Deri më 20 Korrik 2025, është afati i fundit për bashkitë me probleme financiare dhe për ato me detyrime të prapambetura, të kenë përfunduar hartimin e planit të shlyerjes së borxheve.

Ministri i Financave Petrit Malaj, më herët u kërkoi bashkive që planin e rehabilitimit financiar, pasi ta kenë miratuar në këshillat bashkiak ta paraqesin pranë ministrisë.

Plani duhet të sigurojë ecurinë e shlyerjeve të borxheve brenda 12 muajve.

Në total për 2024, niveli i detyrimeve të prapambetura për 61 bashkitë në rang vendi ka arritur në vlerën e rreth 3,2 mld lekëve apo rreth 33 mln euro sipas të dhënave të publikuara në raportin “Qeverisja vendore në Shqipëri- Raport mbi situatën 2024” të Institutit për Bashkitë të Shqipërisë.

Krahasuar me 2023, detyrimet e prapambetura të krijuara nga pushtetit vendor, kanë zbritur në vlerën e 1,5 miliardë lekëve apo 32,8% më pak.

Por pavarësisht tendencës rënëse të totalit të vlerës së detyrimeve të prapambetura, ecuria me shlyerjen e tyre për secilën bashki paraqitet mikse.

Në 2024 nga të dhënat e raportit evidentohet se 14 bashki, kanë shtuar vlerën e detyrimeve të prapambetura, ndërsa 3 bashki si ajo e Këlcyrës, Patosit dhe Mallkastrës nuk kanë krijuar detyrime të prapambetura të reja në 2024.

Po ashtu në 2024, sipas raportit 4 bashki në rang vendi paraqiten në vështirësi financiare, si bashkitë: Kavajë, Vorë, Cërrik, Dimal.

Sipas ligjit “Për financat vendore” nëse niveli i detyrimeve të prapambetura është më i lartë se 25% e shpenzimeve që bashkitë, kanë bërë me burimet e veta ato konsiderohen në vështirësi financiare.

Nga totali i shpenzimeve që Bashkia Kavajë ka bërë në 2024 me burimet e veta, rreth 59% e tyre janë me borxhe të papaguara. Në Vorë shpenzimet me borxhe zenë 40%, në Dimal rreth 33% dhe në Cërrik rreth 37%.

Por pavarësisht se vlerat relative të detyrimeve të prapambetura për këto bashki, janë poshtë nivelit prej 80% të kufirit ligjor të jeluar në raport rekomandohet se këto Bashki, duhet të bëjnë përpjekje më të mëdha si në kahun e të ardhurave dhe në atë të shpenzimeve, për të ulur më tej këtë nivel të lartë detyrimesh përgjatë vitit 2024 e në vijim.

Ndërsa për dy bashkitë Kavajë dhe Vorë që paraqiten në situatën e vështirësisë serioze financiare, raporti i Institutit për Bashkitë e Shqipërisë thotë se sipas ligjit “Për financat vendore” hapat që parashikohen për të mundësuar daljen nga vështirësitë janë:

“Ministria e Financave, me marrjen e njoftimit nga kryetari i njësisë së vetëqeverisjes vendore ose kur e konstaton vetë, i propozon Këshillit të Ministrave masat për daljen nga situata e vështirësisë serioze financiare.

Në këtë rast, Këshilli i Ministrave vendos:

a) të japë mbështetje financiare në formën e ndihmës apo huas, duke përcaktuar edhe planin për daljen e njësisë së vetëqeverisjes vendore nga situata e vështirësisë serioze financiare, si dhe planin e kthimit të shumës së dhënë;

b) të mandatojë Ministrinë e Financave për të negociuar ristrukturimin e borxheve dhe të detyrimeve të papaguara;

c) të shpallë njësinë e vetëqeverisjes vendore në mbikëqyrje financiare dhe të autorizojë Ministrinë e Financave si mbikëqyrës financiar të saj, duke respektuar rigorozisht këto kushte: i) njësia e vetëqeverisjes vendore nuk mund të marrë asnjë vendim që mund të çojë në shtimin e detyrimeve të saj financiare; ii) njësia e vetëqeverisjes vendore nuk mund të vendosë shërbime të reja publike, të themelojë sipërmarrje publike apo çdo institucion tjetër; iii) njësia e vetëqeverisjes vendore nuk mund të shlyejë asnjë detyrim financiar, të krijuar para shpalljes së rastit të vështirësisë financiare, përveç detyrimeve të përcaktuara shprehimisht në planin e rehabilitimit financiar”, citohet në raport.

Nga Kavaja, Tirana deri te Pogradeci 10 bashkitë mbajtëse kryesore të borxhit

10 bashkitë kryesuese me borxhin më të madh, si përqindje e totalit të detyrimeve të prapambetura janë e Kavajës dhe Tiranës pasuar nga Pogradeci, Vora, Rrogozhina, Dimali, Dibra, Cërriku, Peqini dhe Mati.

Pesha e borxhit të Bashkisë së Kavajës kundrejt totalit është 23%, e Tiranës 18%. Më pas e ndjekur nga Bashkia e Pogradecit me peshë 7,5% kundrejt totalit, Vora (4,8%), Rrogozhina (5%), Dimali (4,5%), Dibra (4%), Cërriku (3,6%), Peqini (2,5%) dhe Mati (2,4%).

Në 2024, konstatohet se 14 prej 61 bashkive e kanë shtuar vlerën e detyrimeve të prapambetura në raport me vitin paraardhës.

Spikasin Bashkia Rrogozhinë (+83.1 milionë lekë apo rreth 107% më shumë se 2023), Bashkia Mat (+49.3 milionë lekë apo 189% më shumë se në 2023) dhe Bashkia Berat (+47.6 milionë lekë apo 257% më shumë se 2023).

Nga ana tjetër, vërehet një ecuri pozitive në shlyerjen e detyrimeve të prapambetura nga Bashkia Durrës (-266.8 milionë lekë apo 85,6% më pak se në 2023), Bashkia Tiranë (-217.7 milionë lekë apo 28% më pak se në 2023), Bashkia Vorë (-209.5 milionë lekë apo 58% më pak se në 2023), Bashkia Lezhë (-119 milionë lekë apo 70% më pak se në 2023) dhe Bashkia Elbasan (-107.5 milionë lekë apo 87% më pak se nga 2023).

