Kreu i Partisë Demokratike, Sali Berisha,  ka reaguar lidhur me lajmin e trishtë për ndarjen nga jeta para kohe të gazetarit të njohur shqiptar, Artur Zheji.

Nëpërmjet një postimi në rrjetin e tij social Facebook, Berisha shkruan se  gazeteri, analisti, botuesi, publicisti i mirënjohur Artur Zheji mbylli sot, papritmas dhe parakohe, sytë përgjithmonë.

“Duke shprehur ngushëllimet e mia më të ndjera familjes, miqve të afërmëve, unë lutem së bashku me ta që shpirti i Arturit të tyre të dashur të gjejë paqen e merituar. Amin”, shprehet Berisha.

“Miq, gazeteri, analisti, botuesi, publicisti i mirënjohur Artur Zheji mbylli sot, papritmas dhe parakohe, sytë përgjithmonë. Duke shprehur ngushëllimet e mia më të ndjera familjes, miqve të afërmëve, unë lutem së bashku me ta që shpirti i Arturit të tyre të dashur të gjejë paqen e merituar. Amin” – shkruan Berisha./e.t

Një automjet është shkrumbuar pasditen e sotme në zonën e Pyllit të Sodës në Vlorë, duke vënë në rrezik edhe hapësirën e gjelbër përreth. Flakët u përhapën me shpejtësi dhe për pak çaste rrezikuan të përfshijnë masivin pyjor.

Në vendngjarje ndërhynë me urgjencë forcat zjarrfikëse, të cilat arritën ta vendosin situatën nën kontroll, duke shmangur përhapjen e mëtejshme të zjarrit.

Policia ka nisur hetimet për të zbardhur shkaqet e ngjarjes, ndërsa ende nuk ka të dhëna nëse zjarri ka qenë aksidental apo i qëllimshëm. Fatmirësisht nuk raportohen të lënduar./e.t

“I gjithë ishulli është i tronditur, ne qëndrojmë pranë familjes në këto orë tragjike. Çfarë mund të thuhet në këto raste”, thonë banorët e Paxos, pas lajmit tragjik të vdekjes së një vajze katërvjeçare shqiptare, e cila u mbyt në pishinën e një vile.

Babai dhe gjyshi i vajzës janë bënë në pranga nga autoritetet nën akuzën e neglizhencës ndaj të miturës.

Kryebashkiaku i ishullit, Spyros Vlachopoulos , tha se “prindërit e fëmijës kur e kuptuan se mungonte në shtëpi, njoftuan policinë. Të gjithë u mobilizuan, mbërriti policia greke dhe rreth 1 orë më vonë, rreth orës 16:50, për fat të keq u gjet pa jetë në pishinën e një vile”.

“Informacioni im është se fëmija është parë nga një fqinj, 100 metra larg. Fatkeqësisht, megjithëse kishte njerëz që jetonin në vilë, askush nuk ishte në gjendje ta kuptonte që fëmija kishte rënë në ujë dhe ta ndihmonte”, theksoi më tej ai./e.t

Sekretari i Mbrojtjes në Shtetet e Bashkuara të Amerikës, Pete Hegseth ka shkarkuar nga detyra shefin e inteligjencës së Pentagonit, disa javë pas reagimit të ashpër nga Shtëpia e Bardhë ndaj raportit që nxori kjo agjenci për efektivitetin e sulmeve amerikane ndaj Iranit.

Raportet e mediave amerikane bëjnë me dije se gjeneral-lejtnant Jeffery Kruse nuk do të shërbejë më si kreu i Agjencisë Amerikane të Inteligjencës së Mbrojtjes (DIA), ndërkohë që u shkarkuan dhe dy komandantë të tjerë të lartë.

Në qershor, Presidenti Donald Trump kundërshtoi me forcë një raport të publikuar të DIA-s, i cili zbuloi se sulmet amerikane ndaj Iranit vetëm sa e kishin penguar programin e tij bërthamor me muaj. Shtëpia e Bardhë e deklaroi vlerësimin e agjencisë si krejtësisht të gabuar./e.t

Kryeministri Edi Rama ka ndarë pamje nga Ura e Dragotit, të cilën e vlerëson si një kryevepër inxhinierike mbi lumin Vjosa.

Gjithashtu nënvizon se është një simbol i rëndësishëm i historisë dhe zhvillimit të zonës, teksa me strukturën e saj karakteristike dhe elegancën arkitektonike

“Ura e Dragotit – një kryevepër inxhinierike mbi lumin Vjosa e ndërtuar në vitet 1930, kjo urë lidh Tepelenën me Përmetin dhe është një simbol i rëndësishëm i historisë dhe zhvillimit të zonës, teksa me strukturën e saj karakteristike dhe elegancën arkitektonike, mbetet një pikë referimi për udhëtarët që eksplorojnë bukuritë e Parkut Kombëtar të Vjosës”, shkruan Rama.

Këngëtarja me famë botërore, Dua Lipa festoi dje 30-vjetorin e datëlindjes, ndërsa ka zbuluar për fansat disa foto nga festa me miqtë dhe partnerin e saj Callum Turner. Dua shfaqet në superformë dhe plot energji. Këngëtarja ndau edhe një mesazh të gjatë, përmes së cilit falënderon familjen, miqtë dhe fansat, të cilët e kanë mbështetur në rrugëtimin e jashtëzakonshëm në botën e muzikës.

