Presidenti i Ukrainës, Volodymyr Zelensky, ka dhënë së fundmi një intervistë për New York Post, ku ka zbuluar se po zhvillon bisedime me presidentin amerikan Donald Trump për një “marrëveshje gjigante” mes dy vendeve, e cila do të përfshijë shkëmbim të teknologjive ushtarake dhe bashkëpunim në fushën e dronëve.

Sipas Zelenskyt, Ukraina i ka ofruar Shteteve të Bashkuara eksperiencën dhe të dhënat teknike të grumbulluara gjatë luftës me Rusinë, me theks të veçantë në përdorimin e dronëve në luftën moderne. Në këmbim, Kievi do të blejë sisteme të avancuara armësh amerikane, duke forcuar më tej bashkëpunimin strategjik dypalësh.

“Populli amerikan ka nevojë për këtë teknologji. Duhet ta keni në arsenalin tuaj,” u shpreh Zelensky, duke iu referuar dronëve të rinj ukrainas që kanë depërtuar në sistemet ruse të mbrojtjes ajrore dhe kanë goditur objektiva deri në 800 milje brenda territorit të Rusisë.

Nëse marrëveshja ecën përpara, ajo pritet të ketë ndikim të madh në sigurinë kombëtare amerikane, në një kohë kur zyrtarët në Uashington po paralajmërojnë se SHBA po mbetet prapa Rusisë dhe Kinës në garën për dronë ushtarakë. Vetë ministri i Mbrojtjes i SHBA-së, Pete Hegseth, ka dhënë urdhër për thjeshtimin e procedurave për prodhimin e dronëve brenda vendit, duke e quajtur këtë një hap urgjent për të përballuar sfidat e reja globale.

Në këtë kuadër, startup-i kalifornian Neros do të furnizojë Ukrainën këtë vit me 6,000 UAV, pas testimeve të suksesshme në frontin ukrainas.

Zelensky shtoi se përvoja ushtarake e Ukrainës do të ndahet me SHBA-në dhe partnerët e NATO-s, ndërsa janë në zhvillim bisedime edhe me Daninë, Norvegjinë dhe Gjermaninë, për zgjerimin e bashkëpunimit teknologjik dhe ushtarak.

Kjo marrëveshje e mundshme vjen në një moment kur dronët po kthehen në armën kryesore të luftës, me ekspertët që e konsiderojnë konfliktin në Ukrainë si një “paralajmërim” për luftërat e së ardhmes të dominuara nga teknologjia.

Presidenti i Turqisë, Recep Tayyip Erdogan e ka akuzuar të enjten Izraelin se është duke e përdorur pakicën e druzëve në Siri, si pretekst për t’u zgjeruar në këtë shtet të shkatërruar nga lufta.

“Izraeli, duke i përmendur druzët si arsyetim, është duke zgjeruar banditizmin e vet nëpër lagje të Sirisë në dy ditët e fundit”, ka thënë Erdogan në një fjalim televiziv.

“Dua ta theksoj edhe një herë, qartë dhe direkt, Izraeli është shtet i paligjshëm dhe pa parime”.

“Në këtë drejtim, problem ynë më i madh në rajon është agresioni i Izraelit, dhe nëse nuk ndalet menjëherë, ai nuk do të hezitojë që t’ia vë flakën rajonit tonë dhe më pas botës”.

Provinca Sveida e druzëve, në jug të Sirisë, ka qenë në qendër të konfliktit të përgjakshëm sektarian prej të dielës. Qindra persona është raportuar të jenë vrarë në përleshje mes luftëtarëve druzë kundër fiseve sunite beduine dhe ushtrisë me aleatë.

Izraeli i ka goditur trupat ushtarake qeveritare me sulme ajrore kur ato janë pozicionuar në provincat jugore, ashtu sikurse edhe selinë ushtarake në Damask, duke paralajmëruar që sulmet do të intensifikohen derisa Qeveria të tërhiqet.

Shtetet e Bashkuara – aleate të ngushta të Izraelit, që janë duke tentuar t’i rikrijojnë lidhjet me Sirinë – kanë thënë është arritur një marrëveshje për ta qetësuar situatën në atë zonë.

Erdogani ka thënë se ka biseduar me presidentin e përkohshëm të Sirisë, Ahmed al-Sharaa përmes telefonit, pas largimit të trupave siriane nga Sveida.

Një zjarr i përmasave të mëdha ka përfshirë një qendër tregtare pesëkatëshe në qytetin juglindor të Kutit, rreth 160 kilometra nga Bagdadi.

Deri më tani raportohet për 60 persona që kanë humbur jetën dhe dhjetëra të tjerë janë plagosur zjarri shkatërrues.

Tragjedia ndodhi të mërkurën në mbrëmje, vetëm shtatë ditë pas hapjes së qendrës tregtare, e cila tashmë është shndërruar në një vend zie.

Ministria e Brendshme e Irakut konfirmoi se mes viktimave ka edhe 14 trupa të djegur që nuk janë identifikuar ende, ndërsa shumica e jetëve të humbura u regjistruan në banjat e ndërtesës, ku njerëzit kishin kërkuar strehim nga flakët. Sipas deklaratës, 45 persona janë shpëtuar nga brenda godinës.

Pamjet që qarkullojnë në rrjetet sociale dhe në median shtetërore tregojnë skena dramatike të flakëve që përfshijnë katet e sipërme të qendrës tregtare “Corniche”, ndërsa zjarrfikësit përpiqen të shpëtojnë njerëz nga çatia. Pamje të tjera tregojnë brendësinë e ndërtesës tërësisht të djegur.

Guvernatori rajonal, Mohammed al-Miyahi, e cilësoi ngjarjen si “një tragjedi dhe një fatkeqësi”, duke premtuar hetime të thelluara dhe ngritje padish ndaj pronarit të qendrës. Ai shpalli gjithashtu tre ditë zie zyrtare në rajon.

Shkaku i saktë i zjarrit nuk është bërë ende i ditur, por autoritetet kanë nisur hetimet.

Kryeministri britanik, Keir Starmer ka nënshkruar një traktat me kancelarin gjerman Friedrich Merz, i cili përfshin përpjekje për të ndaluar kalimin e anijeve të vogla.

Friedrich Merz thotë se është krenar që ndodhet në Mbretërinë e Bashkuar dhe pajtohet me kryeministrin se sot “është vërtet një ditë historike”.

Kancelari gjerman thotë se traktati i sotëm hyn në “sfidat kryesore të kohës sonë”.

Këto, thotë Merz, përfshijnë daljen e Britanisë nga Evropa – të cilën Merz thotë se e konsideroi “të mjerueshme” – si dhe Rusinë që “trondit arkitekturën e sigurisë evropiane”.

“Është në këto kushte që ne synojmë të sigurojmë lirinë dhe prosperitetin e popujve të të dy vendeve tona. Kjo është me të vërtetë marrëveshja që të dy kemi nënshkruar.”

