Ish-futbollisti i Kombëtares dhe ish-drejtori sportiv i Milanit, Igli Tare është thirrur në SPAK për tu marrë në pyetje si person në dijeni për çështjen e ish-zv.kryeministres Belinda Balluku.

Report Tv mëson se Tare është thirrur nga prokurori i çështjes Dritan Prençi dhe gjatë marrjes në pyetje i është kërkuar edhe prania e një avokati.

Vetëm 2 javë më parë, më 19 maj, SPAK mori në pyetje edhe vëllanë e Igli Tares, Agronin, i cili qëndroi në ambientet e Prokurorisë së Posaçme për rreth 30 minuta.

Agron Tare ka qenë drejtori i Përgjithshëm i Autoritetit Portual Durrës dhe zëvendësministër i Punëve të Jashtme.

Violand Braçellari 43 vjeç është autori i vrasjes së efektivit të ‘Shqiponjave’ Enea Mekolli dhe i plagosjes së policit Edison Adri.

Braçellari ishte shpallur në kërkim dhe dënuar me 10 vite burg për prodhim e shitje të narkotikëve.

Braçellari fshihej në stan, ndërsa policia kishte rënë në gjurmët e tij dhe shkoi për ta arrestuar. Stani u rrethua ndërsa 43-vjeçari nuk iu përgjigj thirrjeve të policisë për tu dorëzuar, por hapi zjarr në drejtim të efektivëve ku për pasojë vrau njërin prej tyre dhe plagosi një tjetër. Ky i fundit është nisur me helikopter të ushtrisë drejt Traumës me plagë në pjesën e nofullës dhe ndodhet jashtë rreziku për jetën.

Policia iu kundërpërgjigj po me armë duke e plagosur autorin në bark. Ai është arrestuar, ndërsa fillimisht është dërguar për mjekim në spitalin e Korçës ndërsa do të dërgohet te Trauma për mjekim të specializuar.

Seanca e sotme plenare kanë nisur me një minutë heshtje për rënien në krye të detyrës të efektivit të policisë, Enea Mekolli i cili u vra gjatë operacionit policor në Maliq.

Kreu i grupit parlamentar të PS-së,  Taulant Balla kërkoi që të mbahet një minutë heshtje për humbjen e efektivit. Më tej Balla, ashtu si kryeministri,  kërkoi po ashtu dënim maksimal për autorin e ngjarjes së rëndë.

Një kërkesë me të cilën u dakordësuan dhe pjesa tjetër e opozitës, të cilët menjëherë u ngritën në këmbë dhe mbajtën një minutë heshtje për efektivin që u vra mëngjesin e sotëm gjatë operacionit policor të zhvilluar në Llozhan të Maliqit.

Fjala e Taulant Ballës: Ka rënë në krye të detyrës efektivi i policisë së shteti. Deputetë, të dashur qytetarë uniforma që mban policia e shteti duhet të bëjnë që policët të nderohen. Policia e shteti ka derdhur gjak në emër të misionit. Kush ngre dorë kundër punonjësve të policisë. Urojmë për shërim sa më të shpejtë për efektivin e plagosur. Drejtësia do të funksionjë me forcën e vetë për aktin e autorit. Në emër të griupit parlamentar të PS kërkojmë mbajtjen e një minuti heshtje për rënien e policit.

