Vlora këtë sezon ka pritur jo vetëm turistë vendas e të huaj, por edhe qindra emigrantë që rikthehen për pushime. Për ta, qyteti mbetet një nga vendet më të bukura, megjithëse çmimet i konsiderojnë të larta, të krahasueshme me ato të Europës apo Amerikës.

“Kisha dëgjuar për Parajsën… Parajsën e kam gjetur në Vlorë. Unë jam rritur këtu dhe është vendi më i bukur në botë. Ka shumë çmime që janë njëlloj. Karburanti madje është më lirë”, tregon për A2 CNN një i moshuar që vjen nga SHBA.

Ata vlerësojnë zhvillimin e qytetit, por kërkojnë zgjidhje për problemet e ujërave të zeza dhe menaxhimin e mbeturinave, ku fajësojnë edhe bizneset vendase.

Emigrantët, që jetojnë prej vitesh në Europë, Amerikë apo Australi, mbeten kontribuues për qytetin, por edhe kritikët më të mëdhenj, duke kërkuar zhvillim dhe përmirësim të mëtejshëm të Vlorës. m.p.

Një aksident rrugor është regjistruar këtë të premte në unazën lindore të qytetit të Fierit.

Sipas informacioneve paraprake, një automjet tip “Volswagen” është përplasur me një motoçikletë dhe si pasojë drejtuesi i këtij të fundit ka mbetur i plagosur.

Ai është transportuar menjëherë në Spitalin e Fiert, ku ndodhet nën kujdesin e mjekëve.

Ndërkohë, policia dhe grupi hetimor ndodhen në vendngjarje dhe po punojnë për zbardhjen e shkaqeve të aksidentit si dhe menaxhimin e trafikut.

Helidon Gjikoka, një biznesmen kontravers në jug të vendit, duhet të paguajë 113 milionë lekë për “beach bar-in” pa leje që kishte ndërtuar në zonën e Drimadhesit. I denoncuar nga banorët dhe familjarët e tij për grabitjen e pronave, drejtësia më në fund ka dhënë drejtësi.

Avokati Arben Llangozi tregon se beteja me këtë biznesmen ka nisur 5 vite më parë, në kohën e pandemisë kur klientët e tij kanë denoncuar zaptimin e tokave, ndërsa autoritetet lejuan ngritjen e lokalit buzë detit nga Helidon Gjikoka.

“Me këmbëngulje dhe përpjekje të mëdha kam dokumentuar çdo shkelje, duke bërë kallëzimet përkatëse pranë Policisë Himarë, madje edhe ndaj vetë policisë që, në vend që të ndëshkonte autorët e krimit, i mbrojti ata.

Gjatë kësaj periudhe janë depozituar 7 çështje penale lidhur me këtë shkelje, por Prokuroria e Vlorës e kthyer prej vitesh në një çerdhe korrupsioni u bë avokate mbrojtëse e një mafiozi, duke mos e vënë asnjëherë përpara drejtësisë autorin e krimit”, shkruan ai.

Avokati tregon se prej 5 vitesh, Prokuroria e Vlorës ka mbrojtur interesat e paligjshme të këtij individi, duke kërkuar pushimin e çështjeve. Me këmbëngulje të vazhdueshme, ai ka arritur t’a kthej dosjen disa herë për hetim, raporton Newsbomb.

Më në fund, dy ditë më parë fadromat e IKMT-së dhe Policia e Shtetit kanë zbarkuar në ambientet resortit “Amel Beach” dhe kanë rrafshuar godinën e ndërtuar pa leje dhe në tokën e personave të tjerë, zaptuar nga Helidon Gjikoka.

IKMT ka vlerësuar dëmin ndaj shtetit në shumën 113 milionë lekë, por dëmi real ndaj individit është shumë më i madh dhe i pallogaritshëm, thotë avokati Arben Llangozi.

Ai ka ndarë në llogarinë e tij dhe një video të një zonje 80 vjeçare, e cila rezulton të jetë pronare e vërtetë e tokës që i është grabitur nga ky biznesmen kontravers, të cilin avokati e quan “mafia e pronave”. m.p.

Presidenti i SHBA-së, Donald Trump i ka hequr mbrojtjen e Shërbimit Sekret ish-zëvendës presidents amerikane dhe rivales demokrate në zgjedhje, Kamala Harris. Vendimi u konfirmua nga një këshilltar i lartë i Harris.

“Ish-zëvendëspresidentja është mirënjohëse ndaj Shërbimit Sekret të Shteteve të Bashkuara për profesionalizmin, përkushtimin dhe angazhimin e palëkundur ndaj sigurisë”, tha këshilltari për NBC News.

