Një aksident me pasojë plagosjen e dy personave ka ndodhur pasditen e kësaj të mërkure në aksin rrugor Elbasan-Librazhd.

Sipas raportimeve, nga përplasja e dy automjeteve kanë mbetur të plagosur dy pasagjere ndërsa ka nisur procedimi penal për një prej shoferëve.

Të plagosurit janë dërguar për të marrë ndihmë mjekësore në spital ndërsa grupi hetimor ndodhet në vendngjarje për të zbardhur shkaqet e aksidentit.

“Specialistët e Sektorit të Qarkullimit Rrugor referuan materialet në Prokurori ku nisi procedimi penal për shtetasin J. M., 27 vjeç, pasi në aksin rrugor “Elbasan-Librazhd”, automjetin që drejtonte është përplasur me automjetin me drejtues shtetasin K. B., 50 vjeç. Si pasojë janë dëmtuar lehtë 2 pasagjere në automjetin me drejtues shtetasin K. B”, njoftoi policia.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme. m.p.

Mercenarët e paguar nga Rusia kanë zbarkuar në Serbi dhe Bosnje-Hercegovinë. Kështu shkruan, pas një investigimi të hollësishëm, grupi mediak i Balkan Insight.

Ajo thekson se, Agjencitë ruse të inteligjencës kanë ngritur kampe trajnimi për mercenarë në Serbi dhe Bosnjë e Hercegovinë për të përgatitur pjesëmarrësit për një përpjekje për grusht shteti në Moldavi.

Qytetarët moldavë u rekrutuan për operacionin dhe u kërkua të dorëzonin telefonat dhe pasaportat e tyre para se të fillonte trajnimi. Përgatitja përfshinte, ndër të tjera, trajnim në operacionin me dronë.

Maksim Rosca, një nga mercenarët, zbuloi se pjesëmarrësve iu premtua një shpërblim prej 300 deri në 500 dollarë për përfundimin e një kursi intensiv 10-ditor.

Në një intervistë me mediat moldave, Rosca zhvilloi trajnimin fillimisht në entitetin pro-rus të Republika Srpska të Bosnjës dhe Hercegovinës, me popullsi kryesisht serbe, dhe më vonë në një fshat të quajtur Radenka, në Serbinë lindore. Pagesat thuhet se janë bërë në kriptomonedha. Sipas hetimit, seancat trajnuese u mbajtën midis 1 dhe 16 gushtit, dhe përsëri nga 22 gushti deri më 11 tetor 2024, në të dy vendet.

Operacioni kishte për qëllim të minonte zgjedhjet presidenciale në Moldavi, të cilat u zhvilluan në vjeshtën e vitit 2024. Autoritetet e Bosnjës dhe Hercegovinës mohojnë zyrtarisht ekzistencën e kampeve të stërvitjes në territorin e tyre, por zyra e prokurorit vendas ka nisur tashmë një hetim.

Në Serbi, policia zbuloi mbetjet e një kampi – letra të djegura, gjurmë të mushamasë së djegur dhe tokë të djegur. Sipas raporteve të medias pranë autoriteteve serbe, në vend u zbuluan gjithashtu dronë, syze mbrojtëse, pajisje komunikimi satelitor Starlink dhe lëngje të ndezshme.

Zyrtarët serbë nuk kanë dhënë ende asnjë koment. Instruktorët thuhet se janë të lidhur me Ëagner PMC ruse dhe individë që janë nën sanksione të BE-së. m.p.

Deputeti i Partisë Demokratike, Dashnor Sula, ka reaguar lidhur me përplasjen e sotme mes Adriatik Lapajt dhe Endri Shabanit për mandatin e fituar nga koalicioni ‘Nisma Shqipëria Bëhet’.

Përmes një postimi në rrjetet sociale, duke ironizuar situatën e krijuar, Sula shprehet se kur do t’i bësh gropën tjetrit, bie vetë brenda.

Ai rikthen në kujtesë një bisedë të zhvilluar me Lapajn në momentin që po pretendonte për të kandiduar në listën e ‘Nismës Shqipëria Bëhet’ në Elbasan, shkruan A2 CNN.