RENDI I DITËS

Në mbështetje të urdhrit nr. 35, datë 2.6.2026 të Zëvendëskryetares së Kuvendit, znj. Klodiana
Spahiu, rendi i ditës është si më poshtë vijon:
1. Miratimi i procesverbalit të seancës plenare të datës 1.6.2026.
(Neni 44, pika 2, të Rregullores së Kuvendit)
2. Njoftime.
(Neni 44, pika 3, të Rregullores së Kuvendit)
3. Interpelancë urgjente me Kryeministrin e Republikës së Shqipërisë, z. Edi Rama,
kërkuar nga një grup deputetësh të Grupit Parlamentar të Partisë Demokratike.
(Në mbështetje të nenit 80 të Kushtetutës dhe nenit 97 të Rregullores së Kuvendit)
4. Interpelancë urgjente me Ministrin e Punëve të Brendshme, z. Besfort Lamallari,
kërkuar nga një grup deputetësh të Grupit Parlamentar të Partisë Demokratike.
(Në mbështetje të nenit 80 të Kushtetutës dhe nenit 97 të Rregullores së Kuvendit)
5. Interpelancë me Kryeministrin e Republikës së Shqipërisë, z. Edi Rama, kërkuar nga
deputetët Agron Shehaj dhe Erald Kapri. (Në mbështetje të nenit 80 të Kushtetutës dhe
nenit 96 të Rregullores së Kuvendit)
6. Interpelancë me Ministrin e Infrastrukturës dhe Energjisë, z. Enea Karakaçi, kërkuar
nga deputeti Kliti Hoti. (Në mbështetje të nenit 80 të Kushtetutës dhe nenit 96 të
Rregullores së Kuvendit)
7. Interpelancë me Ministrin e Infrastrukturës dhe Energjisë, z. Enea Karakaçi, kërkuar
nga deputeti Gjin Gjoni. (Në mbështetje të nenit 80 të Kushtetutës dhe nenit 96 të
Rregullores së Kuvendit)
8. Interpelancë me Ministrin për Evropën dhe Punët e Jashtme, z. Ferit Hoxha, kërkuar
nga deputeti Erald Kapri. (Në mbështetje të nenit 80 të Kushtetutës dhe nenit 96 të
Rregullores së Kuvendit)
9. Projektligji “Për ratifikimin e marrëveshjes, ndërmjet Republikës së Shqipërisë dhe
Republikës së Polonisë, për sigurimet shoqërore”. (Në mbështetje të neneve 78, 83, pika
1, dhe 121 të Kushtetutës, si dhe neneve 55, 73-77 të Rregullores, shumicë absolute votash
për miratim)
Pyetje
Shprehet nismëtari
Shprehet Komisioni përgjegjës për Ekonominë, Punësimin dhe Financat
Dhënie mendimi Komisioni për Çështjet Ligjore dhe Administratën Publike
Dhënie mendimi Komisioni për Europën dhe Punët e Jashtme
Dhënie mendimi Komisioni për të Drejtat e Njeriut dhe Mjetet e Informimit Publik
Dhënie mendimi Komisioni për Shëndetësinë dhe Mirëqenien Sociale
Dhënie mendimi Komisioni për Bujqësinë, Ushqimin dhe Zhvillimin Rural
Diskutime
(Shprehen grupet parlamentare)
Koha e votimit
10.Projektligji “Për nënproduktet me origjinë shtazore”. (Në mbështetje të neneve 78 dhe 83,
pika 1, të Kushtetutës dhe neneve 55, 73 të Rregullores, shumicë e thjeshtë votash për miratim)
Pyetje
Shprehet nismëtari
Shprehet Komisioni përgjegjës për Bujqësinë, Ushqimin dhe Zhvillimin Rural
Dhënie mendimi Komisioni për Çështjet Ligjore dhe Administratën Publike
Dhënie mendimi Komisioni për Europën dhe Punët e Jashtme
Diskutime
(Shprehen grupet parlamentare)
Koha e votimit
11.Diskutime për çështje jashtë rendit të ditës. (Në mbështetje të nenit 45 të Rregullores së
Kuvendit: Çdo deputet mund të flasë jo më shumë se 5 minuta dhe nëse diskuton në emër të
grupit parlamentar, jo më shumë se 8 minuta. Koha e diskutimeve për çështje jashtë rendit
të ditës nuk mund të jetë më shumë se 60 minuta.)

Analisti Arben Meçe tha gjatë fjalës së tij, se në protestat e zhvilluara në Tiranë kundër investimit në Zvërnec, ka pasur shumë njerëz të ardhur me autobusë nga Greqia, por edhe shumë greqisht-folës që janë me pasaporta greke dhe që jetojnë në Shqipëri.

Teksa vlerësoi projektin që pritet të ndërtohet, Meçe tha se para nisjes së valës së këtyre protestave, nuk ka pasur pretendime apo padi gjyqësore për pronën ku do të ndërtohet resorti.

Ai shtoi se një pjesë e konsiderueshme e protestuesve që kundërshtojnë ndërtimin e resortit në Zvërnec, i shërbejnë interesave të caktuara.

“Pyetja që ne kemi bërë gjatë gjithë debatit është ‘çfarë kërkohet në këtë protestë?’. Sepse në këtë protestë unë shoh unë shoh parrulla ‘Trump ka largohu nga Shqipëria’, ‘poshtë islamizmi’, ‘nuk shitet Shqipëria’ dhe ‘Rama në burg, Berisha në burg’. Po t’i mbledhësh të gjitha këto, duke përfshirë edhe atë që unë kam 3 ditë që po vazhdoj ta evidentoj. Unë para 2-3 ditësh kam nxjerrë një foto të hyrjes së autobusëve grekë në Shqipëri. Në Zvërnec, 30 e kusur vite atë pronë me dokumenta e posedon një individ dhe një grup individësh. Dhe gjatë këtyre viteve nuk ka pasur asnjë proces ligjor për pretendime. Por para-pardje, kemi një deklaratë të shtetit grek që ndezi fitilat, deklaratë që fliste për troje greke në Zvërnec, për qytetarë grekë në Zvërnec. Dhe në funksion të saj lëvizje të tëra u bënë, me individë greqisht-folës, që janë edhe në protestën në Tiranë. Jemi edhe me njerëz të sjellë nga Greqia. Në dijeninë time SPAK ka filluar sot çështjen për autobusët e ardhur nga Greqia. Ata kërkojnë t’u hapet rruga për interesat e veta”, tha mes të tjerash Meçe.

