Një dekadë pasi deputetët votuan për të mbajtur referendumin që çoi në largimin e Britanisë nga Bashkimi Evropian, një sondazh ka treguar se shumica në katër shtetet më të mëdha anëtare të BE-së do të mbështesnin rikthimin e Mbretërisë së Bashkuar – por jo me të njëjtat kushte që kishte më parë.

Sondazhi i realizuar nga YouGov në gjashtë vende të Evropës Perëndimore, përfshirë edhe Britaninë, konfirmon gjithashtu se një shumicë e qartë e votuesve britanikë tani mbështesin rikthimin në bllok – por vetëm nëse mund të ruajnë përjashtimet që kishin më parë.

Sipas sondazhit, kjo përbën një “ngërç të opinionit publik”, edhe pse aktualisht duket shumë e pamundur që qeveria laburiste e Mbretërisë së Bashkuar – e cila këtë vit negocioi një “riformatim” të marrëdhënieve me BE-në – të tentojë një rikthim në BE sipas The Guardian.

Sondazhi EuroTrack i YouGov tregoi se të paktën gjysma e të pyeturve në katër vendet më të mëdha të BE-së – Francë, Gjermani, Itali dhe Spanjë – mbështesnin lejimin e Britanisë për t’u ribashkuar me BE-në. Përqindjet varionin nga 51% në Itali, 53% në Francë, 60% në Spanjë dhe 63% në Gjermani.

Por kur u pyetën nëse Britanisë duhet t’i lejohet të rikthehet me të njëjtat kushte që kishte kur doli – përfshirë jo-përdorimin e euros dhe qëndrimin jashtë zonës Shengen – shifrat ndryshuan ndjeshëm.

Vetëm rreth një e pesta e të anketuarve në katër vendet më të mëdha të BE-së – nga 19% në Itali dhe Francë, në 21% në Spanjë dhe 22% në Gjermani – mendonin se Britania duhet të lejohet të rikthehet me ato kushte, ndërsa 58-62% thonin se ajo duhet të jetë pjesë e të gjitha fushave kryesore të politikave të BE-së.

Sondazhi gjithashtu testoi qëndrimet duke pyetur nëse, nëse Britania do të pranonte të rikthehej vetëm nëse mund të ruante përjashtimet e mëparshme, a duhej t’i lejohej kjo. Disa (33-36%) mendonin se kjo do të ishte e pranueshme, por më shumë (41-52%) ishin kundër.

Në Britani, ndërkohë që 54% e britanikëve mbështesnin ribashkimin me BE-në kur pyetja u bë në mënyrë të përgjithshme, kjo shifër ra në vetëm 36% nëse ribashkimi nënkuptonte heqjen dorë nga përjashtimet e mëparshme. Në këto kushte, 45% e britanikëve ishin kundër rikthimit.

Sondazhi tregoi se votuesit që kishin votuar për të qëndruar dhe ata që mbështesin partitë më pro-BE-së do ta mbështesnin ende rikthimin, edhe nëse kjo nënkuptonte pranimin e euros dhe pjesëmarrjen në zonën Shengen – por me përqindje shumë më të ulëta.

Pothuajse 60% e votuesve pro-qëndrimit në BE thanë se do ta mbështesnin rikthimin pa përjashtimet e mëparshme – një rënie prej rreth 25 pikësh nga pyetja e përgjithshme. Po ashtu, 58% e votuesve të Partisë Laburiste (-23 pikë) dhe 49% e Liberal Demokratëve (-31 pikë) do ta mbështesnin.

Ndërsa votuesit euroskeptikë që ishin të gatshëm të mbështesnin rikthimin pa trajtimin e veçantë të mëparshëm, pothuajse u përgjysmuan: nga 21% në 10% mes votuesve që kishin votuar për të dalë nga BE-ja; nga 25% në 12% mes votuesve konservatorë; dhe nga 15% në 9% mes mbështetësve të partisë Reform UK.

Danimarka, vendi i pestë i anketuar në Evropë kontinentale, rezultoi si përjashtim. Atje, 72% e të anketuarve ishin shumë të gatshëm për rikthimin e Britanisë në BE, dhe ishin më entuziastë se vendet më të mëdha për t’i lejuar Britanisë mbajtjen e përjashtimeve të mëparshme (43%).

Danimarka është një nga vetëm tre vendet anëtare të BE-së që ka përjashtime nga politikat kryesore të BE-së. Sondazhi zbuloi gjithashtu se shumica të mëdha në të pesë vendet kontinentale (nga 63% në 75%) do të mbështesnin anëtarësimin e një Skocie të pavarur në BE.

Sondazhi u krye mbi mostra përfaqësuese me më shumë se 2,000 të rritur në Mbretërinë e Bashkuar dhe Gjermani, si dhe më shumë se 1,000 në Danimarkë, Francë, Itali dhe Spanjë, gjatë periudhës 12-27 qershor. m.p.

Vera shton festat e bashkë me to dhe konsumin e alkoolit. Abuzimi me sasinë dhe përziera me substanca narkotike ka shtuar dhe helmimet.

Mjekët në shërbimin e Toksikologjisë në Qendrën Spitalore “Nënë Tereza” në Tiranë thonë se janë në fluksin e punës.

