“Kjo është një përpjekje e hapur për të rikthyer tarifat globale të paligjshme të Donald Trump me një emër tjetër,” tha senatori i Oregonit, Ron Wyden, demokrati më i lartë në Komitetin e Financave të Senatit. “Këto tarifa të reja do të vazhdojnë të mbajnë të larta inflacionin dhe çmimet për amerikanët, pa bërë asgjë për të ndihmuar punëtorët në mbarë botën.”

Liberty Justice Center, një organizatë libertariane e avokimit, ka ngritur tashmë një padi kundër tarifave të reja në një gjykatë të specializuar për çështjet tregtare.

Strategjia e Trumpit për vendosjen e tarifave të larta, që synon ringjalljen e prodhimit amerikan, mbart edhe rreziqe politike për presidentin. Amerikanët janë tashmë të pakënaqur me koston e lartë të jetesës, ndërsa vendi përgatitet për zgjedhjet e 3 nëntorit, të cilat do të përcaktojnë nëse republikanët e Trumpit do të ruajnë kontrollin e plotë mbi Kongresin.

Si ndryshojnë tarifat e reja të Trumpit nga ato të mëparshmet

Tarifat e reja variojnë nga 10% deri në 12.5% për importet nga 60 ekonomi, përfshirë partnerë të mëdhenj tregtarë të SHBA-së si Bashkimi Evropian, India, Japonia, Kanadaja dhe Meksika.

Norma 12.5% zbatohet për vendet që nuk kanë ligje që ndalojnë importet e prodhuara me punë të detyruar. Ndërsa norma 10% aplikohet për vendet që kanë kufizime ndaj importeve të prodhuara me punë të detyruar, por që sipas administratës Trump nuk i zbatojnë ato në mënyrë efektive.

Trump ka përjashtuar disa produkte nga tarifat e reja, përfshirë naftën, plehrat kimike, importet që trajtohen me favore në kuadër të marrëveshjes tregtare të Amerikës së Veriut, si dhe produkte si çeliku dhe alumini, të cilat tashmë janë subjekt i tarifave të vendosura për arsye të sigurisë kombëtare.

Tarifat e reja janë vendosur në bazë të Nenit 301 të Aktit të Tregtisë të vitit 1974, i cili i lejon presidentit të vendosë tarifa dhe sanksione ndaj vendeve që konsiderohen se kanë praktika të padrejta tregtare. Trump e përdori të njëjtën dispozitë gjatë mandatit të tij të parë për të vendosur tarifa të larta ndaj Kinës, të cilat i mbijetuan sfidave ligjore.

Ndërkohë, bizneset – dhe për rrjedhojë konsumatorët – vazhdojnë të paguajnë koston e tarifave të tjera të vendosura më herët. Gjatë mandatit të dytë, Trump vendosi tarifa mbi makina të importuara, çelikun, aluminin, lëndën drusore dhe madje edhe dollapët e kuzhinës, duke përdorur Nenin 232 të Aktit të Zgjerimit të Tregtisë të vitit 1962.

Për pjesën më të madhe të vitit të kaluar, Trump vendosi edhe tarifat e ashtuquajtura “reciproke” ndaj pothuajse çdo vendi në botë duke përdorur Aktin për Fuqitë Ekonomike Ndërkombëtare në Rast Emergjence (IEEPA). Megjithatë, këto tarifa u rrëzuan nga Gjykata Supreme në muajin shkurt, duke detyruar administratën të kthejë miliarda dollarë në rimbursime.

Tarifa e mëparshme prej 10%, e cila skadoi të premten, ishte vendosur sipas Nenit 122 të Aktit të Tregtisë të vitit 1974, që lejon vendosjen e tarifave vetëm për një periudhë deri në 150 ditë.

Çfarë thonë bizneset

Tarifat e reja ishin gjerësisht të pritshme dhe shumë kompani u përgatitën duke rritur importet përpara hyrjes së tyre në fuqi.

Federata Kombëtare e Tregtisë me Pakicë dhe Hackett Associates parashikuan se volumi i importeve në portet kryesore amerikane do të arrinte një rekord historik në korrik, pasi shitësit me pakicë u furnizuan paraprakisht për t’u mbrojtur nga rritja e tarifave.

Sipas Oxford Economics, për shkak se tarifat e reja janë shumë pranë normës së mëparshme prej 10%, efekti i menjëhershëm mbi nivelin mesatar të tarifave amerikane nuk do të jetë shumë i madh. Megjithatë, bizneset mbeten të shqetësuara për mundësinë e vendosjes së tarifave të tjera sipas Nenit 301.

Federata Kombëtare e Tregtisë me Pakicë paralajmëroi se tarifat më të larta nënkuptojnë kosto më të larta për bizneset dhe çmime më të larta për konsumatorët. Organizata i bëri thirrje administratës të fokusohet në marrëveshje tregtare që ulin tarifat, jo që i rrisin ato.

Matt Priest, president i Shoqatës së Distributorëve dhe Shitësve të Këpucëve, tha se prodhuesit kanë nisur prej muajsh të rrisin çmimet për shkak të tarifave të pritshme.

Sipas tij, në qershor çmimet e këpucëve u rritën me 4.1%, ndërsa këpucët për fëmijë me 4.7% krahasuar me qershorin e vitit 2025. Ai pret që çmimet të vazhdojnë të rriten edhe për shkak të kostove më të larta të karburantit pas luftës me Iranin.

“Nuk shohim asgjë në treg që po i shtyn çmimet poshtë dhe kjo është shqetësuese,” tha Priest.

Arsyetimi për punën e detyruar

Administrata Trump argumenton se tarifat e reja janë të nevojshme sepse vendet e prekura nuk kanë bërë mjaftueshëm për të ndaluar importet e prodhuara me punë të detyruar.

“SHBA ka ndaluar importet e prodhuara me punë të detyruar prej gati një shekulli dhe e zbaton me rigorozitet këtë ndalim. Ka ardhur koha që partnerët tanë tregtarë të bëjnë të njëjtën gjë,” deklaroi Përfaqësuesi Amerikan për Tregtinë, Jamieson Greer.

Ky argument u kundërshtua menjëherë nga partnerët tregtarë. Ministri australian i Tregtisë, Don Farrell, i quajti tarifat “plotësisht të pajustifikuara”, ndërsa shefja e diplomacisë së BE-së, Kaja Kallas, vuri në dyshim këtë qasje duke theksuar standardet shumë të mira të punës në Evropë.

