Një ngjarje tragjike ka ndodhur në Fushë-Milot të Kurbinit, ku një i moshuar ka humbur jetën pasi u përfshi nga flakët e zjarrit në oborrin e banesës.

Korrenspondenti i Report Tv, Elvis Hila, ka mësuar se viktima Demer Haxhiu 78 vjeç ka qenë duke djegur mbeturina në bahçen e tij.

Papritur, flakët e zjarrit morën përmasa më të mëdha dhe përfshinë edhe vetë të moshuarin.

Ky i fundit nuk mundi të shpëtonte dhe fatkeqësisht humbi jetën.

Në vendngjarje mbërritën shërbimet zjarrfikëse të Laçit dhe grupi hetimor, të cilët po punojnë për të zbardhur rrethanat e ngjarjes.

Në Gjykatën Speciale në Hagë sot pritet të bëhet publik vendimi lidhur me mocionin e ekipeve mbrojtëse të ish-krerëve të UÇK-së për të rrëzuar pjesë të caktuara të aktakuzës për krime të pretenduara të luftës.

12 qershori ka qenë afati i fundit kur Hashim Thaçi, Kadri Veseli, Jakup Krasniqi e Rexhep Selimi kanë mundur të dorëzojnë mocionin për rrëzimin e akuzave. Ndërkaq, Zyra e Prokurorit të Specializuar pati kohë të përgjigjet deri më 7 korrik.

Vendimi për mocionin pritet ta përcaktojë edhe rrjedhën e vazhdimit të këtij procesi gjyqësor.

Mbrojtja e ish-eprorëve të UÇK-së e ka konsideruar rastin e prokurorisë të dobët si dhe ka deklaruar se presin rezultat pozitiv në fund të këtij procesi gjyqësor.

Ish-eprorët e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi e Rexhep Selimi ndodhen në paraburgim në Hagë prej nëntorit të vitit 2020.

Zyra e Prokurorit të Specializuar i ngarkon Thaçin dhe të tjerët me akuza për krime të pretenduara të luftës. Ata janë deklaruar të pafajshëm për të gjitha pikat e aktakuzës.

Gjykimi ndaj tyre nisi më 3 prill 2023 – gati tri vjet pas konfirmimit të aktakuzës prej kur ish-krerët e UÇK-së mbahen në qendrën e paraburgimit në Hagë.

Specialja është kritikuar në vazhdimësi për redaktime të shumta dhe mbyllje për publikun.

Edhe Avokati i Popullit i Kosovës, Naim Qelaj ka shprehur shqetësime rreth punës së Gjykatës Speciale. Qelaj ka ngritur dyshimet e tij nëse në Speciale po respektohen parimet e gjykimit të drejtë dhe të paanshëm. /kosovapress

Nga Auron Tare 

Video e Bardhës, shitëses së njohur të tregut të perimeve në Sarandë që debatonte me Muçin përfaqësuesin e Bashkisë së Qytetit u bë virale. Kushdo që e pa u habit nga argumentimi i Muçit i cili pak më parë kishte pasur të njëjtin debat me Lutin, një peshkatar i cili prej dekadash me një varkë me kupi del në det dhe gjuan peshk me grep.

Argumenti i Muçit se si Bardha duhej të kishte qese me etiketë se nga dhe prej cilit Mal vinte rigoni ishte i njëjtë edhe për Lutin i cili duhej t’u vinte etiketë peshqve që kapte çdo ditë me fillo.

Po kështu edhe Rigoni i Malit edhe Peshku i kapur në det me grep duhet të kishin faturë tatimore. Që Bardha apo fshatarët e zonës kanë vite qe mbledhin në mal rigon, çaj, lakra të egra e kështu me radhë këtë e di gjithë qyteti. Këtë e di edhe Muçi që si rigonin si peshkun e freskët e blen te Bardha apo tek Luti.

Mirëpo dje Muçi i cili përfaqëson institucionin shtetëror kërkonte llogari përpara kamerave për një gjë që logjika e quan absurde.

