Carlos Alcaraz dështoi ta ruante titullin e tij në Wimbledon, duke humbur në finale ndaj italianit Jannik Sinner. Megjithatë, sjellja e tij pas humbjes ka qenë më e përfolura në Mbretërinë e Bashkuar.

Pavarësisht humbjes së vështirë, tenisti nga Murcia bëri për vete shumë britanikë me një gjest plot respekt dhe elegancë, një përkulje para Kate Middleton, Princeshës së Uellsit, pas marrjes së trofeut të vendit të dytë. Gjesti i Alcaraz është lavdëruar gjerësisht në mediat sociale dhe në median britanike, ku është përshkruar si një shembull përulësie dhe mirësjelljeje.

“Një moment plot hir dhe përulësi. Alcaraz mund të mos e ketë fituar titullin, por ai u soll si një kampion i vërtetë, brenda dhe jashtë fushës”, komentoi një shikues britanik në X. Përdorues të tjerë gjithashtu theksuan respektin e lojtarit:

“Më pëlqen që ai i përkulet Catherine-s. Është shumë respekt”, tha njëri. “E vlerësoj shumë respektin e tij ndaj Princeshës Catherine duke u përkulur. Vetëm një nga katër finalistët që tregon një respekt të tillë”, shtoi një tjetër.

Gjesti u përforcua më tej nga tradita monarkike britanike, në të cilën akte të tilla mbartin një rëndësi të konsiderueshme simbolike. Në një turne aq ikonik sa Wimbledon, me një prani të fortë mbretërore, sjellja e lojtarëve ndiqet nga afër si nga shtypi ashtu edhe nga publiku.

Përveç nderimit të tij, Alcaraz shprehu edhe mirënjohjen e tij ndaj Mbretit Felipe VI, i cili udhëtoi për në Londër për të parë finalen. Tenisti shprehu publikisht mirënjohjen e tij për mbështetjen e tij, duke theksuar se sa e veçantë ishte për të prania e tij në një skenë kaq të rëndësishme.

Edhe pse nuk arriti fitoren në barin e All England Club, Carlos Alcaraz tregoi edhe një herë pse është një nga figurat më të mëdha në sportin botëror. Sjellja e tij shembullore dhe respekti për traditat britanike i kanë fituar zemrat e publikut britanik, edhe në humbje. Një provë e mëtejshme se tenisi është shumë më tepër sesa rezultate. m.p.

Ministri i Drejtësisë, Ulsi Manja, priti sot në Tiranë Zëvendëskryeministren dhe Ministren e Drejtësisë së Ukrainës, Olha Stefanishyna, në një takim që konfirmon partneritetin e qëndrueshëm mes dy vendeve dhe përkushtimin e përbashkët për drejtësinë dhe integrimin europian.

Gjatë takimit u diskutua forcimi i bashkëpunimit institucional dhe u ra dakord për:

-Nënshkrimin e një Memorandumi Bashkëpunimi në fushën e drejtësisë

-Shkëmbimin e përvojave në reformën në drejtësi dhe luftën kundër korrupsionit

-Mbështetjen e ndërsjellë për procesin e integrimit në Bashkimin Evropian

-Zhvillimin e bashkëpunimit në sistemin penitenciar dhe në mjekësinë ligjore.

Ministri Manja rikonfirmoi qëndrimin e palëkundur të Shqipërisë në krah të Ukrainës dhe në mbështetje të së drejtës ndërkombëtare përballë agresionit rus. Shqipëria do të vijojë të kontribuojë në dokumentimin dhe ndëshkimin e krimeve të luftës përmes mbështetjes ndaj Tribunalit për Ukrainën.

“Drejtësia ndërtohet çdo ditë me partneritet, vullnet dhe miq që nuk të lënë vetëm,” deklaroi ministri i Drejtësisë, duke vënë theksin tek vlerat e përbashkëta që i bashkojnë dy vendet në rrugën drejt Europës.

Ky takim shënon një hap të rëndësishëm në thellimin e bashkëpunimit mes Shqipërisë dhe Ukrainës dhe një kontribut domethënës në ndërtimin e një arkitekture drejtësie më të fortë në rajon dhe më gjerë. m.p.

Pas 13 vitesh ku mbajti veshur fanellën e Los Blancos, Luka Modric vendosi të transferohet në kampionatin Italian te Milani, ndërsa ka zbarkuar në Milano këtë të hënë.

Kroati është shfaqur i qeshur në prezantimin e parë, ndërsa ka pohuar se ndihet i lumtur për këtë rrugëtim të ri.

“Përshëndetje të gjithëve, sapo mbërrita në Milano. Shumë i lumtur që ndodhem këtu, për të vijuar një aventurë të re në karrierën time. Një përqafim i madh për të gjithë”, deklaroi mesfushori në një video të publikuar në rrjetet sociale të djallit.

Modric do të kryejë testet mjekësore e më pas do të bashkohet me skuadrën, ndërsa eksperienca e tij pritet të jetë një vlerë e shtuar në kampin kuqezi.

Ardhja e Modric u bë e mundur pas përfundimit të botërorit të klubeve, ku ishte pjesë e Realit të MAdridit. Kroati 39-vjecar është një legjende e skuadrës spanjolle ku ka fituar gjithcka, ndërsa u transferua në Bernabeu në vitin 2012. Mesfushori numëron afro 400 ndeshje me fanellën e galaktikëve, ku ka realizuar dhe 30 gola. Modric është ndër lojtarët që e ka fituar më së tepërmi Champions League, plot 6 herë. Te Milani, pavarësisht moshës pritet me entuziazëm dhe do të luftojë për formacionin titullar. m.p.

Nga bregdeti i Sarandës, në Shqipërinë e mesme dhe deri në veri të saj, gjithnjë e më shpesh dëgjohet një shqipe me theks të huaj teksa shërbehet në shumë biznese. Shqipëria e viteve të fundit, që ankohet për papunësi, duket se po plotëson këto vende bosh.

Leen – sanitare nga Filipinet: “Në vendin tonë mundësitë e punësimit janë të pakta dhe të vështira për t’u gjetur, sepse ka shumë popullsi dhe nëse s’ke mik në qeveri, ti nuk gjen një vend të mirë pune.”

Joana – sanitare nga Uganda: “Vendosa të vij këtu sepse në vendin tonë, paratë që marrim këtu janë shumë më të larta dhe kjo më ndihmon mua dhe familjen time.”

