Pasditen e sotme, të gjithë administratorët e njësive administrative në Bashkinë Shkodër kanë paraqitur dorëheqjen nga pozicionet e tyre pranë institucionit të Bashkisë.

Lajmi është konfirmuar nga vetë Bashkia e Shkodrës me anë të një njoftimi zyrtar, të shpërndarë për mediat.

‘Në përgjigje të interesit të mediave, ju bëjmë me dije se të gjithë administratorët e njësive administrative në Bashkinë Shkodër kanë paraqitur dorëheqjen nga pozicionet e tyre pranë institucionit të Bashkisë’, thuhet në njoftimin e Bashkisë.

Kujtojmë se kreu i qeverisë ka urdhëruar “pastrim” të stafit të administratës dhe ristrukturim duke u hapur rrugë emërimeve të reja.

Në mbledhjen e sotme me deputetë e drejtorë të bashkisë Tiranë, Rama vuri theksin te një sërë reformash që do mundësojnë shërbime më efikase ndaj qytetarëve.

Zëvendëskryeministrja e Republikës së Shqipërisë, Belinda Balluku, zhvilloi një takim me drejtorët e Bashkisë Lushnjë, në ambjentet e këtij institucioni.

Duke marrë për bazë ultimatumin e kreut të qeverisë, Edi Rama, për reformimin dhe rritjen e performancës së pushteti vendor në vend, Balluku u ka kërkuar dorëheqjen 13 drejtorëve të kësaj bashkie. Lajmi konfirmohet nga gazetarja, Anila Sefa.

Pas kësaj, të gjithë drejtorët do t’i nënshtrohen një interviste dhe në bazë të performancës do të vendoset nëse do qëndrojnë apo do lirojnë pozicionin e punës që ata kanë mbajtur më parë.

Përveçse takimit me drejtorët, Balluku zhvilloi mbledhje dhe me 15 kryetarët e njësive administrative. Këtyre të fundit, u kërkoi dorëheqjen e menjëhershme, duke zbatuar kështu urdhrin e kryeministrit Rama.

Këto takime të Ballukut, u bënë në prezencë të kryebashkiakes, Eriselda Sefa, ministrin e Financave, Petrit Malaj, e deputetët Elton Korreshi, Asforald Haxhiu dhe Kiduana Zaka.

Kujtojmë, se dorëheqjet deri më tani janë paraqitur në bashkitë Elbasan, Vlorë, Fier dhe Durrës.

Serbia dhe Kina pritet të zhvillojnë stërvitje të përbashkët ushtarake për herë të parë kah fundi i këtij muaji, njoftoi Ministria e Mbrojtjes e Kinës të hënën.

Pjesë e ushtrimeve të përbashkët “Paqeruajtësit 2025” do të jenë forcat speciale të Serbisë dhe Kinës dhe stërvitja do të zhvillohet në provincën Hebei, në Kinën veriore, tha koloneli Jiang Bin, zëdhënës i Ministrisë kineze të Mbrojtjes, në një konferencë për shtyp, sipas Ministrisë.

“Ky do të jetë stërvitja e parë e përbashkët midis ushtrive kineze dhe serbe. Do të kontribuojë në forcimin e aftësive luftarake të pjesëmarrësve dhe thellimin e bashkëpunimit midis dy ushtrive”, tha ai.

Serbia është ushtarakisht neutrale, por është anëtare e “Partneritetit për Paqe”, një program bashkëpunimi dypalësh midis NATO-s dhe vendeve individuale jo-anëtare.

Beogradi zyrtar mban marrëdhënie të mira me Kinën dhe këto dy vende e cilësojnë bashkëpunimin e tyre të ndërsjellë si partneritet strategjik, ndërsa Serbia është kandidate për anëtarësim në Bashkimin Evropian.

Autoritetet në Beograd po mbështeten në përkrahjen e Kinës në organizatat dhe institucionet ndërkombëtare në kundërshtimin e pavarësisë së Kosovës.

Serbia gjithashtu mbështeten te Kina për investime ekonomike dhe kredi./rel

Java që sapo ka nisur pritet të jetë e mbushur me energji impulsive dhe ngjarje të vrullshme, sipas parashikimit të astrologes Meri Shehu në emisionin “Rudina” në Tv Klan.

Me Hënën në shenjën e Dashit dhe një lidhje dinamike me Uranin në Binjak, kjo javë sjell një ndjesi të fortë lëvizjeje dhe shpërqendrimi, ku duket se gjithçka ndodh njëkohësisht.

Astrologia paralajmëroi se, ndonëse Afërdita në Binjak sjell mundësi të reja, përplasja e saj me Marsin në Virgjëreshë mund të shkaktojë tensione, veçanërisht në fushën ekonomike dhe emocionale.

“Është një javë shumë impulsive sepse fillon me Hënën në shenjën e Dashit, e cila bën një lidhje shumë të bukur me Uranin në Binjak dhe, si të themi, vrapojnë dhe nuk arrijmë dot. Kaq shumë ngjarje do të ketë, sa nuk dimë se çfarë të shikojmë më përpara. Pra, shpërqendrimi ekziston, por ekziston edhe ai vrulli që ne duhet të ecim përpara. Afërdita në Binjak jep shumë mundësi në fakt edhe në fillim të kësaj jave, por kundërshtimi me Marsin në Virgjëreshë u jep një lloj stresi çështjeve ekonomike ose pasigurive emocionale, në çështjet se si ne ndjehemi. Pra, jemi të gjithë në ndryshime dhe, duke qenë në ndryshime, bëjmë sherre dhe debate për atë që kemi në krah”, tha astrologia Meri Shehu.

Dashi, 2 yje: Fillimin e javës e kanë shumë të mirë, me Uranin në Binjak kanë shumë udhëtime dhe kontakte, dhe janë kaq shumë të shumta, sa Dashët nuk do të dinë se ku do të përqendrohen. Edhe Afërdita në Binjak, që u ka dhënë mundësi që ata të dinë se si të alternohen me të tjerët, godet nga Marsi në Virgjëreshë dhe u sjell disa pengesa me punën dhe ekonominë. Nuk do të jenë të kënaqur, ose me ndonjë flirt aty fillon sherri.

Demi, 3 yje: Do të merren më shumë me çështjet ekonomike. U fillon ai ndryshimi i madh që u jep sa më shumë shanse, por mund edhe të hutohen. Megjithatë, një ngërç i madh u ndodh kësaj jave në një marrëdhënie në çift. Duan shumë gjëra që duan t’i realizojnë, por do të hasin një ngërç ekonomik, ose një kundërshtim nga partneri apo partnerja. Do të jetë një javë me shumë xhelozi dhe debate.

Binjakët, 4 yje: Jupiteri në Gaforre, që do të vazhdojë gjatë gjithë verës dhe gjatë gjithë dimrit, është një stimul, një pikë e fortë në çështjet ekonomike. Por, Afërdita në shenjën e tyre ua ka ëmbëlsuar më shumë kontaktet dhe marrëdhëniet. Do të kenë një debat familjar gjatë kësaj jave; duhet të kenë kujdes.

Gaforrja, 3 yje: Janë në një moment shumë të bukur, por një e fshehtë në jetën personale ose një prapaskenë në punë fillon dhe ngre disa debate. Kujdes në mënyrën se si do të justifikohen dhe sa do ta durojnë sulmin që do t’u vijë nga njerëzit e afërt. Megjithatë, Jupiterin e kanë në shenjën e tyre dhe janë në mbrojtje.

