Policia në Librazhd ka arrestuar 55-vjeçarin e shpallur në kërkim pak ditë më parë. Sipas raportimeve, I.F., theu masën e sigurisë arrest shtëpie dhe tentoi të kryente marrëdhënie seksuale me fqinjen 25-vjeçare.

“Specialistët për Hetimin e Krimeve të Komisariatit të Policisë Librazhd lokalizuan në fshatin Urakë, kapën dhe ndaluan shtetasin në kërkim I. F., 55 vjeç, për veprat penale “Largimi i të burgosurit nga vendi i qëndrimit” dhe “Marrëdhënie seksuale me dhunë me të rritura”, mbetur në tentativë.

Ky shtetas u shpall në kërkim më datë 08.07.2025, pasi theu masën e sigurisë “Arrest në shtëpi”, dhe tentoi të kryente marrëdhënie seksuale me një 25-vjeçare (fqinje e tij)”, njoftoi sot policia.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme hetimore. m.p.

Një 52-vjeçar nga qyteti i Kukësit ka rënë në prangat e policisë së kryeqytetit pasi u kap duke transportuar me furgon mallra kontrabandë.

Mësohet se Shkëlqim Xhahu u ndalua nga efektivët në rrugën “Bardhyl”, teksa po transportonte mallrat për te tregu i shumicës, në rrugën “5 Maji”. Vlera e veshjeve kryesisht sportive arrinte vlerën 40.000 euro, teksa veshjet ishin vendosur në qese të mëdha të zeza dhe të mbyllura me ngjitës.

Materialet procedurale iu referuan Prokurorisë së Tiranës, për veprime të mëtejshme. m.p.

Një ditë pas lajmërimit nga kryeministri se qumështi dhe nënproduktet e tij nuk do të shiten pa faturë, ministri i Financave, Petrit Malja, ministrja e bujqësisë Anila Denaj dhe drejtori i Tatimeve, Ilir Binaj kanë zbritur në terren.

Me qëllim garantimin e mbrojtjes së konsumatorit dhe gjurmimin e plotë të dokumentacionit fiskal, të produkteve blegtorale, zyrtarët e qeverisë lajmërojnë se nga java e ardhshme asnjë produkt I tillë nuk do të lejohet teksa do të arrijë deri në sekuestrimin e tij.

Siguria ushqimore, formalizimi dhe mbledhja e të ardhurave janë prioritetet e qeverisë në këtë fushatë ndërgjegjësuese. m.p.

Kreu i Nismës Thurrje, Endri Shabani, komentoi zhvillimet e ndodhura së fundmi brenda koalicionit “Nisma Shqipëria Bëhet” në lidhje me mandatin e fituar nga Adriatik Lapaj në Tiranë.

Shabani tha në një intervistë televizive se një prej kandidatëve të listës së mbyllur, i cili është edhe i afërmi i tij, ka qenë i qefmbetur me Adriatik Lapajn dhe kërkoi nga KQZ njohjen me nënshkrimin e firmosur për dhënien e dorëheqjes për kandidatët e listës së mbyllur.

Sipas Shabanit, kandidati në fjalë, Zeqir Kordhoni, është kandiduar në listë të hapur nga Nisma Thurrje, por “Shqipëria Bëhet” e ka vendosur në listë të mbyllur për shkak se e ka zëvendësuar me një grua për kuotën gjinore.

“Në marrëveshje ne kemi rënë dakord më 1 mars, sidomos dhe në Tiranë, që listën e mbyllur ta garantojnë të dyja palët. Pra, secili të çojë listat e veta për ata që janë kandidatë fiktivë. Ne kemi kërkuar që i dyti, i pesti dhe i 12-ti të jenë nga Nisma Thurrje. Aty ka pasur një teknikalitet, listat janë dorëzuar të mërkurën. Ne si Nismë kemi pasur 40 kandidatë, ia kemi nisur emrat “Shqipëria Bëhet” pasi duhet t’i firmosnin, sepse ata kishin të drejtën të dorëzonin listat si partia kryesuese e koalicionit.

Zeqiri është aktivist i Nismës, ka organizuar takime në këto zgjedhje, ka shpërndarë fletëpalosje dhe ka qenë aktivist. Ka dashur të dalë në listë të hapur të garojë. Se si përfundoi në listë të mbyllur i kërkova stafit tim një dosje të aplikimit të Zeqirit dhe kush ka qenë rrjedha.

Ne nuk e kemi çuar në listë të mbyllur, e kemi çuar në listë të hapur. Ngaqë kishte shumë gra në listë të mbyllur, stafi i “Shqipëria Bëhet” e ka hequr Zeqirin dhe e ka vendosur në listë të mbyllur. Por nuk e kemi çuar ne në listë të mbyllur. Stafit të “Shqipëria Bëhet” i është dashur një burrë dhe e kanë vendosur në listë të mbyllur.”- tha Shabani.

Shabani tha se tensionet brenda koalicionit u krijuan pas deklaratës së Adriatik Lapajt se do të lërë mandatin nëse koalicioni në zgjedhje siguron vetëm një vend në parlament.

