Marketet e vogla mbeten pa furnizime qumështi; Tatimet: Të përdorin autofaturimin për blerjet nga fermerët

Prej ditës së hënë, pas nisjes së aksionit të tatimorëve, në shumë markete të vogla në Tiranë është ndërprerë furnizimi me qumësht të freskët të prodhuar nga fermerët.

Sipas një vëzhgimi të bërë nga Monitor, situata është e ngjashme në shumë lagje të kryeqytetit, përfshirë Astirin, Freskun dhe zonën 5 Maji.

Tregtarët e marketeve, të kontaktuar, pohojnë se janë të paqartë për mënyrën se si duhet të veprojnë në lidhje me lëshimin e faturave.

Ndërsa furnizohen me sasi të konsiderueshme qumështi të freskët direkt nga fermerët e zonave rurale të Tiranës, ata nuk dinë se si ta formalizojnë këtë proces për faturim.

Fermerët nga ana e tyre pohuan se janë të pajisur me NIPT, por pavarësisht kësaj, prej tre ditësh qumështi i tyre po refuzohet nga njësitë e vogla të tregtimit.

Drejtoria e Përgjithshme e Tatimeve (DPT) sqaron për Monitor se referuar udhëzimit nr.16, datë 03.04.2020, “Për faturën dhe sistemin e monitorimit të qarkullimit”, i ndryshuar, të gjithë njësitë tregtare pa përjashtim që blejnë mallra nga prodhuesit bujqësorë e blegtoralë duhet të shoqërohen me faturë të fiskalizuar, të llojit autofaturim.

Skema për faturimin e mallrave të blera direkt prej fermerëve, nga një market lagjeje, bar, restorant apo supermarkete të mëdhenj është e njëjtë, si në rastin e tregtimit të mallrave bujqësore apo blegtorale te përpunuesit apo grumbulluesit e mëdhenj.

“Pra në rast se një biznes qoftë ky market i lagjes, bar, restorant apo çdo lloj njësie tjetër për mallrat bujqësore apo blegtorale nuk furnizohet nga një grumbullues apo përpunues, por direkt nga fermeri, detyrimin për lëshimin e autofaturës e ka blerësi. Edhe në këtë rast autofatura e ngarkuar në sistem bëhet nga blerësi, me të dhënat e shitësit.

Autofatura nevojitet të firmoset edhe prej shitësit që në këtë rast është fermer, me qëllim gjurmueshmërinë e mallit për sigurinë ushqimore”, sqaron DPT.

Pra, marketi i lagjes që në këtë rast mund të konsiderohet grumbulluesi i vogël i qumështit të freskët të fermerit, pavarësisht se ky i fundit është i pajisur me NIPT apo pa NIPT bujqësor, mund t’i lëshojë fermerit autofaturë për mallin e blerë.

Për rastet kur fermeri nuk është i pajisur me NIPT bujqësor, Tatimet sqarojnë se me qëllim gjurmueshmërinë e produktit të shitur, nevojitet të shënohet në autofaturë vetëm emri i individit që ka shitur produktin dhe autofatura të firmoset prej shitësit.

Fermeri pavarësisht nëse është i pajisur me NIPT apo jo ka të drejtë të tregtojë produktet tij blegtorale në dyqanet e vogla ushqimore, ndërsa detyrimin për lëshimin e faturës fiskale e ka blerësi.

Skema është e njëjtë edhe nëse fermeri qumështin e çon në pikat e grumbullimit dhe përpunimit, detyrimin për lëshimin e faturës fiskale (autofaturës për shitjen) e ka blerësi.

Pra, përpunuesi apo grumbulluesi i licencuar ka detyrimin e lëshimit të autofaturës nëpërmjet ngarkimit në sistemin SelfCare.

Prej disa ditësh tatimorët kanë nisur aksionin për kontrollin e tregtimit të produkteve bujqësore.

Administrata Tatimore thekson sërish se fokusi i aksionit është forcimi i kontrollit në terren mbi lëshimin e autofaturës për tregtimin e produkteve blegtorale, te tregjet e mëdha të tregtimit të mallrave bujqësore, thertoret, baxhot dhe më pas grumbulluesit dhe përpunuesit e mëdhenj.

Tatimet pohojnë se tregtarët e vegjël dhe ambulantët nuk janë në fokus të aksionit. Nëpërmjet këtij aksioni tatimet synojnë të rrisin të ardhurat, dhe të forcojnë sistemin për gjurmueshmërinë e mallit./ D.Azo

The post Marketet e vogla mbeten pa furnizime qumështi; Tatimet sqarojnë si do të bëhen faturat appeared first on Revista Monitor.

Shqipëria është në kulmin e sezonit turistik dhe furnizimi normal me ujë është kthyer në sfidë për qytetet bregdetare sidomos, por nga ana tjetër ndërmarrjet e publike të ujësjellës-kanalizime (UK) e kanë thelluar më tej keqmenaxhimin.

Në fund të 5-mujorit të parë 2025 borxhet e UK-ve ndaj Operatorit të Shpërndarjes së Energjisë Elektrike (OSHEE) u rritën më tej në 33.3 miliardë lekë ose 2.6 miliardë ose 8.4% më shumë se një vit më parë në këtë periudhe.

Rritja e detyrimeve tregon përkeqësimin e mëtejshëm të gjendjes financiare të këtyre institucioneve publike, ndonëse një reformë për ristrukturimin e tyre është drejt përfundimit..

Rritja e borxheve ndaj operatorit të energjisë jo vetëm që rëndon bilancin financiar të OSHEE-së por njëkohësisht reflekton edhe problematika më të thella të lidhura me eficiencën e menaxhimit dhe mbledhjen e të ardhurave nga ndërmarrjet e ujit. Gjithashtu ato kanë minuar përpjekjet e qeverisë për të kthyer në binar borxhet e prapambetura që administrohen ose krijohen nga shoqëri me pronësi publike.

Shumë prej këtyre ndërmarrjeve funksionojnë me sisteme të vjetra dhe jo-eficiente, të cilat kërkojnë sasi të mëdha energjie për të pompuar ujin në zonat e furnizimit, duke rritur ndjeshëm kostot mujore, të cilat nga ana tjetër nga mbulohen nga të ardhurat.

Ndërkohë që borxhet e tyre ndaj OSHEE-së janë në rritje të vazhdueshme dhe treguesit financiarë përkeqësohen, numri i të punësuarve në shumë prej tyre vazhdon të zgjerohet.

UK në të gjithë vendin vazhdojnë të kenë produktivitet të ulët për shkak të mungesës së automatizimit dhe reformave teknologjike, ndërsa numri i të punësuarve shtohet pa një strategji të qartë. Treguesi i Eficencës së Stafit edhe për vitin 2024 është 4.51 punonjës për 1000 lidhje, teksa ky tregues në shumë vende të BE është më pak se 2 punonjës për 1000 lidhje.

Raportet e monitorimit kanë treguar se zgjerimi i administratës në ndërmarrjet e ujësjellësit është rrjedhojë e ndikimeve politike apo punësimeve të favorizuara, dhe jo e nevojave reale të shërbimit apo planeve të eficiencës.

UK janë një proces reformimi dhe riorganizimit të sektorit të Ujit, i startuar në 2022 që synon ridimensionimin e 58 ndërmarrjeve 15 shoqëri me kompetenca të përbashkëta rajonale.

Kjo reformë sipas Ministrisë së Financave ndër të tjera ka si qëllim të gjenerojë të ardhura të mjaftueshme në dobi të mbarëvajtjes së proceseve të punës dhe sidomos shlyerjes së detyrimeve të akumuluara. Deri në Mars 2025 janë arritur marrëveshjet e transferimit të aktivitetit të shërbimeve UK dhe si rrjedhojë janë krijuar 14 shoqëri UK rajonale nga 15 të parashikuara sipas reformës./ B.Hoxha

Burimi: Ministria e Financave

The post 5-mujori, thellohen më tej borxhet e ujësjellësve ndaj OSSHE, arrijnë 330 mln euro appeared first on Revista Monitor.

Grupi i biznesit BALFIN është drejt shitjes së dytë të kompanive të saj të tregtisë me pakicë brenda pak muajve.

Autoriteti i Konkurrencës ka autorizuar shitjen e kompanisë Fashion Group Albania te kompania me kapital nga Kosova Albi Holding.

Fashion Group Albania (FGA) ka për objekt aktiviteti importin dhe tregtimin e veshjeve dhe këpucëve. Shoqëria operon përmes rrjetit të saj të dyqaneve nën markën ndërkombëtare Aldo, Carpisa, Cortefiel, Geox, Mango, Okaidi, Parfois, Prenatal, Springfield, Woman Secrets, brenda territorit të Shqipërisë.

FGA zotërohet në masën 100% nga grupi Balfin i biznesmenit shqiptar Samir Mane.

Shoqëria blerëse Albi Holding është një shoqëri me përgjegjësi të kufizuar me objekt aktiviteti pjesëmarrjen, menaxhimin, ndjekjen dhe kontrollin e kuotave dhe aksioneve në pronësinë e shoqërive ku është ortake.