Ndërsa Bashkia Këlcyrë dhe Bashkia Patos, për të katërtin vit rradhazi nuk krijojnë asnjë detyrim të prapambetur ndaj palëve të treta.

Pjesa më e madhe e detyrimeve të pashlyera janë për energjinë

Pjesa më e madhe e detyrimeve të pashlyera nga 61 bashkitë në rang vendi për 2024 rezulton se është për zërin e shpenzimeve “Të tjera” ku pjesën dërrmuese e zënë detyrimet e prapambetura të energjisë elektrike të njësive të qeverisjes vendore ndaj OSHEE sh.a..

Për zërin “Të tjera” detyrimet e parapambetura zëne një total prej 1.05 mld lekë, apo rreth 33% të totalit të borxheve.

Detyrimet ndaj palëve të treta për projekte të investimeve publike (933 mln lekë) vijojnë të kenë një peshë prej 29,2% në totalin e detyrimeve të prapambetura në këtë periudhë.

Ndërkohë që detyrimet që burojnë nga shërbimet e kryera nga palë të treta, kapin vlerën e 527 mln lekë si dhe për vendime gjyqësore 316 mln lekë apo 10% të totalit të borxhit. / Monitor

The post Raporti/ Detyrimet e prapambetura të Bashkive arritën 33 mln euro në 2024 appeared first on Albeu.com.

Sot, më 21 korrik 2025, dollari amerikan, blihet me 83 lekë dhe shitet me 84.2 lekë.

Euro, blihet me 97 lekë dhe shitet 97.8 lekë.

Franga zvicerane, këmbehet në blerje me 103.6 lekë, ndërsa në shitje me 104.8 lekë.

Paundi britanik, blihet me 111.4 lekë dhe shitet me 112.8 lekë.

Dollari kanadez, sot në blerje këmbehet me 60.5 lekë, ndërsa në shitje me 62 lekë.

Më poshtë, po sjellim të dhënat e këmbimin valutor, për të gjitha monedhat e huaja:

The post Këmbimi valutor/ Çfarë po ndodh me monedhat e huaja? Me sa po blihen dhe shiten dollari dhe euro appeared first on Albeu.com.

Ditën e sotme vendi ynë, do të mbetet nën ndikimin e motit të kthjellët dhe të nxehtë deri pas mesdite, kur priten kalime vranësirash nëpër territor.

Më të theksuara vranësirat do të jenë në zonat malore Lindore, megjithatë nuk priten reshje.

Parashikohet që pasditja dhe nata të vijojnë nën dominimin e kthjellimeve, vranësirave dhe lagështirës së lartë në ajër.

Temperaturat e ajrit do të pësojnë sërisht ritje në të dy vlerat ekstremale ditore, duke u luhatur nga 13°C vlera minimale deri në 41°C maksimalja në rang territori.

Era do të fryjë e lehtë deri mesatare, përgjatë gjithë ditës duke arritur shpejtësinë maksimale mbi 30 km/h nga drejtimi Veriperëndimor, kjo do të bëjë që në brigjet detare të krijohet dallgëzim 1-2 ballë.

The post Parashikimi i motit 21 Korrik 2025, temperatura deri në 41°C appeared first on Albeu.com.

Dashi
Të lindur më: 21 Mars – 19 Prill
Në dashuri, sot mund të ndiheni të mbështetur nga partneri juaj dhe një bisedë e sinqertë do të sjellë afërsi më të madhe. Në punë, pritet një projekt i ri që do të kërkojë vëmendje të veçantë nga ana juaj, ndaj tregohuni të përqendruar. Kujdesuni për shëndetin, pasi lodhja mendore mund të ndikojë në energjinë tuaj; relaksohuni pasdite. Financat janë të qëndrueshme, por shmangni shpenzimet e panevojshme sot.

Demi
Të lindur më: 20 Prill – 20 Maj
Marrëdhëniet romantike mund të jenë paksa të tensionuara, ndaj tregohuni të durueshëm dhe të hapur ndaj dialogut. Në aspektin profesional, do të keni mundësi të shfaqni aftësitë tuaja në një takim të rëndësishëm. Shëndeti është i mirë, por mos neglizhoni aktivitetin fizik. Priten përmirësime të vogla në situatën financiare, por investoni me kujdes.

Binjakët
Të lindur më: 21 Maj – 20 Qershor
Dita është e favorshme për të njohur njerëz të rinj ose për të forcuar lidhjet ekzistuese në dashuri. Në punë, do të ketë zhvillime pozitive dhe mund të merrni një propozim interesant. Shëndeti kërkon pak më shumë vëmendje ndaj ushqimit dhe pushimit. Financat do të kenë rritje të vogël, por mos e teproni me shpenzimet.

Gaforrja
Të lindur më: 21 Qershor – 22 Korrik
Në dashuri, një surprizë e këndshme nga partneri do ju bëjë të ndiheni të vlerësuar. Në vendin e punës, përqendrohuni te detyrat kryesore dhe shmangni konfliktet me kolegët. Shëndeti është i qëndrueshëm, por mos harroni të hidratoheni mjaftueshëm gjatë ditës. Financat janë të balancuara, por këshillohet të kurseni për të ardhmen.

Luani
Të lindur më: 23 Korrik – 22 Gusht
Sot mund të keni një bisedë të thellë me partnerin që do të sqarojë disa keqkuptime të mëparshme. Në aspektin profesional, një koleg mund t’ju kërkojë ndihmë, dhe bashkëpunimi do të sjellë rezultate të mira. Shëndeti është në gjendje të mirë, por kushtojini vëmendje ushqyerjes së shëndetshme. Financat janë në nivel të kënaqshëm, por mos merrni vendime të nxituara për investime.

Virgjëresha
Të lindur më: 23 Gusht – 22 Shtator
Në jetën sentimentale, ndjeni nevojë për më shumë vëmendje nga partneri, ndaj mos hezitoni të shprehni ndjenjat tuaja. Në punë, një detyrë e re kërkon krijimtari dhe përkushtim të plotë. Kujdesuni për shëndetin duke shmangur stresin e tepërt dhe duke bërë aktivitete relaksuese. Financat paraqiten stabël, por është mirë të planifikoni buxhetin me kujdes.