Tiza – magazinier nga Mianmari: “Agjencia ku u interesova më kreu të gjitha procedurat e nevojshme dhe unë erdha menjëherë. Jam i lumtur.”

Shqipëria është e njohur për ta. Të gjithë janë të kënaqur – nuk paguajnë qira, ushqimi u ofrohet nga biznesi, ndërsa çdo muaj dërgojnë para në shtëpi. Por ky realitet është pasqyrë e një problemi më të thellë për tregun shqiptar të punës. Në bujqësi, industri, ndërtim e turizëm janë sektorët që vuajnë për fuqi punëtore, ndërsa mbi 11 mijë punonjës të huaj janë “importuar” për të plotësuar vendet bosh.

Filip Gjoka, sipërmarrës: “Nga ikja dhe mungesa e lindjeve, na kanë detyruar të kthejmë sytë te punëtorët e huaj. Kemi 3 vjet me kontingjentin e parë, ka ardhur i dyti dhe i treti dhe po mundohemi t’i ambientojmë me klimën, ushqimin dhe rregullat tona. Është e vetmja zgjidhje që ne të mos humbim kontratat që kemi vite që kemi punuar për t’i lidhur.”

Mungesa e fuqisë punëtore është e ndjeshme në disa sektorë kyç. Ishim në sektorët e akomodimit dhe tani kemi kaluar në fabrikat e agropërpunimit. Gokul, punonjës nga India: “Ne erdhëm 5 njerëz nga India dhe kemi këtu mbi 2 muaj e gjysmë. Pagat për momentin janë më të mira se në Indi.”

20% e forcës punëtore në Shqipëri mbulohet nga të huajt, sipas Agjencisë Kombëtare të Punësimit, ndërsa më shumë lehtësira do të krijohen në kuadrin e ri ligjor për të huajt në vendin tonë në vijim.

Gertiola Hoxha, drejtoreshë e Shërbimit të Punësimit: “Vihet re një trend rritës, por po flasim për Shqipërinë si një vend gjithnjë e më atraktiv. Ka më shumë nevojë për fuqi punëtore, përfshirë edhe forcë të huaj. Sfidat janë mungesa dhe pasaktësia e dokumentacionit të paraqitur nga të huajt, përmbushja e kritereve dhe rritja e kapaciteteve të punonjësve. Po rishqyrtohet ligji për të huajt, i cili ka për qëllim të lehtësojë të drejtat e emigrantëve si dhe mbrojtjen e tyre, aksesin në informacion, në tregun e punës, etj.”

Qeveria planifikon të sjellë në Shqipëri 40 mijë të huaj për të punuar.m.p.

Një aksident i rëndë ka ndodhur mbrëmjen e sotme në aksin rrugor Elbasan – Ish Metalurgji.

Sipas burimeve për media, një automjet ka përplasur një person, i cili po drejtonte një biçikletë në zonën e njohur si ish-qendra tregtare.

Sipas informacioneve paraprake, drejtuesi i biçikletës ka pësuar dëmtime të rënda në kokë dhe se ndodhet në gjendje kritike për jetën.

Sakaq, lidhur me rastin në fjalë pritet reagimi i Policisë së Shtetit për të zbardhur më tepër mbi rrethanat e rastit. m.p.

Kësaj here në zyrën ovale dhe në prani të sekretarit të përgjithshëm të NATO-s, Mark Rutte, kreu i Shtëpisë së Bardhë thotë se ndaloi konfliktin dhe se sekretari i shtetit, Marko Rubio, po punon mbi atë çështje dhe gjithashtu në ndalimin e luftërave të tjera.

“Kemi qenë shumë të suksesshëm në ndalimin e luftrave. Zgjidhëm atë mes Indisë dhe Pakistanit. Kishit Ruandën dhe Kongon që vazhdonte prej 30 vitesh. Meqë ra fjala për Indinë dhe Pakistanin, do të kishte qenë një luftë bërthamore nëse vazhdonte dhe një javë tjetër. Ashtu si po shkonte, po bëhej shumë keq. E ndalëm atë përmes tregtisë. U thashë se nuk do bënim tregti, nëse nuk e zgjidhin këtë. Dhe kështu që ndaluan.

Ruanda dhe Kongo po vazhdon prej 30 vitesh si luftë. Të paktën 7 milionë njerëz u vranë me armë shumë mizore, si hanxharë. Askush nuk u afrohej vendeve. Zgjidhëm çështjen mes Serbisë dhe Kosovës. Ishte një luftë që do të ndodhte. Në atë çështje përdora tregtinë, në fakt e përdor edhe për shumë gjëra. Tregtia është diçka e mirë për të mbyllur luftëra. Ishte me të vërtetë e rëndësishme shumë. Marco po punon fort me të gjithë këtu për paqen”, tha Trump. m.p.

Po e nis me konkluzionin politik: Qeveria nuk duhej të kishte nisur aksionin e buldozerëve në mes të sezonit turistik. Prej disa ditësh, nuk po gjej një arsye logjike pse qeveria e filloi sulmin kundër ndërtimeve të paligjshme në mes të korrikut dhe nuk priti deri në tetor?

Megjithatë, përjashtuar kohën krejtësisht të papërshtatshme, prishja e ndërtimeve pa leje është ligjore, për disa arsye:

1. Sipas nenit 199/a të Kodit Penal, ndërtimet e paligjshme në tokë me destinacion pyjor, bujqësor ose në zona të mbrojtura dënohen me burgim nga një deri në pesë vjet.

2. Ndërtimet pa leje nuk parashkruhen administrativisht, që do të thotë se nuk legalizohen automatikisht pas 10 apo 20 vitesh. Parashkrimi zbatohet vetëm për ndjekjen penale, por jo për objektin. Argumenti “pse IKMT nuk i prishi më parë” nuk është justifikim ligjor për të mos vepruar më vonë.

3. Justifikimi se ndërtime të paligjshme ka në gjithë Shqipërinë është dëshmi e dështimit të shtetit, por jo arsye ligjore për të legalizuar ndërtimet në Theth. Nëse qeveria Rama ka dështuar si ajo e Berishës për të kontrolluar territorin, kjo nuk e legjitimon anarkinë e barakave pa leje.

