Kryeministri Edi Rama ka dhënë sot një intervistë në CNN,  ku ka dhënë detaje lidhur me idenë e zhvillimit të projektit turistik në zonën e Zvërnecit.

Ndër të tjera Rama tha se ende nuk ka një projekt dhe se mbi të po punojnë disa nga studiot më të njohura në botë, ndërkohë që u shpreh se po kryhet vlerësimi i ndikimit në mjedis.

PJESË NGA INTERVISTA:

Gazetarja: Më lejoni fillimisht të marr reagimin tuaj për protestat që kemi parë si në kryeqytetin Tiranë, ashtu edhe në qytetet bregdetare, lidhur me këtë zhvillim që lidhet me Jared Kushner. Si i përgjigjeni ju protestave dhe shqetësimeve të tyre?

Edi Rama: Së pari, ju falënderoj që më jepni këtë mundësi, sepse duhet të them se është vërtet mbresëlënëse të ndiesh peshën e lajmeve të rreme që vijnë edhe nga media që, në sytë e mi, janë shumë të respektuara.

Dhe vetëm për të saktësuar, ju thatë protesta në të gjithë Shqipërinë. Kjo është e rreme. Nuk ka protesta në të gjithë Shqipërinë. Ka një protestë në kryeqytet.

Ne jemi në një luftë hibride. Shqipëria është nën sulm nga armiq që i njohim shumë mirë. Është nën sulm nga konkurrenca shumë e fortë në pjesën tonë të Mesdheut. Është nën sulm nga mijëra e qindra mijëra profile të rreme (bots) që janë krijuar për të shkaktuar gjithë këtë stuhi.

Dhe sigurisht, në këtë protestë ka njerëz me qëllime të mira, të rinj që në përgjithësi janë të interesuar për mjedisin, por që janë keqinformuar në masë të madhe.

Nuk ekziston diçka e tillë si “ishulli i familjes Trump”. Nuk ekziston diçka e tillë si familja e presidentit amerikan që po merr nën kontroll zonat e mbrojtura me flamingo.

Edi Rama: Dëgjoni, faleminderit që e shfaqët atë video, sepse ajo është pikërisht portreti i dikujt që është i keqinformuar ose pjesë e atyre që keqinformojnë. Sepse, para së gjithash, nuk ka asnjë projekt. Ai po flet për një projekt që nuk e ka parë askund tjetër përveçse në imazhe të rreme të krijuara dhe të shpërndara në rrjetet sociale në Shqipëri, sepse ne jemi në një luftë hibride. Sa i përket projektit…

Gazetarja: Pra, vetëm për ta sqaruar, projekti nuk do të vazhdojë?

Rama: Përsëri, nuk ka ende një projekt. Nuk ka një projekt.

Gazetarja: Dua t’ju dëgjoj, zoti Kryeministër, por po përpiqem të sqaroj…

Edi Rama: Doni të më dëgjoni apo doni vetëm të flisni?

Gazetarja: Dua t’ju dëgjoj, por po përpiqem të sqaroj për shikuesit tanë. Ju po na akuzoni për lajme të rreme dhe po përpiqem të kuptoj nëse projekti vazhdon apo është ndalur. Sepse, sipas raportimeve të Politico, Prokuroria e Posaçme kundër Korrupsionit në Shqipëri ka nisur një hetim për këtë projekt. Si mund të vazhdojë projekti në këto kushte?

Edi Rama: Përsëri, ju nuk doni të dëgjoni. Është shumë e qartë për mua. Nuk po ju sulmoj. Po ju them të vërtetën. Dhe derisa të më tregoni projektin, duhet të më dëgjoni, sepse nuk ka projekt.

Për të krijuar këtë projekt, grupi që nuk përbëhet vetëm nga Jared Kushner dhe Ivanka Trump, por edhe nga investitorë të tjerë shumë të respektuar, ka angazhuar pesë nga arkitektët më të mirë në botë sot:

Kengo Kuma nga Japonia, Bjarke Ingels nga Danimarka, Emre Arolat nga Turqia, K-Studio nga Greqia, Jean Nouvel nga Franca.

Këta po punojnë së bashku me inxhinierë të nivelit më të lartë për mjedisin dhe specialistë të ndikimit social. Ndërkohë është angazhuar edhe një nga kompanitë më të mëdha konsulente për vlerësimin e ndikimit mjedisor.

Sepse sfida nuk është të ndërtohet një qytet. Sfida nuk është të derdhet beton mbi kokat e flamingove. Sfida është të provohet se zhvillimi dhe natyra jo vetëm që mund të bashkëjetojnë, por se natyra dhe zhvillimi kanë nevojë për njëra-tjetrën.

Njerëzit meritojnë të jetojnë në një lloj tjetër mjedisi, ku mund ta shijojnë natyrën dhe njëkohësisht t’i tregojnë respekt.

Pra, projekti ende nuk ekziston. Vlerësimi i ndikimit mjedisor është ende duke u kryer. E kuptoni? Dhe më lini të përfundoj.

Gazetarja: Po ju dëgjoj, zoti Kryeministër.