Luani, 3 yje: Janë në ditë shumë të bukura; do të kenë kontakte, dalje, do të bien në sy, do të jenë në qendër të vëmendjes. Por, do të bien më shumë në sy nga sa duhet dhe do të duket sikur kanë anë ekonomike më shumë nga sa kanë në të vërtetë. Do t’u bëhet një kërkesë ekonomike, që Luanët nuk do të kenë mundësi që ta realizojnë dot, në disa premtime që kanë dhënë ose u kanë dhënë.

Virgjëresha, 1 yll: Marsi vazhdon të jetë në shenjën e tyre dhe i ka bërë impulsive, por këtë impulsivitet do ta drejtojnë kundër vetes së tyre në një moment shumë të mirë. Urani në Binjak u premton një ngritje në karrierë, më modern dhe nuk i lë stabël, por është edhe Afërdita në Binjak në çështjet e karrierës, por duket sikur nuk do të jenë të kënaqur dhe, dashur pa dashur, i bëjnë një sulm vetes.

Peshorja, 3 yje: Është një nga shenjat që do të marrë më shumë zhvillim me çështjet e komunikimit me jashtë, më shumë biseda, kontakte, por edhe këto kanë ndonjë problematikë të vogël, ose me punën, ose me ndonjë shpërblim. Mund të kenë një xhelozi përbrenda që nuk do t’i lërë të shijojnë momentet e bukura të komunikimeve dhe të kontakteve.

Akrepi, 2 yje: Jupiteri në Gaforre premton shumë dhe është një verë shumë e këndshme për Akrepin, dhe korriku do të jetë një nga muajt që do të shijojnë më shumë. Por, u ka dalë një punë, ose duan të bëjnë një punë, që nuk po i lë të shijojnë sa duhet pushimet dhe ta shikojnë xhepin e tyre plot. Nga ana tjetër, xhelozitë në flirtime do t’u ngacmojnë pak nervat.

Shigjetari, 2 yje: Pavarësisht se janë flamurtarë të një pune ose të një ngritjeje në karrierë, në një farë mënyre do të mohojnë një bashkëpunim shumë të mirë. Nuk do ta shikojnë mirë një bashkëpunim, një marrëdhënie të re ose një rast të mirë në jetën e tyre personale. Ngaqë nuk do ta marrin në konsideratë, do të humbasin një rrugë të re për t’i shkuar nga mbrapa një qëllimi të vjetër.

Bricjapi, 1 yll: Kanë periudhën më të mirë që lidhet me punën, por do të kenë një problem ligjor. Gjithashtu, do të kenë edhe një problem, keqkuptim nga një bashkëpunëtor ose nga një mik i afërt, që ua errëson këtë moment dhe nuk i lë që ta shijojnë. Mund të jetë një person nga e kaluara, por edhe një problem i tyre i brendshëm që nuk i lë të shijojnë momentet e bukura.

Ujori, 4 yje: Janë një nga shenjat më të favorizuara për momentin në dashuri. Urani është futur në Binjak dhe dominon të gjitha llojet e komunikimeve. Këta janë modernë në komunikim. Çdo gjë që u del para, do ta bëjnë për vete. E vetmja gjë që do t’i pengojë do të jenë çështjet ekonomike.

Peshqit, 3 yje: Do të merren shumë me ekonominë dhe do të gjejnë një rrugë të re për të ringritur çështjet e tyre ekonomike, një ide dhe një iniciativë e re, e cila do të ecë jashtë mase mirë. Duhet të kenë kujdes vetëm nga bashkëpunëtorët, nga antagonizmat, nga xhelozitë në çift dhe, mesa kuptoj, të gjitha marrëdhëniet në çift do të kenë xhelozira./tvklan.al

Sekretari i ri i përgjithshëm i NATO-s, Mark Rutte zhvilloi ditën e sotme një takim me presidentin e SHBA-së, Donald Trump.

Teksa foli pas takimit, Rutte e ka cilësuar një “marrëveshje vërtet të rëndësishme” akordin që ai njoftoi së bashku me presidentin Trump, për ndihmën ushtarake ndaj Ukrainës.

Rutte bëri të ditur se Trump e kishte kontaktuar të enjten, duke i shprehur gatishmërinë për të furnizuar Ukrainën me pajisje ushtarake të domosdoshme për mbrojtjen ndaj Rusisë – por me kusht që koston ta mbulojnë vendet europiane, gjë që Rutte e quajti “krejtësisht të arsyeshme”.

“Marrëveshja bazohet në suksesin e madh të samitit të fundit të NATO-s dhe tregon se vendet europiane po angazhohen gjithnjë e më shumë për mbështetjen e Ukrainës,” deklaroi Rutte.

Ai konfirmoi se disa shtete kanë shprehur gatishmërinë për t’u bashkuar me marrëveshjen, përfshirë Finlandën, Danimarkën, Suedinë, Norvegjinë, Mbretërinë e Bashkuar, Holandën dhe Kanadanë.

Sipas tij, marrëveshja do t’i mundësojë Ukrainës të marrë “një sasi të konsiderueshme të pajisjeve ushtarake – që nga mbrojtja ajrore e deri te raketat dhe municionet”.

Shefi i NATO-s kritikoi edhe veprimet e fundit të Rusisë, duke i quajtur sulmet ndaj qyteteve ukrainase si “të papërshkrueshme dhe pa lidhje me objektiva ushtarakë”, me qëllim kryesor përhapjen e panikut mes civilëve.

Rutte i bëri thirrje presidentit rus Vladimir Putin që të marrë seriozisht paralajmërimin e fundit të Donald Trump, i cili i ka vendosur afat prej 50 ditësh për të arritur një marrëveshje paqeje me Kievin – në të kundërt, SHBA do të vendosë sanksione dytësore ndaj Rusisë, me efekte që arrijnë deri në 100%.

“Nëse do isha në vendin e Vladimir Putinit pas kësaj deklarate, do ta rishikoja me serioz qasjen ndaj negociatave për Ukrainën,” përfundoi Rutte.

Ura mbi Lumin Mat, në aksin e vjetër rrugor Lezhë–Milot, shumë shpejt pritet të ketë fatin e Urës së Zogut.

Drejtuesit e automjeteve shprehen se mirëmbajtja apo edhe investimet në këtë urë kanë munguar që prej kohës kur është ndërtuar.

“U bënë vite që kjo është copë-copë”, tha një shofer.

Këmbët e strukturës së urës kanë dalë në sipërfaqe dhe janë anuar në disa vende, ndërsa hapësirat mes trarëve lidhës janë zgjeruar, duke vështirësuar lëvizjen e automjeteve.

“Për t’iu shmangur gropës, unë i bie tjetrit, kjo është shumë problematike. Na ka ardhur majë hundës”, tha shoferi.

Që prej ndërtimit të superstradës Lezhë–Laç, ura e vjetër mbi Lumin Mat në qarkun e Lezhës nuk po merr vëmendjen e duhur, pavarësisht se numri i automjeteve që kalojnë aty është i madh.

Autoritetet lokale në Lezhë thonë se, përmes shkresave, ua kanë përcjellë shqetësimin institucioneve qendrore, por deri më tani asnjë masë nuk është ndërmarrë.

