I dërguari special i Francës për Libanin, Jean-Yves Le Drian, pritet të mbërrijë këtë të mërkurë, 3 qershor, në Bejrut, në një përpjekje të Parisit për të forcuar rolin e tij diplomatik në një vend të përfshirë nga kriza të shumta.

Gjatë vizitës, ai do të zhvillojë takime me presidentin Joseph Aoun, kryetarin e Parlamentit Nabih Berri dhe kryeministrin Nawaf Salam. Në fokus të bisedimeve pritet të jenë ndihma për popullsinë e goditur nga kriza ekonomike, përshkallëzimi i konfliktit me Izraelin dhe e ardhmja e misionit paqeruajtës të OKB-së në jug të vendit, UNIFIL.

Situata në Liban mbetet e tensionuar. Izraeli rifilloi sulmet intensive në mars, pasi Hezbollah, i mbështetur nga Irani, nisi sulme me raketa drejt veriut të Izraelit. Edhe pse më 16 prill u arrit një marrëveshje për ndërprerje armiqësish e ndërmjetësuar nga SHBA, sulmet kanë vijuar pothuajse çdo ditë. Deri tani raportohen mbi 3 mijë viktima dhe më shumë se një milion të zhvendosur.

Franca bllokon anijen cisternë të Rusisë
Macron kërkon fundin e sulmeve në Liban dhe marrëveshje urgjente SHBA-Iran

Në këtë sfond, ndikimi i Shteteve të Bashkuara është rritur ndjeshëm. Presidenti amerikan Donald Trump thuhet se ka ndërhyrë për të shmangur sulme izraelite në periferi të Bejrutit, ndërsa presidenti francez Emmanuel Macron ka zhvilluar biseda direkte me të për situatën.

Analistët vlerësojnë se Franca po përpiqet të shmangë margjinalizimin në Liban, ndërsa roli i Uashingtonit po bëhet gjithnjë e më dominues. Marrëveshjet e fundit të armëpushimit dhe ndërmjetësimi mes Libanit dhe Izraelit janë udhëhequr kryesisht nga SHBA, duke e lënë Parisin në një rol dytësor.

Megjithatë, Franca mbetet e pranishme përmes ndihmës humanitare dhe lidhjeve historike me Libanin. Ajo ka akorduar miliona euro për popullsinë e prekur dhe vazhdon të luajë rol kyç në misionin UNIFIL, një nga instrumentet kryesore të ndikimit të saj në rajon.

Po ashtu, Parisi mbështet ushtrinë libaneze dhe ruan interesa ekonomike në vend, përfshirë përfshirjen e kompanive si TotalEnergies dhe CMA CGM.

Ekspertët theksojnë se strategjia e Francës mbështetet kryesisht te diplomacia e butë dhe rrjeti i marrëdhënieve të ndërtuara ndër vite. Megjithatë, përballë rritjes së ndikimit amerikan dhe tensioneve të vazhdueshme në rajon, mbetet e paqartë nëse Parisi do të arrijë të rikthejë rolin e tij udhëheqës në Liban./mxh

David Beckham do të shtojë një tjetër vlerësim prestigjioz në karrierën e tij. Ish-kapiteni i Anglisë do të nderohet me një yll në bulevardin e famshëm Hollywood Walk of Fame, duke u bërë pjesë e listës së personaliteteve që kanë lënë gjurmë në sport dhe argëtim.

Ceremonia e inaugurimit do të mbahet më 12 qershor në Los Anxhelos dhe pritet të mbledhë figura të njohura nga bota e sportit dhe showbiz-it. Mes të ftuarve do të jetë edhe bashkëshortja e tij, Victoria Beckham, e cila do të mbajë një fjalim gjatë aktivitetit.

Sipas organizatorëve, ky vlerësim vjen në një periudhë simbolike, ndërsa SHBA po përgatitet për ngjarje të mëdha futbollistike në vitet e ardhshme. Kontributi i Beckham në popullarizimin e futbollit në Amerikë, si dhe ndikimi i tij në kulturën globale, janë konsideruar faktorë kyç për këtë nderim.

Një detaj i veçantë është se në pllakën e tij do të shfaqet titulli “Sir David Beckham”, pas dekorimit me titull kalorësie nga Mbreti Charles.

Në ceremoni pritet të marrë pjesë edhe aktori Tom Cruise, ndërsa Beckham do të regjistrohet zyrtarisht si personi i 2,849-të që fiton një yll në Hollywood Walk of Fame.

Përzgjedhja për këtë nderim bazohet në sukseset profesionale, ndikimin afatgjatë në publik dhe angazhimin në aktivitete me ndikim shoqëror, kritere që Beckham i ka përmbushur gjatë gjithë karrierës së tij./mxh

Shakira ka ndarë së fundmi detaje të rralla mbi periudhën e vështirë që përjetoi pas ndarjes nga Gerard Piqué, duke treguar se kjo eksperiencë e bëri të zbulonte një forcë që nuk e dinte se e kishte.

Në një intervistë për People, këngëtarja kolumbiane u shpreh se sfidat e jetës i kanë treguar se është shumë më e fortë sesa e kishte menduar ndonjëherë.

