Prej disa ditësh vendi ynë është përfshirë nga një mot me temperatura të larta, duke arritur sot nivelin e 40 gradë celsius.

Regjimi i sforcuar i funksionimit të pajisjeve për shkak kushteve atmosferike ka dhënë efekt në rënien e zjarrit tek transformatori i fuqisë 110/10kv të nënstacionit Ibë, Tiranë. Reagimi i menjëhershëm i brigadave të zjarrëfikëses dhe stafit të drejtorisë së Tensionit të Lartë të OSSH solli shuarjen e shpejtë të zjarrit, duke minimizuar dëmet, ndërsa nuk ka asnjë të dëmtuar nga ana e personelit.

Stakimi i nënstacionit Ibë, ndikoji në ndërprerjen e furnizimit me energji elektrike të zonave Bërzhitë, Mullet, Baldushk, Ibë dhe Krrabë. Në një pjesë të këtyre zonave energjia u rikthye brenda një kohë të shpejtë si rrjedhojë e lidhjeve në unazë me fidera të tjerë që dalin nga nënstacioni Farkë.

OSSH ka shtuar grupet në objekt për të vepruar me ritme më të shpejta, për zgjidhjen e plotë të avarisë.

Ndërkohë, OSSH ka rritur masat e gatishnërisë në rang vendi për shkak të rritjes së temperaturave. Në disa zona prania e zjarreve ka detyruar Operatorin e Sistemit të Shpërndarjes të stakojë energjinë elektrike si masë e nevojshme sigurie.

“OSHEE Group kërkon mirëkuptimin e konsumatorëve për ndërprerjet e energjisë elektrike, të ndikuara nga faktorë natyrorë dhe shprehet se vijon të jetë e angazhuar maksimalisht për zgjidhjen e shpejtë të problematikave me rrjetin e shpërndarjes”, thekson në një komunikim për mediat OSHEE.

Presidenti amerikan Donald Trump ka dhënë disa komente të bujshme nga Britania e Madhe, ku ndodhet në një tur ndërkombëtar, duke prekur tema si njohja e shtetit palestinez nga Emmanuel Macron, marrëveshjet tregtare me Europën dhe takimin e afërt me kryeministrin britanik, Sir Keir Starmer.

I pyetur për vendimin e presidentit francez Macron për të njohur shtetin e Palestinës, Trump zgjodhi të mos reagojë ashpër: “Kjo është ajo që ai bën, është në dorën e tij, jo në dorën time”, u shpreh Trump, duke shtuar se e respekton Macronin, pavarësisht dallimeve.

Ndërkohë, duke folur për mundësinë e një marrëveshjeje tregtare mes SHBA-së dhe BE-së, Trump tha se “ka një shans 50-50”, duke mos ndryshuar qëndrimin që ka shprehur më parë për këtë çështje të ndjeshme ekonomike.

Por më shumë entuziazëm shfaqi kur u pyet për Kryeministrin e Britanisë, Sir Keir Starmer: “Më pëlqen Kryeministri juaj, është pak më liberal se unë, por është njeri i mirë. Ai arriti të mbyllë një marrëveshje tregtare që kishin 12 vite që po e diskutonin. Është një marrëveshje e mirë për Mbretërinë e Bashkuar,”tha Trump, duke konfirmuar gjithashtu se pritet të takojë Starmerin të premten në mbrëmje.

Në konferencën për shtyp, Trump u pyet gjithashtu për rastin e Ghislaine Maxwell dhe dosjet që lidhen me Jeffrey Epstein, çështje që kanë ndjekur Trumpin edhe gjatë udhëtimeve të tij jashtë vendit.

“Nuk kam asgjë për të thënë për këtë. Ajo po flet me një njeri shumë të zgjuar dhe shumë të mirë, Todd Blanch,” tha Trump.

Ai shtoi se nuk ka ndjekur nga afër zhvillimet dhe se shumë njerëz po i kërkojnë të shprehet për një falje të mundshme për Maxwell, por: “Ky nuk është momenti për të folur për falje. Jo tani,” përfundoi ai.

