Deputetja e Partisë Demokratike dhe kryetare e Komisionit të Çështjeve Europiane në Kuvend, Jorida Tabaku, ka postuar në rrjetet sociale një tjetër reagim për hapjen e thirrjeve për  “Paketë e Maleve”, duke e cilësuar atë si një tjetër formë të vjedhjes së pasurive natyrore dhe të pronave të ligjshme në zonat turistike si Thethi.

“Nuk ka më dyshime. Paketa e Maleve është projekt i vjedhjes me ligj i pronave në zonat malore të Shqipërisë. Në emër të investimeve strategjike, qeveria po shpronëson bizneset e ndershme dhe pronarët që kanë sakrifikuar për ta kthyer Thethin në një nga destinacionet më të kërkuara të turizmit shqiptar,” deklaroi Tabaku.

Sipas saj, në vend që t’u ofrojë lehtësira fiskale për 10 vite, apo të ndihmojë me legalizimin e banesave dhe pronave, qeveria shqiptare ka vendosur t’ua marrë këto të drejtë të ligjshme për t’ua dhënë klientëve të saj politikë, nën petkun e investitorëve strategjikë.

“Ky është një sistem i deformuar, ku përfitojnë vetëm dy kategori: ata që janë të mëdhenj dhe ata që janë afër qeverisë. Të tjerët, njerëzit e zakonshëm, bizneset familjare dhe pronarët legjitimë, janë të përjashtuar nga çdo mundësi zhvillimi,” theksoi Tabaku.

Deputetja demokrate i bëri thirrje qeverisë që të ndalë këtë projekt të abuzueshëm dhe të mbrojë pronarët e ligjshëm dhe trashëgiminë natyrore të vendit.

“Kjo paketë nuk është zhvillim. Është kapje. Është padrejtësi. Dhe duhet të ndalet! Ne kemi detyrimin ta ndryshojmë këtë sistem që shpërblen pakicën dhe shkel shumicën,” përfundoi ajo./e.t

Udhëtarët që vijnë nga një vend tjetër në Republikën e Shqipërisë përjashtohen nga detyrimet e importit për mallrat që gjenden në bagazhin e tyre personal.

Mallrat përjashtohen nëse, për nga lloji dhe sasia e tyre, nuk kanë për qëllim përdorimin tregtar. Përfitojnë përjashtim mallrat e përdorimit vetjak të udhëtarëve, ose mallrat për dhurata.

Vlera e mallrave që përfitojnë përjashtim (pa përfshirë këtu produktet e duhanit dhe alkolit) është sipas vlerës ekuivalente në lekë të shumave, si më poshtë:

Udhëtarët në rrugë tokësore:

300 euro për çdo udhëtar

Udhëtarët në rrugë ajrore ose në rrugë detare:

430 euro për çdo udhëtar

Për udhëtarët nën 15 vjeç:

150 euro

Gjatë hyrjes ose daljes nga Republika e Shqipërisë, udhëtari duhet të deklarojë mallrat nëse janë me vlerë më të lartë se kufiri përkatës i sipërpërmendur si dhe nëse janë për qëllime tregtare.

Autoritetet doganore mund t’i kërkojnë udhëtarit që të tregojë të gjitha mallrat që transporton.

KUJDES!

Për mallrat me natyrë jo tregtare në bagazhin e udhëtareve që e tejkalojnë kufirin e pataksueshëm nga detyrimet doganore të importit, kryhet deklarimi doganor nëpërmjet procedurës së Deklarimit të thjeshtuar.

Gjithashtu përjashtohen nga pagesa në import për:

a) konsum personal produktet e duhanit për sasitë:

200 cigare;

100 cigarillo;

50 puro;

250 gramë duhan

b) konsum personal i alkoolit dhe pijeve alkoolike për sasitë:

1 litër alkool dhe pije alkoolike me fortësi alkolike më të lartë se 22% ndaj volumit, ose alkool etilik i padenatyruar me fortësi alkoolike 80% ndaj volumit dhe më shumë;

2 litra alkool dhe pije të distiluara me fortësi alkoolike që nuk e kalon 22% ndaj volumit. Secila sasi e specifikuar në shkronjat “a” dhe “b”, përbën 100 % të përjashtimit total për produktet e alkoolit dhe pijeve alkoolike.

2 litra verë pa gaz dhe 10 litra birrë.

Për një udhëtar, përjashtimi mund të zbatohet për çdo kombinim të produkteve të alkoolit dhe pijeve alkoolike me kushtin që totali i sasisë (përqindjes) së përdorur nga individi të mos kalojë 100%.

c) konsum personal i kafes për sasinë:

3 kg

KUJDES! Udhëtarët nën moshën 17 vjeç nuk përfitojnë përjashtim për produktet e duhanit dhe alkoolit

Ka dështuar edhe përpjekja e 48-të për konstituimin e Kuvendit.  Kryesuesi i seancës, Avni Dehari, u bëri thirrje subjekteve politike që të propozojnë nga një përfaqësues për Komisionin Zgjedhor, i cili do të mundësonte zgjedhjen e kryetares së Kuvendit dhe të nënkryetarëve.

Subjektet politike nuk ofruan propozim, duke sjellë kështu një tjetër dështim në procesin e konstituimit të Kuvendit.  Që nga 15 prilli, Kuvendi ka dështuar plot 47 herë radhazi në zgjedhjen e kryetarit dhe nënkryetarëve.