Peshorja
Të lindur më: 23 Shtator – 22 Tetor
Dashuria merr një drejtim të ri, sidomos për ata që janë të lirë, ndërsa të lidhurit do të ndjejnë ngrohtësi të veçantë në marrëdhënie. Në punë, mund të merrni një lajm të mirë që lidhet me një avancim ose bonus. Shëndeti është i mirë, por mos neglizhoni pushimin mjaftueshëm. Financat janë në përmirësim, por mos i shpërdoroni të ardhurat.

Akrepi
Të lindur më: 23 Tetor – 21 Nëntor
Marrëdhëniet romantike janë të qeta, por kërkohet më shumë komunikim për të shmangur keqkuptimet. Në fushën profesionale, sot do të ndiheni të motivuar dhe do të arrini të përfundoni me sukses detyra të rëndësishme. Shëndeti është i mirë, por mos e teproni me punën. Financat janë të qëndrueshme, por është momenti i duhur për të menduar për kursime afatgjata.

Shigjetari
Të lindur më: 22 Nëntor – 21 Dhjetor
Sot do të përjetoni emocione të bukura në dashuri, veçanërisht nëse planifikoni një takim të veçantë. Në punë, do të keni mundësi të prezantoni idetë tuaja dhe të fitoni respektin e kolegëve. Kujdesuni për shëndetin, veçanërisht për sistemin tretës. Financat janë në gjendje të mirë, por bëni kujdes me shpenzimet impulsive.

Bricjapi
Të lindur më: 22 Dhjetor – 19 Janar
Në jetën në çift, mund të lindin disa mosmarrëveshje të vogla, por dialogu i hapur do të ndihmojë në zgjidhjen e tyre. Në aspektin profesional, pritet një sfidë që do të kërkojë përqendrim maksimal. Shëndeti është i mirë, megjithatë mos harroni të bëni një pauzë gjatë ditës. Financat janë të qëndrueshme, por mos bëni blerje të mëdha pa menduar mirë.

Ujori
Të lindur më: 20 Janar – 18 Shkurt
Sot do të ndjeni mbështetjen e partnerit dhe do të kaloni momente të bukura së bashku. Në punë, një detyrë e përfunduar me sukses do ju sjellë vlerësime nga eprorët. Shëndeti është pozitiv, por kushtojuni rëndësi aktivitetit fizik. Financat janë të sigurta, por një shpenzim i paparashikuar mund të shfaqet në fund të ditës.

Peshqit
Të lindur më: 19 Shkurt – 20 Mars
Në dashuri, dita është e mbushur me pasion dhe mirëkuptim, sidomos për ata që janë në një lidhje të gjatë. Në punë, idetë tuaja do të vlerësohen dhe mund të merrni një ofertë interesante për bashkëpunim. Shëndeti është i mirë, por mos neglizhoni pushimin dhe hidratimin. Financat janë në balancë, por shmangni huazimet apo kreditë e panevojshme.

The post Horoskopi 21 Korrik, ja çfarë kanë parashikuar yjet për ju appeared first on Albeu.com.

Qipriotët grekë dhe turq shënuan të dielën 51-vjetorin e pushtimit të Qipros nga Turqia në vitin 1974, një ngjarje që ndau ishullin dhe mbetet një burim tensioni midis partnerëve të NATO-s, Greqisë dhe Turqisë.

Sirenat e sulmeve ajrore u dëgjuan në pjesët jugore të Qipros, të populluara nga grekët qipriotë, në orën 5:30 të mëngjesit, koha e saktë kur trupat turke zbarkuan në bregdetin verior në një ndërhyrje ushtarake të shkaktuar nga një grusht shteti i shkurtër i frymëzuar nga Greqia.

Presidenti turk, Tayyip Erdogan, pritej të merrte pjesë në festimet në Qipron veriore, një shtet i shkëputur i njohur vetëm nga Ankaraja.

Presidenti i Qipros, Nikos Christodoulides, mori pjesë në një shërbim përkujtimor në jug për të përkujtuar më shumë se 3,000 njerëzit që vdiqën në pushtimin turk, i cili gjithashtu dëboi dhjetëra mijëra qipriotë grekë nga shtëpitë e tyre.

“Pavarësisht atyre që duan që ne të harrojmë, ne nuk do të harrojmë kurrë dhe as nuk do të lëshojmë asnjë pëllëmbë tokë”, tha Christodoulides, duke i quajtur festimet në veri “të turpshme”.

Përpjekjet për të ribashkuar Qipron si një federatë bizonale dhe bikomunale kanë dështuar vazhdimisht për shkak të mosbesimit të thellë dhe vizioneve konkurruese për të ardhmen e ishullit.

Përpara pushtimit, përplasjet midis qipriotëve turq dhe grekë bënë që qipriotët turq të tërhiqeshin nga një qeveri me ndarje pushteti dhe nxitën vendosjen e paqeruajtësve të OKB-së në vitin 1964. Udhëheqësi turk qipriot, Ersin Tatar, tha se pushtimi kishte sjellë “paqe dhe qetësi” në ishull pas “viteve më të errëta” për turqit qipriotë.

“Qëllimi i tyre (i grekoqipriotëve) ishte të shkatërronin qipriotët turq”, tha ai në një video-adresim të postuar në X. Konflikti që po zien ndërlikon ambiciet e Turqisë për të nxitur lidhje më të ngushta me Bashkimin Evropian, anëtare të të cilit janë, si Qiproja, ashtu edhe Greqia.

The post Dy anët e kundërta të Qipros/ Grekët vajtojnë, turqit festojnë përvjetorin e pushtimit që ndau ishullin appeared first on Albeu.com.

Ankthi është një shqetësim i zakonshëm, shpesh i lidhur me ngjarjet e përditshme të jetës dhe i perceptuar si kalimtar. Por gjithnjë e më shumë studime tregojnë se, nëse neglizhohet, ankthi mund të ketë pasoja afatgjata mbi shëndetin mendor dhe funksionet njohëse. Sipas kërkimeve të fundit, veçanërisht në rastet e ankthit kronik, ai mund të rrisë rrezikun për zhvillimin e demencës në moshë të thyer.

Nuk bëhet fjalë për një dënim të pashmangshëm: ndërhyrja e hershme ndaj ankthit mund të ndihmojë në parandalimin e dëmeve që ai mund të shkaktojë në të ardhmen. Shkencëtarët dyshojnë se ankthi ndikon negativisht te shëndeti kardiovaskular, një faktor tashmë i njohur që rrit rrezikun për demencë. Po ashtu, kortizoli, hormoni i stresit, mund të dëmtojë pjesë të trurit që lidhen me kujtesën dhe aftësitë njohëse.