Fundi i marrëdhënies së saj shumëvjeçare me ish-futbollistin spanjoll në vitin 2022 u kthye në frymëzim për disa prej projekteve të saj muzikore, mes tyre edhe superhiti “Shakira: Bzrp Music Sessions, Vol. 53”, i cili pushtoi klasifikimet muzikore në mbarë botën.

Artistja tregoi se muzika u bë mënyra e saj për të përballuar emocionet dhe për të shprehur ndjenjat pa kufizime. Sipas saj, procesi i të shkruarit e ndihmoi të çlirohej nga pesha emocionale e asaj periudhe, duke e krahasuar krijimtarinë me një terapi personale.

Gjatë kësaj kohe, Shakira tha se ka gjetur mbështetje të madhe te familja dhe rrethi i ngushtë i miqve, të cilët e kanë ndihmuar të kalojë një nga momentet më sfiduese të jetës së saj.

Duke reflektuar mbi gjithçka që ka përjetuar, këngëtarja theksoi se edhe përvojat e dhimbshme lënë mësime të vlefshme dhe ndihmojnë në forcimin e karakterit.

Aktualisht, Shakira jeton në Miami me dy djemtë e saj dhe ka zgjedhur t’i përkushtohet plotësisht familjes dhe karrierës, duke lënë në plan të dytë jetën sentimentale./mxh

Sekretari i Shtetit i SHBA-së, Marco Rubio tha të mërkurën se bisedimet me Danimarkën dhe Groenlandën rreth përdorimit të ishullit për mbrojtje kolektive janë në një pikë të mirë.

Gjatë një seance dëgjimore në Komitetin e Punëve të Jashtme të Dhomës së Përfaqësuesve, përfaqësuesja Sarah McBride e Delaware e pyeti Rubion: “Supozoj se jeni në dijeni që Groenlanda është me të vërtetë pjesë e Danimarkës?”. Rubio u përgjigj, “Për momentin”.

McBride pyeti: “A duhet që Shtetet e Bashkuara të zotërojnë tokë brenda NATO-s për t’i mbrojtur ato?”

Rubio u përgjigj: “Ne jemi të përfshirë në biseda me Groenlandën dhe Danimarkën mbi përdorimin e Groenlandës për mbrojtje kolektive për të gjithë ne. Është një pjesë kyçe e mbrojtjes nga raketat, por ne jemi të përfshirë në ato bisedime tani. Mendoj se jemi në një pozicion të mirë për këtë tani.”

Rubio tha se bisedat me Danimarkën dhe Groenlandën po vazhdonin çdo muaj.

“Mendoj se do të kemi lajme mjaft të mira për këtë në një moment të caktuar”, tha ai.

Rubio tha se ishte dakord me presidentin amerikan Donald Trump se marrëveshjet për vendosjen e forcave amerikane në Groenlandë ishin të pamjaftueshme dhe se do të ishte më e lehtë të zotërohej territor për ta mbrojtur atë.

Pohimet e Trump se SHBA-të duhet të fitojnë ose kontrollojnë Groenlandën, një territor gjysmë-autonom danez, shkaktuan tensione midis Uashingtonit dhe Kopenhagenit, të dy anëtarë themelues të NATO-s, dhe më gjerësisht në të gjithë Evropën, megjithëse çështja që atëherë është zhvendosur në një pistë diplomatike./mxh

Kryetarët e bashkive të Qarkut të Dibrës janë shprehur kundër çdo ndryshimi të mundshëm të hartës territoriale gjatë një seance dëgjimore në Komisionin e Posaçëm për Reformën Territoriale në Kuvend. Sipas tyre, ndërhyrjet në kufijtë aktualë administrativë do të rrezikonin funksionimin e shërbimeve publike për qytetarët.

Kryetarja e Bashkisë Klos, Valbona Kola, theksoi se territori aktual i bashkisë mundëson mbulim efikas të shërbimeve, pavarësisht distancave të mëdha në terren.

Ajo u shpreh se Bashkia Klos, me një sipërfaqe prej 357 km², është e pozicionuar në mënyrë qendrore dhe mundëson akses të balancuar për të gjitha zonat. Sipas saj, ndryshimi i statusit apo territorit nuk është i nevojshëm pasi shërbimet aktualisht mbulohen në mënyrë relativisht efikase.

Edhe kryetari i Bashkisë Dibër, Rrahim Spahiu, deklaroi se struktura ekzistuese administrative garanton mbulim të plotë të territorit me shërbime publike, por shtoi se numri i njësive administrative duhet rishikuar.

“Dibra ka 15 njësi administrative dhe mendoj se ky numër duhet të reduktohet,” u shpreh ai.

Ndërkohë, kryetarja e Bashkisë Bulqizë, Festime Mjeshtri, paralajmëroi se zgjerimi i bashkive do të vështirësonte ofrimin e shërbimeve ndaj qytetarëve, duke kërkuar ruajtjen e statusit aktual të bashkisë.

Sipas saj, çdo zgjerim territorial do të rrezikonte efikasitetin e shërbimeve në terren.

Edhe kryetari i Bashkisë Mat, Altin Bojni, u shpreh se modeli aktual i administrimit territorial ka rezultuar funksional dhe i zbatueshëm në praktikë.