Procesi i konstituimit ka mbetur i bllokuar pasi Lëvizja Vetëvendosje ka propozuar Albulena Haxhiun për kryetare të Kuvendit, por kjo kandidaturë nuk ka gjetur përkrahje nga partitë e tjera parlamentare./E.T

Presidenti i Emirateve të Bashkuara Arabe, Muhammed Bin Zayed përfundoi vizitën e tij në Shqipëri.

Bin Zayed u përcoll në aeroportin e Rinasit nga kryeministri Edi Rama.

“Mirëardhsh mik i shtrenjtë”, shkruan Rama në Facebook krahas fotos të publikuar në facebook. /e.t

Presidenti ukrainas i ka ngarkuar qeverisë së re detyrën e mbikëqyrjes së kontratave të mbrojtjes në fuqi, si pjesë e një përpjekjeje për të prodhuar 50% të armëve dhe pajisjeve fushore të vendit në vend.

Presidenti ukrainas Volodymyr Zelensky njoftoi se do të nënshkruhen marrëveshje të paspecifikuara në të ardhmen me Shtetet e Bashkuara.

Në një paraqitjeje në parlament të hënën për të riformatuar qeverinë e tij, ai tha se  këto marrëveshje do ta forconin vendin e tij.

Presidenti ukrainas po ashtu tha se do t’i jepte qeverisë së re kontrollin mbi kontratat e mbrojtjes, si pjesë e një shtytjeje për të prodhuar 50 përqind të armëve dhe pajisjeve fushore të vendit në Ukrainë.

Parlamenti me 450 vende i Ukrainës miratoi sot emërimin e Yulia Svirydenkos si kryeministre, me 262 vota pro.

Svirydenko, e cila u propozua nga vetë presidenti ukrainas, pason Denys Shmyhal, i cili paraqiti dorëheqjen e tij si kryeministër të martën si pjesë e një riorganizimi të qeverisë. /e.t

Një kamion i madh që transportonte qumësht u përmbys në Columbia County, New York.

Si pasojë, ky aksident thuhet se ka shkaktuar një “lumë qumështi”.

Zyrtarët lokalë thanë se aksidenti ndodhi në kryqëzimin e Gahbauer Road me Rrugën Shtetërore 217 në Claverack.

Ndërkohë bëhet e ditur se shoferi i kamionit u dërgua për kontrolle në Qendrën Mjekësore në Albany.

Në vendngjarje ndërhynë Policia Shtetërore e New Yorkut, Departamenti i Mbrojtjes së Mjedisit dhe zjarrfikësit lokalë për pastrimin e zonës.

Autoritetet po hetojnë shkaqet e aksidentit./e.t

Ilir Meta nuk është i zhgënjyer nga vendimi i sotëm i Apelit të GJKKO, që la në fuqi masën e sigurisë arrest në burg.

Në një reagim nga qelia në rrjetin social Facebook, kreu i Partisë së Lirisë, Ilir Meta shkruan se kjo është një “drejtësi me regji”.

Sipas Metës, sistemi gjyqësor është në përgjimin e vazhdueshëm të SPAK-ut.

Ish-Presidenti shprehet se mezi pret që të nisë gjyqi ndaj dosjes së tij dhe të përballet me drejtësinë.

Ilir Meta akuzon Kryeministrin Edi Rama dhe kreun e SPAK Altin Dumanin se kanë intimiduar dëshmitarë dhe kanë fshehur prova në hetimin ndaj tij.

Reagimi i Ilir Metës:

Asnjë zhgënjim nga telenovela “Drejtësi me Regji”.

Falenderim për avokatin e paepur, z. Kujtim Cakrani, që ka harxhuar dy orë frymë për ata që nuk kanë as veshë të dëgjojnë dhe as integritet për të treguar në respekt të Kushtetutës, të Konventës Europiane për të Drejtat e Njeriut, dhe të ligjit.

Por avokati ka parimin që edhe muret dëgjojnë, ndaj e falenderoj edhe njëherë për frymën e harxhuar, e cila sidoqoftë është regjistruar për arsye të shterimit të të gjithë procedurave të brendshme, të një sistemi gjyqësor që është nën përgjimin permanent të SPAK-ut, i cili afërmendsh urdhrat dhe akuzat i merr nga tribuna e Asamblesë së PS-së.

As kanë patur ndonjë provë, as kanë gjetur ndonjë provë, as kanë shans të shpikin ndonjë provë, pavarësisht nga provokimet e shëmtuara edhe këtu te 313-ta.

Sado t’i zvarrisin hetimet, sado të fshehin prova që rrëzojnë të gjitha mashtrimet e tyre, përballja është e pashmangshme dhe ne mezi presim të nisi gjykimi, që e gjithë Shqipëria edhe bota ta dijë se kush janë ata që dinë anglishten e Charles McGonigalit, i cili bashkë me Edi Ramën dhe Altin Dumanin, regjistruan që në Dhjetor 2019 çështjen CEZ-DIA për të më shantazhuar dhe hetuar mua si President i Republikës, çështje e gjykuar në Shqipëri dhe në Arbitrazhin e Vjenës, në kulmin e konfliktit për Gjykatën Kushtetuese.

Nuk jam unë që rrezikoj provat, por janë ata që kanë fshehur prova.

Nuk janë unë që intimidoj dëshimtarë, por janë ata që kanë intimiduar dhe rekrutuar dëshimtarë, dhe që me shantazhe i kanë konvertuar në përkrahës të PS.