Gjendjet e ankthit shpesh bashkëjetojnë me probleme të tjera si depresioni apo çrregullimet e gjumit, të gjitha të njohura për ndikimin e tyre në rënien e funksioneve njohëse. Kjo e bën të vështirë ndarjen e një faktori të vetëm shkaktar, por përforcon idenë e një efekti të kombinuar nga disa probleme fizike dhe mendore që veprojnë së bashku.

Në disa raste, ankthi mund të jetë shenja e parë paralajmëruese e një procesi neurodegjenerativ që ka nisur. Prandaj, nëse konfirmohet lidhja e ankthit me demencën, kjo mund të hapë rrugën për strategji të reja parandaluese, ku shëndeti mendor të marrë një rol qendror në luftën kundër sëmundjeve neurodegjenerative.

Sipas ekspertëve, ‘screening’-u i ankthit rreth moshës 40 vjeç mund të ndihmojë për të identifikuar individët më të rrezikuar. Trajtimi i ankthit përfshin shpesh një qasje të kombinuar: terapi psikologjike (si terapia konjitive-biheviorale), medikamente dhe ndryshime të stilit të jetesës. Ndër ndërhyrjet më të rëndësishme janë aktiviteti fizik, meditimi dhe përfshirja më e madhe në jetën sociale.

Të kujdesesh për ankthin sot, do të thotë të investosh në shëndetin e trurit për të ardhmen.

The post A është ankthi një faktor i fshehur rreziku për demencën? Ja çfarë thonë studimet appeared first on Albeu.com.

Shtëpia e Bardhë duket se po shpreh shqetësime në lidhje me Benjamin Netanyahun pas sulmeve të Izraelit në Siri. Siç raportohet zyrtarë të lartë amerikanë e kanë përshkruar kryeministrin si të çmendur dhe një fëmijë që nuk dëshiron të sillet siç duhet.

“Benjamin Netanyahu po sillet si një i çmendur. Ai po bombardon gjithçka, gjatë gjithë kohës. Kjo mund të minojë planet e Donald Trump”, tha një zyrtar i Shtëpisë së Bardhë për agjencinë amerikane të lajmeve.

Izraeli kreu sulme ndaj trupave siriane dhe ndërtesave të rëndësishme në Damask të mërkurën, pasi akuzoi forcat qeveritare për vrasjen e dhjetëra njerëzve në qytetin druz të Sweidës.

“Ndihet sikur çdo ditë po ndodh diçka e re. Çfarë dreqin?” tha një zyrtar i dytë i lartë amerikan për të njëjtën media, pas një sulmi me tank izraelit në kishën e vetme katolike të Gazës, i cili vrau tre persona dhe plagosi 10 të tjerë.

Pas sulmit në kishë Trump pati një telefonatë me Netanyahun dhe i kërkoi atij të lëshonte një deklaratë duke shprehur keqardhje për incidentin. Sekretarja e shtypit e Shtëpisë së Bardhë, Caroline Levitt, u tha gazetarëve se reagimi i Trump ndaj incidentit nuk ishte pozitiv.

Sipas të njëjtit raport, i dërguari special i SHBA-së për Sirinë, Tom Barak, i kërkoi Izraelit të martën të ndalonte sulmet e tij ndaj Sirisë për të lënë hapësirë për diplomaci. Megjithatë, Izraeli u pajtua, të mërkurën IDF kreu sulme të gjera në Siri, duke përfshirë selinë ushtarake dhe pranë pallatit presidencial.

“Bombardimet në Siri e habitën presidentin dhe Shtëpinë e Bardhë. Presidentit (Trump) nuk i pëlqen të ndezë televizorin dhe të shohë bomba që bien mbi një vend në të cilin ai kërkon paqe dhe për të cilin bëri një njoftim historik se do të ndihmojë në rindërtimin e tij”, thuhet se i tha një zyrtar tjetër agjencisë së lajmeve.

The post Sulmet në Siri/ Shtëpia e Bardhë: Netanyahu po sillet si një i çmendur! appeared first on Albeu.com.

Një shkëmbim i pazakontë videosh në rrjetet sociale ka rikthyer në vëmendje tensionet e heshtura mes Egli Takos dhe familjarëve të Gjestit, me të cilin ajo pati një raport të afërt gjatë qëndrimit në “Big Brother VIP Albania 4”.

Gjithçka nisi kur Egli publikoi një video në Instagram, ku shihet duke mbajtur në dorë një lodër të quajtur “Labubu”.Ajo pyet ndjekësit:

Ju kujton dikë?

Kjo deklaratë e shkurtër u interpretua menjëherë nga fansat si një thumbim i drejtpërdrejtë ndaj Gjestit, duke ngritur dyshime për një përçarje apo tension mes tyre.

Nuk kaloi shumë dhe erdhi reagimi. Motra e Gjestit, Blerina, postoi një video ku shfaqet me një lodër në formë gomari dhe e shoqëron me fjalinë:

Çka është kjo? -dhe më pas shton: Sa njeriu është si ky -një koment që u pa nga ndjekësit si një përgjigje e koduar dhe ironike ndaj postimit të Eglit.

Megjithëse askush nuk ka përmendur emra konkretë, postimet kanë mjaftuar për të ndezur diskutimet në rrjet.

Fansat janë përfshirë në analiza të detajuara për të zbuluar kuptimin pas çdo fjale dhe veprimi, duke e kthyer këtë “luftë lodrash” në një betejë virtuale të nënkuptuar.

Në mungesë të një reagimi të qartë nga ana e Eglit apo Gjestit, publiku vazhdon të lexojë mes rreshtash, ndërsa simbolika e lodrave duket se është bërë mjeti i fundit për të shprehur thumba dhe emocione të fshehura.

The post Egli Tako dhe motra e Gjestit ndezin rrjetin me video thumbuese? Një ‘luftë lodrash’ në rrjetet sociale? appeared first on Albeu.com.

