Kreu i Partisë Demokratike, përmes një postimi në rrjetet sociale ka reaguar mbi situatën e ndodhur ditë e fundit në fshatin turistik në Theth, ku është ndërmarrë aksioni për shembjen e ndërtesave pa leje.

Berisha në këtë postim shkruan se Thethi është në shtetrrethim dhe ‘se armiku më i egër i veriut Ramaduro i shkatërron Thethit dhe veriut turizmin’.

Kreu i PD shkruan se dënon me forcën më të madhe terrorin shtetëror të Edi Ramës dhe bandave të tij me uniformë kundër banorëve të Thethit.

Postimi i Berishës

Thethi në shtet rrethim! Turistët largohen në panik. Armiku më i egër i veriut Ramaduro i shkatërron Thethit dhe veriut turizmin. Dënoj me forcën më të madhe terrorin shtetëror të Edi Ramës dhe bandave të tij me uniformë kundër banorëve të Thethit. #sb

Ish-ambasadori gjerman në Shqipëri, Werner Daum, ka ndërruar jetë në moshën 82-vjeçare.

Diplomati u gjet i pajetë në dhomën e hotelit në Kavajë ku po qëndronte prej disa ditësh në Shqipëri, vend të cilin e deshi fort.

Dyshohet se shkaku i vdekjes ka qenë natyral.

Para pak ditësh, Daum mori pjesë në Kavajë në inaugurimin e shtatores së dëshmorit të demokracisë, Josif Budo. Gjatë viteve 1987-1990, ai ishte ambasador në Tiranë dhe njihet për rolin e tij të veçantë, duke hapur dyert e ambasadës gjermane për shqiptarët kundër urdhrave të qeverisë së tij, me bindjen se kjo do të ndihmonte në rrëzimin e regjimit komunist./tvklan.al

Gjykata e Posaçme ka vendosur sot, më 12 korrik, masat e sigurimit “arrest në burg” për 7 të dyshuarit, që u arrestuan një ditë më parë në kuadër të një operacioni të Prokurorisë së Posaçme (SPAK) për përfshirje në trafikun e drogës nga Amerika Latine.

Gazetarja e Klan News Glidona Daci raporton se 7 të arrestuarit, të cilët janë lënë në “arrest në burg” janë: Arjan Gjata, Vilson Roçi, Musa Gjikola, Akil Alushi, Jani Meçja, Selami Lushkaj, Erjon Dani.

Një ditë më parë, Prokuroria e Posaçme Kundër Korrupsionit dhe Krimit të Organizuar doli me një njoftim zyrtar pasi goditi një grup të strukturuar kriminal që merrej me trafikun e lëndëve narkotike nga Amerika Latine në vendet e Bashkimit Europian. SPAK njoftoi se 7 persona ishin vënë në pranga dhe 6 të tjerë ishin shpallur në kërkim, të dyshuar si pjesë e një grupi kriminal të përfshirë në trafikun e drogës nga Amerika Latine drejt Bashkimit Europian në vitet 2020-2021.

Hetimet për goditjen e këtij grupi nisën rreth dy vite më parë, për t’u finalizuar këtë të premte me operacionin e zhvilluar në qytete si Shkodra, Elbasani, Vlora dhe Tirana.

Të dhënat e përftuara nga hetuesit, edhe falë komunikimeve të zbërthyera nga platforma e enkriptuar SKY ECC, kanë rezultuar se grupi, në të paktën 7 episode, ka tentuar trafikimin e 3585 kilogramëve kokainë, 701 kilogramëve kanabis sativa dhe 4.2 kilogramëve heroinë. Këto sasi të konsiderueshme janë sekuestruar nga autoritetet e huaja partnere, përfshirë këtu Europol dhe Eurojust.

Për të vënë në jetë aktivitetin e tyre kriminal, grupi, sipas SPAK-ut, është ndihmuar edhe nga një ish-punonjës policie, tashmë i vënë në pranga. Bëhet fjalë për Erjon Danin, për të cilin prokuroria thotë se gjatë kohës që ka qenë në detyrën e zv/shefit të Komisariatit nr. 3 në Tiranë, u ka vënë në dispozicion grupit të dhëna nga sistemi TIMS.

Policia e Tiranës ka kesuestruar mallra, konkretisht veshje sportive të dyshuara të kontrabanduara.

Sipas policisë vlera totale e mallrave kap shifrën e 40 mijë Eurove, ndërkohë që policia ka arrestuar drejtuesin e furgonit, një 52 vjeçar.

‘Specialistët e Seksionit për Hetimin e Krimit Ekonomik dhe Financiar në DVP Tiranë, bazuar edhe në informacionet e marra në rrugë operative, organizuan dhe finalizuan operacionin policor të koduar “Silent Load”. Si rezultat i këtij operacioni u bë arrestimi në flagrancë i shtetasit Sh. Xh., 52 vjeç, banues në Kukës.

Shërbimet e Policisë, në rrugën “Bardhyl”, kanë lokalizuar dhe ndaluar furgonin me drejtues m 52-vjeçarin, në të cilin, gjatë kontrollit, u gjetën dhe u sekuestruan, në cilësinë e provës materiale, mallra (veshje sportive) të dyshuara si të kontrabanduara, me vlerë totale 40 000 euro.

Nga hetimet ka rezultuar se ky shtetas do t’i shiste veshjet në dyqane të ndryshme të një tregu të shumicës në rrugën “5 Maji”’,thuhet në njoftimin e policisë.

Materialet procedurale iu referuan Prokurorisë së Tiranës, për veprime të mëtejshme.

Në Parkun Kombëtar të Thethit ka rinisur mëngjesin e sotëm operacioni për shembjen e ndërtimeve pa leje.

Forcat e Inspektoratit Kombëtar të Mbrojtjes së Territorit janë duke shembur ndërtesa nga 1 deri në 3 kate.

Ndryshe nga një ditë më parë operacioni është duke u zhvilluar më i qetë. Në mbështetje të IKMT-së janë edhe forcat e policisë.

Në Theth janë parashikuar të shemben rreth 60-70 ndërtime pa leje. Banorëve u është dhënë kohë që të heqin strukturat prej druri.