4. Shumë nga subjektet që kanë ndërtuar në Theth pretendojnë pronësi, por nuk janë njohur ligjërisht si pronarë. Pa një titull pronësie, askush nuk ka të drejtë për ndërtim të përkohshëm apo të përhershëm.

5. Sipas ligjit, IKMT duhet t’u faturojë shpenzimet e prishjes ndërtuesve pa leje. Madje, fillimisht duhet t’i detyrojë që ta prishin vetë ndërtimin (kioskat, kaninat apo bujtinat).

6. Kisha e ndërtuar në shekullin XIX është objekt kulturor dhe historik, që mbrohet nga shteti dhe nuk mund të rrethohet nga baraka, as me bekimin e priftit të fshatit.

7. Ndërtimet turistike nuk mund të fillojnë në Theth pa përfunduar më parë investimet në infrastrukturën bazike: ujë, energji, kanalizime, rrugë, shërbime dhe mbrojtje mjedisore. Hotelet dhe bujtinat ndërtohen në fund, jo në fillim.

8. Shteti duhet tu sigurojë banorve kredi dhe ndihma për rindërtuar sipas një plani bujtinat dhe bizneset e tyre në zonë

Ligji duhet të funksionojë njësoj për Gjirokastrën dhe për Thethin.

Egërsia politike me të cilën mbrohet betonizimi i Thethit është thellësisht provinciale.

Beteja për të mbrojtur “kioskat” pa leje është e humbur 25 vjet më parë kur në Tiranë u prishën 800 “kioska 3-4 katshe” në Parkun Rina dhe buzë Lanës. Kushdo që ka iluzionin se do bjerë qeveria nga protestat e Thethit i ka bërë llogaritë gabim. Shqiptarët lumturohen kur ja prish “kioskën” komshiut.

Sigurisht shteti ka përgjegjësinë që ende s’ka përgatitur një plan dhe kuadër ligjor.

E drejta e pronës është bazike për shoqërinë.

Pa dyshim që banorët e Thethit duhet të kenë prioritet, por atëherë kur të kuptojnë se Thethi është një pasuri kombëtare dhe jo një republikë e pavarur.

Sigurisht që malësorët e Thethit kanë të drejtë të kërkojnë tokat në pronësi e tyre 500 vjeçare, madje edhe leje ndërtimi mbi tokë, por të njëjtën të drejtë kishin edhe tironcit apo qytetarët autokton të cilët kanë 35 vite kërkojnë çlirimin e “tokave të Xanuna” në kryeqytet nga të ardhurit.

Si do ndjeheshin sot ata, nëse tironcit do shkonin t’ia u “zaptonin” tokat që trashëgojnë nga gjyshrit e tyre sipas Kanunit?

Prandaj nëse duan një Theth dhe Shqipëri demokratike, duhet ta ndërtojnë mbi ligjin apo të drejtën e pronës por edhe të bazuar mbi interesin kombëtar dhe publik.

Thethi është zemra Shqipërisë dhe krenaria jonë, por mos e groposni duke e Golemizuar dhe betonizuar më keq se Shkëmbi Kavajë. m.p.

Të tjera detaje kanë dalë në dritë nga ngjarja e ditës së sotme në Vlorë ku një 17-vjeçare tentoi t’i jepte fund jetës duke qëlluar veten me plumb në kokë.

Ngjarja ka ndodhur gjatë një sherri mes adoleshentes dhe babait të saj ndërsa ky i fundit është shoqëruar në komisariat pasi nuk ka bashkëpunuar me policinë.

Sipas raportimeve, familjarët pas ngjarjes kanë fshehur armën dhe gëzhojën ndërsa babait të vajzës i janë marrë faktorët plotësues nga duart për të zbuluar nëse ka qëlluar me armë apo jo.

Ka dyshime të forta se babai e ka shtyrë vajzën e tij drejt vetëvrasjes pas një debati me të. Ai, nuk e pranonte stilin e jetesës së saj.

Aktualisht e mitura ndodhet në Spitalin e Traumës në Tiranë e intubuar ndërsa mësohet se e shoqërojnë gjyshërit e saj. m.p.

Një pallat në qytetin bregdetar të Vlorës është konfiskuar dhe tashmë i ka kaluar shtetit. Konfiskimi vjen në vazhdë të aksionit për lirimin e hapësirave publike dhe prishjen e ndërtimeve pa leje. Report Tv siguroi pamjet nga pallati që u konfiskua, i cili është ende në ndërtim e sipër dhe sipas autoriteteve ka shkelur lejen e ndërtimit.

“Sot do të bëhet një konfiskim i një kuazi pallati në Vlorë që është në shkelje të lejes së ndërtimit, ky proces synon të bashkojë dy gjëra, s’kemi asnjë minutë për të humbur. Kemi marrë përsipër të mbyllim procesin e legalizimeve. Historia ndërto sot se do legalizohet nesër nuk do te eci me”. Sapo Kryeministri Edi Rama dha paralajmërimin në mbledhjen me deputetët e qarkut të Tiranës, menjëherë në Vlorë u shfaq drejtuesja e IKMT-së, Dallëndyshe Bici.

Ajo inspektoi pallatin në ndërtim, nga ku deklaroi se ka shkelur lejen e ndërtimit. Bici, e cila thotë se të gjitha subjektet që kanë shkelur apo do të shkelin lejen e ndërtimit, do të kenë të njëjtin fat, pra konfiskimin.

“Në vazhdën e kontrolleve, ky objekt do të konfiskohet dhe do ti kalojë shtetit për interes publik. Të njëjtin fat do të kenë të gjithë ato subjekte që rezultojnë me leje ndërtimi, por që kanë ndërtuar në shkelje brutale të lejes së ndërtimit duke cenuar interesin publik. Do inspektojmë objektet me apo pa leje ndërtimi”, tha Bici.

Siç shihet në pamjet e siguruara nga Report TV, leja për këtë pallat me 8 kate është dhënë në korrik të 2021, ndërsa aktualisht punimet ishin në katin e dyte. Zhvillues është kompania ‘Armeer Konstruksion’ dhe Fatmir Halla, ndërsa punimet po i zbatonte firma “Stroytech”.

Report Tv ka mësuar se “ARMEER KONSTRUKSION”, një ndër zhvilluesit e pallatit, është në pronësi të Erjon Ahmataj, i cili ka qenë Drejtor i Urbanistikës në Bashkinë Vlorë, kur kjo e fundit drejtohej nga Dritan Leli. m.p.

