Numri i fëmijëve të pastrehë në Francë është rritur me 6 për qind krahasuar me vitin e kaluar.

Sipas të dhënave të publikuara nga Federata e Aktorëve të Solidaritetit (FAS), e cila përfshin gati 1.000 shoqata që mbrojnë të drejtat e të huajve në vend dhe Fondi Ndërkombëtar i OKB-së për Fëmijët (UNICEF) i Francës, numri i fëmijëve të pastrehë në vend ka tejkaluar 2.000.

Numri i fëmijëve që jetojnë në rrugë në Francë u rrit me 6 për qind krahasuar me vitin e kaluar, duke arritur në 2.159, ndërkohë që 503 prej tyre janë fëmijë nën moshën 3-vjeç. Ky numër përfshin vetëm fëmijët nga familjet që telefonojnë në linjën e urgjencës 115 për të kërkuar strehim.

Këto të dhëna që kanë dhënë institucionet nuk përfshijnë numrin e fëmijëve migrantë që jetojnë në mënyrë të parregullt dhe ata që jetojnë me familjet e tyre në strehimore të improvizuara ose lagje të varfra.

Pas premtimit të qeverisë franceze se “asnjë fëmijë i vetëm nuk do të mbetet në rrugë” deri në vitin 2022, numri i fëmijëve që jetojnë në rrugë është rritur me 30 për qind.

Presidentja e UNICEF-it në Francë, Adeline Hazan tha se “Ne e shohim me zemërim numrin në rritje të fëmijëve që flenë në rrugë çdo vit, të ekspozuar ndaj kushteve degraduese të jetesës dhe rreziqeve të përditshme”.

Presidenti i FAS-it, Pascal Brice tha se “Nuk mund ta pranojmë që pas shkollës disa fëmijë në vendin tonë të kthehen në rrugë natën”.

Administrata Trump po shqyrton planet për të krijuar një “Forcë të Reagimit të Shpejtë për Trazirat Vendase”, e përbërë nga qindra ushtarë të Gardës Kombëtare dhe e ngarkuar me vendosjen e shpejtë në qytetet amerikane që përballen me protesta ose trazira, sipas një raporti në Washington Post sot, duke cituar dokumente të brendshme të Pentagonit.

Dje, Trump njoftoi se kishte urdhëruar marrjen federale të kontrollit të forcës policore të Uashingtonit dhe vendosjen e 800 anëtarëve të armatosur të Gardës Kombëtare me fuqi arrestimi, nëse është e nevojshme, me qëllim që  të adresojë shkallën e lartë të krimit në kryeqytetin e SHBA-së.

Gjatë fundjavës, ai kishte dërguar përforcime federale në rrugë dhe kishte bërë thirrje që adoleshentët nga mosha 14 vjeç të gjykoheshin si të rritur, duke e paraqitur kryeqytetin amerikan si një qytet të rrënuar nga bandat e dhunshme të të rinjve.

Guvernatorja e Rezervës Federale, Lisa Cook, ka paditur Presidentin Donald Trump për përpjekjen e tij për ta larguar nga detyra, duke hapur kështu një betejë të mundshme ligjore mbi autonominë e bankës qendrore të SHBA-së.

Cook i ka kërkuar gjykatës ta shpallë urdhrin e shkarkimit të Trump “të paligjshëm dhe të pavlefshëm”.

Trump deklaroi më herët se kishte arsye të mjaftueshme për të besuar se Cook kishte bërë deklarata të rreme në lidhje me hipotekën e saj dhe përmendi fuqitë kushtetuese të cilat ai tha se i lejonin ta shkarkonte atë.

Presidenti ka ushtruar presion në rritje mbi Rezervën Federale për shkak të asaj që ai e sheh si mungesë vullneti për të ulur normat e interesit. Cook është pjesë e bordit përgjegjës për përcaktimin e normave të interesit në SHBA.

Franca, Gjermania dhe Mbretëria e Bashkuar u dërguan një letër anëtarëve të Këshillit të Sigurimit të OKB-së të enjten në mëngjes duke njoftuar se po aktivizonin mekanizmin “snapback” për të rivendosur sanksionet ndaj Iranit që ishin pezulluar sipas marrëveshjes bërthamore të vitit 2015.

Lajmi u konfirmua nga dy diplomatë evropianë. Tre fuqitë evropiane theksuan se gjatë 30 ditëve të ardhshme, përpara se sanksionet të hyjnë në fuqi, ato mbeten të hapura për negociata me Teheranin, me qëllim një marrëveshje të re bërthamore që mund ta ndalojë procesin.

Mekanizmi “snapback” parashikon rivendosjen automatike të të gjitha sanksioneve që u hoqën sipas marrëveshjes së vitit 2015, duke rritur presionin ekonomik mbi Iranin dhe potencialisht duke çuar në një përgjigje të ashpër nga Teherani.

Zyrtarët iranianë kanë kërcënuar më parë se një veprim i tillë mund të çojë edhe në tërheqjen e tyre nga Traktati i Mospërhapjes Bërthamore (NPT). Evropianët i kishin dhënë Iranit deri në fund të gushtit për të rinisur bisedimet me Shtetet e Bashkuara dhe për të lejuar akses të plotë të inspektorëve të OKB-së në objektet e tij bërthamore dhe rezervat e uraniumit të pasuruar 60%.

Një takim në Gjenevë të martën midis diplomatëve të lartë nga të dyja palët përfundoi në një “mbytje anijeje”, me qarqet iraniane që hodhën poshtë idenë e zgjatjes së afatit.

