Një avion Su-34M i konfiguruar për eksport, i lyer me një ngjyrë kamuflazhi të dallueshme, u vu re në aeroportin Zhukovsky pranë Moskës, gjë që përforcon më tej spekulimet se Rusia po përgatitet për dërgesat e para të atij modeli në Algjeri.

Pamja e avionit, të regjistruara në fillim të kësaj jave, sugjerojnë një përparim të mundshëm në kontratat e eksportit ushtarak të vonuara prej kohësh midis Federatës Ruse dhe Algjerisë.

Në dhjetor të vitit 2019, mediat e specializuara ushtarake algjeriane raportuan përfundimin e kontratave të shumta me Moskën, për një total prej 42 avionësh – duke përfshirë 14 Su 34ME, 14 Su 57E dhe 14 Su 35E – me dërgesa të planifikuara të përfundojnë deri në vitin 2025.

Megjithatë, pushtimi rus i Ukrainës dhe presioni operacional mbi Forcat Ajrore dhe Hapësinore Ruse ngadalësuan zbatimin e programit. Për shkak të humbjeve të luftës dhe rritjes së kërkesës së brendshme, Moska i dha përparësi rinovimit të flotës së saj të avionëve Su-34, duke vonuar më tej afatet e eksportit.

Sipas të dhënave nga grupi i inteligjencës së hapur Oryx, që nga fillimi i agresionit rus kundër Ukrainës, Rusia ka humbur të paktën 35 avionë Su-34 (pesë prej të cilëve janë dëmtuar) dhe një Su-34M. Ky numër i referohet ekskluzivisht humbjeve të konfirmuara vizualisht, kështu që është e mundur që shifra reale të jetë edhe më e lartë.

Su-34ME është një version i përparuar eksporti i avionit sulmues me dy vende, i zhvilluar fillimisht për sulme precize në det të thellë, operacione përgjimi në fushën e betejës dhe sulme ndaj objektivave detare. m.p.

Një ngjarje e rëndë ka ndodhur në fshatin Bogdan të Beratit.

Një 53-vjeçar dyshohet se ka qëlluar me armë gjahu me qëllim për të vrarë një kafshë të egër dhe nga pakujdesia ka plagosur shtetasin A. T., 57 vjeç, i cili si pasojë e plagës së marrë ka ndërruar jetë në spital, shkruan A2.

Njoftimi i policisë:

Rreth orës 21:00, në fshatin Bogdan, Berat, shtetasi Th. K., 53 vjeç, banues në fshatin Bogdan, dyshohet se ka qëlluar me armë gjahu me qëllim për të vrarë një kafshë të egër dhe nga pakujdesia ka plagosur shtetasin A. T., 57 vjeç, i cili si pasojë e plagës së marrë ka ndërruar jetë në spital.

Shtetasi Th. K, është shoqëruar në ambientet e Drejtorisë Vendore të Policisë Berat, për veprime të mëtejshme.

Grupi hetimor ndodhet ne vendngjarje dhe po punon për zbardhjen e plotë të rrethanave të kësaj ngjarje. m.p.

Pas kaosit të krijuar, heqjes së shiritit tē kapitenit, moslargimit dhe operimit, reagon portieri i Barcelonës, Ter Stegen.

Deklarata e Marc-André Ter Stegen:

“Këto muajt e fundit kanë qenë të vështirë për mua, si fizikisht ashtu edhe personalisht. Prioriteti im ka qenë gjithmonë të kthehem në fushë dhe të ndihmoj ekipin.”

“Vendimi për t’iu nënshtruar një ndërhyrjeje kirurgjikale u mor me profesionistë mjekësorë dhe u miratua nga Klubi, me qëllim mbrojtjen e karrierës sime afatgjatë.”

“Ka pasur shumë spekulime të pabaza. Dua të sqaroj se të gjitha nënshkrimet dhe rinovimet u përfunduan para ndërhyrjes sime kirurgjikale. Është e padrejtë të sugjerohet se dëmtimi im është përdorur për të regjistruar të tjerë.”

“Gjithmonë kam vepruar me profesionalizëm dhe respekt. E dua shumë Barçën, këtë qytet dhe tifozët. Angazhimi im ndaj Klubit është absolut.”

“Jam gati të bashkëpunoj me menaxhmentin e Klubit për ta zgjidhur këtë situatë në mënyrë konstruktive.”

“Shumë gjëra mund të kenë ndryshuar, por një gjë nuk do të ndryshojë kurrë: dashuria per Barcelonën. Ju dua, tifozë!”. m.p.