Ish-presidentët marrin mbrojtje nga Shërbimi Sekret për jetën. Harris, si ish-zëvendës presidente, mori 6 muaj mbrojtjeje pas largimit nga detyra, sipas ligjit federal. Kjo periudhë përfundoi më 21 korrik. Megjithatë, mbrojtja e saj ishte zgjatur për një vit shtesë nëpërmjet një direktive, e papublikuar deri më tani, të nënshkruar nga Joe Biden pak para se të largohej nga detyra.

Kongresi miratoi legjislacionin në vitin 2008 që autorizoi Shërbimin Sekret të mbronte ish-nënkryetarët, bashkëshortët e tyre dhe fëmijët e tyre nën 16 vjeç deri në gjashtë muaj pas përfundimit të mandatit të nënpresidentit.

Mbarimi i mbrojtjes së Harris vjen ndërsa ajo së shpejti nis një turne në shumë qytete rreth publikimit të librit “107 Days”, i cili përmban kujtimet për fushatën presidenciale, dhe që do të publikohet më 23 shtator.

Turneu pritet ta rikthejë sërish ish zëvendës presidenten në qendër të vëmendjes së publikut që kur u largua nga detyra. m.p.

Një letër që mbante një zarf me tre plumba ka mbërritur në adresën e ministrit të Brendshëm serb, Ivica Daçiç. Zarfi iu dorëzua qeverisë serbe të enjten, dhe Ministria e Punëve të Brendshme njoftoi një ditë më vonë se policia kishte identifikuar dhe lokalizuar personin që e kishte dërguar paketën.

“Gjatë shpërndarjes së rregullt të postës në ndërtesën e Qeverisë së Republikës së Serbisë më 28 gusht 2025, u vu re një zarf i adresuar Zëvendëskryeministrit dhe Ministrit të Punëve të Brendshme Ivica Daçiç. Gjatë një skanimi sigurie të paketës duke përdorur një pajisje me rreze X, brenda zarfit u gjetën tre plumba”, tha MPB-ja.

Ata shtuan se u përcaktua që paketa ishte dërguar me postë më 26 gusht 2025, në një degë të Postës së Serbisë në Pozharevac, dhe se policia e ka identifikuar dhe lokalizuar dërguesin.

Për rastin ka reaguar edhe Presidenti serb Aleksandër Vuçiç, i cili tha sot se Daçiç e informoi se kishte marrë një pako që mbante tre plumba.

”Policia punon me njerëz të mrekullueshëm që luftojnë për këtë vend. Ivica më tregoi për ato tre plumba, është pjesë e punës së zakonshme, shpresoj se do të jenë në gjendje të përcaktojnë se kë mendon ai se është shumë i zgjuar”, iu përgjigj presidenti sot pyetjes së një gazetari, gjatë një vizite në familjen Vasiljević në Rakovica. m.p.

Prokuroria e Posaçme kundër Korrupsionit dhe Krimit të Organizuar pas përfundimit të hetimeve, më 29.08.2025 ka dërguar për gjykim në Gjykatën e Posaçme të Shkallës së Parë,  procedimin penal nr. 55/2019, në ngarkim të të pandehurve:

Ilir Meta, i akuzuar për kryerjen e veprave penale “Korrupsioni pasiv i funksionarëve të lartë shtetërore ose i të zgjedhurve vendorë” në 3 raste, dy prej të cilave të kryera në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim,“Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i çdo personi tjetër që ka detyrimin ligjor për deklarim”, parashikuar nga nenet 260 dhe 25, 287/2 dhe 257/a/2 të  Kodit Penal.

Monika Kryemadhi, e akuzuar për kryerjen e veprave penale  “Korrupsioni pasiv i funksionarëve të lartë shtetërore ose i të zgjedhurve vendorë” në dy raste të kryera në bashkëpunim,“Pastrimi i produkteve të veprës penale ose veprimtarisë kriminale” e kryer në bashkëpunim , “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i çdo personi tjetër që ka detyrimin ligjor për deklarim”, parashikuar nga nenet 260 dhe 25, 287/2 dhe 257/a/2 të Kodit Penal.

Pirro Xhixho, i akuzuar për kryerjen e veprës penale “Korrupsioni pasiv i funksionarëve të lartë shtetërore ose i të zgjedhurve vendorë” e kryer në bashkëpunim, parashikuar nga nenet 260 dhe 25 të Kodit Penal.

Ema Çoku, e akuzuar për kryerjen e veprës penale “Pastrimi i produkteve të veprës penale ose veprimtarisë kriminale” e kryer në bashkëpunim, parashikuar nga neni 287/2 i Kodit Penal.

