Gazetarja e njohur e televizionit amerikan, Ellen DeGeneres, ka konfirmuar se është larguar nga Shtetet e Bashkuara të Amerikës dhe është vendosur në Mbretërinë e Bashkuar.

Ajo thotë se zhvendosja e saj në Britani ka ardhur për shkak të rizgjedhjes së Donald Trump si President i SHBA.

Bashkë me bashkëshorten e saj, aktoren Portia de Rossi, DeGeneres është shpërngulur në Angli përpara zgjedhjeve presidenciale të nëntorit. Fillimisht, çifti kishte menduar të blinte një shtëpi për qëndrim të përkohshëm, por planet ndryshuan.

“Erdhëm këtu një ditë para zgjedhjeve dhe kur u zgjuam, morëm mesazhe nga miqtë tanë me emoji që qanin. Atëherë kuptuam se ai [Trump] ishte rizgjedhur, dhe thamë ‘do të qëndrojmë këtu”, u shpreh ajo gjatë një paraqitjeje në teatrin Everyman në qytetin Cheltenham, sipas raportimeve të BBC.

Deklaratat e DeGeneres vijnë pak ditë pasi ajo shprehu mbështetje publike për prezantuesen amerikane Rosie O’Donnell, pas kërcënimeve të Trump për të revokuar nënshtetësinë e saj.

Në fjalën e saj para publikut britanik, DeGeneres nuk kurseu vlerësimet për jetesën në Britani të Madhe.

“Është absolutisht e mrekullueshme. Nuk jemi mësuar të shohim këtë lloj bukurie, fshatrat, qytetet, arkitektura, gjithçka është e bukur dhe jeta është më e thjeshtë. Është pastër. Këtu gjithçka është më mire, mënyra si trajtohen kafshët, sjellja e njerëzve. Thjesht e dua këtë vend,” shtoi 67-vjeçarja.

Aktivistja e komunitetit LGBTQ deklaroi gjithashtu se nëse në SHBA do të revokohej ligjshmëria e martesave të të njëjtit seks, ajo dhe De Rossi do të martoheshin sërish në Britani.

“Të jesh homoseksual në Hollywood është ende problem. Njerëzit kanë ende frikë”, tha ajo. m.p.

Paul Pogba, i cili së fundmi iu bashkua Monacos, zbuloi se do të dëshironte që Dembele të fitonte Topin e Artë 2025.

“Unë e mbështes absolutisht Dembouz,” tha Pogba, duke iu referuar nofkës së Dembele.

“Ai fitoi Champions, shënoi gola të rëndësishëm… ai ishte vendimtar gjatë gjithë sezonit. Nëse nuk e fiton këtë vit, nuk do ta fitojë kurrë më”- tha Pogba. m.p.

Adriatik Lapaj po sillet si pronar, jo si kryetar. Kur një drejtues politik i një lëvizjeje qytetare nis të sillet si padron i votave, i mandateve dhe i fatit të bashkëpunëtorëve, projekti shndërrohet nga një mision publik në një biznes personal.

Lapaj u ngjit në skenë si simbol i ndryshimit, si njeriu që vinte për të sfiduar politikën e vjetër me një model të ri të udhëheqjes. Por më pak se dy muaj pas zgjedhjeve, e gjithë filozofia e bashkëpunimit u zëvendësua me logjikën e “këtu komandoj unë”. Pra, “Unë mund të mos e mbaj fjalën dhe ju nuk mund të reagoni.”

Habi e madhe. Në vend që të shihte veten si kapiten të një ekuipazhi idealistësh që rrezikonin së bashku, Lapaj e ktheu veten në administrator dhe partinë si e  pasuri private që shpërndahet sipas rregullave të tij. Ndaj, kur ai flet për mandatin si pronë personale, nuk tradhton vetëm marrëveshjen me Endri Shabanin, por tradhton çdo qytetar që besoi se kjo lëvizje do të sillte një mënyrë të re të të bërit politikë.

Së dyti, mosmbajtja e fjalës së dhënë tregon papjekuri politike dhe një prioritet të qartë për interesin personal, jo për kauzën. Lapaj mund të justifikohet me sistemin zgjedhor, me votat e preferencës, me kalkulimet e listës,  por asgjë nga këto nuk justifikon thyerjen e një premtimi publik të bërë para qytetarëve dhe para ekipit të tij privatësisht.

Fjala është më e fortë se çdo ligj elektoral, sepse politika është marrëdhënie besimi, jo vetëm numrash. Dhe kur një lider vendos ta thyejë këtë besim për të ruajtur një karrige, ai i dërgon një mesazh të qartë publikut: “Unë jam si gjithë të tjerët”. Siç do të thoshte Konfuci, “Burri i madh kërkon tek vetja, i vogli kërkon fajin tek të tjerët.” Lapaj, në vend që të shihte tek vetja mungesën e karakterit për të mbajtur fjalën, po kërkon fajin herë tek të tjerët, herë tek sistemi, herë tek daja e Shabanit, herë tek rrethanat.

Churchill do ta kishte përmbledhur më thjeshtë: “Politikani sheh zgjedhjet e ardhshme, burri i shtetit sheh gjeneratat e ardhshme.” Por për fat të keq, Lapaj s’po sheh asnjerën, por vetëm po na rrëzon iluzionin që “të rinjtë janë ndryshe”.

Së treti, asnjë analizë! A e ka menduar ndonjëherë Lapaj, dëmin që i ka shkaktuar koalicionit si drejtues pas përplasjes me Agron Shehajn? Po kostot për akuzat ndaj vjerrit ish-kryegjyqtar?