Qeveria britanike po përballet me presion të madh nga 221 deputetë nga i gjithë spektri politik për të njohur menjëherë një shtet palestinez, në një kohë shqetësimi të shtuar ndërkombëtar për urinë dhe dhunën e vazhdueshme në Rripin e Gazës.

Letra, e koordinuar nga kryetarja e Komitetit të Zhvillimit Ndërkombëtar, Sarah Champion, i bën thirrje qeverisë të angazhohet për një orar specifik para samitit të OKB-së në Nju Jork javën e ardhshme. Franca ka njoftuar tashmë qëllimin e saj për të njohur Palestinën në shtator.

“Njohja nuk do t’i japë fund menjëherë vuajtjeve, por është një hap i rëndësishëm drejt një zgjidhjeje me dy shtete”, tha Champion, duke shtuar se mesazhi duhet të jetë i qartë: “populli palestinez nuk është vetëm ”.

Nënshkruesit përfshijnë figura kryesore politike si udhëheqësi i Demokratëve Liberalë, Sir Ed Davey, ish-ministri konservator, Kit Malthouse, si dhe Emily Thornberry dhe Liam Byrne të Partisë Laburiste.

Kryeministri Sir Keir Starmer, në një deklaratë të premten, e bëri të qartë se njohja e Palestinës duhet të jetë pjesë e një plani më të gjerë paqeje: “Njohja është thelbësore, por duhet të jetë pjesë e një kuadri që çon në paqe dhe siguri të qëndrueshme për të gjithë në rajon.”

Ai dënoi skenat “e pamëshirshme” në Gaza , ku organizatat bamirëse paralajmërojnë se bllokada dhe bombardimet po e shtyjnë popullsinë në prag të urisë. Qeveria izraelite thotë se po ofron ndihmë të mjaftueshme dhe fajëson Kombet e Bashkuara për vonesat.

Ndërkohë, SHBA-të dhe BE-ja po bëjnë thirrje për një armëpushim të menjëhershëm, me bisedimet e paqes në Katar të “ngrira” për shkak të mosmarrëveshjeve me Hamasin. Marrëveshja e propozuar përfshin një armëpushim 60-ditor dhe një shkëmbim pengjesh.

Lufta , e cila shpërtheu pas sulmit të Hamasit më 7 tetor 2023, tashmë ka marrë jetën e më shumë se 59,000 palestinezëve, sipas shifrave nga Ministria e Shëndetësisë e Gazës, ndërsa më pak se gjysma e 50 pengjeve të mbetura vlerësohet të jenë ende gjallë.

Një zjarr masiv ka përfshirë gjatë ditës së sotme malin Shpirag në Berat.

Flakët janë përhapur me shpejtësi në një sipërfaqe të konsiderueshme me shkurre, bimësi dhe pisha, duke vënë në rrezik zonën përreth.

Më shumë se 30 mjete zjarrfikëse dhe dhjetra forca të MZSH-së janë angazhuar në operacionin e shuarjes së zjarrit, por ndërhyrja është e vështirësuar për shkak të terrenit të thyer malor dhe erës që favorizon përhapjen e flakëve.

Forca shtesë janë kërkuar nga rrethet fqinjë për të përballuar situatën, ndërsa nuk raportohet për banesa apo jetë njerëzish të rrezikuara deri më tani.

Zjarri në malin Shpirag është një tjetër alarm për situatën e zjarreve në vend gjatë sezonit të verës.

Katër helikopterë janë angazhuar me fluturime të pandërprera në tre fshatrat e Delvinës, për të kufizuar perimetrin e flakëve, ndërsa mbi 120 forca po operojnë në terren për të orientuar dhe mbështetur banorët të Pfshatrave Vergo, Palavli dhe Kopaçëz.

Ministri i Mbrojtjes Pirro Vengu bën me dije se “duhet të sigurohemi që mbrëmja të kalojë sa më e sigurt për ta, ndërsa mbetemi në gatishmëri të plotë, pasi orët në vijim pritet të jenë të vështira për shkak të temperaturave të larta”.