Ajo është pjesë e Albi Group, i themeluar në Kosovë, i cili zotëron rrjetin e dyqaneve me produkte të modës që operon në Kosovë dhe rajon, duke përfaqësuar markat ndërkombëtare si: Celio, Chaussea, Okaidi, Mango, Springfield, Ozdilek, Geox, Gant, Timberland, Hugo Boss, Sportina Armani Exchange, Tom Tailor, XYZ, UGG, Plein Sport, Orsay, Dan John, Parfois, Boggi.

Albi Holding zotërohet prej biznesmenëve nga Kosova Tahir Humolli, Sutki Humolli, Nexhat Humolli, Nehat Humolli dhe Betim Humolli.

Deri më tani, Albi Group ka qenë e fokusuar në Kosovë dhe Maqedoninë e Veriut. Kjo blerje do t’i mundësojë hyrjen në tregun shqiptar me një infrastrukturë të gatshme dhe të konsoliduar.

Edhe pse shoqëritë Albi Holding, si pjesë e Albi Group, dhe FGA operojnë në të njëjtin treg përkatës produkti, Komisioni i Konkurrencës ka vlerësuar se transaksioni nuk do të sjellë ndryshime të strukturës së tregut në Shqipëri pasi Albi Group është aktive vetëm në Kosovë, në tregun e shitjes me pakicë të produkteve tekstile dhe të modës, përfshirë veshjet, këpucët dhe aksesorët, ndërsa FGA është aktiv vetëm në Shqipëri.

Përqendrimi nuk do të krijojë mbivendosje ose marrëdhënie të rrjedhës së sipërme apo të poshtme midis aktiviteteve të palëve në nivel kombëtar dhe për këto arsye, transaksioni i synuar nuk do të sjellë ndryshime në tregun shqiptar.

Për sa më sipër, Autoriteti i Konkurrencës ka arritur në përfundimin se ky përqendrim nuk shfaq shenja të kufizimit të konkurrencës në treg ose në një pjesë të tij në veçanti, si rezultat i krijimit ose forcimit të pozitës dominuese.

Sipas pasqyrave më të fundit financiare, në vitin 2023, FGA raportoi xhiro prej afërsisht 1.1 miliardë lekësh dhe një fitim para tatimit në vlerën 116 milionë lekëve.

Shitja e pritshme e FGA është e dyta e njoftuar nga grupi Balfin këtë vit, pas asaj të Spar Albania, te kompania nga Kosova Viva Fresh.

Këto dy transaksione shënojnë një tërheqje të pjesshme të Balfin prej tregut të shitjeve me pakicë në Shqipëri.

Balfin ngelet gjithsesi e pranishme në tregun e pajisjeve elektrike dhe elektroshtëpiake me kompaninë e saj më të hershme, Neptun, si edhe në tregun e shitjes së lodrave dhe pajisjeve shtëpiake dhe industriale, nëpërmjet Kid Zone (Jumbo).

Ndërkohë, në qershor Balfin njoftoi se ka arritur marrëvehsjen për të shtrirë në Rajonin e Ballkanit Perëndimor rrjetin Flying Tiger Copenhagen, kompani daneze e shitjeve me pakicë, me një portofol produktesh të ngjashme me atë që tregtohen në rrjetin Jumbo.

The post BALFIN shet edhe Fashion Group te rrjeti “homolog” nga Kosova appeared first on Revista Monitor.

Mirëmbajtja e sistemit financiar shqiptar parashikohet të kushtojë të paktën 1.7 milionë euro për dy vitet e ardhshme.

Ministria e Financave përgjegjëse për këtë sistem ka kërkuar përmes Agjencisë Kombëtare të Shoqërisë së Informacionit (AKSHI) zhvillimin e procedurës që parashikon këtë shërbim.

“Ky sistem është një zgjidhje e vetme, plotësisht e integruar, homogjene që shërben për maksimizimin e efikasitetit dhe transparencës së planifikimit, ekzekutimit dhe raportimit të buxhetit”, thuhet në dokumentet e procedurës.

Të njëjtat sqarojnë edhe komponentët kryesore që ka kjo procedurë që lidhen me aspektet softwerike si dhe infrastrukturën mbështetëse.

“Objekti kryesor i këtij shërbimi është mirëmbajtja e Sistemit të Menaxhimit Financiar Shqiptar (Albanian Financial Management Information System – AFMIS) në çdo komponent të tij, me qëllim sigurimin e vazhdimësisë së punës 99.95% dhe për të gjithë komponentët dhe shërbimet e ofruara nga ky sistem.

Komponentët kryesore të sistemit AFMIS, objekt i mirëmbajtjes së kësaj kontrate janë:

i)Sistemi AFMIS në të gjitha komponentet e tij softëare që përfshin modulet informatike si më poshtë vijon:

– Web portalin e Arshives Elektronike (AFMIS Web Portal)

– Medium-Term Budget Planning (MTBP)

– Public Investment Management (PIM)

– Budget Project Portfolio Monitoring (BPPM)

– Integrimi i sistemit AFMIS me SIFQ

– Ndërfaqet e integrimit AFMIS me sistemet e tjera (SIFQ, IPSIS, APP, EAMIS, HRMIS).

ii) Infrastruktura mbështetëse e sistemit që konsiston në pajisjet fizike (servera fizike dhe virtuale, storage, pajisje rrjeti) në site primar dhe sekondar, si dhe shërbimet mbështetëse të infrastrukturës si psh virtualizim dhe cluster-izim” thuhet në dokument.

Po kështu operatori ekonomik duhet ti ofrojë edhe shërbim konsulence autoritetit kontraktor.

The post Mirëmbajtja e sistemit financiar shqiptar, 1.7 milionë euro për dy vjet appeared first on Revista Monitor.

Pas valës së shkarkimeve në shumë bashki të vendit me qëllim ristrukturimet e stafeve administrative ka reaguar edhe Instituti i Bashkive të Shqipërisë.

Në deklaratën për media Instituti i Bashkive të Shqipërisë “ngre shqetësimin ndaj deklaratave dhe ndërhyrjeve të përsëritura nga Kryeministri në funksionimin e bashkive, përfshirë thirrjet për dorëheqje të zyrtarëve vendorë dhe diktimin e ristrukturimeve administrative”.

Sipas tyre këto veprime përbëjnë shkelje të parimit të ndarjes së pushteteve dhe cenim të drejtpërdrejtë të autonomisë vendore, të garantuar nga:

-Neni 108 i Kushtetutës së Shqipërisë,

-Karta Evropiane e Autonomisë Lokale (nenet 4,5 dhe 8), dhe

-Ligji nr. 139/2015 “për Vetëqeverisjen vendore”.

Deklaratë

“Qeveria s’mund të drejtojë bashkitë – kjo është shkelje e Parimeve!”

Instituti për Bashkitë Shqiptare shpreh shqetësimin serioz ndaj deklaratave dhe ndërhyrjeve të përsëritura nga Kryeministri në funksionimin e bashkive, përfshirë thirrjet për dorëheqje të zyrtarëve vendorë dhe diktimin e ristrukturimeve administrative.

Këto veprime përbëjnë shkelje të parimit të ndarjes së pushteteve dhe cenim të drejtpërdrejtë të autonomisë vendore, të garantuar nga:

-Neni 108 i Kushtetutës së Shqipërisë,

-Karta Evropiane e Autonomisë Lokale (nenet 4,5 dhe 8), dhe

-Ligji nr. 139/2015 “për Vetëqeverisjen vendore”.

Emërimet dhe shkarkimet në administratën vendore janë kompetencë e kryetarit të bashkisë, jo e pushtetit qendror.

Çdo presion apo ndërhyrje politike përbën shkelje të kushtetutës dhe rrezikon kapjen politike të pushtetit lokal. Administrata publike duhet të jetë e depolitizuar dhe si e tillë duhet të shërbejë.

Thirrja jonë qëndron për:

-Ndërprerjen e menjëhershme të ndërhyrjeve politike në bashki;

-Respektimin e Kushtetutës, Kartës Europiane dhe ligjit për “Vetqeverisjen vendor”;

-Kryetari i Zgjedhur, Këshilli Bashkiak dhe administrata vendore kanë detyrimin të zbatojnë ligjin, të respektojnë përgjegjshmërinë administrative dhe të mbrojnë me integritet autoritetin që u është dhënë nga verdikti i qytetarëve përmes votës.

-Marrëdhëniet ndërinstitucionale ndërmjet nivelit qendror dhe atij vendor duhet të mbështeten dhe të zhvillohen në mënyrë të qëndrueshme dhe funksionale, në përputhje me ligjin dhe në respekt të ndarjes së kompetencave dhe autonomisë vendore.

-Angazhim të institucioneve të pavarura dhe partnerëve ndërkombëtarë për të mbrojtur integritetin dhe funksionimin demokratik të pushtetit lokal në Shqipëri.

Autonomia vendore nuk është privilegj politik, por një e drejtë kushtetuese dhe europiane.

