Mohsen Rezaei, këshilltar ushtarak i Liderit Suprem të Iranit, Mojtaba Khamenei, ka deklaruar se bisedimet me Shtetet e Bashkuara për të arritur një marrëveshje paqeje janë në një ngërç total.

“Negociatat janë në ngërç dhe Trump duhet ta thyejë këtë ngërç, topi është në fushën e Trumpit”, tha Rezaei në një intervistë për CNN në Teheran.

Rezaei paralajmëroi gjithashtu se nëse konflikti rifillon, lufta do të zgjerohet në Oqeanin Indian, Detin e Kuq, Ngushticën Bab al-Mandeb dhe Mesdhe.

Deri tani, Houthis (Huthitë) në Jemen, të mbështetur nga Irani, kanë shmangur sulmet ndaj anijeve në Ngushticën Bab al-Mandeb, e cila çon në Detin e Kuq.

Sipas ekspertëve, mbyllja e njëkohshme e Ngushticës Bab al-Mandeb dhe Ngushticës së Hormuzit do të ndërpriste rreth një të katërtën e furnizimeve botërore të naftës dhe gazit.

Protestat kundër projektit të resortit në Zvërnec pritet të vijojnë edhe gjatë ditës së shtunë, me organizatorët që kanë njoftuar tubime në Vlorë, Tiranë dhe Korçë.

Mësohet se protesta e radhës do të mbahet në orën 11:00 në Portonovo të Vlorës, ndërsa në mbrëmje protestuesit do të rikthehen në kryeqytet.

“Kanë njoftuar protestën e radhës nesër në orën 11:00 në zonën e Portonovës në Vlorë, aty ku ndodhet edhe çështja që ka sjellë protestat.

Më pas, në orën 18:00 do të mblidhen te Sheshi Skënderbej dhe më tej në Bulevardin ‘Dëshmorët e Kombit’, për të qëndruar përballë zyrës së kryeministrit Edi Rama”, u shpreh Bajramemaj.

Ndërkohë, protesta është shtrirë edhe në Korçë, ku qindra qytetarë iu bashkuan një tubimi të organizuar përmes rrjeteve sociale.

Kryeministri Edi Rama ka ironizuar protestuesit dhe kërkesat e tyre, një prej të cilave është dorëheqje e tij.

“Po kur thonë 5 kushte: ‘Jep dorëheqjen’. Po mirë po jap dorëheqjen, katër të tjerat si do i bëj? Është e sigurt që në të gjithë procesin, ne kemi qenë shumë strikt. Është thënë se investimi është 27 mln euro. I janë referuar një leje që është kthyer mbrapsht”, tha Rama.

Ambasadori i BE-së në Tiranë, Silvio Gonzato, u shfaq këtë pasdite në protestën për Zvërnecin.

Të pyetur nga Top Channel, delegacioni i BE-së ka reaguar duke thënë se ambasadori thjesht qëlloi aty afër dhe ka kaluar.

Kujtojmë se qytetarët e vijuan rezistencën kundër ndërtimit të resortit luksoz në Zvërnec për të gjashtën ditë radhazi.

Më flamujt shqiptarë dhe me pankarta në duar, ‘Revolucion’, Shqipëria e shqiptarëve’ dhe ‘atdheu nuk është në shitje’ qytetarët marshuan nga sheshi Skënderbej drejt Kryeministrisë. Në kor protestuesit ripërsëritën 5 kërkesat e tyre, me në krye dorëheqjen e kryeministrit Edi Rama, si edhe shfuqizimin e disa ligjeve që, sipas tyre, dëmtojnë natyrën dhe trashëgiminë kulturore.

Kanë mbërritur mbrëmjen e sotme në aeroportin e  Rinasit 6 shtetas shqiptarë, të ekstraduar nga Dubai.

Bëhet me dije se 6 personat e ekstraduar ën vendin tonë janë pjesë e grupeve kriminale, dhe jishin shpalur më herët në kërkim nga drejtësia shqiptare.

Njoftimi:

Finalizohet ekstradimi nga Emiratet e Bashkuara Arabe i 6 shtetasve të kapur në Dubai, pjesëtarë të grupeve kriminale.

Të ekstraduarit ishin shpallur në kërkim ndërkombëtar për veprimtari kriminale në fushën e narkotikëve, krimeve kompjuterike dhe pastrimit të produkteve të veprimtarisë kriminale.