Një ditë më parë situata u tensionua për shkak se persona të paidentifikuar hodhën molotov ndaj forcave të IKMT. Tv Klan

Kreu i qeverisë Rama ka publikuar në rrjetet sociale foto nga Vlora, ku shihet lirimi i hapësirave publike, kryesisht në Lungomare në pjesën e plazhit.

Rama inkurajon të gjithë profesionistët e Vlorës të aplikojnë për t’u bërë pjesë e kësaj përpjekjeje, duke u përfshirë në intervistat e punës.

‘Në Lungomaren e Vlorës një tjetër sipërfaqe plazhi publik i është rikthyer turistëve dhe qytetarëve, ndërkohë që i inkurajoj të gjithë profesionistët e Vlorës të aplikojnë për t’u bërë pjesë e kësaj përpjekjeje, duke u përfshirë në intervistat e punës’, shkruan Rama.

Këto ditë kryministri ka reaguar ashpër ndaj bizneseve që zënë hapësirat publike, duke ju bërë thirrje që t’i heqin një orë e më parë ‘mushamatë’ e të lirojnë kështu hapësirat publike për qytetarët dhe turistët.

Fatmir Mediu, kreu i Partisë Republikane ka marrë pjesë në konferencën e ECR (Konservatorët Europianë) të zhvilluar në Napoli të Italisë. Diskutimet për gjeopolitikën si dhe rolin e Mesdheut në këto zhvillime kanë qenë fokusi i diskutimeve të konferencës.

Kreu i PR, në një postim në rrjetet sociale shkruan se në këtë ngjarje me rëndësi të veçantë, pati mundësinë të diskutojë mbi sfidat dhe zhvillimet e fundit në arenën ndërkombëtare, si dhe rolin që luan Ballkani dhe Shqipëria në kuadër të këtyre zhvillimeve.

Gjithashtu, gjatë zhvillimeve të kësaj konference siç bën të ditur Mediu ka folur edhe për situatën në vendin tonë.

Ai u shpreh se: ‘Vura në dukje se një nga problemet më të mëdha është kërcënimi i demokracisë nga brenda, rritja e Autoritarizmit: Demokracia po kërcënohet nga brenda, Shqipëria përballet me autoritarizëm, krimi organizuar, korrupsioni mungesa e zgjedhjeve të lira dhe të ndershme si dhe shpopullim masiv”

Gjatë qëndrimit në Napoli, Mediu zhvilloi takime dhe shkëmbeu mendime me figura të rëndësishme të politikës italiane, europiane dhe amerikane, si Lucio Ciriani, Ministër për Marrëdhëniet me Parlamentin në qeverinë italiane, Mateusz Moraëiecki, Kryetar i ECR dhe ish-Kryeministër i Polonisë,  Roberts Zīle, Nënkryetar i Parlamentit Europian, Carlo Fidanza, Nënkryetar i Grupit të Konservatorëve Europianë, Antonio Giordano, Sekretar i Përgjithshëm i ECR, Caush Ahra, ish-zyrtar i lartë në Këshillin e Sigurisë Kombëtare të SHBA-së në Administratën Trump, ekspert për çështjet e sigurisë dhe ekonomisë.

Departamenti i Shtetit i SHBA-ve ka njoftuar punonjësit e tij se do të pushojë nga puna qindra prej tyre “në ditët në vijim”, pas vendimit të kësaj jave të Gjykatës së Lartë që i lejon administratës së Donald Trump-it të vazhdojë me shkurtimet masive të vendeve të punës në të gjitha agjencitë federale.

Financial Times shkruan se plani i administratës, i shpallur nga Sekretari i Shtetit Marco Rubio në muajin prill, do të pushojë nga puna rreth 15% të fuqisë punëtore të departamentit dhe synon ta bëjë Departamentin e Shtetit “të rëndësishëm”, “efektiv dhe të shpejtë”, tha zëdhënësja e departamentit Tammy Bruce të enjten.

“Kur diçka është shumë e madhe për të funksionuar, shumë burokratike për të vepruar në mënyrë efektive dhe për të realizuar projekte apo veprime, atëherë ajo duhet të ndryshojë,” tha ajo.

Reduktimi i stafit të Departamentit të Shtetit është pjesë e një përpjekjeje më të gjerë nga Shtëpia e Bardhë për të eliminuar dhjetëra mijëra vende pune në të gjitha agjencitë qeveritare të SHBA-së.

Presidenti Trump në janar i dha autoritet të besuarit të tij të atëhershëm Elon Musk për të shkurtuar stafin dhe shpenzimet në të gjithë qeverinë federale me qëllimin për të eliminuar burokracinë e “shpërdorimit, mashtrimit dhe abuzimit”, misioni i të ashtuquajturit Departamenti i Efikasitetit të Qeverisë.

Kritikët, disa prej të cilëve kanë paditur administratën, e kanë akuzuar Trump-in dhe Musk-un për mbylljen e programeve që janë thelbësore për sigurinë kombëtare, shëndetin global dhe interesa të tjera të SHBA-së jashtë vendit, krahas atyre që janë vërtet të padobishme.

Një zyrtar i lartë i Departamentit të Shtetit tha të enjten se pushimet e pritshme nuk do të bazohen në merita individuale, siç janë aftësitë kritike gjuhësore. Në vend të kësaj, departamenti do të synojë “funksione” dhe zyra që sekretari, në konsultim me Kongresin, i ka gjetur të tepërta ose në mospërputhje me agjendën e Trump-it.

“Ne shqyrtuam funksionet që po kryheshin, jo individët”, tha një zyrtar i lartë i departamentit.

Pasi një gjyqtar federal në maj bllokoi përkohësisht operacionin e zvogëlimit në 20 agjenci, në pritje të sfidave gjyqësore, Gjykata Supreme të martën vendosi që plani mund të vazhdonte.

Zyrtarët e departamentit nuk pranuan të thonë saktësisht se sa njerëz do të humbasin punën, apo sa do të zgjasë ky proces. Departamenti kishte njoftuar Kongresin më herët këtë vit se rreth 1 mijë e 800 persona do të preken, përveç gati një mijë të tjerëve që kishin zgjedhur të largoheshin vullnetarisht.

Një zyrtar i lartë i departamentit tha të enjten se këto shkurtime nuk do të përfshijnë stafin e shërbimit të jashtëm të vendosur jashtë vendit.

