Është punuar pa u ndalur për të frenuar përhapjen e zjarreve dhe për të mbrojtur banesat e pyjet në zonën e Qafë-Buallit në Bulqizë.

Lajmi është dhënë në një postim në rrjetin social Facebook, nga ministri i Mbrotjes Pirro Vengu ku shkruan se efektivët punuan pa u ndalur gjatë natës në lidhje me situatën.

Sipas Vengut janë përdorur mjetet dhe pajisjet në dispozicion, ndërhyrja nga toka ka vijuar në kushte të vështira nga terrini dhe erërat e forta.

‘Përballë flakëve që përfshinë zonën e Qafë Buallit në Bulqizë, efektivët tanë punuan pa u ndalur gjatë natës për të frenuar përhapjen e zjarreve dhe për të mbrojtur banesat dhe pyjet përreth.

Me mjetet dhe pajisjet në dispozicion, ndërhyrja nga toka ka vijuar në kushte të vështira terreni dhe erërash të forta’, shkruan Vengu.

Ndezi zjarr për pastrim dhe si pasojë e përhapjes së flakëve, u dogj një sipërfaqe e konsiderueshme me bimësi në malin e Shashicës, ndalohet 33-vjeçari.

Si rezultat i punës hetimore dhe i veprimeve për identifikimin dhe nxjerrjen përpara përgjegjësisë penale të autorëve të zjarrvënieve, specialistët për Hetimin e Krimeve të Komisariatit të Policisë Vlorë ndaluan shtetasin E. F., 33 vjeç, banues në fshatin Kaninë, Vlorë.

‘33-vjeçari dyshohet se ka ndezur zjarr për pastrimin e barërave, në një sipërfaqe toke kullotë në pronësi të tij, në vendin e quajtur “Gryka e Zguros”, në malin e Shashicës, ku si pasojë e përhapjes së flakëve është djegur një sipërfaqe e konsiderueshme, me shkurre dhe bimësi të dendur. Zjarri është përhapur edhe në drejtim të territorit të fshatrave Kaninë dhe Sherishtë’, thuhet në njoftimin e Policisë Vlorë.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.

‘Drejtoria Vendore e Policisë Vlorë apelon për të gjithë qytetarët që në asnjë rast të mos ndezin zjarre, pasi do të përballen me ligjin.

Në bashkëpunim me komisariatet në varësi, vijon intensivisht puna për identifikimin dhe vënien përpara përgjegjësisë ligjore të çdo autori të zjarrvënieve në territorin e qarkut të Vlorës.

Policia fton qytetarët që të denoncojnë në numrin 112 çdo rast të kësaj veprimtarie kriminale dhe të paligjshmërive në tërësi, duke iu garantuar anonimat, reagim të shpejtë dhe të paanshëm’, thuhet në njoftimin e Policisë Vlorë.

Emmanuel Macron dëshiron ta njohë Palestinën si shtet. Franca do të ishte vendi i parë i G7 që ndërmerr këtë hap. Po a do të sjellë kjo një dinamikë e re në procesin e paqes sikurse mendon Macron?

Emmanuel Macron e njoftoi vendimin vonë në mbrëmje në X (24.07). Në një postim të gjatë, presidenti francez deklaroi se vendi i tij do ta njihte shtetin palestinez. Njohja zyrtare, tha Macron, do të bëhej në shtator në Asamblenë e Përgjithshme të OKB-së.  Macron e sheh këtë hap si reagim ndaj situatës gjithnjë e më të dëshpëruar në Gaza,  ndaj pamjeve dhe raportimeve të njerëzve të uritur dhe ndaj thirrjeve të përsëritura dhe dramatike nga organizata të shumta ndihme. “Ne kemi nevojë për një armëpushim të menjëhershëm, lirimin e të gjithë pengjeve dhe ndihmë humanitare masive për popullin e Gazës”, shkruan Macron. Në të njëjtën kohë, ai bën thirrje për “demilitarizimin e Hamasit”  dhe të gjithë shtetit palestinez, pasi të njihet nga Franca, i cili duhet ta “njohë plotësisht Izraelin”. Kjo, tha ai, do të kontribuonte në sigurinë e të gjithëve në rajon. Nuk ka alternativë.

Njoftim i mëparshëm

Presidenti francez kishte premtuar edhe më parë njohjen e Palestinës, por më pas e kishte shtyrë këtë. Fillimisht ai donte ta njoftonte këtë në një konferencë të OKB-së mbi zgjidhjen me dy shtete në Nju Jork – por për shkak të sulmit izraelit ndaj Iranit, kjo konferencë u shty nga qershori në fund të këtij muaji.

Macron tani e rindez debatin ndërkombëtar të bllokuar mbi zgjidhjen me dy shtete. Franca ndjek shembullin e vendeve të tjera evropiane si Spanja, Irlanda dhe Norvegjia, të cilat gjithashtu e kanë njohur kohët e fundit Palestinën. Një total prej 147 shtetesh e kanë ndërmarrë këtë hap. Njohja nga Parisi do të kishte rëndësi të veçantë ndërkombëtare: Franca do të ishte shteti i parë i G7 që do të njihte Palestinën – dhe anëtari i parë perëndimor i përhershëm i Këshillit të Sigurimit të OKB-së.

Njoftimi i presidentit francez motivohet edhe nga politika e brendshme. Kundërshtarët e tij politikë e kanë akuzuar prej kohësh se ka vepruar me shumë hezitim në konfliktin e Lindjes së Mesme dhe se nuk ka arritur të krijojë një vijë të qartë. Tani Macron sheh një mundësi për ta profilizuar Francën si një aktore të pavarur në konfliktin e Lindjes së Mesme. Ato pjesë të publikut francez që prej kohësh kanë kërkuar një rol më aktiv evropian në Lindjen e Mesme e mirëpresin veprimin e presidentit të tyre. Duhet thën se vështirë se ka një vend në Evropë ku konflikti i Lindjes së Mesme është aq polarizues sa është në Francë.