Elseid Hysaj luajti sot ndeshjen e 98-të me Kombëtaren, më shumë se çdo futbollit tjetër. Shkodrani foli edhe për përplasjen me Gloukh pas golit që i dha suksesin Izraelit.

“Të them të drejtën kur luaj me fanellën e Shqipërisë, është objektivi të jap maksimumin deri sa të kem fuqi dhe kështu do të vazhdoj deri sa t’ia dal. Ky është një trajner i ri, ka ide të reja, që besoj me kohën do sistemohen, se kemi pasur vetëm 4 ditë kohë që të rregullojmë aksione mbrojtëse e sulmuese.

Por është pozitiv, sheh një lojë më sulmuese se sa kemi bërë më parë. Shpresoj që të gjitha të ndihmojmë që të jemi më mirë për ndeshjet e radhës.

Tensioni? Futbolli kështu është, unë nuk kam qejf të bëj këto skena. Por në momentin që pashë lojtarin me gishtin në buzë duke u thënë tifozëve të pushonin, është impuls momenti. Kërkoj falje, janë gjëra që ndodhin në futboll. Shyqyr nuk ndodhi asgjë e rëndë.

Unë jam pa kontratë, janë dy ndeshje për këtë vit. Pastaj kam folur me menaxherin, po punon, do gjejmë situatatë më të mirë, më të vlefshme dhe pastaj do tregoj se për momentin nuk më ka thënë as mua diçka”, tha Hysaj për “SuperSport” pas ndeshjes.

Në emisionin “Trialog”, analisti Preç Zogaj ka komentuar zhvillimet e fundit lidhur me investimet në Zvërnec.

Sipas tij, çështja kryesore qëndron te sqarimi i së vërtetës mbi statusin e pronës, pasi sikurse ai thotë, “konflikti lidhet drejtpërdrejt me këtë çështje”.

“Themelore për mua dhe për publikun është sqarimi i së vërtetës për statusin e pronës. Konflikti lidhet me këtë. Gjithçka që po ndodh tani, me protesta dhe tensione, lidhet me ngjarjen fillestare, ku disa persona pretendojnë se prona është zaptuar. Sqarimi nga SPAK i jep fund çdo pikëpyetjeje dhe kjo është thelbësore. Kjo është një punë e madhe”, tha Zogaj.

Irani thotë se marina e saj shënjestroi një anije detare amerikane që strehonte një “qendër komande dhe kontrolli” ndërsa ajo po i afrohej ujërave territoriale të vendit në Gjirin e Omanitlu, sipas agjencisë së lajmeve Tasnim.

Ushtria iraniane tha se incidenti pasoi sulmet e SHBA-së ndaj anijeve tregtare iraniane dhe një “shkelje të rregulloreve që lidhen me Ngushticën e Hormuzit”.

Ndërkohë Ministri i Jashtëm iranian, Abbas Araghchi, tha në një intervistë me transmetuesin libanez Al-Mayadeen, se “çdo sulm ndaj Bejrutit do të ketë pasoja serioze dhe do të çojë në një rifillim të plotë të luftës”.

Përplasja e fundit vjen në një moment tensioni të lartë mes Teheranit dhe Uashingtonit, ndërsa incidentet në Gjirin Persik dhe Ngushticën e Hormuzit vazhdojnë të rrisin shqetësimet për sigurinë e lundrimit në një nga korridoret më të rëndësishme energjetike në botë.

Shqipëria u mund 0-1 nga Izraeli në miqësoren e luajtur në “Air Albania”. Takimi u vendos nga një gol i Gloukh, i cili nuk hezitoi që të provokonte kundërshtarët.

Kaq ka mjaftuar që të vijë edhe reagimi i lojtarëve shqiptarë, çka solli më pas edhe përplasje mes të dy skuadrave.

Më pas, gjithçka u normalizua dhe sfida vijoi normalisht. Theksojmë se Glouk u zëvendësua pak më vonë, duke i lënë vendin Shahar.

SHIH VIDEON E PLOTË KËTU 

Pas më shumë se 3 orësh zhvillim, është mbyllur protesta e radhës e qytetarëve në kryeqytet, të cilët kundërshtojnë projektin e parashikuar për zonën e Zvërnecit.

Kjo është dita e katërt e protestës së tyre, duke shprehur qëndrimin e tyre për atë që ata e cilësojnë si plane me ndikim shkatërrues për mjedisin dhe pasuritë natyrore të zonës.