Në vijim të bashkëpunimit të ngushtë ndërmjet Departamentit për Marrëdhëniet Ndërkombëtare në Drejtorinë e Përgjithshme të Policisë së Shtetit dhe autoriteteve ligjzbatuese të Emirateve të Bashkuara Arabe, u finalizua ekstradimi në Shqipëri i shtetasve:

– K. Q., alias J. H., alias J. Q., 44 vjeç;

– Sh. K., 44 vjeç;

– A. P., alias Sh. P., 38 vjeç;

– D. P., alias E. S., alias D. B., alias F. P., 39 vjeç;

të gjithë të akuzuar për veprimtari në fushën e narkotikëve dhe/ose pastrim të produkteve të veprimtarisë kriminale, kryer në kuadër të grupit të strukturuar kriminal.

Gjithashtu u ekstradua shtetasi:

– I. L., alias I. S., 30 vjeç, i akuzuar për pastrim të produkteve të veprimtarisë kriminale, kryer në kuadër të grupit të strukturuar kriminal;

si dhe:

– M. C., 34 vjeç, i akuzuar për mashtrim kompjuterik, kryer në kuadër të grupit të strukturuar kriminal.

Policia e Shtetit mbetet e angazhuar maksimalisht në bashkëpunimin me partnerët ndërkombëtarë për lokalizimin, kapjen dhe ekstradimin e shtetasve në kërkim ndërkombëtar, me qëllim vendosjen e tyre përpara drejtësisë.

Kryeministri Edi Rama ka folur nga Vlora për projektin e ndërtimit në zonën e mbrojtur të Zvërnecit, për të cilin mijëra qytetarët protestojnë prej disa ditësh në Tiranë dhe qytete të tjera të vendit.

Teksa doli nga takimi me banorët, Rama u përballë me një gazetar italian, i cili e pyeti mbi mundësinë e investimeve në vend teksa po zhvillohen protesta masive.

Në përgjigjen e tij Rama tha se “Shqipëria është një vend demokratik. Jeta vazhdon përpara, punët vazhdojnë përpara”.

Pyetur nëse u gjunjëzohet liderëve të huaj, Rama tha: “Jo, unë i gjunjëzohem vetëm Giorgia Melonit.”

Gazetari tentoi duke përmendur Donald Trump dhe vajzën e tij, Ivanka, por kryeministri u përgjigj se nuk është gjunjëzuar para tyre.

Gazetari italian: Kryeministër, mirëmbrëma. A është e mundur të investohet në Shqipëri? Sepse ka protesta.

Rama: Po, Shqipëria është një vend demokratik. Jeta vazhdon përpara, punët vazhdojnë përpara.

Gazetari italian: Po, a nuk mendoni se u gjunjëzoheni pak liderëve?

Rama: Jo, unë i gjunjëzohem vetëm Giorgia Melonit. Nuk më keni parë ndonjëherë në gjunjë.

Gazetari italian: Epo, pak Ivanka Trump-it…

Eksportet e naftës bruto të Iranit ranë në nivelin e tyre më të ulët në të paktën gjashtë vjet në maj, ndërsa bllokada detare e Shteteve të Bashkuara shtrëngon burimin më të rëndësishëm të të ardhurave të Teheranit mes armëpushimit të brishtë midis dy kombeve, shkruan A2CNN.

Bllokada ndaj porteve të Iranit, të cilën Uashingtoni e nisi më 13 prill, është pjesë e përpjekjeve të Presidentit Donald Trump për të ushtruar presion mbi Iranin që të bjerë dakord me kushtet e tij për një marrëveshje paqeje. Teherani e ka dënuar këtë veprim si të paligjshëm dhe e ka përshkruar konfiskimin e anijeve nga SHBA-të rreth porteve të tij si një “akt piraterie”.

Veprimi i SHBA-ve erdhi pasi Irani mbylli Ngushticën e Hormuzit për anijet nga shumica e vendeve pas fillimit të sulmeve SHBA-Izrael më 28 shkurt. Rruga e ngushtë ujore është rruga kryesore e Gjirit drejt oqeanit të hapur dhe normalisht transporton rreth 20 përqind të furnizimeve botërore me naftë dhe gaz.