Klan News

Presidenti i Shteteve të Bashkuara, Donald Trump, ka thënë të hënën se do ta ndëshkojë Rusinë me tarifa, nëse nuk arrihet një marrëveshje brenda 50 ditëve për t’i dhënë fund luftës në Ukrainë.

Presidenti republikan e bëri këtë njoftim gjatë një takimi në Zyrën Ovale me sekretarin e përgjithshëm të NATO-s, Mark Rutte.

“Do të vendosim tarifa shumë të rënda, nëse nuk kemi marrëveshje brenda 50 ditëve”, tha Trump.

Ai nuk dha hollësi për mënyrën se si do të zbatoheshin tarifat.

“Unë e përdor tregtinë për shumë gjëra” shtoi ai. “Por, ajo është mënyrë shumë e mirë për t’i zgjidhur luftërat”.

Rutte synon gjithashtu të zhvillojë bisedime me sekretarin amerikan të Mbrojtjes, Hegseth, dhe sekretarin e Shtetit, Marco Rubio, si edhe me anëtarë të Kongresit.

Ndërkohë, i dërguari i posaçëm i Trumpit për Ukrainën, Keith Kellogg, u takua më herët gjatë ditës në Kiev me presidentin ukrainas, Volodymyr Zelensky, për të biseduar rreth mbështetjes ushtarake për Ukrainën.

“Biseduam për rrugën drejt paqes dhe çfarë mund të bëjmë së bashku më saktësisht për të ardhur më afër paqes. Kjo përfshin forcimin e mbrojtjes ajrore të Ukrainës, prodhimin dhe blerjen e përbashkët të armëve mbrojtëse në bashkëpunim me Evropën”, shkroi Zelensky në X.

Kievi dhe qytete të tjera në Ukrainë janë vënë në shënjestër të sulmeve të shumta ajrore nga forcat ruse javët e fundit, duke i zemëruar Trumpin dhe zyrtarë të tjerë në Uashington, të cilët kanë filluar të dyshojnë nëse presidenti rus, Vladimir Putin, ka vërtet për qëllim të zhvillojë bisedime për paqe për t’i dhënë fund konfliktit më të gjatë dhe më vdekjeprurës në Evropë që nga përfundimi i Luftës së Dytë Botërore.

Trump, i cili ka folur me Putinin gjashtë herë me telefon që kur mori detyrën, ka shprehur gjithnjë e më shumë zhgënjim për refuzimin e Putinit për të rënë dakord për një armëpushim.

Kritikat më të ashpra të Trumpit ndaj Putinit janë të dukshme, pasi ai ka një histori komentesh pozitive dhe lavdëruese për liderin rus. Trump e ka quajtur atë të “mençur” dhe vitin e kaluar tha se kishte “marrëdhënie shumë të mira” me Putinin.

Javën e kaluar, Trump kritikoi hapur Moskën sërish.

“Jam i zhgënjyer me Rusinë, por do të shohim çfarë ndodh në javët në vijim”, i tha ai NBC News.

Gjykata Themelore në Prishtinë i ka shpallur fajtorë dhe i ka dënuar me nga një vit burgim secilin ish-kryeministrin e vendit, Agim Çeku, dhe 9 të akuzuar të tjerë në rigjykimin e rastit “Veteranët”, ndërsa i ka liruar plotësisht nga akuzat dy të tjerë.

Çeku, ish-ministri i Mbrojtjes Rrustem Berisha, ish-deputeti Shkumbin Demalijaj, pastaj Sadik Halitjaha, Qelë Gashi, Shukri Buja, Ahmet Daku, Faik Fazliu, Fadil Shurdhaj dhe Xhavit Jashari u gjetën fajtorë për keqpërdorim të detyrës duke i shkaktuar buxhetit të shtetit dëme në vlerë mbi 88 milionë euro.

Nuredin Lushtaku dhe Smajl Elezaj u shpallën të pafajshëm për akuzat e njëjta.

Gjykatësi Gazmend Bahtiri tha se Nuredin Lushtaku dhe Smajl Elezaj lirohen nga akuza “pasi nuk kanë pasur cilësinë e personit zyrtar”.

Bahtiri shtoi se pas administrimit të provave personale dhe materiale, përtej dyshimit të bazuar mirë, është vërtetuar se të akuzuarit kanë kryer veprën penale, raporton Betimi për Drejtësi.

Ky rast u kthye në rigjykim më vendim të Gjykatës së Apelit në vitin 2022, pasi Gjykata Themelore i kishte liruar nga akuzat që të gjithë 12 të pandehurit në vitin 2021.

Sipas prokurorëve, numri i përfituesve të jashtëligjshëm nga statusi i veteranëve mund të jetë deri në 19 mijë njerëz.

Bahtiri shtoi se Gjykata nuk ka mundur ta identifikojë secilin prej 19 mijë e 500 aplikacioneve për statusin e veteranit, andaj vlerëson se duhet të shqyrtohet procedura përkatëse pastaj të merret vendim se a gëzojnë statusin e veteranit apo jo.

Sipas aktakuzës së përgatitur nga ish-prokurori special, Elez Blakaj, personat e përfshirë thuhet se prej vitit 2011 deri në vitin 2017, duke vepruar si anëtarë të Komisionit Qeveritar për Njohjen dhe Verifikimin e Statusit të Dëshmorit të Kombit, Invalidit, Veteranit, Pjesëtarit dhe të Internuarit të Luftës së Ushtrisë Çlirimtare të Kosovës, shfrytëzuan detyrën dhe autoritetin zyrtar, duke tejkaluar kompetencat me dashje dhe duke mos i përmbushur detyrat zyrtare, me qëllim që të përfitojnë personat e tjerë në mënyrë të kundërligjshme, në vazhdimësi, në dëm të buxhetit të shtetit.

Sipas të dhënave të Qeverisë së Kosovës, statusin e veteranit luftëtar e kanë mbi 53 mijë persona.

Prej tyre, gati 37 mijë janë përfitues nga skema për veteranët e luftës, sipas të dhënave të Agjencisë së Statistikave të Kosovës.

Veteranët e luftës së viteve 1998-‘99 në Kosovë, të cilët janë të papunësuar, marrin pension mujor që nga viti 2015.

Pas rritjes së fundit në janar të këtij viti për 20 për qind, pensioni i tyre mujor është 204 euro./rel

I dërguari i posaçëm amerikan për Ukrainën, Keith Kellogg, u takua të hënën në Kiev me presidentin ukrainas, Volodymyr Zelensky, për të biseduar rreth mbështetjes ushtarake për Ukrainën.

Takimi i tyre ndodhi midis sulmeve të pareshtura ruse dhe në prag të një “njoftimi të rëndëshishëm” që presidenti amerikan, Donald Trump, ka premtuar se do të bëjë në lidhje me qasjen e Uashingtonit ndaj Rusisë.

“Biseduam për rrugën drejt paqes dhe çfarë mund të bëjmë së bashku më saktësisht për të ardhur më afër paqes. Kjo përfshin forcimin e mbrojtjes ajrore të Ukrainës, prodhimin dhe blerjen e përbashkët të armëve mbrojtëse në bashkëpunim me Evropën”, shkroi Zelensky në X.