Merz shton se siguria është “fija që kalon nëpër” traktat.

“Në fund të fundit, kjo do të thotë që ne i sigurojmë njëri-tjetrit se do ta ndihmojmë njëri-tjetrin në rast të një sulmi të armatosur.”

Ai shton se Mbretëria e Bashkuar dhe Gjermania duan të sigurohen që Deti i Veriut të mbrohet më mirë nga kërcënimet hibride, si dhe të ndihmojnë në forcimin e krahut lindor të NATO-s.

Lidhur me Ukrainën, Merz vlerëson “iniciativën e rëndësishme” të Donald Trump për furnizimin e Kievit me armë nëpërmjet Ukrainës.

“E gjithë kjo do të rrisë presionin mbi Putinin që më në fund të negociojë për paqen në Evropë dhe Shtetet e Bashkuara.”

Më parë ata nënshkruan traktatin e parë Britani-Gjermani që nga Lufta e Dytë Botërore, Traktati i Kensingtonit, i quajtur kështu sepse u nënshkrua në Muzeun V&A të Londrës.

Starmer thotë se “shkalla e sfidave” me të cilat përballet Evropa e ka bashkuar Mbretërinë e Bashkuar dhe Gjermaninë.

“Ne synojmë t’i takojmë ata drejtpërdrejt. Por gjithashtu shohim shkallën e mundësive, kështu që kemi një vendosmëri të përbashkët për të ofruar siguri për njerëzit që punojnë.”

Starmer vazhdon duke thënë se Mbretëria e Bashkuar dhe Gjermania bënë diçka “vërtet të pashembullt” sot, pasi marrëveshja është “traktati i parë i madh dypalësh midis Mbretërisë së Bashkuar dhe Gjermanisë”.

Starmer e përshkruan gjithashtu traktatin si një plan pune “praktik” – me 17 projekte të konfirmuara.

Kryeministri thotë se traktati përfshin akses në portën elektronike për udhëtarët e shpeshtë të biznesit në Gjermani dhe plane për një lidhje direkte hekurudhore.

“Po punojmë gjithashtu së bashku kundër migracionit të paligjshëm”, shton Starmer. “Është një shenjë e qartë se e kemi seriozisht – po i ndjekim bandat ilegale në çdo mënyrë që mundemi.”

Starmer përmend gjithashtu thirrjet për një armëpushim në Gaza dhe ndikimin e luftës në Ukrainë.

“Ky është një partneritet me një qëllim,” thotë ai sipas Sky News.

Presidentja e Kosovës, Vjosa Osmani, ka paralajmëruar se do t’i drejtohet Gjykatës Kushtetuese në javën e ardhshme, nëse Kuvendi i Kosovës nuk do të konstituohet edhe në fundjavë.

Ajo i ka bërë këto deklarata në një konferencë të mbajtur me gazetarë, pas kthimit nga vizitat në Shtetet e Bashkuara dhe Letoni, dhe në ditën kur është shënuar përpjekja e 48-të për konstituim të Kuvendit, pas zgjedhjeve parlamentare të 9 shkurtit, pa ndonjë sukses.

“Ne jemi duke e përgatitur lëndën për Kushtetuese dhe nëse edhe gjatë fundjavës nuk ka marrëveshje që mund të rezultojë me institucione të konstituuara, në fillim të javës do t’i drejtohemi Gjykatës, por nuk e dimë sa kohë do t’i duhet asaj për t’u përgjigjur”, ka thënë Osmani.

Mes tjerash, Osmani e ka theksuar se asaj nuk i takon të negociojë koalicione qeveritare dhe se diçka të tillë e ka të ndaluar me Kushtetutë.

Gjykata e ka përcaktuar 26 korrikun si afat të fundit për konstituim, ajo nuk ka ofruar më shumë hollësi se çfarë ndodh tutje nëse partitë nuk merren vesh deri atëherë.

“Unë jam e bindur që sikur për çdo afat tjetër, afat detyrues, edhe për këtë afat të cilin Gjykata e ka shpallur të detyrueshëm dhe kushtetues, nëse nuk respektohet, duhet të ketë pasoja juridike. Nuk po flas për pasoja penale. Pasoja juridike nënkupton se çfarë ndodh me institucionet nëse ato nuk konstituohen deri më 26 korrik?”, ka pyetur Osmani.

Pavarësisht se 26 korriku po afrohet secilën herë e më shumë, partitë politike duken të betonuara në qëndrimet e tyre dhe fajësojnë njëra-tjetrën për situatën e krijuar.

Megjithatë, mbetet të shihet se çfarë do të ndodhë në fundjavë, pasi deputetja e Nismës Socialdemokrate, Xhevahire Izmaku, ka thënë më herët gjatë së enjtes se pret që kryetari i partisë, Fatmir Limaj, të takohet me liderin e Lëvizjes Vetëvendosje, Albin Kurti, për një marrëveshje të mundshme në fundjavë.

“Presim që në fundjavë të ketë një epilog pozitiv, pra shpresojmë se këto bisedime që kanë vazhduar me muaj të tërë, të prodhojnë rezultat dhe Kosova të ketë institucione”, ka thënë Izmaku për gazetarë.

Sipas saj, temë e bisedimeve është që Limaj të jetë kandidat për kryetar të Kuvendit, duke shtuar se “më në fund dikush po del mbi egot personale dhe partiake, e ky duket që do të jetë zoti Limaj pra, sepse nga fillimi e ka ndryshuar diskursin në këtë vend”.

Situata është bllokuar pasi Partia Demoratike e Kosovës, Lidhja Demokratike e Kosovës , Aleanca për Ardhmërinë e Kosovës dhe Lista Serbe – partia më e madhe e serbëve në Kosovë – nuk pranojnë të propozojnë nga një kandidat për formim të një komisioni për votim të fshehtë, me arsyetimin se mënyra e ndryshimit të votimit nga kryesuesi i seancës Avni Dehari është jokushtetuese.

Lëvizja Vetëvendosje, partia që ka fituar më së shumti vota në zgjedhje, kërkon që për Albulena Haxhiun – të propozuar për kryeparlamentare – të votohet vetëm një herë përmes votimit të fshehtë dhe nëse nuk i siguron 61 votat e nevojshme, ajo do të tërhiqet nga gara.

Ajo nuk i ka siguruar votat e nevojshme në disa seanca radhazi që janë mbajtur me votim të hapur. Për disa parti, ajo është figurë përçarëse dhe e papranueshme.

Pjesëtarë të shoqërisë civile kanë protestuar disa herë para ndërtesës së Kuvendit duke i thirrur deputetët në përgjegjësi./rel

Kryetarja e Parlamentit, Elisa Spiropali, ndodhet në Turqi ku ka zhvilluar një vizitë zyrtare. Kjo vizitë erdhi pas festës së homologut të saj turk, Numan Kurtulmus.

