3 persona humbën jetën dhe mbi 90 të tjerë mbetën të plagosur si pasojë e një aksidenti hekurudhor në Egjiptin perëndimor.

Të dhënat paraprake tregojnë se treni i pasagjerëve i nisur nga Matrouh, doli nga shinat teksa ishte drejtuar për në Kajro.

Shtatë nga vagonët e tij dolën nga shinat, me dy prej tyre që u përmbysën.

30 ambulanca u dërguan në vendngjarje për të transferuar të plagosurit në spitale, teksa autoritetet kanë nisur një hetim për ngjarjen.

Aksidentet hekurudhore janë të zakonshëm në Egjipt për shkak të amortizimit të sistemit hekurudhor dhe keqmenaxhimit. m.p.

Rihanna feston sot plot 20 vite karrierë në industrinë e muzikës botërore.

Me anë të një postimi emocional në rrjete sociale, këngëtarja nga Barbadosi është shprehur mirënjohëse për të gjithë udhëtimin e saj në industri, për rrugëtimin e suksesshëm artistik si dhe për të gjithë fansat e mbështetësit e saj.

Postimi i saj në rrjete sociale është një përmbledhje e të gjithë hiteve dhe bashkëpunimeve më të suksesshme ndër vite.

“20 vjet më parë lashë vendin tim, kulturën time, ushqimin dhe familjen për të nisur një udhëtim që filloi me publikimin e veprës sime të parë muzikore! Shumë prej jush kanë qenë pjesë e jetës dhe karrierës sime që nga fillimi, dhe shumë të tjerë i janë bashkuar gjatë rrugës. Ju jam përjetësisht mirënjohëse. Secili prej jush ka luajtur një rol vendimtar në drejtimin ku më ka çuar ky udhëtim deri më sot”, shkruan Rihanna në Instagram. m.p.

Presidentja Vjosa Osmani ka përkujtuar personat e pagjetur në Ditën Ndërkombëtare të Personave të Zhdukur me Dhunë, të cilën ajo e ka quajtur plagë të hapur të Kosovës tash e 26 vjet pas përfundimit të luftës, raporton KosovaPress.

Duke përkujtuar se pas çdo numri është një jetë e ndërprerë, një familje e cila prej më shumë se dy dekadash pret drejtësinë për më të dashurit, presidentja Osmani ka thënë se regjimi i presidentit serb Aleksandar Vuçiq vazhdon të fle mbi varreza masive, duke mbajtur peng zbardhjen e fatit të të zhdukurve.

“Varret e hapura janë dëshmi e gjallë e krimeve të luftës dhe krimit te përsëritur nga regjimi gjenocidal serb, si dhe kujtesë e përditshme se drejtësia nuk është vënë ende në vend. Për sa kohë sa mijëra qytetarë tanë mbesin të zhdukur, paqja mbetet e paplotë. Është koha që partnerët ndërkombëtarë ta rrisin presionin mbi Serbinë, sepse vetëm zbardhja e fatit të të zhdukurve si dhe drejtësia mund t’u japin familjeve qetësinë që meritojnë”, ka shkruar Osmani në Facebook.

Kujtojmë edhe 26 vjet pas përfundimit të luftës nuk dihet ende për fatin e 1584 qytetarëve të Kosovës. Kosovapress. m.p.

Për likuiditet apo edhe investime, bizneset kanë marrë më shumë kredi për të zhvilluar aktivitetin e tyre në 7 muajt e parë të vitit. 19.1 miliardë lekë morën hua koorporatat jofinanciare private vetëm në muajin korrik sipas të dhënave të Bankës së Shqipërisë.

Por ndalur sipas sektorëve të shfaqet një panoramë e ndryshme, me bizneset të cilat vijojnë të financohen nga bankat dhe të tjera të cilat pësojnë tkurrje të vazhdueshme.

Më shumë kredi në vendin tonë ka marrë sektori i tregtisë, në 8.5 miliardë lekë vetëm 1 muaj më parë, ndërsa financimin më të lartë me hua e përfitoi në fillim të sezonit veror.

