Kandidati për deputet i koalicionit PD-ASHM, Aulon Kalaja, i cili nuk siguroi mandat në zgjedhjet e 11 Majit ka ngritur padi në SPAK dhe ka kërkuar sekuestrimin e kutive me pretendimin se janë tjetërsuar votat.

Në një deklaratë për media jashtë ambjenteve të SPAK, Kalaja tha se duhet bërë hetim i gjithanshëm, pasi sipas tij ka të bëjë me krim zgjedhor.

Ai tha se bëhet fjalë për 3 persona që kanë bashkëpunuar, kanë marrë vota dhe i kanë dërguar tek një x kandidat.

“SPAK të sekuestrojë kutitë, ndërkohë do e çoj në Kushtetuese. Bëhet fjalë për 3 persona që kanë bashkëpunuar, kanë marrë vota dhe i kanë dërguar tek një x kandidat. Kjo nuk diskutohet fare. Duhet bërë hetim i gjithanshëm, ky është krim zgjedhor.

Është një grup i strukturuar kriminal bëhet fjalë për bashkëpunim të një grupi numëruesish me një person të caktuar që ka përfituar vota në këtë rast. Ka njerëz që kanë futur duart tek votat e shqiptarëve duke i marrë 42 vota një kandidati, nuk është gabim njerëzor.

I kam përcaktuar kutitë ku ka krim zgjedhor, SPAK i ka gati. Është hetim shumë i thjeshtë.

Beteja ime do të vazhdojë, kam depozituar dy kallëzime  këtu. Ndërkohë do të vazhdoj edhe në Kushtetuese për të goditur Kolegjin Zgjedhor që më rrëzoi për legjitimitet dhe një vendim tjetër që Kodi Zgjedhor ua pamundëson kandidatëve procesin e numërimit të votave, është antikushtetues.

Jam në dy procese paralele, në SPAK për sekuestrimin e kutive dhe rinumërimin dhe në Kushtetuese pikërisht për këtë nen”, tha Kalaja.

Një 34-vjeçar është arrestuar nga policia, pasi akuzohet se ka përndjekur ish të dashurën e tij.

Sipas uniformave blu mësohet se i riu me iniciale K. M., ishte në kërkim policor, për veprat penale “Përndjekja” dhe “Falsifikimi kompjuterik”.

Gjithashtu dyshohet se 34-vjeçari ka lënë 2 fishekë arme gjahu në oborrin e banesës së familjarëve të ish të dashurës për t’i kërcënuar.

“Si rezultat i kërkimeve të bazuara te informacionet e inteligjencës policore, me qëllim kapjen e shtetasve të shpallur në kërkim, si dhe falë bashkëpunimit ndërmjet shërbimeve të komisariateve të Policisë Nr. 2, Nr. 5 dhe Nr. 6, u lokalizuan dhe vunë në pranga shtetasit:

-K. M., 34 vjeç, i cili ishte në kërkim policor, për veprat penale “Përndjekja” dhe “Falsifikimi kompjuterik”. Ai dyshohet se ka përndjekur ish të dashurën e tij, në rrjete sociale. Gjithashtu, dyshohet se ky shtetas, ka lënë 2 fishekë arme gjahu, në oborrin e banesës së familjarëve të kësaj shtetaseje, me qëllim kanosjen.

Fishekët u sekuestruan me cilësinë e provës materiale”, njofton policia.

Materialet procedurale iu referuan Prokurorisë së Tiranës, për veprime të mëtejshme.

Irani nuk ka plane për ta braktisur programin e vet bërthamor, përfshirë pasurimin e uraniumit, pavarësisht dëmit të madh që u është shkaktuar qendrave të veta, si pasojë e sulmeve amerikane muajin e kaluar, ka thënë ministri i Jashtëm iranian, Abbas Araghchi.

Në një intervistë për kanalin televiziv amerikan, Fox News, Araghchi ka thënë se momentalisht pasurimi i uraniumit është ndalur, sepse “dëmet janë serioze dhe të rënda”.

“Por, natyrisht që ne nuk mund të heqim dorë nga pasurimi, sepse është arritje e shkencëtarëve tanë”, ka thënë ai, duke e konsideruar gjithë këtë proces si “krenari kombëtare”.

Sipas tij, çdo marrëveshje bërthamore që mund të arrihet, duhet ta ketë të përfshirë edhe të drejtën për pasurim uraniumi.

Kur është pyetur nëse uraniumi i pasuruar është ruajtur diku nga sulmet, Araghchi ka thënë se “nuk ka informacion të detajuar”, por që Organizata e Iranit për Energji Atomike është duke tentuar “të bëjë vlerësime se çfarë ka ndodhur saktësisht me materialin e pasuruar”.

Uashingtoni i ka bombarduar tri qendra bërthamore në Iran më 22 qershor për të mbështetur ofensivën ushtarake 12-ditore të Izraelit.

Ushtria amerikane e ka shënjestruar edhe qendrën kryesore për pasurim të uraniumit, Fordo, që gjendet në jug të Teheranit.

Presidenti amerikan, Donald Trump ka thënë disa herë që sulmet kanë rezultuar me sukses dhe që të tria qendrat iraniane “janë shkatërruar plotësisht”.

Deklaratat e ministrit iranian vijnë teksa Teherani pritet të zhvillojë bisedime të reja për programin bërthamor me Gjermaninë, Francën dhe Mbretërinë e Bashkuar. Bisedimet do të zhvillohen të premten në Stamboll.