“Me rritjen e temperaturave kanë filluar të rriten dhe rastet toksikologjike. Më shumë intoksikacione nga alkooli, së bashku dhe substancat e tjera. Rritet sasia e konsumimit të alkoolit gjithashtu dhe kombinimi me substanca të tjera, lëndë narkotike. Alkooli varjon nga birra, vera dhe kokteilet e ndryshme, të gjitha llojet”, tha mjekja Matilda Kambo.

Pacientët më të shpeshtë që kërkojnë ndihmën e mjekëve toksikologë janë djem dhe vajza, kryesisht të rinj. Më shumë gjatë fundjavës. Disa prej tyre paraqiten dhe në gjendje të rëndë shëndetësore.

“Në përgjithësi gjatë fundjavës rastet dhe rriten për shkak dhe të festave që ndodhin dhe në sezonin veror. Raste që vijnë në urgjencë, por duke përmendur këtu dhe rastet që hospitalizohen për shkak të varësive të ndryshme”, shtoi Matilda Kambo.

Mund të vijnë dhe në koma alkoolike. Pra niveli i alkoolit është aq i lartë sa pacienti fillon dhe humbet koshiencën. Duhet të marrë terapi dhe të dalë nga gjendja. Kryesisht janë të rinj, variojnë moshat 20, 25, 30, 35 vjeç.

Ndërkohë që këto kohë temperaturash të larta alkooli mund të bëhet shkak për helmime të rënda mjekët rendisin dhe të tjera dëmesh që vijnë prej tij.

“Alkooli është drogë si të gjithë drogërat e tjera dhe alkooli dëmton. Dëmton organizmin, dëmton zemrën, dëmton trurin, na plak, demenca e alkoolit, alkooli nuk ka freskon, alkooli na dehidron dhe na sëmur”, përfundoi mjekja.

Të shumtë kanë qenë dhe turistët të cilët për shkak të teprimit me alkoolin kanë kërkuar ndihmë pranë urgjencës në Qendrën Spitalore Universitare në Tiranë. m.p.

Një ndër qytetet për të cilat kryeministri Edi Rama nuk kurseu kritikat ishte qyteti bregdetar i Vlorës.

Përpos kërkesës për dorëheqje të drejtorëve të Bashkisë së Vlorës, Rama i “tërhoqi veshin” kryebashkiakut të këtij institucioni, Ermal Dredhës duke i kërkuar që menjëherë të “çlirohen” hapësirat publike të cilat janë zaptuar nga bizneset.

Së fundmi ka qenë vetë Dredha i cili ka postuar një foto nga qyteti i Vlorës ku dhe ka treguar se puna nuk po ndalet.

“Vazot me pemë e lule, kishin zënë gjysmën e hapësirës publike në të gjithë zonën historike të qytetit”, shkruan Dredha krah fotos ku shihen disa vazo me lule. m.p.

Një cikël të lashtë sa vetë koha. Por kur Hëna e Plotë e korrikut ngjitet në qiellin veror, ajo nuk është vetëm një disk i shndritshëm mbi horizont – ajo mban me vete një emër poetik, të trashëguar nga kohët kur njeriu orientonte jetën dhe shpresat sipas ritmeve të natyrës: Hëna e Drerit (Buck Moon).

Por çfarë e bën të veçantë këtë Hënë të korrikut? Dhe çfarë lidhje kanë drerët me yjësitë dhe brigjet e hënës?

Prej natyrës në qiell: origjina e emrit “Buck Moon”

Emri “Hëna e Drerit” ka rrënjë të thella në traditat e popujve indigjenë të Amerikës së Veriut dhe më vonë u përvetësua nga kolonët anglo-saksonë që i dhanë formë kalendarëve të hershëm bujqësorë. Sipas vëzhgimeve të tyre sezonale, muaji korrik ishte koha kur drerët meshkuj – të quajtur “bucks” – fillonin të rritnin brirët e rinj, një proces natyror i përsëritur çdo vit.

Brirët e drerëve, që bien në dimër dhe rriten sërish në verë, ishin simbol i fuqisë, ripërtëritjes dhe ciklit të jetës për këto popullsi. Dhe si për të lidhur tokën me qiellin, ata e emërtuan hënën e parë të plotë të korrikut sipas këtij procesi natyror të njohur dhe domethënës: Hëna e Drerit.

Një lidhje më shumë simbolike se shkencore

Nga pikëpamja astronomike, kjo hënë nuk ka ndonjë karakteristikë të veçantë – ajo është thjesht një hënë e plotë si çdo muaj tjetër. Por emri që i është dhënë nuk është aspak rastësor: ai reflekton një mënyrë të të jetuarit dhe të vëzhguarit të natyrës, ku gjithçka që ndodhte mbi tokë, në pyje e fusha, gjen pasqyrim në qiellin e natës.

Emërtimi “Buck Moon” u bë më i njohur në epokën moderne falë “Farmer’s Almanac”, një botim i njohur amerikan i themeluar në shekullin XIX, që kombinon kalendarin bujqësor me vëzhgime natyrore, parashikime moti dhe këshilla praktike për jetën në fshat. Këto emra të hënave të plota – si “Hëna e Lules” (maj), “Hëna e Korrjes” (shtator), “Hëna e Gjakut” (tetor) apo “Hëna e Ujit të Zi” (janar) – nuk janë shkencorë, por janë pjesë e një trashëgimie kulturore që lidh njeriun me stinët dhe me kohën e natyrshme.

Sot, këta emra shërbejnë më shumë si kujtesa poetike e një kohe kur njerëzit jetonin më pranë ritmeve të tokës – një lloj kalendari emocional dhe kulturor që plotëson datat zyrtare të astronomëve.