“Dhe, natyrisht, diskutuam sanksionet ndaj Rusisë dhe atyre që e ndihmojnë atë”, shtoi ai, duke theksuar se “është e qartë se Moska nuk do të ndalet përveç nëse ambiciet e saj të paarsyeshme frenohen me forcë”.

Kievi dhe qytete të tjera në Ukrainë janë vënë në shënjestër të sulmeve të shumta ajrore nga forcat ruse javët e fundit, duke i zemëruar Trumpin dhe zyrtarë të tjerë në Uashington, të cilët kanë filluar të dyshojnë nëse presidenti rus, Vladimir Putin, ka vërtet për qëllim të zhvillojë bisedime për paqe për t’i dhënë fund konfliktit më të gjatë dhe më vdekjeprurës në Evropë që nga përfundimi i Luftës së Dytë Botërore.

Madje një alarm për sulm ajror ra në Kiev menjëherë pas takimit mes Kelloggut dhe Zelenskyt.

Pak orë më herët, Trump premtoi se do të dërgojë sisteme shtesë të mbrojtjes ajrore, Patriot, në Ukrainë, duke shfaqur një ndryshim të politikës së tij, i cili përkon me deklaratën e tij për një qasje të re të Uashingtonit ndaj Rusisë.

Në komentet e bëra në mbrëmjen e 13 korrikut, Trump nuk dha hollësi për dërgesat e planifikuara të sistemeve Patriot në Kiev — të cilat Ukraina i ka kërkuar prej kohësh dhe i konsideron thelbësore për mbrojtjen e qyteteve të saj nga sulmet ajrore ruse.

Ai gjithashtu e kritikoi Putinin, në një seri komentesh negative ndaj presidentit rus.

“Do t’ua dërgojmë Patriotët, sepse ata kanë shumë nevojë për to, pasi Putini i befasoi shumë njerëz”, tha Trump për gazetarë në një bazë ushtarake amerikane pranë Uashingtonit.

“Ai flet ëmbël dhe pastaj bombardon të gjithë në mbrëmje… Nuk më pëlqen”, shtoi ai.

“Bashkimi Evropian po paguan për këtë. Ne nuk po paguajmë asgjë, por do t’i dërgojmë”, shtoi Trump, pa përmendur vendet e BE-së që do të përfshiheshin në një marrëveshje të tillë.

Administrata Trump kishte njoftuar më herët këtë muaj se do të ndalonte disa furnizime me armë për Kievin.

Megjithatë, Trump, i cili ka folur me Putinin gjashtë herë me telefon që kur mori detyrën, ka shprehur gjithnjë e më shumë zhgënjim për refuzimin e Putinit për të rënë dakord për një armëpushim.

Kritikat më të ashpra të Trumpit ndaj Putinit janë të dukshme, pasi ai ka një histori komentesh pozitive dhe lavdëruese për liderin rus. Trump e ka quajtur atë të “mençur” dhe vitin e kaluar tha se kishte “marrëdhënie shumë të mira” me Putinin.

Javën e kaluar, Trump kritikoi hapur Moskën sërish.

“Jam i zhgënjyer me Rusinë, por do të shohim çfarë ndodh në javët në vijim”, i tha ai NBC News.

Përveç baterive të reja Patriot, nuk është ende e qartë se çfarë tjetër do të njoftojë Trump.

Sipas faqes së lajmeve Axios, që citon dy persona të njohur me planin, Trump mund të njoftojë për një politikë “agresive” që do të përfshinte edhe armë sulmuese.

Shtetet e Bashkuara kanë dërguar tri bateri raketash Patriot në Ukrainë, të gjitha gjatë administratës së presidentit Joe Biden.

Patrioti është një nga sistemet më të avancuara të mbrojtjes ajrore në botë, i aftë të shkatërrojë raketa balistike dhe lundruese.

Ushtarë gjermanë të caktuar në Flotën e Mbrojtjes Ajrore dhe Raketore të Sipërfaqes Nr. 1 qëllojnë me sistemin e armëve Patriot në
Ukraina ka marrë gjithashtu edhe katër bateri të tjera Patriot: tri nga Gjermania dhe një nga një grup vendesh të tjera.

Një nga aleatët më të fortë të Trumpit, senatori Lindsey Graham, i dha më shumë peshë spekulimeve se Trump mund të rrisë furnizimin me armë për Kievin, duke thënë se “në ditët në vijim, do të shihni që armët do të rrjedhin në një nivel rekord për të ndihmuar Ukrainën të mbrohet”.

“Një nga llogaritjet më të gabuara që ka bërë Putini është përpjekja për të manipuluar Trumpin. Dhe vetëm pritni, në ditët dhe javët që vijnë do të ketë një përpjekje të madhe për ta sjellë Putinin në tryezën e bisedimeve”, tha Graham për CBS News.

Rusia e ka rritur ndjeshëm numrin e sulmeve me raketa dhe dronë këtë vit, me shifra që janë rritur çdo muaj që nga dhjetori, dhe ka intensifikuar bombardimet në Kiev dhe qytete të tjera javët e fundit, ndërsa gjithashtu ka vazhduar të avancojë në vijën e frontit — megjithëse me humbje të mëdha në radhët e trupave të saj.

Dorëheqja morale nuk është e kërkuar me ligj, por reflekton nivelin e integritetit të institucioneve. Në Kosovë, ky akt mbetet i rrallë dhe shfaqet kryesisht pas presionit publik.

Tahir Latifi, profesor i Antropologjisë në Universitetin e Prishtinës, thotë se përgjegjësia morale shkon përtej lidhjes direkte me një dëm apo mossukses institucional. Ajo është pjesë e vetë rolit udhëheqës, thotë ai për Radion Evropa e Lirë.

Javën e kaluar, komandanti i Policisë së Kosovës për rajonin e Lipjanit, Argjend Gashi, dha dorëheqje nga pozita, vetëm pak ditë pas vdekjes së një 27-vjeçari, gjatë arrestimit nga policia.

Ai e bëri kërkesën për lirim nga detyra dhe ajo iu miratua, pasi pesë policë u paraburgosën nën dyshimet për “vrasjen nga pakujdesia” të të riut.

Latifi, njohës i strukturës dhe organizimit shoqëror, thotë se dorëheqja e tillë e një drejtuesi institucional dërgon te publiku një mesazh gatishmërie për të marrë përgjegjësi – qoftë morale dhe pa përgjegjësi ligjore – dhe për të mos ndikuar në proceset hetimore ose ligjore që janë në zhvillim.

“Dorëheqja morale fillon ta rrisë besimin te qytetarët, duke treguar se njerëzit në institucione kanë nisur të ndjejnë njëfarë përgjegjësie. Pra, publikut i thotë se ‘ne po e pranojmë se është bërë një dëm – edhe nëse nuk kemi përgjegjësi direkte’”, shpjegon Latifi.

Ai thekson se veprimi i tillë ndihmon edhe në uljen e tensioneve në situata që kërkojnë përgjegjësi nga udhëheqësit institucionalë, por nënvizon se kjo praktikë në Kosovë është e rrallë.

Nga tragjedia te dorëheqja: Rastet e rralla në Kosovë
Një shembull i fundit i dorëheqjes morale është edhe rasti i asamblistit të Komunës së Prizrenit, Shukri Quni, më 2 qershor.