Lëvizja e qytetarëve nisi fillimisht në sheshin “Skënderbej”, nga ku marshuan përgjatë bulevardit “Dëshmorët e Kombit” për t’u grumbulluar përpara godinës së Kryeministrisë. Thirrjet e protestuesve janë përqendruar te kërkesa kryesore e tyre: Anulimi i menjëhershëm i projektit në Zvërnec, për të cilin shprehin shqetësimin se do të dëmtojë ekosistemin unik të bregdetit.

Protestuesit theksojnë se mbrojtja e zonave të tilla të ndjeshme është jetike për ruajtjen e trashëgimisë natyrore. Ata kanë paralajmëruar se nuk do të ndalen derisa kërkesat e tyre të dëgjohen dhe projekti të anulohet.

Avokati Indrit Sefa theksoi se Partia Demokratike e urren protestën e nisur nga qytetarët, pasi ajo protestë nxjerr të dështuar opozitën.

I ftuar në emisionin “Off the Record” nga Andrea Danglli në A2CNN, Sefa tha se Shqipëria është i vetmi vend ku opozita urren protestën dhe akuzon protestuesit më shumë se qeveria.

“E urren protestën opozita sepse kjo protestë tregon që opozita ka dështuar. Vetëm në këtë vend ndodh që opozita urren protestën. Unë s’kam parë ndonjë vend tjetër që të akuzojë opozita protestuesit kundër qeverisë se sa vet qeveria. Vetëm këtu ndodh! Edi Rama do bëjë edhe një gjë shumë të mirë fare, me gjithë lobimin e fortë që ka te administrata Trump, t’ia heqë non gratën Berishës dhe të gjithë të biem rehat. Se po i shpërfytyron politikisht. Atë partinë e ka kycur, e ka paketuar, e ka futur në xhep. Në një vend ku opozita kërkon zgjedhje të lira dhe të ndershme dhe nuk bën vet zgjedhje. Unë s’e kuptoj si do vish në qeveri”, tha Sefa.

Gazetari Mentor Nazarko mendon që jo vetëm Greqia, por edhe Serbia dëshiron që Shqipëria të humbasë projektin e Zvërencit.

Duke folur në emisionin “Off the Record” nga Andrea Danglli në A2CNN, Nazarko thekson që Beogradi zyrtar po shqetësohet nga konsolidimi i lidhjes së fuqishme gjeopolitike, në formë ekonomike, të familjes Trump me Shqipërinë.

“Unë po shikoj shtypin serb. Serbia në fakt ishte shumë e shqetësuar që investimi iku nga Beogradi. Ka një prononcim public të Vuçiç-it. Ata po e ndjekin me interes dhe do të dëshironin që Shqipëria këtë lidhje të fuqishme gjeopolitike që konsolidohet përmes pranisë së familjes Trump, në formë ekonomike, Shqipëria ta humbë. Imagjino që ka një interes edhe të fqinjëve të tjerë. Mjafton të shikoni titujt e mediave serbe për ta kuptuar këtë. Unë nuk jam duke e ekzagjeruar këtë”, shprehet Nazarko.

Gazetari Mentor Nazarko thekson se grekët nuk dëshirojnë që investimi i Zvërnecit të realizohet, pasi mund të rrezikohet turizmi në Korfuz dhe Kefaloni.

Sipas gazetarit Athina zyrtare po ashtu ka për qëllim të zgjerojë hartën e zonave minoritare me Nartën dhe Zvërnecin.

Duke folur në emisionin “Off the Record” nga Andrea Danglli në A2CNN, Nazarko beson që protestuesit kanë arritur ta bindin kryeministrin Rama se “nuk mund të bëhet shaka këtë herë”, nëse tubimi vijon me të njëjtën qëndrueshmëri dhe intensitet.

“Për shkak të thirrjeve ne po shikojmë që ka një kriticizëm të fuqishëm ndaj familjes Trump dhe kjo mua më bën kritik për një pjesë të funksionimit të protestës. Një investim i familjes Trump, që afron emrin dhe mobilizon kapitale që vijnë nga të tjera, plus kapitalistët shqiptar,  jam totalisht pro një investimi të tillë. Është një investim që vazhdojë të mbijetojë në Shqipëri. Ishin identifikuar dy zona investimi një në Beograd dhe një në Zvërnec. Në momentin që investimi i Beogradit ka ikur, është interesi ynë kombëtar absolut, jo thjesht për impaktin ekonomik, por edhe gjeopolitik, për kapitalin që vjen nga vendet arabe. Është interesi ynë absolut që ky investim të vijë në Shqipëri”, tha Nazarko.

“Unë mendoj që ka arritur ta bindë qeverinë që s’mund të bëhet shaka këtë herë, nëse protesta do ketë këtë vazhdimësi, intensitet dhe cilësi. Kush janë ata faktor që s’duan që investimi të qëndrojë në Shqipëri? Duket qartë që ka një interes të deep state-it grek. Konkurrenca ekonomike mes shtetesh është legjitime. Greqia është fuqi ekonomike europiane, por turizmi i jugut të Shqipërisë mund të rrezikojë turizmin e Korfuzit apo Kefalonisë. Greqia synon edhe të zgjerojë hartën e zonave minoritare me Nartën dhe Zvërnecin”, vijoi gazetari.