Sa u përket negociatave me Shtetet e Bashkuara për shtensionim rajonal, Araghchi ka thënë se Irani është i hapur për bisedime, por “jo direkte në këtë periudhë”.

Ai ka thënë se Teherani është i gatshëm të ndërmarrë çdo veprim që kontribuon në ndërtim besimi për të dëshmuar që programi bërthamor është për qëllime paqësore, në këmbim të heqjes së sanksioneve amerikane.

Ministri iranian e ka pranuar se Irani do të vazhdojë të zhvillojë dhe prodhojë raketa.

Pavarësisht një numri të konsiderueshëm të raketave që janë nisur drejt Izraelit përgjatë konfliktit 12-ditor, Araghchi ka pretenduar se Irani ka ende “një sasi raketash për ta mbrojtur veten”.

I pyetur për shëndetin e liderit suprem të Iranit, Ayatollah Ali Khamenei, i cili është parë rrallë në publik prej sulmeve izraelite, ministri iranian ka thënë se e ka takuar së fundmi, dhe që ai gëzon “shëndet shumë të mirë”./REL

Miliona studentë dhe nxënës në Gjermani mezi presin pushimet verore.

Por kur fillojnë ato për kë?

Çdo vit kjo temë ringjall mosmarrëveshje midis shteteve federale – një ritual tipik gjerman.

Pse nuk i kanë të gjithë nxënësit dhe shkollat në Gjermani pushimet verore në të njëjtën kohë?

Rreth 11.4 milionë fëmijë dhe të rinj ndjekin shkollat në Gjermani. Nëse ata dhe familjet e tyre do të shkonin të gjithë me pushime në të njëjtën kohë, pasoja do të ishte bllokim edhe më i madh i trafikut në autostrada, trena dhe hotele të mbipopulluara.

Kjo është arsyeja pse 16 landet e Gjermanisë i fillojnë pushimet në kohëra të ndryshme. Kështu, për shembull, në Saksoni, pushimet verore gjashtëjavore në vitin 2025 kanë filluar në fund të qershorit, ndërsa në Bavari ato do të fillojnë në fillim të gushtit.

Kjo periudhë e zgjatur e pushimeve verore është gjithashtu në interes të sektorit të turizmit. Hotelet, plazhet dhe parqet e argëtimit kanë vizitorë gjatë disa muajve dhe jo vetëm një ose dy muaj kur janë pushimet.

Kush vendos se kur do të jenë pushimet në lande?

Arsimi në Gjermani është përgjegjësi e landeve dhe jo e federatës, pra landet vendosin dhe jo qeveria federale në Berlin. Prandaj, landet janë ato që marrin vendime në mënyrë të pavarur për pushimet shkollore.

Megjithatë, ministrat e arsimit të të gjitha 16 landeve koordinohen mes vete, në të ashtuquajturën Konferencë të Ministrave të Arsimit (Kultusministerkonferenz).

Atje, ata planifikojnë së bashku datat e pushimeve disa vite më parë. Për më shumë se 50 vjet, ata janë përpjekur të harmonizojnë të gjitha interesat në këtë mënyrë.

Kohëzgjatja e mësimeve duhet të jetë afërsisht e njëjtë në të gjitha landet. Shkollat kanë nevojë edhe për kohë të mjaftueshme për provime e teste para pushimeve dhe festave.

Pse ka grindje çdo vit?

Sepse çdo land do të donte të kishte datat më të mira për pushime. Pra, jo vetëm kohë të mjaftueshme për provime, por edhe sa më shumë diell, fluturime të lira me avionë dhe hotele më të lira për pushime. E çmimet dhe kushtet dallojnë në mes të korrikut nga fundi i gushtit.

Ndaj ka grindje mes përfaqësuesve të landeve se cili prej tyre do të ketë në dispozicion kohën më të mirë për pushime dhe çmimet më të mira për udhëtime.

Megjithatë, mosmarrëveshjet më të mëdha janë me landet: Bavaria dhe Baden-Württemberg, të dyja në jug të Gjermanisë. Ato nuk duan të futen në rotacione, por duan që gjithmonë pushimet t’i kenë të fundit.

Më parë, këto lande justifikoheshim me faktin se fëmijët në shkollat në rajonet bujqësore duhet të ndihmojnë me korrjet e verës. Sot ata i referohen festës Pfingsten.

A ka ndonjë zgjidhje në horizont?

Ende jo. Për vite me radhë, përfaqësues të landeve të tjera u kanë bërë thirrje Bavarisë dhe Baden-Württembergut të bashkëpunojnë. Për shembull, Ministrja e Arsimit e Renanisë Veriore – Vestfalisë (NRW) Dorothee Feller, deklaroi në një intervistë me Westdeutsche Allgemeine Zeitung: “NRW do të donte po ashtu që pushimet të fillojë më vonë.”

Megjithatë, vit pas viti, këto dy lande jugore i hedhin poshtë propozimet e tilla. Kryeministri bavarez Markus Söder i CSU-së konservatore ka hedhur poshtë këto propozime edhe në deklarimet e fundit.

Ai tha në debatin aktual: “Ne kemi ritmin tonë të pushimeve, i cili, si të thuash, është i gdhendur në ADN-në e bavarezëve.”

Por edhe nëse Bavaria dhe Baden-Württembergu do të ndryshonin mendje, ndryshimi do të ishte i mundur vetëm pas pesë vjetësh – sepse të gjitha datat janë dakorduar për pesë vitet e ardhshme.