Sula tha se Lapaj gjatë bisedës e kishte siguruar se ata që ishin në listë të mbyllur do të jepnin dorëheqjen dhe nëse deputeti demokrat do të merrte më shumë vota nga anëtarët e tjerë të listës së hapur në Elbasan, do të merrte mandatin automatikisht, gjë që sipas tij aktualisht nuk po ndodh në Tiranë.

POSTIMI:

“Kur do t’i bësh gropën tjetrit dhe bie vetë”, kjo është ajo që po ndodh me Adriatik Lapajn, të cilin e paralajmërova për një skemë të tillë, kur më tha se kandidatët në listë të mbyllur në Elbasan do të jepnin dorëheqjen nëse unë do të kandidoja në këtë qark për subjektin që ai përfaqëson. Në atë kohë i kërkova zotit Lapaj që në listë të mbyllur të vendosja një familjarin tim dhe ai/ ajo të jepte dorëheqjen pasi të fitoja në listë të hapur. Zoti Lapaj kërkonte që unë të besoja tek ajo gjë që sot po e lë atë jashtë parlamentit të Shqipërisë. Kjo tregon se partitë e reja kanë mendësitë e partive të vjetra”. m.p.

Një zjarr i fuqishëm ka përfshirë skenën kryesore të festivalit të famshëm “Tomorrowland”, që mbahet në Boom, Belgjikë. Zjarrfikësit janë aktualisht në vendngjarje dhe po përpiqen të vënë nën kontroll flakët.

Sipas VRT News, ende nuk ka të dhëna të konfirmuara nëse ka persona të lënduar. Në momentin që shpërtheu zjarri, në vendngjarje nuk kishte vizitorë, pasi festivali pritet të nisë të premten, por rreth 1,000 punonjës ndodheshin në zonë.

Banorëve përreth u është kërkuar të mbajnë dritaret dhe dyert e mbyllura për shkak të tymit të dendur. Pamjet e publikuara tregojnë flakët që kanë përpirë skenën kryesore, ndërsa re të mëdha tymi ngrihen në ajër. Në sfond dëgjohen edhe fishekzjarre që shpërthejnë, por mbetet e paqartë nëse ato kanë lidhje me shkakun e zjarrit.

Tomorrowland është një nga festivalet më të mëdha të muzikës elektronike në botë, që mbledh çdo vit mijëra adhurues nga e gjithë bota. m.p.

Top Channel pretendon se ka zbuluar arsyen e përplasjes së Adriatik Lapajt me Endri Shabanin.

Sipas këtij burimi, divorci politik Lapaj-Shabani shkon përtej një mandati deputeti dhe si shkak ka mungesën e dakortësisë për një tjetër garë të pritshme, atë të bashkisë së Tiranës.

Endrit Shabani projektonte veten si kandidatin e vetëm të koalicionit kurdo që të bëhen zgjedhjet, ambicie që mesa duket nuk i ka shkuar për shtat aleatit të tij, për të cilin Shabani kishte një kundërpërgjigje.

Me pak fjalë, Shabani ka dashur të kandidojë për bashkinë e Tiranës si kandidat i koalicionit “Nisma Shqipëria Bëhet”, kurse Lapaj ka preferuar një emër tjetër. Ndoshta ekonomistin Panajot Soko.

Pas skandaleve të njëpasnjëshme në burgjet e vendit, ku të burgosurit janë kapur me celularë si dhe takime speciale me eskotra dhe modele të njohura nga showbizzi shqiptar, Policia e Burgjeve ka zbarkuar në paraburgimin 313 dhe 302 ku po ushtron kontrolle blic.

Nga burimet e para për mediat mësohet se kontrollet e hollësishme po ushtrohen në qeli për sende të ndaluara si telefon dhe arme të ftohta.

Inspektimi i imtësishëm në të gjitha burgjet e vendit ka nisur prej mbrëmjes së djeshme dhe raportohet të ketë përfunduar mëngjesin e sotëm ku është kontrolluar për sende të ndaluara të futura brenda nëpër qeli si dhe gjithashtu është bërë kqyrja e të gjitha kartelave të takimeve për disa të burgosur specifikë.