Pse nuk ka analizë kritike por vetëm marrje totale meritash, kur pa votat e aleatëve nuk merrte dot as atë mandat që morën? Nga ana tjetër, Endri Shabani është bashkëfajtor  poashtu. Së pari përmes tolerancës së tij të gjatë dhe mirëkuptimit naiv ndaj Lapajt.

Ai ishte njeriu që duhej ta vendoste kufirin që në fillim, kur Lapaj filloi të sjellë retorikën e pushtetit personal, mentalitetin e komandës së vetme dhe braktisjen e fjalës së dhënë.  Lapaj e emëruan në krye me të gjitha benefitet, por ai sërish nuk mori asnjë përgjegjësi, por  do sërish benefitin e deputetit.

Por Shabani preferoi të heshtë, të durojë, të bëjë atë që shumë herë i ka dënuar vetë në publik,  kompromisin e dëmshëm për “mosprishje muhabeti në publik”.

Së dyti, Shabani duhet ta kishte mbrojtur kauzën, lëvizjen dhe besimin e votuesve, duke vendosur kufij me partnerin e tij politik dhe duke treguar se kauza nuk është dekor për ambiciet personale të askujt. Të jesh lider nuk do të thotë të ruash paqen me çdo kusht, por të ruash dinjitetin dhe frymën për të cilën je angazhuar. Atë që bëri Zeqiri duhet ta bëntë Shabani.

Si përfundim, kjo përplasje nuk është thjesht një sherr për mandate, as një grindje karakteresh. Është shembulli klasik se si edhe njerëzit që erdhën me flamurin e idealizmit, sapo përballen me pushtetin, tregojnë se janë të gatshëm ta trajtojnë atë si pasuri personale. Dhe për këtë, siç do të thoshte John Adams, “Pushteti gjithmonë shfaq fytyrën e tij më të shëmtuar tek ata që e kapin fort.”

Adriatik Lapaj e kapi fort  dhe zbuloi qëllimin e tij primar, që është karriera e tij në Kuvend. Shabani nuk u tregua mjaftueshëm i shpejtë dhe i guximshëm ta ndalojë. Zeqiri u dha një mësim të dyve!/e.t

Ashtu siç ministri i Mbrojtjes, Pirro Vengu paralajmëroi, pasi vizitoi në spital tre zjarrfikës që po trajtohen me ndihmë mjekësore pasi u asfiksuan në luftë me flakët në Dukat, Shqipëria ka aktivizuar Mekanizmin Europian të Mbrojtjes Civile.

Në kuadër të kësaj kërkese të bërë nga Shqipëria për ndihmë, 2 avionë Canadair kanë mbërritur në vendin tonë nga Greqia, me shtetin helen që bëhet i pari që na vjen në ndihmë në luftën për shuarjen e flakëve.

Dy avionët Canadair e ardhur nga Greqia janë aktivizuar menjëherë në vatrën e zjarrit që prej tre ditësh është aktive në Dukat, duke u bërë pjesë e operacionit për ndaljen e flakëve që rrezikojnë edhe Parkun Kombëtar të Llogorasë./e.t

Në zonën e Tushemishtit, në Pogradec, policia kufitare i ka ardhur në ndihmë dy turistëve hollandezë, babë e bijë, pasi kishin dalë në liqen me kanoe dhe kishin kërkuar ndihmën e policisë pasi ishin bllokuar.

Turistët kanë patur probleme me lëvizjen e tyre në liqen, ndërsa mësohet se janë në gjendje shumë të mirë shëndetësore dhe po dërgohen drejt hotelit ku do të kalojnë disa ditë pushimi në Pogradec.

Policia kufitare vazhdon çdo ditë monitorimin në gjithë zonën e Pogradecit, me qëllim parandalimin e ngjarjeve të ndryshme që mund të ndodhin në ujërat e liqenit të Pogradecit./e.t

Një koncert i planifikuar në Itali nga dirigjenti i njohur rus Valery Gergiev, i njohur për lidhjet e tij të ngushta me presidentin Vladimir Putin, është anuluar pas protestave të gjera publike.

Gergiev, një mbështetës i hapur i Putinit, kishte planifikuar të drejtonte një orkestër lokale më 27 korrik në festivalin muzikor “Un’Estate da Re”, që mbahet në Reggia di Caserta, një pallat historik pranë Napolit dhe një nga vendet e trashëgimisë botërore të UNESCO-s. Menaxheri i pallatit njoftoi të hënën, përmes një deklarate të shkurtër, se performanca ishte anuluar.

Ky do të ishte koncerti i parë i Gergiev në Evropë që prej fillimit të pushtimit të plotë rus në Ukrainë në shkurt të vitit 2022. Performanca ishte mbështetur nga Vincenzo De Luca, presidenti rajonal i Kampanjes nga krahu i majtë, ndërsa autoritetet rajonale ishin organizatorët dhe financuesit e festivalit – një nga ngjarjet kulturore më të rëndësishme të verës në Italinë jugore.

Anulimi vjen pas një peticioni të nënshkruar nga mbi 16,000 persona – përfshirë laureatë të Çmimit Nobel, politikanë dhe aktivistë – drejtuar De Lucës dhe presidentes së Komisionit Evropian, Ursula von der Leyen, ku bëhej thirrje për anulimin e koncertit.