“Shefi i Komisariatit të Delvinës ka ndërhyrë për të ndihmuar banorët në kushte shumë të vështira, duke kryer një akt të vërtetë heroik. Ai është lënduar gjatë operacionit dhe po merr ndihmën shëndetësore në spital. I urojmë shërim të shpejtë dhe jemi mirënjohës për guximin e treguar çdo efektivi. Falenderime të veçanta për forcat zjarrfikëse, Policinë e Shtetit dhe partnerët tanë që po na ndihmojnë në këtë situatë të vështirë”, shkruan Vengu.

Prokuroria e Posaçme ka kryer një aksion sot, më 25 korrik, në disa qytete të vendit. Siç ka mësuar gazetarja Glidona Daci, në pranga kanë rënë dy vëllezërit Artur dhe Ervin Hoxhosmani si dhe Ermir Ndrejaj.

Ndërkohë Plarent Dervishajt dhe të penduarit të drejtësisë, Erion Alibej i janë komunikuar akuza të reja.

Të arrestuar janë edhe dy persona të tjerë, emrat e të cilëve nuk janë bërë ende të ditur. Në total ka patur shtatë urdhër-arreste.

Sipas burimeve të gazetares Daci, nga aksioni i SPAK janë sekuestruar ora të shtrenjta, bizhuteri dhe makina luksoze. Nuk dihet se për çfarë rasti është zhvilluar aksioni i SPAK, por mësohet se kontrolle ka pasur edhe në Vlorë.

Ura e Milotit u mbyll për kalimin e automjeteve për shkak të degradimit që kishte pësuar në themelet mbështetëse nga erozioni në bazament, por edhe nga shfrytëzimi i pakontrolluar në shtratin e lumit.

ARRSH sqaron se mbyllja u bë bazuar në një ekspertizë teknike dhe duke marrë parasysh trafikun e rënduar, veçanërisht gjatë sezonit veror.

Për këtë urë po bëhet një ndërhyrje emergjente që po hartohet nga ARRSH në bashkëpunim me Universitetin Politeknik të Tiranës.

Ndërtimi i urës së re është parashikuar si pjesë e programit “100 Ura”, i cili realizohet me mbështetjen e Bankës Botërore.

ARRSH rekomandon Rrugën e Kombit dhe aksin Lezhë–Milot si rrugë alternative deri në zgjidhjen e situatës.

Një marrëveshje e rëndësishme tregtare ndërmjet Bashkimit Evropian dhe Shteteve të Bashkuara mund të finalizohet brenda kësaj fundjave, sipas një raporti të publikuar nga Reuters.

Referuar informacioneve, “marrëveshja tani është në thelb në duart e Donald Trump”, duke nënkuptuar se vendimi përfundimtar varet nga ish-presidenti amerikan, që aktualisht mban një rol vendimtar në drejtimin e axhendës tregtare të SHBA.

Sipas të dhënave paraprake, marrëveshja pritet të përfshijë një tarifë bazë prej 15% për të gjitha produktet që hyjnë në SHBA nga vendet e Bashkimit Evropian, si dhe një tarifë të mundshme prej 50% për çelikun dhe aluminin evropian – sektorë që prej kohësh kanë qenë burim tensionesh ndërmjet dy blloqeve ekonomike.

Kjo nismë synon të vendosë një ekuilibër të ri në marrëdhëniet tregtare transatlantike, të cilat janë përballur me sfida të njëpasnjëshme në vitet e fundit, përfshirë edhe vendosjen e tarifave të ashpra nga administrata Trump ndaj BE-së në vitin 2018, të cilat u pasuan nga kundërmasa evropiane.

Mbetet për t’u parë nëse Trump do ta miratojë marrëveshjen në formën aktuale, apo do të kërkojë ndryshime shtesë që mund të vonojnë ose të komplikojnë përmbylljen e saj. Në çdo rast, një marrëveshje potenciale do të kishte ndikim të madh në zinxhirët ndërkombëtarë të furnizimit, sektorin industrial dhe eksportuesit evropianë që kërkojnë akses më të favorshëm në tregun amerikan.

Starlink i SpaceX pësoi një nga ndërprerjet më të mëdha në botë të enjten (24/7), kur një problem i brendshëm i softuerit shkëputi dhjetëra mijëra përdorues.