Ai thekson se Zeqir Kordhoni, pasi u mërzit me Lapajn mbi mosmbajtjen e fjalës, ndërmori kërkesën në KQZ. Megjithatë Shabani shton se qëndrimi i Nismës Thurrje është që të njihen sa më shpejt nga KQZ dorëheqjet e listës së mbyllur dhe mandati t’i kalojë kandidatit më të votuar në listën e hapur që është Adriatik Lapaj.

“Adriatiku ka thënë se nëse do të marrë një mandat koalicioni, atëherë mandatin do ta marrë jo ai, por më i votuari pas tij. Kjo ka krijuar tension mes aktivistëve. Kuptoj dhe nga “Shqipëria Bëhet” ka krijuar tension.

Te Nisma Thurrje është krijuar një tension sepse është dukur që ne po e mbajmë fjalën për dorëheqjet, por ky po tërhiqet nga deklarata e vetë. Kjo ka krijuar këtë tension me Zeqirin. Zeqiri nuk ka pretendime, e para është në fund të listës.

Mandatin sot e ka Ana Dajko e listës së mbyllur nga “Shqipëria Bëhet”. Kandidatët kanë konfirmuar dorëheqjen. Unë dje i kam kërkuar KQZ që të njohë dorëheqjet dhe të mos e vonojë procesin. KQZ të kalojë te lista e hapur dhe t’ia japë mandatin Adriatik Lapajt. Ky është qëndrimi ynë.

“Unë fola në telefon me Zeqirin dhe më tha: Unë jam burrë dhe jo politikan. La të kuptoj që ju politikanët thoni dhe i ndryshoni gjërat, burrat kur e japin fjalën, e mbajnë”, tha ai. m.p.

Hermann Gerland, thuajse i përjetshëm në akademinë e Bayern, në një intervistë për Kicker ka zbuluar se Bayern e kishte “në dorë” sulmuesin Erling Haaland, por humbi shansin ta blinte.

Ishte viti 2017 kur Gerland punonte si trajner i dytë i skuadrës bavareze. Haaland atë vit mund të transferohej nga Molde për 2,8 mln euro. Bayern refuzoi.

“Erling negocioi në Mynih. Ai kërkoi një pagë prej 10 deri në 15 mijë eurosh në muaj. Drejtuesve bavarezë iu duk shumë për një lojtar ende të pazhvilluar”. Eh, sa janë penduar sot! m.p.

Pak kohë më parë, kryeministri Rama i bënte thirrje të rinjve që të kthehen nga emigrimi për të investuar në atdhe, pasi sipas tij, e ardhmja ishte e sigurtë në Shqipëri, pasi turistët e huaj po gëlonin maleve fushave dhe deteve.

Në fakt ardhja e turistëve ishte diçka e dukshme, dhe kjo gjë ndikoi edhe tek disa persona që vërtet lanë emigracionin për të investuar në tokën e prindërve.

I tillë ishte edhe Klodian Harusha, i cili braktisi endrrën për futbollin, për të investuar kursimet minimale në Theth. Por aksioni i IKMT për shembjen e objekteve, i preu krahët të riut.

“Kam investuar këtu. Kam qënë emigrant. Kam luajtur si futbollist në Itali për 6 vite. U ktheva me idenë se ka të ardhme dhe këtu por fatkeqësisht më duket nuk ka. Kam ardhur me rreth 7 mijë euro të kursyera. U ktheva me fjalën e kryeministrit sepse tha kthehuni të rinjtë e investoni në tokat e të parëve tuaj. Unë u ktheva. Jam munduar me krijuar një jetesë në vete. Kjo këtu ka 1 vit që pikon është me nipt e çdo gjë”, tha Klodian Harusha.

Si një i ri i rritur jashtë vendit, Klodiani ishte i përgjegjshëm se për të ndërtuar duhet të merrte leje. Por ai shpejgon ping-pongun e përjetuar nga institucionet vendore në Shkodër.

“Jam sorollat në bashki, asnjë informacion për paketën e maleve. Më ka nxjerrë edhe jashtë në bashki duke më thënë shko kërko kund tjetër informacion. Kryeministri tha vjet e kemi miratuar paketën e maleve. Unë bëra diçka druri e cila mund të çmontohet për 2 orë. Kanë ardhur më kanë vendosur 58 mijë euro gjobë e më thanë do shembet bashkë me lokalin që ka 2 vite me nipt e çdo gjë”, shtoi banori i Thethit, Klodiani.

Investimi i tij tashmë është pjesë e procesit të shembjes, por humbjet e pësuara dhe borxhi mbi supe i kalon 90 mijë euro.

“Është ndërtesë 1 kat e gjysëm dhe është vënë gjobë e tillë. Jam i zhgënjyer kam ardhur me kriju një jetë këtu, sot jam 95 mijë euro borxh e nuk di nga të ia nisi. Jam munduar me investu në tokën time, kisha dasht një rrugë zgjidhje”, theksoi Harusha.

Klodiani tregon se vendimi i kryeministrit për të prishur objektet në Theth do ta detyrojë 23-vjeçarin të emigrojë sërish. m.p.

Një aksident me pasojë përplasjen e dy mjeteve ka ndodhur pasditen e sotme në kryqëzimin në brendesi të qytetit Bulqizës.

Mjetet janë përplasur ‘kokë me kokë’, por fatmirësisht pa dëme në jet njerzish.