The post Shkarkimet te pushteti vendor, reagon Instituti i Bashkive: Cenojnë autonominë e pushteteve appeared first on Revista Monitor.

Paketa e Maleve ka zgjuar interes për investime potenciale në zonat rurale të vendit, ku sipas Kryeministrit Edi Rama në vetëm pesë ditë kanë aplikuar 787 individë për të përfituar nga lehtësitë që ofron kjo nismë.

Pak ditë më parë qeveria shpalli hapjen e aplikimeve për këtë paketë në një platformë të dedikuar https://paketaemaleve.gov.al/al.

Ligji për Paketën e Maleve synon të krijojë kushte të favorshme për tërheqjen e investimeve dhe të nxisë zhvillimin ekonomik e turistik në zonat malore.

Qeveria pranon se zonat malore kanë vështirësi në dhënien e lejeve të zhvillimit apo ndërtimit për shkak të moskonsolidimit të marrëdhënieve juridike të pronësisë. Kjo është një ndër pengesat më serioze për zhvillimin ekonomik të këtyre zonave.

Shumë toka në malësi administrohen ose zotërohen nga individë dhe familje, posedues jopronarë, që nuk kanë tituj formalë pronësie. Për pasojë, ato nuk mund të përdoren për investime, nuk mund të planifikohen nga bashkitë apo të regjistrohen si pasuri bashkiake për qëllime zhvillimi.

Kjo paketë synon që të stimulojë 500 aplikuesit e parë me lehtësi fiskalë për 10 vjet. Parimi i ndjekur në këtë rast është kush aplikon i pari përfiton i pari. Pjesa tjetër jashtë grupit prej 500 aplikantësh do të përfitojnë nga lehtësitë procedurale.

Bashkitë në të gjithë vendin duhet të nxjerrin listën me zonat me potencial investimi në këtë paketë dhe më pas ta dorëzojnë atë për miratim në qeveri.

Përjashtimet që ofron paketa për grupin 500

• Taksa e ndikimit në infrastrukturë
• Taksa e pasurive të paluajtshme
• TVSH
• Tatimi mbi të ardhurat

Bashkitë në zonat malore përfitojnë:

• Thithje kapitali nga investime vendase, të huaja dhe nga diaspora
• Rritje punësimi
• Rritje e kërkesës për produkte bujqësore dhe blegtorale të zonës
• Zhvillim infrastrukture.

The post Paketa e Maleve, Kryeminstri Rama: Në 5 ditë 787 aplikime appeared first on Revista Monitor.

Shifra shënon një pengesë për Bankën e Anglisë, ndërsa kërkon prova se presionet mbi çmimet po ulen

Inflacioni në Mbretërinë e Bashkuar u rrit papritur në 3.6% në qershor, një pengesë për Bankën e Anglisë (BoE), ndërsa kërkon prova se presionet mbi çmimet po ulen së bashku me ngadalësimin e rritjes ekonomike.

Shifra nga Zyra për Statistikat Kombëtare tejkaloi parashikimin e analistëve se inflacioni do të mbetej në nivelin e majit 3.4%.

Shifrat vijnë ndërsa Banka e Anglisë vlerëson nëse do ta ulë përsëri normën bazë të interesit që në gusht. Në qershor, Komiteti i Politikës Monetare (MPC) votoi gjashtë me tre për të mbajtur normat e pandryshuara në 4.25%, pas një uljeje një çerek pike në maj.

MPC, i cili ka një objektiv inflacioni 2%, ka ulur normat e interesit katër herë që nga vera e kaluar, por politikëbërësit mbeten të ndarë se si do të rezultojnë presionet e vazhdueshme mbi çmimet.

Paundi u forcua pas publikimit të të dhënave, duke u rritur me 0.2% në 1.340 dollarë.

Përpara të dhënave të inflacionit të qershorit, tregtarët po parashikonin të paktën dy ulje të tjera me një çerek pike nga Banka e Anglisë deri në fund të vitit, sipas niveleve të nënkuptuara nga tregjet e swap-eve.

Inflacioni bazë, i cili përjashton energjinë dhe ushqimin, u rrit me 3.7 % në vit deri në qershor, nga 3.5 % në maj. Inflacioni i shërbimeve mbeti i pandryshuar në 4.7 %, duke tejkaluar 4.6 % të parashikuar nga ekonomistët. / FT

The post Inflacioni në Mbretërinë e Bashkuar u rrit papritur në 3.6% në qershor appeared first on Revista Monitor.

Vetëm Kina dhe Kanadaja janë hakmarrë ndaj luftës tarifore të presidentit amerikan

Partnerët tregtarë të Amerikës kanë dështuar të hakmerren ndaj luftës tarifore të Donald Trump, duke i lejuar presidentit amerikan të mbledhë gati 50 miliardë dollarë të ardhura shtesë doganore me pak kosto.

Katër muaj kanë kaluar që kur Trump lëshoi breshërinë e parë të luftës së tij tregtare. Vetëm Kina dhe Kanadaja kanë guxuar të kundërsulmojnë Uashingtonin duke imponuar një tarifë globale minimale 10%, 50% taksa për çelikun dhe aluminin dhe 25% për automjetet.

Në të njëjtën kohë, të ardhurat e SHBA-së nga taksat doganore arritën një rekord prej 64 miliardë dollarësh në tremujorin e dytë – 47 miliardë dollarë më shumë se gjatë së njëjtës periudhë të vitit të kaluar, sipas të dhënave të publikuara nga Departamenti i Thesarit i SHBA-së.

Tarifat hakmarrëse të Kinës mbi importet amerikane, më të qëndrueshmet dhe më të rëndësishmet nga çdo vend tjetër, nuk kanë pasur të njëjtin efekt, me të ardhura të përgjithshme nga detyrimet doganore vetëm 1.9 % më të larta në maj 2025 krahasuar me një vit më parë.

Disa partnerë të tjerë tregtarë të SHBA-së vendosën të mos përgjigjen në të njëjtën mënyrë ndërsa negocionin me Trump për të shmangur tarifat.

Bashkimi Europian, blloku më i madh tregtar në botë, ka planifikuar kundër-tarifa, por ka shtyrë vazhdimisht hyrjen në fuqi të tyre, duke i lidhur tani me afatin e 1 gushtit të Trump për bisedime.

Kostoja e tarifave të Trump gjithashtu nuk po bie vetëm mbi konsumatorët amerikanë, thonë ekspertët e zinxhirit të furnizimit, ndërsa markat ndërkombëtare kërkojnë të përhapin ndikimin e rritjes së kostos në të gjithë globin për të minimizuar ndikimin në tregun amerikan.

Por, pavarësisht se tarifat amerikane arritën nivele të papara që nga vitet 1930, ndrojtja e reagimit global ndaj Trump ka parandaluar një spirale hakmarrëse të llojit që shkatërroi tregtinë globale midis luftës së parë dhe të dytë botërore.

Ekonomistët thanë se pozicioni dominues i SHBA-së si tregu më i madh i konsumit në botë, së bashku me kërcënimet e Trump për të dyfishuar tarifat ndaj shteteve që e sfidojnë atë, nënkuptonte se për shumicën e vendeve vendimi për t’u “larguar” ishte logjikë e shëndoshë ekonomike.

Një model nga firma e konsulencës Capital Economics, zbuloi se një luftë tregtare me përshkallëzim të lartë, ku norma mesatare reciproke e tarifave arrinte në 24 %, do të shkaktonte një goditje prej 1.3 % në PBB-në botërore gjatë dy viteve, krahasuar me 0.3 % në një rast bazik, ndëkohë ajo ka mbetur në 10 %.

Partneri më i madh tregtar i SHBA-së, Meksika, nuk mori hak pasi u godit me tarifa 25% në mars për eksportet që nuk mbuloheshin nga Marrëveshja SHBA-Meksikë-Kanada. Që nga fillimi i bisedimeve të saj me Trump, Presidentja Claudia Sheinbaum tha se preferonte një marrëveshje.

Dështimi i botës për t’u bashkuar dhe për t’u përballur kolektivisht me kërcënimet e Trump i ka lënë gjithashtu presidentit të SHBA-së më shumë hapësirë për të kritikuar shtetet. Ai kërcënoi me një tarifë 50% për Brazilin javën e kaluar, duke përmendur kryesisht justifikime politike.

Edhe brenda blloqeve të unifikuara si BE-ja, interesat konkurruese të shteteve anëtare individuale, të kombinuara me frikën më të gjerë nëse një përballje me Trump mund të minonte garancitë e sigurisë së SHBA-së për Europën, kanë nxitur kujdes të madh.

Vendimi i Trump për të kërcënuar me rritjen e tarifave në 30% nuk provokoi një reagim të madh në Bruksel, pjesërisht sepse zyrtarë të lartë amerikanë, përfshirë sekretarin e Thesarit Scott Bessent, kontaktuan prapa skenave për të këshilluar kujdes, sipas burimeve të brendshme.