Kritika të ashpra nga Izraeli, vlerësime nga bota arabe, po perëndimi?

Reagimet nga Izraeli pas njoftimit nuk vonuan. Kryeministri Benjamin Netanyahu e dënoi ashpër vendimin e Macron, duke thënë se ai “shpërblente terrorizmin” dhe “rrezikonte krijimin e një shteti tjetër përfaqësues iranian, ashtu siç ishte bërë Gaza si  e tillë”. Një shtet palestinez në këto kushte, tha Netanyahu, “do të ishte një platformë startimi për shkatërrimin e Izraelit”.

Vetë organizata terroriste e Hamasit e mirëpriti vendimin e Macronit si një “hap në drejtimin e duhur”, edhe pse sigurisht nuk do të ishte dakord me kërkesën për “çmilitarizimin”. Vlerësime erdhën edhe nga bota arabe, veçanërisht nga Arabia Saudite, Ministria e Jashtme saudite e mirëpriti pozitivisht njoftimin e Macronit.

“Duke njohur Palestinën, Franca do të inkurajojë ose edhe do të ushtrojë presion mbi shtetet e tjera që të ndjekin shembullin e saj, qoftë Belgjika, Danimarka apo Luksemburgu. Apo edhe Britania e Madhe, Australia apo Kanadaja”, u shpreh për DW Hugh Lovatt, ekspert i Lindjes së Mesme në Këshillin Evropian për Marrëdhëniet me Jashtë. Kryeministri britanik Keir Starmer shprehu gatishmërinë e tij ndaj një iniciative të re evropiane për t’i dhënë fund luftës në Gaza, por mbetet i kujdesshëm në çështjen e njohjes së Palestinës.

Qëndrimi politik i Berlinit zyrtar ndaj iniciativës së Macronit ka qenë gjithashtu i kujdesshëm dhe i baraspeshuar. Gjermania ende nuk e njeh Palestinën, ajo ruan qëndrimin e saj të mëparshëm, se një hap i tillë duhet të ndërmerret vetëm në përputhje me negociatat ndërkombëtare. Por iniciativa e Francës e vendos Berlinin në një pozicion të vështirë: Nga njëra anë, Gjermania kërkon unitet evropian, ndërsa nga ana tjetër, Gjermania është partnerja më e ngushtë e Izraelit në Evropë.

Në të kundërt, Shtetet e Bashkuara mbajtën qartë anën e Izraelit dhe e kritikuan ashpër njoftimin e presidentit francez. Sekretari i Shtetit i SHBA-së, Marco Rubio, postoi në X se vendimi “i shërben vetëm propagandës së Hamasit” dhe është “një shuplakë në fytyrë për viktimat e 7 tetorit”. Më 7 tetor 2023 Hamasi kreu një sulmi terrorist të paparë ndaj Izraelit, ku u vranë më shumë se 1,200 vetë dhe më shumë se 250 të tjerë u morën peng. Ky sulm ishte shkaku i drejtpërdrejtë për luftën aktuale në Rripin e Gazës.

Cilat janë pasojat praktike të njohjes së shtetit palestinez nga Franca?

Vendimi i Macron është kryesisht simbolik, pasi ai nuk ka ndonjë pasojë konkrete sipas ligjit ndërkombëtar përtej asaj të marrëdhënies dypalëshe midis Francës dhe një shteti palestinez. Por Franca mund të krijojë ose thellojë marrëdhënie të drejtpërdrejta me Autoritetin Palestinez në të ardhmen – për shembull, përmes ambasadave, marrëveshjeve tregtare ose programeve të ndihmës.

Ajo që diihet thjesht njohja e shtetit palestinez nuk ka gjasa të ndryshojë situatën në terren për momentin,, pasi çështje të rëndësishme mbeten të pazgjidhura, si psh: kufijtë brenda të cilëve do të njihej një shtet palestinez. Është gjithashtu e paqartë se si ideja e Macron për një “shtet të çmilitarizuar” që do të njihet nga Izraeli mund të pajtohet me idetë e qeverisë izraelite, por edhe të Hamasit. DW

Nga sot (27 korrik) ka hyrë në fuqi masa e përkohshme e vendosur nga Gjykata Kushtetuese që ndalon deputetët e zgjedhur të ndërmarrin çdo hap drejt konstituimit të Kuvendit deri më 8 gusht.

Kjo masë vjen pasi më 26 korrik përfundoi afati 30-ditor i përcaktuar nga Gjykata për formimin e legjislaturës së re. Deputetët kishin edhe të shtunën mundësinë e fundit për ta konstituar Kuvendin, por përpjekjet dështuan.

Të shtunën, ata u mblodhën dy herë – në orën 14:00 dhe në 22:00 – në vazhdim të seancës së nisur më 15 prill. Kryesuesi i seancës, Avni Dehari (Lëvizja Vetëvendosje) kërkoi krijimin e një komisioni për të mundësuar votimin e fshehtë për kryetarin e Kuvendit, por kjo nuk gjeti pajtimin e shumicës.

Mosmarrëveshjet lidhen me kandidaturën e Albulena Haxhiut, e propozuar nga Vetëvendosje në koalicion me Guxo dhe Alternativa. Ajo nuk arriti të sigurojë asnjëherë shumicën e nevojshme prej 61 votash, duke dështuar gjashtë herë në votim të hapur. Tentimet për votim të fshehtë gjithashtu rezultuan pa sukses.

Gjykata Kushtetuese argumentoi se vendosja e masës ishte e domosdoshme, pasi çdo veprim pas datës 26 korrik “mund të shkaktonte dëme të pariparueshme për rendin kushtetues të Republikës së Kosovës”.