Yulia Navalnaya, e veja e opozitarit rus Alexei Navalny, i cili vdiq vitin e kaluar në një burg në Arktik, kritikoi ashpër koncertin përmes një artikulli në La Repubblica. Ajo e cilësoi performancën si “një dhuratë për diktatorin” dhe përshkroi Gergiev si jo vetëm “mik të dashur” të Putinit, por edhe “promovues” të politikave të tij kriminale.

Ngjarja shkaktoi përplasje politike mes De Lucës dhe ministrit italian të kulturës, Alessandro Giuli. “Arti është i lirë dhe nuk mund të censurohet,” tha Giuli për agjencinë Ansa. “Megjithatë, propaganda, edhe kur shfaqet me talent, është diçka tjetër.”

Vendimi për anulim u mirëprit nga kritikët. Zëvendëspresidentja e Parlamentit Evropian, Pina Picierno, një nga nënshkrueset e peticionit, shkroi në rrjetet sociale: “Ne shpjeguam, luftuam dhe fituam!” m.p.

Barcelona mund të detyrohet të shtyjë regjistrimin e Joan Garcias, pasi Marc-Andre Ter Stegen po shqyrton mundësinë e një operacioni për një dëmtim në shpinë.

Klubi katalanas është në pritje të një vendimi të rëndësishëm mjekësor nga kapiteni i skuadrës, i cili mund të ndikojë drejtpërdrejt në aktivitetin e merkatos.

Portieri gjerman vazhdon të vuajë nga probleme të përsëritura në pjesën e poshtme të shpinës dhe mund t’i nënshtrohet një tjetër ndërhyrjeje kirurgjikale, që do ta mbante jashtë fushave për deri në katër muaj.

33-vjeçari i është nënshtruar një operacioni të ngjashëm në dhjetor të vitit 2023 dhe nuk ka marrë pjesë në stërvitjet parasezonale. Ai pritet të mungojë në turin e Barcelonës në Japoni dhe Kore të Jugut. m.p.

Aktorja legjendare, Eileen Fulton, e njohur për rolin e saj ikonik në serialin “As the World Turns”, ka ndërruar jetë në moshën 91-vjeçare.

Fulton u nda nga jeta më 14 korrik në vendlindjen e saj, Asheville, Karolina e Veriut, pas një periudhe shëndetësore të përkeqësuar, sipas njoftimit nga “Groce Funeral Home”.

E lindur si Margaret Elizabeth McLarty më 13 shtator 1933, ajo u rrit në një familje modeste, me babanë predikues metodist dhe nënën mësuese./e.t

Eileen do të mbahet mend si një nga figurat më të dashura të televizionit amerikan.

Puna për shuarjen e zjarrit në malin e Dukatit, që digjet prej tre ditësh, nuk ka qenë aspak e lehtë për tre zjarrfikës të Bashkisë së Vlorës, të cilët janë asfiksuar nga tymi gjatë operacionit. Të tre zjarrfikësit janë transportuar për në spital, ku po trajtohen me ndihmë mjekësore.

Efektivët e Forcave Zjarrfikëse janë vizituar në spital edhe nga ministri i Mbrojtjes, Pirro Vengu, i cili për mediat tha se gjendja e tyre është e stabilizuar.

“Të tre efektivët kanë ndjerë disa shqetësime në rrugët e frymëmarrjes, kanë marrë ndihmën e menjëhershme janë transportuar nga Forcat e Armatosura dhe në Orikum kanë marrë ndihmën e parë. Më pas janë transportuar në Urgjencën e Spitalit të Vlorës, ku tashmë gjendja është e stabilizuar”, bëri me dije ministri Vengu.

Ndërkohë, në rrjetin social Facebook, Vengu shkruan: “Mirënjohje për Luanin, Dëfrimin, Andrean, të gjithë zjarrfikësit dhe efektivët e FARSH, si dhe çdo strukturë e individ të angazhuar në parandalimin dhe luftën kundër zjarreve, kudo në Shqipëri”./e.t

Kryeministri Edi Rama deklaroi në mbledhjen me të gjithë deputetët e Tiranës dhe drejtuesit e bashkive se do të ketë zero tolerancë për ndërtimet pa leje.

Kreu i qeverisë theksoi se nëse do të konstatohen raste kur tejkalohet 2 për qind e hapësirës për të cilën është marrë leja e ndërtimit, do të sekuestrohet nga shteti i gjithë objekti.

Edi Rama u shpreh se objekte të tilla që do sekuestrohen, do të përdoren për të strehuar njerëzit në nevojë dhe për arsye të tjera publike.

Sakaq, Rama i tërhoqi veshin deputetëve duke thënë se ka pasur raste që janë bërë ndërhyrje në momentin e fundit në ligjet që lidhen me ndërtimin, duke favorizuar në këtë mënyrë ndërtuesit.

“Do adresojmë problematikën e sigurimit të ndërtimeve, sigurim në funksion të marrëveshjes me shtetin për lejen e ndërtimit, marrëveshjet me blerësit për apartamentet e banimit. Po diskutojmë edhe për një garanci bankare për të gjithë ata që marrin leje ndërtimi.

E drejta për të zhvilluar me të cilën është abuzuar, duhet të adresohet si një e drejtë dhe detyrim për të qenë transparent dhe konform ligjit. Nga ana tjetër, do të marrim masa për të konfiskuar në interes të publikut të gjitha ndërtimet e braktisura, ngrehinat e braktisura që nga vitet 90, që qëndrojnë si karikatina dhe që kanë edhe problematika të natyrës mjedisore dhe të shëndetit të njerëzve.