Komisioni i Posaçëm për Reformën Territoriale u mblodh këtë të mërkurë në një seancë dëgjimore me kryetarët e bashkive Dibër, Tiranë dhe Vlorë, por mungesa e kryebashkiakes së qytetit bregdetar, Brunilda Mersini, shkaktoi përplasje politike mes mazhorancës dhe opozitës.

Deputetja e Partisë Demokratike, Ina Zhupa, e cilësoi të papranueshme mungesën e Mersinit, duke e lidhur atë me zhvillimet e fundit në Zvërnec dhe protestën e së shtunës, ku sipas saj një qytetar u dhunua nga punonjës të sigurisë private.

“Për mua është e papranueshme që kryetarja e Bashkisë Vlorë nuk denjon të paraqitet në ditën e lajmëruar në Komisionin Parlamentar. E kam parë zonjën Mersini që nuk denjon të takojë tregtarët e Vlorës, operatorët turistikë. E kam parë që dalin qytetarët në protestë dhe ajo nuk i takon. Këtu, ku është detyrim të vijë dhe të flasë për Reformën Territoriale, përsëri fshihet”, deklaroi Zhupa.

Deputetja demokrate tha se mungesa e kryebashkiakes lidhet me frikën për t’u përballur me pyetje mbi situatën në Zvërnec dhe menaxhimin e fondeve publike.

“Frika ka qenë e madhe për shkak të sjelljes që bëjnë me qytetarët, duke i marrë para syve të policisë bashkiake dhe asaj të shtetit, duke i rrëmbyer banditë me uniforma të zeza. Zonja patjetër që ka pasur frikë të vijë e të pyetet këtu edhe për situatën. Ka pasur frikë t’i japë llogari Komisionit se si përdoren lekët e taksapaguesve të Vlorës, si ndahet buxheti i Vlorës. Për dy dronë janë shpenzuar 74 milionë lekë në Bashkinë e Vlorës”, u shpreh ajo.

Zhupa kërkoi që Komisioni të caktojë një tjetër datë për dëgjimin e kryebashkiakes së Vlorës.

“Uroj që bashkëkryetarët ta vendosin me detyrim që dëgjesat me kryetarët e bashkive të mos mbyllen pa dëgjuar ata që zgjedhin të kenë një punë tjetër ditën kur janë thirrur. Kërkoj nga ju të vendosni një datë tjetër që ajo të paraqitet në Komision. Të vijë më shpejt këtu para se të shkojë te SPAK-u, se e di që do të ketë punë atje”, tha Zhupa.

Ndaj këtyre deklaratave reagoi bashkëkryetari socialist i Komisionit, Arbjan Mazniku, i cili theksoi se Komisioni për Reformën Territoriale nuk është komision hetimor dhe nuk ka si qëllim marrjen në pyetje të kryetarëve të bashkive.

“Jam dakord që të gjithë kryetarët që për arsye të caktuara nuk e kanë pasur të mundur të jenë të pranishëm, të kenë një mundësi tjetër për të marrë pjesë. Por dua të sqaroj se ky është një komision dëgjimor, jo hetimor. Nuk e ka tagrin të thërrasë me detyrim kryetarët e bashkive”, deklaroi Mazniku.

Sipas tij, kryetarët e bashkive janë institucione të pushtetit vendor të zgjedhur drejtpërdrejt nga qytetarët dhe Komisioni mund t’i ftojë vetëm për të dhënë mendimet e tyre mbi reformën.

“Nuk jemi këtu për t’u bërë gjyqin kryetarëve të bashkive. Kryetarëve të bashkive ua bëjnë gjyqin qytetarët që i votojnë. Komisioni fton palët e interesit për të dhënë opinionet e tyre dhe jo për të kërkuar llogari në kuptimin hetimor të fjalës”, u shpreh ai.

Kryeministri izraelit Benjamin Netanyahu gjatë një interviste për CNBC në Jerusalem tha se së bashku me presidentin Donald Trump bien dakord “për çështjet kryesore”, por nga ana tjetër pranoi ekzistencën e dallimeve në opinione me Trump në disa raste.

“Ndonjëherë, si familjet më të mira, kemi dallime taktike. Ne gjithmonë gjejmë një mënyrë për t’i zgjidhur ato”, tha ai.

Kur u pyet për vërejtjet e Trump për të, kryeministri izraelit u përgjigj me një ton pajtues, pa hyrë në detaje dhe pa theksuar se të dy mund të “mos pajtohen në mëngjes dhe të kenë një veprim të përbashkët në pasdite”.