Edi Rama: Më lini të përfundoj, sepse ju përmendët Politico dhe thatë se ka një hetim antikorrupsion. Ky është lajm i rremë. Hetimi ka të bëjë me një nga pronarët e tokës. Është tokë private dhe një nga pronarët e ka shitur pronën, e cila është blerë përmes transaksioneve bankare krejtësisht transparente.

Hetimi është për atë çështje. Nuk është për investimin. Nuk është për projektin. Nuk është për Kushnerin. Nuk është për Trumpin. Nuk është për asgjë nga ato që po hidhen në këtë përzierje për të krijuar lajmin sensacional se Shqipëria është një vend ku po vrasim flamingot.

Sepse sfida nuk është të ndërtohet një qytet. Sfida nuk është të derdhet beton mbi kokat e flamingove. Sfida është të provohet se zhvillimi dhe natyra jo vetëm që mund të bashkëjetojnë, por se natyra dhe zhvillimi kanë nevojë për njëra-tjetrën.

Njerëzit meritojnë të jetojnë në një lloj tjetër mjedisi, ku mund ta shijojnë natyrën dhe njëkohësisht t’i tregojnë respekt.

Pra, projekti ende nuk ekziston. Vlerësimi i ndikimit mjedisor është ende duke u kryer. E kuptoni? Dhe më lini të përfundoj.

Gazetarja: Faleminderit zoti Rama!

Është mbyllur me humbjen e skuadrës sonë kombëtare miqësorja Shqipëri-Izrael. Ka qeë minuta e 73-të, kur Oskar Gloukh zhbllokoi ndeshjen për Izraelin, duke marr një rezultat të cilin kuq e zinjtë nuk arritën ta ndryshojnë deri në fund të ndeshjes.

Momenti i festimit të golit është konsideruar edhe si provokim ndaj tifozëve shqiptarë, ndërkohë që ndërhyri Elseid Hysaj që i kërkoi llogari futbollistit të Izraelit. Të dy u ndëshkuan me karton të verdhë, ndërsa më pas trajneri i Izraelit vendosi zëvendësimin e Gloukh.

PSG konfirmohet sërish kampion në UEFA Champions League duke mos dorëzuar titullin që mbante, pas fitores ndaj Arsenalit, në ndeashjen e zhvilluar në Puskas Arena.

90 minutat e rregullta të ndeshjes përfunduan në barazim e po kështu edhe koha shtesë, duke e cuar ndeshjen në penallti.

Në fakt qenë londinezët ata që kaluan në avantazh që në minutën e 6-të me anë të Havertz dhe pavarësisht rasteve francezët nuk mundën ta ndryshojnë rezultatin deri në pjesën e dztë. Ishte pikërisht një penallti mes Kvara-Moskjera e realizuar nga gol nga Dembele, që barazoi rezultatin.

Gjatë penalltive PSG, gaboi vetëm një prej tyre duke mbajtur kështu titullin e fituar sezonin e shkuar.

Po zhvillohet sot në stadiumin “Pushkash Arena” në Budapest finalja e Ligës së Kampioneve mes mbajtësve në fuqi të turneut, Paris Saint – Germain dhe Arsenalit. Deri në këto momente Arsenali kryeson me rezultatin 1-0 ndaj kampionëve në fuqi.

Pas përplasjeve dhe tensioneve të kësaj të shtune në Zvërnec, policia dhe kompania “Zvërnec South Adriatic Development” kanë reaguar duke shpjeguar respektivisht situatën.  Në një deklaratë për mediat kompania I cilëson përplasjet si “abuzim me ndjenjat e publikut” dhe përpjekje për të përbaltur një investim që parashikohet të kapë vlerën e mbi 4 miliardë eurove.

Nga ana tjetër, duke listuar disa pika që lidhen me projektin, bëhet me dije se trualli ku do të zhvillohet projekti është privat.

Reagimi i plotë:

Me keqardhje të thellë që po abuzohet me ndjenjat e publikut në rrjetet sociale dhe po investohet për të përbaltur një sipërmarrje kolosale për turizmin dhe ekonominë shqiptare, kompania “Zvërnec South Adriatic Development” njofton shtypin dhe opinionin publik si më poshtë:

Në zbatim strikt të legjislacionit shqiptar dhe në dialog të vazhdueshëm me institucionet përgjegjëse, kompania ka arritur të nisë fazën fillestare të një prej investimeve më të mëdha në fushën e turizmit në Detin Mesdhe, duke vendosur sipas ligjit rrethimin e pronës private që ajo disponon.

Teksa kompania është duke zhvilluar projektin final të ndërtimit, me ambicien për të arritur standardet më të larta arkitekturore dhe mjedisore, dhe ende pa u prezantuar projekti, gjendemi të detyruar të japim disa shpjegime:

Investimi parashikohet të arrijë vlerën e mbi 4 miliardë eurove, duke kontribuar me një rritje nga 3 deri në 4% në GDP (Prodhimi i Brendshëm Bruto) e Shqipërisë, në 5 vitet e ardhshme.