Pas zhvillimit të një konference të përbashkët për shtyp, dy kryeparlamentarët  u ndalën në Anıtkabir, ku vendosën kurora në nderim të Mustafa Qemal Atatürkut.

Pamjet nga zhvillimi i ceremonisë për vendosjen e kurorave, Spiropali i ndau me ndjekësit të rrjetet sociale.

‘Ceremonia e vendosjes së kurorës në Anıtkabir, në nderim të Mustafa Qemal Atatürkut, Atit Themelues të Turqisë moderne dhe Presidentit të parë të Republikës’, shkruan Spiropali në rrjetet sociale.

Zyrtarët e Qeverisë në Siri dhe udhëheqësit e komunitetit druz njoftuan se kanë arritur një armëpushim, pas disa ditësh me përleshje, që rrezikonin të prishnin tranzicionin politik në këtë vend dhe shkaktuan ndërhyrjen ushtarake të Izraelit.

Forcat qeveritare filluan tërheqjen nga qyteti Suveida, por nuk është e sigurt nëse armëpushimi do të respektohet.

Një armëpushim i mëparshëm – i shpallur të martën – u prish shpejt, ndërsa një udhëheqës i njohur druz, sheiku Hikmat Al-Hijri, e hodhi poshtë marrëveshjen e re.

Sulmet izraelite vazhduan edhe pas shpalljes së armëpushimit.

Kush janë druzët?
Druzët janë një pakicë etno-fetare që flet arabisht dhe jeton në Siri, Liban, Izrael dhe Lartësitë e pushtuara të Golanit.

Besimi druz është një degë e Islamit shiit – me identitet dhe rite të veta unike.

Rreth gjysma e ndjekësve të këtij besimi – me gjithsej afro një milion pjesëtarë – jetojnë në Siri, ku përbëjnë rreth 3% të popullsisë.

Në Izrael, ky komunitet konsiderohet në masë të madhe si besnik ndaj shtetit, për shkak të pjesëmarrjes së pjesëtarëve të tij në shërbimin ushtarak.

Sipas Byrosë Qendrore të Statistikave të Izraelit, rreth 152.000 druzë jetojnë në Izrael dhe në Lartësitë Golan – të pushtuara nga Izraeli.

Historikisht, druzët kanë pasur një pozitë të pasigurt në rendin politik të Sirisë.

Gjatë luftës civile gati 14-vjeçare, ata vepruan me milicitë e tyre në jug të këtij vendi.

Që nga rrëzimi i regjimit të Bashar al-Assadit në dhjetor, druzët u kanë rezistuar përpjekjeve të shtetit për të vendosur autoritetin në jug të Sirisë.

Fraksionet druze në Siri nuk kanë qëndrim të njëjtë ndaj autoriteteve të reja – disa tregohen të kujdesshme, e të tjerat i refuzojnë hapur.

Megjithatë, shumë prej tyre kundërshtojnë praninë e forcave zyrtare të sigurisë në Suveida dhe nuk pranojnë të bashkohen me ushtrinë siriane, duke u mbështetur në forcat e tyre lokale për mbrojtje.

Megjithëse Qeveria siriane i dënoi sulmet e fundit ndaj komunitetit druz dhe premtoi se do ta rikthejë rendin në jug të Sirisë, forcat e saj u akuzuan edhe për sulme ndaj kësaj pakice.

Vëzhguesi Sirian për të Drejtat e Njeriut, me seli në Britani, dokumentoi “ekzekutime të menjëhershme” të druzëve nga forcat qeveritare.

Raportet e tilla shtuan mosbesimin e disa pjesëtarëve të komunitetit druz ndaj autoriteteve në Damask.

Pas rrëzimit të papritur të Assadit, Izraeli filloi të afrohej me komunitetin druz pranë kufirit të tij verior, në përpjekje për të krijuar aleanca me pakicat në Siri.

Izraeli po përpiqet të paraqitet si mbrojtës i këtyre pakicave – përfshirë kurdët, druzët dhe alavitët – ndërkohë që vazhdon t’i godasë forcat qeveritare dhe objektivat ushtarake brenda Sirisë.

Gjatë përleshjeve sektare në maj, Izraeli kreu sulme pranë pallatit presidencial në Damask, duke thënë se ato ishin një paralajmërim kundër sulmeve ndaj komunitetit druz.

Megjithatë, disa figura druze në Siri dhe në Liban e akuzuan Izraelin se po nxit përçarje sektare për të avancuar qëllimet e veta ekspansioniste në rajon.

Pse Izraeli po e sulmon tani Sirinë?
Izraeli po sulmon Sirinë për t’i penguar forcat siriane që të ushtrojnë kontroll ushtarak në jug të vendit, pranë kufirit me Izraelin.

Ai do që kjo zonë të mbetet pa ushtri për t’i shmangur rreziqet, sidomos nga luftëtarët islamistë që janë afër kufirit.

Më 15 korrik, Izraeli goditi forcat e sigurisë në qytetin Suveida, ndërsa më 16 korrik sulmet u zgjeruan, duke goditur selinë e ushtrisë dhe Ministrinë e Mbrojtjes në Damask.

Siria i dënoi këto sulme.

Ato ishin më të rëndat që nga fundi i vitit 2024, kur Izraeli goditi bazat ushtarake siriane dhe mori nën kontroll një zonë kufitare.

Izraeli dëshiron ta dobësojë ushtrinë siriane për të mos u rrezikuar, dhe paralajmëroi se sulmet do të vazhdojnë.

Ministri izraelit i Mbrojtjes, Israel Katz, pas sulmit të parë ajror në Damask, shkroi në X se “goditjet e dhimbshme kanë filluar”.

Ai tha se ushtria izraelite “do të vazhdojë t’i sulmojë forcat e regjimit derisa ato të tërhiqen nga zona dhe, së shpejti, do të rrisë nivelin e përgjigjeve ndaj regjimit, nëse mesazhi nuk kuptohet”.

Cilat ishin reagimet në botë?
Sekretari amerikan i Shtetit, Marco Rubio, tha se SHBA-ja është “shumë e shqetësuar” për dhunën.

“Kemi rënë dakord për hapa specifikë që do t’i japin fund kësaj situate shqetësuese dhe të tmerrshme”, tha ai më 16 korrik, pa dhënë më shumë detaje.

Disa shtete arabe, përfshirë Libanin, Irakun, Katarin, Jordaninë, Egjiptin dhe Kuvajtin, i dënuan sulmet e Izraelit në Siri.

Irani i përshkroi sulmet si “shumë të parashikueshme”.

Turqia tha se ato janë “një akt sabotimi kundër përpjekjeve të Sirisë për të siguruar paqen dhe stabilitetin”.