Sipas zyrtarëve evropianë, Teherani ka shkelur qartë detyrimet e tij sipas marrëveshjes së vitit 2015 për vite me radhë, pa marrë masa konkrete korrigjuese. Nga ana e tij, zëvendësministri i jashtëm i Iranit, Kazem Gharibabadi, paralajmëroi se vendi i tij do të reagonte duke pezulluar bashkëpunimin me Agjencinë Ndërkombëtare të Energjisë Atomike (IAEA).

Procesi i “snapback” zgjat 30 ditë, me vendet evropiane që kërkojnë ta përfundojnë atë para tetorit, kur Rusia merr presidencën e Këshillit të Sigurimit.

“Aktivizimi i mekanizmit nuk do të thotë fundi i diplomacisë. Tre vendet evropiane mbeten të hapura për dialog me Teheranin në javët e ardhshme”, tha një diplomat evropian.

Në një postim tjetër në Telegram pas një telefonate me Presidentin turk Rexhep Tajip Erdogan, Zelensky thotë se është folur shumë për garancitë e sigurisë pas sulmeve të fundit të Rusisë gjatë natës në Ukrainë.

Garancitë do të finalizohen javën tjetër, thotë Zelensky.

“Këshilltarët e sigurisë kombëtare po punojnë aktualisht në secilin komponent specifik dhe javën tjetër i gjithë konfigurimi do të jetë në letër”, shton ai.

Presidenti ukrainas thotë gjithashtu se sulmet e natës së kaluar goditën një ndërmarrje turke dhe Ambasadën e Azerbajxhanit në Kiev.

Në një pamje që duket sikur vjen nga një komedi politike, diktatori i Koresë së Veriut, Kim Jong-un, është fotografuar duke inspektuar një banjë të vogël dhe të thjeshtë, e rrethuar nga pllaka klasike që të kujtojnë mungesën e përhershme të kushteve moderne në vendin që ai drejton me dorë të hekurt.

I veshur me një xhaketë të bardhë me mëngë të gjata dhe një kapelë që ngjan me ato të kaubojve, Kim pozon si një pllakaxhi në një nga banjat e një vile të sapo ndërtuar, që është pjesë e një fshati të ri peshkimi në Provincën Hamgyong Jugor.

Pavarësisht pamjes së thjeshtë dhe teknologjisë nga një epokë tjetër (uji i ngrohtë vjen ende nga kazanë), media shtetërore KCNA e ka quajtur projektin “modern dhe piktoresk”.

Vila, sipas raportimeve, nuk është pjesë e një kompleksi të zakonshëm banimi, por një ndërtim që të kujton më shumë një fermë amerikane në stilin e serialit të dikurshëm “Dallas” – ndoshta kjo është arsyeja pse Kim kishte zgjedhur një pamje kaubojsi për këtë rast.

Sipas medias shtetërore, ndërtimi i fshatit të ri filloi në shkurt dhe u përfundua me “shpejtësi të jashtëzakonshme”, falë – siç thuhet – “gatishmërisë ideologjike” dhe “përpjekjeve të dyfishuara” të Ushtrisë Popullore Koreane. Në realitet, pas këtyre fjalëve bombastike, qëndron puna e detyruar dhe shtypja e egër që i karakterizon projektet “kombëtare” të regjimit.

Në një moment gjatë vizitës, Kim është ulur këmbëkryq në lëndinë për të shijuar “pamjet”, ndërsa shoqërohej nga zyrtarët e lartë të regjimit.

Pas kësaj “ceremonie” të çuditshme, javën e ardhshme Kim Jong-un pritet të vizitojë një aleat të vjetër: presidentin kinez Xi Jinping. Ai është ftuar të marrë pjesë, së bashku me presidentin rus Vladimir Putin, në një paradë ushtarake në sheshin Tiananmen më 3 shtator – pikërisht aty ku në vitin 1989 u shtypën protestat paqësore të qytetarëve kinezë me dhunë të pamëshirshme.

Në këtë demonstrim të forcës së diktaturave, do të marrë pjesë edhe kryeministri i Sllovakisë, Robert Fico – si i vetmi përfaqësues i një vendi anëtar të Bashkimit Europian.

Autoritetet në Singapor kanë njoftuar masa ndëshkuese më të rrepta ndaj përdoruesve të cigareve elektronike, në përpjekje për të frenuar përhapjen në rritje të avujve (vape) të përzier me substanca narkotike.

Masat përfshijnë gjoba më të larta, dënime më të gjata me burg dhe deri në ndëshkimin fizik me kamxhik. Shtetasit e huaj mund të përballen gjithashtu me dëbime dhe ndalim për rikthim në vend.

Singapori ishte ndër vendet e para në botë që ndaloi përdorimin e cigareve elektronike në vitin 2018, por pavarësisht ndalimit, përdorimi i tyre ka vazhduar dhe kohët e fundit është rritur dukshëm përhapja e pajisjeve që përmbajnë etomidat, një ilaç me efekte anestezie, i krahasuar me ketaminën. Në Singapor, këto vape njihen ndryshe si “Kpods” (shkurt për “ketamine pods”).

Një test i kryer në korrik mbi 100 pajisje të sekuestruara zbuloi se rreth një e treta përmbanin etomidat. Video të të rinjve që shfaqin sjellje të çrregullta në publik gjatë përdorimit të këtyre pajisjeve janë bërë virale në rrjete sociale, duke nxitur shqetësim të madh në një vend të njohur për ligjet e tij tejet të ashpra kundër drogës.

Ministri i Shëndetësisë, Ong Ye Kung, deklaroi të enjten se këto masa janë të domosdoshme pasi “cigaret elektronike janë kthyer në një portë drejt abuzimit serioz me substanca narkotike”, ku pajisjet përdoren si “mjete shpërndarjeje” të drogës.