Drejtuesi i SPAK, Altin Dumani u qëndroi shkaqeve të ankimit ndaj konfirmimit në detyrë të prokurores së Vlorës, Flora Çela duke kërkuar shkarkimin e saj për probleme në kriterin e profesionalizimit dhe në vlerësimin tërësor të çështjes në drejtim të cënimit të besimit të publikut tek drejtësia.

Dumani i filloi bisedimet përfundimtare në këtë çështje lidhur me hetimin e kryer nga prokurorja Çela për 16 tonë cannabis sattiva të kapur në Vlorë në vitin 2017. Ai vërejti se çështja ishte regjistruar për prodhim dhe shitje të narkotikëve, armëmbajtje pa leje dhe pastrim të produkteve të veprës penale.

Sipas Dumanit, sasia e konsiderueshme e drogës, e paketuar dhe gati për transport, sasia e armëve dhe municioneve të sekuestruara, si dhe arrestimi zyrtarëve publikë, tregonte se kishte një organizim të gjerë për mundësimin e trafikimit të 16 tonëve hashash.

Ai theksoi se subjekti dështoi që të shpjegojë gjatë hetimit administrativ dhe në Kolegj, përse nuk e ka transferuar atëherë çështjen në ish-Prokurorinë e Krimeve të Rënda, pasi dukej se bashkëpunimi kishte qenë i posaçëm. Deklarimi i subjektit se Krimet e Rënda atëherë ishin mbyllur, u gjet i pavërtetë. Dumani solli në vëmendje se ish-Prokuroria e Krimeve të Rënda kishte vijuar të ushtronte veprimtarinë edhe dy vjet pas regjistrimit të këtij procedimi të hetuar prej subjektit.

Po ashtu, një DVR e sekuestruar në një lokal, prej nga mund të siguroheshin të dhëna për bashkëpunëtorët dhe organizatorët e sigurimit dhe trafikimit të kësaj lënde narkotike, ishte kqyrur një vit më vonë. Sipas procesverbaleve të mbajtur, është shënuar se nuk funksiononte, ndërkohë që Dumani theksoi se kqyrja duhej të ishte realizuar nga ekspertë.

Edhe gjatë caktimit të masave të sigurisë, sipas Dumanit, subjekti duket se ka zbehur ekzistencën e dyshimit të arsyeshëm, ndërsa nuk ka kryer hetimin pasuror për një prej personave të dyshuar.

Dumani tha se është e provuar se subjekti nuk ka kryer veprimet e duhura hetimore lidhur me sigurimin e sasisë së drogës dhe as për destinacionin.

Ai theksoi se nga ky rast, më së paku nxirren në pah mangësi dhe hetime të dobta të kryera nga ana e subjektit, prej nga është bërë e pamundur të zbardhet i plotë mekanizimi i ngjarjes dhe roli i përgjegjësisë së secilit prej pjesëmarrësve në ato veprime të paligjshme.

Dumani pohoi se subjekti nuk ka arritur të provojë të kundërtën e gjetjeve të hetimit administrativ edhe në disa çështje të tjera të hetuara prej saj. Ai kërkoi që gjetjet të konsiderohen në vlerësimin tërësor.

Në përfundim, drejtuesi i SPAK u shpreh se mangësitë profesionale të konstatuara, e bëjnë të pamundur përmbushjen e kritereve kushtetuese për kualifikimin profesional të prokurores Flora Çela dhe kërkoi shkarkimin e saj nga detyra.

Subjekti i kundërshtoi shkaqet e Dumanit, duke parashtruar intepretim ligjor të kundërt për faktet e konstatuara. Përfaqësuesja e saj ligjore, avokatja Romina Zano paraqiti një analizë ligjore, duke pretenduar se gjetjet nuk mund të sjellin penalizim. Duke sjellë në vëmendje opinionet e Komisionit të Venecias dhe jurispudencën e Gjykatës Kushtetuese, Zano tha se vlerësimi profesional duhet të kryhet bazuar në partimet e objektivitetit dhe proporcionalitetit. Sipas saj, vlerësimi profesional duhet të mbështetet në indikatorë konkretë e të matshëm dhe se çdo konstatim për të metat e subjektit duhet të jetë i arsyetuar mbi akte konkrete.

Zano tha se subjekti mund të konsiderohet i papërshtatshëm, nëse shfaq gjykim të dobët, mosrespektim të të drejtave të palëve në proces, si dhe kur gabimet janë të rënda e të përsëritura.

Prokurorja Flora Çela paraqiti mbrojtjen për çështjet e relatuara nga Dumani. Ajo këmbënguli se në hetimin e 16 tonëve cannabis sattiva ka vepruar në përputhje me Kodin e Procedurës Penale.

Ajo theksoi se nuk ka mohuar tendencën e trafikimit të lëndës narkotike, por nga aktet e administruara nuk ka pasur prova konkrete për një gjë të tillë. Sipas subjektit, pjesa më e madhe e drogës kishte qenë e degraduar dhe nuk mund të tregtohej. Çela pretendoi se nuk ka pasur elementë që të procedonte për grup të strukturuar kriminal. Ajo solli si argument faktin se kur kishte elementë të trafikimit të lëndës narkotike apo të grupit të strukturuar kriminal, atëherë policia e referonte çështjen drejtëpërdrejtë tek ish-Prokuroria e Krimeve të Rënda.

Në vijim, subjekti tha se nuk u arrit të gjendeshin të dhëna për bashkëpunim të posaçëm, pasi të dyshuarit ishin dy persona, ndërkohë që për grup të strukturuar kriminal duhet bashkëpunimi i tre personave.

Lidhur me kqyrjen me vonesë të pajisjes, prej nga mund të siguroheshin të dhëna për persona të tjerë, subjekti tha se pajisjes në fjalë i ishte hequr ‘truri’ dhe nuk kishte mundësi të siguroheshin informacione shtesë. Për këtë arsye, sipas saj nuk është kryer ekspertimi.

Çela deklaroi ndër të tjera se kishte kryer hetime për aq sa kishte pasur prova. Ajo kundërshtoi edhe gjetjet e çështjeve të tjera dhe konstatimin për cënim të besimit të publikut, duke theksuar se nuk gjendej në të tilla kushte. Në përfundim, prokurorja Flora Çela kërkoi lënien në fuqi të vendimit.