“Ky vit i fundit rreth diellit ka qenë, pa asnjë dyshim, më i bukuri deri tani. Dhjetë vitet e shkuara kanë qenë një udhëtim i pabesueshëm, shumë më i madh nga çdo ëndërr që kisha bërë ndonjëherë… vitet e mia ’20 ishin thjesht magji. Jo pa sfida apo momente të sikletshme, por të mbushura me më shumë dashuri, gëzim dhe mësime sesa mund ta kisha imagjinuar ndonjëherë. Jam thellësisht mirënjohëse për çdo hap të këtij udhëtimi dhe gjithçka që më ka çuar deri këtu,” – shkruan ajo.

Në mesazhin e saj, Dua Lipa falënderon në veçanti prindërit, Dukagjin dhe Anesa Lipa, duke theksuar se falë tyre ajo, motra dhe vëllai i saj janë ndjerë gjithmonë të lirë për të ëndërruar pa kufij.

“Për të gjithë ata që kanë qenë në këtë rrugëtim me mua – nga klubet e vogla deri te Ëembley Stadium, kudo në botë – faleminderit që e keni lënë muzikën të jetë vendi ku jemi takuar, rritur dhe kemi ndarë kaq shumë nga jeta bashkë. Çdo moment e mbaj me vete dhe kurrë nuk do të ndal së qeni mirënjohëse. Pjesa më e bukur është që e di se ka ende shumë përpara… dhe që do ta përjetojmë krah për krah,” – shton këngëtarja shqiptare me famë ndërkombëtare.

Dua Lipa gjithashtu njoftoi se pas pak ditësh rikthehet në turneun e madh me albumin Radical Optimism, që do të përfshijë Kanadanë e SHBA-në deri në fund të vitit.

“E dua këtë jetë, e dua këtë udhëtim, dhe nuk e marr kurrë si të mirëqenë asnjë moment të saj. Ja për 30 vitet e ardhshme e më tej… gjithçka bëhet vetëm më e bukur,” – përfundon Dua Lipa postimin e saj./e.t

Nuk ka shfaqur asnjë shenjë pendese 40 vjeçari shqiptar në Greqi, Pandeli Nakoleci, i cili një ditë më parë vrau me thikë bashkëshorten e tij 36 vjeçare.

Mediat greke shkruajnë se në momentin e arrestimit ai ka thënë përpara policëve, se kishte bërë shumë mirë që e kishte vrarë atë.

“Ia bëra mirë, e meritonte, nuk pendohem për asgjë”, raportojnë mediat.

Krimi brutal ndodhi në Volos të Greqisë, ku 40-vjeçari Pandeli Nakoleci vrau gruan e tij 36-vjeçare Marjeta, me të cilën ka katër fëmijë.

Sherri filloi në apartamentin e tyre dhe çifti zbriti në hyrje të pallatit ku vazhduan të ziheshin. Më pas, burri dyshohet se vrau gruan e tij me një objekt të mprehtë dhe u largua menjëherë nga vendi i krimit për t’u arrestuar ditën e shtunë, jo shumë larg. /E.T

Antonio Piromalli, i njohur si një nga krerët e mafies kalabreze ‘Ndrangheta kërkoi një privilegj të pazakontë në burgun e Parmës ku ndodhet në regjim të ashpër 41-bis: Të lejohej të hante darkë pas orës 22:00. Kërkesa e tij u motivua thjesht me fjalët: “Sepse kështu jam mësuar”.

Por Gjykata e Kasacionit e refuzoi kërkesën, duke theksuar se rregullat e regjimit të 41-bis janë të rrepta dhe nuk lejojnë përjashtime, madje as për ushqim të preferuar. Sipas rregullores, pajisjet për gatim në qelitë e posaçme fiken në orën 20:00.

53 vjeçari Piromalli kishte kërkuar të përgatiste pjata tradicionale, duke u mbështetur në të drejtën për “ushqim të përshtatshëm për kushtet personale”. Por drejtësia italiane nuk lejoi asnjë përjashtim.

Rasti rikujton skandale të mëparshme si ai i burgut Poggioreale, ku disa të burgosur kishin përfituar trajtim luksoz. Me këtë vendim, Gjykata dha një mesazh të qartë se 41-bis nuk është hotel, por një regjim i hekurt ku nuk lejohet asnjë privilegj. /E.T

Kreu i partisë Reform UK, Nigel Farage, do të kërkojë deportimin masiv të azilkërkuesve në një projektligj të ri për migracionin e paligjshëm që pritet të miratohet më 26 gusht. Në një intervistë me The Times të botuar të shtunën, politikani i ekstremit të djathtë, partia e të cilit aktualisht kryeson vazhdimisht në sondazhe, tha se migrantët që vijnë në Britani me anije të vogla duhet të arrestohen me të mbërritur, të ndalohen në bazat e Forcave Ajrore Mbretërore, tu mohohet e drejta e azilit dhe të deportohen brenda 30 ditëve.