Sot Tatimet me sa lexova në shtyp, e kishin quajtur pretendimin e Muçit për Rigonin dhe peshkun me fillo, të pa bazuar në Ligj dhe të pa argumentuar në asnjë urdhëresë apo vendim.

Në këtë mënyrë Muçi që përfaqëson Bashkinë e Sarandës duket se nuk di apo nuk ka lexuar Ligjin dhe në kundërshti si me logjikën e qytetarëve si me Ligjin e Tatimeve ju hakërrua kot edhe Bardhës edhe Lutit.

Në fakt performanca e Muçit në TV është një pasqyrë e qartë dhe realiste e injorancës dhe pa aftësisë totale të administratës sonë. Prandaj i sugjeroj z.Muçi se si një punonjës në Bashkinë e Sarandës duhet të lexojë Ligjin dhe pas kësaj do ishte e udhës që t’i kërkojë një ndjesë të madhe si Bardhës ashtu edhe Lutit, rigoni i malit edhe peshku i detit.

Qeveria italiane vlerëson “ndryshimin e qëndrimit të SHBA”, siç e ka quajtur Giorgia Meloni, përsa i përket luftës në Ukrainë. Por nuk do të blejë armë drejtpërdrejt nga Shtetet e Bashkuara për t’ia kaluar më pas ushtrisë së Kievit. Kjo linjë konfirmohet për La Repubblica nga burime të Ministrisë së Mbrojtjes, në orët kur kancelaritë e vjetra të kontinentit po shqyrtojnë deklaratat e manjatit amerikan, i cili pardje, përkrah sekretarit të përgjithshëm të NATO-s, Mark Rutte, deklaroi nga Zyra Ovale se Shtetet e Bashkuara do të prodhojnë pajisje ushtarake për t’u dërguar në Ukrainë, por do të jenë “evropianët që do të paguajnë” faturën.

Italia, sipas të njëjtave burime të Mbrojtjes, nuk ka ndërmend të ndjekë këtë lloj skeme blerjeje, siç po e shqyrton Gjermania e Friedrich Merz për raketat Patriot, raketa tokë-ajër të kërkuara disa herë nga Volodymyr Zelensky në samitet me aleatët perëndimorë. Kjo vlen edhe për çështje të tjera, nga obusët te bombat për avionët luftarakë. Sa i përket fushës ushtarake, për Italinë shkëmbimet tregtare me Uashingtonin do të mbeten të pandryshuara dhe do të përqendrohen kryesisht te F35-at (avioni shumëfunksional i gjeneratës së pestë, në dispozicion të Forcave Ajrore dhe Marinës Ushtarake), por pa aktivizuar kontrata të reja. Do të mbeten në fuqi vetëm marrëveshjet tashmë të nënshkruara. Ndoshta, duke ndjekur një kërkesë që NATO-ja e ka adresuar këto orë në Romë ashtu si në kryeqytete të tjera evropiane, Italia mund të ofrojë mbështetje, si financiare ashtu edhe logjistike, për transportin e armëve nga SHBA në Ukrainë. Asgjë më tepër.

Tema e blerjes së armëve amerikane për Kievin po trazojnë qeveritë e kontinentit. Dje përfaqësuesja e lartë për politikën e jashtme të BE-së, Kaja Kallas, shpjegoi se “nëse armët paguhen nga Evropa, atëherë nuk është ndihmë nga Shtetet e Bashkuara”. Qëndrimi i qeverisë italiane merr në konsideratë kufizimet e ndërlikuara buxhetore: në vitin 2025 shpenzimet ushtarake nuk pritet të rriten më, ndërsa për 2026 shumëçka do të varet nga rishikimi i mekanizmave që Bashkimi Evropian do të vendosë për të financuar riarmatimin. Ndikojnë gjithashtu edhe ekuilibrat delikatë politikë brenda koalicionit qeverisës. Dje Matteo Salvini riktheu qëndrimin e Legës mbi këtë çështje: “Të futim në borxh italianët për të blerë armë diku tjetër nuk më duket veprim i dobishëm; të investojmë për sigurinë e brendshme, absolutisht po”.