Një nga mjetet ka dalë nga rruga në trotuar, ku ka dëmtuar një pemë pishe, aty ku ka edhe dyqane. Por për fat të mirë s’ka pasur persona të lënduar.

Dëmet materiale janë të konsiderueshme, ndërsa policia vendore nisi hetimet për rrethanat dhe shkaqet, duke pyetur të dy drejtuesit e mjeteve. m.p.

Policia e Vlorës vazhdon aksionin për largimin e automjeteve të parkuara në mënyrë të kundraligjshme, ose kundravajtje, në kuadër edhe të aksionit për lirimin e hapësirave publike.

Drejtuesi u Policisë së Vlorës, Elidon Çela, tha për Report Tv se nuk do të ketë më asnjë tolerim, por vetëm masa administrative.

Përveç masës administrative të heqjes së mjetit me karrotrec, do ketë edhe ndjekje penale për drejtuesit e mjeteve që bllokojnë qarkullimin e lirë të mjeteve dhe këmbësorëve.

Prej ditësh Policia e Vlorës po vijon aksionin për lirimin e rrugëve nga parkimet e gabuara të shoferëve, duke i shoqëruar me gjoba dhe bllokim mjeti. m.p.

Ukraina do të marrë grupin e parë të sistemeve të armëve me rreze të gjatë nga Gjermania në fund të korrikut, ka deklaruar Gjeneralmajori Christian Freuding, shef i stafit të mbështetjes speciale për Ukrainën në Ministrinë Federale të Mbrojtjes së Gjermanisë.

Freuding theksoi se situata në terren për Ukrainën mbetet “ushtarakisht e tensionuar” dhe se forcat ruse “po përpiqen të marrin iniciativën prej disa javësh, në mos muaj”.

Ai shtoi se gjendja në hapësirën ajrore të Ukrainës, veçanërisht mbi qytetet e mëdha, është përkeqësuar ndjeshëm në javët e fundit.

“Ne kemi nevojë për sisteme armësh të afta të arrijnë thellë në territorin rus, sisteme që mund të godasin depot, postet komanduese, fushat ajrore dhe avionët… Në numër të madh, disa qindra njësi ose më shumë”, tha gjenerali. Ai shtoi se aftësi të tilla do të forconin ndjeshëm mbrojtjen ajrore të Ukrainës dhe shtrirjen operacionale në javët dhe muajt në vijim.

Gjermania, sipas tij, është e gatshme të ofrojë këto sisteme të tilla armësh. Dorëzimi është pjesë e një marrëveshjeje të nënshkruar në fund të majit midis Ministrisë së Mbrojtjes së Ukrainës dhe industrisë gjermane të mbrojtjes, e cila është iniciuar dhe financuar nga Berlini.

Ai tha gjithashtu se Gjermania po koordinohet ngushtë me partnerët e saj për të furnizuar Ukrainën me sisteme të reja të mbrojtjes ajrore me rreze të mesme dhe të gjatë veprimi.

Bisedimet janë duke vazhduar rreth transferimit të mundshëm të një ose dy baterive Patriot, të cilat Gjermania do t’i blinte nga Shtetet e Bashkuara. m.p.

Prokuroria e Korçës ka marrë zyrtarisht nën hetim për akuzën e shpërdorimit të detyrës ish-drejtorin dhe ish-shefin e policisë së burgut të Drenovës.

Fatjon Fasho, ish-drejtor burgu, dhe Sokol Kaçoli, shef policie në këtë burg, po hetohen nga prokuroria për veprën penale të shpërdorimit të detyrës. Hetimi filloi pas takimit të modeles nga Kosova Ziza Pajaziti, me të dënuarin me burg të përjetshëm Laert Haxhiu.

Burime zyrtare të Prokurorisë së Korçës bëjnë të ditur se është vetëm faza e parë e fillimit të hetimit. Në vijim, pas sekuestrimit të protokollit të ndjekur nga Drejtoria e Burgjeve për rastin në fjalë si dhe sekuestrimi i rregullores së brendshme të burgjeve, do të këtë dhe një hetim më të thelluar për zbatimin e këtij protokolli nga ana e stafit të brendshëm të këtij institucioni.

Pas verifikimit të dokumentit të martesës se Ziza Pajazitit me të burgosurin Vladimir Kurti, dokument qe i është paraqitur drejtorisë së burgjeve, do të verifikohet edhe fakti që në vend të Kurtit, në takim me Pajazitin, ka shkuar Laert Haxhiu.

Gjatë hetimeve paraprake në rast se provohet se ka elemente të korrupsionit, për shkak të kompetencës dosja do të transferohet në Prokurorinë e Posaçme. Pak ditë më parë Fatjon Fasho u shkarkua nga detyra, ndërsa shefi i Policisë së burgut u pezullua nga detyra pasi Laert Haxhiut iu gjet në qeli një telefon celular. m.p.

Pas tarifave doganore të reja ndaj Kanadasë, tani është radha e Bashkimit Evropian.

Presidenti i SHBA-së, Donald Trump, i dërgoi një letër Brukselit që përmbante tarifat e reja doganore për shtetet anëtare.