Investimi do të kujdeset tërësisht për ruajtjen e mjedisit dhe biodiversitetit të zonës dhe për këtë investitorët kanë angazhuar prej 2 vitesh kompetencat më të spikatura në nivel global, për studimet mjedisore përkatëse. Të cilat padyshim do të ndahen jo vetëm me institucionet, po edhe me publikun.

Investimi do të krijojë direkt dhe indirekt mbi 10.000 (dhjetë mijë) vende të reja pune, duke u bërë një motor i rëndësishëm për ekonominë e zonës, të qarkut Vlorë dhe gjithë Shqipërisë.

Bazuar në eksperiencat e mëparshme të investitorëve, që kanë një portofol ndër më të spikaturit globalisht në fushën e turizmit, kompania beson se investimet dytësore që do të pasojnë do të rrisin ndjeshëm të gjithë zinxhirin e vlerës së ekonomisë vendore, nga vlera e pasurive të patundshme të krejt zonës së Vlorës deri tek diversifikimi i ofertës ekonomike dhe niveli i pagave për zonën.

Investitorët kanë një bilanc kuptimplotë të bashkëpunimit të ngushtë me komunitetin në çdo investim të tyre, si edhe të përgjegjshmërisë sociale, gjëra që janë pjesë e planifikimit të punës dhe do të nisin bashkë me punën për projektin.

Ndërkohë nënvizojmë sa më poshtë disa të vërteta të mbuluara nga mjegulla e abuzimit mediatik:

Trualli në të cilin do të zhvillohet projekti është pronësi private metër për metër dhe kompania e ka blerë nga pronarët e ligjshëm, me certifikata pronësie të noterizuara. Të gjitha transfertat e blerjeve në lidhje me pronësinë janë kryer përmes sistemit bankar dhe janë lehtësisht të verifikueshme.

Të gjithë punonjësit që janë punësuar apo do të punësohen më tej në projekt janë dhe do të jenë subjekt i kontratave përkatëse sipas legjislacionit shqiptar.

Të gjithë hapat e ndjekur nga kompania janë bazuar në legjislacionin shqiptar dhe në konformitet të plotë me autorizimet përkatëse në çdo hap.

Projekti i ndërtimit, ashtu si edhe ai mjedisor, po finalizohet nga disa studio ndër më të mirat në botë dhe sapo të përfundojë do të ndahet publikisht me të gjithë të interesuarit.

Kompania ka lidhur marrëveshje me disa prej brandeve më të njohur të ekselencës botërore në fushën e hotelerisë dhe shërbimeve të tjera, nga restorantet e baret deri tek aktivitetet sportive apo edukative.

Investitorët kanë një karrierë absolutisht të pakontestueshme dhe zotërojnë kompani të kuotuara në bursat ndërkombëtare, si edhe kapitale të pakontestueshme nga askush. Edhe kompania “Zvërnec South Adriatic Development” nuk do të bëjë asnjë përjashtim në zinxhirin e kompanive të tyre, të cilat janë krenare të mishërojnë ekselencën globale në çdo fushë të aktivitetit të tyre.

Duke dënuar me forcë çdo akt dhune ndaj pronës private si edhe duke hedhur poshtë çdo përpjekje që synon disinformimin e publikut, kompania kërkon mirëkuptimin dhe durimin e publikut, duke i siguruar të gjithë ata që duan zhvillimin e qëndrueshëm dhe të suksesshëm të Shqipërisë, se nuk do të zhgënjehen kurrësesi nga cilësia absolute e projektit dhe produktit tonë.

“Zvërnec South Adriatic Development” është forca që do të zbatojë një investim ndërkombëtar, me bindjen dhe përkushtimin për ta shndërruar Vlorën në një nga pikat më të preferuara për turizmin botëror, ndërkohë që investitorët e këtij projekti janë miq të padiskutueshëm të Shqipërisë që frymëzohen nga tradita dhe mikpritja legjendare shqiptare.

Le të punojmë të gjithë së bashku, me besim dhe vërtetësi me njëri-tjetrin. Ndërsa me këdo që do të përpiqet të na pengojë apo shantazhojë, do të përballemi ligjërisht.

– Ndërkohë një tjetër reagim ka ardhur nga Policia e Vlorës, që deklaron se dy punonjës të shoqërisë private të sigurisë janë vënë nën hetim, pasi një protestues që u fut me forcë brenda rrethimit të kantierit, e tërhoqën deri në një ambient të përcaktuar për rojet dhe është mbajtur aty brenda.

Policia e Vlorës ka reaguar zyrtarisht disa orë pas protestës kundër resortit në Zvërnec, ku policë privatë të kontraktuar nga shoqëria që do realizojë ndërtimin, shfaqen të maskuar dhe hedhin spraj me piper ndaj protestuesve. Policia thotë se dy punonjës të shoqërisë private të sigurisë janë vënë nën hetim, pasi një protestues që u fut me forcë brenda rrethimit të kantierit, e tërhoqën deri në një ambient të përcaktuar për rojet dhe është mbajtur aty brenda.