Qeveria ka forcuar ndëshkimet për posedimin dhe përdorimin e vape-ve, ndërsa etomidati është klasifikuar si substancë e kontrolluar e klasës C për një periudhë 6-mujore. Rregullat e reja hyjnë në fuqi më 1 shtator.

Të gjithë personat që kapen me vape edhe nëse nuk përmbajnë drogë do të përballen me gjoba që nisin nga 500 dollarë singaporianë (rreth 390 dollarë amerikanë) si dhe me masa rehabilitimi të detyrueshme nga shteti. Për ata që kapen me vape të përziera me etomidat, ndëshkimet do të jenë edhe më të rënda.

Furnizuesit e cigareve elektronike me drogë rrezikojnë deri në 20 vite burg dhe 15 goditje me kamxhik. Shtetasit e huaj që punojnë në Singapor përballen me të njëjtat ndëshkime, përveçse rrezikojnë të humbasin lejet e qëndrimit dhe punës, si dhe të dëbohen me ndalim për rikthim në vend. Rregullat vlejnë gjithashtu edhe për turistët.

Një aksident automobilistik është regjistruar ditën e sotme në tunelin e Llogarasë.

Ende nuk dihet nëse ka persona të lënduar apo shkaqet e aksidentit.

Po nga pamjet e siguruara nga opinion.al, shihet se për shkak të aksidentit është krijuar trafik i madh në hyrje të tunelit.

Ndërkohë, pritet dhe reagimi zyrtar i Policisë për të dhënë detaje në lidhje me aksidentit.

Pas dështimit të sistemeve të sigurisë të ofruesit amerikan të shërbimit të pagesave PayPal, bankat gjermane bllokuan urdhërpagesa që shkonin në miliarda.

Për shkak të problemeve me sigurinë në sistemin e pagesave të shërbimit PayPal bankat gjermane kanë bllokuar transaksionet bankare që shkojnë në miliarda. Sikurse njofton gazeta Süddeutsche Zeitung problemi lidhej me urdhërpagesa të drejtpërdrejta përmes së cilave PayPal autorizohet të tërheqë para nga llogaritë bankare të klientëve, pasi ata kanë blerë mallra në internet.

PayPal është deri tani shërbimi më i rëndësishëm i pagesave në internet në tregun gjerman. Transaksionet përmes shërbimit PayPal përbëjnë rreth 30 përqind të pagesave për blerjet në internet.

Prej incidentit thuhet se janë prekur kryesisht tregtarët.

Mashtruesit synojnë klientët e bankave
Edhe Shoqata Gjermane e Bankave e konformoi incidentin me sistemin e pagesave të shërbimit PayPal. Ditët e fundit kanë ndodhur incidente të ndryshme, ndër të cilat mund të përmendet dërgimi i urdhërpagesave të paautorizuara nga PayPal-i në institucione të ndryshme bankare dhe krediti, deklaroi shoqata. Kjo ka pasur një ndikim të ndjeshëm në transaksionet e pagesave në të gjithë Evropën dhe veçanërisht në Gjermani.

Kriminelët vënë shpesh në shënjestër klientët e bankave dhe përdoruesit e kartave të kreditit dhe përpiqen vazhdimisht të mashtrojnë bankat dhe ofruesit e shërbimeve financiare si PayPal për të vjedhur para nga llogaritë bankare të viktimave të tyre duke përdorur urdhërpagesa të rreme.

Sipas informacioneve të Süddeutsche Zeitung sistemi i sigurisë së shërbimit PayPal, i cili supozohet të zbulojë dhe të filtrojë përpjekje të tilla për mashtrim, me sa duket gjatë fundjavës së kaluar ka dështuar plotësisht ose në pjesën më të madhe. Si rezultat PayPal-i me sa duket u ka dërguar bankave pa asnjë lloj verifikimi të gjitha urdhërpagesat e paautorizuara./DW

Hungaria dhe Ukraina janë përplasur publikisht për ndërprerjet e vazhdueshme të furnizimeve me naftë, me Budapestin që fajësoi Kievin për një sulm ndaj “sovranitetit” të Hungarisë.

Ukraina reagoi duke e akuzuar Hungarinë për “degjenerim moral”.

Hungaria ka përjetuar ndërprerje të vazhdueshme të furnizimit me naftë përmes tubacionit Druzhba, pasi Kievi ka shënjestruar infrastrukturën energjetike, teksa po vazhdon lufta mes Rusisë dhe Ukrainës që nisi mbi tre vjet më parë.

Raportet midis Kievit dhe Budapestit janë përkeqësuar që atëherë. Udhëheqësi nacionalist i Hungarisë, VIktor Orban, mban raporte të mira me Kremlinin dhe bllokon përpjekjet e Kievit për t’u bërë pjesë e Bashkimit Evropian.

Ministri i Jashtëm i Hungarisë, Peter Szijjarto, tha se shteti i tij ia ka ndaluar hyrjen “komandantit të një njësiti ushtarak ukrainas që së fundi ka kryer sulme të rënda ndaj tubacionit të naftës, Druzhba”.

“Ky ishte një sulm ndaj sovranitetit të Hungarisë, duke rrezikuar sigurinë tonë energjetike”, shkroi Szijjarto në X.

Njoftimi vjen pasi Rusia kreu një sulm masiv në Ukrainë, duke lënë të vrarë të paktën 16 persona, përfshirë fëmijë.

Në përgjigje të postimit të Szijjartos, ministri i Jashtëm ukrainas, Andrii Sybiha, tha se Hungaria “është në anën e gabuar të historisë”.

“Sa e turpshme ta postosh këtë pas sulmit brutal të kryer nga shteti terrorist, Rusia”, shkroi Sybiha në X.