Një spektakël që na bashkon nën të njëjtin qiell

Në natën kur “Hëna e Drerit” del plot mbi kështjellat mesjetare të Abruzzos në Itali, siç e fotografoi Luca Di Cola më 11 korrik 2025, natyra duket se rikthehet në format e saj të thjeshta dhe madhështore. Nuk ka nevojë për teleskop apo instrumente shkencore për ta përjetuar: një shikim nga dritarja, një heshtje në pyll, një ecje buzë detit janë të mjaftueshme për të ndjerë fuqinë e saj simbolike.

Edhe pse emri “Hëna e Drerit” nuk i shton asgjë ciklit hënor, ai i shton një dimension njerëzor: dëshira për të kuptuar kohën, për të ndalur për një çast dhe për të vëzhguar. Në fund të fundit, edhe emrat që i japim hënës flasin më shumë për ne se për vetë hënën.

Përgatiti: L.Veizi

Në brigjet e lumit Buna, në një zonë të qetë të fshatit Dajç të Shkodrës, ndodhet një plazh i vogël, kthyer tashmë në atraksion të ri për turistët. Vite më parë, kjo zonë njihte vetëm banorët vendas. Sot, turistë nga vende të ndryshme të botes vijnë për të shijuar këtë perlë të natyrës.

“Jam nga Malta dhe është hera e dytë që vij këtu. Miqtë e mi shqiptarë më sugjeruan këtë vend. Më pëlqen shumë natyra dhe temperaturat, që janë më të përshtatshme sesa në vendin tim, sidomos në muajin korrik. Do të qëndroj dy javë këtu dhe më pas do të eksploroj më shumë veriun e Shqipërisë. E rekomandoj shumë se është një vend fantastik me njerëz mikpritës dhe ushqim të shkëlqyer”, tha një turist.

Ky plazh, i fshehur mes gjelbërimit ofron qetësi dhe freski, larg plazheve të mbipopulluara dhe të zhurmshme.

Ndërsa për banorët e zonës, është një kthim nostalgjik në kohën kur noti në lumin Buna, ishte pjese e pandare e verës.

Në këtë zonë të bukur, ku lumi Buna me ujërat e kristaltë dhe gjelbërimin e dendur përreth krijojnë një mundësi të shkëlqyer për arratisje në natyrë. m.p.

Para Kishës simbol të Thethit, u mblodh sot Kuvendi i Burrave, një traditë e lashtë e kësaj zone të malësisë së Shqipërisë, për të shprehur shqetësimin lidhur me aksionin e IKMT-së për shembjen e objekteve të ndërtuara pa leje, që po vijon prej një jave.

Të ulur këmbëkryq përballë Kishës dhe në praninë e priftit Pader Kastriot Demaj, banorët e Thethit ngritën zërin në mbrojtje të shtëpive dhe bujtinave të tyre, të cilat i konsiderojnë pjesë të trashëgimisë dhe përpjekjes shumëvjeçare për zhvillimin e turizmit vendas.

“Këto kulla i kemi mbrojtur me gjak”, ishte thirrja në një zë e banorëve, teksa i kërkojnë qeverisë të ndalë aksionin dhe t’i hapë rrugë dialogut.

Komuniteti lokal thekson se nuk është kundër ligjit, por kërkon një zgjidhje të qëndrueshme dhe të drejtë për ndërtesat dhe sipërmarrjet e tyre.

Përmes këtij kuvendi simbolik, banorët kërkuan më shumë informacion dhe qartësi për mënyrat ligjore se si mund të legalizojnë ndërtimet dhe të bëhen pjesë e “Paketës së Maleve”, për të cilën qeveria pretendon se do t’i japë një hov të ri zhvillimit të turizmit malor.

“Jemi për paqe dhe jo për shkatërrim”, theksoi njëri prej përfaqësuesve të komunitetit. m.p.

Real Madridi i ka vënë syrin Alexis Mac Allister për të forcuar mesfushën e tij përpara sezonit 2025-2026.

Mesfushori argjentinas, aktualisht te Liverpooli, ka provuar veten të jetë një lojtar i plotë, duke zotëruar vizion, aftësi për të fituar topin dhe aftësinë për të vrapuar në zonë – cilësi që e bënë atë vendimtar për suksesin e Reds sezonin e kaluar.

Pas largimit të Luka Modric, Real Madridi po kërkon një lojtar që mund të ofrojë jo vetëm cilësi, por edhe lidership në mesfushë.

Mac Allister, nën kontratë me Liverpoolin deri në vitin 2028, duket të jetë kandidati ideal. Por klubi anglez ka vendosur një çmim të lartë për të: rreth 100 milionë euro.

Një shifër që Real Madridi e konsideron të lartë dhe mund të ndërlikojë negociatat.

Megjithatë, për momentin, Mac Allister duket i lumtur te Liverpooli dhe nuk ka treguar shenja se dëshiron të largohet nga Anglia. m.p.

Kryeministri Edi Rama do të mbledhë nesër deputetët e Tiranës dhe drejtuesit e bashkisë në një mbledhje të dytë pas asaj të zhvilluar 10 ditë më parë për shqetësimet e qytetarëve.

Mbledhja do të zhvillohet në orën 8.30 në një prej hoteleve në kryeqytet, ndërsa kryeministri do të njihet me problematikat që kanë qytetarët.