Vendimi i saj lidhet me dy lëndë që ajo po shqyrton, të dorëzuara nga Partia Demokratike e Kosovës (PDK) dhe Lidhja Demokratike e Kosovës (LDK), të cilat pretendojnë se vazhdimet e fundit të seancave janë zhvilluar në kundërshtim me Kushtetutën.

Në ditët e ardhshme, pritet që Gjykata Kushtetuese të sqarojë pasojat ligjore për deputetët dhe hapat që duhet të ndërmerren më tej. Koha.net

Kur Juliet Schor publikoi librin e saj “The Overworked American” në vitin 1992, debati për reduktimin e orarit të punës mori vëmendje kombëtare në SHBA. Por entuziazmi u zbeh shpejt, derisa pandemia e vitit 2020 riktheu në qendër pyetjen thelbësore: A po punojmë shumë për një jetë që nuk na kënaq?

Schor, profesore e ekonomisë dhe sociologjisë në Boston College, është tashmë ndër zërat kryesorë në iniciativën globale “4 Day Week”, që ka pilotuar modele pune me 4 ditë (32 orë) pa ulje page në mbi 245 organizata me 8,700 punonjës në SHBA, Kanada, Europë e Australi.

Rezultatet? Punonjësit raportuan më pak stres, lodhje dhe ankth, përmirësim të shëndetit mendor dhe fizik, dhe një ndjesi më të fortë kontrolli mbi jetën. Produktiviteti u rrit, fitimet e bizneseve u përmirësuan dhe shkalla e dorëheqjeve u zhduk thuajse plotësisht.

“Nuk e prisnim këtë ndjesi mirëqenieje të përgjithshme që punonjësit kishin,” tregon Schor. “Ata ndihen më të freskët të hënave, më të motivuar dhe më të përkushtuar.”

Një tjetër surprizë? Asnjë rritje në numrin e punonjësve që gjejnë një punë të dytë. Në fakt, ai numër ra. Dhe ndryshe nga ç’pritej, ritmi i punës nuk u përshpejtua në 4 ditët e mbetura, ishte një riorganizim i përgjithshëm i proceseve, jo thjesht një ngjeshje orari.

Po pse atëherë nuk po e përqafojnë më shumë kompani këtë model?

Sipas Schor, pengesat kryesore janë kultura e kontrollit dhe frika nga ndryshimi. Shumë menaxherë ndihen të kërcënuar kur duhet të “lirojnë kohë” për stafin e tyre. Edhe kthimi me detyrim në zyrë, sipas saj, ka më shumë të bëjë me kontrollin sesa me produktivitetin real.

Nga ana tjetër, e premtja po bëhet gjithnjë e më shumë një ditë “gjysmë pushimi” në shumë kompani, çka tregon një tranzicion natyror drejt javës 4-ditore.

A ekziston rreziku që ky model të sjellë ulje page? Sipas rregullave të pilotimeve, jo. “Paga nuk mund të ulet,” thekson Schor. Uljet e pavullnetshme të pagës janë të papranueshme për shumicën e njerëzve. Por ka shqetësime se disa kompani mund të ngadalësojnë rritjen e pagave me kalimin e kohës, sidomos nëse rriten produktiviteti dhe përdorimi i teknologjisë.

Po roli i inteligjencës artificiale? Schor paralajmëron se nëse IA zëvendëson punonjësit pa një plan për reduktim të orarit të punës, rreziku i papunësisë masive është real. Alternativa më e qëndrueshme është ndarja e përfitimeve të produktivitetit duke ulur orët e punës, jo vendet e punës.

Ndërsa debati për legjislacionin mbetet i hapur, Schor beson se rruga drejt një jave 4-ditore kërkon më shumë përhapje praktike fillimisht. Vetëm atëherë do të jetë e mundur të bëhet një standard kombëtar.

Për momentin, është një ide që po ecën ngadalë, por me hapa të sigurt drejt normalitetit. /Monitor

Agjencia e Menaxhimit Emergjent ka bërë të ditur se shkaku i temperaturave të larta dhe erërave të forta, në disa zona të Kosovës janë përhapur zjarre.

Agjencia njoftoi se një zjarrfikës është lënduar në Ferizaj gjatë intervenimit për shuarjen e zjarreve.

“Raporti i Qendrës Operative të Agjencisë tregon një rritje në numrin e vatrave të zjarrit, me gjithsej 101 raste të raportuara vetëm në gjashtë orët e fundit. Prej tyre, 48 janë ende aktive, ndërsa 53 janë lokalizuar”, thuhet në njoftimin e Agjencisë.

Presidentja e Kosovës, Vjosa Osmani, tha se gjendja është e vështirë dhe kërkon veprim të shpejtë e të bashkërenduar nga të gjitha institucionet.

“Institucionet e Republikës së Kosovës janë të mobilizuara për të ofruar ndihmën e nevojshme. FSK-ja është në gjendje gatishmërie të plotë dhe e gatshme të ofrojë mbështetje të menjëhershme në rast se kërkohet nga autoritetet komunale apo ato qendrore për emergjencat civile”, tha Osmani.

Në fshatin Zasellë të Komunës së Mitrovicës, ka pasur edhe intervenim me helikopter nga KFOR-i.

Agjencia u bëri thirrje qytetarëve që të mos ndezin zjarre në ambiente të jashtme dhe të lajmërojnë zjarrvëniet në numrat emergjent 112, 193 dhe 192.

Më herët, kjo agjenci kishte thënë se shumica e zjarreve masive në Kosovë shkaktohen nga dora e njeriut.

Edhe pse Agjencia e Menaxhimit Emergjent nuk ka treguar se në cilat zona janë përhapur zjarre, kryetari i Komunës së Suharekës, Bali Muharremaj, ka bërë të ditur për zjarre në disa fshatëra të kësaj komune.

“Kushdo që ka mundësi e që ka pajisje per shuarje të zjarrit, le të ndihmoj në hapësirën Dubravë – Sallagrazhdë – Mushtisht”, shkroi në Facebook, ku publikoi një video.