“Peter, nëse tubacioni rus është më i rëndësishëm për ju sesa fëmijët ukrainas që u vranë nga Rusia mëngjesin e sotëm, ky është degjenerim moral”, shkroi ai, duke shtuar se Kievi do të kundërpërgjigjet.

Javën e kaluar, Orban tha se i është ankuar presidentit amerikan, Donald Trump, pasi operacionet ushtarake të Ukrainës kundër Rusisë kanë shkaktuar ndërprerje të furnizimeve me naftë.

Hungaria dhe Sllovakia po ashtu i kanë kërkuar Komisionit Evropian “të veprojë kundër sulmeve të vazhdueshme të Ukrainës kundër naftësjellësit Druzhba”.

BE-ja vendosi një ndalesë për shumicën e importeve të naftës nga Rusia në vitin 2022, por tubacioni Druzhba u përjashtua përkohësisht nga sanksionet për t’u dhënë kohë vendeve të Evropës Qendrore, që nuk kanë dalje në det, që të gjejnë furnizime alternative të naftës.

Orban dhe homologu i tij sllovak, Robert Fico, kanë kritikuar vazhdimisht sanksionet duke i cilësuar ato si një kërcënim për sigurinë energjetike të shteteve të tyre./rel

Në Maqedoninë e Veriut, kryeministri Hristijan Mickoski paralajmëroi se Qeveria mund të emërojë komisionarë, nëse zgjedhjet lokale nuk japin rezultat. Kjo mund të ndodhë sidomos në komunat e vogla, ku ka pak votues ose shumë njerëz janë larguar jashtë vendit, thonë analistët.

Nëse as pas rundit të dytë të zgjedhjeve nuk zgjidhet kryetari i një komune, Komisioni Shtetëror Zgjedhor (KSHZ) në Maqedoninë e Veriut duhet ta njoftojë Qeverinë e vendit.

Në atë rast, brenda 15 ditësh, Qeveria do të emëronte një komisionar, që do t’i kishte të gjitha kompetencat e kryetarit të komunës.

Pastaj, Qeveria do ta njoftonte Kuvendin, i cili, brenda 60 ditësh, do të shpallte zgjedhje të reja në atë komunë.

E gjithë kjo është e rregulluar kështu me nenin 134 të Kodit Zgjedhor në Maqedoninë e Veriut.

Zgjedhja e komisionarit nuk ka kritere të veçanta, por zakonisht ai zgjidhet nga komuna ku jeton. Dhe, mandati i tij është i përkohshëm, derisa të zhvillohen zgjedhjet e reja.

Njoftimi i Mickoskit pasoi vendimin e Komisionit Shtetëror Zgjedhor për të lehtësuar pjesëmarrjen e kandidatëve të pavarur, me vetëm dy nënshkrime, në zgjedhjet lokale të 19 tetorit.

Kjo ngriti shqetësime se fleta e votimit mund të bëhet shumë e gjatë dhe e ngatërruar.

“Çdo gjë është e mundur. Fleta e votimit mund të jetë 7-8 metra e gjatë, për të penguar qytetarët që të dalin. Por, dua të paralajmëroj se sipas Kushtetutës dhe ligjit, nëse zgjedhjet nuk janë të suksesshme, Qeveria emëron komisionarë”, tha Mickoski.

Si zgjidhen kryetarët e komunave dhe këshilltarët në Maqedoninë e Veriut?
Për të zgjedhur kryetarin e komunës në rundin e parë, duhet të votojë së paku një e treta e votuesve të regjistruar.

Nëse asnjë kandidat nuk merr shumicën e nevojshme, rundi i dytë zhvillohet mes dy kandidatëve më të votuar në rundin e parë. Kandidati që fiton më shumë vota në rundin e dytë, zgjidhet kryetar.

Nëse as pas rundit të dytë nuk zgjidhet kryetari, KSHZ-ja e njofton Qeverinë dhe Qeveria ndërhyn sipas ligjit.

Për zgjedhjen e këshilltarëve nuk kërkohet pjesëmarrje minimale. Ulëset në këshill ndahen sipas numrit të votave që merr secila listë kandidatësh.

Skenari i zgjedhjeve të pasuksesshme, i mundshëm në komunat më të vogla
Analistët politikë paralajmërojnë se zgjedhjet për kryetarë komunash në Maqedoninë e Veriut mund të dështojnë në disa komuna më të vogla – sidomos në ato që janë më të prekura nga emigracioni.

“Nuk pres që në një numër të madh komunash të mos arrihet pragu. Por, në komunat më të vogla, ku ka pak interes për të votuar, abstenimi mund të çojë në dështim të procesit. Këto zakonisht janë zona me popullsi shumë të vogël. Nuk pres që kjo të ndodhë në Shkup apo në qytetet e mëdha”, thotë Aleksandar Novakovski, ish-kryetar i Komisionit Shtetëror Zgjedhor, për Radion Evropa e Lirë.

Ai paralajmëron, gjithashtu, për rreziqet nga numri i madh i kandidatëve dhe mundësinë e manipulimeve.

“Shpresojmë që këto të mos ndodhin. Por, nëse ndodhin, mund të ketë pasoja serioze në përpunimin e të dhënave, kosto financiare dhe fletëvotime tepër të gjata. Po ashtu, mund të rrezikohet fshehtësia e votës, si dhe të ketë shumë ankesa”.

“Nga përvoja ime, keqpërdorimet janë të mundshme. Për shembull, një parti që e di se nuk mund të fitojë në një komunë, mund t’u thotë mbështetësve të saj të regjistrohen si kandidatë. Imagjinoni 1.000 kandidatë në një fletëvotim…”, thotë Novakovski.

Analisti politik, Sefer Selimi, thotë se deklarata e kryeministrit Mickoski për mundësinë e emërimit të “të besuarve” të Qeverisë, në rast se dështojnë zgjedhjet lokale, duket më shumë si një mënyrë për t’i dekurajuar kandidatët e pavarur.