Dua të sqaroj aspektin me të cilin kanë luajtur njerëzit e sitemit të drejtësisë, që kanë mbajtur anën e shkelësve të ligjit në ndërtime. Kur vjen puna e shkeljeve në lejet e ndërtimit me mbi 2 për qind të kufijve të lejes, përqindje e arsyeshme që përdoret dhe në botë, gjatë realizimit të projektit ka devijime, kur kapërcehet kjo, provokon sekuestrimin e menjëhershëm të të gjithë ndërtimit.

Paligjshmëria është e plotë sepse shkelja në ndërtim dhe ndërtimi i kateve shtesë për qëllim fitimi, nuk bëhen në një moment, por me muaj dhe me vite. Shkelje në vazhdimësi me vetëdije e ligjit. Kjo do sjellë kalimin e pronës në duart e shtetit që do mbrojë blerësit aty ku do ketë blerës dhe nga ana tjetër, pjesa tjetër përdoret për interes publik dhe strehim të atyre në nevojë.

Kemi një problem të madh dhe të patolerueshëm që është toleruar nga të gjitha bashkitë për kantieret e ndërtimit, kantiere që s’kanë respekt për ata që i rrethojnë, mjedisin, hapësirën apo sigurinë.

Kantiere që s’janë kantiere. Ndotje e patolerueshme dhe për këtë arsye do bëhet një ndërhyrje kuptimplotë në raport me kantieret e ndërtimit se çfarë kriteresh duhet të përmbushë një kantier ndërtimi.

Një sport tjetër që zhvillohet në Tiranë dhe bregdet, ata ndërtues që marrin një leje por ende pa u zbardhur leja, pa marrë dokumentin duke plotësuar nevojat e ligjit, kuturisen të hapin gropa me demek që po bëjnë gati kantierin.

Përdorin një nen për punime paraprake që kanë prodhuar pallate pa leje. Edhe për këtë masat që do marrim do jenë drastike. Kemi menduar për gjithçka por çuditërisht është lënë jashtë që në mënyrë të përsëritur në Kuvendin e Shqipërisë ka pasur prej shumë vitesh ndërhyrje në sekondën e fundit në ligjet që kanë të bëjnë me ndërtimet dhe territorin, në favor të ndërtuesve.

Do të procedojmë më pas në vijim paralelisht me krijimin e Agjencisë Kombëtare të Planifikimeve të Zhvillimit dhe me përfaqësi në çdo rajon, që do të thotë se bashkitë do ta kenë më të lehtë sa i përket planifikimit, gjë që do të lehtësojë një pjesë të madhe të bashkive të vogla dhe për të krijuar një bazë të re ndërveprimi mes komunitetit, investitorëve, zhvilluesve, pushtetit vendor dhe shtetit në tërësi. Kjo do na japë mundësinë që të kemi burime njerëzore shumë më cilësore në territor.”-tha Rama. m.p.

Ndërsa Apple i ka marrë gjërat me ngadalë dhe është përshtatur me idenë e lansimit të një iPhone të palosshëm shtatë vjet me vonesë, Trump po lëviz me shpejtësi marramendëse në sektorin e teknologjisë, edhe pse kjo nuk është fusha e tij.

Trump njoftoi së fundmi një telefon dhe madje edhe një rrjet pa tel

Iphone Fold, ose sido që të quhet, nuk pritet të ketë ndonjë veçori inovative.

E vetmja gjë emocionuese në lidhje me iPhone-in e palosshëm do të ishte se ai paloset, shkruajnë mediat e huaja.

Dhe ndërsa kjo mund të jetë e mjaftueshme për përdoruesit e iOS, disa prej të cilëve janë aq të thellë në ekosistemin e Apple saqë ideja e daljes jashtë është e paimagjinueshme, nuk do të jetë e mjaftueshme për përdoruesit neutralë.

Besnikëritë mund të ndryshojnë brenda sekondave, siç duket se ka ndodhur me një kompani të caktuar veturash në SHBA.

Trump nuk ka frikë të japë gjithçka, edhe nëse rezultati i mundshëm është dështimi.

Telefoni T1 nuk ka asnjë shans kundër telefonave më të mirë të sotëm, por ai ende ekziston.

Nga ana tjetër, Cook ka adoptuar një qasje të qetë kohët e fundit.

Dhe kjo nuk po ndihmon. /e.t

“Kemi arritur një akord së bashku dhe mandatin do ta marrë zonja Xhuveli e listës së mbyllur”.

Ky është mesazhi që ka dhënë sot për mediat Endrit Shabani, aktor i koalicionit “Nisma Shqipëria Bëhet” në zgjedhjet e 11 majit. Ky mesazh i tij ishte i befasishëm dhe vështirë të besohet, sepse e kundërta duket në kampin tjetër.

“Shqipëria Bëhet” sot ka reaguar duke i kërkuar KQZ-së që të respektojë dorëheqjet e kandidatëve të listës së mbyllur, të cilët kanë qenë emra thjesht fiktivë.

Të kundërtën thotë Endri Shabani. Duket se ai nuk ka biseduar me partinë aleate dhe, madje, nuk ka ndjekur as lajmet e ditës.

Vera ka ardhur dhe bashkë me të vjen edhe nevoja për të ngrënë ushqime freskuese, dhe mënyra më e mirë për ta bërë këtë është duke konsumuar një nga ushqimet më hidratuese të sezonit – shalqirin.