Edhe në Uashington pati kritika. Kongresmenja demokrate Linda Sanchez deklaroi se, nëse Trump do të ishte serioz për luftën kundër punës së detyruar, nuk do të vendoste të njëjtën tarifë prej 12.5% si ndaj Kinës, ashtu edhe ndaj Australisë.

Grupet e biznesit argumentojnë se tarifa të tilla nuk do ta zgjidhin problemin global të punës së detyruar dhe kërkojnë masa më efektive.

Ndikimi në Thesarin amerikan

Tarifat e mëparshme të vendosura sipas IEEPA sollën të ardhura të konsiderueshme për Thesarin amerikan dhe ndihmuan në financimin e uljeve të taksave të miratuara nga Trump në vitin 2025.

Në kulmin e tyre, të ardhurat nga tarifat arritën në 31.4 miliardë dollarë në tetorin e kaluar. Pas vendimit të Gjykatës Supreme për rrëzimin e tyre, të ardhurat ranë në 22 miliardë dollarë në mars dhe prill.

Më pas, për shkak të rimbursimeve të detyruara, bilanci u bë negativ: një mungesë prej 42 milionë dollarësh në maj u pasua nga një humbje prej 25.6 miliardë dollarësh në qershor.

Komiteti për një Buxhet të Përgjegjshëm vlerëson se tarifat e reja, së bashku me ato të shpallura këtë muaj ndaj Kanadasë dhe Brazilit, do të kompensojnë më pak se 60% të të ardhurave që humbi Thesari pas rrëzimit të tarifave IEEPA nga Gjykata Supreme.

Një nga personat më të kërkuar nga SPAK, Denis Tafili, pjesë e grupit të Visit të Pojës, është shfaqur sot në Shkallnur të Durrësit, ku është përfshirë në një konflikt me Edison Gjuzin. Në ngjarje është implikuar dhe një punonjës policie. Mësohet se ka patur dhe të shtëna me armë.

Një njoftim i policisë, shpjegon se konflikti ka nisur për motive të dobta, ku Gjuzi është goditur me sende të forta (qytë pistolete) nga shtetasit Tafili dhe një 27 vjeçar me inicialet G. M. Të dy banues në Shkallnur, Durrës, të cilët pas ngjarjes janë larguar me automjet.

Policia pranon përfshirjen e punonjësit të saj, inspektorit L. Xh., “i cili është shoqëruar dhe ndaj tij po kryhen veprimet procedurale nga Agjencia e Mbikëqyrjes Policore”

Ndonëse i shpallur në kërkim nga SPAK, Tafili nuk ka patur frikë të përfshihet në konflikt në mes të ditës. Si për ironi, nga të dhënat e para mësohet se Tafili ka ndërhyrë duke i dalë në mbrojtje policit, në konfliktin e këtij të fundit me Gjuzin.

Në maj të këtij viti Prokuroria e Posaçme mbylli hetimet për grupin e Elvis Doçit, pjesë e të cilit është dhe Tafili. Grupi u godit një vit më parë falë operacionit të përbashkët me autoritetet italiane, “Ura”. Ndaj 24 anëtarëve të grupit rëndojnë akuzat për trafik ndërkombëtar kokaine, grup të strukturuar kriminal dhe pastrim parash. gjatë ekzekutimit të këtij operacioni janë sekuestruar edhe 4 milionë euro cash dhe 12 milionë euro pasuri, kryesisht prona.

Në 21 maj të vitit të kaluar, kur u ndërmor edhe operacioni, u vendos sekuestro për miliona euro pasuri, përfshirë 2 kompani ndërtimi, 4 restorante luksoze, 1 agjenci imobiliare, 1 televizion në Vlorë, të dyshuara se ishin financuar nga trafiku ndërkombëtar i drogës. Ndërkohë, në vendin fqinj janë sekuestruar 9 apartamente, 4 kompani, 7 llogari bankare dhe 3 makina.

Njoftimi i policisë:

Më datë 24.07.2026, rreth orës 15:00, Salla Operative e DVP Durrës është njoftuar se, në fshatin Shkallnur, gjatë një konflikti për motive të dobëta, shtetasi E. Gj, 36 vjeç, është goditur me sende të forta (qytë pistolete) nga shtetasit D. T., 41 vjeç, person i shpallur më parë në kërkim, dhe G. M., 27 vjeç, të dy banues në Shkallnur, Durrës, të cilët pas ngjarjes janë larguar me automjet.

Gjithashtu, dyshohet se në konflikt ka qenë i përfshirë edhe një punonjës policie, jashtë shërbimit, Inspektor L. Xh., i cili është shoqëruar dhe ndaj tij po kryhen veprimet procedurale nga Agjencia e Mbikëqyrjes Policore (AMP).

Në vendngjarje, grupi hetimor ka gjetur dhe sekuestruar, në cilësinë e provës materiale, një gëzhojë pistolete. Dyshohet se gjatë konfliktit është qëlluar një herë në ajër me armë zjarri pistoletë.

Ndërkohë, forca të shumta të Policisë kanë rrethuar zonën, kanë ngritur pika kontrolli dhe vijojnë kontrollet intensive për lokalizimin dhe kapjen e autorëve.

Grupi hetimor, nën drejtimin e Prokurorisë, vijon veprimet për sqarimin e plotë të rrethanave të ngjarjes dhe dokumentimin ligjor të saj.

Një grup ligjvënësish amerikanë po kërkon që sesioni vjetor i vitit 2027 i Organizatës për Siguri dhe Bashkëpunim në Evropë (OSBE) të zhvillohet në Charleston, Karolina e Jugut, dhe jo në Beograd.

Sipas Reuters, kongresmeni republikan Joe Wilson do të paraqesë të premten një rezolutë të përbashkët në Kongres, të mbështetur nga 40 bashkënënshkrues, ku kërkohet që takimi vjetor i OSBE-së, me pjesëmarrjen e deri në 57 vendeve anëtare nga Evropa, Azia Qendrore dhe Amerika e Veriut, të mbahet verën e ardhshme në Charleston.

Debati nuk lidhet vetëm me aspektet organizative, por edhe me politikën e jashtme amerikane ndaj Serbisë. Një pjesë e ligjvënësve amerikanë kërkon një qasje më të ashpër ndaj Beogradit për shkak të lidhjeve të ngushta ekonomike me Rusinë, blerjeve të energjisë ruse dhe refuzimit të Serbisë për t’iu bashkuar sanksioneve perëndimore kundër Moskës. Nga ana tjetër, disa kongresmenë argumentojnë se bashkëpunimi me Serbinë duhet të vazhdojë, me synimin për ta afruar vendin, që aspiron anëtarësimin në Bashkimin Evropian, me politikat e Perëndimit.

