Të shtëna me armë u regjistruan këtë pasdite, të shtunën, më 16 gusht, në zonën Cuotto të Forio d’Ischia, ishull në gjirin e Napolit.

Sipas mediave italiane katër persona u qëlluan me armë zjarri. Tre persona mbetën të vdekur dhe një i plagosur rëndë.

Shkaqet dhe dinamika e ngjarjes janë ende të paqarta.

Sipas raportimeve të para, personat e vrarë janë qëlluar me plumb në kokë, pothuajse si një ekzekutim.

Incidenti ndodhi në zonën Cuotto në hyrje të një parku hotelesh të njohur në zonë.

Ligjvënësit demokratë në Shtetet e Bashkuara kanë reaguar ashpër në lidhje me atë që prodhoi takimi mes presidentit Trump me homologun e tij rus, Vladimir Putin në Alaskë.

“Ne u lutëm për paqe, por në vend të kësaj morëm lëvdata për Putinin”, shkruan Kryetarja e Dhomës së Përfaqësuesve, Nancy Pelosi, në X.

Pelosi shton se Putini “duhet të kthejë menjëherë dhjetëra mijëra fëmijë që rrëmbeu nga Ukraina dhe të ndalojë përdhunimin e grave si armë lufte”.

Udhëheqësi demokrat në Senat, Chuck Schumer, deklaroi se Trump i kishte shtruar tapetin e kuq një “banditi autoritar”.

“Në vend që të qëndronte përkrah Ukrainës dhe aleatëve tanë, Trump qëndroi krah për krah me një autokrat që ka terrorizuar popullin ukrainas dhe globin për vite me radhë”, thotë ai.

Chris Van Hollen , një senator nga Merilend, thotë se Trump u “vu në lojë” nga presidenti rus.

“Putini pati një takim në tokën amerikane, Trump u lajkatua nga Putini. Përparësi për Putinin. Turp”, shkruan ai në një postim në X.

Ministria e Ekonomisë, Kulturës dhe Inovacionit ka publikuar udhëzuesin e ri për strehimin social, një dokument i rëndësishëm që synon të vendosë një standard të ri për mënyrën se si hartohen programet 5-vjeçare të strehimit në vend.

Ky udhëzues sjell qartësi dhe strukturë për mënyrën e ofrimit të shërbimeve të strehimit social, duke u fokusuar në 6 programe të veçanta, që synojnë mbështetjen e shtresave në nevojë dhe individëve në situata të vështira ekonomike e sociale.

Programi i parë është ai i banesave sociale me qira. Nëpërmjet këtij programi, banesat që janë në pronësi publike ose në pronësi të pronarëve socialë, do të jepen me qira për familjet në nevojë. Sipas udhëzuesit, 80% e përfituesve të këtij programi duhet të jenë familje me të ardhura nga 0 deri në 100% të mesatares familjare.

Programi i dytë lidhet me zhvillimin e zonave me qëllim strehimi, ku parashikon identifikimin dhe planifikimin e zonave urbane që mund të përshtaten për ndërtimin e banesave sociale. Fokusi është tek zonat e banuara në mënyrë informale, ndërtime të palegalizuara që nuk mund të legalizohen, apo zona të vjetra industriale të pashfrytëzuara. Programi i tretë ka në fokus banesat me kosto të ulët. Këto banesa do të ndërtohen në bashkitë ku çmimet e tregut janë të larta, por do të shiten me një çmim nën vlerën e tregut – pa zbritur nën koston e ndërtimit. Përfitues do të jenë familjet me të ardhura më të ulëta se mesatarja e njësisë vendore përkatëse.

Programi i katërt përfshin banesat e specializuara. Këtu bëhet fjalë për strehim të dedikuar për grupe të caktuara si të moshuarit, persona me aftësi të kufizuara, viktima të trafikimit apo dhunës në familje, si dhe fëmijë pa përkujdesje prindërore. Programi i pestë ka si objektiv përmirësimin e kushteve në banesat ekzistuese, si ato private, ashtu edhe ato në pronësi shtetërore. Me mbështetje nga buxheti i shtetit, bashkitë mund të përfitojnë grante konkurruese për të ndihmuar familjet që jetojnë në kushte të papërshtatshme.

Dhe programi i gjashtë, ai për banesat e përkohshme, synon të ofrojë strehim afatshkurtër për individë apo familje që gjenden në emergjenca sociale, si refugjatë, persona të zhvendosur për shkak të investimeve publike apo private, emigrantë të kthyer, apo individë të pastrehë.

Ministria thekson se ky udhëzues është një hap i rëndësishëm drejt një politike më të drejtë, të qëndrueshme dhe gjithëpërfshirëse të strehimit, duke i dhënë prioritet nevojave reale të qytetarëve.