Një zjarr i madh që po përhapet me shpejtësi në veriperëndim të Los Anxhelosit ka shkaktuar evakuime të detyrueshme për mijëra banorë, pasi nxehtësia ekstreme dhe kushtet e thata nxisin përhapjen e tij të shpejtë.

Zjarri, i quajtur Zjarri i Kanionit, shpërtheu të enjten pasdite përgjatë kufirit të qarqeve Ventura dhe Los Angeles.

Më shumë se 2,700 banorëve u është kërkuar të evakuohen, ndërsa 14,000 njerëzve të tjerë u janë dhënë paralajmërime për evakuim, tha Departamenti i Zjarrfikësve i Qarkut Ventura në një deklaratë.

Zjarri është vënë pjesërisht nën kontroll, me 25% të perimetrit të tij nën kontroll që nga e premtja, thanë zyrtarët.

Nxehtësia ekstreme dhe kushtet e thata po i ndërlikojnë përpjekjet për shuarjen e zjarreve. Shërbimi Kombëtar i Motit parashikon që temperaturat të arrijnë në 37.7°C në ditët në vijim.

Zjarri Gifford, flakët më të mëdha aktive në shtet, kanë përfshirë pothuajse 100,000 hektarë dhe po digjen në të gjithë qarqet San Luis Obispo dhe Santa Barbara. m.p.

Një në dy shqiptarë ka një automjet. Të dhënat e INSTAT tregojnë se aktualisht në rrugët e Shqipërisë qarkullojnë mbi 1 milion mjete.

Ndër to, autoveturat përbëjnë 81% të mjeteve gjithsej, të ndjekura nga mjetet për transport të përzier dhe motorët, me nga 5,9% secili.

Vetëm në tremujorin e dytë të këtij viti janë regjistruar për herë të parë 27 mijë mjete, nga të cilat 81% ishin autovetura.

Krahasuar me të njëjtën periudhë të një viti më parë, numri i mjeteve në qarkullim është rritur me 9,6%, duke sjellë jo pak vështirësi në lëvizje dhe fluks trafiku në zonat urbane.

E ndërsa infrastruktura rrugore mbetet e njëjtë, makinat vijojnë të shtohen, kryesisht ato për përdorim personal dhe jo për transport publik. Nga mbi 1 milion automjete që janë në qarkullim, afro 35% i përkasin qarkut të Tiranës. Më pas vjen Durrësi me 13,6%. Ndërkohë, Gjirokastra dhe Kukësi kanë numrin më të ulët të mjeteve, përkatësisht me 2,1% dhe 2,4%. m.p.

Një vatër zjarri është aktivizuar rishtazi në njësinë administrative Cepo të Gjirokastrës mes fshatrave Picar dhe Humelicë.

Në vendngjarje aktualisht kanë mbërritur të gjithë efektivët zjarrfikës të Gjirokastrës me qëllim parandalimin e avancimit të flakëve drejt zonave të banuara. m.p.

Presidenti ukrainas Volodymyr Zelensky tha se këshilltarët e sigurisë nga Ukraina dhe partnerët e saj zhvilluan një bisedë dje, e cila do të vazhdojë edhe sot.

“Këshilltarët e sigurisë folën dje dhe sot vazhdojnë punën e tyre. Andriy Yermak koordinon këshilltarët e udhëheqësve. Ministri i Punëve të Jashtme punon me kolegët në Evropë.

Ne jemi vazhdimisht në komunikim me palën amerikane dhe partnerët tanë, nga ana e tyre, flasin me Shtetet e Bashkuara të Amerikës. Të gjithë janë të bashkuar nga mirëkuptimi se është e mundur të arrihet të paktën një armëpushim dhe gjithçka varet nga presioni i duhur ndaj Rusisë”, – tha Zelensky.

Ai vuri në dukje se vendimi për t’i dhënë fund kësaj lufte, të cilën ata e filluan, duhet të merret në Rusi.

“Rusia nuk i llogarit humbjet njerëzore. Ata bllokojnë të gjitha informacionet në lidhje me humbjet e tyre. Por ata nuk mund ta bllokojnë realitetin objektiv – atë që ndien ekonomia ruse, si ndërpresin operacionet ndërmarrjet ruse, si pëson humbje logjistika ruse. Sanksionet mund të funksionojnë pikërisht ashtu siç na duhen.

Dua të falënderoj të gjithë në botë sot që na ndihmojnë – ndihmojnë në përfundimin e luftës”, shtoi Zelensky. m.p.

Një aksident është shënuar mbrëmjen e kësaj të premteje në vendin e quajtur “Qafa e Koshovicës” në Fier, ku një automjet tip “Benz” ka dalë nga rruga dhe është përmbysur.