“Duke filluar nga 1 gushti 2025, ne do të aplikojmë një tarifë doganore prej 30% të Bashkimit Evropian për produktet e BE-së të eksportuara në Shtetet e Bashkuara , të ndara nga të gjitha tarifat sektoriale”, shkroi Trump në llogarinë e tij në rrjetet sociale  Truth .

Letra e Trump drejtuar Presidentes së Komisionit të BE-së, Ursula von der Leyen, hapet me një ton emfatik dhe vetë-urues: “Është një nder i madh për mua t’ju dërgoj këtë letër, e cila tregon forcën dhe angazhimin ndaj marrëdhënies sonë tregtare dhe faktin që Shtetet e Bashkuara kanë rënë dakord të vazhdojnë të punojnë me Bashkimin Evropian.”/e.t

Një ditë tjetër, një tjetër hetim në Turqi — këtë herë duke synuar Spotify, i cili është nën shqyrtim për dyshime për “fyerje të besimeve shoqërore” dhe përfshirje në sjellje anti-konkurruese.

Kontradiktat filluan me atë që dukej të ishte një reagim shumë i koordinuar në rrjetet sociale, dhe që atëherë është përshkallëzuar.

Të premten, Spotify i tha The Times se po shqyrton pezullimin e përkohshëm të shërbimeve të tij në Turqi ose edhe tërheqjen e plotë nga tregu.

Gjigandi suedez i transmetimit të muzikës deklaroi se “nuk ishte i përgatitur që përdoruesit e tij të censuroheshin”, por shtoi se po “punonte për të bashkëpunuar me autoritetet turke”.

Përfaqësuesit e kompanisë thanë se të gjitha opsionet po vlerësoheshin, duke përfshirë “ndërprerjen e operacioneve në treg ose daljen krejtësisht nga Turqia”.

Spotify është i njohur për listat e tij të këngëve të gjeneruara nga përdoruesit, shumë prej të cilave përmbajnë tituj satirikë ose humoristikë, duke filluar nga referencat e personazheve të famshëm dhe personazhet fiktivë deri te sulmet politike.

Megjithatë, disa tituj listash këngësh kanë shkaktuar polemika politike në Turqi, shkruan euronews.

Zëvendësministri i Kulturës dhe Turizmit Batuhan Mumcu akuzoi platformën për “pritjen e përmbajtjes që synon vlerat fetare dhe kombëtare dhe fyen besimet e shoqërisë”.

Ai pretendoi se platforma përfshinte lista këngësh “të fshehta dhe provokuese” të drejtuara ndaj Zonjës së Parë Emine Erdogan.

“Dështimi i platformës për të vepruar është i papajtueshëm me vlerat kulturore dhe morale të kombit tonë”, tha Mumcu, duke argumentuar se një përmbajtje e tillë minon unitetin shoqëror.

Një listë këngësh në veçanti – e titulluar “Këngët që dëgjon Emine Erdogan ndërsa pastron pallatin” – shkaktoi zemërim midis përdoruesve të rrjeteve sociale pro-qeveritare.

Ndryshe, fushata për të ndaluar Spotify fitoi terren midis votuesve konservatorë, me përdoruesit që etiketonin zyrtarët qeveritarë në X dhe kërkonin veprime.

Pamjet e ekranit të titujve të diskutueshëm të listave të këngëve u bënë shpejt virale.

Listat e këngëve me tematikë fetare gjithashtu provokuan zemërim.

Dy lista – të titulluara “Lista e këngëve që dëgjoi Profeti Muhamed ndërsa shpëtonte nga mushrikët” dhe “Këngët që dëgjoi Profeti në shpellë” – gjithashtu tërhoqën kritika të ashpra në qarqet konservatore.

Spotify aktualisht ka më shumë se 12 milionë përdorues aktivë mujorë në Turqi. /e.t

Edvin Kulluri

Në dhjetor të 1990, një grup studentësh që mendonin se kishte ardhur koha që edhe Shqipëria të hidhte tej me përbuzje diktaturën komuniste, morën guximin të nisnin një protestë që do përfundonte në përballjen e drejtëpërdrejtë më kupolën e rregjimit. Disa prej tyre kishin origjinë të deklasuar, por shumica vinin nga familje burokratësh të qeverisjes së asaj kohe. Biles mund të kishte edhe ndonjë student që  kish prindërit anëtar partie. Por megjithë diferencat familjare, i bashkonte një gjë: nevoja urgjente për liri! Liri individuale në kuptimin politik dhe ekonomik të fjalës. Lirinë për të zgjedhur. Mes tyre “bubrronin” edhe disa disidentë artistikë në miniaturë që pjesërisht iu bashkuan grevës së Qytetit Studenti. Ndonjë tjetër si Rama, jo. Por kjo është një cështje tjetër.

Kjo lëvizje e vonuar në raport me pjesën tjetër të ish bllokut komunist, gjithësesi arriti të kthehej në një lëvizje që coi në përmbysjen e diktaturës dhe monopolit totalitarist të Partisë së Punës. Mbi 70% e shqiptarëve votuan Partinë Demokratike në zgjedhjet e 22 marsit 1992, si përfaqësuesja kryesore e revolucionit demokratik.

