Detaje të reja dalin nga dosja hetimore për zhdukjen e 69 milionë lekëve të rinj në filialin e Postës Shqiptare në Durrës, ku ish-drejtoresha është lënë në burg, ndërsa arrest shtëpie është vendosur për dy zyrtaret e tjera të përfshirë në këtë skemë.

Sipas hetimeve të Prokurorisë dhe Policisë, tre zyrtaret dyshohet se gjatë muajve prill dhe maj 2026 nuk kanë arkëtuar në degët Shijak dhe Krujë shumën prej 69 milionë lekësh të rinj.

Hetimet vijojnë për të zbardhur të gjithë skemën, përfshirjen e mundshme të personave të tjerë dhe destinacionin përfundimtar të shumës së konsiderueshme financiare.

Në dosje zbulohen të gjithë ‘levizjet’ që ish-drejtoresha Elisabeta Mataj, ish-shefja e inancës, Valbona Duni, dhe ish-arkëtarja Paola Dana kanë bërë.

Referuar pamjeve filmike të administruara nga kamerat e sigurisë në ambientet e Filialit Durrës qendër (bashkëlidhur kallëzimit), rezulton se nga ana e punonjëseve të postës lëvizjet e vlerave monetare janë kryer në kundërshtim me aktet ligjore në fuqi dhe të rregullores së brendshme të Posta Shqiptare Sh.a.
Konkretisht më datë 02.04.2026 ora 15:15:29, në filialin e Postës Shqiptare Durrës vijnë vlerat monetare të shoqëruara nga një punonjës i postës dhe nga punonjësi i SHPSF “Nazeri”;
Ora 15:29:12, shefja e financës Valbona Duni, në ambientet e arkës, e pranishme Paola Dana dhe ndihmës arkëtarja, i bën me shenjë me dorë punonjësit të postës të marri thesin me vlera monetare;

Ora 15:29:22 shefja e financës Valbona Duni bashkë me një punonjës poste marrin në arkë, e pranishme Paola Dana, një thes me vlera monetare i porsaardhur me eskortë shoqërimi nga banka;

Ora 15:29:50 shefja e financës Valbona Duni i merr thesin me vlera monetare punonjësit të postës dhe hyn në zyrën e saj;

Ora 15:30:05 Valbona Duni çon thesin me vlera monetare në zyrën e Drejtores Elisabeta Mataj;
Ora 15:30:09 Valbona Duni hyn në zyrën e Drejtores Elisabeta Mataj
Ora 15:30:22 Valbona Duni del nga zyra e Drejtoreshës Elisabeta Mataj
Ora 15:31:16, Valbona Duni niset të largohet puna;
Ora 15:31:31 Elisabeta Mataj e thërret Valbona Dunin dhe së bashku shkojnë në zyrën e Elisabeta Mataj
Ora 15:33:04 nga zyra e Drejtores del e para Valbona Duni
Ora 15:33:27 Valbona Duni largohet nga puna;
Ora 15:39:08 Drejtoresha e Filialit Posta Shqiptare Durrës Elisabeta Mataj largohet nga zyra me një qese të bardhë transparente me sende që nuk mund të përcaktohen, thuhet në dosje.

Datës 2.4.2026 i përket mandat pagesa nr. 2330, vlera 5 000 000 lekë, me përshkrim për llogarinë lidhje të brendshme dega Shijak, e nënshkruar nga Elisabeta Mataj, Valbona Duni, Paola Dana dhe Flora Nexha (arkëtare e degës Shijak e dyshuar e falsifikuar).

2. Më datë 14.04.2026 në orën 13:05:52 shefja e financës Valbona Duni merr një thes me vlera monetare nga zyra e Arkës e pranishme Paola Dana.
13:06:04 shefja e finances Valbona Duni me thesin me vlera monetare futet në zyrën e saj
Dates 14.4.2026 i përket mandat pagesa nr. 2706, vlera 10 000 000 lekë, me përshkrim për llogarinë lidhje të brendshme dega Krujë, e nënshkruar nga Elisabeta Mataj, Valbona Duni, Paola Dana dhe Valentina Guni (arkëtare e degës Krujë e dyshuar e falsifikuar).

3. Më datë 15.04.2026 në orën 14:13 shefja e finances Valbona Duni merr një thes me lekë nga arka e pranishme Paola Dana. Ora 14:14 Valbona Duni me thesin me vlera monetare shkon në zyrën e saj.

Dates 15.4.2026 i përket mandat pagesa nr. 2748, vlera 10 000 000 lekë, me përshkrim për llogarinë lidhje të brendshme dega Krujë, e nënshkruar nga Elisabeta Mataj, Valbona Duni, Paola Dana dhe Valentina Guni (arkëtare e degës Krujë e dyshuar e falsifikuar).

4. Më datë 20.04.2026 në orën 13:39 nd/arkëtarja në prani të arkëtares Paola Dana, i jep shefes së financës Valbona Duni rreth 10 fasheta me prerje kartmonedhe 5.000 të reja në qese plastike, shefja e financës i merr dhe shkon në zyrën e saj. Ora 13:39:26 Valbona Duni me qesen me vlera monetare shkon në zyrën e saj

Datës 20.4.2026 i përket mandat pagesa nr. 2866, vlera 5 000 000 lekë, me përshkrim për llogarinë lidhje të brendshme dega Shijak, e nënshkruar nga Elisabeta Mataj, Valbona Duni, Paola Dana dhe Flora Nexha (arkëtare e degës Shijak e dyshuar e falsifikuar).

5. Më datë 24.04.2026 në orë 14:15 vjen punonjësi i shoqërimit të vlerave i “Nazerit” me dy thasë nga banka dhe i lë tek Arka, e pranishme Paola Dana. Në orën 14:18 njërin nga thasët e merr shefja e financës Valbona Duni dhe shkon tek zyra saj. Ora 14:16:51 Valbona Duni merr thesin me vlera monetare dhe shkon në zyrën e saj.

Datës 24.4.2026 i përket mandat pagesa nr. 3002 (vendosur me shkrim dore numri 2997), vlera 5 000 000 lekë, me përshkrim për llogarinë lidhje të brendshme dega Shijak, e nënshkruar nga Elisabeta Mataj, Valbona Duni, Paola Dana dhe Flora Nexha (arkëtare e degës Shijak e dyshuar e falsifikuar).

6. Më datë 30.04.2026 në orën 15:09:07 nd/arkëtarja në prani të arkëtares Paola Dana mbush një thes me vlera dhe ia jep shefes së financës Valbona Duni e cila e merr thesin e shkon në zyrën e saj. Ora 15:1:03 Valbona Duni me thesin me vlera monetare shkon në zyrën e saj

7. Më datë 7.5.2026, ora 14:41 shefja e finances Valbona Duni merr një thes me lekë nga Arka, e pranishme Paola Dana dhe hyn në zyrën e saj. Ora 14:41:18 Valbona Duni me thesin me vlera monetare pasi del nga arka shkon në zyrën e saj. Ora 14:42:27, nga e njëjta zyrë ku hyri më përpara Valbona Duni me thesin me vlera monetare, del Drejtoresha Elisabeta Mataj. Ora 14:42:35 Elisabeta Mataj hyn në zyrën e saj. Ora 14:42:45 Valbona Duni me të njëjtin thes me vlera monetare hyn në zyrën e Drejtoreshës Elisabeta Mataj. Ora 14:43:19 Valbona Duni dhe Elisabeta Mataj dalin nga zyra e kësaj të fundit pa thesin me vlera monetare dhe hyjnë në të njëjtën zyrë.