Gazetarja Marsela Topi raporton se në mjet udhëtonin katër persona, tre prej të cilëve kanë mbetur të plagosur dhe janë transportuar me urgjencë në spitalin e Fierit për të marrë ndihmë mjekësore.

Policia dhe grupi hetimor ndodhen në vendin e ngjarjes për të zbardhur shkaqet e aksidentit. m.p.

Juxhin Drazhi, një nga anëtarët e grupit të Troplinëve të drejtuar nga Ervis Doçi (i njohur si Visi i Pojës), është prangosur nga Interpoli në Spanjë. Policia Shqiptare ka dalë me njoftim zyrtar dhe konfirmon arrestimin e Drazhit, i lokalizuar nga Interpol Madridi në një vilë luksoze.

34 vjeçari, siç shihet nga pamjet që ka shpërndarë Policia spanjolle, qëndronte në një vilë luksoze me pishinë e shezlongë që kishin pamje të lirë nga gjithë qyteti dhe deti i pafundëm në hoirzont.

Juxhin Drazhi qëndronte në Granada, në Almuñécar, një qytet në bregdetin jugor të Spanjës dhe i njohur për plazhe si Velilla, San Cristobal dhe Del Mar. Shtëpia ku ai qëndronte prej muajsh në arrati ishte në një zonë të izoluar, mbi kodër, që i lejonte të monitoronte përreth. m.p.

#OperacionesGC | Detenido en Almuñecar #Granada un narcotraficante buscado por @INTERPOL_HQ.

Tenía en vigor una orden de búsqueda y detención por las autoridades judiciales de #Albania.
Se encontraba escondido en una vivienda de lujo situada en un paraje aislado y ubicada… pic.twitter.com/fSPUSGtqEO

— Guardia Civil (@guardiacivil) August 8, 2025

Një burrë ka humbur jetën në Greqi të premten, si pasojë e zjarreve të përhapura nga erërat e fuqishme.

Më shumë se 200 zjarrfikës, të mbështetur nga 11 avionë dhe shtatë helikopterë, po i luftojnë zjarret në Keratea, në juglindje të Athinës, tha për televizionin shtetëror ERT, Kostas Tsigkas, kreu i zjarrfikësve grekë.

Ai tha se banorët në disa vendbanime janë evakuuar për shkak të “zjarreve të mëdha” si pasojë e erërat e forta.

Zjarrfikësit gjetën trupin e një të moshuari brenda shtëpisë së tij të djegur në Keratea, ndërsa erërat e forta po ua vështirësojnë punën avionëve cisternë për të vepruar, tha zëdhënësi i shërbimit të zjarrfikësve, Vassilis Vathrakogiannis, në një konferencë për shtyp.

Një gazetar i AFP-së në qytetin e afërt Palaia Fokaia, rreth 45 kilometra në jug të Athinës, pa një shtëpi të përfshihej nga flakët dhe tym të dendur mbi të.

Më herët, një zjarr tjetër në ishullin Kefalonia ishte vënë nën kontroll, sipas autoriteteve lokale, ndërsa situata “është përmirësuar” në gadishullin e Peloponezit, në perëndim të Athinës, njoftoi Vathrakogiannis.

Ministria e Mbrojtjes Civile kishte njoftuar se erërat do të arrinin deri në 88 kilometra në orë, veçanërisht në Egjeun Jugor dhe Detin e Kretës.

Shërbimi Kombëtar Meteorologjik (EMY) tha se erërat do të dobësoheshin pas mesnatës, por Ministria e Mbrojtjes Civile vendosi disa zona në nivelin më të lartë të alarmit për zjarre për të shtunën, përfshirë rajonin e Atikës, ku ndodhet Athina.

Greqia dhe vende të tjera të Mesdheut ndodhen në një zonë që shkencëtarët e quajnë “pikë të nxehtë të zjarreve”, pasi ka zjarre të shpeshta gjatë verave të nxehta dhe të thata.

Franca jugore, e tharë nga thatësira, po përballet aktualisht me zjarrin më të madh në dekada.

Ekspertët thonë se ndryshimet klimatike të shkaktuara nga njeriu po shkaktojnë zjarre më të shpeshta dhe më intensive dhe katastrofa të tjera natyrore. m.p

Gazeta e njohur gjermane “Frankfurter Allgemeine Zeitung” e vlerëson veprën e fundit të Ismail Kadaresë “Kur sunduesit grinden”.