“Qëllimi i këtij legjislacioni janë deportimet masive”, tha Farage për The Times, duke treguar një krizë masive në Britani që “jo vetëm që përbën një kërcënim për sigurinë kombëtare, por po çon në zemërim publik që, sinqerisht, nuk është shumë larg çrregullimit”.

Projektligji do të përfshijë nënshkrimin e marrëveshjeve me vende si Afganistani dhe Eritrea, dy nga pesë vendet kryesore nga të cilat vijnë shumica e njerëzve që mbërrijnë me anije të vogla, sipas të dhënave nga Ministria e Brendshme.

Reform UK është e hapur për të rishikuar planin e partisë Konservatore për deportimin e azilkërkuesve në Ruandë, pavarësisht faktit se Gjykata e Lartë vendosi që plani ishte i paligjshëm në vitin 2023 dhe argumenton se Shqipëria mund të jetë një tjetër mundësi destinacioni.

Një kritik i hershëm i Konventës Evropiane për të Drejtat e Njeriut, Farage thotë se projektligji i propozuar do ta nxjerrë Mbretërinë e Bashkuar nga KEDNJ-ja, një ide e mbështetur edhe nga disa udhëheqës konservatorë. Tërheqja nga KEDNJ-ja do të kërcënonte marrëveshjen e paqes të së Premtes së Madhe të Irlandës së Veriut, e cila përfshin pjesëmarrjen në KEDNJ si një masë mbrojtëse.

“Mund të jemi të mirë me njerëzit, mund të jemi të mirë me vendet e tjera, ose mund të jemi shumë të ashpër me vendet e tjera… Dua të them se (Presidenti i SHBA-së Donald) Trump e ka vërtetuar këtë pikë në mënyrë mjaft gjithëpërfshirëse”, tha Farage.

I pyetur nëse ishte i shqetësuar se azilkërkuesit do të vriteshin ose torturoheshin nëse dërgoheshin në vende me të dhëna të dobëta për të drejtat e njeriut, Farage tha se ishte më i shqetësuar për kërcënimin që ai besonte se azilkërkuesit përbënin për britanikët.

“Nuk mund të jem përgjegjëse për regjimet tiranike në mbarë botën. Por mund të jem përgjegjëse për sigurinë e grave dhe vajzave në rrugët tona”, tha ai.

Farage tha se ai gjithashtu dëshiron të shfuqizojë Aktin e të Drejtave të Njeriut të Mbretërisë së Bashkuar dhe dëshiron shmangie nga një numër traktatesh të tjera që mbrojnë të drejtat e njeriut, si Konventa e OKB-së Kundër Torturës dhe Konventa për Refugjatët.

Të dhënat e Ministrisë së Brendshme e çojnë numrin total të kërkesave për azil në 111,000 në vitin që përfundon në qershor 2025, gjysma e të cilëve mbërritën nëpërmjet “rrugëve të parregullta”. Kjo është më pak se numri i azilkërkuesve në Gjermani, Spanjë, Itali dhe Francë. Shkalla e dhënies së azilit ishte 48 përqind gjatë asaj periudhe. Sipas të dhënave, rreth 43,000 njerëz mbërritën me varka të vogla në të njëjtën periudhë.

Gazeta “Times” raportoi se Farage dëshiron të ndërtojë objekte paraburgimi për 24,000 emigrantë në bazat ajrore me një kosto prej 2.5 miliardë paundësh (3.4 miliardë dollarë) dhe të operojë pesë fluturime deportimi çdo ditë, me numrin total të deportimeve që arrin në qindra mijëra njerëz. Nëse kjo dështon, azilkërkuesit do të ndalohen në Ishullin Ascension, një territor britanik jashtë shtetit në Atlantikun Jugor, për të dërguar një mesazh simbolik./E.T

Jo më larg se gati 1 vit më parë gazetari dhe publicisti i ndjerë Artur Zheji që u nda nga jeta këtë të shtunë, ka shkruar një shkrim për vdekjen.

Shkrimi i publikuar në 3 tetor të vitit 2024 përshkruan mes rreshtave me një gjuhë letrare si të ishte një postulat parashikimi për tragjedinë e tij të ndodhur këtë shtunë, duke e përshkruar si një fenomen që vjen befas dhe shfaqet si një “Zonjë madhështore”.

Në shkrimin e mëposhtëm do të lexoni se si vetë gazetari krejt natyrshëm ka folur për vdekjen, këtë “Mbretëreshë të Zezë” si ai e quan, që e mori krejt papritur dhe në mënyrë tragjike këtë të shtunë për ta dërguar drejt banesës së tij të fundit.

Shkrimi i plotë:

Ka pak raste të rralla, ku njeriu i vogël, apo njeriu i vetëpandehur i madh, zhubroset, tkurret dhe vjen befas në vete!

Krenare dhe me vështrim të tejpërtejshëm, duke kërrusur në trup dhe në fytyrat e vrerosura, madhështitë e rreme të viktimave të saj të ardhshme.Dhe zagarët ndjehen zagarë dhe jo ndonjë kafshë tjetër.

Dhe kobrat ndjehen nëpërka tinzare e të pabesa, kokëulura dhe banuese të vrimave të fshehta ku thurrin planet e kafshimeve të ardhshme helmuese…

Dhe titullarët e pushtetit trullosen dhe ndjehen Askushi, kur shohin në sytë pa sy Mbretëreshën e Zezë.