Kjo është një përballje që ne do ta fitojmë në emër të të gjithë shqiptarëve që paguajnë sot shumë shtrenjtë për drejtësinë, që nuk ka asnjë lidhje me shtetin e së drejtës dhe as me Konventën Europiane të të Drejtave të Njeriut.

Shumë qartë këtë e kanë kuptuar së fundmi banorët e Thethit, por shumë më qartë do ta kuptojnë të gjithë shqiptarët në të ardhmen.

Ilir Meta dhe Partia e Lirisë do të jenë gjithmonë në anën e shqiptarëve, në mbrojtje të Kushtetutës dhe sovranitetit, kundër mercenarëve shqipfolës që kanë vetëm një projekt, shpopullimin e Shqipërisë.

Meqënëse disa nga këto qëndrime i keni dëgjuar më përpara, mos përtoni të lexoni lajmin e freskët se si 270 milion euro të USAID u përdorën nga sorosistët për kapjen e sistemit të drejtësisë./E.T

Kryebashkiaku i Tiranës, Erion Veliaj është dërguar në spitalin e Durrësit, pasi mësohet se ka shfaqur probleme me tensionin.

Mësohet se zyrtarit po i kryen analizat e nevojshme për të konstatuar gjendjen shëndetësore të tij.

E kanë shoqëruar 30 policë dhe kanë nxjerrë pacientet e tjerë nga dhomat, për arsye sigurie./E.T

Psikoanalisti i famshëm Sigmund Freud, babai i psikoanalizës, ka lënë pas shumë citate dhe ide që edhe sot, më shumë se një shekull më vonë, na bëjnë të reflektojmë mbi marrëdhëniet dhe mënyrën si e kuptojmë dashurinë

Në një rast, ai dha një këshillë të thjeshtë, por të fuqishme për gratë që zgjedhin një partner me të cilin planifikojnë të kalojnë pjesën tjetër të jetës.

“Gruaja nuk duhet ta dobësojë një mashkull, por ta relaksojë”, ka thënë Frojdi, duke treguar gabimin klasik të shumë grave që përpiqen ta “ndryshojnë” ose “zbusin” partnerin e tyre.

Sipas tij, shumë gra e lidhin dashurinë me idenë se partneri duhet të formësohet sipas pritshmërive të tyre, të bëhet më ambicioz, më i fortë, më i motivuar. Por një burrë që duhet të motivohet me zor, nuk është gati për të “pushtuar botën” apo për të ndërtuar një jetë të qëndrueshme. Përpjekjet e vazhdueshme për ta ndryshuar, vetëm sa lodhin dhe i bëjnë marrëdhëniet të tensionuara.

Këshilla e Frojdit për gratë?

Zgjidhni dikë që rrezaton energji dhe stabilitet vetë, pastaj thjesht mbështeteni në mënyrë diskrete. Një burrë që ndihet i qetë, i relaksuar dhe i pranuar, do të japë shumë më shumë. Sipas Frojdit, “Ai do të bëjë tri herë më shumë për ju, nëse nuk i bëni presion.”

Ekspertët modernë të marrëdhënieve shpesh pajtohen me këtë ide. Ata theksojnë se kur dikush ndjen presion të vazhdueshëm për të ndryshuar, krijohet distancë emocionale. Përkundrazi, pranim dhe mbështetje e butë janë çelësi që një partner të lulëzojë vetë, pa imponim.

Në fund të fundit, dashuria nuk është projekt për t’u riparuar, por një hapësirë ku të dy ndihen të sigurt dhe të lirë për të dhënë më të mirën e tyre. Dhe kjo është këshilla që mbetet e vlefshme edhe sot, mbi 100 vjet pas Frojdit.

“A mendoni se Frojdi kishte të drejtë?”

Kolegji Zgjedhor Gjyqësor rrëzon ankimin e Partisë Demokratike për pavlefshmëri zgjedhore në qarkun e Tiranës.

Argumentet e paraqitura nga përfaqësuesi ligjori i PD, Franci Nuri, nuk binden trupën gjyqësore për te shpallur të pavlefshëm zgjedhjet në qarkun më të madh në vend, duke i hapur rrugë certifikimit final të rezultatit për këtë zonë zgjedhore.

Sipas rezultatit, 37 mandatet e Tiranës u ndanë 19 për PS, 13 për PD, 2 për Mundësinë, 1 për PSD, 1 për Lëvizjen Bashkë dhe 1 për koalicionin Nisma Shqipëria Bëhet./e.t

Kryetari i Partisë Demokratike, Sali Berisha, foli sot në konferencën për mediat lidhur me prishjen e ndërtesave në Theth, në kuadër të aksionit të qeverisë për lirimin e hapësirave publike.

Berisha tha se prishja e ndërtesave është hakmarrje e kryeministrit Rama ndaj banorëve të Thethit, pasi më 11 Maj ata votuan për PD-në dhe jo për PS-në.

Berisha: Ky është rezultati i qendrës së votimit ku ju patë atë krim të shëmtuar. PD në këtë qendër ka marrë 95 vota dhe PS 82 vota.

Pra, nuk kanë votuar PS-në, kanë votuar PD-në dhe kjo është hakmarrja primitive, kriminale e Edi Ramës ndaj tyre. Dëgjojeni këtë.