Akti i tij pasoi një aksident automobilistik fatal në Nashec – fshat i kësaj komune – ku humbi jetën një 17-vjeçar.

Duke folur për Radion Evropa e Lirë, Quni tregon se e kishte ngritur më herët në Kuvendin Komunal çështjen e mungesës së sinjalistikës rrugore në atë zonë dhe, pas tragjedisë, thotë se ndjeu obligim moral të largohej nga pozita.

“Kur ti flet dhe fjala jote nuk zë vend, nuk merret parasysh, pse rri kot atëherë? E kam ndjerë obligim moral të jap dorëheqje, aty për aty, madje pa filluar mirë seanca. Nuk kam lejuar të diskutohet rendi i ditës – menjëherë kam dhënë dorëheqje dhe kam dalë jashtë”, thotë Quni.

Për të, ky veprim ishte përgjegjësi ndaj qytetarëve, sidomos atyre që e kishin votuar.

Në vitin 2022, dorëheqje morale dha edhe drejtori i përgjithshëm i Policisë së Kosovës, Samedin Mehmeti, pas rastit të përdhunimit të një 11-vjeçarjeje në Prishtinë nga pesë persona të dyshuar.

Po për këtë rast, nga pozita u vetëtërhoq edhe udhëheqësi i Drejtorisë për trajtimin e të burgosurve dhe të miturve në Shërbimin Korrektues të Kosovës, Ali Gashi.

Në vitin 2016, Xhelal Sveçla, asokohe drejtor i Inspektoratit në Komunën e Prishtinës, dha gjithashtu dorëheqje, pas vdekjes së dy fëmijëve në një pus të thellë të mbushur me ujë në lagjen Kolovicë.

Vdekja e dy fëmijëve ishte aksidentale, sipas Policisë së Kosovës, por Sveçla tha: “Nuk ndjej përgjegjësi ligjore, por njerëzore po”.

Sveçla – aktualisht ministër në detyrë i Punëve të Brendshme – u pyet nga gazetarët nëse do të japë dorëheqje pas rastit në Lipjan, por nuk u përgjigj.

Mbi 18 vjet më parë, në shkurt të 2007-ës, dorëheqje dha edhe ministri i atëhershëm i Punëve të Brendshme, Fatmir Rexhepi, pas vrasjes së dy personave në një protestë në Prishtinë.

Mon Balaj dhe Arben Xheladini humbën jetën pasi policia e Misionit të Kombeve të Bashkuara në Kosovë qëlloi me plumba gome në drejtim të protestuesve.

Rexhepi tha atëkohë se ndjen përgjegjësi morale ndaj qytetarëve dhe familjarëve të viktimave, pavarësisht se forcat nuk ishin nën komandën e tij direkte.

Kur dorëheqja shihet si dobësi
Burbuqe Kastrati nga Lëvizja FOL – që promovon transparencën dhe llogaridhënien në institucionet publike – thotë se, në vitet e pasluftës në Kosovë, dorëheqjet morale kanë qenë të rralla dhe jo pjesë e kulturës institucionale.

Ajo thotë se aktet e tilla nuk nënkuptojnë pranim të fajësisë ligjore për një ngjarje apo dëm publik.

“Dorëheqjet morale duhet të interpretohen si akt i përgjegjësisë. Kultura institucionale nuk nënkupton që institucionet të reagojnë vetëm kur janë nën presion, por të jenë llogaridhënëse para qytetarëve në çdo kohë”, thotë Kastrati për Radion Evropa e Lirë.

Praktikat, sipas saj, tregojnë se bartësit institucionalë zakonisht e shmangin përgjegjësinë kur përballen me dështime apo dëme të shkaktuara nga mosveprimi i institucionit.

Në nivelet politike, ajo thotë se dorëheqja morale perceptohet shpesh si “shenjë dobësie”.

“Çka vërejmë te qytetarët në Kosovë, është se kjo mungesë e përgjegjësisë institucionale është një nga faktorët kyçë të mosbesimit të qytetarëve në institucionet shtetërore në këso rastesh”, thotë Kastrati.

Një anketë e publikuar nga Programi për Zhvillim i Kombeve të Bashkuara (UNDP) në Kosovë, korrikun e vitit 2024, nxori në pah se “mesatarisht 50.1% e të anketuarve kanë qenë të kënaqur me punën e institucioneve qendrore kryesore të Kosovës”.

Në vitin 2022, Qendra Kosovare për Studime të Sigurisë publikoi po ashtu një raport, sipas të cilit, “besimi i qytetarëve në institucionet e gjykatave dhe prokurorisë në Kosovë është në rënie të vazhdueshme”.

Sipas atij raporti, besim të plotë në prokurori kanë pasur 13% e të anketuarve, ndërsa në gjykata 14%.

Besim më i theksuar në mesin e të anketuarve ka qenë në Policinë e Kosovës – me 46%.

Mentaliteti shoqëror dhe sfidat e ndërtimit të besimit
Latifi mendon se mungesa e besimit më të madh të qytetarëve ndaj institucioneve të Kosovës lidhet më shumë me mentalitetin shoqëror, i cili e ka origjinën në të kaluarën.

“Prej Perandorisë Osmane, 90 vjet Serbia, deri në fund të viteve ‘90 kur përfundoi lufta, pastaj administrimi ndërkombëtar… në shtetin e Kosovës nuk është arritur besimi i mjaftueshëm i qytetarit në institucion. Nuk është se ka humbur, por s’ka qenë asnjëherë”, thotë Latifi.

Ai shton se ndërtimi i një mentaliteti që e njeh përgjegjësinë institucionale si vlerë demokratike dhe kulturore, kërkon edukim të brezave të rinj, që nga arsimi fillor e tutje.

E, mendim të ngjashëm ndan edhe Kastrati. Përveçse në shkolla, ajo thotë se edukimi për përgjegjësinë institucionale duhet të bëhet edhe përmes medias dhe shoqërisë civile, duke rritur vetëdijen qytetare për të kërkuar llogaridhënie vazhdimisht dhe jo vetëm pas ngjarjeve tragjike.

Sipas saj, transparenca e institucioneve është çelësi për ndërtimin e afërsisë dhe besimit me qytetarët.

“Ne, si qytetarë, duhet të jemi të edukuar se këto janë institucione, të cilat duhet të na japin llogari dhe duhet të na shërbejnë për sigurinë dhe mirëqenien tonë të përbashkët”, thotë Kastrati.

Raporte të organizatave të ndryshme ndërkombëtare, si Transparency International, tregojnë se në Evropë, vendet skandinave prijnë në indeksin e transparencës dhe llogaridhënies në institucionet publike./rel

Një 41-vjeçar është arrestuar nga policia e Shkodrës, pasi akuzohet se ka kanosur me armë zjarri fqinjin e tij pas një konflikti mes tyre.

Në pranga ka rënë shtetasi Sirjan Jahja, banues në Dobraç.

Sipas njoftimit të policisë, dyshohet se për motive të dobëta 41-vjeçari ka qëlluar me armë zjarri pistoletë, në tokë, për të kanosur fqinjin e tij, shtetasin me iniciale A. K.

Njoftimi i policisë:

Shkodër/Ndërhyrja e shpejtë e Policisë parandalon një ngjarje të rëndë.

Kanosi fqinjin e tij, duke qëlluar me armë zjarri pistoletë, në fshatin Dobraç, kapet në flagrancë dhe vihet në pranga 41-vjeçari.