Fatime Kryemadhi, e akuzuar për kryerjen e veprës penale “Pastrim i produkteve të veprës penale ose veprimtarisë kriminale” e kryer në bashkëpunim, parashikuar nga neni 287/2 i Kodit Penal./kb

Depozitat në euro rezultojnë të jenë rritur në mënyrë të konsiderueshme edhe për bizneset. Sipas të dhënave nga Banka e Shqipërisë, rreth 283 miliardë lekë ishin depozitat e bizneseve në banka gjatë korrikut, shifër kjo rreth 3.5% më e lartë se në muajin pararendës.

Të gjitha paratë që qytetarët dhe bizneset mbajnë në bankë, pra paratë në llogaritë bankare, në llogari kursimi, në depozita afatshkurtra ose afatgjata dhe të tjera llogariten si depozita të përfshira në paranë e gjerë.

Depozitat në lekë të bizneseve kapin një vlerë prej 116 miliardë lekësh, ndërsa ato në valutë kanë arritur në 166 miliardë lekë në korrik. Nëse bëjmë një krahasim me muajin qershor, kuptojmë që depozitat në lekë kanë pësuar një rritje me gati 3.3%, ndërsa ato në valutë janë rritur me 3.7%.

Ndërkohë, sipas statistikave të Bankës së Shqipërisë, depozitat e transferueshme, të cilat i referohen parave që ne mbajmë në llogaritë tona bankare, janë ato me shumën më të lartë, ndjekur nga depozitat e tjera dhe depozitat me likuiditet të lartë, pra ato pa afat.

Pjesa më e madhe e depozitave janë në Tiranë, pasi në këtë qark është përqendruar shumica e popullsisë dhe bizneseve.

Për sa i përket normave të interesit të depozitave në lek, ato kanë qenë në rënie të vazhdueshme në 2025. Pavarësisht se normat e interesit nuk kanë qenë shumë të favorshme dhe fitimi nga depozitat është më i vogël se më parë, kursimet e shqiptarëve në bankë kanë qenë sërish në rritje. Ndërkohë, normat e interesit për depozitat në euro mbeten më të ulëta se ato në lek./kb

Policia e Shtetit ka hapur aplikimet për pranim për 402 funksione të rolit bazë për të gjithë ata që kanë përfunduar arsimin e mesëm.

“Me urdhër të Drejtorit të Përgjithshëm janë miratuar 402 kuota të lira, nga këto 52 i takojnë konkurrentëve që janë shpallur fitues nga aplikimi i fundit dhe ishin në listë pritjeje, ndërsa 350 kuota i takojnë konkurrentëve të kësaj faze”, njoftoi policia.

Aplikimet janë të hapura nga data 1 Shtatori deri më datë 21 Shtator.

KRITERET PËR APLIKIM

Çdo shtetas që plotëson kriteret e mëposhtme, ka të drejtë të aplikojë pranë drejtorive vendore të Policisë ku ai ka vendbanimin e përhershëm:

•të jetë shtetas shqiptar;

•të jetë jo më shumë se 30 vjeç;

•të jetë me gjatësi jo më pak se 170 cm për meshkujt dhe jo më pak se 160 cm për femrat;

•të ketë përfunduar arsimin e mesëm (nuk përjashtohen shtetasit që kanë përfunduar arsimin e  lartë);

•të mos jetë i përjashtuar nga Policia e Shtetit, strukturat e tjera të sigurisë kombëtare apo të jetë larguar nga shërbimi civil;

•të ketë zotësi të plotë për të vepruar;

•të jetë në gjendje të mirë shëndetësore dhe i aftë fizikisht për të kryer detyrën;

•të mos jetë i dënuar me vendim gjykate, të formës së prerë, për kryerjen e një krimi apo për kryerjen e një kundërvajtjeje penale me dashje;

•të ketë dëshmi të aftësisë së drejtimit të automjetit të tipit B;

•të plotësojë kriteret e besueshmërisë dhe të integritetit.

DOKUMENTACIONI PËR APLIKIM

Shtetasit që shprehin dëshirën për t’u pranuar në Policinë e Shtetit, duhet të dorëzojnë pranë strukturave të Burimeve Njerëzore në drejtoritë vendore të Policisë, jo më vonë se data 21.09.2025, formularin e aplikimit të plotësuar, së bashku me dokumentacionin e mëposhtëm:

•formularin e vetëdeklarimit për punësim në strukturat e Policisë;

•formularin e dekriminalizimit;

•fotokopje të kartës së identitetit;

•diplomë të shoqëruar me listë notash, që vërteton përfundimin e arsimit të mesëm (të noterizuara);

•fotokopje të dëshmisë së aftësisë së drejtimit të automjetit të tipit “B”;

•certifikatë të gjendjes gjyqësore;

•certifikatë familjare;

•skedën mjekësore (formular tip);

•vërtetim nga gjykata që nuk është në gjykim për vepër penale;

•vërtetim nga prokuroria që nuk është në ndjekje penale;

•vërtetim nga SPAK, që nuk është objekt hetimi;

•mandat pagesën e tarifës së aplikimit, i cili merret në drejtorinë vendore të Policisë./kb

Disa militantë turq të ISIS-it kishin një plan për të vrarë Papa Françeskun gjatë vizitës së tij në Trieste më 7 korrik 2024. Këtë e zbulon një hetim i publikuar ekskluzivisht nga gazeta “Il Piccolo”.

