Presidenti ukrainas Volodymyr Zelensky ka reaguar i pari pas telefonatës që pati me presidentin amerikan Donald Trump.

Ai pohoi shkurtimisht zhvillimin e kësaj bisede, por pa dhënë detaje. E vetmja e re që ai njoftoi, ishte edhe prezenca e liderëve të tjerë europianë të pranishëm, që kanë qenë në linjë gjatë bisedës.

“Pata një bisedë me Presidentin Trump. Kjo bisedë u zhvillua pas vizitës në Moskë të përfaqësuesit të Presidentit Trump, Steve Witkoff”, tha Zelensky në Telegram, duke specifikuar se “liderët evropianë ishin të pranishëm” në këtë bisedim, pa thënë se cilët. m.p.

Pesë ushtarë amerikanë u qëlluan në Fort Stewart në bazën e Xhorxhias. Sipas një zyrtari të zbatimit të ligjit dyshohet se u qëlluan nga një ushtar tjetër.

Mediat ndërkombëtare bëjnë të ditur se i dyshuari është në paraburgim dhe detaje të mëtejshme rreth identitetit të tij nuk janë bërë menjëherë të ditura. Zyrtarët ushtarakë pritej të mbanin një konferencë për shtyp më vonë të mërkurën.

Ushtarët e plagosur u trajtuan në vend dhe më pas u transportuan në Spitalin Komunitar të Ushtrisë Winn për trajtim të mëtejshëm, tha Fort Stewart në një postim në Facebook. Autoritetet nuk dhanë detaje të mëtejshme mbi gjendjen e të plagosurve.

“Nuk ka asnjë kërcënim aktiv për komunitetin”, thuhej në postim.

Forcat e rendit iu përgjigjën raportimeve për të shtëna me armë në zonën e Ekipit Luftarak të Brigadës së 2-të të Blinduar në orën 10:56 të mëngjesit ET dhe baza u mbyll menjëherë pas orës 11:04 të paradites. I dyshuari u arrestua në orën 11:35 të paradites, tha Fort Steëart.

Guvernatori Brian Kemp shkroi në X se ai dhe familja e tij ishin “të trishtuar nga tragjedia e sotme” në bazë.

“Ne po i mbajmë familjet e tyre dhe të gjithë ata që i përgjigjen thirrjes për të shërbyer në zemrat dhe lutjet tona, dhe u kërkojmë banorëve që të bëjnë të njëjtën gjë”, shtoi ai.

Presidenti Donald Trump është informuar për të shtënat dhe po monitoron situatën, tha sekretarja e shtypit e Shtëpisë së Bardhë, Karoline Leavitt, në X.

Të shtënat masive janë relativisht të zakonshme në SHBA, ku armët janë gjerësisht të disponueshme, dhe bazat ushtarake, të cilat janë ndër vendet me sigurinë më të lartë në vend, nuk janë kursyer. m.p.

Sugjerimi është i fuqishëm, ndez diskutimet mes tifozëve si në rrjetet sociale, ashtu edhe në bar-kafe. Ndoshta krijon të njëjtin efekt edhe në numrin 8 të rrugës “Aldo Rossi” në Milano. Një temë që po rritet dita-ditës me intensitet dhe zëra, sepse kthimi i mundshëm i Adriano Gallianit te Milani do të ishte një lajm bombastik.

Një skenar që për momentin mbështetet në dy siguri. E para është se jemi ende në nivelin e hipotezës; thënë ndryshe, nuk ka asgjë të shkruar me shkrim, të zezë mbi të bardhë deri tani. Nga ana tjetër, nuk mund të ndodhë ndryshe: nëse “martesa e dytë” do të ndodhë me të vërtetë, ish-administratori i deleguar i kuqezinjve duhet të përfundojë më parë procesin e shitjes së Monzës. Pra, mbyllja e vërtetë e transaksionit me “Beckett Layne Ventures”, fondin amerikan që ka blerë klubin brianzol nga “Fininvest”.