Siç raporton Reuters në telegramin e tij, mijëra përdorues në të gjithë botën, në Shtetet e Bashkuara, Evropë, filluan të përjetonin probleme me internetin rreth orës 3:00 pasdite (16:00 sipas ores sonë).

Starlink, i cili ka më shumë se 6 milionë përdorues në rreth 140 vende, njoftoi ndërprerjen në llogarinë e tij X dhe tha se po punonte për ta zgjidhur problemin.

Sipas nënpresidentit të Starlink, Michael Nichols, ndërprerja u zgjidh pas rreth 2.5 orësh. “Ndërprerja ishte për shkak të një dështimi të shërbimeve kryesore të brendshme të softuerit që operojnë rrjetin kryesor”, tha Nichols, duke kërkuar falje për ndërprerjen dhe duke u zotuar të gjente shkakun e problemit.

Elon Musk nga ana e tij kërkoi falje për incidentin specifik në X: “Më vjen keq për ndërprerjen. SpaceX do ta rregullojë shkakun rrënjësor për t’u siguruar që të mos ndodhë përsëri”, shkroi CEO i SpaceX.

Ndërprerja më e madhe në historinë e Starlink të SpaceX është shqetësuese sepse një dështim në një sistem kaq të sofistikuar është i rrallë.

Kjo i ka shtyrë disa ekspertë të spekulojnë se kompania është goditur nga një përditësim i dështuar i softuerit ose edhe një sulm kibernetik.

Kievi njoftoi se ndërprerja globale e Starlink ndikoi në telekomunikacionin e saj ushtarak. Sistemet satelitore Starlink të përdorura nga njësitë ushtarake ukrainase ishin jashtë shërbimit për dy orë e gjysmë gjatë natës, tha një komandant i lartë, për shkak të një problemi global që ndërpreu ofruesin e rrjetit satelitor.

Forcat ukrainase mbështeten shumë në mijëra terminale SpaceX Starlink të përdorura për komunikimet në fushën e betejës dhe disa operacione me dronë, duke rezultuar rezistentë ndaj spiunazhit dhe bllokimit të sinjalit gjatë betejës trevjeçare e gjysmë kundër agresionit rus.

Sistemi satelitor Starlink pësoi një nga ndërprerjet më të mëdha në botë të enjten kur një problem i brendshëm i softuerit la dhjetëra mijëra përdorues jashtë linje.

“Starlink është hequr jashtë linje në të gjithë frontin,” shkroi Robert Brovdy, komandant i forcave të dronëve të Ukrainës, në një postim në Telegram në orën 10:41 të mëngjesit (19:41 GMT) të martën.

Starlink, i cili ka më shumë se 6 milionë përdorues në rreth 140 vende dhe territore, më vonë pranoi ndërprerjen globale në llogarinë e tij X dhe tha se po “zbatonte në mënyrë aktive një zgjidhje”.

Brovdy më vonë e përditësoi postimin e tij për të thënë se rreth orës 1:05 të mëngjesit të së premtes problemi ishte zgjidhur. Ai tha se incidenti kishte nxjerrë në pah rrezikun e varësisë nga sistemi dhe bëri thirrje për metoda të ndryshme komunikimi dhe lidhjeje.

“Misionet luftarake u kryen pa transmetim (video), zbulimi i fushës së betejës u krye me (dronë) sulmues”, shkroi Brovdy.

Një komandant ukrainas i droneve, duke folur në kushte anonimiteti, i tha Reuters se njësia e tij kishte pezulluar disa operacione luftarake për shkak të ndërprerjes.

Oleksandr Dmitriev, themeluesi i OCHI, një sistem që grumbullon qarqet e transmetimit të mijëra ekipeve të droneve përgjatë vijave të frontit, i tha Reuters se ndërprerja tregoi se mbështetja në shërbimet cloud për të komanduar njësitë dhe për të transmetuar zbulimin nga dronët në fushën e betejës përbënte një “rrezik të madh”.

“Nëse humbet kontakti me internetin… aftësia për të kryer operacione luftarake praktikisht humbet”, tha ai, duke bërë thirrje për një kalim në sistemet lokale të komunikimit që nuk varen nga interneti.