Bergoglio kishte arritur në “kryeqytetin” e Friuli Venezia Giulia për të marrë pjesë në mbylljen e Javës së 50-të Sociale të Katolikëve në Itali. Në ditën para vizitës, në një valixhe të braktisur në barin e stacionit ishte gjetur një pistoletë.

Ky zbulim shkaktoi një seri kontrollesh, pasi disa elementë nxitën dyshimin se arma ishte vendosur qëllimisht për t’u gjetur më pas. Hetimet u thelluan edhe nga shërbimet e inteligjencës, të cilat nxorrën në pah një frazë që tashmë ishte në dokumente, mbi një “projekt të mundshëm atentati kundër Papës së Shenjtë”.

Interpoli, vazhdon hetimi i publikuar nga gazeta, ka arrestuar në Holandë një prej të dyshuarve, në një operacion të lidhur direkt me hetimet italiane: turkun Hasan Uzun, 46 vjeç, tani i mbajtur në burgun e Triestes në një qeli izolimi.

Atentati dyshohet se ishte planifikuar nga një organizatë turke e lidhur me ISIS K. Pas ekstradimit nga Holanda, Uzun qëndroi disa ditë në burg në Milano.

46-vjeçari dyshohet të ketë lidhje me pistoletën, ndoshta pasi e kishte transportuar fizikisht në stacion brenda valixhes.

Ende nuk dihet me saktësi se si është identifikuar, nëse përmes kamerave apo informacionit dhe treguesve të tjerë të inteligjencës.

Pistoleta është një armë automatike, Luger kalibri 9, e gjetur me një magazinë dhe 14 fishekë/kb

Një ngjarje e rëndë tronditi mbrëmë komunitetin sportiv turk, pasi presidenti i Klubit Sportiv Alemdağ, Tuncay Meriç, humbi jetën nga një sulm me armë zjarri në lagjen Çekmeköy të Stambollit, shkruan A2 CNN. Sipas raportimeve të mediave turke, incidenti ndodhi rreth orës 21:00 në një restorant të rrugës Tolgahan, në lagjen Güngören. Tuncay Meriç, 49 vjeç, po drekonte kur një person ende i paidentifikuar hyri brenda dhe e qëlloi në kokë me armë zjarri.

Pamjet e kamerave të sigurisë, të publikuara nga mediat lokale, tregojnë momentin e sulmit dhe panikun që shpërtheu mes të pranishmëve, të cilët u larguan me nxitim nga vendngjarja. Meriç u dërgua me urgjencë në spital, por pavarësisht përpjekjeve të mjekëve, ai nuk mundi të mbijetonte.

Hetimet fillestare sugjerojnë se motivi i vrasjes lidhet me çështje borxhi. Ndërkohë, policia e Stambollit ka nisur një hetim të gjerë dhe po shqyrton pamjet filmike për të identifikuar autorin, i cili ndodhet ende në arrati
Ngjarja ka shkaktuar reagime të shumta dhe ka tronditur botën e sportit turk, ku Tuncay Meriç njihej si një figurë e respektuar dhe e përkushtuar ndaj klubit të tij./kb

Një mundësi e rrallë u hap për Teheranin kur Franca, Gjermania dhe Mbretëria e Bashkuar tentuan një kompromis të fundit. Iniciativa dështoi. Mëngjesin e së enjtes së 28 gushtit, tri qeveritë i dërguan një letër Këshillit të OKB-së ku thanë se po përsërisnin sanksionet e pezulluara të marrëveshjes bërthamore të vitit 20015, shkruan L’Orient le Jour.

Zyrtarët europianë cituan dështimin e Teheranit në përmbushjen e detyrimeve të marrëveshjes si justifikimi kryesor. Këto shqetësime kryesisht përqendrohen te përshpejtimi i programit të pasurimit të uraniumit të Iranit, që sipas burimeve, ka arritur një pastërti prej 60% të stoqeve të mëdha dhe të paverifikuara të uraniumit të pasuruar. Mekanizimi i sanksioneve lejon rivendosjen e shpejtë të tyre nëse Irani cenon marrëveshjen.