Siguria e dytë, megjithatë, është se diçka po përgatitet me patjetër. Ka arsye të forta për të kuptuar më shumë, nëse është e vërtetë. Në fakt, është e vërtetë që Galliani dhe Cardinale janë takuar personalisht në javët e fundit. Një bisedë që vështirë se mund të konsiderohet thjesht takim për mirëkuptim. Një takim që mund të ketë qenë i lehtësuar nga Flavio Briatore, mik i madh i Gallianit dhe i lidhur profesionalisht me “RedBird”, aksionerin kryesor të Milanit dhe pjesë e grupit të investitorëve që kanë blerë 24% të “Alpine” në Formula 1, klub i drejtuar pikërisht nga Briatore.

Çështja qëndron te sa i thellë ka qenë ky takim ballë për ballë. A ishte një takim për t’u njohur dhe për të vlerësuar njëri-tjetrin, siç kishte bërë Cardinale me Ibrahimovic, apo janë vënë themelet për një rikthim real të Gallianit? Populli kuqezi thotë po, duke imagjinuar se prania e ish-drejtorit mund të zgjidhë, për shembull, çështje të “peshës politike” të klubit në skenën e futbollit dhe njëkohësisht të shërbejë si udhëheqës në aspektin e merkatos.

Por duhet qartësi që në fillim. Nëse ky skenar do të realizohej, Galliani nuk do të zëvendësonte askënd. Scaroni do të mbetej president, ashtu si Furlani do të vazhdonte të ishte administrator i deleguar. Mund të themi se do të krijohej një rol i veçantë, një lloj super-këshillimi personal. Ndoshta i lidhur, si Ibrahimovic, direkt me “RedBird” dhe jo me Milanin. m.p.

Qeveria braziliane ka kërkuar zyrtarisht konsultime me Organizatën Botërore të Tregtisë (OBT) në lidhje me tarifat e vendosura nga Shtetet e Bashkuara mbi produktet braziliane, njoftoi ministria e jashtme.

Kjo kërkesë, e dorëzuar pranë misionit amerikan në OBT përfaqëson hapin e parë zyrtar në një mosmarrëveshje tregtare.

“Brazili ka paraqitur një kërkesë për konsultime me Shtetet e Bashkuara të Amerikës (SHBA) në kuadër të Sistemit të Zgjidhjes së Mosmarrëveshjeve të Organizatës Botërore të Tregtisë (OBT),” thuhet në një deklaratë të Ministrisë së Jashtme.

Presidenti Luiz Inacio Lula da Silva kishte paralajmëruar më herët se qeveria e tij do të paraqeste një ankesë formale për të kërkuar anulimin e tarifave amerikane, të cilat ai i konsideron si shkelje të rregullave të tregtisë ndërkombëtare.

Masat tarifore në fjalë janë vendosur Donald Trump, i cili vuri një tarifë prej 50% për importet amerikane nga Brazili, një veprim që ai e lidhi me atë që e quajti një “gjueti shtrigash” kundër aleatit të tij politik, ish-Presidentit Jair Bolsonaro, i cili aktualisht po përballet me gjyq për komplot të dyshuar për grusht shteti pas humbjes së tij në zgjedhjet e vitit 2022.

Sipas Ministrisë braziliane të Zhvillimit, Industrisë dhe Tregtisë (MDIC), rreth 36% e eksporteve të Brazilit drejt SHBA-ve do të preken nga këto tarifa.

“Duke imponuar këto masa, SHBA-të shkelin në mënyrë flagrante angazhimet thelbësore të marra nga ai vend ndaj OBT-së, siç është parimi i kombit më të favorizuar dhe kufijtë e tarifave të negociuara brenda asaj organizate”, shtoi deklarata. m.p.

Një vatër zjarri ka shpërthyer mbrëmjen e sotme edhe fshatin turistik të Dhërmiut, në Himarë.

Sipas informacioneve paraprake, flakët kanë rënë pranë varrezave të fshtatit, ku janë përhapur me shpejtësi dhe përbëjnë rrezik, pasi aty pranë ndodhen edhe banesa të banuara.