Netanyahu më pas përsëriti se Izraeli dhe Shtetet e Bashkuara ndajnë të njëjtat objektiva strategjike ndaj Republikës Islamike.

Gjykata e Posaçme kundër Korrupsionit dhe Krimit të Organizuar (GJKKO) ka shpallur vendimin për një çështje që lidhet me trafikimin e armëve dhe municioneve drejt Mbretërisë së Bashkuar, ku të pandehur ishin Adulla Hoxhaj, Admir Tutaj, Rifat Avdiaj dhe Bojken Turtulli.

Pas zhvillimit të procesit me procedurën e gjykimit të shkurtuar, trupi gjykues i përbërë nga gjyqtarët Bib Ndreca, Rudina Palloj dhe Atalanta Zeqiraj vendosi dënimin e tre prej të pandehurve dhe shpalljen të pafajshëm të njërit prej tyre.

Sipas vendimit, Adulla Hoxhaj u shpall fajtor për tentative për trafikim armësh dhe municionesh, pjesëmarrje në grup të strukturuar kriminal, si dhe për mbajtje pa leje të armëve dhe municioneve dhe u dënua me 13 vite burg. Pas bashkimit të dënimeve dhe përfitimit nga gjykimi i shkurtuar, ai u dënua përfundimisht me 8 vite e 8 muaj burgim.

Po ashtu, Admir Tutaj dhe Bojken Turtulli u shpallën fajtorë për trafikim armësh dhe pjesëmarrje në grup të strukturuar kriminal. Të dy u dënuan me nga 12 vite burg secili, por do të vuajnë 8 vite burgim secili, pas uljes së dënimit me një të tretën për shkak të gjykimit të shkurtuar.

Ndërkohë, gjykata shpalli të pafajshëm Rifat Avdiaj për të gjitha akuzat, duke arsyetuar se nuk provohej që ai kishte kryer veprat penale për të cilat akuzohej. Për këtë arsye u urdhërua heqja e masës së sigurisë “arrest në burg” dhe lirimi i tij i menjëhershëm, nëse nuk mbahet për ndonjë shkak tjetër ligjor.

Gjatë operacionit dhe kontrolleve të kryera në vitin 2024, autoritetet sekuestruan një arsenal të konsiderueshëm armësh, municionesh, pjesësh armësh, pajisjesh optike, silenciatorësh dhe sende të tjera ushtarake. Gjykata vendosi konfiskimin e tyre, ndërsa një pjesë e pajisjeve elektronike dhe mjeteve të tjera do të qëndrojnë në funksion të procedimeve të ndara dhe hetimit pasuror.

Palët kanë të drejtë të ankimojnë vendimin në Gjykatën e Posaçme të Apelit brenda afatit ligjor prej 15 ditësh nga komunikimi i vendimit të arsyetuar.

Nga vendimi i Gjykata e Posaçme e Shkallës së Parë për Korrupsionin dhe Krimin e Organizuar dalin disa detaje me interes:

Çfarë akuzohej grupi?

Sipas dosjes, të pandehurit akuzoheshin për:

Trafikim armësh dhe municionesh në tentativë.

Pjesëmarrje në grup të strukturuar kriminal.

Mbajtje pa leje të armëve dhe municioneve.

Dënimet

Adulla Hoxhaj u dënua përfundimisht me 8 vite e 8 muaj burgim.

Admir Tutaj u dënua me 8 vite burgim.

Bojken Turtulli u dënua me 8 vite burgim.

Rifat Avdiaj u shpall i pafajshëm dhe u urdhërua lirimi i menjëhershëm nga paraburgimi.

Arsenali i sekuestruar

Gjatë kontrollit në banesën e Adulla Hoxhajt më 1 gusht 2024, hetuesit gjetën:

Të paktën 10 armë zjarri pistoleta funksionale.

Një armë gjysmëautomatike tip kallashnikov.

Dhjetëra pjesë armësh, tyta, gjilpëra, shula dhe mekanizma të ndryshëm.

Qindra fishekë luftarakë të kalibrave të ndryshëm.

50 fishekë sportivë.

10 pajisje optike (dylbi) për armë.

3 pajisje lazer.

2 silenciatorë.

Një pajisje elektroshok.

Pranga, veshje ushtarake, helmetë dhe pajisje të tjera.

Hetimi pasuror vazhdon

Gjykata urdhëroi që në kuadër të hetimit financiar të qëndrojnë nën verifikim:

Një Volkswagen.

Një Toyota RAV4.

Një Audi Q5.

Një Volvo.

Një motoçikletë Honda.

Dokumente të ndryshme automjetesh dhe leje lundrimi.

Pika më e rëndësishme e vendimit

Megjithëse prokuroria e akuzonte si pjesë të grupit kriminal, gjykata vlerësoi se ndaj Rifat Avdiajt nuk kishte prova të mjaftueshme për të vërtetuar akuzat për trafik armësh dhe pjesëmarrje në grup të strukturuar kriminal, duke e shpallur të pafajshëm.