Michael Martens

I rënë në mëshirë të fatit, i përbuzur dhe i përjashtuar, Mihail Bulgakovi, në një letër drejtuar qeverisë sovjetike më 28 mars 1930, kërkoi leje për të braktisur Bashkimin Sovjetik. Ekzistenca e letrës është e dokumentuar. Për atë që thuhet se ndodhi më pas, biografja gjermane e Bulgakovit, Elsbeth Wolffheim, shkruan: “Vetë i Plotfuqishmi (Stalini) kapi telefonin dhe e pyeti Bulgakovin, i cili mbeti i habitur: ‘Ndoshta duhet t’ju lejojmë me të vërtetë të udhëtoni jashtë vendit? Si është puna, u lodhët nga ne?’” I hutuar, Bulgakovi dha një përgjigje për të cilën tha se shpesh ishte penduar: se nuk besonte që një shkrimtar rus mund të jetonte jashtë vendit. Thuhet se Stalini iu përgjigj se do të siguronte që Bulgakovi të merrte një vend pune në Teatrin e Artit të Moskës.

Kështu edhe ndodhi. Bulgakovi u bë asistent regjisori. Thuhet se biseda u zhvillua më 18 prill 1930, katër ditë pas vetëvrasjes së Vlladimir Majakovskit. Wolffheim si burim përmend studjuesen ruse të letërsisë Marieta Çudakova (e ndarë nga jeta në vitin 2021) dhe ditarët e gruas së fundit të Bulgakovit, Jelena Bulgakova. Nëse biseda ndodhi vërtet apo ky është thjesht një tregim nga tregu gjithnjë i gjallë i anekdotave për Stalinin – mbetet e pasigurt. Gjithsesi, ekziston një varg i tërë historish të tipit “Stalini-telefonon-shkrimtarin”, pothuajse një zhanër më vete.

Shkrimtari shqiptar Ismail Kadare, i ndarë nga jeta vitin e kaluar, në veprën e tij të fundit sjell një anekdotë edhe më të njohur se ajo e bisedës së Stalinit me Bulgakovin. Libri i tij i fundit, “Kur sunduesit grinden”, doli në shqip në vitin 2018 (në gjermanisht libri mban titullin “Thirrja” apo “Telefonata”, v.j.). Ky vëllim i hollë, me rreth 170 faqe, sillet vazhdimisht rreth tre minutave nga gjithsej gati 37 milionë minuta të jetës së Boris Pasternakut. Kaq thuhet se zgjati një telefonatë legjendare e Stalinit me shkrimtarin që më vonë do të fitonte çmimin Nobel.

Rrëfimtari i Kadaresë – që pa frikë mund të identifikohet me vetë autorin – e kishte dëgjuar për herë të parë këtë histori në moshën 22-vjeçare, kur ndodhej në Bashkimin Sovjetik si student në Institutin e Letërsisë “Maksim Gorki” në Moskë. Përvojat e asaj kohe ai i përpunoi më vonë në romanin “Muzgu i perëndive të stepës”. Në esenë “Kur sunduesit grinden” ai kthehet sërish aty. Në trembëdhjetë kapituj, që ai i quan “Versione”, Kadare shkruan për sfondin, rrjedhën e mundshme dhe sidomos pasojat e kësaj bisede të famshme midis diktatorit dhe Pasternakut, e cila thuhet se ka ndodhur më 23 qershor 1934.

“Pra, ishte qershori i vitit 1934, Osip Mandelshtami sapo ishte arrestuar. E gjithë Moska fliste për këtë ngjarje, kur më 23 të muajit ra telefoni. Thirrësi ishte Stalini, bashkëbiseduesi i tij Pasternaku”, fillon një nga këto “versione”, bërthama e të cilave mbetet gjithmonë e njëjtë: Stalini e pyet Pasternakun se çfarë mendimi kishte për Mandelshtamin e arrestuar. Ky, i zënë ngushtë, belbëzon se ata u përkisnin rrymave të ndryshme letrare, pra nuk kishte gjë për të thënë. Thuhet se Stalini u zemërua nga mungesa e solidaritetit të Pasternakut me kolegun e tij dhe e përqeshi për frikën, pastaj e mbylli telefonin.
Ngjashmëritë autobiografike në libër janë të dukshme. Janë më shumë sinjale të hapura sesa aluzione. Sepse, kur Kadare shkruan për Stalinin e Bulgakovin, në të vërtetë shkruan edhe për veten dhe Enver Hoxhën, diktatorin e Shqipërisë nga 1945 deri në 1985. Pasternaku mori çmimin Nobel në vitin 1958, por nuk u lejua ta pranonte. Kadare, edhe kur diktatura e Hoxhës dukej e pathyeshme, për vite me radhë u konsiderua si kandidat serioz për çmim dhe me siguri do ta kishte pranuar, por nuk e mori kurrë. Ky çmim është një nyje lidhëse mes të dyve. “Të ishe kandidat për Nobelin do të thoshte të mbaje vulën e një faqeje të rrezikshme”, shkruan rrëfimtari i Kadaresë.