Kolegji u tërhoq për marrjen e vendimit që njoftoi se do ta shpallë më datë 25 korrik, në orën 15:30. m.p.

Zëvendëskryeministrja Belinda Balluku ka kërkuar dorëheqjen e të gjithë drejtorëve dhe 13 administratorëve të bashkisë së Lushnjës.

Në një takim të zhvilluar në bashkinë e Lushnjës, zëvendëskryeministrja dhe njëherazi drejtuesja politike e PS ne qarkun e Fierit, u ka kërkuar dorëheqjen drejtorëve në bashkinë e Lushnjës dhe 13 administratorëve.

Burime zyrtare nga kjo bashki sqaruan se ashtu si në bashkinë e Fierit pas dorëheqjes, puna e secilit drejtor dhe administrator do te shqyrtohet nga një komision ku do të vlerësohet performanca e gjithsecilit.

Bazuar në këtë vlerësim do të vendoset nëse drejtuesi do të qëndrojë në detyrë apo do të largohet. Bashkia e Lushnjës ka 15 njësi administrative, por në dy prej tyre vendi i administratorit është vakant.

Në Fier ndërkohë, kanë dhënë dorëheqjen të gjithë administratorët e njësive, që gjithsej janë 14. Gazetarja e ABC News, Valbopna Davidhi raportin se edhe drejtorë të bashkisë dhe drejtorive rajonale gjithashtu kanë dhënë dorëheqjen. m.p.

Bashkia Shkodër ka bërë të ditur zyrtarisht se të gjithë Administratorët e Njësive administrative në territorin e saj kanë paraqitur dorëheqjet nga pozicionet që mbanin deri më tani.

Ky vendim i tyre vjen pas kërkesës së kryeministrit Edi Rama në takimin që pati me drejtuesit e Bashkive pak ditë më parë në Durrës.

Më herët, një vendim të tillë e morën edhe administratorët e Njësive administrative në Bashkinë e Elbasanit. m.p.

Nga Monada Mehmetaj, Strasburg

Në një sallë të ndriçuar të selisë së Këshillit të Bashkimit Evropian në Bruksel, më 14 korrik 2025, u zhvillua një ngjarje me jehonë të veçantë për diplomacinë ndër-rajonale: takimi i parë i Këshillit të Asociimit mes Bashkimit Evropian dhe gjashtë vendeve të Amerikës Qendrore. Ky ishte një moment historik, jo vetëm për përmbajtjen politike dhe ekonomike të diskutimeve, por edhe për frymën që e përshkoi takimin një frymë e ndërtuar mbi sfida të përbashkëta dhe aspirata të ndërsjella për paqe, zhvillim dhe integrim më të thelluar

Një marrëdhënie me rrënjë të hershme, por me ambicie të reja

Marrëdhëniet mes BE-së dhe Amerikës Qendrore nuk janë të reja. Ato shtrihen pas në kohë, që nga dekadat kur Evropa ofronte mbështetje për paqen në rajonin e trazuar të Amerikës Latine. Por sot, për herë të parë, këto marrëdhënie janë të institucionalizuara në kuadër të Marrëveshjes së Asociimit, e cila hyri në fuqi më 1 maj 2024. Kjo marrëveshje shumëdimensionale – që përfshin dialog politik, bashkëpunim dhe tregti është simbol i një qasjeje të re strategjike, ku Evropa kërkon të ndërtojë ura më të forta me partnerë që ndajnë të njëjtat vlera.

Simbolika e pjesëmarrjes së liderëve

Në takim morën pjesë personalitete të nivelit të lartë si Përfaqësuesja e Lartë për Punët e Jashtme e BE-së, Kaja Kallas, dhe Ministri i Jashtëm i Danimarkës, Lars Løkke Rasmussen, që përfaqësonte Presidencën e rradhës të Këshillit të BE-së. Nga ana e Amerikës Qendrore, të pranishëm ishin ministrat e jashtëm dhe zëvendësministrat e gjashtë vendeve: nga Kosta Rika e deri në Panama, përfshirë El Salvadorin, Guatemalën, Hondurasin dhe Nikaraguan. Ky diversitet institucional dhe kulturor solli me vete jo vetëm qëndrime të ndryshme për çështje globale, por edhe një pasuri përvojash që ndihmoi në ndërtimin e një vizioni të përbashkët. Dialogu u zhvillua në një klimë mirëkuptimi dhe respekti, ku u pranua se pavarësisht sfidave të brendshme apo dallimeve gjeopolitike, ekziston një vullnet real për të ndërtuar së bashku.

Gjeopolitika si sfond dhe sfidë

Diskutimet prekën me intensitet realitetin e polarizuar global. Ndërsa konflikti në Ukrainë dhe tensionet në Lindjen e Mesme vazhdojnë të tronditin rendin ndërkombëtar, BE-ja dhe partnerët nga Amerika Qendrore shprehën angazhimin për të mbrojtur parimet e Kartës së Kombeve të Bashkuara, përfshirë sovranitetin, integritetin territorial dhe të drejtat e njeriut. Në një kohë kur shumë rajone të botës po përballen me rritjen e autoritarizmit dhe kërcënime ndaj demokracisë, kjo deklaratë e përbashkët për ruajtjen e rendit ndërkombëtar të bazuar në rregulla ka vlerë të veçantë. Për vende si Guatemala apo El Salvadori, të cilat kanë kaluar tranzicione të dhimbshme nga diktatura në demokraci, angazhimi ndaj multilateralizmit është një përvojë e jetuar dhe jo vetëm një deklaratë diplomatike.

Kriza globale dhe përgjigje të përbashkëta

Ndryshimet klimatike, migrimi, siguria dhe zhvillimi i qëndrueshëm ishin boshtet kryesore të diskutimeve. BE-ja dhe partnerët nga Amerika Qendrore u zotuan të bashkërendojnë përpjekjet për të ndalur degradimin mjedisor, për të ruajtur oqeanet dhe për të forcuar qeverisjen mjedisore ndërkombëtare. Migrimi, sidomos nga Amerika Qendrore drejt SHBA-së dhe Evropës, mbetet një sfidë dramatike për rajonin. Zyrtarët evropianë propozuan qasje të reja për menaxhimin e migrimit përmes mbështetjes për zhvillimin lokal dhe integrimin ekonomik të komuniteteve të brishta. Bashkëpunimi në luftën kundër trafikimit të qenieve njerëzore dhe krimit të organizuar u vlerësua si i domosdoshëm për të frenuar rrënjët e migrimit të detyruar.