Sekuestrohet arma e zjarrit pistoletë.

Specialistët për Hetimin e Krimeve të Komisariatit të Policisë Shkodër, në bashkëpunim me shërbimet e Patrullës së Përgjithshme, të mbeshtetura nga Forca e Posaçme “Shqiponja”, menjëherë pas marrjes së njoftimit se në Dobraç, një shtetas kishte kanosur me armë zjarri, fqinjin e tij, kanë organizuar punën për kapjen e autorit dhe zbardhjen e rrethanave të rastit.

Si rezultat i veprimeve të shpejta, u kap në flagrancë dhe u arrestua shtetasi Sirjan Jahja , 41 vjeç, banues në Dobraç.

Nga veprimet e para proceduriale dyshohet se për motive të dobëta, shtetasi S. J. ka qëlluar me armë zjarri pistoletë, në tokë, për të kanosur fqinjin e tij, shtetasin A. K.

Materialet procedurale do t’i kaloj ë Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.

Paneli i Gjykatës së Apelit në Dhomat e Specializuara të Kosovës në Hagë vendosi t’i ulë dënimin nga 18 në 13 vjet burg Pjetër Shalës, ish-pjesëtar i Ushtrisë Çlirimtare të Kosovës, i gjetur fajtor për krime lufte, të kryera në vitin 1999.

Paneli hodhi poshtë shumicën e pretendimeve të Shalës në apel – përfshirë shkeljet e supozuara të të drejtave të tij gjatë procedimit të materialeve të dëshmitarëve dhe pretendimin se gjykimi kishte filluar para se mbrojtja të ishte e përgatitur – por konstatoi disa mangësi në aktgjykimin e shkallës së parë.

Anëtari i trupit gjykues, Kai Ambos, tha se Apeli e pranon pjesërisht apelin e Shalës në pikat 7, 12 dhe 14, ndërsa e refuzon për pjesën tjetër.

Si rezultat, Paneli caktoi një dënim unik prej 13 vjetësh burg, i cili hyn në fuqi menjëherë, theksoi Ambos.

Në komunikatën për media të lëshuar pas përfundimit të seancës, Dhomat e Specializuara sqaruan se Paneli i Apelit ka lënë në fuqi verdiktin e fajësisë së Shalës për krimet e luftës të ndalimit arbitrar (pika 1), torturës (pika 3) dhe vrasjes së paligjshme (pika 4).

Megjithatë, Paneli i Apelit miratoi pjesërisht tri prej 14 pikave që Shala paraqiti në apel, hodhi poshtë pikat e tjera të apelit të tij, dhe uli dënimin e tij nga 18 në 13 vjet burgim, duke llogaritur edhe kohën e kaluar në paraburgim, thuhet në komunikatë.

Prokurorja e specializuar, Kimberly West, tha se e mirëpret aktgjykimin e Apelit që la në fuqi dënimet për të gjitha akuzat, por ndryshoi gjatësinë e dënimit, duke e cilësuar atë si hap të rëndësishëm drejt forcimit të sundimit të ligjit dhe drejtësisë për viktimat.

Ajo tha se Zyra e Prokurorisë do ta shqyrtojë me kujdes aktgjykimin në ditët në vijim, përfshirë edhe konstatimet që çuan në ndryshimin e gjatësisë së dënimit.

Gjatë seancës, Shala nuk ishte i pranishëm fizikisht, por e ndoqi atë përmes video-lidhjes.

Shala, ish-pjesëtar i Ushtrisë Çlirimtare të Kosovës, u dënua me 18 vjet burg në korrik të vitit 2024, pasi u gjet fajtor për ndalim arbitrar, torturë dhe vrasje të paligjshme në Fabrikën e Metalit në Kukës – pjesa veriore e Shqipërisë.

Sipas aktakuzës, ai dhe pjesëtarë të tjerë të UÇK-së morën pjesë në ndalimin dhe keqtrajtimin e të dyshuarve për bashkëpunim me Serbinë dhe të atyre që nuk merrnin pjesë aktive në luftime.

Viktimat, sipas aktakuzës, ishin subjekt i dhunës fizike dhe psikologjike, përfshirë kërcënimet me vdekje, poshtërimet dhe ngacmimet.

Gjykata e urdhëroi Shalën të paguante edhe 208 mijë euro si kompensim për tetë viktima, ndërsa e shpalli të pafajshëm për veprën penale të trajtimit çnjerëzor.

Mbrojtja e tij e apeloi si aktgjykimin, ashtu edhe urdhrin për zhdëmtimin e viktimave.

Megjithatë, vendimi për këtë të fundit nuk u përfshi në aktgjykimin që u dha më 14 korrik.

Dhomat e Specializuara të Kosovës, të njohura ndryshe si Gjykata Speciale, punojnë me ligjet e Kosovës, por prokurorët dhe gjyqtarët e tyre janë ndërkombëtarë.

Gjykata u themelua në vitin 2015 për të hetuar ish-pjesëtarët e UÇK-së, të cilët dyshohet se kanë kryer krime lufte dhe krime të tjera nga janari i vitit 1998 deri në dhjetor të vitit 2000.

Selia e Speciales u vendos në Hagë të Holandës, për shkak të shqetësimeve se sistemi i drejtësisë në Kosovë nuk është mjaftueshëm i pavarur për të hetuar krimet e luftës, si dhe për shkak të dyshimeve për kërcënimin e dëshmitarëve.

Deri më tani, Gjykata Speciale shpalli dy aktgjykime për krime lufte, ndaj Salih Mustafës dhe Pjetër Shalës, dhe dy tjera për pengim të administrimit të drejtësisë, ndaj Nasim Haradinajt dhe Hysni Gucatit.

Aktualisht, është duke vazhduar procesi gjyqësor kundër ish-presidentit të Kosovës, Hashim Thaçi, ish-deputetit Rexhep Selimi dhe dy ish-kryetarëve të Kuvendit të Kosovës, Kadri Veseli dhe Jakup Krasniqi – që të gjithë ish-pjesëtarë të UÇK-së – të cilët akuzohen për krime lufte dhe krime kundër njerëzimit./rel

Kryeministri i vendit, Edi Rama, ndodhet ditën e sotme në Mynih të Gjermanisë, ku ka takuar homologun bavarez, Markus Soder.

Lajmin e ka bërë të ditur vetë Rama përmes një postimi në rrjete sociale.

Krahas pamjeve nga ky takim, kreu i qeverisë e ka cilësuar Soder, si një mik të çmuar me të cilin është ndërtuar marrëdhënia e një partneritet i posaçëm mes Shqipërisë dhe Bavarisë.

“Gjermani, Mynih – Të ftuar nga Kryeministri i Bavarisë z.Markus Söder, një mik i çmuar me të cilin kemi ndërtuar marrëdhënien e një partneriteti të posaçëm mes Shqipërisë dhe Bavarisë”, shkruan ai.

Përmes një postimi në rrjetet sociale, kryeministri Edi Rama ka njoftuar hapjen e regjistrimeve për arsimin profesional. Kryeministri Rama ka bërë me dije se të rinjtë mund të regjistrohen përmes portalit  e-Albania.