Agjencia e Menaxhimit Emergjent raportoi edhe dje për gjithsej 23 zjarre, prej të cilat shtatë kishin qenë aktive deri në orën 15:00.

Ende nuk dihet se sa dëme janë shkaktuar, por më parë gjatë këtij muaji janë publikuar shumë video në rrjete sociale që tregonin se si arat e mbjella me drithëra si grurë kapeshin nga zjarret.

Sipas Sistemit Evropian të Informacionit për Zjarret në Pyje (EFFIS), gjatë vitit 2024 në Kosovë ishin regjistruar 94 zjarre, të cilat kishin djegur gjithsej 12.079 hektarë pyje dhe shkurre./REL

Kryeministri Rama, përmes një postimi në rrjetin social Facebook ka reaguar në lidhje me situatën nga zjarret që kanë përfshirë vendin.

Në këtë postim kryeministri ka shprehur falenderime për efektivët e Forcave të Armatosura, Policisë së Shtetit, të zjarrfikëses,  të urgjencës kombëtare dhe të Emergjencave Civile të cilët në këtë kohë janë në gatishmëri në lidhje me situatën e zjarreve.

Gjithashtu Rama ka veçuar një falenderim për shefin e Policisë së Delvinës, Agim Troci,  i cili sipas Ramës shpëtoi jetë duke rrezikuar të tijën.

Postimi i kryeministrit Rama.

MIRËMËNGJES

dhe me falënderimin me respekt për çdo efektiv të Forcave të Armatosura e të Policisë së Shtetit po ashtu, me një veçim plot admirim për shefin e policisë së Delvinës, Agim Troci që shpëtoi jetë duke rrezikuar të tijën, si edhe zjarrfikës, forca të Urgjencës Kombëtare e të Emergjencave Civile, të cilën janë në gatishmëri në këtë kohë të vështirë zjarresh në gjithë Europën Mesdhetare, ju uroj të diel të mbarë.

Në Borsh, Piqeras dhe Sasaj ka rinisur aksioni nga ajri me dy helikopterë të Forcës Ajrore për të neutralizuar zjarret që kanë kërcënuar banesat dhe bizneset e zonës për shkak të erës së fortë që favorizoi përhapjen e shpejtë të flakëve gjatë orëve të para të mëngjesit. Kështu shkruan në një postim në rrjetin social Facebook, ministri i Mbrojtes, Pirro Vengu.

‘Teksa zjarrëfikësit dhe Forcat e Armatosura të stacionuara në Borsh gjatë natës siguruan perimetra sigurie përreth banesave, Policia e Shtetit dhe punonjësit e emergjencave civile ndihmuan banorë dhe pushues të evakuohen nga zonat më të rrezikuara, duke shoqëruar drejt sigurisë 40 prej tyre’, shprehet ministri Vengu në këtë postim.

Sipas tij, zjarrfikësit e Himarës dhe Forcat e Armatosura vijojnë operacionin në terren duke bashkërenduar me ekuipazhet e helikopterëve për të eliminuar çdo rrezik.

Dashi

Dita e sotme sjell energji dhe vendosmëri. Mund të ndihesh më impulsiv se zakonisht, por nëse vepron me maturi, mund të arrish një sukses të papritur. Kujdes në marrëdhëniet me partnerin.

Demi

Fokusohu tek stabiliteti financiar dhe planet afatgjata. Një bisedë e rëndësishme mund të ndodhë në familje – dëgjo më shumë sesa flet. Dita është pozitive për çështje zemre.

Binjakët

Komunikimi është çelësi i suksesit sot. Një ide e re ose një takim i papritur mund të hapë dyer të reja. Kujdes me fjalët – dikush mund të keqkuptojë qëllimet e tua.

Gaforrja

Fokusohu tek mirëqenia emocionale. Disa çështje familjare kërkojnë vëmendjen tënde. Mos neglizho shëndetin – pushimet e vogla do të të bëjnë mirë.

Luani

Me Diellin në shenjën tënde, je në qendër të vëmendjes. Shfrytëzo këtë energji për të ndërtuar lidhje të reja apo për të përmirësuar imazhin tënd. Dita është shumë pozitive për dashurinë dhe krijimtarinë.

Virgjëresha

Sot je më reflektiv. Mund të ndjesh nevojën për qetësi dhe vetmi. Një projekt i vjetër mund të rikthehet në vëmendje – vlen ta rishikosh. Intuita është e fortë.

Peshorja

Miqësitë dhe bashkëpunimet janë në qendër të vëmendjes. Dita favorizon aktivitetet sociale dhe punën në grup. Në dashuri, kërko më shumë balancë dhe mirëkuptim.

Akrepi

Fokusi është te karriera. Mund të të ofrohet një mundësi për të treguar aftësitë. Bëhu i matur me vendimet – mos u nxit. Dikush mund të të vë në provë durimin.

Shigjetari

Dita e sotme frymëzon zgjerim dhe eksplorim. Mund të planifikosh një udhëtim apo të fillosh një projekt të ri mendor. Kujdes me premtimet – mbaj ato që bën.

Bricjapi

Sot ndihesh më i përqendruar në çështjet financiare ose emocionale. Një vendim i rëndësishëm mund të merret në lidhje me një partneritet. Mos e neglizho ndihmën që të ofrohet.

Ujori

Marrëdhëniet janë në fokus. Është një ditë e mirë për të sqaruar mosmarrëveshje ose për të forcuar lidhjet. Në punë, dikush mund të të ofrojë një aleancë të vlefshme.

Peshqit

Dita kërkon organizim. Shëndeti dhe rutina janë thelbësore – ndoshta duhet të ndryshosh diçka në stilin e jetës. Në mbrëmje, një bisedë intime do të të qetësojë shpirtin.