“Nuk kemi plane për këtë për momentin,” tha zyrtari. “Sekretari dëshiron ta trajtojë këtë hap pas hapi dhe për momentin po shqyrtojmë praninë tonë të brendshme.”

Zëvendëssekretari i Shtetit për Menaxhimin dhe Burimet, Michael Rigas, shkroi në një email: “Janë bërë të gjitha përpjekjet për të mbështetur kolegët tanë që po largohen. Në emër të udhëheqjes së departamentit, shprehim mirënjohjen tonë për punën tuaj të palodhur dhe përkushtimin për realizimin e riorganizimit, si dhe për përkushtimin tuaj të vazhdueshëm për avancimin e interesave kombëtare të SHBA-ve në mbarë botën.”/tvklan.al

Kanosi në lokal me sëpatë dy shtetas për motive të dobëta, kapet në flagrancë dhe vihet në pranga 44-vjeçari.

Ndërhyrja e menjëhershme e shërbimeve të Policisë parandalon përshkallëzimin e një konflikti ndërmjet disa shtetasve, që mund të sillte pasoja të rënda për jetën.

‘Menjëherë pas njoftimit se në lagjen nr. 17, Durrës, një shtetas po kanoste dy shtetas të tjerë me mjet prerës (sëpatë), për shkak të një konflikti për motive të dobëta, shërbimet e Komisariatit të Policisë Durrës organizuan punën dhe shkuan menjëherë në vendngjarje.

Si rezultat i ndërhyrjes së menjëhershme, shërbimet e Policisë parandaluan përshkallëzimin e konfliktit që mund të kishte pasoja të rënda për jetën e personave të përfshirë, si dhe arrestuan në flagrancë shtetasin E. Dh., 44 vjeç, banues në Shkodër.

Shtetasi 44-vjeçar u kap në flagrancë, në lagjen nr. 16, teksa kanoste me sëpatë shtetasin E. A.,  dhe  shtetasen E. S., të dy banues në Durrës’.

Gjithashtu, u procedua penalisht shtetasi B. K., i cili kishte djeni për konfliktin dhe nuk njoftoi Policinë’, thuhet në njoftimin e bluve të Durrësit.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.

Komisariatin e Policisë së Kuçovës do ta drejtojë një grua. Edjona Dano, e vetmja grua që garoi, u kualifikua si fituese mes 290 apkikatëve që synonin për të qenë shefa komisariatesh.

Së fundmi Dano mbante detyrën e Shefe Seksioni për Parandalimin e Dhunës në Familje dhe Mbrojtjes së të Miturve, në Policinë e Tiranës. Më herët ka mbajtur detyrën e Shefit të Seksionit për Hetimin e Krimeve në Komisariatin e Policisë nr.6 Tiranë.

Ndërkohë Kleant Serdari nga Kuçova është emëruar shef i Komisariatit të Policisë Mallakastër. Bledar Metaj nga ana tjetër është kaluar nga Mallakastra në Shef Sektori i Policisë Rrugore në Drejtorinë e Vlorës.

Mes të tjerash janë firmosur edhe 8 ndryshime të tjera.

Florian Dano emërohet shef në komisariatin e Policisë Kufitare Dibër.

Elvid Shehu emërohet shef në Komisariatin e Policisë Kufitare Sarandë.

Ferit Merkaj emërohet shef në Komisariatin e Policisë Himarë.

Kliton Zharri emërohet shef në Komisariatin e Policisë Cërrik.

Ajet Bega emërohet shef në Komisariatin e Policisë Kurbin.

Leonard Ndreka emërohet shef në Komisariatin e Policisë Gramsh.

Krenar Guçe emërohet zv/drejtor për Krimet në Drejtorinë e Elbasanit

Gentian Dedej emërohet shef në Komisariatin e Policisë Pogradec.

Kujtojmë se një ditë më parë u emëruan shefat e rinj edhe në 8 komisariate të tjera në vend./tvklan.al

Gjatë 24 orëve të fundit janë raportuar 21 vatra zjarri në disa bashki të vendit, prej të cilave 5 mbeten ende aktive. Zjarret janë përhapur kryesisht në sipërfaqe me shkurre dhe bimësi të ulët, duke shkaktuar dëme të konsiderueshme në mjedis.

Vatrat janë evidentuar në bashkitë: Dibër, Vlorë, Rrogozhinë, Tiranë, Kamëz, Dimal, Përmet, Këlcyrë, Gjirokastër, Librazhd, Belsh, Lezhë, Kurbin, Roskovec, Pogradec dhe Korçë.

Deri më tani, janë djegur rreth 91 hektarë sipërfaqe, si dhe 20 rrënjë ullinj.

Vatrat ende aktive

Qarku Dibër – “Livadhi i Peladhisë”, Bulqizë

Zjarri ka pasur intensitet të ulët, pa rrezik për përhapje në zonat pyjore. Deri më tani janë djegur rreth 19 hektarë. Në terren janë angazhuar 8 efektivë të zjarrfikëses, 6 të shërbimit pyjor, 4 forca bashkiake dhe 4 vullnetarë. Sot, situata po mbahet nën kontroll nga 4 forca të tjera operacionale.

Parku Kombëtar Lurë – “Liqeni i Luleve”, Dibër

Një nga vatrat më problematike, me shtrirje të madhe gjatësore, që përfshin sipërfaqe me pisha dhe livadhe. Janë përfshirë rreth 30 ha, ndërsa në terren po punojnë mbi 60 forca, përfshirë efektivë të zjarrfikëses, AdZM, forca bashkiake, vullnetarë dhe 30 trupa nga Forcat e Armatosura (FA).

Qarku Tiranë – Fshati Zambish, Rrogozhinë

Zjarri në një sipërfaqe me dushqe është përhapur në disa fshatra përreth: Hemenraj, Murroj, Çek, Memollaj dhe Berdajt. Janë përfshirë rreth 20 ha, ndërsa disa banesa janë rrezikuar. Në operacion janë angazhuar 17 efektivë zjarrfikës, 20 forca bashkiake, 10 vullnetarë dhe një helikopter i FA.

Qarku Elbasan – “Mal Plak”, Librazhd

Zjarri në një zonë pyjore vijon të mbahet nën kontroll nga 1 mjet zjarrfikës, 8 efektivë dhe 10 vullnetarë. Shkaku i rënies mbetet i panjohur.