Një qytetarë ka denoncuar se kush e privatizoi bazën ushtarake të Porto Palermos. Denoncimi i qytetarit vjen vetëm disa javë pasi JOQ denoncoi me pamje se si Porto Palermos i kishte dalë pronari, pasi pushuesve u ishte bllokuar rruga me një portë të hekurt që i ndalonte të hynin brenda. Përmes denoncimit të bërë tek JOQ, qytetari bën me dije se “truri” i gjithë këtij organizmi është Vojo Peçi, ish-shef i Komisariatit të Kuçovës dhe vëllai i Tërmet Peçi, ish-kryebashkiak i Tepelën dhe prej shtatorit që vjen deputet i PS-së në Kuvend.

Qytetari në denoncimin e tij shkruan se po i sjell në vëmendje kyreministrit katastrofën që po ndodh në një zonë të mbrojtur dhe ushtarake. Duket se Vojo ka shfrytëzuar njohjet e vëllait të tij, për të zaptuar bazat ushtarake të Porto Palermos, dhe për t’i kthyer nga zona të mbrojtura, në zona me shfrytëzim për qëllime përfitimi. Denoncuesi habitet se si autoritetet nuk kanë marrë asnjë masë ndaj zaptuesve të kësaj zone ushtarake, e cila dikur ka qenë një plazh i paprekur, ashtu sikur e ka krijuar natyra.

Qytetari në denoncimin e tij shtron edhe pyetjen se “si ka mundësi gjithë ky tolerim për këta horra”?

Denoncimi i Plotë:

Pershendetje JOQ! Doja ti sillja ne vemendje kryeministrit katastrofen qe ndodh ne nje zone te mbrojtur dhe ushtarake. Ne zonen e Porto Palermos perkatesisht ne daljen e tuneleve te bazes ushtarake eshte ndertuar nje lokal, ku me pare kishin bllokuar dhe rrugen me porte hekuri qe ju e keni hedhur si denoncim. Si ka mundesi gjithe ky tolerim per keta horra. Vojo Peci e ka ndërtuar. Po ta shikosh me vemendje kane vendossur dhe disa cadra dhe shezlong. Eshte gjiri i Porto Palermos dhe ai vend atje ka qene plazh i virgjër. Eshte i njejti rast me mbylljen e portave qe keni denoncuar. Vojo eshte vellai i Termetit.

The post Vëllai i Tërmet Peçit privatizon bazën ushtarake të Porto Palermos/ Qytetari: Si ka mundësi gjithë ky tolerim për këta horra appeared first on Albeu.com.

Qeveria thotë se Diaspora mbetet prioritet i punës së saj, jo vetëm me të drejtën e votës së mundësuar për herë të parë në zgjedhjet e 11 majit, por me një plan për t’i ftuar shqiptarët e larguar jashtë të rivijnë në atdhe.

Në strategjinë kombëtare për migracionin, parashikohen lehtësim politikash për rikthimin dhe riintegrimin e emigrantëve në shoqërinë shqiptare.

Në dokumentin e punuar në bashkëpunim edhe me Organizatën ndërkombëtare të migracionit theksohet një projekt që pritet të nis në 2026 si një fushatë e gjerë informuese për mundësitë e punësimit në vend, e cila do të zgjas katër vite me institucione përgjegjëse Ministrinë e Ekonomisë dhe atë të Jashtme dhe përfshirjen gjithashtu të Ambasadave dhe shoqatave me vlerë rreth 70 milionë lek.

Së pari, planifikohet që deri në 2026 të jetë kryer identifikimi i kapaciteteve intelektuale dhe profesionale të emigrantëve shqiptarë. Mbi 56 milionë lek mendohen të shkojnë po ashtu për krijimin e stimujve për të promovuar kthimin e emigrantëve përkohësisht ose përgjithmonë, me qëllim transferimin e aftësive të fituara jashtë dhe për të sjellë vlera të reja kulturore në vendlindjen e tyre.

Më tej vlerësohet e nevojshme anketimi dhe konsultimi vjetor me sipërmarrësit shqiptarë që qëndrojnë jashtë vendit, për të matur nivelin e interesit të tyre për investime në Shqipëri dhe për të identifikuar pengesat kryesore që hasin institucionalisht.

E për ata që janë rikthyer kërkohet monitorimi i tyre në tregun e punës si dhe raportimi periodik në lidhje me nevojat që paraqesin në zyrat e punës, me qëllim përmirësimin e programeve të punësimit.

The post Qeveria premton të harxhojë mbi 56 milionë lekë për të promovuar kthimin e emigrantëve në Shqipëri appeared first on Albeu.com.

Pas disa ditësh heshtje, këngëtarja e njohur shqiptare Dafina Zeqiri ka reaguar për herë të parë pas lindjes së djalit të saj, Daskan.

Në një postim të ndjerë në rrjete sociale, Dafina shprehet mirënjohëse për dashurinë e marrë nga fansat, miqtë dhe familjarët.

Artistja dhe partneri i saj, Kreshnik Gjergji, janë bërë prindër për herë të parë pak ditë më parë, ndërsa emri i djalit, Daskan, ka tërhequr vëmendjen për origjinalitetin dhe ndjeshmërinë që mbart.

Postimi i plotë i Zeqirit:

“Faleminderit prej zemrës

Ju falenderoj krejt juve per dashnine e madhe e mireseardhjen qe ia keni bo djalit tone Daskan Gjergji n’kete bote.

Me u bo nane osht si me bo update n’krejt jeten shpirt, trup, zemer, karriere… gjithçka ndjehet ma ndryshe, ma thelle. Jam super e emocionume per gjithqka qe po vjen.

Nder e respekt per krejt nanat qe sakrifikojne gjithqka. Ju jeni superheroina e keaj bote.

Edhe per baballaret qe qendrojne para grave te tyne, si mbeshtetja ma e madhe ju perulem.

Burrit tem, faleminderit qe je shkrmbi jem. E di qe ki me qene shembulli ma i mire per djalin tone.

Ju du krejtve shume

Le ta nisim kete kapitull te ri bashke”.

The post “Një kapitull i ri nisi me Daskan”/ Dafina Zeqiri rrëfen për herë të parë ndjesitë pas ardhjes në jetë të djalit appeared first on Albeu.com.

Albert Pashaj, pronari i hotelit në Ksamil i cili u dhunua dje me sende të forta tha përmes një interviste televizive se problematika ka nisur që në më 15 nëntor të vitit të shkuar kur kanë nisur aplikimet për ndarjen e plazheve. Pashaj gjithashtu ka deklaruar se është kërcënuar vazhdimisht nga Agim Taraj dhe se para një muaj ai është dhunuar dhe se për këtë ngjarja është bërë një kallëzim.