Këtë Zonjë madhështore që një ditë vendos Drejtësi Hyjnore, mbi vampirët hipokritë të së përditshmes, ngjeshur dhe fshehur fort mirë, mbas kostumeve dhe kollareve të shtrenjta.

Ata, kinse të vrerosur, parakalojnë kokëulur, në funeral, buzë Zonjës Madhështore, Mbretëreshës së Zezë, me duart me unaza të arta, që ju fshehin paq njollat e gjakut që nuk ju lahen dot.

Ajo qëndron mbi krye të udhëtarit të rradhës për në Botën tjetër dhe i kqyr të gjithë si i kqyr Shqiponja, minjtë brejtës të Vendit tim.

Dhe Mbretëresha, që lodron si fllad në atë log të përzishëm, dëgjon lutjet e tyre të heshtura, që ta shtyjnë sa më shumë takimin me të, të Pakorruptueshmen Absolute!

Por Ajo, e Madhërishmja, vazhdon të lodrojë si fllad, mbi atë gumëzhitje milingonash, gjarpërinjsh e hienash dhe përkëdhel ëmbël veç ata, që njerëzisht vuajnë vërtetë për të ndjerin që Ajo ka ardhë të marrë me vete…

Këtë perceptim ndjeva kur sodisja Funeralin e Shtetit për Ismail Kadarenë në udhëtimin e tij ndërmjet dy Botëve.

Shkrimtari i mprehtë dhe ironik, virtuoz dhe vetmitar në më të shumtën e jetës së tij, vështroi së fundmi shumë nga personazhet që kishte qesëndisur dhe tallur, të mbanin rradhën në funeralin e tij.

Në të vërtetë, kjo është hakmarrja e tmerrshme e mikrobotës, ndaj atyre që i kanë shpërfillur së gjalli, ju vijnë në funeral, duke ja trazuar qetësinë që lipset në këto raste.

Ndaj dhe e mirëkuptova thellësisht Helena Kadarenë, që largoi turmën e Hiçave të shumtë, në çastet e shkurtra të ndarjes me Ismailin e saj.

Kush nuk kupton, nuk është më puna ime!/E.T

Gazetari Artur Zheji u nda nga jeta në mënyrë të papritur pasditen e sotme. Zheji ishte me pushime me familjen e tij në qytetin bregdetar të Sarandës dhe dyshohet se ka pësuar arrest kardiak.

Gazetari po festonte me familjen datëlindjen e të birit, Patrik, në një restorant në rrugën “Butrinti” në Sarandë dhe nuk është ndjerë mirë. Menjëherë ata kanë telefonuar një ambulancë, e cila ka marrë Zhejin rreth orës 16:10 për ta dërguar në spitalin “Petro Nako” të Sarandës, por atje ka mbërritur pa shenja jete.

“Sot, rreth orës 16:10, në afërsi të rrugës “Butrinti”, shtetasi A. Zh., banues në Tiranë, dyshohet se ka shfaqur probleme shëndetësore gjatë qëndrimit në një restorant dhe gjatë transportit drejt spitalit me autoambulancë, ka ndërruar jetë. Vijon puna për sqarimin e plotë të rrethanave të rastit”, informoi Policia e Sarandës.

Reagime të shumta kanë ardhur për ndarjen nga jeta të Zhejit, jo vetëm nga bota e medias, por edhe nga ajo e politikës. Ministri Taulant Balla shkroi “Shumë, shumë i trishtë lajmi për ndarjen e parakohshme të gazetarit Artur Zheji. U prehsh në paqe mik!”

Gazetari Zheji lindi më 29 gusht 1961 dhe u nda nga jeta në moshën 64-vjeçare. Ai la pas bashkëshorten, dhe dy fëmijët, djalin 22-vjeçar dhe vajzën 19 vjeç.

Zheji është angazhuar për dekada në fushën e gazetarisë dhe publicistikës në Shqipëri. Ka mbajtur funksione drejtuese në disa media, si tek RTSH dhe gazeta Mapo. Veprimtaria e tij përfshin analiza politike, shkrime editoriale dhe drejtimin e programeve televizive. Që nga viti 2017, ai është drejtues i emisionit politik dhe analitik 360 Gradë./e.t

Ky është vendi ku u lokalizua dhe u arrestua i fshehur Pandeli Nakoleci, shqiptari 40-vjeçar në foto, që akuzohet se vrau me thikë ditën e djeshme në Volos, në pallatin ku jetonin, bashkëshorten e tij 36-vjeçare, nënë e katër fëmijëve.

Ai ishte fshehur në një truall toke aty pranë, vetëm 200 metra nga vendi ku ndodhi krimi. Nakoleci u gjet rrugën Evripidou dhe sipas informacioneve ai ishte fshehur në një parcelë toke dhe mbante veshur rroba që i gjeti në një kosh plehrash. Ai nuk kishte telefon celular apo ndonjë objekt tjetër me vete.