8. Më datë 08.05.2026 në orën 13:47:22 shefja e financës Valbona Duni merr një pako të madhe me kartmonedha prerje 5.000 të reja nga arka, e pranishme Paola Dana. Ora 13:47:36 Valbona Duni plikon me kartmonedha e mbështjell me mandat pagesën e prerë nga Paola Dana. Ora 13:47:43 Valbona Duni me plikon me kartmonedha mbështjellë me mandat pagesë shkon në zyrën e saj

Datës 8.5.2026 i përket mandat pagesa nr. 4320, vlera 5 000 000 lekë, me përshkrim për llogarinë lidhje të brendshme dega Shijak, e nënshkruar nga Elisabeta Mataj, Valbona Duni, Paola Dana dhe Flora Nexha (arkëtare e degës Shijak e dyshuar e falsifikuar).

9. Më datë 21.05.2026 në orën 15:24 shefja e financës merr rreth 12 fasheta me kartmonedha prerje 5.000 të reja nga arka, e pranishme Paola Dana dhe i çon tek zyra e drejtoreshës së Filialit.

Ora 15:24:46 Valbona Duni mbështjell me mandat pagesë pliko me kartmonedha ndërkohë që komunikon me Paola Danën që kryen veprime në kompjuter. Ora 15:24:59 Valbona Duni me plikon me kartmonedha të mbështjellë me mandat pagesë shkon në zyrë e Drejtoreshës Elisabeta Mataj. Ora 15:25:18 Valbona Duni del nga zyra e Drejtoreshës Elisabeta Mataj me mandate pagesën në dorë por pa plikot me kartmonedha. Ora 15:25:28, Elisabeta Mataj me telefon në dorë del nga zyra e saj pas Valbona Dunit dhe hyn në një zyrë tjetër.

Ndërkohë, drejtoresha e filialit, Elisabeta Mataj, gjatë përballjes me gjykatën, nuk ka dhënë një shpjegim se ku kanë përfunduar paratë. E pyetur nga gjykata për destinacionin e shumës prej 69 milionë lekësh, Mataj është përgjigjur se nuk e di.

Policia e Sarandës pas kontrolleve në lagjen “Baba Rexhepi”, zonë kjo ku u drejtuan autorët pas atentatit ndaj 50-vjeçarit Thimjo Rubati, kanë gjetur një motor të braktisur.

Motori u gjet buzë detit, në një prej gjireve detare të zonës, pikërisht në zonën e quajtur “Kasollja”. Policia dyshon se motori i përket autorëve të atentatit të mbrëmjes të së premtes. Ai nuk ka pasur shenja dëmtimi ose djegieje, ç’ka mund t’i shërbejë grupit hetimor të mbledhë material gjenetik për të identifikuar autorët. Fakti që motori është gjetur buzë detit, e ka bërë grupin hetimor të dyshojë se autorët janë larguar me mjet lundrues ose të jenë fshehur në banesat e zonës periferike.

Atentati ndaj Thimjo Rubatit, sipas dyshimeve, ka qenë i planifikuar dhe organizatori ka shfrytëzuar qëllimisht ngjarjen e një dite më parë kur djali i tij u konfliktua me një oficer policie, me qëllim ngatërresën e pistës së  hetimit. Madje ka informacione se autorët e dinin që policia kishte sekuestruar një natë më parë DVR e kamerave të zonës duke e shfrytëzuar këtë fakt për të kryer ngjarjen në një zonë të pambuluar me kamera.

Deri në këto momente, burimet bëjnë me dije se dy janë pistat kryesore të hetimit, njëra është konflikt pronësie dhe tjetra konflikt personal për motive të tjera. Të vakëta janë për grupin hetimor motivet për larje hesapesh apo hakmarrje, pasi indiciet janë minimale.

Kanadaja po vijon të përballet me një situatë të rënduar nga zjarret masive pyjore, të cilat kanë detyruar autoritetet të angazhojnë ushtrinë për evakuimin e banorëve në zonat më të rrezikuara.

Forcat e Armatosura kanadeze kanë nisur një operacion për evakuimin me avion të rreth 600 banorëve të komunitetit të izoluar Fort Hope, në veriperëndim të Ontarios, ku flakët vazhdojnë të përhapen me shpejtësi.

Sipas autoriteteve kanadeze, vetëm gjatë 24 orëve të fundit janë regjistruar 69 zjarre të reja, duke e çuar në 955 numrin e vatrave aktive në të gjithë vendin. Mijëra persona janë evakuuar tashmë nga rajonet e prekura dhe janë transferuar në qytete më të sigurta në jug të Ontarios.

Situata ka ndikuar edhe përtej kufirit. Tymi i dendur i zjarreve është përhapur në disa shtete të SHBA-së, ku autoritetet kanë lëshuar paralajmërime për përkeqësimin e cilësisë së ajrit dhe u kanë bërë thirrje qytetarëve, veçanërisht grupeve më të rrezikuara, të kufizojnë aktivitetet në ambiente të hapura.

Ekspertët e klimës theksojnë se zjarret pyjore janë bërë një fenomen gjithnjë e më i shpeshtë në Kanada, ndërsa temperaturat e larta dhe thatësira kanë krijuar kushte ideale për përhapjen e flakëve. Autoritetet vijojnë përpjekjet për vënien nën kontroll të zjarreve, ndërsa monitorojnë nga afër zhvillimin e situatës.

Izraeli thuhet se i ka riklasifikuar krokodilët e Nilit si kafshë “të kujdesura” , duke hapur potencialisht rrugën për përdorimin e tyre si pjesë e sigurisë së burgjeve.

Propozimi kontrovers për të rrethuar burgjet me hendeqe të mbushura me krokodilë thuhet se u propozua në fund të vitit të kaluar nga Ministri i Sigurisë Kombëtare i ekstremit të djathtë, Itamar Ben-Gvir, i cili argumentoi se zvarranikët do të forconin sigurinë dhe do të pengonin përpjekjet e arratisjes. Plani fillimisht u konsiderua ligjërisht i parealizueshëm nga Autoriteti i Natyrës dhe Parqeve të Izraelit, sepse krokodilët e Nilit klasifikoheshin si kafshë të egra që mund të mbaheshin vetëm në kopshte zoologjike dhe rezervate të kafshëve të egra.

Kjo pengesë ligjore thuhet se u hoq këtë javë kur Ministri i Mbrojtjes së Mjedisit Idit Silman e riemërtoi krokodilin e Nilit si një “kafshë të egër të kujdesur”, raportuan mediat izraelite të premten. Klasifikimi i ri lejon që zvarranikët të mbahen në një gamë më të gjerë ambientesh, duke përfshirë potencialisht edhe burgjet.