Kujtojmë se dy javë më parë, gjatë një kontrolli të ushtruar në burgun e Drenovës është kapur me telefon celular Laert Haxhiun, një prej të dënuarve për krime të rënda, i njohur për përfshirjen në “Masakrën e Lushnjës”. m.p.

Ditën e djeshme forcat zjarrfikëse arritën të vendosnin nën kontroll zjarrin në Drenovë të Mallakastrës, por mësohet se vatra është aktivizuar sërish.

Burimet për median bëjnë me dijë se zjarri është riaktivizuar në masivin pyjor të Drenovës. Shërbimet zjarrfikëse kanë rinisur operacionin për shuarjen e flakëve, por mësohet se situata është e vështirë për shkak të terrenit malor.

Kujtojmë se zjarri në Drenovë kanë rënë disa ditë më parë dhe janë proceduar penalisht tre persona të cilët dyshohet se kanë ndezur zjarr në tokat e tyre për djegien e mbeturinave, duke shkaktuar përhapjen e flakëve në sipërfaqet pyjore dhe të mbjellave me vreshta dhe pemë frutore. m.p.

Bashkëthemeluesi i Nisma Thurje, Napolon Laska, i ka dedikuar një shkrim në Facebook kreut të kësaj partie, Endri Shabani, duke shkruar se ky i fundit është mashtrues dhe se ka përvetësuar 240 mijë euro në 4 vite.

Duke iu referuar lajmit të sotëm, ku Shabani përdori dajën për të penguar mandatin e Lapajt, Laska shkruan se Shabani ka shkelur në mundin dhe djersën e Lapajt dhe mijëra aktivistëve.

“Si themelues dhe ish-Sekretar i Përgjithshëm i Nisma Thurje duke marrë shkas nga zhvillimet e ditëve të fundit, nuk mund të rri i heshtur dhe pa thënë disa gjëra të cilat meritojnë vëmendjen e publikut. Kur është themeluar Nisma Thurje si parti, në fund të vitit 2020, statuti parashikonte që mos të kishte një kryetar të modelit të forcave të vjetra politike, por të kishte rotacion çdo 2 vite pa të drejtë rizgjedhjeje. Gjithashtu, kryetari edhe pse i sanksionuar në statut si i tillë për shkak të kërkesave të ligjit, nuk kishte të drejtë vendimmarrje, por vendimmarrjen e kishte Çentrali, organ I partisë në të cilin vendimet merreshin në mënyrë demokratike.

Me konsensus në atë kohë, edhe pse ishte përfshirë shumë vonë në Thurjen si organizatë, u vendos që Endri Shabani të ishte kryetar i parë I partisë, ndërkohë u vendos që unë të isha Sekretar i Përgjithshëm. Ndërkohë që të gjithë ishim përqendruar në fushatë Endri Shabani e kishte mendjen si të linte vetëm veten në parti, për të administruar fondet që do vinin nga KQZ.

Pas zgjedhjeve të vitit 2021 duke qenë se Nisma Thurje përfitiu rimbursim për çdo palë zgjedhje të shpenzimeve dhe një fond rreth 240 mijë Euro në 4 vite.
Çdo akt i dorëzuar në gjykatë, para dhe pas zgjedhjeve të vitit 2021, për shkarkime apo zgjedhje apo zgjatje mandati në forumet drejtuese në parti është falsifikuar pasi asnjherë nuk është mbledhur kongresi dhe forume të tjera të partisë.
Sigurisht që pas zgjedhjeve u kujdes që të largoheshin dhe ata pak anëtarë që kishin ngelur, duke e kthyer Nisma Thurje nga shpresë për ndryshim në atë kohë, në Partinë njeriut të Vetëm.

Të gjitha këto falsifikime dhe qëndrimi i tij në krye të partisë në kundërshtim me statutin sigurisht që janë bërë për të vjedhur 240 mijë Eurot e akorduara nga KZQ. Ndaj sot, nuk jam i habitur që ky hajdut kronik tenton të vjedhë mandatin e Adriatik Lapajt dhe Lëvizjes Shqipëria Bëhet duke shkelur mbi mundin dhe djersën jo vetëm të Adriatikut por të qindra dhe mijëra aktivistëve e mbi të gjitha mbi besimin e mbi 70mijë votuesve. Hajdutët në politikê i kemi provuar, na dalin e teprojnë kêta që kemi. Si shokët edhe Shabani do vejë në burg ku e ka vendin si hajdut e mashtrues”, shkruan Laska në Facebook.