Megjithatë, pavarësisht shumë përfitimeve të tij, konsumimi i shalqirit në sasi të mëdha mund të jetë i dëmshëm për trupin tuaj.

Ky ushqim i shijshëm përbëhet nga afërsisht 92 përqind ujë. Jo vetëm që ka shije të shkëlqyer, por ka edhe shumë përfitime shëndetësore. Nuk përmban yndyrë dhe është një burim i shkëlqyer i vitaminave A, B6 dhe C, kaliumit dhe komponimeve të dobishme si likopeni dhe citrulina.

Përmbajtja e fibrave që përmban shalqiri e bën atë një frut të mrekullueshëm për humbjen e peshës. Është i njohur për të gjitha anët e mira, por çfarë të keqe mund të ketë konsumimi i tij në sasi të mëdha?

Mund të shkaktojë diarre dhe probleme të tjera të tretjes

Shalqiri është një burim i shkëlqyer uji dhe një burim po aq i mirë i fibrave dietike. Megjithatë, konsumimi i tij në sasi të mëdha mund të shkaktojë probleme me tretjen, siç janë diarreja, fryrja, gazrat, gazrat dhe të ngjashme.

Fruti përmban sorbitol, një përbërës sheqeri i njohur për shkaktimin e jashtëqitjeve të lirshme dhe problemeve me gazrat. Një tjetër shkak i zakonshëm i problemeve të tilla është përmbajtja e tij e likopenit, një antioksidant i pigmentuar që i jep shalqirit ngjyrën e tij të ndritshme.

Mund të rrisë nivelet e glukozës

Nëse vuani nga diabeti, ekziston mundësia që konsumimi i tepërt i shalqirit të rrisë nivelin e sheqerit në gjak. Mund të jetë i shëndetshëm, por ka një indeks të lartë glicemik (72). Prandaj, konsultohuni gjithmonë me mjekun tuaj përpara se ta konsumoni çdo ditë.

Mund të rrisë rrezikun e zhvillimit të inflamacionit të mëlçisë

Njerëzit që pinë rregullisht alkool duhet të shmangin sasitë e mëdha të shalqirit sepse nivelet e larta të likopenit mund të reagojnë me alkoolin, duke shkaktuar më tej inflamacion të mëlçisë. Stresi i tepërt oksidativ në mëlçi mund të jetë i dëmshëm.

Mbihidratim

Intoksikimi nga uji ose mbihidratimi është një gjendje ku trupi juaj ka ujë të tepërt, gjë që çon në humbje të natriumit. Konsumimi i sasive të mëdha të shalqirit mund të rrisë nivelet e ujit në trupin tonë.

Nëse uji i tepërt nuk nxirret jashtë, kjo mund të çojë në një rritje të vëllimit të gjakut, gjë që shkakton më tej ënjtje të këmbëve, lodhje, veshka të dobëta… Gjithashtu mund të çojë në një humbje të niveleve të natriumit në trup.

Probleme kardiovaskulare

Shalqiri njihet si një burim i shkëlqyer i kaliumit, një lëndë ushqyese jetësore që luan role të shumta në ruajtjen e shëndetit të trupit. Ndihmon në ruajtjen e funksionit të elektroliteve, e mban zemrën tonë të shëndetshme dhe forcon kockat dhe muskujt tanë. Megjithatë, shumë kalium mund të çojë në probleme kardiovaskulare, të tilla si rrahje të çrregullta të zemrës dhe puls të dobët./e.t

Epitetet e zgjedhura nuk janë ato të leksikut diplomatik. “Një i çmendur”, “një fëmijë që nuk di si të sillet”, “ai bombardon gjithçka vazhdimisht”.

Këto janë fjalët e disa zyrtarëve të Shtëpisë së Bardhë mbi vendimet e fundit të Benjamin Netanyahut në lidhje me luftërat, të raportuara nga gazeta Axios.

Shqetësimi në “Shtëpinë e Bardhë” është, mbi të gjitha, për pasojat. “Këto plane mund të minojnë atë që Trump po përpiqet të arrijë në Damask dhe në Lindjen e Mesme, sigurisht”, mendojnë zyrtarët pranë Presidentit amerikan.

Asnjë deklaratë zyrtare, por murmurima që duket se tregojnë një krisje në boshtin SHBA-Izrael.

Të martën, forcat izraelite goditën trupat e Damaskut që po përparonin drejt qytetit të Sweidës, duke iu përgjigjur përleshjeve të dhunshme midis fiseve druze dhe beduine të armatosura, të cilat kanë vrarë më shumë se 700 njerëz, sipas Observatorit Sirian për të Drejtat e Njeriut.

Me një vazhdimësi të shpejtë, sulmet arritën në kryeqytetin sirian, ku forcat ajrore të Netanyahut hodhën gjithashtu bomba në pallatin presidencial.

Por ditët e fundit, lista e sulmeve është zgjeruar. Përveç operacioneve në dukje të pafundme në Rripin e Gazës, njerëzit e Uashingtonit janë irrituar nga vrasja e shtetasit palestinezo-amerikan Saif Musallet nga një turmë kolonësh dhe raketa izraelite që shpërtheu çatinë e Familjes së Shenjtë, famullisë së vetme katolike në Gaza, duke vrarë tre persona. Këtu, një zyrtar tjetër i tha Axios se ndjesia është se “diçka e re po ndodh çdo ditë”.