Debati për reformën territoriale pritet të vijojë në Kuvend, ndërsa bashkitë e Qarku i Dibrës mbeten të unifikuara në qëndrimin kundër ndryshimeve të kufijve aktualë./Mxh

Denzel Dumfries është shumë pranë largimit nga Interi dhe transferimit te Real Madrid. Klubi spanjoll është i gatshëm të paguajë klauzolën e lirimit të mbrojtësit holandez, e cila varion nga 20 deri në 25 milionë euro dhe mund të aktivizohet nga 1 deri më 15 korrik.

Dumfries, i cili mbushi 30 vjeç më 18 prill, u transferua te Interi në verën e vitit 2021 nga PSV për 12 milionë euro. Shitja e tij do t’i siguronte klubit zikaltër një plusvalencë prej afro 15 milionë eurosh.

Paratë e përfituara mund të investohen për afrimin e Marco Palestra, objektivi kryesor për krahun e djathtë.

Ndërkohë, José Mourinho po ndjek edhe rikthimin e Nico Paz në Madrid, duke aktivizuar të drejtën e riblerjes për 9 milionë euro. Trajneri portugez ka shfaqur interes edhe për Alessandro Bastoni dhe Riccardo Calafiori.

Real Madrid po planifikon ndryshime të rëndësishme në skuadër për sezonin e ardhshëm, ndërsa merkatoja po hyn në fazën vendimtare./mxh

Last Updated on 03/06/2026 by Monika

Kombëtarja shqiptare ka humbur miqësoren ndaj Izraelit. Në sfidën e zhvilluar në “Air Albania”, miqtë triumfuan me rezultatin 0-1.

Debutim me humbje për trajneri Rolando Maran në stolin e Shqipërisë, ku pasoi Silvinjon.

Golin e vetëm e shënoi Gloukh në minutën e 73-të, pas një kundërsulmi të shpejtë. Pas golit, në fushë u regjistrua një sherr mes lojtarëve, për shkak të provokimit të lojtarit izraelit te goli.

Vlen të përmendet, se Shqipëria kishte disa raste të pastra me Mehmetin dhe Shehun, por nuk arriti t’i konkretizonte.

Miqësorja e radhës për kuqezinjtë do të jetë ndaj Luksemburgut, më 6 qershor, në orën 20:00, në stadiumin “Air Albania”./mxh

Last Updated on 03/06/2026 by Monika

Kuvajti ka pezulluar të gjitha fluturimet tregtare pasi aeroporti ndërkombëtar i vendit u godit nga një sulm me dronë, duke shkaktuar dëme të konsiderueshme dhe disa të plagosur.

Sipas Ministrisë së Mbrojtjes së Kuvajtit, disa dronë armiqësorë goditën terminalin kryesor të pasagjerëve, duke dëmtuar rëndë infrastrukturën e aeroportit. Si pasojë, kompania ajrore Kuwait Airways njoftoi ndërprerjen e të gjitha fluturimeve deri në një njoftim të dytë.

Ngjarja vjen në mes të përshkallëzimit të tensioneve në rajonin e Gjirit Persik. Vetëm pak orë më parë, Irani kishte ndërmarrë sulme me raketa dhe dronë ndaj objektivave në Kuvajt dhe Bahrein. Në përgjigje, ushtria amerikane kreu sulme ajrore ndaj një objekti ushtarak iranian në ishullin Qeshm, në ngushticën strategjike të Hormuzit.

Komanda Qendrore e Shteteve të Bashkuara deklaroi se operacioni ishte një kundërpërgjigje ndaj sulmeve iraniane që kishin në shënjestër forcat amerikane në Kuvajt dhe selinë e Flotës së Pestë në Bahrein.

Ndërkohë, Garda Revolucionare e Iranit mori përgjegjësinë për sulmet, duke deklaruar se objektivi kryesor ishte Flota e Pestë amerikane. Autoritetet iraniane thanë se veprimi erdhi pas një sulmi amerikan ndaj një anijeje cisternë të destinuar për Iranin.

Përveç zhvillimeve ushtarake, situata ka krijuar paqartësi edhe në frontin diplomatik. Media pranë qeverisë iraniane raportojnë se Teherani ka pezulluar kontaktet me ndërmjetësit ndërkombëtarë, ndërsa presidenti amerikan Donald Trump ka deklaruar se komunikimi mes palëve vazhdon.

Tensionet në Lindjen e Mesme mbeten të larta, ndërsa komuniteti ndërkombëtar po ndjek me shqetësim zhvillimet që mund të çojnë në një përshkallëzim edhe më të madh të konfliktit në rajon./mxh

Të paktën nëntë persona kanë humbur jetën si pasojë e sulmeve ajrore izraelite në Libanin jugor këtë të mërkurë, në një kohë kur marrëveshja e brishtë për një armëpushim të pjesshëm po vihet seriozisht në provë.

Mes viktimave janë dy mjekë të ekipit të urgjencës, ambulanca e të cilëve u godit në zonën e Chehour-it, ndërsa një tjetër sulm ndodhi ndaj një makine në jug të kryeqytetit, Bejrut. Ministria libaneze e Shëndetësisë denoncoi aktet, duke deklaruar se sulmet ndaj personelit mjekësor bien ndesh me ligjin ndërkombëtar humanitar.

Nga ana tjetër, ushtria izraelite njoftoi se ka interceptuar një dron dhe dy predha që kishin kaluar kufirin nga territori libanez. Si kundërpërgjigje, grupi Hezbollah deklaroi se ka shënjestruar një grup trupash izraelite në veri të Izraelit, duke pretenduar se veprimet e tyre ishin përgjigje ndaj shkeljes së armëpushimit nga ana e Izraelit.