Këshilli i Ministrave ka miratuar hapjen e pikës së kalimit kufitar në Aeroportin Ndërkombëtar të Vlorës, duke i hapur rrugë nisjes së qarkullimit ndërkombëtar të pasagjerëve përmes këtij aeroporti të ri.

Sipas vendimit, pika kufitare do të shërbejë për qarkullimin ndërkufitar ajror të shtetasve, ndërsa për zbatimin e tij janë ngarkuar disa ministri: Ministria e Brendshme, Ministria e Infrastrukturës dhe Energjisë, Ministria e Financave dhe Ministria e Bujqësisë dhe Zhvillimit Rural.

Vendimi i plotë:

Në mbështetje të nenit 100 të Kushtetutës dhe të pikës 1, të nenit 8, të ligjit nr.71/2016, “Për kontrollin kufitar”, të ndryshuar, me propozimin e ministrit të Brendshëm, Këshilli i Ministrave V E N D O S I:
1. Hapjen e pikës së kalimit kufitar në Aeroportin Ndërkombëtar të Vlorës për qarkullimin ndërkufitar ajror të shtetasve.
2. Ngarkohen Ministria e Brendshme, Ministria e Infrastrukturës dhe Energjisë, Ministria e Financave dhe Ministria e Bujqësisë dhe Zhvillimit Rural për zbatimin e këtij vendimi.
Ky vendim hyn në fuqi pas botimit në “Fletoren zyrtare”. m.p.

Ursula von der Leyen ka zbuluar propozimin e saj për buxhetin e ri të Bashkimit Evropian me vlerë 2 trilionë euro midis viteve 2028 dhe 2034, një rritje e konsiderueshme krahasuar me 1.21 trilionë euro të miratuar nga udhëheqësit në verën e vitit 2020.

“Është një buxhet për një epokë të re që përputhet me ambicien e Evropës”, tha presidentja e Komisionit Evropian të mërkurën pasdite.

“Kjo adreson sfidat e Evropës. Kjo forcon pavarësinë tonë”, tha ajo, sipas medias së huaj.

Projekti i saj rimodelon strukturën e buxhetit përgjatë tre shtyllave kryesore. 865 miliardë euro për politikën bujqësore, të peshkimit, të kohezionit dhe atë sociale.

410 miliardë euro për konkurrueshmërinë, duke përfshirë kërkimin dhe inovacionin. 200 euro për veprim të jashtëm, përfshirë 100 miliardë euro për Ukrainën.

Ndërsa kontributet direkte nga shtetet anëtare do të mbulojnë pjesën më të madhe të buxhetit, Von der Leyen parashikon gjithashtu taksa të reja në të gjithë BE-në mbi mbeturinat elektrike, duhanin dhe fitimet e korporatave për t’i lejuar Brukselit të mbledhë të ardhura shtesë vetë. m.p.

Breidablik triumfoi pastër 5-0 ndaj Egnatias, duke u kualifikuar kështu për në turin e dytë të Champions League.

Hoskuldur Gunnlaugsson, lojtar i ekipit islandez nuk hezitoi të tallej me kundërshtarët, duke i cilësuar lojtarët e ekipit kampion të Shqipërisë si “të shpejtë vetëm për të hedhur peshqirin”. Ai po ashtu tha se gjatë lojës, futbollistët nisën t’i bërtisnin njëri-tjetrit.

“Po, pikërisht, dhe sonte të gjithë ishin shumë të kujdesshëm në shfrytëzimin e mundësive, përveç meje, mendoj. Ishim të përqendruar dhe punëtorë, dhe mendoj se fryma e ekipit shkëlqeu nëse e krahasoj veten pak me kundërshtarët tanë.