Ai më tej ka theksuar se ndarjen e plazheve duhen ta bënte bashkia dhe Agjencia e Bregdetit, por që këto institucione vazhdimisht kanë luajtur ping-pong me njëri-tjetrin. Gjithashtu Pasha bëri me dije se ai ka shkuar dhe tek kryebashkiaku dhe se ai i ka thënë të marrë vetëm 20 çadra ndërsa të tjerat t’i marrë Taraj. Ndër të tjera Pashaj deklaroi se nëse drejtësia nuk bën punën e vet, ai do të vetëmbrohet.

Pashaj: Jam i goditur në kokë, jam i çarë. Problematika nuk është se ka filluar dje. Jo vetëm dhuna fizike ndaj meje dhe familjes, por ka disa muaj. Që kur janë hapur aplikimet e plazheve në 15 nëntor, jam kërcënuar nga Agim Taraj, indirekt dhe direkt që të tërhiqem dhe të mos aplikoj. I kam thënë jo se mua ma jep ligji, kam investuar disa miliona euro nuk mund të kem hotel, njësi akomoduese kur e jep dhe ligji dhe të mos kemi shezlonge.

Këto presione kanë vijuar vazhdimisht. Kam marrë aprovimin nga Agjencia Bregdetare, janë aprovuar 52 çadra për strukturën akomoduese se plotësoj të gjithë kushtet. Kur merr aprovimin, më kanë thënë të paraqitem në bashki, të bëj pagesën e qirasë dhe të vijë bashkia të bëjë matjet për vendosjen e çadrave. Kam shkuar atje dhe bashkia më ka thënë jo prit sot dhe jo prit nesër. Pastaj më nxori që nuk merr aq çadra sa ke marrë ti dhe subjekti tjetër Agim Taraj, që nuk ka strukturë akomoduese nuk ka fare hotel.

I jam drejtuar Agjencisë së Bregdetit dhe i kam thënë që bashkia nuk më aprovon për këtë arsye. Ata më thonë që bashkia ka detyrë të bëjë matjet në terren. Bashkia nuk erdhi kurrë dhe luante ping pong me Agjencinë e Bregdetit. Kam vënë në dijeni Kumbaron 2-3 herë. Më 6 qershor ka ardhur Taraj dhe në sytë e 50-60 turistëve më ka dhunuar , kam bërë kallëzim dhe çështjen e ka prokuroria. Familja, nusja bashkë me fëmijët ka shkuar për të bërë plazh, në plazhin e ashtuquajtur publik se nga momenti që bashkia nuk erdhi të më miratonte planin dhe unë nuk plotësova dokumentet që t’i dërgoja tek Agjencia Bregdetare dhe pasi merr aprovimin nga Agjencia e Bregdetit duhet të vijë bashkia.

Unë nuk e bëra se bashkia nuk erdhi kurrë dhe u dogjën afatet. Agjencia e Bregdetit më dërgon mesazh që t’i nuk plotësove dokumentet dhe ne nuk të kualifikuam. Ky nuk ishte faji im, ishte faji i bashkisë. Më parë këtë plazh e ka shfrytëzuar Taraj. Tani kam hotelin, ndërsa Taraj ka ndërtesat në krah, disa objekte të vogla. Mua ma jep ligji, nuk kam kërkuar që Taraj të zhvendosej, por që një pjesë ta marr unë se ma jep ligji. Bashkia dhe Agjencia e Bregdetit duhet ta bënin këtë ndarje dhe nuk e kanë bërë kurrë.

I kam dërguar disa mesazhe ministres Kumbaro, nuk më ka kthyer përgjigje. Kam takuar dhe kryebashkiakun në zyrë dhe më ka thënë merr 20 çadra dhe lërja atij tjetrit. Bashkia e Sarandës përveç se nuk më ka nisur asnjë dokument me shkrim që të më thotë për këtë arsye se pse nuk e përfitoj. Gojarisht më tha merr 20 çadra dhe lërja atij. I thashë cila është arsyeja? Më tha lërja atij. Bashkia na ka lënë në baltë. Taksën e paguajmë. Nëse drejtësia do të bëjë punën e vet, unë ia lë drejtësisë. Nëse drejtësia nuk do ta bëjë punën e vet, atëherë unë do të vetëmbrohem se s’kam se çfarë bëj tjetër.

The post “Jam kërcënuar prej muajsh”/ Dhuna ndaj pronarit të hotelit në Ksamil, Albert Pashaj: Nëse nuk vepron drejtësia do vetëmbrohem appeared first on Albeu.com.

Zhytësi shqiptar nga Kosova, Shkëlzen Goqi, është skualifikuar nga gara që u zhvillua në “Urën e Vezirit” në Malin e Zi. Shkëlzen Goqi u skualifikua nga gara pasi bëri simbolin e shqiponjës me duar ndërsa ky veprim u interpretua si provokues nga organizatorët.

Shkëlzen Goqi është i njohur për kërcimet nga lartësia ndërsa në momentin që bëri shqiponjën u duartrokit dhe u shoqërua më fishkëllima nga publiku, por juria vendosi skualifikimin.

Sekretari i Sportit në Podgoricë, Darko Nikçeviq, mbështeti skualifikimin e shqiptarit duke theksuar se “rregullat e manifestimit ndalojnë qartë shfaqjen e simboleve dhe porosive të papërshtatshme politike, kombëtare apo të natyrave të tjera”.

Në lidhje me rastin ka folur edhe vetë Shkëlzen Goqi, i cili është shprehur se vendimi për skualifikimin e tij është i padrejtë.

Goqi shprehet se përfaqëson Kosovën në Podgoricë dhe se nuk është prezantuar si garues i Kosovës, por vetëm kanë thënë se është një garues nga Gjakova.

Sipas disa mediave, fituesi i garës, Evald Krniq, ishte një nga iniciatorët për skualifikimin e shqiptarit Shkëlzen Goqi nga gara.

The post VIDEO/ Bëri simbolin e shqiponjës, sportisti nga Kosova skualifikohet nga gara e zhytjes në Malin e Zi appeared first on Albeu.com.

Zjarri përfshin një sipërfaqe në malin e Moravës, pjesë e fshatit të Dishnicës.