Axhenda 2030 si busull zhvillimi

Një tjetër pikë kyçe ishte riafirmimi i angazhimit ndaj Axhendës 2030 për Zhvillim të Qëndrueshëm. Palët u pajtuan që Objektivat e Zhvillimit të Qëndrueshëm (OZHQ) duhet të mbeten në themel të bashkëpunimit të ardhshëm, veçanërisht në fusha si shëndetësia, arsimi, siguria ushqimore dhe energjia. Në mënyrë të veçantë, për vendet e Amerikës Qendrore, përballja me pasojat e ndryshimeve klimatike është emergjente. Përmbytjet ciklike, uraganët dhe thatësirat kanë shkaktuar pasoja shkatërruese në bujqësi dhe infrastrukturë. Në këtë kontekst, përfshirja aktive e BE-së përmes fondeve të qëndrueshme dhe mbështetjes teknike është thelbësore.

Investimet që krijojnë ura: Global Gateway në veprim

Nisma “Global Gateway” e Bashkimit Evropian u prezantua si mekanizëm konkret për të mbështetur zhvillimin ekonomik dhe qëndrueshmërinë institucionale në rajon. Ajo synon të mobilizojë miliarda euro përmes partneritetit publik-privat në fusha strategjike si energjia e pastër, dixhitalizimi, infrastruktura sociale dhe zinxhirët e furnizimit. Për vende me nivel të lartë pabarazie sociale dhe sfida në sektorin publik, siç është Nikaragua ose Honduras, investimet në arsim dhe infrastrukturë do të jenë vendimtare. BE-ja shpreson që përmes kësaj agjende të krijojë alternativa reale ndaj ndikimit ekonomik kinez apo prirjeve autoritare në rajon. Në këtë kuadër, përparësia iu dha zhvillimit të mëtejshëm të Tregut Rajonal të Energjisë Elektrike të Amerikës Qendrore, i cili pritet të krijojë një treg të unifikuar energjetik, më efikas dhe më të qëndrueshëm, që nxit integrimin dhe ul varësinë nga burimet fosile.

Një tregti në lulëzim dhe një potencial ende i pashfrytëzuar

Statistikat tregojnë se bashkëpunimi tregtar mes BE-së dhe Amerikës Qendrore ka përjetuar një rritje të ndjeshme që nga hyrja në fuqi e shtyllës tregtare të marrëveshjes në vitin 2012. Vëllimi i tregtisë është rritur nga 8.7 miliardë euro në 2012 në 22 miliardë euro në 2023. Kjo rritje ka ndodhur pavarësisht krizave të shumta globale, si pandemia apo kriza e zinxhirëve të furnizimit, dhe është dëshmi e rezistencës së këtij partneriteti. Mallrat agro-ushqimore përbëjnë shumicën e eksporteve të rajonit drejt Evropës, duke dëshmuar rëndësinë e sektorit rural dhe traditës bujqësore për ekonomitë lokale. Palët u zotuan të përforcojnë më tej marrëdhëniet tregtare dhe të nxisin diversifikimin e eksporteve me vlerë të shtuar, duke inkurajuar gjithashtu investimet evropiane në industri të qëndrueshme, teknologji të pastër dhe inovacion.

Perspektiva të reja: më shumë kontakte njerëzore dhe shkëmbime

Një nga elementët më të theksuar të deklaratës së përbashkët ishte nevoja për thellimin e kontakteve njerëzore – një formë “diplomacie qytetare” që përfshin shoqërinë civile, sektorin privat, universitetet dhe organizatat e të rinjve. Në këtë drejtim, programet e shkëmbimit akademik, projektet kulturore ndërajonale dhe nismat për të forcuar kapacitetet e sipërmarrjes lokale janë pjesë e planit të zbatimit që do të pasohet nga Komitetet dhe Nënkomitetet e Asociimit. Takimi i radhës i Këshillit të Asociimit do të mbahet në vitin 2027 në njërin nga vendet e Amerikës Qendrore një gjest simbolik që tregon se partneriteti nuk është më një marrëdhënie “veri-jug”, por një dialog i barabartë, me ndikim konkret në të dy anët e Atlantikut.Nga bashkëpunimi teknik në një vizion të përbashkët gjeostrategjik

Takimi i parë i Këshillit të Asociimit BE–Amerika Qendrore nuk ishte thjesht një event protokollar. Ai përfaqëson një vizion të ri të politikës së jashtme të BE-së, që e shikon bashkëpunimin ndër-rajonal si mjet për të përballuar sfidat globale me partnerë të besueshëm. Në një botë të trazuar ku rendi ndërkombëtar sfidohet çdo ditë, dialogje si ky ofrojnë një alternativë të prekshme për diplomacinë bashkëpunuese, zhvillimin e qëndrueshëm dhe ndërtimin e një bote më të ndershme dhe të balancuar. Qëndron tani në dorën e aktorëve institucionalë, por edhe të shoqërive tona, ta mbajmë gjallë këtë frymë të bashkëpunimit nga Brukseli në San Salvador, nga Guatemala City në Strasburg, në një hark solidariteti që shkon përtej kufijve dhe kontinentëve. m.p.

Një tjetër autobus i agjencisë së kryetarit të degës së Partisë Demokratike në Sarandë, Shpëtim Ahmeti, është sekuestruar nga policia pasi është kapur duke transportuar emigrantë të paligjshëm.

Autobusi raportohet se është në pronësi të agjencisë “Ahmeti Travel” ndërsa emigranti i paligjshëm u pikas gjatë kontrollit nga policia. Autobusi i “Ahmeti Travel” u kap në pikën kufitare të Mavromatio të Greqisë duke tentuar ta nxjerrë emigrantin jashtë territorit të vendit fqinj.

Autobusi u sekuestrua nga autoritetet greke, ndërsa të ndaluarit së bashku me dosjen hetimore të përgatitur nga Departamenti i Parë i Rojës Kufitare të Filatit, iu referuan në Prokurorinë e Shkallës së Parë të Thesprotisë.