Ndërkohë, një ndikim pozitiv në rritjen e portofolit të kredisë për biznese ka dhënë edhe sektori i industrisë, ritmet e rritjes së të cilit rikthyen në terren pozitiv kontributin e këtij sektori. Brenda këtij sektori është dega e industrisë përpunuese, e cila fitoi më shumë financim nga bankat me 2.7 miliardë lekë, pasuar nga ajo nxjerrëse 488 milionë lekë, një rritje e ndjeshme krahasuar me të njëjtën periudhë të një viti më parë.

Më shumë kredi kanë përfituar dhe aktivitetet e pasurive të paluajtshme si dhe informacioni dhe komunikacioni.

Sektorët të cilët kanë pësuar rënie të kreditimit dhe më të keqfinancuarit janë edhe më të shumtë. Ndërtimi ndonëse një nga kontribuesit më kryesor në rritjen ekonomike të vendit, ka pësuar një tkurrje me 34% të huasë duke zbritur në 2.1 miliardë lekë. Ndërsa edhe kredia për sektorin e turizmit ka pësuar rënie. Bizneset e akomodimit dhe shërbimit ushqimor kanë përfituar 1.2 miliardë lekë kredi, rënie në krahasim mujor ndërsa vjetor një rritje e lehtë.

Deputeti i ardhshëm i Kuvendit të Shqipërisë i ardhur nga radhët e Partisë “Mundësia”, Erald Kapri ka takuar ditën e sotme Yemi Mobolade, kryetarin e bashkisë së Colorados.

Kapri ka ndarë disa foto në profilin e tij krah Mobolade, ndërsa tregon se historitë e tyre në rrugën drejt triumfit në politikë i bashkon ndershmëria dhe puna.

Kryebashkiaku Mobolade është një emigrant nga Nigeria, i cili arriti të fitonte vendin e tij në politikë pa pasur mbështetje nga partitë e mëdha, duke i dhënë zë ëndrrës amerikane.

Nga ana tjetër, Partia Mundësia “luftoi” fort në zgjedhjet e 11 majit, për të pasur zërin e tyre në Kuvend me qëllim rikthim e besimit dhe shpresën tek qytetarët e vendit.

Postimi i Erald Kaprit:

Sot takova kryebashkiakun e Colorado Springs, Yemi Mobolade. Një emigrant nga Nigeria, pa mbështetjen e asnjë partie të madhe, ai fitoi duke besuar tek mundësitë dhe duke rikthyer shpresën te ëndrra amerikane.

Kur i tregova për Partinë Mundësia dhe energjinë e fushatës sonë në Shqipëri, u entuziazmua dhe kërkoi të mësonte çdo detaj. Ndamë bashkë mesazhet dhe përvojat nga takimet me qytetarët.

Historia e tij dëshmon se PO, me ndershmëri dhe punë, mund t’ia dalësh! m.p.

Një ndër emrat ikonë të muzikës italiane të viteve ’60, këngëtari Gianni Morandi prej ditësh është duke pushuar në bregdetin shqiptar.

Legjenda e kinemasë italiane së fundmi ndodhet në Himarë ku dhe është takuar me kryebashkiakun Vangjel Tavo. Pas sygjerimeve nga miqtë e tij, Morandi fillimisht vizitori Tiranën për 1 ditë e më pas shkoi në Palasë. Pas dy ditëve ai u bë vizitor në Himarë e Dhërmi.

Kryebashkiaku i Himarës, Vangjel Tavo ka shprehur kënaqësinë e për ardhjen e Gianni Morandit në Shqipëri ndërsa ka ndarë dhe video duke treguar dhe mikpritjen shqiptare.

“Kënaqësi e madhe që një ikonë e muzikës italiane si Gianni Morandi, të zgjedhë Dhërmiun për të pushuar. Pata nderin të kem një takim miqësor dhe shumë emocionues me këngëtarin i cili me muzikën e tij, ka bërë epokë dhe ka kultivuar edhe disa breza shqiptarësh, që nga vitet 60-të. Mirënjohje Gianni Morandi që zgjodhe Jugun e Shqipërisë!”, shprehet kryebashkiaku Tavo.