Kadare vuajti nën diktaturën shqiptare, por përfitoi edhe prej saj, duke e kthyer atë në lëndë për një vepër të madhe. Në këtë libër lamtumirës ai e rikthen edhe një herë temën e tij të përhershme – marrëdhënien midis poetit dhe tiranit – një temë e pashtershme. Dikur Lion Feuchtwanger shkruante ode për Stalinin, sot (publicisti djathtist zviceran) Roger Köppel lavdëron Putinin – çdo vrasës masiv e ka pasur rapsodin e vet, qoftë edhe një mediokër. Ndryshe nga propaganduesit shtegtarë nga Perëndimi, Kadare nuk e kishte njohur pushtetin e dhunshëm vetëm nga distanca e sigurt.

Ndoshta ishte pikërisht kjo njohje e pavullnetshme e së keqes që e shtyu të shkruante fjali të sakta si ajo për shkrimtarin në diktaturë që punon në një roman politikisht të rrezikshëm: “Ishte sikur mbaja në kafaz një zog të bukur, por mjaft të rrezikshëm”. Ekzistenca e lektorëve në diktaturë përshkruhet po ashtu si e rrezikshme: “Nëse një libër botohej dhe ndalohej më pas, të pyesnin: ‘Si lektor si të ka shpëtuar ky helm që ka përzier autori?’” Por nëse lektorët vërenin diçka që vetëm atyre u binte në sy, kjo mund të ishte po aq e rrezikshme: “‘Pse kërkove nga autori të hiqte çdo aluzion për xhelozinë e verbër dhe prirjet homoseksuale të sulltanit? Fol! Doje ndoshta që tirani turk të paraqitej në dritë të favorshme? Pra, çfarë ke për të thënë?’”

Me këtë ese rrëfimtar, të cilit botuesi gjerman i përkthimit i ka shtuar disi të paqartë nëntitullin “Hetime”, Kadare është larguar nga kjo botë me dinjitet. Për këtë meritë ka edhe Joachim Röhm, përkthyesi i tij i shkëlqyer në gjermanisht. Röhm, në vitet ’70, në një hutim rinor-komunist, u shpërngul nga Gjermania Perëndimore në Shqipërinë komuniste për disa vite dhe mësoi gjuhën. Që ai zotëron shqipen, kjo merret si e mirëqenë. Që di të sillet me gjermanishten, e dëshmojnë përkthimet e tij. Meritat e Röhmit për Kadarenë përfshijnë edhe librat që ai nuk i ka përkthyer. Shumë vepra të Kadaresë nuk ekzistojnë në gjermanisht, dhe, sipas zërave, shpesh ka qenë pikërisht Röhm që e ka mbrojtur shkrimtarin më të njohur shqiptar nga vetja e tij, duke mos përkthyer veprat më të dobëta.

“Pranvera shqiptare”, një shkresë e Kadaresë që në rastin më të mirë mund të quhet justifikim i ngathët për rolin e tij gjatë diktaturës së Hoxhës, është një shembull i tillë librash të dështuara. Libri mund të gjendet në gjermanisht, por si përkthim nga frëngjishtja. Röhmi e ka kursyer publikun gjerman me mençuri nga ky libër, i cili i ka sjellë shumë dëm Kadaresë dhe ndoshta madje i ka kushtuar edhe çmimin Nobel. Në vend të tij, ai ka përkthyer në një gjermanisht të përkryer vepra të mëdha si “Gjenerali i ushtrisë së vdekur”, “Sjellësi i fatkeqësisë” apo “Pasardhësi”. Nëse nuk gabohemi, këto libra do të vazhdojnë të lexohen gjatë, ndoshta deri në kohët kur emri i Enver Hoxhës nuk do të thotë më asgjë. Atëherë do të ishte përmbushur edhe pretendimi që shprehet në titullin origjinal, plot vetëbesim, të librit të fundit të Kadaresë. m.p.

Kreu i partisë Mundësia, Agron Shehaj ka ndarë një fotografi me familjen, nga një vizitë në Shtetet e Bashkuara të Amerikës.

Në një foto të publikuar nga ura ikonike e Brooklyn-it në New York City, Shehaj shihet së bashku me bashkëshorten dhe tre fëmijët e tyre, dy djem dhe një vajzë, duke buzëqeshur me sfondin e mahnitshëm të Manhatanit.

“Përqafime nga NYC ????”, shkruan Shehaj, ndërsa kujtojmë se Partia “Mundësia” fitoi dy mandate në Tiranë në zgjedhjet e 11 majit. m.p.