Ata te Egnatia ishin të shpejtë për të hedhur peshqirin, filluan të bërtisnin ndaj njëri-tjetrit dhe gjyqtarit, dhe ne vazhduam me rrjedhën e ndeshjes. Ne nuk jemi njohur për fitoret jashtë në transfertë, por për fitoret në shtëpi. Në ndeshjen e parë pësuam një gol të pafaund në fund, por e ndjemë këtë përmbysje”, tha Hoskuldur Gunnlaugsson. m.p.

Në portalin e qeverisë e-Albania janë regjistruar në total 85,980 aplikime për “leje unike”.

Shërbimi elektronik “Aplikim për leje unike” u mundëson shtetasve të huaj që kërkojnë të qëndrojnë dhe të punojnë në territorin e Republikës së Shqipërisë, të bëjnë një kërkesë për t’u pajisur me leje unike në Republikën e Shqipërisë.

Sipas të dhënave të publikuara nga e- Albania, vetëm gjatë vitit 2022 janë regjistruar 36,700 aplikime, ndërsa gjatë vitit 2023 shënohen 36,348 aplikime dhe në vitin 2024 janë 12,932 aplikime.

Paralelisht me kërkesën e bizneseve për të pasur mundësi të punësojnë të huaj në kushtet e mungesë së krahut të punës në vend, ka ardhur në përmirësim të vazhdueshëm dhe është lehtësuar procesi i aplikimit në sistemin online, nga bizneset për lejeve unike. m.p.

Komiteti Ekzekutiv i FSHF-së ka miratuar propozimin e ri për ndryshimin e rregullores së kampionatin “Abissnet Superiore” për fazën “Final 4”.

Pas takimit konsultues me drejtuesit e klubeve, ku shumica shprehën mbështetjen për këtë propozim, Komiteti Ekzekutiv vendosi ta miratojë. Kështu, duke nisur nga sezoni 2025-2026, faza “Final 4” do të funksionojë sipas kësaj rregulloreje:

Kampionati është me 4 faza të rregullta, vajtje – ardhje. Renditja pas 36 javëve përcakton pjesëmarrësit në Final 4.

Katër ekipet e para kualifikohen në Final 4. Pikët në Final 4 do të përgjysmohen, duke marrë për bazë vlerën më të ulët. Të gjitha ndeshjet zhvillohen në stadiumin “Air Albania”.

Pjesëmarrësit në kompeticionet europiane përcaktohen nga renditja e Final 4. Vendi 9 dhe 10 i “Abissnet Superiore” bie nga kategoria. Vendi i tetë i “Abissnet Superiore” shkon në “play out”. m.p.

Vetëm pak minuta pasi Adriatik Lapaj e sulmoi në rrjetet sociale Endri Shabani ka reaguar me disa vargje në “Facebook”.

“Mora pushkën dola malit,
Të luftoja për atdhe,
Ku ta dija unë i varfri,
Se armiku ishim ne.

Mora pushkën dola malit
Të luftoja në furtunë;
Ku ta dija unë i ngrati
Se armiku isha unë”.

Më herët, Adriatik Lapaj reagoi pasi kandidati për deputet i koalicionit “Nisma Shqipëria Bëhet”, Zeqir Kordhoni, i ka dërguar një letër Komisionerit Shtetëror të Zgjedhjeve, ku shpreh vullnetin për të pranuar mandatin, në rast se do të shpallet fitues i tij.

Kandidatët e këtij koalicioni në listën e mbyllur kishin nënshkruar para zgjedhjeve një deklaratë noteriale ku deklaronin se hiqnin dorë nga mandati, në mënyrë që të futeshin në Parlament kandidatët nga lista e hapur me më shumë vota. m.p.

Qeveria do të miratojë një reformë të re për kontrollin e territorit, duke marrë shkas nga zaptimi i hapësirave publike nga ndërtimet pa leje.

Kryeministri Edi Rama, në një postim të fundit në Facebook, ka publikuar rastin e një shtese lokali që është legalizuar në hapësirë publike.

Lidhur me raste të tilla, Rama thotë se do të anulohet ligjërish legalizimi i lejeve të tilla, e madje do të ketë hetim penal edhe për punonjësit e Kadastrës që kanë zbatuar akte të tilla.