Antonio Tajani, nga Uashingtoni, ku ka takuar sekretarin e Shtetit Marco Rubio – bisedë që përfshinte edhe çështjen e tarifave – ishte më i paqartë mbi këtë pikë, duke ia kaluar përgjegjësinë llojit të instrumentit të blerjes që duhet të përcaktojë aleanca atlantike. “Të blejmë armë nga SHBA? Vendimi i përket NATO-s – tha ministri i Jashtëm – Ne jemi në favor të mbështetjes për Ukrainën, sekretari i përgjithshëm Rutte do të flasë me liderët dhe do të shohim çfarë do të bëhet. Për momentin është e rëndësishme që nga ana amerikane ka pasur një zgjedhje të fortë në mbështetje të Ukrainës”. Sa i përket Putinit, për ta shtyrë drejt një armëpushimi duhen “tarifa dhe sanksione”.

Meloni e ka trajtuar këtë çështje nga Pallati Chigi, pas pritjes që i bëri mbretit të Bahreinit dhe kancelarit austriak Christian Stocker. “Po shohim sot një ndryshim qëndrimi nga ana e Shteteve të Bashkuara dhe sigurisht që e mirëpresim pozitivisht”, deklaroi ajo para kamerave dhe gazetarëve (pa pyetje). Qeveria italiane, si shumica e vendeve të BE-së, deri një muaj më parë e shihte me shqetësim linjën e Uashingtonit, nga frika e një tërheqjeje nga teatri i luftës në Ukrainë. Një tërheqje që sot duket më e largët, edhe pse ekziston gjithmonë faktori Trump, me ndryshimet e vazhdueshme të skenarëve dhe deklaratave të komandantit të përgjithshëm. Megjithatë, sipas kryeministres, për të arritur në një negociatë të vërtetë me Putinin është e domosdoshme “të vazhdojmë të mbështesim Ukrainën, në mënyrë që ajo të mund të mbrohet, dhe të rrisim presionin mbi Rusinë”. Edhe sepse ofensiva e egër e Moskës vazhdon, civilët goditen, “sulme gjithnjë e më intensive, brutale, që tregojnë sa pak është e angazhuar Rusia për të ndërtuar paqen. Dhe kjo, pavarësisht vullnetit për dialog të administratës Trump, të cilin Putini ka vendosur të mos e pranojë”./La Repubblica

Një 31-vjeçar i cili lëvizte me armë me vetë në makinë ka rënë në prangat e policisë së Tiranës.

Egzon Murataj kap nga blutë në urën e Babrroit.

Ndërkohë pasagjeri 27-vjeçar do të hetohet në gjendje të lirë për moskallëzim krimi.

Si provë materiale u sekuestruan pistoleta me municion luftarak, automjeti dhe 2 celularë.

Njoftimi i policisë:

Shërbimet e Komisariatit të Policisë Nr. 4, mbi bazën e informacioneve të siguruara në rrugë operative për 2 shtetas që lëviznin me armë zjarri në automjet, kanë organizuar dhe finalizuar operacionin policor të koduar “Fokusi”, si rezultat i të cilit u godit një rast i armëmbajtjes pa leje.

Gjatë operacionit, në urën e Babrroit, shërbimet e Policisë ndaluan automjetin me drejtues shtetasin F. B. dhe pasagjer E. M. Gjatë kontrollit në automjetit, në derën e pasagjerit, u gjet një armë zjarri pistoletë me municion luftarak, që dyshohet se e posedonte shtetasi E. M. Arma e zjarrit u sekuestrua në cilësinë e provës materiale, bashkë me automjetin.

Në vijim të veprimeve për rastin, u arrestua shtetasi E. M., 31 vjeç, për veprën penale “Mbajtja pa leje dhe prodhimi i armëve, armëve shpërthyese dhe i municionit”, dhe nisi procedimi penal për shtetasin F. B., 27 vjeç, për veprën penale “Moskallëzimi i krimit”, të dy banues në Tiranë.

Materialet procedurale iu referuan Prokurorisë së Tiranës, për veprime të mëtejshme.