Sipas tij, partitë tradicionale gjithmonë kanë vendosur pengesa shtesë për pjesëmarrjen e tyre.

“Mundësia për të emëruar të besuar qeveritarë është shumë e vogël. Edhe nëse ndodh, përsëri duhet të ketë zgjedhje, ku qytetarët vendosin, e jo kryeministri”, thotë Selimi.

Kriteret për pjesëmarrjen e kandidatëve të pavarur në zgjedhje duhej të përcaktoheshin përmes ndryshimeve në Kodin Zgjedhor.

Kryetari i Kuvendit, Afrim Gashi, thirri një seancë të jashtëzakonshme më 16 gusht, por propozimi nuk u miratua.

Kuvendi pritet të mbajë edhe dy seanca para nisjes së fushatës për zgjedhjet lokale – më 2 dhe më 12 shtator.

Kondarko: Kemi mekanizma për të siguruar mbarëvajtjen e zgjedhjeve
Kryetari i Komisionit Shtetëror Zgjedhor të Maqedonisë së Veriut, Boris Kondarko, tha se edhe nëse ka numër të lartë të kandidatëve të pavarur – pasi tani u mjaftojnë vetëm dy nënshkrime për të garuar – KSHZ-ja i ka mekanizmat për të siguruar mbarëvajtjen e zgjedhjeve.

Ai pranoi se numri i lartë i tyre mund ta bëjë procesin më të kushtueshëm, por tha se nuk do ta pengojë organizimin.

“Do të shohim pas afatit të dorëzimit të listave, më 13 shtator, se sa kandidatë do të regjistrohen, sa do t’i plotësojnë kushtet dhe sa do të konfirmohen. Ne do t’i përshtatim fletëvotimet në mënyrë që të respektohen të drejtat e të gjithëve”, tha Kondarko për Radion Evropa e Lirë.

Në vitin 2021, dy komuna në Maqedoninë e Veriut – Mavrovë-Rostushë dhe Qendra Zhupa – mbetën pa kryetarë komune dhe u drejtuan përkohësisht nga përfaqësues të emëruar nga Qeveria.

Në rundin e parë, zgjedhjet nuk u zhvilluan me sukses, sepse në votime morën pjesë vetëm rreth 25 për qind e qytetarëve – shumë më pak se pragu i kërkuar.

Në rundin e dytë, në Mavrovë-Rostushë, kandidati u tërhoq, ndërsa në Qendrën Zhupë përsëri nuk u arrit numri i nevojshëm i votuesve./REL

Pjesë e garës në universitetet e vendit janë bërë në total 20,200 maturantë duke u rritur me rreth 500 më shumë në krahasim me vitin e shkuar. Numri i aplikimeve është rritur edhe në universitetin e Tiranës, tha rektori Artan Hoxha.

“Universitetin e Tiranës e kanë përzgjedhur më shumë të rinj nga viti i shkuar, si në numër absolut, rreth 160 studentë të ardhshëm, ka 1276 aplikime më shumë sesa viti i shkuar. Është një tregues që ka më shumë besim te ky vit akademik sesa vitet e shkuara që u janë drejtuar në një numër më të madh universiteteve të huaja jashtë vendit.”

Ndërkohë që disa degë sipas tij vijojnë të vuajnë numrin e ulët të studentëve, sidomos mësuesia.

“Në mësues të shkencave të natyrës dhe disi edhe ata që lidhen me histori-filologjinë. Gjuha greke, gjuha ruse ka vuajtur gjithmonë, kimi, fizikë të cilat mendoj se kërkojnë politika që e tejkalojnë universitetin.”

Por pavarësisht aplikimeve, e rëndësishme sipas rektorit është regjistrimi final i studentëve në programet Bachelor e këtij universiteti.

“Motivoj studentët e ardhshëm që të regjistrohen në programet e studimit që ata preferojnë dhe të bëjnë kujdes që mos të humbasin preferencën e fazave dhe ndërlikimit disi të procesit të regjistrimit.”

Nga data 29 gusht deri më 11 shtator, kandidatët fitues mund të bëjnë regjistrimin pranë sekretarive mësimore ku janë shpallur fitues.

Klan News

Policia e Shtetit ka reaguar me një njoftim zyrtar lidhur me operacionin e SPAK, që u zhvillua ditën e djeshme, 27 gusht, ndaj punonjësve të IMT-së.

Sipas njoftimit të bluve, mbi punonjësit e IMT-së rëndojnë akuzat: “Korrupsioni aktiv i personave që ushtrojnë funksione publike” dhe “Shpërdorimi i detyrës“, të kryera në bashkëpunim.

Nga hetimet e kryera rezultoi se Geraldo Fuçia i cili u vu në prangat e policise, Klajdi Zhilla ( i shpallur në kërkim) dhe Edmond Çela (në procedim penal) gjatë kontrolleve në subjekte (lokale), për evidentimin dhe lirimin e hapësirave publike të zëna në kundërshtim me ligjin, iu kanë kërkuar para pronarëve të subjekteve, që të mos i hiqnin çadrat/tendat që zinin hapësirat publike përreth subjekteve.

Gjatë operacionit janë sekuestruar në cilësinë e provës materiale 3000 euro dhe 27 000 lekë, që dyshohet se janë përfituar nga korrupsioni aktiv i punonjësve të IMT, një automjet tip “Audi A6“ si dhe 4 celularë.

Njoftimi i policisë:

Finalizohet operacioni policor i koduar “Hapësira publike“, si rezultat i hetimeve të kryera me metoda proaktive, nga strukturat e Policisë së Shtetit, në drejtimin e SPAK-ut.