Por për ironi tradicionalisht shqiptare të fatit, 5 vite më pas, 70% e shqiptarëve votuan kundër “partisë udheheqëse të revolucionit demokratik” në Shqipërinë gjysëm të djegur, pikërisht për të rikthyer lirinë poilitike dhe ekonomike që u shpërdorua kryesisht në 26 dhe 28 maj të 1996 dhe rënies së piramidave që kanë lidhje me iniciativën e lirë, aq sa ka lidhje një falsifikator pasaportash me një konsullatë ambasade!

Dhe në gjithë këtë zallamahi 5 vjecare spikati kryesisht një personazh politik që ishte i rreshtuar në dy “revolucionet demokratike” kundër qeverisë, Azem Hajdari. Sa i përket rolit të tij në vitet 1990-1992 nuk ka nevojë për ritregim. Por për fatin e keq të tijin dhe Shqipwrisë, Azem Hajdari ishte kundërshtari më I fortë I qeverisë brenda mazhorancës edhe gjatë viteve 1992-1997. Dhe këtë trajektore të detyruar nga rrethanat, Azemi e përcaktoi prej rebelizmit dhe vokacionit tëë tij për liri. Asnjë personazh nuk është I rastwsishwm, aq më pak Azem Hajdari. Por nuk ishte e rastwsishme as balta që është hedhur mbi të duke gjetur lloj-lloj arsyesh nga më banalet deri tek ato politike. Te dy partitw e mëdha e sulmuan sa ishte gjallë, ndërsa pjesa me radikale ish komuniste e PS vazhdon ta sulmojw edhe pas vdekjes në komentet e portaleve apo rrjete sociale, sa herë u vjen rasti. Si cdo njeri edhe ai kishte dobesitë e veta, por një gje mbetet: mbetet njeriu që u përplas me këdo për liri!

Sot nuk është as përvjetori I tij ilindjes por as i vdekjes fatkeqe. Por sot më shumë se kurrë përpjekja e tij për liri është përdhosur më shumë se kurdoherë! Si nga PD që është shndërruar në një bunker personal të kryetarit që nga viti 2017, ashtu dhe PS e Ramws që i ka dedikuar vërtetë buste post-moderne, por që po sillet si një qeveri e një despoti butaforik.

Të dyja partitë e mëdha që zotërojnë 90% të elektoratit, që prej vitit 2008 kanë nisur një vrull centralizues anti-liri të pashembullt në Evropë. Pasi e kthyen Kryeministrin të parrëzueshwm në parlament me ndryshimet kushtetuese, mbyllën dhe listat e kandidatëve për deputetë duke e kthyer parlamentin në zgjatim të kryetarëve. E më pas, në 2014 i hoqën themelet vetë-qeverisjes lokale, e tashmë po sulmojnë cdo prokuror a gjyqtar që u cënon pushtetin politik e ekonomik abuziv. Prokurorja Gjeli është e fundit, por Duman ziu-t nuk i kanë lënë epitet e mbiemër denigrues pa i vënë. Por kulmi ishte sulmi thuaj fizik ndaj gjyqtarëve të GJKKO ditën që u caktua masa e arrestit për Veliajn. Për pak na nxorrën mallin e ca komsomolasve me uniformë ushtrie në oborrin e Shkollës së Bashkuar në shkurtin e largët të vitit 1990.

Me pak fjalë sot shoqëria drejtohet paradoksalisht nga dy njerëz që urrejnë lirinë në mënyrë të pakthyeshme. Sepse urrejnë pronën private të trashwguar apo të fituar, urrejnë iniciativën e lirë, urrejnë ndarjen e pushteteve dhe urrejnë qeverisjen lokale si niveli I parë demokratik i përfaqwsimit politik. Shkurt urrejnë lirine individuale, të grupeve të interesit dhe komuniteteve. Parlamentin po e po.

E në këtë kontekst Azem Hajdari si symbol I antikonformizmit politik është shndërruar në një kujtim të keqkuptuar dhe të nëpërkëmbur. Ajo që ai ka simbolizuar është transformuar në një gënjeshtër të madhe nga Rama dhe Berisha, por më keq akoma e atyre që thërrasin “Azem ti je gjallë” por që e rivrasin politikisht sa herë që adhurojnë kryetarin por jo lirinë për të cilën u krijua ajo parti nga Azem Hajdari dhe miqtë e tij studentë e pedagogë. E po kaq hipokritë janë  dhe ata qindra e mijëra socialistë që mburren se rrëzuan “rregjimin e Berishës” në 1997, e tani votojnë pa pikë ndërgjegjeje politike sozinë e Berishës 28 vite më vonë. I vetmi ndryshim është se në atë kohë mund të rriheshe në qendrën e votimit, ndërsa sot “këshillohesh” si të votosh nga drejtori apo ndonjë gangster i qytetit.

Autokratët, despotët dhe demagogët përvec lirisë urrejnë edhe të vërtetën. Por këtë 11 shtator kanë një mundësi: mos të kujtojnë Azem Hajdarin si symbol I kërkesws për liri, por ta lënë rehat në kujtimet e keqkuptuara të atyre që sic përshkruante pak a shumë Prec Zogaj para disa vitesh, “mesa duket shumica e atyre që u derdhën shesheve për liri në 1990, donin batanije të reja”.