Reagim i Drejtorisë Vendore të Policisë 

Më datë 30.05.2026, është zhvilluar një tubim i organizuar nga banorë të fshatit Zvërnec, në vendin e quajtur “Portonovë”, të cilët kundërshtojnë zbatimin e një projekti ndërtimor nga një kompani private.

Policia e Vlorës, pas njoftimit të marrë nga banorët për zhvillimin e këtij tubimi, ka marrë masat e nevojshme për garantimin e rendit dhe sigurisë publike, si dhe për mbrojtjen e pronës private.

Gjatë tubimit, situata është përshkallëzuar dhe një grup protestuesish kanë kryer veprime të dhunshme me qëllim prishjen e rrethimit të kantierit të kompanisë.

Në këto rrethana, njëri prej protestuesve, shtetasi E. S., është futur me forcë brenda rrethimit të kantierit dhe është shoqëruar nga punonjësit e shoqërisë private të sigurisë në ambientin e përcaktuar për rojet.

Gjatë shoqërimit nga punonjësit e shoqërisë private të sigurisë, shtetasit E. S. i janë shkaktuar dëmtime trupore.

Menjëherë kanë ndërhyrë shërbimet e Policisë, të cilat kanë nxjerrë shtetasin E. S. nga ambienti ku mbahej nga punonjësit e shoqërisë private të sigurisë. Më pas, ai është paraqitur në ambientet e DVP Vlorë, ku ka bërë kallëzim ndaj dy punonjësve të kësaj shoqërie.

Në vijim të veprimeve procedurale, u proceduan penalisht dy punonjësit e shoqërisë private të sigurisë, konkretisht shtetasit G. V., 41 vjeç, dhe A. G., 35 vjeç, të dy banues në Tiranë.

Po në vijim të veprimeve procedurale, u proceduan penalisht edhe 15 shtetas pjesëmarrës në tubim, të cilët dyshohet se kanë kryer veprime të dhunshme me qëllim prishjen e rrethimit të kantierit.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprat penale “Organizimi dhe pjesëmarrja në grumbullime e manifestime të paligjshme”, “Shkatërrimi i pronës” dhe “Plagosja e lehtë me dashje”.

Partia Demokratike në Kuvendin Kombëtar të 30 Majit ka dalë me një rezolutë përmes së cilës, bën thrrje për përmbysjen e asaj që e konsiderojnë si autokraci në Shqipëri. “Misioni i demokratëve është kthimi i demokracisë”, thuhet ndër të tjera në rezolutë.

“Për të realizuar misionin e saj, Kuvendi Kombëtar i Partisë Demokratike bën një thirrje të sinqertë për bashkimin e të gjithë faktorëve politikë dhe shoqërorë në një front të vetëm opozitar, duke lënë mënjane çdo dallim, në emër të objektivit tonë të përbashkët: përmbysjes së regjimit autokratik dhe kleptokratik, si dhe mundësimit të së ardhmes së Shqipërisë tonë Evropiane”, mbyllet rezoluta.

REZOLUTË

Kuvendi Kombëtar i Partisë Demokratike, mbledhur sot më datë 30.05.2026, pasi mori në shqyrtim situatën politike dhe shoqërore në Shqipëri,

konstaton se:

Shqipëria ndodhet sot në një udhëkryq historik. Në vend është instaluar një regjim autokratik dhe kleptokratik, në të cilin të gjitha pushtetet përqendrohen në një dorë, shteti ligjor është zëvendësuar me narkoshtetin, zgjedhjet me farsën zgjedhore;

Regjimi qëndron në pushtet nëpërmjet zgjedhjeve farsë. Raportet ndërkombëtare kanë provuar përfundimisht shuarjen e kufijve midis partisë dhe shtetit, patronazhimin që ushtron presion të skajshëm politik ndaj votuesit, përdorimin e krimit të organizuar për mbledhjen e votave si dhe ekzistencën e një administrate shumë të fryrë politike!

Shqipëria po zbrazet çdo ditë e më shumë! Vendi po kalon një situatë depresive ekonomike dhe shoqërore, të mungesës së shpresës dhe besimit për të ardhmen! Pamundësia për të jetuar me punë të ndershme dhe mungesa e perspektivës, shtrenjtimi i skajshëm i jetesës, papunësia dhe rënia e prodhimit vendas, mungesa e shanseve të barabarta, mungesa e një sistemi arsimor dhe shëndetësor dinjitoz, mungesa e shërbimeve bazike veçanërisht për shqiptarët që jetojnë në zonat rurale, po prodhojnë çdo vit emigracion masiv të rinisë dhe pjesës më të kualifikuar të forcës prodhuese.

Shqipëria është një narkoshtet! Ajo është kthyer në epiqendrën e krimit të organizuar dhe larjes së parasë së pisët. Krimi i organizuar kontrollon funksionet kryesore të shtetit, korrupsioni është i kudondodhur, agjencitë shtetërore të rendit dhe të sigurisë janë kompromentuar rëndë, sistemi gjyqësor është në kolaps, prona është e pambrojtur dhe aspak e sigurtë.