Ka dështuar edhe përpjekja e fundit për ta funksionalizuar legjislaturën e nëntë të Kuvendit të Kosovës, vetëm pak orë para hyrjes në fuqi të afatit të vendosur nga Gjykata Kushtetuese.

Pas orës 00:00 të së premtes, deputetët e zgjedhur nuk do të mund të marrin asnjë veprim për çështjen e konstituimit të Kuvendit deri më 8 gusht, për shkak të masës së përkohshme të vendosur nga Kushtetuesja.

Saga parlamentare, që vijon prej më shumë se tre muajsh, është shoqëruar me 54 tentativa për të thirrur dhe zhvilluar një seancë funksionale, të gjitha të dështuara.

Zjarri vijon me intesitet në malin Shashicë. Pavarësisht se në majën e malit sipër Vlorës pati ndërhyrje nga toka dhe ajri, flakët ende nuk janë vendosur nën kontroll.
Jo vetëm që nuk janë vendosur nën kontroll, por mesa duket vatra e zjarrit është përhapur edhe më tej.

Flakët po i afrohen më tepër shtëpive të banuara të Kaninës, duke e bërë të rrezikshme situatën.

Ndërkohë, territori i djegur prej tyre është shtuar edhe më tepër. Ndërhyrja nga ajri është ndalur për shkak të errësirës. Flakët në terren po luftohen me forcat zjarrfikëse të Vlorës, të cilët pavarësisht punës së palodhur nuk po ia dalin dot t’i vendosin nën kontroll.

Ndërkohë, shtëllungat e tymit kanë mbuluar në total bregdetin e Vlorës, duke u dukur nga kilometra larg.

Smartphonet shpërqendrojnë dhe ndikojnë negativisht në rezultatet shkollore. Kjo është një çështje e nxehtë që nuk njeh kufij dhe që ka bërë që Holanda të ndërmarrë një hap drastik, ndalimin e plotë të përdorimit të celularëve në shkolla.

Përfitimet janë të qarta, të qëndruarit larg pajisjeve elektronike gjatë mësimit apo edhe gjatë pushimeve sjell efekte pozitive jo vetëm në përvetësimin e dijes, por edhe në aspektin social.

Ky ndryshim i madh është bërë i mundur nga udhëzimet e reja të miratuara nga Ministria e Arsimit në janar 2024, të cilave tashmë i janë përshtatur shumica e shkollave në vend. Sot, afro dy të tretat e shkollave të mesme holandeze i kërkojnë nxënësve të lënë telefonat në shtëpi. Në disa shkolla, celularët vendosen në dollapë të posaçëm dhe qëndrojnë aty deri në fund të ditës shkollore.

Sipas intervistave të zhvilluara nga Instituti Kohnstamm, 75% e nxënësve thonë se përqendrohen më lehtë në mësim ose në detyra, ndërsa 59% raportojnë përmirësim të klimës në klasë dhe të marrëdhënieve me bashkëmoshatarët. Pa telefon në duar, të rinjtë flasin më shumë mes tyre, debatojnë, luajnë, lëvizin, shohin njëri-tjetrin në sy dhe lexojnë më shumë libra. Efektet pozitive ndihen edhe në luftën kundër bullizmit.

Disa nxënës tregojnë se edhe pasi kthehen në shtëpi, kanë më shumë dëshirë të ndërveprojnë me njerëzit përreth sesa të kontrollojnë njoftimet në telefon. “Tani që nuk mund të bësh më një foto fshehurazi dikujt në klasë dhe ta shpërndash në një grup WhatsApp, është rritur ndjesia e sigurisë sociale“, thotë doktori Alexander Krepel, studiues në Kohnstamm Instituut.

Por Holanda nuk është e vetmja që po vepron kundër përdorimit të celularëve në shkolla. Franca ishte ndër të parat, duke ndaluar përdorimin e telefonave për nxënësit nga mosha 11 deri në 15 vjeç që në vitin 2018. Për fëmijët më të vegjël, ndalimi ka qenë gjithmonë absolut. Nga viti i ardhshëm shkollor, Franca do ta ashpërsojë më tej masën: nxënësit nuk do të lejojnë vetëm të mos i përdorin, por do t’i dorëzojnë telefonat në dollapë të posaçëm të administruar nga mësuesit, për t’i marrë sërish vetëm në fund të ditës.

Kjo vjen pas një periudhe prove të quajtur “pushimi dixhital”, në të cilën morën pjesë rreth njëqind shkolla franceze gjatë gjashtë muajve të fundit.

Një studim i Universitetit të Birmingham mbi 1.227 nxënës në 30 shkolla, i publikuar në revistën Lancet, thekson se ndalimi i telefonave në shkollë nuk mjafton. Për të pasur një ndikim të qartë në mirëqenien mendore dhe fizike të adoleshentëve, është e nevojshme të kontrollohet edhe koha që kalojnë në rrjete sociale pas mësimit dhe në shtëpi.

Në Mbretërinë e Bashkuar, 90% e shkollave ndalojnë përdorimin e telefonave në klasë, por 79% e lejojnë që nxënësit t’i mbajnë me vete. Një raport i UNESCO-s i vitit 2024 vëren se edhe një shpërqendrim i vogël nga telefoni kërkon të paktën 20 minuta që një nxënës të rifitojë përqendrimin e mëparshëm – një kohë që në epokën e mbingarkesës së stimujve nuk është aspak e vogël.

Në Spanjë, rajoni Castilla y León ka ndaluar celularët në shkolla që nga viti 2007, dhe pjesa më e madhe e vendit është përshtatur me këtë praktikë.

Po Shqipëria? Në Itali, Ministri i Arsimit Giuseppe Valditara ka parashikuar ndalimin e telefonave në shkollat fillore dhe të mesme dhe ka nënshkruar një qarkore që do ta zgjerojë këtë ndalim edhe për shkollat e mesme të larta nga viti shkollor 2025/2026. Ministri ka cituar disa herë raportin e OECD, sipas të cilit 17% e adoleshentëve ndihen të shqetësuar dhe të stresuar kur u hiqen pajisjet dixhitale, një simptomë që ngjan me ato të varësisë.