Ky është një nga rastet ku, krahas dënimeve për trafik armësh, vendimi evidenton edhe një arsenal të madh armësh, municionesh dhe pajisjesh të sekuestruara nga autoritetet gjatë operacionit të vitit 2024.

Ministria e Jashtme e Kuvajtit shpalli dy diplomatë iranianë “persona non grata” të mërkurën për sulmet me dronë dhe raketa balistike iraniane në territorin e Kuvajtit.

Në një deklaratë në platformën sociale amerikane X, ministria tha se i Ngarkuari me Punë i Ambasadës së Iranit në Kuvajt u thirr dhe iu dorëzua një notë proteste, duke përfshirë gjithashtu një vendim për të reduktuar stafin e ambasadës.

Sipas deklaratës, diplomatëve iranianë të cilët u shpallën persona non grata u kërkohet të largohen nga territori i Kuvajtit brenda 24 orëve.

Duke shprehur dënimin e Kuvajtit për sulmet iraniane, ministria tha se rezervon “të drejtë të plotë dhe të natyrshme për të mbrojtur veten dhe për të marrë të gjitha masat e nevojshme për të ruajtur sovranitetin dhe për të mbrojtur sigurinë e saj”.

Autoritetet e Kuvajtit thanë të mërkurën se sulmet e fundit iraniane vranë një person, plagosën 63 të tjerë dhe dëmtuan objekte kritike, përfshirë misione diplomatike, duke theksuar se “rezervon të drejtën e plotë” për t’iu përgjigjur sulmeve.

Tensionet rajonale janë përshkallëzuar që nga fundi i shkurtit pasi SHBA-ja dhe Izraeli nisën sulmet ajrore mbi Iranin, duke vrarë më shumë se 3.000 njerëz, duke përfshirë liderin e atëhershëm suprem Ayatollah Ali Khamenei dhe disa komandantë të lartë ushtarakë dhe zyrtarë qeveritarë.

Një armëpushim i ndërmjetësuar nga Pakistani hyri në fuqi më 8 prill, por përpjekjet për të arritur një marrëveshje më të gjerë deri më tani kanë dështuar.

Pak ditë pas miratimit të raportit të IBAR për Shqipërinë nga ana e vendeve anëtare të BE-së, qeveria e Brukselit i propozon Këshillit që të nisë punën për mbylljen e kapitujve.

Këshilli i Bashkimit Europian konfirmoi se më 5 qershor do të nisin diskutimet e para për këtë fazë në mbledhjen e COELA-s, për mbylljen e 3 kapitujve.

Këshilli i BE për A2CNN: Këshilli ka marrë propozimin e Komisionit Europian për 3 kapituj: Kapitullin 30 për Marrëdhëniet me Jashtë, Kapitullin 25 për Shkencën dhe Kërkimin, si dhe Kapitullin 26 për Arsimin dhe Kulturën. Diskutimi i parë është planifikuar nga COELA më 5 qershor.

Sipas burimeve, qeveria shqiptare po shpreson që disa kapituj të mbyllen brenda 30 qershorit, kur përfundon presidenca qipriote. Por Këshilli thekson në sqarimin e tij se diskutimet ndërmjet vendeve anëtare deri në vendimin përfundimtar mund të marrin disa muaj.

Këshilli i BE për A2CNN: Miratimi i Dokumenteve të Pozicioneve të Përbashkëta të BE-së nga COREPER pritet të ndodhë në muajt në vijim. Zakonisht, arritja e dakordësisë së shteteve anëtare në COELA kërkon disa raunde diskutimesh. Prandaj, mund të thuhet me siguri se zhvillimet e ardhshme kryesore do të ndodhin gjatë presidencës së ardhshme irlandeze të Këshillit të BE-së.

A2CNN iu drejtua edhe Komisionit Europian me të njëjtat pyetje, por qeveria e Brukselit u tregua më e kursyer në detaje dhe më me shpresë për mbylljen e këtyre kapitujve për vendin tonë.

KE për A2CNN: Shpejtësia e përparimit në negociatat e anëtarësimit varet nga reformat e zbatuara dhe nga përmbushja e kushteve nga secili vend kandidat. Ndonëse nuk mund të spekulojmë mbi numrin e saktë të kapitujve që mund të mbyllen deri në muajin korrik, Komisioni është plotësisht i angazhuar për të mbështetur Shqipërinë që të mbyllë sa më shumë kapituj të jetë e mundur.

Qeveria shqiptare synon që brenda këtij viti të mbyllë 10 kapituj për të arritur objektivin e vitit 2027, të vendosur nga Tirana zyrtare, për të përmbyllur të gjashtë grupet e kapitujve të negociatave të anëtarësimit.