Sektori për Hetimin e Korrupsionit në Drejtorinë për Hetimin e Krimeve Ekonomike dhe Financiare, në bashkëpunim me Drejtorinë e Forcës së Posaçme Operacionale, në Departamentin për Policinë Kriminale, në Policinë e Shtetit, si rezultat i hetimeve të kryera me metoda proaktive, në drejtimin e Prokurorisë së Posaçme kundër Korrupsionit dhe Krimit të Organizuar, në kuadër të një procedimi të regjistruar për veprat penale “Korrupsioni aktiv i personave që ushtrojnë funskione publike“ dhe “Shpërdorimi i detyrës“, të kryera në bashkëpunim, finalizoi operacionin e koduar “Hapësira publike“.

Në kuadër të këtij operacioni:

-u arrestua në flagrancë shtetasi G. F., 33 vjeç, punonjës i IMT, bashkia Tiranë;

-nisi procedimi penal për shtetasit E. Ç., 48 vjeç, banues në Tiranë, punonjës i IMT, bashkia Tiranë; A. E., 26 vjeç, banues në Tiranë, menaxher i një lokali në Tiranë;

-u shpall në kërkim shtetasi K. Zh., 35 vjeç, banues në Tiranë, inspektor i IMT, bashkia Tiranë.

Nga hetimet e kryera dyshohet se këta shtetas, gjatë kontrolleve në subjekte (lokale), për evidentimin dhe lirimin e hapësirave publike të zëna në kundërshtim me ligjin, iu kanë kërkuar para pronarëve të subjekteve, që të mos i hiqnin çadrat/tendat që zinin hapësirat publike përreth subjekteve.

Gjatë operacionit janë sekuestruar në cilësinë e provës materiale 3000 euro dhe 27 000 lekë, që dyshohet se janë përfituar nga korrupsioni aktiv i punonjësve të IMT, një automjet tip “Audi A6“ si dhe 4 celularë.

Punohet për kapjen e shtetasit K. Zh. dhe për dokumentimin e plotë të kësaj veprimtarie të kundërligjme.

Materialet procedurale u referuan në Prokurorinë e Posaçme kundër Korrupsionit dhe Krimit të Organizuar, për veprime të mëtejshme.

Presidentja e Komisionit Evropian, Ursula von der Leyen, dënoi sulmin e ri rus ndaj Kievit, si dhe goditjen ndaj delegacionit të BE-së në kryeqytetin ukrainas, në një postim në platformën X.

“Një tjetër natë me bombardime të pandërprera ruse ka goditur infrastrukturën civile dhe ka vrarë njerëz të pafajshëm. Gjithashtu ka goditur delegacionin tonë të BE-së në Kiev. Stafi i delegacionit tonë është i sigurt. Rusia duhet të ndalojë menjëherë sulmet e saj pa dallim ndaj infrastrukturës civile dhe të angazhohet në negociata për një paqe të drejtë dhe të qëndrueshme”, theksoi Presidentja e Komisionit në mesazhin e saj.

Edhe Presidenti i Këshillit Evropian, Antonio Costa, tha se ishte “i tronditur” sot nga sulmi i ri masiv i nisur nga Rusia kundër Kievit, i cili vrau të paktën 13 persona dhe dëmtoi ndërtesën e misionit diplomatik të BE-së.

“Mendimet e mia janë me viktimat në Ukrainë, por edhe me stafin e delegacionit të BE-së, ndërtesa e të cilit u dëmtua nga këto sulme të qëllimshme nga Rusia”, shkroi Costa në X. “BE-ja nuk do të frikësohet. Sulmi i Rusisë vetëm sa forcon vendosmërinë tonë për të mbështetur Ukrainën dhe popullin e saj”, theksoi ai.

Ambasadorja e BE-së në Ukrainë, Katarina Mathernova, sqaroi se misioni diplomatik “pësoi dëme serioze nga vala e goditjes” së bombardimeve.

Një foto e postuar nga Costa tregon shkallën e dëmit në zyrat e delegacionit evropian, çatia është shembur dhe dritaret janë thyer. Megjithatë, asnjë anëtar i delegacionit nuk është lënduar, sipas një diplomati evropian.

Nga ana e saj, Komisionerja Evropiane për Zgjerimin, Marta Kos, komentoi për X: “Delegacioni i BE-së në Kiev është dëmtuar nga sulmet e sotme ruse kundër zonave ku ndodhen civilë.”

“Unë i dënoj pa mëdyshje këto sulme brutale, një tregues i qartë se Rusia refuzon paqen dhe preferon terrorizmin. Solidariteti ynë i plotë është me stafin e BE-së, familjet e tyre dhe të gjithë ukrainasit që po vuajnë nga ky sulm”, shtoi komisionerja sllovene.

Policia e Shtetit ka nisur një hetim penal në lidhje me një skemë të dyshuar investimesh piramidale TXEX, e cila operon përmes platformave online dhe synon përfitime të paligjshme nga qytetarët.

Hetimet po zhvillohen nga Drejtoria e Hetimit të Krimit Kibernetik në bashkëpunim me Drejtoria e Hetimit të Krimit Ekonomik dhe Financiar në Policinë e Shtetit.

Autoritetet bëjnë thirrje për kujdes maksimal nga ana e qytetarëve, duke u kërkuar që të shmangin aplikimin apo përfshirjen në platforma që premtojnë fitime të menjëhershme.

Njoftimi i plotë:

Strukturat e specializuara të Policisë së Shtetit po vijojnë intensivisht veprimet hetimore dhe operacionale, për parandalimin dhe goditjen e paligjshmërive që zhvillohen online, për të përfituar para nga qytetarët.