A ekziston ky problem edhe në vende të tjera?

Gjermania nuk është i vetmi vend ku pushimet verore fillojnë dhe mbarojnë në kohëra të ndryshme. Në Holandë, për shembull, ka tre zona rajonale me fillime të ndryshme të pushimeve verore. Megjithatë, pushimet atje ndryshojnë më së shumti për dy javë, ndërsa oraret caktohen nga Ministria qendrore e Arsimit.

Në disa vende të tjera, si Britania e Madhe, sistemi i rotacionit është diskutuar për një kohë të gjatë. Edhe disa vende të tjera, si Franca, kanë një fillim të ndarë të pushimeve – por nuk ka dallime për pushimet verore të gjata.

Debati vjetor rreth fillimit të pushimeve midis jugut të Gjermanisë dhe pjesëve tjetra të vendit mbetet një ritual veror në këtë vend, një temë e përhershme gjermane./DW

Presidenti ukrainas, Volodymyr Zelensky ka bërë të ditur se më 23 korrik do të mbahet një rund i ri i bisedimeve me Moskën në Turqi, teksa Perëndimi rrit presionin ndaj Kremlinit për t’u pajtuar për një armëpushim, ndonëse forcat ushtarake ruse vazhdojnë të kryejnë sulme vdekjeprurëse në Kiev dhe qytete tjera ukrainase.

“Sot kam diskutuar me Rustem Umerovin për përgatitjet për këmbim të të burgosurve dhe për një takim tjetër me palën ruse në Turqi”, ka thënë Zelensky në adresimin e tij ditor më 21 korrik, duke iu referuar shefit të ri të Këshillit ukrainas për Siguri Kombëtare dhe Mbrojtje.

“Umerov ka raportuar se takimet janë planifikuar të mbahen më 23 korrik”, ka thënë presidenti ukrainas, pa dhënë më shumë hollësi.

Umerov e ka mbajtur në të kaluarën pozitën e ministrit të Mbrojtjes dhe i ka udhëhequr dy runde takimesh me Rusinë.

Dy ditë më parë, Zelensky ka thënë se ia ka dërguar Moskës një ofertë për runde të reja bisedimesh në javët e ardhshme, meqë takimet e zhvilluara muajin e kaluar nuk kanë rezultuar me përparim drejt paqes.

Ai ka thënë se duhet bërë gjithçka që të arrihet armëpushimi.

“Pala ruse duhet t’i japë fund fshehjes nga vendimmarrja”.

Nëse palët do të takohen në Turqi, ky do të jetë takimi tyre i parë pas shtatë javësh. Qeveria turke ka thënë se bisedimet do të zhvillohen në Stamboll.

Kremlini nuk e ka konfirmuar datën apo vendin e rundit të ri të bisedimeve, duke thënë vetëm se është në pritje të më shumë hollësive dhe që dy palët vazhdojnë të kenë pozicione “diametralisht të kundërta”, rreth asaj se si e shohin përfundimin e konfliktit.

Kremlini ka thënë se i mirëpret bisedimet, por që “gjëja më e rëndësishme për ne është që t’i arrijmë synimet tona. Ato janë të qarta. Nuk kanë ndryshuar”.

Moska ka insistuar se çdo marrëveshje për paqe duhet të përfshijë heqjen dorë të Ukrainës nga katër rajonet që Rusia i ka aneksuar ilegalisht në shtator të vitit 2022, mirëpo nuk i ka zotëruar asnjëherë plotësisht.

Presidenti amerikan, Donald Trump është shprehur i mllefosur me mungesën e përparimit dhe i ka dhënë Moskës një afat prej 50 ditësh që të pajtohet për një marrëveshje, ose në të kundërtën do të përballet me sanksione të ashpra.

Presidenti rus, Vladimir Putin i ka refuzuar ftesat e Zelenskyt për një takim ballë për ballë, dhe shpesh e ka vënë në pikëpyetje legjitimitetin e liderit ukrainas.

Lufta në Ukrainë ka nisur më 24 shkurt të vitit 2022.

Putin e quan luftën “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre./REL

Si pasojë e përballjes me një vale të lartë të të nxehtit dhe rritjes së rrezikut nga zjarret në vend, ditën e sotme u zhvillua një mbledhje urgjente e Komitetit të Mbrojtjes Civile, e drejtuar nga ministri Pirro Vengu.

Në mbledhje mori pjesë zëvendës-kryeministrja Belinda Balluku, ministri Ervin Hoxha dhe ministrja Albana Koçiu për të mobilizuar të gjithë trupën dhe zinxhirin e reagimit të emergjencave civile në nivel kombëtar.

Në kushtet kur parashikohen temperatura të larta përgjatë gjithë javës dhe ndërkohë që përpjekjet vijojnë në shumë fronte nga veriu në jug të vendit, Vengu thotë se ndamnë planin e masave me të gjithë titullarët e institucioneve të përfshira në mekanizmin e mbrojtjes civile, prefektët e qarqeve dhe kryetarët e Bashkive më të ekspozuara ndaj zjarreve:

Rritje e nivelit të gatishmërisë së trupave vendore në dispozicion të prefektëve;

Rritje e vigjilencës dhe monitorim i pandërprerë i terrenit në çdo bashki për raportim të menjëhershëm;

Pozicionim i forcave në zonat me risk për të shkurtuar kohën e reagimit;

Ndërhyrja nga ajri do të vijojë me përparësi në zonat e banuara dhe zonat e mbrojtura;

Bashkërendim me mekanizmin Evropian të Mbrojtjes Civile për kapacitete shtesë.