Për të gjitha këto lloj çmendurish me qëllim fitimi, të cilat kanë marrë dokument legalizimi në hapësirën publike në kurriz të komunitetit, jo vetëm që do të reagohet zero tolerancë duke i anuluar ligjërisht, por do të miratohet si pjesë e reformës së re të kontrollit të territorit edhe një masë për ndëshkimin penal të të gjithë atyre nëpunësve të kadastrës që kanë firmosur për këto legalizime kriminale”, shkruan Kryeministri Edi Rama. m.p.

Adriatik Lapaj ka reaguar me anë të një postimi në rrjetet sociale pasi kandidati për deputet i koalicionit “Nisma Shqipëria Bëhet”, Zeqir Kordhoni, i ka dërguar një letër Komisionerit Shtetëror të Zgjedhjeve, ku shpreh vullnetin për të pranuar mandatin, në rast se do të shpallet fitues i tij.

Kandidatët e këtij koalicioni në listën e mbyllur kishin nënshkruar para zgjedhjeve një deklaratë noteriale ku deklaronin se hiqnin dorë nga mandati, në mënyrë që të futeshin në Parlament kandidatët nga lista e hapur me më shumë vota.

“Është angazhuar gjithë këneta si e si të mos shkoj unë në Kuvend. Po sa tmerr më keni?! O të mjerë, unë nuk pranoj shantazh e as shitem. Zeqiri (dajo i Endrit) dhe nipi i tij Endri Shabani të cilit i shtriva dorën e bashkimit nuk do marrin asnjë mandat. Qameti do ndalojnë mua të shkoj në Parlament. Është një popull i tërë dëshmitar se Endri Shabani u angazhua për hapjen e listave dhe doli garant për familjarët e vetë. Nëse Endri Shabani do të mbahet mend kështu në jetën publike, mbarë u shkoftë bashkë me dajon! Jam krenar që u luftova nga çdo anë dhe nuk u ndala! U luftova nga Rama, Saliu dhe këta “të rinjtë”, deri dhe te ky që e futa në gji…nga të gjithë.

Ndaj meje dhe krejt ekipit të Lëvizjes Shqipëria Bëhet po konsumohet publikisht PADREJTËSI! Populli do gjykojë”, shkroi Lapaj në rrjetet sociale.

Në këto lista të mbyllura u përfshinë edhe familjarë të anëtarëve aktivë të dy partive, Nisma Thurje dhe Shqipëria Bëhet. m.p.

Renis Dobra u rrëmbye dhe u vra mbrëmjen e 8 korrikut dhe për të fshehur ngjarjen trupi i 23 vjeçarit u hodh në liqenin e Shkopetit. Tashmë një javë pas ngjarjes, policia ka mundur ta zbardhë atë duke identifikuar 4 autorët e dyshuar, tre prej të cilëve vëllezër. Uniformat blu kanë vënë në pranga dy autorët, Petrit Çakrri dhe Fatjon Bushgjoka, person me precedentë penalë për vepra të ndryshme.

Ata u kapën në Kukës e në Tiranë. Ndërsa në kërkim janë shpallur Kristi Bushgjokaj dhe Aleksandër Bushgjokaj.

Tre vëllezërit Bushgjokaj nga Tropoja të cilës jetonin në Kamëz dhe Petrit Çakrri për të kryer krimin kanë marrë në përdorim mjete me qira në Rinas e në Yzberisht dhe për tre ditë me radhë kanë vëzhguar lëvizjet e Dobrës. Mjetet ata i kanë ndërruar shpesh për të mos rënë në gjurmët e policisë.

Një prej vëllezërve Bushgjokaj akuzohet për përkrahje të autorit të krimit pasi rezulton se ka dërguar në Kosovë dy vëllezërit e tij pas kryerjes së vrasjes.

Ndërsa dy vëllezërit e tjerë akuzohen se kanë bashkëpunuar në kryerjen e krimit. Nga hetimet ka rezultuar se autorët kanë tentuar të heqin disa herë GPS e makinave me qira por nuk ia kanë arritur.

Shkak i vrasjes dyshohet të jetë bërë humbja e një sasie droge në Gjermani ku kishte nisur edhe njohja e tyre dhe për këtë vëllezërit Bushgjokaj akuzonin viktimën Renis Dobra.