Qarku Korçë – Fshati Udenisht, Pogradec

Zjarri është riaktivizuar në një zonë me pyll pishe dhe shkurre. Forcat vendore të MZSH dhe AdZM janë në terren për shuarjen e tij. Në total janë angazhuar 459 forca zjarrfikëse, ushtarake dhe vullnetare, 38 automjete zjarrfikëse, 90 efektivë të Forcave të Armatosura dhe 3 helikopterë për mbështetje ajrore.

Sipas Institutit të Gjeoshkencave, sot nuk priten reshje atmosferike. Rreziku për zjarre mbetet i lartë në qarqet: Durrës, Tiranë, Fier dhe Vlorë, ndërsa në qarqet e tjera rreziku është në nivel të moderuar, me disa zona të lokalizuara me rrezik të lartë, si Shkodër (jug), Kukës (jugperëndim), Korçë (veri).

Autoritetet i bëjnë thirrje qytetarëve që të tregojnë kujdes maksimal, të mos ndezin zjarre në natyrë dhe të shmangin çdo veprim që mund të rrezikojë përhapjen e flakëve. Në rast zjarri, njoftoni menjëherë shërbimet zjarrfikëse. Vetëm me bashkëpunimin dhe ndërgjegjësimin e të gjithëve mund të mbrojmë mjedisin, pronën dhe jetën e njerëzve.

Derisa presidentja e Kosovës, Vjosa Osmani, thotë se ka “informacione të besueshme” se presidenti amerikan, Donald Trump, “ka parandaluar së voni” një përshkallëzim të mundshëm të situatës së sigurisë nga Serbia në Kosovë, Qeveria në detyrë e Kosovës nuk komenton.

Pyetjeve të Radios Evropa e Lirë se për çfarë lloj përshkallëzimi të situatës bëhej fjalë, çfarë rreziku specifik për sigurinë ekzistonte dhe kur, nuk iu përgjigj as Ministria e Punëve të Brendshme e Kosovës.

Beogradi, në anën tjetër, thotë se presidentja Osmani po e akuzon rrejshëm Serbinë.

Pretendimet e fundit të presidentit amerikan, Donald Trump, se ka parandaluar një konflikt mes Kosovës dhe Serbisë, kanë tërhequr vëmendje, por edhe kanë krijuar konfuzion, pasi në opinionin publik mungojnë detaje – të tilla si periudha kohore në të cilën ka mundur të ndodhte një përshkallëzim i tillë.

Duke folur më 10 korrik në një ligjëratë në Uashington, presidentja Osmani tha se kjo deklaratë e presidentit Trump, qartazi, u referohet “javëve të fundit” dhe se bëhet fjalë “për zhvillime shumë, shumë të vona”. Jeta Loshaj, studiuese në Qendrën Kosovare për Studime të Sigurisë, vlerëson se ekziston një kërcënim real nga Serbia, sidomos në formën e operacioneve speciale dhe kërcënimeve hibride të sigurisë.

Ajo thotë për Radion Evropa e Lirë se deklarata e fundit e presidentes Osmani në lidhje me sulmin e mundshëm nga Serbia, vetëm se konfirmon shqetësimet e hershme që kanë ekzistuar – kryesisht brenda qarqeve të ekspertëve – bazuar në retorikën e zyrtarëve serbë, përfshirë edhe vetë presidentin e Serbisë, Aleksandar Vuçiç.

Megjithatë, për Loshajn është “e habitshme” që presidenti amerikan flet hapur për parandalimin e planeve të Serbisë për të sulmuar Kosovën – veprim që në praktikë do të përkthehej sulm ndaj NATO-s – ndërkohë që aleanca ushtarake nuk ka dalë me asnjë reagim zyrtar.

Dushan Janjiç, nga Forumi për Marrëdhënie Etnike në Beograd, thotë se deklarata e presidentes së Kosovës se ka pasur një kërcënim sigurie nga Serbia në javët e fundit, është “joserioze”.

Ai beson se deklarata e Trumpit për këtë çështje i referohej Marrëveshjes së Uashingtonit midis Kosovës dhe Serbisë për normalizimin e marrëdhënieve ekonomike, e arritur në vitin 2020, gjatë mandatit të tij të parë presidencial.

Çfarë tha Trump?

Presidenti i SHBA-së, Donald Trump, shkroi në rrjetin Social Truth më 15 qershor se gjatë mandatit të tij të parë presidencial, Kosova dhe Serbia po “shkonin drejt një konflikti serioz” dhe se lufta ishte në prag të shpërthimit, por se ai e ndaloi atë.

Ai e akuzoi pasardhësin e tij të atëhershëm, ish-presidentin Joe Biden, se “ka dëmtuar perspektivën afatgjate me disa vendime shumë të pakuptimta”, por se ai “do ta rregullojë sërish”.

“Gjatë mandatit tim të parë, Serbia dhe Kosova po luftonin ashpër, siç kishin bërë për dekada të tëra, dhe ky konflikt i gjatë kërcënonte të përshkallëzohej në luftë. Unë e ndalova atë”, shkroi Trump.

Pastaj, në një konferencë për mediat në Shtëpinë e Bardhë më 29 qershor, ai tha se, në muajt e fundit, SHBA-ja ka ndaluar ose parandaluar konflikte midis disa palëve, përfshirë Serbinë dhe Kosovën.

“Serbia, e dini, po përgatitej për luftë, me një grup që as nuk do ta përmend, sepse nuk ndodhi. Ne arritëm ta parandalonim, por kam një mik në Serbi që tha se do të shkojë përsëri në luftë. Nuk do të them se është Kosova, por është Kosova. Ata po përgatiteshin për një luftë serioze, ne e parandaluam. E parandaluam për tregti. Ata donin të tregtonin me Shtetet e Bashkuara. Unë thashë: ne nuk tregtojmë me ata që luftojnë”, tha Trump.

Pastaj, më 9 korrik, ai përsëriti se e kishte ndaluar luftën në rajon, duke kërcënuar se do ta pezullonte tregtinë.

“Kam arritur të zgjidh shumë situata, si ajo me Indinë dhe Pakistanin, Kosovën dhe Serbinë. Thashë: a do të luftoni? Ne nuk do të bëjmë tregti. Dhe, duket se kjo ka qenë mjaft e suksesshme”, tha Trump.