Ndërprerja bëri që çmimet globale të energjisë të rriteshin ndjeshëm dhe uli ndjeshëm eksportet nga prodhuesit kryesorë të Gjirit, përfshirë Arabinë Saudite, Kuvajtin, Irakun dhe Emiratet e Bashkuara Arabe.

Megjithatë, gjatë asaj periudhe, Irani ishte kryesisht në gjendje të vazhdonte eksportimin e naftës së vet. Me më pak konkurrentë në gjendje të lëviznin ngarkesa përmes ngushticës, eksportet iraniane mbetën të forta deri në mars dhe një pjesë të prillit, ndërsa çmimet më të larta të naftës rritën të ardhurat.

Të dhënat e reja tregojnë se kjo ka ndryshuar që kur SHBA-të filluan bllokadën detare të porteve iraniane.

Eksportet e naftës përmes Ngushticës së Hormuzit përbëjnë rreth 80 përqind të totalit të eksporteve iraniane. Të dhënat më të fundit të transportit detar sugjerojnë se bllokada ka ulur ndjeshëm sasinë e naftës bruto që Irani mund të shesë jashtë vendit, veçanërisht Kinës, klientes së saj më të madhe.

Presidenti amerikan Donald Trump ka deklaruar se çmimet e naftës pritet të bien pasi situata në Ngushticën e Ngushtica e Hormuzit të stabilizohet.

I pyetur nga gazetarët për numrin e tankerëve të naftës që administrata e tij ka arritur të kalojë përmes ngushticës, Trump u përgjigj se janë “shumë”, pa dhënë një shifër të saktë.

“Do të doja të mos e thosha numrin, por janë shumë,” u shpreh ai, duke shtuar se zgjidhja e situatës “nuk do të zgjasë shumë”.

Sipas tij, sapo situata të normalizohet, çmimet e naftës “do të bien ndoshta edhe më poshtë se nivelet e mëparshme”.

Deklaratat vijnë në një moment presioni politik në rritje në SHBA për shkak të rritjes së çmimeve të karburanteve, në prag të zgjedhjeve të ardhshme të mesmandatit.

Në fjalën e mbajtur gjatë aktivitetit për 35-vjetorin e Partia Socialiste e Shqipërisë në Vlorë, Rama tha se vendi nuk mund të ecë përpara duke u udhëhequr nga “deliret dhe sharlatanizmi”.

Kryeministri kundërshtoi sloganin “Shqipëria e shqiptarëve”, duke theksuar se vendi ka nevojë për respekt.

Sipas tij, sektori i turizmit përballet me mungesë të fuqisë punëtore, ndërsa pagat në hotelet dhe restorantet e bregdetit shqiptar janë të krahasueshme, madje në disa raste më të larta se ato në Greqi.

“Nuk kanë bërë prokopi kurrë në asnjë rast popujt që janë udhëhequr nga delire dhe sharlatanizma.

Shqipëria ishte e shqiptarëve kur u bë bunker, kur mori detet dhe malet i reckosur. Shqiptarët për Shqipërinë, jo Shqipëria e shqiptarëve. Shqipëria e shqiptarëve është si të thuash “shtëpia ime është vetëm e imja”. Nuk është kjo ajo që ka nevojë Shqipëria.

Shqipëria ka nevojë për respekt dhe për zërin e hoxhës, të priftit, për ngjyrën e kujtdo që Zoti ka vendosur ta sjellë në Vlorë. Kjo është Shqipëria.

Po kur thonë se do na vijnë indianët, malajzezët, do na marrin punën në hotele dhe restorante, a thua se këta që i thonë këto mbeten në dyert e hoteleve dhe restoranteve të kërkojnë punë.

Këto broçkulla ua thonë dhe atyre që janë turrur në Shqipëri të përcjellin gjithfarë lajmesh. Jo se një pjesë janë armiq apo konkurrentë, por një pjesë ka një hall tjetër, se nuk e kanë me Vlorën dhe flamingot, por e kanë me babanë dhe vjehrrin e atyre që duan të bëjnë investime në Shqipëri.

Luftën që kanë atje e ushqejmë ne me këta sharlatanët tanë që lidhin një flamur, shajnë me libër shtëpie dhe thonë “Shqipëria është e shqiptarëve”. Thonë se këto resorte do të sjellin të huaj sepse duan t’i paguajnë për një copë bukë, ndërkohë që në hotelet e Vlorës dhe restorantet pagat janë njësoj apo pak më të larta se në Greqi.