Para zgjedhjeve mburreshin me ato ndërtime, mburreshin se Thethi kishte arritur të ketë 2 mijë shtretër. Vërtet arritje shumë e madhe, po të kemi parasysh se një shtrat në Theth ka një kosto të paktën tre herë më të lartë se një shtrat në Tiranë apo bregdet, për shkak të infrastrukturës, distancës, etj.

Por ja ku janë 2 mijë shtretërit e Thethit, se si Edi Rama për shkak të disfatës elektorale, u hakmor në mënyrën më primitive, më çnjerëzore ndaj tyre.

Unë u bëj thirrje banorëve të Thethit, Shkodrës dhe mbarë Shqipërisë, të ngrihemi për t’u ndarë në mënyrë përfundimtare nga kjo e keqe e madhe që po rrënon çdo ditë shqiptarët dhe qenien e tyre.

Nga ky armik i egër i veriut të Shqipërisë në mënyrë të posaçme, por edhe shqiptarëve në tërësi, i cili rrezaton çdo ditë armiqësi, urrejtje, negativitet ndaj tyre. Pra, ky është Thethi i 2 mijë shtretërve sot./E.T

Avokati i Ilir Metës ka komentuar vendimin e Apelit të GJKKO-së që la në fuqi masën e sigurisë “arrest me burg” ndaj ish-Presidentit të vendit, duke u shprehur se “unë i fola gjykatës”.

Kujtim Cakrani deklaroi se Ilir Meta është në kushtet e persekutimit, por theksoi se ai do të përballet me të gjithë dhe se nuk mposhtet kollaj.

Avokati i Ilir Metës: Presidenti ka 9 muaj në paraburgim, është e paprecedentë që Presidenti i Republikës të qëndrojë 9 muaj në paraburgim pa përfunduar hetimet.

Po mbahet në kushtet e një persekutimi politik, ju e dini mirë se çfarë po heq ai sot në paraburgim ku i janë mohuar të drejtat elementare siç janë ato e ushtrimit të telefonatave me kolegët, apo anëtarët e Kryesisë apo familjes së tij.

Meta është aty do të përballet me të gjithë, është një individ që nuk mposhtet kollaj. Meta do të vazhdojë të përballet me këta./E.T

Presidenti i përkohshëm i Sirisë, Ahmed al-Sharaa, ka thënë të enjten se mbrojtja e qytetarëve druzë dhe të drejtave të tyre është “prioriteti ynë”, derisa Izraeli u zotua se do t’i shkatërrojë forcat qeveritare siriane që po sulmojnë druzët në jug të Sirisë.

Në fjalimin e tij të parë televiziv pas bombardimeve të fuqishme izraelite mbi Damask të mërkurën, Sharaa iu drejtua druzëve të enjten duke thënë se “ne e kundërshtojmë çdo përpjekje për t’ju tërhequr në duart e ndonjë pale të jashtme”.

“Ne nuk jemi nga ata që tremben nga lufta. Ne e kemi kaluar jetën duke u përballur me sfida dhe duke mbrojtur popullin tonë, por kemi vendosur interesat e sirianëve para kaosit dhe shkatërrimit”, tha ai.

Ai shtoi se populli sirian nuk ka frikë nga lufta dhe se është i gatshëm të luftojë nëse rrezikohet dinjiteti i tyre.

Sulmet ajrore izraelite shkatërruan një pjesë të Ministrisë së Mbrojtjes së Sirisë dhe goditën pranë Pallatit Presidencial, pasi Izraeli u zotua se do t’i “shkatërrojë” forcat qeveritare që po sulmojnë druzët në jug të Sirisë dhe kërkoi tërheqjen e tyre.

Bombardimet shënuan një përshkallëzim të madh nga ana e Izraelit kundër administratës së udhëhequr nga Sharaa. Ato ndodhën pavarësisht afrimit të Sharaas me SHBA-në dhe kontakteve të administratës së tij me Izraelin në fushën e sigurisë.

Duke përshkruar sundimtarët e rinj të Sirisë si xhihadistë të maskuar dobët, Izraeli tha se nuk do t’i lejojë ata t’i zhvendosin forcat në jug të Sirisë dhe është zotuar se do ta mbrojë pakicën druze në këtë pjesë të vendit nga sulmet, pasi u nxit edhe nga thirrjet e pakicës druze brenda vetë Izraelit.

Ndërkohë, SHBA-ja tha se luftimet do të ndalen së shpejti.

“Jemi pajtuar për hapa specifikë që do t’i japin fund kësaj gjendje situatë shqetësuese dhe të tmerrshme sonte”, tha sekretari amerikan i Shtetit, Marco Rubio, të mërkurën mbrëma.

Të mërkurën, zyrtarë të Qeverisë siriane dhe udhëheqës të pakicës fetare druze shpallën një armëpushim të ri pas luftimeve disaditore.

Autokolonat e forcave qeveritare filluan të tërhiqen nga qyteti i Suveidës, por nuk është ende e qartë nëse marrëveshja e re – e shpallur nga Ministria e Brendshme e Sirisë dhe nga një udhëheqës fetar druz përmes një video-mesazhi – do të zbatohet.

Një armëpushim i mëparshëm i shpallur një ditë më parë dështoi shumë shpejt.

Sulmet izraelite vazhduan edhe pas shpalljes së armëpushimit.

Përshkallëzimi më i fundit në Siri nisi me rrëmbime dhe sulme hakmarrëse ndërmjet fiseve vendëse sunite beduine dhe fraksioneve të armatosura druze në provincën jugore.

Forcat qeveritare që ndërhynë për të rivendosur rendin u përplasën më pas me forcat druze.