Emërtimi i ri thuhet se vjen pavarësisht paralajmërimeve nga këshilltarja ligjore e ministrisë, e cila i tha Silman se nuk kishte autoritet për të vendosur në mënyrë të njëanshme mbi statusin e krokodilëve dhe për të hedhur themelet për vendosjen e tyre në burgje. Disa javë më parë, Ben-Gvir dhe Silman thuhet se zhvilluan një takim me këshilltaren ligjore dhe shefen e Autoritetit të Natyrës dhe Parqeve, Raya Soraki, duke i shtyrë ata që të pranonin planin e dyshimtë.

Sipas raportimeve të medias izraelite, Ben-Gvir dëshiron t’i prezantojë fillimisht zvarranikët në burgun Ketziot, një qendër burgimi në Izraelin jugor që mban kryesisht të burgosur palestinezë. Pasi ai e paraqiti propozimin për herë të parë, Shërbimi i Burgjeve të Izraelit (IPS) e shqyrtoi atë dhe dërgoi oficerë në fermën e krokodilëve Hamat Gader në fillim të janarit për t’u njohur me zvarranikët.

Sipas njoftimeve, IPS e priti propozimin e ministrit në mënyrë të favorshme, duke marrë në konsideratë zgjedhjen e ekzemplarëve më të vegjël që do të kushtonin rreth 8,000 dollarë për kokë, në vend të zvarranikëve më të vjetër që kushtonin rreth 20,000 dollarë. “Kjo është një shumë relativisht e vogël krahasuar me investimin në siguri që kërkon një burg, dhe rezultatet do të ishin edhe më të mira”, tha një burim i IPS për gazetën Maariv në atë kohë, duke shtuar se zvarranikët e vegjël “gjithashtu të rrezikshëm” përfundimisht do të rriteshin brenda kompleksit të burgut.

Treqind shezlongë u zhdukën natën, në qershorin e dy viteve më parë, nga resorti i Onde Chiare në Reggio Emilia dhe u vodhën nga persona të panjohur.

Një vit më vonë, të njëjtët shezlongë u shfaqën “si me magji”, me logon e Onde Chiare ende të dukshme, në një plazh në Kepin e Rodonit në Shqipëri, shkruajnë mediat italiane.

I vuri re një grua nga Reggio Emilia, e cila ndodhej atje me pushime dhe u dërgoi menaxherëve të resortit një email me foto të bashkëngjitura, për t’i njoftuar për këtë gjetje të pazakontë, pasi ishte në dijeni të ngjarjes së dy viteve më parë.

Nuk është ende e qartë sesi shezlongët kanë përfunduar në këtë plazh. Ka disa hipoteza që mund të qëndrojnë në këtë rast pasi mund të jenë blerë pa ditur që janë të vjedhur. Gjithashtu verifikimet e blerjes mund të mos jenë bërë ende apo të kenë kaluar nga një pronar te tjetri deri në publikimin e videos.

Alberto Costoli dhe Enrico Cavazzoni, menaxherët e Onde Chiare, nuk humbën kohë. Ata caktuan avokatin Gianluca Dallari për të nisur procedurën për rikthimin e pajisjeve me vlerë mbi 45 mijë euro.

“Menduam të shkonim atje dhe t’i merrnim vetë, por më pas vendosëm të ndiqnim rrugën ligjore. Avokati ynë gjeti edhe një avokat në Shqipëri, i cili nisi procesin gjyqësor. Në teori, shezlongët tanë duhej të ishin sekuestruar dhe të vendoseshin në ruajtje nga autoritetet shqiptare. Por ndërkohë, një kliente tjetër e jona, e cila rastësisht ndodhej këto ditë në Durrës, na dërgoi një video të re, atë që më pas e publikuam në profilin tonë në Instagram, ku shihet qartë se ata janë ende në plazh, duke u përdorur nga klientët e kësaj strukture shqiptare. Jemi shumë të zemëruar”, thotë Costoli.

Pikërisht për këtë arsye vendosën ta bëjnë çështjen publike:

“Kemi etiketuar mediat lokale, i kemi dërguar një email redaksisë së programit ‘Le Iene’ të Italia Uno, i njohur për hetimet e tij mbi çështje të ndjeshme. Gjithashtu desha të etiketoja edhe Edi Ramën, kryeministrin e Shqipërisë, sepse shpesh bën deklarata për zhvillimin e turizmit në vendin e tij. E pra, vjedhja e shezlongëve në Itali nuk është aspak një kartëvizitë e mirë për turistët dhe për reputacionin kombëtar të Shqipërisë. Ne punojmë prej vitesh me disa furnitorë shqiptarë dhe nuk kemi pasur kurrë probleme. Shpresojmë që kryeministri shqiptar të interesohet për rastin tonë, sepse tashmë nuk dimë më se cilën rrugë të ndjekim”, thonë menaxherët.

Postimi i Onde Chiare:

“Përshëndetje të gjithëve, nëse dikush shkon me pushime në Kepin e Rodonit… të përshëndesë shezlongët tanë! Duket si shaka, por fatkeqësisht është e vërtetë.”

“Në qershorin e vitit 2024 na vodhën rreth 300 shezlongë, me një vlerë mbi 45.000 euro, nga Circolo Onde Chiare i Reggio Emilia-s”, shkruhet në postim. “Një vit më vonë, një e njohura jonë, gjatë pushimeve në Shqipëri, na dërgoi disa foto: ‘… por këta nuk janë tuajit?’

Dhe që nga ai moment fillon një histori pothuajse surreale. Denoncime, avokatë në Itali dhe Shqipëri, përkthime, verifikime, kohë dhe para të shpenzuara për të provuar të kthejmë atë që na është vjedhur.

Sot kjo video, e filmuar pak ditë më parë, tregon se ata shezlongë janë ende në të njëjtën strukturë plazhi. Ne thjesht duam të kuptojmë se si është e mundur që një vjedhje prej 45.000 eurosh, me sendet e identifikuara dhe të dokumentuara prej më shumë se një viti, ende nuk ka gjetur një zgjidhje.

Ndoshta kjo video do të arrijë te personi i duhur. Nëse njihni dikë që mund të na ndihmojë, një gazetar, një emision televiziv, ose thjesht mendoni se kjo histori meriton të rrëfehet… shpërndajeni”, shprehet më tej.

Ndërkohë, postimi në rrjetet sociale ka marrë vërtet shumë vëmendje, duke arritur dhjetëra shpërndarje dhe disa qindra pëlqime.

“Shpresojmë që pak zhurmë dhe presion mediatik të ndihmojnë për ta çuar çështjen përpara”, përfundon Costoli”, mendoni për shqetësimin që na shkaktoi kjo vjedhje dy vite më parë, pikërisht në fillim të sezonit veror.”

Sipas raportimeve për vjedhjen dy vite më parë, gjithçka ndodhi vetëm 30 minutave. Hajdutët nuk kishin lënë pas rreth 200 shezlongë.

Gjykata e Durrësit ka caktuar masat e sigurisë për tre zyrtaret e filialit të Postës Shqiptare në Durrës, të arrestuara në kuadër të hetimeve për përvetësimin e 69 milionë lekëve të rinj.

Gjykata vendosi “arrest në burg” për ish-drejtoreshën e filialit, Elisabeta Mataj, ndërsa caktoi masën “arrest në shtëpi” për ish-shefen e financës, Valbona Duni, dhe ish-arkëtaren Paola Dana.