Sekretari i përgjithshëm i OKB-së, Antonio Guterres, i dënoi gjithashtu sulmet e Izraelit në Suveida dhe Damask./rel

Një ngjarje e rëndë është regjistruar në Sarandë mesditën e sotme, ku në lagjen numër 4 të qytetit ka pasur të shtëna me armë zjarri, dhe për pasojë kanë mbetur të plagosur dy persona.

Burimet bëjnë me dije se Policia e Sarandës, me mbështetjen e forcave të ndërhyrjes së shpejtë (FNSH), është vënë në kërkim të dy vëllezërve të dyshuar si autorë të një plagosjeje të ndodhur së fundmi në qytet.

Të dyshuarit për ngjarjen janë Ramadan Zoto alias Ramadan Canaj, 43 vjec, i dënuar më parë në Greqi për vrasje dhe armëmbajtje pa leje, aktualisht në proces gjyqësor në Sarandë për “goditje për shkak të detyrës”.

Ramadan Canaj konsiderohet person me rrezikshmëri të lartë, pasi gjatë veprimtarisë në Greqi ka shkëmbyer zjarr edhe me policinë greke disa vite më parë. Në kërkim është shpallur edhe Erjon Canaj, 35 vjec, vellai tij.

Canaj në dhjetor 2022 ka dhunuar rojen e spitalit të Sarandës, ndërsa në shkurt 2024 është arrestuar në banesë me 2 pistoleta por është shpallur i pafajshëm nga Gjykata e Sarandës disa muaj më parë.

 

Marrëveshja Shqipëri-Itali për njohjen e sigurimeve shoqërore hyri në fuqi nga data 1 korrik 2025.

Deri më tani kanë nisur procedurat 150 qytetarë, për njohjen e sigurimeve shoqërore me shtetin italian

Lidhur me këtë, ministri i Ekonomisë, Kulturës dhe Inovacionit, Blendi Gonxhja ka pritur në një takim drejtoreshën e Institutit Kombëtar të Sigurimeve Shoqërore në Itali, dhe së bashku me përfaqësues të ambasadës italiane në vendin tonë, panë nga afër punën për zbatimin e kësaj marrëveshje.

“Mbi 150 shtetas shqiptarë kanë nisur procedurat në zbatim të marrëveshjes për njohjen e sigurimeve shoqërore me shtetin italian, e cila ka hyrë në fuqi nga data 1 Korrik 2025.

Së bashku me Znj. Valeria Vittimberga, Drejtoreshë e Përgjithshme e Institutit Kombëtar të Sigurimeve Shoqërore në Itali dhe me përfaqësues të ambasadës Italiane në Shqipëri, zhvilluam një takim për të ndjekur nga afër hapat e parë të zbatimit të kësaj marrëveshjeje historike, që synon garantimin e të drejtave të punëmarrësve shqiptarë dhe italianë që kanë kontribuar në të dy vendet.

Marrëveshja i hap rrugë njohjes së ndërsjellë të periudhave të sigurimit dhe mundëson përfitimin e pensioneve sipas legjislacionit kombëtar të secilit shtet. Deri më tani, kërkesat e para janë kryesisht për bashkimin e periudhave të sigurimit për qëllime pensioni në Itali, si dhe nga individë që nuk plotësojnë minimumin prej 15 vite sigurim në Shqipëri.

Instituti i Sigurimeve Shoqërore ka ngritur të gjithë infrastrukturën e nevojshme për të pritur dhe përpunuar këto kërkesa, si dhe për të realizuar komunikimin e drejtpërdrejtë dhe efikas me palën italiane. Shkëmbimi i formularëve midis dy institucioneve do të kryhet në mënyrë elektronike, duke reduktuar ndjeshëm kohën e procedurës dhe duke lehtësuar ndjeshëm shërbimin për qytetarët.

Në funksion të transparencës dhe udhëzimit të saktë për qytetarët, janë publikuar tashmë të gjitha udhëzimet dhe manualet që shpjegojnë hapat që duhen ndjekur për çdo kategori aplikuesi.

Kjo marrëveshje përfaqëson një hap domethënës në drejtim të mbrojtjes sociale dhe është një model bashkëpunimi që synojmë ta zgjerojmë edhe me vende të tjera ku jetojnë dhe kontribuojnë shtetasit shqiptarë”, shkruan ministri Gonxhja në një postim.

Një sër ndryshimesh në sistemin zgjedhor janë njoftuar nga qeveria e Mbretërisë së Bashkuar, ku synohet ulja e moshës së votimit në 16 vjeç në të gjitha territoret e vendit deri në zgjedhjet e ardhshme të përgjithshme.

Vendimi përmbush një nga zotimet kryesore të fushatës së Partisë Laburiste dhe synon të forcojë barazinë dhe përfshirjen e të rinjve në procesin demokratik.

Kjo ndryshim harmonizon moshën e votimit në të gjithë Mbretërinë e Bashkuar, pasi Skocia dhe Uellsi tashmë kishin miratuar rregullore të ngjashme për zgjedhjet lokale.

Sipas qeverisë, masa synon të rikthejë drejtësinë për 16 dhe 17-vjeçarët që punojnë ose mund të shërbejnë në forcat e armatosura, por deri tani nuk kishin të drejtë vote.

Paketa reformuese përfshin gjithashtu një kalim gradual drejt një sistemi më të automatizuar të regjistrimit të votuesve, duke reduktuar nevojën për dorëzimin e të dhënave në mënyrë të përsëritur në shërbime të ndryshme shtetërore.

Edhe pse regjistrimi automatik nuk bëhet ende detyrim ligjor, ky hap shihet si një përpjekje për të rritur pjesëmarrjen qytetare.

Paketa e reformave përfshin gjithashtu forçimin e rregullave për financimin e zgjedhjeve, me qëllim të kufizimit të ndikimit të interesave të huaja. Do të mbyllen hapësirat ligjore që lejonin hyrjen e fondeve nga jashtë përmes kompanive fasadë, ndërkohë që do të zbatohen kontrolle të reja për kompanitë që ofrojnë donacione për partitë politike.

Këto kompani do të duhet të dëshmojnë aktivitet ekonomik të vërtetë në Mbretërinë e Bashkuar ose Irlandë.

Shkelësit do të përballen me gjoba deri në 500,000 paund, ndërsa deklaratat e rreme ose mashtruese do të përbëjnë vepër penale. Subjektet politike do të kenë detyrimin të kryejnë vlerësime të rrezikut për çdo donacion të marrë, ndërkohë që Komisioni Zgjedhor do të lëshojë udhëzime të reja për vlerësimin e donatorëve.

Presidentja e Kosovës, Vjosa Osmani, ka thënë të enjten se Serbia ka pasur qëllim dhe ka ende qëllim destabilizimin e situatës së sigurisë në Kosovë, dhe se këtë vlerësim që e ka bërë edhe në Uashington ditë më parë, e ka bazuar në informatat e vazhdueshme që i ka marrë nga institucionet e sigurisë të Republikës së Kosovës.