Joe Wilson, bashkëkryetar i Komisionit të Helsinkit në Kongresin amerikan, deklaroi se zhvillimi i takimit në Shtetet e Bashkuara do të demonstronte angazhimin e Uashingtonit ndaj aleatëve të tij në OSBE. Ai kritikoi gjithashtu qëndrimin e Serbisë ndaj Kosovës, të cilën SHBA-ja e konsideron aleate, ndërsa Beogradi vazhdon ta trajtojë si pjesë të territorit të tij.

Rezoluta mbështetet edhe nga demokrati William Keating, anëtari më i lartë i Partisë Demokratike në nënkomisionin për Evropën të Komisionit të Punëve të Jashtme të Dhomës së Përfaqësuesve. Sipas tij, zhvillimi i sesionit në SHBA do të nxirrte në pah rolin e rëndësishëm që vendi duhet të luajë në institucionet shumëpalëshe.

Ndërkohë, sipas Wilson, një nga kundërshtarët e organizimit të samitit në Charleston është senatori republikan Roger Wicker, i cili kryeson Komisionin e Forcave të Armatosura në Senat dhe ka ndikim të madh në vendimmarrjen për financimin e një samiti të tillë në SHBA. Zyra e Wicker nuk ka komentuar mbi këtë çështje.

Nuk është ende e qartë nëse rezoluta do të miratohet, pasi Kongresi amerikan pritet të ndërpresë punimet për pushimet verore deri në muajin shtator.

Avokati Idajet Beqiri, i ftuar në studion e emisionit “3D nga Alban Dudushi” në RTSH, deklaroi se protestat shërbejnë gjithmonë si një mundësi për reflektim, duke vlerësuar se kryeministri ka treguar një qasje serioze ndaj shqetësimeve të qytetarëve.

Sipas Beqirit, kryeministri ka identifikuar problematikat kryesore me të cilat përballen shqiptarët dhe është i vetëdijshëm për sfidat që e presin qeverinë në mandatin e katërt.

Beqiri theksoi se gjatë qeverisjes së deritanishme janë realizuar reforma dhe investime të rëndësishme, duke përmendur reformën në drejtësi, zhvillimin e infrastrukturës, përmirësimin e imazhit ndërkombëtar të Shqipërisë dhe rritjen e turizmit.

“Domethënë, gjithmonë nxirren mësime nga protestat. Edhe në këtë aspekt unë shoh një reflektim serioz sot të kryeministrit, sepse ai diti të ndajë se cilat janë hallet e vërteta që kanë njerëzit, çfarë shqetësimesh kanë në këtë situatë Shqipëria dhe shqiptarët, si edhe çfarë përgjigjesh duhen dhënë.

Ai e ka të qartë situatën në mandatin e katërt. Mënyra se si është konceptuar ky mandat nuk varet vetëm prej tij, sepse ai i ka të qarta gjërat, por edhe prej ekipit të tij të madh, duke filluar nga grupi parlamentar, anëtarët e qeverisë dhe, në mënyrë të veçantë, administrata shtetërore. Për hir të së vërtetës, jo vetëm administrata, por të gjitha institucionet e këtij shteti, gjatë këtyre mandateve, janë matur vetëm me atë që kanë marrë.

Domethënë, ata morën në vitin 2013 një Shqipëri të rrënuar në të gjitha drejtimet dhe e ringritën me institucione, me reformën në drejtësi, me infrastrukturën, me imazhin e vendit dhe me një politikë ndërkombëtare për t’u marrë shembull. U organizuan samite të ndryshme në kryeqytet, të cilat i dhanë Shqipërisë një emër të rëndësishëm në arenën ndërkombëtare. Gjithashtu, vendi priti një numër të jashtëzakonshëm turistësh, afërsisht 14 milionë. Pra, ata i shikonin këto arritje dhe bënin krahasimin.

Mirëpo, reflektimi i sotëm i kryeministrit ishte se nuk duhet të matemi me hijen e mëngjesit, por me sfidat dhe përgjegjësitë që kemi përpara, duke korrigjuar gabimet dhe duke iu përgjigjur më mirë shqetësimeve të qytetarëve”, u shpreh Beqiri.

Ai shtoi se qytetarët shqiptarë sot krahasojnë standardet e jetesës në vend me ato të vendeve të Bashkimit Europian, Shteteve të Bashkuara dhe Mbretërisë së Bashkuar, duke kërkuar paga, pensione dhe shërbime publike më cilësore.

Në vijim, ai u ndal edhe te funksionimi i administratës publike, duke u shprehur se ajo është mbushur me të rinj të Gjeneratës Z, të cilët sipas tij shpesh janë të papërvojë dhe nuk tregojnë vëmendjen e duhur ndaj problemeve të qytetarëve.

“Kemi të bëjmë sot me qytetarët shqiptarë, të cilët e kanë parë botën, kanë jetuar në vendet e Bashkimit Europian, në Amerikë, në Angli dhe në shumë vende të tjera. Ata i shohin standardet atje dhe pyesin: “Pse të mos i kemi edhe ne këto standarde?”

Qytetari nuk do t’ia dijë nëse Roma nuk u ndërtua brenda një dite. Ai thotë: “Unë nuk duhet të jem në këtë nivel page, në këtë nivel pensioni dhe nuk duhet të përballem me një administratë ku shkoj e nuk gjej askënd me të cilin të merrem vesh.”

Megjithatë, për hir të së ardhmes dhe për t’ia lënë Shqipërinë sa më mirë gjeneratës së re, këto probleme duhet të adresohen.

Gjenerata Z e ka mbushur administratën, por shpesh me të rinj të papërvojë, të cilët, sipas këtij këndvështrimi, nuk tregojnë interes për hallet e qytetarëve. Kjo është mënyra se si kjo qeverisje po e ndërton administratën.

Në këtë aspekt, ai po përpiqet të identifikojë mangësitë dhe të kuptojë se çfarë duhet korrigjuar. Gjithashtu, është e rëndësishme që marrëdhënien ta ndërtojë me qytetarët dhe jo me ata që, sipas tij, u përfshinë në protesta vetëm për axhendat e tyre: axhenda antishqiptare, kundër turizmit, kundër investimeve strategjike dhe në favor të destabilizimit të Shqipërisë, të cilat ai i lidh me Berishën dhe ekipin e tij”, tha ai.