Tre zyrtaret akuzohen për veprat penale “Shpërdorimi i detyrës” dhe “Vjedhja duke shpërdoruar detyrën”, kryer në bashkëpunim. Sipas hetimeve, gjatë muajve prill dhe maj 2026 ato dyshohet se kanë përvetësuar 69 milionë lekë të rinj.

Hetimet vijojnë për zbardhjen e plotë të skemës dhe identifikimin e personave të tjerë që mund të jenë të përfshirë.

VENDIMI I PLOTË

Vendosi:
1. Pranimin e pjesshëm të kërkesës së Prokurorisë pranë Gjykatës së Shkallës së Parë të Juridiksionit të Përgjithshëm Durrës.
2. Vleftësimin si të ligjshëm të ndalimit të personave nën hetim E. M., V. D. dhe P. D.
3. Caktimin ndaj personit nën hetim E. M masën e sigurimit personal “Arrest në burg”, të parashikuar nga neni 238 i K.Pr.Penale, si e dyshuar për kryerjen e veprës penale “Vjedhja duke shpërdoruar detyrën”, kryer në bashkëpunim, të parashikuar nga neni 135 dhe 25 i K.Penal.
4. Caktimin ndaj personit nën hetim V. D. masën e sigurimit personal “Arrest në shtëpi”, të parashikuar nga neni 237 i K.Pr.Penale, si e dyshuar për kryerjen e veprës penale “Vjedhja duke shpërdoruar detyrën”, kryer në bashkëpunim, të parashikuar nga neni 135 dhe 25 i K.Penal.
5. Caktimin ndaj personit nën hetim P. D. masën e sigurimit personal “Arrest në shtëpi”, të parashikuar nga neni 237 i K.Pr.Penale, si e dyshuar për kryerjen e veprës penale “Vjedhja duke shpërdoruar detyrën”, kryer në bashkëpunim, të parashikuar nga neni 135 dhe 25 i K.Penal.
6. Urdhërohet lirimi i menjëhershëm i personave nën hetim V.D. dhe P. D.nga dhomat e paraburgimit nëse nuk mbahen të paraburgosur për ndonjë vepër tjetër penale.
7. Urdhërohet personi nën hetim V. D. të qëndroi dhe të mos largohet nga banesa e saj në Lagjen Ilira, Plazh, Durrës.
8. Urdhërohet personi nën hetim P. D. të qëndroi dhe të mos largohet nga banesa e saj në Lagjen nr.13, Durrës.
9. Ngarkohet Prokuroria pranë Gjykatës së Shkallës së Parë të Juridiksionit të Përgjithshëm Durrës dhe policia gjyqësore për ekzekutimin e këtij vendimi.
10. Kundër këtij vendimi lejohet ankim brenda 5 (pesë) diteve në Gjykatën e Apelit të Juridiksionit të Përgjithshëm Tiranë, duke filluar nga e nesërmja e komunikimit të vendimit të gjykatës.
U shpall në Durrës, me datë 18.07.2026.

Detaje të reja kanë dalë nga hetimi për skemën e dyshuar të përvetësimit të fondeve në filialin e Postës Shqiptare në Durrës, ku tre zyrtare janë arrestuar nën akuzën se kanë abuzuar me rreth 69 milionë lekë të rinj, para të destinuara për shpërndarjen e pensioneve dhe ndihmave sociale.

Gjatë seancës gjyqësore, ku u shqyrtua masa e sigurisë, është përmendur edhe frekuentimi i kazinove nga drejtoresha e filialit.

Elisabeta Mataj ka pranuar fjalën e mbrojtjes dhe nuk ka mohuar se ka frekuentuar kazino, por është shprehur se nuk ka pasur asnjë ndalim ligjor apo kontraktor që ta pengonte të shkonte në ambiente të tilla.

“Unë jam qytetare e lirë. Më shpjegoni se cila është kontrata e firmosur që nuk mund të shkoj në lokale, bare dhe kazino”, mësohet të jetë shprehur Mataj para gjykatës.

Ajo ka mohuar se i është shmangur drejtësisë, duke deklaruar se kishte planifikuar të udhëtonte jashtë vendit më 10 korrik, ndërsa në datat 13 dhe 14 korrik ka qenë në punë.

E pyetur nga gjykata se ku kanë përfunduar paratë që dyshohet se janë përvetësuar, Elisabeta Mataj është përgjigjur se nuk e di.

Hetimet pritet të zbardhin mënyrën se si është realizuar skema, rolin e secilës prej të arrestuarave dhe destinacionin e shumës prej 69 milionë lekësh, e cila ishte parashikuar për pagesat sociale ndaj qytetarëve.

Po mbahet në këto momente për herë të parë Kuvendi Kombëtar i Protestës dhe nuk kanë munguar tensionet.

Persona të ndryshëm që janë prezentë në sallë kanë dalë kundër mënyrës sesi po organizohet kjo mbledhje dhe personat që janë të pranishëm aty. “Mosha mesatare këtu është mbi 45 vjeç, këtu nuk shoh asnjë nga marshimi. Nuk jemi lajmëruar”, shprehet një prej protesuesve në prapaskenë.

Nga ana tjetër, ka edhe nga ata që kërkojnë fjalën dhe nuk u jepet. “Kemi një rend dite dhe nuk do të lejojmë të na prishni mbledhjen”, u shpreh një nga organizatorët pas këtij incidenti.

“Ky kuvend është i hapur për të gjithë qytetarët, do të kemi takim të hapur”, tha moderatorja e takimit. Ndërkohë, një prej organizatorëve, i cili në një moment po pengohej të fliste, nuk e kurseu përgjigjen e ashpër.

“Nuk ma ka ndier kur kam pasur 300 veta përballë, jo më juve. Prandaj mos na sfidoni, mos na merrni neve sikur jemi të butë”, u shpreh ai, duke shkaktuar më pas një reagim të ashpër në sallë.

Ndërkohë, një prej qytetarëve kërkoi të ulej në rreshtin e parë dhe tre djem nxituan për ta kundërshtuar me forcë. Pavarësisht këmbënguljes së organizatorëve, ai nuk u çua nga karrigia e rreshtit të parë.

“Duhet të shkojmë përtej sheshit. Në shesh e vramë frikën, por çfarë do të bëhet më pas? Nuk duhet të përsërisim rastin e Serbisë, ku protestuan pa fund dhe nuk ndryshuan asgjë”, shprehet një prej organizatorëve, pasi tensionet u qetësuan, të paktën për momentin.

Kryetari i Partisë Demokratike, Sali Berisha, deklaroi se PD ka përmbyllur procesin e riorganizimit të forumeve drejtuese, duke e cilësuar atë si “procesin më të thellë të ripërtëritjes” që nga themelimi i partisë.

Në një bashkëbisedim, Berisha tha se përbërja e re e strukturave drejtuese reflekton një përfaqësim më të madh të të rinjve dhe grave.

Ai theksoi se ndryshimet nuk janë vetëm numerike, por edhe cilësore, duke shtuar se partia tashmë ka një ekip drejtues të përgatitur për sfidat politike të ardhshme.

“Ne lamë pas një javë të veçantë, në të cilën PD përfundoi institucionalizimin e plotë të forumeve të saj.