Përgjatë vizitës në Uashington javën e kaluar, presidentja i ka konfirmuar deklaratat e presidentit amerikan, Donald Trump se ai e ka parandaluar një përshkallëzim të mundshëm nga Serbia në Kosovë “në javët e fundit”.

“Më konkretisht në fund të muajit maj kemi marrë informacione specifike lidhur me veprimet e Serbisë në kufi me Kosovën. Menjëherë pas marrjes së këtyre informacioneve kam pasur takime me institucionet e sigurisë të cilat më raportojnë si presidente. Jemi siguruar që çdo institucion në Kosovë ka mobilizim të duhur për mbrojtje të vendit”, ka thënë ajo në një konferencë për media në Prishtinë, pas kthimit nga disa vizita në Shtetet e Bashkuara dhe Letoni.

Osmani ka thënë se një pjesë e informacioneve janë të klasifikuara, por që ato janë ndarë me aleatët për të ndalur përshkallëzimin e sigurisë.

Serbia i ka hedhur poshtë deklaratat e Osmanit ditë më parë, mirëpo presidentja e Kosovës i ka quajtur ato “pjesë të propagandës së tyre të vazhdueshme”.

“I siguroj qytetarët e Kosovës se nuk ka arsye, as për shqetësim dhe as për panik, sepse institucionet tona janë në krye të detyrës për mbrojtjen e kufijve dhe të sigurisë të të gjithë qytetarëve tanë. Kërcënimet nga Serbia janë të vazhdueshme, megjithatë institucionet tona kanë gjithçka në kontroll”.

“Nuk i kam interpretuar deklaratat e Trumpit”
Kur është pyetur për akuzat e Richard Grenellit, të dërguarit të presidentit amerikan për Misione të Posaçme, se Osmani po manipulon me deklaratat e Trumpit, presidentja ka thënë se ajo vetëm e ka falënderuar presidentin Trump për rolin e tij në botë në përgjithësi, dhe në rajonin e Ballkanit për ruajtjen e paqes dhe sigurisë.

“Unë jam përgjigjur në pyetje dhe i ftoj vetë qytetarët e Kosovës që t’i dëgjojnë ato deklarata për të cilat unë jam pyetur. Ndër të tjera është deklarata e datës 25 qershor 2025, mund t’i dëgjoni vetë. Thuhet se ‘në javën e fundit u kujdesshëm për Indinë e Pakistanin, Kosovën dhe Serbinë’”, ka deklaruar Osmani duke cituar deklarimet e Trumpit në javët e fundit.

“Nuk kam interpretuar deklarata të presidentit Trump, por kam treguar se si i kam kuptuar unë si presidente e Republikës së Kosovës. Nëse qëndrimi i Shteteve të Bashkuara është ndryshe, besoj që mund t’iu drejtoheni, mirëpo ne e vlerësojmë rolin e presidentit Trump si paqebërës ditë e natë për paqe në botë. E vlerësojmë jashtëzakonisht këtë kontribut. Nuk dua të deklaroj si e kam komentuar tjerët deklaratën time”.

Vetë Trump i ka përmendur Kosovën dhe Serbinë në disa raste në javët e fundit, duke thënë se ka parandaluar një konflikt mes tyre, por pa ofruar hollësi për periudhën kohore.

Radio Evropa e Lirë e ka kontaktuar Shtëpinë e Bardhë për sqarim lidhur me këto deklarata, por nuk ka marrë përgjigje.

Përgjigje nuk ka nisur as Qeveria në detyrë e Kosovës, kur është pyetur se për çfarë lloj përshkallëzimi të situatës bëhet fjalë.

Misioni i NATO-s në Kosovë, KFOR, i ka thënë Radios Evropa e Lirë se Ballkani Perëndimor vazhdon të ketë rëndësi strategjike për aleancën dhe ajo është e përkushtuar për stabilitet rajonal.

Megjithatë, KFOR-i nuk ka dashur t’i komentojë deklaratat e fundit të Osmanit dhe Trumpit, duke thënë se për to duhet referuar te institucionet e Kosovës dhe ato të SHBA-së.

Edhe Ambasada e Gjermanisë në Kosovë i ka thënë një ditë më parë Radios Evropa e Lirë se nuk ka informacione për ndonjë përshkallëzim ushtarak të situatës mes Kosovës dhe Serbisë./rel

“Shqipëria Bëhet” i është drejtuar Komisionit Qendror të Zgjedhjeve me një kërkesë.

Përmes saj, kërkohet që KQZ-ja të shpallë të pavlefshme kërkesat për revokimin e dorëheqjeve të anëtarëve të koalicionit “Nisma Shqipëria Bëhet”.

Shkresa e depozituar këtë të enjte nënvizon se dorëheqja është bërë nga kandidimi dhe si e tillë, emrat në listën e mbyllur kanë humbur të drejtën e përfitimit të mandatit.

Shkresa mbyllet me kërkesën që mandati t’i kaloj Adriatik Lapajt, si kandidati i renditur i pari me numrin më të lartë të votave në listën e hapur të koalicionit ‘Nisma Shqipëria Bëhet’.

Kujtojmë se prej ditësh ka nisu një ‘përplasje online’ mes Adriatik Lapajt dhe Endri Shabanit lidhur me mandatin e fituar nga koalicioni në zgjedhjet e 11 majit.

Stërvitja e parë ushtarake mes ushtrisë serbe dhe asaj kineze shënon një hap të ri në forcimin e bashkëpunimit ushtarak mes dy vendeve.

Me këtë veprim, Serbia bëhet vendi i vetëm kandidat për anëtarësim në Bashkimin Evropian që zhvillon stërvitje të tilla me Kinën.

Ministria kineze e Mbrojtjes njoftoi më 14 korrik se stërvitja, e quajtur “Rojtari i Paqes 2025”, do të zhvillohet në gjysmën e dytë të korrikut, në provincën Hebei në veri të Kinës.

Viteve të fundit, Serbia ka blerë armë nga Kina, duke u bërë vendi i parë në Evropë që blen sistemin kinez kundërajror, FK-3.

Për shkak të qasjes ndaj Kinës dhe Rusisë, Brukseli e ka paralajmëruar disa herë Serbinë.

Edhe stërvitja ushtarake me Kinën u pa në të njëjtin kontekst kritik nga BE-ja.

“Serbia duhet të përmbahet nga veprimet dhe deklaratat që bien ndesh me qëndrimet e BE-së në fushën e politikës së jashtme”, ishte mesazhi nga Brukseli.

Duke folur për Radion Evropa e Lirë, një zëdhënës i BE-së tha se blloku dëshiron të mbështetet te Serbia si një partnere e besueshme evropiane, për parime dhe vlera të përbashkëta.

“Neve na duhet që Serbia të na bindë për drejtimin e saj strategjik”, tha zëdhënësi i BE-së.

Si vend kandidat, Serbia e ka detyrim të përputhet me politikën e jashtme të BE-së, dhe Brukseli e ka kërkuar këtë shumë herë nga Beogradi.