Sekti fetar druze u formua në shekullin e 10-të si një degë e ismailizmit, që është vetë një degë e Islamit shiit. Më shumë se gjysma e rreth 1 milion druzëve në botë jetojnë në Siri.

Pjesa tjetër jeton kryesisht në Liban dhe Izrael, përfshirë edhe në Rrafshnaltën e Golanit, të cilën Izraeli i mori nga Siria gjatë luftës së Lindjes së Mesme më 1967 dhe e aneksoi në vitin 1981.

Nuk janë publikuar të dhëna zyrtare për viktima që nga e hëna, kur Ministria e Brendshme siriane tha se ishin vrarë 30 njerëz.

Por, vëzhguesi Sirian për të Drejtat e Njeriut me seli në Mbretërinë e Bashkuar raportoi se deri të mërkurën në mëngjes janë vrarë mbi 300 njerëz, përfshirë katër fëmijë, tetë gra dhe 165 ushtarë e forca sigurie./ REL

Një ngjarje e rëndë ka tronditur Greqinë ku një grua, dyshohet se së bashku me të dashurin e saj, ka organizuar vrasjen e ish-bashkëshortit të saj polak në Agia Paraskevi.

Hetimet kanë hedhur dritë mbi lëvizjet e autorëve, mes tyre dy shqiptarë, si edhe rolin e gruas së viktimës.

Sipas protothema.gr, profesori 43-vjeçar kishte ngritur më parë një padi kundër të dashurit të ish-gruas së tij për kërcënime dhe dëmtime fizike, duke raportuar incidente dhune, detaje që tregojnë se kishte frikë për jetën.

Autori i dyshuar i vrasjes, gjatë rrëfimit të tij në polici, u shfaq i penduar, duke thënë: “Nuk mund ta duroja më ta shihja të trishtuar dhe të stresuar, dhe thashë se do ta bëja. Kam bërë gjithçka”.

35-vjeçari ka tentuar të marrë gjithë përgjegjësinë mbi vete, por, sipas medias greke, provat tregojnë se krimi ishte organizuar në bashkëpunimin me ish-gruan e viktimës.

Në rrëfimin e tij, autori i vrasjes ka treguar se rekrutoi tre bashkëpunëtorë, dy shtetas shqiptarë dhe një shtetas bullgar, ndërsa u ka thënë që: “Do të shkojmë diku për të rrahur dikë që po më shqetëson të dashurën”.

Për t’i qetësuar, ai i siguroi se “nëse keni nevojë për avokatë, Nadia do të paguajë. Mos u shqetësoni”.

Porsche me qira dhe alibia e dështuar

Autorët përdorën një mjet tip Porsche Cayenne për të lëvizur, e cila sipas autoriteteve u gjet dhe u identifikua nëpërmjet kompanisë ku u mor me qira, duke çuar tek dy shqiptarët.

Mjeti dyshohet se e ndoqi 43-vjeçarin që nga momenti që ai ishte në Haidari për një takim me ish-gruan greke dhe fëmijët e tyre, deri Agia Paraskevi ku u organizua komploti i vrasjes.

Menjëherë pas vrasjes, autori dyshohet se braktisi bashkëpunëtorët e tij dhe hipi në një taksi me destinacion Nafplion, duke u përpjekur të fshihej.

Në të njëjtën kohë, ai ia kishte dhënë celularin dhe çelësat e makinës një personi tjetër, me qëllim që të krijonte një alibi të rreme se ndodhej në Argolidë dhe jo në vendin e krimit.

Arma e vrasjes, sipas deklaratës së tij, është blerë në Omonia, por ende nuk është gjetur.

Fotoja që “djeg” ish-gruan

Sa i përket ish-gruas së profesorit, 43-vjeçarja dyshohet se është përpjekur të fshehë të gjitha gjurmët. Menjëherë pas vrasjes, ajo e fiku telefonin dhe fshiu të gjitha të dhënat.

Megjithatë, policia gjeti një foto të viktimës në telefonin e saj, të bërë nga pas, ditën e vrasjes, që tregonte saktësisht se çfarë kishte veshur. Një fakt që, sipas autoriteteve, dokumenton rolin e saj në përgatitjen e krimit. Ende nuk është përcaktuar se kujt i është dërguar imazhi.

Megjithëse telefoni i vrasësit nuk është gjetur, hetimet zbuluan se komunikimet e tij me ish-gruan e tij u bënë nëpërmjet aplikacionit të koduar Signal, duke përdorur një numër që i përkiste djalit të saj.

Provat forcojnë bindjen e autoriteteve se ishte një vrasje e paramenduar, me përfshirjen e më shumë se një personi.

Autori dhe 3 bashkëpunëtorët e tij kanë rrëfyer krimin, ndërsa gruaja mohon çdo përfshirje.

Roli i shqiptarëve

Siç rezultoi nga hetimi policor, gruaja fillimisht i bëri presion partnerit të saj aktual që të gjente njerëz me pagesë për të rrahur ish-burrin e saj.

Në fakt, i dashuri i saj gjeti, nëpërmjet një të njohuri të bullgarit, edhe dy shqiptarë të gatshëm të merrnin përsipër “punën” (të gjithë janë arrestuar).

Ata e kanë çuar autorin e krimit në vendin e ngjarjes dhe i kanë dhënë një pistoletë me të cilin ky i fundit ka qëlluar dhe vrarë profesorin.