Në bregdetin tonë, nga Dhërmiu deri në Ksamil, pagat janë njësoj ose pak më të larta se në Greqi.

Ndërkohë që ata flasin për pronat, se po shitet Shqipëria. Shqipëria është përdhunuar shumë kohë para se ju të më jepnit besimin të drejtoja. Është përdhunuar nga honxhobonxhot kur titujt e pronësisë i morën nga kutitë ku ruheshin. Shqiptarët e viteve 1991-1992 i morën dhe i bënë fije-fije letrat e pronës. E bënë aq të madh çorapin sa sot paguhen pasojat.

Ne nuk mund të themi se e ç’kollopsëm tërë atë çorap, por themi se kemi bërë shumë për të vënë rregull dhe të zeza si ato të zeza që dalin mbi ujë për pronat ne s’kemi bërë kurrë.

Po të ishim ne ata që shisnim Shqipërinë, do të ishte privatizuar Sazani.

Sazanin kanë dashur edhe të tjerë ta bëjnë destinacion turistik, por ne s’po bëjmë atë që bënë të tjerët, që e ofruan Sazanin për ta privatizuar.

Pavarësisht se ata që na erdhën janë shumë herë më të fuqishëm, u kemi thënë se Sazani është tokë dhe pronë e popullit shqiptar dhe se në Sazan janë të mirëpritur të investojnë.”

Kryeministri Edi Rama ka postuar një foto në rrjetet sociale ku shfaqet me kancelarin gjerman Merz Në Tivat. Kreu i qeverisë bën me dije se bëhet fjalë për një bisedë pas mbldhjes, prej nga ai u nis në drejtim të Vlorës.

“Me Kancelarin Merz në Tivat, gjatë bisedës pas mbledhjes së gjatë dhe para largimit, ai për Berlin e unë për Vlorë”, shkruan Rama në rrjetet sociale.

Udhëheqësit e Bashkimit Evropian dhe ata të Ballkanit Perëndimor u mblodhën të premten në Mal të Zi për samitin e nivelit të lartë, në fokus të të cilit pritet të jetë zgjerimi i bllokut evropian.

Kryeministri Edi Rama mbërriti me helikopter në fushën e aviacionit në Vlorë, nga ku u nis drejt Pallatit të Kulturës “Labëria”, ku u prit nga kryebashkiakja Brunilda Mersini dhe drejtuesi politik i qarkut Vlorë për PS, Blendi Çuçi.

Në hyrje të takimit ka firmosur një bluzë të një vajze të vogël. Ndërkohë që përgjatë pyetjes së gazetarëve nuk ka pranuar të flas për media. I prerë kreu i qeverisë është përgjigjur vetëm me një “JO”.

Aktualisht Rama po zhvillon takimin me banorët e Zvërnecit, ku janë të pranishëm edhe përfaqësues të bashkisë.

Të shtunën e kaluar, banorë të zonës, ambientalistë dheaktivistë të shoqërisë civile, u përplasën me rojet e sigurisë të një kompanie private, që kishte rrethuar me gardh plazhin e Pishë Poros. Njëri prej protestuesve u mor zvarrë nga dy persona dhe u qëllua nga një i tretë. Të tre më pas u arrestuan.

Ngjarja shkaktoi reagim dhe prej ditë së diel, çdo pasdite mijëra vetë mblidhen në Tiranë për të protestuar kundër projektit për ndërtimin e një resorti në Zvërnec, me të cilin lidhen edhe Ivanka Trump, vajza e Presidentit amerikan Donald Turmp dhe bashkëshorti i saj, Jared Kushner.

Kryeministri Rama tha se nuk ka ende një projekt konkret për Zvërnecin, por shtoi se aty bëhet fjalë për një investim në tokë private, që sipas tij, do të jetë 4 miliardë dollarë. “Sa kohë të jem unë në detyrë, investimi nuk anulohet”, tha Rama të martën në një konferencë për mediat me Presidentin e Këshillin Europian, Antonio Costa.

Rama deklaroi se protestat janë të nxitura nga faktorë të huaj, që nuk duan zhvillimin e Shqipërisë dhe realizimin e një investimi të këtyre përmasave në vendin tonë.