Ekonomia e furnizuar nga narkoeurot si dhe burimet kombëtare janë përqendruar në duar të personave të lidhur drejtpërdrejtë me qeverinë dhe krimin, nëpërmjet PPP megakorruptive dhe prokurimeve publike me fitues të paracaktuar. Biznesi për të mbijetuar duhet të gjunjëzohet. Kush nuk e bën shantazhohet. Paratë e krimit të organizuar pastrohen haptazi, veçanërisht në sektorin e ndërtimit. Në këmbim, me to blihen vota për të mbajtur narkoshtetin në pushtet. Kjo ka bllokuar rotacionin normal politik, në dëm të Shqipërisë dhe shqiptarëve;

Maxhoranca socialiste dhe drejtuesi i saj Edi Rama, pasi nuk ia dolën ta zhbëjnë apo ta blejnë Opozitën dhe Partinë Demokratike, po ndërmarrin çdo hap për të tkurrur rolin e saj kushtetues të kontrollit të pushtetit! Në Kuvend, hapësira legjislative dhe mbikëqyrëse që i takon Opozitës është tkurrur në maksimum. Opozita është përjashtuar tërësisht nga procesi i integrimit të vendit dhe ai mbikëqyrës institucional. Ndërkaq, mediat në shumicë të kontrolluara, tentojnë çdo ditë të shuajnë zërin e saj!

Maxhoranca socialiste dhe drejtuesi i saj Edi Rama i ka ofruar mbrojtje maksimale megakorrupsionit, nëpërmjet mbrojtes së megakorrpsionit me imunitet parlamentar dhe moszbatimit të vendimeve të Gjykatës Kushtetuese, Këto janë standard unikale për një vend që synon të bëhet pjesë e Evropës, në shkelje flagrante të ligjit dhe moralit politik dhe shoqëror evropian!

Në këtë kontekst të vështirë, Partia Demokratike ia ka dalë të ekspozojë tërësisht realitetin e hidhur shqiptar. Raporti OHDIR që shkërmoqi Partinë-Shtet, dy misione vëzhgimi nga institucionet ndërkombëtare, 8 rezoluta ndërkombëtare që rendisin të gjitha gjetjet dhe shqetësimet si dhe 34 kushtet e reja të imponuara nga BE në procesin e integrimit evropian, tregojnë qartë se realiteti shqiptar i fasadës demokratike dhe opinioneve të komisionuar, tashmë është përpara syve të opinionit publik shqiptar dhe ndërkombëtar.

PËR KËTË ARSYE,

KUVENDI KOMBËTAR I PARTISË DEMOKRATIKE

DEKLARON SE:

Misioni i saj madhor ka qene dhe mbetet ‘Shqipëria Evropiane’ dhe ‘Shqipëria si e gjithë Evropa’. Për këtë, ndalimi i menjëhershëm i shpopullimit të Shqipërisë si kërcënimi më serioz që përballet Shqipëria, nëpërmjet shkëputjes së Shqipërisë nga shtetkapja dhe krimi i organizuar, lufta pas asnjë kompromis kundër pastrimit të parave, korrupsionit dhe keqqeverisjes, janë prioritete absolute të saj;

Falënderon Misionin e OHDIR, Partinë Popullore Evropian dhe Unioni Ndërkombëtar Demokrat për mbështetjen e madhe që i kanë dhënë Partisë Demokratike në luftën e saj të pareshtur për Zgjedhje të Lira dhe të Ndershme, në përputhje me standardet më të mira të OSBE/OHDIR-it.

Konsideron zgjedhjet e lira dhe të ndershme si mekanizëm thelbësor që garanton pluralizmin politik dhe vlerat e familjes evropiane ku duam të bëhemi pjesë. Për këtë arsye Partia Demokratike do beje çdo përpjekje për një qeveri teknike, për të garantuar minimumin e standardeve të pranueshme zgjedhore, si parakusht për rotacionin politik që presin shqiptarët.

Mbështet me të gjitha forcat dhe mundësitë e saj procesin e integrimit të vendit në Bashkimin Evropian, si interes madhor kombëtar që shpreh aspiratat shekullore të shqiptarëve. Por njëkohësisht deklaron se Shqipëria në Evropë duhet të shkojë për meritë të saj, duke plotësuar të gjitha standardet evropiane drejtësisë dhe të shtetit ligjor.. Ne kundërshtojmë më forcën më të madhe çdo projekt paralel që lë mënjane plotësimin e standardeve në këmbim të një anëtarësimi gjysmak;

Deklaron se në të gjithë aktivitetin e saj politik, nëpërmjet Grupit të saj Parlamentar në Kuvend dhe strukturës së saj kudo në Shqipëri, do të angazhohet në çdo akuze të drejtë në mbrojtje të qytetarëve të saj, të shtetit ligjor, të mirëqeverisjes, dhe transparencës, të normave demokratike, të lirisë së shprehjes dhe besimit. Kudo ku ka një kauzë për të mbrojtur, aty do të jetë Partia Demokratike, drejtuesit dhe strukturat e saj!