Ndërsa Trump zgjedh të heshtë publikisht, ai privatisht telefonon aleatin e tij dhe kërkon falje përmes mikrofonave për bombardimin e vendit fetar. Netanyahu pranon. Komentet e vetme zyrtare përtej Atlantikut vijnë nga Karoline Leavitt, zëdhënësja e Shtëpisë së Bardhë, e cila thjesht u thotë gazetarëve se “reagimi i Trump ndaj bastisjes në kishë nuk ka qenë pozitiv”.

Edhe pse të paidentifikuar, zërat e raportuar nga Axios zbulojnë një lloj intolerance nga Trump. Dikush pyet veten nëse frustrimi që zien midis zyrtarëve të Uashingtonit pasqyron edhe mendimet e të parit të Zyrës Ovale. Sigurisht që nuk do të ishte hera e parë që acarimi është rritur për shkak të vendimeve të qeverisë së Netanyahut, e cila, thonë ata, “duket se është e gatshme të shtypë këmbëzën”.

Muajin e kaluar, pas një sulmi të IDF-së në Teheran në prag të armëpushimit të brishtë me Iranin, në një nga deklaratat e tij të tërbuara, Trump akuzoi “mikun e tij” për rrezikimin e armëpushimit.

Tensionet u rritën nga bombardimet në Siri, të cilat “e kapën Shtëpinë e Bardhë në befasi”. “Presidentit nuk i pëlqen të ndezë televizorin dhe të shohë bomba të hedhura në një vend ku ai po kërkon paqe dhe ka bërë një njoftim monumental për të ndihmuar në rindërtim”, tha një zyrtar.

Dhe Trumpit nuk i pëlqen as të dëgjojë ankesa nga Arabia Saudite, Turqia dhe vendet e tjera në rajon me të cilat po punon për të forcuar dhe normalizuar marrëdhëniet, pikërisht me Izraelin.

Zyrtarët i thonë Axios se ndjenja është se: “Agjenda politike e Bibit po ndikon në logjikën e tij të shëndoshë dhe ky do të jetë një gabim serioz për të në planin afatgjatë”. m.p.

Për shkak të situatës problematike të zjarrit në Dukat të Vlorës, Shqipëria ka aktivizuar Mekanizmin Europian të Mbrojtjes Civile, duke kërkuan ndihmën e BE-së.

Lajmin e ka bërë të ditur ministri i Mbrojtjes, Pirro Vengu, pasi vizitoi në Spitalin e Vlorës tre zjarrfikësit që pësuan lëndime, të cilët fatmirësisht janë në gjendje të mirë.

Avionët zjarrfikës të BE-së në ndihmë të Shqipërisë pritet të mbërrijnë gjatë orëve në vijim.

Ministri ka paralajmëruar gjithashtu se temperaturat e larta do të arrijnë kulmin të enjten dhe të premten.

“Janë ditë që do të vijojnë të jenë të vështira përsa i përket luftës kundër zjarreve, sidomos në zonat malore dhe pyjore. Kemi mobilizuar Mekanizmin Europian të Mbrojtjes Civile në mënyrë që në ditët në vijim dhe orët në vijim të kemi mbështetje dhe nga vendet partnere. Do jenë ditë me temperatura shumë të larta, me maksimumin të enjten dhe të premten, sipas parashikimeve të meteorologjisë ushtarake, ndaj në mbarë territorin jemi në gatishmëri të plotë. Do vijojmë në orët e mbrëmjes të bëjmë një raport situates përsa i përket dislokimit të të gjitha forcave këto ditët ku parashikohet piku i temperaturave të larta, të jemi në gatishmëri maksimale”, u shpreh ministri Vengu.

Zjarri në Dukat të Vlorës ka marrë përmasa të mëdha dhe rrezikon seriozisht Parkun Kombëtar të Llogarasë.

Vatra, që u riaktivizua 2 ditë më parë, u shfaq fillimisht para rreth 10 ditësh dhe për shkak të terrenit të vështirë malorë, ndërhyrja e zjarrfikësve mbetet sfidë.

Për këtë arsye, është aktivizuar disa herë nga ajri helikopteri i ushtrisë./e.t

Pas largimit të Toni Kroos, Real Madrid ka kuptuar se i duhet një mesfushor i ngjashëm me gjermanin. Ky rol vështirë të mbulohet nga një lojtar tjetër në Madrid.

Emri më i dëshiruar i trajnerit Xabi Alonso është Rodri. Kontrata e tij aktuale te City skadon në qershor 2027 dhe bisedimet për rinovim nuk kanë vijuar me sukses. Të paktën, deri tani.

Plani B i madrilenëve është Nicolò Barella i Interit. AS raporton se mesfushori italian është lojtar i përshtatshëm për skemat e Alonsos dhe pëlqehet shumë në Madrid. m.p.

Një valë e fortë dhe e zgjatur e të nxehtit pritet të prekë rajonin e Ballkanit në ditët e ardhshme, duke arritur kulmin midis 21 dhe 26 korrikut 2025. Temperaturat maksimale do të kalojnë +8 deri në +10°C mbi vlerën mesatare të periudhës 1991-2020 në shumë zona të Ballkanit, përfshirë edhe Shqipërinë.

Zonat më të nxehta do të jenë Shqipëria, Greqia, Maqedonia e Veriut, Bullgaria, Italia jugore dhe Turqia perëndimore, ku temperatura maksimale pritet të arrijë ose madje të tejkalojë 42-44°C, nivele që tejkalojnë rekordet e viteve të mëparshme. Fenomeni vjen si pasojë e masave të forta të ajrit të ngrohtë nga Afrika e Veriut drejt Mesdheut lindor, ndërsa masat e ajrit të ftohtë lëvizin drejt Evropës perëndimore.