Në këtë kuadër, ju informojmë se Policia e Shtetit, nëpërmjet Drejtorisë së Hetimit të Krimit Kibernetik dhe Drejtorisë së Hetimit të Krimit Ekonomik e Financiar, bazuar në informacionet e siguruara, ka nisur një hetim penal lidhur me një skemë të dyshuar investimesh piramidale, nëpërmjet platformave online, dhe po vijon punën intensive për dokumentimin ligjor.

Policia e Shtetit iu bën thirrje të gjithë qytetarëve, që të tregojnë kujdes të shtuar dhe të shmangin aplikimet ose përfshirjen në platforma të tilla, të cilat premtojnë fitime të menjëhershme dhe të paverifikuara.

Për çdo dyshim apo informacion që mund të ndihmojë hetimin, ju inkurajojmë të kontaktoni menjëherë strukturat përkatëse të Policisë së Shtetit, konkretisht ato të Drejtorisë së Hetimit të Krimit Kibernetik dhe të Drejtorisë së Hetimit të Krimit Ekonomik e Financiar në DPPSh, si dhe të sektorëve përkatës në çdo DVP.

Udhëheqësja e organizatës për të drejtat e fëmijëve, Save the Children, ka përshkruar në detaje tronditëse agoninë e ngadaltë të fëmijëve të uritur në Gazë, duke thënë se ata janë aq të dobët fizikisht sa nuk munden as të qajnë.

Duke iu adresuar mbledhjes së Këshillit të Sigurimit të Kombeve të Bashkuara lidhur me konfliktin izraelito-palestinez, presidentja e kësaj organizate ndërkombëtare bamirëse, Inger Ashing, tha se zia e bukës – që javën e kaluar OKB-ja tha se po ndodh në Gazë – nuk është vetëm term teknik.

“Kur nuk ka ushqim të mjaftueshëm, fëmijët vuajnë nga kequshqyerja akute dhe më pas vdesin ngadalë dhe në dhimbje. Kjo, thënë qartë, është ajo çfarë është zia e bukës”, tha Ashing.

Më pas ajo përshkroi se çfarë ndodh kur fëmijët vdesin nga zia e bukës, proces që sipas saj zgjat disa javë. Trupi, tha Ashing, fillimisht shfrytëzon yndyrën e vet për të mbijetuar, por kur nuk ka më yndyrë trupore, trupi nis të konsumojë vetveten, duke përdorur muskujt dhe organet vitale.

“Megjithatë, klinikat tona janë pothuajse të heshtura. Fëmijët nuk kanë forcë as të flasin e as të qajnë në agoni. Ata shtrihen, të dobët fizikisht, duke vdekur” ngadalë, tha Ashing.

Ajo insistoi se grupet e ndihmës me zë të lartë kanë paralajmëruar për zinë e urisë, kur Izraeli ndaloi që ushqimet dhe gjërat e tjera esenciale të hynin në Gazë, gjatë luftës.

“Të gjithë në këtë mbledhje kanë përgjegjësi morale dhe ligjore që të veprojnë që ta ndalin këtë mizori”, tha Ashing.

OKB-ja shpalli zyrtarisht zinë e bukës në Gazë javën e kaluar, duke fajësuar atë që e quajti pengesë sistematike të ndihmave nga Izraeli gjatë më shumë se 22 muajsh luftë.

Organizata që monitoron urinë, e quajtur Klasifikimi i Integruar i Fazave të Sigurisë Ushqimore, apo IPC, tha se zia e bukës po prek 500.000 njerëz në Qytetin e Gazës dhe deri në fund të shtatorit uria do të përhapet në rreth dy të tretat e tërë territorit palestinez./rel

Kryetari i Partisë Demokratike Sali Berisha i ka bërë thirrje sot FBI-së amerikane, që të zgjerojë hetimet për miliarderin George Soros dhe të birin e tij Alex Soros deri në Shqipëri. Ai i bëri të njëjtën thirrje edhe qeverisë dhe Kongresit të SHBA-ve. Sipas tij, nëse hetojnë do zbulojnë se si Soros dhe i biri përdorën çdo lloj influence në favor të qeverisë së Edi Ramës.

“Thirrja ime për qeverinë e SHBA-ve dhe kongresin e SHBA-ve, thirrja ime për FBI-në, të shtrijnë hetimet e tyre për Xhorxhin dhe të birin edhe në Shqipëri gjatë 20 viteve dhe do gjejnë se si ata përdorën çdo lloj influence kundër një force politike në favor të ekstremit të majtë të Edi Ramës, bashkëshortes së tij dhe ish-bashkëshortes së tij, të gjitha drejtuese kryesore në fondacionin Soros, të ushqyera me miliona nga ky fondacion.

Të hetojnë politikën e jashtme të Xhorxh Sorosit, e cila në mënyrë absolute përputhej me Beogradin dhe binte ndesh me interesat e shqiptarëve, me politikën e ndjekur zyrtare të SHBA gjer në atë kohë, por dhe me politikën e ndjekur nga presidenti Donald Trump në mandatin e parë.

Iu bëj thirrje që duke përdorur aktin RICO, të hetojnë çdo veprim të Xhorxh Sorosit në të ashtuquajturën reformë kushtetuese dhe të drejtësisë, me të cilën kanë garantuar sot një pushtet që kontrollon mbi 95 përqind të çdo gjëje në këtë vend. Praktikisht pothuajse një monizëm të plotë.”, tha Berisha.

Kjo deklaratë e Berishës vjen një ditë pasi presidenti amerikan Donald Trump, kërkoi përmes një postimi nisjen e hetimeve ndaj Sorosit për mbështetje të protestave të dhunshme.