Nga ana tjetër, Gianni Morandi tregon se ai dhe familja e tij po i shijojnë në maksimum pushimet në brigjet e Shqipërisë.

“Italinë dhe Shqipërinë i lidhin miqësi të forta, sikurse ato të artit dhe muzikore. Shqiptarët janë shumë të apasionuar pas muzikës dhe kanë dëgjuar shumë këngë italiane në vitet 60-80. Shumë miq të mi italianë vijnë me pushime këtu. Një mik i imi inxhinier nga Bolonja më tha: Shko me pushime në Shqipëri, sepse është vend fantastik! Këtu ku qëndrojmë është shumë bukur, kemi malin dhe detin, jemi përballë njëri-tjetrit. E dëgjova dhe erdha, bashkëshortja ime është shumë e lumtur. Besoj se do rikthehem edhe herë të tjera, siç do e bëjnë edhe shumë italianë”. m.p.

Dy persona kanë humbur jetën në një aksident ajror që ndodhi mes komunave Crescentino e Livorno Ferraris në Itali.

Viktimat janë babë e bijë, të cilët humbën jetën pas rrëzimit të një avioni të vogël me të cilin ata po udhëtonin.

Avioni raportohet të ketë rënë me shpejtësi të lartë në tokë dhe më pas ka shpërthyer në flakë.

Në vendngjarje shkuan menjëherë zjarrfikësit dhe efektivët e policisë që po hetojnë për shkaqet e këtij aksidentit të rëndë. m.p.

Lideri i Korësë së Veriut, Kim Jong Un ka takuar familjet e ushtarëve që kanë humbur jetën teksa luftonin përkrah trupave ruse kundër Ukrainës, duke i shprehur atyre ngushëllimet më të thella.

Ai i priti ata me një ceremoni speciale dhe iu dhuroi portrete të djemve të vrarë, të mbështjella me flamurin e Koresë së Veriut.

Sipas autoriteteve të Koresë së Jugut, fqinji verior ka dërguar rreth 15,000 ushtarë për të mbështetur Rusinë, duke marrë si këmbim ndihma në ushqime dhe teknologji. Deri tani, Koreja e Veriut ka pranuar se disa nga ushtarët e saj janë vrarë, dhe vlerësimet flasin për rreth 600 të vdekur.

Kim tha se ishte shumë i trishtuar që nuk mundi t’i sillte ushtarët e vrarë gjallë duke premtuar se do të ndërtonte një monument për ta dhe do të kujdesej për fëmijët e tyre.

Pas ceremonisë, Kim pritet të takojë Vladimir Putin në Kinë për një paradë ushtarake, duke thelluar bashkëpunimin ushtarak midis dy vendeve. m.p.

Dy shqiptarë, 25 dhe 36 vjeç, janë arrestuar nga policia italiane në rajonin e Peruxhias, pasi u kapën me një sasi prej 15 kg kokainë dhe 100 mijë euro cash. Hetimet tregojnë se ata dyshohen për përfshirje në një rrjet trafiku që lidh Toskanën dhe Umbrinë.

Gjatë ndalimit, njëri prej tyre u përpoq të arratisej dhe hodhi 2 kg kokainë, ndërsa tjetri po fshihte 70,000 euro të gatshme në makinën e tij dhe në çantë. Pas kontrolleve në shtëpitë e tyre, u gjetën edhe 12 kg kokainë të tjera dhe rreth 23,000 euro.

Kokaina ishte e paketuar në mënyrë të veçantë, me ngjyra të ndryshme, që dyshohet të kenë simbolizuar porositësit. Hetimet vazhdojnë për të zbuluar të gjithë rrjetin dhe bashkëpunëtorët e mundshëm. m.p.

Fabrizio Romano raporton se Chelsea i ka dërguar këtë pasdite Barcelonës ofertën e parë zyrtare për Fermin Lopez dhe është shumë larg asaj që pritej.