Për të realizuar misionin e saj, Kuvend Kombëtar i Partisë Demokratike bën një thirrje të sinqertë për bashkimin e të gjithë faktorëve politikë dhe shoqërorë në një front të vetëm opozitar, duke lënë mënjane çdo dallim, në emër të objektivit tonë të përbashkët: përmbysjes së regjimit autokratik dhe kleptokratik, si dhe mundësimit të së ardhmes së Shqipërisë tonë Evropiane!

Kuvendi i Partisë Demokratike ka votuar këtë të shtunë ndryshimet në statutin e partisë, ku ndër të tjera parashikohet ngritja e një komisioni të posaçëm që do të shqyrtojë dhe filtrojë kandidaturat për deputetë dhe kryetarë bashkish, përpara se ato të kalojnë në procesin e primareve. Gjithashtu statute parashikon fuqizimin e diasporës, fuqizimin e rolit të grave si dhe saktësim në rregullat e shkarkimit të kryetarëve.

NDRYSHIMET NE STATUT:

8. Fuqizimi i Diasporës shqiptare dhe përfaqësimi real politik i saj. 15% në lista dhe në organet e partisë duhet të jenë përfaqësues nga Diaspora.
9. Fuqizimi i rolit të grave dhe vajzave në Parti, duke e rritur përfaqësimin e tyre nga 30 % në 40%.
10. Ngritjen e Komisionit të Seleksionimit të Kandidaturave për deputet dhe kryetar bashkie, si strukturë autonome nga organet drejtuese të partisë, përpara realizimit të procesit të primareve.
11. Përmirësimi i organizimit bazë të partisë (grupseksionet dhe nëndega) dhe forcimi i Kolegjit të Kryetarëve të Grupseksioneve.
12. Forcimi i raporteve mes Degëve të Partisë dhe të zgjedhurve vendor (këshilltarëve bashkiak).
13. Njohja e një statusi të barabratë për të gjitha organizatat partnere të partisë, duke respektuar historinë e themelimit të PDSH.
14. Mbrojtja e të dhënave personale të anëtarëve të Partisë.
15. Saktësimi i rregullave të shkarkimit të kryetarëve të degëve, duke i dhënë më shumë garanci të qëndrimit në detyrë.

Nga Kuvendi Kombëtar i Partisë Demokratike, kreu i saj Sali Berisha, ndërsa ka përshëndetur të ftuarit dhe miqtë ndërkombëtarë, tha ndër të tjera se ata që përmbysën 35 vite më parë diktaturën komuniste, do të përmbysin sot edhe qeverinë e Edi Ramës. Duke iu drejtuar këshilltarit të JD Vance, Bob McWëeen, kreu i PD tha se do të përmbysin tani diktaturën më të shëmtuar midis diktaturave autokratike.

Fjala e Berishës:

Të dashur miq, përfaqësues të partive politike simotra.

I dashur miku im i viteve ’90 e gjer sot, kryetar i Këshillit Kombëtar, këshilltar për veprimin konservator pranë zëvendëspresidentit JD Vance, Bob McEëeen, është nder i madh që je sot midis nesh.
I dashur Bob, 35 vite më parë përmbysëm një diktaturë, diktaturën më oruelliane të Evropës së bashku, tani do përmbysim diktaturën e Edvin Ballukut, diktaturën më të shëmtuar midis diktaturave autokratike.
Është nder të përshëndes praninë këtu të përfaqësuesit të Neo Demokracisë, parti mike, deputeti Giogiakos, me lidhje të forta që nga takimi i parë në janarin e vitit 1991 me kryeministrin Kostandin Micotaqis dhe vazhdojmë me të birin, Qirjako Micotaqis, ne jemi krenarë për bashkëpunimin dhe miqësinë me ju.
I dashur zoti Kovacki, përfaqësu i partisë mike VMRO-DPMNE, në një bashkëpunim të gjatë, të frytshëm, të suksesshëm midis dy partive dhe dy vendeve tona, u falënderoj shumë për praninë tuaj.
I dashur Volkmar Klein, mik i çmuar i PD, demokracisë dhe Shqipërisë.
Është nder i veçantë për ne të kemi një mik si ju, u falënderoj shumë për praninë tuaj sot në këtë kuvend.
I dashur Thomas, një mirënjohje të veçantë për ju, mik i ditëve të vështira, për ndihmesën tejet të çmuar që i dhe PD, për fjalën që thatë, por edhe për bashkëpunimin në dekada që PD ka pasur me Bashkimin Kristian Demokrat gjerman dhe Fondacionin Adenauer, ne u jemi shumë mirënjohës partisë tuaj dhe fondacionit.

Pak para protestës së paralajmëruar të studentëve shqiptarë në Republikën e Maqedonisë së Veriut, Ambasadori i Shqipërisë në këtë vend ka publikuar disa vargje të Fishtës për gjuhën shqipe.

Duke qenë se protesta e studentëve ka në qendër pikërisht kërkesën e studentëve për mbrojtjen e gjuhës dhe kryerjen e provimeve në shqip, Ambasadori Denion Meidani  ka ndarë disa vargje nga poema “Gjuha Shqype”.