Gjatë kësaj kohe deputetët kanë zbritur në terren për t’u njohur me problematikat e qytetarëve dhe do t’i raportojnë ato tek kreu i qeverisë.

Më 4 korrik në një takim që zhvilloi me deputetët e Tiranës Rama u ka kërkuar atyre për dy javë, të evidentojnë problematikat e qytetit përmes kontakteve të drejtpërdrejta me qytetarët. m.p.

Operatori i Shpërndarjes së Energjisë Elektrike njofton se do t’i bashkohet institucioneve në aksionin kundër ndërtimeve pa leje.

Në një njoftim për mediat OSHEE, bën me dije se nuk do të lejojë asnjë lidhje të re me rrjetin elektrik për ndërtimet që nuk përmbushin kriteret ligjore.

“Vëmendje e veçantë do t’u kushtohet kërkesave për lidhje të reja, me qëllim që të shmangen çdo përpjekje për të anashkaluar ligjin”, citohet në njoftim.

Ky institucion zotohet se nuk do të pranojë jo vetëm kërkesat për lidhje me energji elektrike të ndërtesave pa leje ndërtimi por edhe te ato godina që nuk kanë zbatuar kushtet e lejes ndërtimit. m.p.

13 korrik 1923

Në një mëngjes të mjegullt korriku mbi kodrat e Los Anxhelosit, një shkrim i madh dhe i bardhë nisi të shfaqej mbi horizontin e qytetit që ende kërkonte identitetin e vet si kryeqyteti i kinemasë botërore. “HOLLYWOODLAND”, i gdhendur me shkronja gjigande 14 metra të larta, u vendos aty jo si simbol i yjeve të famshëm, por si reklamë për një lagje të re banimi – një projekt ndërtimi që synonte të tërhiqte klasën e mesme amerikane në rritje drejt luksit suburban.

Më 13 korrik 1923, shenja u përurua zyrtarisht, me drita elektrike që e ndriçonin natën, dhe u mendua të ishte e përkohshme – për një periudhë rreth 18 muajsh. Por ajo mbijetoi dekadat dhe shndërrohet në simbolin më të njohur të ëndrrës amerikane.

Nga reklamë ndërtimi në ikonë të kinemasë

Pas përfundimit të projektit urbanistik, pjesa e dytë e fjalës – “LAND” – u bë e panevojshme dhe u hoq gjatë një restaurimi të plotë në vitin 1949. Kështu mbeti “HOLLYWOOD”, si një emër që tashmë lidhej ngushtësisht me industrinë e filmit, jo me ndërtime.

Shenjat e mëdha të bardha u bënë pjesë e identitetit vizual të qytetit – jo vetëm si simbol i kinemasë, por si prekje iluzive e famës dhe dritave të mëdha. Në vitet 1970, pasi ishte degraduar nga koha, ajo u restaurua plotësisht falë kontributit të figurave publike si Hugh Hefner, Alice Cooper dhe Gene Autry, të cilët sponsorizuan ndërtimin e shkronjave të reja.

Një hije tragjike mbi shkronjën “H”

Por nën këtë dritë të ndritshme, fshihet edhe një njollë tragjike. Në vitin 1932, një aktore e re britanike, Millicent Lilian “Peg” Entwistle, vetëm 24 vjeç, hodhi veten nga shkronja “H”, pasi humbi shpresën për një karrierë në Hollivud. Ironikisht, një letër që mbërriti pas vdekjes së saj i ofronte një rol në një film ku personazhi do të përfundonte jetën në mënyrë tragjike – një rast ku jeta dhe arti u përplasën dhimbshëm.

Sot: më shumë se një shenjë

Shenja “HOLLYWOOD” qëndron edhe sot si një nga simbolet më të fotografuara në botë, e mbrojtur si monument historik. Ajo është më shumë se gërma të mëdha mbi kodër – është një portë imagjinare drejt famës, një ikonë që për shumë artistë mbetet pikënisje e ëndrrës, por edhe e zhgënjimit.

Përgatiti: L.Veizi

Rrjeta e hedhur nga autoritetet gjermane të drejtësisë, për gjetjen e pasurive të një 44-vjeçari shqiptar të akuzuar për trafik droge, ka kapur një vilë dhe një mjet luksoz “Lamborgini” Aventador në bregdetin e Palasës në Shqipëri.

Me kërkesë të SPAK, Gjykata e Posaçme ka vënë nën sekuestro dy pasuri të Visar Miftarit, pas dyshimeve se janë krijuar në burime kriminale. Gjuetia e pasurive të 44 vjeçarit me shtetësi gjermane në Shqipëri nisi në mars të këtij viti, pas një kërkesë nga autoritetet gjermane të drejtësisë.

Në kohën e dërgimit të kërkesës Visar Miftari, ndodhej i ndaluar në një institucion korrektues në Frankfurt. Ai dyshohej nga shteti gjerman për tregtim të kokainës dhe kanabisit në sasi jo të vogla, si anëtar i një bande, veprimtari e kryer gjatë pesë viteve të fundit. Sipas vendimit për sekuestro të gjykatës gjermane të Darmstadt, 44-vjeçari dyshohej se kishte përfituar nga tregtimi i drogës të paktën 11.2 milionë euro.

Hetimi i SPAK në Shqipëri zbuloi se në vitin 2022, i dyshuari kishte blerë një vilë në vlerën e 260 mijë eurove në një rezidencë luksoze në Palasë. Shuma e parave për blerjen e vilës dy katëshe, me sipërfaqe të katit të parë 72 m2 dhe një sipërfaqe parcele prej 362 m2, ka kaluar përmes një transferte bankare nga Gjermania në Shqipëri.