Si bullgari ashtu edhe dy shqiptarët kanë pohuar se nuk e dinin që autori donte ta vriste viktimën, por se thjesht donte ta terrorizonte dhe ta rrihte.

Ata dyshohet se i kanë kërkuar 50.000 euro që të mos e dorëzonin në polici, ndërsa autori u kishte dhënë 2.000 euro për të rrahur profesorin.

I dashuri i gruas greke u arrestua me akuzën se vrau 43-vjeçarin me 5 plumba, ndërsa tre shtetasit e huaj akuzohen si bashkëpunëtorë.

Viktima kishte pasur debate me ish-gruan e tij si për dy fëmijët që kanë, ashtu edhe për mosmarrëveshje financiare.

Fotot e autorëve në gjykatë

Përgjatë 4 muajve të parë të 2025 janë shpenzuar 8.2 miliardë lekë për mbrojtjen nga 52.7 miliardë lekë që planifikohen për t’u shpenzuar në total deri në fund të këtij viti.

Nëse bëjmë një krahasim ndërmjet programeve për mbrojtjen, rreth 32% e shpenzimeve të Ministrisë ose gati 2.7 miliardë lekë kanë shkuar për Forcat e Luftimit, 24% e parave i janë kushtuar mbështetjes për ushtarakët dhe 23% për mbështetjen e luftimit. Emergjencat civile dhe mbështetja për shëndetësinë përbëjnë vetëm 6% të shpenzimeve faktike në 4 muajt e parë të këtij viti.

Për arsimin ushtarak janë shpenzuar më pak para se për çdo program tjetër, vetëm 4% e buxhetit për mbrojtjen deri më tani.

Megjithatë, sipas Raportit të Monitorimit, duke qenë se buxheti për “Forcat e Luftimit” është më i madh se për çdo program tjetër, deri më tani rezulton të jenë shpenzuar shumë pak në raport me totalin që duhet të shpenzohet deri në fund të këtij viti. Kjo për shkak të realizimit të ulët për projektet e investimeve publike, veçanërisht ato me financim të huaj.

Ky program synon që të mbajë në gatishmëri dhe përmirësojë kapacitetet Operacionale të Forcës Tokësore, Detare dhe Ajrore. Konkretisht, 1.2 miliardë lekë janë shpenzuar për të mbajtur në gadishmëri 2,597 personel të forcave tokësore, 392 milionë lekë për 688 personel të forcave ajrore, rreth 476 milionë lekë për të mbajtur në gadishmëri 704 personel të forcave detare dhe 285 milionë lekë për 259 kontigjent ushtarak pjesmarrës në misione paqeruajtëse jashtë vendit.

Lidhur me programin Emergjencat Civile, realizimi i fondeve në nivelin 14% në shpenzime korente lidhet kryesisht me realizimin e ulët të fondit të shpërndarë sipas bashkive në formën e transfertës së kushtëzuar për dëmshpërblimin e shtetasve të prekur nga fatkeqësitë natyrore, si dhe për marrjen e masave parandaluese./e.t

Ka mbërritur në Durrës “Mircea”, veliera shkollë e Marinës rumune.

E ndërtuar në vitin 1938 në kantierin gjerman Blohm & Voss, “Mircea” është një velierë elegante me tre direkë, e cila prej më shumë se 85 vitesh është simbol i traditës dhe formimit detar në Rumani.

Emrin e ka marrë nga princi i njohur i Vllahisë, Mircea cel Bătrân, dhe që prej vitit 1939 ka shërbyer si anije shkollë për kadetët e Akademisë Detare Rumune, duke trashëguar rolin e anijes së parë stërvitore të vendit.

Përgjatë dekadave, “Mircea” ka përshkuar shumë dete, duke përfaqësuar Rumaninë në misione stërvitore dhe evente ndërkombëtare. Ndër më të spikaturat është pjesëmarrja në festivalin “OPSAIL 1976”, me rastin e 200-vjetorit të Pavarësisë së SHBA-së.

Veliera ka “motra” të tjera të famshme në SHBA, Gjermani, Ukrainë dhe Portugali, të ndërtuara sipas të njëjtit model, ndërsa vetë “Mircea” mbetet një ndër më të dashurat për brezat e marinarëve rumunë.

Me një gjatësi prej mbi 82 metrash dhe direkë që ngrihen deri në 44 metra lartësi, ajo mirëpret në bord 135 kadetë dhe një ekuipazh prej 89 profesionistësh.

Pas rikonstruksionit të vitit 2002, “Mircea” ruan hijeshinë e saj klasike, por është pajisur edhe me teknologji moderne, duke u renditur sot mes anijeve më të mira të klasit të saj në botë./e.t

Foto të reja të “djalit sekret” të Vladimir Putinit, Ivanit janë bërë publike. I vogli ka një ngjashmëri të habitshme me të atin, ndërsa ndjek hapat e nënës së tij atlete.

Djali, tani 10 vjeç, është lindur nga e dashura sekrete e presidentit rus, 42-vjeçarja që fitoi medaljen e artë olimpike në gjimnastikë ritmike, Alina Kabaeva.

Imazhe të reja tregojnë djalin e Putinit në një seancë stërvitore në qershor 2025 në Valdai, atje ku presidenti rus ka pallatin e tij.

Foto të tjera të Ivanit në u zbuluan nga kanali antiqeveritar i Telegramit VChK-OGPU, i cili në prill publikoi fotot e para të një fëmije që e quajti “djali më i vetmuar në Rusi”.