Detajet u dhanë në një konferencë për mediat nga drejtori i Policisë së Dibrës, Artion Duka. Policia është duke punuar për të identifikuar nëse në krim ka persona të tjerë të përfshirë. Në komisariat u shoqëruan edhe 4 persona të tjerë, ndërsa u sekuestruan 20 aparate celularë 7 automjete, një shumë eurosh, një sasi lënde narkotike kokainë, si dhe prova të tjera të cilat do t’i shërbejnë hetimeve. m.p.

Ju prezantojmë me Melisën, roboti që shërben së bashku me kamarierët në në një pasticeri në Durrës.

Melisa lëviz mes tavolinave, duke shërbyer dhe sjellë buzëqeshje. Flet anglisht, është e sjellshme dhe ka marrë menjëherë vëmendjen e klientëve, sidomos të fëmijëve.

Eriona Sopi sipërmarrësja që solli këtë risi në shërbim rrëfen se gjithçka nisi nga dëshira për të sjellë diçka ndryshe dhe moderne në shërbim të klientëve.

“Porosia është bërë në Kinë, është dashur një vit për ta sjellë këtu. Ky robot është ndihmës i kamarierëve në transportimin e produkteve dhe në ndihmesën e tyre. Absolutisht jo për eliminimin e fuqisë punëtore, vetëm për të ndihmuar. E kanë pritur shumë mirë, është shumë gjë e bukur. Zëvendësim nuk besoj, ndihmës po, ndoshta reduktim, mendoj”, tha Eriona Sopi, sipërmarrëse.

Melisa tërheq vëmendjen e klientëve që ndjekin çdo lëvizje të saj, ndërsa për stafin mund të quhet pa frik një kolege e mirë që ju vjen në ndihmë.

“Nuk është se ndihemi shumë në presion, por janë ndihmë plus për stafin. Nuk besoj që do të zëvendësojë punëtorët, thjesht do ta kemi si ndihmë”, shtoi menaxheri.

Në një kohë kur teknologjia po futet gjithnjë e më shumë në jetën e përditshme, Melisa është një shembull i vogël, por domethënës, se si risi të tilla mund të përmirësojnë shërbimin, pa e zëvendësuar njeriun, por duke e ndihmuar atë. m.p.

Një aksident ka ndodhur ditën e sotme në aksin Elbasan-Librazhd. Mjeti i drejtuar nga J.M, 27 vjeç është përplasur me një automjet tjetër me drejtues K.B.

Si pasojë e këtij aksidenti janë plagosur dy pasagjere, ndërsa policia ka nisur hetimin për 27-vjeçarin.

‘Specialistët e Sektorit të Qarkullimit Rrugor referuan materialet në Prokurori ku nisi procedimi penal për shtetasin J. M., 27 vjeç, pasi në aksin rrugor “Elbasan-Librazhd”, automjetin që drejtonte është përplasur me automjetin me drejtues shtetasin K. B., 50 vjeç. Si pasojë janë dëmtuar lehtë 2 pasagjere në automjetin me drejtues shtetasin K. B’, njoftoi policia.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme. m.p.

Presidenti Donald Trump ka kërcënuar të zbatojë “tarifa të ashpra” ndaj Rusisë nëse nuk arrihet një marrëveshje paqeje në Ukrainë brenda 50 ditësh.

Sipas mediave të huaja, ky njoftim ka marrë mbështetjen e senatorit amerikan Lindsey Graham, i cili thotë se tarifat për vendet që blejnë naftë të lirë ruse do ta “godasin Putinin aty ku dhemb më shumë”.

Duke iu referuar sulmeve të fundit të SHBA-së ndaj objekteve bërthamore iraniane, Graham shtoi se nëse Putini “dhe të tjerët” po pyesin veten se çfarë do të ndodhë në ditën e 51-të, “do të sugjeroja që ata të telefonojnë Ajatollahun”.

Irani ka qenë një aleat kyç i Rusisë në luftën e saj kundër Ukrainës dhe e ka ndihmuar Moskën të zhvillojë armët e veta.

“Nëse do të isha një vend që blen naftë të lirë ruse, duke mbështetur makinën e luftës së Putinit, do t’i besoja fjalës së presidentit Trump”, tha Graham. m.p.