Këto deklarata vijnë në një kohë kur tensionet mes Kosovës dhe Serbisë mbeten të larta, sidomos në veri të Kosovës, ku shumica e popullsisë është serbe.

Përshkallëzimi i situatës në veri të Kosovës kulmoi në shtator të vitit 2023 kur një grup i armatosur serbësh, i udhëhequr nga Millan Radoiçiq – ish-nënkryetar i Listës Serbe – sulmoi Policinë e Kosovës në fshatin Banjskë dhe vrau një rreshter policie.

Kosova e përshkroi sulmin si terrorist dhe e akuzoi Serbinë se qëndron pas tij – gjë të cilën Beogradi zyrtar e mohoi. Osmani e përmendi këtë sulm në Uashington, duke thënë se ngjarjet e tilla konfirmojnë se ekziston një rrezik real për incidente të ngjashme në të ardhmen, prandaj, tha ajo, është e rëndësishme që të ketë jo vetëm frenim ushtarak, por edhe politik të Serbisë nga planet e tilla.

Loshaj: Konfliktet nuk mund të përjashtohen plotësisht

Loshaj deklaron se hulumtimet e Qendrës Kosovare për Studime të Sigurisë – si ai për rritjen e forcave të operacioneve speciale në Serbi dhe mënyrën se si Kosova trajtohet në doktrinën serbe të sigurisë – tregojnë për shqetësime serioze në lidhje me sigurinë e Kosovës, por thekson se, megjithatë, ekzistojnë edhe disa kufizime.

“Kur vlerësohet gatishmëria aktuale e Serbisë për të nisur një sulm më të gjerë dhe konvencional ndaj Kosovës, duhen marrë në konsideratë edhe kufizimet. Për aq kohë sa Kosova është nën mbrojtjen e NATO-s, e cila ka një mandat për misionin e KFOR-it nga Kombet e Bashkuara, çdo lëvizje drejt një sulmi konvencional do të mbartte një rrezik të lartë për Serbinë. Pavarësisht kësaj, Këshilli i Sigurisë Kombëtare i SHBA-së lëshoi një paralajmërim në shtator të vitit 2023 për një grumbullim të forcave ushtarake të Serbisë në kufirin me Kosovën, duke na kujtuar se skenarë të tillë nuk mund të përjashtohen plotësisht”, thotë Loshaj.

Ajo thekson, gjithashtu, se paqja në rajonin e Ballkanit Perëndimor është e brishtë dhe se kërkon vigjilencë dhe angazhim të vazhdueshëm nga NATO-ja dhe SHBA-ja.

Janjiç: Forcat serbe të sigurisë nuk merren me Kosovën prej muajsh

Janjiç thotë se publiku nuk është në dijeni të një tentative të re sulmi, të organizuar ndaj Kosovës, dhe se presidenti i SHBA-së, Trump, nuk kishte asgjë për të parandaluar.

“Qartazi, Vjosa Osmani nuk ndjek me vëmendje atë që po ndodh në Serbi. Këtu, me muaj, ushtria, forcat paraushtarake dhe madje edhe policia merren me gjëra të tjera, e jo me Kosovën. Kështu që kjo është një politikë joserioze, një përpjekje për t’i bërë përshtypje Trumpit dhe ambicies së tij për Çmimin Nobel për Paqe, por kjo nuk përputhet me faktet”, thotë Janjiç.

Qysh në nëntor të vitit të kaluar, në Serbi janë duke u organizuar protesta, që kërkojnë llogari për shembjen e një strehe në Stacionin Hekurudhor të Novi Sadit, ku mbetën të vrarë 16 persona.

Në fillim të korrikut, në rrjetet sociale u shfaqën disa fotografi me përshkrimin se anëtarët e grupit të armatosur nga Banjska, gjenden pranë Presidencës së Serbisë për të mbrojtur një grup studentësh që i kundërshton protestat, e që mbështeten edhe nga presidenti Aleksandar Vuçiç.

Duke përdorur mjetet e njohjes së fytyrës, Radio Evropa e Lirë arriti të përcaktonte se grupi përfshinte Vlladimir Vuçetiçin, nga Mitrovica e Veriut, i cili është një nga 45 personat e akuzuar për kryerjen e sulmit në Banjskë.

Reagimet nga Beogradi

Radio Evropa e Lirë kërkoi nga Presidenca e Serbisë të komentonte deklaratat e presidentes së Kosovës, në lidhje me planet e Beogradit për të sulmuar Kosovën gjatë disa javëve të fundit, por, deri në publikimin e këtij artikulli, nuk mori përgjigje.

Drejtori i Zyrës për Kosovën në Qeverinë e Serbisë, Petar Petkoviç, tha përmes një deklarate se Osmanit “i janë errësuar sytë”, për shkak të krizës së brendshme politike dhe pamundësisë për të formuar institucionet e reja pas zgjedhjeve të shkurtit.

Sipas tij, Osmani e akuzoi rrejshëm Beogradin për “planet e veta të dhunshme” dhe politikanët nga Prishtina “gënjejnë hapur”.

“Ne po e ruajmë paqen e brishtë në veri të Kosovës dhe Metohisë vetëm falë politikës së mençur dhe të matur të presidentit Vuçiq dhe përgjegjësisë së treguar nga populli serb në Kosovë dhe Metohi”, thuhet në deklaratën e tij. REL

Ministrja e Bujqësisë dhe Zhvillimit Rural, Anila Denaj ka njoftuar një vendim të rëndësishëm për pezullimin e përkohshëm të aktiviteteve të inspektimit nga Autoriteti Kombëtar i Ushqimit (AKU) që nuk janë të planifikuara apo të miratuara zyrtarisht.

“Kam urdhëruar pezullimin e ushtrimit të aktivitetit të inspektimit pa planifikim paraprak dhe atyre të pamiratuara,” deklaroi Denaj, duke theksuar rëndësinë e transparencës dhe përgjegjshmërisë në proceset inspektuese.

Në mbështetje të këtij vendimi, është ngritur një komision i posaçëm me 5 anëtarë, i cili do të ketë në përbërje 3 përfaqësues nga Universiteti Bujqësor i Tiranës. Ky komision do të luajë një rol kyç në procesin e analizës dhe vlerësimit të trupës aktuale të inspektorëve të AKU-së.