Situata mbetet tejet e tensionuar edhe pse diplomatët izraelitë dhe libanezë po zhvillojnë bisedime të dyta në Uashington, me qëllim gjetjen e një plani sigurie që do ta bënte Libanin të pavarur nga ndikimi i Hezbollahut.

Ky përshkallëzim vjen pavarësisht marrëveshjes së arritur të hënën, ku Izraeli ishte zotuar të mos bombardonte kryeqytetin Bejrut, në shkëmbim të ndalimit të sulmeve nga Hezbollahu. Ndërkohë, presidenti amerikan Donald Trump konfirmoi se kishte ndërhyrë personalisht për të ndaluar bombardimet në kryeqytetin libanez, duke i bërë thirrje kryeministrit izraelit Benjamin Netanyahu që të shmangë luftimet e mëtejshme.

Sipas të dhënave nga Ministria e Shëndetësisë në Liban, që nga fillimi i luftës më 2 mars, numri i të vrarëve ka arritur në të paktën 3,516 persona, ndërsa mbi një milion banorë janë zhvendosur nga shtëpitë e tyre. Izraeli raporton se në këtë konflikt janë vrarë 26 ushtarë dhe katër civilë izraelitë./mxh

Kryeministri Edi Rama zhvilloi një intervistë aspak të qetë për rrjetin televiziv prestigjioz amerikan CNN.

I pyetur për protestat në Shqipëri, Rama tha se ka shumë lajme të rreme që po thuhen për këtë çështje. Madje ai u shfaq i revolotuar edhe ndaj gazetares së CNN derisa në fund ajo u detyrua t’i presë fjalën për shkak se Rama nuk po pushonte.

Sjellja e Ramës në CNN i ngjasonte asaj të Donald Trump që sa herë përballet me CNN e akuzon për “lajme të rreme”. Ndoshta kjo ishte një mënyrë e zgjedhur nga Rama për të rënë në sy të kreut të Shtëpisë së Bardhë ose atyre rreth tij.

PJESË NGA INTERVISTA

Gazetarja: Më lejoni fillimisht të marr reagimin tuaj për protestat që kemi parë si në kryeqytetin Tiranë, ashtu edhe në qytetet bregdetare, lidhur me këtë zhvillim që lidhet me Jared Kushner. Si i përgjigjeni ju protestave dhe shqetësimeve të tyre?

Edi Rama: Së pari, ju falënderoj që më jepni këtë mundësi, sepse duhet të them se është vërtet mbresëlënëse të ndiesh peshën e lajmeve të rreme që vijnë edhe nga media që, në sytë e mi, janë shumë të respektuara.

Dhe vetëm për të saktësuar, ju thatë protesta në të gjithë Shqipërinë. Kjo është e rreme. Nuk ka protesta në të gjithë Shqipërinë. Ka një protestë në kryeqytet.

Ne jemi në një luftë hibride. Shqipëria është nën sulm nga armiq që i njohim shumë mirë. Është nën sulm nga konkurrenca shumë e fortë në pjesën tonë të Mesdheut. Është nën sulm nga mijëra e qindra mijëra profile të rreme (bots) që janë krijuar për të shkaktuar gjithë këtë stuhi.

Dhe sigurisht, në këtë protestë ka njerëz me qëllime të mira, të rinj që në përgjithësi janë të interesuar për mjedisin, por që janë keqinformuar në masë të madhe.

Nuk ekziston diçka e tillë si “ishulli i familjes Trump”. Nuk ekziston diçka e tillë si familja e presidentit amerikan që po merr nën kontroll zonat e mbrojtura me flamingo./mxh

Kryeministri izraelit, Benjamin Netanyahu, ka dhënë një intervistë për CNBC, këtë të martë, 3 qershor, ku ka trajtuar disa çështje kyçe, nga marrëdhëniet me liderët europianë dhe raporti me Donald Trump, deri te tensionet me Iranin dhe mundësia e rifillimit të operacioneve ushtarake në shkallë të gjerë.

Sulme ndaj liderëve europianë

Netanyahu ka kritikuar ashpër disa liderë europianë, përfshirë presidentin francez Emmanuel Macron, për qëndrimet ndaj operacioneve ushtarake të Izraelit. Ai i akuzoi se “u përshtaten pakicave islamike radikale” dhe se nuk kanë guxim të mbështesin hapur Izraelin.

Sipas tij, këto qeveri “e dinë që ne po i mbrojmë, por nuk kanë guxim të rreshtohen në anën e duhur dhe të bëjnë atë që duhet për të shpëtuar qytetërimin tonë nga këta barbarë”.

Marrëdhënia me Trump

Kreu i qeverisë izraelite u ndal edhe te raporti me Donald Trump, duke zbuluar se komunikon me të “çdo dy ditë”. Ai theksoi se të dy ndajnë “objektiva të përbashkëta” dhe kanë dakordësi për çështjet kryesore.

Netanyahu minimizoi gjithashtu zërat për tensione mes tyre, duke mohuar që telefonata e fundit të përbëjë krizë. “Nëse mendoni se kjo është krizë, duhet të kishit qenë në biseda të tjera”, tha ai, duke shtuar se marrëdhënia mes tyre mbetet e fortë.