I dërguari i Bashkimit Evropian për dialogun mes Kosovës dhe Serbisë, Peter Sorensen, u takua të premten në Prishtinë me kryeministrin në detyrë, Albin Kurti, në një vizitë të paparalajmëruar.

Mes temave të diskutuara ishte edhe çështja e gjyqtarëve dhe prokurorëve të dorëhequr serbë, të cilët po kërkojnë rikthimin në punë.

Në një njoftim për media, zyra e Kurtit tha se ai u pyet nga Sorensen për kthimin e dhjetëra gjyqtarëve dhe prokurorëve serbë në punë, të cilët kishin dhënë dorëheqje më 2022.

BE-ja ka kërkuar që çështja e ri-integrimit të gjyqtarëve dhe prokurorëve të dorëhequr serbë të zgjidhet në kuadër të dialogut mes dy vendeve fqinje.

Në takimin me zyrtarin e lartë të BE-së, Kurti e përsëriti se është i hapur për përfshirjen e serbëve në gjyqësor dhe prokurori, por jo për rikthimin e tyre automatikë në punë, duke ngulur këmbë se çdo vendim të bëhet sipas Kushtetutës dhe ligjeve të Kosovës.

I dërguari i bllokut evropian erdhi në Prishtinë në ditën kur si Kurti, ashtu edhe ushtruesja e detyrës së presidentit, Albulena Haxhiu, e shtynë Këshillin Gjyqësor (KGJK) të vendit të bëjë kërkesë për lirimin nga detyra të gjyqtarëve të dorëhequr serbë, pavarësisht thirrjeve nga BE-ja për të mos i bërë trysni institucionit të pavarur të gjyqësorit.

Një mbledhje e Këshillin Gjyqësor të premten, ku pritej të shqyrtohej edhe çështja e gjyqtarëve të dorëhequr serbë, dështoi për shkak të kuorumit.

Reflektimet e kryeministrit Edi Rama për protestën e flamingove, janë paraprirë nga një situatë e tensionuar në mbledhjen e përbashkët këtë të premte, mes qeverisë dhe grupit parlamentar, ku mes kreut të qeverisë dhe Erion Braçes, siç mëson Report TV, ka patur një përplasjeje mjaft të fortë, pas së cilës deputeti ka zgjedhur që të lërë mbledhjen.

Gjatë diskutimeve me dyer të mbyllura  Rama ka patur sërish kritika ndaj të tijve, ndaj disa ministrave por dhe deputetëve, për qasjen e tyre publike.

Ai ka kritikuar ministrin e Brendshëm për mënyrën e përballimit të protestave, apo dhe atë të Bujqësisë, për rastin e përmendur dhe në fjalimin e tij publik, të një qytetari kërkesa e të cilit për një investim ishte lënë për tre vite pa përgjigje, Ndërsa deputetëve u ka kërkuar që t’i thonë në mbledhje “ato që diskutoni nëpër tavolina”. Rama i është rikthyer vërejtjeve të përsëritura ndaj “luftës së bërrylave”, në gjirin e PS, duke u shprehur se “të gjithë duhet ta kuptojnë se sulmet mes njeri tjetrit nuk bëjnë gjë tjetër vecse ulin aksionet e ndërmarrjes sonë të përbashkët, e kësisoj dhe aksionet e secilit prej jush”.

Bruime brenda grupit, thanë për Report TV, se takimi mori një kthesë të papritur pas fjalës së deputetit Erion Braçe, e cila është pasuar me replikë të kryeministrit, duke u kthyer më pas në një përplasje të ashpër verbale me tone të larta mes të dyve. Ka qenë një pushim i kërkuar nga kreu i grupit parlamentar Taulant Balla që ka “shuar” zjarrin, me deputetin Braçe, i cili ka zgjedhur të largohet nga mbledhja në mënyrë demonstrative.

Shtetet anëtare të Gjykatës Penale Ndërkombëtare (GJPN) votuan të premten për shkarkimin e Karim Khan nga posti i prokurorit, pas akuzave për sjellje të pahijshme seksuale, sipas raportimeve të agjencive AP, Reuters dhe AFP.

Karim Khan, një avokat britanik, u akuzua për sjellje të pahijshme seksuale ndaj një ndihmëseje të tij. Ai i ka mohuar vazhdimisht këto akuza. Në qershor, ai u pezullua përkohësisht nga detyra, pasi një raport i komitetit ekzekutiv të organit mbikëqyrës të gjykatës arriti në përfundimin se kishte kryer “sjellje të rëndë të papërshtatshme”.

Në votimin e zhvilluar, 82 nga 125 shtetet anëtare të Gjykatës votuan pro shkarkimit të Khanit, 13 votuan kundër, ndërsa 15 shtete abstenuan.

Khan, 56 vjeç, u bë i njohur ndërkombëtarisht në vitin 2024 kur kërkoi dhe siguroi lëshimin e urdhër-arresteve ndaj kryeministrit izraelit Benjamin Netanyahu dhe ish-ministrit të Mbrojtjes Yoav Gallant për luftën në Gaza, si edhe ndaj disa drejtuesve të Hamasit, të cilët ndërkohë janë vrarë. Hamasi kreu sulmet terroriste të 7 tetorit 2023 ndaj Izraelit.

Pavarësisht shkarkimit të tij, të gjitha urdhër-arrestet aktive të GJPN-së mbeten në fuqi, pasi vetëm gjyqtarët e Gjykatës kanë kompetencën për t’i tërhequr ato.

Cilat ishin reagimet?

Kenneth Roth, ish-drejtor ekzekutiv i Human Rights Watch dhe aktualisht profesor i ftuar në Universitetin Princeton, shkroi në rrjetin X se shtetet anëtare të GJPN-së “bënë gjënë e duhur” duke shkarkuar Khanin.

Nga ana tjetër, ambasadori i Izraelit në OKB, Danny Danon, kritikoi veprimet e Khanit në një deklaratë të publikuar në X pas shkarkimit.

“Khan mendoi se gjuetia e tij politike e shtrigave kundër Izraelit dhe urdhër-arrestet skandaloze do ta largonin vëmendjen nga akuzat serioze për sjellje të pahijshme seksuale. Ai gaboi,” tha Danon.
Shkarkimi i Khanit vjen në një kohë kur administrata Trump synon të “çmontojë” GJPN-në

Vendimi për shkarkimin e Khanit vjen në një periudhë kur administrata e presidentit amerikan Donald Trump po kërkon të dobësojë dhe të shpërbëjë Gjykatën Penale Ndërkombëtare.