Reuters raportoi sot se pronari i Starlink, Elon Musk, kishte urdhëruar që mbulimi i Starling të ndërpritej në disa zona të Ukrainës në vitin 2022, ndërsa forcat ukrainase nisën një kundërsulm për të rimarrë territorin e pushtuar nga Rusia.

Që nga prilli i vitit 2025, sipas postimeve të qeverisë ukrainase në mediat sociale, Kievi ka marrë më shumë se 50,000 terminale Starlink.

Edhe pse Starlink nuk operon në Rusi, zyrtarët ukrainas kanë thënë se trupat e Moskës po i përdorin sistemet gjerësisht në vijat e frontit në Ukrainë.

“Ndërprerja ndodhi për shkak të një dështimi të shërbimeve kryesore të softuerëve të brendshëm që operojnë rrjetin kryesor”, shkroi nënkryetari i Starlink, Michael Nichols, në X, duke kërkuar falje për ndërprerjen dhe duke premtuar se do të gjejë shkakun.

Një aksident i rëndë ka ndodhur paraditen e sotme në qytetin e Sarandës, në rrugën “Janaq Kumi”. Në ngjarje janë përfshirë një automjet dhe një motor, ku si pasojë ka mbetur i plagosur rëndë drejtuesi i motorit.

Sipas të dhënave paraprake, mjeti tip “Citroen”, i drejtuar nga Danjel Veizi, ka kryer një manovër të gabuar duke i prerë rrugën motorrit “Yamaha TMax”, që drejtohej nga Aurel Gumeni, 27 vjeç.

Përplasja ka qenë e fortë, duke i shkaktuar këtij të fundit dëmtime të shumta trupore. Pas dhënies së ndihmës së parë në Spitalin Rajonal të Sarandës, për shkak të politraumave të pësuara, 27-vjeçari është transportuar me helikopter drejt Spitalit të Traumës në Tiranë për trajtim të specializuar.

Policia ka nisur hetimet për të sqaruar rrethanat e aksidentit dhe për të përcaktuar përgjegjësitë ligjore.

12 specialistë nga Prokuroria e Posaçme dhe Policia e Shtetit morën pjesë në kursin “Praktikat më të Mira Mjekoligjore në Macintosh” që u zhvillua gjatë kësaj jave.

Trajnimi u zhvillua nga Zyra e Ndihmës për Antiterrorizmin të Departamentit të Shtetit përmes Zyrës Rajonale të Sigurisë së Ambasadës së Shteteve të Bashkuara në Tiranë.

Specialistët mësuan hollësitë e sistemit operues Mac dhe praktikuan aftësi praktike për të gjetur dhe analizuar të dhëna kritike në mbështetje të hetimeve kibernetike.

“Ekspertiza dhe udhëheqja amerikane në teknologji është thelbësore për mbrojtjen e Shteteve të Bashkuara dhe aleatëve tanë nga kërcënimet kibernetike”, njoftoi Ambasada Amerikane.

Agim Troci, shefi i komisariatit të policisë së Delvinës, pësoi djegie në trup nga flakët e zjarrit gjatë ditës së sotme në fshatin Senicë.

Troci, pasi mori ndihmën e parë në spitalin e Sarandës, është transportuar me helikopter drejt spitalit të Traumës  në Tiranë.

Ai ishte pjesë e ekipit të punonjësve të zjarrfikëseve dhe policisë, që morën pjesë për shuarjen e zjarrit që duket se ka dalë jashtë kontrollit. Shefi i komisariatit të policisë ka pësuar djegie  në bark, krah dhe në këmbë.

Ministria e Drejtësisë prezantoi projektin e një Kodi të ri Penal, ku propozohet ndër të tjera, mundësia e lirimit me kusht të të dënuarve me burgim të përjetshëm.

Procedurat që ndiqen në këtë rast.