Ai pranoi se ndonjëherë ka “mospajtime taktike”, por theksoi se ato zgjidhen gjithmonë: “Mund të jemi në mospajtim në mëngjes dhe të kemi një veprim të përbashkët pasdite”.

Irani dhe skenari i përshkallëzimit

Në lidhje me Iranin, Netanyahu paralajmëroi se Izraeli dhe Shtetet e Bashkuara janë të gatshme të rifillojnë veprime ushtarake “në shkallë të gjerë”, nëse do të jetë e nevojshme.

Ai vuri në dyshim stabilitetin e armëpushimit mes Uashingtonit dhe Republikës Islamike, duke e cilësuar situatën si një “lojë taktike”. Sipas tij, vendimi për një përshkallëzim të mundshëm i takon SHBA-së, por shtoi se “Izraeli është gati dhe edhe forcat amerikane janë gati”.

Në përfundim, Netanyahu ritheksoi se Izraeli dhe SHBA-të ndajnë të njëjtat objektiva strategjikë përballë Iranit, ndërsa një marrëveshje e mundshme mbetet ende e pasigurt./mxh

Last Updated on 03/06/2026 by EL

Në orën 20.00 në stadiumin Air Albania nisi miqësorja mes Shqipërisë dhe Izraelit. Para ndeshjes, gjatë ekzekutimit të himnit kombëtar izraelit u dëgjuan fishkëllima dhe reagime nga një pjesë e tifozëve të pranishëm në tribunat e stadiumit.

Ceremonia protokollare para takimit u zhvillua nën masa të shtuara sigurie, ndërsa momenti i himnit të Izraelit tërhoqi vëmendjen e publikut dhe mediave sportive. Pavarësisht reagimeve nga tribunat, ndeshja vijoi normalisht pas përfundimit të ceremonisë zyrtare./ET

Last Updated on 03/06/2026 by EL

Botërori FIFA 2026 pritet të jetë një nga ngjarjet që do t’i japë shtysën më të madhe turizmit në Amerikën e Veriut. Sipas Këshillit Botëror të Udhëtimeve dhe Turizmit (WTTC), turneu do të rrisë ndjeshëm kontributin e turizmit në ekonomitë e Kanadasë, Meksikës dhe Shteteve të Bashkuara, duke forcuar pozicionin e rajonit si një nga destinacionet kryesore turistike në botë.

Parashikimet tregojnë se Kanadaja do të përfitojë më shumë nga organizimi i Botërorit, me një rritje prej 6.4% të sektorit të turizmit. Meksika pritet të shënojë një rritje prej 2.4%, ndërsa SHBA-ja 2.1%.

Sipas WTTC-së, Botërori përfaqëson një mundësi të rëndësishme për të nxitur zhvillimin afatgjatë të turizmit, përmes përmirësimit të lidhjeve ajrore, lehtësimit të lëvizjes së turistëve dhe forcimit të bashkëpunimit mes tre vendeve pritëse.

Megjithatë, organizata thekson se për të ruajtur konkurrueshmërinë në tregun global, nevojiten investime të vazhdueshme në transportin ajror, infrastrukturën turistike, teknologjinë digjitale dhe procedurat e hyrjes për vizitorët.

Ndërkohë, Meksika rezultoi vendi me performancën më të mirë turistike në rajon gjatë vitit 2025. Të dhënat tregojnë se vendi regjistroi rritje të vizitorëve të huaj dhe të shpenzimeve turistike, ndërsa SHBA-ja dhe Kanadaja shënuan rënie në disa prej treguesve kryesorë.

WTTC vlerëson se sektori i udhëtimeve dhe turizmit do të mbështesë rreth 30.9 milionë vende pune në Amerikën e Veriut gjatë vitit 2026. Në shkallë globale, turizmi pritet të kontribuojë me rreth 12 trilionë dollarë në ekonominë botërore dhe të mbështesë 376 milionë vende pune./et

Last Updated on 03/06/2026 by EL

Eksperti i kriminalistikës, Ervin Karamuço, ka ngritur alarmin për aktivitetin e shtuar në rrjetet sociale dhe portalet online lidhur me çështjen e Zvërnecit dhe protestat e zhvilluara në Tiranë.

Në një intervistë në emisionin “Real Story” në ABC News, Karamuço deklaroi se pas zhvillimeve të fundit janë aktivizuar një numër i madh adresash dhe platformash që, sipas tij, synojnë nxitjen e tensioneve dhe destabilizimin e situatës.

“Kërkojnë të nxisin nacionalizmin dhe të ngrenë në këmbë grupe personash apo komunitete të caktuara me qëllime destabilizimi. Gjatë 48 orëve të fundit, në rajon dhe në vendet fqinje, në lidhje me çështje shqiptare janë aktivizuar mbi 1 mijë adresa falso dhe janë hapur portale të reja që fokusohen vetëm te çështjet që lidhen me protestat dhe Shqipërinë në Tiranë”, deklaroi Karamuço.

Sipas ekspertit, përdorimi i llogarive të rreme dhe krijimi i platformave të reja informative janë tregues të përpjekjeve për të amplifikuar debatet dhe për të ndikuar në opinionin publik përmes përmbajtjeve që lidhen me zhvillimet e fundit në vend./et

Last Updated on 03/06/2026 by EL

Janë identifikuar 2 të rinjë nga Kosova të cilët humbën jetën pasditen e kësaj të marte të cilët u mbytën gjatë notimit në bregdetin e Shëngjinit, në zonën “Rana e Hedhun”.