Dhe në fakt, Preci ka thënë një të vërtetë të madhe që Azem Hajdari nuk e pranoi kurrë, por me shumë mundësi e kuptoi herët. Në 1992, në konferencën e jashtëzakonshme të PD ku e përjashtuan vec 5 minuta, por e sulmuan edhe 5 vite të tjera vetëm për një arsye: për liri! Liri që sot e kemi nëpërkëmbur si shoqeri dhe si elita. Kemi dështuar demokratikisht në mënyrë spektakolare duke riprodhuar cikle autokratizmi në 34 vite. Por ketë herë ndyshe nga më parë PS dhe PD janë bashkuar qartazi në këtë kundër-revolucion. Ndaj “Azem, ti nuk je gjallë as për së vdekuri”!

Administrata Amerikane e Ushqimit dhe Barnave (FDA) ka miratuar tabletën e parë për trajtimin e karcinomës së mushkërive me qeliza jo të vogla (NSCLC) në fazë të avancuar

Sunvozertinib (Zegfrovy) është i destinuar për të rriturit me NSCLC të avancuar dhe vepron tek ata pacientë që kanë një ndryshim të caktuar gjenetik, mutacion me insertion në eksonin 20 të EGFR.

Kur dhe si përdoret ky ilaç?

Ilaçi përdoret kur kanceri përparon gjatë ose pas kimioterapisë. Merret në formë tablete, një herë në ditë, gjë që ua lehtëson pacientëve ndjekjen e terapisë, e cila shpesh zgjat për një kohë të gjatë.

NSCLC është tipi më i zakonshëm i kancerit të mushkërive, duke përbërë rreth 80-85% të rasteve. Ky kancer është shpesh i vështirë për t’u trajtuar, pasi mutacionet ndryshojnë nga një person te tjetri, duke e bërë të vështirë gjetjen e trajtimeve efektive.

Rezultatet e studimeve

FDA e ka miratuar ilaçin mbi bazën e një studimi klinik me 85 persona me NSCLC të avancuar dhe me mutacion insertion në eksonin 20 të EGFR, të cilëve kanceri u ishte përkeqësuar pavarësisht kimioterapisë. Pacientët e merrnin ilaçin një herë në ditë dhe rezultatet treguan se rreth 46% e tyre u përgjigjën ndaj trajtimit, me përfitime që zgjatën mesatarisht më shumë se 11 muaj, transmeton Telegrafi.

Si vepron Zegfrovy?

Zegfrovy vepron duke bllokuar proteinat problematike EGFR, të cilat ndihmojnë rritjen e qelizave kanceroze. Ai është krijuar për të synuar lloje të ndryshme të ndryshimeve në EGFR, përfshirë mutacionet insertion të eksonit 20, duke kursyer në masë të madhe qelizat e shëndetshme.

Barnat mund të ndihmojnë gjithashtu në trajtimin e disa ndryshimeve të tjera të rralla të EGFR dhe mutacioneve HER2 të eksonit 20.

Çfarë është karcinoma e mushkërive me qeliza jo të vogla?

Karcinoma e mushkërive me qeliza jo të vogla (NSCLC) është forma më e shpeshtë e kancerit të mushkërive. Shenjat e hershme mund të jenë fishkëllima në kraharor, kollë, vështirësi në frymëmarrje, por mund të shfaqen edhe simptoma të tjera si dhimbje në nyje dhe kocka, ënjtje e duarve dhe fytyrës, humbje peshe etj.

Dy format kryesore të kancerit të mushkërive

1. Karcinoma e mushkërive me qeliza të vogla (SCLC) – forma më agresive, zakonisht e lidhur me pirjen e duhanit.
2. Karcinoma e mushkërive me qeliza jo të vogla (NSCLC) – më e zakonshmja, rreth 85% e rasteve.

Krahasuar me SCLC, NSCLC rritet dhe përhapet më ngadalë. Të dyja format ndajnë simptoma të ngjashme: kollë, dhimbje në kraharor, fishkëllimë në gjoks, zë i ngjirur. Fatkeqësisht, kanceri i mushkërive shpesh nuk jep simptoma në fazat e hershme, derisa përhapet në organe të tjera.

Tre nënllojët kryesorë të NSCLC

Adenokarcinoma – zakonisht shfaqet në shtresat e jashtme të mushkërive; po shtohet te gratë, edhe tek ato që nuk kanë pirë kurrë duhan.
Karcinoma e qelizave skuamoze – formohet zakonisht në qendër të mushkërive, pranë bronkeve.
Karcinoma e qelizave të mëdha – mund të formohet kudo dhe shpesh rritet më shpejt se dy llojet e tjera.

Katër stadet e sëmundjes

NSCLC ndahet në katër stade, sipas përhapjes:

Stadet 0-1: kanceri është vetëm në mushkëri.
Stadet 2-4: kanceri përhapet në nyjet limfatike dhe në organet e largëta si mëlçia, truri ose mushkëria tjetër.

Si çdo formë kanceri, edhe NSCLC mund të jetë fatal, por zbulimi i hershëm përmirëson shumë prognozën.