Serbia është ushtarakisht neutrale, por është anëtare e programit të NATO-s “Partneriteti për Paqe” dhe qëllim strategjik i saj është anëtarësimi në BE.

Beogradi zyrtar e balancon njëkohësisht politikën e tij të jashtme midis Perëndimit, Kinës dhe Rusisë, e cila është izoluar nga Perëndimi për shkak të pushtimit të Ukrainës.

Nikolla Lluniq, analist serb i gjeopolitikës dhe sigurisë, beson se vendimi i Serbisë për stërvitje ushtarake me Kinën “e minon orientimin e deklaruar të Serbisë drejt BE-së”.

“Forcimi i ndërveprimit të njësive kineze dhe serbe i dërgon Perëndimit një mesazh të qartë gjeopolitik”, thotë ai për Radion Evropa e Lirë.

Para stërvitjes me Ushtrinë e Serbisë, Ushtria e Kinës zhvilloi në korrik të vitit 2024 manovra në Bjellorusi – së bashku me ushtrinë e këtij vendi – në kufi me NATO-n.

Ato u mbajtën në kohën e samitit të NATO-s në Uashington, ku udhëheqësit e aleancës ushtarake shprehën mbështetje “të padiskutueshme” për Ukrainën, ndërsa kritikuan ashpër Pekinin për mbështetjen e tij për Rusinë.

Cili është qëllimi i stërvitjes në Kinë?
Sipas njoftimit të Ministrisë kineze të Mbrojtjes, stërvitja e planifikuar “do të kontribuojë në forcimin e aftësive luftarake të pjesëmarrësve dhe thellimin e bashkëpunimit midis dy ushtrive”.

Ministria serbe e Mbrojtjes nuk iu përgjigj pyetjeve të Radios Evropa e Lirë në lidhje me qëllimin e kësaj stërvitjeje, e as se cilat njësi dhe sa ushtarë të Ushtrisë së Serbisë do të marrin pjesë.

Përgjigje nuk ktheu as Ambasada e Kinës në Beograd.

Tash për tash, nuk ka informacione as nëse dhe kur do të mbahet një stërvitje e përbashkët në Serbi, pasi këto stërvitje zakonisht organizohen me rotacion.

Lluniq thotë se nga njoftimi i Ministrisë kineze të Mbrojtjes mund të kuptohet më shumë se bëhet fjalë për një stërvitje ushtarake, e jo për trajnim.

Ai thotë se trajnimet ushtarake nuk kanë emër, ndaj “Rojtari i Paqes 2025” është më i përshtatshëm për stërvitje ushtarake.

NATO-ja nuk iu përgjigj pyetjes së Radios Evropa e Lirë në lidhje me stërvitjen e paralajmëruar ushtarake mes Serbisë dhe Kinës.

Armët kineze në Ushtrinë e Serbisë
Serbia bleu nga Kina gjashtë dronë pa pilot CH-92A në vitin 2020 dhe, dy vjet më vonë, edhe sistemin raketor të mbrojtjes ajrore FK-3.

Kështu, Serbia u bë operatore e këtyre raketave kineze dhe dronëve luftarakë në Evropë.

Gjatë prezantimit të pajisjeve të reja të Forcave të Armatosura të Serbisë në prill të vitit 2023, publikut iu prezantua edhe droni kinez CH-95.

Ministria e Mbrojtjes e Serbisë njoftoi në fund të vitit 2024 se në Kinë është realizuar një trajnim për sistemin raketor FK-3, i cili mund të godasë lloje të ndryshme avionësh, helikopterësh, raketash lundruese dhe dronësh.

Brukseli dhe Uashingtoni kanë shprehur vazhdimisht shqetësim për blerjet e armëve ruse dhe kineze nga Serbia.

Pasi Rusia nisi pushtimin në shkallë të plotë të Ukrainës në vitin 2022, Serbia vendosi një moratorium për të gjitha stërvitjet ushtarake me partnerë të huaj.

Përjashtim bën stërvitja taktike ndërkombëtare “Ujku i Platinit”, në të cilën njësitë e Ushtrisë së Serbisë forcojnë aftësitë e tyre për të marrë pjesë në misione paqeruajtëse.

Stërvitjet “Ujku i Platinit” zhvillohen në Serbi që nga viti 2014 dhe në to marrin pjesë edhe anëtarë të NATO-s, përfshirë Shtetet e Bashkuara.

Lluniq thotë se pjesëmarrja e Serbisë në stërvitjen ushtarake me Kinën, bie ndesh me synimet që vetë Serbia i ka shpallur për politikën e saj të jashtme dhe e bën të paqëndrueshëm pretendimin e saj për neutralitet ushtarak.

“Është e qartë se moratoriumi mbështetet në kritere politike, jo parimore, dhe për këtë arsye, neutraliteti ushtarak i Serbisë, për shkak të kësaj qasjeje selektive, humb çdo besueshmëri ndërkombëtare”, thotë ai.

Stërvitjes ushtarake i paraprinë ushtrimet policore
Stërvitjet e ardhshme ushtarake nuk do të jenë të parat midis Serbisë dhe Kinës në fushën e sigurisë.

Viteve të kaluara, janë mbajtur edhe ushtrime mes njësive speciale të Policisë së Serbisë dhe asaj të Kinës, ndërsa që nga viti 2019 dy vendet kanë edhe një marrëveshje për patrulla të përbashkëta policore.

Vuk Vuksanoviq, nga Qendra e Beogradit për Politikat e Sigurisë, përmend edhe dokumentin kinez të Iniciativës Globale të Sigurisë (GSI), të vitit 2023.

Në të, kujton ai, thuhet se Kina do t’i forcojë partneritetet dhe shkëmbimet e saj të sigurisë në fushën e arsimit ushtarak dhe policor.

Vuksanoviq thotë se rritja e bashkëpunimit në siguri mes Serbisë dhe Kinës reflektohet përmes blerjes së pajisjeve ushtarake kineze, bashkëpunimit policor dhe teknologjisë kineze të mbikëqyrjes.

“Nga perspektiva e Serbisë, ky është vetëm një vazhdim i politikës shumëvektoriale dhe politikës balancuese”, vlerëson ai.

Cili është interesi i Kinës?
Ushtria dhe policia kineze, sipas Vuksanoviqit, kërkojnë partnerë për të fituar përvojë ndërkombëtare.

Ai thotë se vendet evropiane, kryesisht, nuk ishin të gatshme ta bënin këtë.

“Kjo [me Serbinë] është përpjekje për të fituar përvojë ndërkombëtare dhe, në të njëjtën kohë, është shumë e dobishme për promovimin e Kinës si një fuqi e re globale në rritje”, thotë Vuksanoviq.

Në korrik të vitit 2019, përpara pushtimit rus të Ukrainës, në Gjermani u mbajt një stërvitje e përbashkët ushtarake-mjekësore midis saj dhe Kinës.