Burime bëjnë me dije se viktimat janë shtetasit Leonid Alia nga Fushë Kosovë dhe Jetmir Çopa nga Prishtinë.

Ndërsa të shtuar në spitalin e Lezhës, jashtë rrezikut për jetën ndodhen shtetasit Dion Myftari, Arbër Beqaj dhe Drilon Rrustemi.

Siç raporti ne zonën ku 2 të rinjtë u shuan përgjithmonë nuk ka pasur kulla vrojtimi e as flamuj të kuq në det të cilët përdoren si sinjalizues që pushuesit të mos futen në det, në ditët kur situata duket e rrezikshme, si në ditën e sotme kur deti thuhet se ka qenë me trazira.

2 të rinjtë shënojnë viktimat e para për këtë sezon veror në bregdetin e Shëngjinit./et

Last Updated on 03/06/2026 by EL

Vendimi i Administratës Tatimore të Kosovës (ATK) për të kufizuar pagesat me para në dorë (cash) deri në vlerën 2 mijë euro, po konsiderohet si një lëvizje strategjike për ekonominë e vendit. Sipas këtij rregulli të ri, çdo transaksion mes bizneseve dhe individëve që e kalon këtë shumë, duhet të kryhet detyrimisht përmes sistemit bankar apo platformave elektronike.

Për të zbërthyer efektet e kësaj mase, ka folur eksperti i njohur i ekonomisë në Kosovë, Jakup Bellaqa, në “Box to Box” në Scan TV, ku ka ndarë analizën e tij mbi impaktin që ky vendim do të ketë në tregun vendas.

Eksperti Jakup Bellaqa e ka vlerësuar pozitivisht këtë iniciativë, duke theksuar se orientimi drejt transaksioneve elektronike është një shtyllë e rëndësishme në formalizimin e ekonomisë. Sipas tij, ky kufizim rrit transparencën në treg dhe i jep administratës tatimore mjete më efektive për të monitoruar qarkullimin e parasë.

“Kufizimi i pagesave cash dhe kalimi te ato elektronike ndihmon drejtpërdrejt në formalizimin e ekonomisë. Kjo masë rrit transparencën dhe ua lehtëson punën organeve tatimore për të kryer kontrolle administrative më të sakta, gjë që ndikon pozitivisht në uljen e informalitetit dhe në rritjen e mbledhjes së të ardhurave,” u shpreh Bellaqa.

Edhe pse e konsideron një hap të menduar mirë dhe të domosdoshëm, eksperti rreshtohet krah zërave që mendojnë se kjo paketë nuk duhet të mbetet e izoluar. Për të pasur një sukses afatgjatë dhe një transformim rrënjësor, Bellaqa nënvizoi se ky proces duhet të shoqërohet edhe me politika të tjera mbështetëse.

Sidoqoftë, ai shtoi se ky vendim shënon një kthesë pozitive për Kosovën, duke e shtyrë ekonominë drejt një epoke të re të digjitalizimit dhe modernizimit të sistemeve të pagesave.

Ky hap pritet të ndryshojë sjelljen e bizneseve karshi detyrimeve ligjore dhe të krijojë një mjedis më të barabartë konkurrence në tregun kosovar./ET

Armiqësitë në  vendet e Gjirit u ndezën përsëri të mërkurën, pasi sulmet iraniane ndaj Kuvajtit dëmtuan aeroportin e tij dhe plagosën dhjetëra persona, ndërsa ushtria amerikane kreu sulme pranë Ngushticës së Hormuzit.

Sulmet janë të fundit që testuan një armëpushim të lëkundshëm, duke çuar çmimet e naftës të rriten më shumë se 2%, pasi ngushtica mbetet kryesisht e mbyllur më shumë se tre muaj pasi SHBA-të dhe Izraeli nisën sulmet ndaj Iranit,.

Fluturimet në Aeroportin Ndërkombëtar të Kuvajtit u pezulluan pasi një sulm me dron dhe raketa iraniane dëmtoi objektet e aeroportit dhe misionet diplomatike, duke vrarë një person dhe duke plagosur më shumë se 60 të tjerë, sipas autoriteteve të Kuvajtit dhe mediave shtetërore.

Autoriteti i Aviacionit Civil tha se Kuwait Airways dhe Jazeera Airways po rifillonin fluturimet pas marrjes së masave të sigurisë.

Më herët, mediat iraniane raportuan se Garda Revolucionare elitare e Iranit kishte sulmuar selinë e Flotës së Pestë të SHBA-së në Bahrein dhe një bazë ajrore amerikane, si dhe një anije të identifikuar si Panaya. Komanda Qendrore e SHBA-së (CENTCOM) mohoi se bazat e saj ishin goditur dhe tha se raketat balistike iraniane nuk arritën të godasin objektivat e tyre në rajon.

CENTCOM tha se kishte kryer një raund të ri “sulmesh mbrojtëse” në Iranin jugor, kishte shënjestruar vendet e lëshimit të raketave dhe anijet iraniane që kërkonin të vendosnin mina, si dhe kishte kryer sulme në ishullin Qeshm pranë Ngushticës së Hormuzit pas tentativave për sulme iraniane.