Kingsley Coman po largohet nga Bayern. Mediat gjermane raportojnë se sulmuesi francez është duke negociuar me Al Nassr në Arabinë Saudite.

Në Mynih nuk janë kundër shitjes së tij, sidomos nëse bëhet fjalë për një shifër që i kalon 40 mln eurot. Francezi është heroi i finales së 2020, kur Bayern fitoi Champions League kundër PSG.

Paga e tij bruto vjetore është 16,5 mln euro, barrë që Bayern do që ta heqë sa më shpejt. Problemi është se bavarezët nuk janë aq efikasë sa për të gjetur zëvendësues të francezit. m.p.

Ngjarja e rëndë ku 22 kuaj u qëlluan me armë gjahu në zonën e Llogarasë, afër “Gropave të Pirit”, ka shkaktuar reagime të shumta nga qytetarë dhe organizata për mbrojtjen e kafshëve.

Për këtë ngjarje të rëndë ka reaguar edhe kryetari i Shoqatë së Gjuetarëve “Tirona” dhe anëtar i kryesisë së Federatës Kombëtare të Gjuetisë, Armand Burri.

Ky i fundit duke dënuar aktin e rëndë thotë se shoqata e gjuetarëve ka kritere të qarta për gjuetinë, ndërsa thekson se kush është pjesë e shoqatës, është i informuar për ligjet dhe mënyrën e saktë të ushtrimit të gjuetisë.

Burri thekson se pas këtij rasti të rëndë, Policia e Shtetit dhe organet kompetente të veprojnë me vendosmëri, që ngjarje të tilla të mos përsëriten më.

“Së pari, dua të theksoj se rasti i ndodhur së fundmi në Llogara, ku janë qëlluar 20 kuaj, është një akt i rëndë dhe i patolerueshëm. Shoqata jonë është e indinjuar dhe e distancohet totalisht nga ky akt i paligjshëm dhe çnjerëzor.

Për të qenë pjesë e gjuetisë në mënyrë të ligjshme dhe të kontrolluar, çdo individ duhet të jetë i anëtarësuar në një shoqatë gjuetie dhe të ketë kaluar testin e gjuetarit. Çdo bashki ka shoqata lokale që janë pjesë e Federatës Kombëtare të Gjuetisë, dhe këto shoqata zbatojnë rregulla të qarta dhe kritere të përcaktuara se ku dhe çfarë mund të gjuhet, dhe vetëm gjatë periudhës së lejuar nga 15 gushti deri më 1 mars.

Ne vijmë pas 12 viteve moratoriumi, dhe aktualisht jemi duke u angazhuar në mënyrë intensive me testimin dhe informimin e gjuetarëve, si dhe anëtarësimin e tyre të rregullt. Kush është pjesë e shoqatës, është i informuar për ligjet dhe mënyrën e saktë të ushtrimit të gjuetisë. m.p.

Frani, e cila pavarësisht se ka lindur grua, ka zgjedhur të jetojë si burrë.

Por, kur Zana, mbesa që ka nën kujdesin e saj ka nevojë për nënë, Franit i duhet të bëjë një zgjedhje të vështirë midis ruajtjes së statusit të një burrneshe apo rigjetjes së ndjenjave mëmësore, që i ka shtypur prej kohësh.

Kjo është historia që prezanton kineasti Andamion Murataj në Festivalin e Filmit në Sarajevë. Regjisori tregon se duke u përballur me një histori të veçantë gjinore është përpjekur të shmangë klishetë ekzotike, që shpesh shoqërohen me narrativat kulturore tradicionale në përshkrimin e burrneshave.

“Që në krye të herës vendosa që në krijimin e grupit të punës ta rrethoj veten me gra dhe vajza krijuese, pa kontributet e të cilave ky film do të ishte i pamundur”, tha Murataj.

Aktoret kryesore të filmit janë: Drita Kaba Karaga, në rolin e Franit dhe 9-vjeçarja e talentuar Alesia Ruçi, në rolin e mbesës së saj.

Programi i Festivalit të Sarajevës përfshin 15 premiera botërore, 6 premiera ndërkombëtare, 28 premiera rajonale dhe 2 premiera kombëtare. Përveç shfaqjes së filmave, një hapësirë e veçantë në festival i kushtohet kremtimit të talenteve kinematografike nga e gjithë bota.

Regjisori italian Paolo Sorrentino do të nderohet me çmimin e nderit “Zemra e Sarajevës” për kontributin e tij të shquar në artin e kinemasë. m.p.