I fshehur në bar, ku ishte shtrirë edhe për të fjetur gjatë natës, i rraskapitur dhe i dobët, ai iu dorëzua policisë pa asnjë rezistencë

“Disa orë më parë, policia u njoftua nga një qytetar se brenda kësaj parcele toke ndodhej një person dhe pak më vonë dëgjuam zëra dhe dolëm jashtë. Pamë se e arrestuan burrin në fjalë, pa bërë rezistencë”, tha një dëshmitar okular.

I dyshuari ishte person me precedentë të shumtë penalë, i dënuar disa herë për drogë e organizatë kriminale, me probleme të shëndetit mendor dhe i kartelizuar. Krimi ndodhi pas debateve në familje mes çiftit dhe në sy të fëmijëve të viktimës dhe autorit./e.t

“Letërkëmbimi i Fan Nolit” na sjellë korrespodencën e Nolit mes Enver Hoxhës dhe Sejfulla Malëshovës për amanetin që i kishte lënë Faik Konica.

Libri “Letërkëmbimi i Fan Nolit”, është botim i shtëpisë botuese “Erik”, i përgatitur nga studiuesi Nasho Jorgaqi. Mes 544 letrave është edhe korrespondenca mes Nolit dhe Enver Hoxhës. Një pjesë e tyre është botuar në të përditshmen DITA.

Në dhjetor të vitit 1942, Faik Konica do të mbyllte sytë. Pak kohë para vdekjes i shkruante Nolit:

“Ndërroj jetë me mejtimin se ti je njeriu që më ke kuptuar më mirë në këtë botë… (shkruar nga dora e Konicës, kjo duket boll e çuditshme, sepse njihet përplasja që Konica e Noli kanë pasur gjatë gjithë jetës së tyre)… Nuk do të më tretë dheu, nëse ti imzot dhe të gjithë ata që e quajnë veten shqiptarë, nuk do ta çojnë kufomën time të tretet në tokën mëmë”.

Botimi jep fakte, se si për këtë amanet Noli i drejtohet Enver Hoxhës (me të cilin ka pasur një letërkëmbim të gjatë në vitet 1945-1946):

“Dëshira e fundit e Faik Konicës ishte që të prehej në atdhe, në Shqipëri. Kini mirësinë të na njoftoni kur do të ishte e përshtatshme që të silleshin eshtrat e tij me nderimet përkatëse si kampion i pavarësisë së Shqipërisë”.

Por Enver Hoxha nuk i ktheu asnjëherë përgjigje për këtë çështje.

Më tej lexojmë t’i ketë shkruar Sejfulla Malëshovës:

“Bëj përpjekje për të ndjerin Faik se është akoma në dollap dhe koston shumë dhe trupi ka filluar të prishet. Më kthe përgjigje për këto”.

As Malëshova nuk i ktheu përgjigje. Noli do të ikte nga kjo botë me pengun se nuk e çoi deri në fund amanetin e mik-armikut të tij. Eshtrat e Konicës u kthyen në atdhe vetëm në maj 1995. Ato u vendosën në Parkun e Tiranës, pranë varreve të vëllezërve Frashëri./e.t

Fëmijët e gruas 36-vjeçare në Volos, e cila u vra brutalisht nga bashkëshorti i saj 40-vjeçar mëngjesin e së premtes, më 22 gusht, u përballën me një pamje të tmerrshme.

Në fakt, policia u informua nga vajza 16-vjeçare e çiftit, e cila njoftoi Policinë se babai i saj e kishte goditur me thikë nënën e saj brenda shtëpisë së tyre.

Vajza e madhe e 36-vjeçares bëri edhe një postim prekës në rrjetet sociale, duke i thënë lamtumirë nënës së saj.

“Ike, mami im, do të më mungosh shumë. E di që po na sheh atje lart, por bleta Dinos, unë dhe Asimina të duam shumë. Je gjithmonë në jetën tonë”, shkroi vajza në mbishkrimin e postimit të saj, duke postuar një sërë fotosh me nënën e saj.

Policia greke arrestoi autorin 40-vjeçar shqiptar, Pandeli Nakoleci, një ditë pas krimit në familje, teksa ishte fshehur në një parking, vetëm 200 metra nga pallati ku bëri vrasjen makabre.

Ai ishte një person me shumë precedentë penalë, i dënuar, gjithashtu i kartelizuar me probleme të shëndetit mendor, për të cilat së fundmi ishte mbyllur për trajtim në Psikiatri edhe nga Prokuroria e Greqisë. Shkak ishte bërë një tentativë vetëvrasjeje që 40-vjeçari kishte ndërmarrë.

Nakoleci ka qenë i proceduar që nga viti 2013 për falsifikim, drogë, organizatë kriminale dhe të tjera./e.t

Gazetaria shqiptare në zi pas ndarjes nga jeta të një prej emrave më të njohur të saj, Artur Zheji. Ngjarja tragjike ka ndodhur pasditen e sotme në qytetin bregdetar të Sarandës, ku Zheji ndodhej për pushime me familjen.

Sipas informacioneve paraprake, gazetari 64-vjeçar ka qenë duke drekuar në një restorant në rrugën “Butrinti”, bashkë me bashkëshorten dhe djalin, kur papritur ka pësuar një arrest kardiak. Ai është transportuar menjëherë me urgjencë drejt spitalit rajonal “Petro Nako”, por, fatkeqësisht, ka mbërritur pa shenja jete.