Krahas fotove, Kanali shkroi:

“Ivani është në një grup djemsh. Ai po merrte pjesë në një performancë të quajtur ‘Lezginka’ në një festival të organizuar nga nëna e tij.

Ivani nuk është një djalë i zakonshëm. Gjatë shfaqjeve, seancave stërvitore dhe ngjarjeve të tjera që zhvillohen brenda, ai ka tetë persona në ekip që e shoqërojnë kudo”.

Nëna e tij, Alina Kabaeva, drejton një akademi gjimnastike dhe është përgjegjëse për stërvitjen në Valdai.

Kanali raportoi se Ivani nuk duket se ka marrë pjesë në “evente masive” që nga viti 2023, por ai ende shfaqet në fotot e ekipit të tij.

Ivani ka një vëlla më të vogël, Vladimir Junior, tani pesë vjeç, i cili ende nuk është fotografuar.

Ivani, ashtu si nëna e tij, duket se ka arritur shumë si gjimnast i ri dhe garoi në të njëjtin festival ku garues të tjerë ishin nga vende të tilla si Kina, Kuba, Uzbekistani, Kazakistani dhe Bjellorusia.

Putini nuk e ka konfirmuar kurrë marrëdhënien dhe fëmijët e tij me Kabaevën – e cila është tre dekada më e vogël se ai.

Megjithatë, në një moment vitin e kaluar, ai pranoi se kishte parë filma me përralla ruse me “fëmijët e tij të vegjël”.

The Telegraph

Sapo mbaron një luftë në Lindjen e Mesme, fillon një tjetër .

Izraeli duket se hapi një front të ri lufte, duke u kthyer kundër regjimit të ri sirian dhe duke goditur ndërtesën e inistrisë së mbrojtjes në Damask.

Avionët luftarakë izraelitë bombarduan gjithashtu forcat qeveritare siriane në jug, ku ka shpërthyer dhuna sektare midis pakicës druze dhe fiseve beduine.

Deri më tani, më shumë se 300 persona janë vrarë në përleshjet që nga e diela, tha Observatori Sirian për të Drejtat e Njeriut.

Pse po e sulmon Izraeli Sirinë?

Izraeli pretendon se veproi për të mbrojtur druzët, një grup fetar pakicë me lidhje të hershme me Izraelin.

Druzët, të cilët janë përleshur prej kohësh me pakicat beduine , u tërbuan javën e kaluar kur një adoleshent druz u grabit në rrugën për në Damask.

Druzët morën peng disa beduinë në shenjë hakmarrjeje dhe luftimet midis dy komuniteteve shpërthyen në qytetin Suwayda pranë kufirit izraelit, duke lënë më shumë se 100 të vdekur.

Regjimi i ri sirian dërgoi trupa, gjoja për të ruajtur paqen, por disa nga këto forca vranë civilë druzë gjatë këtij procesi dhe poshtëruan të tjerë duke ua rruar mustaqet.

Izraeli u përgjigj duke bombarduar pozicionet siriane dhe duke vrarë disa nga ushtarët dhe civilët e tyre.

Druzët janë një grup fetar dhe etnik që numëron rreth një milion njerëz, kryesisht të vendosur në Siri, Liban dhe Izrael.

Ata janë një komunitet fetar i mbyllur me rrënjë në shekullin e 11-të. Në Siri, shumica e Druzëve jetojnë në pjesën jugore të vendit, kryesisht në Guvernatoratin Sweida, pranë Lartësive të Golanit. Më shumë se 20,000 Druzë jetojnë në Lartësitë e Golanit, të cilat Izraeli i pushtoi në vitin 1967 dhe i aneksoi në vitin 1981.

Shumica kanë refuzuar shtetësinë izraelite, duke mbajtur kartat e identitetit sirian dhe kartat e qëndrimit të përhershëm.

Shumë prej tyre luftuan me Izraelin kundër ushtrive arabe në luftën e vitit 1948 që themeloi Izraelin.

Ata janë të përfaqësuar në radhët e Forcave Mbrojtëse të Izraelit sot si ushtarë.

Brenda Izraelit dhe Lartësive të Golanit të pushtuara nga Izraeli jetojnë rreth 145,000 druzë dhe ata përbëjnë rreth 1.6 përqind të popullsisë së Izraelit. Ata gjithashtu kanë komunitete të mëdha në Liban dhe Siri.

Pse Izraeli është kaq i shqetësuar për al-Sharaa dhe Sirinë?

Edhe pse regjimi i ri nuk është i lidhur me Iranin, ai ka një trashëgimi islamiste dhe Izraeli është goditur nga grupe terroriste islamike si Hamasi dhe Hezbollahu për dekada të tëra.

Është gjithashtu e rëndësishme që nofka luftarake e al-Sharaa është Abu Mohammad al-Julani, elementi “Julani” i të cilit është shoqëruar prej kohësh me Lartësitë e Golanit, zonën e diskutueshme të Sirisë jugore dhe Izraelit verior, pjesën më të madhe të së cilës Izraeli e aneksoi më parë në vitin 1981.

Në Izrael ekzistojnë frikëra populiste se çdo ish-luftëtar i Al-Kaedës që vjen nga ai rajon dhe mban këtë emër, nuk ka gjasa ta lërë atë përgjithmonë.

Kjo është një nga arsyet pse forcat izraelite kanë pushtuar një zonë tampon të patrulluar nga OKB-ja në territorin sirian përgjatë kufirit me Lartësitë e Golanit dhe kanë nisur sulme ajrore në bazat ushtarake në Siri.