Shpenzimet e pushtetit vendor për 5-mujorin e parë 2025 evidentojnë zhvendosje të theksuar drejt shpenzimeve të personelit dhe tkurrje të mëtejshme të shpenzimeve kapitale në raport me shpenzime totale.

Personeli zuri 56% të shpenzimeve totale bashkiake në 5 mujorin 2025 nga 52% që zunë vitin e kaluar në këtë periudhë.

Të dhënat zyrtare nga Ministria e Financave tregojnë se shpenzimet për paga dhe kontributet shoqëruese arritën 16,454 milionë lekë, ose rreth 25% më shumë se një vit më parë.

Ndërkohë shpenzimet kapitale zunë 14% të shpenzimeve totale në 5-mujorin 2025 nga 16.6% në vitin 2024.

Shtimi me 25% i shpenzimeve të personelit në vitin 2025 erdhi nga rritja e pagave.

Në anën tjetër, shpenzimet kapitale, matësi kryesor i investimeve publike në infrastrukturë, shërbime dhe asete të reja, kanë mbetur praktikisht të pandryshuara në nivelin: 4,1 miliardë lekë milionë lekë, gati të njëjtin nivel si një vit më parë.

Ndërsa kostot e personelit kanë “ngrënë” një copë më të madhe të tortës së shpenzimeve, hapësira për projekte zhvillimi nuk është zgjeruar,  madje realisht është ngushtuar, po të llogariten edhe efektet e inflacionit.

Kontrasti midis ritmit të rritjes së pagave dhe ngrirjes së investimeve po ul produktivitetin e buxheteve vendore, ku shumica e fondeve po përdoren kryesisht për funksionimin e përditshëm, jo për rritje kapacitetesh apo përmirësim shërbimesh.

10 vite nga nisja e zbatimit të reformës territoriale, në vend që të rrisin shërbimet për qytetaret i kanë përkeqësuar ato. Kompetencat dhe territoret e bashkive janë zgjeruar dukshëm pas reformës territoriale të vitit 2015 dhe gjithashtu, edhe kapacitetet financiare.

Reforma shkriu 373 njësi vendore në 61 bashki, ndërkohë fondet  janë dyfishuar dhe pushteti i bashkive është i gjerë në komunitetet që drejtojnë, që nga strehimi e deri te kujdesi social, bujqësia, infrastruktura rurale dhe arsimi parashkollor, të cilat nëse zotërohen siç kërkojnë ligjet, ata mund të ndikojnë cilësinë e jetës, po aq edhe sa politikat e qeverisë qendrore.

Por në realitet, cilësia e shërbimeve, jo vetëm që nuk ka ndryshuar që nga reforma, por në shumicën e rasteve, kostoja e tyre është rritur, teksa rajonet e Shqipërisë po zbrazen nga popullsia dhe sidomos të rinjtë.

Komunitetet rurale po përballen me mungesa të mëdha në shërbime dhe në infrastrukturë, teksa bashkitë e vendit nuk janë të afta të zbatojnë dhe të realizojnë buxhetet e tyre të vogla karshi nevojave të mëdha.

Të dhënat zyrtare nga Ministria e Financave tregojnë se në 2024 pushteti vendor realizoi vetëm 43 për qind të programit të investimeve. Nga 46,3 miliardë lekë të planifikuara u investuan vetëm 19,9 miliardë lekë ose më pak se gjysma e programit./Monitor

Sipas Shërbimit Meteorologjik moti parashikohet i kthjellët në pjesën më të madhe të territorit, me vranësira në zhvillim në orët e mesditës kryesisht përgjatë relieveve malore të vendit.

Temperaturat maksimale shënojnë vlerën 38 gradë Celcius në  qarkun e Tiranës, Elbasanit, Beratit dhe Fierit

Era do të fryjë me drejtim verilindje – veriperëndim me shpejtësi mesatare 5 m/s, ndërsa përgjatë vijës bregdetare e dhe zonat luginore era fiton shpejtësi deri në 8 m/s.

Valëzimi në det do të jetë i forcës 2-3 ballë.