Në këtë pesëvjeçar të fundit, në krahasim me periudhën 30-vjeçare 1960-1990, temperaturat kanë qenë më të larta me 1-2 gradë, duke treguar një rritje të temperaturave mesatare. Vërehet gjithashtu një rritje e ekstremeve absolute, si të temperaturave maksimale ashtu edhe të temperave minimale. Nëse i referohemi periudhës së verës së pesëvjeçarit që lamë pas, jemi 3-5 gradë më lart në temperaturë krahasuar me periudhën 30-vjeçare.

Anomalitë më të theksuara në vitet e fundit i kanë shënuar vlerat e temperaturave maksimale të ajrit. Në figurën Nr. 2, janë paraqitur devijimeve që kanë shënuar vlerat mesatare të temperaturave maksimale të ajrit përgjatë 8 viteve të fundit, ku qartë dallohen viti 2024 me një anomali prej +5.8°C.

Njëkohësisht edhe temperaturat mesatare të vlerave minimale gjatë muajit korrik janë karakterizuar me anomali pozitive (paraqitur në figurën Nr. 3), të cilat mesatarisht kanë qenë në nivelin e +2.0°C, ku viti i fundit shënon edhe anomalinë më të lartë me +3.0°C.

Vetëm dy javë më parë Evropa Jugore dhe Ballkani, përfshirë rajonet përreth Shqipërisë, regjistruan vlera të “stresit të nxehtësisë” shumë të fortë, me ndjesi termike që tejkaluan 38°C. Shqipëria u prek ndjeshëm nga ky fenomen ekstrem. Temperaturat maksimale ditore në shumë qytete, si Tirana, Durrësi, Elbasani dhe Gjirokastra, gjatë kësaj vale tejkaluan vlerat 39–40°C, duke kulmuar më 7 korrik, që rezultoi dita më e nxehtë.

Ndikimet priten të jenë të rëndësishme:

Presion mbi rrjetet e energjisë për shkak të kërkesës së shtuar për ftohje.
Ndikime në bujqësi dhe mjedis natyror, me rrezik të shtuar të zjarreve.
Pemët punojnë në heshtje për planetin
Por sa ndryshim bëjnë pemët? Studimet tregojnë se temperatura në zonat urbane mund të ndryshojë nga 8-11° midis lagjeve më të nxehta dhe më të ftohta dhe shumica e këtij ndryshimi është për shkak të ndryshimeve në mbulesën e pemëve dhe hapësirën e gjelbër. Ndërsa valët e të nxehtit bëhen më të shpeshta dhe intensive, një rritje prej 8° mund të jetë ndryshimi midis jetës dhe vdekjes. Sëmundjet e lidhura me nxehtësinë si goditja e nxehtësisë dhe dehidrimi paraqesin një kërcënim serioz për popullatat e cenueshme si të moshuarit dhe fëmijët.

Natyra mund të jetë aleati ynë për t’i ndihmuar njerëzit të përshtaten me një klimë gjithnjë e më jomikpritëse. Ne duhet të rimendojmë se si i zhvillojmë qytetet tona dhe mjedisin e ku kemi ndërtuar. Kjo nuk ka të bëjë vetëm me mbjelljen e më shumë pemëve, por me integrimin e zgjidhjeve të bazuara në natyrë në planifikimin tonë urban.

Ky proces përfshin disa hapa të dukshëm, si krijimi i më shumë parqeve dhe kopshteve të komunitetit, por gjithashtu përfshin metoda novatore si çatitë dhe muret e gjelbërta. Këto struktura, të cilat janë pjesërisht ose plotësisht të mbuluara me bimësi, ofrojnë disa përfitime: ndihmojnë në filtrimin e ndotësve, përmirësojnë izolimin e ndërtesave, ulin kostot e energjisë./E.T

Eksperti rus Aleksander Gabuev, drejtor i Qendrës Carnegie për Rusinë dhe Euroazinë në Berlin, analizon për revistën gjermane DER SPIEGEL ndryshimin e retorikës së Donald Trump ndaj Vlladimir Putinit dhe pasojat për luftën në Ukrainë.

Sipas Aleksander Gabuev, Donald Trump ka ndërruar tonin ndaj Vlladimir Putinit, duke e quajtur retorikën e tij “budallallëk” (“bullshit”) dhe është treguar më pak i gatshëm të përsërisë argumentet e Kremlinit për luftën. Gabuev i tha revistës gjermane DER SPIEGEL se kjo lidhet me frustrimin e Trumpit ndaj kërkesave ekstreme dhe kokëfortësisë së Putinit. Trump ishte i gatshëm të pranonte de fakto pushtimin rus të disa territoreve ukrainase, por refuzoi të ndërpriste ndihmën ushtarake për Ukrainën – një kusht thelbësor për Putinin, i cili dëshiron kontroll të plotë mbi Ukrainën.

Sipas Gabuev, Trump nuk e kupton motivimin imperialist të Putinit. Për Trumpin, lufta është një konflikt që mund të zgjidhet me një “marrëveshje të mirë” (“deal”). Por për Putinin, synimi është nënshtrimi i Ukrainës. Gabuev e përshkruan Trumpin dhe ndërmjetësin e tij Steve Witkoff si njerëz pa përvojë në politikën ndërkombëtare. Putini i ka refuzuar propozimet e Trumpit, gjë që ky i fundit e ka interpretuar si fyerje.