1. Lirimi me kusht i të dënuarit me burgim të përjetshëm mund të lejohet, pasi ka shlyer jo më pak se tridhjetë e pesë vjet burgim deri në ditën e bërjes së kërkesës dhe, vetëm nëse gjatë shlyerjes së dënimit ka dhënë prova pjesëmarrjeje në programin e trajtimit, ka shfaqur një pendim të sigurt në bazë të sjelljes në tërësi, vullnetit të tij për t’u integruar në shoqëri, që rezulton nga interesi për vlerat etike dhe shoqërore, prova të mirësisë dhe solidaritetit, në qëndrimin e mbajtur për viktimën e veprës së kryer prej tij, zëvendësimin e dëmeve që u ka shkaktuar atyre, ndërprerjes së kontakteve me botën e krimit, dhe synimit për të fshirë pasojat e dëmshme të veprës penale, jo thjesht ekonomike, por edhe sociale, psikologjike apo të rendit publik.
2. Kërkesa për lirimin para kohe me kusht paraqitet personalisht nga i dënuari. Ajo i drejtohet gjykatës së vendit ku i dënuari po shlyen dënimin. Instituti i Ekzekutimit të Vendimeve Penale ku i dënuari po shlyen dënimin, merr masat për përcjelljen e menjëhershme të kërkesës pranë gjykatës kompetente, duke i njoftuar pa vonesë kopje të saj prokurorit pranë gjykatës së vendit të ekzekutimit dhe shërbimit përkatës të provës. Autoritetet e Institutit të Ekzekutimit të Dënimit shoqërojnë kërkesën me një raport të hollësishëm që përmban të dhënat e detajuara për sa kërkohet nga përmbajtjet e paragrafit të parë të këtij neni dhe nenit 174 të këtij Kodi dhe detyrimet e vëna nga ligji për ekzekutimin e vendimeve penale për subjektet pjesëmarrëse.
3. Në seancën gjyqësore të lirimit para kohe me kusht, përveç të dënuarit, prokurorit dhe shërbimit të provës, gjykata dëgjon edhe mendimin e viktimës së veprës penale. Gjykata e përbërë nga tre gjyqtarë, nëpërmjet debatit gjyqësor, shqyrton hollësisht nëse janë plotësuar kriteret e lirimit para kohe me kushte të shënuara në këtë nen dhe nenin 174 të këtij Kodi.
4. Në vlerësimin e përgjithshëm të të gjitha rrethanave gjykata duhet të çmojë nëse i është arritur qëllimit të dënimit për edukimin e tij dhe, mbi këtë vlerësim të japë vendimin e saj. Gjendja e kriminalitetit në vend dhe prirjet në politikën penale të zbatuara nga gjykatat në dhënien e vendimeve për krimet e kryera në përgjithësi, janë elemente që merren parasysh në zbatimin e lirimit para kohe me kusht. Edhe palët e tjera në këtë proces, sipas interesave që përfaqësojnë, vlerësojnë të njëjtat rrethana.
5. Vendimi i gjykatës që urdhëron lirimin para kohe me kusht ekzekutohet menjëherë.

Sekretari i Përgjithshëm i Kombeve të Bashkuara, Antonio Guterres, ka shpërthyer në kritika të forta ndaj komunitetit ndërkombëtar për indiferencën ndaj situatës humanitare në Gaza.

“Nuk arrij të shpjegoj nivelin e indiferencës dhe mosveprimit që shohim nga shumë njerëz në komunitetin ndërkombëtar: mungesën e dhembshurisë, mungesën e së vërtetës, mungesën e njerëzores”, tha Guterres, gjatë një fjalimi përmes videolidhjes në asamblenë globale të Amnesty International.

Duke iu referuar vuajtjes së palestinezëve në Rripin e Gazës, ai theksoi se bota po dështon në përballjen me atë që ai e quajti një “krizë morale”.

“Kjo është një krizë që vë në provë ndërgjegjen globale”, shtoi ai.

Deklaratat e Guterres vijnë në një kohë kur situata humanitare në Gaza vazhdon të përkeqësohet, me mijëra civilë që përballen me uri ekstreme, mungesë ndihme dhe sulme të vazhdueshme.

Donald Trump nuk është i vetmi President amerikan që i ka dërguar një letër urimi për ditëlindje Jeffrey Epsteinit.

Emri më i madh në këtë koleksion është ai i Bill Clinton, sipas një raportimi të “Wall Street Journal”.