Në 30 ditë, Irani do të ngrijë sërish asetet, vizat, do të ketë një embargo për armët konvencionale dhe kufizime në prodhimin e bombave. Kjo thekson një ndryshim të thellë në qëndrimin e Teheranit. Para luftës shkatërruese me Izraelin dhe sulmeve të SHBA-ve në qendrat nukleare, Republika Islamike ka treguar më shumë vullnet për të negociuar që të shmangë sanksionet. Sot, po kërcënon me “kundërmasa” dhe ngre mundësinë e tërheqjes nga regjimi global për mospërdorimin e armëve bërthamore.

Bisedimet e kësaj jave në Gjenevë e demonstruan. Sipas zyrtarëve europianë, negociatorët iranianë erdhën pa propozime konkrete. Tre shtetet kishin vendosur tre kushte: rifillimin e dialogut me Uashingtonin, zgjerimin e aksesit për inspektorët e IAEA dhe zbulimin e vendndodhjes të më shumë se 400 kilogramëve uranium të pasuruar që sipas agjencisë së OKB, është nën zotërimin e Iranit. Irani i refuzoi të treja opsionet. Duke refuzuar mbajtjen e hapur të komunikimit për të shmangur përshkallëzimin e ndëshkimit, Teherani duket gati për të përballuar koston ekonomike të sanksioneve të reja.

Republika Islamike lejoi kthimin e pjesshëm të inspektorëve të IAEA, por me kushte strikte. Ata do të monitorojnë zëvendësimin e karburantit në qendrën nukleare Bushehr, por nuk dihet nëse do të mund të hyjnë në vende të tjera si Fordoë dhe Natanz që u sulmuan nga SHBA-të gjatë luftës. Nga ana tjetër, kryenegociatori i Iranit, Abbas Araghchi sqaroi se “nuk është aprovuar asnjë shkresë finale për kornizat e reja të bashkëpunimit”, duke nënkuptuar se kjo mund të jetë një taktikë për të blerë më shumë kohë.

Përpara vendimit të Iranit, SHBA-të kishin vendosur sanksione të reja unilaterale për të ushtruar presion mbi eksportet e naftës iraniane. Në sytë e Teheranit, kjo konfirmon se ndëshkimet ekonomike do të zgjasin pavarësisht sjelljes së tij. Mosbesimi iranian u thellua pasi Uashingtoni mbështeti drejtpërdrejt sulmet izraelite në qendrat bërthamore.

Në këtë atmosferë të tensionuar, Izraeli ka kërcënuar me sulme të reja nëse Irani përpiqet të rijetëzojë programin bërthamor. Teherani nuk do një luftë tjetër, por po përgatitet për një konflikt të mundshëm. I bindur se s’mund t’u besojë më premtive të perëndimit, Irani po merr një qëndrim të përllogaritur mbrojtës: bashkëpunim minimal me IAEA, kërcënime se do të largohet nga marrëveshja bërthamore dhe një aleancë strategjike me Moskën e Pekinin. Europa shpreson që kërcënimi i sanksioneve do ta rikthejë Teheranin në tavolinë. Për momentin, shenjat tregojnë se Republika Islamike parapëlqen ta presë presionin sesa ta shmangë./kb

Aktor Naun Shundi, një nga emrat më të spikatur të skenës dhe ekranit shqiptar, u përkujtua me respekt dhe nderim nga aktori i njohur Bujar Asqeriu.

Ai e cilësoi Shundin si një figurë universale në artin shqiptar dhe një njeri modest.

“Sot është një dhimbje dhe trishtim i madh për të gjithë publikun shqiptar që e ndoqi me duartrokitje artin e tij. Nauni jo vetëm si artist universal, regjisor, aktor, dramaturg, por edhe si burrë fisnik që ishte ka lënë mbresa tek ne. Ishte nga këta artistët e mëdhenj, kokë ulur dhe modeste, që asnjëherë nuk i ra gjoksit që “jam unë”, por vepra e tij, puna dhe talenti i tij vlerësoheshin gjithandej.
Rruga e tij artistike është një rrugë që duhet ndjekur, sidomos nga të rinjtë, sepse ai la mesazhe paqe, dashuria dhe artistike në komunitetin artistik. I paharruar emri dhe puna e artistit të madh shqiptar Naun Shundi”, tha për gazetarët Asqeriu/kb

Nga ARTUR AJAZI

Prej 2013, nuk mbaj mënd që dikush nga opozita e kaluar dhe e tanishmja, të ketë thënë “jam dakort me ty Edi Rama”. Edhe pse Edi Rama, prej ditës së parë, zbatoi premtimet ë dhëna, duke i hyrë me fadroma pallateve dhe gjithçkaje të ngritur pa leje, edhe pse ai nisi ta kthejë përmbys shtetin e rrumpallës që gjeti, sërish opozita e kritikonte.