Armando Broja është lojtari i ri i Burnley. Klubi anglez njoftoi transferimin përfundimtar të sulmuesit nga Chelsea.

Broja ka firmosur për 5 vite me klubin e sapongjitur në Premier League dhe pritet të ketë minutat që i kanë munguar në vitet e fundit në eksperiencat e tjera në huazim në skuadra të ndryshme.

“Jam shumë i kënaqur që jam këtu si një futbollist i Burnley. Është një periudhë me të vërtetë pozitive për t’u bashkuar me këtë klub përpara fillimit të sezonit të ri të Premier League. Mezi pres të filloj! Ndihem mirë, jam gati dhe jam i emocionuar për sfidën e të luajturit për këtë klub.

Që tani mund ta ndiej mbështetjen nga tifozët. Mund t’ju them të gjithëve se do të jap gjithçka nga vetja sa herë që vesh këtë fanellë të famshme”, tha Broja pas firmës në kontratë. m.p.

Jadon Sancho. Ky është “sekreti” që ka ruajtur deri më sot trajneri Diego Simeone.

Sipas mediave spanjolle, Atletico Madrid po tenton të huazojë sulmuesin anësor për 5 mln euro, aq sa pagoi dhe Chelsea për të në sezonin e kaluar.

Ruben Amorim nuk e ka në listë për sezonin e ri, kështu që Sancho është i vetëdijshëm se i duhet një ekip tjetër. Manchester United është kapitull i mbyllur. m.p.

Lëvizja Vetëvendosje, me anë të një deklarate për mediat, deklaroi se “njoftimi i publikuar sot nga Gjykata Kushtetuese përbën devijim të rrezikshëm nga roli kushtetues”.

“Ai është në kundërshtim me parimet themelore të shtetit të së drejtës dhe ndarjes së pushteteve”, shprehet Vetëvendosje, shkruan A2.

Deklarata e plotë e Vetëvendosjes:

Njoftimi i publikuar sot nga Gjykata Kushtetuese përbën devijim të rrezikshëm nga roli kushtetues. Ai është në kundërshtim me parimet themelore të shtetit të së drejtës dhe ndarjes së pushteteve.
Gjykata Kushtetuese është një organ i pavarur që ka për detyrë të interpretojë dhe kontrollojë përputhshmërinë e ligjeve apo akteve të tjera me Kushtetutën, brenda juridiksionit të vet.
Njoftimi nuk ka qartësuar asgjë tjetër veçse që Gjykata ka tejkaluar kompetencat kushtetuese. Gjykata nuk e ka të drejtën që të krijojë norma të reja juridike apo të imponojë rregulla që nuk kanë bazë në Kushtetutë.

Gjykata ka zgjedhur të shpikë arbitrarisht rregulla. Shpikja e rregullave tërësisht të reja në mes të procesit dhe ndërhyrja në mënyrë substanciale në kompetencat e Kuvendit është cënim i rendit kushtetues.
Kushtetutën e miraton dhe e ndërron Kuvendi. Marrja e kësaj kompetencë duke uzurpuar rolin kushtetues të Kuvendit është goditje e sistemit demokratik që ka burimin te sovrani. Nuk ka forma të tjera të njohura të shkrimit e rishkrimit, miratimit e ndryshimit të Kushtetutës. Ato i bën ose Kuvendi ose Referendumi popullor. Anëtarët e Gjykatës Kushtetuese nuk janë subjekte as të njërës, as të tjetrës. Kur një organ që duhet të jetë gardian i Kushtetutës fillon të prodhojë norma të reja ose të plotësojë norma që nuk janë paraparë as në Kushtetutë, as nga legjislativi, atëherë transformohet në një organ jashtëkushtetues.

Ku, saktësisht, shkruhet në Kushtetutë, në Rregulloren e Kuvendit, në Aktgjykimin e Gjykatës në rastin KO119/14 apo në Aktgjykimin e Gjykatës në rastin KO124/25, apo në jurisprudencën ndërkombëtare se grupi më i madh parlamentar ka të drejtë të propozojë të njëjtin kandidat vetëm tri herë? Nga buron kjo normë? Pse jo dy herë, katër herë, dhjetë herë? Ku është lidhja kushtetuese apo doktrinare me numrin tre?

Njoftimi i Gjykatës paralajmëron se Aktgjykimi që pritet të dalë do ta cënojë rëndë ndarjen e pushteteve. Rast i paprecedentë dhe ndërhyrje flagrante në kompetencat e Kuvendit. Gjykata nuk mund të uzurpojë funksionin e hartimit apo amandamentimit të Rregullores së Kuvendit, sepse kjo përbën shkelje të Kushtetutës, përkatësisht parimit kushtetues të ndarjes së pushteteve, i cili është një ndër shtyllat e demokracisë parlamentare.