Një zyrtar i BE-së i njohur me bisedimet shtoi se negociatat nuk po zhvilloheshin të izoluara, në një kohë kur Europa po kërkon mbështetjen e vazhdueshme të SHBA-së për Ukrainën. “Ato ndikojnë në të gjithë spektrin e marrëdhënieve me SHBA-në, përfshirë ato që kanë të bëjnë me sigurinë”, thanë ata.

Si rezultat, ndryshe nga Kina, BE-ja ka vonuar vazhdimisht zbatimin e paketave të saj të masave hakmarrëse, ndërsa kërkon të lërë hapësirë për të arritur një marrëveshje me Trump përpara 1 gushtit.

Kur Komisioni Europian publikoi listën e objektivave të mundshëm hakmarrës për 72 miliardë euro mallra të martën – duke përfshirë avionë Boeing, makina dhe burbon – nuk vendosi tarifa specifike për produktet individuale, në një përpjekje të dukshme për të mos e acaruar më tej Trumpin.

Edhe Kanadaja dhe Kina kanë qenë të kujdesshme për të kundërshtuar Trumpin, pavarësisht se janë dy vendet e vetme që kanë vendosur tarifa hakmarrëse.

Tarifat amerikane ndaj Kinës u përshkallëzuan në 145 % deri në mesin e prillit, duke bërë që eksportet kineze në SHBA të bien me një të tretën në maj. Të dyja palët u tërhoqën shpejt, duke rënë dakord për një pauzë 90-ditore në Gjenevë në maj, duke e ulur normën në 30 %.

Në shkurt dhe mars, Kanadaja vendosi ekuivalentin e 155 miliardë dollarë kanadezë në tarifa hakmarrëse, duke përfshirë çelikun dhe pjesët e automobilave. Megjithatë, në javët e fundit është tërhequr përballë presionit të SHBA-së, pavarësisht premtimeve zgjedhore nga kryeministri kanadez Mark Carney për t’u përballur me Trumpin.

Me tregtinë amerikane që përbën 20 % të PBB-së kanadeze – krahasuar me 2 % për SHBA-në – Carney i ka kalibruar përgjigjet e tij. Ai hoqi dorë nga një taksë mbi shërbimet dixhitale nën presionin e SHBA-së dhe nuk u përputh me vendimin e Trumpit muajin e kaluar për të dyfishuar tarifat e çelikut në 50 %.

Komisioneri i tregtisë Maroš Šefčovič tha këtë javë se një tarifë prej 30% mbi eksportet e BE-së nuk do ta linte bllokun të pabdikuar, pasi tregtia transatlantike do të ishte pothuajse e pamundur.

Në planin afatgjatë, dështimi për t’u hakmarrë do t’u jepte gjithashtu kompanive amerikane një rrugë relativisht të lirë në zinxhirët globalë të furnizimit, ndërsa prodhuesit e BE-së dhe aziatikë ende do të përballeshin me tarifa të larta në SHBA, tha Creon Butler, kreu i ekonomisë globale në Chatham House.

“Llogaritja është ndikimi afatshkurtër kundrejt arij afatgjatë,” tha ai. “Ka kuptim të mos hakmerresh në planin afatshkurtër, por në planin afatgjatë, bëhet një përllogaritje për vendet e tjera mbi masën në të cilën do të luftojmë për zinxhirët globalë të furnizimit jashtë SHBA-së.” / FT

The post Trump mbledh 50 miliardë dollarë më shumë nga tarifat, ndërsa bota “nuk guxon të përgjigjet” appeared first on Revista Monitor.

Vullnetarizmi në Shqipëri mund të kalojë nga një akt i mirëdashjes individuale në një strukturë me ndikim konkret në zhvillimin ekonomik dhe shoqëror të vendit.

Ky është synimi i ligjit të ri i cili është dërguar sëfundmi në Kuvend dhe që pritet të nisë diskutimet në shtator.

Për herë të parë, krijohet një kuadër ligjor i qartë për përfshirjen e vullnetarëve në aktivitete të përgjegjësisë sociale të korporatave (CSR).

Bizneset që organizojnë apo mbështesin projekte vullnetare do të kenë më shumë siguri ligjore dhe më pak paqartësi mbi raportin e tyre me individët e përfshirë. Ligji gjithashtu parashikon reduktim të kostove administrative për organizatat që përfshijnë vullnetarë.

Me thjeshtimin e procedurave të regjistrimit dhe monitorimit, përmes digjitalizimit të platformave të menaxhimit të vullnetarizmit (si “Vullnetarizmi.al”), bizneset do të mund të angazhohen më lirshëm dhe me më pak barrë burokratike.

Ligji ri strukturon vullnetarizmin mbi disa parime të qarta: kontratë e detyrueshme, monitorim, raportim vjetor, dhe mbrojtje të të drejtave të vullnetarit.

Ai vendos përgjegjësi jo vetëm për organizatat pritëse, por edhe për autoritetet shtetërore, si Agjencia Kombëtare për Punësimin dhe Aftësitë (AKPA), që do të mbikëqyrin zbatimin dhe do të menaxhojnë regjistrin elektronik të vullnetarëve.

Nga ana tjetër, individët përfitojnë nga një sistem ku përfshirja e tyre nuk mbetet më “në ajër”, por dokumentohet, vlerësohet dhe i hap rrugë të reja mundësive profesionale.

Një nga ndryshimet më domethënëse të ligjit të ri është njohja e përvojës vullnetare si përvojë pune. Kjo do të thotë që orët e kryera në kuadër të aktiviteteve vullnetare, kur dokumentohen dhe certifikohen nga organizatat pritëse, do të mund të përdoren nga individët në CV-të e tyre si përvojë e vlefshme pune.

Ky zhvillim pritet të ketë ndikim të drejtpërdrejtë në rritjen e punësueshmërisë së të rinjve, veçanërisht në një treg pune që shpesh kërkon eksperiencë edhe për pozicione fillestare.

Nga ana tjetër, vullnetarizmi bëhet një mekanizëm real për zhvillimin e aftësive profesionale, përmes përfshirjes në aktivitete që nxisin komunikimin, menaxhimin e kohës, punën në grup dhe iniciativën.

“Vullnetarizmi nuk do të jetë më një aktivitet që mbetet në margjinë, por një përvojë e dokumentuar që rrit shanset për një vend pune të mirëpaguar”, thuhet në analizën e RIA-së për projektligjin.

The post Një ligj i ri do nxisë vullnetarizmin në ndërmarrje appeared first on Revista Monitor.

Aktivitetet sportive  si Giro D’italia dhe politike siç ishte Samiti Politik Europian që zunë vend në maj në vendin tonë duket se kanë ndikuar drejtpërdrejt tek rezervimet në strukturat akomoduese.

Këto dy vende sigurisht që nuk përjashtojnë vizitorët që vijnë si efekt i promovimit turistik të Shqipërisë.

Të dhënat zyrtare tregojnë se strukturat akomoduese panë rritje të vizitorëve gjatë muajit maj për jo rezidentët  me 36.6 për qind më shumë. Paralelisht me këtë edhe neqëndrimet e të huajve janë rritur në 35.1 për qind. Instituti i Statistikave publikoi të dhënat

“Në muajin Maj 2025, strukturat akomoduese shënuan një rritje të ndjeshme të vizitorëve dhe net qëndrimeve, krahasuar me të njëjtin muaj të vitit të kaluar. • Vizitorët gjithsej u rritën me 31,8%, ku ata jo-rezidentë shënuan një rritje prej 36,6% dhe rezidentë 18,6%. • Net qëndrimet gjithsej u rritën me 31,5%, ku ato jo-rezidentë u rritën me 35,1%, ndërsa ato nga rezidentët me 20,6%. • Rritja më e madhe e vizitorëve jo-rezidentë u shënua në zonat bregdetare (+47,6%) dhe në hotelet dhe akomodimet e ngjashme (+38,5%)” thuhet në publikimin e INSTAT.

Lidhur me vendin nga kanë ardhur vizitorët në krye qëndron Kosova dhe pas saj Italia.

“Në Maj 2025, shumica e vizitorëve jo-rezidentë të cilët u akomoduan në strukturat pritëse në Shqipëri vijnë nga Kosova (15%), Italia (13%), Gjermania (9%).

Polonia dhe Franca kontribuuan përkatësisht me nga 8% të vizitorëve, ndërsa 47% e tyre ishin nga vende të tjera. Këto të dhëna reflektojnë prirjen e rritjes së turizmit hyrës nga tregjet kryesore të rajonit dhe Europës. Norma e shfrytëzimit të dhomave në hotele arriti në 28,7%, krahasuar me 25,1 % në Maj 2024”, thuhet në publikim.

Ecuria e turizmit këtë vit po tregon luhate që së pari u shfaq më ngadalësim të rritjes në raport me një vit më parë.

Turoperatorët shprehen se rajonet jugore si Vlora dhe Saranda kanë më pak rezervime individuale për korrikun dhe gushtin ndërkohë që Durrësi dhe pjesa e veriore shfaqen më të qëndrueshme.

Një ditë më parë kryeministri Edi Rama tha se në total në janar-qershor erdhën në vendin tonë 4.76 milionë turistë me një rritje 5 për qind në raport me të njëjtën periudhë të një viti më parë.