GJPN-ja, me seli në Hagë të Holandës, heton dhe ndjek penalisht individët e dyshuar për krime kundër njerëzimit, krime lufte, gjenocid dhe krimin e agresionit.

Sekretari amerikan i Shtetit, Marco Rubio, deklaroi së fundmi se Shtetet e Bashkuara kanë nisur një “fushatë të gjerë për të çmontuar kërcënimin që Gjykata Penale Ndërkombëtare paraqet ndaj sovranitetit amerikan.”

Departamenti Amerikan i Shtetit tha se vendet që përfitojnë nga mbrojtja e sigurisë së SHBA-së duhet të refuzojnë autoritetin që GJPN pretendon se ka për të ndjekur penalisht zyrtarët dhe ushtarakët amerikanë.

Po ashtu, Departamenti i Shtetit po shqyrton mundësinë e heqjes së vizave dhe vendosjes së ndalimeve të udhëtimit për personelin e GJPN-së, si edhe sanksione shtesë ndaj Gjykatës dhe organizatave të lidhura me të./ DW

Presidenti i Shteteve të Bashkuara, Donald Trump, reagoi ashpër përmes një postimi në platformën Truth Social, duke akuzuar Bashkimin Evropian se po shënjestron padrejtësisht kompanitë e mëdha amerikane me gjoba miliarda dollarëshe.

Reagimi i Trump vjen pasi BE-ja vendosi një tjetër gjobë prej 1 miliard dollarësh ndaj Google, të cilën ai e cilësoi si të pajustifikuar. Sipas tij, me këtë vendim, vlera totale e gjobave të vendosura ndaj kompanisë tejkalon 18 miliardë dollarë.

Trump renditi edhe gjobat e vendosura më herët ndaj kompanive të tjera amerikane, duke përmendur 15 miliardë dollarë ndaj Apple, 3 miliardë dollarë ndaj Meta dhe 2.5 miliardë dollarë ndaj Amazon.

“Shtetet e Bashkuara nuk janë ‘banka derrkuci’ e Evropës dhe nuk do ta lejojmë të jenë”, shkroi Trump.

Ai pretendoi se kjo praktikë nisi gjatë administratës së ish-presidentit Joe Biden, por theksoi se nuk do të vazhdojë gjatë mandatit të tij.

Presidenti amerikan paralajmëroi se administrata e tij do të nisë menjëherë një hetim sipas Seksionit 301 mbi atë që e quajti praktikë të “grabitjes” së kompanive amerikane dhe, si pasojë, të taksapaguesve amerikanë.

“Bashkimi Evropian do të paguajë një çmim shumë të lartë për këtë sjellje të paligjshme dhe shumë joetike, për të cilën i kam paralajmëruar vazhdimisht”, u shpreh Trump.

Ai shtoi se, sipas tij, këto gjoba do të anulohen plotësisht dhe se ndaj Bashkimit Evropian do të vendosen tarifa të konsiderueshme “sa më shpejt të jetë e mundur”.

Analisti Agim Baçi, i ftuar në studion e emisionit “3D nga Alban Dudushi” në RTSH, komentoi zhvillimet e fundit politike, duke u ndalur te reagimi i kryeministrit Edi Rama ndaj pakënaqësive qytetare.

Sipas Baçit, Rama nxitoi të përcaktonte se opozita e tij nuk është më Partia Demokratike, por vetë qytetarët.

Analisti theksoi se kryeministri bëri një ndarje të qartë mes asaj që e konsideron “opozitë qytetare” dhe opozitës politike.

“Kemi të bëjmë me një përcaktim se opozita jeni ju; nuk është më PD-ja. Pikërisht. Pra, nxitoi të bënte një ndarje. Domethënë, ne jemi në mënyrë paradoksale në një situatë ku leximin e bulevardit e bën më shpejt Rama. Po tregon se po e bën më shpejt Rama sesa opozita, e cila duhej ta kishte bërë që ditën e parë. Ai nxitoi që sot të tregonte se unë e kam opozitë qytetarët.

Bëri edhe një ndarje: nga sot, puplat me flamingot. Bëri një lloj reagimi të tillë për të thënë se, kur është opozita qytetare, unë reagoj; me opozitën tjetër nuk merrem fare, nuk e përfill.

Fatkeqësisht, kjo lloj krize vjen pikërisht nga mosbesimi. Së pari, prej opozitës; qeverinë ke gjithmonë arsye ta kontestosh. Së dyti, tregoi një gjë që, në fakt, e përmendi edhe më parë me çështjen e fakteve: këto janë dy shinat mbi të cilat funksionon demokracia, sa mban përgjegjësi dhe sa jep llogari. Po ta dëgjojmë fjalimin e sotëm, unë mendova se kishte rënë një tërmet. Domethënë, do të ndryshonte edhe Edi Ramën vetë. Do të ndryshonte gjithë qeverinë, madje edhe vetveten”, u shpreh Baçi.

Në vijim, analisti u ndal te rëndësia e perceptimit publik, duke vlerësuar se kryeministri pranoi se imazhi i qeverisë është dëmtuar. Ai vuri në dukje edhe përdorimin e gjuhës së ashpër nga kryeministri gjatë fjalës së tij.

“Perceptimi, domethënë, nuk na hyn më në punë. Ajo që kemi thënë këtu është se perceptimi publik është kundër nesh. Edhe sot u mundua ta ndante përgjysmë atë shprehjen ‘Rama burg, Berisha burg’. Domethënë, tentoi me këtë lloj fjalimi të thoshte: unë reagoj, unë jam me ju, ju dëgjoj. Madje tha edhe: ‘Ju kam dëgjuar mirë’, dhe fajësoi administratën e vet dhe gjithë grupin përreth, që ka rënë pre e një raporti krejt tjetër.

Përdori edhe fjali ekstreme, si: ‘Kanë prapanicën në vend të fytyrës’, çka do të thotë se ka humbur marrëdhënien me qytetarin. Bëri një reagim ndryshe, mbi konceptin se kemi humbur, sepse perceptimi ndaj nesh nuk është më ai që kemi menduar ne. Por ky është një lloj reagimi politik që është i domosdoshëm.

Megjithatë, pas 13 vjetësh në detyrë, kryeministri ka shumë më tepër për të thënë dhe nuk mund ta fajësojë më opozitën për gjithçka.”, tha ai.