Në informacionin e dërguar nga pala gjermane për SPAK është cituar se tek vila në Palasë ndodhet një automjet Lamborgini Aventador, si modeli në këtë foto, që i përket shtetasit Visar Miftari. Duke arsyetuar se të dy pasuritë dyshohet se janë krijuar nga aktivitetit kriminal i 44-vjeçarit në shtetin gjerman, Gjykata e Posaçme pranoi kërkesën e SPAK për vendosjen e tyre nën masën e “sekuestros preventive”.

Në të njëjtin vendim, përveç ngrirjes së dy pasurive, GJKKO ia ngarkoi Agjencisë së Administrimit të Pasurive të Sekuestruara administrimin dhe përdorimin e tyre. m.p.

Redinel Korfuzi, një ish-analist i tregjeve financiare pranë firmës së menaxhimit të aseteve “Janus Henderson”, në Britaninë e Madhe është dënuar me gjashtë vjet burg pasi akuzohej për përdorim të informacioneve të brendshme për përfitime monetare dhe pastrim parash.

Pas një ndjekjeje penale të profilit të lartë nga Autoriteti i Sjelljes Financiare në Mbretërinë e Bashkuar (FCA), rezultoi se 38-vjeçari shqiptar kishte abuzuar me pozicionin e tij në kompani duke aksesuar informacion konfidencial dhe sensitiv për tregun, të cilin më pas e ndau me motrën e tij, Oerta Korfuzi.

Së bashku me të motrën 35-vjeçare, Korfuzi ka përfituar nga tregtimi aksioneve 1 milion stërlina. Edhe Oerta Korfuzi u shpall fajtore dhe u dënua me pesë vjet burg nga autoritetet britanike, pas një gjyqi 18-javor në Gjykatën e Kurorës në Southwark.

Sipas FCA-së, Korfuzi përdori rolin e tij për të parë email-e nga kompani që kërkonin interes investitorësh për rritje kapitali apo shitje të mëdha aksionesh. Brenda pak minutash nga marrja e informacionit, ai tregtonte në aksionet përkatëse përmes disa llogarive tregtare, përfshirë ato të operuara nga motra e tij.

Në periudhën dhjetor 2019 deri mars 2021, vëlla e motër nga Shqipëria tregtuan në 13 kompani dhe gjeneruan përfitime mbi 960,000 paund.

Modeli i dyshimtë i tregtisë shtyu FCA-në të niste hetime, ku analizuan sasi të mëdha të dhënash për të zbuluar skemën. Ata u arrestuan në mars 2021, me mbështetje nga Policia Metropolitane e Londrës.

Rasti zbuloi gjithashtu një operacion ndërkombëtar pastrimi parash, që përfshinte 173 depozita nga Mbretëria e Bashkuar drejt Shqipërisë. Gjatë një kontrolli, autoritetet gjetën gati 25,000 paund në një kuti sigurie në Knightsbridge. m.p.

Policia e Tiranës ka vënë në pranga një 19-vjeçar, përgjegjës për aksidentin tragjik që ndodhi ditën e djeshmë në autostradën Tiranë–Durrës, ku për pasojë humbi jetën një 18-vjeçar dhe mbeti i dëmtuar pasagjeri tjetër.

“Specialistët e Qarkullimit Rrugor Tiranë arrestuan shtetasin D. D., 19 vjeç, pasi ditën e djeshme, në autostradën “Tiranë–Durrës”, dyshohet se ka humbur kontrollin mbi drejtimin e automjetit dhe për pasojë automjeti ka dalë nga rruga. Nga aksidenti ka humbur jetën pasagjeri, shtetasi E. B., 18 vjeç, banues në Durrës, si dhe janë dëmtuar drejtuesi i automjetit dhe pasagjeri tjetër, shtetasi E. Sh., 19 vjeç, të cilët ndodhen në spital, nën kujdesin e mjekëve”, njofton policia e Tiranës./kb

“Ju doni një parti të re politike dhe do ta keni!”, deklaroi Elon Musk në fillim të korrikut, duke shpallur krijimin e “America Party”, një përpjekje e re e miliarderit për të ndryshuar politikën amerikane.

Musk, i njohur për deklaratat bombastike, e prezantoi partinë si një alternativë ndaj demokratëve dhe republikanëve, të cilët ai i akuzoi për “falimentimin e vendit me korrupsion dhe shpërdorim”. Synimi i tij është të kandidojë kandidatë për 2-3 vende në Senat dhe deri në 10 vende në Dhomën e Përfaqësuesve, duke shpresuar të bëhet vota vendimtare në çështje të diskutueshme.

“Ne jetojmë në një sistem njëpartiak, jo në një demokraci. Sot, themelohet ‘America Party’ për t’ju kthyer lirinë,” shkroi ai.

Por ekspertët e politikës janë shumë më skeptikë. Bernard Tamas, profesor i shkencave politike dhe autor i librit The Demise and Rebirth of American Third Parties, i tha The Guardian: “Nuk shoh asnjë provë që një parti e tretë do të fitojë vende në Kongres dhe të ketë ndikim të vërtetë. Demokratët dhe republikanët kanë struktura, para, profesionistë dhe eksperiencë që janë të paarritshme për një iniciativë të re.”