“Komisioni do të kryejë vlerësimin e inspektorëve ekzistues, si në formë të shkruar, ashtu edhe me gojë. Ky është një hap i domosdoshëm për të garantuar një trupë inspektuese të aftë, profesionale dhe me integritet,” shtoi ministrja.

Gjithashtu, vëmendje e veçantë do t’i kushtohet aplikantëve të rinj, të cilët duan t’i bashkohen strukturave të AKU-së. Komisioni do të vlerësojë edhe këta kandidatë, me synimin për të sjellë një frymë të re, një qasje moderne dhe mbi të gjitha një etikë të re në këtë institucion.

“Ky proces do të përfshijë jo vetëm analizën e masave dhe praktikave të kaluara, por edhe testimin dhe vlerësimin e potencialit individual të çdo kandidati në frymën e një kulture të re pune,” theksoi Denaj.

Pjesë nga fjala e ministres Denaj

Kam urdhëruar pezullimin e ushtrimit të aktivitetit të inspektimit pa planifikim paraprak dhe atyre të pamiratuara. Ky urdhër ka në bazë ngritjen e një komisioni të posacëm me 5 anëtarë.

Falënderoj universitetin bujqësor të Tiranës do të ketë 3 anëtarë. Do të vlerësojë në formë të shkruar dhe me gojë  inspektorët e AKU-së. Aplikantët e rinj që do ti bashkohen kësaj trupe do të jenë gjithashtu fokus i veprimtarisë së këtij komisioni për të sjellë në këtë insticion një frymë të re, një qasje të re e mbi të gjitha një etikë të re.

Ky proces do të ketë jo vetëm një analizë të masave e procesve të shkuara por dhe një testim e vlerësim të potencialit tuaj individual në frymë të punës.

Jorida Tabaku, deputetja e PD ka reaguar me anë të një videoje në rrjetet sociale pas prishjes së disa ndërtimeve në zonën turistike të Thethit, duke ngritur shqetësimin për ndikimin e kësaj ndërhyrjeje në komunitetin lokal dhe sezonin turistik.

Situata, sipas saj, është e lidhur me zbatimin e ligjit të njohur si “Paketa e Maleve”, të cilin ajo e cilëson si të diskutueshëm në mënyrën sesi aplikohet në terren.

‘Dhuna në Theth ka një shkak: Paketën e Maleve! Ajo është kali Trojës në pronat e veriut dhe turizmit malor! Paketa e Maleve nuk po sjell zgjidhje, por po krijon pasiguri për këto prona,” shprehet Tabaku.

Gjithashtu ajo shpreh shqetësimin se ligji mund të përdoret për të favorizuar subjekte të caktuara në emër të investimeve strategjike.

Deputetja thekson se ndërhyrja për prishjen e ndërtimeve ndodh në një periudhë të ndjeshme për turizmin dhe mund të ketë ndikim në imazhin e vendit. Ajo nënvizon se ndërtimet në fjalë kanë qenë të pranishme për një kohë të gjatë dhe kërkon sqarime për mënyrën se si po veprohet nga autoritetet.

“Është e nevojshme transparencë e plotë për projektet që po zhvillohen në zonat malore dhe garantimi i një trajtimi të barabartë për të gjithë qytetarët,” përfundon Tabaku.

Qarkullonin të armatosur me pistoletë dhe municion luftarak, në një automjet luksoz, njëri prej tyre tentoi të arratisej duke u hedhur në det, së bashku me çantën ku ndodhej arma, finalizohet operacioni policor i koduar “Diving”.

Operacioni është kryer nga komisariati i Policisë Sarandë, në bashkëpunim me Policinë Kufitare, ku është goditur një tjetër rast i veprimtarisë kriminale të armëmbajtjes pa leje.

Nga ky operacion janë vënë në pranga 3 shtetas, mes tyre edhe një person në kërkim për vepra të rënda penale. Ndërkohë sekuestrohen arma e zjarrit pistoletë, 16 fishekë dhe automjeti tip “Porsche”.

‘Si rezultat, në lagjen nr. 1, rruga “Butrinti”, Sarandë, u ndalua për kontroll automjeti luksoz tip “Porsche”, me të cilin udhëtonin 3 shtetas. Gjatë veprimeve, njëri prej tyre, shtetasi E. D., tentoi të largohej duke u hedhur në det, së bashku me çantën ku ndodhej arma e zjarrit, me qëllim humbjen e provave. Por falë reagimit të shpejtë të punonjësve të Policisë, me mbështetjen e Policisë Kufitare që ndodhej në patrullim në afërsi me mjetin e tyre lundrues, u bë e mundur kapja në flagrancë e këtij shtetasi.

Gjithashtu, nga punonjësit e Policisë Sarandë u bë e mundur, brenda një kohe shumë të shkurtër, gjetja e çantës me armën që ky shtetas tentoi të fshihte duke e hedhur në det.

Në vijim të veprimeve procedurale, specialistët për Hetimin e Krimeve në Komisariatin e Policisë Sarandë arrestuan në flagrancë shtetasit:

E.D., 27 vjeç, banues në Kamëz, për veprat penale “Armëmbajtja pa leje” dhe “Kundërshtimi i punonjësit të policisë së rendit publik”;

I. G., 21 vjeç, banues në Kamëz, për veprat penale “Mos kallëzimi i krimit” dhe “Veprime që pengojnë zbulimin e së vërtetës”;

B. C., 27 vjeç, banues në Kamëz, për veprat penale “Mos kallëzimi i krimit” dhe “Veprime që pengojnë zbulimin e së vërtetës”, i cili rezultoi edhe person i shpallur në kërkim për veprat penale “Sigurimi i kushteve dhe i mjeteve materiale për të kryer vrasje” dhe “Mbajtja pa leje dhe prodhimi i armëve luftarake”. Arma e zjarrit (pistoletë), municioni luftarak dhe automjeti tip “Porsche” u sekuestruan në cilësinë e provës materiale’, thuhet në njoftimin e policisë.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.

Në një postim në rrjetet sociale, kryeministri Edi Rama ka publikuar sot pamje të reja nga lumi Buna, duke njoftuar për përfundimin me sukses të fazës së dytë të pastrimit në zonën e Dajlanit, në Shkodër.