Komiteti i Mbrojtjes Civile është autoriteti më i lartë i përhershëm që bashkërendon veprimtaritë dhe masat ndërinstitucionale të strukturave dhe të gjitha subjekteve të përfshira në mbrojtjen civile, duke përfshirë Forcat e Armatosura, Policinë e Shtetit, Urgjencën Kombëtare, Shërbimet Pyjore, Zonat e Mbrojtura, Autoritetet e Transportit; Meteorologjinë etj.

Është riaktivizuar vatra e zjarrit në malin e Dukatit në Vlorë.

Burime bëjnë me dije se flakët janë përhapur sërish, ndërsa kanë ndërhyrë dy avionë “Canadair” të ardhur nga Greqia.

Kjo prej terrenit mjaft të vështirë dhe emergjencës në një zonë me rëndësi të lartë natyrore.

Pas kërkesës së vendit tonë pranë Mekanizmit të Mbrojtjes Civile të Bashkimit Europian, Italia i çoi dy avionët zjarrfikës edhe në zonën e quajtur “Liqeni i Luleve”, në Parkun Kombëtar të Lurës.

Kujtojmë se situata me zjarrin në Dukat ka qenë kritike prej 10 ditësh tanimë./tvklan

Të qenit i pasur nuk ka të bëjë vetëm me të ardhurat e larta.

Çmimet ndryshojnë nga një vend në tjetrin dhe një pagë modeste mund të ketë më shumë vlerë atje ku kostoja e jetesës është më e ulët.

Edhe orët e punës nuk janë të njëjta: në disa vende arrihen të ardhura të larta me më pak orë pune, duke lënë më shumë kohë për pushim dhe jetë personale. Revista “The Economist” renditI 178 vende duke u bazuar në tre tregues.

I pari është Prodhimi i Brendshëm Bruto për frymë sipas kursit të këmbimit të tregut. Ky është një tregues i thjeshtë, i kuptueshëm dhe i përdorur gjerësisht. Por ai nuk merr parasysh ndryshimet e çmimeve mes vendeve.

Treguesi i dytë rregullon të ardhurat në raport me koston lokale të jetesës (i njohur si barazia e fuqisë blerëse, ose PPP).

Ky jep një pasqyrë më të saktë të standardit të jetesës, por nuk merr parasysh kohën e lirë: pjesëmarrja në tregun e punës dhe gjatësia e orarit të punës ndryshojnë nga një vend në tjetrin.

Treguesi i fundit kombinon të dyja aspektet: çmimet lokale dhe orët e punës, duke ofruar kështu një matës më të plotë të mirëqenies reale.

Në renditje përfshihet dhe Shqipëria e vendet e tjera të Ballkanit Perëndimore, pa Kosovën.

Në treguesin e të ardhurave për frymë, me 10 mijë dollarë, Shqipëria lë pas si Bosnjë Hercegovinën (gati 9 mijë dollarë), ashtu dhe Maqedoninë e Veriut (9.3 mijë dollarë), ndërsa Mali i Zi dhe Serbia kanë përkatësisht 13 dhe 13.5 mijë dollarë të ardhura për frymë në vit.

Shqipëria është e teta në gjithë Europën për renditjen nga fundit të vendeve që kanë të ardhura më të ulëta për frymë, duke lënë pas Azerbaxhanin, Moldavine, Bjellorusinë, Armeninë, Bosnjë hercegovinën, Gjerogjinë, Maqedoninë e Veriut.

Por, kur kalohet në dy treguesit e tjerë, që marrin në konsideratë si diferencat e çmimeve (që përshtat të ardhurat për ndryshimet e kostos së jetesës në vende të ndryshme) ashtu dhe treguesi i fundit që llogarit të ardhurat duke u bazuar në çmimet dhe orët që punohet (Tregon sa pasuri gjenerohet realisht për orë pune në çdo vend.

Ky është treguesi më i drejtë për të krahasuar efikasitetin ekonomik të popullsisë punëtore), të ardhurat relative ulen, duke reflektuar çmimet e shtrenjta, ndërkohë që orët e punës janë të gjata. Shqiprarët kanë të ardhurat më të ulëta në rajon, krahasuar me fuqinë blerëse, pas Bosnjë Hercegovinës dhe janë të katërit në Europë, pas Moldavisë, Bosnjë Hercegovinës dhe Armenisë.

Ndërkohë që në Maqedoninë e Veriut kjo shifër arrin në mbi 30 mijë dollarë dhe, në Serbi 31.6 mijë në Mal të Zi në mbi 36 mijë, Shqipëria mbetet shumë më pas në vlerën ekonomike që prodhon për çdo orë pune.

Madje, edhe Bosnja dhe Hercegovina, me një PBB nominale më të ulët për frymë, arrin të ketë një produktivitet të krahasueshëm me Shqipërinë kur bëhet fjalë për të ardhurat efektive të punës.

Ky pozicionim i dobët lidhet jo me numrin e ulët të orëve të punës, përkundrazi Shqitarët punojnë një rekord prej 43.7 orë në javë, nga 36.1 orë mesatarja europiane, por me strukturën e tregut të punës dhe natyrën e ekonomisë shqiptare.