Sipas raportimit në fjalë, “Blutë” i kanë ofruar Barcelonës shifrën 40 milionë euro për kartonin e Fermin Lopez dhe presin një përgjigje brenda ditës së sotme. Sigurisht që pritet përgjigje negative nga Barcelona, pasi katalanasit janë të gatshëm të lejojnë largimin e Fermin Lopez vetëm për një shifër 60 milionë euro ose më shumë.

Nga ana tjetër, vetë lojtari duket se nuk ka ndërmend të largohet nga Barcelona, duke ditur edhe besimin e madh që trajneri Hansi Flick ka për të. Largimi i Fermin Lopez për një shifër mbi 60 milionë euro, mund të zgjidhte disi problemet financiare të Barcelonës. m.p.

Sulmuesi shqiptar i Rubin Kazan, Mirlind Daku, ka vazhduar me ritmin e tij të shkëlqyer në elitën e futbollit të Rusisë, duke shënuar një dygolësh në barazimin 2-2 ndaj Orenburgut. Në këtë ndeshje të zhvilluar të shtunën, Daku ka arritur të realizojë golin e parë në minutën e 16-të, dhe të dytin në minutën e 34-të, duke u shfaqur si një nga lojtarët më të rëndësishëm të skuadrës.

E veçantë ishte dedikimi i parë të golit, të cilin Daku ia kushtoi gjyshit të tij që ndërroi jetë disa ditë para ndeshjes.

Përveç suksesit me klubin, Daku ka edhe dy ndeshje të rëndësishme me Kombëtaren e Shqipërisë. Ai do të jetë një nga lojtarët kyç për trajnerin Sylvinho në përballjet e ardhshme për kualifikueset e Kampionatit Botëror, ku Shqipëria ka nevojë për rezultate pozitive. m.p.

Kalaja e Bashtovës ka rihapur dyert duke pritur përsëri vizitorët. Ka qenë vetë kryeministri Edi Rama ai i cili përmes një postimi në rrjetet sociale ka ndarë pamjet nga Kalaja e cila është bërë sërish e aksesueshme për vizitorët pas restaurimeve të bëra.

“Kalaja e Bashtovës, një nga monumentet më të çmuara të trashëgimisë sonë historike, ka rilindur duke hapur dyert për vizitorët, tashmë si një hapësirë moderne për kulturën, turizmin dhe zhvillimin e qëndrueshëm të komunitetit”, shkruan Rama.

Restaurimi i Kalasë së Bashtovës është pjesë e programit të BE-së për kulturën, i cili ka për qëllim rijetëzimin e 21 siteve historike në të gjithë Shqipërinë, duke i kthyer në burime zhvillimi ekonomik dhe social.

Falë bashkëpunimit të ngushtë mes Bashkimit Europian, UNOPS-it dhe institucioneve shqiptare, Kalaja e Bashtovës jo vetëm që është shpëtuar nga degradimi, por është transformuar në një qendër të re kulturore dhe turistike për rajonin. m.p.

Nevoja për të ‘qetësuar’ kursin e këmbimit po rrit shpejt rezervën valutore që mbahet dhe administrohet nga Banka e Shqipërisë.

Këtë vit po regjistrohen vlerat më të larta ndonjëherë të rezervës valutore. Sipas të dhënave të fundit të Bankës së Shqipërisë në fund të muajit korrik rezerva ishte 6.8 miliardë euro, ndërkohë që në fillim të këtij viti ishte më pak se 6.3 miliardë euro.

Kurse në raport me vitin e kaluar rezerva valutore është rritur me gati 17% ose afro 1.1 miliardë euro. Kjo rezervë aktivizohet në ditë të këqija, për të shlyer borxhin në valutë, për të mbuluar importet për të paktën 1 vit në rast nevoje si dhe për të siguruar stabilitetin e kursit të këmbimit.

Një nga shkaqet kryesore të rritjes së shpejtë të saj është shtimi i blerjeve të valutës në treg nga Banka e Shqipërisë me qëllim që të stabilizojë kursin e këmbimit dhe të frenojë një zhvlerësim më të fortë se kaq të euros apo dollarit.