Gjithashtu kryeministri shkruan se pas shumë vitesh, lumi tashmë rrjedh i lirë në shtratin e tij natyral, si rezultat i ndërhyrjeve të realizuara në dy faza të ndryshme.

 “Mirëmëngjes dhe me lumin Buna, që pas shumë vitesh rrjedh i lirë në shtratin e vet, pas mbylljes me sukses të fazës së dytë të ndërhyrjes për pastrimin e çlirimin e shumëpritur të zonës së Dajlanit në Shkodër, ju uroj një fundjavë të mbarë”, shkroi Rama.

Pastrimi i shtratit të lumit Buna si projekt nisi me një fazë të parë që përfshinte heqjen e rrjetave dhe pinarëve, elementë që pengonin rrjedhën natyrore të ujit dhe dëmtonin ekosistemin lokal.

Ndërkohë faza e dytë u përqendrua në largimin e strukturave metalike dhe objekteve të tjera të mëdha, të cilat kërkonin ndërhyrje të specializuar dhe pajisje specifike.

Falë golit në minutat e fundit të Riola Xhemailit Zvicra është për herë të parë në çerekfinalen e Kampionati Evropian të Femrave. Lojtarja me origjinë nga Kosova përballet shpesh me armiqësi në rrjetet sociale.

“Ende nuk mund ta kuptoj plotësisht se si ndodhi. Pulsin e kisha ndoshta 200”, tha Riola Xhemaili pas fishkëllimës për përfundimin e ndeshjes. “Është një ëndërr.”Me golin e saj që e bëri në kohën shtesë 1-1 rezultatin në ndeshjen kundër Finlandës, lojtarja zvicerane me origjinë kosovare parandaloi eliminimin e Zvicrës në fazën e grupeve të Kampionatit Evropian EURO 2025.

Tani skuadra zvicerane e futbollit të femrave është për herë të parë mes tetë skuadrave më të mira në një Kampionat Evropian. Në çerekfinale ajo të përballet me Spanjën ose Italinë. “Ky është moment historik”, tha trajnerja e kombëtares së Zvicrës, suedezja Pia Sundhage.

Xhemaili shënon golin vendimtar

“Që kur po bëja nxehjen po mendoja: ‘Pia, më fut në fushë, ndihem mirë’”, tha Xhemaili. “E dija që do ta shënoja atë gol.” Trajnerja Sundhage e zëvendësoi 22-vjeçaren në minutën e 82-të. Në këtë moment zviceranet ishin 1-0 në disavantazh kundër Finlandës. Humbja do të thoshte eliminim nga Kampionati Evropian.

Dhjetë minuta pasi hyri në fushë, Xhemaili jo vetëm që i çoi në eufori 26,388 spektatorët në stadiumin e Gjenevës, por dhe të gjithë Zvicrën: Pas një krosimi të mprehtë të Géraldine Reuteler, ajo ishte në vendin e duhur dhe shënoi gol në portën finlandeze nga një distancë prej katër metrash.

Rrugë jo e lehtë

Karriera e Riola Xhemailit sifutbolliste nuk ishte e lehtë. Pas dy vitesh të mira në klubin gjerman të Bundesligës, SC Freiburg, lojtarja zvicerane u transferua në vitin 2023 në klubin kryesues VfL Wolfsburg. Por atje ajo nuk mundi të afirmonte veten.

Në vitin 2024 klubi Wolfsburg e huazoi Xhemailin te klubi holandez PSV Eindhoven. Aty ajo pati një nisje të shkëlqyer: me 14 gola dhe gjashtë pasime që përfunduan në gola ajo luajti një rol kyç që sezonin e kaluar PSV Eindhoven u bë nënkampione pas FC Twente. Shpërblimi: Eindhoveni ia shndërroi e Riola Xhemailit kontratën e huazimit në  kontratë të përhershme deri në vitin 2028.

Por trajnerja e ekipit kombëtar zviceran, Pia Sundhage, e mbajti atë në pritje për një kohë të gjatë. Vetëm në fillim të qershorit ajo e aktivizoi sulmuesen për herë të parë këtë vit në ndeshjen e Ligës së Kombeve kundër Norvegjisë. Pas kësaj Riola Xhemaili u bë më në fund pjesë e skuadrës së Kampionatit Evropian.

Me vëllain binjak në një ekip

Riola Xhemaili është lindur në Solothurn në vitin 2003. Si shumë shqiptarë të Kosovës edhe prindërit e saj kishin emigruar në Zvicër. Shumë lojtarë kyç në ekipin kombëtar zviceran të meshkujve kanë gjithashtu rrënjë kosovare, ndër ta dhe yjet e Bundesligës Xherdan Shaqiri dhe Granit Xhaka.

“Karriera ime filloi në volejboll dhe ishte rastësi që futbolli më hyri në zemër”, thotë Xhemaili.

“Kjo ndodhi kur po shikoja vëllain tim binjak, Rion Xhemaili. E pashë kur luante me teknikën e tij të mirë dhe shpirtin e tij luftarak.”

Në fillim, binjakët stërviteshin së bashku në një ekip fëmijësh të Solothurnit. Pastaj shtigjet e tyre të futbollit u ndanë. Vëllai Rion tani luan për ekipin e të rinjve të klubit zviceran të kategorisë së parë FC Winterthur.

Komente plot urrejtje në rrjetet sociale

Në vitin 2020 Riola Xhemaili debutoi për ekipin kombëtar të Zvicrës. Meqenëse ai vendosi të luajë për Zvicrën, ku ishte lindur, në vend të ekipit të Kosovës, futbollistja ende sulmohet shpesh në rrjetet sociale.

Ajo kërcënohet rregullisht dhe familja e saj fyhet, shkroi Xhemaili në Instagram në gusht të vitit 2024: “Unë luaj për Zvicrën për të treguar se jam mirënjohëse që jam rritur në një vend kaq të mrekullueshëm.” Më tej ajo sqaron: “Rrënjët e mia janë nga Kosova. Kjo do të mbetet gjithmonë kështu dhe nuk do të ndryshojë kurrë. Ne të gjithë duhet të ndajmë të njëjtat vlera dhe të mos përhapim urrejtje të panevojshme.” DW

Gjatë dimrit një dron rus dëmtoi mbulesën mbrojtëse të centralit bërthamor të mbyllur Çernobil. Ekspertët tani kanë zhvilluar një koncept për të paktën restaurim të pjesshëm të sistemit shumë kompleks.