Me këtë rast, ajo çka dua t’u informoj të gjithë ju është se ky proces u zhvillua në moton e ripërtëritjes së PD dhe u them me kënaqësi, jo vetëm të ripërtëritjes në kuptimin e numrave, por edhe të proporcioneve deficitare në këtë parti.

Kështu sot në Këshillin Kombëtar të PD, 60 përqind e përbëjnë të rinjtë dhe gratë dhe ky është një proporcionim shumë i rëndësishëm për ne sepse patëm trashëguar një deformim nga i cili u ndamë përfundimisht.

Dy të tretat e kryesisë së zgjedhur të PD, zgjidhen për herë të parë sikundër tre nënkryetarë të PD zgjidhen për herë të parë.

Nga 14 sekretarë, vetëm 3 janë të rizgjedhur. Pra, mund t’u informoj se ky është procesi më i thellë i ripërtëritjes së PD pas themelimit të saj. Por nga ana tjetër janë vendosur proporcione të domosdoshme të përfaqësimit në këtë parti. Jam i bindur se kërkesa themelore për çdo qytetar dhe anëtar, mbështetës të kësaj partie ka qenë ripërtëritja. U siguroj se në këtë proces nuk kanë ndryshuar vetëm statistikat, por PD ka shpalosur kualitete dhe vlera ndër më të shquarat.

Kështu që në kilometrin e fundit të saj, ajo ka një ekip të pajisur me të gjitha aftësitë për të udhëhequr këtë parti për përmbushjen me sukses të misionit të saj.

Duhet të theksoj me këtë rast se ne jemi një parti që bazohemi tek vota e anëtarëve tanë dhe shpreh mirënjohje të thellë për të gjithë bashkëpunëtorët e mi që nuk u zgjodhën, të cilët kanë dhënë një kontribut të jashtëzakonshëm. Unë ruaj për ta vlerësimin më të lartë.

Theksoj se shumë prej tyre kanë funksione të tjera shumë të rëndësishme në PD, grupin e saj parlamentar dhe misione në drejtim të reformave themelore në interes të kësaj partie dhe të vendit. Kjo është ajo çka unë desha t’u informoj ju. Por duhet të them prapë me kënaqësi se procesi i ripërtëritjes nuk ndalet dhe nuk do ndalet.

Në mënyrë të përsëritur u kisha pohuar se PD ka rreth saj personalitete të shquara, individë me vlera ekselentë në fushat e veta. Dhe jo pak prej tyre garuan me sukses në këtë proces. Por janë të tjerë të shumtë që kanë shprehur gatishmërinë dhe janë të lidhur me PD. Kanë shprehur gatishmërinë për të kontribuar, për të vënë në dispozicion të qytetarëve shqiptare, vizionit të kësaj partie, të gjithë potencialin e tyre intelektual, profesional, në Shqipëri, në Evropë dhe në botë dhe kudo që ndodhen.

Për herë të parë në këtë proces ripërtëritje, u institucionalizua roli dhe vendi i diasporës. Hapa të parë të rëndësishëm janë shënuar. Një nënkryetare partie dhe një sekretar për diasporën janë zgjedhur.

Përpjekje të tjera do bëhen për ridimensionimin e rolit të diasporës në jetën politike të PD dhe të Shqipërisë. Pra, për të gjithë ata të cilët kërkonin me të drejtë dhe prisnin ripërtëritje si tipar kryesor, mendoj se hapa të rëndësishme janë shënuar dhe të tjera do vijnë.”, u shpreh Berisha.

Policia e Sarandës ka arritur të identifikojë 3 autorët e dyshuar të kanosjes dhe goditjes së oficerit të Policisë Mihal Velço, mbrëmjen e së enjtes në Sarandë. Sipas burimeve policore, bëhet fjalë për tre persona me precedentë penalë, të cilët janë shpallur në kërkim.

Të dyshuarit janë identifikuar si Andrea Rubati, 27 vjeç, Antonio Lefteri, 30 vjeç dhe Engjëll Dalanaj, 30 vjeç.

Ngjarja ka ndodhur rreth orës 23:00 të së enjtes, në lagjen nr. 4, pranë restorantit “Lindi”, në Sarandë. Sipas policisë, shtetasi Mihal Velço, 32 vjeç, oficer policie në Komisariatin e Policisë Sarandë, ka njoftuar sallën operative se tre persona që lëviznin me motomjete e kishin goditur për shkak të detyrës dhe e kishin kanosur me thikë, duke tentuar ta godisnin pasi ai u ishte prezantuar si punonjës policie dhe u kishte kërkuar të mos kryenin manovra të rrezikshme në qytet.

Menjëherë pas ngjarjes, autorët e dyshuar janë larguar me shpejtësi me motomjetet e tyre. Pas informacioneve të siguruara dhe pamjeve filmike të administruara, policia ka bërë të mundur identifikimin e tre personave të dyshuar.

Sipas burimeve zyrtare policore, oficeri i Policisë Mihal Velço është paraqitur pranë Prokurorisë së Juridiksionit të Përgjithshëm Sarandë, ku ka depozituar kallëzim penal në lidhje me ngjarjen.

Me qëllim kapjen e autorëve të dyshuar, gjatë natës janë kryer kontrolle në disa banesa dhe ambiente ku dyshohej se mund të fshiheshin personat e shpallur në kërkim.

Kontroll është ushtruar në banesën e Andrea Rubatit, në rrugën “Mithat Hoxha”, Sarandë, por aty është gjetur vetëm nëna e tij dhe nuk është bërë e mundur kapja e tij. Gjithashtu është kontrolluar edhe banesa e gjyshit të tij, shtetasit M. L., në fshatin Livadhja, Bashkia Finiq, por edhe aty nuk është gjetur.

Policia ka ushtruar kontroll edhe në banesën e Antonio Lefterit, në rrugën “Skënderbej”, Sarandë, ku ndodheshin prindërit e tij, por nuk është bërë e mundur gjetja e këtij shtetasi. Ndërkohë, gjatë ditës së sotme është kontrolluar edhe banesa e Engjëll Dalanajt në rrugën “Onhezmi”, ku nuk është gjetur asnjë person.

Tre shtetasit e shpallur në kërkim dyshohen për kryerjen e veprave penale “Goditja për shkak të detyrës” dhe “Kanosja”, të parashikuara nga nenet 237 dhe 84 të Kodit Penal.

Një ish-asistente e Jeffrey Epstein ka rrëfyer për BBC detaje të reja mbi mënyrën se si financieri amerikan, i akuzuar për trafikim seksual të të miturve, dyshohet se kontrollonte dhe manipulonte gratë që ndodheshin pranë tij.

Gruaja, e identifikuar me emrin e ndryshuar Anya për të mbrojtur identitetin e saj, tha se për vite me radhë kishte jetuar në një nga apartamentet në Manhattan që përdorej nga Epstein për të strehuar gra të cilat, sipas dëshmive të saj, ai i abuzonte seksualisht.

Ajo e përshkroi sistemin e krijuar nga Epstein si një “sekt”, ku ai ishte figura dominuese dhe ku kontrolli nuk bëhej përmes dhunës së dukshme, por përmes izolimit, varësisë financiare dhe presionit psikologjik.

“Zinxhirët ishin më pak të dukshëm, por ishin aty”, tha Anya për BBC, duke shpjeguar mënyrën se si, sipas saj, Epstein kufizonte lirinë e grave që punonin për të.