Letra e ish-Presidentit Clinton u shfaq përkrah gati 50 letrave të tjera, të dërguara nga personalitete të njohura si investitori miliarder Leon Black, dizajnerja e modës Vera Wang, dhe miliarderi Mortimer Zuckerman, mes të tjerëve.

Letra e Clinton për Epstein-in është raportuar të ketë përmbajtur mesazhin: “Është ngushëlluese, apo jo, të kesh mbijetuar kaq shumë vite, mes të gjitha mësimeve, njohurive, aventurave dhe kureshtjes fëminore, drive për të bërë ndryshim dhe ngushëllimit nga miqtë.”

Një zëdhënës i Clinton refuzoi të komentonte, duke referuar një deklaratë të mëparshme të ish-Presidentit, i cili tha se kishte ndërprerë lidhjet me Epsteinin mbi një dekadë para arrestimit të tij dhe se nuk ishte i informuar për krimet e Epsteinit.

Pak ditë më parë, “Wall Street Journal” raportoi se Trump kishte shkruar një letër me përmbajtje provokuese për Epsteinin, i cili vdiq në burg në vitin 2019 pas arrestimit për akuzat e trafikimit të grave për qëllime seksuale.

Letra ishte pjesë e një albumi të mbledhur nga ish e dashura e Epsteinit, Ghislaine Maxwell, për ditëlindjen e tij të 50-të në vitin 2003. Trump ka paditur Rupert Murdoch, dy gazetarët e “Wall Street Journal” dhe botuesin e gazetës Dow Jones për shpifje pas këtij raportimi.

Në raportin e të enjtes, “Wall Street Journal” ka dhënë më shumë detaje mbi albumin, duke përfshirë emrat e disa prej 50 personave që i kanë dërguar letra Epstein-it. Midis tyre janë emra të njohur, si biznesmeni miliarder Nathan Myhrvold, avokati Alan Dershowitz, modeli scout Jean-Luc Brunel dhe pronari i dikurshëm i Victoria’s Secret, Les Wexner.

Po ashtu, në album ndodhen dhe përfaqësues të politikës dhe diplomacisë, si ambasadori britanik në SHBA dhe politikanit i Partisë Laburiste, Peter Mandelson.

Një pjesë e përmbajtjes së albumit përmban edhe shkrime e foto nga njerëz të tjerë që kanë pasur lidhje me Epsteinin, si ish-bashkëpunëtorët e tij Alan “Ace” Greenberg dhe James “Jimmy” Cayne, që kanë punuar me të në firmën investuese Bear Stearns gjatë viteve 1970.

Përveç letrës së Trump, disa letra të tjera përmbajnë përmbajtje me natyrë seksuale.

Aksioni për lirimin e plazheve publike është ndalur edhe te Kepi i Rodonit.

Kreu i qeverisë Edi Rama në një postim të bërë në rrjetet sociale me pamje nga aksioni, shprehet se do të rikthehen hapësirat publike për qytetarët dhe pushuesit.

“Kepi i Rodonit – Lirimi i plazheve publike përgjatë bregdetit të Durrësit. Rikthejmë hapësirat publike për qytetarët dhe pushuesit, duke garantuar akses të barabartë dhe kushte dinjitoze për të gjithë”, shkruan Rama.

Presidenti amerikan Donald Trump ka reaguar ashpër ndaj vendimit të presidentit francez Emmanuel Macron për të njohur shtetin palestinez, duke e cilësuar këtë hap si “të pakuptimtë” dhe “të parëndësishëm në skenën ndërkombëtare”.

Komentet e Trump u bënë gjatë një interviste, ku ai nuk i kurseu ironitë ndaj homologut francez.

“Emmanuel është në rregull, është një lojtar ekipi. Por ja lajmi i mirë: ajo që thotë ai nuk ka rëndësi. Nuk do të ndryshojë asgjë,” u shpreh Trump, duke minimizuar ndikimin e Francës në çështjen izraelito-palestineze dhe në politikën globale në përgjithësi.

Deklarata e Macron, e cila shprehu përkushtimin e Francës për të njohur zyrtarisht Palestinën si shtet të pavarur, ka nxitur reagime të përziera në mbarë botën.