Pjesa më e madhe e punës kryhet në sektorë me vlerë të ulët të shtuar – si bujqësia informale, tregtia e vogël apo shërbimet jo-produktive – të cilat nuk gjenerojnë të ardhura të mjaftueshme krahasuar me kohën e investuar.

Në krahasim me vendet e Bashkimit Europian, hendeku është edhe më i madh. Sipas The Economist, vendet si Zvicra dhe Irlanda arrijnë të gjenerojnë mbi 90 mijë dollarë për frymë në vit të korrigjuar për orë pune.

Edhe vende me ekonomi më të strukturuara si Gjermania, Austria apo Suedia luhaten në shifrat 70–80 mijë dollarë. Shqipëria, me pak më shumë se 26 mijë, mbetet shumë larg këtij standardi.

Analiza e The Economist shtron një mesazh të qartë për vendet në zhvillim si Shqipëria: rritja e produktivitetit nuk vjen vetëm nga më shumë punë, por nga punë më efikase, më të mirëpaguar dhe në sektorë me teknologji më të lartë dhe me më shumë vlerë të shtuar.

Në mungesë të reformave strukturore në arsim, punësim dhe teknologji, Shqipëria rrezikon të ngelet një vend ku punohet shumë, por ku shpërblimi ekonomik mbetet modest./Monitor

I nxehti afrikan vijon ndikimin e tij edhe gjatë ditës së martë, duke sjellë mot të kthjellët dhe temperatura të larta, ku vlera ekstrem priten në zonat jugore deri në 40 gradë Celcius.

Orët e pasdites sjellin prezencë të vranësirave të pakta në të gjithë territorin e vendit, ku më të dukshme do të jenë në zonat verilindore dhe juglindore.

Mundësia për reshje është thuajse zero. Rritet ndjeshëm lagështira relative në ajër duke bërë që i nxehti të ndjehet edhe më shumë.

Temperaturat e ajrit do të rriten lehtë në mëngjes dhe në mesditë, duke luhatur vlerat ditore nga 13°C temperatura më e ulët e shënuar në qytetin e Ersekës deri në 40°C vlera më e lartë e cila pritet për-gjatë Ultësirës Perëndimore.

Një shpërthim tronditi lagjen nr. 3 të Sarandës pak para mesnatës së 21 korrikut.

Dyshohet se një sasi lënde eksplozive ka shpërthyer në një automjet të parkuar, duke shkaktuar dëme materiale.

Mjeti rezulton në pronësi të 31-vjeçarit K. J., person i shpallur në kërkim për “Përkrahje të autorit të krimit”, në lidhje me plagosjen me armë të dy personave më 17 korrik.

Grupi hetimor ndodhet në vendngjarje dhe po punon për zbardhjen e plotë të atentatit dhe identifikimin e autorëve.

Kujtojmë se konflikti mes tyre nisi brenda një lokali për motive të dobëta duke agravuar në përdorim armësh.

Përpos 31 vjeçarit, në kërkim janë edhe tre persona të tjerë.

“Dyshohet se 43-vjeçari R. Z. ka hapur zjarr ndaj dy të rinjve nga Tirana, G. H., 33 vjeç, dhe E. L., 25 vjeç, të cilët u plagosën rëndë dhe ndodhen në Spitalin e Traumës në Tiranë.

Personat në kërkim janë: R. Z., 43 vjeç, për “Vrasje në rrethana të tjera cilësuese”, e mbetur në tentativë, dhe bashkëpunëtorët E. C., 36 vjeç, A. M., 43 vjeç, dhe K. J., 31 vjeç, për “Përkrahje e autorit të krimit”, sqaronte Policia./tvklan

Sllovenia është përfshirë nga stuhi të forta me reshje të rrëmbyeshme shiu, erëra të forta dhe breshër.

Raportet për dëmet e shkaktuara nga stuhia tashmë po vijnë nga shumë vende. Disa mijëra përdorues të kompanisë “Elektro Ljubljana” mbetën pa energji elektrike. Agjencia e Mjedisit ka lëshuar një paralajmërim portokalli për pjesën më të madhe të vendit, raporton Index.hr.

Siç bëjnë me dije mediat vendase, pasdite, pjesa perëndimore e Sllovenisë, përgjatë kufirit me Italinë, u prek nga një stuhi më e fortë që po lëviz drejt lindjes së vendit.

Index raporton se gjatë pasdites, një stuhi më e fortë preku zonën e Bovacit dhe Kobaridit, dhe më pas u zhvendos drejt Kranjit dhe Kamnikut. Një lexues nga Horjul raportoi se era rrëzoi çatinë e një shtëpie të vjetër.

Për shkak të pemëve të rrëzuara në rrugë, trafiku është i vështirësuar në autostradat për në Dolenjska dhe Primorska, si dhe në rrugët anësore jugore dhe perëndimore të Lubjanës , njoftoi Qendra e Informacionit për Trafikun, e cila u bëri thirrje shoferëve të jenë të kujdesshëm dhe ta përshtatin drejtimin e tyre me kushtet e motit.

Në zonën e Lubjanës, më shumë se 6,000 përdorues të Elektro Ljubljana mbetën pa energji elektrike – kryesisht në zonat Horjul, Polhov Gradec, Domžale, Litija dhe Grosuplje.

Koalicioni qeverisës në Japoni ka humbur shumicën në Dhomën e Lartë të Parlamentit, por kryeministri Shigeru Ishiba ka bërë të qartë se nuk ka ndërmend të dorëhiqet nga detyra, pavarësisht rezultatit të pafavorshëm.