Trump admiroi Putinin për “forcën” e tij dhe shpresonte ta përdorte Rusinë si kundërpeshë ndaj Kinës. Po ashtu, qëndrimi negativ i Trumpit ndaj presidentit ukrainas Vollodimir Zelenski dhe Ukrainës ka luajtur rol. Gabuev thekson se Trump është përpjekur të afrohet personalisht me Putinin, por ky është shumë më kokëfortë nga sa Trump kishte parashikuar.

Së fundmi Trump ka lejuar që vendet evropiane të blejnë armë amerikane për Ukrainën – një ndryshim nga qëndrimi i mëparshëm refuzues. Gabuev e sheh këtë si një qasje cinike dhe të orientuar drejt biznesit. Ai thekson paqartësinë rreth sasisë dhe llojit të armëve të premtuara (për shembull sistemet Patriot). Në çdo rast, Moska nuk pret që këto ndihma të ndryshojnë balancën në terren.

Putini nuk frikësohet nga tarifat ndëshkuese me të cilat është kërcënuar Trumpi, pasi eksportet ruse drejt SHBA janë minimale dhe të pazëvendësueshme në disa sektorë (si plehrat dhe platini). Kremlini nuk beson se SHBA do të zbatojë me të vërtetë tarifa ndaj vendeve që tregtojnë me Rusinë.

Sipas Aleksander Gabuev strategjia e Kremlinit ndaj Trumpit përmban tri plane.

Plani A: Trump pranon kërkesat e Putinit dhe ua imponon Ukrainës dhe Evropës.

Plani B: Trump nuk i pranon, por redukton ndjeshëm angazhimin e SHBA në luftë.

Plani C: SHBA rikthehet në politikën e epokës së Bidenit.

Sipas Gabuev, tani jemi diku mes planit B dhe C. Ministri i Jashtëm rus Sergei Lavrov dhe të tjerë kanë qenë gjithmonë skeptikë ndaj Trumpit, duke kujtuar se gjatë mandatit të parë ai nuk solli përmirësim real në marrëdhëniet SHBA-Rusi.

Përpjekjet diplomatike të liderëve evropianë si Mark Rutte, Alexander Stubb, Keir Starmer, Emmanuel Macron dhe Friedrich Merz kanë luajtur rol në frenimin e afërsisë Trump-Putin. Megjithatë, zhgënjimi personal i Trumpit nga Putini ka qenë vendimtar.

Aleksander Gabuev paralajmëron se nëse SHBA nxit Ukrainën të sulmojë thellë në territorin rus, Putini mund të reagojë me masa më të ashpra – më shumë sulme ndaj qyteteve ukrainase, furnizim të rebelëve huthi në Jemen me armë për të goditur interesat amerikane në Detin e Kuq apo edhe sulme kundër ambasadave perëndimore në Kiev. Gabuev thekson se këto skenare janë ende hipotetike, por të mundshme në rast përshkallëzimi.

Gabuev e përshkruan luftën si një konflikt rraskapitës në të cilin Putini beson se koha është në anën e tij. Gabuev mendon se vetëm kur ushtria ruse të përballet me humbje masive dhe ngërç, Putini do të jetë i gatshëm të negociojë seriozisht – një situatë që Gabuev e krahason me luftën Iran-Irak. Sipas tij, ky moment nuk do të vijë para vitit 2026.

Gabuev theksoi se Putini nuk është i impresionuar nga Trump dhe ka përgatitur skenarë për çdo sjellje të tij. Ndihma perëndimore për Ukrainën është ende e pamjaftueshme për të thyer vendosmërinë ruse, por ka një ndikim. E ardhmja e luftës varet nga mobilizimi ukrainas, mbështetja e qëndrueshme nga Perëndimi dhe qëndrueshmëria e vetë Trumpit, i cili mbetet një protagonist i paparashikueshëm. m.p.

Kryeministri Edi Rama do të mbajë sot një mbledhje në kryeqytet me të gjithë deputetët e zgjedhur të qarkut të Tiranës si dhe me të gjithë drejtuesit e Bashkisë vendore.

Siç është thënë  dhe më parë, kryeministri u ka kërkuar të gjithë deputetëve të zgjedhur të Tiranës që të jenë sa më aktiv në terren dhe me takimet e tyre me qytetarët, me qëllim diktimin e problematikave të përditshme dhe hartimin e një bilanci.

Takimi i ditës së sotme do të shërbejë për shpalosjen e problematikave të qytetarëve të kryeqytetit nga deputetët, si dhe bashkërendimin e një plani pune të mirëfilltë për dhënien zgjidhje të këtyre problematikave. Takimi do të mbahet në orën 18:30 në një prej hoteleve të kryeqytetit./E.T

Barcelona duhet të largojë disa lojtarë për të mundësuar regjistrimin e blerjeve të reja, si për shembull huazimi i anglezit Markus Rashford.

Alex Valle, Ansu Fati dhe Pablo Torre janë larguar, por Hansi Flick ka ende disa emra në “listën e zezë”.

Dihet tashmë se largimi i lojtarëve si Marc-Andre Ter Stegen dhe Andreas Christensen do të sillte më shumë të ardhura, por ata po refuzojnë.

Pau Victor duket se ka pranuar, i vetëdijshëm se nuk ka vend titullari në Barcelonë. Valencia ka shprehur interes për lojtarin dhe ka nisur bisedimet e para me drejtorin sportiv Deco.

23-vjeçari pritet të zyrtarizohet në Mestalla brenda muajit korrik.