Gazetarja Laureta Roshi ishte në një lidhje live për emisionin “Review” me Greta Topjanën, ku solli detaje nga ngjarja tragjike e kësaj të premteje në fshatin Vidhisht të Roskovecit, ku bilanci u rëndua në tre viktima.

Ajo bëri të ditur se ceremonia mortore për Kosta dhe Belere Plakun pritet të zhvillohet të nesërmen në orën 10:00, ndërsa për autorin e ngjarjes ende nuk ishte përcaktuar orari i ceremonisë mortore.

Gazetarja Laureta Roshi tha se kishte kontaktuar me prindërit e autorit, të cilët, sipas saj, ishin në gjendje të rënduar emocionale dhe kishin mësuar për ngjarjen vetëm pasi policia kishte mbërritur në banesën e tyre rreth orës 07:50 të mëngjesit.

“Kam shkuar në shtëpinë e autorit dhe kam kontaktuar prindërit e tij, dy të moshuar të cilët ndiheshin të tronditur. Ata thanë se ngjarjen e rëndë e kishin mësuar vetëm kur policia kishte shkuar në banesë. Babai është pacient kardiologjik, ndërsa të dy treguan se djali i tyre nuk kishte konsumuar ushqim prej dy ditësh dhe kishte dalë herët në mëngjes,” u shpreh Roshi.

Sipas saj, prindërit deklaruan se Refit Buzi ndodhej në masën e sigurisë “arrest në shtëpi”, pasi dyshohej se kishte shkelur një urdhër mbrojtjeje. Ata shtuan gjithashtu se djali i tyre kishte kërkuar vazhdimisht kthimin e një shume parash nga ish-partnerja.

Gazetarja bëri me dije se, pas daljes së Rozalinda Plakut nga situata e pengmarrjes, ajo u transportua fillimisht në spital për ndihmë mjekësore dhe më pas në Drejtorinë e Policisë për të dhënë dëshminë e saj.

Roshi tha se operacioni i forcave RENEA për negociimin me autorin zgjati për disa orë, por përfundoi pa sukses, pasi 35-vjeçari qëlloi veten me armë zjarri.

Në fund të lidhjes live, gazetarja ngriti disa pikëpyetje mbi mënyrën se si trajtohen rastet e konflikteve familjare dhe urdhrave të mbrojtjes.

“Ka ardhur momenti që në raste të tilla të ketë edhe një psikolog vlerësues në momentin kur lëshohet urdhri i mbrojtjes. Ndoshta, nëse do të ishte ndërhyrë më herët, kjo tragjedi mund të ishte shmangur. Sjelljet kriminale nuk shfaqen papritur, ato zakonisht nxiten nga një sërë rrethanash,” u shpreh gazetarja.

Kujtojmë që këtë të premte, 35-vjeçari Refit Buzi shkoi në banesën e ish-partneres së tij, Rozalinda Plaku, dhe hapi zjarr me armë gjahu ndaj prindërve të saj. Si pasojë e sulmit, Kosta Plaku, 58 vjeç, humbi jetën në vend, ndërsa bashkëshortja e tij, Belere Plaku, ndërroi jetë në spital në mbrëmje si pasojë e plagëve të marra. Më pas, autori i dyshuar i ngjarjes vrau veten brenda automjetit të tij, pas disa orësh rrethimi dhe negociatash nga forcat RENEA për ta bindur të dorëzohej.

Shërbimi Social Shtetëror ka dalë me një sqarim për zbatimin e vendimit të Këshillit të Ministrave, të miratuar më 22 korrik, që parashikon ndryshime në përfitimet për personat me aftësi të kufizuara dhe ndihmësit e tyre personalë.

Sipas institucionit, edhe pse vendimi është miratuar më 22 korrik, ai hyn në fuqi me efekt financiar nga 1 korriku 2026. Kjo do të thotë se duke nisur nga 1 gushti, përfituesit do të marrin pagesën sipas vlerave të reja, së bashku me diferencën që u takon për muajin korrik.

“Shërbimi Social Shtetëror informon qytetarët se aktet për ndryshimet që lidhen me përfitimet e personave me aftësi të kufizuara dhe ndihmësve të tyre personalë janë miratuar në datë 22 Korrik 2026 me Vendim të Këshillit të Ministrave.  Vendimi i Këshillit të Ministrave parashikon që këto ndryshime  hyjnë në fuqi me efekt financiar nga 1 korriku 2026. Për këtë arsye, Shërbimi Social Shtetëror siguron të gjithë përfituesit se asnjë e drejtë e fituar nuk do të cenohet dhe çdo përfitim do të zbatohet sipas përcaktimeve të vendimit, çka do të thotë se duke filluar nga 1 gushti 2026 përfituesit do të marrin pagesën sipas vlerave të reja, së bashku me diferencën që u përket për muajin korrik. Shërbimi Social Shtetëror falenderon çdo përfitues për mirëkuptimin dhe ju siguron se zbatimi i këtij vendimi do të kryhet në mënyrë të plotë, duke garantuar respektimin e të drejtave për çdo qytetar” thuhet në sqarim

Më 22 korrik Këshilli i Ministrave miratoi një paketë të re masash sociale për personat me aftësi të kufizuara dhe ndihmësit e tyre personalë. Paketa parashikon dyfishimin e pagesës për mbi 10 mijë fëmijë me aftësi të kufizuara, njohjen e periudhës së shërbimit si vite kontributi për rreth 14 mijë e 600 ndihmës personalë, si edhe lehtësimin e procedurave të KEMP-it për rastet kur përfitimi është shumëvjeçar. Efektet financiare nisin nga 1 korriku 2026, ndërsa kostoja e paketës për këtë vit llogaritet në mbi 15 milionë euro.

Një valë e fortë moti të keq ka përfshirë të premten disa zona të Greqisë, duke sjellë stuhi të fuqishme, erëra të forta, reshje intensive shiu, breshër dhe një numër të jashtëzakonshëm rrufesh.

Athina u përball me përkeqësim të menjëhershëm të kushteve atmosferike pasditen e së premtes. Qielli u mbulua nga re të dendura dhe të errëta, ndërsa pak para orës 19:00 (me oren lokale) nisën reshje të rrëmbyeshme shiu, të shoqëruara me erëra të forta dhe aktivitet intensiv elektrik.

Fenomenet ekstreme kanë prekur shumë zona të vendit, ku janë raportuar përmbytje në rrugë, dëmtime në ndërtesa, pemë të rrëzuara dhe probleme në qarkullim.