Simptomat e hershme të NSCLC

Simptomat zakonisht lidhen me mushkëritë dhe rrugët e frymëmarrjes:

Kollë e vazhdueshme ose që përkeqësohet
Fishkëllimë në gjoks
Vështirësi në frymëmarrje që përkeqësohet
Zë i ngjirur
Dhimbje kraharori
Infeksione të shpeshta respiratore (bronkit, pneumoni)
Nxjerrje gjaku me kollë

Simptoma të tjera janë humbja e pashpjegueshme e peshës, humbja e oreksit dhe lodhja.

Simptomat në kocka, nyje dhe muskuj

Ndërsa NSCLC fillon të përhapet në pjesë të tjera të trupit, simptomat bëhen gjithnjë e më serioze. Meqenëse ky lloj kanceri shpesh zbulohet në faza të avancuara, në rreth 20% të rasteve tashmë shfaqen shenja të përhapjes në kocka në momentin e diagnostikimit.

Në këtë fazë, simptomat mund të përfshijnë:

Dhimbje ose ndjeshmëri në kocka e nyje (më shpesh në legen e shpinë)
Sindroma Pancoast – dhimbje në shpatulla, krahë, mpirje e dobësi muskulore
Atrofia e thenarit – humbje e muskujve në gishtin e madh dhe pëllëmbën e dorës që ndikon në lëvizjen dhe funksionin.
Osteoartropatia hipertrofike – ënjtje e dhimbshme e kyçeve ose gishtave
Deformime të thonjve.

Simptoma në kokë dhe qafë

Kur kanceri përhapet, mund të shtypë vena dhe nerva të mëdhenj. Sindroma e venës së sipërme kava shkakton ënjtje të fytyrës dhe venat fryhen. Përhapja në nerva mund të shkaktojë sindromën Horner – kapak i varur, bebëza e ngushtuar dhe djersitje e reduktuar në njërën anë të fytyrës.

Simptoma neurologjike

Në fazat e vonshme, nëse përhapet në tru (më shpesh me adenokarcinomën NSCLC):

Dhimbje koke
Të vjella
Shikim i turbullt
Dobësi, lëvizje të pavullnetshme ose humbje e kontrollit të muskujve
Ndryshime ndjeshmërie (mpirje).

Simptoma digjestive

Edhe pse më e zakonshme tek SCLC, edhe NSCLC mund të shkaktojë hiperkalcemi (kalcium i lartë në gjak) në faza të vonshme, që mund të prekë gjëndrat paratiroide. Kjo mund të shkaktojë:

Dhimbje kockash
Lodhje
Të përziera, të vjella, kapsllëk
Humbje oreksi dhe etje të shtuar

/e.t

Deputetët e Partisë Demokratike të qarkut Shkodër, Luçiano Boçi dhe Bardh Spahia, janë përplasur me efektivët e policisë në Theth, ku kishin shkuar për të mbështetur banorët që kundërshtojnë prishjen e ndërtimeve në fshat.

Në një video të publikuar në llogarinë e Boçit në Facebook, shihet teksa deputeti i zgjedhur demokrat përleshet edhe me një person, i cili prezantohet se është drejtori i Policisë së Shkodrës, Fatmir Lleshaj. “Çfarë drejtori je ti? Ku e ke bexhin”, dëgjohet t’i thotë Boçi.

“Mos më kap me dorë se ta mbështjell mirë, legen m….”, i tha deputeti i zgjedhur një tjetër efektivi. “E mendove mirë që më preke?”. “O trim hajde një minutë”, i tha Boçi, Lleshajt.

Prej disa ditësh situata në Theth është tensionuar pas nisjes së operacionit të IKMT-së për prishjen e ndërtimeve pa leje në zonë. Banorët kundërshtojnë veprimet e shtetit, pasi thonë që nuk e kanë të mundur që të ndërtojnë me leje pasi u mungojnë certifikatat e pronësisë.

Një ditë më parë situata përshkallëzoi edhe më tej, pasi disa persona hodhën molotov drejt fadromave të IKMT-së dhe dogjën një urë në fshat, ndërsa policia u detyrua të ndërhynte duke nxjerrë armët për të mundësuar vijimin e operacionit./e.t

Agjencia palestineze e lajmeve WAFA, duke cituar Ministrinë lokale të Shëndetësisë, pohoi se Musallat, një i ri tek të njëzetat, ndërroi jetë pas rrahjes çnjerëzore nga kolonët në një qytet verior të Ramallahut. Reuters thotë se të njëjtin sulm, u plagosën edhe dhjetë persona të tjerë.

Ushtria izraelite reagoi duke thënë se po e heton incidentin në Sinjil, ku përplasja mes palestinezëve dhe kolonëve shpërtheu pasi këta të fundit u sulmuan me gurë nga palestinezët, cka solli dhe plagosjen e disa izraelitëve.

Më vonë, Ministria Palestineze e Shëndetësisë njoftoi se edhe një i ri palestinez, Muhammad al-Shalabi, humbi jetën gjatë të njëjtit sulm; ai thuhet të jetë qëlluar me armë zjarri e më pas është lënë në tokë i gjakosur pa asnjë lloj ndihme për orë të tëra.

Kombet e Bashkuara dhe organizata të tjera të rëndësishme për të drejtat e njeriut i konsiderojnë vendbanimet izraelite në Bregun Perëndimor si shkelje të së drejtës ndërkombëtare dhe pjesë të një strategjie më të gjerë për zhvendosjen e palestinezëve./e.t

Juventusi pritet të ketë lëvizje të rëndësishme në repartin e mesfushës. Bardhezinjtë kanë nxjerrë në treg Douglas Luiz pas vetëm një sezoni, i cili nuk ka bindur me paraqitjet e tij.