Rregullat e reja të paralajmëruara nga Gjykata Kushtetuese nëse nuk janë në Kushtetutë dhe as në Rregulloren e Kuvendit nuk mund të jenë në asnjë Aktgjykim.
Vendimi pasqyron motive partiake. Sa herë që Lëvizja VETËVENDOSJE! duhet të veprojë sipas rregullave që më herët janë vendosur nga vet Gjykata si jurisprudencë në raste analoge, sikur Aktgjykimi i vitit 2014, ato rregulla po i ndryshon vet Gjykata.

Përmasa partiake e vendimit dallohet edhe nga fokusi krejtësisht i panevojshëm tek Kryesuesi i seancës konstituive z. Avni Dehari. Të njëjtin efekt juridik do të kishte lidhur me rendin e ditës pa e subjektivizuar me figurën e Kryesuesit e seancës. Sepse, tek e fundit, Kryesuesi i seancës konstituive nuk është subjekt kushtetues, vetëm Kuvendi është. Kryesuesi i seancës konstituive është vetëm subjekt i Rregullores së Kuvendit. Duke e spikatur vetëm Kryesuesin e seancës pa asnjë justifikim juridik, zbulohet qartazi që qëllimi ishte etiketimi politik i figurës së tij sipas fjalorit të partive opozitare.

Nëse Kryesuesi i seancës konstituive paska vepruar gabimisht kur u ka kërkuar deputetëve të votojnë për, kundër apo abstenim për sa i përket komisionit për votim të fshehtë, është e pakuptueshme pse Gjykata nuk e ka konstatuar këtë shkelje në Aktgjykimin KO 124/25, të shpallur më 26 qershor i cili është nxjerrë pasi Kryesuesi i seancës kishte filluar tashmë thirrjen për votim të komisionit prej 1 majit 2025.

Gjykata duket qartë se ka zgjedhur të mbajë anë duke prekur në mënyrë serioze parimet demokratike dhe sfiduar vullnetin popullor. Ky është një paralajmërim serioz për rrezikun e një pushteti juridik të pakontrolluar, që në vend të kontrollit të pushteteve të tjera, vetë bëhet burim i kapjes institucionale. m.p.

Kryeministri i Polonisë, Donald Tusk ka deklaruar sot se mundësia për një “ngrirje” të konfliktit ushtarak mes Rusisë dhe Ukrainës është më afër se sa është menduar.

Këto komente u bënë pas një bisede që ai zhvilloi me Presidentin e Ukrainës, Volodymyr Zelenskyy.

“Ka disa sinjale, dhe një ndjesi personale, që ndoshta do të kemi një ‘ngrirje’ të konfliktit. Nuk dua të them se lufta do të marrë fund, por një ‘ngrirje’ e situatës mund të ndodhë më shpejt nga sa mendohej”, – tha Tusk në një deklaratë për mediat.

Sipas tij, edhe Presidenti Zelenskyy ndan një qasje optimiste për një armëpushim të mundshëm, megjithëse mbetet i kujdesshëm në deklaratat e tij.

“Ka një shpresë për këtë. Sot është afati i një ultimatumi. Presidenti Zelenskyy është shumë i kujdesshëm, por gjithsesi optimist. Pala ukrainase ka një interes të madh që Evropa, përfshirë Poloninë, të jetë pjesë aktive në formësimin e një armëpushimi të mundshëm dhe më pas të paqes. Edhe ne jemi shumë të interesuar për këtë, sepse paqja në rajon do të ndikonte drejtpërdrejt në sigurinë tonë”, – theksoi Kryeministri polak. m.p.

Bashkimi Evropian u ka bërë thirrje të premten partive parlamentare në Kosovë ta pranojnë vendimin e fundit të Gjykatës Kushtetuese lidhur me themelimin e Kuvendit të ri, duke thënë se “nuk ka më kohë për të humbur” në këtë ngërç politik.

Gjykata Kushtetuese e Kosovës urdhëroi deputetët e Kuvendit të Kosovës ta zgjedhin kreun e ri të organit ligjvënës përmes votimit të hapur dhe ta përmbyllin konstituimin e Kuvendit brenda 30 ditëve.

BE-ja e cilësoi këtë vendim të Kushtetueses si “sqarim të rëndësishëm”, sipas një njoftimi të Zyrës së BE-së në Kosovë.

Ajo gjithashtu u bëri thirrje partive parlamentare t’i gjejnë “kompromiset e nevojshme” dhe të lëvizin shpejt me emërimin e kryetarit dhe nënkryetarëve të Kuvendit. m.p.