Sipas të dhënave meteorologjike, në orët e fundit janë regjistruar më shumë se 100 mijë goditje rrufesh në tokë dhe në det, një aktivitet i pazakontë për këtë periudhë.

Dëme dhe probleme në disa rajone

Në Fthiotidë, stuhia shkaktoi dëme të konsiderueshme. Erërat e fuqishme rrëzuan pemë, ndërsa rrugët u kthyen në lumenj nga reshjet e dendura. Në Makrakomi, forca e erës shkëputi çatinë metalike të një ndërtese të Unionit të Kooperativave Bujqësore, duke e hedhur rreth 100 metra larg.

Në Larisa dhe zonën përreth, qielli u errësua nga re të fuqishme, ndërsa vetëtimat ndriçonin fushën e Thesalisë. Në disa zona u raportuan edhe breshër dhe dëmtime të të mbjellave.

Stuhi të forta goditën gjithashtu Agrinion, Zakynthos, Volosin, Trikalën, Dramën dhe Halkidikinë. Në këtë të fundit, banorët u alarmuan nga shfaqja e një tornadoje pranë zonës bregdetare të Psaroudias.

Një fenomen i rrallë u regjistrua edhe në detin mes Sithonisë dhe Malit Athos, ku u shfaq një rrymë uji që lidhej mes resë së stuhisë dhe sipërfaqes së detit.

Për shkak të rrezikut nga reshjet intensive dhe stuhitë, autoritetet greke aktivizuan sistemin e emergjencës 112. Banorët e disa zonave morën njoftime për të treguar kujdes gjatë lëvizjeve.

Paralajmërimet prekën kryesisht Larisën, Fthiotidën, Evian qendrore dhe veriore, Skyros, Magnezinë dhe Sporadet.

Autoritetet kërkuan që qytetarët të shmangin udhëtimet e panevojshme gjatë kulmit të fenomeneve dhe të tregojnë kujdes ndaj përmbytjeve të mundshme dhe objekteve që mund të rrëzohen nga era.

Moti i keq vazhdon edhe në orët në vijim

Sipas Shërbimit Kombëtar Meteorologjik të Greqisë, moti i paqëndrueshëm pritet të vazhdojë deri në orët e para të së shtunës. Zonat më të rrezikuara janë pjesët bregdetare të Magnezisë, Evia, Sporadet, Larisa, Halkidikia dhe disa zona të Atikës.

Meteorologët paralajmërojnë se stuhitë mund të shoqërohen me erëra të forta, breshër dhe përmbytje të shpejta lokale.

Përmirësimi gradual i motit pritet të nisë nga mbrëmja e vonë e së premtes dhe gjatë së shtunës, ndërsa nga e diela Greqia pritet të rikthehet në kushte më tipike verore me rritje të temperaturave.

Kryetari i Këshillit të Agrobiznesit, Agim Rrapaj, është shprehur se bujqësia shqiptare po vazhdon të përballet me vështirësi të mëdha, duke mos arritur të performojë sipas pritshmërive.

Sipas tij, vetëm sektori i perimeve ka shënuar njëfarë rritjeje, ndërsa kushtet e pafavorshme klimatike, si ngricat, përmbytjet dhe zjarret, kanë shkaktuar dëme të konsiderueshme. Rrapaj ka theksuar gjithashtu se mungesa e skemave efektive të sigurimit në bujqësi e bën të domosdoshëm miratimin e një ligji të ri brenda muajit shtator.

“Ka disa sektorë që nuk po dalin nga ato vështirësitë, që kanë bërë që bujqësia në periudhën që ka kaluar të mos ketë mundësi të dalë mbi vlerën zero dhe të ketë mundësi të performojë më mirë. Ka edhe disa sektorë pastaj që kanë performuar në një farë mënyre dhe kanë tejkaluar pritshmëritë tona. Po të shikosh bujqësinë, në të gjitha produktet vetëm perimet kanë pësuar një rritje krahasuar me vitet e kaluara, por jo me objektivat që ne kemi vendosur.

Kjo ka ardhur për disa arsye. Arsyeja e parë është objektive dhe lidhet me kushtet klimatike që ne kemi kaluar. Në këtë periudhë që sapo kemi kaluar nuk ka qenë në favor të këtij sektori, kemi pasur ngrica, breshër, përmbytje dhe po vijon që të kemi edhe zjarre. Duhet marrë parasysh që nuk është vepruar me shpejtësi sa u takon sigurimeve në bujqësi, që të mbulojnë dëmet.

Është një draft, një ide për ta bërë të ngjashëm me modelin turk. Shpresoj që ky ligj brenda shtatorit të dalë për konsultim publik. Është i domosdoshëm që të bëhet një ligj i tillë, sepse dëmet e shkaktuara nuk mund të mbulohen nga buxheti i shtetit”, tha Rrapaj.

NATO konfirmon rrëzimin e një droni në hapësirën ajrore rumune nga avionët luftarakë të aleancës.

Aleanca Transatlantike ka konfirmuar zyrtarisht se një dron është rrëzuar brenda hapësirës ajrore të Rumanisë nga avionë luftarakë aleatë, të cilët ndodheshin nën komandën dhe kontrollin e drejtpërdrejtë të NATO-s.

Sipas njoftimit të Komandës Ajrore të NATO-s, ndërhyrja ka qenë e menjëhershme pasi mjeti fluturues i papilotuar shkeli hapësirën ajrore të vendit anëtar.

Më herët gjatë ditës së premte, autoritetet zyrtare rumune deklaruan se një avion luftarak i tipit F-16 kishte pikasur dhe asgjësuar dronin e paidentifikuar.

Ndërkaq, aleanca ka nisur menjëherë një hetim të hollësishëm për të përcaktuar origjinën e dronit dhe qëllimin e fluturimit të tij.

Komanda e NATO-s bëri të ditur se është në kontakt të vazhdueshëm dhe të ngushtë me autoritetet rumune për të monitoruar situatën.

Ky incident vjen në një kohë tensionesh të larta në rajonin e Detit të Zi, duke rritur gatishmërinë e mbrojtjes ajrore në krahun lindor të Aleancës.

Deri më tani nuk raportohet për viktima apo dëme materiale në tokë nga rënia e mbetjeve të dronit. Autoritetet po punojnë për të zbardhur nëse bëhet fjalë për një dron spiunazhi apo një mjet sulmi të devijuar nga kursi.

Një person ka mbetur i plagosur këtë pasdite në zonën e Shkallnurit, në Durrës.