Detyrimi i Sali Berishës për të shkuar në një ditëlindje të një biznesmeni në Kosovë, fsheh pas përuljen e thellë të tij ndaj rrjetit klientelist të bizneseve të lidhura me familjen e tij gjatë kohës që ka qenë në pushtet dhe tani në opozitë.

Ndërkohë, klanit Osmani si dhe Dreshajve nga Kosova që drejtojnë lojërat e fatit dhe shtëpitë e seksit në Hamburg, ai u tregon respekt personalisht, duke marrë edhe dhëndrrin me vete. Djali i tij Shkëlzeni, po ashtu, u ka shkuar atyre për sebepe familjare në Kosovë, përkundër distancës që ata formalisht mbajnë nga biznesi.

Se kush është klani Osmani në Hamburg, e ke lehtë ta kërkosh në internet. Kanë qenë sponsorë të Partisë Demokratike më 2005 si pagues të kontratës së lobimit të BG&R dhe, pasi Berisha i futi në pushtet, të dy këto grupe biznesi kontrolluan tregun e lojërave të fatit në Shqipëri duke punuar në mënyrë thuajse ilegale dhe kanë shërbyer për interesa financiare të Familjes Berisha, për pagesat e padeklaruara dhe investime të tjera në Perëndim.

Është kjo arsyeja që Berisha, 81 vjeçar, merr rrugën e shkon në Istog, në ditëlindjen e një pronari bordelloje, apo që djali i tij mban kontaktet e rregullta me klanin Osmani. Një vit më parë, kur një prej njerëzve të fotografuar me Shkëlzenin u arrestua në Spanjë për drogë, të gjithë e relativizuan lajmin, sikur ajo foto ishte si ndonjë foto politikanësh në fushatë elektorale. Në fakt ishte foto e Shkëlzenit me gruan e tij, në një tavolinë dreke me personin e arrestuar.

Të gjitha këto nuk vlejnë për të treguar se kush janë miqtë e Berishës, pasi ata kanë punën dhe jetën e tyre. Këto vlejnë për të treguar se sa i përkulur është Sali Berisha ndaj njerëzve që janë të lidhur me familjen e tij për biznese shpesh të dyshimta dhe sa i përkushtuar është ndaj tyre.

Mashtrimet banale të Berishës të tipit “kthim në fëmijërinë time” apo “kthim në traditat e tij në bjeshkë” janë gënjeshtra fëminore. Berisha si fëmijë s’ka qenë kurrë në Kosovë, madje as si i rritur. Për herë të parë ka shkelur pasi vdiq Rugova, sepse sa ishte gjallë ai nuk ia dha këtë shans.

Hipokrizia e tij duke bërë vlerësime për Rugovën dhe duke shpallur këtë biznesin e bordellos “luftëtarë të lirisë” janë banalitetet e një njeriu në hall, që e thërrasin për t’u shërbyer, duke e ngritur nga krevati.

Nëse të njëjtat fakte do të ishin për Edi Ramën apo ndonjë politikan tjetër, Sali Berisha do t’i kishte përditë duke ekzagjeruar faktet dhe duke u përpjekur t’i “denonconte”. Në rastin e tij, media jo vetëm që e injoron këtë gjë, por e paraqet udhëtimin e Berishës në Istog si ekskursion turistik. Në fakt është ekskursion i detyruar nga dikush që ka fuqi ta ngrejë një 81 vjeçar nga krevati dhe t’i thotë: “Eja këtu të të shikojnë që je njeriu im.” Dhe të mos ketë fuqi ta kundërshtojë.

Kjo tregon se në dorë të kujt mund të jetë pushteti në Shqipëri dhe kush mund të na e komandojë kryeministrin nëse Berisha do të kishte kohë dhe mundësi të rikthehej.

Presidenti rus, Vladimir Putin i ka bërë një propozim homologut të tij amerikan, Donald Trump, gjatë takimit në Alaskë, që përfshin dorëzimin e kontrollin të plotë të rajonit lindor të Donetskut nga Ukraina, i cili është 70% i pushtuar nga Rusia.

Sipas shumë gazetave, Putini në këmbim do të pranonte që vijat e frontit të ndalon dhe të mos përparonin më tej brenda territorit ukrainas.

Ndërkohë që kreu i Shtëpisë së Bardhë, Donald Trump thuhet se ia tha Volodymyr Zelenskyt ofertën në një telefonatë pas samitit të Alaskës.

Sado e pakëndshme që është për Kievin, çështja e territorit është një pikë thelbësore negociuese në këto përpjekje paqeje.

Është e vështirë të imagjinohet që Zelensky të dorëzojë qytete të mëdha si Kramatorsk, Kostyantynivka dhe Sloviansk, pasi i ka mbrojtur me sukses për kaq shumë kohë. Kjo do të kërkonte gjithashtu miratimin e parlamentit të Ukrainës.