Gjeopolitika e një Sirie të ripërtërirë dhe të fuqishme mund të mos i përshtatet Izraelit nga një perspektivë ushtarake ose politike.

Regjimi i ri atje është i afërt me Turqinë, një kritike e ashpër e Izraelit, dhe me Arabinë Saudite e cila, së bashku me Emiratet e Bashkuara Arabe dhe Katarin, janë bërë fuqi të mëdha në rajon.

Një Siri e suksesshme mund të pritet të rreshtohet ngushtë me këto blloqe në zhvillim, duke ofruar mundësi ekonomike për Izraelin, por edhe konkurrencë të vërtetë ushtarake, ekonomike dhe politike.

Disa analistë besojnë, pra, se Izraeli do të preferonte që Siria të mbetej e fragmentuar.

Çfarë ka të ngjarë të ndodhë më pas?

Shumë do të varet nga zoti Trump dhe SHBA-të, të cilët thuhet se janë të zemëruar për hapjen e një fronti të ri nga Izraeli në Siri.

SHBA-të, nga të cilat Izraeli mbështetet për mbrojtje ajrore dhe armë, kanë fuqinë për të detyruar t’i japin fund luftimeve dhe kanë thënë më parë se duan t’u japin al-Sharaa-s dhe Sirisë një “shans për të pasur sukses”.

Por kryeministri i Izraelit, Benjamin Netanyahu, ashtu si Putini, ka treguar se është i aftë të bëjë sikur nuk e ka fjalën për presidentin amerikan, të cilin e thotë John Bolton, ish-këshilltari i tij i sigurisë kombëtare, vetëm për të kujtuar se çfarë tha personi i fundit që i foli.

Nëse ky është zoti Netanyahu, prisni që bombardimet të vazhdojnë për ca kohë./e.t

Adriatik Lapaj dhe Endri Shabani kanë edhe pak orë kohë ta zgjidhin krizën mes tyre. Nga dita e nesërme, komisioneri Celibashi ka të drejtë të shpërndajë mandatet dhe të publikojë emrat e fituesve në Tiranë, ku është edhe mandati i debatueshëm i ‘Nismës Shqipëria Bëhet’.

Komisioneri ka vendosur t’u japë të rinjve pak kohë, siç është kërkuar prej tyre, derisa Shabani të kthehet në Shqipëri të shtunën. Por nëse bisedimet dështojnë, Zeqir Kordhoni lë përfundimisht jashtë Kuvendit, Adriatik Lapajn.

Por edhe vetë Kordhoni ka zero shanse të hyjë në Kuvend. Aktualisht mandatin e zotëron Ana Dajko, e para në listën e mbyllur. 60-vjeçarja me arsim të mesëm, jeton në Sarandë dhe është nëna e anëtarit të kryesisë së partisë së Lapajt, Vasil Dajko.

Ajo ka shanse të larta të pranojë mandatin nëse nuk ka zgjidhje përplasja Lapaj-Shabani. Burime pranë Partisë Shqipëria Bëhet, thanë, se ajo do të pranojë mandatin, duke mos rrezikuar kështu që Livia Savri, që është e dyta në listë të hyjë në Kuvend.

Livia është partnerja e Endri Shabanit, ndaj Ana Dajko, ngelet për Lapajn arma e vetme për të lënë me ‘gisht në gojë’ Shabanin.

Debati mes tyre nisi pasi daja i Endri Shabanit nuk pranoi të dorëhiqet dhe i shkroi KQZ që kërkon të marrë mandatin e deputetit në rast se atij i vjen radha, duke qenë se pozicionohet i nënti në listën e mbyllur të koalicionit Nisma Shqipëria Bëhet. Kjo solli edhe një përplasje në distancë mes Lapajt dhe Shabanit.

Kreu i Shqipëria Bëhet bën fajtor për dajën e tij, Endri Shabanin. Ky i fundit tha se kryeneçësia e Zeqir Kordhonit, për të mos dhënë dorëheqjen nga lista e mbyllur, erdhi pas kreu i “Shqipëria Bëhet” i kërcënoi fëmijët. Në listën e hapur, Lapaj mori në Tiranë 6500 vota, ndërsa Shabani 2 900 të tilla./e.t

Apeli i Posaçëm shqyrton sot ankimin e Ilir Metës kundër vendimit të Shkallës së Parë të 26 qershorit, që vijoi masën “arrest në burg” ndaj ish presidentit.

Para nisjes së seancës në një deklaratë të shkurtër për mediat, avokati i ish-presidentit, Kujtim Cakrani u shpreh: “Patjetër që do lirohet, e ka thënë Ajatollahu sot, do ta lirojmë”.

Pak ditë më parë presidenti i Partisë së Lirisë Ilir Meta, ka bërë ankim në Gjykatën Kushtetuese ndaj vendimit të Gjykatës së Lartë që e la atë në arrest me burg.

Në kërkesën drejtuar Kushtetueses, Meta shprehet se vendimet e 3 gjykatave ai i Gjykatës së Lartë, Gjykatës së Apelit, dhe Gjykatës së Shkallës të Parë, për masën arrest me burg ndaj tij, janë antikushtetuese, pasi shkelin Kushtetutën dhe Konventën Europiane për të Drejtat e Njeriut, duke theksuar se po mbahet në qeli pa akuzë./e.t