Artur Zheji ishte një figurë e spikatur në media dhe analizën politike, vdekja e tij përbën një humbje të madhe për opinionin publik dhe botën e medias në Shqipëri.

Që nga rizgjedhja e tij si president i SHBA-së, Donald Trump është përballur vazhdimisht me akuza për përfitime personale. Në fakt, Trump dhe familja e tij kanë bërë kohët e fundit marrëveshje të shumta – nga pasuritë e paluajtshme dhe kriptovalutat te obligacionet dhe aksionet.

A ka ndonjë model këtu që tregon pasurim personal? Në SHBA, Akti i Etikës në Qeveri i vitit 1978, i miratuar pas skandalit Watergate, kërkon që presidentët, nënkryetarët dhe zyrtarët e tjerë të lartë të zbulojnë financat e tyre çdo vit. Këto raporte depozitohen në Zyrën e Etikës Qeveritare (OGE) dhe janë të disponueshme publikisht.

100 milionë dollarë obligacione

Sipas dokumenteve aktuale nga Zyra e Kryesisë së Operacioneve (OGE), Trump ka kryer më shumë se 600 transaksione financiare që nga 21 janari 2025, duke investuar mbi 100 milionë dollarë në obligacione të korporatave, bashkive dhe ato shtetërore.

Trump bleu obligacione të korporatave nga Citigroup, Morgan Stanley, Meta, T-Mobile US, The Home Depot dhe UnitedHealth, ndër të tjera. Kritikët e shohin këtë si një konflikt të mundshëm interesi.

Investimet në aksione

Lidhur me marrëveshjet e aksioneve, aktualisht nuk ka njoftime publike në lidhje me blerjet ose shitjet që nga fillimi i mandatit të dytë të Trump në janar 2025. Megjithatë, sipas njoftimit të fundit, në fund të vitit 2024, Trump mbante aksione të konsiderueshme në Microsoft, Blackstone dhe në kompaninë e tij, Trump Media & Technology Group.

Trump thuhet gjithashtu se zotëronte aksione në kompani teknologjike dhe kompani me kapital të lartë si Amazon, Alphabet, Meta, Tesla, Berkshire Hathaway, PepsiCo, JPMorgan Chase, Coca-Cola dhe Pfizer.

Por sasitë më të mëdha të aksioneve kishte në Nvidia, me 615,000 deri në 1.3 milion dollarë, dhe Apple, me 650,000 deri në 1.35 milion dollarë. Të dyja kompanitë janë prekur ndjeshëm nga vendimet politike të Trump. Trump fillimisht e ndaloi Nvidia-n të shiste tërësisht çipa në Kinë, por kohët e fundit e zbuti këtë rregull. Në këmbim, Nvidia duhet t’ia dorëzojë 15 përqind të të ardhurave të saj në Kinë qeverisë amerikane – një ngjarje shumë e pazakontë dhe, sipas ekspertëve, e pashembullt në historinë e SHBA-së.

Raportet me Apple

Në fillim të gushtit, Trump njoftoi tarifa deri në 100 përqind edhe për çipat dhe gjysmëpërçuesit e importuar të kompjuterëve. Megjithatë, kompania iPhone u përjashtua nga këto tarifa, në fund të fundit, CEO i Apple, Tim Cook, kishte premtuar Apple 100 miliardë dollarë investime shtesë në SHBA. Çmimi i aksioneve të Apple më pas u rrit me më shumë se katër përqind të nesërmen.

Biznesi me imobilie në vendet arabe
Marrëveshjet e fundit të pasurive të paluajtshme të Trump janë gjithashtu të vështira për t’u ndarë nga bizneset dhe udhëtimet e tij zyrtare. Udhëtimi i parë i madh jashtë vendit i Trump e çoi atë në Arabinë Saudite, Katar dhe Emiratet e Bashkuara Arabe – pikërisht vendet ku familja e tij po ndjek projekte të reja ose të zgjeruara paralelisht.

Në maj, filloi ndërtimi i Trump Tower në Jeddah, një rrokaqiell luksoz 47-katësh në bregdetin e Detit të Kuq të Arabisë Saudite. Familja Trump njoftoi gjithashtu ndërtimin e një fushe golfi luksoze në Katar “në stilin Trump” si pjesë e një projekti zhvillimi prej 5.5 miliardë dollarësh, si dhe “Trump International Hotel & Tower” në Dubai – një pronë 80-katëshe me pishinën më të lartë të jashtme në botë.

Investime në kriptovaluta

Megjithatë, investimet e Trump në kriptovaluta po konkurrojnë gjithnjë e më shumë me biznesin e tij tradicional të pasurive të patundshme. Në qershor, revista amerikane “Forbes” vlerësoi se Trump kishte fituar ndoshta rreth 1 miliard dollarë vetëm në nëntë muajt e fundit nga investimet e tij në kriptovaluta, të tilla si monedha Trump dhe aksionet e tij në World Liberty Financial. Në korrik, kompania e tij holding, Trump Media & Technology, njoftoi se kishte investuar 2 miliardë dollarë në Bitcoin dhe kriptovaluta të tjera.