The post Hotelet, net-qëndrimet e të huajve në maj u rritën me 35 për qind appeared first on Revista Monitor.

Zyrtarët e Bashkimit Europian dhanë dritën jeshile në qershor që Bullgaria të bëhet anëtarja e 21-të e eurozonës, një projekt kyç i Brukselit që synon thellimin e lidhjeve mes vendeve anëtare.

Pronarët e bizneseve të vogla në Bullgari janë të shqetësuar me ndryshimin e ardhshëm të monedhës nga leva në euro, pasi shumë prej tyre druhen se kjo mund të jetë një tjetër krizë me të cilën do t’u duhet të përballen.

Këto shqetësime vijnë ndërsa vendi ballkanik me 6.4 milionë banorë po përgatitet të kalojë nga monedha kombëtare në atë europiane më 1 janar 2026.

Në qytetin jugor bullgar të Haskovos, familja Terziev hapi dyqanin e parë të produkteve organike më shumë se 10 vjet më parë. Me biznesin e tyre të vogël që ka kaluar disa kriza ndër vite, tani ata përballen me një sfidë të re — kalimin në euro.

Nikolay Terziev, pronari i dyqanit, thotë se ka filluar të vendosë etiketat e çmimeve edhe në euro, por me ndjesi të konsiderueshme pasigurie.

“Asnjë pronar dyqani nuk është ekonomist,” tha ai. “Ajo që na shqetëson është informacioni që marrim nga të njohur të afërt në vende që tashmë e kanë adoptuar euron — po, treguesit ekonomikë përmirësohen, por popullsia bëhet më e varfër. Ndërkohë, janë bizneset e mëdha ato që përfitojnë më shumë,” shpjegoi Terziev.

Çmimet e mallrave janë në rritje

Bullgaria është një rast i veçantë, pasi e lidhi levën me euron që në fillimet e bashkimit monetar në vitin 1999, madje përpara se të anëtarësohej në BE në vitin 2007. Për më tepër, vendi ka një nivel shumë të ulët borxhi publik — vetëm 24.1% e prodhimit të brendshëm bruto vjetor.

Ky është ndjeshëm më poshtë nivelit prej 60% të përcaktuar në kriteret ekonomike për anëtarësim në eurozonë. Hapi i fundit ishte ulja e inflacionit nën pragun e kërkuar prej 2.8%, ose jo më shumë se 1.5% mbi mesataren e tre vendeve të eurozonës me inflacionin më të ulët.

Megjithatë, gjatë muajit të fundit është vërejtur një rritje e ndjeshme e çmimeve nga furnitorët, gjë që ka shtuar shqetësimet për mundësinë e falimentimeve.

“Kalimi i Bullgarisë në euro nuk është problemi ynë më i madh. Problemi i vërtetë është ajo që po shkakton rritjen e çmimeve. Është e thjeshtë — kur çmimet rriten dhe fuqia blerëse e njerëzve është e ulët, siç ndodh në Bullgari, njerëzit blejnë më pak dhe ti shet më pak,” tha Terziev.

Shqetësimi më i madh lidhet me muajin janar të vitit të ardhshëm, kur të dyja monedhat do të jenë në qarkullim për një periudhë njëmujore.

“E dimë shumë mirë që kaosi do të nisë në fillim të janarit. Që nga janari do të duhet të japim kusur në euro; do të duhet të llogarisim në centë të euros,” tha Terziev.

“Do të na duhet vazhdimisht të këmbejmë leva me euro dhe të shkojmë në banka. Duhet të punojmë dhe të këmbejmë para njëkohësisht. Fizikisht, nuk e di si do t’ia dalim.”

Por jo të gjithë klientët e dyqanit organik të Terzievit janë kundër pagesave në euro. Sipas sondazhit më të fundit të Eurobarometrit të zhvilluar nga BE-ja, 50% e bullgarëve janë kundër kalimit në euro, ndërsa 43% janë pro.

Disa nga arsyet për këtë qëndrim përfshijnë frikën nga inflacioni, mungesën e besimit ndaj institucioneve shtetërore — në një vend që ka pasur shtatë qeveri në katër vite — si dhe dezinformimin e përhapur në rrjetet sociale. Në Haskovo, shumë banorë shprehen se nuk e kanë me nxitim për të shkëmbyer kursimet.

“Jo, nuk kam shumë për të këmbyer,” tha një klient.
“Është absurde. Për momentin, zgjedh të jem optimist dhe të besoj se nuk do të jetë e nevojshme,” shtoi një tjetër.

Megjithëse shumëkush e sheh me frikë ndryshimin, të tjerë janë besimplotë.

“Jam shumë e lumtur që Bullgaria do të adoptojë euron. Shpresoj që kjo ta ndihmojë vendin ekonomikisht. Nuk jam e shqetësuar,” tha një kliente, Monika Boyuklieva.

“Nuk mendoj se inflacioni shkaktohet nga euroja — ai vjen për shkak të faktorëve të tjerë. Shpresoj që gjithçka të shkojë pa probleme dhe të mos ketë rritje të mëdha çmimesh,” shtoi Boyuklieva.

Duke filluar nga 8 gushti, të gjitha çmimet me pakicë duhet të shënohen në të dyja monedhat. Të gjitha bankat do të jenë të detyruara të shkëmbejnë lev deri në fund të vitit 2026.

Banka Kombëtare e Bullgarisë do të vijojë të këmbejë kartëmonedhat dhe monedhat nga leva në euro për një periudhë të pakufizuar./ Euronews

The post Pronarët e bizneseve të vogla në Bullgari përgatiten për kalimin nga leva në euro në vitin 2026 appeared first on Revista Monitor.

Dy procedura prokurimi të lidhura me linja të furnizimit me ujë janë ankimuar në Komisionin e Prokurimit Publik.

Njëra prej tyre lidhet me zonën turistike të Radhimës ndërsa tjetra me Akërninë të dyja të shpallura nga Ujësjellës-Kanalizime Vlorë sh.a.

Ankimi për këto procedura të hapura në muajin qershor duket se lidhet me fazën e vlerësimit nga ana autoritetit kontraktor.

Në dokumentet e tenderit që shoqërojnë procedurat nuk jepen shumë detaje lidhur me ndikimin që kanë ato në numrin e familjeve që furnizojnë apo të bizneseve.

Dy procedurat kanë konkretisht në objekt “ Linja e furnizimit me uje ne fshatin Akerni” dhe de dyta “Përmirësimi i sistemit të furnizimit me ujë në zonën e Radhimës”.

Ndërhyrjet sipas fondeve limite që kanë procedurat duket se janë minimale dhe afati i zbatimit të tyre është 30 ditor por duket se ankimimet do ta zvarrisin edhe më shumë këtë procedurë ndërkohë që për zona me përparësi turizmin furnizimi me ujë në mënyrë të vazhdueshme dhe cilësore është tepër i rëndësishëm.

Këtë vit për herë të parë furnizimi me ujë po shfaqet problematik në disa zona kjo e nxitur nga arsye të ndryshme duke nisur nga investimet e nevojshme për përmirësime sigurie në diga e liqene e deri tek mungesa e ujit për shkak të pamjaftueshmërisë së mbulimit me rrjet në zona që kanë shtim të numrit të turistëve.

Pak ditë më parë edhe Dhoma Amerikane e Tregtisë reagoi duke kërkuar më shumë reagim nga institucionet për të garantuar një mbarëvajtje të sezonit turistik.

Ndër të tjera Dhoma citonte se anëtarët e saj kishin raportuar për problematika të ndryshme të lidhura me mungesën e ujit apo menaxhimin e mbetjeve.

The post Furnizimi me ujë, ankimohen tenderat për përmirësimin e sistemit në Radhimë dhe Akërni appeared first on Revista Monitor.

Yield-et e bonove 12-mujore pësuan rënie në ankandin e kësaj jave, duke ndjekur uljen e normës bazë të interesit nga Banka e Shqipërisë.

Sipas informacionit nga Ministria e Financave, yield-i mesatar i ponderuar i këtyre instrumenteve zbriti në 2.68%, nga 2.76% që kishte qenë në ankandin e mëparshëm, në fund të muajit qershor. Aktualisht, yield-et e bonove 12-mujore kanë arritur nivelin më të ulët që prej verës së vitit 2022.

Kërkesa e investitorëve rezultoi përsëri e kënaqshme, me gjithsej 8.9 miliardë lekë, nga 7.8 miliardë lekë që kishte shuma e shpallur për financim. Ministria e Financave pranoi oferta për një shumë lehtësisht më të ulët se ajo e shpallur, gjithsej 7.7 miliardë lekë.

Në fillim të këtij muaji, Këshilli Mbikëqyrës i Bankës së Shqipërisë vendosi uljen e normës bazë të interesit, nga 2.75% në 2.5%.

Vendimi u argumentua me inflacionin e ulët, që prej më shumë se një viti po qëndron poshtë objektivit të Bankës së Shqipërisë dhe me rritjen ekonomike më të dobët se pritshmëritë për tremujorin e parë të vitit, ndërkohë që monedha vendase edhe këtë vit vazhdon të shfaqë tendencë mbiçmuese në kursin e këmbimit valutor.