Sipas analizës së The Guardian, vetë krijimi i partisë duket i nxitur nga konflikti i fundit i Musk me Donald Trump dhe u shpall në pak javë, me shumë detaje ende të paqarta. Për shembull, domain-i americaparty.com është pronë e dikujt tjetër, i cili e shet për 6.9 milionë dollarë, dhe llogaria në X (ish-Twitter) @AmericaParty ishte e zënë, duke e detyruar partinë të përdorë @AmericaPartyX.

Pa platformë të qartë dhe me problem imazhi publik

Ende nuk ka një platformë zyrtare apo program politik përveç kundërshtimit të rritjes së borxhit publik. Vetëm 65% e ndjekësve të tij në një sondazh në rrjete sociale u shprehën pro partisë së tij, ndërsa 34% kundër.

Ekspertët theksojnë se historia e partive të treta në SHBA është zakonisht ajo e “bletëve që pickojnë”, pra ato dështojnë të fitojnë pushtet real, por detyrojnë partitë kryesore të adresojnë tema të neglizhuara.

“Qëllimi i partive të treta nuk është t’i zëvendësojnë të mëdhatë, por t’u shkaktojnë dhimbje dhe t’i tërheqin drejt qendrës,” tha Tamas.

Sidoqoftë, Musk duket më shumë i fokusuar tek ndëshkimi personal i kundërshtarëve të tij sesa tek ndonjë reformë e thellë politike. Këshilltarët që ai ka afruar, si Curtis Yarvin, një bloger që ka propozuar fundin e demokracisë në favor të një CEO-diktatori, kanë shtuar shqetësimet mbi drejtimin ideologjik të nismës.

Një tjetër pengesë madhore është vetë imazhi i Musk, pasi një sondazh i fundit tregoi se 60% e amerikanëve kanë një perceptim negativ për të, ndërsa vetëm 32% e shohin pozitivisht.

The Guardian e mbyll analizën e saj me një pyetje: “A e dëshiron Amerika një parti të tillë, me këto qëllime dhe të drejtuar nga një njeri si ai?”/kb

Përgatiti: Leonard Veizi

Në një ditë të nxehtë korriku, kur ajri mbi qytetet përvëlonte rrugët dhe njerëzit kërkonin hijet e pakta që mbeteshin në mes të verës, muzika u ngjit mbi zhurmën e zakonshme të botës jo si zbavitje, por si britmë e shpirtit njerëzor. Ajo nuk trokiti në veshë për të kënaqur, por për të zgjuar ndërgjegje. Ishte një ditë ku kitarat nuk tingëlluan për lavdi personale, por për jetë të shpëtuara. Ku mikrofonët nuk kërkuan duartrokitje, por ndihmë…

…Më 13 korrik 1985, bota ndaloi për një çast dhe dëgjoi veten. Live Aid, koncerti që do të linte gjurmë në historinë e njerëzimit, shpërtheu njëherësh në Londër dhe Philadelphia, duke lidhur dy kontinente në një himn universal humaniteti. Ishte më shumë se një ngjarje muzikore – ishte një akt global dashurie, një bashkim zërash për ata që s’kishin më zë, një përpjekje për të zbutur dhimbjen e fëmijëve që vdisnin nga uria në Etiopi dhe në cepa të tjerë të harruar të Afrikës Sub-Sahariane. Në atë ditë korriku, muzika nuk foli për dashuritë e humbura apo ëndrrat personale. Ajo foli për mbijetesë. Dhe për herë të rrallë, njerëzimi i përgjigj tingullit të vet me një “po” të thellë dhe të dhembshëm.

Një ide që lindi nga zemërimi dhe ekrani

Ideatori i koncertit ishte Bob Geldof, frontmeni i grupit “The Boomtown Rats”, i tronditur nga pamjet televizive të fëmijëve që vdisnin urie në Afrikë. Pas suksesit të këngës bamirëse “Do They Know It’s Christmas?” në vitin 1984, Geldof e kuptoi se kishte nevojë për një gjest më të madh, më të fortë, më të ndjeshëm për të zgjuar ndërgjegjen botërore.

Kështu lindi Live Aid, një koncert i përmasave planetare që zhvillohej në dy kontinente njëkohësisht: në Wembley Stadium të Londrës dhe në John F. Kennedy Stadium të Filadelfias, duke u transmetuar drejtpërdrejt në më shumë se 150 vende dhe u ndoq nga rreth 1.9 miliardë njerëz – afro gjysma e popullsisë së globit në atë kohë.

Performancat

Skena e Live Aid përfshiu yjet më të mëdhenj të muzikës botërore:

Queen, me një performancë që konsiderohet ndër më të mirat në historinë e rokut.

U2, David Bowie, Elton John, The Who, Led Zeppelin (në një ribashkim të rrallë),

Mick Jagger & Tina Turner, Paul McCartney, Madonna, Phil Collins (i cili performoi në të dy kontinentet të njëjtën ditë, falë fluturimit me Concorde).

Koncerte të tjera më të vogla u mbajtën njëkohësisht në Sydney, Moskë, Toronto, e qytete të tjera, duke e shndërruar ditën në një simfoni botërore solidariteti.

Çfarë u arrit?

Live Aid mblodhi më shumë se 125 milionë dollarë amerikanë, që u përdorën për ndihma emergjente, logjistikë dhe furnizime në zonat më të goditura nga uria. Por më shumë se shifra, ai ndryshoi mënyrën se si arti ndërhynte në kauzat humanitare, duke dëshmuar se muzika kishte fuqi për të ndryshuar botën.