Zjarri në malin e Borshit vijon ende me intensitet të lartë, teksa situata është alarmante.

Edhe pse zjarrfikësit e Himarës gjatë gjithë ditës kanë qenë në terren, nuk kanë arritur ta marrin situatën nën kontroll.

Terreni i vështirë ka qenë ai i cili ka vështirësuar punën e forcave zjarrfikëse.

Zjarri po i afrohet Puqerasit dhe Borshit, teksa në rrezik janë banesat.

Flakët vijojnë të lëshojë tym, i cili përfshin të gjithë vijën bregdetare nga Borshi, Qeparoi deri në Himarë.

PD ka reaguar në lidhje me situatën e krijuar prej disa ditësh nga zjarret që kanë përfshirë zona të ndryshme të vendit.

Në reagimin zyrtat të selisë blu, u kërkohet qytetarëve që të tregohen të kujdesshëm si dhe të ndihmojnë personat e tjerë që mund të jenë në rrezik.

PD thotë gjithashtu se kryrministri Edi Rama është me pushime, ndërsa autoritetet kanë dështuar të mbajnë nën kontroll situatën.

PD akuzon qeverinë se bën shpenzime luksi dhe nuk investon në mbrojtjen civile.

REAGIMI I PD

Nga Jugu në Veri, Shqipëria është pushtuar nga zjarret.

Ndërkohë që, u bëjmë thirrje banorëve, qytetarëve dhe turistëve të tregojnë kujdes të shtuar, të largohen sa më parë nga zonat e  kërcënuara, dhe të ndihmojnë këdo në rrezik. Partia Demokratike shpreh indinjatën e thellë me reagimin minimalist dhe thuajse përqeshës të autoriteteve.

Jo vetëm ndërhyrjet bëhen me vonesë, por janë mungesa e alarmit dhe angazhimit që e bëjnë situatën  të duket edhe më kaotike, kërcënuese dhe dëshpëruese.

Zjarret, përmbytjet, fatkeqësitë natyrore përsëriten në Shqipëri, si në të gjithë botën, dhe kjo nuk është në dorë të qeverive, por përgatitjet, gatishmëria, vullneti, janë detyrë dhe në dorë të tyre.

Siç e kemi parë prej vitesh, qeveria dërgon ushtrinë dhe zjarrfikësit, të cilët u sulen zjarreve me shkurre, me lopata dhe batanije, si në një vend të Botës së Tretë, apo të sapodalë nga lufta dhe në mungesë të mjeteve bazike.

Një pamje tjetër shohim prej tri javësh në Theth, Tiranë dhe gjithandej nëpër Shqipëri.

Për të shembur bujtinat në Theth dhe marrë para shitësit të rigonit në Sarandë, qeveria dërgoi IMT, Tatimet, Policinë dhe Ushtrinë, me mjete të rënda, me arrogancë, të armatosur deri në dhëmbë, në luftë me qytetarët.

Për Edi Ramën, prioritet absolut është uzurpimi i pushtetit lokal, jo zjarret dhe dhjetëra problemet që kërcënojnë qytetarët dhe jetën e tyre.

Për Edi Ramën, prioritet është spektakli me satelitët “Albania 1” dhe “2”, apo dronët për të cilët, pasi i hedh në Facebook për t’u mburrur nuk ka kush as t’i lexojë dhe as kush t’i komandojë. Sepse, Edi Rama e ka bërë ushtrinë e një vendi të NATOs, një organizatë që shkon të fikë zjarret me shkurre dhe pagure.

Prandaj, përballja me zjarret dhe fatkeqësitë natyrore që kërcënojnë qytetarët janë të mekura.

Do të jetë kështu këtë verë dhe tjetrën, sepse Edi Rama nuk kujtohet dhe as kujdeset për infrastrukturën e shtetit, për fondet e emergjencave, për modernzimin e ekipeve të kërkim-shpëtimit. Paratë që i merr nga taksat i bën shpenzime luksi për vete dhe ministrat, udhëtime me carter, koncerte të shtrenjta apo kopësht 4 milion euro në oborrin e Kryeministrisë.

Edi Rama është me pushime, pasi bëri zhurmën me drejtorët, me heqjen e tendave dhe terrorizimin e Thethit, por zjarret nuk bëjnë pushim dhe pyjet, territori, bizneset, shtëpitë dhe jeta e qytetarëve është në rrezik.

Edi Rama nuk është zjarrfikës, por ai nuk mund të lejohet të jetë Kryeministri që hedh Shqipërinë në zjarr.

Pesë persona kanë humbur jetën gjatë natës në Ukrainë dhe Rusi si pasojë e shkëmbimeve intensive me dronë dhe raketa midis dy vendeve, ndërsa përpjekjet për një armëpushim vijojnë të dështojnë.

Zyrtarët ukrainas konfirmuan se Rusia qëlloi mbi 200 dronë dhe rreth 30 raketa, duke goditur kryesisht rajonin e Dnipropetrovsk, ku mbetën të vrarë tre persona dhe u plagosën gjashtë të tjerë. Në Rusi, autoritetet lokale në Rostov njoftuan se dy persona vdiqën pas një sulmi me dron ukrainas që përfshiu një makinë në flakë.

Sulmet ndodhën paralelisht me përditësimet nga të dyja palët për zhvillimet në front. Rusia deklaroi se ka marrë kontrollin e dy fshatrave – Zelenyi Hai në Donetsk dhe Maliivka në Dnipropetrovsk. Ndërkohë, presidenti ukrainas Volodymyr Zelensky tha se forcat e tij po i shtyjnë gradualisht trupat ruse nga rajoni i Sumyt, përfshirë çlirimin e fshatit Kindrativka.