Burime nga policia thanë për ABC News se ngjarja ka ndodhur në ambientet e një lokali në këtë zonë, Lagjja 13.

Të njëjtat burime saktësojnë se i plagosuri është qëlluar nga një person tjetër me mjet prerës (thikë).

Në vendngjarje ka mbërritur policia, e cila ka nisur hetimet.

Ndërkohë, i plagosuri është dërguar në Urgjencën e Spitalit të Durrësit, ku po i nënshtrohet një ndërhyrjeje kirurgjikale.

Ende nuk dihen identitetet e personave të përfshirë në këtë konflikt, ndërsa policia po punon për kapjen e autorit, i cili është larguar nga vendi i ngjarjes.

Është thelluar ngjarja tragjike në Roskovec.

Burime për Vizion Plus bëjnë me dije se ka ndërruar jetë edhe ish-vjehrra e autorit, Belere Plaka, rreth 55 vjeçe.

Ajo u qëllua me armë gjahu nga Refit Buzin, 35 vjeç, i cili pas disa orësh mos bindjesh për tu dorëzuar në polici, vrau veten brenda në makinë.

Buzi mëngjesin e kësaj të premte vrau edhe ish-vjehrrin e tij, Kosta Plakën, 58 vjeç .

Kryetari i Partisë Socialiste, njëherësh kryeministër, Edi Rama, gjatë takimit të zgjeruar të Grupit Parlamentar Socialist, u ndal te pritshmëritë e reja të qytetarëve dhe nevoja për reflektim të shumicës qeverisëse pas një viti qeverisjeje.

Duke iu referuar asaj që e quajti “pasqyra e Bulevardit të Flamingove”, Rama tha se shqiptarët nuk e krahasojnë më vendin me të kaluarën e mungesave, por me standardet dhe mundësitë që duan të arrijnë.

Kryeministri deklaroi se Shqipëria ka kaluar nga një realitet i perceptuar negativisht në një destinacion më të dëshiruar, por sipas tij sfida e re është përballja me kërkesat më të larta të qytetarëve.

Rama theksoi se qytetarët kanë të drejtë të kërkojnë standarde më të larta dhe se kjo kërkon një qasje të re nga qeveria dhe Partia Socialiste.

“Bulevardi i Flamingove është prova se shqiptarët nuk e krahasojnë me Shqipërinë me vendin e mungesave, por me vendin e mundësive ku ata mezi presin të mbërrijnë. Ndaj nuk na vlerësojnë më për cfarë kemi ndryshuar.  Janë të përqendruar të na gjykojnë se panë që nuk pranojnë dot që gjithçka ndryshoi të mbetet sic ishte. Ne e nxorëm Shqipërinë nga epoka e mungesave dhe përballemi me një popull që nuk na vlerëson më sa do donim ne, por na kërkon llogari më shumë se sa do donim ne për gjithçka duhet bërë. Një popull që tregon se sa lart duhet të jetë pa pritur kohën që duhet për t’u ngjitur me ne apo pa ne. Dhe ka të drejtë. Nëse nuk kupton se kjo e drejtë është më e madhe se sa PS apo se edhe vetë Edi Rama po deshe…Faktet janë dhe do mbeten aty, nga një realitet që bënte lajme vetëm për keq. Me një emër të përbuzur e shpërfillur ndërkombëtarisht në një destinacion të dëshiruar. Por kjo është histori, ne jemi aktualitet. Në pasqyrën e Bulevardit të flamingove, pashë një të vërtetë tronditëse që asnjë statistikë nuk e tregon, por që asnjë provë nuk e rrëzon. Ne lart kishim fakte, njerëzit poshtë kishin përjetime. Faktet tona thoshin se kishim me vete të vërtetën, por përjetimi i tyre ishte e gjitha e vërteta ishte në anën e tyre. Padiskutim që pati lajme të rreme e video të deformuara…Por asnjë prej tyre nuk ishin zemra e atij manifestimi spektakolar që e ktheu Bulevardin në hendek. Përgjigja nuk duhet kërkuar në pjesët e bashkëngjjitur të protestës, por duhet gjetur te pritshmëritë e rritura të njerëzve. Duam apo jo, njerëzit presin më shumë dhe bëhen me pak tolerantë, sidomos pas përvojave të hidhura me administratën që e derdhën kupën në Bulevard”, tha ai.

Kryeministri Edi Rama, në mbledhjen e grupit parlamentar të Partisë Socialiste, deklaroi se gjatë dekadës së fundit Shqipëria ka pësuar një transformim të rëndësishëm në fushën e mbrojtjes së florës dhe faunës.

Rama u shpreh se qeveria ka zgjeruar kategoritë e mbrojtjes së natyrës dhe ka kaluar, sipas tij, nga një qasje sporadike në një sistem administrimi të biodiversitetit me rezultate të dukshme.

“Në një dekadë ne kemi bërë për florën dhe faunën e Shqipërisë një përmbysje historike të vizionit, qasjeve dhe administrimit, me rezultate të pamohueshme. Në këtë dekadë zgjeruam në mënyrë të ndjeshme, si asnjë vend tjetër në rajon, kategoritë e mbrojtjes dhe e kthyem mbrojtjen e natyrës nga një thirrje sporadike në një sistem administrimi.

Një parantezë këtu: ndryshimet e vitit 2024, le ta mbajë shënim kush e dëgjon, në atë ligj u përdorën papushim dhe vazhdojnë të përdoren si benzinë për zjarrin e protestës nga individë me agjendë politike, përfshirë edhe disa eurodeputetë, të cilët në rastin më të mirë nuk e kanë lexuar fare çfarë kemi ndryshuar, ndërsa në rastin më të keq kanë dashur të besojnë rolin e viktimave të imperializmit amerikan. E vërteta është se ato ndryshime janë bërë në përputhje me direktivën europiane.

Ka një proces në zbatim të procesit të negociatave, ku do të skanohen një për një me Komisionin Europian për ta përputhur krejt atë ligj 100% me direktivat e BE-së. Edhe ato ndryshime, ky konflikt i stisur, do të zgjidhen përfundimisht në rrugën e negociatave, ku nuk kalon asgjë pa miratimin e Komisionit.

Shqipëria, ku deri dje natyra dhe popullsia e specieve të saj ishin preja e pambrojtur e njeriut të lëshuar nga çdo zinxhir moral në raport me nënën natyrë, u bë vendi i një proteste popullore që mori si shkak një zog dhe një lagunë. Biodiversitetit i kemi kthyer përkushtimin, me rezultate aspak modeste”, tha Rama.