Sakaq, mes luftës ka ardhur edhe reagimi i Donald Trump. Në një intervistë për median amerikane Washington Post, Trump tha se “nuk kemi nevojë për ushtarakë në tokë. Ne kemi zhdukur pjesën më të madhe të ushtrisë së tyre vetëm me bombardime”.

“Ata kanë shumë pak ushtarë”, tha ai. Trump përsëriti optimizmin e tij për negociatat, duke thënë se bisedimet me Iranin “po evoluojnë me shpejtësi” dhe se “nuk do të kemi një armë bërthamore, dhe shumë gjëra të tjera pozitive do të ndodhin”.

“Do të doja shumë ta takoja. Do të doja të takoja të gjithë. Do të doja ta takoja dhe ndoshta do të takohemi herët a vonë, varësisht se si do të zhvillohen gjërat”, tha Donald Trump në një intervistë ekskluzive me New York Post. “Ai nuk po ia del mbanë; po i mungojnë shumë pjesë të ndryshme”, shtoi Trump në lidhje me informacionet se Khamenei u gjymtua në një sulm ajror. /et

Mjeku fitues i Çmimit Nobel për Paqen, Denis Mukwege paralajmëroi se epidemia e re e Ebolës, e cila po përhapet me shpejtësi në Republikën Demokratike të Kongos dhe Ugandë, mund të shndërrohet në më vdekjeprurësen të regjistruar ndonjëherë.

Mukwege u bëri thirrje gjithashtu të gjitha palëve në konflikt në rajon të pranojnë një armëpushim të menjëhershëm për të ndihmuar në frenimin e përhapjes së sëmundjes.

Në një artikull të botuar në gazetën franceze Le Monde, Mukwege theksoi se epidemia aktuale nuk është thjesht një krizë shëndetësore, por një emergjencë që ishte e parashikueshme për shkak të dhunës së vazhdueshme, neglizhencës dhe dështimeve politike në rajon.

Sipas tij, kjo është epidemia e 17-të e Ebolës që godet Republikën Demokratike të Kongos, vetëm pesë muaj pas përfundimit të shpërthimit të mëparshëm.

Mukwege shpjegoi se varianti i rrallë i virusit, i njohur si Bundibugyo ebolavirus infection, ka qarkulluar pa u zbuluar për të paktën gjashtë javë. Ai fajësoi shkurtimet në ndihmën ndërkombëtare, të cilat sipas tij detyruan laboratorët të testonin kryesisht për variantin më të zakonshëm të Ebolës, atë të Zaires.

“Nëse nuk merren masa urgjente, kjo epidemi mund të bëhet më vdekjeprurësja që është regjistruar ndonjëherë”, paralajmëroi ai.
Mjeku nobelist theksoi se lindja e Kongos nuk është një mjedis neutral ku virusi thjesht është shfaqur. Sipas tij, dekada ndërhyrjesh të huaja dhe konfliktesh mes grupeve të armatosura kanë krijuar mosbesim të thellë te popullsia dhe kanë nxitur përhapjen e dezinformimit.

Ai shtoi se shumë qendra shëndetësore janë shkatërruar, njësitë e izolimit janë djegur, ndërsa punonjësit e shëndetësisë janë kërcënuar, sulmuar dhe madje vrarë gjatë kryerjes së detyrës.

Mukwege kritikoi gjithashtu uljen e ndjeshme të ndihmës amerikane për Kongon. Sipas tij, ndihma e USAID për vendin ka rënë me rreth 68%, nga mbi 1.41 miliardë dollarë në vitin 2024 në vetëm 451 milionë dollarë në vitin 2025.

Ai tha se kapacitetet lokale epidemiologjike, rrjetet laboratorike dhe zinxhirët e furnizimit, të ndërtuara ndër vite me mbështetjen e USAID-it dhe të Bashkimit Evropian, janë dobësuar rëndë ose janë çmontuar.

Në përfundim, Mukwege u bëri thirrje qeverive, donatorëve ndërkombëtarë, agjencive të Kombeve të Bashkuara (OKB), organizatave humanitare, si dhe Organizatës Botërore të Shëndetësisë (OBSH) dhe Africa CDC, që të mobilizohen menjëherë për të përballuar krizën. Ai nënvizoi se punonjësit e kujdesit shëndetësor duhet të mbështeten dhe të mbrohen në mënyrë efektive për të shmangur një katastrofë humanitare edhe më të madhe./mxh

NATO ka nisur manovrën e saj të përvitshme detare “BALTOPS” në Detin Baltik, me pjesëmarrjen e më shumë se 30 anijeve nga 15 vende dhe rreth 6 000 ushtarakëve, njoftoi sot marina gjermane.

Manovra ushtarake dyjavore ka nisur nga porti polak i Gdynia-s dhe drejtohet nga marina e SHBA-së. Ajo do të përfundojë në qytetin portual gjerman, Kiel.

Gjermania merr pjesë me fregatën “Sachsen-Anhalt”, dhe anijet “Braunschweig” dhe “Erfurt”, nëndetësen U34 si dhe një avion patrullimi detar.

Sipas zëvendësadmiralit Stephan Haisch, të gjitha njësitë e përfshira, do të kontribuojnë në forcimin e pranisë detare të NATO-s, duke përdorur anije, mjete ajrore detare dhe sisteme pa pilot.