Zelensky theksoi në rrjetin X se sulmet me dronë ukrainas ndaj bazave dhe aeroporteve ushtarake në Rusi janë një përgjigje ndaj agresionit, duke i quajtur “argumente që e afrojnë paqen”.

Ndërkohë, një qendër tregtare, një bllok banimi dhe një zonë industriale u dëmtuan në qytetin Dnipro, ndërsa pamjet e publikuara tregonin makina dhe ndërtesa të djegura.

Pavarësisht sulmeve, përpjekjet diplomatike për paqe mbeten të pasuksesshme. Raundi i tretë i bisedimeve për armëpushim u zhvillua në Stamboll të mërkurën, por nuk solli asnjë përparim. Të dyja palët u akuzuan reciprokisht për refuzimin e propozimeve të njëra-tjetrës.

Pasi negociatat ndërmjet Rusisë dhe Ukrainës, më 23 korrik, përfunduan pa ndonjë përparim të madh, Uashingtoni njoftoi se do t’i shesë Kievit një pako pajisjesh ushtarake në vlerë prej 322 milionë dollarësh.

Një ditë më pas, Departamenti amerikan i Shtetit bëri të ditur aprovimin e shitjes së një pakoje tjetër ushtarake për Ukrainën, që kushton 330 milionë dollarë.

Dy sisteme të armëve, të cilat Ukraina tashmë i përdor, do të përforcohen me pajisje dhe mbështetje shtesë në kuadër të shitjes së pakos së parë, sipas një komunikate për media nga Departamenti i Mbrojtjes i Shteteve të Bashkuara të Amerikës.

Raketa HAWK

Një raketë HAWK duke u lëshuar gjatë stërvitjeve në Tajvan, më 2022.

Uashingtoni thotë se Ukraina do të mund të blejë “artikuj dhe shërbime të ndërlidhura të mbështetjes për sistemin raketor HAWK”, me vlerë prej 172 milionë dollarësh.

HAWK është akronim për Homing All The Way Killer, emër që i është dhënë raketës për shkak të aftësisë së saj për t’u drejtuar deri në momentin e goditjes.

Arma është krijuar në vitet ’50, për mbrojtje ndaj aeroplanëve të shpejtë luftarakë dhe ndaj disa raketave. Raketat HAWK ishin dislokuar përgjatë vijës bregdetare të Floridës, gjatë Krizës Kubane me Raketa, më 1962.

Një lëshues i raketave HAWK, i fotografuar në Floridë, gjatë Krizës Kubane me Raketa, më 1962.

Sistemi HAWK është joefektiv përballë shumë prej raketave të shpejta dhe moderne, ndërsa ushtria e SHBA-së e ka zëvendësuar sistemin me raketa Patriot në vitet ’90. Por, kërcënimet aktuale ndaj qyteteve ukrainase, që përfshijnë dronët e ngadalshëm Shahed, të prodhimit iranian, i kanë dhënë HAWK-ut një rol të ri.

Versionet e sistemit që i janë dhënë më parë Ukrainës raportohet të kenë arritur sukses në pengimin e bombardimeve ruse. Ushtria ukrainase ka pohuar se një sistem i vetëm HAWK ka rrëzuar 40 dronë dhe 14 raketa.

Autoblinda Bradley

Një Bradley gjatë përdorimit nga ushtria ukrainase, më 2023.

SHBA-ja thotë se Ukraina mund të blejë autoblinda Bradley, me vlerë prej 150 milionë dollarësh, bashkë me kapacitetet për mirëmbajtjen dhe riparimin e tyre, si dhe pajisje të ndërlidhura me to.

Kur nisi ndërtimi fillestar i kohës së Luftës së Ftohtë i atij që do të shndërrohej në autoblindën Bradley, qëllimi ishte të krijohej një mjet i blinduar transporti, i cili do të mund të bartte trupa nëpër një terren post-apokaliptik, pas një shkëmbimi bërthamor.

Sot, autoblindat Bradley, që kanë marrë emrin nga një gjeneral i Luftës së Dytë Botërore, shërbejnë kryesisht si “taksi të fushëbetejës”, për të transportuar trupa nëpër pothuajse çfarëdo terreni, duke i mbrojtur ato nga të shtënat dhe shpërthimet.

Pas transportimit të luftëtarëve, automjetet mund t’i mbulojnë ata me një top të fuqishëm 25-milimetërsh. Autoblindat Bradley munden, po ashtu, të pajisjen me raketa të afta për shkatërrimin e tankeve të armikut.

Një ushtar ukrainas brenda një Bradley, më 2023.

Bradleyt janë kritikuar për blindën e tyre relativisht të butë prej alumini, dhe për lartësinë e tyre, që i bën ato objektiva të dallueshme në terren të hapur.

Më shumë se 150 nga Bradleyt që i janë dërguar Ukrainës raportohet të jenë shkatërruar, braktisur apo kapur. Shtatëmbëdhjetë Bradley janë shkatërruar në një betejë në jug të Ukrainës, në qershorin e 2023-tës.

Përveç raketave HAWK dhe autoblindave Bradley, Ukraina do të mund të blejë edhe pajisje për riparimin dhe mirëmbajtjen e obusëve M109, dhe për mbështetjen e sistemeve të prodhimit amerikan për mbrojtje ajrore.

Uashingtoni thotë se shitja e armëve për Ukrainën “nuk do ta ndryshojë ekuilibrin bazik ushtarak në rajon”./ REL

Ministri i Financave, Petrit Malaj, ka ndarë në Facebook bilancin e parë të aksionit për formalizimin e tregut të produkteve bujqësore dhe blegtorale, si dhe për rritjen e sigurisë ushqimore.

Sipas tij, në vetëm 12 ditë janë inspektuar 209 subjekte dhe janë bllokuar 76.1 ton mallra që nuk përmbushnin standardet.