Ndërsa disa vende evropiane si Spanja, Irlanda dhe Norvegjia tashmë kanë ndërmarrë hapa konkretë në këtë drejtim, Franca është pozicionuar në një linjë më diplomatike, duke sinjalizuar vullnetin politik por pa përcaktuar një afat të qartë.

Një zjarr ka rënë në fshatin Konisbaltë, në Bashkinë Dimal. Zjarri, që filloi në kufirin kodrinor të Konisbaltës me fshatin Mbreshtan, mori përmasa të mëdha, i favorizuar nga era dhe temperaturat e larta.

Drejt zjarrit, në ndihmë të zjarrfikësve të Dimalit shkoi grupi i shërbimit zjarrfikës të qytetit të Beratit, me 3 mjete dhe 20 efektivë dhe 1 mjet zjarrfikës me 4 efektivë nga qyteti i Kuçovës.

Zjarrfikësit kanë mundur të lokalizojnë flakët dhe po punojnë për fikjen e plotë të zjarrit, duke mbajtur në monitorim disa vatra që janë ende aktive, edhe pse ndërhyrja e mjeteve zjarrfikëse në zonë ka qnë e vështirë për shkak të terrenit të vështirë.

Real Madridi është gati të trondisë merkaton e verës me një ofertë marramendëse prej 115 milionë eurosh për mesfushorin e Manchester Cityt, Rodri (Rodrigo Hernandez Cascante). Sipas asaj që raporton ‘The Sun’, ‘Galaktikët’ tashmë nën drejtimin e Xabi Alonsos, po përgatiten për një tjetër goditje të madhe në mesfushë, duke kërkuar të sigurojnë shërbimet e spanjollit që fitoi ‘Topin e Artë’.

Rodri, i rikthyer pas një dëmtimi serioz në ligamentin e gjurit, ka qenë sërish elementi kyç në mesin e fushës për skuadrën e Pep Guardiolës. Kontrata e tij me Cityn përfundon në vitin 2027 dhe aktualisht nuk ka sinjale për rinovim nga asnjë palë.

Kjo situatë ka nxitur interesimin e Real Madridit, që e sheh 28-vjeçarin si pasardhësin ideal për t’i besuar trashëgiminë e rëndë të legjendave Toni Kroos dhe Luka Modric, dy prej figurave më emblemantike të suksesit të dekadës së fundit në “Santiago Bernabeu”.

Mbetet për t’u parë nëse Manchester City do të jetë i gatshëm të lërë të largohet një prej shtyllave të skuadrës së tyre dhe nëse vetë lojtari do të joshet nga rikthimi në La Liga (ka qenë pjesë e Atletico Madrid).

Kjo vatër e madhe zjarri është një prej më të fundit të shpërthyera mes shumë zjarreve, me të cilat po përballet Turqia këtë verë.

Janë dy vatra të mëdha zjarri, që po përhapen fare pranë zonave të banuara në Antalja, qytetin e famshëm turistik mesdhetar të Turqisë.

Autoritetet kanë shpallur gjendjen e emergjencës në këto zona, ku zjarrëfikësit po luftojnë për t’i vënë nën kontroll zjarret që po ndihmohen nga erërat e fuqishme dhe moti i nxehtë dhe i thatë. E gjithë beteja është që flakët të mos përfshijnë vilat dhe pallatet e banimit, banorët e të cilëve janë evakuuar.

Në rajonin e Ekshehirit iu dha lamtumira e fundit 10 personave, të cilët humbën jetën të mërkurën në përpjekje për të shuar një tjetër vatër të madhe, atë të Ekshehirit në Turqinë qendrore. Në gjithë vendin janë aktualisht aktive të paktën  6 vatra masive zjarri, ndërsa prej rreth 1 muaji janë evakuuar banorë nga 120 lokalitete.

Ndërsa në Qipro, këto vatra pranë qytetit bregdetar jugor të Limasolit i morën jetën 2 personave.

Të njejtën problematikë me zjarret kanë të gjithë shtetet e Mesdheut, ku zjarret janë shtuar si pasojë e eksremizimit të motit ku në verë temperaturat arrijnë mbi 40 gradë si këto ditë dhe ku e ajri i thatë dhe erërat e fuqishme i ushqejnë ato edhe më shumë.