Nëse vjet plani ishte për të blerë 250-330 milionë euro për të rritur rezervën, këtë vit planifikimi është bërë për të tërhequr 270-350 milionë Euro. Vetëm në tremujorin e parë u blenë 33 milionë euro për të stabilizuar kursin, ndërsa guvernatori deklaroi pak javë më parë se blerjet janë shtuar edhe më shumë në tremujorin e dytë, por megjithatë, monedhat e huaja vijojnë të tkurren.

Euro e mbylli gushtin më i dobët se kurrë, duke paralajmëruar ditë jo të mira për eksportuesit shqiptarë, të cilëve vijojnë tu zhvlerësohen fitmet, pasi i kanë në monedhën evropiane. Euro këtë muaj thotë banka e Shqipërisë është këmbyer mesatarisht me 97.2 lekë duke u zhvlerësuar me 3% krahasuar me gushtin e një viti më parë.

Institucionet shtetërore thonë se valutat po dobësohen nga turizmi dhe investimet e huaja që kanë sjellë fluks të madh të euros apo dollarit në treg. Kurse për ekspertët, në këtë zhvlerësim të monedhave të huaja po ndikon ndjeshëm edhe paraja informale. m.p.

Një shqiptar i moshës 35-vjeçare është arrestuar në shtetin italian i akuzuar për dhunë të rëndë në familje.

Shqiptari, identiteti i të cilit nuk është bërë me dije për mediat, dhunonte sistematikisht të dashurën e tij 23-vjeçare. Sulmi më i rëndë është ai i 20 korrikut kur shqiptari e goditi në mënyrë brutale me bishtin e një fshese.

Si pasojë e sulmit ajo pësoi thyerje të hundës dhe lëndime të tjera, me një prognozë prej të paktën 30 ditësh.

Masa e sigurisë “arrest me burg” u pa si e arsyeshme nga gjyqtari i çështjes për shkak të shkallës së seriozitetit të ngjarjes dhe mundësive të përshkallëzimit të sulmeve fizike. Sakaq, 35-vjeçari shqiptar nuk ishte i pajisur me leje qëndrimi në shtetin italian. m.p.

Pëllumb Pilinçi së bashku me anëtarët e kabinetit të tij ka vizituar ditën e sotme qytetin e Korçës ku dhe është takuar me mbështetësit.

Ashtu sikurse dhe në vendet e tjera, edhe në qytetin juglindor, profesori i cili më herët ka shpallur “qeverinë teknike”, shkoi i blinduar deri në “dhëmb”, me bodygard dhe automjet luksoz.

Ka qenë demokrati besnik i Sali Berishës, Ilir Vrenozi ai i cili ia ka bërë “llogaritë” Pilinçit duke bërë me dije se vetëm automjeti i kushton mijëra euro.

Sipas tij limuzina me të cilët ai qarkullon nëpër qytetet e vendit ka qiranë ditore 500 euro.

“Kjo limuzina është 500 euro qiraja në ditë. 30 ditë nga 500 euro 15 mijë euro. Për Zotin e Madh, 500 euro është limuzina. Hajde, hajde. Po shikoje ore, vazhdon, veta janë aty, turp i Zotit”, dëgjohet të thotë Vrenozi në videon e postuar. m.p.

Një aksident rrugor me pasojë plagosjen e një kalimtari është regjistruar pasditen e së shtunës në zonën e Repsit, në aksin e Rrugës së Kombit.

Sipas të dhënave nga policia, aksidenti ka ndodhur pranë Repsit, kur mjeti i drejtuar nga N.A. ka përplasur këmbësorin A.N. i cili ishte duke kaluar rrugën.

I plagosuri ka marrë dëmtime të shumta dhe për këtë arsye është dërguar me urgjencë në spitalin e Traumës në Tiranë.

Ndërkohë që policia ka shoqëruar drejtuesin e mjetit të përfshirë në aksident dhe po punon për zbardhjen e shkaqeve. m.p.