Flakët kanë djegur sipërfaqe të konsiderueshme me bimësi, shkurre e pemë, ndërsa janë njoftuar edhe autoritetet vendore dhe zjarrfikësja për ndërhyrje të menjëhershme. m.p.

I dërguari im i posaçëm, Steve Witkoff, sapo pati një takim shumë produktiv me Presidentin rus Vladimir Putin. Është arritur përparim i madh!”.

Ky ishte reagimi i Presidentit amerikan Donald Trump në Truth Social pas përfundimit të takimit vendimtar në Moskë.

“Më pas, i informova disa nga aleatët tanë evropianë. Të gjithë janë dakord se kjo luftë duhet të përfundojë dhe ne do të punojmë drejt kësaj në ditët dhe javët në vijim”, tha më tej presidenti i SHBA-së.

Dhe telefonatën e tij me liderët europianë, konkretisht udhëheqësit e Britanisë së Madhe, Gjermanisë, Finlandës dhe shefin e NATO-s Mark Rutte, së bashku me presidentin e Ukrianës Volodymyr Zelensky e konfirmuan më pas burime nga Kievi për AFP-në.

Ndërkohë, New York Times duke cituar burime pranë administratës amerikane raporton se Trump dëshiron të takohet me Putinin javën e ardhshme dhe do të dëshiron që takimi të pasohet nga një samit trepalësh me Presidentin ukrainas, Volodymyr Zelensky.

Dy samitet nuk pritet të përfshijnë asnjë udhëheqës evropian. Sakaq Zelensky në bisedën telefonike me Trump ka thënë se diskutuan “atë për të cilën u ra dakord në Moskë”. m.p.

Florentino Perez ka identifikuar 3 emrat e mëdhenj që pritet t’i bashkohen Real Madridit verën e vitit ardhshëm, falas. I pari dihet që është Ibrahima Konate. Francezi ka refuzuar ofertat e vazhdueshme të Liverpool-it për rinovim të kontratës dhe ka zgjedhur të vazhdojë karrierën te Real Madrid.

Xabi Alonso e donte qendërmbrojtësin francez që këtë verë, por Liverpool kërkoi 50 milionë euro, shifër shumë e majme, duke ditur që lojtari mund të vijë pas një viti falas. Dy yjet e tjerë për të cilët drejtuesit e Real Madrid kanë nisur që tani nga puna për të siguruar “firmën” e tyre verën e ardhshme janë Dayot Upamecano dhe Gianluigi Donnarumma. 27-vjeçari francez i Bayern Munich ka refuzuar deri tani rinovimin e kontratës me bavarezët dhe transferimi falas te Real Madrid shihet si një mundësi e mirë për të. m.p.

Rreth 4 hektarë pyll me pisha janë djegur brenda pak orëve në Gjinoqarë të Patosit.

Sipas kryeplakut Nuri Gllava, masivi pyjor ka dekada pa pastruar ndaj është dhe shumë e vështirë ndërhyrja e mjeteve zjarrfikëse.

Nëse nuk do të ketë ndërhyrje përveç mjeteve rrethanore, situata do të dalë jashtë kontrollit e madje rrezikohen edhe zonat e banuara të fshatrave përreth.

Ndërkohë, zjarrfikësit, strukturat e bashkisë dhe banorët e zonës po luftojnë me flakët me mjete rrethanore, ndërkohë që era favorizon përhapjen e flakëve në disa drejtime, duke e bërë situatën edhe më kritike. m.p.

Një helikopter ushtarak u rrëzua në rajonin Ashanti të Ganës jugore të dielën dhe si pasojë e aksidentit ajror mbetën të vdekur tetë personat që ndodheshin në bord.

Helikopteri ushtarak Z-9 u rrëzua në rrethana të paqarta menjëherë pas ngritjes nga kryeqyteti Accra, gjatë rrugës për në qytetin Obuasi.

Si pasojë e përplasjes kanë ndërruar jetë edhe ministrat e Mbrojtjes dhe Mjedisit të vendit. Julius Debra, shefi i Shtabit të Presidentit John Mahama, njoftoi në një konferencë për shtyp se ministri i Mbrojtjes Edward Omane Boama dhe ministri i Mjedisit, Shkencës dhe Teknologjisë Ibrahim Murtala Mohammed u vranë tragjikisht në aksident.