“Ky është vetëm fillimi,” shkruan Malaj, duke theksuar se aksioni do të vijojë për të garantuar një treg të formalizuar, produkte të sigurta e të gjurmueshme, dhe mbrojtje për fermerët dhe prodhuesit e ndershëm.

Ministri nënvizon se objektivi i këtij operacioni është vendosja e rregullave të barabarta për të gjithë dhe forcimi i besimit të konsumatorit te produktet vendase.

“Plazhet e Shqipërisë që do të jenë hit këtë verë”, ky është titulli intrigues i një artikulli dedikuar vijës sonë bregdetare publikuar në “National Geographic” në gjuhën spanjolle.

Vendi ballkanik thuhet se shkëlqen me një thesar plazhesh kilometrash të gjata, ndërsa përshkruhet si parajsa e pazbuluar e Mesdheut.

“Shqipëria ka gjithçka që i nevojitet për t’u bërë destinacioni më i lakmuar i verës në Europë, me plazhe spektakolare me rërë, të panjohura për shumë udhëtarë”, shkruhet në artikull.

Plazhet që rekomandon National Geographic janë ai i Ksamilit, Borshit, Jalës, Dhërmiut, Gjipesë, Lukovës, Kakomesë, Porto Palermos si dhe Qeparoit.

“Nëse Shqipëria do të përmblidhej vetëm në një plazh, fituesi do të ishte Ksamili”, citohet në shkrimin, ku vlerësohet rëra e bardhë dhe padiskutim ishujt që janë një magnet për not.

Sakaq si një nga plazhet më të mëdha urbane të Shqipërisë, sugjerohet Dhërmiu.

Ai që magjeps është plazhi i Kakomesë, një mrekulli natyrore në formë gjysmëhëne e rrethuar nga bimësi e harlisur.

Nga ana tjetër Jala cilësohet si një nga parajsat e bregdetit Jon, ndërsa Lukova është ideale për të shijuar qetësinë e Rivierës Shqiptare./ Tv Klan

Vijon beteja me flakët në vendin tonë. 26 vatra zjarri u njoftuan deri pasdite nga Ministria e Mbrojtjes, nga të cilat 17 aktive dhe 9 në monitorim.

Në Dibër, në vendin e quajtur “Liqeni i Luleve”, pjesë e Parkut Kombëtar Lurë, zjarri po zhvillohet në 2 vatra, por nuk është dashur ndërhyrje përtej forcave bashkiake.

Ndërkohë që ndihmë nga ajri u kërkua në fshatin Zall Gjoçaj, kurse vatra e zjarrit ne Ulëz u shua në anë e Dibres, por jo të Mirditës.

Aktive mbetet vatra në Livadhet e Peladhisë në Bulqizë.

Në Vlorë, tek “Maja e Paliskës”, mbi fshatin Dukat, ka vazhduar puna gjithë ditën për shuarjen e zjarrit e po ashtu në Delvinë. Në operacion janë 60 efektivë dhe 4 zjarrfikëse të Forcave të Armatosura, si dhe helikopterë shqiptarë e hungarezë. Zjarri është nën kontroll, por janë përshkuar 10 banesa.

Vatra zjarri ka edhe në Lezhë, Milot, Korçë, Librazhd, por edhe në zonën e Shkopetit në Kurbin, ku ka shkuar edhe shefi i shtabit të përgjithshem të Forcave të Armatosura, Arben Kingji.

Pasdite vonë u njoftua se në Bulqize ka rënë zjarr në vendin e quajtur Qafë Bualli. Janë angazhuar 8 mjete zjarrfikëse, 2 helikopterë dhe dhjetra forca.

Zjarrfikësit po luftojnë me flakët pranë Athinës dhe në disa rajone të tjera të Greqisë këtë të shtunë, ndërsa vendi mesdhetar po përballet me valën e tretë të të nxehtit për këtë verë. Disa fshatra dhe zona të banuara janë evakuuar për shkak të rrezikut në rritje nga zjarret.

Në fshatin Drosopigi, rreth 25 kilometra në veri të Athinës, janë dëgjuar shpërthime teksa re të mëdha tymi kanë mbuluar zonën. Në këtë fshat ndodhen edhe fabrika me materiale të ndezshme. Dy helikopterë janë angazhuar për të hedhur ujë nga ajri, ndërsa 65 zjarrfikës me 26 automjete dhe dy avionë po përpiqen të vendosin nën kontroll flakët.

Sipas mediave vendase dy banesa janë përfshirë nga zjarri, ndërsa autoritetet u kanë kërkuar banorëve të fshatit Krioneri të zhvendosen drejt Athinës për siguri.

Temperaturat në Greqi pritet të arrijnë deri në 44 gradë Celsius këtë të shtunë, paralajmëroi shërbimi meteorologjik grek.

Në ishullin Evia, janë dislokuar 115 zjarrfikës me 24 automjete për të përballuar flakët, të mbështetur nga gjashtë avionë dhe shtatë helikopterë. Por erërat e forta po e vështirësojnë ndjeshëm operacionin. Banorëve të zonës Triada në Evia u është kërkuar të jenë gati për evakuim në rast emergjence.

Zjarri në Evia është një nga seritë e zjarreve që kanë shpërthyer gjatë këtij muaji për shkak të erërave të fuqishme dhe thatësirës ekstreme.

Edhe në ishullin Kythira, autoritetet kanë urdhëruar evakuimin e fshatrave Aroniadika, Pitsinades dhe Aryoi. Në rajonin e Messinisë, në perëndim të Athinës, është dhënë gjithashtu urdhër evakuimi për banorët e Kryonerit dhe Sellasit.

Të gjitha këto zona ishin të përfshira në listën e rajoneve të Greqisë në alarm të lartë për zjarre, për shkak të temperaturave rekord dhe erërave të forta të parashikuara për këtë fundjavë.