Premtime për karrierë në modë dhe një rrjet kontrolli

Sipas rrëfimit të saj, Anya u afrua me Epstein pasi punonte si modele në Evropë. Ajo thotë se fillimisht ai u prezantua si një person me lidhje të fuqishme në industrinë e modës dhe i premtoi mundësi të mëdha profesionale.

Por, sipas saj, marrëdhënia ndryshoi gradualisht. Epstein filloi të ndërhynte në jetën e saj personale, financat, mënyrën e veshjes dhe pamjen fizike.

Anya pretendon se ai e kritikonte vazhdimisht për trupin e saj dhe e detyroi t’i nënshtrohej ndërhyrjeve kirurgjikale që ajo i konsideron të panevojshme dhe që i lanë shenja.

“Ai të bënte të varur prej tij”

Një tjetër ish-asistente e Epstein, Sarah Kellen, ka mbështetur disa nga pretendimet për mënyrën e kontrollit psikologjik. Ajo ka deklaruar se Epstein ishte i aftë të shkatërronte ndjenjën e autonomisë së njerëzve dhe t’i bënte ata të vareshin prej tij.

Sipas Anya-s, Epstein kontrollonte edhe lëvizjet e grave që punonin për të, u monitoronte komunikimet dhe i mbante ato në një gjendje pasigurie të vazhdueshme.

Ajo pretendon se Epstein përdorte edhe materiale komprometuese, përfshirë fotografi intime, si një mënyrë për t’i frikësuar që të mos flisnin kundër tij.

Rekrutimi i grave të tjera

Në rrëfimin e saj, Anya thotë se një pjesë e dhimbshme e përvojës së saj ishte fakti që, sipas saj, asistentet nxiteshin të sillnin gra të tjera në rrethin e Epstein.

Ajo e përshkroi këtë si një “ekosistem abuzimi”, ku viktimat shpesh përfundonin duke u përfshirë në një sistem që shërbente për të zgjeruar kontrollin e tij.

Jeffrey Epstein vdiq në vitin 2019 në një burg në Nju Jork, ndërsa priste gjyqin për akuzat federale për trafikim seksual të të miturve. Vdekja e tij u cilësua zyrtarisht si vetëvrasje.

Rrëfimet e viktimave dhe ish-bashkëpunëtorëve të tij kanë vazhduar të hedhin dritë mbi mënyrën se si funksiononte rrjeti i tij dhe mbi akuzat për abuzime të zgjatura ndër vite.

Një 39-vjeçar është arrestuar në Malësi të Madhe, pasi ishte shpallur në kërkim ndërkombëtar nga autoritetet spanjolle për trafikim të lëndëve narkotike dhe pjesëmarrje në organizatë kriminale.

Arrestimi u krye në kuadër të operacionit policor të koduar “Fast”, i zhvilluar nga specialistët e Sektorit për Kërkimin (FAST Albania), në bashkëpunim me Drejtorinë Vendore të Policisë Shkodër, pas koordinimit informativ dhe operacional me homologët në Spanjë.

Sipas Policisë, 39-vjeçari, i lindur në Koplik, u lokalizua dhe u arrestua provizorisht në Malësi të Madhe.

Ai ishte shpallur në kërkim ndërkombëtar nga Interpol Madrid, pasi autoritetet gjyqësore spanjolle, me vendim të datës 8 korrik 2026, i kishin caktuar masën e sigurisë “Arrest në burg” për veprat penale të trafikimit të lëndëve narkotike dhe pjesëmarrjes në organizatë kriminale, të kryera me qëllim tregtimin e lëndëve narkotike.

Procedurat për ekstradimin e tij drejt Spanjës vijojnë në bashkëpunim me autoritetet përkatëse.

Shërbimi i Sigurisë së Ukrainës (SBU) ka njoftuar se ka realizuar një sulm të suksesshëm me dronë me rreze të gjatë veprimi ndaj një baze ajrore ruse në rajonin e Saratovit, rreth 800 kilometra larg kufirit me Ukrainën.

Sipas SBU-së, objektiv i operacionit ishte një bombardues strategjik Tu-95, i cili ka pësuar dëmtime të rënda pas goditjes. Autoritetet ukrainase bëjnë të ditur se pjesa e pasme e avionit është dëmtuar në mënyrë kritike.

Bombarduesi Tu-95 është një nga asetet kryesore të aviacionit strategjik rus dhe përdoret rregullisht nga Moska për lëshimin e raketave me rreze të gjatë veprimi ndaj qyteteve dhe infrastrukturës kritike në Ukrainë.

Presidenti ukrainas, Volodymyr Zelensky, e përshëndeti operacionin, duke e cilësuar atë si një tjetër goditje të rëndësishme ndaj kapaciteteve ushtarake të Rusisë dhe një dëshmi të aftësisë së Ukrainës për të goditur objektiva të rëndësishëm larg vijës së frontit.

Sulmi është pjesë e strategjisë së Kievit për të intensifikuar operacionet me dronë thellë në territorin rus, me synimin për të dobësuar logjistikën dhe fuqinë ajrore të Moskës. Në muajt e fundit, Ukraina ka pretenduar se ka dëmtuar ose shkatërruar disa avionë ushtarakë rusë përmes sulmeve me dronë me rreze të gjatë veprimi.

Presidenti i Shteteve të Bashkuara, Donald Trump, ka kërcënuar Kanadanë me vendosjen e tarifave të reja, duke e akuzuar për “neglizhencë të qëllimshme” në menaxhimin e zjarreve masive në pyje, të cilat kanë përhapur tym të dendur mbi shumë qytete amerikane.

Në një reagim të publikuar në platformën Truth Social, Trump deklaroi se SHBA-ja po përballet me ajër të ndotur dhe të rrezikshëm për shëndetin si pasojë e zjarreve në Kanada. Ai tha se do të kërkojë shpjegime nga kryeministri kanadez, Mark Carney, duke pretenduar se autoritetet kanadeze nuk kanë menaxhuar siç duhet pyjet dhe zonat e rrezikuara nga zjarret.

Sipas Sistemit Kanadez të Informacionit për Zjarret në Natyrë, në Kanada janë aktive rreth 888 vatra zjarri, ndërsa mbi 190 prej tyre ndodhen në provincën e Ontarios, ku shumë vazhdojnë të jenë jashtë kontrollit.

Komentet e Trump vijnë në një kohë kur disa ligjvënës republikanë kanë kritikuar Kanadanë për mënyrën e menaxhimit të situatës, duke kërkuar masa më të forta për parandalimin e zjarreve. Disa prej tyre kanë paralajmëruar se SHBA mund të shqyrtojë edhe përfshirjen e drejtpërdrejtë në operacionet ndërkufitare për shuarjen e flakëve.

Nga ana tjetër, qeveria kanadeze ka theksuar se të dy vendet vazhdojnë të bashkëpunojnë ngushtë në përballimin e emergjencave. Ministrja e Menaxhimit të Emergjencave, Eleanor Olszewski, deklaroi se Kanadaja ka investuar miliarda dollarë në mbrojtjen e pyjeve dhe se zjarret janë një sfidë që nuk njeh kufij shtetërorë.