“Regjistrimet në Arsimin Profesional janë hapur. Bëj zgjedhjen e duhur. Regjistrohu përmes e-Albania në shërbimin “Regjistrim në klasë të dhjetë”, shkruan Rama në Facebook.

Regjistrimet për klasën e dhjetë për arsimin profesional janë hapur që më 7 korrik dhe do të zgjasin deri në fund të muajit shtator.

Procesi kryhet përmes portalit e-Albania ku çdo prind mund të aplikojë online përmes këtij shërbimi dhe më pas merr përgjigjen nga shkolla. Arsimi i mesëm profesional u ofron nxënësve mundësi kualifikimi dy-tre dhe katër vjeçare, dhe i përgatit ata për profesione specifike, nëpërmjet zhvillimit të aftësive praktike dhe njohurive të aplikueshme. Aplikimi për regjistrim kryhet nga prindi ose personi që ushtron përgjegjësinë prindërore sipas procedurës të publikuar në këtë shërbim.

Sikurse ka bërë me dije Ministria e Arsimit, të gjithë nxënësit që janë regjistruar aktualisht në një gjimnaz apo në një shkollë tjetër, dhe kanë dëshirë të vijojnë studimet në arsimin profesional, kanë të drejtë të bëjnë çregjistrimin apo anulimin e aplikimit deri një ditë para fillimit të shkollës dhe mund të regjistrohen në shkollat e Arsimit Profesional.

Disa nga avantazhet e regjistrimit në arsimim profesional:

1)Vajzat që regjistrohen në arsimin profesional përfitojnë 50 % të bursës.

2)Të gjithë nxënësit që regjistrohen në drejtimet mësimore: bujqësi, veterinari, pyje, ndërtim, peshkim, detari, gjeologji-miniera dhe shpim e shfrytëzim i vendburimeve të naftës dhe gazit, përfitojnë bursë për të gjitha vitet e shkollimit.

Pas mbarimit të Arsimit Profesional, nxënësit pajisen me aftësi që kërkon tregu i punës, dhe nuk penalizohen në vijimin e studimeve universitare.

Mbi 125 mijë vizitorë kanë zgjedhur Gjirokastrën në 6 muajt e parë të këtij viti. Sipas autoriteteve, të dhënat tregojnë për një rritje të numrit të turistëve që preferojnë të pushojnë në qytetin e gurtë. Fluksi është më i lartë kryesisht gjatë fundjavave.

“Kam ardhur dhe herë tjetër në Gjirokastër. Vimë, shikojmë se vit pas viti janë bërë ndryshime. Na pëlqen shumë këtu.”

“Sapo mbërritëm në mëngjes, na kanë thënë se kjo është kalaja më e vjetër në Ballkan, është e mbrojtur nga UNESCO. U ngjitëm në këmbë, ishte pak e vështirë.”

Më shumë interes ka për zonën muzeale. Kalaja e Argjiros tërheq numrin më të madh të vizitorëve të cilët mësojnë më shumë për historinë e qytetit duke ndaluar në muzetë e ndryshëm.

“Vizitorët janë veçanërisht nga Europa, por nuk kanë munguar australianët, amerikanët me një interes të madh për të njohur jo vetëm bukuritë natyrore të Gjirokastrës, por edhe historikun, zhvillimin e qytetit,” tha Albana Ismaili, Muzeu Gjirokastra.

Një tjetër ndalesë është padyshim edhe Muzeu Kadare. Shumë vizitorë janë kuriozë për shtëpinë e shkrimtarit.

“Kryesisht këtu vijnë vizitorët francezë të cilët e njohin më tepër shkrimtarin nëse mund ta krahasojmë me vendet e tjera, sepse dihet që në frëngjisht janë përkthyer më tepër veprat e tij. Kryesisht duan të dinë ku është lindur shkrimtari, ku është rritur ai,” tha ciceroni Bruno Pjetri.

Ata që zgjedhin Gjirokastrën mund të bëhen pjesë edhe e jetës së gjallë të natës, ndërsa gjatë kësaj periudhe zhvillohen aktivitete të ndryshme kulturore dhe artistike. Klan News

Në lidhje me aksionin e ndërmarrë nga Administrata Tatimore për evidentimin dhe ndëshkimin e rasteve të mosfaturimit të produkteve ushqimore, veçanërisht të atyre të ndjeshme si qumështi, mishi dhe bulmeti i freskët, ka reaguar në rrjetin social Facebook, kryeministri Rama.

Në postimin e tij, kryeministri e cilësoi këtë fenomen jo vetëm si një shkelje e rëndë ligjore, por edhe si një rrezik të drejtpërdrejtë për shëndetin e konsumatorëve shqiptarë.

“Mosfaturimi për qumështin, mishin dhe bulmetin e freskët kërcënon shëndetin e konsumatorëve, përveçse cenon rendin ligjor si çdo mosfaturim tjetër,” shkruan Kryeministri.

Ai theksoi se strukturat shtetërore do të jenë maksimalisht të angazhuara për identifikimin, kontrollin dhe sekuestrimin e produkteve që tregtohen pa faturë, si pjesë e një lufte të pandalshme kundër informalitetit dhe rrezikimit të sigurisë ushqimore.

Gjykata e Posaçme ka dënuar me 2 vite e 4 muaj burgim ish-shefin e Antidrogës së Durrësit, Gazmir Preçin. Po ashtu, atij i ndalohet që të kryejë funksione publike për pesë vite.

Preçi u deklarua fajtor nga GJKKO  për kryerjen e veprës penale “Korrupsioni pasiv i personave që ushtrojnë funksione publike”.

Kështu me gjykim të shkurtuar ai do të vuajë vetëm 2 vite e 4 muaj burgim nga 3 vite e 6 muaj që u dënua fillimisht.

NJOFTIMI

Prokuroria e Posaçme kundër Korrupsionit dhe Krimit të Organizuar ka paraqitur pranë Gjykatës kërkesën me objekt: “Dërgimin për gjykim të procedimit penal nr. 170, të vitit 2024, të Prokurorisë së Posaçme kundër Korrupsionit dhe Krimit të Organizuar, në ngarkim të të pandehurit Gazmir Preçi, i akuzuar për kryerjen e veprës penale “Korrupsioni pasiv i personave që ushtrojnë funksione publike”, parashikuar nga neni 259 paragrafi 2 i Kodit Penal”.

Gjykimi i kësaj ҫështje u zhvillua me rregullat e gjykimit të shkurtuar. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarët Etleva Deda, Irena Gjoka dhe Flojera Davidhi, me vendimin Nr. 50, datë 14.07.2025 vendosi:

1.Deklarimin fajtor të të pandehurit Gazmir Preçi, për kryerjen e veprës penale “Korrupsioni pasiv i personave që ushtrojnë funksione publike”, parashikuar nga neni 259 paragrafi i 2 i Kodit Penal dhe dënimin e tij me 3 vjet e 6 muaj burgim.

Në aplikim të nenit 406 të K.Pr.Penale, uljen e dënimit me 1/3, duke e dënuar përfundimisht të pandehurin Gazmir Preçi me 2 vjet e 4 muaj burgim. Në aplikim të nenit 35 të Kodit Penal, heqjen e të drejtës për të ushtruar funksione publike për të pandehurin Gazmir Preçi për 5 (pesë) vjet.