Gjithashtu u vranë Alhaji Muniru Mohammed, zv/Koordinatori i Sigurisë Kombëtare dhe ish-Ministri i Bujqësisë, Samuel Sarpong, nënkryetari i Kongresit Demokratik Kombëtar (NDC), ish-kandidati parlamentar Samuel Aboajye dhe tre anëtarë të ekuipazhit.

“Është një tragjedi kombëtare”, tha Julius Debra, duke njoftuar se flamujt në të gjithë vendin do të ulen në gjysmë shtizë, pasi është ditë zie në Gana. m.p.

Si Axios ashtu edhe Reuters raportojnë se presidenti amerikan Donald Trump po flet tani me presidentin ukrainas, Volodymyr Zelensky.

Reuters po transmeton një citat me një rresht nga një zyrtar i Shtëpisë së Bardhë, i cili thotë se sanksionet dytësore ndaj Rusisë pritet të zbatohen të premten.

Kremlini tha se i dërguari i SHBA-ve, Steve Witkoff dhe Vladimir Putin i Rusisë kanë zhvilluar bisedime “konstruktive”, ndërsa afati i fundit i Donald Trump që Moska të bjerë dakord për një armëpushim në Ukrainë afrohet.

Ndihmësi i politikës së jashtme Yuri Ushakov tha se, gjatë takimit të tyre tre-orësh, Putin i transmetoi “sinjale” Witkoff mbi atë që ai e quajti “çështja ukrainase” dhe “mori sinjale përkatëse” nga pala amerikane.

Më shumë rreth negociatave do të ndahet pasi Witkoff t’i raportojë Trump, shtoi Ushakov.

Presidenti amerikan ka thënë se Rusia mund të përballet me sanksione të rënda ose të shohë sanksione dytësore të vendosura kundër të gjithë atyre që tregtojnë me të nëse nuk ndërmerr hapa për t’i dhënë fund “luftës së tmerrshme” me Ukrainën. m.p.

Milan ka zyrtarizuar transferimin e Ardon Jasharit nga Club Brugge për 39 milionë euro, bashkë me bonuset. Por, Ardon Jashari ndoshta nuk do jetë futbollisti i vetëm shqiptar te Milan.

“La Gazzetta dello Sport” raporton se drejtuesit e Milanit po punojnë për të transferuar një qendërmbrojtës, duke qenë të pasigurt për të ardhmen e Malick Thiaw. 23-vjeçari gjerman është përfolur shumë për një largim nga kuqezinjtë këtë sezon, ai mund të përdoret në një operacion shkëmbimi me Dusan Vlahovic te Juventus. Përveç Juventusit, për Thiaw ka interes edhe nga ekipe të tjera të njohura.

Në këtë mënyrë, drejtuesit e Milanit po ndjekin tre emra për të forcuar qendrën e mbrojtjes: Pietro Comuzzo i Fiorentinës, Giovanni Leoni i Parmës dhe Berat Gjimshiti i Atalantës.

Ndryshe nga dy emrat e parë të cilët janë të rinj dhe ka një lloj pasigurie nëse do arrinin të përshtateshin menjëherë te Milan, për Gjimshitin nuk ka kush dyshime duke ditur që është një mbrojtës me përvojë dhe eksperiencë dhe një nga më të mirët në Serie A. Gjimshiti është përfolur shpesh për një transferim te Milan, por me ardhjen e Igli Tares si drejtor sportiv, transferimi i tij është më afër se kurrë. Po ashtu, kosto e Gjimshitit është më e përballueshme për kuqezinjtë sesa dy lojtarët e tjerë, të cilët kushtojnë më shumë. m.p.

Një skandal i përmasave të mëdha po trondit politikën greke, pasi dyshohet se qindra miliona euro nga fondet e Bashkimit Evropian për bujqësinë janë përfituar në mënyrë të paligjshme përmes deklarimeve të rreme dhe aktiviteteve fiktive.