Opozita shpifte, akuzonte, denonconte, protestonte, dhunonte, dhe sërish nuk pranon se “Edi Rama e ka fituar bastin e tyre”. Shqipëria sot ka famën e saj në politikën e jashtme, në turizëm, në shtetbërje, në drejtësi, ligje, ekonomi, kulturë, sport, apo në ecurinë e saj drejt Bashkimit Europian. Shtetin nuk e bëjnë burokratët nga selia, nuk e bëjnë zyrtarucët nga godinat e vjetra, dhe nuk e bëjnë ata politikanë, që nuk kanë “1 ditë punë në bordero”, dhe njohin vetëm rryshfetin apo postin e përfituar nga fituesi i zgjedhjeve. Shtetin e bëjnë të vendosurit, “kokëderrat”, kurajozët, të guximshmit, vizionarët, konkuruesit, tolerantët. Shtetin e bën ligji i zbatueshëm për punëtorin, fshatarin, bujkun, zyrtarin, ministrin, kryeministrin dhe presidentin.

Shtetin e bën vetëdija për ndryshimin, dhe jo vegjetimin në pellgjet e qelbura. Edi Rama, vendosi dhe vazhdon të tregojë vendosmërinë e tij, se “shtetin do ta bëjmë me ligje të zbatueshme me çdo çmim”. Ai mbetet kryeministri më jetëgjatë i periudhës postkomuniste, dhe jo më kot. Tregoi se, e bëri Tiranën kryeqytet, nga pocaqi që ishte. Tregoi se bëri Shqipërinë me shtet sapo erdhi në pushtet, nga rrumpallë që ishte. Përmbysi mentalitete, shembi ngrehina dhe ngriti institucione me pamje dhe shije europiane. Mbi gjithçka, vuri zbatimin e ligjit.

Në rrugëtimin drejt një pushteti të drejtë dhe të suksesshëm, miku, shoku, farefisi, nuk duhet të jenë pjesë e një qeverisje të mire, kur ata vjedhin, abuzojnë, korruptohen, dhe shkelin ligjet. Në Bashkimin Europian, nuk të qasin me vese të ndyra dhe mentalitete province. Kur vjedh, kur pasurohesh shpesht e shpejt, dhe kur tenton ta shpërndash fajin tënd tek partia apo qeveria, atëhere ke shkelur 10 herë ligjet e vendit.

Gjithkush përgjigjet për vjedhjet dhe krimet e tij. Në BE, kush gabon dhe shkel ligjin, përgjigjet para tij deri në fund. Shtetin e bën ligji i zbatueshëm. Nuk mund të gjesh “strehë” tek zyra e kryeministrit (siç bëri për 21 Janarin Berisha me gardistët) apo tek partia, kur ti vjedh, kryen një krim, apo je i lidhur me trafikun e drogës. Ata që deri dje, ishin mësuar me trajtimin e zyrave, institucioneve dhe ligjit sikur të ishin “lecka pastrimi”, sot e kanë të pamundur të pranojnë ndryshimin rradikal të Edi Ramës. Ata egërsohen dhe shthuren në fjalor, kur mësojnë fatin e tyre politik dhe penal. Ky është shteti, dhe shtetin e bën zbatimi i ligjit. Kjo duhet pranuar nga të gjithë, ndryshe BE-ja do të na lërë edhe 35 vjet të tjera tek pragu i derës saj./kb

Zvicra mund të përballet me më shumë skena dhune javën e ardhshme pas dy netësh trazirash të dhunshme, që panë qindra të rinj të derdheshin në rrugë pas një vale vdekjesh të lidhura me policinë, që kulmoi me vdekjen e një adoleshenti emigrant në tentativë për t’iu ikur oficerëve.

Marvin M, një 17-vjeçar zviceran banor i Lozanës, po ikte nga policia me një skuter të vjedhur, kur goditi murin e një garazhi dhe vdiq rreth orës 3:45 të mëngjesit të së dielës, pavarësisht përpjekjeve për ta mbajtur në jetë nga shërbimet e emergjencës.

Të dielën dhe të hënën në mbrëmje, xhandarmëria u përlesh me protestuesit që hodhën kokteje molotov, ndërsa autoritetet përpiqeshin me dëshpërim të ndalonin dhunën në rritje.

Pjesa më e madhe e zemërimit erdhi nga një pikëpamje e hershme se policia në Lozanë është raciste sistematikisht kundër emigrantëve që janë vendosur atje.

Vdekja e Marvin ishte vdekja e tretë që përfshinte policinë në më pak se tre muaj në qytet, me shtatë në rajonin më të gjerë të Vaud që nga viti 2016. Pesë nga këto vdekje ishin burra me origjinë nga Afrika.