Kujtojmë se dy muaj më parë, së njëjtës agjenci iu sekuestrua një autobus pasi u kap për të njëjtën çështje, duke transportuar emigrantë të paligjshëm drejt shtetit fqinj. m.p.

Festa madhështore e 18-vjetorit të Lamine Yamal ka sjellë polemika të forta në Spanjë.

Ministria e të Drejtave Sociale i ka kërkuar Prokurorisë, Avokatit të Popullit dhe Zyrës për Luftimin e Krimeve të Urrejtjes të nisin një hetim për të verifikuar nëse gjatë eventit është shkelur ligji që ndalon shfaqjet denigruese ndaj personave me nanizëm.

Janë ngritur dyshime se në festën e ditëlindjes janë përdorur persona me nanizëm në mënyrë denigruese, duke shkelur një ligj që është në fuqi prej gati tre vitesh, teksa fansat e lidhin menjëherë me një episod të “errët” nga seriali i njohur “Game of Thrones”.

Ndërkohë, Shoqata e Personave me Akondroplazi dhe Displazi të Tjera Skeletore me Nanizëm (ADEE), pjesë e konfederatës COCEMFE, ka bërë të ditur se ka paditur Lamine Yamal për punësimin e personave me nanizëm për qëllime argëtimi në festën e tij.

Në deklaratën e tyre zyrtare, organizata shprehet: “Kjo sjellje shkel jo vetëm ligjin, por edhe vlerat etike të një shoqërie që pretendon të jetë e barabartë dhe respektuese ndaj të gjithëve.” m.p.

Gjykata Themelore në Prishtinë i ka shpallur fajtorë dhe i ka dënuar me nga një vit burgim secilin ish-kryeministrin e vendit, Agim Çeku, dhe 9 të akuzuar të tjerë në rigjykimin e rastit “Veteranët”, ndërsa i ka liruar plotësisht nga akuzat dy të tjerë.

Çeku, ish-ministri i Mbrojtjes Rrustem Berisha, ish-deputeti Shkumbin Demalijaj, pastaj Sadik Halitjaha, Qelë Gashi, Shukri Buja, Ahmet Daku, Faik Fazliu, Fadil Shurdhaj dhe Xhavit Jashari u gjetën fajtorë për keqpërdorim të detyrës duke i shkaktuar buxhetit të shtetit dëme në vlerë mbi 88 milionë euro.

Nuredin Lushtaku dhe Smajl Elezaj u shpallën të pafajshëm për akuzat e njëjta.

Gjykatësi Gazmend Bahtiri tha se Nuredin Lushtaku dhe Smajl Elezaj lirohen nga akuza “pasi nuk kanë pasur cilësinë e personit zyrtar”.

Bahtiri shtoi se pas administrimit të provave personale dhe materiale, përtej dyshimit të bazuar mirë, është vërtetuar se të akuzuarit kanë kryer veprën penale, raporton Betimi për Drejtësi.

Ky rast u kthye në rigjykim më vendim të Gjykatës së Apelit në vitin 2022, pasi Gjykata Themelore i kishte liruar nga akuzat që të gjithë 12 të pandehurit në vitin 2021.

Sipas prokurorëve, numri i përfituesve të jashtëligjshëm nga statusi i veteranëve mund të jetë deri në 19 mijë njerëz.

Bahtiri shtoi se Gjykata nuk ka mundur ta identifikojë secilin prej 19 mijë e 500 aplikacioneve për statusin e veteranit, andaj vlerëson se duhet të shqyrtohet procedura përkatëse pastaj të merret vendim se a gëzojnë statusin e veteranit apo jo.

Sipas aktakuzës së përgatitur nga ish-prokurori special, Elez Blakaj, personat e përfshirë thuhet se prej vitit 2011 deri në vitin 2017, duke vepruar si anëtarë të Komisionit Qeveritar për Njohjen dhe Verifikimin e Statusit të Dëshmorit të Kombit, Invalidit, Veteranit, Pjesëtarit dhe të Internuarit të Luftës së Ushtrisë Çlirimtare të Kosovës, shfrytëzuan detyrën dhe autoritetin zyrtar, duke tejkaluar kompetencat me dashje dhe duke mos i përmbushur detyrat zyrtare, me qëllim që të përfitojnë personat e tjerë në mënyrë të kundërligjshme, në vazhdimësi, në dëm të buxhetit të shtetit. m.p.

Presidenti amerikan Donald Trump ka bërë një sërë deklaratash të forta gjatë një takimi në Zyrën Ovale me sekretarin e përgjithshëm të NATO-s, Mark Rutte. Trump paralajmëroi sanksione dytësore 100% ndaj çdo shteti apo kompanie që vazhdon të tregtojë me Rusinë, ndërsa në Kongres po shqyrtohet një projektligj që parashikon sanksione dytësore deri në 500%. Trump kërcënoi me tarifa dytësore 100% kundër Rusisë nëse nuk arrihet asnjë marrëveshje brenda 50 ditëve, duke theksuar se ishte i zhgënjyer nga Vladimir Putin.

Në të njëjtën kohë, Trump konfirmoi se dërgesat e para të sistemeve raketore “Patriot” për Kievin do të nisen brenda pak ditësh, në kuadër të një marrëveshjeje të re të koordinuar me NATO-n për furnizimin e Ukrainës me armë amerikane. Presidenti sqaroi se Shtetet e Bashkuara do t’i prodhojnë armët, por do të jenë vendet europiane ato që do të paguajnë për to.

Trump e bëri të qartë se përfundimi i luftës në Ukrainë mbetet prioritet, duke shtuar: “Kjo nuk është lufta ime, është lufta e Biden-it. Po përpiqem t’ju nxjerr prej saj dhe duam që të marrë fund.” Ai shprehu zhgënjimin ndaj presidentit rus Vladimir Putin, duke thënë se kishte shpresuar për një marrëveshje paqeje që dy muaj më parë, por “kjo nuk ndodhi”.

Për sa i përket të ardhmes së Ukrainës, Trump paralajmëroi se faza e rindërtimit do të jetë sfida e radhës dhe do të kërkojë shumë kohë dhe burime. Ai theksoi se është e nevojshme të përgatitet një plan i koordinuar me aleatët për këtë proces. m.p.

17-vjeçarja e cila u soll e plagosur nga familjarët në spitalin e Vlorës, ka mbërritur në spitalin e Traumës.