Sipas një hetimi të nisur nga Zyra e Prokurorit Publik Evropian (EPPO), zyrtarë të lartë të Ministrisë së Bujqësisë dhe agjencisë përgjegjëse për shpërndarjen e fondeve të BE-së, OPEKEPE, kanë qenë pjesë e një skeme të mirëorganizuar që shmangte kontrollet dhe lejonte shpërndarjen e ndihmës financiare për përfitues të paligjshëm.

Por hetimet rrezikojnë të bllokohen pas një vendimi të Kryeministrit grek Kyriakos Mitsotakis, i cili në një deklaratë tha:

“Greqia në vitin 2025 nuk ka nevojë për skandale, por për të vërtetën.”

Dosja e EPPO-së, e gjatë mbi 3 mijë faqe, përfshin përgjime dhe transkripte ku përmenden të paktën pesë ish-ministra apo ministra aktualë dhe dhjetë deputetë të partisë në pushtet, Demokracia e Re.

Skandali u bë publik nga portali evropian “Politico”, i cili zbuloi dokumentet e hetimit. Sipas raportimeve, Bashkimi Evropian i ka kërkuar Greqisë të kthejë rreth 400 milionë euro – mbi 20% e fondeve të planifikuara për vitin e ardhshëm.

Mes personave nën hetim janë ish-ministrat Lefteris Avgenakis dhe Makis Voridis. Sipas dokumenteve të EPPO-së, Voridis akuzohet se ka detyruar dorëheqjen e ish-presidentit të OPEKEPE, Grigoris Varras, pasi ky i fundit raportoi kullota të rreme në vitin 2020. Ndërkohë, Avgenakis dyshohet se ka shkarkuar një tjetër president të agjencisë, Evangelos Simandrakos, i cili kishte bllokuar mbi 9 mijë pagesa të dyshimta.

Brukseli ka paralajmëruar se do të ndjekë çështjen me seriozitet të plotë, ndërsa në Athinë mbetet e paqartë nëse hetimet do të vazhdojnë apo do të bllokohen përfundimisht nga qeveria Mitsotakis. m.p.

Një aksident detar është regjistruar mesditën e së martës pranë ishullit Diaporos, në zonën turistike të Halkidikit në Greqi.

Sipas autoriteteve portuale greke, një skaf me shtatë persona në bord gjashtë shtetas nga Kosova dhe një shtetas amerikan është përplasur në një breg shkëmbor.

Si pasojë e përplasjes, tre persona mbetën të plagosur. Fillimisht ata morën ndihmën e parë në Qendrën Shëndetësore të Agios Nikolaos, ndërsa më pas u transportuan në Spitalin e Përgjithshëm të Poligyros.

Të tre personat janë jashtë rrezikut për jetën dhe tashmë janë lënë të lirë nga spitali.

Skafi, i cili mësohet se ishte marrë me qira, është përmbysur pas përplasjes dhe më pas është tërhequr në breg.

Autoritetet e Portit të Ormos Panagias kanë nisur hetimet për të zbardhur rrethanat e aksidentit. Deri më tani nuk raportohet për ndotje detare si pasojë e ngjarjes. m.p.

Drejtësia argjentinase ka nisur një hetim penal ndaj një burri të dyshuar për vrasjen dhe copëtimin e të paktën 5 personave në shtëpinë e tij.

I dyshuari, 37 vjeç, përballet me akuza për “vrasje seriale” “me rrethana rënduese” pasi ai tregoi “mizori”. Ai tani është lënë në paraburgim.

Hetimi ka të bëjë me vrasjen e të paktën pesë personave që ishin zhdukur. Pas analizimit të pamjeve nga sistemet e mbikëqyrjes, hetimi u përqendrua në shtëpinë e autorit të dyshuar, ku u gjetën pjesë të trupit të njerëzve si kocka, lëkurë dhe shenja gjaku.

Në pronën që u kontrollua, një adoleshent 16-vjeçar, i cili u prezantua si nipi i pronarit, dyshohet se u tha oficerëve të policisë: “Dua të flas, dua të them se çfarë ka ndodhur”.