Fokusi kryesor i manovrës, është garantimi i lirisë së lundrimit në Detin Baltik dhe demonstrimi i aftësive parandaluese të aleancës.

Deti Baltik konsiderohet me rëndësi të veçantë strategjike, kryesisht në kontekstin e luftës së Rusisë kundër Ukrainës.

Rusia është i vetmi vend nga nëntë shtetet bregdetare të Baltikut, që nuk është anëtar i NATO-s.

Manovra “BALTOPS” ka nisur që në periudhën e Luftës së Ftohtë dhe synon të sigurojë aftësinë e forcave detare të NATO-s, për të operuar lirshëm në Baltik, duke penguar njëkohësisht, hyrjen e forcave kundërshtare drejt Detit të Veriut dhe Oqeanit Atlantik./ET

Last Updated on 03/06/2026 by EL

Ndërsa në Shqipëri janë shtuar protestat kundër projektit të lidhur me Jared Kushner në Sazan dhe në zonën e Zvërnecit, disa faqe greke me profil nacionalist dhe influencues në rrjetin ‘X’ e kanë çuar retorikën përtej shqetësimeve mjedisore apo ligjore, duke e kthyer në një çështje pretendimesh etnike e territorial.

Nga postimet e monitoruara, vërehet se disa llogari që përhapin propagandë nacionaliste greke po përpiqen ta zhvendosin debatin nga projekti i investimit dhe pasojat e tij konkrete, drejt narrativës së vjetër nacionaliste të Vorio Epirit. Një prej influencuesve, me emrin Trikalinos në ‘X’ shkruan se Zvërneci është  “një fshat i mrekullueshëm grek në rajonin e Vlorës”, ndërsa pretendon se qeveria shqiptare dhe familja Trump “po marrin shtëpitë e vorioepirotëve” në zonë. Postimi përdor edhe hashtag-un #ΒόρειοςΗπειρος, pra “Vorio Epiri”, duke e lidhur projektin e Zvërnecit me pretendime historike dhe etnike greke mbi jugun e Shqipërisë.

Në një tjetër postim, këtë herë nga një faqe me emrin ZenonPapazachos, që gjithashtu shpërndan propagandë ekstremiste të djathtë greke, ishulli i Sazanit paraqitet si “ishulli grek Sason”, i njohur, sipas autorit, që nga antikiteti dhe i banuar nga grekë prej vitit 1000 para Krishtit. I njëjti postim pretendon se në vitin 1914 shqiptarët kanë kryer një masakër ndaj banorëve grekë të ishullit dhe e lidh projektin e sotëm të Kushnerit me idenë provokuese se hotelet do të ndërtohen “mbi varret e grekëve të vrarë”. Faktikisht, ishulli i Sazanit nuk ka qenë kurrë i banuar, as në antikitet, veçanërisht sepse nuk ka burime uji të pijshëm.

Një postim tjetër nga po i njëjti profil në ‘X’ shkon edhe më tej, duke përzier projektin e Sazanit me teori konspirative dhe referenca ndaj Jeffrey Epstein. Aty thuhet se “dhëndri i Trumpit, Kushner, bashkë me mikun e tij Nat Rothschild” kanë blerë “ishullin grek Sazan” për ta kthyer në një “ishull të ri Epstein”. Përfshirja e emrit të Rothschild lidhet me deklaratën e Kushner gjatë një interviste, ku ai tha se e ka zbuluar zonën gjatë një udhëtimi me jahtin e Nat Rothschild, por postimi duket se e përdor këtë element për të ndërtuar një narrativë konspirative, jo për të analizuar faktet e projektit.

Një tjetër influencues, me emrin JOKAQARMY1, i njohur për shpërndarjen e narrativave proruse thotë se “Kryeministri Edi Rama ia ka shitur bregdetin e Vlorës Izraelit,” ndërsa shton se Kushner dhe Ivanka Trump do të ndërtojnë një “ishull për parazitët,” duke iu referuar pushuesve të pasur që pritet të pushojnë në atë resort kur të ndërtohet.

Këto dhe shumë faqe apo influencues që shpërndajnë narrativa nacionaliste greke, ruse dhe serbe duket se po prodhojnë tre narrativa të pabaza: se Zvërneci është një zonë “greke” ku po cenohen pronat e “vorioepirotëve”; se Sazani është një ishull “grek” i përvetësuar historikisht nga Shqipëria; dhe se projekti i Kushnerit nuk është thjesht një investim turistik i diskutueshëm, por pjesë e një skeme më të errët globale.

Prania e shtuar e narrativave të tilla ngre një pikëpyetje të rëndësishme mbi mënyrën se si pakënaqësitë e qytetarëve mund të jenë duke u shfrytëzuar nga aktorë të tjerë, me interesa krejt të ndryshme nga mbrojtja e mjedisit apo e pronës publike. Kur llogari nacionaliste greke e paraqesin Zvërnecin si “fshat grek” dhe Sazanin si “ishull grek”, ndërsa profile proruse apo të lidhura me narrativa serbe e kthejnë projektin në një histori shitjeje të Shqipërisë tek “Izraeli” apo tek elitat globale, atëherë bëhet e qartë se rreth protestës po përpiqen të ngjiten axhenda të rrezikshme nacionaliste dhe konspirative.