Ky zemërim u nxit vetëm pasi raportet e gazetave zbuluan se katër oficerë u pezulluan pas zbulimit të mesazheve raciste, seksiste dhe diskriminuese në grupet private të WhatsApp.

Por Sandro Cattacin, një profesor i sociologjisë në Universitetin e Gjenevës, i tha Daily Mail se ai beson se Zvicra, e cila zakonisht shihet si një dritë stabiliteti në kontinent, do të shohë më shumë dhunë në ditët në vijim.

Cattacin paralajmëroi se grupet e presionit mund t’i shohin trazirat si një shans për t’u kapur dhe për të shkaktuar dhunën e tyre. “Pres që të kemi trazira përsëri javën tjetër. Tani keni këto grupe të tjera, njerëz të lidhur me pozicione më agresive antikapitaliste, të cilët thonë: ‘Në rregull, ky është momenti kur mund të kemi trazira’”.

Cattacin tha se kishte folur me burime të punonjësve socialë në terren në Lozanë, të cilët i kishin përcjellë frikën e tyre për dhunë të mëtejshme.

“Nëse ata mbërrijnë fundjavën, atëherë trazirat do të jenë më brutale, dhe nga policia përgjigja do të jetë më e dhunshme“, shtoi profesori.

Ai shtoi se e vetmja mënyrë për të zhdukur zemërimin që ndjen shoqëria ishte të hapej një dialog midis policisë dhe grupeve të margjinalizuara.

“Pyetja tani është: ‘A është policia në gjendje të ndërhyjë me kujdes, duke u përpjekur të kufizojë dëmet dhe duke u përpjekur në çdo rast të fillojë një diskutimme këta të rinj?’“./kb

Këshilli i Lartë i Prokurorisë cakton datën 1 shtator si ditën kur anëtarët do mblidhen për të deklaruar mbarimin e mandatit të drejtoreshës së BKH Aida Hajna.

Anëtarët e KLP, siç raportohet nga media, do të mblidhen këtë të hënë në orën 11 për të vendosur lirimin nga detyra të drejtoreshës së Byrosë Kombëtare të Hetimit që sipas ligjit i mbaron mandati pesë vjeçar në 31 gusht.

Më herët gazetarja e Top Channel, Anila Hoxha, ka raportuar se procesi për përzgjedhjen e drejtorit të ri ka ngecur dhe se gjetja mes kandidatëve e shefit të ri të BKH nuk la gjasa të kryhet brenda afateve të caktuara nga ligji, pasi Komisioni i Posaçëm i Verifikimit të Posaçëm të Figurës dhe Pasurisë nuk ka nisur ende kontrollin e shtatë kandidatëve, që do të thotë ende nuk janë përcjellë shkresat drejt shërbimit sekret dhe institucioneve të tjera të ngarkuara me ligj, që do të japin përgjigje për figurën e garuesve.

Dhe për të kontrolluar pasuritë e tyre bazuar mbi deklaratat që pretendentët Gledis Nano, Gentian Ndoj, Elton Kërluku ,Andi Pogace, Gentian Shehu, Artur Beu, Joni Keta i kanë dorëzuar pranë ILDKPI.

Nga përfundimi i testeve (datë 28 korrik) me një komision të posaçëm të përzgjedhjes (tre prokurorë që udhëhoqën këtë gare), tashmë komisioni i dytë duhet të kryejë vlerësimet e mëtejshme. Në përmbajtje të tij janë një gjyqtar antikorrupsion, dy prokurorë të SPAK, dhe dy hetues të BKH , njëri siç përmend ligji vjen nga seksioni financiar dhe ai ishte Z.Elton Kërluku. Por hetuesi rezulton të ketë dhënë dorëheqjen nga komisioni i kontrollit, mbasi si një aspirant për drejtimin e BKH nuk mund të kontrolloje veten dhe 6 konkurrentët e tjerë.

Ishte reagimi i vonuar i KLP në ngërçin Hajnaj dhe beteja që ajo pati prej muajit dhjetor 2024 në një letërkëmbim të gjatë që ekspozoi krizën e komunikimit brenda strukturës së posaçme.

Po ashtu gara u çel me vonesë, por edhe kur u mbyll zyrtarisht afati për dorëzimin e dokumenteve të të interesuarve, u shty me kohë shtesë të pajustifikuar dhe përtej protokollit./tch

Katër muaj pas përfundimit të zgjedhjeve të 11 majit, e ngarkuara me punë e SHBA-së, Nancy Vanhorn ka shkuar paraditen e së premtes në kryeministri. Diplomatja amerikane qëndroi në godinën qeveritare përreth 20 minuta.