Ajo u quajt “Ndihma e Kombinuar 2019” dhe në fokus kishte përgatitjen për reagim gjatë krizave humanitare.

Në media u përshkrua si ngjarja e parë për ushtrinë kineze në përpjekjet e saj për të krijuar lidhje më të ngushta me Evropën.

Serbia dhe Kina, viteve të fundit, i kanë forcuar edhe marrëdhëniet ekonomike dhe politike, të cilat dy vendet i cilësojnë si “miqësi të çeliktë” dhe “partneritet strategjik”.

Gjatë vizitës së dytë të presidentit kinez, Xi Jinping, në Beograd, në maj të vitit 2024, u nënshkrua një deklaratë për thellimin e partneritetit strategjik dhe “ndërtimin e një bashkësie të Serbisë dhe Kinës, me një të ardhme të përbashkët në epokën e re”.

Beogradi së bashku me Parisin dhe Budapestin ishin tri adresat e vizituara nga Xi, gjatë vizitës së tij në Evropë në pranverën e vitit 2024.

Kina, ndërkohë, u bë edhe partnerja më e madhe e tregtisë së jashtme të Serbisë për sa u përket importeve, të cilat arritën në 5.13 miliardë euro në vitin 2024.

Autoritetet në Beograd mbështeten te Kina kur bëhet fjalë për investime ekonomike dhe kredi.

Ato, gjithashtu, llogarisin në mbështetjen e Kinës në organizatat dhe institucionet ndërkombëtare, sa i përket kundërshtimit të pavarësisë së Kosovës./rel

Shqipëria po njeh një rritje të ndjeshme të interesit për punësimin e shtetasve të huaj, veçanërisht nga vende si Turqia, Italia, Kosova, Filipinet dhe India. Vetëm në gjashtëmujorin e parë të vitit 2024 janë miratuar mbi 11 mijë leje unike pune për të huajt.

Gertiola Çepani, drejtuese e Shërbimit të Tregut të Punës pranë AKPA, bën të ditur se sektorët më të kërkuar mbeten ato prodhues dhe shërbimet.

“Gjatë këtij viti kemi zhvilluar një analizë të tregut, ku mbi 2300 punëdhënës kanë shprehur mungesën e fuqisë punëtore dhe nevojat për aftësi të reja. Për të aplikuar, punëdhënësit shqiptarë duhet të kenë lidhur kontratë pune me të huajin dhe të kenë shlyer detyrimet tatimore. Krahas dokumentacionit të zakonshëm si diploma, ID, dhe adresa e qëndrimit, aplikimi bëhet përmes e-Albania,” tha Gertiola Çepani, Drejtuese e Shërbimit të Tregut të Punës, AKPA.

Të huajt me leje unike gëzojnë të njëjtat të drejta si qytetarët shqiptarë, ndërkohë që aktiviteti i tyre punësor monitorohet nga Policia e Shtetit dhe Inspektorati i Punës.

“Shqipëria është kthyer në një treg gjithnjë e më atraktiv për fuqinë punëtore të huaj, ndërsa sfidat mbeten dokumentacioni i pasaktë dhe përmbushja e kritereve ligjore. Ndërkohë, pritet rishikimi i ligjit për të huajt për të lehtësuar më tej të drejtat e emigrantëve dhe aksesin e tyre në tregun shqiptar të punës.”

Autoritetet theksojnë se kjo prirje pasqyron zhvillimet e tregut dhe rritjen e interesit të të huajve për të ndërtuar një të ardhme profesionale në Shqipëri. Tv Klan

 

 

Policia e Sarandës ka dhënë detaje rreth ngjarjes së ndodhur pak momente më parë në stadiumin e qytetit ku mbetën të plagosur dy persona.

Konkretisht, sipas njoftimit paraprak të policisë, bëhet me dije se shtetasit e plagosur me armë zjarri i përkasin moshës 32 dhe 24 vjeç.

Po sipas policisë, të rinjtë, pas ndihmës së parë mjekësore në spitalin e Sarandës, do të dërgohen drejt spitalit të Traumës në Tiranë, për mjekim të specializuar.

 “Sot, rreth orës 15:00, në lagjen nr. 4, Sarandë, në rrethana ende të paqarta, dyshohet se janë plagosur me armë zjarri shtetasit G. H., 32 vjeç dhe E. L., 24 vjeç, të cilët pas ndihmës së parë mjekësore në spitalin e Sarandës, do të dërgohen drejt spitalit të Traumës, Tiranë, për mjekim të specializuar” tha policia e Sarandës në një informacion paraprak për mediat.

Grupi hetimor, nën drejtimin e Prokurorisë Sarandë, po vijon punën për identifikimin e autorit, zbardhjen e e rrethanave dhe dokumentimin e plotë ligjor të kësaj ngjarjeje.

Kuvendi i Ukrainës e ka emëruar Yulia Svyrydenkon kryeministre të vendit, në kuadër të riformatimit më të më madh të kabinetit qeveritar në këtë shtet në vjetët e fundit, me qëllim të përmirësimit të menaxhimit në periudhë lufte.

Svyrydenko, 39-vjeçare, e ka marrë detyrën nga presidenti ukrainas, Volodymyr Zelensky, me kërkesë për rritje të prodhimit të brendshëm të armëve dhe ringjallje të ekonomisë së Ukrainës, të varur në mënyrë të konsiderueshme nga kreditë.

Në fjalimin para Kuvendit, Zelensky ka thënë se pret që Qeveria të rrisë numrin e armëve që prodhohen brenda territorit dhe që brenda gjashtë muajve ato jenë të shpërndara në fushëbetejë te 50 për qind e ushtarëve.

Ai e ka përmendur edhe zgjerimin e bashkëpunimit ekonomik me aleatët, si një prej synimeve kryesore të riformatimit më të madh qeveritar prej nisjes së luftës së Rusisë në Ukrainë më 2022. Svyrydenko është teknokrate me përvojë, e cila ka shërbyer si zëvendëskryeministrja e parë e Ukrainës prej vitit 2021. Ajo është zotuar se do të veprojë “me shpejtësi dhe vendosmëri”.

“Lufta nuk lë hapësirë për vonesa”, ka thënë ajo përmes një postimi në X – dikur Twitter.

“Prioritetet tona për gjashtë muajt e parë janë të qarta: furnizime të qëndrueshme për ushtrnë, zgjerim të prodhimit të brendshëm të armëve dhe përforcim të kapaciteteve teknologjike për forcat tona mbrojtëse”.

Svyrydenko është e njohur brenda qarqeve të administratës amerikane, pasi ajo e ka negociuar marrëveshjen për qasjen e Shteteve të Bashkuara në minerale e rralla të Ukrainës.