Ai tha se xhaxhai i tij dilte të premteve pas drekës dhe kthehej në mbrëmje me njerëz të ndryshëm. Me sa duket, ai u ofronte punë dhe pastaj i ftonte të pinin diçka në shtëpinë e tij. m.p.

Ambasada Amerikane ka hapur dyert këtë të mërkurë për deputetët e rinj të Kuvendit të Shqipërisë.

“Së fundmi, personeli i Ambasadës së Shteteve të Bashkuara u takua me anëtarë të sapozgjedhur të Kuvendit për të kuptuar shqetësimet e komuniteteve të tyre dhe përparësitë në prag të fillimit të mandatit. Ne presim me kënaqësi të punojmë me përfaqësues të zgjedhur nga i gjithë spektri politik për të vijuar partneritetin tonë të ngushtë me Shqipërinë”, thuhet në njoftimin e ambasadës. m.p.

Aktori i njohur i Hollivudit, Brad Pitt, është tronditur nga një lajm i hidhur në familje. Nëna e tij, Jane Etta Pitt, është ndarë nga jeta në moshën 84-vjeçare.

Lajmi për vdekjen u konfirmua nga mbesa e saj dhe e aktorit, Sydney, në një postim në rrjetet sociale, informon media. Sydney është vajza e vëllait të vogël të aktorit, Doug Pitt, dhe përmes llogarisë së saj në Instagram, ajo i tha lamtumirë gjyshes së saj, të cilën e përshkroi si një person plot dashuri dhe mirësi.

“Nuk ishim gati të të thoshim lamtumirë ende, por fakti që tani je e lirë të këndosh, të kërcesh dhe të pikturosh përsëri e bën pak më të durueshme”, shkroi ajo, duke shtuar: “Kushdo që e njihte Grammy e dinte se ajo kishte zemrën më të madhe. Ajo kujdesej thellë për të gjithë dhe për gjithçka, pa pyetur pse. “Ajo më mësoi të pikturoja, të isha e fortë, të udhëheqja me mirësi, ta doja Jezusin në të gjitha dhe të gjeja gëzim në gjërat më të vogla”. m.p.

Mladen Milinkovic është trajneri i ri i Partizani. Pasi mbylli aventurën e tij në Malin e Zi me Buducnost Podgorica, tekniku serb ka vendosur të nisë një “udhëtim” të ri në Shqipëri.

Për Milinkovic është një rikthim në Superiore, pasi më parë ka drejtuar Luftëtartn dhe Kukësin. Ndërkohë që te Partizani, 57-vjeçari serb do të marrë vendin e Skënder Gegës, i cili dha dorëheqjen disa ditë më parë. m.p.

Ministria e Mbrojtjes ka njoftuar se ekipet zjarrfikëse, të mbështetura nga Forcat e Armatosura, Policia e Shtetit dhe ndërhyrja nga ajri, po punojnë për të vënë nën kontroll flakët që kanë përfshirë zonat e Çerkovicës dhe Dhivrit në bashkinë Finiq.

Sipas autoriteteve, efektivët janë angazhuar prej orësh në terren, duke luftuar me intensitet për të ndaluar përhapjen e zjarrit dhe duke ndihmuar në evakuimin e përkohshëm të banorëve që ndodhen brenda perimetrit të rrezikut.

Agjencia Kombëtare e Mbrojtjes Civile vijon të monitorojë situatën nga afër dhe po bashkëpunon ngushtë me të gjitha strukturat përkatëse për të garantuar sigurinë e banorëve dhe për të minimizuar dëmet.

Zjarri në Finiq është një ndër disa vatra aktive në vend, teksa temperaturat e larta dhe erërat e forta kanë vështirësuar ndërhyrjen në terren. m.p.

Më në fund është zyrtare. Futbollisti me origjinë shqiptare që përfaqëson kombëtaren e Zvirës, Ardon Jashari, është lojtar më i ri i Milanit.