Sipas burimeve, 17-vjeçarja është në gjendje të rëndë shëndetësore dhe e intubuar. Policia e Vlorës ka shoqëruar të atin e saj për ta marrë në pyetje lidhur me ngjarjen pasi ka qenë ai i pari që e ka shoqëruar në spital dhe për të mësuar se ku e ka gjetur vajza armën duke mos e lejuar ta shoqërojë atë drejt Tiranës.

Ai është shoqëruar me forcë nga policia pasi ka kundërshtuar duke u thënë se donte të shoqëronte vajzën drejt Tiranës, ndërsa efektivët të komanduar dhe nga Drejtori i Policisë së Vlorës e kanë futur në makinë.

Nga informacione paraprake dyshohet se 17-vjeçarja mund të jetë vetëplagosur, por gjithçka do të konfirmohet nga hetimet e policisë. m.p.

Ish-kryebashkiaku i Shkodrës, Bardh Spahia, ka komentuar në “News24” shembjet e ndërtimeve pa leje në Theth. Spahia tha se kemi të bëjmë me një tentativë të Kryeministrit Edi Rama për të ndëshkuar Shkodrën dhe Thethin pas zgjedhjeve të 11 Majit.

Sipas tij, banorët e Thethit kanë kërkuar leje për të ndërtuar por nuk kanë mundur të aplikojnë. Bardh Spahi shtoi më tej se operacioni i ndërmarrë është i panevojshëm dhe në kulmin e sezonit turistik ka shkaktuar dëm kolosal për banorët.

“Eshtë e trishtë të shikosh se si një fshat si Thethi simbol i turizimit malor dhe jo vetëm për Bashkinë e Shkodrës por edhe të rajonit ta shikosh në këtë sulm barbar që ka treguar e terrorizuar edhe banorët.

Për vetë faktit që është një tentativë e Edi Ramës për të ndëshkuar Thethin dhe Shkodrën pas zgjedhjeve të 11 majit. Ajo që po ndodh në Theth është e turpshme, e trishtë dhe kriminale.

Banorët kanë kërkuar leje për ndërtim por nuk kanë mundur të aplikojnë. Bashkia Shkodër e ka përfshirë edhe Thethin në planin vendor i cili ka përmbushur edhe detyrimet e saj. Plani ka nevojë për detajim edhe për t’i dhënë edhe zhvillimin e duhur të saj.

Kam qënë në kontakt të vazhdueshëm me qytetarët dhe mund të them se ky operacion ishte ndëshkues ndaj Thethit. Eshtë e trishtë të shikosh se shumica e atyre banesave ishin të lehta dhe të ndërtuara pa beton dhe ishte shumë e thjeshtë që të çmontoheshin.

Ky ishte një operacion i panevevojshëm në kulmin e turizmit dhe se është shkaktuar një dëm kolosal edhe për banorët”, përfundoi Spahia. m.p.

Tensioni duhet të jetë ndjerë në ajër në sallën e Hotel Tiranës, ku drejtues të Bashkisë së Tiranës ishin në përballjen e dytë me kryeministrin Edi Rama. Minutat para nisjes së takimit duket të kenë qenë të ndera. Në pritje të sinjalit për transmetimin live të mbledhjes, askush nuk fliste. Një qetësi që prishej nga vështrimi i kryeministrit, që për disa minuta, u vërtit i pashoqëruar nga asnjë fjalë, mbi pjesmarrësit, të ulur si mbi gjemba.

Fillimi i fjalës së Ramës, duket se e zbuti disa situatën. Kryeqyteti zuri pak vend, mes shumë çështjesh që ai ngriti. Mbyllja e fjalimit dhe ndërprerja e transmetimit live, duke kaluar në diskutimin me dyer të mbyllura, riktheu ankthin. Zakonisht kjo është pjesa kur kryeministri shpërthen pa doreza. Për çudi ai nuk e zgjati shumë. Vuri në dukje se ndërsa zgjedhjet e ardhshme për pushtetin vendor janë pas dy vitesh, Tiranës (me kryetarin nën arrest) nuk i dihet fati. Pak më pas, u ngrit duke njoftuar se diskutimet do të vijonin në prani të ministrave, nën drejtimin e zëvendëskryeministres Belinda Balluku.

Një njoftim që duket se riktheu ndjenjën e ankthit. Pavarësisht se si Balluku, dhe zoti Veliaj, kanë hedhur poshtë publikisht ekzistencën e një rivaliteti mes tyre, të gjithë në sallë e kishin të qartë realitetin e fakteve, veçanërisht zyrtarët e lartë të Bashkisë.

Fillimisht drejtuesve të qarqeve ju tha se mund të largoheshin, duke qenë se diskutimet do fokusoheshin vetëm në kryeqytet. Pak para se të dilnin atyre iu kërkua që mbledhje si për bashkinë e Tiranës ata duhet të organizonin dhe në bashkitë e qarqeve të tyre.

Ogerta Manastirliu, një nga drejtueset politike të qarkut të Tiranës, mësohet të ketë folur me terma përgjithësisht të moderuar, duke theksuar se kishte vend për të përmirësuar, shumë nga punët në kryeqytet. Por pas saj Balluku, deklaroi se nuk ishte aq elegante sa kolegia e saj dhe se preferonte të ishte e drejtpërdrejtë. Ajo ka kujtuar përvojat e hershme të saj në Bashkinë e Tiranës, gjë e cila, siç mësohet të jetë shprehur, i mundësonte asaj t’i kuptonte në ajër problemet.

Burimet tregojnë se fjala e saj kishte tone të qarta kritike ndaj ecurisë së shërbimeve, të cilat “nuk mund t’i mungojnë qytetarëve sepse një zyrtar druhet për këtë apo atë arsye”. Ajo ka vënë theksin dhe të një bashkëpunim i munguar mes Bashkisë dhe qeverisë apo institucioneve qendrore, duke sjellë si shembull dixhitalizimin. Për zëvendëskryeministren, e rëndësishme ndër të tjera, është riorganizmi apo dhe forcimi I rolit të Sekretarit të Përgjithshëm.

Nga ana e tij ministri i Financave Petrit Malaj, ka bërë një analizë të situatës financiare, duke vënë në dukje, të ardhurat që më së shumti vijnë nga taksat e ndërtimit, dhe shpenzimet jo fort të balancuara. m.p.