Zgjedhjet e zhvilluara të dielën u mbajtën në një klimë të shtuar pakënaqësie publike, të nxitur nga rritja e kostos së jetesës dhe tensionet në rritje në marrëdhëniet tregtare me Shtetet e Bashkuara.

Pas përfundimit të procesit të votimit, kryeministri Ishiba pranoi se rezultati ishte “i ashpër” dhe “i rëndë”, por nënvizoi se qeveria e tij do të vijojë punën për përmirësimin e kushteve ekonomike dhe avancimin e negociatave tregtare.

Koalicioni i përbërë nga Partia Liberale Demokratike (LDP) dhe partnerja e saj, Komeito, kishte nevojë për të paktën 50 mandate për të ruajtur shumicën në dhomën me 248 vende. Në fund të procesit zgjedhor, arriti të siguronte vetëm 47 vende.

Ndërkohë, Partia Demokratike Kushtetuese, opozita kryesore, fitoi 22 mandate, duke u renditur si forca e dytë më e madhe politike në këto zgjedhje.

Në këtë proces u votua për gjysmën e vendeve në Dhomën e Lartë, anëtarët e së cilës zgjidhen për mandate gjashtëvjeçare. Humbja e fundit për koalicionin qeverisës vjen pas një tjetër disfate të rëndësishme në vitin e kaluar, kur humbi kontrollin edhe në Dhomën e Ulët, gjë që pritet të ndikojë ndjeshëm në axhendën legjislative të qeverisë.

Rreth 167 qytetarë kanë aplikuar për t’u bërë pjesë e administratës së bashkisë së Shkodrës deri më sot, 21 korrik, pas vendeve të reja që u hapën me dorëheqjet masive. Kryetari i Bashkisë së Shkodrës Benet Beci e ka bërë të ditur numrin e aplikimeve përmes një postimi në rrjetet sociale, ku njofton qytetarët se afati i fundit është data 25 korrik.

“Bashkia Shkodër fton të gjithë ata që duan të kontribuojnë në shërbim të komunitetit, të sjellin eksperiencën, energjinë dhe idetë e tyre për zhvillimin e qytetit dhe të gjithë territorit të saj”, shton Beci, duke u bërë thirrje qytetarëve të interesuar që të dërgojnë CV-të e tyre në emailin zyrtar të bashkisë.

Ai shton se: “Bashkia e hapur për profesionistët dhe për të gjithë ata që e duan Shkodrën.”

Pozicionet janë të hapura për arkitektë, inxhinierë, ekonomistë, juristë, zjarrfikës, punonjës të Policisë Bashkiake dhe shumë profile të tjera.

Më herët edhe kryeministri Edi Rama i inkurajoi të interesuarit që të aplikojnë për pozicionet drejtuese në bashkitë e vendit, si pjesë e një procesi të ri që ai ka nisur për fuqizimin e administratës vendore. Sipas tij, synimi i gjithë kësaj është për të sjellë prurje të reja dhe për të ngritur cilësinë e qeverisjes vendore./tvklan.al

Shërbimet e sigurisë të Ukrainës kanë arrestuar një zyrtar nga një njësit kryesor kundër korrupsionit, nën akuza se ka spiunuar për Rusinë.

Edhe pse Ukraina dhe Rusia kanë arrestuar dhjetëra spiunë të dyshuar gjatë luftës që Rusia nisi kundër Ukrainës më 2022, rastet e spiunazhit brenda agjencive qeveritare janë të rralla.

“Një punonjës i zyrës qendrore të NABU-s [Byrosë Kombëtare të Ukrainës kundër Korrupsionit] është arrestuar”, tha shërbimi i sigurisë, SBU.

“Ai ka punuar në njësinë më elite, D-2 dhe ka spiunuar për shërbimet e posaçme ruse”, u tha në njoftim, ku nuk u publikua emri i zyrtarit të arrestuar.

Më herët, SBU-ja kreu bastisje në zyrat e NABU-s dhe në zyrën e prokurorëve të specializuar kundër korrupsionit.

NABU njoftoi se po zhvillon një “rishikim të brendshëm” dhe po “heton bazën ligjore të veprimeve të ndërmarra, përfshirë përdorimin e forcës ndaj një punonjësi”.

Kjo byro shtoi se më parë kishte kryer një hetim së bashku me SBU-në, i cili nuk kishte gjetur “asnjë provë” për të mbështetur akuzat kundër tij.

“Nuk ka prova që zyrtari në fjalë të ketë qenë i përfshirë në aktivitete kundër shtetit”, deklaroi NABU.

SBU-ja, ndërkohë, ka pretenduar se i dyshuari ka dërguar informacione të klasifikuara te një zëvendësshef i sigurisë së ish-presidentit ukrainas, Viktor Yanukovich, i cili u rrëzua nga pushteti në vitin 2014 dhe tani jeton në Rusi.

Një video e publikuar nga SBU-ja tregon persona të armatosur me uniforma kamuflazhi duke e nxjerrë të dyshuarin me forcë nga një veturë, duke e shtyrë përtokë dhe duke e prangosur.

Nëse shpallet fajtor, ai përballet me deri në 15 vjet burg.

NABU u krijua pas revolucionit proevropian të vitit 2014, si pjesë e reformave që synonin ta afronin Kievin me Evropën, në një kohë kur vendi po përballej me separatistët e mbështetur nga Moska në lindje.

Një turist nga Maqedonia e Veriut ka ndërruar jetë pasditen e sotme në Shkëmbin e Kavajës.