Lëvizja e Bankës së Shqipërisë forcoi edhe më shumë tendencën rënëse të yield-eve, që po regjistrohet prej më shumë se një viti.

Yield-et e bonove 12-mujore patën zbritur madje poshtë nivelit të normës bazë të interesit në disa raste, ndërsa instrumentet më afatgjata të maturimit kanë prekur nivelet më të ulëta historike muajt e fundit.

Kjo situatë është ndikuar nga disa faktorë. Huamarrja e qeverisë në tregun e brendshëm financiar këtë vit ka ardhur në rënie.

Sipas Bankës së Shqipërisë, huamarrja e re neto e qeverisë në tregun e brendshëm ra me 6.5 miliardë lekë në tre muajt e parë të vitit, në reflektim të strukturës së maturitetit që kishte portofoli i titujve dhe të strategjisë së huamarrjes së qeverisë përgjatë kësaj periudhe.

Nga ana tjetër, kërkesa për këto instrumente ka vazhduar të jetë e lartë, për shkak të gjendjes së mirë të likuiditetit në tregun financiar.

Një faktor shtesë që ka rritur kërkesën dhe ka shtuar konkurrencën për instrumentet e borxhit të qeverisë ka qenë edhe pjesëmarrja në rritje e investitorëve nga jashtë vendit. Sipas të dhënave nga Banka e Shqipërisë, investitorët jorezidentë e shtuan portofolin e titujve qeveritarë, me rreth 5.3 miliardë lekë në tremujorin e parë 2025.

Megjithëse pjesëmarrja e tyre është shtrirë kryesisht në tregun e obligacioneve me afate të mesme maturimi, kërkesa e tyre e ka rritur likuiditetin e tregut në tërësi dhe konkurrencën në tregun e titujve, duke ndikuar në uljen e yield-eve.

Përmirësimi i parametrave makroekonomikë dhe në veçanti ulja e borxhit publik ka përmirësuar vlerësimin e kreditit sovran të qeverisë shqiptare në dy vitet e fundit, duke ndikuar në tërheqjen edhe të investitorëve nga jashtë në tregun e titujve qeveritarë në Lekë./ E.Shehu

Burimi: Banka e Shqipërisë

The post Yield-i i bonove 12-mujore arrin nivelin më të ulët në tre vjet appeared first on Revista Monitor.

Pas përfundimit të aksionit për kontrollin e tregtimit me faturë të produkteve blegtorale, qeveria po përgatitet të rikthejë një skemë kompensimi për fermerët nëpërmjet rimbursimit të TVSH-së në nivelin 10%.

Sipas burimeve për Monitor, është gati një projektligj i ri, i cili parashikon që kompensimi për fermerët të aplikohet duke nisur nga viti 2026, si pjesë e një reforme më të gjerë për formalizimin e zinxhirit agroushqimor dhe uljen e kostove për prodhuesit vendas.

Deri tani në rang vendi rezultojnë të regjistruar 100 mijë fermerë të pajisur me NIPT që kanë të drejtë të shesin te përpunuesi, grumbulluesi apo supermaketet produktet e veta, pa faturë TVSH-je, por nëpërmjet autofaturës që plotësohet prej blerësit.

Skema e TVSH-së së rimbursueshme që përfitohej prej përpunuesve u hoq plotësisht në vitin 2022. Pas heqjes së saj, ku fermeri përfitonte tregtimin e produkteve me çmim të leverdisshëm, u rrit kostoja e prodhimit, sepse TVSH-ja e paguar nuk kreditohet më dhe bëhet pjesë e kostos së lëndës së parë.

Deri në vitin 2017, rimbursimi i TVSH-së për përpunuesit ishte 20%, çka do të thotë se psh,. për çdo blerje të qumështit me faturë tatimore nga fermeri, përpunuesi mund të kreditonte këtë vlerë në TVSH-në e zbritshme.

Kjo skemë e bënte ekonomikisht të leverdishme blerjen edhe me çmim të lartë për fermerin dhe siguronte marzh të qëndrueshëm fitimi për industrinë.

Nga viti 2019 deri në 2022, skema ndryshoi. TVSH-ja në blerje (nga fermerët) u ul në 6%. Ndërsa TVSH-ja në shitje e produkteve të bulmetit mbeti 20%. Kjo krijoi një pabarazi fiskale, pasi industria paguante më shumë në dalje sesa kreditonte në hyrje.

Prej vitit 2022, skema e TVSH-së së kreditueshme u heq plotësisht, duke vendosur 0% TVSH të zbritshme për blerjet e qumështit nga fermerët.

Shoqata e Industrisë së Përpunuesve të Qumështit propozoi që skema të harmonizohej me praktikat e rajonit, ku TVSH-ja e blerjes dhe e shitjes të unifikohej në 6% ose 9%, për të shmangur pabarazitë tatimore.

Skema e vjetër të zëvendësohej me një mekanizëm neutral fiskal, jo penalizues për përpunuesin. Ky propozim nuk u pranua nga Ministria e Financave në buxhetin e vitit 2022.

Në vend të rimbursimit të TVSH-së, qeveria aplikoi subvencione direkte deri në 10,000 lekë për krerë bagëtie/lopë për fermerët.

Por përpunuesit në atë kohë theksuan se skema e subvencioneve nuk do të ketë efekt të të drejtpërdrejtë në uljen e kostos së lëndës së parë për industrinë. Nuk garanton formalizimin, sepse nuk është e lidhur me volumin real të qumështit të shitur.

Ndryshe nga rajoni, ku subvencionet jepen për litër qumësht të prodhuar e dorëzuar, në Shqipëri mungon kjo logjikë e orientuar drejt prodhimit të formalizuar.

Situata me heqjen e TVSH-së së kreditueshme, kostot e larta të ushqimit të kafshëve nga fragmetizimi i tokave dhe mungesës së vaditjeve krijuan një zinxhir pasojash në sektor, duke ulur ndjeshëm volumin e përpunimit dhe duke vënë në rrezik vazhdimësinë e kapaciteteve prodhuese, ndërkohë që tregu po përballet me konkurrencë gjithnjë e më të fortë të mallrave të gatshme që vijnë nga importi.

Po ashtu për shkak të çmimit më të lirë të shitjes së qumështit jashtë, importet vijojnë të jenë në nivele të larta, pasi qumështi i prodhuar nga fermat e huaja po përdoret, kryesisht në sezonin e verës si lëndë e parë për përpunuesit vendas.

Si qumështi vendas po zëvendësohet me importe

Në periudhën janar-prill 2024 u importuan 6 mln litra qumësht sipas të dhënave të Doganave. Kjo ishte sasia më e larta e qumështit e importuar prej 2016-s. Për janar-prill 2025 u importuan 5,1 mln litra qumësht. Krahasuar me të njëjtën periudhë të vitit të kaluar importet janë ulur 15,4%.

Çfarë synon aksioni?

Nisja prej 14 korrikut të aksionit të tatimorëve për kontrollin e zinxhirit të tregtimit të mallrave blegtorale nga fermeri drejt grumbulluesit dhe konsumatorit final shkaktoi paqartësi te fermerët në radhë të parë dhe grumbulluesit ku nisën t’i kërkonin njëri-tjetrit fatura fiskale, teksa mes tyre transaksionet dokumentohet me autofaturim të blerësit. Po ashtu inspektorët tatimorë nisën të kërkonin origjinën e mallit edhe te tregtarët ambulantë.

Nisur nga situata Administrata Tatimore sqaroi për Monitor se fokusi i aksionit është forcimi i kontrollit në terren mbi lëshimin e autofaturës për tregtimin e produkteve blegtorale, ku rezulton informalitet i lartë në tregtimin e tyre, sidomos prej grumbulluesve dhe përpunuesve të mëdhenj. Nëpërmjet këtij aksioni tatimet synojnë të rrisin të ardhurat, dhe të forcojnë sistemin për gjurmueshmërinë e mallit.

Pavarësisht nisjes së aksionit skema e faturimit për tregtimin e mallrave blegtorale nga fermeri drejt grumbulluesit nëpërmjet faturës fiskale të llojit autofaturim, me qëllim më pas hedhjen në treg të tyre për konsumatorin final nuk ndryshoi. Do të vijojë të mbetet e njëjtë. Pra fermeri i pajisur me NIPT shet produktet e tij te grumbulluesi, përpunuesi apo supermarketet, ndërsa këta të fundit kanë detyrimin e lëshimit në SelfCare të autofaturës.

E njëjta skemë do të vijojë të funksionojë për shitjen e fermerëve të regjistruar si tatimpagues për kategorinë  “person fizik” apo “shpk”. Në këtë rast fatura e fiskalizuar për shitjen e mallit lëshohet prej tij. Në këtë rast nuk funksionon autofatura.

Po ashtu përmes një njoftimi Tatimet bënë me dije se tregtarët ambulantë nuk kanë asnjë detyrim për të lëshuar faturë dhe për të mbajtur dokumentacion tatimor për mallrat.