“Pra, shqyptarë çdo fes qi t’jini,

gegë e toskë, malci e qyteta,

gjuhën t’uej kurr mos ta lini,

mos ta lini sa t’jetë jeta…”

Drejtori i Policisë së Shtetit Skënder Hita ka urdhëruar rritjen e masave për sigurinë në shkolla dhe goditjen e shpërndarjes së lëndëve narkotike brenda perimetrit të sigurisë në institucionet arsimore.

Hita kërkon që siguria në shkolla të jetë një prioritet në punën e përditshme të uniformave blu, duke urdhëruar kontrolle periodike dhe të befasishme jo vetëm me shërbime të dukshme por edhe me agjentë civilë.

Me anë të një telegrami drejtuar drejtorive vendore të policisë dhe departamenteve, kryepolici kërkon që të mbahet kontakt i vazhdueshëm me oficerët e sigurisë në shkolla dhe drejtuesit e institucioneve për nxënësit problematik, lidhur me konflikte apo informacione të mbajtjes së armëve të ftohta si dhe subjektet pranë shkollave që tregtojnë produkte të ndaluara si alkool dhe duhan për grupmoshën nën 18 vjeç.

Ky urdhër ka ardhur pas një analize të problematikave gjatë vitit shkollor 2024-2025 por dhe pas shqetësimit të adresuar të një prindi ditët e fundit, fëmijës së të cilit i ishte ofruar kanabis sativa pranë një gjimnazi në kryeqytet.

Ditën e hënë më 18 Maj, nis Turi Çiklistik i Shqipërisë 2026, i cili starton nga kryeqyteti dhe do të vijojë në disa qytete të Shqipërisë.

Për këtë arsye disa rrugë de akse rrugore do të preken nga bllokime dhe kufizime të përkohshme të qarkullimit.

Turi nis nga Tirana më 18 Maj, ora 12:00 dhe sipas njoftimit zyrtar nga kufizimet do të preken disa nga rrugët dhe bulevardet kryesore të Tiranës, si Sheshi “Skënderbej”, bulevardet “Zogu i Parë”, “Dëshmorët e Kombit”, “Gjergj Fishta”, si dhe segmente të Unazës së Madhe dhe itinerarit Tiranë – TEG – Thumanë – Milot – Rrëshen – Reps.

Një 52-vjeçar ka humbur jetën këtë të dielë në Kepin e Rodonit, teksa është aksidentuar duke lëvizur me një motor me  rrota. Sipas policisë, viktima dyshohet se ka humbur kontrollin si pasojë e terrenit dhe është rrëzuar. Në mjet ndodhej edhe bashkëshortja e tij, e cila është lënduar lehtë.

Njoftimi policor:

Rreth orës 16:45, në vendin e quajtur “Kepi i Rodonit”, në një terren me shkurre, shtetasi A. K., rreth 52 vjeç, banues në Tiranë, duke drejtuar një motomjet (me 4 goma), dyshohet se ka humbur kontrollin, si pasojë e terrenit, dhe është rrëzuar.

Si pasojë, 52-vjeçari ka ndërruar jetë në vendngjarje.

Në motomjet ndodhej edhe bashkëshortja e tij, shtetasja E. K., 44 vjeçe, e cila është lënduar lehtë dhe ndodhet jashtë rrezikut për jetën.

Grupi hetimor ndodhet në vendngjarje dhe po punon për zbardhjen e plotë të rrethanave dhe shkakut të aksidentit.

Kryeministri Edi Rama u ka bërë thirrje mediave të tregojnë përmbajtje dhe përgjegjësi, lidhur me publikimin e materialeve që kanë lidhje me aksidentin tragjik që u mori jetën dy të miturve në zonën e ish-Kënetës në Durrës. “Publikimi ose përhapja e imazheve grafike nuk informon, por vetëm sa shton dhimbjen e atyre që po përballen me një humbje të pariparueshme dhe e shndërron botën e informacionit në një spektakël”, shkruan Rama ndërsa shprehet se drejtësia po bën punën e saj me autorin e krimit.

Mesazhi i plotë:

Ndërsa i gjithë vendi është në zi për këtë ngjarje dhe drejtësia po bën punën e saj me autorin e krimit, është detyrë e të gjithëve, por veçanërisht e mediave dhe portaleve, të tregojnë përmbajtje, ndjeshmëri dhe përgjegjësi. Publikimi ose përhapja e imazheve grafike nuk informon, por vetëm sa shton dhimbjen e atyre që po përballen me një humbje të pariparueshme dhe e shndërron botën e informacionit në një spektakël. Respekti për dinjitetin njerëzor dhe dhimbja e atyre që preken drejtpërdrejt duhet të jetë mbi çdo sensacionalizëm apo klikim. Le të tregojmë solidaritet, humanizëm dhe dhembshuri në një ditë tragjike si kjo.

Dy fëmijë kanë ndërruar jetë dhe një tjetër ndodhet në gjendje të rëndë në Spitalin e Traumës, pasi u përplasën nga një automjet në zonën e ish-Kënetës në Durrës.