Sa përfiton Trump nga posti i tij politik?

David Kirkpatrick llogariti së fundmi në një raport sensacional në The New Yorker se Trump, fëmijët e tij dhe bashkëshortet e tyre kanë fituar më shumë se 3.4 miliardë dollarë që nga fillimi i presidencës së parë të Trump.

Shumica e këtyre marrëveshjeve, transaksioneve dhe investimeve pothuajse me siguri nuk do të kishin realizuar nëse Trump do të kishte mbetur një biznesmen i pastër. Në një intervistë me The Weekend Primetime të MSNBC të dielën e kaluar, Kirkpatrick tha se ndërsa presidentë të tjerë dhe fëmijët e tyre kanë gjetur mënyra për të përfituar nga marrëveshjet e librave dhe tarifat e fjalimeve, krahasuar me marrëveshjet e familjes Trump, ato ishin të gjitha “imtësira”. DW

Shërbimi Sekret Gjerman (BND) dhe ushtria gjermane, Bundeswehr, janë të pranishme me stenda rekrutimi në panairin ndërkombëtar të lojërave kompjuterike Gamescom që po zhviillohet në Këln.

Zëdhënësja e BND-së, Julia Linner, thotë se në stendën e shërbimit sekret vizitorët mund të marrin pjesë në lojën kompjuterike “BND Legends — Operation Blackbox”, ku lojtarët marrin identitetin e një agjenti të fshehtë për të penguar një sulm kibernetik. Loja, të cilën BND planifikon ta bëjë të disponueshme edhe në një platformë publike, teston aftësinë e lojtarëve në një numër situatash specifike dhe synon të tërheqë të rinj për t’u punësuar në agjencinë e shërbimit sekret ttë Gjermanisë.

Zëdhënësja Linner, thotë se për shumë njerëz BND-ja është një e panjohur e madhe dhe ne duam të zbulojmë disa nga sekretet e punës sonë, në mënyrë që të thithim punonjës të rinj. Ajo vëren se mjaft të rinj që luajnë lojëra kompjuterike kanë aftësi që janë të favorshme për të shtuar efektivitetin e punës së agjencive të spiunazhit – si p.sh. aftësi digjitale, aftësi komunikimi, frymë bashkëpunimi në ekip dhe rezistencë ndaj stresit.

Për arsye të ngjashme, pra rekrutimin e të rinjve dhe të rejave për ushtrinë gjermane, i pranishëm me një stendë në Gamescom është edhe Bundeswehri. Në stendën e Bundeswehr-it vizitorët mund të drejtojnë në simulatorë tanke ose të fluturojnë helikopterë, apo të bëjnë një stërvitje të vërtetë fizike të veshur me jelekë antiplumb pranë një posteri gjigant në të cilin shkruhet: “A je gati për nivelin tjetër?”

Sikurse zëdhënësja e BND-së, Linner, edhe zëdhënësi i ushtrisë, Marco Mann, thotë: “Ne jemi aty ku janë njerëzit që synojmë të bëjmë për vete”. Bundeswehr-i, i cili ka qenë i pranishëm në Gamescom që nga viti 2009, dëshiron t’u tregojë të rinjve se sa punëdhënës tërheqësështë, thotë Marco Mann.

Megjithatë kritikët hedhin dyshime duke shtruar pyetjen se sa të përshtatshme janë aktivitete të tilla. Pacifistët si Jürgen Grässlin nga Shoqata Gjermane e Paqes (DFG) thonë: “Në lojërat me vrasje, lojtarët futen në role të ndryshme në të cilat simulojnë vrasjen; ata madje marrin pikë bonus për vrasjen e një kundërshtari”.

Sipas tij “Bundeswehr-i nuk ka asnjë arsye që të jetë i pranishëm në Gamescom”.

Edhe ministri i Jashtëm gjerman, Johann Wadephul, e shfrytëzoi vizitën e tij në Indonezi, për të rekrutuar infermierë dhe infermiere nga ky vend. Ndërsa të dhënat demografike tregojnë se popullsia e Gjermanisë po plaket, rreth gjysma e 284 milionë qytetarëve të Indonezisë janë nën moshën 30 vjeç.

Në kryeqytetin e Indoneziasë, Xhakarta, Wadephul vizitoi i shoqëruar nga Ministri i Shëndetësisë i Indonezisë Budi Gunadi Sadikin një shkollë infermierie dhe foli me nxënësit dhe nxënëset për planet e tyre për të ardhmen.

Megjithatë interesin për fuqi punëtore aktualisht Gjermania lëshon çdo vit vetëm rreth 1,000 viza pune për indonezianë. Berlini thotë se pengesë për lëshimin e vizave janë mungesa e arsimimit të nevojshëm, aftësitë e pamjaftueshme gjuhësore në gjuhën gjermane dhe mungesa e njohjes së certifikatave dhe diplomave nga Indonezia në Gjermani. DW

Në Shqipëri, dixhitalizimi i shërbimeve publike ka qenë një ndër prioritetet më të shpallura të qeverisë në dekadën e fundit, me qëllim modernizimin e administratës dhe lehtësimin e aksesit për qytetarët.