Sipas njoftimit të policisë, dyshohet se 66-vjeçari ka humbur jetën pas një arresti kardiak që pësoi pas hyrjes në det.

Njoftimi i policisë:

Rreth orës 19:00, në Shkëmbin e Kavajës, shtetasi Sh. A., 66 vjeç, banues në Maqedoni, dyshohet se ka pësuar arrest kardiak pasi ka hyrë në det e për pasojë ka humbur jetën.

Grupi hetimor vijon punën për dokumentimin e shkakut të humbjes së jetës së 66-vjeçarit.

Rrjetet sociale po shërbejnë si një mundësi e jashtëzakonshme promovimi për vendin tonë. Me video të shkurtra, ritmike dhe me pamje spektakolare nga destinacionet më unike që ka Shqipëria, në pak kohë merret një informacion që mund të ndikojë në planet e turistëve për ta vendosur vendin tonë në hartën e udhëtimeve.

“Beautiful Destinations”, një rrjet i njohur informimi dhe promovimi në Instagram dhe një nga platformat që krijon dhe shpërndan videot më të bukura, ka pasur një fokus të veçantë tek ajo çfarë ofron Shqipëria.

Video që ka marrë mijëra pëlqime, komente pozitive dhe shpërndarje virale ka nisur me plazhet, malet, ushqimin, mikpritjen, vendet historike dhe trashëgiminë kulturore të vendit tonë. Në pak sekonda përdoruesit e gjerë të rrjetit online kanë marrë një informacion të dobishëm se çfarë duhet të vizitojnë kur në planin e tyre të afërt, të zbresin në tokën e shqiponjave.

Klan News

Policia e Kosovës tha se gjatë një kontrolli të kryer më 21 korrik gjeti dy raketahedhës krahu në një kompleks të pabanuar banesor në Mitrovicë të Veriut.

“Në vendin e ngjarjes kanë dalë njësitë relevante policore, përfshirë edhe njësinë e specializuar për trajtimin e mjeteve shpërthyese. Gjatë kontrollit, policia ka gjetur dhe sekuestruar dy armë të llojit zolla [raketahedhës krahu], prodhim serb”, u tha në njoftimin e Policisë.

Sipas saj, armët janë sekuestruar dhe më pas Prokurori i Shtetit ka urdhëruar inicimin e rastit për veprën penale “mbajtje në pronësi, kontroll ose posedim të paautorizuar të armëve”.

Lidhur me këtë rast reagoi edhe ministri në detyrë për Punë të Brendshme të Kosovës, Xhelal Sveçla.

Ai fajësoi Serbinë se përveç se nuk distancohet nga këto armë të prodhimit serb “dhe veprimet në veri të vendit”, por “për vite me radhë i ka stimuluar, organizuar dhe furnizuar grupet terroriste dhe bandat kriminale, me të vetmin qëllim: cenimin e integritetit territorial dhe rendit kushtetues të Republikës së Kosovës”.

Sveçla shtoi se pavarësisht shteti është i vendosur të çmontojë çdo prani kriminale apo potencialisht terroriste në Kosovë.

“Çdo ditë e më shumë po e kthejmë rendin në atë pjesë të territorit dhe, bashkë me të, edhe investimet dhe zhvillimin për të gjithë qytetarët, pa dallim”, shkroi ai në Facebook.

Autoritetet kosovare kanë gjetur armë të llojeve të ndryshme kohë pas kohe në pjesë të ndryshme të Kosovës, kryesisht në pjesën veriore, të banuar me shumicë serbe.

Në maj, autoritetet thanë se kishin gjetur një punishte të armëve në Mitrovicën e Veriut dhe gjatë aksionit u raportua se u sekuestruan sasi armatimi dhe pjesë të ndryshme të armëve./REL

Zjarrfikësit janë përballur me zjarre në mbarë Shqipërinë dhe Maqedoninë e Veriut më 21 korrik, teksa një valë e re e të nxehtët ka goditur rajonin e Ballkanit.

Shtatë zjarre të mëdha janë raportuar në Maqedoninë e Veriut ku temperaturat pritet të arrijnë në 42 gradë Celsius të martën, thanë autoritetet.

Pesë zjarre janë jashtë kontrollit në Shqipëri, ku temperaturat të hënën ishin nga 37 deri në 41 gradë Celsius.

Në Kroaci, një zjarr afër qytetit turistik Sibhik ka shpërthyer dhe dhjetëra ekspertë të emergjencave civile dhe gjashtë avionë janë angazhuar për shuarjen e flakëve.

Disa nga vatrat e zjarreve në Kroaci janë aktive që disa ditë, teksa kryetarët e komunave janë ankuar se nuk kanë burime të mjaftueshme për t’i luftuar zjarret.

Kosova po ashtu përballet me temperatura të larta, sikurse edhe Serbia.

Ndërkaq, veriu i Bosnje e Hercegovinës pritet të përballet me temperatura deri në 40 gradë Celsius./rel

Ministria e Mbrojtjes njoftoi pasditen e sotme se shërbimet zjarrfikëse me ndihmën e ndërhyrjes nga ajri kanë arritur të fikin zjarrin në Belsh që rrezikonte zonat e banuara.

Në njoftimin e shpërndarë për mediat, bëhet me dije se në zonë do të vijojnë qëndrimin forcat e MZSH Belsh dhe punonjës të bashkisë, të cilët po kryejnë krehjen e plotë të terrenit për të shmangur rindezjen e ndonjë vatre të fshehur.