Ndërsa Ministria e Bujqësisë dhe Zhvillimit Rural në reagimin e saj bëri me dije se kontrollet për sigurinë ushqimore dhe pajisjen me faturë tatimore nuk janë aksion kundër fermerëve, por një hap për ta formalizuar, forcuar dhe mbështetur sektorin bujqësor./ Dorina Azo

https://monitor.al/pa-autofature-ska-mall-nga-fermeri-tatimet-aksioni-po-forcon-kontrollin-ndaj-grumbulluesve/

https://monitor.al/tatimet-sqarojne-aksionin-ambulantet-skane-detyrim-per-fature-apo-dokumentacion-tatimor/

The post Qeveria, gati të rikthejë skemën e kompensimit të TVSH-së për fermerët, në nivelin 10% appeared first on Revista Monitor.

Shpenzimet e pushtetit vendor për 5-mujorin e parë 2025 evidentojnë zhvendosje të theksuar drejt shpenzimeve të personelit dhe tkurrje të mëtejshme të shpenzimeve kapitale në raport me shpenzime totale.

Personeli zuri 56% të shpenzimeve totale bashkiake në 5 mujorin 2025 nga 52% që zunë vitin e kaluar në këtë periudhë.

Të dhënat zyrtare nga Ministria e Financave tregojnë se shpenzimet për paga dhe kontributet shoqëruese arritën 16,454 milionë lekë, ose rreth 25% më shumë se një vit më parë.

Ndërkohë shpenzimet kapitale zunë 14% të shpenzimeve totale në 5-mujorin 2025 nga 16.6% në vitin 2024.

Shtimi me 25% i shpenzimeve të personelit në vitin 2025 erdhi nga rritja e pagave.

Në anën tjetër, shpenzimet kapitale, matësi kryesor i investimeve publike në infrastrukturë, shërbime dhe asete të reja, kanë mbetur praktikisht të pandryshuara në nivelin: 4,1 miliardë lekë milionë lekë, gati të njëjtin nivel si një vit më parë.

Ndërsa kostot e personelit kanë “ngrënë” një copë më të madhe të tortës së shpenzimeve, hapësira për projekte zhvillimi nuk është zgjeruar,  madje realisht është ngushtuar, po të llogariten edhe efektet e inflacionit.

Kontrasti midis ritmit të rritjes së pagave dhe ngrirjes së investimeve po ul produktivitetin e buxheteve vendore, ku shumica e fondeve po përdoren kryesisht për funksionimin e përditshëm, jo për rritje kapacitetesh apo përmirësim shërbimesh.

10 vite nga nisja e zbatimit të reformës territoriale, në vend që të rrisin shërbimet për qytetaret i kanë përkeqësuar ato. Kompetencat dhe territoret e bashkive janë zgjeruar dukshëm pas reformës territoriale të vitit 2015 dhe gjithashtu, edhe kapacitetet financiare.

Reforma shkriu 373 njësi vendore në 61 bashki, ndërkohë fondet  janë dyfishuar dhe pushteti i bashkive është i gjerë në komunitetet që drejtojnë, që nga strehimi e deri te kujdesi social, bujqësia, infrastruktura rurale dhe arsimi parashkollor, të cilat nëse zotërohen siç kërkojnë ligjet, ata mund të ndikojnë cilësinë e jetës, po aq edhe sa politikat e qeverisë qendrore.

Por në realitet, cilësia e shërbimeve, jo vetëm që nuk ka ndryshuar që nga reforma, por në shumicën e rasteve, kostoja e tyre është rritur, teksa rajonet e Shqipërisë po zbrazen nga popullsia dhe sidomos të rinjtë.

Komunitetet rurale po përballen me mungesa të mëdha në shërbime dhe në infrastrukturë, teksa bashkitë e vendit nuk janë të afta të zbatojnë dhe të realizojnë buxhetet e tyre të vogla karshi nevojave të mëdha.

BB: Reforma territoriale la fshatin pa shërbime dhe përkeqësoi cilësinë e tyre në qytet

Të dhënat zyrtare nga Ministria e Financave tregojnë se në 2024 pushteti vendor realizoi vetëm 43 për qind të programit të investimeve. Nga 46,3 miliardë lekë të planifikuara u investuan vetëm 19,9 miliardë lekë ose më pak se gjysma e programit./ B.Hoxha

Burimi: Ministria e Financave

The post Bashkitë rrisin shpenzimet e personelit, ulin investimet në 5-mujor appeared first on Revista Monitor.

Pas rreth dy muajsh  nga fatkeqësia e ndodhur në minierën e kromit në Katjel ku një punonjës humbi jetën, Ministria e Infrastrukturës dhe Energjisë ka vendosur që të revokojë lejen nën argumentin e kushteve teknike të rënduara.

Në një dokument të firmosur në fillim të këtij muaji por të bërë publik këto ditë ministria argumenton arsyet e këtij vendimi.

“Autoriteti Kombëtar për Sigurinë dhe Emergjencat në Miniera, me anë të shkresës Nr. 850 prot. AKSEM, datë 09.06.2025, protokolluar në Ministrinë e Infrastrukturës dhe Energjisë me Nr. 4146 Prot., datë 09.06.2025, është propozuar revokimi i Lejes Minerare të Shfrytëzimit Nr. 1335, datë 15.04.2009, për mineralin krom, në Objektin “Katjeli Jugor”, Bashkia e Përrenjasit, Qarku i Elbasanit, pas problematikave serioze të ndodhura kohët e fundit në objekt, si rezultat i përmbytjeve të nivelit Hz +428, i vetmi nivel në të cilin kryhet veprimtari minerare.

Pas disa inspektimeve të AKSEM në objekt, është vërejtur se kushtet teknike janë në gjendje të rënduar, me prani të shtuar të ujërave dhe llumrave, deformim të armaturave mbajtëse dhe kapacitet të tejmbushur të sistemit të pompimit, çka e bën të pamundur zhvillimin e veprimtarisë normale pa rrezik për jetën e punonjësve nga Hz +428 deri në nivelin e pusit Hz +655” thuhet në shkresë.

Lidhur me këtë vendim MIE ka kërkuar që në zbatim të Ligjit Nr.10304, datë 15.07.2010 “Për sektorin minerar në Republikën e Shqipërisë”, i ndryshuar, neni 49, pika 1, zotëruesi i lejes minerare në këtë rast Miniera e Kromit Katjel sh.p.k.  ka detyrimin të zbatojë planin përfundimtar të mbylljes së aktivitetit minerar, rehabilitimin e mjedisit për sipërfaqen e prekur nga aktiviteti minerar dhe planin e menaxhimit të mbetjeve minerare, të miratuar nga struktura përgjegjëse AKBN.

Vetëm këtë vit nga ana e ministrisë janë njoftuar 15 procedura për fillimin e revokimit të lejeve minerare ku arsyet janë nga më të ndryshme nga mungesa e aktivitetit minerar prej më shumë se një viti tek mosrespektimi i detyrimeve që lidhen me pagesën e garancisë./ N.Maho

The post MIE revokon lejen për minierën e kromit në Katjel, shkak kushtet teknike appeared first on Revista Monitor.

Aksioni i nisur nga administrata tatimore me fokus forcimin e kontrollit të shitjes me faturë të produkteve blegtorale nga fermerët drejt prodhuesve dhe përpunuesve, në disa tregje rajonale është shoqëruar edhe me kontroll të inspektorëve te tregtarët ambulante.

Përmes një njoftimi Tatimet bëjnë me dije se tregtarët ambulantë nuk kanë asnjë detyrim për të lëshuar faturë dhe për të mbajtur dokumentacion tatimor për mallrat.

“Administrata Tatimore informon opinionin publik dhe individët e regjistruar si “tregtarë ambulantë” se, bazuar në legjislacionin tatimor në fuqi, nuk kanë detyrim për të lëshuar faturë tatimore dhe as për të mbajtur dokumentacion tatimor për mallrat apo shërbimet që tregtojnë.

Ky përjashtim parashikohet në ligjin nr. 87/2019, “Për faturën dhe sistemin e monitorimit të qarkullimit”, i ndryshuar, konkretisht në nenin 5, pika 1, gërma c). Gjithashtu, ligji nr. 9920, datë 19.05.2008, “Për procedurat tatimore në Republikën e Shqipërisë”, i ndryshuar, në nenin 5, pika 1, gërma j), përcakton qartë statusin dhe kushtet e ushtrimit të aktivitetit të tregtarëve ambulantë.
Detyrimet e vetme të një tregtari ambulant janë:

• Të jetë mbi moshën 16 vjeç;
• Të jetë i vetëpunësuar dhe të mos punësojë persona të tjerë;
• Të tregtojë në hapësira publike me leje të lëshuar nga Bashkia përkatëse;
• Të jetë i regjistruar si ambulant pranë Drejtorisë Rajonale Tatimore;
• Të paguajë: Kontributet e sigurimeve shoqërore dhe shëndetësore; Tarifën për zënien e hapësirës publike; Taksat bashkiake të aplikueshme”.