Platforma e-Albania është kthyer në bërthamën e këtij transformimi, duke ofruar mbi 1,200 shërbime në mënyrë elektronike dhe duke u promovuar si një mjet për të shmangur radhët, kontaktin fizik me administratën dhe për të rritur transparencën.

Në vitin 2022, u ndërmor një hap i rëndësishëm me mbylljen e shumë sporteleve fizike dhe detyrimin që shërbimet të merren vetëm online.

Pavarësisht suksesit, shumë qytetarë, veçanërisht në zonat rurale dhe të moshuarit, u përballën me vështirësi në përdorimin e platformës, duke ekspozuar një hendek të madh në aftësitë dixhitale dhe nevojën për asistencë njerëzore.

Por nga ana tjetër, punësimet në administratën publike në vend që të uleshin nga ofrimi i shërbimeve online u rritën më tej.

Në vend që dixhitalizimi të shoqërohej me racionalizimin e burimeve njerëzore, administrata publike ka vijuar të zgjerohet, sidomos në nivel vendor dhe në agjenci të reja.

Ndërmjet 2018 dhe 2024, numri i të punësuarve në sektorin publik është rritur nga rreth 153 mijë në mbi 170 mijë persona.

Kjo rritje ka qenë më e dukshme në sektorë si arsimi, shëndetësia dhe siguria publike, por edhe në struktura të reja të administratës që menaxhojnë shërbimet digjitale dhe sistemet e të dhënave.

Ky zhvillim ngre pikëpyetje mbi efikasitetin e reformës, nëse qëllimi i dixhitalizimit është reduktimi i ngarkesës së punës fizike dhe automatizimi i proceseve, pse vazhdon të rritet punësimi në shtet?

Dixhitalizimi i shërbimeve publike në Shqipëri ka funksionuar më shumë si një shtesë mbi administratën ekzistuese, sesa si një proces transformues që e riorganizon apo e bën më të vogël strukturën shtetërore.

Rrjedhimisht, ndërsa teknologjia është përfshirë më thellë në ofrimin e shërbimeve, administrata nuk është ristrukturuar në mënyrë domethënëse.

Ky kombinim i një aparati në zgjerim dhe një dixhitalizimi të paplotë krijon një barrë të dyfishtë.

Shpenzimet për infrastrukturë të IT po rriten me shpejtësi duke arritur në 140 milionë euro këtë vit, në një kohë që edhe kostot për burimet njerëzore janë rritur gjithashtu./monitor.al

Nëna, babai dhe gjyshi i 4-vjeçares shqiptare që u gjet e mbytur në pishinën e një vile në Paksos të premten pasdite, pranë shtëpisë ku jetonte fëmija, kërkuan dhe morën një afat për të dëshmuar para gjykatës.

Prokurori ngriti padi penale kundër tre të afërmve të vajzës për ekspozimin e të miturës në rrezik, pasi nëna, babai dhe gjyshi ishin në shtëpi dhe po flinin kur 4-vjeçarja u zhduk.

Të afërmit e 4-vjeçares deklaruan se ajo po luante në korridorin e shtëpisë dhe se zhdukja e saj ishte diçka e papritur dhe ndodhi brenda pak minutash.

Të afërmit, sapo kuptuan zhdukjen e vajzës, njoftuan policinë dhe filluan kërkimin e saj me fqinjët dhe oficerët e policisë, por pa sukses.

4-vjeçarja u gjet pa ndjenja pak kohë më vonë në pishinën e një vile disa metra larg shtëpisë familjare, nga kuzhinieri që kishte shkuar atje për të punuar.

Mjekët e Qendrës shëndetësorë të Paksosit bënë përpjekje për ta sjellë në jetë të miturën por nuk ja dolën./E.T

Në 114-vjetorin e vdekjes së udhëheqësit të kryengritjes së Malësisë së Madhe, Dedë Gjon Ujka, që dha jetën në betejën e përgjakshme në Qafën e Uglës përballë ushtrisë osmane, në nder të tij në Tuz të Malit të Zi u organizua ceremonia e inaugurimit të varrit monumental.

I rënë në mbrojtje të trojeve shqiptare, Dedë Gjon Ujka, kujtohet nga pasardhësit si trim dhe humanist. Për studiuesin Anton Lajçaj figura Dedë Gjon Ujkës nuk mund të harrohen asnjëherë.

Provinciali i Kishës Françeskane në Shkodër, Padër Pashko Gojçaj, duke përkujtuar kontributin e trimave si Dedë Gjon Ujka, ndau shqetësimin e tij dhe të kishës për braktisjen e trojeve shqiptare edhe në fshatrat shqiptar të Malit të Zi.

Ndërkohë stërnipi Dedë Camaj tregoi se me varrin monumental po çohet në vend amaneti për dëshmorin dhe stërgjyshin e tij.

Dedë Gjon Ujka ishte organizator dhe komandant i betejës antiosmane në Qafën e Uglës ku dha jetën për liri në qershorin e 1911-ës. Mban titullin “Dëshmor i Atdheut” dhënë nga qeveria shqiptare në 2020-ën ndërsa është një prej personazheve real në veprën monumentale “Lahuta e Malësisë” të Gjergj Fishtës për trimërinë dhe heroizmin e tij në mbrojte të kombit shqiptar./E.T