Ekspertët e klimës dhe zjarreve pyjore theksojnë se fenomeni është shumë më kompleks sesa pretendimet politike. Sipas tyre, tymi përhapet nga erërat dhe prek të dy vendet, ndërsa kushtet ekstreme të motit, temperaturat e larta, thatësira dhe ndryshimet klimatike kanë ndikuar në përhapjen e zjarreve. Shumë prej tyre janë shkaktuar edhe nga rrufetë në zonat e largëta pyjore.

Ndërkohë, cilësia e ajrit është përkeqësuar ndjeshëm në disa shtete amerikane, përfshirë Michiganin, Illinoisin, Pensilvaninë dhe Nju Jorkun, ku autoritetet kanë lëshuar paralajmërime për ndotje të rrezikshme dhe kanë anuluar një sërë aktivitetesh në natyrë.

Detaje të reja dalin në dritë nga hetimet për atentatin ndaj 50-vjeçarit Thimjo Rubati në Sarandë.

Mësohet se pista që po verifikohet është edhe një lidhje e mundshme me dhunimin e oficerit Mihal Velço, ngjarje e ndodhur një ditë më parë.

Sipas të dhënave të reja nga hetimi, dyshohet se autorët, të cilët ishin të maskuar dhe me skafandra, janë larguar nga vendngjarja drejt zonës së plazheve ku përfundon rruga “Mithat Hoxha”. Dyshohet se ata mund të jenë larguar më pas me skaf.

Forcat e policisë kanë vijuar kontrollet gjatë gjithë natës dhe kërkimet vazhdojnë ende për identifikimin dhe kapjen e personave të dyshuar.

Ndërkohë, i plagosuri Thimjo Rubati është transportuar për trajtim më të specializuar në spitalin e Janinës. Më herët ai mori ndihmën e parë në spitalin e Sarandës, ku i janë dhënë edhe gjak.

Sipas burimeve, 50-vjeçari ka qenë në gjendje të vetëdijshme pas sulmit, por nuk ka mundur të identifikojë autorët, pasi ka deklaruar se nuk ka njohur personat që e qëlluan.

Policia vijon hetimet për zbardhjen e rrethanave të atentatit dhe për përcaktimin e motivit të sulmit.

Ministri i Turizmit, Kulturës dhe Sporteve, Blendi Gonxhja, ka publikuar të dhëna mbi ecurinë e hyrjeve të shtetasve të huaj në Shqipëri, duke vlerësuar se sektori i turizmit vijon të jetë në territor pozitiv, por me një ngadalësim të ritmit të rritjes gjatë muajit qershor.

Sipas shifrave të paraqitura në postimin e ministrit, në qershor 2026 Shqipëria regjistroi 1,346,279 vizitorë të huaj, krahasuar me 1,329,204 në qershor 2025. Diferenca është 17,075 vizitorë më shumë, ose një rritje prej rreth 1.28%.

Për periudhën janar–qershor 2026, sipas të dhënave të publikuara nga Gonxhja, vendi regjistroi 5,059,069 vizitorë të huaj, nga 4,761,648 në të njëjtën periudhë të vitit të kaluar. Kjo përbën një rritje prej 297,421 vizitorësh, ose 6.25%.

Postimi i Blendi Gonxhes

Ashtu siç kemi paralajmëruar, ekonomia e turizmit paguan situatën!

Shqipëria mbetet në territor pozitiv sa u takon hyrjeve të shtetasve të huaj, por të dhënat e qershorit tregojnë një ngadalësim të qartë të ritmit të rritjes.

Në qershor 2026, vendi regjistroi 1,346,279 vizitorë të huaj, krahasuar me 1,329,204 në qershor 2025. Kjo përfaqëson një rritje prej vetëm 17,075 vizitorësh, ose +1.28%. -1,223% më pak krahasuar me rritjen e muajit maj 2026 ose 12.2 herë më e ulët si rritje, dhe -638% më pak krahasuar me trendin e rritjes në 5-mujorin janar-maj 2026 ose 6.3 herë më e ulët si rritje!

Për gjashtëmujorin e parë të vitit 2026, u regjistruan 5,059,069 vizitorë të huaj, krahasuar me 4,761,648 në të njëjtën periudhë të vitit 2025. Rritja totale është 297,421 vizitorë, ose +6.25%.

Megjithatë, deri në muajin maj, rritja ishte +8.2%. Me përfshirjen e të dhënave të qershorit, ritmi i rritjes zbret në +6.25%, çka nënkupton një ngadalësim prej rreth -24% të dinamikës së rritjes.

Ky sinjal bëhet edhe më i qartë kur analizohen disa nga tregjet kryesore. Në qershor 2026, krahasuar me qershorin 2025, u regjistrua rënie e numrit të vizitorëve nga:

Kosova: 51,190 vizitorë më pak

Maqedonia: 15,223 vizitorë më pak

Gjermania: 13,165 vizitorë më pak

Turqia: 11,062 vizitorë më pak

Mali i Zi: 6,212 vizitorë më pak

Vetëm këto pesë tregje, të marra së bashku, sollën 96,852 vizitorë më pak, ose -13.00% krahasuar me qershorin e vitit të kaluar.

Në një sektor si turizmi, perceptimi i sigurisë, normalitetit dhe stabilitetit është vendimtar. Klima e krijuar nga protestat, tensioni publik dhe imazhi negativ i përcjellë në tregjet e huaja kanë rritur pasigurinë dhe kanë ndikuar në vendimmarrjen e vizitorëve, grupeve turistike dhe partnerëve ndërkombëtarë.

Sinjalizimet nga operatorët turistikë, hotelierët dhe agjencitë e udhëtimit konfirmojnë shqetësimet për ngadalësimin e rezervimeve, anulimet dhe hezitimin nga tregjet e huaja.

Turizmi nuk është vetëm statistikë. Është ekonomi reale, vende pune, të ardhura për familjet dhe imazh kombëtar.

Prandaj, është thelbësore për të gjithë të mbrojmë industrinë turistike nga çdo axhendë destabilizuese e konfliktuale!

Kombëtarja e Futbollit të personave me aftësi të kufizuara intelektuale do të përfaqësojë Shqipërinë në “Genuine Cup 2026”, që do të organizohet në Houston, Texas, SHBA, nga 26 korriku deri më 2 gusht. Për herë të parë Shqipëria merr pjesë në një kompeticion me përmasa të tilla ndërkombëtare me një ekip të të rinjve me aftësi të kufizuara. Kjo është një arritje sportive, por mbi të gjitha është një fitore për përfshirjen.

Prej disa muajsh, Federata Shqiptare e Futbollit në bashkëpunim me organizatën Klubi Kombëtar i Prindërve të fëmijëve me CSA&P.A.K /Autizmi Flet ka punuar në mënyrë të vazhdueshme për të përgatitur pjesëmarrjen e të rinjve më aftësi të kufizuara intelektuale në “Genuine Cup 2026”. Skuadra shqiptare, e përbërë nga 12 futbollistë, po zhvillon përgatitjet e fundit përpara nisjes, ndërsa vijon stërvitjen në “Shtëpinë e Futbollit”.

Në seancën e radhës stërvitore ishin të pranishëm Zv.presidenti i FSHF-së, Geri Çipi, anëtari i Komitetit Ekzekutiv të FSHF-së, Blendi Fevziu si dhe Ministrja e Shëndetësisë dhe Mirëqenies Sociale, Evis Sala.