Ndoshta ka ardhur momenti që ta ndërpresim serinë e zezë.

Shqipëria nuk ka bilanc pozitiv ndaj Izraelit, me gjithçka që ka marrë për keq 8 vitet e fundit, dha ja ku kemi një rast për të bërë kthesën.

Kombëtarja jonë njeh tri humbje radhazi me ekipin hebraik, 0-2, 1-2 e sërish 1-2 që nga 2018-ta, dhe mundësia nuk duket e keqe për të arritur një sukses në miqësoren që nis sonte në orën 20:00.

Do të luhet në “Arenën Air Albania”, dhe do të jetë edhe debutimi në stol I trajnerit të ri, Rolando Maran.

Tekniku italian ka punuar vetëm dy ditë me lojtarët, dhe padyshim që nuk ka arritur ta njohë aq mirë skuadrën.

Nuk dihet aspak se cili do të jetë formacioni I parë I tij, me mjaft ndryshime, por sidomos me një filozofi tjetër futbolli që besohet se do të jetë më sulmuese sesa ajo e paraardhësit Silvinjo.

Kuqezinjtë I dhanë fund përgatitjeve të martën pasdite në “Arenë”, dhe problemi kryesor ishte gjendja gripale e Myrto Uzunit që nuk mori pjesë në seancë.

Sulmuesi ka qenë me temperaturë të lartë edhe disa orë para ndeshjes, pra është në dyshim për të mos qenë pjesë e ekipit.

Më herët, nga kombëtarja u largua mbrojtësi Ardian Ismajli, I dëmtuar, ndërsa për shkak lëndimi nuk janë Strakosha, Manaj, Muçi e Gripshi.

Si e pret Maran kombëtaren në testin e parë?

“Pres një Shqipëri që t’i japë tonin ndeshjes. Do të jetë hera e parë, me pak ditë punë, dhe nuk është të nxjer përfundimet e mia nga fusha. Gjithsesi, siç e thashë, kam parë gatishmëri të madhe të lojtarëve për të bërë atë që kam kërkuar. Kam parë skuadër që mëson shpejt dhe që është shumë e motivuar. Kjo është gjëja më e rëndësishme për mua, në këtë moment. Sidoqoftë, këtë duhet ta shprehim në fushë kundër një skuadre ndaj së cilës nuk është e lehtë të luash. Ajo nuk të lejon të luash, dhe të detyron të vraposh shumë. Duhet të jemi pranë njëri-tjetrit dhe të luajmë me ritëm të lartë. Kjo do të jetë arma jonë për të penguar zotërimin e tyre të topit. Një provim mjaft I mirë”.

Me Izraelin kemi vetëm dy fitore, një 3-0 me De Biazin në stol arritur jashtë fushe, si përgjigje për katastrofën 0-3 që pësuam në Elbasan po për Kupën e Botës, si dhe një 1-0 gjithnjë në Elbasan në 2018 për Ligën e Kombeve kur shënoi Taulant Xhaka.

Ndeshja e fundit u luajt në Izrael dhe u humb me shifrat 2-1 gjithnjë për Ligën e Kombeve, ndonëse Myrto Uzuni shënoi një gol shumë të bukur.

Nga 1 korriku, të gjitha bizneset e vogla dhe të mesme që duan të marrin kredi për të rritur sipërmarrjet e tyre mund të aplikojnë pranë bankave të nivelit të dytë. Ministrja për Sipërmarrjen shpjegon kushtet që ofrohen për kreditimin, bazuar në programin “Dyfisho ndërmarrjen tënde”.

“Bizneset do të financohen me normë interesi nga 2 deri në 3 përqind. Bizneset të informohen mbi potencialet që kanë programet, që të rrisim produktivitetin, që të rrisim eksportet dhe me qëllim aksesi në tregun europian. Qeveria do të vijojë të mbështesë bizneset”.

Një tjetër institucion i ri bankar, Banka Shqiptare e Zhvillimit, do të ndihmojë për kreditimin e ndërmarrjeve të mesme, por edhe sektorë si bujqësia, agro-përpunimi, banesat sociale dhe projektet që lidhen me eficiencën e energjisë.

“Ky institucion financiar do të ketë një potencial për të financuar kompanitë. Koncepti i bankës është që të financojë sektorët e nënfinancuar, si dhe të mbështesë projektet strategjike të qeverisë shqiptare”.

Në mbledhjen e sotme të qeverisë është miratuar edhe një program i ri që parashikon rikualifikimin e disa godinave qeveritare.

“Programi Hospitality Albania është program që parashikon menaxhimin e strukturave qeveritare në Vlorë dhe në Velipojë. Qëllimi i programit është që asetet shtetërore të rikualifikohen dhe të shfrytëzohen me qëllim fitimi, në bashkëpunim me privatin. Prona shtetërore në asnjë rast nuk i transferohet privatit”.