Ish-deputetja e Partisë Demokratike, Flutura Açka, e sheh protestën kundër projektit turistik në Zvërnec dhe Sazan jo vetëm si një reagim për mbrojtjen e natyrës, por edhe si një tregues të fortë humbjes së besimit popullor te opozita tradicionale. E ftuar në emisionin “Sot Live në Shqipëri” në Report TV, Açka tha se qytetarët që po protestojnë përfaqësojnë sot opozitën e vërtetë, duke i dhënë një shuplakë Berishës dhe PD-së

“Fakti që protesta ndodhi menjëherë pas zgjedhjes së Berishës, kam përshtypjen që shumë njerëz shpresuan se pas këtyre proceseve të zgjedhjeve, ata do të shikonin një parti të reformuar dhe kur kjo nuk ndodhi sigurisht, e humbën besimin tek opozita. Opozita e ka humbur kredibilitetin dhe nuk mund të thojë që ‘jam unë opozita.’ Opozita e vërtetë janë këta njerëz, në rrugë, që mblidhen me vullnet të lirë. Nuk mund të pagojë as Greqia, as Rusia, as Veliaj e as Rama kaq shumë njerëz që të dalin në rrugë me vullnet të lirë. Nuk mund të dalë Berisha kundër 20,000 shqiptarëve që janë aty. Këta djem e vajza kanë parë prindërit e tyre të frustruar. Berisha nuk mund të mohojë vullnetin e lirë. Ai nuk merr pjesë se nuk është i mirëpritur aty. Nuk ka bërë detyrën e opozitarit për shqiptarët. Jo vetëm që nuk është i mirëpritur por edhe nuk ka pse se është pro investimeve. Njerëzit patriotë e mbrojnë vendin e tyre”, u shpreh Açka.

Lidhur me qëndrimin e kreut të PD-së ndaj protestës, ajo ngriti dyshime se distancimi i tij lidhet edhe me emrin e familjes Trump që përmendet në projekt.

Gjëja e parë ka të bëjë me intimidimin prej pranisë së familjes Trump, por Berisha është ‘dëbuar’ nga kjo protestë sepse e bën atë me faj bashkë me Ramën. Eunuket e vegjël e të ngushtë, këpucëlëpirësit e Sali Berishës, nuk i thanë të tërhiqej me qëllimin që PD të vinte në pushtet për shqiptarët, ata janë përgjegjësit që ne jemi në këtë gjendje. PD nuk mundi të ndreqë demokracinë”, deklaroi ish-deputetja.

Avokati i ish-presidentit, Ilir Meta, Kujtim Cakrani, ka reaguar ashpër ndaj vendimit të Gjykatës së Posaçme që e detyron klientin e tij të qëndrojë në “kafazin e xhamtë” gjatë zhvillimit të procesit gjyqësor.

Në një prononcim për mediat, Cakrani e cilësoi këtë vendim si “të turpshëm” dhe tha se ai dëmton imazhin e drejtësisë shqiptare.

“Sipas tij, ky është një nga ato vendime që e turpërojnë gjykatën. Ne e bëmë kërkesën tonë dhe gjykata e rrëzoi, duke iu referuar rasteve të një ukrainasi dhe një rusi. Ukrainasi akuzohej për 43 vrasje, ndërsa rusi për cenim të rendit kushtetues”, u shpreh Cakrani.

Avokati shtoi se, sipas tij, krahasimi i rastit të Metës me këto dy raste është i papranueshëm dhe bie ndesh me standardet e drejtësisë.

“Gjykata, nëse krahason Metën me dy terroristë, atëherë problemi është i gjykatës. Më vjen turp që një gjykatë shqiptare me formim amerikan i referohet vendimeve të Rusisë”, deklaroi ai.

Autoriteti Rrugor Shqiptar ka bërë gati procedurën për tenderimin e fazës së tretë të bypass-it të Tiranës, një prej projekteve më të rëndësishme infrastrukturore që synon të lehtësojë trafikun në kryeqytet. Sipas të dhënave të publikuara në Agjencinë e Prokurimit Publik, fondi limit për këtë kontratë është parashikuar në vlerën e 2.5 miliardë lekëve.