Në një prononcim për fshf.org, Ministrja e Shëndetësisë dhe Mirëqenies Sociale, Evis Sala, theksoi rëndësinë e përfshirjes sociale dhe kontributin që jep futbolli në këtë aspekt.

“Kjo është arritje shumë e madhe që për herë të parë një ekip shqiptar merr pjesë në “Genuine Cup 2026” se nuk janë të pakta këto arritje që duhet t’i njohim, por duhet thënë në të njëjtën kohë që edhe ne si Ministri e Politikave Sociale kemi bërë një hap të ri, kemi kaluar nga vetëm mbështetja ekonomike në një përfshirje sociale të vërtetë që shumë e rëndësishme, përfshirja në sport, në kulturë, në arsim, në jetën e përditshme dhe ashtu do vazhdojmë për të kaluar nga ndihma e thjeshtë sociale në përfshirjen në komunitet, aty ku dëgjohet fjala dhe me të drejta të barabarta”.

Zv.presidenti i FSHF-së, Geri Çipi, nënvizoi impaktin e futbollit në krijimin e mundësive për personat me aftësi të kufizuara që të zhvillojnë një aktivitet normal si gjithë të tjerët.

“Kjo arritje, që jemi ne këtu sot, është rezultat i një bashkëpunimi dhe angazhimi të Federatës Shqiptare të Futbollit me shoqatën. Dhe do të shtoja që, falë këtij bashkëpunimi, kemi arritur të krijojmë këtë ekip futbolli, që edhe këta persona me aftësi të kufizuara të përfaqësojnë vendin e tyre në aktivitete ndërkombëtare. Edhe një herë dua ta theksoj. Ky është një mesazh i qartë që futbolli është gjithëpërfshirës, që edhe këta persona të ndihen njësoj si gjithë të tjerët dhe të krijojnë e të zhvillojnë një aktivitet normal si të gjithë ne”.

Anëtari i Komitetit Ekzekutiv të FSHF-së, Blendi Fevziu, falënderoi të gjitha strukturat që e bënë të mundur këtë përfaqësim të Shqipërisë, si dhe vlerësoi shembullin që jep kjo skuadër në tejkalimin e sfidave nëpërmjet futbollit.

“Meqenëse është një moment i veçantë që një përfaqësi e Shqipërisë po shkon të luajë në Houston, në Shtetet e Bashkuara të Amerikës, do të doja të falënderoja, së pari, të gjitha shoqatat e të rinjve me aftësi të kufizuara, mbi të gjitha për angazhimin e tyre të jashtëzakonshëm. Kjo tregon, së pari, se nuk ka pamundësi në jetë, pra se gjithçka është e mundur, dhe, së dyti, se futbolli është gjithëpërfshirës, si për ata që stërviten çdo ditë në futbollin profesionist, ashtu edhe për ata që janë amatorë, por edhe për këta të rinj që kanë pasur një vështirësi në jetën e tyre dhe përpiqen ta tejkalojnë pikërisht nëpërmjet futbollit. Falënderoj të gjitha shoqatat, falënderoj ministren dhe, natyrisht, përfaqësuesit e Federatës, të cilët kanë arritur t’i përfshijnë dhe t’i angazhojnë këta të rinj në strukturat e tyre, të cilët duhet të ndihen të barabartë me të gjithë të tjerët”.

Pjesëmarrja në “Genuine Cup 2026” është rezultat i bashkëpunimit të vazhdueshëm ndërmjet FSHF-së dhe Shoqatës ndër vite. Përmes këtij angazhimi është bërë i mundur krijimi, zhvillimi dhe mbështetja e këtij ekipi, duke u ofruar personave me aftësi të kufizuara intelektuale mundësinë të jenë pjesë aktive e futbollit dhe të përfaqësojnë Shqipërinë në aktivitete ndërkombëtare.

Ky projekt pasqyron angazhimin e FSHF-së për një futboll gjithëpërfshirës, ku secili ka mundësinë të luajë, të zhvillohet dhe të ndihet pjesë e komunitetit, pavarësisht aftësive apo sfidave që ka. Mesazhi është i qartë: futbolli është për të gjithë, pa dallime dhe pa kufizime, duke promovuar barazinë, përfshirjen dhe respektin për çdo individ.

Mbahet në Tiranë dita e 48-të e tubimit.

Ashtu si çdo ditë tjetër, protestuesit janë mbledhur përpara Kryeministrisë ku kanë mbajtur fjalime të ndryshme.

Gjithashtu, shumë prej tyre kanë dalë me flamuj dhe pankarta kundër klasave politike.

Pamjet e publikuara me dron nga zjarrfikësit e Madridit të premten tregojnë pasojat e zjarrit pyjor që detyroi evakuimin dhe izolimin e banorëve në veri të kryeqytetit spanjoll.

Një burrë u arrestua të enjten (16 korrik), nën dyshimin se i vuri qëllimisht zjarrin që shpërtheu në komunën Lozoyuela, bëri të ditur për radion Cadena SER përfaqësuesi i qeverisë në Madrid.

Deri të premten, zjarri mbeti jashtë kontrollit, ndërsa autoritetet po monitoronin me kujdes kushtet e motit, të cilat konsiderohen faktor kyç në përpjekjet për vënien e flakëve nën kontroll.

Zjarri pyjor ka përfshirë rreth 700 hektarë sipërfaqe në zonën e Lozoyuelas.

Agjencia Meteorologjike e Spanjës (AEMET) paralajmëroi se temperaturat do të fillojnë të rriten sërish nga e shtuna, ndërsa në disa pjesë të brendshme të Andaluzisë pritet të kalojnë 40 gradë Celsius.

Jetëgjatësia mesatare për një ushtar rus në Ukrainë është midis 20-30 minutash, sipas drejtoriy të CIA-s, John Ratcliffe.

Duke folur në një samit të mbrojtjes në Pensilvani, ai ia atribuoi kushtet vdekjeprurëse për forcat e Vladimir Putinit dronëve luftarakë të Ukrainës të pajisur me inteligjencë artificiale, shkruan Sky News.

“Ajo që do të thoja është se inteligjenca jonë është në përputhje me disa nga raportimet me burim të hapur që mund të keni parë në Ukrainë”, tha Ratcliffe.

“Pra, jetëgjatësia mesatare e një rekruti rus, që mbërrin tani në fushën e betejës në Ukrainë, vlerësohet të jetë midis 20 dhe 30 minutash.”

“Dhe kjo për shkak se dronët e mundësuar nga inteligjenca artificiale janë bërë makina vrasëse kaq të specializuara dhe me kosto të ulët. Dhe kjo është arsyeja pse tani jemi katër vjet e gjysmë në atë konflikt”, shtoi Ratcliffe.

Ukraina tha këtë muaj se Rusia ka humbur rreth 1.4 milion ushtarë që nga fillimi i pushtimit të saj në shkallë të plotë, me mbi 1,000 trupa të Kremlinit të vrarë ose të plagosur pothuajse çdo ditë.

Në maj, ministria e mbrojtjes e Ukrainës tha se po vriste afërsisht 200 ushtarë rusë për çdo kilometër territor që Moska pretendonte.