Në rrjetin e tij personal, “Truth”, Trump i kërkoi drejtësisë që të ngrejë akuza ndaj tyre në bazë të ligjit RICO, i cili parashikon dënimet penale për organizatat kriminale dhe që kryejnë korrupsion. Presidenti amerikan i cilësoi multimiliarderin dhe të birin si “të çmendur” dhe paralajmëroi se nuk do të lejojë më që të shkatërrojnë Amerikën.

Kryeministri Edi Rama ka postuar në rrjetet sociale një tjetër vendim të një gjyqtari për një ndërtim pa leje. Ai thotë se deklaratat e tij nuk janë presion, por qeveria nuk do të heshtë më përballë gjyqtarëve dhe prokurorëve “të paaftë, të papërgjegjshëm, të dyja bashkë apo edhe më keq, pa atdhe fare”.

Rama ka narë fotot e një biznesi, i cili sipas Ramës, po kryen veprimtari tregtare në kurriz të komunitetit dhe paraqet rrezik serioz për banorët në rast emergjencash, si zjarri.

Kreu i qeverisë e akuzoi gjyqtarin për shpërfillje të interesit publik dhe vuri në dukje se vendimi i tij i bashkohet një sërë rastesh të ngjashme që tashmë janë pjesë e një dosjeje të përgatitur nga Ministria e Drejtësisë dhe që do t’i përcillet organeve të kontrollit dhe vetëqeverisjes së gjyqësorit.

Postimi i plotë:

Gjykatësi Ligoraq vendosi në pak minuta pa praninë e palëve, që të mos hapet kalimi i mbyllur nga kjo ngrehinë pa leje me kupolë xhami mes dy pallateve, nën të cilën shtrihet një dyqan ku bëhet tregti në kurriz të komunitetit

Gjykatësi Ligoraq nuk e ka parë të udhës që të mbajë anën e komunitetit të zënë në kurth nga ky ndërtim pa leje dhe me siguri as nuk e ka menduar që mos o Zot, në rast zjarri ky dyqan kthehet në barrikadë vrastare, e pakapërcyeshme edhe për banorët edhe për zjarrfikësit

Gjykatësi Ligoraq i bashkohet kësisoj prokurores Gjeli, gjykatësve Balliu e Demiri, në dosjen që Ministria e Drejtësisë do t’i përcjellë organeve të kontrollit e të vetëqeverisjes së gjyqësorit, ndërkohë që ne do të kërkojmë që ankimimeve në këto organe t’u bashkohen edhe qytetarët e dëmtuar nga këto masa sigurie absurde, në dëm të komunitetit, mjedisit dhe rendit ligjor
Post Scriptum. Atyre që komentojnë apo bëjnë deklarata publike për gjasme presion nga ana ime mbi gjyqësorin, u them se për të mbrojtur interesin publik, të drejtën e komunitetit dhe të drejtat e liritë e njerëzve nga shpërdoruesit e detyrës në radhët e gjyqësorit, ne as do të heshtim më, as do të ndalemi së adresuari rastet e shpërdorimit në organet përkatëse të cilat Kushtetuta e ligji i ngarkojnë edhe me mbrojtjen e interesave të popullit e të shtetit, nga prokurorë e gjykatës të paaftë, të papërgjegjshëm, të dyja bashkë apo edhe më keq, pa atdhe fare

Por askush të mos ngatërrojë qëndrimin ndaj këtyre individëve, me qëndrimin tonë të palëkundur në mbështetje të drejtësisë dhe institucioneve të saj, në luftën kundër korrupsionit, krimit të organizuar dhe lirive e të drejtave të njerëzve

Shikojeni vetë çfarë tmerri ka marrë në mbrojtje gjykatësi Ligoraq.

Kryetari i Listës Serbe, Zlatan Elek, nuk ka marrë votat për t’u zgjedhur nënkryetar i Kuvendit të Kosovës, duke bërë që të dështoi kështu konsitutimi i institucionit.

Elek përmes shortit u hodh në votim tri herë radhazi për nënkryetar të legjislativit, në seancën e sotme të konstituimit të legjislaturës së nëntë, mirëpo nuk mori asnjë votë për, kundër ishin 54, kurse 19 deputetë abstenuan.

Në votim nuk morën pjesë deputetët nga Lista Serbe.

Të zgjedhurit e popullit të enjten për herë të 60-të po tentojnë të zgjedhin trupat e legjislativit. Pas zgjedhjes së kryetarit të Kuvendit dhe katër nënkryetarëve, deputetë nuk po arrijnë konsensus për zgjedhjen e nënkryetarit tjetër nga komuniteti serb, që do t’i hapte rrugë konstituimit të Kuvendi.

Komisioni Rregullator në KQZ ka miratuar ditën e sotme rezultatin përfundimtar të zgjedhjeve të 11 majit.

Me tre vota pro dhe dy kundër, u miratua projektvendimi për rezultatin e zgjedhjeve.

Komisioni pasqyroi numrin e votave të fituara nga çdo subjekt zgjedhor në çdo zonë zgjedhore, numrin e mandateve të fituara nga secili subjekt dhe listën emërore të deputetëve për secilën zonë dhe në rang kombëtar.

Ky hap shënon mbylljen zyrtare të procesit zgjedhor dhe çel rrugën për konstituimin e Kuvendit të ri. Miratimi i rezultatit nga Komisioni Rregullator do të pasohet më pas me mbledhjen e parë të Kuvendit, ku do të zhvillohet edhe seanca e konstituimit.

Nga zgjedhjet e 11 majit, Partia Socialiste mori 83 mandate, Partia Demokratike-Aleanca për Shqipërinë Madhështore 50 mandate. Partia Socialdemokrate tre deputetë, Mundësia dy, ndërsa Lëvizja Bashkë dhe Nisma Shqipëria Bëhet nga një mandat.