Vizita e saj vjen një ditë pasi Komisioni Rregullator shpalli rezultatin përfundimtar të zgjedhjeve duke certifikuar 11 majin.

Vizita vjen gjithashtu në një kohë kur Rama pritet që të shpallë kabinetin e ri qeveritar. 11 shtatori përflitet si datë për mbajtjen e Asamblesë së PS-së, ku pritet të njoftohen emrat e rinj të qeverisë./kb

Ministrat e Mbrojtjes dhe të Jashtëm të BE takohen në Kopenhagen. Çfarë është e gatshme të ofrojë Evropa për të mbrojtur Ukrainën?

Këto javë janë periudhë ulje-ngritjesh për evropianët. Njëherë ata lihen mënjanë dhe as nuk merren në konsideratë, kur Presidenti i SHBA-së, Donald Trump negocion me kreun e Kremlinit, Vladimir Putin. Pastaj befas ata vendosen në qendër të vëmendjes, sepse marrëveshja e supozuar duhet të mbështetet ushtarakisht, domethënë, të ofrojnë garanci sigurie për Ukrainën: Madje edhe me trupa tokësore të vendosura jo shumë larg fushave të betejës ukrainase e kryesisht pa mbështetjen e SHBA-së. Trump mund të përfytyrojë vetë të ofrojë pak mbështetje nga ajri, si u tha, pavarësisht se është e paqartë, ç’do të thotë kjo në rast krize.

Që pas samiteve në Alaska dhe Uashington dhjetë ditë më parë po spekulohet rreth garancive të sigurisë pë Ukrainën, edhe pse armëpushimi që evropianët supozohet të garantojnë deri më tani nuk është arritur. E madje as që duket në horizont. Megjithatë, ministrat e Mbrojtjes dhe të Jashtëm të BE do të duhet të adresojnë këtë çështje mjaft delikate në takimin e tyre në Kopenhagen (29.08.) ./kb

Homazhet në nder të aktorit të njohur Naun Shundin do të mbahen ditën e sotme. Mësohet se ceremonia e homazheve do mbahet tek ArtTurbina, rreth orës 10:30-12:00. Shundi vuante prej kohësh nga një sëmundje e rëndë.

Artisti u dërgua për trajtim të specializuar në një spital në Francë, por kostot e larta financiare detyruan familjarët që të kërkojnë ndihmë. Më pas ai u rikthye në Shqipëri, ku vijoi trajtimin mjekësor në QSUT, shpenzimet e së cilës u mbuluan nga ministria e Shëndetësisë

Naun Shundi është një nga figurat më të vlerësuara të skenës shqiptare, me kontribute të shumta në teatër dhe dramaturgji, si dhe themelues i një hapësire të veçantë kulturore përmes teatrit të tij./kb

Ministria e Mbrojtjes njofton se, sipas të dhënave të Qendrës Kombëtare Operacionale të Emergjencave Civile (QKOEC) në AKMC, gjatë 24 orëve të fundit janë evidentuar gjithsej 26 vatra zjarri, prej të cilave: 21 vatra janë shuar, 4 vatra vijojnë aktive ndërsa 1 vatër është në monitorim.

Ministria thotë se është bërë izolimi i plotë dhe shuarja e zjarreve në: Havalehas (Kuçovë), Krutje (Lushnjë), Rubjek (Shijak), Lagjja nr.10 (Korçë), Drobonik (Berat), Kotë (Selenicë), Kameras (Durrës), Martalloz (Memaliaj), Stadiumi dhe puset e naftës (Kuçovë), Fushë Milot (Kurbin), “Gjëmbi” (Selenicë), Lanabreges (Tiranë), Bogovë (Skrapar), Durisht (Tiranë), Barbullush (Vau Dejës), Bogiç-Palvar (Malësi e Madhe), Katundi i Ri (Durrës), Mjull Bathore (Tiranë), Hamallaj (Durrës), Parku Natyror Gërmenj (Kolonjë), si dhe midis fshatrave Nivicë, Salari e Dhëmblan (Tepelenë).

Aktualisht vijojnë të jenë aktive 4 vatra zjarri: Në fshatin Pezë Helmës, bashkia Tiranë, ku janë të pranishme disa vatra të izoluara që po mbahen në monitorim nga zjarrfikësit. Në fshatin Fage, bashkia Tiranë, ku zjarri është aktiv dhe në monitorim nga zjarrfikësit, forcat bashkiake dhe vullnetarët. Në fshatin Miras, bashkia Devoll, ku ka prani tymi në disa zona dhe rreth 100 forca janë angazhuar për shuarjen e flakëve. Në lagjen Boje, bashkia Krujë, ku dy vatra po përfshijnë sipërfaqe pyjore me pisha në zonë të mbrojtur./kb