Rusia i ka shtuarsulmet kundër Ukrainës në mënyrë masive, po në shkurt lajmi nga vendi i shkatërruar nga lufta tronditi të gjithë Evropën.  Një dron kamikaz rus, prodhim iranian kishte rënë në Çernobil. Më saktësisht në bllokun 4 të reaktorit të centralit bërthamor të çaktivizuar. Kjo rizgjoi kujtimet e errëta të vitit 1986, kur në atë reaktor ndodhi aksidenti më i rëndë bërthamor në historinë e njerëzimit.

Dëmtime të rënda

Droni dëmtoi guaskën mbrojtëse që kishte mbrojtur reaktorin që nga viti 2019 dhe kishte për qëllim të parandalonte daljen e radioaktivitetit. Ky lajm u harrua shpejt sepse ekspertët nuk mundën të matnin ndonjë rritje të radioaktivitetit në reaktor. Megjithatë, ndikimi i dronit pati pasoja të rënda. Droni depërtoi murin e jashtëm prej çeliku të rrethimit mbrojtës, i njohur në zhargonin teknik si “Mbyllja e Re e Sigurt”-“New Safe Confinement”. Rreth nëntë metra më poshtë është edhe një mur i brendshëm – pjesë të dronit gjithashtu e depërtuan atë. Megjithatë, hapësira midis dy mureve luajti një rol vendimtar në konceptin e sigurisë.

Ekspertët vendas mendojnë se mbulesa mbrojtëse, ndërtimi i së cilës kushtoi mbi dy miliardë euro, ndoshta nuk do të funksionojë dot më siç ishte planifikuar. Riparimi i plotë ka gjasa të kryhet, tha për portalin gjerman, tagesschau.de Artem Siryj, menaxher i operacioneve në mbulesën mbrojtëse, por sigurimi i burimeve financiare ndoshta nuk do të jetë i mundur.

Ndërkohë specialistë nga Ukraina dhe ndërkombëtarë kanë zhvilluar një koncept për mbylljen e vrimave dhe të paktën mbylljen hermetike të murit të brendshëm, tha Siryj. Kjo do të sigurojë mbrojtje të mirë. Siryj shpreson që punimet të fillojnë këtë vit. Mbulesa aktuale mbrojtëse u financua nga një fond i kontribuar nga vendet donatore dhe nga Banka Evropiane për Rindërtim dhe Zhvillim (BERZH). Zyrtarët në Ukrainë shpresojnë për mbështetje të mëtejshme nga BERZH. DW

Sipas të dhënave të OHCHR-së gjatë 10 javëve të fundit në Rripin e Gazës janë vrarë 798 vetë në përpjekje për të marrë ndihma humanitare.

Zyra e Komisionerit të Lartë të OKB-së për të Drejtat e Njeriut (OHCHR) njofton se që nga fundi i muajit maj në Rripin e Gazës janë vrarë të paktën 798 vetë, që po përpiqeshin të merrin ndihma.

Sipas zëdhënëses së OHCHR-së, Ravina Shamdasani, 615 prej këtyre vdekjeve janë regjistruar në ose pranë qendrave të shpërndarjes së ndihmave humanitare që operohen nga Fondacioni Humanitar i Gazës (GHF), i cili mbështetet nga SHBA dhe Izraeli.

Krime mizore

Ravina Shamdasan tha se OHCHR është sidomos e shqetësuar në lidhje me “krimet mizore që kryhen aty ku njerëzit rrinë në radhë për të marrë ndihma jetike, siç janë ushqimet”.

“Gati 800 vetë janë vrarë ndërsa përpiqeshin të merrnin ndihma”, tha ajo. “Dhe shumica e të plagosurve kanë plagë nga të shtëna me armë zjarri,” shtoi ajo.

183 persona të tjerë janë vrarë “me sa duket pranë konvojeve të ndihmave” të OKB-së dhe të organizatave të tjera të ndihmave në Territoret Palestineze, u tha ajo gazetarëve në Gjenevë.

Cili është roli i GHF-së?

Veprimtaria e GHF-së, e cila ka paralizuar në fakt rrjetin e gjerë të shpërndarjes së ndihmave të OKB-së në Gazë, është shoqëruar nga skena kaotike dhe është dëmtuar prej raportime pothuajse të përditshme për forcat izraelite që qëllojnë mbi civilët që përpiqen të marrin ndihmë.

Shifrat e publikuara nga OKB-ja flasin për të paktën 10 vetë të tjerë që u vranë të premten pranë një pike shpërndarjeje ndihmash në Rafah, një qytet në Rripin jugor të Gazës. Rreth 70 vetë të tjerë u plagosën gjatë një incidenti, njoftoi autoriteti shëndetësor i Gazës i kontrolluar nga Hamasi. DW

3 radarë inteligjentë “Poliscan” do të monitorojnë të gjitha akset rrugore në 24 orë, për 7 ditë të javës. Sipas Policisë Rrugore këto radarë do të jenë krahas mjeteve të tjera inteligjente dhe radarëve automatikë, për të parandaluar aksidentet dhe për të rritur parametrat e sigurisë në rrugë.

Policia Rrugore po intensifikon kontrollet në terren, duke përdorur pajisje teknologjike të avancuara për matjen e shpejtësisë dhe identifikimin automatik të shkelësve, jo vetëm për shpejtësinë, por edhe për disa shkelje të tjera që përbëjnë rrezik potencial për përfshirje në aksidente rrugore, si: përdorimi i celularit gjatë drejtimit të mjetit, parakalimet e gabuara dhe mosvendosja e rripit të sigurimit.

‘Qëllimi nuk është masa administrative, por parandalimi i aksidenteve, nëpërmjet ndërgjegjësimit të përdoruesve të rrugës. Kujdes: tejkalimi i shpejtësisë është një nga shkaktarët kryesorë të aksidenteve rrugore me pasoja fatale. Respektoni rregullat e qarkullimit rrugor!’, thuhet në njoftimin e policisë.