Administrata Tatimore mbetet e angazhuar në krijimin e një klime besimi dhe bashkëpunimi me qytetarët, duke garantuar që çdo politikë tatimore të zbatohet në mënyrë të drejtë, transparente dhe të kuptueshme për të gjithë.

The post Tatimet sqarojnë aksionin: Ambulantët s’kanë detyrim për faturë apo dokumentacion tatimor appeared first on Revista Monitor.

Kërcënimi i Presidentit të SHBA-së Donald Trump për një tarifë 30% mbi importet e Bashkimit Europian po e ndërlikon vendimmarrjen e Bankës Qendrore Europiane, por nuk ka gjasa të prishë planet për një pauzë të uljes së normave javën e ardhshme, thanë pesë politikëbërës të Bankës Qendrore Europiane.

BQE sinjalizoi pas takimit të qershorit se ka të ngjarë t’i mbajë normat e interesit të pandryshuara më 23-24 korrik.

Por tarifa 30% e propozuar nga Trump është më e lartë se sa kishte parashikuar BQE-ja edhe në skenarin më negativ nga tre skenarët për ekonominë e Eurozonës që publikoi muajin e kaluar.

Kjo do të thotë që BQE-ja është detyruar të kryejë vlerësime të reja dhe tani politikëbërësit mendojnë për një rezultat më negativ sesa në qershor, thanë pesë burimet, të gjithë anëtarë të Këshillit Drejtues të BQE-së.

Ata thanë se guvernatorët ngurrojnë të veprojnë në bazë të asaj që është ende një kërcënim, megjithatë, veçanërisht duke pasur parasysh deklaratat ndonjëherë kontradiktore të bëra nga administrata e Trump, që nga njoftimi i tij i parë për tarifat globale në prill. Prandaj, çdo diskutim në lidhje me uljen e normave ka të ngjarë të mbahet për takimin e BQE-së në shtator.

Trump tha të dielën se tarifat e tij do të hyjnë në fuqi më 1 gusht, dhe Komisioni Europian gjithashtu ka ndaluar kundërmasat deri në atë datë.

Ekonomistët e tregut kanë thënë kryesisht se mendojnë se është e pamundur, që Trump të vazhdojë me kërcënimin e tij të tarifave për shkak të dëmit që do t’i shkaktonte ekonomisë amerikane në aspektin e inflacionit më të lartë dhe rritjes më të ulët.

Por nëse vendoset taksa 30%, ata presin që BQE të ulë normat e interesit.

Analistët e Barclays parashikuan një ulje të normës së depozitave të BQE-së në vetëm 1% deri në marsin e ardhshëm nga 2% aktual, nëse SHBA-të vendos një normë mesatare tarifore 35% për mallrat e BE-së, të cilën ata vlerësuan se do të zbriste 0.7 pikë përqindjeje nga rritja e Eurozonës.

Projeksionet më të fundit makroekonomike të BQE-së, të publikuara në qershor, vunë në dukje një rimëkëmbje graduale të ekonomisë së Eurozonës në vitet e ardhshme, me inflacionin që luhatet rreth objektivit 2%.

Këto projeksione supozonin si bazë një tarifë 10% mbi eksportet e mallrave të BE-së në SHBA, e cila do ta çonte rritjen ekonomike të Eurozonës në 0.9% këtë vit, 1.1% vitin e ardhshëm dhe 1.3% në vitin 2027.

Por parashikimet sipas një skenari alternativ të publikuar në të njëjtën kohë, treguan se një tarifë 20% e SHBA-së do të frenonte rritjen me 1 pikë përqindjeje gjatë së njëjtës periudhë dhe gjithashtu do të ulte inflacionin në 1.8% në vitin 2027, nga 2.0% në skenarin bazë. / Reuters

The post Tarifat e SHBA-së shtojnë presion mbi BQE-në në korrik, por nuk ndërpresin pauzën e uljes së normave appeared first on Revista Monitor.

Perspektiva për ekonomitë e Europës Lindore, të cilat për dekada kanë përfituar nga globalizimi, po përkeqësohet ndërsa Shtetet e Bashkuara rrisin tarifat, sipas Beata Javorcik, kryeekonomiste në Bankën Europiane për Rindërtim dhe Zhvillim.

Rajoni, që tashmë është kryesisht pjesë e Bashkimit Europian dhe i përfshirë në aleancën ushtarake të NATO-s, ka përfituar ndjeshëm duke përqafuar tregtinë e lirë pas rënies së komunizmit, veçanërisht në aspektin e transferimit të teknologjisë, që ka riformësuar ekonomitë e tij.

Tani, përpjekja e Presidentit të SHBA-së, Donald Trump, për të transformuar tregtinë globale pritet të përkeqësojë kushtet tregtare për ekonomitë – kryesisht të vogla dhe të hapura – të rajonit, tha Javorcik.

Tarifat e SHBA-së për vendet në të cilat BERZH ushtron aktivitet janë rritur në një mesatare 10%, nga më pak se 2%, me vendet eksportuese të makinave dhe pjesëve të këmbimit, si Sllovakia dhe Hungaria, që përballen me tarifa deri në 20%.

Sistemi tregtar i organizuar nga Organizata Botërore e Tregtisë mbrojti ekonomitë e vogla nga presioni i vendeve të mëdha. Ajo që po shohim është një erozion i rregullave globale të tregtisë dhe një zhvendosje drejt negociatave dypalëshe, që natyrisht do të thotë se vendet më të vogla kanë më pak fuqi negociuese.

Ndërsa Trump shpallte ultimatumet e tij të fundit tarifore, duke propozuar një normë 30% për Bashkimin Europian dhe Meksikën, modelet e BERZH-it parashikojnë që tarifat të mbeten në nivelet aktuale dhe se përbërja e eksporteve nuk do të ndryshojë si pasojë e luftës tregtare.

Banka parashikon një goditje 0.8% në produktin e brendshëm bruto të Sllovakisë dhe një ngadalësim shtesë 0.4% për ekonominë hungareze. Ndikimi i drejtpërdrejtë në vendet e tjera të rajonit është shumë më modest.

Ndikimi indirekt

Megjithatë, goditja indirekte pritet të jetë më e fortë, veçanërisht pasi Trump synon Gjermaninë, deri tani tregu më i madh i eksportit për shumicën e vendeve të Europës Lindore. Kjo pritet të ngadalësojë rritjen rajonale me një mesatare 0.8%, sipas Javorcik.

Lëvizjet e Trump- po injektojnë gjithashtu më shumë pasiguri politike sesa është vërejtur gjatë krizës financiare globale pothuajse dy dekada më parë. Kjo pasiguri po frenon vendimmarrjen për investime, ndërsa tkurrja potenciale e tregjeve të eksportit po zbeh gjithashtu stimujt për të rritur shpenzimet për kërkim dhe zhvillim.

“Tregjet në zhvillim do të vuajnë nëse globalizimi ndalon,” përfundoi ajo. / Bloomberg

The post BERZH: Tarifat e Trump godasin ekonomitë në zhvillim të Europës Lindore appeared first on Revista Monitor.

Mungesa e tualeteve publike në zona turistike është bërë shpesh objekt diskutimesh në forume të turistëve të huaj duke e sugjeruar këtë si diçka që institucionet duhet ta kenë parasysh.

Së fundmi duket se Bashkia Shkodër ka vendosur që të aplikojë marrjen me qira të tualeteve publikë që janë të lëvizshëm dhe që do të vendosen në zonën turistike.

Referuar procedurës së prokurimit të hapur nga Ndërmarrja e Shërbimeve dhe Punëve Publike në këtë bashki nënvizohet se sasia e kërkuar e këtyre tualeteve të jetë 12 copë ndërsa fondi limit 1.6 milionë lekë apo rreth 16 mijë euro.

“Ne funksion te mbrojtjes se mjedisit , si dhe te plotësimit me shërbime te turisteve vendas dhe te huaj, kërkohet përdorimi i tualeteve portative ne zonat turistike.

Përdorimi i këtyre tualeteve përveç konceptit te nevojës , shkojnë përtej, për përmasim i performances se shërbimeve ne zonat turistike”, thuhet në specifikimet e dokumenteve.

Ndërkaq nënvizohet se pastrimi i tualeteve do behet brenda te gjitha kushteve higjeno-sanitare nga subjekti fitues, 2 here ne jave, dite te premte dhe te hënë.

Ndërkohë Autoriteti kontraktor, merr përsipër pastrimin sipërfaqësor te tualeteve gjate gjithë javës.

Sipas dokumenteve afati për qiranë e këtyre strukturave të lëvizshme do të jetë për periudhën nga nënshkrimi i kontratës deri në fund të vitit 2025.

Mbeten të paqarta zonat turistike ku do të vendosen këto 12 tualete publike edhe pse Shkodra ka një sërë rajonesh ku fluksi turistik është i përqendruar duke nisur nga plazhet tek liqeni sitet kulturore apo pjesa qendrore e qytetit.

The post Tualete me qira për zonat turistike, tenderi i Bashkisë së Shkodrës appeared first on Revista Monitor.