“Zonja e Vjetër” do të vlerësojë oferta nga 30-35 milionë euro për të larguar mesfushorin brazilian. Në rast se do të largohet Douglas Luiz, Juventusi do të tentonte direkte për Granit Xhakën.

Bayer Leverkusen do të ishte i kënaqur me një ofertë prej 15 milionë eurosh për mesfushorin shqiptar. Por fillimisht Douglas Luiz duhet të largohet nga Torino për t’i hapur vendin Xhakës./e.t

Pasi Kryeministri Rama nga Elbasani kërkoi shkrirjen e AKU, Ministrja e Bujqësisë Anila Denaj njoftoi se ka urdhëruar pezullimin e aktiviteteve të AKU-së. Në një deklaratë për mediat Denaj tha se ky vendim vjen pas ankesave të rritura nga subjektet tregtare të lidhura me ushqimin. Ndërsa inspektorët e rinj do të testohen me shkrim dhe me goje nga një komision prej 5 anëtarësh.

Dhjetw ditë pasi Kryeministri Rama kërkoi nga Cërriku që të pezullohet Autoriteti Kombëtar i Ushqimit, Ministrja e Bujqësisë Anila Denaj e bëri fakt të kryer. Këtë vendim e justifikoi me ankesat e mbërritura në dikasterin që drejton për sigurinë ushqimore.

Denaj bëri publike edhe mekanizmin, që sipas saj do ta kthejë AKU në një autoritet me standarde. Një komision i ngritur do të kalojë në sitë inspektorët e këtij autoriteti.

Për ta kthyer këtë autoritet në funksion të interesit të qytetarëve, qeveria i ka shpresat tek aplikantët e rinj, te studentët e Universitetit Bujqësor të Tiranës.

Ministrja e Bujqësisë AnilaDenaj nuk dha asnjë sqarim se si do të garantohet kontrolli I sigurisë ushqimore në vend, derisa AKU të rikthehet. /e.t

Ish-shefi i Ushtrisë Britanike, Gjeneral Sir Patrick Sanders, ka paralajmëruar se Britania duhet të përgatitet seriozisht për një përballje të mundshme ushtarake me Rusinë deri në vitin 2030. Në një intervistë për The Telegraph, ai deklaroi se ndërtimi i strehimoreve nëntokësore për civilët dhe forcimi i mbrojtjes ajrore duhet të jenë përparësi kombëtare.

“Nëse Rusia ndalon luftimet në Ukrainë, atëherë brenda disa muajsh ajo do të arrijë në një pikë ku do të ketë kapacitetin për të kryer një sulm të kufizuar ndaj një vendi anëtar të NATO-s, të cilin ne do të jemi të detyruar ta mbështesim, dhe kjo ndodh deri në vitin 2030”, tha Gjeneral.

Sanders, i cili udhëhoqi Ushtrinë Britanike nga viti 2022 deri në qershorin e kaluar, theksoi se kërcënimi nga Rusia është më i madh se kurrë dhe Britania nuk është e përgatitur për të përballuar pasojat e një sulmi të mundshëm, përcjell A2 CNN. Ai vlerësoi si shembull Finlandën, e cila ka strehimore për 4,5 milionë qytetarë dhe mund të vazhdojë të funksionojë edhe nën bombardime.

Sipas tij, ushtria aktuale britanike është shumë e vogël për të mbijetuar më shumë se disa muaj në një konflikt të përmasave të mëdha. Ai kritikoi gjithashtu qeverinë për mungesën e investimeve në mbrojtje dhe përpjekjet për t’i “ripaketuar” fondet ekzistuese në vend që të rrisë realisht kapacitetet mbrojtëse.

Sanders u shpreh se Rusia mund të synojë vende që dikur ishin pjesë e Bashkimit Sovjetik, si shtetet baltike, ku Britania ka prezencë ushtarake. Ai theksoi se një sulm ndaj një prej këtyre vendeve do të aktivizonte automatikisht Nenin 5 të NATO-s dhe Britania do të ishte e përfshirë që ditën e parë.

Ndërsa nënvizoi rrezikun që vjen edhe nga Irani dhe Lindja e Mesme, Gjenerali Sanders u shpreh se kërcënimi më i madh për sigurinë e Mbretërisë së Bashkuar mbetet Rusia./e.t

Një zjarr ka rënë mesditën e sotme në vendin e quajtur “ Ura e Daullasit” në Fier. Zjarri i shkaktuar nga djegia e hamulloreve nga fermerët e zonës, duket se ka dalë jashtë kontrollit duke shkaktuar panik te banorët e zonës.

Në vendngjarje kanë mbërritur menjëherë shërbimet zjarrfikëse për të bërë të mundur shuarjen e flakëve të cilat ndodhen pranë shtyllave të energjisë elektrike.

Për të shmangur rrezikun është bërë edhe stakimi i energjisë, ndërsa zjarrfikësit po punojnë për neutralizimin e flakëve të cilat favorizohen edhe nga era./e.t