24 Jet Ski, 5 Skafe, 4 gomone dhe 3 varka metalike me motor uji të instaluar.

13 mjete lundruese janë konstatuar duke lundruar brenda perimetrit të sigurisë, duke rrezikuar jetën e pushuesve. Drejtuesit e tyre janë ndëshkuar me masë administrative 100,000 lekë secili.

Ndërkohë nga Ksamili në Velipojë, Policia Kufitare ka ndërhyrë në 10 raste për t’u ardhur në ndihmë 18 shtetasve, të cilët ndodheshin në rrezik për shkak të dallgëve të forta apo defekteve në mjetet e tyre lundruese”, njofton policia.

Policia Kufitare apelon për respektimin me rigorozitet të rregullave për përdorimin e mjeteve lundruese që të mos shkelin perimetrin e sigurisë, të lundrojë vetëm në zonat e lejuara dhe të jenë të pajisur me mjetet e shpëtimit.

Në kuadër të aksionit të ndërmarrë nga Qeveria Shqiptare për të goditur paligjshmërinë në fushën e ndërtimit, Operatori i Shpërndarjes së Energjisë Elektrike ka nisur të marrë masa për të ndaluar lidhjet e reja me rrjetin elektrik.

Përmes një deklaratë zyrtare, OSHEE thekson se nuk do të pranojë asnjë kërkesë për lidhje të re me rrjetin elektrik nga ndërtesa që nuk kanë leje ndërtimi ose që nuk kanë zbatuar kushtet e përcaktuara në lejen ekzistuese.

Sipas OSHEE, vëmendje e veçantë do t’u kushtohet kërkesave të reja për lidhje, me qëllim që të parandalohet çdo përpjekje për të anashkaluar ligjin dhe për të garantuar një sistem të drejtë e të sigurt për të gjithë qytetarët.

Njoftimi i OSHEE:

Në kuadër të aksionit të nisur nga qeveria shqiptare për të goditur paligjshmërinë në fushën e ndërtimit, Operatori i Shpërndarjes së Energjisë Elektrike (OSHEE) shprehet i vendosur për të kontribuar në këtë përpjekje të përbashkët institucionale.

OSHEE është angazhuar për të forcuar kontrollin dhe për të mos lejuar asnjë lidhje të re me rrjetin elektrik për ndërtimet që nuk përmbushin kriteret ligjore.

Vëmendje e veçantë do t’u kushtohet kërkesave për lidhje të reja, me qëllim që të shmangen çdo përpjekje për të anashkaluar ligjin.

OSHEE nuk do të pranojë kërkesat për lidhje me energji elektrike të ndërtesave pa leje ndërtimi ose që nuk kanë zbatuar kushtet e lejes ndertimit.

OSHEE mbetet e angazhuar të veprojë në përputhje me legjislacionin dhe të kontribuojë për një mjedis të ndërtuar të sigurt, të ligjshëm dhe në shërbim të qytetarëve.

Ka vijuar edhe këtë të dielë aksioni i IKMT-së për prishjen e ndërtimeve pa leje në Theth.

Situata ditën e sotme paraqitet më e qetë, ndërsa bëhet e ditur se deri më tani janë prishur rreth 70 objekte pa leje.

Më herët IKMT ka bërë të ditur se janë konstatuar rreth 80 objekte pa leje në këtë zonë, por burime pranë saj bëjnë të ditur se ky numër mund të jetë edhe më i lartë.

Gjatë ditës së sotme pritet që banorët e zonës së Thethit të mbajnë edhe një takim mes tyre për të koordinuar qëndrimin që do të mbajnë lidhur me aksionin e IKMT-së.

Tv Klan

Ditën e sotme ka vijuar në Tiranë lirimi i hapësirave publike të zëna në mënyrë të kundërligjshme.

Mësohet se është liruar një hapësirë e përbashkët pallati, e kthyer në mënyrë të paligjshme në vendparkim automjetesh, në rrugën “Medar Shtylla”.

Për rastin u procedua penalisht shtetasi A. D., 39 vjeç, i akuzuar për veprën penale “Pushtimi i tokës”.

“Shërbimet e Komisariatit të Policisë Nr. 2, në bashkëpunim me strukturat e Policisë Bashkiake dhe të Inspektoratit të Mbrojtjes së Territorit, ndërhynë në një hapësirë të përbashkët pallati në rrugën “Medar Shtylla”, e cila ishte zënë pa leje dhe ishte kthyer në një vendparkim automjetesh.

Në përfundim të veprimeve për rastin, u procedua penalisht shtetasi A. D., 39 vjeç, për veprën penale “Pushtimi i tokës”. Automjetet e parkuara në mënyrë të kundërligjshme u tërhoqën me karrotrec”, njofton policia.

Policia e Tiranës vijon apelimin se nuk do të tolerohet asnjë rast i cenimit të hapësirave publike.