Ish-kryetari i parlamentit ukrainas dhe njëkohësisht deputet, Andriy Parubiy, është vrarë ditën e sotme në qendër të qytetit të Lvivit.

Andriy Parubiy u qëllua nga një person i maskuar si korrier i veshur me të zeza dhe me një motorr. Ai qëllon mbi deputetin ukrainas teksa ky i fundit po ecte në trotuar.

Lajmin për vdekjen e politikanit Andriy Parubiy e ka bërë me dije presidenti i Ukrainës, Volodymyr Zelensky, i cili tha se lidhur me këtë “vrasje të tmerrshme” do të kryhet një hetim i thelluar për të sqaruar plotësisht rrethanat e rastit. m.p.

Des images montrent un tueur ouvrant le feu avec un pistolet en direction d’Andriy Parubiy ; au moment du meurtre, la victime est cachée des caméras de surveillance par des arbres, mais le tireur avec un sac Glovo est bien visible. https://t.co/Uxy1Efotxv pic.twitter.com/lRcMKtBLcD

— Bounty (@JoelTarnawski) August 30, 2025

Interesimi i tifozëve për ndeshjen e 9 shtatorit të kombëtares ndaj Letonisë, është ndjeshëm më i ulët. Ndryshe nga ndeshjet e tjera, ku biletat shiteshin në pak orë, këtë herë biletat kanë dalë në shitje që në datën 6 gusht, madje në sasi më të vogël për shkak të vendimit të UEFA-s për të mbyllur një sektor të stadiumit “Air Albania”.

Lajmin e raporton Panorama Sport. Biletat ende nuk janë shitur dhe bie në sy fakti se ndaj Letonisë, biletat po shiten edhe fizikisht dhe jo vetëm online siç shiteshin në ndeshjet e mëparshme. m.p.

Dyshja e njohur, Dua Kipa dhe i fejuari i saj, aktori Callum Turner, janë gati të hyjnë në botën e biznesit së bashku. Këngëtarja me famë botërore ka krijuar këtë javë një kompani produksioni filmash me emrin ‘TwentyTwo Films Limited’, të cilën e zotëron në pjesë të barabarta me Turnerin.

Sipas regjistrimeve zyrtare, kompania do të merret me “produksionin e filmave artistikë dhe programeve televizive”. Nga të gjitha gjasat, dyshja duket se po ndjek hapat e Margot Robbie dhe bashkëshortit të saj, producentit Tom Ackerley, të cilët me kompaninë e tyre ‘LuckyChap’ kanë sjellë filma të suksesshëm si “I, Tonya”, “Saltburn” dhe “Barbie” ku edhe Dua pati një rol.

Një burim afër çiftit u shpreh: “Dua dhe Callum janë shumë ambiciozë dhe kanë plot ide për projekte që duan t’i realizojnë bashkë. Ajo tashmë ka provuar veten në botën e filmit, por nëse merr pjesë në projekte të tjera, dëshiron të ketë më shumë kontroll kreativ. Çifti ka shumë ide që besojnë se do të funksionojnë. Edhe pse është ende herët, procesi tashmë ka nisur”. m.p.

Instituti i Gjeoshkencave ka paralajmëruar për kushte atmosferike të paqëndrueshme që konsistojnë në reshje të dendura shiu e erëra të forta përgjatë pasdites së sotme (30 Gusht) dhe ditës së nesërme.

Qytetet kryesore që do të preken janë Tirana, Durrësi, Lezha, ndërsa në pjesën tjetër priten reshje mesatare dhe të dobëta.

“Shtrëngatat dhe intensiteti i lartë i reshjeve, për momente të shkurtra, mund të krijojnë probleme të ndryshme, si dhe vërshime të ujit në zonat urbane, në varësi të sistemit të kanalizimeve në qarqet Shkodër, Kukës, Dibër, Lezhë, Durrës, Tiranë, Elbasan, Fier dhe Vlorë”, thuhet në njoftim. m.p.