Zjarri ka përfshirë fillimisht një sipërfaqe me shkurre por në afërsi ndodhet pylli dhe ka depërtuar edhe brenda tij. Sipas informacioneve, zjarri mendohet të jetë i qëllimshëm, ndërsa policia ka shoqëruar një person në komisariat.

Personi i shoqëruar dyshohet se e ka rast të përsëritur zjarrvënien, ndërsa mund të jetë me probleme të shëndetit mendor.

Forcat zjarrfikëse do të kthehen e më pas do të ndërhyjnë ditën e nesërme prej mëngjesit për të izoluar flakët e për të fikur zjarrin totalisht.

The post Zjarr i qëllimshëm në malin e Mavrovës, flakët depërtojnë brenda pyllit appeared first on Albeu.com.

Një javë e nxehtë parashikohet të përfshijë Kosovën ditët në vijim. Kjo situatë vjen si pasojë e masave të nxehta të ajrit të ardhura nga pjesa e Afrikës Veriore.

Këto masa ajrore, të cilat karakterizohen nga temperatura shumë të larta dhe përmbajtje të ulët të lagështisë, janë rezultat i qarkullimeve atmosferike që favorizojnë zhvendosjen e ajrit tropikal drejt veriut.

Ky fenomen meteorologjik shfaqet shpesh gjatë muajve të verës dhe zakonisht shoqërohet me rritje ekstreme të temperaturave, ulje të ndjeshme të reshjeve, si dhe rrezik të shtuar për thatësirë dhe zjarre në zona pyjore dhe fusha bujqësore.

Temperaturat mund të tejkalojnë lehtësisht vlerat mesatare sezonale, duke shkaktuar valë të nxehti që ndikojnë negativisht në shëndetin publik.

Sipas IMHK indeksi UV (ultraviolet) do të jetë i lartë, prandaj këshillohet që nga ora 9-17 të kufizohet ekspozimi në rrezet të diellit, sidomos personat në moshë, fëmijët dhe personat me sëmundje kronike.

The post I nxehti afrikan, Kosova përballet me temperatura të larta javën e ardhshme appeared first on Albeu.com.

Adil Veli është 54-vjeçari i cili u plagos mbasditen e sotme në lagjen nr.4 të qytetit të Sarandës. 54-vjeçari është transportuar drejt Spitalit të Sarandës dhe ende nuk dihet gjendja e tij shëndetësore.

Gjithashtu bëhet me dije se Veli ka qenë më parë efektiv policie. Megjithatë ende nuk dihen motivet e kësaj ngjarjeje. Ndërkohë Forca të shumta policie ndodhen në vendin e ngjarjes.

The post EMRI/ Të shtënat me armë zjarri në Sarandë, identifikohet i plagosuri, 54-vjeçari një ish-efektiv policie appeared first on Albeu.com.

Politikanë të së majtës, të djathtës, oligarkë dhe bosë medias rezultojnë të implikuar në aferën 20-vjeçare Bankers, duke futur duart në pasurinë nëntokësore të shqiptarëve. Personazhe të politikës dhe biznesit kanë përfituar miliona euro nga kompania e shfrytëzimit të naftës, në formë korruptive, duke ndikuar nga ana tjetër në fryrjen e shpenzimeve të Bankers, përfitimin e padrejtë të rimburimit të TVSH dhe shmangien e taksave.

Disa personazhe të tjerë janë implikuar në pastrimin e parave të Leonidha Çobës, ish administrator i Bankers, i vizatuar tashmë si hajduti i shekullit, me pagë deri në 1.7 milionë euro në vit, kartel kompanish fantazmë, 100 milionë euro të vjedhura me faturime fiktive, vila, ferma, sera, aksione dhe thasë me para.

I tillë është rasti i ish ministrit të Jashtëm, Besnik Mustafaj, me të birin Dardan Mustafaj, të përfshirë në faturime fiktive me Leonidha Çobon, ish administrator i Bankers në periudhën 2010-2015, ideator i zhvatjes 5.5 miliardë euro nga Bankers. Sipas dosjes së Prokurorisë së Fierit, para se Leonidha Çobo të largohej nga Bankers në maj 2019, ka hapur subjektin ‘Leonidha Çobo’ person fizik, duke pastruar rreth 1.6 milionë euro.

Mes kompanive për të cilat Loni i Bankers ka lëshuar fatura të dyshuara si fiktive është edhe kompania H2015 shkpk, për të cilën Çobo ka lëshuar fatura me vlerë rreth 300 mijë euro. Pronari kryesor i kompanisë H2015, me objekt shërbime konsulence, rezulton Besnik Mustafaj me 75.70 % të aksioneve, ndërsa 4.3 % të aksioneve i ka i biri Dardan Mustafaj.

Nuk kuptohet se çfarë shërbimi do t’i ofronte Loni i Bankersit ish ministrit të Jashtëm, Besnik Muftafaj, figurë e njohur e PD-së, kur dy kompanitë kanë objekt pothuajse të njëjtë dhe Çobo nuk ka çfarë ofron, pasi nuk ka asnjë punonjës, pra kompania e tij është vetëm në letra. Ka dyshime të forta se Çobo mund t’i ketë dhënë cash qindra mijëra euro Dardan Malajt, i cili një pjesë ia ka kthyer me faturime fiktive.

Nga verifikimet e deritanishme rezultojnë rreth 50 personazhe të politikës, biznesit, medias, sekserë dhe njerëz të drejtësisë të përfshirën mashtrimin më të madh në historinë e shtetit shqiptar. Alket Hyseni, Besnik Mustafaj me të birin, Endri Puka, Behar Çukaj, Leonidha Çobo, Artur Çobo, Antigoni Çobo, Frident Kuqi, Ardit Kero, Flavia Capo, Kledi Xhani, Doina Goga, Anila Denaj, Baki Sinaj, Fatos Sinaj, Idajet Ismailaj etj., janë vetëm disa nga personazhet e përfshirë./ Prapaskena

The post Besnik Mustafaj me të birin të përfshirë në pastrim parash me Lonin e Bankers me faturime fiktive appeared first on Albeu.com.

Një sherr ka ndodhur pasditen e sotme në qytetin e Shkodrës. Bëhet me dije se shtetasi V.D., ka goditur me thikë për motive të dobëta, Pjetër Guralecin, 33 vjeç. Më pas 33-vjeçari është dërguar në spital dhe ndodhet jashtë rrezikut për jetën. Ndërkohë grupi hetimor ndodhet në vendngjarje dhe po punon për sqarimin e rrethanave të saj. Po ashtu shërbimet e Policisë vijojnë kontrollet për kapjen e autorit të dyshuar.