Sipas ARRSH, procedura e prokurimit pritet të hapet gjatë muajit të ardhshëm, pasi të përfundojnë diskutimet me Ministrinë e Infrastrukturës dhe Energjisë për elementët fundorë, që kanë nevojë për saktësim.

Ndërkohë, punimet kanë nisur tashmë në dy fazat e para të bypass-it. ARRSH raportoi se realizimi fizik i punimeve ka arritur në rreth 18-20%, ndërsa aktualisht po kryhen gërmimet, skarifikimi dhe mbushjet për formimin e trupit të rrugës. Po ashtu vijon ndërtimi i dy urave të parashikuara në këto lote, si dhe profilimi i skarpateve përgjatë gjurmës së projektit.

Për fazën e parë dhe të dytë, vlera e kontratave është 5.9 mld lekë dhe përfshijnë një gjatësi prej rreth 8.2 km.

Bypass-i i Tiranës parashikohet të ketë një gjatësi totale prej 21.6 km dhe do të lidhë autostradën Tiranë-Durrës me autostradën Tiranë-Elbasan, duke shmangur kalimin e trafikut tranzit përmes kryeqytetit. Traseja nis pranë rrugës Thumanë – Kashar dhe përfundon në Mullet, ndërsa rruga do të ketë dy korsi për secilin drejtim lëvizjeje dhe shpejtësi të lejuar deri në 120 km/h.

Deputeti i Partisë Socialiste Klevis Jahaj është paraqitur këtë të premte në ambientet e SPAK.

Ende nuk dihen arsyet e paraqitjes së deputetit socialist në Prokurorinë e Posaçme.

Kanë dalë para Gjykatës së Vlorës edhe dy punonjësit e sigurisë private, Artur Grami dhe Gazmend Vathi, të arrestuar pas situatës në zonën e Zvërnecit.

Gjykata ka vendosur ndaj tyre masën e sigurisë “arrest me burg”. Sipas hetimeve, ata dyshohet se kanë qenë të përfshirë në tërheqjen zvarrë të një qytetari gjatë protestës kundër projektit në Zvërnec.

Më herët, në burg është lënë edhe Geraldo Biba, punonjës i “Major Security”, i akuzuar për dhunimin e protestuesit.

Presidenti i Partisë së Lirisë, Ilir Meta, ka lëshuar akuza në drejtim të SPAK gjatë seancës së sotme gjyqësore në GJKKO. Në dëshminë e tij të zbardhur brenda sallës së gjyqit, Meta u shfaq i revoltuar, duke e cilësuar procesin ndaj tij si tërësisht të politizuar dhe të bazuar në manipulime.

Meta akuzoi prokurorët se kanë mbajtur të fshehura letërporositë e ardhur nga Shtetet e Bashkuara të Amerikës që saktësonin faturat e lobimit me “McKeon Group”, ndërsa u ndal sërish te mënyra se si u arrestua më 21 tetor, duke e quajtur një “rrëmbim zyrtar”.

Ish-Presidenti deklaroi para trupit gjykues se është mashtruar me shifrat e lobimit në SHBA, duke tentuar të krijojnë një skandal për llogari të opinionit publik.

“Jam shumë i revoltuar të nderuar gjyqtarë e prokurorë, sepse veç shumë gënjeshtrave të përsëritura, dëgjova një gjë shokuese. Unë jam rrëmbyer më 21 tetor në orën 12:08 minuta nga persona të panjohur dhe vetëm në orën 14:06 më u komunikua urdhri i prokurorëve të SPAK. Që kur jam pyetur për këtë çështje e kam bërë të qartë se kemi pasur veç një pagesë 15 mijë USD, me vendim kryesie dhe me bankë. Në shtator morën një letërporosi për ‘McKeon’ sikur janë bërë takime e pagesa të jashtëligjshme. Por pasi unë arrestohem, më 15 nëntor ka ardhur përgjigje tjetër nga SHBA, një saktësim! Zotërinjtë jo vetëm nuk ma bënë të ditur, por e mbajtën fshehur dhe në janar më pyetën prapë për të njëjtën gjë,” deklaroi Meta.

Duke u ndalur te dokumentet e lobimit të regjistruara në SHBA nën logon e FARA (Foreign Agents Registration Act), Meta sqaroi se ato nuk përbëjnë prova penalizuese dhe se emri i tij nuk figuron në asnjë kontratë.