Po ashtu, Ministria theksoi se pas thirrjes për ndihmë, Italia ka dërguar dy avionë zjarrfikës të tipit Canadair, të cilët po operojnë aktualisht në zonën e “Liqenit të Luleve”, brenda Parkut Kombëtar të Lurës, ndërsa Greqia ka angazhuar dy avionë Canadair në përballimin e zjarrit në Dukat të Vlorës

Njoftimi i Ministrisë së Mbrojtjes:

Pas një operacioni të koordinuar dhe intensiv është bërë e mundur fikja e të gjitha vatrave të zjarrit në Njësinë Administrative Rrasë, në bashkinë Belsh.

Falë ndërhyrjes së shpejtë të forcave zjarrfikëse nga MZSH Belsh, Cërrik, Gramsh, Elbasan, Peqin dhe Njësia Nerat Kuçovë si dhe angazhimit të dy mjeteve zjarrfikëse dhe efektivëve të FA u arrit të shmangej përhapja e flakëve drejt zonave të banuara.

Në operacion morën pjesë edhe dy helikopterë që ndërhynë nga ajri, duke ndihmuar në neutralizimin dhe shuarjen e zjarrit në një terren të vështirë. Aktualisht, në terren ndodhen ende efektivët e MZSH Belsh dhe punonjës të bashkisë, të cilët po kryejnë krehjen e zonës për të shmangur riaktivizimin e ndonjë vatre të fshehur.

Ndërkohë, pas kërkesës së Shqipërisë pranë Mekanizmit të Mbrojtjes Civile të Bashkimit Europian, Italia ka ardhur në ndihmë me trupa dhe dy avionë zjarrfikës të tipit Canadair, të cilët po operojnë në zonën e quajtur “Liqeni i Luleve”, në Parkun Kombëtar të Lurës. Kjo ndërhyrje synon të përshpejtojë shuarjen e vatrave aktive në këtë zonë me rëndësi të lartë natyrore. Po përmes Mekanizmit Evropian te Mbrojtjes Civile, Greqia erdhi në ndihmë me dy avionë Canadair në vatrën e zjarrit në Dukat, Vlorë.

Forcat operacionale, nën koordimin e Agjencisë Kombëtare të Mbrojtjes Civile po vijojnë punën në vatrat e tjera, në mbrojtje të qytetarëve dhe pronës.

Kina ka filluar ndërtimin e një dige tjetër masive në Tibet. Sipas agjencisë shtetërore të lajmeve Xinhua, Kryeministri Li Qiang njoftoi fillimin e projektit me një ceremoni simbolike në Nyingchi, në jug të rajonit autonom, pranë kufirit me Indinë.

Me digën në lumin Yarlung Tsangbo, Kina synon të transportojë sasi të mëdha energjie elektrike në zona të tjera, por edhe të sigurojë energji për rajonin. Sipas të dhënave zyrtare, Pekini vlerëson se ndërtimi i digës, e cila do të përbëhet nga pesë termocentrale, do të kushtojë 1.2 trilion juanë (pothuajse 144 miliardë euro).

Tre herë më e madhe se Diga e Tre Grykave
Partia Komuniste e kishte përfshirë ndërtimin e digës në planin aktual pesëvjeçar. Dhjetorin e kaluar, Pekini më në fund i dha dritë të gjelbër projektit. Diga pritet të gjenerojë 300 miliardë kilovat orë energji elektrike në vit. Kështu, do të ketë tre herë më shumë kapacitet se Diga e famshme e Tre Grykave në lumin Jance dhe do të jetë diga më e madhe në botë. Kina beson se projekti kontribuon në qëllimin e saj për të arritur kulmin e emetimeve të dioksidit të karbonit deri në vitin 2030 dhe për t’u bërë neutral ndaj klimës deri në vitin 2060.

Megjithatë, ky megaprojekt ngre shqetësime mjedisore për dëmtime serioze të natyrës. Në të kaluarën, ekspertët kanë paralajmëruar vazhdimisht për pasojat shkatërruese ekologjike të një dige kaq gjigante. Për më tepër, zona është e prirur ndaj tërmeteve.

Shqetësime për një “luftë uji”
Për më tepër, projekti është shqetësues për Indinë dhe Bangladeshin, vende të vendosura në rrjedhën e poshtme të Yarlung Tsangpo-së. Yarlung Tsangpo, i quajtur Brahmaputra në Indi, është një nga lumenjtë më të gjatë në botë, me rreth 3.000 kilometra. Nga Himalajet në Tibet, ai rrjedh nëpër Indi dhe Bangladesh, ku derdhet në Ganges dhe përfundimisht në Gjirin e Bengalit. Nëse Kina do të ndërtonte digë për ujin në rrjedhat e sipërme, kjo do të kishte pasoja për vendet fqinje. Ekspertët kanë paralajmëruar tashmë për një “luftë uji”.

Prandaj, India e ka paralajmëruar Kinën se diga nuk duhet të ndikojë në furnizimin me ujë të vendeve fqinje. Për më tepër, diga ndodhet pranë një zone mbi të cilën Pekini dhe Nju Delhi kanë pretenduar prej kohësh të drejta territoriale. Kina e quan rajonin Zangnan, ndërsa në Indi njihet si Arunachal Pradesh. Mosmarrëveshja për territorin ka çuar në tensione të përsëritura diplomatike midis dy vendeve më të populluara në botë në muajt e fundit./dw