Të miturit kanë qenë duke luajtur në trotuarin pranë banesës, ndërsa janë përplasur nga mjeti i drejtuar nga Nikoll Radaçi. Ky i fundit është larguar nga vendngjarja, por është ndaluar më pas nga policia, ndërsa në testin e alkoolit ka rezultuar me nivele të larta. Sipas banorëve, Radaçi njihet si person që në zonën e ish-Kënetës, ku dhe banonte vetë, drejtonte mjetin me shpejtësi tepër të lartë.

Një ngjarje e rëndë ka ndodhur mesditën e sotme në zonën e ish-Kënetës, në Durrës ku një automjet ka përplasur tre fëmijë, të moshës rreth 10–13 vjeç.

Bëhet me dije se dy prej djemve të mitur kanë ndërruar jetë si pasojë e plagëve të marra, ndërsa një tjetër ndodhet në spital në gjendje të rëndë shëndetësore.

Ndërkohë autori i aksidentit është ndaluar nga policia ndërsa vendngjarje kanë mbërritur shërbimet e emergjencës dhe autoritetet që po punojnë për sqarimin e rrethanave të aksidentit.

Shtetasi kinez qe humbi jeetën si pasojë e një aksidenti në aksin Elbasan-Librazhd më 26 Prill, ishte në fakt një biznesmen i rëndësshëm në vendin e tij. Mediat e huaja raportojnë se bëhet fjalë për 60 vjeçarin Li Jianhong, president dhe kryetar i kompanisë “Xinjiang Grand Scape Group” dhe themelues i resortit të skive “Silkroad Mountain Resort” në Urumqi të Kinës.

Li ishte gjithashtu i njohur si sportist ekstrem dhe alpinist. Ai kishte përfunduar ngjitjen e shtatë majave më të larta në botë dhe kishte arritur në të dy polet e Tokës, duke u bërë një nga pak alpinistët kinezë që e kanë përfunduar këtë sfidë. Në vitin 2018 kishte ngjitur malin Everest dhe më pas K2, në vargmalin Karakoram, brenda një periudhe të shkurtër kohe.

Edhe pse i raportuar si turist, mësohet që 60-vjeçari kishte ardhur në Shqipëri për një takim pune.

Biznesmeni ndërroi jetë pasi automjeti i tij u  përplas me një tjetër automjet,  që drejtohej nga një 26 vjeçar shqiptar, i cili më pas ra  në pranga për  “shkelje të rregullave të qarkullimit rrugor”.

Policia nuk ka gjetur asgjë të rrezikshme apo të jashtëligjshme pas kontrollit në qendrën tregtare, ku u dha një njoftim për bombë.

Bëhet me dije se rreth orës 20:10, shtetasi A. D, ka njoftuar sallën operative të DVP Tiranë se në email e tij ka ardhur një mesazh se në qendrën tregtare ku ai punon si shef security është vendosur një sasi lëndë plasëse, e cila do shpërthejë në orën 20:30.

Menjeherë në vendngjarje kanë shkuar shërbimet e Policisë, Forcat Xheniere dhe shërbimet e Antiterritorit, të cilët kanë kontrolluar qendrën dhe nuk kanë konstatuar asgjë të paligjshme.

Grupi hetimor po punon për identifikimin e shtetasit që ka dërguar emailin dhe për sqarimin e rrethanave të rastit.

Një alarm për bombë është njoftuar në nje qender tregtare në kryeqytet. Mësohet se qendra është duke u evakuar, ndërsa autoritetet po kryejne kontrolle.

Shqipëria ka siguruar medaljen e arjendtë, duke u renditur e dyta në Europë, në kampionatin e mundjes, përfaqësuar nga sportisti Islam Dudaev.

Ai  u mposht vetëm në finale në peshën 65 kg në stilin e lirë nga rusi Bashir Magomedov, në Europianin e që zhvillohet në Tiranë.

Më herët Dudaev eleminoi në fazën kualifikuese turkun Ahmet Duman, ndërsa në çerekfinale, ai arriti të fitonte ndaj gjeorgjianit Nika Zakashvili. Në gjysmëfinale, Dudaev shkëlqeu ndaj  Islam Guseinovit.

31-vjeçari u shpall kampion i Evropës në vitin 2024 dhe fitues i medaljes së bronztë në Lojërat Olimpike në Paris.

Gjatë një komunikimi me qytetarët online, kreu i Partisë Demokratike Sali Berisha u ka bërë thirrje t’ju bashkohen protestës kombëtare të 8 majit, për votën e lirë dhe kundër varfërmit.

Duke akuzuar kryeministrin për mashtrime dhe trillime kundër PD, Berisha tha se nuk protestohet për pushtetin e Partisë Demokratike.

“Të ngrihemi fuqishëm në protestën e 8 majit por para së gjithash të ngrihemi fuqishëm mbi murin e propagandës së mashtrimit, trillimit që Rama montoi me mafian e fjalë së lirë. Mos harroni se sot kjo mafie 24 orë në 24 orë, 7 ditë të javës, fillon e mbaron gjithçka për të manipuluar të vërtetat e për të trilluar shpifje për PD dhe opozitën. Nuk protestohet për pushtetin e PD dhe Berishës, por për votën e lirë të shqiptarëve dhe kundër varfërimit të vazhdueshëm ”, tha Berisha.