Trashëgimia

Live Aid nuk ishte fundi, por fillimi. Frymëzoi lëvizje të reja ndërkombëtare për zhvillimin, fushata të të drejtave të njeriut dhe bamirësi të strukturuara si Live 8 në vitin 2005. Ishte prova e parë që ndjeshmëria globale mund të ndizet nga tingulli i kitarës dhe zëri i njeriut.

Në një botë ku shpesh uria dhe varfëria janë të padukshme për sy ndërkombëtar, 13 korriku 1985 shënoi ditën kur muzika nuk heshti – por foli fort, për ata që nuk kishin zë.

Mirëmenaxhimi i trafikut gjatë sezonit turistik si dhe minimizimi i numrit të ngjarjeve rrugore, ka bërë që Policia Rrugore të krijojë disa Njësi të Posaçme Policore, sidomos në zonat me trafik të dendur automjetesh.

“Janë marrë masa për krijimin e disa nukleve të reja që do të jenë me shërbim vetëm për sezonin turistik. Janë nukli në Ksamil, Himarë, Manzë dhe Velipojë”, tha drejtuesi Artur Selimaj.

Drejtues Artur Selimaj thotë për RTSH, se në akset rrugore në zonat turistike, detare, liqenore apo malore, ka kontrolle të shtuara të patrullave.

“Fokus shumë i lartë në planin e masave të Policisë Rrugore në këtë sezon turistik janë përdorimi i pajisjeve dhe teknologjisë, kamerat, radarët dhe pajisjet e tjera që do të zëvendësojnë pjesën e shërbimeve fizikisht në rrugë. Mbikëqyrja e trafikut do të jetë e monitoruar 24 orë në të gjithë territorin, kryesisht në akset kryesore që kanë fluksin më të lartë të lëvizshmërisë”, u shpreh Selimaj.

Sa i përket trafikut të rënduar nëpër qytetet kryesore bregdetare, Policia ka një apel për të gjithë ata drejtues automjetesh që njohin rrugët alternative.

“Në qytete siç është Vlora, Durrësi apo Shkodra, qytetarët që njohin rrugët alternative është mirë që të mos përdorin rrugët kryesore, me qëllim që të çlirojmë sadopak fluksin e lëvizjes”, bëri thirrje Selimaj.

Plani i masave i hartuar nga Policia Rrugore synon menaxhimi e trafikut, uljen e numrit të aksidenteve, evidentimin e shkeljeve me dhe pajisje teknologjie 24 orë në 24./kb

Ekonomisti dhe anëtar i Këshillit të Ekspertëve të Ekonomisë Gjermane, Martin Werding, ka thënë se punonjësit duhet të përgatiten për kontribute të sigurimeve shoqërore që arrijnë deri në 50 përqind të të ardhurave të tyre bruto. “Zhvillimi aktual është marramendës. Pyetja nuk është nëse normat e kontributeve do të arrijnë 50 përqind në një moment, por kur”, tha Werding për Rheinische Post.

Për shkak të popullsisë në plakje, tendenca drejt rritjes së kontributeve do të vazhdojë e pandryshuar në Gjermani, nëse nuk bëhen reforma edhe në vitet 2030, parashikon Werding. Profesori i politikës sociale dhe financave publike në Universitetin e Ruhr-it në Bochum pret që rritja e ardhshme e kontributeve të ndodhë që në vitin 2026.

Aktualisht, kontributet e sigurimeve shoqërore për punonjësit dhe punëdhënësit së bashku arrijnë në rreth 42 përqind të të ardhurave bruto. Werding pret që ato të rriten në 43 përqind gjatë vitit. Ai theksoi se disa kompani sigurimi shëndetësor kanë kaluar ndërkohë mesataren prej 17 përqind dhe tashmë i kanë rritur përsëri kontributet e tyre shtesë këtë vit. “Aktualisht, mesatarja ka të ngjarë të jetë 17.5 përqind”.

Edhe një rritje tjetër e sigurimit për kujdesin afatgjatë shëndetësor pritet me ndërrimin e viteve. Fondi i pensioneve pritet të preket më vonë: në vitin 2027 ose më së voni në vitin 2028, kontributet, të cilat kanë mbetur konstante në 18.6 përqind për një kohë të gjatë, do të rriten në pothuajse 20 përqind. “Kjo do të thotë arritja e një barre tatimore prej 45 përqind së shpejti deri në fund të kësaj periudhe legjislative”, tha ekonomisti, i cili bëri thirrje për reforma të thella.

Për ekspertin masat që po diskutohen aktualisht, të tilla si rritja e kufirit të vlerësimit të kontributeve shoqërore dhe përfshirja e nëpunësve civilë në sigurimet shoqërore, nuk janë të mjaftueshme. “Në disa raste, kjo thjesht krijon boshllëqe financiare diku tjetër – për shembull, në buxhetet e landeve që punësojnë shumicën e nëpunësve civilë”, thekson Werding. Nevojiten debate për zhvillimet e shpenzimeve shoqërore, efektivitetin e tyre, si për shembull, pensioni për nënat, që ka disa specifika e ka shkaktuar debat në Gjermani. Eksperti Martin Werding është anëtar i Këshillit të Ekspertëve të Ekonomisë Gjermane që merret nga ana studimore me zhvillimin ekonomik të Gjermanisë./ DW/kb

Prania e IKMT-së dhe forcave policore në Theth për shembjen e strukturave, duket se ka bërë bashkë banorët si një herë e një kohë.