“AC Milan njofton blerjen e përhershme të Ardon Jasharit nga Club Brugge”, thuhet në një deklaratë nga kuqezinjtë, teksa janë publikuar edhe imazhet e Jasharit që hedh firmën mbi kontratë.

“Mesfushori zviceran ka nënshkruar një kontratë deri më 30 qershor 2030. I lindur në Cham (Zvicër) më 30 korrik 2002, Ardon erdhi nga akademia e të rinjve në FC Luzern, ku bëri debutimin e tij me ekipin e parë në korrik 2020, duke bërë 102 paraqitje dhe duke shënuar nëntë gola. Në verën e vitit 2024, ai u transferua në Club Brugge, ku bëri 52 paraqitje dhe katër gola, duke fituar Kupën e Belgjikës. Jashari ka katër ndeshje për ekipin kombëtar të Zvicrës, ku bëri debutimin e tij në shtator 2022. Ardon Jashari do të veshë fanellën me numrin 30 për Rossonerët”, thuhet më tej në njoftim.

Pasi mbërriti në Linate të martën në mbrëmje, Jashari shkoi në klinikën “La Madonnina” herët në mëngjes për t’iu nënshtruar vizitave të zakonshme mjekësore. Më pas ai iu nënshtrua një testi fizik në Centro Ambrosiano dhe nënshkroi kontratën e tij në Casa Milan. m.p.

Ndërtimi i urës që do të lidhë ishullin e Siçilisë me Italinë kontinentale do të fillojë para fundit të verës, sipas njoftimeve të sotme nga ministria e Infrastrukturës e qeverisë Meloni.

Kostoja totale e projektit është 13.5 miliardë euro dhe përfundimi i tij është planifikuar për vitet 2032-2033. Gjatësia e urës do të kalojë 3.6 kilometra dhe për ta përshkuar këtë distancë me makinë do të duhet 15 minuta.

Dy kullat, në fillim dhe në fund të urës, do të jenë 399 metra të larta. Kjo infrastrukturë e veçantë është projektuar për t’i bërë ballë tërmeteve deri në 7.7 ballë, duke pasur parasysh që zona është sizmike, dhe erërave deri në 200 kilometra në orë.

Ky është një “bast” personal i sekretarit të “Lega Nord” dhe ministrit të Transportit Matteo Salvini, i cili këmbënguli veçanërisht në domosdoshmërinë e projektit, me logjikën se ndër të tjera do të rrisë ndjeshëm punësimin.

Parashikimi përkatës thotë se mund të krijohen deri në 120,000 vende të reja pune, përveçse ura do ta afrojë Siçilinë me pjesën tjetër të Italisë.

Opozita italiane, nga ana e saj, tërheq vëmendjen ndaj rrezikut të infiltrimit nga kontraktorë të lidhur me mafian dhe nënvizon se përparësi duhet t’u jepet dhjetëra veprave të tjera infrastrukturore të tjera që kanë nevojë urgjente për përforcim dhe mirëmbajtje, siç janë lidhjet hekurudhore në Italinë Jugore.

Menaxherët e projektit garantojnë se “Ura e Mesinës” do të zgjasë të paktën dy shekuj, por shumë organizata ekologjike përgjigjen se çmimi, në aspektin e shkatërrimit të pasurisë mjedisore të rajonit, do të jetë shumë i lartë.

Shuma e taksës që shoferët do të duhet të paguajnë për të kaluar në këtë urë ende nuk është përcaktuar. Ministria e Transportit, megjithatë, i siguron italianët se “çmimet do të jenë konkurruese dhe plotësisht të arsyeshme”.

Ura më e madhe në botë në kategorinë e saj do të ndërtohet me fonde kombëtare dhe evropiane. Një pjesë e shumës, në fakt, duhet të konsiderohet si shpenzim mbrojtës , pasi do të lehtësojë lidhjet strategjike rrugore në rast lufte. Në këtë mënyrë, qeveria Meloni pritet të jetë në gjendje t’i afrohet më lehtë qëllimit të ndarjes së 5% të PBB-së së vendit për shpenzimet e mbrojtjes. m.p.