“FARA është thjesht një portal ku mijëra kompani publikojnë të dhëna për transparencë, por nuk është as gjykatë, as prokurori. Nuk ekziston në marrëveshjen me GSIS asnjë nënshkrim i Ilir Metës! Marrëveshja është mes LSI-së dhe GSIS. Ju zoti Kllapi e dinit që në fillim që janë paguar veç 15 mijë dollarë. Ju erdhi tjetër gjë në shtator e tjetër në nëntor, e mbajtët fshehur dhe më pyetët sërish në janar. Ka një tendencë të qartë për politizim të procesit. Kur s’ke fakte, do e bësh politike!”

Më tej, Ilir Meta akuzoi prokurorët se kanë fshehur dëshmi kyçe të dhëna vite më parë që rrëzonin akuzat aktuale, duke u ndalur edhe te ndarja e përgjegjësive me ish-bashkëshorten e tij, Monika Kryemadhi.

“Prokuroria ka fshehur dëshminë e dhënë tek Ndini Tavani në vitin 2011 nga Hejsek, ku e bën të qartë që s’i kujtohej emri konkret. Edhe ajo çështja me 200 mijë euro bëhet vetëm për manipulim të opinioni publik, nuk ka asnjë përgjigje. Po ashtu, duhet të sqaroj se kreu i AKEP zgjidhet nga Kuvendi dhe Kryeministri, që ka qenë Edi Rama. Nuk e propozojnë partitë politike. Unë jam këtu për të mbajtur përgjegjësi për çdo veprim timin individual, nuk jam as për të marrë e as për të dhënë. Unë mbaj përgjegjësi për të miat, znj. Kryemadhi nuk ka pse mban përgjegjësi për CEZ-DIA,” përfundoi Meta para trupës së GJKKO-së.

Riakreditimi i Programit IPARD III dhe mbështetja financiare për fermerët ishin në qendër të mbledhjes së katërt të Komitetit të Monitorimit, ku mori pjesë edhe ministri i Bujqësisë, Andis Salla, së bashku me përfaqësues të Komisionit Europian, Delegacionit të BE-së në Shqipëri, strukturave zbatuese dhe partnerëve ndërkombëtarë.

Gjatë takimit u diskutua progresi i arritur në përmbushjen e detyrimeve për Kapitujt 11, 12 dhe 13 të negociatave me Bashkimin Europian, si dhe hapat që do të ndiqen për modernizimin e sektorit bujqësor dhe zhvillimin rural.

Salla u shpreh se Programi IPARD III mbetet një nga instrumentet kryesore për mbështetjen e fermave dhe industrisë agro-përpunuese, me fokus rritjen e konkurrueshmërisë, forcimin e sigurisë ushqimore dhe zhvillimin e qëndrueshëm të zonave rurale.

Sipas ministrit, krahas fondeve të IPARD, mbështetja për sektorin do të vijojë edhe përmes Skemës Kombëtare 2026 dhe Instrumentit të Garancisë Sovrane, të cilat synojnë të krijojnë më shumë mundësi financimi dhe investimi për fermerët dhe agrobizneset shqiptare.

Teherani ka njoftuar se marina e Iranit detyroi anijet amerikane që të largoheshin nga Gjiri i Omanit.

Lajmin e bëri të ditur agjencia gjysmë-zyrtare iraniane e lajmeve Tasnim, e cila është e lidhur me Gardën Revolucionare të vendit.

“Marina iraniane, duke qëlluar raketa paralajmëruese dhe dronë, i detyroi shkatërruesit dhe transportuesit e avionëve amerikanë të largoheshin nga Gjiri i Omanit drejt Oqeanit Indian”, sipas agjencisë gjysmëzyrtare iraniane të lajmeve Tasnim, e cila është e lidhur me Gardën Revolucionare.

Televizioni iranian transmetoi pamje që pretendon se përshkruajnë momentin kur u qëlluan të shtënat paralajmëruese.

Imazhet tregojnë momentin kur u lëshua droni. Sipas deklaratës së ushtrisë iraniane, të shtënat paralajmëruese u qëlluan “si pjesë e operacioneve të kryera nga Marina e Shteteve të Bashkuara për të luftuar aktet e vandalizmit dhe ngacmimit në det, si dhe rrëmbimin e anijeve tregtare dhe cisternave të naftës”.