Banorët, marrë shkak nga situata e gjendur, janë mbledhur pranë Kishës, së bashku me burrat e Dukagjinit të bashkuar.

Pamjet tregojnë kuvendin e Thethit, të ulur këmbëkryq, teksa diskutojnë se cili do të jetë qëndrimi i tyre përballë shtetit që po u shemb çdo strukturë që nuk disponon leje.

Kjo situatë, ka bërë e një herë që banorët e Thethit t’i rikthehen traditës së kuvendit pranë Kishës, në diskutime për hapin e tyre të radhës.

Sakaq, deri më tani janë prishur 70 objekte pa leje në zonën e Thethit. Situata paraqitet më e qetë sot, por mbetet për t’u parë se cili do të jetë reagimi i banorëve dhe pronarëve të strukturave.

Më herët IKMT ka bërë të ditur se janë konstatuar rreth 80 objekte pa leje në këtë zonë, por burime pranë saj bëjnë të ditur se ky numër mund të jetë edhe më i lartë/kb

Besa Kokëdhima ka ndarë disa nga momentet më të ndjera të jetës së saj personale në një intervistë televizive. E qeshur dhe e sinqertë, Besa rrëfeu se është më e dashuruar se kurrë dhe se partneri i saj është mbështetja më e madhe në ditët e ngarkuara.

“Kur jam e stresuar, ai është i vetmi që më qetëson. Kuptimi i jetës për mua është dashuria,” u shpreh këngëtarja, duke treguar se ndjenjat janë në qendër të gjithçkaje për të.

Por surprizat nuk përfunduan këtu. Besa la të kuptohet se dasma është shumë afër.

“Po, themi që së shpejti do të kemi dasmë,”tha ajo me entuziazëm, duke shtuar se do të ketë më shumë se një fustan.

“Jam gocë serioze, një herë në jetë dua të martohem. Nuk dua të më mbetet gjë peng,”përfundoi artistja./kb

Presidenti i Shteteve të Bashkuara të Amerikës, Donald Trump, mund të mos e gëzojë privilegjin e të adresuarit probleme para Parlamentit britanik gjatë vizitës së tij shtetërore në Mbretërinë e Bashkuar më vonë këtë vit, pasi ende nuk është bërë një kërkesë zyrtare për t’i dhënë atij këtë nder, raporton Sky News.

Vendimi vjen vetëm disa ditë pasi presidenti francez Emmanuel Macron mbajti një fjalim të suksesshëm para të dyja dhomave të Parlamentit gjatë vizitës së tij shtetërore. Por deri më tani, kryetari i Dhomës së Komunave, Sir Lindsay Hoyle, nuk ka marrë asnjë kërkesë për të ftuar presidentin amerikan që të flasë në Parlament kur ai pritet të vizitojë Britaninë në shtator.

Kërkesa për ta ndaluar një fjalim të tillë është artikuluar edhe nga deputetja laburiste Kate Osborne, e cila që në prill i ka shkruar kryetarit të Parlamentit duke kërkuar që Trump të mos lejohet të flasë para të dyja dhomave.

“Ishte kënaqësi të shihja Macron këtu, por mendoj krejt ndryshe për Trump,” tha Osborne.

“Ai ka bërë komente shumë shqetësuese për qeverinë britanike, demokracinë, Lindjen e Mesme, të drejtat e barabarta dhe, natyrisht, për Ukrainën. Ky është një privilegj që nuk duhet dhënë lehtë.”

Një zgjidhje diplomatike?

Sipas ekspertëve të diplomacisë, fakti që Parlamenti nuk do të jetë në punë për pjesën më të madhe të shtatorit për shkak të konferencave të partive politike, mund të shmangë ndonjë incident diplomatik ose perceptim për fyerje ndaj presidentit amerikan.

Ish-ambasadori britanik në Francë, Lord Ricketts, theksoi se kjo pushim i Parlamentit mund të ndihmojë për ta zgjidhur çështjen pa shumë zhurmë.

Ende nuk ka një datë zyrtare të konfirmuar nga Pallati Buckingham ose qeveria për vizitën shtetërore, por burime pranë Trump kanë sugjeruar se ajo është planifikuar për shtator.

Fjalim i dytë i munguar?

Kjo do të ishte vizita e dytë shtetërore e Trump në Britani. Gjatë vizitës së tij të parë në vitin 2019, ai nuk u lejua të fliste para Parlamentit, ndryshe nga paraardhësi i tij Barack Obama, që u ftua ta bënte këtë. Në atë kohë, kryetari i atëhershëm i Parlamentit, John Bercow, kishte shprehur qartë qëndrimin e tij kundër një fjalimi nga Trump.

Megjithatë, kjo nuk e prishi entuziazmin e ish-presidentit amerikan për takimet e tij me familjen mbretërore.

Nga zyra e kryetarit të Dhomës së Komunave i thanë Sky News se “adresimi para të dyja dhomave të Parlamentit nuk është automatikisht pjesë e itinerarit të një vizite shtetërore dhe vendimi për këtë është pjesë e planifikimeve.”

Nëse qeveria vendos të kërkojë një adresim të tillë, zyra e Lord Chamberlain, në emër të Mbretit, duhet të shkruajë zyrtarisht tek të dy kryetarët e dhomave për ta ftuar presidentin amerikan./kb