Njoftimi i policisë:

Shkodër / Informacion paraprak. Rreth orës 18:30, në sheshin “Prek Cali”, gjatë një konflikti për motive të dobëta, shtetasi V. D. dyshohet se ka goditur me mjet prerës (thikë) shtetasin P. G., 33 vjeç, i cili ndodhet në kujdesin e mjekëve, jashtë rrezikut për jetën.

Grupi hetimor ndodhet në vendngjarje dhe po punon për sqarimin e rrethanave të saj. Shërbimet e Policisë vijojnë kontrollet për kapjen e autorit të dyshuar.

The post Sherr me thika në Shkodër, plagoset 33-vjeçari, dërgohet me urgjencë në spital appeared first on Albeu.com.

Një ngjarje e rëndë ka ndodhur sot në Shëngjin, ku një 23-vjeçar dyshohet se ka rënë nga ballkoni aksidentalisht.

23-vjeçari me banim në Bruksel është transportua në Spitalin e Traumës në Tiranë, për ndihmë më të specializuar mjekësore.

“Rreth orës 17:40 në ambientet e një hoteli në Shëngjin, dyshohet se ka rrëshqitur aksidentalisht dhe ka rënë nga lartësia (ballkoni), shtetasi R. I., 23 vjeç, banues në Burrel, pushues në Shëngjin. 23-vjeçari është transportua në Spitalin e Traumës në Tiranë, për ndihmë më të specializuar mjekësore”, njofton policia.

Grupi hetimor po punon për sqarimin e plotë të rrethanave të rastit.

The post Ishte me pushime në Shëngjin, 23-vjeçari rrëshqet dhe bie aksidentalisht nga ballkoni i hotelit appeared first on Albeu.com.

Kaosi politik në Kosovë nuk është as rastësi dhe as paaftësi, por një situatë e krijuar me qëllim nga partitë politike për të mbrojtur interesat dhe pushtetin e tyre. Kështu u shpreh për “Syri Tv” akademiku Nexhmedin Spahiu i cili theksoi se qytetarët janë të vetmit që humbin nga ky kaos institucional.

Sipas tij, mazhoranca dhe opozita po e mbajne peng vendin për pazare dhe llogari personale. Sakaq, ai hodhi akuza ndaj Gjykatës Kushtetuese në Kosovë duke e bërë pjesë të bllokadës. Spahiu deklaroi se kriza po përdoret si mjet që disa të qëndrojnë në postet që janë edhe pa legjitimitet politik.

“Ngërçi politik në Kosovë i intereson të gjithëve, përveç qytetarëve kosovarë, të cilët paguajnë taksa për shërbime që nuk i marrin. Si pasojë e kësaj situate, as Parlamenti, as Qeveria, as Presidentja dhe as Gjykata Kushtetuese nuk e bëjnë punën e tyre, sepse të gjithëve u leverdis kjo gjendje kaosi. Të gjithë shohin interesin e tyre në këtë situatë, dhe në një sistem me vlera të dobëta, kjo është përgjigjja për atë që po ndodh sot në Kosovë.

Interesi i partisë në pushtet është që të mbajë një qeveri në detyrë, pasi nuk po arrin të krijojë shumicën e nevojshme parlamentare. Ajo nuk dëshiron të ndajë pushtetin, nuk do që Fatmir Limaj të marrë postin e kryetarit të Kuvendit, dhe për këtë arsye po shfrytëzon një vendim të diskutueshëm të Gjykatës Kushtetuese të vitit [mungon viti], e cila në atë kohë mori një vendim për të mbajtur Thaçin në pushtet, duke e interpretuar se posti i kryetarit të Kuvendit i takon partisë së parë që del nga zgjedhjet, dhe jo asaj që ka shumicën e votave. Vendimi ishte absurd: nëse i takon partisë së parë, përse duhet të votohet? Nëse votohet, duhet ta fitojë ai që merr më shumë vota. Ky vendim absurd ka mbetur peng për Kosovën edhe sot dhe po shfrytëzohet nga Albin Kurti.

Opozita nuk ka interes të bëhet konstituimi i institucioneve, sepse ka frikë se Albin Kurti nuk do të arrijë të formojë qeverinë dhe vendi do të shkojë në zgjedhje të reja – diçka që nuk i leverdis.

Ka edhe aktorë jashtë parlamentit që nuk janë të interesuar për zgjedhjen e institucioneve. Një prej tyre është Presidentja, së cilës i përfundon mandati pas disa muajsh. Duke qenë se ka humbur përkrahjen dhe ka prishur marrëdhëniet me shumicën e spektrit politik, ajo nuk ka asnjë shans të rizgjidhet. Prandaj, e vetmja mundësi që ajo sheh për të qëndruar në post, është krijimi i një ngërçi politik të tillë që do të detyrojë ndërkombëtarët të ndërhyjnë në Kosovë me shpresën se në atë rast do të imponohet si presidente.

Gjykata Kushtetuese kishte mundësinë të korrigjonte vendimin e gabuar të së kaluarës, ta shpallte të pavlefshëm dhe t’i jepte zgjidhje situatës, por edhe aty ekziston një konflikt interesi. Në rast se presidentes i përfundon mandati dhe nuk ka kryetar Kuvendi, detyrën e ushtruesit të presidentit e merr kryetari i Gjykatës Kushtetuese. Kjo është arsyeja pse edhe Gjykatës i leverdis që ngërçi të vazhdojë.

Zgjedhjet lokale nuk rrezikohen, sepse presidentja është ende në mandat deri në përfundimin e tyre, kështu që ato do të mbahen. Ndoshta ato do të ndihmojnë disi në kthjellimin e situatës politike, pasi do të shërbejnë si një matje e forcave reale politike.

Megjithatë, zgjedhjet e parakohshme mbeten një opsion i pashmangshëm për sa kohë situata mbetet e tillë dhe nuk ekziston një vullnet tjetër politik për ta zgjidhur.”-tha Spahiu.

The post Kaosi politik në Kosovë, Spahiu: Ngërç i qëllimshëm për pushtet! Zgjedhjet e parakohshme, opsion i pashmangshëm appeared first on Albeu.com.