Bazuar në nenin 33 të Kodit Penal si dhe nenin 15 të Ligjit nr. 81/2020 “Për të drejtat dhe trajtimin e të dënuarve me burgim dhe të paraburgosurve”, vuajtja e dënimit për të pandehurin Gazmir Preçi do të fillojë të llogaritet nga dita e arrestimit në flagrancë të tij, datë 15.08.2024 dhe do të kryhet në një nga

Institucionet për të dënuarit e rritur dhe të sigurisë së zakonshme.

2. Në lidhje me provat materiale në bazë të nenit 36 të Kodit Penal dhe nenit 190 të Kodit të Procedurës Penale,

– Një DVD që shoqëron raportin përmbledhës i mbikëqyrjes së fshehtë, datë 16.08.2024; një CD që shoqëron raportin mbi transkiptimin e bisedave audio; 2 CD që mbajnë pamjet filmike të sekuestruara pranë subjektit tregtar “Auto 555” dhe supermarket “Aldi”, si dhe 8 DVD që përmbajnë pamjet filmike të sekuestruara pranë DVP Durrës, të mbeten pjesë e fashikullit gjyqësor.

– 2 aparate telefonike të shtetasit Gazmir Preçi, telefon i markës “Iphone 15” me ngjyrë gri me kapak transparent me nr. Sim të operatorit telefonik “Vodafone”, mbyllur me kod dhe telefon i markës “Iphone 11” me ngjyrë të zezë, me kapak me ngjyrë portokalli me logo si të një katrori, me nr. Karte sim të operatorit telefonik “Vodafone”, i mbyllur me kod, t’i kthehen shtetasit Gazmir Preçi, konform nenit 190/1 gërma “ç” të K.Pr.Penale.

3. Shpenzimet proceduriale të kryera gjatë fazës së hetimit paraprak në shumën 2207.11 lekë, të seancës paraprake dhe gjatë gjykimit, sipas procesverbalit bashkëlidhur këtij vendimi, i ngarkohet të pandehurit.

4.Kundër këtij vendimi lejohet apel brenda afatit ligjor, në Gjykatën e Posaçme të Apelit për Korrupsionin dhe Krimin e Organizuar.

Klubi i Futbollit Tirana njofton emërimin e Vangjel Mile si trajner i parë i skuadrës për tre sezone. Mile vjen në këtë detyrë pas një periudhe të suksesshme si Drejtor Teknik i Akademisë së Futbollit Tirana, ku ka luajtur një rol kyç në zhvillimin e talenteve të rinj dhe ndërtimin e një filozofie të qëndrueshme loje.

“Njohja e thellë me strukturat e klubit, filozofinë bardheblu dhe modelin e funksionimit të Akademisë i japin trajnerit Mile avantazhin për të ndërtuar një urë të natyrshme mes të rinjve dhe ekipit të parë. Objektivi i tij do të jetë jo vetëm rikthimi i skuadrës në krye të futbollit shqiptar, por edhe integrimi i elementëve të rinj me potencial, në përputhje me identitetin historik të KF Tiranës.

Mile është i njohur për qasjen e tij moderne ndaj stërvitjes, disiplinën taktike dhe aftësinë për të ndërtuar grupe të balancuara me frymë kolektive të fortë. Eksperienca e tij si strateg dhe drejtues teknik e bën zgjedhjen ideale për një projekt të qëndrueshëm dhe ambicioz”, thuhet në njoftimin e KF Tirana.

“E ndjej veten pjesë të kësaj shtëpie dhe e marr këtë përgjegjësi me përulësi, por edhe me shumë besim. Njoh vlerat dhe pritshmëritë e këtij klubi dhe jam i përkushtuar të punoj çdo ditë për të çuar përpara emrin dhe objektivat e KF Tiranës,” – deklaroi trajneri i ri gjatë prezantimit.

Ndryshe nga vitet e shkuara kur kishin tendencën të iknin në Kanada, është shtuar numri i inxhinierëve të rinj në fushën e naftës dhe gazit, që duan të punojnë në Shqipëri.

Siç njofton vetë ministrja e Energjisë dhe Infrastrukturës, Belinda Balluku, janë 45 vajza dhe djem që sot janë testuar dhe kanë shprehur dëshirën për t’u bërë pjesë e kompanisë shqiptare Albpetrol.

“Në vitin 2024, Ministria e Energjisë dhe Infrastrukturës përmes Albpetrol vendosi të nisë një projekt të ri i cili përfshin në trupat tona të operimit në atë ndërmarrje, djem dhe vajza të cilët studiojnë në fushën e naftës dhe gazit, por edhe në gjeologji.

Ky grup që na u bashkua vetëm një vit më parë, tashmë është kthyer në pjesë permanente të Albpetrol. Tani ndodhemi në fazë të dytë dhe në këtë klasë u testuan 45 inxhinierë të rinj që kanë shprehur dëshirën për t’u bërë pjesë e Albpetrol për vitin 2025 dhe 2026, në një vit prove të paguar”, deklaroi Balluku.

Edhe drejtuesi i Albpetrol, Eltar Deda, u shpreh optimist për këtë fazë, duke shpresuar që pas një viti provë, ata të bëhen pjesë e përhershme e kompanisë.

Balluku theksoi se rreth 35 inxhinierë të rinj do të testohen për kontribute të tjera në sektorin publik, qoftë si specialistë pranë Ministrisë apo në institute të tjera teknike në varësi të saj. Theksi u vu edhe te numri i lartë i vajzave në këtë fushë specifike, që thuajse gjithmonë është dominuar nga burrat.

“Rreth 29% janë vajza”, u shpreh Deda. /tvklan.al

Në kuadër të operacionit “The Wanted”, policia e Kukësit ka vënë në pranga 28-vjeçarin Edison Dobrushi, i shpallur në kërkim dhe i dënuar me 11 vjet e 6 muaj burg për tentativë trafikimi të lëndëve narkotike dhe mosbindje ndaj urdhrit të Policisë.

Arrestimi u bë në fshatin Shëmri, pas informacioneve operative. Procedurat e mëtejshme do të ndiqen nga DVP Shkodër.

Njoftimi i policisë 

Kukës/Vijojnë kontrollet në kuadër të operacionit policor të koduar “The Wanted”, për kapjen e shtetasve në kërkim.

I dënuar me 11 vjet e 6 muaj burgim, për tentativë për trafikim të lëndëve narkotike dhe për mosbindje ndaj urdhrit të punonjësit të Policisë, kapet në fshatin Shëmri, 28-vjeçari.

Shërbimet e Komisariatit të Policisë Kukës, në vijim të punës për lokalizimin dhe kapjen e shtetasve të shpallur në kërkim, bazuar dhe në informacionet e siguruara në rrugë operative, në kuadër të operacionit policor të koduar “The Wanted”, lokalizuan dhe kapën shtetasin: Edison Dobrushi, 28 vjeç, banues në fshatin Shëmri, Kukës.

Ky shtetas ishte shpallur në kërkim pasi Gjykata e Shkallës së Parë e Juridiksionit të Përgjithshëm Shkodër e ka dënuar me 11 vjet e 6 muaj burgim, për veprat penale “Trafikimi i lëndëve narkotike”, mbetur në tentativë dhe “Mosbindja ndaj urdhrit të punonjësit të policisë”.

Veprimet e tjera procedurale për këtë shtetas do të kryhen nga strukturat e DVP Shkodër.