Këto negociata konsiderohen kryesore në përforcim të marrëdhënieve në mes të Kievit dhe Uashingtonit. Duke iu adresuar ligjvënësve të enjten, Zelensky ka thënë se do të ketë edhe marrëveshje tjera që do të arrihen me SHBA-në, por ka përmendur diçka specifike.Lufta në Ukrainë ka nisur më 24 shkurt të vitit 2022. Presidenti rus, Vladimir Putin, e quan luftën “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra. Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre. REL

Raportohen të shtëna me armë zjarri në lagjen nr 4 të qytetit të Sarandës. Ngjarja mësohet se ka ndodhur pranë stadiumit të qytetit dhe raportohet për dy persona që kanë mbetur të plagosur.

Deri në këto momente bëhet me dije se në urgjencë janë paraqitur dy persona që kanë marrë ndihmën e parë pas plagëve të shkaktuara nga armë zjarri.

Forca policie ndodhen në vendngjarje dhe kanë rrethuar zonën, ndërsa po punojnë për identifikimin e autorëve dhe zbardhjen e rrethanave të incidentit. Ende nuk dihet gjendja shëndetësore e të plagosurve, madje as motivet që çuan në përdorimin e armës.

“Shqipëria ka përjetuar një bum vizitorësh vitet e fundit, kjo edhe falë çmimeve të favorshme. Plazhet, një diversitet i madh kulturor dhe peizazhet mbresëlënëse e bëjnë vendin një destinacion popullor udhëtimi.” Kështu nis shkrimi i të përditshmes gjermano-zvicerane “Blick” për vendin tonë, ku rendit disa nga pikat kryesore për t’u vizituar, duke nisur me Tiranën.

Kryeqyteti i Shqipërisë sigurisht që ia vlen një vizitë, pasi këtu e kaluara komuniste takohet me stilin e jetës në një mënyrë emocionuese. Qendra e qytetit është Sheshi “Skënderbej”, ku ndodhen ndërtesat më përfaqësuese të qytetit, ku spikat Muzeu Kombëtar me mozaikun e tij.

Më tej, shkrimi i gazetës gjermano-zvicerane “Blick” vijon me Sarandën, që e konsideron si parajsën e plazheve të Shqipërisë. Riviera shqiptare në jug të vendit tërheq shumë vizitorë dhe po zhvillohet gjithnjë e më shumë si një alternativë e lirë krahasuar me Kroacinë dhe Greqinë. Në Sarandë, “Blick” shkruan se përveç plazhit, mund të ecni përgjatë shëtitores, e cila ka shumë kafene dhe restorante.

Gjithashtu, Ksamil i zë një peshë të rëndësishme në artikullin e gazetës gjermano-zvicerane, që e konsideron si plazhin më të bukur të Shqipërisë, aty ku ky destinacion ka një plazh të gjatë me rërë, por edhe gjiret e ndryshme të vogla.

Një xhevahir historik është i vendosur në mes të peizazhit të Parkut Kombëtar të Butrintit, qyteti antik i cili është në trashëgiminë botërore të UNESCO-s, ku mund të dallohen gjurmët e grekëve, romakëve, bizantinëve dhe venecianëve, të gërshetuara në kompleksin historik.

Në shkrimin për Shqipërinë, e përditshmja gjermano-zvicerane “Blick” ndalet tek Berati dhe Gjirokastra.

Për të parin shkruan se përveç përzierjes piktoreske të ndërtesave të banimit, restoranteve e dyqaneve, kishat me afresket mesjetare ia vlen të vizitohen, sikurse edhe Muzeu Onufri, i cili ka ikona historike.

Ndërsa për Gjirokastrën, “Blick” shkruan se është ndoshta qyteti më i bukur dhe një nga destinacionet turistike më të vizituara, me ndërtesat që i ngjajnë mini-kështjellave të vogla.

Në përmbyllje të artikullit për vendin tonë, gjermano-zvicerania “Blick” ndalet tek Kruja, që e konsideron si shtëpia e heroit kombëtar “Skënderbeut”. Jo larg nga Tirana, Kruja me Muzeun Etnografik dhe kullat e larta në mal, ofrojnë një pamje të mrekullueshme të Parkut Kombëtar përreth. Klan News

Përkeqësohet gjatë orëve të fundit situata në lidhje me zjarrin e rënë në zonën e Drenovës në Mallakastër. Raportohet se dhjetëra forca zjarrfikëse nga Mallakastra, Fieri, Patosi dhe efektivë të ushtrisë janë angazhuar në terren për të përballuar flakët që po përhapen me shpejtësi.

Zjarri vijon të jetë jashtë kontrollit për shkak të erës së fortë e cila ka favorizuar përhapjen e flakëve në një sipërfaqe të gjerë pyjore dhe kullotash, pavarësisht ndërhyrjeve nga ajri përfshirë përdorimin e helikopterëve.

Nga ana e tyre autoritetet lokale kanë bërë thirrje për vigjilencë dhe bashkëpunim nga komuniteti, ndërsa nuk përjashtohet mundësia e evakuimit në rast se zjarri avancon më tej.

Gjendet dhe sekuestrohet arma e zjarrit që dyshohet se u përdor nga 17-vjeçarja në tentativën për vetëvrasje. Lajmi bëhet i ditur nëpërmjet një njoftimi nga policia e Vlorës.

“Në vijim të hetimeve për ngjarjen e ndodhur më datë 14.07.2025, në lagjen “Kushtrimi”, ku një 17-vjeçare mbeti e plagosur rëndë pas tentativës për vetëvrasje me armë zjarri, u bë e mundur gjetja dhe sekuestrimi, në cilësinë e provës materiale, i armës së zjarrit pistoletë, e cila ishte hedhur në një vend grumbullimi materialesh të ndryshme shtëpiake, pranë banesës së gjyshërve të të miturës dhe ndodhej brenda një qeseje plastike”, thuhet në njoftim.

Arma e sekuestruar do t’i dërgohet Institutit të Policisë Shkencore për ekzaminime të mëtejshme, me qëllim dokumentimin e plotë të ngjarjes. Materialet shtesë iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.

Kujtojmë se 17-vjeçarja qëlloi veten me plumb pas një konflikti familjar. Sipas uniformave blu, adoleshentja tentoi t’i jepte fund jetës pasi u dhunua nga babai i saj, 43 vjeçari me iniciale S. S., i cili u vendos në prangat e policisë më 15 korrik, një ditë pas ngjarjes.

Ai akuzohet për veprat penale “Dhuna në familje” dhe “Shkaktimi i vetëvrasjes”.

Blutë nisën procedimin në gjendje të lirë për gjyshin e të miturës, 76-vjeçarin me iniciale P. H., pasi dyshohet se  posedonte në mënyrë të paligjshme armën e zjarrit me të cilën ka tentuar të vetëvritet mbesa e tij. Ai akuzohet për veprën penale “Mbajtja pa leje dhe prodhimi i armëve, armëve shpërthyese dhe i municionit”. opinion.al